မသေမျိုးကျင့်ကြံခြင်းခေတ်၏ စွန့်ပစ်ခံ ပါရမီရှင်

လုချင်းသည် ဦးစွာပထမ လှည့်လည်သွားလာသူ မသေမျိုး၏ ဆောင်းပါးပေါင်းချုပ်စာအုပ်ကို ထုတ်ယူလိုက်သည်။

ဒီတစ်ကြိမ် မြို့ထဲ လျှောက်သွားရာမှ လုချင်းအတွက် အကျိုးအမြတ်များစွာ ရရှိခဲ့လေ၏။

အကြီးမားဆုံးသော ရရှိမှုမှာ ဤဆောင်းပါးပေါင်းချုပ်စာအုပ်နှင့် ဟင်းလင်းပြင်ချီအိတ်ပင် ဖြစ်သည်။

သူ၏ နတ်မျက်စိစွမ်းရည်များမှ ဖော်ပြသော အချက်အလက်များအရ ဤဆောင်းပါးများထဲတွင် မသေမျိုးကျင့်ကြံခြင်းခေတ်နှင့် ပတ်သက်သော မှတ်တမ်းများ ပါဝင်နေသည်။

လုချင်းသည် ထိုဆန်းကြယ်သော ခေတ်ကာလအကြောင်းကို အလွန်ပင် သိချင်နေခဲ့ပါ၏။

ထို့ကြောင့် ဤစာအုပ်ကို ဦးစွာ လေ့လာရန် ဆုံးဖြတ်လိုက်တော့သည်။

ခေတ္တမျှ စစ်ဆေးကြည့်ပြီးနောက် စာအုပ်၏ အသားမှာ သာမန်မဟုတ်ကြောင်း လုချင်း တွေ့လိုက်ရသည်။ စာရွက်များမှာ အလွန် ခိုင်ခံ့ပြီး ပျက်စီးယိုယွင်းခြင်းမရှိဘဲ ကာလကြာရှည် ခံမည့်ပုံ ပေါက်နေသည်။

[ဒေါင်းလုပ်ဆွဲပြီး လေ့လာမလား။]

သူ့အမြင်အာရုံထဲတွင် ပေါ်လာသော စာသားကို ကြည့်ရင်း လုချင်းသည် "ဟုတ်ကဲ့" ကိုသာ ရွေးချယ်လိုက်သည်။

[ဒေါင်းလုပ်ဆွဲနေသည်... ပြီးစီးမှု - ၁%၊ ၂%၊ ၃%... ၉၇%၊ ၉၈%၊ ၉၉%၊ ၁၀၀%]

[ဒေါင်းလုပ်ဆွဲခြင်း ပြီးဆုံးပါပြီ။ စတင် လေ့လာလိုပါသလား။]

လုချင်းသည် "ဟုတ်ကဲ့" ကိုသာ ဆက်လက် ရွေးချယ်လိုက်၏။

နောက်တစ်ခဏတွင်တော့ ရင်းနှီးနေသော ခံစားမှုများနှင့် သိမြင်နားလည်မှုများသည် သူ့စိတ်အာရုံ၏ နက်ရှိုင်းရာမှ တိုးဝင်လာသဖြင့် လုချင်းလည်း မျက်လုံးများကို ဖြည်းညှင်းစွာ မှိတ်ထားလိုက်တော့သည်။

ခဏအကြာတွင် သူ့စိတ်ထဲမှ သတင်းအချက်အလက်များကို နားလည်သဘောပေါက်သွားသောအခါ၌ သက်ပြင်းချသံသဲ့သဲ့နှင့်အတူ မျက်လုံးများကို ဖွင့်လိုက်လေ၏။

"ဒီ လှည့်လည်သွားလာသူ မသေမျိုးဆိုတဲ့လူက တကယ့်ကို ကံဆိုးတဲ့လူပါလား။"

ဆောင်းပါးများထဲမှ အချက်အလက်များကို စုပ်ယူပြီးနောက် လုချင်းသည် လှည့်လည်သွားလာသူ မသေမျိုး၏ ဘဝဇာတ်ကြောင်းအချို့ကို သိရှိလိုက်ရသည်။

