အခန်း (၃၁၃-၃၁၄)
Vol. 23 Ch. 313-314
အခန်း ( ၃၁၃ ) - အကောင်းဆုံးရွေးချယ်မှုနှင့် ချန်ဝူနတ်ဆိုးဧကရာဇ်
သွေးပင်လယ်ကြီးမှာ တစ်လှိုင်းပြီးတစ်လှိုင်း အရှိန်အဟုန်ဖြင့် တက်လာကာ ချီလျိုထံသို့ အရူးအမူး ရိုက်ခတ်နေ၏။
ထိုကျယ်ပြောလှသော သွေးပင်လယ်အတွင်း၌ ပြင်းထန်သော တိုက်စားနိုင်စွမ်းများ ကိန်းအောင်းနေလေသည်။ ၎င်းတို့သည် ချီလျို၏ တာအိုစည်းမျဉ်း နတ်ဘုရားကြိုးကွင်းများဖြင့် တည်ဆောက်ထားသော အကာအကွယ်အတားအဆီးကို တဖြည်းဖြည်း တိုက်စားဖျက်ဆီးနေသဖြင့် အချိန်မရွေး ပြိုကွဲသွားနိုင်သည့် အခြေအနေသို့ ရောက်နေ၏။
ချီလျိုသည် စိတ်ကို တည်ငြိမ်အောင် ထားသော်လည်း ဤအခြေအနေမှ လွတ်မြောက်ရန် နည်းလမ်းကို အသည်းအသန် စဉ်းစားနေမိသည်။
" ယမမြစ်ဘိုးဘေး... ရှင်က သွေးငရဲနတ်ဆိုးအရှင်ရဲ့ စကားကို တကယ်ယုံတာလား... ရှင်က တကယ်ကို ရူးမိုက်လွန်းပြီး တုံးအတာပဲ "
ချီလျိုသည် လှောင်ပြောင်လိုက်၏။ သူ၏စကားလုံးများမှာ ထက်မြက်သော ဓားတစ်စင်းကဲ့သို့ ယမမြစ်ဘိုးဘေး၏ စိတ်ထဲသို့ တိုက်ရိုက် ထိုးနှက်လိုက်ခြင်းပင်။
" ကျွန်မကို သတ်ပြီးတာနဲ့ အဲ့ဒီသွေးငရဲနတ်ဆိုးအရှင်က ရှင့်ကိုပါ ရှင်းပစ်ဖို့ အကြောင်းပြချက် ရှာလိမ့်မယ်လို့ ကျွန်မ ထင်တယ်.....
ဒီလိုဆိုရင် သူက ရှင့်ကို နတ်ဆိုးအရှင်အဆင့်ရောက်အောင် ကူညီပေးရမယ့် ကုန်ကျစရိတ်တွေကို သက်သာစေမယ့်အပြင်... အသိသက်သေဖြစ်တဲ့ ရှင့်ကိုပါ တစ်ခါတည်း နှုတ်ပိတ်လိုက်လို့ ရသွားတာပေါ့... ဒါက တစ်ချက်ခုတ် နှစ်ချက်ပြတ်ပဲ မဟုတ်လား.....
စဉ်းစားကြည့်ပါဦး... သွေးငရဲနတ်ဆိုးအရှင်က သူပေးထားတဲ့ ကတိအတိုင်း ရှင့်ကို နတ်ဆိုးအရှင်ဖြစ်အောင် ကူညီပေးပြီး နောင်တစ်ချိန်မှာ ဒီလျှို့ဝှက်ချက် ပေါက်ကြားသွားမှာကို စိုးရိမ်နေမလား.....
