အခန်း (၂၉၉-၃၀၀)
Vol. 22 Ch. 299-300
အခန်း ( ၂၉၉ ) - ပထမဆုံးနတ်ဆိုး ဆင်းသက်လာခြင်း၊ အထွတ်အထိပ် ဓမ္မရုပ်သွင်နှင့် ရယ်စရာတစ်ခုသာ ဖြစ်ခြင်း
" အင်မော်တယ်ဘုရင်..... "
ချီလျန်မျိုးနွယ်စု၏ ဘိုးဘေးနယ်မြေအတွင်း၌ အဆုံးမဲ့သော နတ်ဆိုးချီများ ရုတ်တရက် ကျဆင်းလာချိန်တွင် တတိယအကြီးအကဲနှင့် ချီချင်း အပါအဝင် ချီလျန်မျိုးနွယ်စုဝင် အားလုံး၏ စိတ်နှလုံးထဲ၌ လေးလံသော အရိပ်မည်းကြီးတစ်ခု ကျရောက်လာသကဲ့သို့ ခံစားလိုက်ရကာ အသက်ရှူရန်ပင် အလွန်ခက်ခဲလာတော့၏။
ဤအရာမှာ ရှီမိုကောင်းကင်အရှင်သခင်၏ ဂုဏ်သတင်းကို ကြောက်ရွံ့ခြင်းကြောင့်သာမက သူတို့၏ ဝိညာဉ်အတွင်းပိုင်းမှ မြစ်ဖျားခံလာသည့် တုန်လှုပ်မှုလည်း ဖြစ်သည်။ ထိုအရာကို သူတို့ လုံးဝ မထိန်းချုပ်နိုင်ကြပေ။
အဆုံးစွန်ဆိုသော် အင်မော်တယ်ဘုရင်အဆင့်သို့ ရောက်ရှိခြင်းဟူသည်မှာ ကျယ်ပြောလှသော ကောင်းကင်ဘုံများ၏ အထွတ်အထိပ်သို့ ရောက်ရန် လက်တစ်ကမ်းအလို အခြေအနေပင် ဖြစ်သည်။
သူတို့၏ အသက်အနှစ်သာရမှာ အကြိမ်ကြိမ် အဆင့်တက်လှမ်းခဲ့ပြီးဖြစ်ရာ အင်မော်တယ်ဘုရင်အောက်ရှိ မည်သည့်သက်ရှိနှင့်မျှ တူညီခြင်း မရှိတော့ပေ။ နဂါးစစ်စစ်ကို မမြင်ဖူးသော ပုရွက်ဆိတ်တစ်ကောင်သည်ပင် နဂါးနှင့် ထိပ်တိုက်တွေ့ပါက မသိစိတ်ဖြင့် မော့ကြည့်မိမည်မှာ ဓမ္မတာပင် ဖြစ်သည်။
" သခင်က သူ့ကို တားဆီးနိုင်ပါ့မလား "
" ရှီမိုကောင်းကင်အရှင်သခင် တကယ် ရောက်လာပြီပဲ... မြန်လိုက်တာ "
အစည်းအဝေးခန်းမအတွင်း၌ ချီလျန်မျိုးနွယ်စု အကြီးအကဲများသည် မြေပြင်ပေါ်တွင် ဒူးထောက်နေကြကာ သူတို့၏ စိတ်နှလုံးများမှာ လှုပ်ခတ်နေ၏။ ကုချန်မှ ရှီမိုကောင်းကင်အရှင်သခင် ကိုယ်တိုင်ရောက်လာသည်အထိ စောင့်ရန်နှင့် သူ့ကို ဖြေရှင်းပြီးပါက ချီလျန်မျိုးနွယ်စုသည် နတ်ဆိုးနယ်မြေတွင် အခိုင်အမာ ခြေကုပ်ယူနိုင်လိမ့်မည်ဟု ပြောခဲ့သော်လည်း ထိုနေ့ရက် အမှန်တကယ် ရောက်ရှိလာချိန်တွင်မူ သူတို့မှာ အလွန်အမင်း စိုးရိမ်ပူပန်ခြင်းကို မတားဆီးနိုင်ကြပေ။
ရှီမိုကောင်းကင်အရှင်သခင်သည် စစ်မှန်သော အင်မော်တယ်ဘုရင်တစ်ပါး ဖြစ်၏။ သူသည် သွေးငရဲနတ်ဆိုးအရှင်သခင်၊ ရွှမ်းရှနတ်ဆိုးအရှင်သခင်တို့နှင့် လုံးဝ နှိုင်းယှဉ်၍မရပေ။ အင်မော်တယ်နတ်ဆိုးအရှင်သခင် အထွတ်အထိပ်အဆင့်နှင့် အင်မော်တယ်ဘုရင်အဆင့်မှာ စာရွက်တစ်လွှာစာမျှသာ ကွာခြားသည်ဟု ထင်ရသော်လည်း အမှန်တကယ်တွင်မူ ထိုကွာခြားချက်မှာ နယ်မြေနှစ်ခုကြားရှိ ချောက်နက်ကြီးထက်ပင် ပိုမိုကျယ်ပြောလှသည်။
သွေးငရဲအရှင်နှင့် ရွှမ်းရှအရှင်ကဲ့သို့သော သူများသည် သူတို့၏တစ်သက်တာတွင် အင်မော်တယ်ဘုရင်အဆင့်သို့ တက်လှမ်းရန် အခွင့်အရေး အလင်းတန်းလေးတစ်ခုကိုပင် တွေ့ရှိနိုင်မည် မဟုတ်ပေ။ အင်မော်တယ်ဘုရင် ရှီမိုကောင်းကင်အရှင်သခင်၏ ရှေ့တွင် သူတို့၏ စွမ်းအားမှာ ပုရွက်ဆိတ်နှစ်ကောင်နှင့် မခြားနားလှပေ။
