အခန်း (၂၉၇-၂၉၈)
Vol. 22 Ch. 297-298
အခန်း ( ၂၉၇ ) - အင်မော်တယ်ဝိညာဉ်နန်းတော်၊ ဘယ်သူများလဲ? အံ့ဩတုန်လှုပ်ခြင်း
ကုချန်၏ တည်ငြိမ်အေးဆေးသော အမူအရာသည် အကြီးအကဲသုံးဦးနှင့် အခြားသူများအပေါ် ကူးစက်သွားပုံရကာ သူတို့အား တဖြည်းဖြည်း စိတ်အေးသွားစေခဲ့သည်။
သူတို့သခင်ကပင် မကြောက်ရွံ့မှတော့ သူတို့သည် ဘာကို ကြောက်နေရဦးမည်နည်း။ သူတို့လုပ်ရန်မှာ ငြိမ်သက်စွာ စောင့်ဆိုင်းနေရန်သာ ဖြစ်သည်။ သူတို့သည် ချီလျန်မျိုးနွယ်၌ ဤကဲ့သို့သောနေ့ရက်မျိုး ရောက်ရှိလာလိမ့်မည်ဟု တစ်ခါမျှ မမျှော်လင့်ထားခဲ့ကြပေ။
ချီလျန်မျိုးနွယ်သည် ရှီမိုကောင်းကင်၏ ဖမ်းဆီးခြင်းကို မခံရစေရန် မည်သို့ စိုးရိမ်တကြီး နေထိုင်ခဲ့ရသည်ကို သူတို့ ပြန်လည်အမှတ်ရမိသွား၏။ သူတို့သည် ရှီမိုကောင်းကင်ကို မဆိုထားနှင့် ရှီမိုကောင်းကင်၏ လက်အောက်ခံဖြစ်သော ရွှမ်ယွမ်နတ်ဆိုးနယ်မြေကဲ့သို့ အားနည်းသော နယ်မြေများကိုပင် မထိရဲခဲ့ကြပေ။
သို့သော် ယခုမူ သူတို့၏သခင်သည် ချီလျန်မျိုးနွယ်ကို ဦးဆောင်ကာ ရှီမိုကောင်းကင်တစ်ခုလုံးကို တိုက်ရိုက်ရင်ဆိုင်နေရုံသာမက ရှီမိုကောင်းကင်အရှင်သခင်ကိုပင် ဆန့်ကျင်နေပြီဖြစ်သည်။ ဤကဲ့သို့ ကြီးမားသော အပြောင်းအလဲသည် သူတို့အား မည်သို့လျှင် စိတ်လှုပ်ရှားမှု မဖြစ်စေဘဲ နေနိုင်မည်နည်း။
…………
ရှီမိုကောင်းကင်.....
သွေးငရဲ နတ်ဆိုးအရှင်သခင်၊ ရွှမ်းရှနတ်ဆိုးအရှင်သခင်နှင့် အခြားနတ်ဆိုးအရှင်သခင် ငါးဦးတို့ ရှီမိုကောင်းကင်မှ ထွက်ခွာသွားပြီး မကြာမီမှာပင် ရှီမိုကောင်းကင်၏ အင်မော်တယ်ဝိညာဉ်နန်းတော်ကို စောင့်ကြပ်နေသည့် အင်မော်တယ်အဆင့် ပညာရှင်တစ်ဦးမှာ မိုဟဲနတ်ဆိုးအရှင်သခင်၏ ဝိညာဉ်ကျောက်ပြားသည် ရုတ်တရက် အစိတ်စိတ်အမွှာမွှာ ကွဲအက်သွားသည်ကို ထိတ်လန့်ဖွယ် တွေ့ရှိလိုက်ရသည်။
အင်မော်တယ်ဝိညာဉ်နန်းတော်ဟူသည်မှာ နာမည်အတိုင်းပင် ရှီမိုကောင်းကင်လက်အောက်ရှိ အင်မော်တယ်အဆင့်နှင့် ထိုအထက်ရှိ နတ်ဆိုးအရှင်သခင်များအားလုံး၏ ဝိညာဉ်ကျောက်ပြားများကို သိမ်းဆည်းထားသည့် နေရာဖြစ်သည်။ ဝိညာဉ်ကျောက်ပြားတစ်ခုစီအတွင်း၌ အင်မော်တယ်အဆင့်၏ ဝိညာဉ် အစိတ်အပိုင်းတစ်ခုကို ပေါင်းစည်းထားခြင်း ဖြစ်သည်။
အကယ်၍ အင်မော်တယ်တစ်ဦး သေဆုံးသွားပါက အင်မော်တယ်ဝိညာဉ်နန်းတော်ရှိ ဝိညာဉ်ကျောက်ပြားသည် ချက်ချင်း အာရုံခံမိကာ အစိတ်စိတ်အမွှာမွှာ ကွဲအက်သွားမည်ဖြစ်ကာ ရှီမိုကောင်းကင်ကို ချက်ချင်း သိရှိစေမည်ဖြစ်သည်။
