အခန်း (၂၇၅-၂၇၆)
Vol. 20 Ch. 275-276
အခန်း ( ၂၇၅ ) - သစ္စာဖောက်ရခြင်းအကြောင်းရင်း၊ ကပ်ဘေးနှင့် ကိုယ်ကျိုးစီးပွါး
ကုချန်သည် ချီမုန် ဆက်သလာသည့် ကောင်းကင်သတ္တုသုံးတုံးအား ငြင်းပယ်ခြင်းမရှိဘဲ သူ၏အိတ်ကပ်ထဲသို့ တိုက်ရိုက် ထည့်လိုက်သည်။
ကုချန်မှ... ကောင်းကင်သတ္တုများအား ပြတ်သားစွာ လက်ခံလိုက်သည်ကို မြင်လိုက်ရသောအခါ... ချီမုန်သည် အကြောင်းပြချက်မရှိ စိတ်သက်သာရာရကာ... သက်ပြင်းချလိုက်မိသည်။
မည်သို့ပင်ဆိုစေကာမူ... သခင်သည် ချီလျန်မျိုးနွယ်၏ ဆက်သမှုကို မည်သည့်သံသယမျှမရှိဘဲ... လက်ခံလိုက်ပြီဖြစ်သည်။ ဆိုလိုသည်မှာ... နောင်တွင် ချီလျန်မျိုးနွယ်၌ မည်သို့သောကိစ္စများ ဖြစ်ပျက်စေကာမူ... သခင့်ထံမှ ကာကွယ်စောင့်ရှောက်မှုကို ရရှိတော့မည်ပင် ဖြစ်သည်။
" စကားမစပ်... မင်းတို့ ချီလျန်မျိုးနွယ်က အင်မော်တယ်နယ်မြေကနေ... ဘာလို့ ပုန်ကန်ထွက်ပြေးလာရတာလဲဆိုတာ... ဒီအရှင် မသိသေးဘူး "
ကုချန်သည် ကောင်းကင်သတ္တုများကို လက်ခံပြီးနောက်... အကန့်အသတ်မဲ့ဓားအား ချက်ချင်း သန့်စင်ခြင်းမပြုသေးဘဲ... ချီလျန်မျိုးနွယ် အင်မော်တယ်နယ်မြေမှ ပုန်ကန်ထွက်ပြေးလာရသည့် အကြောင်းရင်းကို... ပေါ့ပါးစွာ မေးမြန်းလိုက်သည်။
ချီမုန်၏ ယခင်ပြောပြချက်အရ... လွန်ခဲ့သည့် မရေမတွက်နိုင်သော နှစ်ပေါင်းများစွာကာလများက... ချီလျန်မျိုးနွယ်သည် အင်မော်တယ်နယ်မြေအတွင်းရှိ မျိုးနွယ်တစ်ခုဖြစ်ခဲ့သည်။
နောက်ပိုင်းတွင်... အကြောင်းအရာတစ်ခုခုကြောင့် အင်မော်တယ်နယ်မြေကို ပုန်ကန်ပြီး... နတ်ဆိုးနယ်မြေသို့ ဝင်ရောက်ပူးပေါင်းခဲ့ကြခြင်း ဖြစ်သည်။
ကုချန်သည်... ထိုစဉ်က အဖြစ်အပျက်နှင့် ပတ်သက်၍... အလွန်စူးစမ်းချင်နေမိသည်။ ချီလျန်မျိုးနွယ်တစ်ခုလုံး ကြီးမားသော ပေးဆပ်မှုဖြင့်... အင်မော်တယ်နယ်မြေအား ပုန်ကန်ခဲ့ရသည်အထိ... မည်သည့်အရာများ ဖြစ်ပျက်ခဲ့သနည်း။
" သခင့်ကို ပြန်လျှောက်တင်ရရင်တော့... ဒီကိစ္စက ပြောမယ်ဆိုရင် ပုံပြင်ရှည်တစ်ပုဒ်လိုပါပဲ... ချီမုန်တောင်မှ အကြမ်းဖျင်းလောက်ပဲ သိထားတာပါ "
ကုချန်၏မေးခွန်းကို ကြားလိုက်ရသောအခါ ချီမုန်၏မျက်နှာတွင် ခါးသီးသော အပြုံးတစ်ခု ပေါ်လာခဲ့သည်။
" ကျွန်မတို့ ချီလျန်မျိုးနွယ်တစ်ခုလုံးက... အမျိုးသမီးတွေချည်းပဲ ဖွဲ့စည်းထားတာကို သခင် မြင်ပြီးသားဖြစ်မှာပါ... အဲ့ဒီတုန်းက အင်မော်တယ်နယ်မြေက... ကျွန်မတို့မျိုးနွယ်ကို လက်မခံနိုင်ခဲ့တာကလဲ ဒီအကြောင်းပြချက်ကြောင့်ပါပဲ..... "
ချီလျန်မျိုးနွယ်တွင် အမျိုးသမီးများသာ ရှိနေခြင်းနှင့်... အင်မော်တယ်နယ်မြေမှ လက်မခံနိုင်ခြင်းတို့မှာ... မည်သို့ ပတ်သက်ဆက်နွယ်နေသနည်း။
ကုချန်သည် မျက်ခုံးအနည်းငယ် ပင့်လိုက်မိသည်။ ဒီအကြောင်းအရာနှစ်ခုကြား၌ ဆက်စပ်မှုရှိသည်ဟု သူ မခံစားမိပေ။
သို့သော်... ချီမုန်၏ တိုးညှင်းသော ရှင်းပြစကားများသည်... ကုချန်အား အကြောင်းရင်းကို နားလည်သွားစေ၏။
" ချီလျန်မျိုးနွယ်က အမျိုးသမီးပဲ ရှိနေရုံတင်မကပါဘူး... မျိုးနွယ်ရဲ့ ထူးခြားချက်ကြောင့် အဖွဲ့ဝင်တိုင်းက... အရမ်းကောင်းမွန်တဲ့ 'ဆေးဖို' တွေ ဖြစ်နေကြလို့ပါပဲ.....
