အခန်း (၃၁၅-၃၁၆)
Vol. 23 Ch. 315-316
အခန်း ( ၃၁၅ ) - အရှင်သခင်၏ လက်နက်၊ ထိတ်လန့်ဖွယ်ရာ ခန့်မှန်းချက်နှင့် ချီလျို ပြန်လာခြင်း
အဆုံးမဲ့ဓား၏ စိတ်အားထက်သန်နေသော ပုံစံကို မြင်လိုက်ရသောအခါ ချီလျိုသည် သူ၏ခန့်မှန်းချက် မှားယွင်းခြင်းမရှိကြောင်း ပို၍ သေချာသွားတော့သည်။ ဤလျှို့ဝှက်ဆန်းပြားသော စွမ်းအားရှင်ဓားမှာ လေဟာနယ် ကောင်းကင်သတ္တုနောက်သို့ လိုက်လာခြင်းဖြစ်ပေလိမ့်မည်။
ချီလျို တုံ့ဆိုင်းနေစဉ်မှာပင် အဆုံးမဲ့ဓားထံမှ ဝိညာဉ်အာရုံတစ်ခု ထွက်ပေါ်လာ၏။
" အရှင်က မင်းကို ကယ်ခိုင်းလိုက်တာ... ကောင်းကင်သတ္တု ရထားတယ် မဟုတ်လား... မြန်မြန် ထုတ်ပေးတော့! "
အဆုံးမဲ့ဓား၏ စကားကို ကြားသောအခါ ချီလျိုမှာ မှင်တက်သွားရသည်။
အရှင်က သူ့ကို ကယ်ခိုင်းလိုက်တာလား... ဒါဆိုရင်.....
လေဟာနယ်ထဲတွင် ငြိမ်သက်စွာ ရှိနေသော အဆုံးမဲ့ဓားကို ကြည့်လျက် ချီလျို၏စိတ်ထဲ၌ မယုံကြည်နိုင်စရာကောင်းသော အတွေးတစ်ခု ပေါ်လာ၏။
" ရှင်က... စီနီယာ အဆုံးမဲ့ဓားလား "
သူ၏ခန့်မှန်းချက်ကို မဆိုင်းမတွပင် မေးမြန်းလိုက်မိသည်။ သူ၏သမီးဖြစ်သူသည် အရှင်သခင်၏ လက်နက်မှာ အဆုံးမဲ့ဓား ဖြစ်ကြောင်း ပြောပြဖူးလေသည်။
" ဝုန်း...! "
အဆုံးမဲ့ဓားသည် ဓားဦးကို အောက်သို့ အကြိမ်ကြိမ် ညိတ်ပြလိုက်သဖြင့် ချီလျို၏ ခန့်မှန်းချက် မှန်ကန်သွားသည်မှာ သေချာသွားတော့သည်။
ဒါ တကယ်ပဲ အရှင်သခင်ရဲ့ အဆုံးမဲ့ဓားပဲ!
ချီလျို၏ မျက်ဝန်းအစုံမှာ ထိတ်လန့်မှုများဖြင့် ပြည့်နှက်သွား၏။ အရှင်သခင်၏ လက်နက်မှာ အဘယ်ကြောင့် ဤမျှ အစွမ်းထက်နေရသနည်း။ အဆုံးမဲ့ဓား၏ ကိုယ်ပိုင်တိုက်ခိုက်ရေးစွမ်းရည်မှာ နတ်ဆိုးအရှင် ထိပ်တန်းအဆင့်နှင့် ရင်ဘောင်တန်းနိုင်နေပြီဆိုလျှင် အရှင်သခင်၏ အစွမ်းမှာ မည်မျှ ရှိမည်နည်း။
ဒါဆို အရှင့်ရဲ့အစွမ်းက အင်မော်တယ်ဘုရင် အဆင့်ကို ရောက်နေပြီလား.....
