အခန်း (၂၇၃-၂၇၄)
Vol. 20 Ch. 273-274
အခန်း ( ၂၇၃ ) - အဆင်သင့်ပြင်ထား၊ ချီလျန်နယ်မြေထဲ ဝင်ခြင်း၊ ချီမုန် လာကြိုပါလိမ့်မယ်
ချီလျန်နတ်ဆိုးနယ်မြေနှင့် ရွှမ်ယိုနတ်ဆိုးနယ်မြေတို့သည်... နယ်နိမိတ်ချင်း ထိစပ်နေခြင်း မရှိသော်လည်း... ၎င်းနယ်မြေနှစ်ခုကြားတွင် အပြန်အလှန် ဆက်သွယ်ထားသော... ပို့ဆောင်ရေးအစီအရင်များ ရှိလေသည်။
ချီမုန်၏ ယခင်သတင်းပို့ချက်အရ... ကုချန်သည် ဤပို့ဆောင်ရေးအစီအရင် တည်ရှိရာနေရာကို လျင်မြန်စွာ ရှာတွေ့ခဲ့ပြီး... ယင်းမှတဆင့် ရွှမ်ယိုနတ်ဆိုးနယ်မြေမှ ထွက်ခွာကာ... ချီလျန်နတ်ဆိုးနယ်မြေသို့ ရောက်ရှိလာခဲ့သည်။
ချီလျန်နတ်ဆိုးနယ်မြေသို့ ရောက်ရှိလာသည်နှင့်... ကုချန်သည် သူ၏နတ်ဘုရားအာရုံကို အနည်းငယ် ဖြန့်ကျက်လိုက်ရုံဖြင့်... ဤနယ်မြေ၏ အခြေအနေအသေးစိတ်ကို... အကြမ်းဖျင်း နားလည်သွားခဲ့သည်။
ဤနေရာသည် ရွှမ်ယိုနတ်ဆိုးနယ်မြေထက် ပိုမိုကျယ်ဝန်းသော နတ်ဆိုးနယ်မြေတစ်ခု ဖြစ်သည်။
ထို့အပြင်... ကမ္ဘာလောကအတွင်း ပျံ့နှံ့နေသော စိတ်ဝိညာဉ်ချီများသည်... ရွှမ်ယိုနတ်ဆိုးနယ်မြေထက် အဆင့်များစွာ မြင့်မားနေရာ... နတ်ဆိုးနယ်မြေတစ်ခုလုံး၏ အဆင့်အတန်းသည်... ရွှမ်ယိုနတ်ဆိုးနယ်မြေထက် များစွာသာလွန်ကြောင်း ညွှန်ပြနေပြီး... ရှားပါးသော မင်္ဂလာမြေတစ်ခု ဖြစ်ပေသည်။
ဤအချက်ကပင်... ချီလျန်မျိုးနွယ်၏ အခြေအနေမှာ... အဘယ်ကြောင့် ဤမျှ ခက်ခဲနေရသည်ကို... ကုချန်အား နားလည်သွားစေခဲ့သည်။
မိမိတို့မျိုးနွယ်တူ မဟုတ်လျှင် စိတ်သဘောထားလည်း ကွဲပြားမည်မှာ မလွဲဧကန်ပင်။
ဤသည်မှာ ထာဝရအမှန်တရားတစ်ခု ဖြစ်သည်။
ချီလျန်မျိုးနွယ်သည်... သစ္စာဖောက်ကာ နတ်ဆိုးနယ်မြေသို့ ဝင်ရောက်လာကြသော်လည်း... သူတို့သည် နတ်ဆိုးနယ်မြေ၏ မူလဒေသခံ သတ္တဝါများ မဟုတ်ကြပေ။
ပြင်ပမှ ဝင်ရောက်လာသော လက်နက်ချအညံ့ခံသည့် မျိုးနွယ်စုတစ်ခုသည်... အခြားနတ်ဆိုးနယ်မြေများအား မနာလိုဝန်တိုခြင်း မဖြစ်စေဘဲ... ဤမျှ မြေသြဇာကောင်းမွန်သော နယ်မြေကို... မည်သို့ သိမ်းပိုက်ထားနိုင်ပါမည်နည်း။
ယခင်က ချီလျန်မျိုးနွယ်၏ ဘိုးဘေးသည်... အင်မော်တယ်ဘုရင် အဆင့်သို့ ချိုးဖျက်ဝင်ရောက်ရန် အမြဲတစေ ကြိုးပမ်းနေခဲ့ပြီး... ရှီမိုအရှင်သခင်အား ခြိမ်းခြောက်လုနီးပါး ဖြစ်ခဲ့ရာ... ရှီမိုကောင်းကင်အောက်ရှိ နတ်ဆိုးနယ်မြေ ရာပေါင်းများစွာသည်... ချီလျန်မျိုးနွယ်အပေါ် ကောင်းသောအမြင် မရှိကြသည်မှာ သဘာဝပင် ဖြစ်သည်။
ရွှမ်ယိုနတ်ဆိုးနယ်မြေကဲ့သို့သော နယ်မြေများစွာကပင်... ချီလျန်မျိုးနွယ်ကို တိတ်တဆိတ် ပစ်မှတ်ထားခဲ့ကြသဖြင့်... သူတို့၏ တိုးတက်မှုကို ခက်ခဲစေခဲ့သည်။
ဤအခြေအနေများအောက်တွင်... ချီလျန်မျိုးနွယ်၏ ဘိုးဘေး ကျဆုံးသွားပြီဖြစ်၍... ရှီမိုအရှင်သခင်အတွက် မည်သည့် ခြိမ်းခြောက်မှုမျှ မရှိတော့သော်လည်း.....