တကယ်လို့ အင်မော်တယ်နယ်မြေက ကျင့်ကြံသူတစ်ယောက်ကသာ ချီလျန်မျိုးနွယ်ဝင်တစ်ယောက်နဲ့ ပေါင်းဖက်မယ်ဆိုရင်... လက်တွဲဖော်ရဲ့ ကျင့်ကြံခြင်းလမ်းစဉ်ဖြစ်တဲ့... တာအိုစွမ်းအင်ကို စုပ်ယူနိုင်ပြီး သူတို့ကိုယ်သူတို့ အားဖြည့်နိုင်ပါတယ်... ဒါက သူတို့ရဲ့ ကျင့်ကြံခြင်းအတွက် အများကြီး အကျိုးရှိစေတာလေ..... "
" ဒါပေမယ့်... စုပ်ယူခြင်းခံလိုက်ရတဲ့ ချီလျန်မျိုးနွယ်ဝင်ကတော့ သူ့ရဲ့ မူလဇစ်မြစ် ပျက်စီးပြီး... ပြန်လည်မကုစားနိုင်တဲ့ ကြီးမားတဲ့ ထိခိုက်မှုကြီးကို ခံစားရမှာပါ..... "
ချီမုန်၏စကားသံသည် တိုးညှင်းနေသော်လည်း ခါးသီးမှုများဖြင့် ပြည့်နှက်နေသည်။
" ကျွန်မတို့ရဲ့ ဘိုးဘေးတွေက ဒီလို ဆေးဖိုအဖြစ် သတ်မှတ်ခံရတဲ့ အချက်ဟာ... ချီလျန်မျိုးနွယ်အတွက် ဘယ်လောက်အန္တရာယ်များလဲဆိုတာ ကြိုသိခဲ့ကြပါတယ်... ဒါကြောင့် ဘိုးဘေးတွေက ဒီကိစ္စကို လျှို့ဝှက်ထားဖို့အတွက်... မျိုးနွယ်ဝင်အားလုံးကို ပြင်ပက အမျိုးသားကျင့်ကြံသူတွေနဲ့ ရင်းရင်းနှီးနှီး ဆက်ဆံတာမျိုး မလုပ်ဖို့... တင်းတင်းကျပ်ကျပ် တားမြစ်ခဲ့ဖူးပါတယ် "
" ဒါပေမယ့် နောက်ပိုင်းမှာ... မျိုးနွယ်ဝင်တစ်ယောက်က မတော်တဆ လျှို့ဝှက်ချက်ကို ပေါက်ကြားစေခဲ့မိရာကနေ... ချီလျန်မျိုးနွယ်တစ်ခုလုံး ထာဝရငရဲခန်းထဲ ကျရောက်သွားခဲ့ရတာပါပဲ..... "
ချီမုန်၏ ပြောပြချက်များကြောင့် ကုချန်သည် အကြောင်းစုံကို နားလည်သွားခဲ့သည်။
ဆိုလိုသည်မှာ... ဤချီလျန်မျိုးနွယ်မှ အမျိုးသမီးအားလုံးသည်... အလွန်ကောင်းမွန်သော 'ဆေးဖို' ခန္ဓာကိုယ်ကို... ပိုင်ဆိုင်ထားကြသည်ပင်။
သို့သော် စဉ်းစားကြည့်လျှင် မဖြစ်နိုင်စရာတော့ မရှိပေ။ ချီလျန်မျိုးနွယ်၏ ပင်ကိုစွမ်းရည်မှာ နက်ရှိုင်းလှသည်။ မျိုးပွားရန်အတွက် မိမိတို့၏ သွေးအဆီအနှစ်၊ တာအို စသည်တို့ကို ခွဲထုတ်နိုင်သည်။ ထိုသို့ဆိုလျှင် ဆေးဖိုအဖြစ် ပြောင်းလဲကာ မိမိ၏ တာအိုကျင့်ကြံခြင်းကို အခြားသူထံ လွှဲပြောင်းပေးနိုင်သည် ဆိုခြင်းမှာလည်း ဖြစ်နိုင်ပေသည်။
သို့သော် ကုချန်ကြားသိရသည်မှာ... ယခင်က ကျဆုံးသွားခဲ့သော ချီလျန်မျိုးနွယ်၏ ဘိုးဘေး ချီရှောင်သည်... အင်မော်တယ်ထျန်းကျွင်းအဆင့် အထွတ်အထိပ်သို့ ရောက်ရှိနေသူဖြစ်သည်။ ထိုကဲ့သို့သော တည်ရှိမှုမျိုးသည် ချီလျန်မျိုးနွယ်ကို မကာကွယ်နိုင်ခဲ့ဘူးလော။
အင်မော်တယ်နယ်မြေတစ်ခုလုံးသို့ သတင်းပြန့်နှံ့သွားလျှင်ပင်... ထိုကဲ့သို့သော ကျင့်ကြံခြင်းအဆင့်ဖြင့် ချီလျန်မျိုးနွယ်ကို ကာကွယ်ရန်... လုံလောက်သင့်ပေသည်။ အမှန်တကယ်တွင်... ကုချန်အနေဖြင့် မြင့်မြတ်လှသော အင်မော်တယ်ဘုရင်အဆင့် တည်ရှိမှုများသည်... ဆေးဖိုဟုခေါ်သည့် အရာများကို လိုအပ်လိမ့်မည်ဟု မယုံကြည်ပေ။
အင်မော်တယ်ဘုရင်များ ဝင်ရောက်စွက်ဖက်ခြင်း မရှိသရွေ့... အင်မော်တယ်ထျန်းကျွင်း အထွတ်အထိပ်အဆင့် ကျင့်ကြံခြင်းဖြင့်... ချီလျန်မျိုးနွယ်ကို အချိန်တစ်ခုအထိ ကာကွယ်ပေးထားနိုင်မည် မဟုတ်လော။
ကုချန်၏မျက်နှာထားကို မြင်သောအခါ... ချီမုန်သည် သူ၏အတွေးကို ခန့်မှန်းမိပုံရပြီး... ခါးသီးစွာ ပြုံးလျက် ပြောဆိုလေသည်။
" ကျွန်မတို့ ချီလျန်မျိုးနွယ်မှာ... အစက ဘိုးဘေးချီရှောင် တစ်ယောက်တည်း ရှိခဲ့တာ မဟုတ်ပါဘူး... အင်မော်တယ်ထျန်းကျွင်း အထွတ်အထိပ်အဆင့်ရှိတဲ့... ဘိုးဘေး လေးယောက်အထိ ရှိခဲ့ဖူးပါတယ် "
" ဒါပေမယ့် နောက်ပိုင်းမှာ... တခြားဘိုးဘေးသုံးယောက်လုံး မျိုးနွယ်ကို ကာကွယ်ရင်း ကျဆုံးခဲ့ရပြီး... ဘိုးဘေးချီရှောင် တစ်ယောက်တည်းသာ ကျန်ရစ်ခဲ့တာပါ "
" ချီလျန်မျိုးနွယ်ရဲ့ ဆေးဖိုအာနိသင်က... ဘယ်လောက်ထိ စွမ်းအားကြီးသလဲဆိုတာ... သခင် မသိပါဘူး.....