လှည့်လည်သွားလာသူ မသေမျိုးဆိုသည်မှာ လွန်ခဲ့သော နှစ်ပေါင်း တစ်ထောင်ကျော်က ကျင့်ကြံသူတစ်ဦးပင်။

ပို၍ တိကျစွာ ပြောရလျှင် သူသည် မသေမျိုးကျင့်ကြံခြင်းလမ်းစဉ်ကို လိုက်စားခဲ့သော သနားစရာ ကောင်းသူတစ်ဦး ဖြစ်သည်။

လှည့်လည်သွားလာသူ မသေမျိုးသည် မူလကတော့‌ေ စာပေပညာရှင်တစ်ဦးပင်။ သူ၏ ငယ်ရွယ်စဉ်ကာလက မတော်တဆမှုတစ်ခုကြောင့် ထူးဆန်းသော ဂူတစ်ဂူထဲတွင် မသေမျိုးကျင့်ကြံခြင်း အမွေအနှစ်တစ်ခုကို ရရှိခဲ့သည်။

တိုက်ဆိုင်စွာပင် သူ၏ ပါရမီဓာတ်ခံမှာ အလွန်ကောင်းမွန်ပြီး ထိုအမွေအနှစ်နှင့် အထူး လိုက်ဖက်ညီနေခဲ့လေ၏။

ထို့ကြောင့် ထူးဆန်းသော ဂူမှ ရရှိခဲ့သော အမွေအနှစ်နှင့် အရင်းအမြစ်အချို့ကို အားကိုးကာ ကိုယ်တိုင်လေ့လာခြင်းဖြင့် အောင်မြင်မှု ရရှိခဲ့ပြီး အတားအဆီးများကို ကျော်ဖြတ်ကာ ချီသန့်စင်ခြင်းနယ်ပယ်သို့ ဝင်ရောက်နိုင်ခဲ့ပြီး စစ်မှန်သော မသေမျိုးကျင့်ကြံသူတစ်ဦး ဖြစ်လာခဲ့သည်။

နောက်ပိုင်းတွင်တော့ ဂူထဲမှ အရင်းအမြစ်များကို အသုံးပြုကာ လျင်မြန်စွာ တိုးတက်လာခဲ့ပြီး ဆယ်နှစ်ကျော်ကာလအတွင်းမှာပင် ချီသန့်စင်ခြင်း အထွတ်အထိပ်သို့ ရောက်ရှိခဲ့သည်။

ဆောင်းပါးများထဲမှ လှည့်လည်သွားလာသူ မသေမျိုး၏ ရေးသားချက်များအရ သူ၏ တိုးတက်မှုနှုန်းမှာ ထွန်းကားခဲ့သော မသေမျိုးကျင့်ကြံခြင်းခေတ်၌ပင် ပါရမီရှင်ဟု သတ်မှတ်ခံရနိုင်ပြီး ဂိုဏ်းကြီးများက အလုအယက် လိုချင်ကြမည့် အနေအထားမျိုး ဖြစ်သည်။

ကံဆိုးစွာဖြင့် သူသည် မှားယွင်းသောခေတ်တွင် မွေးဖွားလာခဲ့သည်။ ထိုခေတ်သည် ဝိညာဉ်စွမ်းအင်များ ရှားပါးပြီး မသေမျိုးကျင့်ကြံခြင်းလမ်းစဉ် ပျောက်ကွယ်ကာ သိုင်းပညာများသာ လွှမ်းမိုးနေသော ခေတ်ကာလ ဖြစ်ပါ၏။

ထို့ကြောင့် သူ့တွင် မသေမျိုးကျင့်ကြံခြင်းအတွက် ထူးကဲသော ပါရမီရှိသော်လည်း ဝင်ရောက်ရန် မည်သည့်ဂိုဏ်းမျှ မရှိခဲ့ပေ။

