အခန်း (၂၇၉-၂၈၀)
Vol. 20 Ch. 279-280
အခန်း ( ၂၇၉ ) - ပြီးပြည့်စုံသော အစီအစဉ်၊ တစ်ခန်းလုံး ထိတ်လန့်သွားခြင်းနှင့် မျိုးနွယ်စု သုတ်သင်ရှင်းလင်းခံရမည့် ဘေးဒုက္ခ
ကုချန်သည်... အရာအားလုံးကို အစမှအဆုံးတိုင်... ရှင်းလင်းစွာ မြင်နိုင်ခဲ့သည်။ သူ့အပေါ် သစ္စာရှိခဲ့ကြသူများမှာ... ချီလျိုနှင့် ချီမုန် သားအမိနှစ်ဦးသာဖြစ်ပြီး... ချီလျန်မျိုးနွယ်စု တစ်ခုလုံး မဟုတ်ပေ။
ချီလျန်မျိုးနွယ်စု တစ်ခုလုံး သူ၏စမ်းသပ်မှုကို အောင်မြင်မှသာ သူ စိတ်အေးနိုင်မည် ဖြစ်သည်။
မည်သို့ပင်ဆိုစေကာမူ... ကုချန်အနေဖြင့် ယခင်က ကြုံတွေ့ခဲ့ရသော သစ္စာဖောက်ခံရမှုမျိုးကို... အကြောင်းပြချက်မရှိဘဲ ဒုတိယအကြိမ်... ထပ်မံ မကြုံတွေ့လိုတော့ပေ။
ဤတစ်ကြိမ်တွင်မူ... သူသည် နက်ရှိုင်းသော ချောက်နက်နတ်ဆိုးနယ်မြေကို ဖြတ်သန်းလာခဲ့ပြီး... ဟန်ယိုထျန်းကျွင်းကို ပေါ့ပေါ့ပါးပါးပင် သတ်ဖြတ်ပြီးနောက်... ချီလျန်နတ်ဆိုးနယ်မြေသို့ ရောက်ရှိလာချိန်တွင်... သူ၏ လာရာလမ်းကြောင်းကို ရည်ရွယ်ချက်ရှိရှိဖြင့် ဖုံးကွယ်မထားခဲ့ပေ။
သူ၏ရည်ရွယ်ချက်မှာ... ချီလျန်မျိုးနွယ်စုသည် ဤကဲ့သို့သော အခြေအနေမျိုးအောက်တွင်ပင်.. သူ၏ဘက်၌ ခိုင်ခိုင်မာမာ ဆက်လက် ရပ်တည်နိုင်မည်လား ဆိုသည်ကို... သိလိုခြင်းပင် ဖြစ်သည်။
ရှီမိုကောင်းကင်မှ လာနိုင်သော ခြိမ်းခြောက်မှုများနှင့် ပတ်သက်၍မူ ကုချန်သည် အနည်းငယ်မျှပင် ကြောက်ရွံ့ခြင်း မရှိပေ။
သူ၏ လက်ရှိ ပြင်ပသို့ ပြသထားသော အစွမ်းမှာ... အင်မော်တယ်ဘုရင်အဆင့် တစ်ပိုင်းသာ ဖြစ်သော်လည်း... 'ကောင်းကင်ဘုံအလုံးစုံ အမှန်တရား နားလည်ခြင်း' နှင့် 'ချီတစ်ခုမှ သန့်စင်သူသုံးပါး ခွဲထွက်ခြင်း' ကဲ့သို့သော... နတ်ဘုရားစွမ်းအင်များကိုပါ ပေါင်းစပ်လိုက်လျှင်... သူ ထုတ်ဖော်နိုင်သည့် အစွမ်းမှာ... အင်မော်တယ်ဘုရင်တစ်ပါးနှင့် နှိုင်းယှဉ်နိုင်ပေသည်။
ရှီမိုထျန်းကျွင်းကိုယ်တိုင် ရောက်လာခဲ့လျှင်ပင် ကုချန်သည် ကြောက်ရွံ့နေမည် မဟုတ်ပေ။
ထို့အပြင်... သူ၏ လက်ထဲတွင် 'ကံတရားပြောင်းပြန်လှန် အမွှေးတိုင်'လည်း ရှိနေသေးသည်။ ဤအမွှေးတိုင်ကို ထွန်းညှိလိုက်သည်နှင့်... သူ၏ လက်ရှိ တိုက်ခိုက်ရေးစွမ်းရည်ဖြင့်... အင်မော်တယ်ဘုရင်တစ်ပါးကိုပင် ချေမှုန်းနိုင်မည် ဖြစ်သည်။
နတ်ဆိုးနယ်မြေ တစ်ခုလုံးကို ပြောင်းပြန်လှန်ပစ်ရန်မှာလည်း မဖြစ်နိုင်သည့် အရာမဟုတ်ပေ။
ဤကဲ့သို့သော ဖဲချပ်များစွာ ရှိနေပါလျက်နှင့် ချီလျန်မျိုးနွယ်စု တစ်ခုတည်းကို သူ မကာကွယ်နိုင်ဘဲ နေမည်လော။
ကုချန်သည်... ချီလျန်မျိုးနွယ်စု၏ ဘေးကင်းလုံခြုံရေးကို... နောက်ပြောင်ရမည့် ကိစ္စအဖြစ် သဘောမထားခဲ့ပေ။ သူသည်... ချီလျန်မျိုးနွယ်စုကို ကာကွယ်နိုင်မည်ဟု... အပြည့်အဝ ယုံကြည်မှု ရှိနေသောကြောင့်သာ... ဤကဲ့သို့ ပြုလုပ်ခဲ့ခြင်း ဖြစ်သည်။
အကျိုးဆက်ကို မစဉ်းစားဘဲ ချီလျန်မျိုးနွယ်စုအား အန္တရာယ်ထဲသို့ သူ မိုက်မိုက်ကန်းကန်း တွန်းပို့မည် မဟုတ်ပေ။
ယခုမူ ချီလျန်မျိုးနွယ်စုမှ မည်သို့ ရွေးချယ်မည်ကို စောင့်ကြည့်ရမည်သာ.....