အရှင်သခင်အဆင့် တည်ရှိမှုတစ်ခုက စစ်မှန်တဲ့ အင်မော်တယ်အဆင့်ရှိတဲ့... ချီလျန်မျိုးနွယ်ဝင်တစ်ဦးကို ဆေးဖိုအဖြစ် အသုံးပြုပြီး... သူ့ရဲ့ ကျင့်ကြံခြင်းအားလုံးကို စုပ်ယူလိုက်မယ်ဆိုရင်.....
အချိန်တိုအတွင်းမှာပဲ... စစ်မှန်သော အင်မော်တယ်အဆင့်အတန်းကို တက်လှမ်းနိုင်မှာပါ... ပြီးတော့ ဘေးထွက်ဆိုးကျိုးကလဲ မရှိသလောက်ပါပဲ! "
" အဲ့ဒီအချိန်တုန်းက အင်မော်တယ်နယ်မြေတစ်ခုလုံး ရူးသွပ်သွားခဲ့ကြတယ်... အပေါ်ယံမှာတော့ ထိန်းသိမ်းထားကြပေမယ့်... အားလုံးက တိတ်တဆိတ်နဲ့ ကျွန်မတို့ ချီလျန်မျိုးနွယ်ဝင်တွေကို... အကြီးအကျယ် ဖမ်းဆီးခဲ့ကြတာပါ "
" အစပိုင်းမှာတော့... မျိုးနွယ်ထဲက ဘိုးဘေးတွေက သတင်းပေါက်ကြားသွားမှန်းသိတော့... ချီလျန်မျိုးနွယ်ဝင် အားလုံးကို အပြင်မထွက်ခိုင်းတော့ဘဲ... မျိုးနွယ်ပိုင်နက်ထဲမှာပဲ နေစေပြီး ဒီကိစ္စတွေ ငြိမ်သွားတဲ့အထိ စောင့်ဖို့... ပြင်ဆင်ခဲ့ကြပါတယ် "
" အဲ့ဒီတုန်းက ဘိုးဘေးတွေ ထင်ယောင်ထင်မှား ဖြစ်ခဲ့ကြတာက.....
အင်မော်တယ်ဘုရင်တွေသာ ဝင်မပါရင်... ချီလျန်မျိုးနွယ်ရဲ့ အင်မော်တယ်ထျန်းကျွင်းအဆင့် ဘိုးဘေးလေးယောက်နဲ့တင်... ချီလျန်မျိုးနွယ်ပိုင်နက်ကို ကာကွယ်ဖို့ လုံလောက်တယ်လို့ ယူဆခဲ့ကြတာပါ...
အင်မော်တယ်နယ်မြေက ဘယ်အင်အားစု၊ ဘယ်လိုအာဏာရှင်မှ ချီလျန်မျိုးနွယ်ကို ထိပါးရဲမှာ မဟုတ်ဘူးလို့ ထင်ခဲ့ကြတာပေါ့ "
" နှစ်ထောင်ချီ၊ သောင်းချီ ကြာပြီးလို့ အခြေအနေတွေ ငြိမ်သက်သွားတဲ့အခါ... ချီလျန်မျိုးနွယ်ဝင်တွေ သတိထားပြီး နေထိုင်ကြမယ်ဆိုရင်... နောင်တစ်ချိန်မှာ အင်မော်တယ်နယ်မြေထဲ ပြန်လည်ပြီး လွတ်လပ်စွာ သွားလာခွင့်ရမယ်လို့ မျှော်လင့်ခဲ့ကြတာ..... "
ချီမုန် ဒီအထိ ပြောလာသည်ကို ကြားရသောအခါ ကုချန်သည် စကားပင်မပြောနိုင် ဖြစ်သွားရသည်။ ချီလျန်မျိုးနွယ်၏ ခန္ဓာကိုယ်ဖွဲ့စည်းပုံမှာ မည်မျှ 'ပုံမှန်မဟုတ်' ကြောင်းကို သူ သဘောပေါက်လိုက်ပြီဖြစ်သည်။
အရှင်သခင်အဆင့် ကျင့်ကြံသူတစ်ဦးသည်... စစ်မှန်သော အင်မော်တယ်အဆင့် ဆေးဖိုကို စုပ်ယူလိုက်ရုံဖြင့်... အချိန်တိုအတွင်း စစ်မှန်သော အင်မော်တယ်အဆင့်သို့ ရောက်ရှိနိုင်ကာ... ဘေးထွက်ဆိုးကျိုးလည်း မရှိသလောက်ပင် ဖြစ်သည်တဲ့လော။
အင်မော်တယ်တစ်သောင်းမျှော်စင်မှ အောက်ဘုံတွင်... နှစ်သန်းပေါင်းများစွာ ကြိုးစားပမ်းစား သိမ်းယူခဲ့သည့်... အရှင်သခင်အဆင့် ဆေးလုံးများအားလုံး ပေါင်းစည်းလိုက်လျှင်ပင်... စစ်မှန်သော အင်မော်တယ်အဆင့် အနည်းငယ်ကို မွေးထုတ်ပေးနိုင်ရန်... မသေချာပေ။
ထိုအရာနှင့် ယှဉ်လိုက်လျှင် ချီလျန်မျိုးနွယ်၏ ဆွဲဆောင်မှုမှာ သိသာထင်ရှားလွန်းလှသည်။
သို့သော် ထိုအချိန်က ချီလျန်မျိုးနွယ်၌ အင်မော်တယ်ထျန်းကျွင်းအဆင့် ဘိုးဘေးလေးဦးအထိ ရှိနေခဲ့သည်။
အင်မော်တယ်ထျန်းကျွင်း လေးပါးက ချီလျန်မျိုးနွယ်လေးတစ်ခုကို မကာကွယ်နိုင်ခဲ့ဘူးလား.....