ရှီမိုကောင်းကင်အောက်ရှိ နတ်ဆိုးနယ်မြေ ရာပေါင်းများစွာ၏ ချီလျန်မျိုးနွယ်အပေါ် ပစ်မှတ်ထားမှုသည် ရပ်တန့်သွားမည် မဟုတ်ပေ။
ရှီမိုအရှင်သခင်၏ မျက်လုံးထဲတွင်... ချီလျန်မျိုးနွယ်ဘိုးဘေး၏ ခြိမ်းခြောက်မှုကသာ... ကြောက်ရွံ့ကောင်း ကြောက်ရွံ့ထိုက်ပေလိမ့်မည်။ ကျန်သောအရာများသည် ထည့်သွင်းစဉ်းစားရန်ပင် မတန်ပေ။
သို့သော်... ရွှမ်ယိုနတ်ဆိုးနယ်မြေကဲ့သို့သော နတ်ဆိုးနယ်မြေအသီးသီး၏ မျက်လုံးထဲတွင်မူ... သူတို့ လိုချင်မက်မောနေသည်မှာ ချီလျန်မျိုးနွယ် သိမ်းပိုက်ထားသော... မြေသြဇာကောင်းမွန်သည့် နယ်မြေပင် ဖြစ်သည်။
ဤအချက်ကို နားလည်ပြီးနောက်... ချီလျန်မျိုးနွယ်၏ ခေါင်းဆောင်ဖြစ်သူ... စစ်မှန်သော အင်မော်တယ် အဆင့်ရှိ ချီလျိုသည်... သူ့ကို မြင်လိုက်သည်နှင့် သစ္စာဆိုရန်... အဘယ်ကြောင့် ဤမျှ စိတ်အားထက်သန်နေရသည်ကို... ကုချန် သဘောပေါက်သွားခဲ့သည်။
ရိုးရိုးရှင်းရှင်း ပြောရလျှင်... ချီလျန်မျိုးနွယ်သည် လမ်းဆုံးသို့... ရောက်နေပြီ ဖြစ်သည်။ အကယ်၍... အခြေအနေကို ဖောက်ထွက်ရန် နည်းလမ်းမရှိပါက... သူတို့သည် မကြာမီ အခြားနတ်ဆိုးနယ်မြေများ၏ ဝါးမြိုခြင်းကို ခံရကာ... အရိုးတစ်စပင် ကျန်ရစ်မည် မဟုတ်ပေ။
ထို့ကြောင့်... ချီလျိုသည် သူ၏မျှော်လင့်ချက်အားလုံးကို ကုချန်အပေါ် ပုံအပ်ထားခြင်းဖြစ်ပြီး... သူသည် ချီလျန်မျိုးနွယ်တစ်ခုလုံးကို ဦးဆောင်လျက်... ဤကြပ်တည်းသော အခြေအနေမှ ဖောက်ထွက်ကာ... ဘဝသစ်တစ်ခု ရှာဖွေပေးနိုင်ရန် မျှော်လင့်နေခြင်း ဖြစ်သည်။
ဤအရာကို တွေးမိသောအခါ ကုချန်၏ စိတ်နှလုံး လှုပ်ရှားသွားသည်။
အမှန်တကယ်တွင် ကောင်းကင်သတ္တု သုံးခုကို ရယူခြင်းအပြင် သူ ယခုတစ်ကြိမ် ချီလျန်မျိုးနွယ်ထံ လာရောက်ရခြင်း၏ ရည်ရွယ်ချက်မှာ ချီလျန်မျိုးနွယ်တစ်ခုလုံး၏ သစ္စာရှိမှုကို အတည်ပြုရန်လည်း ဖြစ်သည်။
ချီလျိုနှင့် ချီမုန် သားအမိနှစ်ယောက်သည် သူတို့၏လုပ်ရပ်များဖြင့် သစ္စာရှိမှုကို သက်သေပြပြီး ဖြစ်သည်။
သို့သော် ချီလျန်မျိုးနွယ်ကမူ မပြရသေးပေ။
မျိုးနွယ်စုခေါင်းဆောင် ချီလျိုအနေဖြင့်... အကြွင်းမဲ့ အာဏာကို ကိုင်စွဲထားနိုင်သော်လည်း... မျိုးနွယ်စုအတွင်း သူ့ကို ဆန့်ကျင်သော သဘောထားကွဲလွဲမှုများ ရှိနေမည်ကို... ကုချန် ကောင်းစွာ သိရှိထားသည်။
ယခု... ကုချန် အတည်ပြုရန် လိုအပ်သည်မှာ... ချီလျန်မျိုးနွယ်သည် သူ့အပေါ်... အမှန်တကယ် သစ္စာရှိမရှိ ဆိုသည်ကိုပင်။