ဤအချက်က လှည့်လည်သွားလာသူ မသေမျိုးအား သူ၏ ဆောင်းပါးများထဲတွင် သူ့ကံကြမ္မာဆိုးအတွက် အကြိမ်ကြိမ် ညည်းတွားမိစေခဲ့သည်။

သူ့ကို ပို၍ စိတ်ပျက်အားငယ်စေသည်မှာ ဝိညာဉ်စွမ်းအင် ရှားပါးမှုကြောင့် ချီသန့်စင်ခြင်း အထွတ်အထိပ်သို့ ရောက်ပြီးနောက် သူ၏ ကျင့်ကြံမှု ရပ်တန့်သွားခြင်းပင်ဖြစ်၏။ မည်သို့ပင် ဆက်လက် လုပ်ဆောင်စေကာမူ တိုးတက်မှု မရှိတော့ချေ။

သူ မည်မျှပင် ကြိုးစား ကျင့်ကြံပါစေ၊ ခန္ဓာကိုယ် အညစ်အကြေး ကင်းစင်ပြီး အပြစ်အနာအဆာ မရှိသော ပိုမိုမြင့်မားသည့် အဆင့်တစ်ခုဖြစ်သည့် အခြေတည်အဆင့်သို့ ထိုးဖောက်ဝင်ရောက်နိုင်ခြင်း မရှိခဲ့ပေ။

ထိုးဖောက်နိုင်မည့် နည်းလမ်းကို ရှာဖွေရန်အတွက် လှည့်လည်သွားလာသူ မသေမျိုးသည် ကမ္ဘာအနှံ့ ခရီးထွက်ခဲ့သည်။

သူသည် နာမည်ကြီး တောင်များ၊ မြစ်များနှင့် ထူးဆန်းသော နေရာများသို့ သွားရောက်ကာ အခွင့်အရေးကို ရှာဖွေခဲ့ပါ၏။

သိုင်းပညာရှင်များ၏ မွေးရာပါနယ်ပယ်နှင့် ညီမျှသော၊ မသေမျိုးကျင့်ကြံခြင်း၏ ဆန်းကြယ်မှုကြောင့် ပို၍ပင် စွမ်းအားကြီးသော ကျင့်ကြံမှုအဆင့် ရှိနေသဖြင့် ကမ္ဘာအနှံ့ ခရီးသွားခြင်းသည် သူ့အတွက် မခက်ခဲခဲ့ပေ။

သို့သော် သူရရှိခဲ့သော အမွေအနှစ်မှတ်တမ်းများတွင် ဖော်ပြထားသည့် ရှေးဟောင်း မသေမျိုးဂိုဏ်းများ၏ တည်နေရာများကို ဆယ်စုနှစ်များစွာ ရှာဖွေခဲ့ပြီးနောက် တစ်ချိန်က ကျော်ကြားခဲ့သော နိဗ္ဗာန်ဘုံများနှင့် မသေမျိုးစံအိမ်များသည် ခြေရာလက်ရာမကျန် ပျောက်ကွယ်သွားပြီဖြစ်ကြောင်း တွေ့ရှိခဲ့ရသည်။

တစ်ခါတစ်ရံတွင် အပျက်အစီးများနှင့် တိတ်ဆိတ်ခြောက်သွေ့မှုများသာ ကျန်ရစ်နေတတ်လေ၏။

ဤအခြေအနေတွင် မသေမျိုးကျင့်ကြံခြင်းခေတ် တကယ် ကုန်ဆုံးသွားပြီဖြစ်ကြောင်း လှည့်လည်သွားလာသူ မသေမျိုးမှာ အမှန်တကယ်ပင် နားလည်သွားတော့လေသည်။

သို့သော် သူသည် လုံးဝ လက်ဗလာချည်းသက်သက် မဖြစ်ခဲ့ပေ။

ထျန်းတောက်ဂိုဏ်းဟုခေါ်သော ဂိုဏ်းတစ်ခု၏ အပျက်အစီးများကြားတွင် ကျောက်စိမ်းနံရံတစ်ခုကို သူ တွေ့ရှိခဲ့သည်။

