ထျန်းပင်း၏ အသွင်ပြောင်းလဲခြင်း ၊ ရေခဲအကြေးခွံနှင့် သစ္စာရှိမှု

ကျေးရွာ၏ အပြင်ဘက်တွင်မူ ရေညှိခုန်ပျံသားရဲများက တိတ်တဆိတ် စောင့်ကြည့်မှုကို ဆက်လက် ပြုလုပ်နေကြသည်။ သူတို့၏ ဖြူဖျော့သော မျက်လုံးကြီးများနှင့် နှင်းဝံပုလွေကျေးရွာ၏ တံတိုင်းခြေရင်းရှိ အပင်အကြွင်းအကျန်များကို တစ်ချက်တစ်ချက် စူးစမ်းနေကြသည်မှာ တစ်စုံတစ်ခုကို လေ့လာဆန်းစစ်နေသည့်နှယ်။

ဤကဲ့သို့ စိုက်ကြည့်ခံနေရသည့် ခံစားချက်က ကျေးရွာတစ်ခုလုံးအပေါ် မမြင်ရသော ဖိအားများကို သက်ရောက်စေခဲ့သည်။

လင်းထျန်းလုံက သူ၏ အကြည့်ကို လွှဲလိုက်ပြီး နာမည်ရပြီးခါစ ထျန်းပင်းထံသို့ ကြည့်လိုက်သည်။ ထိုအကောင်ပေါက်လေးမှာ အားအင်အပြည့်ဖြင့် သူ၏ရှေ့ခြေများကို ပွတ်သပ်ကာ ချစ်စရာအသံလေးဖြင့် ညည်းတွားနေလေသည်။

ကြည်လင်သော မျက်ဝန်းလေးများထဲတွင် ရှင်သန်လိုစိတ်နှင့်အတူ... ဖုံးကွယ်ထားသော ဆာလောင်မှု အရိပ်အယောင်အချို့ကို လင်းထျန်းလုံမှ မြင်တွေ့လိုက်ရသည်။

‘အစားအသောက်က... အဓိက ပြဿနာပဲ’ လင်းထျန်းလုံ အတွေးများသွားရလေသည်။ မျိုးဆက်သစ်တွေ ကြီးထွားဖို့ဆိုလျင် စွမ်းအင်တွေ အများကြီး လိုအပ်သည်။ ပိုင်လင်နှင့် ဝံပုလွေမများ ရှာဖွေလာသော သစ်ဥသစ်ဖုများမှာ အစာပြေရုံမျှသာ ရှိပြီး ထျန်းပင်းကဲ့သို့ ပါရမီရှင် ကလေးငယ်တစ်ဦး အရှိန်အဟုန်ဖြင့် ကြီးထွားလာရန်အတွက်မူ မလုံလောက်ချေ။

သူ၏ အကြည့်မှာ ခိုင်မာသွားလေသည်။ ရေခဲဂူအတွင်းတွင် သိမ်းဆည်းထားသော ၊ သူ့အတွက် အသုံးမဝင်ဟု ယူဆထားသည့် သွေးဝိညာဉ်သမင်၏ မိစ္ဆာအမြုတေ(အဖြူ) ကို သူသတိရလိုက်သည်။ ထိုအမြုတေထဲတွင် ဝိညာဉ်လောင်မြိုက်သွေး ၊ ခန္ဓာကိုယ်ခုခံနိုင်စွမ်းမြှင့်တင်ခြင်းနှင့် မီးဒြပ်စင် စွမ်းအားများ ကိန်းအောင်းနေသည်။

‘နှင်းဝံပုလွေတွေက အအေးဓာတ်ရှိတဲ့ မျိုးနွယ်တွေဆိုပေမယ့်... ဒီပြင်းထန်တဲ့ အပူစွမ်းအင်ကို သုံးပြီး ထျန်းပင်းရဲ့ ခန္ဓာကိုယ်ထဲက ထူးခြားတဲ့ အလားအလာတွေကို အစွမ်းကုန် လှုံ့ဆော်ကြည့်ရင်ရော’ ရဲတင်းလှသည့် အကြံစည်တစ်ခု သူ၏ ဦးနှောက်အတွင်း ပေါ်ပေါက်လာခဲ့သည်။

ဤအမြုတေ၏ ဂုဏ်သတ္တိများက သူ သို့မဟုတ် ရန့်မြဲ့အတွက် မကိုက်ညီသော်လည်း ဗီဇပြောင်းလဲထားသော ဤကလေးငယ်အတွက်မူ အခွင့်အရေးတစ်ခု ဖြစ်လာနိုင်သည်။

သူသည် နွေးထွေးသောမီးစွမ်းအင်များ ထွက်ပေါ်နေသည့် ရဲရဲနီနေသော အမြုတေနှင့်အတူ ဝိညာဉ်စွမ်းအင် ထူထပ်လှသော သမင်အသားခြောက်တစ်ဖတ်ကို ထျန်းပင်း၏ ရှေ့သို့ ချပေးလိုက်သည်။

“အာဝူး... (ဒါကို စားလိုက်...)”