ကုချန်သည် မျက်လုံးများကို အသာအယာ မှိတ်လိုက်ကာ ချီလျန်မျိုးနွယ်စု၏ လှုပ်ရှားမှုများကို ဆက်လက် အာရုံမစိုက်တော့ပေ။
မကြာမီ အဖြေကို သိရလိမ့်မည်ဟု သူ သိနေခဲ့သည်။
.........
" ဘာတွေဖြစ်တာလဲ။ မိသားစုခေါင်းဆောင်က ငါတို့ကို အစည်းအဝေး ခေါ်တယ်တဲ့လား "
" ခေါင်းဆောင်က အပြင်ထွက်သွားတာ မဟုတ်ဘူးလား။ ငါတို့ကို အစည်းအဝေး ခေါ်ဖို့ ဘယ်လိုလုပ် အချိန်ရှိနေတာလဲ "
" ဘာဖြစ်တာလဲတော့ ငါလဲ မသိဘူး။ အရင်ဆုံး ခန်းမကို သွားကြစို့ "
သံသယဖြစ်ဖွယ် တိုးတိုးသာသာ ပြောဆိုသံများသည်... ချီလျန်မျိုးနွယ်စု ဘိုးဘေးမြေ၏ အနက်ရှိုင်းဆုံးနေရာမှ... ထွက်ပေါ်လာခဲ့သည်။ သင်းပျံ့သော ရနံ့များနှင့်အတူ... ဆွဲဆောင်မှုရှိသော ကိုယ်ဟန်များမှာ... တစ်ယောက်ပြီးတစ်ယောက် ချီလျန်မျိုးနွယ်စု၏... တိုင်ပင်ဆွေးနွေးရာခန်းမအတွင်းသို့ ပေါ်ထွက်လာကြသည်။
" ချီမုန်လေး... ဘာတွေဖြစ်နေတာလဲ။ အစ်မကြီး ချီလျိုမှာ... ကြေညာစရာ တစ်ခုခု ရှိနေလို့လား "
ခန်းမအတွင်းတွင်... စိမ်းရောင်ဝတ်စုံကို ဝတ်ဆင်ထားသော အမျိုးသမီးတစ်ဦးသည်... ချီမုန်၏အနားသို့ လျှောက်လာရင်း... ရယ်မောကာ မေးလိုက်သည်။
" ဒေါ်လေးချင်း..... "
လာသူသည်... သူ့ကို 'ချီမုန်လေး' ဟု ခေါ်သည်ကို ကြားရသောအခါ... ချီမုန်သည် သဘောမကျသလိုဖြင့် တစ်ဖက်လူ၏ ရင်ဘတ်ကို တစ်ချက်ကြည့်လိုက်ပြီးနောက်... သူ၏ ကိုယ်ပိုင်ရင်ဘတ်ကို မသိမသာ ပြန်ကြည့်ကာ... အရှုံးပေးသည့်အလား ခေါင်းငုံ့သွားတော့သည်။
" ဟီးဟီး... ငါ့မေးခွန်းကို မဖြေရသေးဘူးနော် "
ချီချင်း၏ လှပသော မျက်နှာတွင် စပ်စုလိုစိတ်များ ပြည့်နှက်နေသည်။
" ဪ... ဟုတ်သားပဲ... နင်က ဘိုးဘေးမြေထဲကို ယောင်္ကျားတစ်ယောက် ခေါ်လာတယ်လို့ ငါ ကြားလိုက်မိသေးတယ်... ချီမုန်လေး... အဲ့ဒါကြောင့် နင့်အမေက ငါတို့ကို အပြစ်ပေးဖို့... ဒီကို ခေါ်တာလား "
ထိုစကားကို ကြားလိုက်ရသည်နှင့်... ခန်းမအတွင်းရှိ အခြား ချီလျန်မျိုးနွယ်စု အကြီးအကဲများ၏ အကြည့်များမှာ... ချီမုန်ထံသို့ ကျရောက်သွားကြသည်။
ချီလျန်မျိုးနွယ်စုသည် အင်မော်တယ်နယ်မြေတွင်... နာကျင်ဖွယ် သင်ခန်းစာများကို ခံစားခဲ့ရသောကြောင့်... ထိုအချိန်မှစ၍ ဘိုးဘေးတို့သည်... စည်းကမ်းချက်တစ်ခုကို ချမှတ်ခဲ့ကြသည်။
ထိုအချက်မှာ... ချီလျန်မျိုးနွယ်စုဝင်များသည် ပြင်ပကမ္ဘာမှ အမျိုးသား ကျင့်ကြံသူများနှင့်... မည်သည့် ထိတွေ့ဆက်ဆံမှုမျိုးမှ မလုပ်ရဟူသော... အချက်ပင် ဖြစ်သည်။ ဘိုးဘေးမြေအတွင်းသို့ ခေါ်ဆောင်လာရန်မှာမူ ပို၍ပင် မဖြစ်နိုင်ပေ။
လွန်ခဲ့သော နှစ်ပေါင်း သောင်းချီအတွင်း... မည်သည့် အမျိုးသားမျှ ချီလျန်မျိုးနွယ်စု၏ ဘိုးဘေးမြေသို့... မရောက်ဖူးခဲ့ချေ။ ကုချန်မှာ ပထမဆုံးသော ပုဂ္ဂိုလ်ပင် ဖြစ်သည်။
" ဟွန်း... အခု ငါတို့ ချီလျန်မျိုးနွယ်စုက စိုးရိမ်ရတဲ့ အခြေအနေမှာ ရှိနေတာတောင်... တချို့လူတွေက စိတ်ကူးယဉ်နေတုန်းပဲ... ဘိုးဘေးတို့ရဲ့ စည်းကမ်းကိုတောင် ချိုးဖောက်နေကြသေးတယ်.....