ကျောက်စိမ်းနံရံပေါ်တွင် လျှို့ဝှက်ချက်တစ်ခုကို မှတ်တမ်းတင်ထားလေ၏။

ယေဘုယျအားဖြင့် ဝိညာဉ်စွမ်းအင် ကျဆင်းမှုသည် လူတစ်ဦး၏ အသက်ရှူခြင်းကဲ့သို့ပင် သဘာဝ သံသရာစက်ဝန်းတစ်ခု ဖြစ်ကြောင်း၊ အတက်နှင့် အကျ တစ်လှည့်စီ ရှိကြောင်း ဖော်ပြထားပါသည်။

ဝိညာဉ်စွမ်းအင်၏ အတက်အကျ သံသရာစက်ဝန်းမှာ နှစ်ပေါင်း ခြောက်သောင်းခန့် ကြာမြင့်သည်။

နှစ်ပေါင်း သုံးသောင်းကြာ ယိုယွင်းပျက်စီးပြီး ကုန်ခမ်းသွားတတ်ကာ နောက်ထပ် နှစ်ပေါင်း သုံးသောင်းကြာ ပြန်လည် နိုးထပြီး စည်ပင်ဝပြောလာတတ်သည်။ ဤသို့ဖြင့် အဆုံးမရှိ သံသရာ လည်ပတ်နေခြင်း ဖြစ်လေ၏။

ဤလျှို့ဝှက်ချက်ကို မြင်လိုက်ရသောအခါ၌မ လှည့်လည်သွားလာသူ မသေမျိုး၏ နှလုံးသားမှာ အေးစက်သွားတော့သည်။

ကျောက်စိမ်းနံရံ၏ မှတ်တမ်းအရ တွက်ချက်ကြည့်သောအခါ သူသည် ကျဆင်းမှုကာလ၏ အဆုံးသတ်ပိုင်းတွင် ရောက်နေပြီး ဝိညာဉ်စွမ်းအင် ပြန်လည်နိုးထရန် အနည်းဆုံး နှစ်တစ်ထောင်ခန့် လိုသေးကြောင်း သိလိုက်ရသည်။

ဤအချက်ကို သိလိုက်ရခြင်းက လှည့်လည်သွားလာသူ မသေမျိုးကို စိတ်ပျက်အားငယ်စေခဲ့လေ၏။

ချီသန့်စင်ခြင်း အထွတ်အထိပ်အဆင့်တွင် သက်တမ်းမှာ နှစ်သုံးရာသာ ရှိပြီး ဆန်းကြယ်သော မသေမျိုးကျင့်ကြံနည်းများဖြင့် အသက်ဆက်လျှင်ပင် အများဆုံး နှစ်ငါးရာအထိသာ နေနိုင်မည် ဖြစ်သည်။

ဝိညာဉ်စွမ်းအင် ပြန်လည်နိုးထမည့်အချိန်ကို စောင့်ဆိုင်းရန်မှာ မဖြစ်နိုင်ပေ။

ဆိုလိုသည်မှာ သူသည် မသေမျိုးကျင့်ကြံခြင်းတွင် ထူးကဲသော ပါရမီရှိသော်လည်း ဝိညာဉ်စွမ်းအင် ပြန်လည်နိုးထမည့်နေ့ရက်ကို မည်သည့်အခါမျှ မြင်တွေ့ရမည် မဟုတ်သလို သူ၏ ကိုယ်ပိုင် ထူးချွန်ပြောင်မြောက်မှုများနှင့်လည်း တောက်ပခွင့်ရမည် မဟုတ်တော့ပေ။

ဆောင်းပါးများ၏ နောက်ဆုံးအပိုင်းတွင် လှည့်လည်သွားလာသူ မသေမျိုးသည် ကျောက်စိမ်းနံရံပေါ်မှ လျှို့ဝှက်ချက်ကို သိပြီးနောက်ပိုင်း၌လည်း လုံးဝ အရှုံးမပေးခဲ့ကြောင်း လုချင်း ဖတ်လိုက်ရသည်။

