အခန်း (၁၁၃-၁၁၄)

အခန်း။ ၁၁၃

သူသည် ရွှီရန်၏ လွန်ခဲ့သော နှစ်နှစ်တာအတွင်း တိုးတက်လာမှုများကို ကိုယ်ရံတော်တစ်ဦးအနေဖြင့် အနီးကပ် လေ့လာစောင့်ကြည့်လိုသည့် ဆန္ဒများ ပြင်းပြလာခဲ့သည်။ ဉာဏ်အလင်းပွင့်မှု အမြုတေအရိုးပိုင်ရှင်တစ်ဦးက ကမ္ဘာကြီးကို မည်မျှအထိ တုန်လှုပ်စေနိုင်မလဲဆိုသည်ကို သူ ကိုယ်တိုင် မြင်တွေ့လိုလှသည်။

ထိုသို့ တွေးတောပြီးနောက် ယဲ့ဖျင်က လေးနက်စွာ ခေါင်းညိတ်ပြလိုက်သည်ာ

"ကောင်းပြီလေ နောက်နှစ်ရက်နေရင် မနက် ၁၀ နာရီမှာ ငါတို့ စထွက်ကြမယ်။ ကျောင်းအုပ်ကြီးဆီကနေ ခွင့်ပြုချက်ရအောင် အရင်တောင်းထားဖို့တော့ မမေ့နဲ့ဦး"

ရွှီရန် : "ပြဿနာမရှိပါဘူးဗျာ အခုပဲ ကျောင်းအုပ်ကြီးကို သွားရှာလိုက်ပါ့မယ်။ တိုက်တိုက်ဆိုင်ဆိုင် ကျွန်တော့်ရဲ့ဓားကလည်း သားရဲတိုက်ခိုက်ရေးကွင်းမှာ ကျန်ခဲ့တာနဲ့ အတော်ပဲ"

ဦးလေးယဲ့ကို နှုတ်ဆက်ပြီးနောက် ရွှီရန်သည် စိတ်လှုပ်ရှားမှုအပြည့်ဖြင့် သားရဲတိုက်ခိုက်ရေးကွင်းဆီသို့ အရှိန်အဟုန်ဖြင့် ပြေးထွက်လာခဲ့သည်။ လမ်းခုလတ်တွင် ကျားမလေးက စောင့်ကြိုနေသည်ကို တွေ့လိုက်ရ၏။

ကျားမလေး : "အစ်ကိုရွှီ ဘယ်တွေသွားနေတာလဲ"

ရွှီရန် : "ဦးလေးယဲ့နဲ့ တွေ့လို့လေ ငါ့ကို အပြင်မှာ လေ့ကျင့်ပေးဖို့ လိုက်ပို့ပေးဖို့ ပြောခဲ့တာ"

ကျားမလေး၏ မျက်ဝန်းများမှာ ဝင်းလက်သွားပြီး "လေ့ကျင့်ဖို့ ဟုတ်လား တကယ်ပဲ အပြင်မှာ လေ့ကျင့်မှာလား။ ကျွန်မကိုပါ ခေါ်သွားလို့ မရဘူးလား ကျွန်မလည်း တော်တော်လေး သန်မာနေပြီနော်"

ရွှီရန် : "မရဘူး။ မင်းက အနည်းဆုံး အသက် ၈ နှစ်ပြည့်ရမယ်။ သွေးအင်အားကျင့်စဉ်ကို အောင်မြင်အောင် သင်ရမယ်။ ပြီးရင် မီးအိမ်ထွန်းညှိခြင်းကိုလည်း တတ်မြောက်ပြီးမှ လိုက်လို့ရမှာ"

ကျားမလေးမှာ အံ့အားသင့်သွားပြီး "အစ်ကိုရွှီ... အစ်ကိုသွားပြီး လေ့ကျင့်မယ့်နေရာက တကယ်ပဲ တခြားကမ္ဘာ တိုက်ပွဲမြေပြင်လား"

ရွှီရန် : "တကယ်ကို ထက်မြက်တဲ့ ကောင်မလေးပဲ"

ကျားမလေးက စိုးရိမ်တကြီးဖြင့် ရေရွတ်လိုက်သည်။

"ဒါက သိပ်ပြီး အန္တရာယ်မများလွန်းဘူးလား အစ်ကိုရွှီက အသက် ရှစ်နှစ်ပဲ ရှိသေးတာလေ..."