ယခုမူ ထိုအရှင်သခင်သည် ကြက်သွေးရောင်ငရဲနတ်ဆိုးနယ်မြေသို့ ကိုယ်တိုင် ဆင်းသက်လာတော့မည် ဖြစ်သည်။ အမှားအယွင်း အနည်းငယ် ရှိရုံဖြင့် ချီလျန်မျိုးနွယ်စုမှာ ဤလောကမှ လုံးဝ ပျောက်ကွယ်သွားနိုင်သည်။
ဤအချက်ကို သိထားကြသဖြင့် တတိယအကြီးအကဲနှင့် ချီချင်းအပါအဝင် အခြားသူများမှာ အလွန်အမင်း ထိတ်လန့်နေကြခြင်း ဖြစ်သည်။ ယခုမှစ၍ မိနစ်တိုင်း စက္ကန့်တိုင်းမှာ သူတို့မျိုးနွယ်စုအတွက် အသက်နှင့်သေခြင်းတရား ယှဉ်နေသည့် အချိန်ပင် ဖြစ်သည်။
" ဝုန်း! "
ချီလျန်မျိုးနွယ်စုဝင်များ စိုးရိမ်ထိတ်လန့်နေကြစဉ်မှာပင် ကြက်သွေးရောင်ငရဲနတ်ဆိုးနယ်မြေ၏ ဝေးကွာသော ကောင်းကင်ယံ၌ အဆုံးမဲ့သော နတ်ဆိုးချီများ ရုတ်တရက် ပေါက်ကွဲထွက်လာကာ ဖော်ပြ၍မရလောက်အောင် ကြီးမားခမ်းနားလှသော ဓမ္မရုပ်သွင် တစ်ခု ထွက်ပေါ်လာ၏။
၎င်းမှာ အဆုံးမဲ့သော နတ်ဆိုးချီများ လွှမ်းခြုံထားသည့် မြင့်မားလှသော ဓမ္မရုပ်သွင်ကြီး ဖြစ်သည်။ ကျယ်ပြောလှသော ကြက်သွေးရောင်ငရဲနတ်ဆိုးနယ်မြေသည်ပင် ထိုရုပ်သွင်ကြီး၏ ဆယ်ပုံတစ်ပုံစာသာ ရှိပေသည်။ ဓမ္မရုပ်သွင်ကြီးသည် နယ်မြေ၏ အပြင်ဘက်အထိ မြင့်တက်နေကာ စကြဝဠာ၏ ကြယ်တာရာအလင်းတန်းများမှာ ထိုရုပ်သွင်ကြီး၏ ရှေ့တွင် မြေမှုန့်ကလေးများကဲ့သို့ သေးငယ်သွားတော့သည်။ သူ၏ ရွှေရောင်ဆံပင်များကြား၌ ရစ်ပတ်နေသော ကြယ်တာရာအလင်းတန်းများမှာ အမှုန်အမွှားမျှသာ ရှိတော့၏။
ဤအရာမှာ ရှီမိုကောင်းကင်အရှင်သခင်၏ ဓမ္မရုပ်သွင်ဖြစ်ပြီး သူ၏ အင်မော်တယ်ဘုရင်တာအို၏ သဘာဝအတိုင်း ထွက်ပေါ်လာသော အရှိန်အဝါလည်း ဖြစ်သည်။ ဓမ္မရုပ်သွင် ပေါ်ထွက်လာခြင်းမှာ ရှီမိုကောင်းကင်အရှင်သခင် ဆင်းသက်လာပြီဖြစ်ကြောင်း ဖော်ပြနေခြင်းပင်။
ဧရာမ ဓမ္မရုပ်သွင်ကြီး ကမ္ဘာပေါ်သို့ ရောက်ရှိလာချိန်တွင် လောကကြီးသည် ထိုဖိအားကို လုံးဝ မခံနိုင်တော့ပုံရကာ ကောင်းကင်ယံမှာ တုန်ခါနေလျက် မြေပြင်မှာ အက်ကွဲလာကာ လေဟာနယ် အတွင်း၌ အက်ကြောင်းများစွာ ဖြစ်ပေါ်လာ၏။ ဓမ္မရုပ်သွင်၏ ပတ်ဝန်းကျင်ရှိ တောင်တန်းများ ပြိုကျကာ မြစ်ရေများ ပြောင်းပြန်စီးဆင်း၍ မြေဆီလွှာများ ပျက်စီးသွားကြသည်။ ၎င်းမှာ ကမ္ဘာပျက်ကပ်တစ်ခုကဲ့သို့ပင် ထိတ်လန့်ဖွယ် ကောင်းလှပေသည်။
ဤအကြောင်းကြောင့်ပင် အင်မော်တယ်ဘုရင်များသည် နတ်ဆိုးနယ်မြေ၏ နေရာအသီးသီးသို့ အလွယ်တကူ မသွားလာကြခြင်း ဖြစ်သည်။ သူတို့၏ ခမ်းနားလှသော တာအိုအရှိန်အဝါမှာ သာမန်နတ်ဆိုးနယ်မြေများ ခံနိုင်ရည်ရှိသည်ထက် ပိုမိုလွန်ကဲနေသဖြင့် သူတို့သွားလေရာတွင် ကောင်းကင်နှင့် မြေကြီး ပျက်စီးမှုများ ဖြစ်ပေါ်တတ်သည်။ သူတို့သည် မိမိတို့၏ သက်ဆိုင်ရာ ကောင်းကင်ဘုံများ၌ နေထိုင်ခြင်းကသာ အဆင်ပြေဆုံး ဖြစ်သည်။