သို့သော် ဤအင်မော်တယ်သည် အင်မော်တယ်ဝိညာဉ်နန်းတော်ကို နှစ်ပေါင်းသိန်းနှင့်ချီ၍ စောင့်ကြပ်လာခဲ့သော်လည်း ဝိညာဉ်ကျောက်ပြား ကွဲအက်သည်ကို တစ်ခါမျှ မမြင်ဖူးခဲ့ပေ။
အဆုံးစွန်ဆိုသော် ထိုသူမှာ အင်မော်တယ်တစ်ဦး ဖြစ်သည်မဟုတ်ပါလော။ ထို့ပြင် ရှီမိုကောင်းကင်အရှင်သခင်၏ လက်အောက်ငယ်သားများ ဖြစ်သည့်အတွက် နတ်ဆိုးနယ်မြေရှိ အားကောင်းသော တည်ရှိမှုအချို့နှင့် ထိပ်တိုက်တွေ့လျှင်ပင် ရှီမိုကောင်းကင်အရှင်သခင်၏ မျက်နှာကို ထောက်ထားသောအားဖြင့် အနည်းငယ်သာ သတိပေးခံရမည်ဖြစ်ပြီး အသက်ဆုံးရှုံးသည်အထိ ဖြစ်ခဲလှသည်။
ထို့ကြောင့် နတ်ဆိုးနယ်မြေတွင် ကောင်းကင်ဘုံအချင်းချင်း စစ်ပွဲမဖြစ်သရွေ့ အင်မော်တယ်အဆင့်အထက် တည်ရှိမှုများ သေဆုံးရန်မှာ မဖြစ်နိုင်သလောက်ပင်။
သို့သော် ယခုမူ မိုဟဲနတ်ဆိုးအရှင်သခင်၏ ဝိညာဉ်ကျောက်ပြားမှာ ကွဲအက်သွားပြီဖြစ်သည်။ ဤအရာမှာ မိုဟဲနတ်ဆိုးအရှင်သခင် သေဆုံးသွားပြီဟု ဆိုလိုခြင်းပင်။
သူသည် အင်မော်တယ်တစ်ဦးထက်ပင် ပိုမိုစွမ်းအားကြီးသော နတ်ဆိုးအရှင်သခင် တစ်ဦးဖြစ်သည်။ မိုဟဲနတ်ဆိုးအရှင်သခင်သည် အဘယ်ကြောင့် သေဆုံးသွားရသနည်း။
ထိုနေရာကို စောင့်ကြပ်နေသည့် ရှီမိုကောင်းကင်မှ အင်မော်တယ်အရှင်မှာ တုန်လှုပ်သွား၏။ သူသည် ဤကိစ္စကို ရှီမိုကောင်းကင်ရှိ အင်မော်တယ်နတ်ဆိုးအရှင်သခင်များထံ သတင်းပို့ရန်နှင့် မိုဟဲနတ်ဆိုးအရှင်သခင် သွားလာခဲ့သည့် နေရာတို့ကို စုံစမ်းရန် အလျင်အမြန် ထွက်ခွာရန် ပြင်လိုက်သည်။
သို့သော် ထိုအင်မော်တယ်မှာ အင်မော်တယ်ဝိညာဉ်နန်းတော်မှ ထွက်ခွာရန် ပြင်လိုက်စဉ်မှာပင် ဆက်တိုက်ဆိုသလို ကွဲအက်သံများ ထပ်မံထွက်ပေါ်လာပြန်သဖြင့် သူသည် မသိစိတ်ဖြင့် ဘေးသို့ လှည့်ကြည့်လိုက်မိသည်။
ထိုမြင်ကွင်းသည် သူ့အား အသည်းတုန်မတတ် ထိတ်လန့်သွားစေတော့သည်။ သူ၏မျက်လုံးများမှာ ကြောက်ရွံ့မှုနှင့် အံ့အားသင့်မှုတို့ဖြင့် ဝိုင်းစက်နေတော့၏။
" သွေးငရဲ နတ်ဆိုးအရှင်သခင်၊ ရွှမ်းရှနတ်ဆိုးအရှင်သခင်၊ ဖီးနစ်ပွဲတော် နတ်ဆိုးအရှင်သခင်... သေပြီ... အားလုံး သေကုန်ပြီလား "
အင်မော်တယ်အရှင်သည် ထိတ်လန့်တကြား ရေရွတ်လိုက်မိ၏။ သူ ဘာကို မြင်လိုက်ရသနည်း။
