အခန်း (၂၇၇-၂၇၈)
Vol. 20 Ch. 277-278
အခန်း ( ၂၇၇ ) - တံခါးပိတ်ကျင့်ကြံရင်း ဆင့်ကဲပြောင်းလဲခြင်း၊ သားအမိတွေ့ဆုံခြင်းနှင့် ဆိုက်ရောက်လာသော အကျပ်အတည်း
" ဝီ...! "
ကုချန် ကောင်းကင်သတ္တု သုံးမျိုးလုံးကို ပစ်ပေးလိုက်သည်နှင့်... အကန့်အသတ်မဲ့ဓား၏ ကိုယ်ထည်သည် အလွန်အမင်း အရသာရှိသော အစားအစာကို မြင်တွေ့လိုက်ရသကဲ့သို့... တောက်ပစွာ လင်းလက်လာခဲ့သည်။ ဓားထိပ်ဖျား လှုပ်ရှားလိုက်သည်နှင့်... ဓားကိုယ်ထည်ပေါ်တွင် အက်ကြောင်းတစ်ခု ချက်ချင်း ပေါ်လာကာ... ကောင်းကင်သတ္တု သုံးမျိုးလုံးကို တစ်ပြိုင်နက် 'ဝါးမြို' လိုက်လေသည်။
ပုံသဏ္ဍာန် မတူညီကြသော်လည်း... မြင့်မြတ်သော ရောင်ဝါအသီးသီး ထုတ်လွှတ်နေသည့် ကောင်းကင်သတ္တု သုံးခုလုံးကို ဝါးမြိုပြီးနောက်... အကန့်အသတ်မဲ့ဓားသည် အစားလွန်သွားသကဲ့သို့ ဖြစ်သွားသည်။
လေထဲမှ ကြမ်းပြင်ပေါ်သို့ 'ဂလန်' ခနဲ ပြုတ်ကျသွားကာ... ကြမ်းပြင်ပေါ်တွင် တောင့်တင်းစွာ... လဲကျနေတော့သည်။ ဓား၏ကိုယ်ထည်သည် မကြာခဏဆိုသလို တုန်ခါနေကာ... ကောင်းကင်သတ္တု သုံးမျိုးလုံးကို ချေဖျက်ရန် ကြိုးစားနေကြောင်း... သိသာထင်ရှားလှသည်။
ကုချန်သည်... ထိုမြင်ကွင်းကို ကြည့်ကာ... မရယ်ဘဲ မနေနိုင်တော့ပေ။ သူ၏ အကန့်အသတ်မဲ့ဓားသည်... အမှန်တကယ်ပင် စိတ်မြန်လွန်းလှသည်။ ကောင်းကင်သတ္တုများကို... တစ်ခုပြီးတစ်ခု ဝါးမြိုနိုင်သော်လည်း... ယခုကဲ့သို့ စွန်ပလွံသီးတစ်လုံးလုံးကို မြိုချလိုက်သကဲ့သို့... တစ်ပြိုင်နက်တည်း အကုန်ဝါးမြိုပစ်ရန် ဇွတ်အတင်း လုပ်ဆောင်ခဲ့သည်။
သို့သော်... ဤသည်မှာ အစပျိုး ဝါးမြိုခြင်းသာ... ဖြစ်သည်။ ကောင်းကင်သတ္တု သုံးမျိုးလုံးကို... အပြည့်အဝ ချေဖျက်၍ ပျော်ဝင်သွားစေရန်...' အချိန်အတိုင်းအတာတစ်ခု လိုအပ်ဦးမည်ဖြစ်သည်။ ထိုကိစ္စအတွက်... ကုချန် စိတ်ပူစရာ မလိုပေ။ အကန့်အသတ်မဲ့ဓားသည် သူ့အလိုလို ကိုင်တွယ်ဖြေရှင်းသွားလိမ့်မည် ဖြစ်သည်။
အကန့်အသတ်မဲ့ဓားထံမှ အကြည့်လွှဲလိုက်ပြီးနောက်... ကုချန်သည် မျက်လုံးများကို အနည်းငယ် မှိတ်လိုက်ကာ... တရားမှတ်ခြင်းနှင့် ဉာဏ်အလင်းပွင့်ခြင်း လုပ်ငန်းစဉ်ကို... စတင်လိုက်လေသည်။
ဤတစ်ကြိမ် နတ်ဆိုးနယ်မြေသို့ ရောက်လာစဉ်... သူသည် ကျင့်ကြံခြင်းအဆင့်ကို အလျင်စလို တိုးမြှင့်ခဲ့ရသဖြင့်... လက်ရှိအဆင့်ကို ခိုင်မာအောင် မလုပ်ဆောင်ရသေးပေ။
ထို့အပြင်... နတ်ဆိုးနယ်မြေ၏ အဆုံးမဲ့တာအိုများသည်... အဆုံးမဲ့ကမ္ဘာနှင့် လုံးဝ ကွာခြားနေသည်။ ထို့ကြောင့်... ဤအခွင့်အရေးကို အသုံးချ၍ နတ်ဆိုးနယ်မြေ၏... အဆုံးမဲ့တာအိုများကို သေချာစွာ လေ့လာကာ... ဉာဏ်အလင်းရယူလိုသည်။ ထိုသို့ လုပ်ဆောင်ခြင်းဖြင့်... အဆုံးမဲ့ကမ္ဘာတွင် ကျန်ရှိနေခဲ့သော သူ့မူလခန္ဓာကိုယ်၏ ကျင့်ကြံခြင်းအတွက်လည်း... အကျိုးရှိစေမည့် ထိုးထွင်းသိမြင်မှုများ ရရှိနိုင်ပေသည်။
ကျင့်ကြံရာနေရာသည် တစ်ခဏအတွင်း တိတ်ဆိတ်သွားကာ... အကန့်အသတ်မဲ့ဓားထံမှ ရံဖန်ရံခါ ထွက်ပေါ်လာသည့်... သက်တောင့်သက်သာ ညည်းတွားသံများသာ... ကြားနေရသည်။
...