အကယ်၍ သွားလာလိုလျှင် အင်မော်တယ်ဘုရင်များသည် သူတို့၏ အရှိန်အဝါများကို ဖိနှိပ်ထားမှသာ နတ်ဆိုးနယ်မြေအတွင်း ပုံမှန် လျှောက်လှမ်းနိုင်မည် ဖြစ်သည်။ သို့သော် ထိုသို့ ဖိနှိပ်ထားခြင်းမှာ သူတို့အတွက် အသက်ရှူရ ကြပ်နေသကဲ့သို့ အကန့်အသတ်တစ်ခု ဖြစ်နေပေလိမ့်မည်။ ထို့ကြောင့် သူတို့သည် သူတို့၏ ကောင်းကင်ဘုံများ၌သာ နေထိုင်လေ့ရှိကြပြီး လက်အောက်ခံနယ်မြေများသို့ ဆင်းသက်လေ့ မရှိကြပေ။
ယခုမူ ရှီမိုကောင်းကင်အရှင်သခင်သည် သူ၏ အရှိန်အဝါကို လုံးဝ ဖုံးကွယ်ခြင်းမရှိဘဲ ရဲတင်းစွာ ဆင်းသက်လာခဲ့သည်။ ထို့ကြောင့် သူ ရောက်ရှိလာသည်နှင့် တစ်ပြိုင်နက် ကြက်သွေးရောင်ငရဲနတ်ဆိုးနယ်မြေမှာ ကမောက်ကမ ဖြစ်သွားကာ သူ၏ခန္ဓာကိုယ်မှ ထွက်ပေါ်လာသော ဖိအားကို မခံနိုင်ဘဲ ပျက်စီးစပြုလာတော့သည်။
သို့သော် ရှီမိုကောင်းကင်အရှင်သခင်သည် ဤအရာများကို လုံးဝ ဂရုမစိုက်ပေ။ အင်မော်တယ်ဘုရင်တစ်ပါး ဆင်းသက်လာချိန်တွင် နတ်ဆိုးနယ်မြေငယ်လေးတစ်ခုရှိ သက်ရှိများ၏ ခံစားချက်ကို သူသည် အဘယ်ကြောင့် ထည့်တွက်နေရမည်နည်း။
" အင်မော်တယ်ဘုရင်အဆင့်ကို တက်လှမ်းဖို့ မအောင်မြင်တဲ့ကောင်ကို အားကိုးပြီး ဒီအရှင်ရဲ့ အရှိန်အဝါကို ယှဉ်နိုင်မယ်လို့ ထင်နေတာလား မင်းတို့က တုံးအလွန်းတယ် "
ရှီမိုကောင်းကင်အရှင်သခင်သည် လှောင်ပြောင်လိုက်၏။ ရှီမိုကောင်းကင်မှ မထွက်ခွာမီ မိုဟဲနတ်ဆိုးအရှင်သခင် ပေးပို့ခဲ့သော သတင်းများကို သူ သိရှိပြီးဖြစ်သည်။ ရွှမ်ယွမ်နတ်ဆိုးနယ်မြေ၌ အဆင့်တက်ရန် မအောင်မြင်ဘဲ ဟန်ယိုထျန်းကျွင်းကို သတ်ခဲ့သည့် ထိုသူသည် ယခုအခါ ချီလျန်မျိုးနွယ်စု၏ ဘိုးဘေးနယ်မြေတွင် ပုန်းအောင်းနေပုံရသည်။
ချီလျန်မျိုးနွယ်စုဝင်များမှာ ထိုသူကို ကာကွယ်ပေးနေကြပုံရပြီး အတင်းအကျပ် အခိုင်းခံရခြင်းမျိုး မဟုတ်ဘဲ သူနှင့် သဘောတူညီချက် ရယူကာ 'အားကောင်းသော နောက်ခံ' တစ်ခုကို ရှာဖွေတွေ့ရှိသွားကြဟန် တူသည်။
သို့သော် ချီလျန်မျိုးနွယ်စု၏ ဆုံးဖြတ်ချက်ကို ရှီမိုကောင်းကင်အရှင်သခင်မှာ ရယ်စရာတစ်ခုအဖြစ်သာ မြင်၏။ အင်မော်တယ်ဘုရင်အဆင့်ကို မရောက်နိုင်သည့်သူ တစ်ယောက်အတွက်နှင့် ချီလျန်မျိုးနွယ်စုသည် အရာအားလုံးကို အမြော်အမြင်မရှိ ရင်းဝံ့သလော။
အင်မော်တယ်ဘုရင်အဆင့်နှင့် ထိုအောက်ရှိ အဆင့်များမှာ လုံးဝ ကွာခြားသော အယူအဆများ ဖြစ်သည်။ အင်မော်တယ်ဘုရင်ဖြစ်ရန် မအောင်မြင်ခဲ့ပါက အင်မော်တယ်ဘုရင်အဆင့် တာအို၏ အစအနအချို့ကို မြင်တွေ့ခဲ့ရလျှင်ပင် ထိုနယ်ပယ်အတွင်းသို့ အမှန်တကယ် မဝင်ရောက်နိုင်သရွေ့ ထိုသူမှာ ပုရွက်ဆိတ်တစ်ကောင်သာ ဖြစ်သည်။ ကောင်းကင်ယံမှ နဂါးတစ်ကောင်အဖြစ် မည်သည့်အခါမျှ အသွင်မပြောင်းနိုင်ပေ။