ဒါက အပြစ်ပေါ် အပြစ်ဆင့်တာပဲ... မိသားစုခေါင်းဆောင် ရောက်လာတဲ့အခါ ကျွန်မ သေချာ မေးရမယ်... ခေါင်းဆောင်ရဲ့ သမီးဖြစ်ရုံနဲ့... ဒီလောက်တောင် မိုက်မိုက်ကန်းကန်း လုပ်လို့ရသလားလို့ပေါ့ "
ထိုအချိန်တွင် အနည်းငယ် အသက်ကြီးပုံရသော်ငြား ဆွဲဆောင်မှုရှိသော အခြား ချီလျန်မျိုးနွယ်စု အကြီးအကဲ တစ်ဦးမှ မကျေမနပ် ပြောဆိုလိုက်သည်။
" ဟီးဟီး... တတိယအကြီးအကဲရဲ့ ဒေါသကတော့ ပြင်းနေတုန်းပဲနော်... အေးမြသွားအောင် တာအိုအဖော် တစ်ယောက်လောက် ရှာလိုက်ရင်... ကောင်းမယ်လို့ ထင်တယ် "
ချီချင်းနှင့် ချီလျိုမှာ အလွန် ရင်းနှီးကြသူများ ဖြစ်သည်။ ယခုအခါ... တတိယအကြီးအကဲမှ ရည်ရွယ်ချက်ရှိရှိ ပြောဆိုနေသည်ကို မြင်သောအခါ... သူသည်လည်း အလျှော့မပေးဘဲ ပြန်လည် တုံ့ပြန်လိုက်သည်။
" နင်! "
တတိယအကြီးအကဲသည် မျက်လုံးများ ပြူးသွားကာ ဒေါသကြောင့် ရင်ဘတ်မှာ နိမ့်ချည်မြင့်ချည် ဖြစ်နေတော့သည်။
" ဒေါ်လေးချင်းနဲ့ တတိယအကြီးအကဲတို့... ကျေးဇူးပြုပြီး ဆက်မပြောကြပါနဲ့တော့... အမေ ရောက်လာရင် ဒီကိစ္စတွေကို အားလုံးကို ပြောပြပြီး... သင့်တော်တဲ့ ရှင်းပြချက်တစ်ခု ပေးပါလိမ့်မယ် "
တတိယအကြီးအကဲနှင့် ချီချင်းတို့ ထိပ်တိုက်တွေ့နေသည်ကို မြင်သောအခါ ချီမုန်သည် အလျင်အမြန် ဝင်ရောက် ဖြန်ဖြေပေးလိုက်၏။
ချီမုန်၏ စကားကို ကြားသောအခါ... တတိယအကြီးအကဲသည် ချီချင်းကို မကျေမနပ် ကြည့်လိုက်ပြီးနောက်... ဘေးသို့ ဆုတ်ခွာသွားကာ ဘာမှ ထပ်မပြောတော့ပေ။
သို့သော် ခန်းမအတွင်းရှိ အငွေ့အသက်မှာ လျော့ပါးသွားခြင်း မရှိဘဲ ပိုမို လေးလံလာခဲ့၏။
ချီလျန်မျိုးနွယ်စု၏ ဘိုးဘေးကြီး ချီရှောင် ကျဆုံးသွားကတည်းက... မျိုးနွယ်စုသည် တစ်နေ့ထက်တစ်နေ့ ဆုတ်ယုတ်လာခဲ့ကာ... ပြင်ပမှ ဖိအားများလည်း တိုးလာခဲ့သည်။ ဤအကြီးအကဲများသည်လည်း... ချီလျန်မျိုးနွယ်စုအတွက် အချိန် သိပ်မကျန်တော့သည်ကို... အလိုလို သိရှိနေကြသည်။
ဤဖိအားများပြည့်နှက်နေသော အငွေ့အသက်အတွင်း၌ အချိန်မည်မျှ ကုန်ဆုံးသွားသည်ကို မသိနိုင်ပေ။
တိုင်ပင်ဆွေးနွေးရာ ခန်းမ၏ အရှေ့ဘက်ဆုံးရှိ ကျောက်စိမ်းထိုင်ခုံပေါ်တွင်... မီးခိုးရောင် ရောယှက်နေသော နန်းတွင်းဝတ်စုံကို ဝတ်ဆင်ထားသည့်... ချီလျို၏ပုံရိပ်မှာ ရုတ်တရက် ပေါ်လာခဲ့သည်။
" မိသားစုခေါင်းဆောင် "
ချီလျို ပေါ်လာသောအခါ အကြီးအကဲများအားလုံးမှာ နှုတ်ဆက်လိုက်ကြသည်။
" ဒီနေ့... ငါ အားလုံးကို ဒီမှာ စုခိုင်းရတာက... ငါတို့ရဲ့ ချီလျန်မျိုးနွယ်စုဟာ ရှင်သန်ခြင်းနဲ့ သေဆုံးခြင်းကြားက... အရေးကြီးတဲ့ အချိန်ကို ရောက်နေလို့ပဲ "
ချီလျိုသည် ပတ်ဝန်းကျင်ကို ဝေ့ကြည့်လိုက်သည်။ သူ စကားပြောလိုက်သည်နှင့် ရောက်ရှိနေသော အကြီးအကဲများအားလုံး၏ နှလုံးသားများမှာ ချက်ချင်းပင် တင်းကျပ်သွားကြလေသည်။
ရှင်သန်ခြင်းနဲ့ သေဆုံးခြင်းကြားက အချိန်?