ရွှီရန်ကမူ လုံးဝ စိုးရိမ်ပူပန်ပုံမရဘဲ "ဦးလေးယဲ့က အစ်ကို့ကို ကာကွယ်ပေးမှာပဲ။ အလွန်ကို ဘေးကင်းပါတယ်" ဟု ပြောလိုက်သည်။

ကျားမလေး : "ဒါပေမဲ့... စာအုပ်တွေထဲမှာ ရေးထားတာကတော့ ကမ္ဘာပြင်ပ ဟင်းလင်းပြင်ဆိုတာ ညစ်ညမ်းမှုတွေနဲ့ ပြည့်နှက်နေပြီး စိတ်ပျက်အားငယ်စရာကောင်းတဲ့ ဂြိုဟ်သားသတ္တဝါတွေ ရှိတယ်တဲ့။ နောက်ပြီး အရိပ်ထဲကနေ စောင့်ကြည့်နေတဲ့ နတ်ဘုရားတွေတောင် ရှိတယ်လို့ ဆိုကြတယ်။ ဦးလေးယဲ့တောင်မှ လုံးဝဥဿုံ ဘေးကင်းပါတယ်လို့ အာမမခံနိုင်ဘူးလေ"

ရွှီရန် : "အန္တရာယ်ရှိလို့လည်း ဒါကို လေ့ကျင့်မှုလို့ ခေါ်တာပေါ့"

ကျားမလေးက တစ်ခုခု ထပ်ပြောရန် ပြင်လိုက်သော်လည်း သူတို့သည် သားရဲတိုက်ခိုက်ရေးကွင်း၏ ပွဲကြည့်စင်သို့ ရောက်ရှိသွားကြပြီ ဖြစ်သည်။

အောက်ဘက်တွင်မူ ကျူးယွီဟန်နှင့် သူမ၏အဖွဲ့မှာ လက်တွေ့တိုက်ပွဲဆင်နွှဲနေဆဲပင်။

ကျောင်းအုပ်ကြီးမှာ လက်နှစ်ဖက်ကို နောက်ပစ်လျက် ရပ်နေ၏။ ရွှီရန်တို့ ရောက်လာသည်ကို သိလိုက်ရသောအခါ သူက လှည့်ကြည့်၍ လက်လှမ်းပြလိုက်သည်။

"လာ... မင်းရဲ့ဓားကို လာယူတော့။ နောက်တစ်ခါ လက်နက်ကို ဒီလိုမျိုး ပေါ့ပေါ့ဆဆ ပစ်မထားခဲ့နဲ့တော့။ မင်းရဲ့ညီမလေး လျိုလီကို ကယ်ဖို့ လိုအပ်ရင်တောင် လက်နက်ကို မြဲမြဲကိုင်ထားဖို့ သတိရရမယ်။ ဒါက မူကြိုကျောင်းမို့လို့ ဘေးကင်းမှု အတိုင်းအတာ မြင့်မားနေတာ။ တကယ်လို့ တိုက်ပွဲမြေပြင်မှာဆိုရင် ဘယ်လိုလုပ်မလဲ။ လက်နက်မပါဘဲ ဘယ်သူ့ကိုမှ မကယ်နိုင်ဘူး"

ကျောင်းအုပ်ကြီး၏ လေသံမှာ ပြတ်သားပြီး တင်းမာလှသည်။

ရွှီရန်ကလည်း ရိုသေစွာဖြင့် ထိုဆုံးမစကားကို နာခံလိုက်သည်။

"မှတ်သားထားပါ့မယ် ကျောင်းအုပ်ကြီး"

ကျောင်းအုပ်ကြီးက ခေါင်းညိတ်ပြပြီးနောက် ကျားမလေးကို ကြင်နာစွာ ကြည့်လိုက်သည်။

"လျိုလီလေး... အခု နေလို့ကောင်းရဲ့လား"

ကျားမလေးသည် ကျောင်းအုပ်ကြီး၏ ဘေးတွင် အားရပါးရ ခုန်ပေါက်ပြရင်း တောက်ပစွာ ပြုံးလိုက်သည် "လုံးဝကို အဆင်ပြေပါတယ်ရှင့်။ အခု ကျွန်မမှာ ခွန်အားတွေ အပြည့်ပဲ"