ဤအချက်ကို အတည်ပြုပြီးမှသာ ကုချန်သည် ချီလျန်မျိုးနွယ်မှ ပေးပို့သော သတင်းအချက်အလက်များကို သံသယမရှိ ယုံကြည်နိုင်မည် ဖြစ်သည်။
ဤအရာကို စစ်ဆေးရန် ကုချန်သည် စောစီးစွာကပင် စီစဉ်ထားပြီး ဖြစ်သည်။ ယခု သူလုပ်ရန် လိုအပ်သည်မှာ တိတ်ဆိတ်စွာ စောင့်ဆိုင်းနေရန်သာ။
ဤသို့ တွေးတောရင်း ကုချန်၏နှုတ်ခမ်းထောင့်တွင် အပြုံးရေးရေးလေး ပေါ်လာ၏။
စိတ်အာရုံတစ်ခု လှုပ်ရှားလိုက်သည်နှင့် သူသည် သိမ်မွေ့သော ချိတ်ဆက်မှုကို အသုံးပြုကာ ချီမုန်ကို ဆင့်ခေါ်လိုက်လေသည်။
" ဝုန်း! "
လေဟာနယ်သည် လှိုင်းထသွားကာ ကျက်သရေရှိသော ပုံရိပ်တစ်ခုသည် ကုချန်၏ရှေ့တွင် ဖြည်းညှင်းစွာ ပေါ်လာ၏။
" သခင်! "
ကုချန်၏ဆင့်ခေါ်မှုကို လက်ခံရရှိသည်နှင့်... ချီမုန်သည် တစ်ခဏမျှ တုံ့ဆိုင်းမနေရဲဘဲ... သူ၏ နတ်ဘုရားအာရုံ တစ်စွန်းတစ်စကို အလျင်အမြန် ပုံဖော်ကာ... ကုချန်၏ရှေ့တွင် လေးစားစွာ ဒူးထောက်လိုက်၏။
သို့သော်... အကြောင်းရင်း တစ်စုံတစ်ရာကြောင့်... သူ့သခင်၏ လက်ရှိအခြေအနေသည် အနည်းငယ် ထူးခြားနေသည်ဟု... ချီမုန် ခံစားလိုက်ရသည်။
ယခင်က သူ၏သခင်သည်... အထွတ်အထိပ် အင်မော်တယ်ချီ အရိပ်အငွေ့များ ရောယှက်နေသော... အေးစက်သည့် ခံစားမှုကို ပေးစွမ်းခဲ့သော်လည်း... ယခုအခါ သူ၏သခင်ထံမှ သိမ်မွေ့သော်လည်း လွှမ်းမိုးနိုင်စွမ်းရှိသော နတ်ဆိုးအလိုဆန္ဒကို... ဖျော့တော့စွာ အာရုံခံမိနေသည်။
ဒါ ဘယ်လိုလုပ် ဖြစ်နိုင်မှာလဲ.....
သူ၏သခင်သည် အဆုံးမဲ့ကမ္ဘာမှ ဖြစ်သည်။ အနာဂတ်တွင် အဆင့်တက်လှမ်းမည်ဆိုလျှင်ပင်... အင်မော်တယ်နယ်မြေသို့ တက်လှမ်းကာ... အင်မော်တယ်နယ်မြေ၏ တာအိုလမ်းစဉ်ကို ရေးထိုးရမည် ဖြစ်သည်။ သူသည် အဘယ်ကြောင့် နတ်ဆိုးနယ်မြေရှိ သတ္တဝါများကဲ့သို့... ကြောက်မက်ဖွယ် နတ်ဆိုးမီးတောက်များ ရှိနေရသနည်း.....
ချီမုန်သည်... တွေးတောလျက် စိတ်ရှုပ်ထွေးနေမိသော်လည်း... သူ၏ခေါင်းကို လေးစားစွာ ငုံ့ထားကာ... ကုချန်ကို မော့မကြည့်ရဲပေ။
သူ၏ရှေ့တွင် လေးစားစွာ ဒူးထောက်နေသော ချီမုန်ကိုကြည့်လျက် ကုချန်သည် အေးစက်စွာ ပြောကြားလိုက်သည်။
" ငါ မကြာခင် ချီလျန်မျိုးနွယ်ဆီ ရောက်တော့မယ်... ပြင်ဆင်စရာရှိတာ ပြင်ဆင်ပြီး ထွက်ကြိုလိုက် "
ထိုစကားကို ကြားသောအခါ... အတွေးလွန်နေသော ချီမုန်သည် ချက်ချင်း ထိတ်လန့်သွားကာ... ကုချန်အား မော့ကြည့်မိလိုက်သည်။
သူ့သခင်က အခု ဘာပြောလိုက်တာလဲ.....
သူ မကြာခင် ချီလျန်မျိုးနွယ်ဆီ ရောက်တော့မယ်လို့ ပြောလိုက်တာလား.....
ဒါ... ဘယ်လိုလုပ် ဖြစ်နိုင်မှာလဲ.....