ဒါမှမဟုတ် ရှင့်ကိုပါ အမြစ်ပြတ်ရှင်းပစ်ပြီး ပြဿနာအားလုံးကို တစ်ခါတည်း ဖြေရှင်းလိုက်မလား "
ချီလျို၏စကားကြောင့် လှိုင်းထနေသော သွေးပင်လယ်ကြီးပင် ခေတ္တခဏ တည်ငြိမ်သွားသကဲ့သို့ပင်။ ချီလျို၏စကားမှာ ယမမြစ်ဘိုးဘေး အကြောက်ဆုံးအချက်ကို ကွက်တိ ထိုးနှက်လိုက်ခြင်းပင် ဖြစ်၏။
ဤသည်မှာ ယမမြစ်ဘိုးဘေး အစိုးရိမ်ဆုံးသော အချက်လည်း ဖြစ်သည်။ အမှန်စင်စစ်တွင် ရှီမိုကောင်းကင်သည် ချီလျန်မျိုးနွယ်ကို ရှင်းပစ်ချင်နေကာ ချီလျိုကိုပါ ထောင်ချောက်ဆင် သတ်ဖြတ်ချင်နေသည်ဆိုလျှင် သူတို့ကိုယ်တိုင် ဘာကြောင့် မလုပ်ဆောင်ကြသနည်း။
ရှီမိုကောင်းကင်တွင် နတ်ဆိုးအရှင်အဆင့် ပုဂ္ဂိုလ်တစ်ဦးတည်း ရှိသည်မဟုတ်ပေ။ သူတို့ကိုယ်တိုင် လျှို့ဝှက်စွာ လုပ်ဆောင်မည်ဆိုပါက ချီလျိုကို သတ်ဖြတ်ရန်မှာ အလွန်လွယ်ကူသော ကိစ္စပင်။
သို့သော် ယခုမူ သွေးငရဲနတ်ဆိုးအရှင်မ ယမမြစ်ဘိုးဘေးကို အကူအညီတောင်းခဲ့ခြင်းမှာ တစ်ခုတည်းသော အကြောင်းပြချက်သာ ရှိနိုင်သည်။ ၎င်းမှာ သွေးငရဲနတ်ဆိုးအရှင်ရော၊ ရှီမိုကောင်းကင်ပါ သူတို့၏လက်တွင် သွေးမပေစေချင်ဘဲ ဤညစ်ပတ်သော အလုပ်ကို တခြားသူထံ လွှဲပြောင်းပေးလိုက်ခြင်းပင် ဖြစ်သည်။
အဘယ်ကြောင့်ဆိုသော် အပေါ်ယံတွင်မူ ချီလျန်မျိုးနွယ်မှာ ချန်ဝူနတ်ဆိုးဧကရာဇ်ကိုယ်တိုင် ရှီမိုကောင်းကင်သို့ ပို့ဆောင်ပေးခဲ့ခြင်းကြောင့် ဖြစ်သည်။
ထိုစဉ်က နတ်ဆိုးဧကရာဇ်သည် လုပ်ရိုးလုပ်စဉ်အရသာ ပို့ဆောင်ပေးခဲ့ကာ နောက်ပိုင်းတွင် ချီလျန်မျိုးနွယ်နှင့် အဆက်အသွယ် မလုပ်တော့သော်လည်း ရှီမိုကောင်းကင်မှာမူ နတ်ဆိုးဧကရာဇ်၏ မျက်နှာကြောင့် ချီလျန်မျိုးနွယ်အပေါ် အမြဲတစေ သတိထားခဲ့ရသည်။
ချီလျန်မျိုးနွယ်ဝင်များမှာ ဆင်းရဲဒုက္ခရောက်နေကြသော်လည်း အသက်ရှင်နေသေးသည်ဖြစ်၍ နတ်ဆိုးဧကရာဇ်မှ အာရုံစိုက်မည် မဟုတ်ပေ။ သို့သော် အကယ်၍ ရှီမိုကောင်းကင်၏ ဖိနှိပ်မှုကြောင့် ချီလျန်မျိုးနွယ်တစ်ခုလုံး သုတ်သင်ခံလိုက်ရသည်ဆိုလျှင် နတ်ဆိုးဧကရာဇ် သိသွားခဲ့ပါက အခြေအနေ မကောင်းနိုင်ပေ။
ချီလျန်မျိုးနွယ်မှာ သူကိုယ်တိုင် ခေါ်ဆောင်လာသူများ ဖြစ်သဖြင့် သူတို့ အမြစ်ပြတ်သွားခြင်းမှာ နတ်ဆိုးဧကရာဇ်၏ မျက်နှာကို ဖြတ်ရိုက်လိုက်သကဲ့သို့ ဖြစ်နေမည် မဟုတ်ပါလော။