သူ့တစ်ဘဝလုံးတွင် ကောင်းကင်နိယာမများကို ဆန့်ကျင်တိုက်ခိုက်ခဲ့ပြီး သူ့ပါရမီနှင့် ကြိုးစားအားထုတ်မှုဖြင့် ပိုမိုမြင့်မားသော နယ်ပယ်များသို့ ရောက်ရှိရန် ကြိုးပမ်းခဲ့သည်။

နောက်ပိုင်း ရာစုနှစ်များတွင် သူသည် အရာများစွာကို စမ်းသပ်ခဲ့သည်၊ လျှို့ဝှက်နေရာအနှံ့အပြားကိုလည်း ရှာဖွေခဲ့သည်၊ လက်ကျန် ဝိညာဉ်စွမ်းအင်များကိုလည်း စုပ်ယူခဲ့ပါ၏။ သိုင်းပညာများကို လေ့ကျင့်ခဲ့သည့်အပြင် နာမည်ဆိုးဖြင့် ကျော်ကြားသော ပိုးကောင်မှော်ပညာ လမ်းစဉ်ကိုပင် လေ့လာခဲ့သေးသည်။

သို့သော် ကြိုးပမ်းမှုအားလုံးမှာ အဆုံးသတ်တွင် ကျရှုံးခဲ့ရပါ၏။

သူ သေဆုံးသည်အထိ ချီသန့်စင်ခြင်း အထွတ်အထိပ်အဆင့်ကို ကျော်ဖြတ်ပြီး ပိုမိုမြင့်မားသော အခြေတည်အဆင့်သို့ မဝင်ရောက်နိုင်ခဲ့ပေ။

ဆောင်းပါးများထဲတွင် မှတ်တမ်းတင်ထားသော လှည့်လည်သွားလာသူ မသေမျိုး၏ ဘဝဇာတ်ကြောင်းကို ဖတ်ပြီးနောက် လုချင်း အချိန်အတော်ကြာ တိတ်ဆိတ်နေမိသည်။

လူတစ်ယောက်၏ ဘဝဇာတ်ကြောင်းကြောင့် သူ တုန်လှုပ်မိသည်မှာ ဒါ ဒုတိယအကြိမ်ပင်။

ပထမအကြိမ်က လီဝေ့ထျန်း ဖြစ်ပြီး ဒုတိယအကြိမ်ကတော့ ဒီ လှည့်လည်သွားလာသူ မသေမျိုးပင် ဖြစ်သည်။

သို့သော် လီဝေ့ထျန်းနှင့် ယှဉ်လျှင် လှည့်လည်သွားလာသူ မသေမျိုး၏ ဘဝက ပို၍သနားစရာကောင်းသည်ဟု ထင်ရသည်။

လီဝေ့ထျန်း၏ ဇာတ်သိမ်းသည် သူ့အပြစ်နှင့်သူ ဖြစ်သည်ဟု ပြောနိုင်ပါ၏။ ငယ်ရွယ်စဉ်က အခြားသူများနှင့် ယှဉ်ပြိုင်ရင်း အချိန်ဖြုန်းမနေခဲ့လျှင် အဆင်သင့်မဖြစ်ဘဲ အလျင်စလို အဆင့်တက်ရန် တွန်းအားပေးခံရမည် မဟုတ်သလို နောက်ဆုံးတွင် သေဆုံးရမည့်အဖြစ်မျိုးလည်း ကြုံရမည် မဟုတ်ပေ။

သို့သော် လှည့်လည်သွားလာသူ မသေမျိုးမှာမူ ကွဲပြားသည်။ သူသည် တစ်ဘဝလုံး မသေမျိုးလမ်းစဉ်ကို လိုက်စားခဲ့ပြီး ဘယ်သောအခါမျှ အားလျှော့ခြင်းမရှိခဲ့ဘဲ ဝီရိယရှိရှိ ကျင့်ကြံခဲ့သူ ဖြစ်သည်။

သို့တိုင် ကံကြမ္မာက သူ့ကို ရက်စက်စွာဖြင့် ကျီစားခဲ့ပြီး မှားယွင်းသောခေတ်တွင် လူဖြစ်လာစေခဲ့သည်။