ထျန်းပင်းက စူးစမ်းလိုစိတ်ဖြင့် နမ်းရှုံ့ကြည့်ပြီးနောက် မဆိုင်းမတွပင် သမင်အသားခြောက်ကို အရင်စားကာ အမြုတေကို ခက်ခဲစွာ မျိုချလိုက်သည်။ အစပိုင်းတွင် ဘာမှမထူးခြားသော်လည်း ခဏအကြာတွင် အပြောင်းအလဲမှာ စတင်လာတော့သည် ။

“ဝူး...!” ထျန်းပင်းမှာ နာကျင်စွာ အော်ဟစ်လိုက်ရပြီး မြေပြင်ပေါ်တွင် လူးလိမ့်ကာ ပြင်းထန်စွာ တုန်ယင်လာသည်။

ဆွတ်ဆွတ်ဖြူနေသော အမွေးအမှင်များအောက်တွင် အနီရောင် အလင်းတန်းများ တဖျတ်ဖျတ် ပေါ်ထွက်လာပြီး သူ၏ အရေပြားမှာလည်း မီးပူတိုက်ထားသကဲ့သို့ ပူလောင်လာသည်။

‘မကောင်းတော့ဘူး၊ စွမ်းအင်က များလွန်းနေတာလား’ လင်းထျန်းလုံ၏ ရင်ထဲတွင် စိုးရိမ်စိတ်များ ဝင်လာသည်။ သူသည် ချက်ချင်း ရှေ့သို့တိုးကာ သူ၏ ဝံပုလွေခြေဖဝါးကြီးဖြင့် ထျန်းပင်း၏ ကိုယ်ပေါ်သို့ ဖွဖွလေး ဖိထားလိုက်ပြီး မျိုးတူပဲ့တင်ထပ်သံမှတစ်ဆင့် ထိုပြင်းထန်လှသော အပူဓာတ်များကို ထိန်းညှိပေးရန် ကြိုးစားလိုက်သည်။

သစ်ပင်အိမ်အတွင်းတွင်လည်း ရှောင်လန်နှင့် ရှောင်ယင်းတို့က စိုးရိမ်တကြီး စောင့်ကြည့်နေကြသည်။

“အီး... (အဲဒီ ဝံပုလွေပေါက်လေး တော်တော် နာနေပုံရတယ်...)” ရှောင်ယင်းက အော်ဟစ်မိလိုက်သည် ။ “အင်း... (အဲဒီ အမြုတေရဲ့ စွမ်းအားက ပြင်းထန်လွန်းနေတာပဲ...)” ရှောင်လန်ကလည်း မျက်မှောင်ကြုတ်လျက် ပြောလိုက်လေသည်။

သို့သော် လင်းထျန်းလုံက အင်အားသုံး၍ ဝင်ရောက်ကူညီရန် ပြင်လိုက်စဉ်မှာပင်.. ထျန်းပင်း၏ ခန္ဓာကိုယ်အတွင်းရှိ နှင်းဝံပုလွေ သွေးမျိုးဆက်၏ အအေးဓာတ်မှာ ပြင်ပက အပူဓာတ်ကြောင့် လုံးဝ လှုံ့ဆော်ခံလိုက်ရပြီး ပြင်းထန်စွာ တိုက်ခိုက် ပေါင်းစည်းသွားကြတော့သည် ။

‘ရှပ်... ရှပ်...’ ဟူသော အသံများနှင့်အတူ ထျန်းပင်း၏ ကိုယ်ပေါ်တွင် ရေခဲပွင့်များနှင့် မီးအမှတ်အသားများ ရောယှက်နေသော အနာဖေးများ ဖုံးလွှမ်းသွားခဲ့သည်။

ထိုအနာဖေးများ ကွာကျသွားသောအခါ သူ၏ ခြေဆစ်များ ၊ ရင်ဘတ်နှင့် ကျောပြင်များတွင် နီရဲသော အစင်းကြောင်းများ ပါဝင်သည့် ဖောက်ထွင်းမြင်ရသော ရေခဲအကြေးခွံများ ပေါ်ထွက်လာတော့သည်။

သူ၏ ကိုယ်ထည်မှာလည်း တခဏအတွင်း ထွားကျိုင်းလာပြီး ကလေးအရွယ်မှာတင် သားရဲကြီးတစ်ကောင်၏ အရှိန်အဝါမျိုး ပိုင်ဆိုင်လာသည်။ အထူးခြားဆုံးမှာ သူ၏ အမြီး ဖြစ်သည်။ ဖြူဖွေးစွတ်နေသော အမွေးများမှာ လောင်မြိုက်နေသော ရေခဲမီးလျှံများအလား ငွေဖြူရောင်နှင့် အနီရောင်တို့ ရောယှက်နေသော ထူးခြားသည့် အရောင်မျိုးဖြစ်သွားတော့သည်။