ကျောင်းအုပ်ကြီးမှာလည်း မပြုံးဘဲ မနေနိုင်တော့ချော

"မဆိုးဘူး တကယ့်ကို မဆိုးဘူးပဲ။ တတိယအကြိမ်မြောက် အစွမ်းနိုးထမှုမှာတင် အဆင့် ၈ ပုံဆောင်ခဲသားရဲ စစ်မှန်သောသွေး အစက် ၁၀၀ တောင် စုပ်ယူနိုင်တယ်ဆိုတော့... ကျန်ရှိနေတဲ့ အစွမ်းတွေက ဘယ်လောက်တောင် အံ့မခန်း ဖြစ်လာမလဲဆိုတာ တွေးကြည့်ရုံနဲ့တင် ကြောက်စရာပဲ"

ကျောင်းအုပ်ကြီးသည် အံ့ဩချီးကျူးစွာဖြင့် ကျားမလေး၏ ခေါင်းကို ပုတ်ပေးလိုက်မိသည်။

သူမ၏ ပထမအကြိမ် အစွမ်းနိုးထမှုတွင် အဆင့် ၇ စစ်မှန်သောသွေး အစက် ၂၀ ကို စုပ်ယူခဲ့ပြီး ထူးခြားသော ဉာဏ်ရည်ဉာဏ်သွေး၊ လျင်မြန်သော သွေးအင်အား တိုးတက်မှုနှင့် အားမာန်တို့ကို ရရှိခဲ့သည်။ ဒုတိယအကြိမ်တွင်မူ အဆင့် ၇ စစ်မှန်သောသွေး ၇၀ အထိ စုပ်ယူကာ ခိုင်ခံ့လှသော ဖျက်ဆီး၍မရသော ဖန်သားကိုယ်ထည်ကို တဖြည်းဖြည်း တည်ဆောက်နိုင်ခဲ့သည်။

ယခု တတိယအကြိမ်တွင်မူ အဆင့် ၈ စစ်မှန်သောသွေး အစက် ၁၀၀ တိတိ... ဤအခြေအနေက မည်မျှအထိ အစွမ်းထက်သွားမလဲဆိုသည်ကို ခန့်မှန်းရန်ပင် ခက်ခဲလှသည်။

သူမသည် တကယ့်ကိုပင် ကောင်းကင်ဘုံ၏ ပြစ်ဒဏ်ခံ ဘုရင်မတစ်ဦးဖြစ်ကြောင်း သက်သေပြနေခဲ့သည်။ သူမ၏ ထူးခြားသော ပါရမီမှာ လက်ရှိ အချိန်အမြုတေအရိုးပိုင်ရှင်များကိုပင် ကျော်လွန်နေပြီး သူ့စိတ်ကြိုက် လုပ်ဆောင်နိုင်သော အမြုတေအရိုးပိုင်ရှင်ဖြစ်သည့် ရွှီရန် တစ်ဦးတည်းကိုသာ ရှုံးနိမ့်ပေလိမ့်မည်။

သို့သော် သူမ၏ အသက်မှာ အလွန်ပင် ငယ်ရွယ်နေသေးသည်။ နတ်ဘုရားသတ်တပ်ဖွဲ့ ရွေးချယ်ရေးပြိုင်ပွဲအတွက် ၃၂၈ ရက်သာ လိုတော့သော်လည်း သူမမှာ ရှစ်နှစ်ပင် မပြည့်သေးချေ။ ရှစ်နှစ်ပြည့်ပြီးပါကလည်း သူမအတွက် ကျင့်ကြံရန် အချိန်မှာ ရက်ပေါင်း ၂၇၀ မျှသာ ကျန်ရှိတော့မည် ဖြစ်သည်။

သူမနှင့် တစ်သုတ်တည်းရှိ အခြားပြိုင်ဘက်များမှာမူ သူမထက် နှစ်နှစ်နှင့် ခုနစ်လခန့် ပိုမို၍ ကျင့်ကြံချိန် ရရှိထားကြသည်။ ဤမျှကြီးမားသော ကွာဟချက်ကို ကျော်လွှားရန်မှာ လွယ်ကူလှသည်မဟုတ်ပေ။

ကျောင်းအုပ်ကြီးသည် အနည်းငယ် စိုးရိမ်ပူပန်သော အကြည့်ဖြင့် ရွှီရန်ကို လှမ်းကြည့်လိုက်မိသည်။