အင်မော်တယ်ဝိညာဉ်နန်းတော်အတွင်း၌ နတ်ဆိုးအရှင်သခင် ငါးဦး၏ အသက်ဝိညာဉ်ကို ကိုယ်စားပြုသည့် ဝိညာဉ်ကျောက်ပြား ငါးခုမှာ တစ်ပြိုင်နက်တည်း ကွဲအက်သွားခဲ့သည်။ ထိုငါးဦးထဲတွင် သွေးငရဲ နတ်ဆိုးအရှင်သခင်နှင့် ရွှမ်းရှနတ်ဆိုးအရှင်သခင်တို့လည်း ပါဝင်နေသည်။
ဤနတ်ဆိုးအရှင်သခင် နှစ်ဦးမှာ ရှီမိုကောင်းကင်အရှင်သခင်၏ လက်ရုံးများ ဖြစ်ကြသည်။ သူတို့ကိုယ်တိုင်မှာလည်း အင်မော်တယ်နတ်ဆိုးအရှင်သခင် အထွက်အထိပ်အဆင့်၏ ကြောက်မက်ဖွယ် စွမ်းအားများကို ပိုင်ဆိုင်ထားကြသူများ ဖြစ်သည်။ ဤသူနှစ်ဦးကို မည်သူက သတ်နိုင်သနည်း။ အင်မော်တယ်ဘုရင်အဆင့် ရှိသူမှလွဲ၍ မည်သူမျှ မဖြစ်နိုင်ပေ။
ထို့အပြင် နတ်ဆိုးအရှင်သခင် ငါးဦး၏ ဝိညာဉ်ကျောက်ပြားများသည် တစ်ချိန်တည်းမှာပင် ကွဲအက်သွားခဲ့ခြင်းကြောင့် သူတို့အားလုံးသည် တစ်ပြိုင်နက်တည်း သေဆုံးသွားခဲ့ခြင်း ဖြစ်ရမည်။ ကျယ်ပြောလှသော နတ်ဆိုးနယ်မြေတွင် မည်သူက ဤကဲ့သို့ လုပ်ဆောင်နိုင်မည်နည်း။
ဤကိစ္စအား အခြားနတ်ဆိုးကောင်းကင်ဘုံမှ အင်မော်တယ်ဘုရင်တစ်ဦးသာ လုပ်ဆောင်နိုင်ပေလိမ့်မည်။
သို့သော် အခြားကောင်းကင်ဘုံမှ အင်မော်တယ်ဘုရင်သည် အဘယ်ကြောင့် သွေးငရဲ နတ်ဆိုးအရှင်သခင်နှင့် အခြားသူများကို သတ်ရသနည်း။ ဤမျှများပြားသော နတ်ဆိုးအရှင်သခင်များ ဆက်တိုက်သေဆုံးခြင်းမှာ ပုဂ္ဂိုလ်ရေးအရ မကျေနပ်မှုကြောင့် မဖြစ်နိုင်ပေ။
အခြားနတ်ဆိုးကောင်းကင်ဘုံမှ အထွတ်အထိပ် တည်ရှိမှုတစ်ခုသည် ရှီမိုကောင်းကင်ကို တိုက်ခိုက်ရန် စီစဉ်နေခြင်းများလော။ ဤအတွေးဝင်လာသည်နှင့်အမျှ ထိုအင်မော်တယ်အရှင်၏ မျက်လုံးထဲရှိ ကြောက်ရွံ့မှုများမှာ ပိုမိုပြင်းထန်လာတော့သည်။
အခြေအနေအရပ်ရပ်ကို စဉ်းစားကြည့်လျှင် ဤဖြစ်နိုင်ခြေတစ်ခုသာလျှင် ကျိုးကြောင်းဆီလျော်သည်။ အင်မော်တယ်ဘုရင်တစ်ဦးသည် ရှီမိုကောင်းကင်ကို စစ်ကြေညာရန်အတွက် ရှီမိုကောင်းကင်အရှင်သခင်၏ လက်အောက်ငယ်သားများကို ကြိုတင်ဖယ်ရှားလိုက်ခြင်းသာ ဖြစ်ရမည်။
ထိုအင်မော်တယ်သည် ဆက်လက်မစောင့်ဆိုင်းတော့ဘဲ ဝိညာဉ်နန်းတော်ထဲမှ ပြေးထွက်သွားတော့သည်။ ယခုတစ်ကြိမ်တွင် သူသည် အခြားနတ်ဆိုးအရှင်သခင်များထံ သတင်းပို့ရန် မစဉ်းစားတော့ဘဲ ရှီမိုကောင်းကင်အရှင်သခင်ကို တိုက်ရိုက်သွားရောက်တွေ့ဆုံရန် ဆုံးဖြတ်လိုက်သည်။ ဤသတင်းကို အရှင်သခင်ထံ အမြန်ဆုံး တင်ပြရမည်ဖြစ်သည်။
…………