ချီမုန်သည် ပြန်လည် ထွက်ခွာသွားပြီးနောက်... တစ်ခုခု မှားယွင်းနေသည်ဟု... ခံစားနေရသည်။ ထို့အပြင်... သခင် ပြောပြလိုက်သည့် သတင်းကိုလည်း... မိခင်ဖြစ်သူထံ အချိန်မီ တင်ပြရန် လိုအပ်နေသည်။ ထို့ကြောင့်... သူ၏ကျင့်ကြံရာနေရာမှ ထွက်လာပြီးနောက်... ချီမုန်သည် ချီလျိုကို ချက်ချင်း ဆက်သွယ်လိုက်သည်။
" အမေ! "
သူ၏ ရှေ့တွင် ပေါ်လာသော ပုံရိပ်ယောင်ကို ကြည့်ကာ ချီမုန်သည် အလျင်အမြန် လှမ်းခေါ်လိုက်၏။
" သခင် ချီလျန်မျိုးနွယ်ဆီ ရောက်နေပါပြီ။ သမီး နေရာချပေးထားပါတယ် "
" သခင်က ချီလျန်မျိုးနွယ်ဆီ ရောက်နေပြီ ဟုတ်လား။ မြန်လှချည်လား "
ချီမုန်၏စကားကို ကြားလိုက်ရသောအခါ ချီလျိုသည် အံ့အားသင့်သွား၏။ ကုချန် ဤမျှ လျင်မြန်စွာ ရောက်ရှိလာမည်ဟု သူ လုံးဝ မျှော်လင့်မထားခဲ့ပေ။
အမှန်တကယ်တွင်... ကုချန် ကိုယ်တိုင် ကောင်းကင်သတ္တုသုံးမျိုးကို... လာရောက်ယူဆောင်မည်ဟု သတင်းကြားရစဉ်က... ချီလျို၏တုံ့ပြန်မှုသည် ချီမုန်နှင့် အတူတူပင် ဖြစ်သည်။ ထိုလုပ်ရပ်သည်... ပညာမရှိဟု ခံစားခဲ့ရကာ... ကုချန် နတ်ဆိုးနယ်မြေသို့ မည်သို့ ဆင်းသက်လာမည်ကိုလည်း... သူ မစဉ်းစားတတ်ပေ။
ရက်အနည်းငယ်သာ ကုန်ဆုံးသွားသေးသော်လည်း... သခင်သည် နတ်ဆိုးနယ်မြေသို့ ရောက်ရှိနေပြီ ဖြစ်ကြောင်း... ချီလျန်မျိုးနွယ်ထဲတွင်ပင် ရှိနေပြီ ဖြစ်ကြောင်း... သမီးဖြစ်သူမှ ပြောလာလိမ့်မည်ဟု ဘယ်သူ ထင်ထားပါ့မည်နည်း။
ချီလျို၏ အံ့သြနေသော မျက်နှာကို မြင်သောအခါ ချီမုန်သည် အလျင်အမြန် ရှင်းပြလိုက်၏။
" အစတုန်းက သမီးလဲ မယုံပါဘူး။ ဒါပေမယ့် သခင်က အခု ချီလျန်မျိုးနွယ်ထဲမှာ တကယ်ပဲ ကျင့်ကြံနေပါတယ်။ သမီး ကောင်းကင်သတ္တု သုံးမျိုးလုံးကိုလဲ သခင့်ဆီ ဆက်သပြီးပါပြီ "
" အင်း "
ကနဦး အံ့သြမှု ပြီးဆုံးသွားပြီးနောက် ချီလျိုသည် သတိပြန်ဝင်လာကာ ဖြည်းဖြည်းချင်း ခေါင်းညိတ်လိုက်၏။
" သမီး လုပ်တာ ကောင်းပါတယ်။ ဒါပေမယ့် အမေက အခု 'လေဟာနယ် အင်မော်တယ် ရွှေ' တစ်တုံးအတွက်... ယမမြစ် နတ်ဆိုးနယ်မြေနဲ့ ယှဉ်ပြိုင်နေရလို့ လောလောဆယ် ပြန်လာလို့ မရသေးဘူး။ အဲ့ဒီ လေဟာနယ် အင်မော်တယ် ရွှေကို ရတာနဲ့... ချီလျန်မျိုးနွယ်ကို ချက်ချင်း ပြန်လာပြီး သခင့်ကို ဆက်သလိုက်မယ် "
ယမမြစ် နတ်ဆိုးနယ်မြေ ဟုတ်လား။
မိခင်ဖြစ်သူ၏ စကားကို ကြားလိုက်ရသောအခါ... ချီမုန်၏ မျက်နှာထားမှာ အနည်းငယ် ပြောင်းလဲသွားကာ... မျက်ဝန်းထဲတွင် စိုးရိမ်မှုအရိပ်အယောင်များ ပေါ်ထွက်လာ၏။
ယမမြစ် နတ်ဆိုးနယ်မြေအကြောင်း သူ ကြားဖူးသည်။ ၎င်းသည် ရှီမိုကောင်းကင်ဘုံ လက်အောက်ရှိ... နတ်ဆိုးနယ်မြေများထဲမှ တစ်ခုဖြစ်ပြီး... ယမမြစ် ဘိုးဘေးဆိုသူက အုပ်စိုးသည်။ သူသည် သက်တမ်းရင့် အင်မော်တယ်အဆင့် တည်ရှိမှု တစ်ဦးဖြစ်သည်။
ထို့အပြင်... သူသည် ရက်စက်ကြမ်းကြုတ်ပြီး သွေးဆာတတ်ကာ... အငြိုးအတေး အလွန်ကြီးသည်။ အခြား အင်မော်တယ်အဆင့် တည်ရှိမှုများပင်... သူ့ကို ရန်စရန် ဝန်လေးကြသည်။ သူသည် အမှန်တကယ်ပင်... နာမည်ဆိုးဖြင့် ကျော်ကြားသူဖြစ်သည်။
ချီလျန်မျိုးနွယ်၏ ဘိုးဘေး ချီရှောင် မကျဆုံးခင်ကဆိုလျှင် ယမမြစ်ဘိုးဘေးကို ရန်စရန် ကြောက်ရွံ့နေမည် မဟုတ်ပေ။
သို့သော်... ယခုအခါ ဘိုးဘေးချီရှောင် ကျဆုံးသွားပြီဖြစ်ရာ... မျိုးနွယ်စုအတွင်း အားအကောင်းဆုံး တိုက်ခိုက်ရေးစွမ်းအားမှာ... အင်မော်တယ်အဆင့်ရှိသော မိခင်ဖြစ်သူသာ ရှိတော့သည်။