ရွှီရန်၏ ရှေ့တွင် ပြသခဲ့သော ပုံဆောင်ခဲချပ်ဝတ် ငရဲခွေးအား တစ်ချက်တည်းဖြင့် အပိုင်းပိုင်း ဖြတ်တောက်နိုင်သည့် စွမ်းဆောင်ရည်အရ သူသည် ဝိညာဉ်နတ်ဘုရားကျင့်စဉ်နှင့် သူကိုယ်တိုင် ဖန်တီးထားသော စူပါပေါက်ကွဲအားပြင်း ခုတ်ချက်ကို အသုံးပြု၍ အခြားသူများနှင့်ရှိနေသော ကွာဟချက်ကို အတိုင်းအတာတစ်ခုအထိ လျှော့ချနိုင်သည်မှာ အမှန်ပင်။

သို့သော် နှစ်နှစ်ခွဲဟူသော အချိန်ကွာဟချက်မှာ လအနည်းငယ်အတွင်း အလွယ်တကူ ကျော်လွှားနိုင်သည့်အရာ မဟုတ်ပေ။ ရွှီရန် ရင်ဆိုင်ရမည့် ပြိုင်ဘက် တစ်ဦးချင်းစီမှာလည်း ခန့်မှန်းရခက်လွန်းလှသည်။

သူနှင့် ယှဉ်ပြိုင်ရမည့် ငါးဦးမှာ အကြွင်းမဲ့ ဘုရင်များဖြစ်ကြပြီး သူတို့၏နောက်ကွယ်တွင်လည်း အခြားထိပ်သီးများ ရှိနေနိုင်သေးသည်။ ထို့ကြောင့် ရွှီရန်အနေဖြင့် ထိပ်သီးငါးဦးစာရင်းသို့ ဝင်ရောက်နိုင်ပြီး ကျင်းပြည်နယ်၏ ဂုဏ်သိက္ခာကို ပြန်လည်ဆယ်တင်နိုင်ပါ့မလား ဆိုသည်မှာ ကျောင်းအုပ်ကြီးအတွက် အလွန်စိုးရိမ်စရာ ဖြစ်နေရသည်။

သို့သော် ရွှီရန်ကမူ ကျောင်းအုပ်ကြီး၏ စိုးရိမ်ပူပန်မှုများကို ဂရုမထားဘဲ သူ၏ ရည်ရွယ်ချက်ကို တိုက်ရိုက်ပင် ပြောလိုက်သည်။

"ကျောင်းအုပ်ကြီး... နောက်နှစ်ရက်နေလို့ အထူးအဆင့်မြင့် ကျောက်တုံးဝိညာဉ် ကွင်းပါဓားရှည် ရောက်လာတာနဲ့ ဦးလေးယဲ့က ကျွန်တော့်ကို တခြားကမ္ဘာ တိုက်ပွဲမြေပြင်ဆီ လေ့ကျင့်ဖို့ ခေါ်သွားပါလိမ့်မယ်"

ကျောင်းအုပ်ကြီးမှာ တုံ့ပြန်မှုပင် မဆိုင်းဘဲ ချက်ချင်း ငြင်းဆန်လိုက်သည်။

"ဘာ မင်းက တိုက်ပွဲမြေပြင်မှာ သွားပြီး လေ့ကျင့်ချင်တယ် ဟုတ်လား မဖြစ်နိုင်တာ။ လုံးဝ မဖြစ်နိုင်ဘူး။ အဲဒီ ယဲ့ဖျင် ကောင်လေးကတော့ တကယ်ကို အရမ်းတယူသန်တာပဲ။ ဘယ်လိုဖြစ်ပြီး ဒီလိုကိစ္စမျိုးကို သဘောတူလိုက်ရတာလဲ။ ငါပြောထားမယ်... ငါ လုံးဝ သဘောမတူဘူး"

ရွှီရန် : "..."

ကျောင်းအုပ်ကြီး၏ တုံ့ပြန်မှုက ပုံမှန်ထက် ပိုမိုပြင်းထန်နေသဖြင့် ရွှီရန် အံ့အားသင့်သွားရသည်။

သွားပြီ... ဘယ်လိုပဲ တောင်းပန်တောင်းပန် ကျောင်းအုပ်ကြီးက တိုက်ပွဲမြေပြင်ကို သွားဖို့ ခွင့်မပြုရင် ဘယ်လိုလုပ်မလဲ။

ငါ့ရဲ့ ရွှေရောင်အောင်မြင်မှုဘွဲ့တံဆိပ်တွေ၊ ငါ့ရဲ့ ကပ်ဘေးမီးလျှံနဲ့ ငါ့ရဲ့ အနှိုင်းမဲ့ ခန္ဓာကိုယ်...