ကုချန်သည် အနည်းငယ် နားမလည်နိုင် ဖြစ်သွားရ၏။
ထိုအကြောင်းအရာသို့ ရောက်သောအခါ ချီမုန်၏အသံသည် ပိုမို၍ ခါးသီးလာခဲ့သည်။
" ဒါပေမယ့်... ဘိုးဘေးတွေက အရာရာကို တွက်ချက်ခဲ့ကြပေမယ့် အချက်တစ်ချက်ကို လွဲချော်ခဲ့ကြတယ်... အဲ့ဒါကတော့ အင်မော်တယ်နယ်မြေက မြင့်မြတ်လှတဲ့ အင်မော်တယ်ဘုရင်ကြီးတွေဟာ... ဆေးဖိုဆိုတာတွေကို မလိုအပ်ကြပေမယ့်... သူတို့ရဲ့ တပည့်တွေ၊ သူတို့ရဲ့ သွေးသား ဆက်ခံသူတွေကတော့ လိုအပ်နေကြတယ် ဆိုတာပဲ..... "
ချီမုန် ဤအထိ ပြောလိုက်ချိန်မှာတော့ ကုချန် အပြည့်အဝ သဘောပေါက်သွားပြီ ဖြစ်သည်။
ဆိုလိုသည်မှာ... ထိုနှစ်များက အရာရာကို တွက်ချက်ခဲ့ကြသော... ချီလျန်မျိုးနွယ်၏ ဘိုးဘေးများသည်... အချက်တစ်ချက်တည်းကိုသာ လွဲချော်ခဲ့ခြင်းဖြစ်သည်။ ထိုအရာမှာ... လူတိုင်းတွင် ကိုယ်ကျိုးကြည့်သော စိတ်ဓာတ်... ရှိသည်ဟူသော အချက်ပင်။
ထိုအင်မော်တယ်ဘုရင်များပင်လျှင် ချွင်းချက်မရှိပေ။
မှန်ပါသည်... ထိုအင်မော်တယ်ဘုရင်များ၏ ကျင့်ကြံခြင်းအဆင့်ဖြင့်ဆိုလျှင်... ဆေးဖိုဆိုသည့်အရာများကို မလိုအပ်ကြပေ။
သို့သော် အင်မော်တယ်ဘုရင်များ၏ တပည့်များ၊ အင်မော်တယ်ဘုရင်များ၏ မျိုးဆက်များကရော မလိုအပ်ကြဘူးလော။
အကယ်၍ လိုအပ်ခဲ့မည်ဆိုလျှင်... ထိုအင်မော်တယ်ဘုရင်များသည် ချီလျန်မျိုးနွယ်ဘက်မှ ရပ်တည်ပြီး... တရားမျှတမှုကို ဖော်ဆောင်ပေးမည်လော မဟုတ်လျှင်... သူတို့၏ တပည့်များ၊ မျိုးဆက်များဘက်မှ ရပ်တည်ပြီး ဤကိစ္စများကို ခွင့်ပြုပေးမည်လော... သို့တည်းမဟုတ် တိတ်တဆိတ်ပင် မီးလောင်ရာလေပင့် လုပ်ပေးကြမည်လော။
ထိုမြင့်မြတ်လှသော အင်မော်တယ်ဘုရင်အဆင့် တည်ရှိမှုများသည် ကိုယ်တိုင်ဝင်ရောက်စွက်ဖက်ရန်ပင် မလိုပေ။ အမှောင်ထဲမှနေ၍ အနည်းငယ် လှုံ့ဆော်ပေးလိုက်ရုံဖြင့်... ချီလျန်မျိုးနွယ်တို့ ခုခံနိုင်စွမ်းမရှိသော အခြေအနေသို့... ရောက်သွားစေနိုင်သည်။
လက်ရှိ ချီလျန်မျိုးနွယ် ကြုံတွေ့နေရသော အကြပ်အတည်းကဲ့သို့ပင်... ရှီမိုကောင်းကင်အရှင်သည် မျက်နှာပင် မပြဘဲ... ချီလျန်မျိုးနွယ်အပေါ် မကျေနပ်ကြောင်း ပြသလိုက်ရုံဖြင့်... နတ်ဆိုးနယ်မြေရှိ အင်အားကြီးပုဂ္ဂိုလ်များသည် သူ့အတွက် 'အမှုတော်ထမ်း' ရန်... အလုအယက် ထွက်ပေါ်လာကြကာ ချီလျန်မျိုးနွယ်ကို... ပူးပေါင်းပစ်မှတ်ထားလာကြခြင်း ဖြစ်သည်။
အခန်း ( ၂၇၆ ) - အတိတ်ဟောင်း၊ မလိုအပ်သော ဆေးဖို၊ အင်မော်တယ်ဓားသန့်စင်ခြင်းနှင့် ပေးဆပ်မှု
" အဲ့ဒီတုန်းက အင်မော်တယ်ဘုရင် လက်အောက်ခံ အင်အားစု တစ်ခုမကပါဘူး... ပေါ်ပေါ်ထင်ထင်ရော တိတ်တဆိတ်ပါ ကျွန်မတို့ ချီလျန်မျိုးနွယ်ကို ဖိအားပေးခဲ့ကြတာပါ... သူတို့ရဲ့ တပည့်တွေအတွက်... ကျွန်မတို့ ချီလျန်မျိုးနွယ်ဝင်တွေနဲ့ 'လက်ထပ်ထိမ်းမြား' ပေးဖို့ မျှော်လင့်ပါတယ် ဆိုပြီးတော့လေ..... "
ချီမုန်၏အပြုံးသည် အနည်းငယ် ခါးသက်နေကာ လှောင်ပြောင်မှုများပင် ပါဝင်နေသည်။