ယခု မိခင်ဖြစ်သူသည် စတုတ္ထမြောက် ကောင်းကင်သတ္တုအတွက် ထိုကဲ့သို့သော ပြိုင်ဘက်မျိုးကို ရန်စခဲ့ပြီလော။
ချီမုန်၏ စိုးရိမ်နေသော မျက်နှာကို မြင်သောအခါ ချီလျိုသည် အနည်းငယ် ပြုံးလိုက်ကာ ပြောဆိုလေသည်။
" အမေ့အတွက် စိတ်မပူပါနဲ့... ယမမြစ်ဘိုးဘေးက အစွမ်းထက်တယ် ဆိုပေမယ့်... အမေကလဲ လွယ်လွယ်ကူကူ အနိုင်ကျင့်လို့ရမယ့်သူ မဟုတ်ပါဘူး။ တိုက်ပွဲက အဆုံးသတ်ခါနီးနေပါပြီ။ အဲ့ဒီ လေဟာနယ် အင်မော်တယ် ရွှေက အမေ့လက်ထဲပဲ ရောက်လာဖို့ များပါတယ် "
" ဒါဆိုရင်တော့ ကောင်းတာပေါ့..... "
မိခင်ဖြစ်သူ ယုံကြည်မှု အပြည့်ရှိနေသည်ကို မြင်လိုက်ရသောအခါမှ ချီမုန် သက်ပြင်းချလိုက်နိုင်တော့သည်။ သို့သော် သူ၏မိခင်ကို ဆက်သွယ်ရသည့် အဓိက ရည်ရွယ်ချက်ကို သတိရသွားကာ အလျင်အမြန် ပြောဆိုလိုက်သည်။
" ဪ... အမေ... နောက်ထပ် ကိစ္စတစ်ခု ရှိသေးတယ်..... "
ထို့နောက် ချီမုန်သည် ကုချန် ပြောပြခဲ့သော ဟန်ယိုထျန်းကျွင်းအား သတ်ဖြတ်ခဲ့သည့် အကြောင်းအရာ အလုံးစုံကို ချီလျိုအား ပြောပြလိုက်သည်။
ထိုအကြောင်းအရာအားလုံးကို နားထောင်ပြီးသောအခါ... ချီလျို၏မျက်နှာထားမှာ ချက်ချင်း ပြောင်းလဲသွားကာ... မသိလိုက်ဘာသာ ရေရွတ်လိုက်မိသည်။
" ဒုက္ခပါပဲ! "
" ဘာဖြစ်လို့လဲ အမေ "
ချီမုန်သည် နားမလည်နိုင်စွာ မေးမြန်းလိုက်၏။
အမှန်တကယ်တွင်... ကုချန် ဟန်ယိုထျန်းကျွင်းကို သတ်ဖြတ်ခဲ့ကြောင်း သိလိုက်ရစဉ်က... တစ်ခုခု လွဲမှားနေသည်ဟု သူ ခံစားခဲ့ရသော်လည်း... မည်သည့်အရာ ဖြစ်ကြောင်း စဉ်းစားမရခဲ့ပေ။ ထို့ကြောင့်... သူ၏မိခင် အမြင်ကို သိလို၍... ဆက်သွယ်ခဲ့ခြင်း ဖြစ်သည်။
သမီးဖြစ်သူ၏ နားမလည်နိုင်သော မျက်နှာကို မြင်သောအခါ ချီလျိုသည် သက်ပြင်းချလိုက်ကာ ရှင်းပြလေသည်။
" သခင်က ဟန်ယိုထျန်းကျွင်းကို သတ်လိုက်တယ်... ဒါပေမယ့် ဘာလို့ သမီးကို ချောက်နက် နတ်ဆိုးနယ်မြေကို ပြန်ခွင့်မပြုတာလဲ... နတ်ဆိုးနယ်မြေ တစ်ခုလုံးမှာ သမီးနဲ့ အမေ ဘယ်သူ့ဆီ သစ္စာခံထားတယ်ဆိုတာ... ဘယ်သူမှ မသိကြဘူးဆိုတာ သမီးလဲ သိတာပဲ... ရွှမ်ယိုနန်းတော်က သမီးနဲ့ သခင်ရဲ့ ပတ်သက်မှုကို... ဘယ်လိုလုပ် သိနိုင်မှာလဲ "
" ဒါပေမယ့် သခင်က ဒီကိစ္စ သမီးကို ထိခိုက်နိုင်တယ်လို့ ပြောခဲ့တယ်။ ဘာကြောင့်လဲ "
" ဖြစ်နိုင်ခြေ တစ်ခုပဲ ရှိတယ်... သခင်က ဟန်ယိုထျန်းကျွင်းကို သတ်ပြီးတဲ့နောက်... သူ့ရဲ့ ခြေရာလက်ရာတွေကို တမင် ဖုံးကွယ်မထားဘဲ... ချီလျန်နတ်ဆိုးနယ်မြေကို တိုက်ရိုက် လာခဲ့တာ ဖြစ်မယ် "
" ဒီလိုဆိုရင် ရွှမ်ယိုနန်းတော်က ဒီကိစ္စကို အမြန်ဆုံး စုံစမ်းတော့မယ်။ ပြီးရင် သခင်က ငါတို့ ချီလျန်မျိုးနွယ်ဆီ ရောက်နေတာကိုလဲ သိသွားလိမ့်မယ် "
" အဲ့ဒါကြောင့် သခင်က သမီးပါ ရောပါသွားမှာ စိုးလို့... ချောက်နက် နတ်ဆိုးနယ်မြေကို ပြန်ခွင့်မပြုခဲ့တာပေါ့ "
" ဪ... အဲ့ဒီလိုကိုး..... "
မိခင်ဖြစ်သူ၏ ရှင်းပြချက်ကို ကြားပြီးနောက်... ချီမုန်သည် နောက်ဆုံးတွင်... သဘောပေါက်သွားတော့သည်။ သို့သော်... မိခင်ဖြစ်သူ၏ စိုးရိမ်ပူပန်နေသော မျက်နှာကို မြင်ရသောအခါ... မိခင်ဖြစ်သူ အစိုးရိမ်လွန်နေသည်ဟု သူ ခံစားလိုက်ရသည်။
" အမေက ဘာလို့ ဒီလောက် စိုးရိမ်နေရတာလဲ။ သမီးက အခု ချီလျန်မျိုးနွယ်ထဲမှာပဲ ရှိနေတာလေ။ ချောက်နက်နတ်ဆိုးနယ်မြေကို ပြန်ဖို့လဲ အစီအစဉ် မရှိပါဘူး.....