"ငါ နောက်ထပ် တစ်မိနစ်တောင် ထပ်မစောင့်ချင်တော့ဘူး။ ကျောင်းအုပ်ကြီးကို သေချာပေါက် နားချနိုင်အောင် လုပ်ရမယ်"

ရွှီရန်၏ အကြည့်များမှာ ရုတ်တရက် ပြတ်သားသွားတော့သည်။

အခန်း။ ၁၁၄

ပြတ်သားသော အကြည့်တို့ဖြင့် ရွှီရန် တစ်စုံတစ်ခုကို ပြောရန် ပြင်လိုက်စဉ်မှာပင် ကျောင်းအုပ်ကြီးက လက်တစ်ဖက်ကို မြှောက်ကာ ရှေ့ကဦးအောင် တားဆီးလိုက်သည်။

"ငါတို့မှာ ထူးချွန်ထက်မြက်တဲ့ ပါရမီရှင်တွေကို ပျိုးထောင်ဖို့အတွက် သီးသန့် ချမှတ်ထားတဲ့ လုပ်ငန်းစဉ်တွေ ရှိပြီးသားပါ"

"အသက် ရှစ်နှစ်မပြည့်ခင်အထိ သူတို့ဟာ ဝိညာဉ်နတ်ဘုရား မူကြိုကျောင်းမှာ ကောင်းမွန်တဲ့ ဘဝကို ဖြတ်သန်းရင်း အခြေခံ ဗဟုသုတတွေကို သင်ယူရတယ်။ ရှစ်နှစ်ပြည့်တာနဲ့ သွေးအင်အား ကျင့်စဉ်နဲ့ မှော်အတတ်တွေကို စတင် သင်ကြားရတယ်။ တစ်နှစ်ကျော်လောက် လေ့ကျင့်ပြီး သွေးအင်အား ၂၀,၀၀၀ ဝန်းကျင် ရောက်လာတဲ့အခါမှ နတ်ဘုရားသတ်တပ်ဖွဲ့ ရွေးချယ်ရေးပြိုင်ပွဲကို ဝင်ပြိုင်ခွင့် ရှိတာ"

"အဲဒီပြိုင်ပွဲကနေ ကုသခြင်း၊ သန့်စင်ခြင်း၊ စိတ်ဝိညာဉ်စွမ်းအား၊ ဒိုင်းကာစွမ်းအား၊ တိုက်ခိုက်ရေးနဲ့ အားဖြည့်စွမ်းအားတွေ စုစည်းထားတဲ့ အဖွဲ့တစ်ဖွဲ့ ဖွဲ့စည်းပြီးမှသာ လေ့ကျင့်ရေး မစ်ရှင်တွေကို စတင်ရတယ်။ အစောပိုင်း ကာလတွေမှာ တခြားကမ္ဘာ တိုက်ပွဲမြေပြင်ထဲကို စွန့်စားသွားဖို့ လုံးဝ ခွင့်မပြုဘူး။ ဒါက သိပ္ပံနည်းကျပြီး အန္တရာယ်အကင်းဆုံး ပညာရေး အဆင့်ဆင့်ပဲ"

ကျောင်းအုပ်ကြီးက ရွှီရန် ကို စိုက်ကြည့်ရင်း ဆက်ပြောသည်။

"မင်းက အခုမှ ရှစ်နှစ်ပြည့်တာပဲ ရှိသေးတယ်။ ဘယ်လိုပဲ ကြည့်ကြည့် တိုက်ပွဲမြေပြင်ကို သွားဖို့ မလိုသေးဘူး။ အဲဒီနေရာက အခုမှ စတင်သင်ယူသူတွေအတွက် နေရာမဟုတ်ဘူး"

"ပြီးတော့ မင်းက ဘေးကင်းလုံခြုံတဲ့ ဇုန်တွေမှာပဲ လေ့လာရေး လုပ်မှာမှ မဟုတ်တာ။ တကယ်လို့ မင်းက ဘေးကင်းဇုန်တွေမှာပဲ နေမယ်ဆိုရင် ငါ တားမှာ မဟုတ်ပါဘူး"

တိုက်ပွဲမြေပြင်၏ အလွန်အမင်း ဆိုးရွားလှသော ပတ်ဝန်းကျင်ကြားတွင် ဟွာရှနိုင်ငံသည် ဘေးကင်းလုံခြုံရေးဇုန် အနည်းငယ်ကို တည်ဆောက်ထားနိုင်ခဲ့သည်။

