အခန်း (၂၆၂)

အပိုင်း (၂၆၂)

အချက်တစ်ခုကတော့ သေချာနေခဲ့သည်။ ဤသူသည် မိစ္ဆာဂိုဏ်း၏ မှတ်တမ်းများတွင် မရှိသေးသော စိမ်းသက်သက် ဖြစ်နေသည့် မဟာကောင်းကင်အဆင့် သိုင်းပညာရှင်တစ်ဦး ဖြစ်ရပေမည်။ ဒုတိယအချက်မှာ ထိုသိုင်းပညာရှင်သည် လင်းပိုင်ဖန်နှင့် အလွန်နီးကပ်သော ပတ်သက်မှုမျိုး ရှိနိုင်သည်၊ သို့မဟုတ်လျှင် သူ့ကို အကာအကွယ်ပေးရန် ဤနေရာအထိ ရောက်လာစရာ အကြောင်းမရှိချေ။

အခြေအနေမှာ ပို၍ ရှင်းလင်းလာခဲ့သည်။ လှပလွန်းသော အမျိုးသမီးသည် လင်းပိုင်ဖန်နှင့် ပတ်သက်ခဲ့ဖူးသော အင်အားကြီး ပုဂ္ဂိုလ်များအကြောင်းကို အသေးစိတ် ပြန်လည် စဉ်းစားကြည့်လိုက်ရာ လျှို့ဝှက်ဆန်းပြားသော ပုံရိပ်တစ်ခု သူမ၏ စိတ်ထဲတွင် ပေါ်လာတော့သည်။

“အဲဒီ ဓားသမားပဲ”

သူမ စုံစမ်းသိရှိထားသော အချက်အလက်များအရ လင်းပိုင်ဖန်၏ နောက်ကွယ်တွင် အမြဲရှိနေတတ်သော အစွမ်းထက်သည့် ဓားသမားတစ်ဦး ရှိနေသည်။ ထိုသူမှာ မည်သူမည်ဝါဖြစ်ကြောင်း မည်သူမျှ မသိသော်လည်း မဟာရှနိုင်ငံ အန္တရာယ်ကြုံတိုင်းတွင် သူ အမြဲ ထွက်ပေါ်လာလေ့ရှိသည်။

ပထမအကြိမ်မှာ ရှန်၊ အန်းနှင့် ဖန် သုံးနိုင်ငံ မဟာမိတ်စစ်တပ် မဟာရှကို တိုက်ခိုက်စဉ်က ဖြစ်သည်။ ထိုသူမှာ လူကိုယ်တိုင် ပေါ်မလာဘဲ အဝေးမှနေ၍ပင် ဓားတစ်ကွက်တည်းဖြင့် ရန်သူ့ ချီဖွဲ့တည်ခြင်းအဆင့် ပညာရှင်အားလုံးကို သုတ်သင်ခဲ့သည်။ ဒုတိယအကြိမ်မှာ 'ငွေဂိုဏ်း' က ဧကရာဇ်မိုက်ကို လုပ်ကြံရန် ပညာရှင်များ စေလွှတ်စဉ်က ဖြစ်ပြီး၊ ထိုစဉ်ကလည်း တစ်ကွက်တည်းဖြင့် အားလုံးကို ရှင်းပစ်ခဲ့သည်။ တတိယအကြိမ်မှာ ချီဖွဲ့တည်ခြင်းအဆင့် သိုင်းပညာရှင်များကို စေလွှတ်၍ 'ကိုးမျက်လုံး ကျောက်စိမ်းဖြူ ကြာပန်း' ကို ရှာဖွေစဉ် ကြုံတွေ့ရသည့် မြွေကြီးကို သတ်ဖြတ်ခဲ့ခြင်း ဖြစ်သည်။ စတုတ္ထအကြိမ်မှာ အိုယဲ့ဇီ လာရောက် ပြဿနာရှာစဉ်က ဖြစ်ပြီး၊ ပဉ္စမအကြိမ်မှာတော့ အန်လုရှန်နှင့် ရှီစစ်မင်တို့ ပုန်ကန်စဉ် 'လူသတ်လက်ဝါး ချိုယင်' ကို တစ်ကွက်တည်းဖြင့် ဖြေရှင်းခဲ့ခြင်း ဖြစ်သည်။