ဤအကျိုးဆက်ကို ရှီမိုကောင်းကင်သာမက ရှီမိုကောင်းကင်အရှင်သခင်ကိုယ်တိုင်ပင်လျှင် တာဝန်ယူနိုင်မည် မဟုတ်ချေ။ ထို့ကြောင့်လည်း ရှီမိုကောင်းကင်သည် ချီလျန်မျိုးနွယ်ကို မျက်စိစပါးမွှေး စူးနေသော်လည်း ခိုင်လုံသော အကြောင်းပြချက် မရှိဘဲ တစ်စုံတစ်ရာ မလုပ်ရဲခဲ့ခြင်း ဖြစ်သည်။
ယခုအခါ ချီလျိုကို လုပ်ကြံရန် ကြိုးစားခြင်းမှာ ရှီမိုကောင်းကင်အတွက် စွန့်စားရသော လုပ်ရပ်တစ်ခုပင်။ အောင်မြင်ခဲ့လျှင် ချီလျန်မျိုးနွယ်ကို အလွယ်တကူ ဖြိုခွဲနိုင်မည် ဖြစ်သော်လည်း ကျရှုံးခဲ့ပါက သူတို့၏အကြံအစည်များ ပေါ်သွားနိုင်၏။
ထို့ကြောင့် ရှီမိုကောင်းကင်အတွက် အကောင်းဆုံးရွေးချယ်မှုမှာ သူတို့ကိုယ်တိုင် မလုပ်ဘဲ ကြားခံလူတစ်ယောက်ကို အသုံးချရန်ပင် ဖြစ်သည်။ ထိုကြားခံလူမှာ ယမမြစ်ဘိုးဘေး ဖြစ်လာခဲ့တော့သည်။
ယမမြစ်ဘိုးဘေးသည်လည်း ရှီမိုကောင်းကင်မှ သူ့ကို ဘာကြောင့် ရွေးချယ်ခဲ့သည်ကို နားလည်ထား၏။ သူသာ ချီလျိုကို သတင်းမပေါက်ကြားစေဘဲ အမြန်ရှင်းနိုင်လျှင် အားလုံး အဆင်ပြေမည် ဖြစ်သည်။
အကယ်၍ ကျရှုံးပြီး ချီလျို လွတ်သွားခဲ့လျှင် ရှီမိုကောင်းကင်သည် သူ့ကို ချက်ချင်း အဆက်အသွယ် ဖြတ်တောက်မည်မှာ အသေအချာပင်။ အဘယ်ကြောင့်ဆိုသော် သွေးငရဲနတ်ဆိုးအရှင်မှ သူ့အား ခိုင်းစေခဲ့ခြင်းမှာ နှုတ်မိန့်သာဖြစ်ပြီး မည်သည့် အထောက်အထားမျှ မရှိသောကြောင့် ဖြစ်သည်။
ယမမြစ်ဘိုးဘေးအနေဖြင့်လည်း သွေးငရဲနတ်ဆိုးအရှင်မှ သူ့ကို ကတိပေးထားသည့်အတိုင်း နတ်ဆိုးအရှင် ဖြစ်လာစေရန် ကူညီပေးမည်လားဟူသည်မှာ သံသယဖြစ်ဖွယ်ပင်။ ချီလျို ပြောသကဲ့သို့ပင် သူ့ကိုပါ နှုတ်ပိတ်လိုက်ခြင်းက ပို၍ လွယ်ကူသော လမ်းစဉ် ဖြစ်နေပေသည်။
အကယ်၍ သူသာ သွေးငရဲနတ်ဆိုးအရှင်၏ နေရာတွင် ရှိနေလျှင် အသိသက်သေကို ရှင်းပစ်မည့် လမ်းကိုသာ ရွေးချယ်မည်မှာ အမှန်ပင်။
ဤသို့ တွေးမိသောအခါ ယမမြစ်ဘိုးဘေး၏ ဖြူဖျော့သော မျက်နှာမှာ ပို၍ပင် မရေမရာ ဖြစ်လာကာ သူ၏စိတ်ထဲ၌လည်း တိုက်ပွဲတစ်ခု ဖြစ်နေတော့သည်။
ယမမြစ်ဘိုးဘေးမှ အချိန်အတော်ကြာ ပြန်မပြောသည်ကို မြင်သောအခါ ချီလျိုသည် ဝမ်းသာသွား၏။ သူ၏စကားလုံးများမှာ ယမမြစ်ဘိုးဘေး၏ စိတ်ကို လှုပ်ခါနိုင်ခဲ့ပြီ ဖြစ်သည်။
အခွင့်အရေး ရှိပြီ!