မသေမျိုးကျင့်ကြံခြင်းအတွက် ထူးကဲသော ပါရမီရှိသော်လည်း ဝိညာဉ်စွမ်းအင် ရှားပါးမှုကြောင့် ချီသန့်စင်ခြင်း အထွတ်အထိပ်တွင် ပိတ်မိနေပြီး နောက်ဆုံး၌ အိုမင်းရင့်ရော်ကာ သေဆုံးခဲ့ရရှာသည်။

"မသေမျိုးကျင့်ကြံခြင်းခေတ်ကြီးက စွန့်ပယ်ခဲ့တဲ့ ဝမ်းနည်းစရာ ပါရမီရှင်တစ်ယောက်ပါလား..."

လုချင်းသည် လှည့်လည်သွားလာသူ မသေမျိုး၏ ကံကြမ္မာကို သနားမိသဖြင့် သက်ပြင်းချလိုက်မိသည်။

ဝိညာဉ်စွမ်းအင် ရှားပါးသော ခေတ်ကာလတွင်တောင် ထိုသူသည် မည်သူ့လမ်းညွှန်မှုမျှ မပါဘဲ ကိုယ့်ဘာသာ ချီသန့်စင်ခြင်း အထွတ်အထိပ်ရောက်အောင် ကျင့်ကြံနိုင်ခဲ့သည်။

အကယ်၍ လှည့်လည်သွားလာသူ မသေမျိုးသာ မသေမျိုးကျင့်ကြံခြင်း ထွန်းကားသော ခေတ်တွင် မွေးဖွားခဲ့လျှင် မည်မျှ မြင့်မားသော အဆင့်အတန်းသို့ ရောက်ရှိနိုင်မည်ကို တွေးကြည့်ရန်ပင် ခက်ခဲလှပေ၏။

သို့သော်... ဒီလောကကြီးမှာ 'အကယ်၍များ' ဆိုတာ မရှိပေ။

မှားယွင်းသောခေတ်တွင် မွေးဖွားလာခြင်းက လှည့်လည်သွားလာသူ မသေမျိုး၏ ဝမ်းနည်းဖွယ် ဇာတ်သိမ်းကို ဖန်တီးပေးလိုက်ခြင်းပင် ဖြစ်သည်။

လှည့်လည်သွားလာသူ မသေမျိုး၏ ဘဝအတွက် ခေတ္တမျှ သက်ပြင်းချပြီးနောက် လုချင်းသည် အခြားကိစ္စတစ်ခုကို အာရုံစိုက်လိုက်တော့၏။

ဆောင်းပါးများထဲမှ လှည့်လည်သွားလာသူ မသေမျိုး၏ မှတ်တမ်းများအရ သူ့ခေတ်ကာလတွင် ထျန်းတောက်ဂိုဏ်း၏ တွက်ချက်မှုအရ ဝိညာဉ်စွမ်းအင် ပြန်လည်နိုးထရန် အနည်းဆုံး နှစ်တစ်ထောင်ခန့် လိုသေးသည်။

ယခုအခါ လှည့်လည်သွားလာသူ မသေမျိုး သေဆုံးပြီးနောက် နှစ်ပေါင်း တစ်ထောင်နီးပါး ကုန်လွန်ခဲ့ပြီပင်။

ဒီတွက်ချက်မှုအရဆိုလျှင် ဝိညာဉ်စွမ်းအင် ပြန်လည်နိုးထမည့်အချိန်သည် သူရှိနေသော ယခုခေတ်ကာလ ဖြစ်နေပြီ မဟုတ်လော။

သို့သော် ကမ္ဘာကြီးတွင် သိသာထင်ရှားသော ပြောင်းလဲမှုများကို သူ မခံစားမိသေးချေ။

နေဦး...

လုချင်း ရုတ်တရက် တစ်စုံတစ်ခုကို သတိရသွားပြီး သူ့နှလုံးသားမှာလည်း‌ ပြင်းထန်စွာဖြင့် တုန်လှုပ်သွားတော့လေသည်။

……..