လောလောဆယ်တွင်... ချီလျန်မျိုးနွယ်စု၏ အခြေအနေမှာ မကောင်းသော်လည်း... မျိုးနွယ်စု ပျက်သုဉ်းရမည့် အခြေအနေမျိုးအထိတော့... မရောက်သေးဘူး မဟုတ်လော။
အကြီးအကဲများသည်... တစ်ယောက်ကိုတစ်ယောက် ကြည့်လိုက်မိကြကာ... ချီလျို၏ စကားမှာ အမှန်တရားလော သို့မဟုတ် ချဲ့ကားပြောဆိုခြင်းလောဟု... တွေးတောနေကြသည်။
" နင်တို့ ယုံချင်မှ ယုံလိမ့်မယ်... ငါတို့ မျိုးနွယ်စုက ဆုတ်ယုတ်နေတယ် ဆိုပေမယ့်... ပျက်သုဉ်းဖို့ကတော့ အဝေးကြီး လိုသေးတယ်လို့ ထင်နေကြလိမ့်မယ် "
ချီလျို၏အမူအရာမှာ တည်ကြည်နေကာ သူ၏ နောက်ဆက်တွဲ စကားများကြောင့် ခန်းမတစ်ခုလုံးမှာ ရုတ်ရုတ်သဲသဲ ဖြစ်သွားခဲ့သည်။
" ဒါပေမယ့်... ခေါင်းဆောင်တစ်ယောက်အနေနဲ့ ငါ တာဝန်ခံပြီး ပြောနိုင်တာကတော့... ငါတို့ ချီလျန်မျိုးနွယ်စုရဲ့ ရှင်သန်မှုဟာ... စိုးရိမ်ရတဲ့ အခြေအနေမှာ ရှိနေပြီဆိုတာပဲ! "
" ခေါင်းဆောင်... တကယ်ပဲ ဘာဖြစ်တာလဲ... ရှီမိုကောင်းကင်က ငါတို့ မျိုးနွယ်စုကို တိုက်ခိုက်တော့မှာလား... ဒါပေမယ့် ဒီနှစ်တွေမှာ ငါတို့ ချီလျန်မျိုးနွယ်စုက... အမြဲတမ်း သတိထားပြီး အမှားအယွင်း မရှိအောင် နေခဲ့တာပဲ.....
တကယ်လို့ ရှီမိုကောင်းကင်က ငါတို့ မျိုးနွယ်စုကို တိုက်ခိုက်မယ်ဆိုရင်... သူတို့က တခြား နတ်ဆိုးကောင်းကင်ဘုံတွေ သိသွားမှာကို မကြောက်ဘူးလား... နောင်အနာဂတ်မှာ နတ်ဆိုးနယ်မြေကို သစ္စာခံမယ့်သူတွေ... မရှိတော့မှာကို မစိုးရိမ်ဘူးလား "
အကြီးအကဲ တစ်ဦးမှာ မနေနိုင်စွာ ထရပ်လျက် ပြောဆိုလိုက်သည်။
ချီလျန်မျိုးနွယ်စု ပျက်သုဉ်းမည့် ဘေးဒုက္ခမှာ အမှန်တကယ်ပင် နီးကပ်နေပြီလော။
ဤအရာကို လုပ်ဆောင်နိုင်သူမှာ ရှီမိုကောင်းကင် တစ်ခုတည်းသာ ရှိသည်။
သို့သော်လည်း ရှီမိုကောင်းကင်သည် ဤနှစ်များအတွင်း ချီလျန်မျိုးနွယ်စု၏ အမှားကို ရှာမတွေ့ခဲ့သောကြောင့် ဘာမျှမလုပ်နိုင်ခဲ့ခြင်း ဖြစ်သည်။
အဘယ်ကြောင့် ယခုမှ ဟန်ဆောင်မှုကို ဖျက်သိမ်းပြီး ချီလျန်မျိုးနွယ်စုကို တိုက်ခိုက်ရသနည်း။
ဤအချက်မှာ ခန်းမအတွင်းရှိ အကြီးအကဲများအတွက် နားမလည်နိုင်စရာ ဖြစ်နေသည်။
အားလုံး၏ သံသယရှိသော အကြည့်များ... သူ့ထံသို့ ကျရောက်လာသည်ကို မြင်သောအခါ... ချီလျိုသည် အသက်ပြင်းပြင်း တစ်ချက်ရှူလိုက်၏။ အရာအားလုံးကို ထုတ်ဖော်ပြောပြရမည့် အချိန်ရောက်ပြီဟု သူ သိလိုက်သည်။
သူ၏ ယခင် အစီအစဉ်အရ... မလိုအပ်သော ပြဿနာများကို ရှောင်ရှားရန်... ကုချန်၏တည်ရှိမှုကို ကြိုတင် ထုတ်ဖော်မပြောရန်... ဆုံးဖြတ်ထားခဲ့သည်။
သို့သော်... ယခုအခါ ကုချန်ကိုယ်တိုင် နတ်ဆိုးနယ်မြေသို့ ရောက်ရှိလာခဲ့ပြီး... ချီလျန်မျိုးနွယ်စု၏ ဘိုးဘေးမြေအတွင်းသို့ ဗြောင်ကျကျပင် ဆင်းသက်လာခဲ့သောကြောင့်... ဖုံးကွယ်ထားချင်လျှင်ပင် မဖြစ်နိုင်တော့သည်ကို... ချီလျို သိလိုက်ရလေသည်။
အခန်း ( ၂၈၀ ) - ဧကရာဇ်မှ အင်မော်တယ်အရှင်အား သတ်ဖြတ်ခြင်း၊ ကိုယ်တိုင်ကိုယ်ကျ မြင်တွေ့ခဲ့ရခြင်းနှင့် လိုရင်းကို ပြောဆိုခြင်း