ချီလျိုသည် စိတ်လှုပ်ရှားစွာဖြင့် ယမမြစ်ဘိုးဘေး၏ ဆုံးဖြတ်ချက်ကို လုံးဝ ပျက်စီးသွားစေရန် ဆက်ပြောဖို့ ပြင်လိုက်သည်။ သို့သော် သူ စကားမပြောရသေးခင်မှာပင် ယမမြစ်ဘိုးဘေး၏ အေးစိမ့်သော အသံကို ကြားလိုက်ရသည်။
" ဟားဟားဟား... ချီလျို... မင်းရဲ့ သတိပေးချက်အတွက် ကျေးဇူးတင်ပါတယ်... ငါ မင်းကို သတ်ပြီးရင်တော့ တော်တော်လေးကို ဂရုတစိုက် ပြင်ဆင်ထားရတော့မှာပေါ့.....
မပူပါနဲ့... ငါက ရှီမိုကောင်းကင်နဲ့ အပေးအယူ လုပ်ရဲတယ်ဆိုကတည်းက ငါ့မှာလည်း ကိုယ့်ကိုယ်ကိုယ် ကာကွယ်ဖို့ အစီအစဉ် ရှိပြီးသားပါ... ရှီမိုကောင်းကင်က ကတိဖျက်ချင်တယ်ဆိုရင်တော့ အဲ့လောက် မလွယ်ဘူးလေ! "
ခေတ္တမျှ တုံ့ဆိုင်းသွားပြီးနောက် ယမမြစ်ဘိုးဘေးသည် သူ၏ဆုံးဖြတ်ချက်ကို ခိုင်မာစွာ ချလိုက်လေတော့သည်။
ရှီမိုကောင်းကင်နှင့် အပေးအယူကို သူ ဆက်လုပ်မည်သာ ဖြစ်သည်။ အဘယ်ကြောင့်ဆိုသော် နတ်ဆိုးအရှင် ဖြစ်လာနိုင်မည့် အခွင့်အရေးမှာ သူ့အတွက် အလွန်ပင် တွေ့ရခဲသော အခွင့်အရေး ဖြစ်နေသောကြောင့် ဖြစ်လေသည်။
အခန်း ( ၃၁၄ ) - အဆုံးမဲ့ဓား ဆင်းသက်ခြင်း၊ တစ်ချက်တည်းဖြင့် အပြတ်သတ်ခြင်းနှင့် ချီလျို တုန်လှုပ်သွားခြင်း
ယမမြစ်ဘိုးဘေးသည် ဆုံးဖြတ်ချက် ခိုင်မာသွားပြီ ဖြစ်သည်။ သွေးငရဲနတ်ဆိုးအရှင်နှင့် အပေးအယူလုပ်ခြင်းမှာ အန္တရာယ်များလှသော်လည်း သူ ဆက်လုပ်မည်သာ ဖြစ်သည်။
သူသည် နာမည်ကျော် အင်မော်တယ်တစ်ဦး ဖြစ်သော်လည်း နှစ်ပေါင်းသန်းချီ ကြိုးစားခဲ့သော်ငြား နတ်ဆိုးအရှင်အဆင့်သို့ တက်လှမ်းနိုင်မည့် အလားအလာကိုပင် မမြင်ခဲ့ရပေ။ ယခုကဲ့သို့ အခွင့်အရေးမျိုး ရလာသည်ကို သူ အလွယ်တကူ လက်လွှတ်မည် မဟုတ်ချေ။ သွေးငရဲနတ်ဆိုးအရှင်၏ တာအိုမှာ သူနှင့် ဆင်တူသဖြင့် ထိုသူ၏လမ်းညွှန်မှုကို ရရှိပါက နတ်ဆိုးအရှင်အဆင့်သို့ တက်လှမ်းနိုင်မည့် လမ်းမှန်ကို ရှာတွေ့နိုင်မည်ဟု သူ ယုံကြည်နေသည်။