သမီး ဘေးကင်းပါတယ်။ ရွှမ်ယိုနန်းတော်က သမီးတို့ ချီလျန်မျိုးနွယ်အတွက် အဲ့ဒီလောက်ကြီး ခြိမ်းခြောက်မှု မဟုတ်ပါဘူးနော် "
ရွှမ်ယိုနန်းတော်၏ ထိပ်တန်း တိုက်ခိုက်ရေးစွမ်းအားများမှာ ဟန်ယိုထျန်းကျွင်းနှင့် ရွှမ်ယိုနန်းတော် သခင် ရွှမ်ချင်းထျန်းကျွင်း သာ ရှိသည်။
ယခု ဟန်ယိုထျန်းကျွင်း သေဆုံးသွားပြီ ဖြစ်ရာ... ရွှမ်ချင်းထျန်းကျွင်း တစ်ယောက်တည်းသာ... ကျန်ရစ်တော့သည်။ စစ်မှန်သော အင်မော်တယ်တစ်ပါး... စောင့်ကြပ်နေသည့်. ချီလျန်မျိုးနွယ်ကို... သူသည် မည်သို့ ခြိမ်းခြောက်နိုင်မည်နည်း။
" ရွှမ်ယိုနန်းတော်က ငါတို့ ချီလျန်မျိုးနွယ်အတွက် သိပ်ပြီး ခြိမ်းခြောက်မှု မရှိတာ မှန်ပါတယ် "
ချီလျိုသည် သက်ပြင်းချကာ ပြောဆိုလိုက်သည်။
" ဒါပေမယ့် သမီး... မမေ့ပါနဲ့... ရွှမ်ယိုနန်းတော်ရဲ့ နောက်ကွယ်မှာ... ရှီမိုကောင်းကင်ဘုံ ရှိနေတယ်ဆိုတာကိုလေ "
" အခု ဟန်ယိုထျန်းကျွင်းက ရွှမ်ယိုနန်းတော်ထဲမှာ သေဆုံးသွားပြီ။ ရွှမ်ချင်း ပြန်ရောက်လာရင် ဒီကိစ္စကို ဒီအတိုင်း ထားမှာ မဟုတ်ဘူး။ ရှီမိုကောင်းကင်ဘုံကို သေချာပေါက် တိုင်ကြားလိမ့်မယ် "
" ထျန်းကျွင်းတစ်ပါး သေဆုံးတာက ဘာမှ မဟုတ်ပေမယ့်... ဟန်ယိုထျန်းကျွင်းက ရွှမ်ယိုနန်းတော်ရဲ့ ဒုတိယ သခင်လေ။ အခု သူ့နယ်မြေထဲမှာတင်... အကြောင်းပြချက်မရှိဘဲ သေဆုံးသွားတာဆိုတော့... ဂုဏ်သိက္ခာအတွက်ပဲ ဖြစ်ဖြစ် ရှီမိုကောင်းကင်ဘုံက... ဒီကိစ္စကို အဆုံးထိ စုံစမ်းမှာပဲ "
" တကယ်လို့ ရှီမိုကောင်းကင်ဘုံက... အရာအားလုံး ငါတို့ ချီလျန်မျိုးနွယ်နဲ့ ပတ်သက်နေတယ်ဆိုတာ သိသွားခဲ့ရင်... နောက်ဆက်တွဲ ဘာတွေ ဖြစ်လာမလဲဆိုတာ သမီး စဉ်းစားကြည့်ပါဦး "
မိခင်ဖြစ်သူ၏ ရှင်းပြချက်ကို နားထောင်ပြီးနောက်... ချီမုန်၏ မျက်ဝန်းများ ကျဉ်းမြောင်းသွားကာ... သူ၏ရင်ထဲတွင် ထိတ်လန့်မှု အရိပ်အယောင်များ ထွက်ပေါ်လာတော့သည်။
စောစောက သူ ခံစားခဲ့ရသည့်... ဖော်ပြမတတ်နိုင်သော စိုးရိမ်စိတ်၏ အကြောင်းရင်းကို... နောက်ဆုံးတွင် သူ နားလည်သွားပြီ ဖြစ်သည်။
အခန်း ( ၂၇၈ ) - မျိုးနွယ်စုအစည်းအဝေး၊ ချီလျို၏ အစီအစဉ်နှင့် ဆုံးဖြတ်ချက်ချရမည့်အချိန်
မှန်ပေသည်... ထိုရွှမ်ယိုနန်းတော်မှာ အမှန်တကယ်ပင် ဘာမှမဟုတ်ချေ။
သို့သော်... ရွှမ်ယိုနန်းတော်၏ နောက်ကွယ်တွင် ရှိနေသော... ရှီမိုကောင်းကင်ဘုံမှာမူ ချီလျန်မျိုးနွယ်တစ်ခုလုံးအား စိုးရိမ်တုန်လှုပ်စေသည့်... ဧရာမအင်အားစုကြီး ဖြစ်ပေသည်။
အဆင့်မြင့်လှသော အင်မော်တယ်ဘုရင်တစ်ပါးဖြစ်သည့် ရှီမိုအရှင်အဖို့... ချီလျန်မျိုးနွယ်ကို ဖျက်ဆီးပစ်ရန်မှာ... လက်ဖျစ်တစ်ချက်တီးရသကဲ့သို့ လွယ်ကူလှ၏။ သူသည် ချီလျန်မျိုးနွယ်အပေါ် မကျေနပ်မှုများ ရှိနေသော်လည်း... ထိုအကြောင်းကို လူသိရှင်ကြား ထုတ်ဖော်ပြသခြင်း မရှိခဲ့ပေ။ သူ၏... နယ်ပယ်အသီးသီးရှိ အစွမ်းထက် ကျင့်ကြံသူများကိုသာ... ချီလျန်မျိုးနွယ်အား ရံဖန်ရံခါ ပြဿနာရှာရန်... ခွင့်ပြုထားခဲ့ခြင်း ဖြစ်သည်။ ၎င်းမှာ အဘယ်ကြောင့်နည်း။