သူ၏ လှုပ်ရှားမှုများမှာ မကြာခဏ မဟုတ်သော်လည်း ထွက်ပေါ်လာတိုင်း အခြေအနေကို ပြောင်းပြန် လှန်နိုင်ခဲ့သည်။ မည်သို့သော ပြိုင်ဘက်မျိုးကိုမဆို တစ်ကွက်တည်းဖြင့်သာ အဆုံးသတ်နိုင်သည့် သူ၏ ခွန်အားမှာ ခန့်မှန်းရ ခက်လောက်အောင် နက်ရှိုင်းလှသည်။

အလွန်လှပသော အမျိုးသမီး၏ အတွေးများမှာ ပို၍ ပြတ်သားလာခဲ့သည် - “ အင်ပါယာချီအဆင့် သိုင်းပညာရှင်တစ်ယောက်ကို တစ်ကွက်တည်းနဲ့ သတ်နိုင်တယ်ဆိုရင် သူက အနည်းဆုံးတော့ ကောင်းကင်အဆင့်ပဲ၊ သာမန် ကောင်းကင်အဆင့်တောင် မဟုတ်ဘူး။ အဲဒီလောက် အစွမ်းထက်နေမှတော့ သူက ဘာလို့ မဟာကောင်းကင် အဆင့် မဖြစ်နိုင်ရမှာလဲ။ သူက လူကိုယ်တိုင် ပေါ်မလာတာကလည်း သူ့ထက် အဆင့်နိမ့်တဲ့ သူတွေနဲ့ မဆက်ဆံချင်လို့ ဒါမှမဟုတ် နိုင်ငံရေး အရှုပ်အထွေးတွေကို ကလေးကစားစရာလို သဘောထားလို့လည်း ဖြစ်နိုင်တယ်။ အဲဒီ ဧကရာဇ်မိုက်ရဲ့ အသက်အန္တရာယ် မစိုးရိမ်ရသရွေ့ သူက လှုပ်ရှားမှာ မဟုတ်ဘူး”

သူမ ဆက်လက် ဆင်ခြင်ကြည့်ပြန်သည် - “ လင်းပိုင်ဖန်က အပြင်လောကမှာ မိုက်မဲတဲ့ ဧကရာဇ်လို့ နာမည်ကြီးပေမဲ့ တကယ်တော့ တစ္ဆေတစ်ကောင်လို ကောက်ကျစ်ပြီး အနိုင်မရနိုင်မယ့် တိုက်ပွဲကို ဘယ်တော့မှ မတိုက်ဘူး။ အခု သူကိုယ်တိုင် စစ်မြေပြင်ကို လာတာကလည်း အနိုင်ရဖို့ ရာနှုန်းပြည့် သေချာနေလို့ပဲ ဖြစ်ရမယ်။ သူ့ရဲ့ ယုံကြည်ချက်က ဘယ်ကလာတာလဲ၊ နတ်ဓားကို ကိုင်ထားတဲ့ ဓားအဖိုးအိုဆီကလား၊ မဖြစ်နိုင်ဘူး။ ဓားအဖိုးအိုက တော်ပေမဲ့ ကောင်းကင်အဆင့်ကို မကျော်နိုင်ဘူး။ လူတစ်သန်း စစ်ဗျူဟာကရော..? ဒါကလည်း အားနည်းချက် ရှိနေတယ်။ အခုတော့ အဖြေက ရှင်းသွားပြီ... သူ့ဘေးမှာ မဟာကောင်းကင်အဆင့် သိုင်းပညာရှင်တစ်ယောက် ရှိနေလို့ပဲ”