ထို့ကြောင့် မည်သို့ပင်ဖြစ်စေ ယမမြစ်ဘိုးဘေးသည် ဤအပေးအယူကို ဆက်လုပ်ရန် ဆုံးဖြတ်လိုက်၏။ သို့သော် ချီလျိုကို သတ်ပြီးပါက သူကိုယ်တိုင် အသတ်ခံရနိုင်ခြေအတွက် ကြိုတင်ပြင်ဆင်မှုများ ပြုလုပ်ရမည် ဖြစ်သည်။
ယခု လောလောဆယ်တွင်မူ ချီလျိုကိုသာ သတ်ရလိမ့်မည်။
ယမမြစ်ဘိုးဘေး၏ ဆုံးဖြတ်ချက်အတိုင်း သွေးလှိုင်းကြီးများသည် ပြိုကျလာသော တောင်ကြီးများကဲ့သို့ ချီလျိုအပေါ်သို့ အဆက်မပြတ် ဖိနှိပ်လာတော့သည်။
ချီလျိုသည်လည်း ယမမြစ်ဘိုးဘေးမှ သူ့ကို အသေသတ်ရန် ဆုံးဖြတ်လိုက်ပြီဖြစ်ကြောင်း သိလိုက်လေသည်။
" အားလုံး ပြီးဆုံးသွားပြီပေါ့..... "
တဖြည်းဖြည်း ပါးလွှာလာသော အကာအကွယ်အတားအဆီးနှင့် ခန္ဓာကိုယ်ထဲမှ ကုန်ခမ်းလုနီးပါး ဖြစ်နေသော စွမ်းအင်များကြောင့် ချီလျိုသည် စိတ်ထဲမှ သက်ပြင်းချလိုက်မိသည်။ သို့သော် သူသည် ထိုင်ရုံဖြင့် အသေခံမည့်သူ မဟုတ်ပေ။ သူ၏ နောက်ဆုံး တိုက်ခိုက်ရေးစွမ်းအားကို စုစည်းကာ အစီအရင်ထဲမှ ဖောက်ထွက်ရန် သို့မဟုတ် ယမမြစ်ဘိုးဘေးကို တစ်စုံတစ်ရာ ထိခိုက်အောင် လုပ်ရန် ပြင်ဆင်လိုက်လေ၏။
သူ နောင်တရမိသည်မှာ မျိုးနွယ်စုဆီ နောက်ဆုံးအကြိမ် ပြန်မကြည့်ရတော့ခြင်းနှင့် သူ၏ အရှင်သခင်အတွက် လေဟာနယ် ကောင်းကင်သတ္တုကို ယူမပေးနိုင်တော့ခြင်းပင်။ ထိုသတ္တုမှာ ယခု သူ၏လက်ထဲတွင် ရှိနေသော်လည်း ကုချန်ထံ ပေးအပ်ရန် အခွင့်အရေး မရှိတော့ပေ။
ချီလျိုသည် နောက်ဆုံး တိုက်ပွဲအတွက် အင်အားစုဆောင်းနေစဉ်မှာပင် ထူးဆန်းသော အဖြစ်အပျက်တစ်ခု ဖြစ်ပွားလာခဲ့၏။ သူ့ကို ဖိနှိပ်ထားသော သွေးပင်လယ်ကြီးမှာ ရုတ်တရက် ပြင်းထန်စွာ တုန်ခါလာကာ အက်ကြောင်းကြီးတစ်ခု ပေါ်လာတော့သည်။
ထို့နောက် ယမမြစ်ဘိုးဘေး၏ ထိတ်လန့်တုန်လှုပ်နေသော အော်ဟစ်သံ ထွက်ပေါ်လာ၏။
" ဘယ်သူလဲ... မဖြစ်နိုင်တာ... မဟုတ်ဘူး! "