ချီမုန်သည် အနည်းငယ် ဇဝေဇဝါ ဖြစ်သွား၏။
ယခင်က... ကုချန်သည် နတ်ဆိုးနယ်မြေထဲသို့ ဝင်ရောက်ပြီး... ချီလျန်မျိုးနွယ်ထံမှ ကောင်းကင်သတ္တုသုံးခုကို... ကိုယ်တိုင် လာယူမည်ဟု ပြောစဉ်က... ချီမုန်သည် မဖြစ်နိုင်ဟု ထင်မှတ်ခဲ့သည်။
အင်မော်တယ်နယ်မြေနှင့် ဟွမ်သွမ့်ပင်လယ် ကြားတွင်... ဘုံနှစ်ခုကြား ချောက်နက်ရှိပြီး အင်မော်တယ်အဆင့်အောက်ရှိ... ဖြစ်တည်မှုများသာ ဖြတ်သန်းခွင့် ရှိသည်။ သူ၏ သခင်သည် ဘုံနှစ်ခုကြားမှ ချောက်နက်ကို ဖြတ်ကျော်ကာ... နတ်ဆိုးနယ်မြေထဲသို့ မည်သို့ ဝင်ရောက်လာနိုင်မည်နည်း။
သူ၏သခင်တွင်... နည်းလမ်းရှိ၍ ဝင်ရောက်လာနိုင်သည် ဆိုလျှင်ပင်... နတ်ဆိုးနယ်မြေအတွင်း လှုပ်ရှားသွားလာရန်... အလွန် ခက်ခဲပေလိမ့်မည်။
အဘယ်ကြောင့်ဆိုသော်... နတ်ဆိုးနယ်မြေ၏ ကောင်းကင်အလိုဆန္ဒသည်... နတ်ဆိုးနယ်မြေနှင့် မသက်ဆိုင်သော သတ္တဝါအားလုံးကို... ဖိနှိပ်ထားမည် ဖြစ်သောကြောင့်ပင်။ အဆုံးမဲ့ကမ္ဘာမှ ဖြစ်သော သူ၏သခင်သည်... နတ်ဆိုးနယ်မြေ၏ ကောင်းကင်အလိုဆန္ဒ ဖိနှိပ်မှုကို မလွဲမသွေ ခံရမည်ဖြစ်ပြီး... သူ၏ တိုက်ခိုက်နိုင်စွမ်းသည် ဆယ်ပုံ ပုံ တစ်ပုံ၊ နှစ်ပုံလောက်ပင် ထုတ်ဖော်နိုင်မည် မဟုတ်ချေ။
သူ့သခင်၏ ဉာဏ်ပညာဖြင့် ဤကဲ့သို့ စွန့်စားမှုကို မပြုလုပ်သင့်ဟု ချီမုန် ခံစားမိသည်။
ထို့ကြောင့်... ပြီးခဲ့သည့် ရက်အနည်းငယ်အတွင်း သူသည် ကုချန်၏ဆင့်ခေါ်မှုကို စောင့်ဆိုင်းနေပြီး... ကောင်းကင်သတ္တုသုံးခုကို ကုချန်ထံ ပေးအပ်ရန်အတွက်... နတ်ဆိုးနယ်မြေမှ အချိန်မရွေး ထွက်ခွာနိုင်ရန်... ပြင်ဆင်ထားခဲ့သည်။
သို့သော် ယခု သူ၏သခင်သည် ချီလျန်မျိုးနွယ်ထံ မကြာခင် ရောက်တော့မည်ဟု ပြောကြားနေသည်။
ဒါက.....
ချီမုန် ဇဝေဇဝါ ဖြစ်နေဆဲအချိန်တွင် ကုချန်သည် ပြုံးလျက် ပတ်ဝန်းကျင်ရှုခင်းကို ညွှန်ပြကာ တည်ငြိမ်စွာ ပြောကြားလိုက်သည်။
" ကြည့်စမ်း... ဒီနေရာက ဘယ်နေရာလဲ..... "
ချီမုန်သည် ကုချန် ညွှန်ပြရာသို့ အလိုအလျောက် ကြည့်လိုက်ရာ သူ၏ရှေ့ရှိ မြင်ကွင်းသည် ပို၍ ပို၍ ရင်းနှီးနေသည်ကို တွေ့လိုက်ရသည်။
ဒါ... ဒါ ချီလျန်နတ်ဆိုးနယ်မြေ မဟုတ်ပါလော။
ချီမုန်သည် အလွန်ပင် တုန်လှုပ်သွား၏။
ပတ်ဝန်းကျင် ရှုခင်းသည် အတုအယောင် မဟုတ်ပေ။ သူ၏သခင်သည် ချီလျန်နတ်ဆိုးနယ်မြေသို့ အမှန်တကယ် ရောက်ရှိနေပြီ ဖြစ်သည်။
ချီမုန်၏ စိတ်အာရုံများသည် ရှုပ်ထွေးသွား၏။ ဤအရာအားလုံးကို သူ လုံးဝ မျှော်လင့်မထားခဲ့ပေ။
သို့သော် ခေတ္တမျှ အံ့အားသင့်ပြီးနောက် သူသည် စိတ်ကို အလျင်အမြန် ပြန်လည် တည်ငြိမ်အောင် ထားလိုက်၏။
သူ၏သခင်သည် ချီလျန်နတ်ဆိုးနယ်မြေသို့ မည်သို့ ရောက်လာသည်ဖြစ်စေ... သူ၏ လက်ရှိဦးစားပေးမှာ သခင့်ကို ကာကွယ်ရန်အတွက်... ချီလျန်မျိုးနွယ်ထံ အမြန်ဆုံး ခေါ်ဆောင်သွားရန်ပင် ဖြစ်သည်။
ဟုတ်တယ်... ကာကွယ်ဖို့ပဲ.....