မြင့်မားလှသော ဓမ္မရုပ်သွင်ကြီးသည် ကြက်သွေးရောင်ငရဲနတ်ဆိုးနယ်မြေပေါ်သို့ ဆင်းသက်လာခဲ့၏။ နောက်မှ လိုက်ပါလာကြသော နတ်ဆိုးအရှင်သခင်များနှင့် အင်မော်တယ်အဆင့် ပညာရှင်များသည်လည်း ချီလျန်နယ်မြေအနီးသို့ ရောက်ရှိလာကြသည်။
သို့သော် ရှီမိုကောင်းကင်မှ လိုက်ပါလာသူများသည် ချီလျန်နယ်မြေအတွင်းသို့ တကယ်တမ်း မဝင်ရဲကြဘဲ အဝေးမှသာ စောင့်ကြည့်နေကြသည်။ ဘေးထွက်ဆိုးကျိုးများကပင် နတ်ဆိုးအရှင်သခင်တစ်ဦးအား သေဆုံးစေနိုင်သည် မဟုတ်ပါလော။
တစ်ချိန်တည်းမှာပင် မိုးကြိုးပေါင်း တစ်သောင်း တစ်ပြိုင်နက် ပေါက်ကွဲလိုက်သကဲ့သို့ ခမ်းနား အေးစက်လှသော အသံကြီးသည် ကြက်သွေးရောင်ငရဲနတ်ဆိုးနယ်မြေ၏ နေရာတိုင်း၌ ပဲ့တင်ထပ်သွားတော့သည်။
" ငါ့ရဲ့ ရှီမိုကောင်းကင်လက်အောက်က နတ်ဆိုးအရှင်သခင်တွေကို သတ်ရဲတာက ငါကိုယ်တိုင် မလှုပ်ရှားတာ ကြာပြီဖြစ်လို့ မင်းတို့လို ပုရွက်ဆိတ်တွေက ဘုရင်တစ်ပါးအပေါ် ထားရမယ့် ရိုသေမှုကို မေ့သွားကြတာလား "
ရှီမိုကောင်းကင်အရှင်သခင်၏ စကားသံ ထွက်ပေါ်လာသည်နှင့်အမျှ ကျယ်ပြောလှသော လောကအတွင်းရှိ လေဟာနယ်များမှာ ပေါက်ကွဲပျက်စီးသွားကာ နတ်ဆိုးနတ်ဘုရား ဓမ္မရုပ်သွင်ပေါင်း သောင်းနှင့်ချီ၍ ဖြစ်ပေါ်လာ၏။ သူတို့အားလုံးမှာ မျက်နှာပျက်ယွင်းနေကြကာ ရှီမိုကောင်းကင်အရှင်သခင်၏ စကားနှင့်အတူ ချီလျန်မျိုးနွယ်စုရှိရာဘက်သို့ တစ်ပြိုင်နက်တည်း ကြိမ်းမောင်းလိုက်ကြတော့သည်။
အခန်း ( ၃၀၀ ) - ကုချန်၏ ရည်မှန်းချက်၊ ဘုရင်အဆင့်၏ လှုပ်ရှားမှု၊ ကွာခြားချက်က ကြီးမားလွန်းခြင်း
ရှီမိုကောင်းကင်အရှင်သခင်၏ ကြိမ်းမောင်းသံကြောင့် ချီလျန်မျိုးနွယ်စုဝင် အများအပြားမှာ စိတ်မသက်မသာ ဖြစ်သွားကြရသည်။ မည်သည်အရာများ ဖြစ်ပျက်နေသည်နှင့် မြင့်မြတ်လှသော အင်မော်တယ်ဘုရင်တစ်ပါး အဘယ်ကြောင့် ဆင်းသက်လာသည်ကို သူတို့ မသိရှိကြပေ။
သို့သော် အဖြစ်မှန်ကို သိရှိကြသော ချီလျန်မျိုးနွယ်စု အကြီးအကဲများမှာမူ သူတို့၏အကြည့်များကို ကုချန်ထံသို့ မသိစိတ်ဖြင့် လှည့်ကြည့်လိုက်မိကြသည်။ ရှီမိုကောင်းကင်အရှင်သခင်မှာ ကတိအတိုင်း ရောက်ရှိလာခဲ့ပြီဖြစ်ရာ ယခုအခါ အခြေအနေကို မည်သို့ကိုင်တွယ်မည်မှာ သူတို့သခင်၏ ဆုံးဖြတ်ချက်ပေါ်တွင်သာ မူတည်တော့သည်။
" နောက်ဆုံးတော့ သူ ရောက်လာပြီပဲ... ငါ စောင့်ရကျိုးနပ်ပါတယ် "