ထိုအော်ဟစ်သံနှင့်အတူ အလင်းတန်းတစ်ခုသည် အက်ကြောင်းထဲသို့ တိုးဝင်လာကာ သွေးမိုးနှင့် အမှောင်ထုကို ခွဲထုတ်ပစ်လိုက်သည်။ ချီလျိုသည် နဂါးဟိန်းသံကဲ့သို့ ကြည်လင်လှသော ဓားမြည်သံတစ်ခုကို ကြားလိုက်ရသည်။
နောက်တစ်ခဏတွင် သူ့ကို ဝန်းရံထားသော သွေးပင်လယ်ကြီးမှာ ပြိုကွဲပျက်စီးသွားကာ မူလမြေပြင် အနေအထား ပြန်ပေါ်လာ၏။ ယမမြစ်သွေးသန့်စင်ခြင်း အစီအရင်ကြီးမှာ တစ်စုံတစ်ဦး၏ ဖျက်ဆီးခြင်းကို ခံလိုက်ရခြင်းပင်။
ချီလျိုမှာ ကြောင်တောင်တောင် ဖြစ်သွား၏။ ယမမြစ်ဘိုးဘေးမှ စိတ်ပြောင်းကာ လွှတ်ပေးလိုက်ခြင်းတော့ မဟုတ်နိုင်ပေ။ သို့ဆိုလျှင် ဤအစီအရင်ကို အပြင်ဘက်မှနေ၍ မျက်စိတစ်မှိတ်အတွင်း မည်သူမှ ဖျက်ဆီးလိုက်နိုင်သနည်း။ သွေးငရဲနတ်ဆိုးအရှင်ကဲ့သို့ ထိပ်တန်းပုဂ္ဂိုလ်မျိုးမှသာ ဤသို့ လုပ်နိုင်မည် မဟုတ်ပါလော။
ချီလျန်မျိုးနွယ်မှာ ရှီမိုကောင်းကင်တစ်ခုလုံးတွင် မိတ်ဆွေမရှိဘဲ အထီးကျန်နေသော မျိုးနွယ်စု ဖြစ်သည်။ မျိုးနွယ်စု၏ တစ်ဦးတည်းသော အားကိုးရာဖြစ်သည့် ဘိုးဘေးချီရှောင်းမှာလည်း မကြာသေးမီကမှ ကွယ်လွန်သွားခဲ့သည်။
ဒါဆို ဘယ်သူက ငါ့ကို လာကယ်တာလဲ.....
" ချွမ်...! "
ဓားမြည်သံမှာ ပို၍ ကြည်လင်လာ၏။ အစီအရင်မှာ လုံးဝ ပျက်စီးသွားပြီးနောက် ချီလျိုသည် အပြင်လောကကို မြင်လိုက်ရလေသည်။
လေဟာနယ်ထဲတွင် လှပကျော့ရှင်းသော စွမ်းအားရှင်ဓားတစ်စင်း လွင့်မျောနေကာ ၎င်း၏ ဓားလက်ကိုင်မှာ သူ့ကို နှုတ်ဆက်နေသကဲ့သို့ လှုပ်ခတ်နေ၏။ အခြားတစ်ဖက်တွင်မူ သွေးရောင်ဝတ်စုံနှင့် ယမမြစ်ဘိုးဘေးမှာ အင်အားမဲ့စွာ လဲကျနေလေသည်။
ယမမြစ်ဘိုးဘေး၏ နဖူးအလယ်တွင် ဖောက်ထွင်းမြင်နေရသော ဒဏ်ရာတစ်ခု ရှိနေကာ ဓားချီများမှာ ထိုဒဏ်ရာထဲ၌ လှုပ်ရှားနေဆဲဖြစ်၏။ သူ၏မျက်နှာတွင် ထိတ်လန့်မှုများဖြင့် ပြည့်နှက်နေလေသည်။