နတ်ဆိုးနယ်မြေ၏ အပြင်ဘက်တွင် ကုချန်၏ တိုက်ခိုက်နိုင်စွမ်းကို ချီမုန် မော့ကြည့်ရုံသာ တတ်နိုင်ပေသည်။
သို့သော် ဤနေရာသည် နတ်ဆိုးနယ်မြေ ဖြစ်သည်။
သူ့သခင်၏ စွမ်းအားသည် သူ့ထက်ပင် ပိုမို အားနည်းသွားသည်အထိ ဖိနှိပ်ခံထားရနိုင်သည်။
အကယ်၍... အန္တရာယ် တစ်စုံတစ်ရာ ကြုံတွေ့ရပါက... ပြန်လည် တိုက်ခိုက်ရန် အခွင့်အရေးပင်... ရရှိချင်မှ ရရှိပေလိမ့်မည်။ သူနှင့် သူ၏ မိခင်တို့သည်... ချီလျန်မျိုးနွယ်၏ အနာဂတ်တစ်ခုလုံးကို သခင့်အပေါ် ပုံအောထားပြီးဖြစ်ရာ... သခင့်၏ လုံခြုံရေးနှင့် ပတ်သက်၍ မည်သို့ ပေါ့ဆခံနိုင်ပါမည်နည်း။
" ချီမုန် အခုချက်ချင်း လာခဲ့ပါ့မယ်... ကျေးဇူးပြုပြီး စောင့်နေပေးပါ သခင် "
ဤစကားကို ကပျာကယာ ပြောပြီးနောက်... ချီမုန်၏ ပုံရိပ်သည် ချက်ချင်းပင်... ပျောက်ကွယ်သွားတော့သည်။
အခန်း ( ၂၇၄ ) - ရေအောက်လှိုင်းစီးကြောင်းများ၊ အမျိုးသမီးသီးသန့်၊ အင်မော်တယ်ရွှေအား လက်ဝယ်ပိုင်ဆိုင်ခြင်း
ချီမုန်၏ ကပျာကယာ ထွက်ခွာသွားမှုကို ကြည့်ရင်း... ကုချန်သည် အစပိုင်းတွင် အနည်းငယ် ကြောင်အမ်းအမ်း ဖြစ်သွားသော်လည်း... မကြာမီပင် ချီမုန်၏အတွေးကို နားလည်သွားရသည်။
ချီမုန်သည် သူ့အား အထင်လွဲသွားပုံရသည်။
သို့သော်... သူသည် ရှင်းပြချက် တစ်စုံတစ်ရာ မပေးခဲ့ဘဲ... ဖြစ်ပျက်နေသည်များကို ပြုံး၍သာ ကြည့်နေလိုက်သည်။
ဒါလည်း ကောင်းပါတယ်.....
ဤသည်မှာ သူတို့အရှင်သခင်၏ စွမ်းအား အားနည်းနေချိန်တွင်... ချီလျန်မျိုးနွယ်သည် သစ္စာရှိရှိ ကာကွယ်ပေးဦးမည်လော ဆိုသည်ကို... စောင့်ကြည့်ရန် အခွင့်အရေးကောင်းပင်။
ကုချန်သည် တိတ်ဆိတ်စွာ ရပ်နေလိုက်၏။
ဆယ့်ငါးမိနစ်ပင် မပြည့်မီတွင်... မိုးကုပ်စက်ဝိုင်းဆီမှ အနီရောင် ပုံရိပ်တစ်ခု ရုတ်တရက် ပေါ်ထွက်လာကာ... သူ၏ရှေ့သို့ ဆင်းသက်လာသည်။
" ချီမုန် သခင့်ကို ဂါရဝပြုပါတယ် "
ရောက်လာသူမှာ အမှန်ပင် ချီမုန် ဖြစ်သည်။ သူသည်... ကုချန်ကို သိမ်မွေ့စွာ ဂါရဝပြုလိုက်ပြီးနောက်... ပတ်ဝန်းကျင်ကို သတိကြီးစွာဖြင့် စူးစမ်းကြည့်ရှုလိုက်သည်။ စွမ်းအားကြီး ကျွမ်းကျင်သူတစ်ဦး ပေါ်ထွက်လာကာ... ကုချန်၏ လုံခြုံရေးကို ခြိမ်းခြောက်မည်ကို စိုးရိမ်နေပုံရသည်။
" ဒီချီလျန်နတ်ဆိုးနယ်မြေက မင်းတို့ ချီလျန်မျိုးနွယ်ရဲ့ နယ်မြေ မဟုတ်လား... ဘာလို့ ဒီလောက်တောင် သတိထားနေရတာလဲ "
ကုချန်သည် အနည်းငယ် ရယ်မောလိုက်၏။
မည်သို့ပင်ဆိုစေကာမူ ချီလျန်နတ်ဆိုးနယ်မြေသည် ချီလျန်မျိုးနွယ်၏ အမာခံစခန်း ဖြစ်သည်။ ချီမုန်၏ လက်ရှိတုံ့ပြန်ပုံအရ ဤချီလျန်နတ်ဆိုးနယ်မြေသည်ပင် မလုံခြုံတော့သည့် ပုံစံ ပေါက်နေသည်။
" သခင် မသိလို့ပါ... ကျွန်မတို့ ချီလျန်မျိုးနွယ်ရဲ့ ချီရှောင်ဘိုးဘေးကျဆုံးသွားတဲ့ သတင်း ပျံ့နှံ့သွားကတည်းက... နတ်ဆိုးနယ်မြေများစွာက ကျွန်မတို့ရဲ့ နယ်မြေကို မျက်စိကျနေကြပြီး ဝါးမြိုချင်နေကြတာပါ.....