အကြောင်းမှာ... ချီလျန်မျိုးနွယ်သည် အင်မော်တယ်နယ်မြေဘက်မှ ကူးပြောင်းလာပြီး... သစ္စာခံထားခြင်းကြောင့်ပင် မဟုတ်ပါလော။ ကမ္ဘာ့အပြင်ဘက်သို့ ဟန်ပြပြသထားခြင်းပင် ဖြစ်စေကာမူ... ချီလျန်မျိုးနွယ်ကိုယ်တိုင်က မိမိကိုယ်ကိုယ် သေတွင်းတူးသည့် လုပ်ရပ်မျိုး မလုပ်သရွေ့... နတ်ဆိုးနယ်မြေအနေဖြင့် ၎င်းတို့အပေါ် လွယ်လွယ်နှင့် အရေးယူ၍ မရနိုင်ချေ။
သို့မဟုတ်ပါက... နောင်တွင် မည်သည့်ပြင်ပအင်အားစုမှ နတ်ဆိုးနယ်မြေထံ... သစ္စာခံဝံ့တော့မည်နည်း။ ချီလျန်မျိုးနွယ်သည် အခြားသူများအတွက်... သင်ခန်းစာတစ်ခု ဖြစ်သွားပေလိမ့်မည်။
ထိုအကြောင်းပြချက်ကြောင့်ပင်... မြင့်မြတ်လှသော ရှီမိုထျန်းကျွင်းသည် မကျေမနပ်ဖြစ်နေသော်လည်း... ချီလျန်မျိုးနွယ်ကို အမြဲတစေ ကိုင်တွယ်နိုင်ခြင်း မရှိခဲ့ခြင်းဖြစ်သည်။
သို့သော် ယခုမူ အခြေအနေမှာ ပြောင်းလဲသွားခဲ့လေပြီ။
ရွှမ်ယိုနန်းတော်မှာ မည်မျှပင် အားနည်းပါစေ... ရှီမိုကောင်းကင်ဘုံ၏ လက်အောက်ခံ အင်အားစုတစ်ခုဖြစ်ပြီး... ရှီမိုကောင်းကင်ဘုံ၏ ဂုဏ်သိက္ခာကို ကိုယ်စားပြုနေဆဲပင်။
အကယ်၍ ဟန်ယိုထျန်းကျွင်းအား သတ်ဖြတ်သူမှာ... ချီလျန်မျိုးနွယ်နှင့် ဆက်နွှယ်နေကြောင်း အတည်ပြုနိုင်ပါက... ရှီမိုကောင်းကင်ဘုံအတွက် ချီလျန်မျိုးနွယ်အပေါ် အရေးယူရန်... တရားဝင် အကြောင်းပြချက်တစ်ခု ရရှိသွားမည် မဟုတ်ပါသလော။
ထို့အပြင်... ထိုအကြောင်းပြချက်မှာ ပြင်ပကမ္ဘာမှ မည်သူမျှ မေးခွန်းထုတ်နိုင်မည်မဟုတ်သော... ခိုင်လုံသည့် အကြောင်းပြချက်လည်း ဖြစ်ပေလိမ့်မည်။
အဆုံးတွင်မူ... ဤသည်မှာ တစ်စုံတစ်ယောက်မှ ချီလျန်မျိုးနွယ်အား ရည်ရွယ်ချက်ရှိရှိ ပစ်မှတ်ထားခြင်း မဟုတ်ဘဲ... ချီလျန်မျိုးနွယ်ကိုယ်တိုင်က မိမိတို့၏ ပျက်စီးရာပျက်စီးကြောင်းကို ဖန်တီးခဲ့ခြင်းဖြစ်၍... အခြားသူကို အပြစ်တင်၍ မရနိုင်တော့ချေ။
ယခုနှစ်များအတွင်း... ချီလျန်မျိုးနွယ်သည် အဘယ်ကြောင့်... အောက်ကျနောက်ကျ ခံနေခဲ့ရသနည်း။ ချီမုန် အပါအဝင်... မျိုးနွယ်စုဝင်များအားလုံး အခြားနတ်ဆိုးနယ်မြေများတွင်... အဘယ်ကြောင့် အမှုထမ်းနေကြရသနည်း။ ၎င်းမှာ... ရှီမိုကောင်းကင်ဘုံမှ ချီလျန်မျိုးနွယ်အား ပစ်မှတ်ထားရန်... အကြောင်းပြချက် မရှာနိုင်စေရန် မဟုတ်ပါလော။
သို့မဟုတ်ပါက... ထျန်းကျွင်းတစ်ပါးသာ စောင့်ကြပ်နေသည့် ရွှမ်ယိုနန်းတော်သည်... အင်မော်တယ်အဆင့် ကျင့်ကြံသူတစ်ဦး၏ သမီးဖြစ်သူအား... မည်သို့ဝံ့ဝံ့စားစား အမိန့်ပေးစေခိုင်းရဲပါမည်နည်း။
ချီလျန်မျိုးနွယ်၏ နှစ်ရှည်လများ သည်းခံလျှော့ပေးမှုများကြောင့်... ရှီမိုထျန်းကျွင်းသည် အပြစ်ရှာ၍မရဘဲ ပေါ်ပေါ်တင်တင် ရန်မပြုဝံ့ခဲ့ခြင်းဖြစ်ကာ... တိတ်တဆိတ်သာ ပြဿနာရှာနိုင်ခဲ့ခြင်း ဖြစ်သည်။
ယခုမူ... သခင်မှ ဟန်ယိုထျန်းကျွင်းကို ဦးစွာ သတ်ပြီးနောက်... ချီလျန်မျိုးနွယ်ထံသို့ ရောက်လာခဲ့လေပြီ။ ဤသတင်းမှာ... ကြာရှည်စွာ ဖုံးကွယ်ထားနိုင်မည်... မဟုတ်ချေ။
ရှီမိုကောင်းကင်ဘုံမှ ဤအကြောင်းများကို သိရှိသွားသည့်အခါ.....