ကုချန်သည် တိုးညင်းစွာ ရေရွတ်လိုက်၏။ သူ၏အသံထဲတွင် ရှားရှားပါးပါး စိတ်လှုပ်ရှားမှု အရိပ်အယောင်များ ပါဝင်နေ၏။ အမှန်စင်စစ် သူသည် မိုဟဲကို သတ်လိုက်ကတည်းက ဤရလဒ်ကို ကြိုတင်ခန့်မှန်းထားခဲ့ခြင်း ဖြစ်သည်။ သူ ချီလျန်မျိုးနွယ်စု၌ ကျန်ရှိနေရခြင်းမှာ သူတို့အတွက် အရှိန်အဝါ တည်ဆောက်ပေးရန်နှင့် ဤနတ်ဆိုးနယ်မြေတွင် အခိုင်အမာ ခြေကုပ်ယူနိုင်စေရန်သာ မဟုတ်ပေ။
ထို့ထက်ပို၍ အရေးကြီးသော အကြောင်းရင်းတစ်ခု ရှိနေသေးသည်။ ၎င်းမှာ ကုချန်သည် အင်မော်တယ်ဘုရင် ရှီမိုကောင်းကင်အရှင်သခင် ရောက်လာမည်ကို တမင်တကာ စောင့်ဆိုင်းနေခြင်းပင် ဖြစ်သည်။ သူသည် ရှီမိုကောင်းကင်အရှင်သခင်၏ လက်ကို အသုံးချကာ သူ၏ လက်ရှိ အစစ်အမှန် တိုက်ခိုက်ရေးစွမ်းရည်ကို စမ်းသပ်လိုနေခြင်း ဖြစ်သည်။
သူသည် လက်ရှိတွင် အင်မော်တယ်ဘုရင်တစ်ပိုင်းအဆင့်၌သာ ရှိနေသေးသော်လည်း အထွတ်အထိပ် နည်းဗျူဟာများစွာကို ပိုင်ဆိုင်ထားသူ ဖြစ်သည်။ ထို့ကြောင့် ကုချန်၏ ခန့်မှန်းချက်အရ သူ ထုတ်ဖော်နိုင်သည့် တိုက်ခိုက်ရေးစွမ်းအားမှာ သာမန်အင်မော်တယ်ဘုရင်အချို့နှင့် နှိုင်းယှဉ်နိုင်ရမည် ဖြစ်သည်။ သို့သော် ဤအရာအားလုံးမှာ ကုချန်၏ ကိုယ်ပိုင်တွေးဆချက်သာ ဖြစ်သည်။
သူ၏အစစ်အမှန် စွမ်းရည်ကို တိုက်ပွဲအစစ်အမှန်မှတစ်ဆင့်သာ တိုင်းတာနိုင်မည် ဖြစ်သည်။ သို့သော် သူနှင့် ယှဉ်ပြိုင်ရန် အင်မော်တယ်ဘုရင်တစ်ပါးကို ရှာဖွေရန်မှာ မည်မျှ ခက်ခဲလိုက်မည်နည်း။ နတ်ဆိုးနယ်မြေမှာ အဆုံးမဲ့ကျယ်ပြောလှသည်ဖြစ်ရာ ထိုအင်မော်တယ်ဘုရင်များ မည်သည့်နေရာ၌ ပုန်းအောင်းနေကြသည်ကို မည်သူမျှ မသိနိုင်ပေ။ အမှားအယွင်း အနည်းငယ် ရှိရုံဖြင့် အင်မော်တယ်ဘုရင် တစ်ပါးတည်းသာမက နှစ်ပါး သုံးပါးအထိပါ ထွက်ပေါ်လာနိုင်သည့် မရေရာသော အချက်များလည်း ရှိနေ၏။
ဤအကြောင်းကြောင့်ပင် ကုချန်သည် ရှီမိုကောင်းကင်အရှင်သခင်ကို ပစ်မှတ်ထားခဲ့ခြင်း ဖြစ်သည်။ ရွှမ်ယွမ်နတ်ဆိုးနယ်မြေ၏ ကိစ္စရပ်များမှတစ်ဆင့် သူသည် ရှီမိုကောင်းကင်မှ လူများကို ယုတ္တိရှိရှိ ဆွဲဆောင်နိုင်ခဲ့သည်။ ထို့နောက် ရှီမိုကောင်းကင် လက်အောက်ရှိ နတ်ဆိုးအရှင်သခင်များကို သတ်ဖြတ်ခြင်းဖြင့် ရှီမိုကောင်းကင်အရှင်သခင်ကို သူ၏ ထောင်ချောက်ထဲသို့ ဆွဲခေါ်ခဲ့ခြင်း ဖြစ်သည်။
ယခုမူ အရာအားလုံးမှာ ကုချန်၏ထိန်းချုပ်မှုအောက်တွင် ရှိနေ၏။ ရှီမိုကောင်းကင်အရှင်သခင်သည် အမှန်တကယ်ပင် ဆင်းသက်လာခဲ့ပြီ ဖြစ်သည်။ သူ၏ တိုက်ခိုက်ရေးစွမ်းရည်ကို မကြာမီ စမ်းသပ်နိုင်တော့မည်ကို သိရသဖြင့် ကုချန်၏ စိတ်ထဲတွင်ကျေနပ်နေမိသည်။
သို့သော် ကောင်းကင်နှင့် မြေကြီးအနှံ့ ပဲ့တင်ထပ်နေသော မေးခွန်းထုတ်သံများကို ရင်ဆိုင်ရာတွင်မူ ကုချန်၏အမူအရာမှာ တည်ငြိမ်မြဲ တည်ငြိမ်နေဆဲ ဖြစ်သည်။ နောက်တစ်ခဏတွင် ရှီမိုကောင်းကင်အရှင်သခင်၏ အသံနှင့် ကွဲပြားသော်ငြား ထပ်တူပင် ခမ်းနားထည်ဝါကာ အေးစက်လှသော အသံတစ်ခု ကမ္ဘာပေါ်၌ ပေါ်ထွက်လာ၏။