ထိုဇုန်များကိုမူ ရန်ငြိုးဖွဲ့ နတ်ဘုရားပင်လျှင် ဖျက်ဆီးနိုင်စွမ်း မရှိချေ။ ၎င်းတို့သည် ဟွာရှနိုင်ငံ၏ ဂုဏ်ယူဖွယ်ရာများ ဖြစ်ကြသည်။ အချို့ကမူ ဟွာရှတွင် တစ်ချိန်က နတ်ဘုရားကဲ့သို့ အစွမ်းထက်သူများ ရှိခဲ့ဖူးသည်ဟု ပြောကြသည်။

ဥပမာအားဖြင့် ချင်းမင်းဆက်၏ ပထမဆုံးဧကရာဇ်သည် သူ့အတွက် မြေအောက်နန်းတော်ကြီး တစ်ခုကို တည်ဆောက်ခဲ့ပြီး ဟွာရှ၏ တိုက်ပွဲမြေပြင်သို့ ဆင်းသက်ကာ ဘေးကင်းဇုန် ကိုးခုကို ဖန်တီးခဲ့သည်ဟု အချို့က ယုံကြည်ကြသည်။

အချို့ကမူ ဤဇုန်များသည် ထူးခြားလှသော နတ်ဘုရားအဆင့် အမြုတေအရိုး၏ အာနိသင်ကြောင့် ဖြစ်ပေါ်လာသည်ဟု ပြောကြသည်။

အချို့ကလည်း ဟွာရှ စစ်သည်တော်များ၏ အရိုးများကို အခြေခံကာ အနှိုင်းမဲ့ နယ်ပယ်တစ်ခုအဖြစ် သွန်းလုပ်ခဲ့ခြင်း ဖြစ်သည်ဟု ပြောကြသည်။

အတိုချုပ်ပြောရလျှင် ဟွာရှ၏ တိုက်ပွဲမြေပြင်ရှိ ဘေးကင်းဇုန်များမှာ အံ့ဖွယ်ရာ တစ်ခုပင်။

သို့သော် ဘေးကင်းဇုန်မှ ခြေတစ်လှမ်း ထွက်လိုက်သည်နှင့် အလွန်အန္တရာယ်များသော နယ်မြေသို့ ရောက်ရှိသွားမည်ဖြစ်ပြီး လေထုထဲရှိ ညစ်ညမ်းမှုများမှာ မြူခိုးများကဲ့သို့ စေးကပ်နေပေလိမ့်မည်။

ရွှီရန်က မတတ်သာသလို ပခုံးတွန့်ပြလိုက်ရင်း "ကျွန်တော်လည်း မတတ်နိုင်ဘူးလေ။ ကျွန်တော့်ရဲ့ဓားကို တခြားကမ္ဘာက သားရဲတွေနဲ့ ကျွေးမွေးဖို့ လိုအပ်တယ်။ ကျွန်တော့်ရဲ့ ဓားသိုင်းက တိုးတက်နေဖို့ဆိုရင် ထူးဆန်းတဲ့ သားရဲတွေရဲ့ သွေးအိုင်တွေ လိုအပ်တာဗျ။ ကျောင်းအုပ်ကြီးအနေနဲ့ ကျွန်တော့်ရဲ့ ဓားစွမ်းရည်တွေ ကျဆင်းသွားတာမျိုး မမြင်ချင်ဘူး မဟုတ်လား"

"ဒါ့အပြင် ကျွန်တော့်ရဲ့ စက္ကူရုပ်လေးတွေကလည်း တစ္ဆေမျိုးနွယ်သတ္တဝါတွေရဲ့ စွမ်းအင်ကို စုပ်ယူဖို့ လိုအပ်နေတယ်။ ဒါကြောင့် ကျွန်တော် သွားမှဖြစ်မယ်။ တိုးတက်မှုမရှိဘဲနဲ့ ထိပ်သီးငါးယောက်စာရင်းကို ဘယ်လိုဝင်နိုင်မှာလဲ။ ထိပ်သီးဆယ်ယောက်စာရင်းထဲ ဝင်ဖို့တောင် ရုန်းကန်နေရရင် ဘယ်လိုလုပ်မလဲ။ ကျောင်းအုပ်ကြီးအနေနဲ့ ကျွန်တော့်ကို အဆင့်တွေ နောက်ကျကျန်ခဲ့တာမျိုး မဖြစ်စေချင်ဘူး မဟုတ်လား"