ချီမုန်၏ သွယ်လျသော ကိုယ်လုံးလေးမှာ တုန်ရင်သွားကာ ဆက်၍ မတွေးဝံ့တော့ပေ။
အကြောင်းမှာ... သူ့အနေဖြင့် ရလဒ်ကို... မြင်ယောင်နေသောကြောင့် ဖြစ်သည်။ ရှီမိုကောင်းကင်ဘုံသည် သွေးနံ့ရသည့် ငါးမန်းတစ်ကောင်ကဲ့သို့... အတင်းအဓမ္မ ခုန်အုပ်လာမည်မှာ သေချာပြီး... ချီလျန်မျိုးနွယ်ကို လွယ်လွယ်နှင့်... လွှတ်ပေးမည် မဟုတ်ပေ။
" နင် ချက်ချင်းသွားပြီး ချီလျန်မျိုးနွယ်ရဲ့ အကြီးအကဲတွေအားလုံးကို အစည်းအဝေးခန်းမမှာ စုခိုင်းလိုက်။ ငါတို့ရဲ့ ရပ်တည်ချက်ကို ချက်ချင်း တစ်သံတည်းဖြစ်အောင် လုပ်ပြီး တုံ့ပြန်ဖို့ ပြင်ဆင်ရမယ် "
ချီမုန် ထိတ်လန့်နေစဉ်မှာပင် ချီလျို၏ ခိုင်မာသောအသံသည် သူ့အား သတိပြန်ဝင်လာစေခဲ့သည်။
" အမေ့ရဲ့ သဘောက..... "
ချီမုန်သည် ဝေခွဲမရဖြစ်သွား၏။
မိခင်ဖြစ်သူ၏ လုပ်ရပ်မှာ ချီလျန်မျိုးနွယ်တစ်ခုလုံးကို ဦးဆောင်၍ ကုချန်နှင့် လမ်းခွဲရန် ပြင်ဆင်ခြင်း ဖြစ်မည်လားဟု သူ စိုးရိမ်မိသည်။
အဆုံးတွင်မူ... သခင်ဖြစ်သူကြောင့် ချီလျန်မျိုးနွယ်တစ်ခုလုံးမှာ ဘေးအန္တရာယ်နှင့် ရင်ဆိုင်နေရခြင်းဖြစ်ပြီး... သခင်မှာလည်း ချီလျန်မျိုးနွယ်တစ်ခုလုံးကို ကာကွယ်ပေးနိုင်လောက်အောင်... အစွမ်းမထက်သေးပေ။
ယခုအချိန်တွင်... ချီလျန်မျိုးနွယ်ကို ထိန်းသိမ်းရန်မှာ... သခင်နှင့် အဆက်အသွယ်ဖြတ်ပြီး ဆုံးရှုံးမှုများကို... အချိန်မီ လျှော့ချရန်သာ ရှိတော့သည်ဟု... ထင်မှတ်ရပေသည်။
ချီမုန်၏ တွေဝေနေသော အမူအရာကို ကြည့်ကာ... မိခင်နှင့် သမီးကြားရှိ နက်ရှိုင်းသော ဆက်နွှယ်မှုအရ... ချီလျိုသည် သမီးဖြစ်သူ ဘာတွေးနေသည်ကို... မည်သို့လျှင် မသိဘဲ နေပါမည်နည်း။
သူသည် စိတ်ကို တည်ငြိမ်အောင် ထိန်းလိုက်ပြီးနောက်... လေးနက်သော အသံကို ခပ်တိုးတိုး ပြောင်းလဲလိုက်ကာ.....
" စိတ်မပူပါနဲ့... အမေ သခင့်ကို သစ္စာဖောက်မှာ မဟုတ်ဘူး... အမေ့အနေနဲ့ ချီလျန်မျိုးနွယ်တစ်ခုလုံးကို ဦးဆောင်ပြီး... သခင့်ဆီမှာ သစ္စာခံဖို့ ဆုံးဖြတ်ခဲ့ပြီးကတည်းက... အမေ့စကားကို ငါ ဘယ်တော့မှ ပြန်မရုတ်သိမ်းဘူး.....