ထို 'လက်ထပ်ထိမ်းမြားခြင်း' ဆိုသည်မှာ... ချီလျန်မျိုးနွယ်ဝင်များကို 'ဆေးဖို' အဖြစ် ဆက်ဆံလိုခြင်းကို အလှဆင်ထားသော... စကားလုံးသက်သက်သာ ဖြစ်ကြောင်း သိသာထင်ရှားလှသည်။
" အဲ့ဒီတုန်းက ချီလျန်မျိုးနွယ်ရဲ့ ဘိုးဘေးတွေကလဲ ဒါကို ရိပ်မိခဲ့ကြပါတယ်... ဒါပေမယ့် သူတို့မှာ ရွေးချယ်စရာမရှိဘဲ ခဏသည်းခံပြီး... အဲ့ဒီရွံစရာကောင်းတဲ့ လူတွေကို သဘောတူခဲ့ရပါတယ် "
" အဲ့ဒီအချိန်ကစပြီး... ဘိုးဘေးတွေဟာ ချီလျန်မျိုးနွယ်ကို ဒီလို အကျပ်အတည်းထဲကနေ လွတ်မြောက်နိုင်မယ့်... နည်းလမ်းကို အမြဲရှာဖွေခဲ့ကြတာပါပဲ "
" ဒါပေမယ့် ချီလျန်မျိုးနွယ်က အင်မော်တယ်နယ်မြေထဲမှာ ရှိနေသရွေ့... အင်မော်တယ်ဘုရင်တွေရဲ့ သြဇာလွှမ်းမိုးမှုအောက်ကနေ... ဘယ်လိုလုပ် လွတ်မြောက်နိုင်မှာလဲ "
" မျိုးနွယ်ထဲက ဘိုးဘေးတစ်ယောက်ယောက်က... အင်မော်တယ်ဘုရင်အဆင့်ကို အောင်မြင်စွာ ချိုးဖျက်တက်လှမ်းနိုင်ရင်တော့ တစ်မျိုးပေါ့... ဒါပေမယ့် အင်မော်တယ်ဘုရင်အဆင့်ကို တက်လှမ်းဖို့ဆိုတာ... တကယ်ကို ခက်ခဲလွန်းပါတယ်..... "
ချီမုန်သည် ခါးသီးစွာ ပြောဆိုလိုက်၏။
" နောက်ပိုင်းမှာတော့ ဘိုးဘေးတွေက တိုင်ပင်ဆွေးနွေးပြီးတဲ့နောက်... နတ်ဆိုးနယ်မြေဘက်ကို ဘက်ပြောင်းခိုလှုံဖို့ ဆုံးဖြတ်လိုက်ကြတယ်... နတ်ဆိုးနယ်မြေမှာ ဘဝသစ်တစ်ခု စတင်နိုင်ဖို့ မျှော်လင့်ခဲ့ကြတာပေါ့ "
" အဲ့ဒီအချိန်တုန်းက... အင်မော်တယ်နယ်မြေနဲ့ နတ်ဆိုးနယ်မြေတို့ စစ်ဖြစ်နေကြပြီး... နယ်စပ်ဒေသတစ်ခုလုံး မီးဟုန်းဟုန်းတောက်လောင်နေတဲ့ အချိန်ပါပဲ "
" ဘိုးဘေးတွေက... အရင်ဆုံး နတ်ဆိုးနယ်မြေဘက်ကို လျှို့ဝှက်ဆက်သွယ်ပြီး... သဘောတူညီမှု ရယူခဲ့ကြတယ် "
" ပြီးတော့ သူတို့ရဲ့ အသက်ကိုရင်းပြီး... ချီလျန်မျိုးနွယ်တစ်ခုလုံးကို နတ်ဆိုးနယ်မြေဘက် ခေါ်ဆောင်သွားဖို့ ကြိုးစားခဲ့ကြတယ်... ဒါပေမယ့် လမ်းခုလတ်မှာ အင်မော်တယ်နယ်မြေဘက်က ရိပ်မိသွားခဲ့ပြီး..... "
" နောက်ဆုံးမှာတော့... အင်မော်တယ်ထျန်းကျွင်းအဆင့် ဘိုးဘေးသုံးယောက်ရဲ့ အသက်ကို ပေးဆပ်လိုက်ရပြီးမှ... ဘိုးဘေးချီရှောင်က ချီလျန်မျိုးနွယ်ကို နတ်ဆိုးနယ်မြေဘက် အောင်မြင်စွာ ခေါ်ဆောင်နိုင်ခဲ့တာပါ..... "
ချီမုန် ပြောပြလိုက်သည်နှင့် ချီလျန်မျိုးနွယ် အင်မော်တယ်နယ်မြေကို သစ္စာဖောက်ခဲ့ရသည့် အဖြစ်အပျက် အသေးစိတ်အားလုံးသည် ကုချန်၏ ရှေ့တွင် ပေါ်လွင်လာခဲ့သည်။
" သူတို့လဲ ကံဆိုးရှာတဲ့ လူတွေပါပဲလား "
ကုချန်သည် ဖြေးညင်းစွာ သက်ပြင်းချလိုက်မိသည်။
ချီလျန်မျိုးနွယ်သည် အမှန်တကယ်ပင် ကံဆိုးလှသည်။
ထိုကဲ့သို့သော ခန္ဓာကိုယ်ဖွဲ့စည်းပုံကို ပိုင်ဆိုင်ထားခြင်းကြောင့်... အင်မော်တယ်နယ်မြေရှိ အင်အားစုအသီးသီး၏ မျက်စိကျစရာ... 'သိုးမွေးထူ' များ ဖြစ်လာခဲ့ရသည်။ ရှောင်လွှဲချင်လျှင်ပင် ရှောင်လွှဲ၍ မရနိုင်တော့ပေ။