ရွှီရန်သည် အားနည်းသလို ဟန်ဆောင်ကာ ကျောင်းအုပ်ကြီး၏ စိုးရိမ်စိတ်ကို ထိုးနှက်လိုက်သည်။

ကျောင်းအုပ်ကြီး : "... အဲဒီအတွက် တိုက်ပွဲမြေပြင်အထိ ပြေးစရာ မလိုပါဘူးကွာ။ ငါ မင်းကို ဓားကျင့်ဖို့အတွက် နေ့တိုင်း သွေးအင်အား ၅၀,၀၀၀ ရှိတဲ့ သားရဲတစ်ကောင်နဲ့ တစ္ဆေမျိုးနွယ် သတ္တဝါ ငါးကောင် စီစဉ်ပေးမယ် ဘယ်လိုလဲ"

ရွှီရန်က ခေါင်းခါပြလိုက်ပြီး "မရဘူးဗျ။ အနည်းဆုံး ပုံဆောင်ခဲသားရဲ တစ်ထောင်လောက် လိုအပ်တာ ပြီးတော့ တစ္ဆေမျိုးနွယ် သတ္တဝါ နောက်ထပ် တစ်ထောင် အကောင်နည်းနည်းလေးဆိုရင် ကျွန်တော့်အတွက် သွားကြားထိုးဖို့တောင် မလောက်ဘူး။ ကျွန်တော် ပြင်းပြင်းထန်ထန် တိုက်ခိုက်ဖို့ လိုအပ်တယ်"

ကျောင်းအုပ်ကြီးမှာ အံ့ဩသွားရသည်။

"မင်း အဲဒီလောက်တောင် အများကြီး လိုတာလား။ အဲဒါ တကယ်လား ဒါဆိုရင် အဆင့်မြှင့်ထားတဲ့ စက္ကူရုပ်က ဘယ်လောက်တောင် သန်မာသွားမှာလဲ"

ရွှီရန် : "အတိုချုပ်ပြောရရင်တော့ အရမ်းကို သန်မာသွားမှာပါ။ ရွေးချယ်ရေးပြိုင်ပွဲမှာ ပထမနေရာကို အလွယ်တကူ ရယူနိုင်တဲ့အထိပေါ့"

ကျောင်းအုပ်ကြီး : "..."

ရွှီရန်၏ ယုံကြည်ချက်အပြည့်ရှိသော စကားများကြောင့် သူ ဇဝေဇဝါ ဖြစ်သွားရသည်။ ဤကောင်လေးသည် အမြဲတမ်း တစ်ခုခုကို ဖုံးကွယ်ထားတတ်ပြီး နံပါတ်တစ် ဖြစ်ရမည်ဟု ကြွေးကြော်နေတတ်ရာ... တကယ်ပဲ ထိုကဲ့သို့ စွမ်းဆောင်နိုင်စွမ်း ရှိနေမလား။

"မင်း တိုက်ပွဲမြေပြင်ကို သွားရင် မင်းရဲ့ အစွမ်းအစတွေကို သိသိသာသာ မြှင့်တင်နိုင်မယ်လို့ သေချာလား။ ရရှိမယ့် ရလဒ်က ရင်ဆိုင်ရမယ့် စွန့်စားမှုနဲ့ ထိုက်တန်ရဲ့လား"

"ရရှိလာမယ့် အကျိုးကျေးဇူးတွေက စွန့်စားရတာထက် အများကြီး ပိုတန်ဖိုးရှိပါတယ်"

ရွှီရန်က လေးနက်စွာ ခေါင်းညိတ်ပြလိုက်သည်။

သူ၏ စက္ကူရုပ်များပိုမိုသန်မာလာစေရန်အတွက် ဝါးမြိုဖျက်ဆီးပစ်ရမည့် ပိုမိုအားကောင်းသော ဝိညာဉ်ဓာတ်များနှင့် တစ္ဆေစွမ်းအင်များ လိုအပ်နေသည်။ ထို့အပြင် သတ်ဖြတ်လိုစိတ် အရှိန်အဟုန်ဟူသော ရွှေရောင်အောင်မြင်မှုဘွဲ့တံဆိပ်နှင့်အတူ ရွှေနီရောင် ရတနာများသည်လည်း တိုက်ပွဲမြေပြင်ရှိ နက်နဲသော လျှို့ဝှက်ချက်များကို ဖော်ထုတ်ရာတွင် အထောက်အကူ ဖြစ်စေနိုင်မည်ပင်။

အတိုချုပ်ပြောရလျှင် ဤလေ့ကျင့်ရေးခရီးစဉ်သည် ကဏ္ဍစုံမှ အကျိုးရှိနေခြင်းပင်။

ကျောင်းအုပ်ကြီးမှာ ဝေခွဲမရဖြစ်နေဆဲ "ငါ ခဏလောက် စဉ်းစားပါရစေဦး..."