ရှီမိုကောင်းကင်၏ နက်ရှိုင်းသော တစ်နေရာ၊ အဆုံးမဲ့နတ်ဆိုးချီများ ဖုံးလွှမ်းနေသော နယ်မြေအတွင်း၌ ရွှေရောင်ဆံပင်နှင့် ရှေးဟောင်းတော်ဝင်ဝတ်ရုံကို ဝတ်ဆင်ထားသော ရှီမိုကောင်းကင်အရှင်သခင်သည် သူ၏မျက်လုံးများကို ဖြည်းညင်းစွာ ဖွင့်လိုက်၏။ သူသည် သူ၏ရှေ့တွင် ဒူးထောက်နေသော အင်မော်တယ်အရှင်ကို ကြည့်ကာ အေးစက်စွာ ပြောကြားလိုက်သည်။
" ဒီအရှင် သိပြီ... မင်း သွားနိုင်ပြီ "
" ဟုတ်ကဲ့ပါ "
အင်မော်တယ်ဝိညာဉ်နန်းတော်ကို စောင့်ကြပ်နေသည့် ထိုသူသည် ရိုသေစွာဖြင့် ဆုတ်ခွာသွားခဲ့၏။ သူသည် ရှီမိုကောင်းကင်အရှင်သခင်နှင့် တွေ့ဆုံစဉ် သွေးငရဲ နတ်ဆိုးအရှင်သခင်နှင့် အခြားသူများ သေဆုံးသည့် သတင်းအားလုံးကို တင်ပြခဲ့ပြီးဖြစ်သည်။
အင်မော်တယ်အရှင် ထွက်ခွာသွားပြီးနောက် ရှီမိုကောင်းကင်အရှင်သခင်သည် မတ်တတ်ရပ်လိုက်၏။ သူ၏ နက်ရှိုင်းသော ရွှေရောင်မျက်လုံးများအတွင်း၌ ဒေါသနှင့် သံသယများ ပြည့်နှက်နေလေသည်။
ရှီမိုကောင်းကင်၏ အရှင်သခင်အနေဖြင့် ရှီမိုကောင်းကင်အတွင်းရှိ လှုပ်ရှားမှုအားလုံးကို သူ မသိဘဲ မနေနိုင်ပေ။ သွေးငရဲ နတ်ဆိုးအရှင်သခင်နှင့် ရွှမ်းရှနတ်ဆိုးအရှင်သခင်တို့ ချီလျန်မျိုးနွယ်ရှိရာသို့ သွားကြသည်ကို သူ သိသော်လည်း မတားဆီးခဲ့ပေ။ သို့မဟုတ် မတားဆီးချင်ခဲ့ခြင်း ဖြစ်သည်။
ချီလျန်မျိုးနွယ်၏ ချီရှောင်းမှာ သေဆုံးသွားခဲ့ပြီဖြစ်ရာ သူ့အတွက် ခြိမ်းခြောက်မှု မရှိတော့ပေ။ သို့သော် သူ၏ လက်အောက်ခံ နတ်ဆိုးအရှင်သခင်များသည် ချီလျန်မျိုးနွယ်ကို ဖျက်ဆီးပြီးနောက် ထိုနယ်မြေကို ခွဲဝေယူရန် စောင့်ဆိုင်းနေခဲ့ကြသည်မှာ ကြာပြီဖြစ်သည်။ ရှီမိုကောင်းကင်အရှင်သခင် အနေဖြင့် သူ၏လက်အောက်ငယ်သားများ၏ စိတ်အားထက်သန်မှုကို မဖျက်ဆီးလိုပေ။
မည်သို့ပင်ဆိုစေ ချီရှောင်းသေဆုံးပြီးနောက် ချီလျန်မျိုးနွယ်မှာ အသားစင်ပေါ်မှ ငါးကဲ့သို့ပင် ဖြစ်သည်။ ယခုအခါ သူတို့အား အရေးယူရန် ခိုင်လုံသောအကြောင်းပြချက်လည်း ရှိနေပြီဖြစ်ရာ ၎င်းမှာ သူ့အတွက် မျက်နှာပန်းလှစေသည်။
ထို့ကြောင့် သွေးငရဲ နတ်ဆိုးအရှင်သခင်နှင့် အခြားသူများ၏ သီးသန့်လှုပ်ရှားမှုကို ရှီမို
သူသည် တစ်ဖက်ပိတ် မျက်ကွယ်ပြုပေးခဲ့ခြင်း ဖြစ်သည်။ သို့သော် သူတို့ထွက်ခွာသွားပြီး မကြာမီမှာပင် အားလုံးသေဆုံးသွားသည့် သတင်းကို ရရှိလိမ့်မည်ဟု မည်သူက ထင်ထားပါမည်နည်း။
