အခန်း (၃၁၇-၃၁၈)
Vol. 23 Ch. 317-318
အခန်း ( ၃၁၇ ) - တုန်လှုပ်ခြင်း၊ ခေါင်းငုံ့အညံ့ခံခြင်းနှင့် အမိန့်တော်ကို နာခံခြင်း
ချီလျန်မျိုးနွယ် ဘိုးဘေးမြေအပြင်ဘက်၌ ရိုသေစွာ ခေါင်းငုံ့စောင့်ဆိုင်းနေကြသော အင်မော်တယ်နတ်ဆိုးအရှင်များကို ကြည့်ကာ ချီလျိုတစ်ယောက် အိပ်မက်မက်နေသည်ဟုပင် ထင်မှတ်လိုက်မိသည်။
ဤနတ်ဆိုးအရှင်များသည် တစ်ချိန်က သူနှင့် အဆင့်တူ သို့မဟုတ် သူထက်ပင် မြင့်မားခဲ့ဖူးသော နယ်မြေအရှင်သခင်များ ဖြစ်ကြသည်။ ချီလျန်မျိုးနွယ်၏ ထူးခြားသော အခြေအနေကြောင့် ယခင်ကဆိုလျှင် ထိုသူတို့သည် ချီလျန်မျိုးနွယ်ကို မျက်လုံးထောင့်ကပ်၍ပင် ကြည့်လေ့မရှိသူများ ဖြစ်သည်။
သို့သော် ယခုမူ သူတို့သည် သူ၏အရှင်သခင်ဖြစ်သည့် ကုချန်၏ခွင့်ပြုချက်ကို ရိုသေစွာ စောင့်ဆိုင်းနေကြ၏။ အရှင်သခင်သည် ဘာလုပ်လိုက်သနည်း။ ဤနတ်ဆိုးအရှင်များသည် ရှီမိုကောင်းကင်အရှင်သခင်၏ ဒေါသကို မကြောက်ကြတော့ဘူးလော။ ချီလျိုမှာ အလွန်အံ့အားသင့်ကာ ဝေခွဲမရ ဖြစ်နေ၏။
သူ၏မိခင်ဖြစ်သူမှ ဖြစ်ပျက်နေသည်များကို နားမလည်ဖြစ်နေသည်ကို မြင်သောအခါ ချီမုန်သည် သူ၏နားနားသို့ ကပ်၍ တိုးတိုးတိတ်တိတ် ရှင်းပြလိုက်ပြန်သည်။
" အမေ မရှိတဲ့အချိန်မှာ ရှီမိုကောင်းကင်နန်းတော်က လာရန်ရှာတယ်... အရင်ဆုံး မိုဟဲနတ်ဆိုးအရှင် ရောက်လာပြီး အရှင့်လက်ချက်နဲ့ သေဆုံးသွားတယ်...နောက်တော့ သွေးငရဲနတ်ဆိုးအရှင် အပါအဝင် နတ်ဆိုးအရှင်ငါးပါး ရောက်လာပြီး အဆုံးမဲ့ဓားရဲ့ လက်ချက်နဲ့ တစ်ချက်တည်း အသတ်ခံလိုက်ရတာပါ "
ချီမုန်သည် သူ့မိခင်မရှိခိုက် ဖြစ်ပျက်ခဲ့သမျှကို ပြန်လည် ပြောပြလိုက်၏။ ဤသတင်းကို ကြားလိုက်ရသောအခါ ချီလျို၏ရင်ထဲ၌ လှိုင်းထန်သွားလေသည်။ သူသည် ယမမြစ်ဘိုးဘေးကို အဆုံးမဲ့ဓားမှ သတ်ဖြတ်ခဲ့သည်အား မြင်တွေ့ခဲ့ရသော်လည်း သွေးငရဲနတ်ဆိုးအရှင်ကဲ့သို့ ထိပ်တန်းနတ်ဆိုးအရှင်များကိုပါ တစ်ချက်တည်း သတ်ဖြတ်နိုင်လိမ့်မည်ဟု မထင်မှတ်ထားခဲ့ပေ။
အဆုံးမဲ့ဓားသည် အင်မော်တယ်ဘုရင်လက်နက် အစစ်အမှန် ဖြစ်သွားပြီလော။ ထို့သို့ဆိုလျှင် သူ၏အရှင်သခင် ကုချန်သည်လည်း အင်မော်တယ်ဘုရင်အဆင့်သို့ ရောက်ရှိနေပြီဟု ဆိုလိုခြင်းလော။