အရာအားလုံးမှာ အချိတ်အဆက် မိသွားပြီ ဖြစ်သည်။ အလွန်လှပသော အမျိုးသမီးသည် သက်ပြင်းတစ်ချက်ကို အသာအယာ ချလိုက်ရင်း - “ယောင်ယောင်... မင်းရဲ့ ဒီဧကရာဇ်မိုက် သူငယ်ချင်းက မင်းထင်တာထက်တောင် အများကြီး ပိုကြောက်ဖို့ကောင်းတယ်” ဟု အဓိပ္ပာယ်ပါပါ ပြုံး၍ ဆိုလိုက်သည်။

ယောင်ယောင်မှာ နားမလည်ဘဲ ကြောင်ကြည့်နေသော်လည်း ဆရာမက ရှင်းမပြတော့ပေ။ သူမ၏ တပည့်မလေးကို လင်းပိုင်ဖန်နှင့် သဘာဝအတိုင်းပဲ ပတ်သတ်စေချင်ခဲ့သည်။ ထိုသို့ဆိုလျှင် သူတို့ကြားက သံယောဇဉ်မှာ ပို၍ စစ်မှန်ပြီး မိစ္ဆာဂိုဏ်းအတွက်လည်း အကျိုးကျေးဇူးများ ရနိုင်သည် မဟုတ်ပါလား။

“ကဲ... တပည့်မလေး၊ ပြင်ဆင်လိုက်တော့။ ငါတို့တွေ မဟာရှဧကရာဇ်ဆီကို သွားလည်ကြမယ်”

တဲအတွင်း၌ လင်းပိုင်ဖန်သည် သတိပြန်ဝင်လာပြီး အချိန်ကို ကြည့်လိုက်ရာ အံ့အားသင့်သွားခဲ့သည်။ သူ၏ စိတ်ထဲတွင် နှစ်ပေါင်းများစွာ ကြာခဲ့သကဲ့သို့ ခံစားရသော်လည်း လက်တွေ့တွင်မူ အချိန် ခဏလေးသာ ရှိသေးသည်။ သို့သော် သူ၏ ခွန်အားမှာမူ အမှန်တကယ် တိုးတက်သွားပြီဖြစ်သည်။ ချီစွမ်းအားများမှာ သုံးဆမက ပိုမိုစင်ကြယ်သွားပြီး သူ၏ ခန္ဓာကိုယ်မှာလည်း နတ်လက်နက်များဖြင့်ပင် ဖောက်ထွင်း၍ မရလောက်အောင် ကျစ်လျစ်ကာ သန်မာသွားပြီဖြစ်သည်။

အရေးကြီးဆုံးမှာ သူ၏ သိုင်းပညာအပေါ် နားလည်မှုမှာ 'တာအို' အဆင့်သို့ ရောက်ရှိသွားခြင်းပင်။ ဒါကို တာအိုသို့ သိုင်းပညာဖြင့် ဝင်ရောက်သွားခြင်းဟုပင် ဆိုနိုင်ပေသည်။ ဒီခံစားချက်သည် အလွန်ထူးခြားဆန်းကြယ်ပြီး ဖော်ပြ၍ မရနိုင်ပေ။ ယခုဆိုလျှင် မဟာကောင်းကင်အဆင့်အောက်ရှိ မည်သည့် သိုင်းပညာရှင်ကိုမဆို သူသည် လက်တစ်ဖက်တည်းဖြင့်ပင် ဖိနှိပ်ထားနိုင်ပြီဖြစ်သည်။

လင်းပိုင်ဖန်မှာ သက်ပြင်းချရင်း “ငါ ထပ်ပြီး အစွမ်းထက်လာပြန်ပြီပဲ…. ပြိုင်ဘက်ကင်းရတာ တကယ်ကို အထီးကျန်ဖို့ ကောင်းတာပဲ...”

လင်းပိုင်ဖန်၏ ဤမောက်မာလှသော စကားကိုသာ အပြင်လူများ ကြားလျှင်တော့ သူ့ကို ဝိုင်းရိုက်ကြမည်မှာ သေချာလှပေသည်။