ရှီမိုကောင်းကင်၏ နတ်ဆိုးအရှင်သခင် ခြောက်ဦးလုံး သေဆုံးသွားခဲ့ပြီ။ ထိုအထဲတွင် အထွက်အထိပ်အဆင့် နတ်ဆိုးအရှင်သခင် နှစ်ဦးပင် ပါဝင်နေ၏။ ဤအချက်အလက်များအရ တိုက်ခိုက်သူမှာ အင်မော်တယ်နတ်ဆိုးအရှင်သခင် အထွက်အထိပ်ထက်ပင် သာလွန်သူ မဟုတ်လျှင် အင်မော်တယ်ဘုရင်အဆင့် တည်ရှိမှုတစ်ခု ဖြစ်ရမည်ဟု ရှီမိုကောင်းကင်အရှင်သခင် ခန့်မှန်းလိုက်သည်။
သို့သော် မည်သူနည်း... မည်သူက ဤမျှ ရဲတင်းစွာ လုပ်ဆောင်ဝံ့သနည်း။
အခန်း ( ၂၉၈ ) - ဇာတ်ကြောင်းတစ်ခုလုံးအား ဖော်ထုတ်ခြင်း၊ အရှင်သခင်၏ လှုပ်ရှားမှု
ရှီမိုကောင်းကင်အရှင်သခင်၏ မျက်နှာအမူအရာမှာ မှောင်မှိုင်း၍ မရေမရာ ဖြစ်နေကာ ထိုသို့ ပြုလုပ်သွားသူမှာ မည်သူဖြစ်နိုင်သည်ကို စတင် စဉ်းစားနေတော့သည်။ သို့သော် သူ၏စိတ်ထဲတွင် ပေါ်လာသော ပုံရိပ်များကိုမူ သူကိုယ်တိုင်ပင် ပြန်လည် ပယ်ချပစ်လိုက်လေသည်။
ရုတ်တရက် တစ်စုံတစ်ခုကို သတိရသွားဟန်ဖြင့် သူ၏မျက်လုံးများမှာ ပို၍ မှောင်မှိုင်းသွားတော့သည်။ မကြာသေးမီက ရွှမ်ယွမ်နတ်ဆိုးနယ်မြေ၌ အင်မော်တယ်ဘုရင်အဆင့်သို့ တက်လှမ်းရန် ကြိုးစားနေသည့် အရှိန်အဝါတစ်ခုကို သူ အာရုံခံမိခဲ့သည်ကို ရုတ်တရက် သတိရလိုက်ခြင်းပင်။
ထိုစဉ်က ရှီမိုကောင်းကင်အရှင်သခင်မှာ အံ့အားသင့်သွား၍ သူ၏ ဝိညာဉ်အစိတ်အပိုင်းတစ်ခုအား စေလွှတ်ကာ စုံစမ်းရန် ကြိုးစားခဲ့သော်လည်း တစ်ဖက်လူ၏ အဆင့်တက်လှမ်းမှု အရှိန်အဝါမှာ ခဏတာမျှသာ ကြာမြင့်ပြီးနောက် အစအနမကျန် ပျောက်ကွယ်သွားခဲ့သည်။
ထိုအချိန်တွင် ရှီမိုကောင်းကင်အရှင်သခင်သည် အင်မော်တယ်ဘုရင်အဆင့်သို့ တက်လှမ်းရန် အသက်နှင့်ရင်း၍ ကြိုးစားရင်း သေဆုံးသွားသည့် မသိနားမလည်သော လူငယ်တစ်ဦးဟုသာ ထင်မှတ်ခဲ့သည်။ ထို့ကြောင့် သူ၏ အာရုံကို ပြန်လည်ရုပ်သိမ်းလိုက်ကာ ထိုကိစ္စကို အလေးမထားခဲ့ပေ။
ယခုမူ မိုဟဲသည် ရွှမ်ယွမ်နတ်ဆိုးနယ်မြေ၏ ကိစ္စရပ်များကို စုံစမ်းရင်း ကြက်သွေးရောင်ငရဲနတ်ဆိုးနယ်မြေရှိ ချီလျန်မျိုးနွယ်ကို ခြေရာခံ လိုက်ခဲ့ခြင်း ဖြစ်သည်။ ထို့နောက် သွေးငရဲအရှင်၊ ရွှမ်းရှအရှင်နှင့် အခြားသူများမှာ သူ့အား ကူညီရန် သွားရောက်ရင်း ထိုနယ်မြေ၌ သေဆုံးကုန်ကြသည်။ ရှီမိုကောင်းကင်အရှင်သခင်၏ စိတ်ထဲတွင် အရာအားလုံး ဆက်စပ်မိသွား၏။
" ငါ့နယ်မြေထဲမှာ အင်မော်တယ်ဘုရင်အဆင့်ကို တက်လှမ်းဖို့ ကြိုးစားတာက တစ်ကိစ္စ... အခုတော့ ငါ့လက်အောက်ငယ်သားတွေကိုပါ သတ်ရဲတယ်ပေါ့... အဆင့်တက်လှမ်းဖို့ မအောင်မြင်လို့ ဒေါသပုံချနေတာလား "