ဘိုးဘေးကြီး ချီရှောင်က... အမေ့ကို မိသားစုခေါင်းဆောင်အဖြစ် တာဝန်ပေးတုန်းက မှာကြားခဲ့တာ ရှိတယ်... အမေတို့ ချီလျန်မျိုးနွယ်ဟာ အင်မော်တယ်နယ်မြေကို တစ်ကြိမ် သစ္စာဖောက်ခဲ့ဖူးတယ်.....
အဲဒါက အမေတို့မျိုးနွယ်စုရဲ့ အပြစ်မဟုတ်ခဲ့ပေမယ့်... နောက်ဆုံးမှာတော့ အမေတို့က သစ္စာဖောက်ခဲ့တာပဲ... ဒါကြောင့် အမေတို့မျိုးနွယ်စုဟာ နောက်ထပ် ဘယ်တော့မှ သစ္စာဖောက်လို့မရဘူး... မဟုတ်ရင် ကောင်းကင်ဘုံအားလုံးရဲ့ စွန့်ပစ်တာကို ခံရလိမ့်မယ်.....
အမေ သခင့်အပေါ်မှာ အရာအားလုံး ပုံအောပြီးကတည်းက... ဒါဟာ လောင်းကြေးထပ်လိုက်တာပဲ... လမ်းခုလတ်ကနေ နောက်ဆုတ်ဖို့ အကြောင်းမရှိဘူး "
ချီလျိုသည် ချီလျန်မျိုးနွယ်မှာ ယခုအခါ ချောက်ကမ်းပါး အစွန်းတွင် ရောက်နေသည်ကို ရှင်းရှင်းလင်းလင်း မြင်နေရသည်။
ဘိုးဘေးကြီး ချီရှောင် ကွယ်လွန်သွားသည့် သတင်းမှာ... ရှီမိုကောင်းကင်ဘုံ၏ နယ်ပယ်အသီးသီးသို့... တဖြည်းဖြည်း ပျံ့နှံ့နေပြီဖြစ်သည်။ နောက်ဆုံးတွင်... ရှီမိုကောင်းကင်ဘုံ လက်အောက်ခံ နယ်ပယ်များ၏ ပစ်မှတ်ထားမှုမှာ... ပိုမိုပြင်းထန်လာမည်ဖြစ်ပြီး ချီလျန်မျိုးနွယ် လုံးဝ ပျက်စီးသွားသည်အထိ... ဖြစ်လာပေလိမ့်မည်။
ကုချန်၏အစွမ်းကသာ ချီလျန်မျိုးနွယ်ကို ဤအခက်အခဲမှ လွတ်မြောက်ရန် ကူညီပေးနိုင်မည်ဟု ချီလျို မျှော်လင့်ချက် ထားနေခြင်းဖြစ်သည်။
သခင်သည်... အင်မော်တယ်ဘုရင် အဆင့်သို့ ရောက်ရှိသွားသည်နှင့်... ချီလျန်မျိုးနွယ်တစ်ခုလုံးကို ကာကွယ်ပေးနိုင်လောက်အောင်... အစွမ်းထက်လာပေလိမ့်မည်။ ထိုအချိန်ကျလျှင်... နတ်ဆိုးနယ်မြေမှ ထွက်ခွာသွားလျှင်ပင်... သခင်၏ကာကွယ်မှုဖြင့် နတ်ဆိုးနယ်မြေသည်... အလွန်အကျွံ လက်စားချေရဲမည် မဟုတ်ပေ။
ထိုအကြောင်းကြောင့်ပင် ချီလျိုသည် သူ၏ မျှော်လင့်ချက်အားလုံးကို ကုချန်အပေါ်တွင် ပုံအောထားခြင်း ဖြစ်၏။
ထို့ကြောင့်လည်း... သူသည် ကုချန်၏ ညွှန်ကြားချက်များကို... အပတ်တကုတ် ကြိုးစားဆောင်ရွက်ပေးနေခြင်း ဖြစ်သည်။
ရုတ်တရက် အခြေအနေများ ပြောင်းလဲသွားသည့် ယခုအချိန်တွင်ပင်... ချီလျိုသည် ချီလျန်မျိုးနွယ်နှင့် ကုချန်ကြားရှိ ဆက်ဆံရေးကို... ဖြတ်တောက်ရန် အလျဉ်း စိတ်မကူးခဲ့ချေ။
အမှန်စင်စစ် သူသည် ချီလျန်မျိုးနွယ်တစ်ခုလုံး စတေးခံရရန်ပင် ပြင်ဆင်ထားပြီး ဖြစ်သည်။
ကုချန် ဘေးကင်းမည်ဆိုလျှင် ချီလျန်မျိုးနွယ်၏ ထက်ဝက် သို့မဟုတ် အများစု စတေးခံရလျှင်ပင် တန်သည်ဟု သူ ယူဆထားသည်။
အဘယ်ကြောင့်ဆိုသော်... ချီလျန်မျိုးနွယ်မှ ပေးဆပ်ရသည့် တန်ဖိုးမှာ... ကုချန်နှင့် မျိုးနွယ်စုကို ပိုမိုနက်ရှိုင်းစွာ... ချည်နှောင်ပေးမည် ဖြစ်သောကြောင့်ပင်။ ချီလျန်မျိုးနွယ်၏ စတေးမှု ကြီးမားလေလေ... ဤနှောင်ကြိုးမှာ ပိုမိုခိုင်မာလေလေ ဖြစ်ပေလိမ့်မည်။
ဤသည်မှာ မိသားစုခေါင်းဆောင်တစ်ဦးအနေဖြင့် ချီလျို၏ ပြတ်သားသော အရည်အချင်းပင် ဖြစ်သည်။
သူ သိသည်မှာ... ကုချန်အတွက်သာ အလုပ်လုပ်ပေးမည်ဆိုလျှင်... အဆုံးတွင် ကုချန်သည် ကတိအတိုင်း ကာကွယ်ပေးမည်ဖြစ်သော်လည်း... ထိုကာကွယ်မှုမှာ အပေးအယူတစ်ခုသဖွယ်သာ ဖြစ်နေပေလိမ့်မည်။