ချီလျန်မျိုးနွယ်တစ်ခုလုံးကို ဦးဆောင်ပြီး... နတ်ဆိုးနယ်မြေသို့ ဘက်ပြောင်းခိုလှုံရန် ဆုံးဖြတ်ချက်ချမှတ်ခဲ့ရသည့်... ဘိုးဘေးများအတွက် မည်မျှ ခက်ခဲခဲ့မည်ကို... တွေးကြည့်ရုံနှင့် သိနိုင်သည်။
သို့သော် ထိုအချိန်က ထိုလမ်းသည်သာ ချီလျန်မျိုးနွယ်အတွက် တစ်ခုတည်းသော လွတ်မြောက်ရာလမ်း ဖြစ်ခဲ့သည်။
အကယ်၍... နတ်ဆိုးနယ်မြေသို့ ဘက်ပြောင်းခိုလှုံခြင်း မပြုခဲ့လျှင်... ချီလျန်မျိုးနွယ်တစ်ခုလုံးသည် အင်မော်တယ်ဘုရင် အင်အားစုအသီးသီး၏... လှောင်အိမ်သွင်း မွေးမြူခြင်းကို ခံရမည်ဖြစ်ပြီး... တစ်သက်လုံး လွတ်မြောက်နိုင်တော့မည် မဟုတ်ပေ။
ဆေးဖိုများကိုသာ အဆက်မပြတ် မွေးထုတ်ပေးနေရမည့် ဘဝမျိုး ရောက်သွားမည်ဖြစ်သည်။
နတ်ဆိုးနယ်မြေသို့ ဘက်ပြောင်းခိုလှုံခြင်းကမူ ချီလျန်မျိုးနွယ်အတွက် အသက်ရှူပေါက် တစ်ခု ရစေခဲ့သည်။
သို့သော်... ယခု ပြန်ကြည့်လျှင် ချီလျန်မျိုးနွယ်၏ ဆုံးဖြတ်ချက်မှာ မှန်ကန်သည်... မှားယွင်းသည်ဟု ပြောရန် ခက်ခဲလှသည်။ အဘယ်ကြောင့်ဆိုသော်... နတ်ဆိုးနယ်မြေသို့ ရောက်ရှိပြီးနောက်၌လည်း... ချီလျန်မျိုးနွယ်သည် ငြိမ်းချမ်းမှုကို မရရှိခဲ့ပေ။
အန္တရာယ်များသော အခြေအနေများကြောင့်... ချီလျန်မျိုးနွယ်၏ တစ်ဦးတည်းသော အသက်ရှင်ကျန်ရစ်သည့် ဘိုးဘေးချီရှောင်သည်... အင်မော်တယ်ဘုရင်အဆင့်သို့ အတင်းအကျပ် ချိုးဖျက်ဝင်ရောက်ရန်... ကြိုးစားခဲ့ရသည်။
ချီလျန်မျိုးနွယ်ကို ကာကွယ်ရန်နှင့် အန္တရာယ်ထဲမှ ဆွဲထုတ်ရန် မျှော်လင့်ခဲ့သော်လည်း... နောက်ဆုံးတွင် ကျင့်ကြံခြင်းအဆင့် ချိုးဖျက်မှု မအောင်မြင်ဘဲ... သေဆုံးခြင်းဖြင့်သာ အဆုံးသတ်ခဲ့ရသည်။
ကုချန် တိတ်ဆိတ်နေသည်ကို မြင်သောအခါ... ချီမုန်သည် အထင်လွဲသွားပုံရပြီး အကြည့်များ နူးညံ့သွားကာ... ရှက်သွေးဖြာလာ၏။
သူသည်... ခေါင်းကို အနည်းငယ် ငုံ့လိုက်ကာ... တိုးညှင်းစွာ ပြောဆိုလိုက်သည်။ " တကယ်လို့... သခင်သာ ကျွန်မကို စွန့်ပစ်မသွားဘူးဆိုရင်... ချီမုန်က သခင့်ရဲ့ ဆေးဖို ဖြစ်ခွင့်ရဖို့ ဆန္ဒရှိပါတယ် "
ချီလျန်မျိုးနွယ်တစ်ခုလုံး၏ အနာဂတ်အတွက်... ချီမုန်သည် မည်သည့်အရာကိုမဆို ပေးဆပ်ရပါစေ... သူကိုယ်တိုင် ပေးဆပ်ရမည် ဆိုလျှင်ပင်... သူ လိုလိုလားလား ပြုလုပ်မည်ဖြစ်သည်။
ချီမုန်၏စကားကို ကြားလိုက်ရသောအခါ ကုချန် သတိပြန်ဝင်လာခဲ့၏။
ချီမုန် အထင်လွဲနေကြောင်း... ချက်ချင်း သိလိုက်ရပြီး လက်ကာပြကာ... လျင်မြန်စွာ ငြင်းပယ်လိုက်သည်။
"မလိုပါဘူး"
ဆေးဖို... ဟုတ်လား။
အင်မော်တယ်ဘုရင်တစ်ပိုင်းအဆင့် တိုက်ခိုက်ရေးစွမ်းအားကို ပိုင်ဆိုင်ထားသော သူ့အနေဖြင့် ဆေးဖိုဆိုသည့် အရာကို ဘယ်နေရာမှာ အသုံးပြုရမည်နည်း။
ကုချန်သည် ထိုကဲ့သို့သော ယုတ်ညံ့သည့် နည်းလမ်းများကို မနှစ်သက်ပေ။
ကုချန်၏ ပြတ်သားသော အဖြေသည်... ချီမုန်ကို ကျေးဇူးတင်စိတ်များ ပြည့်နှက်သွားစေရုံသာမက... သူ၏စိတ်ထဲတွင် ထူးခြားသော ခံစားမှုတစ်ခုကိုလည်း ဖြစ်ပေါ်စေခဲ့သည်။