ဒါကြောင့်... ဒီရက်ပိုင်း ချီလျန်နတ်ဆိုးနယ်မြေက သိပ်ပြီး အေးချမ်းမနေပါဘူး "
ချီမုန်သည် ရှက်ရွံ့သည့်လေသံဖြင့် ပြန်ဖြေလိုက်၏။
လက်ရှိ ချီလျန်မျိုးနွယ်၏ အခြေအနေမှာ အမှန်တကယ်ပင် ခက်ခဲနေသည်။
ချီရှောင်ဘိုးဘေး၏ အကာအကွယ် မရှိတော့သဖြင့်... စွမ်းအားကြီးသော နတ်ဆိုးနယ်မြေများ လှုပ်ရှားလာကြသည်သာမက... ရွှမ်ယိုနတ်ဆိုးနယ်မြေ ကဲ့သို့သော အားနည်းသည့် နယ်မြေများကပင်... မသင့်လျော်သော အတွေးများ ဝင်လာကာ အမြတ်အစွန်း ခွဲဝေယူချင်နေကြသည်။
ဤအခြေအနေများအောက်တွင်... ချီလျန်နတ်ဆိုးနယ်မြေသည် အပေါ်ယံတွင် တည်ငြိမ်နေပုံရသော်လည်း... လက်တွေ့တွင်မူ ရေအောက်လှိုင်းစီးကြောင်းများ ထန်နေပြီး... အန္တရာယ်များနှင့် ပြည့်နှက်နေသည်။
ထို့ကြောင့်... ချီမုန်သည် ကုချန်၏ လုံခြုံရေးကို စိုးရိမ်ကာ... သူ့အား စောင့်ရှောက်ရန်... အလျင်အမြန် ရောက်လာခြင်း ဖြစ်သည်။
" အော်... အဲ့ဒီလိုကိုး "
ကုချန်သည် ခေါင်းအနည်းငယ် ညိတ်လိုက်ကာ ဘာမှထပ်မပြောတော့ဘဲ လမ်းပြရန်သာ ချီမုန်ကို အချက်ပြလိုက်သည်။
" အရှင်...ကျေးဇူးပြုပြီး ခွင့်လွှတ်ပေးပါ... အမေက အရှင့်အတွက်... စတုတ္ထမြောက် ကောင်းကင်သတ္တုကို ရယူဖို့ ကြိုးစားနေတာကြောင့်... ကိုယ်တိုင်လာပြီး မကြိုဆိုနိုင်တာပါ "
ချီမုန်သည် လမ်းပြရင်း တိုးညှင်းစွာ ရှင်းပြလိုက်သည်။
လက်ရှိ... ချီလျန်မျိုးနွယ် ပိုင်ဆိုင်ထားသော ကောင်းကင်သတ္တုသုံးခုအနက် တစ်ခုမှာ... ချီလျန်မျိုးနွယ်၏ မူလရတနာဖြစ်ပြီး တစ်ခုမှာ အခြားနတ်ဆိုးနယ်မြေများထံမှ... လဲလှယ်ရယူထားခြင်း ဖြစ်သည်။ ကျန်တစ်ခုကိုမူ... ချီလျို ကိုယ်တိုင် မျိုးနွယ်စု ကျွမ်းကျင်သူများကို ဦးဆောင်ကာ... အန္တရာယ်များသော နေရာမှ ရှာဖွေတွေ့ရှိခဲ့ခြင်း ဖြစ်သည်။
ချီလျိုသည် မျိုးနွယ်စုခေါင်းဆောင် ဖြစ်သော်ငြားလည်း... ဤကောင်းကင်သတ္တုသုံးခုကို ရရှိရန် အလွန်ပင် ကြိုးစားအားထုတ်ခဲ့ရကာ... မျိုးနွယ်စုအတွင်း ခုခံမှုများနှင့် မနည်းပင် ရင်ဆိုင်ခဲ့ရသည်ဟု ဆိုနိုင်သည်။
အဘယ်ကြောင့်ဆိုသော်... အမှန်တရားကို မသိကြသော ချီလျန်မျိုးနွယ် ကျွမ်းကျင်သူများသည်... ချီလျိုမှ အကျိုးသင့်အကြောင်းသင့် မရှိဘဲ လုပ်ဆောင်နေသည်ဟု... ခံစားနေကြရသောကြောင့်ပင်။
ချီလျန်မျိုးနွယ်၏ လက်ရှိအခြေအနေမှာ မည်သို့ရှိနေသလဲ... မျိုးနွယ်စုခေါင်းဆောင် ဖြစ်ပါလျက်နှင့် ချီလျိုသည်... ချီလျန်မျိုးနွယ်ကို ဤကြပ်တည်းမှုမှ မည်သို့ ဆွဲထုတ်ရမည်ကို မစဉ်းစားဘဲ... ကောင်းကင်သတ္တု ဆိုသည်များကိုသာ လိုက်ရှာနေသည်။
ကောင်းကင်သတ္တုတွေ ဘယ်လောက်ပဲ များများ... ချီလျန်မျိုးနွယ်ကို လက်ရှိအခြေအနေဆိုးကနေ လွတ်မြောက်အောင်... ကူညီပေးနိုင်မှာတဲ့လား။
ချီလျို၏ ဂုဏ်သတင်းသာ မြင့်မားခြင်း မရှိလျှင်... သူသည် မျိုးနွယ်စု ကျွမ်းကျင်သူများ၏ ဝိုင်းဝန်းဆန့်ကျင်မှုကို ခံရသည်မှာ... ကြာပေပြီ။
သို့သော် ချီမုန်သည် ဤအကြောင်းများကို ကုချန်အား ထုတ်မပြောခဲ့ပေ။
အရှင်သည် သူ့အမိန့်၏ရလဒ်ကိုသာ လိုချင်ကာ... မည်သို့ လုပ်ဆောင်ရမည် ဆိုသည်မှာ... ချီလျိုနှင့် ချီလျန်မျိုးနွယ်၏ ကိစ္စသာဖြစ်ကြောင်း... သူကောင်းစွာ သိသည်။