ကုချန် အင်မော်တယ်အရှင်ကို သတ်ဖြတ်သည်ကို မြင်ခဲ့ရသည်မှာ လပိုင်းမျှသာ ရှိသေးသော်လည်း ယခုအခါ အင်မော်တယ်ဘုရင် အဆင့်သို့ ရောက်နေပြီဆိုသည်မှာ ဒဏ္ဍာရီဆန်လွန်းလှသည်။ ချီလျိုသည် ကြောင်တောင်တောင်ဖြင့်ပင် လေဟာနယ် ကောင်းကင်သတ္တုကို ထုတ်၍ အဆုံးမဲ့ဓားထံသို့ ပေးအပ်လိုက်၏။ အဆုံးမဲ့ဓားသည် သတ္တုကို သိမ်းယူလိုက်ပြီးနောက် သူ့အား ဓားလက်ကိုင်ကို ကိုင်ခိုင်းကာ အလင်းတန်းတစ်ခုအဖြစ် ပြောင်းလဲ၍ နေရာမှ ထွက်ခွာသွားတော့သည်။
………
" ချီလျိုက ဘေးကင်းသွားပြီ... စိုးရိမ်စရာ မလိုတော့ဘူး "
ချီလျန်မျိုးနွယ် အစည်းအဝေးခန်းမအတွင်း၌ ကုချန်၏ တည်ငြိမ်စွာ ပြောကြားလိုက်သံ ထွက်ပေါ်လာလေသည်။ ထိုစကားကြောင့် ချီမုန်မှာ စိတ်အေးသွားရ၏။
မကြာမီမှာပင် ဓားအလင်းတစ်ခုနှင့်အတူ အဆုံးမဲ့ဓားသည် ချီလျိုကို ခန်းမထဲသို့ ခေါ်ဆောင်လာခဲ့သည်။ ထို့နောက် အဆုံးမဲ့ဓားသည် လေဟာနယ်ကို ဖောက်ထွက်ကာ ပျောက်ကွယ်သွားလေ၏။ ၎င်းမှာ ရရှိလာသော သတ္တုကို အမြန်ဆုံး ဝါးမြိုရန် စိတ်အားထက်သန်နေခြင်း ဖြစ်သည်။
" အသက်ကယ်ပေးတဲ့အတွက် ကျေးဇူးတင်ပါတယ် အရှင်! "
ချီလျိုသည် ကုချန်၏ရှေ့တွင် မဆိုင်းမတွပင် ဒူးထောက်လိုက်၏။ သူ၏စိတ်ထဲ၌ မေးခွန်းများစွာ ရှိနေသော်လည်း ဘယ်ကစမေးရမှန်း မသိဖြစ်နေစဉ်မှာပင် သူ၏မျက်နှာသည် တစ်ဖန် ပြောင်းလဲသွားပြန်၏။
အဘယ်ကြောင့်ဆိုသော် ချီလျန်နယ်မြေ၏ နယ်စပ်တွင် အင်မော်တယ်အရှင်များနှင့် နတ်ဆိုးအရှင်များစွာသည် ချီလျန်မျိုးနွယ် ဘိုးဘေးနယ်မြေဆီသို့ အပြင်းအထန် ဦးတည်လာနေသည်ကို သူ အာရုံခံလိုက်မိသောကြောင့် ဖြစ်လေတော့သည်။
အခန်း ( ၃၁၆ ) - နတ်ဆိုးလောက၏ အညံ့ခံမှု၊ သန်မာသူသာ အလေးထားခံရခြင်းနှင့် ရက်စက်သော နိယာမ
ချီလျန်နယ်မြေအတွင်းသို့ ချဉ်းကပ်လာနေသော အရှိန်အဝါများကို အာရုံခံမိလိုက်သဖြင့် ချီလျို၏ မျက်နှာအမူအရာမှာ သိသိသာသာ ပြောင်းလဲသွား၏။
သူ၏အရှင်သခင် ကုချန်မှ ယမမြစ်ဘိုးဘေးကို သတ်ခဲ့သည့်သတင်း ပေါက်ကြားသွားကာ ရှီမိုကောင်းကင်နန်းတော်မှ အင်မော်တယ်နတ်ဆိုးအရှင်များကို စေလွှတ်၍ ချီလျန်မျိုးနွယ်ကို လာရောက်နှိမ်နင်းခိုင်းခြင်း ဖြစ်နိုင်သည်ဟု သူ တွေးမိလိုက်သည်။ ဤအတွေးကြောင့် ဘေးကင်းစွာ ပြန်ရောက်လာသည့်အတွက် ဝမ်းသာနေမှုများမှာ ချက်ချင်းပင် စိုးရိမ်စိတ်အဖြစ် ပြောင်းလဲသွားတော့သည်။
ဘေးဒုက္ခဆိုတာ ရှောင်လွှဲလို့မရဘူးပဲ။ ရှီမိုကောင်းကင်နန်းတော်က ပြဿနာတွေ တကယ်ရောက်လာပြီ။
သူသည် အဆုံးမဲ့ဓား၏ စွမ်းဆောင်ရည်ကြောင့် ကုချန်၏အစွမ်းမှာ သူ ထင်ထားသည်ထက် ပိုမိုမြင့်မားနိုင်ကြောင်း သိထားသော်လည်း တစ်ဖက်တွင်မူ နှစ်ပေါင်းများစွာ ဘုရင်အဆင့်အဖြစ် အုပ်ချုပ်လာခဲ့သော ရှီမိုကောင်းကင်အရှင်သခင် ရှိနေလေသည်။ ၎င်းကို ကုချန် ယခုအချိန်တွင် ရင်ဆိုင်နိုင်ဦးမည် မဟုတ်ဟု သူ ယူဆနေဆဲပင်။