ရှီမိုကောင်းကင်အရှင်သခင်သည် အေးစက်စွာ နှာခေါင်းရှုံ့လိုက်၏။ သူသည် ဇာတ်ကြောင်းတစ်ခုလုံးကို သဘောပေါက်သွားရကာ ဤသူသည် ရွှမ်ယွမ်နတ်ဆိုးနယ်မြေ၌ အင်မော်တယ်ဘုရင်အဆင့်သို့ တက်လှမ်းရန် ကြိုးစားသော်လည်း မအောင်မြင်ခဲ့၍ ဒေါသဖြေသည့်အနေဖြင့် ဟွမ်ယိုထျန်းကျွင်းကို သတ်ဖြတ်ကာ ကြက်သွေးရောင်ငရဲနတ်ဆိုးနယ်မြေသို့ သွားခဲ့ခြင်း ဖြစ်ရမည်။
ထို့နောက် မိုဟဲမှာ ကိစ္စရပ်များကို စုံစမ်းရင်း ထိုသူ၏လက်ချက်ဖြင့် သေဆုံးခဲ့ရကာ သွေးငရဲနတ်ဆိုးအရှင်နှင့် အခြားသူများ၏ သေဆုံးမှုမှာလည်း ဤအကြောင်းရင်းကြောင့်သာ ဖြစ်ပေလိမ့်မည်။
အင်မော်တယ်ဘုရင်အဆင့်သို့ တက်လှမ်းရန် မအောင်မြင်ခဲ့သောသူမှ သူ၏အာဏာကို ဤမျှအထိ လျစ်လျူရှုဝံ့ခြင်းမှာ ပြောင်ပြောင်တင်းတင်း စိန်ခေါ်လိုက်ခြင်းပင် ဖြစ်သည်။ အင်မော်တယ်ဘုရင်အဆင့်သို့ တက်လှမ်းရန် ကြိုးစားခြင်းမှာ မိမိ၏ စွမ်းအားနှင့် ကျင့်စဉ်အဆင့်သည် သတ်မှတ်ချက်ကို ပြည့်မီမှသာ လုပ်ဆောင်နိုင်သည့် အရာဖြစ်သည်။
ထိုသူသည် အင်မော်တယ်ဘုရင်အဆင့်သို့ မရောက်ရှိခဲ့သော်လည်း အင်မော်တယ်ဘုရင်တစ်ပါး၏ နတ်ဘုရားစွမ်းအင် အချို့ကို အမှတ်မထင် နားလည်သွားခဲ့ပုံရသည်။ သို့မဟုတ်ပါက သူ၏လက်အောက်ရှိ အင်မော်တယ်နတ်ဆိုးအရှင်သခင် အထွက်အထိပ် နှစ်ဦးကို ဤမျှလွယ်လွယ်ကူကူ သတ်ဖြတ်နိုင်မည် မဟုတ်ပေ။
သို့သော်လည်း မအောင်မြင်ခြင်းမှာ မအောင်မြင်ခြင်းပင်။ အင်မော်တယ်ဘုရင်အဆင့်သို့ မရောက်သရွေ့ ထိုသူမှာ သူ၏မျက်စိထဲတွင် ပုရွက်ဆိတ်တစ်ကောင်မျှသာ ဖြစ်သည်။
" ဒီနေ့ မင်းကို ငါကိုယ်တိုင် မသတ်ရင် နတ်ဆိုးနယ်မြေရဲ့ ကောင်းကင်ဘုံအားလုံးက ငါ့ကို လှောင်ပြောင်ကြလိမ့်မယ်... မင်းက ကိုယ့်သေတွင်းကိုယ် တူးတာပဲ... ဘယ်သူ့ကိုမှ အပြစ်မတင်နဲ့တော့ "
ရှီမိုကောင်းကင်အရှင်သခင်သည် အေးစက်စွာ ရေရွတ်လိုက်၏။ ယနေ့တွင် မိမိ၏ ဂုဏ်သိက္ခာကို ထိန်းသိမ်းရန်နှင့် အင်မော်တယ်ဘုရင်တစ်ပါး၏ ဂုဏ်သိက္ခာကို ကာကွယ်ရန်အတွက် သူသည် ထိုသူကို သတ်ဖြတ်ရန် ဆုံးဖြတ်လိုက်ပြီဖြစ်သည်။
အကယ်၍ တစ်စုံတစ်ဦးမှ သူ၏လူများကို သတ်ဖြတ်ကာ သူ၏ရှီမိုကောင်းကင်မှ အေးအေးလူလူ ထွက်ခွာသွားနိုင်ပါက ရှီမိုကောင်းကင်အရှင်သခင်သည် အခြားအင်မော်တယ်ဘုရင်များ၏ အမြင်တွင် ရယ်စရာဖြစ်သွားပေလိမ့်မည်။ သူ၏ လက်အောက်ငယ်သားများကို သတ်သွားသူအား အပြစ်မပေးနိုင်သော အရှင်သခင်သည် မည်သို့လျှင် ဘုရင်တစ်ပါး ဖြစ်နိုင်မည်နည်း။