ကုချန် အလေးအနက်ထားပြောနေကြောင်း သူ သိသည်။ ချီလျန်မျိုးနွယ်၏ အကြီးမားဆုံး လျှို့ဝှက်ချက်ကို သိရှိပြီးနောက်၌ပင် သူ၏ သခင်သည် စိတ်လှုပ်ရှားခြင်း အလျဉ်းမရှိပေ။
နှစ်များတစ်လျှောက်... ချီမုန်သည် ဟန်ဆောင်ကောင်းသူများကို အများအပြားကို... တွေ့မြင်ခဲ့ဖူးသည်။ နတ်ဆိုးနယ်မြေ၌ ရှိနေစဉ်တွင်လည်း... သူသည် အမြဲတမ်း သတိဝီရိယဖြင့် နေထိုင်ခဲ့ရပြီး... အခြားသူများကို မယုံရဲခဲ့ပေ။ အလစ်အငိုက် အတိုက်ခိုက်ခံရမည်ကို အမြဲ စိုးရိမ်နေခဲ့ရသည်။
ကုချန်၏ ဖြောင့်မတ်ပြီး ဂုဏ်သိက္ခာရှိသော လုပ်ရပ်များသည် ချီမုန်ကို မဖော်ပြတတ်နိုင်သော ငြိမ်းချမ်းမှုတစ်ခုကို ပေးစွမ်းနိုင်ခဲ့သည်။
ဖြစ်နိုင်သည်မှာ... ချီလျန်မျိုးနွယ်အတွက် ဤသခင်ကို ရှာဖွေတွေ့ရှိခဲ့ခြင်းသည်... သူ၏ ဘဝတစ်လျှောက်လုံး ချမှတ်ခဲ့ဖူးသော ဆုံးဖြတ်များထဲတွင်... အမှန်ကန်ဆုံး ဆုံးဖြတ်ချက် ဖြစ်နိုင်ပေသည်ဟု... ချီမုန် တွေးမိလိုက်သည်။
" ကဲပါ... ငါ့အတွက် သီးသန့်ကျင့်ကြံလို့ရမယ့် နေရာတစ်ခု ရှာပေးပါဦး... ငါ အရင်ဆုံး တံခါးပိတ်ကျင့်ကြံဖို့ လိုတယ် "
ချီလျန်မျိုးနွယ်၏ လျှို့ဝှက်ချက်များကို သိရှိပြီးနောက် ကုချန်သည် ဆက်လက် စုံစမ်းလိုစိတ် မရှိတော့ပေ။
ထိုအစား... အကန့်အသတ်မဲ့ဓားအတွင်းသို့ ကောင်းကင်သတ္တု သုံးမျိုးလုံး ပေါင်းစပ်ထည့်သွင်းရန်အတွက်... ချီမုန်အား တိတ်ဆိတ်သော ကျင့်ကြံရာနေရာတစ်ခု ရှာခိုင်းလိုက်သည်။
အကန့်အသတ်မဲ့ဓားသည် ဆင့်ကဲပြောင်းလဲရန် မစောင့်နိုင်တော့သကဲ့သို့ စိတ်လှုပ်ရှားစွာ တုန်ခါနေသည်ကို သူ ခံစားနေရပြီဖြစ်သည်။
" ဒါက လွယ်ပါတယ် သခင်... ကျွန်မနောက် လိုက်ခဲ့ပါ "
ကုချန်၏ညွှန်ကြားချက်ကို ကြားသောအခါ... ချီမုန်သည် တောက်ပစွာ ပြုံးလိုက်ပြီး... ချီလျန်မျိုးနွယ်၏ နက်ရှိုင်းသော နေရာရှိ သီးသန့်ကျင့်ကြံရာနေရာသို့... ကုချန်အား ခေါ်ဆောင်သွားလိုက်သည်။
" သခင်... ဒီနေရာမှာ ကျင့်ကြံနိုင်ပါတယ်... တကယ်လို့ တစ်ခုခု လိုအပ်ရင်... ချီမုန့်ကို ပြောပါ "
ချီမုန်သည် လေးစားစွာ ပြောဆိုပြီးနောက်... ပြန်ထွက်သွားရန် ပြင်လိုက်သော်လည်း... ကုချန်သည် တစ်စုံတစ်ခုကို သတိရသွားပုံဖြင့်... ချီမုန့်အား ပေါ့ပါးစွာ မှာကြားလိုက်သည်။
" လောလောဆယ် ရွှမ်ယိုနန်းတော်ကို ပြန်မသွားနဲ့ဦး "
ဟန်ယိုထျန်းကျွင်းကို သတ်ဖြတ်စဉ်ကဖြစ်စေ... သတ်ဖြတ်ပြီးနောက်ပိုင်းတွင်ဖြစ်စေ ကုချန်သည်... သူ၏ခြေရာလက်ရာများကို ဖုံးကွယ်ထားခြင်း မရှိခဲ့ပေ။
ထို့ကြောင့်... မကြာမီ အချိန်အတွင်း ရွှမ်ယိုနန်းတော်နှင့် ရှီမို ကောင်းကင်ဘုံမှ နတ်ဆိုးနယ်မြေ အားကြီးသူများသည်... သူ ချီလျန် နတ်ဆိုးနယ်မြေသို့ ရောက်ရှိနေကြောင်း... သိရှိသွားကြလိမ့်မည်ဟု ကုချန် သိနေသည်။
အကယ်၍... ထိုကဲ့သို့သော အချိန်တွင် ချီမုန် ရွှမ်ယိုနန်းတော်သို့ ပြန်သွားမည်ဆိုပါက... မလိုအပ်သော ပြဿနာများ ရှိလာနိုင်သည်။ ထို့ကြောင့် ကုချန်သည် ကြိုတင်သတိပေးလိုက်ခြင်း ဖြစ်သည်။