" လူတစ်ယောက်ကို သတ်ဖို့အတွက် မင်းရဲ့ ခွင့်ပြုချက် လိုလို့လား "
ဤသည်မှာ ရှီမိုကောင်းကင်အရှင်သခင်ကို ပြန်လည်တုံ့ပြန်လိုက်သော ကုချန်၏ စကားပင် ဖြစ်သည်။ ဤပြန်လည်ဖြေကြားမှုသည် ရှီမိုကောင်းကင်အရှင်သခင် နောက်မှ လိုက်ပါလာကြသော နတ်ဆိုးအရှင်သခင် အင်မော်တယ်များစွာကို ပို၍ပင် အံ့အားသင့်သွားစေ၏။ ဤသူမှာ မည်သူနည်း။
အင်မော်တယ်ဘုရင်ကိုယ်တိုင် ဆင်းသက်လာသည်ကို ရင်ဆိုင်ရလျှင်ပင် သူ၏စကားများမှာ ယုံကြည်မှုအပြည့်နှင့် ရဲတင်းလွန်းနေဆဲ ဖြစ်သည်။ ရှီမိုကောင်းကင်အရှင်သခင်ကို အမှန်တကယ် ဒေါသထွက်စေ၍ ကြောက်မက်ဖွယ် အဆုံးသတ်နှင့် ရင်ဆိုင်ရမည်ကို သူ မကြောက်လေသလား။
" ငါကိုယ်တော် "
ကုချန်၏တုံ့ပြန်မှုကို ကြားလိုက်ရသောအခါ ရှီမိုကောင်းကင်အရှင်သခင်သည် တစ်စုံတစ်ခု မှားယွင်းနေသည်ကို အကဲခတ်မိလိုက်သည်။ အကယ်၍ ဤသူမှာ အင်မော်တယ်ဘုရင် မဟုတ်ဘဲ နတ်ဆိုးအရှင်သခင် တစ်ဦးသာ ဖြစ်ပါက သူသည် မိမိကိုယ်ကိုယ် "ငါအရှင်" ဟုသာ ခေါ်ဆိုရမည် ဖြစ်သည်။ "ငါကိုယ်တော်" ဆိုသည်မှာ မည်သည့်နေရာမှနည်း။
သို့သော် ရှီမိုကောင်းကင်အရှင်သခင်သည် ထူးဆန်းသည်ဟု ထင်သော်လည်း ထိုအရာအား သိပ်အလေးမထားခဲ့ပေ။ နတ်ဆိုးနယ်မြေမှာ ကျယ်ပြောလှသဖြင့် လူများမှာ မိမိကိုယ်ကိုယ် ခေါ်ဆိုရာတွင် ပုံစံအမျိုးမျိုး အသုံးပြုတတ်ကြသည်။ မိမိကိုယ်ကိုယ် "ငါကိုယ်တော်" ဟု ခေါ်ဆိုခြင်းမှာ အတွေ့ရနည်းသော်လည်း လုံးဝ နားမလည်နိုင်စရာတော့ မဟုတ်ပေ။
ရှီမိုကောင်းကင်အရှင်သခင်ကို အမှန်တကယ် ဒေါသထွက်စေသည်မှာ ကုချန်၏ နောက်ဆက်တွဲ စကားများပင် ဖြစ်သည်။
" ငါကိုယ်တော် လူသတ်တာမှာ မင်းရဲ့ ခွင့်ပြုချက်ကို ဘာလို့ လိုအပ်ရမှာလဲ "
သွေးငရဲ နတ်ဆိုးအရှင်သခင်ကဲ့သို့သော သူများသည် သူ၏လက်အောက်ငယ်သားများ ဖြစ်ကြသော်လည်း အသတ်ခံလိုက်ရရုံသာမက ဤသူမှာ ခွင့်ပြုချက်ယူရန် မလိုဟုပင် ပြောဝံ့၏။ ဤသည်မှာ သူ့အား လုံးဝ လျစ်လျူရှုလိုက်ခြင်း မဟုတ်ပါလော။
" ကောင်းပြီ... ငါဘုရင် ဆင်းသက်မလာတာ ကြာပြီဖြစ်လို့ စစ်မှန်တဲ့ အင်မော်တယ်ဘုရင်တစ်ပါးရဲ့ ရှေ့မှာ ထားရှိရမယ့် ရိုသေမှုကို လောကကြီးက မေ့သွားပုံပဲ "
ရှီမိုကောင်းကင်အရှင်သခင်၏ မျက်လုံးများမှာ ပို၍ အေးစက်လာ၏။ ယခုတစ်ကြိမ်တွင်မူ သူသည် ကုချန်နှင့် စကားများကာ အချိန်ဖြုန်းရန် စိတ်မဝင်စားတော့ပေ။ ထိုအစား သူသည် သူ၏ကြီးမားလှသော ဓမ္မရုပ်သွင်အား လှုပ်ရှားစေကာ ရုတ်တရက် တိုက်ခိုက်လိုက်တော့သည်။
" ဝူး... "