တစ်ကြိမ်၊ နှစ်ကြိမ် ကာကွယ်ပေးလျှင် အဆင်ပြေနိုင်သော်လည်း... သုံးကြိမ်၊ လေးကြိမ်နှင့် ထို့ထက်မက ဖြစ်လာလျှင်မူ... မည်သို့ဖြစ်မည်နည်း။
အပေးအယူတစ်ခု ဖြစ်နေသရွေ့ ၎င်းသည် တစ်နေ့နေ့တွင် ကုန်ဆုံးသွားမည်သာ။
ထိုနေ့ရောက်လျှင် ချီလျန်မျိုးနွယ်သည် ကျရှုံးပျက်စီးရမည့် ကံကြမ္မာမှ ရှောင်လွှဲနိုင်မည် မဟုတ်ချေ။
၎င်းကို ရှောင်ရှားရန်အတွက်... ချီလျိုသည် ယခုအကြိမ်တွင် ချီလျန်မျိုးနွယ်တစ်ခုလုံးကို... ကုချန်နှင့်အတူ ခိုင်ခိုင်မာမာ ရပ်တည်စေရန်... ဆုံးဖြတ်လိုက်ခြင်း ဖြစ်သည်။ မျိုးနွယ်စုဝင်များစွာ၏ အသက်ကို စတေးရမည်ဆိုလျှင်ပင် သူ တွန့်ဆုတ်နေမည် မဟုတ်ပေ။
မျိုးနွယ်စုဝင်များ၏ စတေးမှုနှင့်အတူ... သခင်နှင့် ချီလျန်မျိုးနွယ်ကြားရှိ ဆက်ဆံရေးမှာ... အပေးအယူသက်သက် မဟုတ်တော့ပေ။
ဤသည်မှာ... ချီလျန်မျိုးနွယ်၏ အမွေအနှစ်ကို ဆက်လက်ထိန်းသိမ်းနိုင်မည့်... ရေရှည်တည်တံ့သော တာအိုပင် ဖြစ်ပေသည်။
ချီမုန်မှာမူ ချီလျို၏ အစီအစဉ်များကို မသိရှိရှာပေ။
သို့သော်... မိခင်ဖြစ်သူ၏ လှပသော မျက်ဝန်းများအတွင်းရှိ ပြတ်သားမှုကို မြင်လိုက်ရသောအခါ... ချီမုန်၏စိတ်နှလုံးမှာ မသိစိတ်အရ တည်ငြိမ်သွားပြီး... ချက်ချင်းပင် ပြန်လည် ထူးလိုက်လေသည်။
" အမေ စိတ်ချပါ... သမီး အခုပဲ မျိုးနွယ်စု အကြီးအကဲတွေကို သွားပြောပြီး... အစည်းအဝေးခန်းမမှာ စုခိုင်းလိုက်ပါ့မယ် "
" အင်း... သွားတော့... အမေလဲ ခဏနေရင် လာခဲ့မယ် "
ချီလျိုသည် ခေါင်းကို အနည်းငယ် ငြိမ့်ပြလိုက်ပြီးနောက် သူ၏ပုံရိပ်မှာ ပျောက်ကွယ်သွားလေသည်။
...
ချီလျန်မျိုးနွယ်၏ နက်ရှိုင်းရာအရပ်ရှိ ကျင့်ကြံခြင်း စခန်းအတွင်း.....
ကုချန်၏ အနည်းငယ် မှိတ်ထားသော မျက်လုံးများမှာ ရုတ်တရက် ပွင့်လာကာ သူ၏မျက်ဝန်းထဲတွင် စဉ်းစားဆင်ခြင်နေဟန်များ ပေါ်လွင်နေ၏။
သူ၏ အစွမ်းဖြင့်ဆိုလျှင် ချီလျန်ဘိုးဘေးနယ်မြေအတွင်းရှိ လှုပ်ရှားမှုမှန်သမျှမှာ သူ၏ မျက်စိအောက်မှ လွတ်မြောက်နိုင်ခြင်း မရှိချေ။
ချီလျန်မျိုးနွယ်အတွင်းရှိ အစွမ်းထက် ကျင့်ကြံသူအားလုံး ဗဟိုချက်ဆီသို့ စုရုံးသွားကြသည်ကိုလည်း သူ ခံစားသိရှိနေသည်။
ထိုသို့ ပုံမှန်မဟုတ်သော လှုပ်ရှားမှုများ ဖြစ်ပေါ်နေရသည့် အကြောင်းအရင်းကိုလည်း ကုချန် ကောင်းစွာ သိရှိနေပေသည်။
" ဒါဆို... မင်းတို့ နောက်ဆုံးမှာ ဘယ်လို ရွေးချယ်မလဲ... ကြည့်ကြသေးတာပေါ့ "
ကုချန်သည် လှောင်ပြုံးကလေးဖြင့် ခပ်တိုးတိုး ရေရွတ်လိုက်သည်။
အကယ်၍... ဤချီလျန်မျိုးနွယ်သည် သစ္စာရှိပြီး သူ၏ဘက်၌ အမြဲရပ်တည်မည်ဆိုလျှင်... သူသည်လည်း ချီလျန်မျိုးနွယ်ကို... မည်သည့်ဆုံးရှုံးမှုမျိုးမျှ ခံရစေမည်မဟုတ်ပေ။ ရှီမိုထျန်းကျွင်း... ကိုယ်တိုင် ဆင်းသက်လာလျှင်ပင်... ကုချန်အနေဖြင့် ခုခံနိုင်စွမ်း ရှိပေသည်။
သို့သော်... အကယ်၍ ဤချီလျန်မျိုးနွယ်သည် မရိုးသားသော ရည်ရွယ်ချက်များ ရှိနေမည်ဆိုပါက... ကုချန်သည်လည်း ငြိမ်နေမည် မဟုတ်သလို... မည်သည့်အကူအညီမျှလည်း ပေးလိမ့်မည် မဟုတ်ပေ။