" ရွှမ်ယိုနန်းတော်ကို လောလောဆယ် ပြန်မသွားနဲ့ဦး... ဟုတ်လား... ဘာကြောင့်လဲဟင် "
ချီမုန်သည် အံ့အားသင့်သွားကာ... သူ၏မျက်နှာတွင်လည်း နားမလည်နိုင်သော အမူအရာများ... ပေါ်လာ၏။ ကုချန်သည် အဘယ်ကြောင့်... ထိုသို့ အမိန့်ပေးသည်ကို... သူ မသိပေ။
" ဒီအရှင် ချီလျန်နတ်ဆိုးနယ်မြေကို မလာခင်တုန်းက... ချောက်နက် နတ်ဆိုးနယ်မြေကို ဖြတ်လာရင်း... ရွှမ်ယိုနန်းတော်က ဟန်ယိုထျန်းကျွင်းကို သုတ်သင်ရှင်းလင်းခဲ့လို့ပဲ "
" တကယ်လို့ မင်း အခုချိန် ရွှမ်ယိုနန်းတော်ကို ပြန်သွားမယ်ဆိုရင် အန္တရာယ်ရှိနိုင်တယ် "
ကုချန်သည် ပေါ့ပါးစွာ ပြန်ဖြေလိုက်သည်။
သခင်က ဟန်ယိုထျန်းကျွင်းကို သတ်လိုက်ပြီ ဟုတ်လား။
ကုချန်၏စကားကို ကြားလိုက်ရသောအခါ... ချီမုန်၏ မျက်နှာထားသည် ပြောင်းလဲသွားရကာ... အနည်းငယ် ကြောင်အသွားမိသည်။
သခင်၏ ပေါ့ပါးအေးဆေးသော လေသံကို နားထောင်ကြည့်ရသည်မှာ... ဟန်ယိုထျန်းကျွင်းကို သတ်ဖြတ်ခြင်းသည်... လမ်းဘေးရှိ ပုရွက်ဆိတ်တစ်ကောင်ကို နင်းခြေလိုက်သကဲ့သို့... လွယ်ကူနေပုံရသည်။
သို့သော်... သခင်၏စွမ်းအားဖြင့် ဆိုလျှင် ဟန်ယိုထျန်းကျွင်းကို သတ်ဖြတ်ခြင်းမှာ... အမှန်တကယ်ပင် ရိုးရှင်းလွန်းလှသည်။ စစ်မှန်သော အင်မော်တယ်များကိုပင် သတ်ဖြတ်ဖူးသော သခင်အတွက်... သာမန် ထျန်းကျွင်းအဆင့်လောက်က... ဘာများ ပြောပလောက်စရာ ရှိမည်နည်း။
ဒါပေမယ့် တစ်ခုခု လွဲနေသလိုပဲ.....
ဒီနေရာက နတ်ဆိုးနယ်မြေလေ... အဆုံးမဲ့ကမ္ဘာ မဟုတ်ဘူး.....
သခင့်ရဲ့ တိုက်ခိုက်ရေးစွမ်းအားက ဖိနှိပ်ချုပ်ချယ်မခံရဘူးလား.....
သူ စဉ်းစားလို့ မရပေ... တကယ်ကို စဉ်းစားလို့ မရပေ.....
ပြီးတော့... သခင်က ဘာလို့ ရုတ်တရက်ကြီး ဟန်ယိုထျန်းကျွင်းကို သတ်လိုက်ရတာလဲ... သူ့အတွက် လက်စားချေပေးတာများလား.....
ချီမုန်သည် အံ့သြသွားရကာ သူ၏စိတ်ကူးများမှာလည်း အရိုင်းဆန်စွာ ပြန့်လွင့်သွားတော့သည်။
သို့သော်... ကုချန် လက်ကာပြလိုက်သည်ကို မြင်သောအခါ... သူ ထွက်သွားသင့်ပြီဖြစ်ကြောင်း သိလိုက်ရသည်။ ထို့ကြောင့်... သူ၏စိတ်ထဲရှိ ရှုပ်ထွေးနေသော အတွေးများကို အမြန် ဖိနှိပ်လိုက်ပြီး... ကုချန်အား လေးစားစွာ ဦးညွှတ်ကာ... တိတ်ဆိတ်စွာ ထွက်ခွာသွားလိုက်သည်။
ချီမုန် ထွက်သွားပြီးနောက်... အကန့်အသတ်မဲ့ဓားသည် စိတ်လှုပ်ရှားစွာ ခုန်ထွက်လာပြီး... ဂရုစိုက်တတ်သော ခွေးပေါက်လေးတစ်ကောင်ကဲ့သို့... ကုချန်၏ ဘေးပတ်လည်တွင် မရပ်မနား လှည့်ပတ်နေတော့သည်။
" သိပါပြီ... သိပါပြီကွာ... ဘာလို့ ဒီလောက်တောင် လောနေရတာလဲ "
အကန့်အသတ်မဲ့ဓား၏ အပြုအမူကို ကြည့်ရင်း... ကုချန်သည် အနည်းငယ် ရယ်ချင်သွားမိသည်။ သို့သော်... သူသည် ကောင်းကင်သတ္တု သုံးမျိုးလုံးကို ထုတ်ယူကာ... အကန့်အသတ်မဲ့ဓားထံသို့ ပစ်ပေးလိုက်လေသည်။