သို့သော် ချီမုန်၏ ထပ်မံပြောဆိုလိုက်သော စကားမှာ သူ့အား ပို၍ တုန်လှုပ်စေခဲ့လေသည်။
" နတ်ဆိုးအရှင်ငါးပါး သေဆုံးပြီးနောက်မှာ ရှီမိုကောင်းကင်အရှင်သခင် ကိုယ်တိုင် ဆင်းသက်လာတယ်... ဒါပေမယ့် အရှင့်ကို မယှဉ်နိုင်ဘဲ အရေးနိမ့်ပြီး အချိန်မြစ်ထဲ ပြုတ်ကျသွားတာ... အခုထိ အသက်ရှင်သလား သေလား မသိရတော့ဘူး "
ရှီမိုကောင်းကင်အရှင်သခင် ကိုယ်တိုင် ဆင်းသက်လာသော်လည်း အရေးနိမ့်၍ ပျောက်ဆုံးသွားသည်လော။
ပြောပြသူမှာ သူ၏သမီးအရင်း မဟုတ်ပါက ချီလျိုသည် ယုံကြည်မည်ပင် မဟုတ်ပေ။ ဤအဖြစ်အပျက်များမှာ ယုံကြည်ရန်ခက်ခဲလွန်းလှ၏။ ရှီမိုကောင်းကင်တစ်ခုလုံးကို အုပ်ချုပ်သော အင်မော်တယ်ဘုရင်တစ်ပါးမှာ အရေးနိမ့်၍ ထွက်ပြေးရသည်အထိ ဖြစ်သွားခဲ့သည်။
ထို့ကြောင့်လည်း နတ်ဆိုးအရှင်များသည် ဤမျှ ရိုကျိုးနေကြခြင်း ဖြစ်ကြောင်း သူ သဘောပေါက်သွား၏။ သူ၏ဆုံးဖြတ်ချက် မှန်ကန်ခဲ့ပြီ။ ချီလျန်မျိုးနွယ်သည် အန္တရာယ်တွင်းမှ လွတ်မြောက်ရုံသာမက နယ်မြေအသီးသီးမှ လေးစားရသော နေရာတစ်ခု ဖြစ်လာခဲ့ပြီ။
ချီလျိုသည် စိတ်လှုပ်ရှားနေသော်လည်း ကုချန်ကမူ အေးဆေးတည်ငြိမ်နေဆဲပင်။ သူ၏ လက်ရှိအဆင့်အတန်းအရ နတ်ဆိုးအရှင်အချို့ လာရောက်ဂါရဝပြုခြင်းမှာ စိတ်လှုပ်ရှားစရာ ကိစ္စမဟုတ်ပေ။ နောင်တစ်ချိန် အင်မော်တယ်ဘုရင်များ လာရောက်ဂါရဝပြုမှသာ ပြောရကျိုးနပ်ပေလိမ့်မည်။
ဘိုးဘေးနယ်မြေအပြင်ဘက်၌ စောင့်ဆိုင်းနေသော နတ်ဆိုးအရှင်များမှာ အထဲမှ တုံ့ပြန်သံ မကြားရသဖြင့် စိုးရိမ်လာကြ၏။ နောက်ဆုံးတွင် သူတို့အားလုံး၏ အကြည့်မှာ မိုခယ့်နတ်ဆိုးအရှင်ထံသို့ ရောက်ရှိသွားကြ၏။ သူသည် ထိုအဖွဲ့ထဲတွင် အစွမ်းအထက်ဆုံးနှင့် ဝါအရင့်ဆုံး ဖြစ်သည်။
မိုခယ့်နတ်ဆိုးအရှင်သည် မတတ်သာသည့်အဆုံး ရှေ့ထွက်ကာ လေးလေးနက်နက် လျှောက်တင်လိုက်၏။
" အင်မော်တယ်ဘုရင်... ကျွန်တော်တို့ နယ်မြေအသီးသီးမှာ တာဝန်ထမ်းဆောင်နေကြတဲ့ ချီလျန်မျိုးနွယ်ဝင်အားလုံးကို ဘေးကင်းစွာ ပြန်လည်ပို့ဆောင်ဖို့ အမိန့်ပေးထားပြီး ဖြစ်ပါတယ်.....