ထိုသို့တွေးတောရင်း ရှီမိုကောင်းကင်အရှင်သခင်သည် ဖြည်းညင်းစွာ မတ်တတ်ရပ်လိုက်ရာ ကောင်းကင်နှင့် မြေကြီးကြားရှိ နတ်ဆိုးချီများမှာလည်း လိုက်ပါ လှုပ်ခတ်လာတော့သည်။
ထိုသို့ လှုပ်ခတ်နေသော နတ်ဆိုးချီများမှာ ရှီမိုကောင်းကင်အရှင်သခင်၏ ခန္ဓာကိုယ်မှ သဘာဝအတိုင်း ထွက်ပေါ်လာခြင်းသာ ဖြစ်သည်။ သူ လှုပ်ရှားလိုက်သည်နှင့် တစ်ပြိုင်နက် ရှီမိုကောင်းကင်တစ်ခုလုံးကို လွှမ်းခြုံနိုင်လောက်သော ကြောက်မက်ဖွယ် နတ်ဆိုးချီများမှာ ရှီမိုကောင်းကင်မှ ထွက်ခွာသွားတော့သည်။
ထိုကြီးမားလှသော နတ်ဆိုးချီများ၏ တုန်ခါမှုကို ရှီမိုကောင်းကင်ရှိ သက်ရှိအားလုံး အာရုံခံမိကြကာ ထိတ်လန့်တကြား ကြည့်လိုက်မိကြသည်။
" ဟင်... ဒီလောက် ကြောက်စရာကောင်းတဲ့ နတ်ဆိုးချီတွေ... ဒါ ရှီမိုကောင်းကင်အရှင်သခင်များလား "
" အရှင်သခင်ကလွဲရင် ဘယ်သူက ဒီလောက် ကြောက်စရာကောင်းတဲ့ အရှိန်အဝါကို ပိုင်ဆိုင်မှာလဲ "
" ဘုရားရေ... အရှင်သခင်ကိုယ်တိုင် လှုပ်ရှားနေပြီပဲ... ရှီမိုကောင်းကင်မှာ ဘယ်လို အဖြစ်အပျက်ကြီးတွေ ဖြစ်နေလို့လဲ "
ရှီမိုကောင်းကင်ရှိ သက်ရှိများမှာ တုန်လှုပ်နေကြ၏။ ရှီမိုကောင်းကင်၏ အရှင်သခင်အနေဖြင့် ကြီးမားသော အရေးအခင်းများမှလွဲ၍ သူသည် ကျင့်ကြံရာနေရာမှ မည်သည့်အခါမျှ ထွက်ပေါ်လာလေ့မရှိပေ။
အမှန်စင်စစ် သူ နောက်ဆုံးအကြိမ် ပေါ်ထွက်လာခဲ့သည်မှာ နှစ်ပေါင်း သိန်းနှင့်ချီခဲ့ပြီ ဖြစ်သည်။ ယခု နှစ်ပေါင်းသိန်းချီကြာပြီးနောက် အရှင်သခင် ပြန်လည်ပေါ်ထွက်လာခြင်းမှာ ရှီမိုကောင်းကင်၌ မတွေးဝံ့စရာ အဖြစ်အပျက်ကြီးတစ်ခု ဖြစ်ပွားနေခြင်းပင် ဖြစ်ရမည်။
အဖြစ်မှန်ကို မသိကြသော သက်ရှိများနှင့်မတူဘဲ ရှီမိုကောင်းကင်ရှိ အင်မော်တယ်နတ်ဆိုးအရှင်သခင်များနှင့် အင်မော်တယ်ဘုရင်အချို့မှာမူ အရှင်သခင်၏ ဦးတည်ရာကို ခန့်မှန်းမိကြသည်။
" သွေးငရဲအရှင်နဲ့ ရွှမ်းရှအရှင်တို့ သေဆုံးတာက အရှင်သခင်ကို ဒေါသထွက်စေပုံရတယ် "
" ဟွန်း... အဲဒီလူက အရမ်းကို ရဲတင်းလွန်းတယ်... ဒါ ရှီမိုကောင်းကင်လေ... အရှင်သခင်ရဲ့ မျက်စိအောက်မှာတင် လူသတ်သွားတာက အရှင်သခင်ကို မျက်ကွယ်ပြုတာပဲ မဟုတ်လား
"
" ဟက်... အရှင်သခင်ကို ကိုယ်တိုင်လှုပ်ရှားလာအောင် လှုံ့ဆော်နိုင်တဲ့သူကတော့ သေရင်တောင် အေးအေးဆေးဆေး သေလို့ရပါပြီ "