သူသည် အရာအားလုံးကို ထုတ်ဖော်ပြောပြရန် ဆုံးဖြတ်ထားပြီးဖြစ်ရာ ချီလျိုသည် တွန့်ဆုတ်မနေတော့ဘဲ ပွင့်ပွင့်လင်းလင်းပင် ပြောလိုက်သည်။
" အားလုံးကို ပြောပြပါရစေ... ကျွန်မနဲ့ ချီမုန်ဟာ မကြာခင်ကပဲ အရှင်သခင်တစ်ဦးကို သစ္စာခံခဲ့ကြပါတယ်... ကျွန်မတို့ သားအမိရဲ့ အရှင်သခင်ကတော့ ခုနက ရှင်တို့ပြောနေကြတဲ့... ကျွန်မတို့ ချီလျန်မျိုးနွယ်စုရဲ့ ဘိုးဘေးမြေကို ရောက်လာတဲ့ လူပါပဲ "
သူ စကားပြောပြီးသည်နှင့် ခန်းမတစ်ခုလုံးမှာ ချက်ချင်းပင် တိတ်ဆိတ်သွားတော့သည်။ မယုံကြည်နိုင်မှုနှင့် တုန်လှုပ်မှုများ ပြည့်နှက်နေသည့် မျက်လုံးများသည် ချီလျိုနှင့် ချီမုန်တို့ထံသို့ စုပြုံကျရောက်လာကြ၏။
ဤချီလျန်မျိုးနွယ်စု အကြီးအကဲများသည် သူတို့ကိုယ်သူတို့ စိတ်ကယောင်ချောက်ခြား ဖြစ်နေသည်ဟုပင် ထင်မှတ်လိုက်မိကြသည်။
မိသားစုခေါင်းဆောင်က... သူက... တကယ်ပဲ အရှင်သခင်တစ်ဦးကို လက်ခံလိုက်တာလား။
" အရှင်သခင်ကို သစ္စာခံလိုက်တယ် ဟုတ်လား "
တတိယအကြီးအကဲ၏ အမူအရာမှာ ပြောင်းလဲသွားသော်လည်း တစ်စုံတစ်ခုကို သတိရသွားသည့်အလား အလျင်အမြန် မေးမြန်းလိုက်သည်။
" အဲ့ဒီလူရဲ့ အစွမ်းက ဘယ်လောက်လဲ... ငါတို့ ချီလျန်မျိုးနွယ်စုကို ကာကွယ်ပေးနိုင်မှာလား "
ချီလျိုမှ အရှင်သခင်တစ်ဦးကို သစ္စာခံလိုက်သည့်ကိစ္စနှင့် ပတ်သက်၍... ချီလျန်မျိုးနွယ်စု အကြီးအကဲများသည် ခဏတာ တုန်လှုပ်သွားကြသော်လည်း... လုံးဝ နားမလည်နိုင်သည်တော့ မဟုတ်ပေ။
အကြောင်းမှာ... ဤအရာသည် ချီလျန်မျိုးနွယ်စု၏ လက်ရှိအခက်အခဲမှ လွတ်မြောက်ရန်... သူတို့ အစောပိုင်းကတည်းက ဆွေးနွေးထားခဲ့ဖူးသော... နည်းလမ်းတစ်ခု ဖြစ်သောကြောင့်ပင်။
အကယ်၍... သူတို့သည် နတ်ဆိုးနယ်မြေမှ အင်အားကြီး ပုဂ္ဂိုလ်တစ်ဦးကို အရှင်သခင်အဖြစ် သစ္စာခံနိုင်လျှင်... ချီလျန်မျိုးနွယ်စုအနေဖြင့် ရှီမိုကောင်းကင်၏ လွှမ်းမိုးမှုမှ လွတ်မြောက်နိုင်မည်ဖြစ်ပြီး... ရှီမိုကောင်းကင်၏ ခြိမ်းခြောက်မှုများကိုလည်း လျစ်လျူရှုနိုင်ကာ... ဘေးကင်းစွာ ရှင်သန်နိုင်မည် ဖြစ်သည်။
ထို့ကြောင့် ချီလျို အရှင်သခင်တစ်ဦးကို သစ္စာခံလိုက်ကြောင်း သိရသောအခါ... တတိယအကြီးအကဲ၏ ပထမဆုံးအတွေးမှာ ကုချန် အစွမ်းမည်မျှရှိသည်ကို... အတည်ပြုရန်သာ ဖြစ်သည်။
" မဖြစ်နိုင်သေးဘူး "
ကုချန်၏ တိုက်ခိုက်ရေးစွမ်းရည်ကို တွေးတောရင်း ချီလျိုက တွန့်ဆုတ်နေသော်လည်း အမှန်အတိုင်းပင် ပြောလိုက်သည်။
သူ၏ အရှင်သခင်၏ အစွမ်းမှာ... အင်မော်တယ်ထျန်းကျွင်းတစ်ပါးကို သတ်ဖြတ်နိုင်သော်လည်း... လက်ရှိအချိန်တွင် ချီလျန်မျိုးနွယ်စု တစ်ခုလုံးကို ကာကွယ်ရန်မှာမူ... လုံလောက်မှု မရှိသေးပေ။
မည်သို့ပင်ဆိုစေကာမူ... ဤနေရာမှာ နတ်ဆိုးနယ်မြေဖြစ်ပြီး... သူ၏ အရှင်သခင်၏ အစွမ်းမှာလည်း ဖိနှိပ်ခံရမည်မှာ... သေချာလှပေသည်။ ရှီမိုကောင်းကင်နှင့် ရှီမိုအရှင်၏ တည်ရှိမှုတို့ကြောင့်... ချီလျန်မျိုးနွယ်စုကို ကာကွယ်ရန်မှာ မဖြစ်နိုင်သော ကိစ္စတစ်ခု ဖြစ်နေသဖြင့်... ချီလျိုအနေဖြင့် အမှန်အတိုင်းသာ ဖြေဆိုနိုင်ခဲ့သည်။
မဖြစ်နိုင်သေးဘူး ဟုတ်လား.....