နှစ်ပေါင်းများစွာ ကျွန်တော်တို့ဆီမှာ ကူညီပေးခဲ့တဲ့အတွက် ကျေးဇူးတုံ့ပြန်တဲ့အနေနဲ့ လျော်ကြေးတွေလည်း ဆက်သပါ့မယ်... အင်မော်တယ်ဘုရင်ကြီးမှာ တစ်ခြားအမိန့်တော်များ ရှိခဲ့ရင်လည်း မိန့်ကြားတော်မူပါ... ကျွန်တော်တို့ အစွမ်းကုန် ဆောင်ရွက်ပေးပါ့မယ် "
မိုခယ့်နတ်ဆိုးအရှင်၏ စကားမှာ အလွန်ပင် နှိမ့်ချသော စကားများ ဖြစ်သည်။ ချီလျန်မျိုးနွယ်ဝင်များကို ပြန်ပို့ပေးရုံသာမက လျော်ကြေးပါ ပေးမည်ဟု ဆိုခြင်းဖြစ်သည်။
ထိုစကားကို ကြားသောအခါ ချီလျန်မျိုးနွယ်ဝင်များ၏ မျက်ဝန်းများတွင် မျက်ရည်များ ပြည့်လျှံလာကြ၏။ နှစ်ပေါင်းများစွာ မျိုးနွယ်စု ဘေးကင်းရေးအတွက် အရှက်တရားကို မြိုသိပ်ကာ ကွဲကွာနေခဲ့ရသော မိသားစုဝင်များ၊ ညီအစ်မများ ပြန်လည်ဆုံစည်းရတော့မည် ဖြစ်သည်။
တချို့မှာ သေကွဲကွဲသွားခဲ့ကြသော်လည်း အသက်ရှင်ကျန်ရစ်သူများ ပြန်လာနိုင်ခြင်းအတွက် ချီလျန်မျိုးနွယ်ဝင်များမှာ ဝမ်းသာမျက်ရည်များ ကျဆင်းကာ စိတ်လှုပ်ရှားနေကြတော့သည်။
အခန်း ( ၃၁၈ ) - အံ့အားသင့်စရာ အမိန့်တော်၊ ကောင်းကင်ဘုံ၏ အမှန်တရားကို ပြောင်းပြန်လေ့ကျင့်ခြင်း
မိုခယ့်နတ်ဆိုးအရှင်၏ ရိုကျိုးသောစကားကို ကြားသောအခါ ကုချန်သည် ပြုံးနေသော်ငြား ဘာမျှ ပြန်ပြောခြင်း မရှိပေ။ ဤနတ်ဆိုးအရှင်သခင်များ ဤမျှအညံ့ခံနေခြင်းမှာ သူ၏ အစွမ်းထက်မှုကို ကြောက်ရွံ့၍ ဖြစ်ကြောင်း သူကောင်းစွာသိသည်။
ကုချန်သည် ဤအခွင့်အရေးကို လက်လွတ်မခံဘဲ သူတို့ထံမှ အဖိုးတန်ရတနာများ ညှစ်ထုတ်ရန် ဆုံးဖြတ်လိုက်သည်။ ဤသို့ဖြင့် ချီလျန်မျိုးနွယ်၏ အင်အားကို မြှင့်တင်ပေးနိုင်သလို သူလိုအပ်သည့် ရတနာများကိုလည်း ရရှိနိုင်မည်ဖြစ်သည်။ သူသည် ချီလျိုအား အချက်ပြလိုက်၏။
ချီလျိုသည် ကုချန်၏ဆိုလိုရင်းကို ချက်ချင်းနားလည်သွားလျက် ရှေ့သို့တက်ကာ ကြေညာလိုက်လေသည်။
" ငါတို့ မျိုးနွယ်စုဝင်တွေကို ပြန်ပို့ပေးဖို့ ကိစ္စကို နင်တို့လက်ထဲ အပ်လိုက်မယ်... လျော်ကြေးကိစ္စကိုတော့ နင်တို့ဘာသာ ဆုံးဖြတ်ကြပေါ့... ပြီးတော့ ငါ့ရဲ့အရှင်သခင်က လက်နက်သွန်းလုပ်ဖို့အတွက် နတ်ဘုရားသတ္တု လိုအပ်နေတယ်... ရှိတဲ့သူတွေက ချက်ချင်း လာပို့ကြပါ "
ချီလျို၏ပါးစပ်မှ ' အရှင်သခင် ' ဟူသော စကားကို ကြားလိုက်ရသောအခါ နတ်ဆိုးအရှင်များမှာ ထိတ်လန့်သွားကြ၏။ ချီလျန်မျိုးနွယ်သည် ဤအင်မော်တယ်ဘုရင်၏ တိုက်ရိုက်လူယုံများ ဖြစ်နေသည်ကို သူတို့ သဘောပေါက်သွားကြခြင်း ဖြစ်လေသည်။ နတ်ဆိုးလောကတွင် အင်မော်တယ်ဘုရင်တစ်ပါး၏ နောက်လိုက်ဖြစ်ခွင့်ရခြင်းမှာ အလွန်ဂုဏ်ယူစရာ ကိစ္စဖြစ်သည်။