ထိုဓားသည် လျှပ်စီးကဲ့သို့ မြန်ဆန်သော အရှိန်ဖြင့် ယမမြစ်ဘိုးဘေး၏ နဖူးကို ဖောက်ထွက်ကာ သူ၏ဝိညာဉ်ကို ချက်ချင်း အစိမ်းလိုက် ဖျက်ဆီးပစ်လိုက်ခြင်းပင်။ ထို့နောက် အရှိန်မသေဘဲ အစီအရင်ကိုပါ ဖျက်ဆီးကာ သူ့ကို ကယ်တင်ခဲ့ခြင်း ဖြစ်သည်။
ချီလျိုသည် ဖြစ်ပျက်ခဲ့သမျှကို ချက်ချင်း သဘောပေါက်သွားကာ ထိုဓားအပေါ် ရိုသေကြောက်ရွံ့စိတ်များ ဖြစ်ပေါ်လာ၏။ သူသည် ကုချန်၏ နောက်လိုက် ဖြစ်နေသော်လည်း ကုချန်မှ အဆုံးမဲ့ဓားကို အသုံးပြုသည်ကို တစ်ခါမျှ မမြင်ဖူးသဖြင့် ဤသည်မှာ ကုချန်၏ လက်နက်ဖြစ်ကြောင်း မသိရှာပေ။
သူ့ကို တုန်လှုပ်စေသည်မှာ ဤဓား၏ ကြောက်မက်ဖွယ် တိုက်ခိုက်ရေးစွမ်းရည်ပင်။ ယမမြစ်ဘိုးဘေးကဲ့သို့ အစွမ်းထက်သူကို တစ်ချက်တည်းဖြင့် သတ်ဖြတ်ကာ အစီအရင်ကိုပါ ဖျက်ဆီးနိုင်ရန်မှာ အနည်းဆုံး အထွတ်အထိပ် နတ်ဆိုးအရှင်အဆင့် ရှိရမည်။
ယခုမူ ဤလက်နက်သည် မည်သူမျှ မကိုင်တွယ်ဘဲ သူ၏ကိုယ်ပိုင်စွမ်းအားဖြင့်သာ လုပ်ဆောင်သွားခြင်း ဖြစ်သည်။ ဤဓား၏ နောက်ကွယ်တွင် ပို၍ ကြောက်စရာကောင်းသော ပုဂ္ဂိုလ်တစ်ဦး ရှိနေရမည်မှာ အသေအချာပင်။
ဒါဆို ဒီဓားရဲ့ အရှင်သခင်က ဒဏ္ဍာရီထဲက အင်မော်တယ်ဘုရင်လား.....
ဤသို့ တွေးမိသောအခါ ချီလျိုမှာ ပို၍ပင် အံ့အားသင့်သွားရသည်။ အင်မော်တယ်ဘုရင်တစ်ပါးသည် သူ့ကိုကယ်တင်ရန် သူ၏လက်နက်ကို အထူးတလည် စေလွှတ်လိမ့်မည်ဟု သူ မယုံကြည်နိုင်ပေ။
ချီလျို ကြောင်အနေစဉ်မှာပင် အဆုံးမဲ့ဓားသည် သူ၏ဘေးသို့ ပျံသန်းလာကာ သူ့ကို လှည့်ပတ်လျက် တစ်စုံတစ်ခုကို 'နမ်းရှုပ်' နေသကဲ့သို့ ပြုလုပ်နေလေ၏။ ထို့နောက် ဓားမြည်သံများ ပြုလုပ်ကာ ချီလျိုကို လေဟာနယ် ကောင်းကင်သတ္တုအား ချက်ချင်း ထုတ်ပေးရန် အချက်ပြလိုက်လေသည်။
အဆုံးမဲ့ဓား၏ အပြုအမူကို ကြည့်ကာ ချီလျိုသည်လည်း တစ်စုံတစ်ခုကို ရိပ်မိသွား၏။
ဒါဆို ဒီစွမ်းအားရှင်ဓားက လေဟာနယ် ကောင်းကင်သတ္တုကြောင့် ရောက်လာတာပေါ့။