ထိုသို့ တွေးမိစဉ်မှာပင် အစည်းအဝေးခန်းမအတွင်းရှိ ချီလျန်မျိုးနွယ် အကြီးအကဲအဆင့်များမှာ မည်သည့် စိုးရိမ်ထိတ်လန့်မှုမျှ မရှိဘဲ တည်ငြိမ်နေကြသည်ကို မြင်လိုက်ရသဖြင့် ချီလျိုမှာ အံ့အားသင့်သွားရသည်။ သူ၏သမီးဖြစ်သူ ချီမုန်ပင်လျှင် ကုချန်၏ ဘေးတွင် ရိုသေစွာ ရပ်နေကာ စိုးရိမ်သည့် အရိပ်အယောင် ရှိမနေပေ။
နတ်ဆိုးအရှင်များ ပိုမိုနီးကပ်လာသောအခါ ချီလျိုသည် စိတ်မထိန်းနိုင်တော့ဘဲ ကုချန်ကို ထုတ်ပြောလိုက်၏။
" အရှင်... နတ်ဆိုးအရှင်တွေ ချဉ်းကပ်လာနေပါပြီ... ရှီမိုကောင်းကင်နန်းတော်က စွမ်းအားရှင်တွေ ဖြစ်ရမယ်... အရှင် ဘေးကင်းဖို့အတွက် ဒီနေရာကနေ အရင်ဆုံး ဖောက်ထွက်သွားပါ "
ယခင်က ချမှတ်ထားသော အစီအစဉ်အရ ရှီမိုကောင်းကင်နန်းတော်မှ တိုက်ခိုက်လာလျှင် ကုချန် ဘေးကင်းစေရန်အတွက် မျိုးနွယ်စု အကြီးအကဲများသည် အသက်ပေး၍ ခုခံပေးရန် ပြင်ဆင်ထားကြခြင်းဖြစ်သည်။
ထို့နောက်ထို့နောက် သူသည် အခြားအကြီးအကဲများကို ကြည့်ကာ အလျင်အမြန် ညွှန်ကြားလိုက်၏။
" အရင်က စီစဉ်ထားတဲ့အတိုင်း လုပ်ကြစို့ "
သို့သော် သူ၏စကားကို ကြားသောအခါ အကြီးအကဲများ၏ မျက်နှာတွင် ထူးဆန်းသော အမူအရာများ ပေါ်လာခဲ့သည်ကိုတော့ သူ သတိမပြုမိပေ။
" ရှီမိုကောင်းကင်အရှင်သခင် အပါအဝင် ရှီမိုကောင်းကင်နန်းတော်တစ်ခုလုံးကို အရှင်သခင်က နှိမ်နင်းလိုက်ပြီဆိုတာ မျိုးနွယ်စုခေါင်းဆောင် မသိသေးဘူးထင်တယ် "
အကြီးအကဲများအားလုံးသည် တစ်ယောက်ကိုယ် တစ်ယောက်ကြည့်ကာ ထို့သို့သာ တွေးနေကြ၏။
နောက်ဆုံးတွင် ချီမုန်သည် မိခင်ဖြစ်သူ၏လက်ကို အသာအယာ ဆွဲလိုက်ကာ တိုးတိုးတိတ်တိတ် ပြောပြလိုက်လေသည်။
" အမေ... ရှီမိုကောင်းကင်နန်းတော်က ဒုက္ခပေးမှာ မဟုတ်တော့ဘူး...အဲဒီလောက် စိုးရိမ်မနေပါနဲ့ "
ထိုနတ်ဆိုးအရှင်များ အဘယ်ကြောင့် ပြန်လာကြသည်ကို ချီမုန် အတိအကျ မသိသော်လည်း ဒုက္ခပေးရန် မဟုတ်သည်ကိုမူ သူ သေချာပေါက် သိ၏။ အကြောင်းမှာ ထိုနတ်ဆိုးအရှင်များသည် ကုချန်မှ ရှီမိုကောင်းကင်အရှင်သခင်အား နှိမ်နင်းလိုက်သည်ကို ကိုယ်တိုင် မြင်တွေ့ခဲ့ရသူများ ဖြစ်သောကြောင့်ပင်။
ချီလျိုမှာ ဝေခွဲမရ ဖြစ်နေစဉ်မှာပင် မိုးကုပ်စက်ဝိုင်းဆီမှ ရိုသေလေးစားသော အော်ဟစ်သံများ ဟိန်းထွက်လာ၏။
" ချမ်ကျွင်း နတ်ဆိုးနယ်မြေမှ အင်မော်တယ် ကျွင်းဟမ်... အင်မော်တယ်ဘုရင်ကို ဂါရဝပြုဖို့ ရောက်ရှိလာပါတယ် "
" မိုခယ့်နတ်ဆိုးနယ်မြေမှ နတ်ဆိုးအရှင် မိုခယ့်... အင်မော်တယ်ဘုရင်ကို ဂါရဝပြုဖို့ ရောက်ရှိလာပါတယ် "
" အဆုံးမဲ့ နတ်ဆိုးနယ်မြေမှ အင်မော်တယ် ဝူယာ့... အင်မော်တယ်ဘုရင်ကို ဂါရဝပြုဖို့ ရောက်ရှိလာပါတယ် "
ထိုအမည်များကို ကြားလိုက်ရသောအခါ ချီလျို၏ စိတ်ထဲ၌ လှိုင်းထန်သွားလေ၏။ ထိုသူများမှာ ရှီမိုကောင်းကင်နန်းတော်၏ လက်အောက်ခံ နတ်ဆိုးနယ်မြေ အသီးသီးကို အုပ်ချုပ်နေကြသော သူနှင့် အဆင့်တူ နယ်မြေအရှင်သခင်များ ဖြစ်ကြသည်။
နတ်ဆိုးနယ်မြေအရှင်သခင်တွေ အများကြီး ရောက်လာပြီး 'အင်မော်တယ်ဘုရင်' ကို ဂါရဝပြုတယ် ဆိုပါလား... ဘယ်သူက အင်မော်တယ်ဘုရင်လဲ.....