' လျော်ကြေးကို ကိုယ့်ဘာသာဆုံးဖြတ်ပါ ' ဟူသော စကားမှာ သူတို့အတွက် အခက်ခဲဆုံးပင်။ အကယ်၍ ပေးသည့်ပမာဏ နည်းသွားပါက အင်မော်တယ်ဘုရင် စိတ်ဆိုးမည်ကို စိုးရိမ်ရသဖြင့် သူတို့ပိုင်ဆိုင်သမျှ ရတနာများကို အကုန်အစင် ထုတ်ပေးရမည့် အခြေအနေမျိုး ဖြစ်နေသည်။ ထို့အပြင် နတ်ဘုရားသတ္တုမှာ အလွန်ရှားပါးသော်လည်း အင်မော်တယ်ဘုရင်၏ မျက်နှာသာရရန် သူတို့ မရရအောင် ရှာဖွေရတော့မည်ဖြစ်သည်။
ချီလျိုသည် ခဏမျှ ငြိမ်သက်ကာ ကုချန်၏ စိတ်ချင်းဆက်သွယ် အမိန့်ပေးမှုကို နားထောင်ပြီးနောက် ဆက်လက်ပြောဆို၏။
" နောက်ထပ် အမိန့်တစ်ခုကတော့... နယ်မြေအသီးသီးမှာရှိတဲ့ နတ်ဆိုးအရှင်အဆင့်ကနေ အောက်ခြေအဆင့်အထိ ရှိသမျှ လျှို့ဝှက်သိုင်းကျမ်းတွေ၊ တန်ခိုးစွမ်းအားကျမ်းတွေ အားလုံးကို ရှာဖွေပြီး လာပို့ကြပါ... ကောင်းကောင်း ဆောင်ရွက်နိုင်တဲ့သူကို ငါ့အရှင်က ဆုလာဘ် ပြန်ပေးလိမ့်မယ် "
ဤအမိန့်ကို ကြားသောအခါ မိုခယ့်နတ်ဆိုးအရှင်နှင့် အခြားအရှင်များမှာ ကြောင်အသွားကြ၏။ အင်မော်တယ်ဘုရင် တစ်ပါးအနေဖြင့် အောက်ခြေအဆင့် သိုင်းကျမ်းများကို အဘယ်ကြောင့် လိုချင်ရသနည်း။ သူတို့မှာ ဘယ်လိုမှ နားမလည်နိုင်ပေ။ သို့သော်လည်း ဆုလာဘ် ရနိုင်သည်ဟု ကြားသဖြင့် သူတို့ ဝမ်းမြောက်ဝမ်းသာ လက်ခံလိုက်ကြသည်။
အမှန်စင်စစ်တွင် မိုခယ့်နတ်ဆိုးအရှင်နှင့် အခြားသူများသာမက ချီလျိုကိုယ်တိုင်ပင်လျှင် သူ၏ အရှင်သခင်မှ အဘယ်ကြောင့် ဤသိုင်းကျမ်းများအား လိုချင်ရသည်ကို နားမလည်နိုင်ချေ။
အစည်းအဝေးခန်းမအတွင်း၌ ကုချန်သည် အေးဆေးစွာ ထိုင်နေလေ၏။ သူသည် သိုင်းကျမ်းများကို အကြောင်းမဲ့ ရှာခိုင်းခြင်း မဟုတ်ပေ။
သူ၏ ရည်ရွယ်ချက်မှာ " ကောင်းကင်ဘုံအလုံးစုံ အမှန်တရား နားလည်ခြင်း " ပညာရပ်ကို ပြောင်းပြန်နည်းလမ်းဖြင့် လေ့ကျင့်ရန် ဖြစ်သည်။ လက်ရှိတွင် သူသည် ထိုပညာရပ်ကို ၁ ရာခိုင်နှုန်းသာ တတ်မြောက်ထားသေး၏။ ထိုပညာရပ်သည် အရာအားလုံးကို ခြုံငုံမိသော ပညာရပ်ဖြစ်လေသည်။
အကယ်၍ သူသာ လောကရှိ သိုင်းပညာပေါင်းစုံကို လေ့ကျင့်နိုင်မည်ဆိုပါက ထိုအတွေ့အကြုံများကို အခြေခံ၍ " ကောင်းကင်ဘုံအလုံးစုံ အမှန်တရား နားလည်ခြင်း " ပညာရပ်ကို ပိုမိုမြင့်မားသော အဆင့်သို့ ပြောင်းပြန်နည်းလမ်းဖြင့် တွန်းတင်နိုင်လိမ့်မည်လော။ သူ အမှန်တကယ်ပင် စမ်းသပ်လို၏။