ပြင်းထန်လှသော နာကျင်မှုကြောင့် အော်ဟစ်နေသံများမှာလည်း တဖြည်းဖြည်းနှင့် ခွန်အားပြည့်ဝလှသော ဟိန်းဟောက်သံများအဖြစ် ပြောင်းလဲသွားသည်။

အရာအားလုံး တည်ငြိမ်သွားသောအခါ ထျန်းပင်းက ခေါင်းကို မော့လိုက်သည်။ သူ၏ မျက်ဝန်းများမှာ ကြည်လင်နေသော အပြာရောင်မှ နက်မှောင်နေသော နီညိုရောင်သို့ ပြောင်းလဲသွားသည်။

သူသည် လင်းထျန်းလုံကို ယခင်ကထက် ပိုမိုသစ္စာရှိလာပြီး အားကိုးလိုသော အကြည့်များဖြင့်ကြည့်ကာ သူ၏ အကြေးခွံများ ဖုံးလွှမ်းနေသော ခေါင်းကလေးဖြင့် လင်းထျန်းလုံ၏ ခြေထောက်ကို နူးညံ့စွာ ပွတ်သပ်လိုက်သည်။

လင်းထျန်းလုံက ထျန်းပင်၏ အခြေအနေကို ချက်ချင်း စစ်ဆေးလိုက်လေသည်။

[ မျိုးနွယ် - နှင်းဝံပုလွေ (ဗီဇပြောင်းသွေးမျိုးဆက်) — ထျန်းပင်း ]

[ အဆင့် - ၉ (ဝိညာဉ်စွမ်းအင်အဆင့်) ] (၂ အဆင့် တက်လှမ်းသည်)

[ ပင်ကိုယ်စွမ်းရည် - နှင်းဝံပုလွေသွေးမျိုးဆက် (အဖြူ) ၊ ရေခဲအကြေးခွံချပ်ဝတ် (အဖြူ) ၊ မီးဒြပ်စင် (အဖြူ) ] [ စွမ်းရည် - အားပြင်းသော တိုက်ခိုက်မှု (အစိမ်း) ၊ မီးလျှံကိုက်ချက် (အစိမ်း) ]

ရေခဲအကြေးခွံချပ်ဝတ် (အဖြူ) - ရေခဲနှင့် မီးစွမ်းအားများ ပေါင်းစပ်မှုကြောင့် ဖြစ်ပေါ်လာသော ထူးခြားသည့် အကြေးခွံ ဖြစ်သည်။ ရုပ်ပိုင်းဆိုင်ရာ ခုခံမှု အားကောင်းပြီး မီးဓာတ် တိုက်ခိုက်မှုများကိုလည်း အတိုင်းအတာတစ်ခုအထိ လျော့ပါးစေသည်။

မီးလျှံကိုက်ချက် (အစိမ်း) - ကိုက်ဖြတ်တိုက်ခိုက်မှုများတွင် မီးလျှံစွမ်းအင်များ ပါဝင်လာသဖြင့် ပိုမို ပြင်းထန်သော ဒဏ်ရာများကို ရရှိစေသည်။

‘အောင်မြင်သွားပြီ’ လင်းထျန်းလုံ၏ ရင်ထဲတွင် ဝမ်းမြောက်၀မ်းသာဖြစ်မှုများ ပေါက်ကွဲထွက်သွားသည်။ ‘စွန့်စားရကျိုး နပ်ပါတယ်’

ထိုအခိုက်အတန့်တွင် ကျေးရွာအပြင်ဘက်ရှိ ရေညှိခုန်ပျံသားရဲများမှာ ဤစွမ်းအင် လှုပ်ခတ်မှုကြောင့် ဂနာမငြိမ် ဖြစ်လာကြပြီး သစ်ပင်ထိပ်များပေါ်မှ စူးရှသော အော်သံများကို ထုတ်ဖော်လိုက်ကြပြန်သည်။

‘အေးချမ်းတဲ့အချိန်ကတော့ ကုန်ဆုံးသွားပြီပဲ’ ဟု လင်းထျန်းလုံက မျက်မှောင်ကြုတ်ကာ တွေးလိုက်သည်။

သူသည် အင်အားတိုးလာသော်လည်း မောပန်းနေသည့် ထျန်းပင်းကို မိခင်ဖြစ်သူပိုင်လင်ထံသို့ ပို့ဆောင်ပေးလိုက်ပြီးနောက် မြို့ရိုးပေါ်သို့ ပြန်လည် ခုန်တက်ကာ အသင့်စောင့်နေသော ရန်သူများကို ရင်ဆိုင်လိုက်တော့သည်။

အကျပ်အတည်းများ မပြီးဆုံးသေးသော်လည်း နှင်းဝံပုလွေကျေးရွာ၏ အနာဂတ်အတွက်မှာမူ မျှော်လင့်ချက် အလင်းတန်းအသစ်တစ်ခုကြောင့် ပိုမိုခိုင်မာလာခဲ့ပြီ ဖြစ်သည်။