နတ်ဆိုးအရှင်သခင် အုပ်စုသည် အရှင်သခင်ကို စိန်ခေါ်သူမှာ သေချာပေါက် အဆုံးသတ်ရတော့မည်ဟု ယုံကြည်ကာ လှောင်ပြောင်နေကြသည်။ တစ်ချိန်တည်းမှာပင် အင်မော်တယ်ဘုရင်တစ်ပါးကို စိန်ခေါ်ဝံ့သည့်သူမှာ မည်သူနည်းဟုလည်း အားလုံးက သိလိုနေကြသည်။ အင်မော်တယ်ဘုရင်အောက်ရှိ အားလုံးမှာ ပုရွက်ဆိတ်များသာ ဖြစ်သည်ကို ထိုသူ မသိလေသလော။
" သွားကြစို့... ရွှမ်ယွမ်နတ်ဆိုးနယ်မြေမှာ ဘာဖြစ်မလဲဆိုတာ သွားကြည့်ကြတာပေါ့... အရှင်သခင်ကိုယ်တိုင် လှုပ်ရှားတာကို မြင်ရဖို့ဆိုတာ နှစ်ပေါင်းအများကြီးနေလို့ တစ်ခါတောင် မကြုံနိုင်တဲ့ အခွင့်အရေးပဲ "
" ဟုတ်တယ်! သွားကြည့်ရမယ်... အရှင်သခင်ရဲ့ လှုပ်ရှားမှုကို ကိုယ့်မျက်စိနဲ့ကိုယ် မြင်ခွင့်ရတာကနေ တစ်ခုခု နားလည်သွားရင်တောင် ငါတို့အတွက် အကျိုးကျေးဇူး အများကြီး ရှိလိမ့်မယ် "
ရှီမိုကောင်းကင်အရှင်သခင် လှုပ်ရှားလာသည်နှင့်အမျှ ရှီမိုကောင်းကင်တစ်ခုလုံးမှာလည်း ဆူညံသွားတော့သည်။ အင်မော်တယ်နတ်ဆိုးအရှင်သခင်များနှင့် စွမ်းအားကြီးသော အင်မော်တယ်ဘုရင်အချို့မှာ ကြက်သွေးရောင်ငရဲနတ်ဆိုးနယ်မြေသို့ အပြိုင်အဆိုင် သွားရောက်ကြသည်။
သို့သော် ရှီမိုကောင်းကင်ရှိ အင်မော်တယ်နတ်ဆိုးအရှင်သခင်များနှင့် အားကောင်းသော အင်မော်တယ်ဘုရင်အချို့သာ လိုက်သွားကြခြင်း ဖြစ်သည်။ အခြားသောသူများမှာမူ သူတို့၏ ကျင့်စဉ်အဆင့်မှာ အရှင်သခင်နှင့် အလွန်ကွာခြားလှသဖြင့် လိုက်သွားသော်လည်း ဘာကိုမျှ အာရုံခံနိုင်မည် မဟုတ်သောကြောင့် သက်ပြင်းချကာ ကျန်ရစ်ခဲ့ကြတော့သည်။
………………
ကြက်သွေးရောင်ငရဲနတ်ဆိုးနယ်မြေ.....
ရှီမိုကောင်းကင်အရှင်သခင် လှုပ်ရှားလာသည်နှင့် စက္ကန့်အနည်းငယ်အတွင်းမှာပင် ကောင်းကင်ယံမှ အဆုံးမဲ့နတ်ဆိုးချီများ ရုတ်တရက် ကျဆင်းလာကာ ကြက်သွေးရောင်ငရဲနတ်ဆိုးနယ်မြေ၏ နေရာတိုင်းကို ဖုံးလွှမ်းသွားတော့သည်။
တစ်ခဏချင်းမှာပင် ထွန်းလင်းတောက်ပနေသော နေရောင်ခြည်မှာ ပျောက်ကွယ်သွားကာ အမှောင်ထုမှ အစားထိုးဝင်ရောက်လာတော့သည်။ ဤအရာမှာ ရှီမိုကောင်းကင်အရှင်သခင် ရောက်ရှိလာခြင်းကြောင့် မဟုတ်ဘဲ ထိုနယ်မြေ၏ ကောင်းကင်နှင့်မြေကြီး တာအိုများမှာ ရှီမိုကောင်းကင်အရှင်သခင်၏ ရောက်ရှိလာမှုကို အာရုံခံမိကာ သဘာဝလွန် ဖြစ်ရပ်များအဖြစ် ပြောင်းလဲသွားခြင်းသာ ဖြစ်သည်။