ဓမ္မရုပ်သွင်မှာ အတိုင်းအဆမရှိ ကြီးမားသော်လည်း လှုပ်ရှားမှုမှာမူ အလွန်ပင် လျင်မြန်လှသည်။ ကြီးမားလှသော လက်မောင်းတစ်ဖက်သည် နယ်မြေ၏အပြင်ဘက်မှ ဆန့်ထွက်လာကာ ကြက်သွေးရောင် ငရဲနတ်ဆိုးနယ်မြေအတွင်းသို့ ဝင်ရောက်လာ၍ အဆုံးမဲ့သော ကောင်းကင်ယံကို တစ်ခဏချင်း ဖုံးလွှမ်းသွားကာ ချီလျန်မျိုးနွယ်စု၏ ဘိုးဘေးနယ်မြေရှိရာသို့ ဖမ်းဆုပ်လိုက်တော့သည်။
အင်မော်တယ်ဘုရင်တစ်ပါး လှုပ်ရှားလိုက်ပြီ ဖြစ်သည်။
ဤအခိုက်အတန့်တွင် ရှီမိုကောင်းကင်မှ လိုက်ပါလာကြသော နတ်ဆိုးအရှင်သခင် အင်မော်တယ်များစွာမှာ စိတ်နှလုံးများ တုန်လှုပ်နေကြလျက် နယ်မြေအပြင်ဘက်မှ ဆင်းသက်လာသော ဧရာမလက်ဝါးကြီးကို မျက်တောင်မခတ်တမ်း ကြည့်နေကြ၏။ သူတို့သည် ထိုလှုပ်ရှားမှုမှတစ်ဆင့် တစ်စုံတစ်ခုကို သိမြင်နားလည်နိုင်ရန်နှင့် ဘုရင်အဆင့်၏ တာအိုအစအနလေးပင်ဖြစ်စေ ရရှိနိုင်ရန် မျှော်လင့်နေကြခြင်း ဖြစ်သည်။
အင်မော်တယ်ဘုရင်တစ်ပါး လှုပ်ရှားလိုက်ချိန်တွင် ဖြစ်ပေါ်လာသော အရှိန်အဝါမှာ မည်မျှ ထိတ်လန့်ဖွယ် ကောင်းမည်နည်း။ ဧရာမ လက်ကြီးမှာ အတိုင်းအဆမရှိသော လေဟာပြင်ကို ဖြတ်ကျော်ကာ ချီလျန်ဘိုးဘေးနယ်မြေသို့ ဦးတည်လာ၏။
၎င်း၏လက်ချောင်းများကြားတွင် ကြယ်တာရာအလင်းတန်းများ ဝဲလည်နေလျက်ရှိ၏။ ၎င်း၏ လမ်းကြောင်းတစ်လျှောက်ရှိ မရေတွက်နိုင်သော ကြယ်တာရာများမှာ ထိုအရှိန်အဝါကို မခံနိုင်စွာ လက်ဝါးကြီး အနီးသို့ မရောက်မီမှာပင် ဖုန်မှုန့်နှင့် ပြာများအဖြစ်သို့ ပြောင်းလဲသွားကြသည်။
လက်ဝါးတစ်ချက်ဖြင့် လမ်းကြောင်းပေါ်ရှိ အရာအားလုံးကို ချေမှုန်းလိုက်ခြင်းပင်။ ဤအရာမှာ အဆုံးစွန်သော ဖျက်ဆီးခြင်း စွမ်းအား၏ ပြယုဂ်ဖြစ်ကာ လောကီအဆင့်အတန်းထက် ကျော်လွန်နေသော အလွန်အမင်း ရဲတင်းလှသည့် စွမ်းအားကို ပြသလိုက်ခြင်း ဖြစ်သည်။ အင်မော်တယ်ဘုရင် တစ်ပါးအနေဖြင့် ရှီမိုကောင်းကင်အရှင်သခင်သည် ကုချန်နှင့် ဆက်လက် ငြင်းခုံနေရန်မလိုဟု ယူဆကာ ကုချန်၏အသက်ကို နုတ်ယူရန် ပြတ်ပြတ်သားသား တိုက်ခိုက်လိုက်ခြင်း ဖြစ်သည်။
အကယ်၍ ဤလက်ဝါး ကျဆင်းလာချိန်တွင် ကုချန် မတားဆီးနိုင်ပါက သူသာမက ချီလျန်မျိုးနွယ်စု တစ်ခုလုံးမှာလည်း ဤလက်ဝါး၏ နောက်ဆက်တွဲဒဏ်ကြောင့် ဖုန်မှုန့်အဖြစ် ပြောင်းလဲကာ ပျက်စီးသွားပေလိမ့်မည်။ ဤသည်မှာ ရှီမိုကောင်းကင်အရှင်သခင်၏ ရည်ရွယ်ချက် ဖြစ်နိုင်၏။ ထိုသို့မဟုတ်လျှင် သူသည် ဤအချက်ကို လုံးဝ ဂရုမစိုက်ခြင်းလည်း ဖြစ်နိုင်သည်။
အင်မော်တယ်ဘုရင်အဆင့် ပညာရှင်တစ်ဦး လှုပ်ရှားလိုက်ချိန်တွင် ဖြစ်ပေါ်လာသော နောက်ဆက်တွဲဒဏ်မှာ အရာအားလုံးကို ဖျက်ဆီးပစ်နိုင်၏။ နှစ်ပေါင်း သန်းနှင့်ချီသော အမွေအနှစ်များ ရှိသည့် ချီလျန်မျိုးနွယ်စုသည်ပင် အင်မော်တယ်ဘုရင်၏ တိုက်ခိုက်မှုအောက်တွင် ပုရွက်ဆိတ်တစ်ကောင်ကဲ့သို့ နုနယ်လှပေသည်။
ချီလျန်မျိုးနွယ်စုအတွင်း၌.....