ချီလျို၏မျက်ဝန်းထဲတွင် ဇဝေဇဝါ ဖြစ်မှုများဖြင့် ပြည့်နှက်သွား၏။ သူ၏ မယုံကြည်နိုင်သော အတွေးတစ်ခုမှာ ဤနယ်မြေအရှင်သခင်များ အားလုံးသည် သူ၏အရှင်သခင်ကို ဂါရဝပြုရန် လာကြခြင်းများလော ဆိုသည်ပင်။
ထိုစဉ်မှာပင် နတ်ဆိုးအရှင်များမှာ ချီလျန်မျိုးနွယ်၏ ဘိုးဘေးနယ်မြေအပြင်ဘက်သို့ ဆင်းသက်လာကြ၏။ သို့သော် မည်သူတစ်ဦးမျှ ရှေ့သို့ ဆက်မတိုးဝံ့ကြဘဲ အဝေးကနေ၍သာ ရိုသေစွာ ဦးညွှတ်လျက် ကုချန်၏အမိန့်ကို စောင့်ဆိုင်းနေကြ၏။
နယ်မြေအရှင်သခင် ဖြစ်လာသူများမှာ လူမိုက်များ မဟုတ်ကြပေ။ ကုချန်နှင့် ရှီမိုကောင်းကင်အရှင်သခင်တို့ တိုက်ခိုက်ကြပြီးနောက် အရှင်သခင် ပျောက်ကွယ်သွားသည့် သတင်းကို ကြားသည်နှင့် ၎င်းတို့သည် ကုချန်ထံသို့ ချက်ချင်း အပြေးအလွှား လာရောက် ဂါရဝပြုကြခြင်း ဖြစ်သည်။
နတ်ဆိုးလောကတွင် သန်မာသူသာလျှင် အလေးထားခံရစမြဲ ဖြစ်သည်။ ဤတိုက်ပွဲတွင် ကုချန် အနိုင်ရရှိသွားခဲ့သည်။
နယ်မြေအရှင်သခင်များအတွက်မူ ဤသည်မှာ တိုက်ပွဲတစ်ခုမျှသာ မဟုတ်ဘဲ ဘုရင်အသစ်နှင့် ဘုရင်ဟောင်းတို့အကြား နန်းလုပွဲတစ်ခု ဖြစ်သည်။ အနိုင်ရသူမှာ ၎င်းတို့၏ အရှင်သခင် ဖြစ်လာမည်သာ ဖြစ်သည်။ ယခုအခါ ကုချန် အနိုင်ရရှိသွားပြီ ဖြစ်ရာ ၎င်းတို့သည် အရှင်သခင်သစ်အား သစ္စာခံရန် ရောက်လာကြခြင်း ဖြစ်သည်။
ရှီမိုကောင်းကင်နန်းတော်၏ တိုက်ရိုက်လက်အောက်ခံ တပ်ဖွဲ့များမှာမူ အရှင်သခင်ဟောင်းကို သစ္စာမဖောက်ဝံ့ကြသော်လည်း အခြားသော နတ်ဆိုးနယ်မြေများမှာမူ ထိုသို့ မဟုတ်ပေ။ အနိုင်ရသူနောက်သို့ လိုက်ခြင်းမှာ ရှေးယခင်ကတည်းက ရှိခဲ့သော နတ်ဆိုးလောက၏ နိယာမတစ်ခုပင် ဖြစ်လေတော့သည်။