သူ၏မိခင်သည်... ချီလျန်မျိုးနွယ် တစ်ခုလုံးသည် အရှင့် စေခိုင်းရာ ဖြစ်စေရမည်ဟု... ကြွားလုံးထုတ်ထားပြီး ဖြစ်သည်။ ယခုမှ... တစ်စုံတစ်ရာ အမှားအယွင်း ဖြစ်သွားပါက... အရှင်သည် ချီလျန်မျိုးနွယ်ကို မည်သို့ ယုံကြည်တော့မည်နည်း။
မကြာမီ ချီမုန်၏လမ်းပြမှုဖြင့် ကုချန်သည် ချီလျန်မျိုးနွယ်ဘိုးဘေးနယ်မြေသို့ လျင်မြန်စွာ ရောက်ရှိလာခဲ့သည်။
ချီလျန်မျိုးနွယ်ဘိုးဘေးနယ်မြေသည်... ရွှမ်ယိုနန်းတော်ထက် များစွာ ပိုမို ခမ်းနားထည်ဝါကြောင်း... ထင်ရှားလှသည်။
အစိမ်းရောင် စကပ်ဝတ်ဆင်ထားကာ... မျက်နှာတွင် ကြက်သွေးရောင် နတ်ဆိုးအမှတ်အသားများ ပါရှိသော... အမျိုးသမီးနှစ်ဦးသည် ပတ်ဝန်းကျင်ကို အာရုံစိုက်ကာ... ကင်းလှည့်နေကြသည်။ သူတို့နှစ်ဦးစလုံးသည် သူတော်စင်အဆင့် ကျင့်ကြံခြင်းအဆင့်ကို ပိုင်ဆိုင်ထားကြ၏။
" သခင်မလေးကို ဂါရဝပြုပါတယ် "
ထိုနှစ်ဦးသည် ချီမုန်ကို မြင်လိုက်သည်နှင့် အလိုအလျောက် ဦးညွှတ်လိုက်ကြသည်။
သို့သော်... ချီမုန်၏နောက်မှ ကုချန်ကို မြင်လိုက်ရသောအခါ... သူတို့သည် အံ့အားသင့်သွားကြကာ... ချက်ချင်းပင် သတိဝင်လာကြသည်။
" သခင်မလေး... ဒါက..... "
ဘိုးဘေးနယ်မြေကို စောင့်ကြပ်နေသော... ဤသူတော်စင်အဆင့် ချီလျန်မျိုးနွယ်ဝင် နှစ်ဦးသည်... အလွန် ဇဝေဇဝါ ဖြစ်သွားကြ၏။ ဤမျှ ထိရှလွယ်သော အချိန်ကာလတွင်... ချီမုန်သည် ပြင်ပလူတစ်ဦးကို ဘိုးဘေးနယ်မြေထဲသို့ အဘယ်ကြောင့် ခေါ်ဆောင်လာသည်ကို... သူတို့ နားမလည်နိုင်ပေ။
ဒီလူက ဘယ်သူလဲ.....
" မသိသင့်တာကို မမေးနဲ့... ဒါက ငါတို့ ချီလျန်မျိုးနွယ်ရဲ့ ဧည့်သည်တော်ပဲ "
ချီမုန်သည်... ဘိုးဘေးနယ်မြေတွင် တာဝန်ကျနေသော ဤမျိုးနွယ်ဝင်နှစ်ဦးကို... ကုချန်၏ အခြေအနေမှန်အား ထုတ်မပြောဘဲ... ဝါးတားတားသာ ပြောဆိုလိုက်သည်။
မည်သို့ပင်ဆိုစေ... သူ၏မိခင်သည် ကုချန်၏တည်ရှိမှုကို ချီလျန်မျိုးနွယ်အား အသိပေးရန် အစီအစဉ် မရှိသေးသဖြင့်... ချီမုန်သည် 'ဧည့်သည်တော်' ဟူသော အသုံးအနှုန်းကိုသာ... အစားထိုး သုံးစွဲလိုက်ခြင်း ဖြစ်သည်။
ဧည့်သည်တော်.....
ချီမုန်၏ရှင်းပြချက်ကို ကြားသောအခါ... ထိုသူတော်စင်အဆင့် ချီလျန်မျိုးနွယ်ဝင် နှစ်ဦးသည်.. မကျေနပ်ချက် အနည်းငယ် ရှိနေသေးသော်လည်း ချီမုန်၏ အဆင့်အတန်းကြောင့်... ဆက်မမေးရဲတော့ပေ။ သူတို့သည် လေးစားစွာ လမ်းဖယ်ပေးလိုက်ပြီး... ချီမုန်နှင့် ကုချန်အား ဝင်ခွင့်ပြုလိုက်သည်။
ကုချန်သည်... ချီလျန်မျိုးနွယ်ဘိုးဘေးနယ်မြေထဲသို့ ဝင်ရောက်ပြီးနောက်... ချီလျန်မျိုးနွယ်ဝင် အမျိုးသမီး အများအပြားကို... ဆက်တိုက် တွေ့မြင်လိုက်ရသည်။ အားလုံးသည် ကျော့ရှင်းသော ကိုယ်ခန္ဓာနှင့် လှပသော ရုပ်သွင်ပြင်များ ရှိကြ၏။
ဤအချက်သည် သူ့အား စိတ်ဝင်စားသွားစေကာ ချက်ချင်းပင် မေးမြန်းလိုက်မိသည်။
" ဘာလို့ ဒီချီလျန်မျိုးနွယ်မှာ အမျိုးသမီးတွေချည်းပဲ ရှိနေရတာလဲ..... "
လမ်းတစ်လျှောက်တွင်... သူသည် ချီလျန်မျိုးနွယ်ဝင် အမျိုးသမီး ဆယ်ဦးမက တွေ့ခဲ့ရသော်လည်း... အမျိုးသား တစ်ဦးတစ်လေမျှ မတွေ့ရခြင်းဖြစ်ရာ... ကုချန်ကို စူးစမ်းလိုစိတ်နှင့် ဇဝေဇဝါ ဖြစ်စေသည်မှာ သဘာဝပင်။
" သခင့်ကို ပြန်လည်တင်ပြရရင်... ချီလျန်မျိုးနွယ်ဝင် အားလုံးက အမျိုးသမီးတွေပါ... အမျိုးသား မရှိပါဘူး "
ချီမုန်သည် တိုးညှင်းစွာ ပြန်လည်ဖြေဆို၏။
အမျိုးသား မရှိဘူး.....