တတိယအကြီးအကဲ၏ မျက်နှာတွင် စိတ်ပျက်သည့် အရိပ်အယောင်များ ယှက်သန်းသွားသည်။
လက်ရှိတွင်... ချီလျန်မျိုးနွယ်စု ရင်ဆိုင်နေရသော အကြီးမားဆုံး ခြိမ်းခြောက်မှုမှာ... ရှီမိုကောင်းကင်နှင့် ရှီမိုအရှင်တို့ ဖြစ်ကြသည်။ သူ၏အရှင်သခင်သည်... ချီလျန်မျိုးနွယ်စု တစ်ခုလုံးကို မကာကွယ်နိုင်သေးဟု ချီလျိုမှ ပြောဆိုလိုက်သောအခါ... တတိယအကြီးအကဲသည် ထိုစကား၏ ဆိုလိုရင်းကို အလိုလို နားလည်လိုက်၏။
၎င်းမှာ ချီလျို၏အရှင်သခင်သည် ရှီမိုကောင်းကင်အရှင်၏ ပြိုင်ဘက် မဟုတ်သေးဟု ဆိုလိုခြင်းပင် ဖြစ်သည်။
သူသည် အင်မော်တယ်ဘုရင် မဟုတ်လျှင် နတ်ဆိုးထျန်းကျွင်း တစ်ဦးတော့ ဖြစ်ရမည် မဟုတ်လော။
" ဒါဆိုရင် အစ်မကြီး ချီလျို သစ္စာခံလိုက်တဲ့ အရှင်သခင်က ဘိုးဘေးကြီးလိုပဲ အင်မော်တယ်ထျန်းကျွင်းအဆင့် ရှိတဲ့သူ ဖြစ်ရမယ် "
ချီချင်းသည် ချက်ချင်းပင် ဝင်ရောက်ပြောဆိုလိုက်၏။
" ကျွန်မရဲ့ အရှင်သခင်က... အင်မော်တယ်ထျန်းကျွင်းလဲ မဟုတ်ဘူး "
ချီလျိုမှ ပြန်လည် ဖြေကြားလိုက်သည်။
" အင်မော်တယ်ဘုရင်လည်း မဟုတ်ဘူး... အင်မော်တယ်ထျန်းကျွင်းလဲ... မဟုတ်ဘူးလား "
ချီလျိုမှ ခေါင်းယမ်းပြသည်ကို မြင်သောအခါ... တတိယအကြီးအကဲ၏ လှပသော မျက်လုံးများမှာ... ချက်ချင်းပင် ပြူးကျယ်သွားတော့သည်။
" မိသားစုခေါင်းဆောင်... နင်... နင်က အင်မော်တယ်အဆင့် ကျင့်ကြံသူတစ်ယောက်ကို... အရှင်သခင်အဖြစ် ဒီအတိုင်း သစ္စာခံလိုက်တာတော့ မဟုတ်ပါဘူးနော် "
တတိယအကြီးအကဲမှာ မယုံကြည်နိုင်လောက်အောင် ဖြစ်နေရသည်။
ချီလျိုကိုယ်တိုင်ကပင်... အင်မော်တယ်အဆင့်သို့ ရောက်ရှိနေသူဖြစ်ရာ... သူနှင့် အဆင့်တူသော အင်မော်တယ်တစ်ဦးကို အဘယ်ကြောင့်... အရှင်သခင်အဖြစ် သစ္စာခံရမည်နည်း။
အင်မော်တယ်ဘုရင်တစ်ပါးကို မတွေ့နိုင်လျှင်ပင်... အနည်းဆုံး အင်မော်တယ်ထျန်းကျွင်း တစ်ပါးကိုတော့... သစ္စာခံသင့်သည် မဟုတ်လား။ အဆင့်တူ အင်မော်တယ်တစ်ဦးကို သစ္စာခံရသည်မှာ... မည်သို့သော အခြေအနေမျိုးနည်း။
အင်မော်တယ်အဆင့် ကျင့်ကြံသူတစ်ဦးမှ ချီလျန်မျိုးနွယ်စုကို မည်သို့ ကာကွယ်နိုင်မည်နည်း။
ဤသည်က ပြက်လုံးတစ်ခုပင် မဟုတ်ပါလော။
သို့သော်လည်း ချီလျို၏အဖြေမှာ တတိယအကြီးအကဲအား ချက်ချင်းပင် စကားမပြောနိုင်အောင် ဖြစ်သွားစေခဲ့သည်။
" ကျွန်မရဲ့ အရှင်သခင်က အင်မော်တယ်အဆင့်တောင် မဟုတ်ဘူး... ဧကရာဇ်အဆင့်ပဲ ရှိသေးတယ် "
ချီလျိုသည် ဤအကြီးအကဲများနှင့် ထပ်မံ၍ ထင်ကြေးပေး မကစားလိုတော့သဖြင့် တိုက်ရိုက်ပင် ပြောချလိုက်တော့သည်။
အင်မော်တယ်တောင် မဟုတ်ဘူး ဟုတ်လား.....