အကြီးအကဲ အားလုံးမှာ ကောင်းကင်ယံမှ ကျဆင်းလာသော ထိတ်လန့်ဖွယ် လက်ဝါးကြီးကို မော့ကြည့်နေကြ၏။ သူတို့၏ မျက်လုံးများထဲတွင် ကြောက်ရွံ့မှုနှင့် မျှော်လင့်ချက်ကင်းမဲ့မှုတို့ ပြည့်နှက်နေလေသည်။
ဤသည်မှာ စစ်မှန်သော အင်မော်တယ်ဘုရင်တစ်ပါး၏လှုပ်ရှားမှု ဖြစ်ကာ မည်သည့် နတ်ဆိုးအရှင်သခင်နှင့်မျှ နှိုင်းယှဉ်၍ မရနိုင်ပေ။ ဤလက်ဝါး တစ်ချက်တည်းဖြင့် ချီလျန်မျိုးနွယ်စု မဆိုထားနှင့် ကြက်သွေးရောင်ငရဲနတ်ဆိုးနယ်မြေ တစ်ခုလုံးပင် ပျက်စီးသွားနိုင်ပေသည်။
သို့သော် ချီလျန်မျိုးနွယ်စုဝင်များ ထိတ်လန့်တုန်လှုပ်နေကြစဉ်မှာပင်.....
ကုချန်မှာမူ ရှီမိုကောင်းကင်အရှင်သခင် ဖိနှိပ်လိုက်သော လက်ဝါးကို အေးအေးလူလူပင် ကြည့်ရှုနေကာ သူ၏စိတ်ထဲတွင် ထိုလက်ဝါးအား လျှို့ဝှက်ဆန်းပြားသော ခေါင်းတလားအတွင်း၌ သူမြင်တွေ့ခဲ့ရသည့် လက်ဝါးနှင့် နှိုင်းယှဉ်နေမိသည်။
နှိုင်းယှဉ်မှု၏ ရလဒ်မှာမူ သိသာလှပေသည်။ ရှီမိုကောင်းကင်အရှင်သခင် ဖိနှိပ်လိုက်သော လက်ဝါးမှာ စွမ်းအားကြီးမားသော်လည်း ကုချန် ယခင်က မြင်တွေ့ခဲ့ရသော လျှို့ဝှက်ဆန်းပြားသည့် လက်ဝါး၏ အစအနလေးတစ်ခုကိုပင် မမီပေ။ ရှီမိုကောင်းကင်အရှင်သခင်၏ လက်ဝါးတွင် ဖျက်ဆီးခြင်း တာအို၏ အနှစ်သာရ အနည်းငယ်သာ ပါဝင်နေ၏။
သို့သော် ကုချန် မြင်တွေ့ခဲ့ရသည့် လက်ဝါးမှာမူ အဆုံးမဲ့ တာအိုများကို လွှမ်းခြုံထားကာ ဖျက်ဆီးခြင်း အနှစ်သာရ အပြည့်အဝ ပါဝင်နေ၏။ ထိုလက်ဝါးကို ကြည့်လိုက်ရုံဖြင့် အတိတ်၊ ပစ္စုပ္ပန်နှင့် အနာဂတ်၏ ကောင်းကင်ဘုံများနှင့် နယ်ပယ်အသီးသီးကို မြင်တွေ့လိုက်ရသကဲ့သို့ပင် ဖြစ်သည်။ ထိုနှစ်ခုမှာ လုံးဝ တူညီသော အဆင့်အတန်းတွင် ရှိမနေပေ။
" လိုပါသေးတယ် "
ကုချန်သည် တိုးညင်းစွာ ရေရွတ်ရင်း သူ၏လက်ညှိုးကို ဖြည်းညင်းစွာ ဆန့်ထုတ်ကာ ရှီမိုကောင်းကင်အရှင်သခင်၏ ဧရာမလက်ဝါးကြီးရှိရာသို့ တိတ်ဆိတ်စွာ ညွှန်ပြလိုက်သည်။
" ဝူး... "
ကုချန် လက်ညှိုးညွှန်လိုက်သည်နှင့် ချီချင်းနှင့် တတိယအကြီးအကဲတို့မှာ အသံတစ်ခုကို ကြားလိုက်ပုံရကာ ထိုဘက်သို့ မသိစိတ်အလျောက် လှည့်ကြည့်လိုက်ကြ၏။ နောက်တစ်ခဏတွင် သူတို့သည် သူတို့အား ဆွံ့အသွားစေမည့် မြင်ကွင်းတစ်ခုကို မျက်ဝါးထင်ထင် မြင်တွေ့လိုက်ရတော့သည်။