ကုချန်သည် အံ့အားသင့်သွားပြီးနောက်... သူတွေ့ခဲ့ရသော ချီလျန်မျိုးနွယ်ဝင် အားလုံးမှ သူ့အား... ထူးဆန်းသော အကြည့်ဖြင့် ကြည့်နေခဲ့ကြသည်ကို... သတိရလိုက်သည်။
ထိုစဉ်က သူနားမလည်ခဲ့ဘဲ ချီမုန်နှင့်အတူ ပါလာသောကြောင့်ဟုသာ ထင်မှတ်ခဲ့သည်။
တကယ်တော့ ဒီချီလျန်မျိုးနွယ်မှာ အမျိုးသား လုံးဝ မရှိတာကိုး.....
" ကျွန်မတို့ ချီလျန်မျိုးနွယ်က သာမန်မျိုးနွယ်တွေနဲ့ မတူပါဘူး... ယောက်ျားတွေနဲ့ ပေါင်းစပ်စရာ မလိုဘဲ... မျိုးဆက်ပွားနိုင်ပါတယ် "
ချီမုန်၏မျက်နှာမှာ အနည်းငယ် ရဲသွားသော်လည်း ကုချန်ကို ဆက်လက် ရှင်းပြလိုက်သည်။
" ချီလျန်မျိုးနွယ်ရဲ့ မျိုးနွယ်စု ပါရမီတစ်ခုက... မျိုးနွယ်ဝင်တွေ အရွယ်ရောက်လာရင် သူတို့ရဲ့ နတ်ဘုရားဝိညာဉ်နဲ့ အသားစိုင်တချို့ကို ခွဲထုတ်ပြီး... ကိုယ်ခန္ဓာထဲမှာ သွေးသားရင်းချာ မျိုးဆက်ကို ပြုစုပျိုးထောင်နိုင်တာပါ.....
အမေက ကျွန်မကို မွေးဖွားဖို့ ဒီနည်းလမ်းကို သုံးခဲ့တာပါ "
ချီမုန်၏ရှင်းပြချက်ကို နားထောင်ပြီးနောက် ကုချန်သည် နောက်ဆုံးတွင် နားလည်သွား၏။
ချီလျန်မျိုးနွယ်တစ်ခုလုံးတွင် အမျိုးသမီးများသာရှိပြီး အမျိုးသားမျိုးနွယ်ဝင် တစ်ဦးမျှ မရှိခြင်းမှာ မဆန်းတော့ပေ။
ဒီမျိုးနွယ်စုက သူတို့ဘာသာသူတို့ မျိုးဆက်ပွားနိုင်တာကိုး.....
ကုချန်၏အကြည့်များ သူ၏အပေါ် ရောက်ရှိလာသည်ကို မြင်သောအခါ... ချီမုန်၏စိတ်ထဲတွင် ရှက်ရွံ့မှုများ ပိုမို တိုးပွားလာကာ ထူးဆန်းသော စိတ်အလိုတစ်ခုကြောင့်... ထပ်မံပြောဆိုလိုက်မိသည်။
" ဒါပေမယ့် တစ်ခြားဖြစ်တည်မှုတွေနဲ့ ပေါင်းဖက်ရင်လဲ... ချီလျန်မျိုးနွယ်ဝင်တွေက မျိုးဆက်ပွားနိုင်ပါတယ်..... "
ထိုသို့ ပြောပြီးသည်နှင့်... မပြောသင့်သည်ကို ပြောမိလိုက်ကြောင်း... ချီမုန် သတိထားမိသွားပုံရသည်။ သူ၏နှုတ်ခမ်းကို တင်းတင်းစေ့လိုက်လျက်... ခေါင်းငုံ့ကာ ဆက်လက် လမ်းပြနေလိုက်သည်။
အရပ်မျက်နှာ အသီးသီးမှ လာသော.. အံ့ဩထိတ်လန့်နေသည့် အကြည့်များကို လျစ်လျူရှုရင်း.....
ချီမုန်သည် ကုချန်ကို ချီလျန်မျိုးနွယ်၏ နက်ရှိုင်းသော လျှို့ဝှက်နေရာတစ်ခုသို့ လျင်မြန်စွာ ခေါ်ဆောင်သွားခဲ့သည်။
ထို့နောက် သူသည် ကောင်းကင်သတ္တု သုံးခုလုံးကို လေးစားစွာ ထုတ်ယူကာ ကုချန်၏ရှေ့တွင် ဆက်သလိုက်၏။
" အရှင်... ကောင်းကင်သတ္တု သုံးခုလုံး ဒီမှာပါ... လက်ခံပေးပါ "