ခဏတာမျှ ခန်းမအတွင်းရှိ အကြီးအကဲအားလုံးမှာ အံ့အားသင့်ကာ တစ်ယောက်ကိုတစ်ယောက် ကြည့်လိုက်မိကြသည်။
ချီလျိုသည်... ဤကဲ့သို့သော ကိစ္စမျိုးတွင် လိမ်ညာမည်မဟုတ်ဟု သူတို့ မယုံကြည်ခဲ့လျှင်... မိသားစုခေါင်းဆောင်မှာ သူတို့အား နောက်ပြောင်နေသည်ဟု... အားလုံးမှ ထင်မှတ်ကြလိမ့်မည် ဖြစ်သည်။
" ဧကရာဇ်အဆင့်လား... အရှင်အဆင့် အထွတ်အထိပ်ကို ကျော်လွန်ပြီး... အင်မော်တယ်ဘုရင်ရဲ့ တာအိုကို ရရှိဖို့ အလားအလာရှိတဲ့... ဒဏ္ဍာရီထဲက ဧကရာဇ်အဆင့်ကို ပြောတာလား "
ချီချင်းကမူ အဓိကအချက်ကို သိရှိသွားပြီး အလျင်အမြန်ပင် မေးမြန်းလိုက်သည်။
" အတိအကျပဲ "
ချီလျိုသည် ခေါင်းကို အသာအယာ ညိတ်ပြလိုက်သည်။
" အင်မော်တယ်ဘုရင်လောင်း... ဧကရာဇ်အဆင့်..... "
တတိယအကြီးအကဲမှာ... ဧကရာဇ်အဆင့်နှင့် ပတ်သက်၍ အချို့ကို သိရှိထားပုံရပြီး... သူ၏ အမူအရာမှာ... သိသိသာသာ ပြောင်းလဲသွား၏။ ချီလျို... အဘယ်ကြောင့် သစ္စာခံခဲ့သည်ကို... သူ အနည်းငယ် နားလည်သွားပုံရသည်။
ဧကရာဇ်အဆင့် ကျင့်ကြံသူတစ်ဦးသည်... အင်မော်တယ်များနှင့် ရင်ဆိုင်ယှဉ်ပြိုင်နိုင်ပြီး... အနာဂတ်တွင် အင်မော်တယ်အဆင့်သို့ ရောက်ရှိသွားပါက... အင်မော်တယ်ဘုရင် ဖြစ်လာရန် ပိုမိုကြီးမားသော အလားအလာရှိပေသည်။
အကယ်၍... ထိုကဲ့သို့သော အရှင်သခင်ကို သစ္စာခံနိုင်ခဲ့လျှင်... သူ အားကောင်းလာသည်နှင့်အမျှ ချီလျန်မျိုးနွယ်စုကို... ကာကွယ်နိုင်စွမ်း ရှိလာနိုင်မည် ဖြစ်သည်။
ထို့ကြောင့် ချီလျို သစ္စာခံခဲ့ခြင်းမှာ အဓိပ္ပာယ်ရှိပေသည်။
တတိယအကြီးအကဲနှင့် အခြားသူများမှာ အံ့အားသင့်မှုမှ မသက်သာသေးခင်မှာပင် ချီလျိုမှ နောက်ထပ် ကိစ္စကြီးတစ်ခုကို ထပ်မံပြောချလိုက်ပြန်သည်။
" ကျွန်မရဲ့ အရှင်သခင်က သာမန် ဧကရာဇ်အဆင့် မဟုတ်ဘူး... သူက အင်မော်တယ်ထျန်းကျွင်းတစ်ပါးကို သတ်ဖြတ်နိုင်စွမ်းရှိတဲ့... ဧကရာဇ်အဆင့်ပဲ "
ဧကရာဇ်အဆင့်က... အင်မော်တယ်ထျန်းကျွင်းကို သတ်နိုင်တယ် ဟုတ်လား.....
ချီလျို၏စကားမှာ... ငြိမ်သက်နေသော ရေကန်ထဲသို့ ဗုံးတစ်လုံး ပစ်ချလိုက်သည့်အလား... တိုင်ပင်ဆွေးနွေးရာခန်းမအတွင်း၌ ကြီးမားသော လှုပ်ခတ်မှုကို... ချက်ချင်း ဖြစ်ပေါ်စေခဲ့သည်။
ဧကရာဇ်အဆင့်နှင့် အင်မော်တယ်ထျန်းကျွင်းကို သတ်ဖြတ်ခြင်းမှာ မည်သို့မျှ ဆက်စပ်၍ မရနိုင်သော ကိစ္စ မဟုတ်ပါလော။
ခန်းမအတွင်းရှိ အကြီးအကဲများ၏... မယုံကြည်နိုင်သော အကြည့်များကို ကြည့်ရင်း... ချီလျိုမှာ စိတ်လှုပ်ရှားမှုကို ခံစားလိုက်ရသည်။ ယခင်က... သူကိုယ်တိုင်၏ တုံ့ပြန်မှုမှာလည်း သူ၏ မျိုးနွယ်ဝင်များကဲ့သို့ပင် ဖြစ်ခဲ့သည်ကို... သူ ပြန်လည် သတိရမိသည်။
အကြောင်းမှာ... ဧကရာဇ်အဆင့် ကျင့်ကြံသူတစ်ဦးမှ အင်မော်တယ်ထျန်းကျွင်းကို သတ်ဖြတ်နိုင်သည်ဟူသော ကိစ္စမှာ... ယုံကြည်ရန် အလွန်ပင် ခက်ခဲလွန်းလှသောကြောင့် ဖြစ်သည်။
" မိသားစုခေါင်းဆောင်... ဒါကို... နင် ကိုယ်တိုင် မြင်ခဲ့တာလား "
ချီချင်းသည် သူ၏ရင်ထဲမှ တုန်လှုပ်မှုကို ဖိနှိပ်ထားရင်း အလျင်အမြန် မေးမြန်းလိုက်သည်။
သူ စကားပြောပြီးသည်နှင့် အားလုံး၏ အကြည့်များမှာ ချီလျိုထံသို့ တစ်ဖန် ပြန်လည် စုပြုံကျရောက်လာပြန်သည်။
အမှန်တကယ်ပင်... ကိုယ်တိုင်ကိုယ်ကျ မြင်တွေ့ရခြင်းနှင့် တစ်ဆင့်စကား ကြားရခြင်းမှာ... လုံးဝ ကွာခြားလှပေသည်။
သို့သော်လည်း... ချီလျို၏ နောက်ထပ် လုပ်ဆောင်ချက်မှာ... အကြီးအကဲများ၏ နှလုံးသားများကို ပြင်းထန်စွာ... တုန်လှုပ်သွားစေခဲ့ပြန်သည်။
" အရှင်သခင်က... အင်မော်တယ်ထျန်းကျွင်းကို သတ်ဖြတ်ချိန်မှာ ကျွန်မ အနားမှာ ရှိနေခဲ့သလို... ကိုယ်တိုင်ကိုယ်ကျလဲ မြင်တွေ့ခဲ့ရပါတယ် "
ချီလျိုသည် စကားလုံးတိုင်းကို ခိုင်မာစွာ ပြောဆိုလိုက်၏။
" ကျွန်မလဲ အဲ့ဒီမှာ ရှိနေခဲ့တာပါ... ကျွန်မလဲ သက်သေခံနိုင်ပါတယ် "
ဘေးနားရှိ ချီမုန်ကလည်း အလျင်အမြန်ပင် ထောက်ခံပြောဆိုလိုက်သည်။
ဟူး... ကိုယ်တိုင်ကိုယ်ကျ မြင်တွေ့ခဲ့ရတာပဲ.....
ချီလျိုသည် ဤမျှအထိ အသေအချာ ပြောဆိုနေသည်ကို မြင်သောအခါ မည်သူမျှ သံသယ မဖြစ်ရဲတော့ပေ။
ချီလျိုသည် ချီလျန်မျိုးနွယ်စု၏ မိသားစုခေါင်းဆောင်တစ်ဦးအနေဖြင့် ဤကဲ့သို့သော ကိစ္စမျိုးတွင် နောက်ပြောင်မည် မဟုတ်သည်ကို လူတိုင်း သိကြသည်။
မထူးဆန်းတော့ပါဘူး... ချီလျိုရော ချီမုန်ပါ သူ့ကို အရှင်သခင်အဖြစ် သစ္စာခံခဲ့ကြတာ... မထူးဆန်းတော့ဘူး.....
ချီလျန်မျိုးနွယ်စုရဲ့ ဘိုးဘေးမြေထဲကို... အခုလေးတင် ဝင်လာခဲ့တဲ့ အဲ့ဒီလူဟာ... အင်မော်တယ်ထျန်းကျွင်းတစ်ပါးကိုတောင် သတ်နိုင်တဲ့... ကြောက်စရာကောင်းတဲ့ ပုဂ္ဂိုလ်တစ်ယောက် ဖြစ်နေတာကိုး.....
" မဟုတ်သေးဘူး... နင် ခုနက အင်မော်တယ်ထျန်းကျွင်းကို သတ်တယ်လို့ ပြောလိုက်တာလား... နတ်ဆိုးနယ်မြေမှာ ထျန်းကျွင်းပဲ ရှိတာ.....
အင်မော်တယ်ထျန်းကျွင်း ဆိုတာက အင်မော်တယ်နယ်မြေရဲ့ ကျင့်ကြံသူပဲ... နင် သစ္စာခံလိုက်တဲ့ အရှင်သခင်က... နတ်ဆိုးနယ်မြေက မဟုတ်ဘူးလား "
ရုတ်တရက် တတိယအကြီးအကဲမှာ တစ်စုံတစ်ခု မှားယွင်းနေသည်ကို သတိထားမိသွားကာ အလျင်အမြန် အတည်ပြုလိုက်သည်။
" ကျွန်မရဲ့ အရှင်သခင်က နတ်ဆိုးနယ်မြေက မဟုတ်တာ အမှန်ပဲ... သူက အင်မော်တယ်နယ်မြေရဲ့ လက်အောက်မှာရှိတဲ့... 'အဆုံးမဲ့ကမ္ဘာ' လို့ ခေါ်တဲ့ နေရာမှာ မွေးဖွားခဲ့တာပါ "
ချီလျိုသည် တည်ငြိမ်စွာပင် ဖြေကြားလိုက်လေသည်။
အင်မော်တယ်နယ်မြေရဲ့ လက်အောက်က ကမ္ဘာငယ်လေးတစ်ခုကလား.....
နတ်ဆိုးနယ်မြေက သတ္တဝါ မဟုတ်ဘူးတဲ့လား.....
တကယ်လို့ သူက နတ်ဆိုးနယ်မြေက မဟုတ်ရင်... နတ်ဆိုးနယ်မြေထဲကို ဘယ်လို ဝင်လာတာလဲ.....
တတိယအကြီးအကဲမှာ စိတ်ရှုပ်ထွေးသွားကာ နားမလည်နိုင် ဖြစ်နေတော့သည်။
သို့သော်လည်း ချီလျိုသည် လူတိုင်းကို အချိန်အကြာကြီး တွေးတောခွင့်မပေးဘဲ လိုရင်းကို တိုက်ရိုက်ပင် ပြောဆိုလိုက်တော့ ယသည်။
" ကျွန်မနဲ့ ချီမုန် အရှင်သခင်ကို သစ္စာခံခဲ့တဲ့ကိစ္စကတော့... ပြီးဆုံးသွားပြီဖြစ်လို့ ပြောင်းလဲလို့ မရတော့ဘူး.....
ဒီကာလအတွင်းမှာ... မျိုးနွယ်စုတစ်ခုလုံးက ရရှိခဲ့တဲ့ နတ်ဘုရားသတ္တုသုံးမျိုးဟာလဲ... အရှင်သခင်အတွက် နတ်ဘုရားလက်နက်တစ်ခု သွန်းလုပ်ဖို့ ပြင်ဆင်ထားတာပါ... အရှင်သခင် ဒီကို ရောက်လာတာကလဲ... ဒီသတ္တုသုံးမျိုးကို ယူပြီး လက်နက်သွန်းလုပ်ဖို့ပဲ.....
ဒါပေမယ့် အရှင်သခင် ဒီတစ်ခေါက် နတ်ဆိုးနယ်မြေကို လာတဲ့လမ်းမှာ... ချောက်နက်နတ်ဆိုးနယ်မြေကို ဖြတ်သန်းရင်း... ရွှမ်ယိုနန်းတော်ရဲ့ ဒုတိယနန်းတော်သခင် ဟန်ယိုထျန်းကျွင်းကို... သတ်ပစ်ခဲ့တယ်.....
ဒါကြောင့်... မကြာခင်မှာ ရွှမ်ယိုနန်းတော်က ရှီမိုကောင်းကင်ကို လာရှာလိမ့်မယ်... အဲ့ဒီအချိန်ကျရင် ငါတို့ ချီလျန်မျိုးနွယ်စုရဲ့ ဒုက္ခတွေ... စတင်တော့မှာပဲ "