"မင်းရဲ့ မိုးကြိုးခြေလှမ်း သုံးထောင်က တော်တော်လေး မြန်တယ်။ ကိုယ်ဖျောက်အတတ် ကလည်း အိပ်မက်ဆိုး ကလဲ့စားချေမိခင်ရဲ့ အာရုံခံနိုင်စွမ်းကိုတောင် ရှောင်ရှားနိုင်တယ်။ နောက်ပြီး စူပါပေါက်ကွဲအားပြင်း ခုတ်ချက် က သွေးအင်အား ၂၀,၀၀၀ ရှိတဲ့ သားရဲတွေကို အပိုင်းပိုင်း ဖြတ်နိုင်စွမ်းရှိတယ်..."

"မင်း သန်မာလာမယ့်လမ်းကို ပိတ်ပင်ထားတာကလည်း အဓိပ္ပာယ်မရှိဘူး။ ပြီးတော့ မင်းရဲ့ လက်ရှိအဆင့်က တစ်နှစ်ကျော် ကျင့်ကြံထားတဲ့ ပါရမီရှင်တွေရဲ့ အဆင့်နဲ့ ညီမျှနေပြီပဲ..."

ကျောင်းအုပ်ကြီးသည် ခေါင်းမာသူတစ်ဦး မဟုတ်ပေ။ ထို့ကြောင့် သူသည် ရွှီရန်၏ တောင်းဆိုချက်ကို သွယ်ဝိုက်သောနည်းဖြင့် သဘောတူလိုက်သည်။

"ဒါပေမဲ့ မင်းကို တစ်ခုတော့ သတိပေးရမယ်"

"မင်း အမြင့်ဆုံး အဆင့် ၂ ညစ်ညမ်းနယ်မြေအထိပဲ သွားခွင့်ရှိမယ်။ အဲဒီနယ်မြေတွေမှာ တွေ့ရတတ်တဲ့ သာမန် ပုံဆောင်ခဲသားရဲတွေ၊ ရန်ငြိုးဖွဲ့သားရဲတွေနဲ့ တစ္ဆေတွေရဲ့ သွေးအင်အားကအနည်းဆုံး ၆၀,၀၀၀ ရှိတယ်။ တချို့ဆိုရင် ၁၀၀,၀၀၀ ကျော်တဲ့အထိတောင် ရှိတယ်နော်"

"အဆင့် ၁ ညစ်ညမ်းနယ်မြေတွေက အဆင့် ၂ ထက် ဆယ်ဆမက ပိုကြောက်စရာကောင်းတယ်။ မင်း အဲဒီဘက်ကို ခြေတစ်လှမ်းတောင် မလှမ်းမိစေနဲ့"

"အဆင့် ၁ နယ်မြေမှာရှိတဲ့ သတ္တဝါ ၈၀ ရာခိုင်နှုန်းဟာ သွေးအင်အား ၁၀၀,၀၀၀ ကျော်ကြတဲ့အပြင် သူတို့က အုပ်စုလိုက် တိုက်ခိုက်တာ။ အပေးအယူလုပ်တာတွေမှာလည်း ကျွမ်းကျင်ကြတယ်။ ဒါတင်မကသေးဘူး။ အဲဒီမှာ နတ်ဆိုးရုပ်တုတွေ ရှိနေတော့ သူတို့က နာကျင်မှုကို မကြောက်တော့ဘဲ အမြဲတမ်း သွေးရူးသွေးတန်း အခြေအနေရောက်နေကြတာ"

ရွှီရန်က တကယ့်လိမ္မာတဲ့ ကလေးတစ်ယောက်လို ခေါင်းကို တရစပ်ညိတ်ပြရင်း "စိတ်ချပါ ကျောင်းအုပ်ကြီး ဘေးကင်းရေးကို ကျွန်တော် အထူးဂရုစိုက်ပါ့မယ်" ဟု ကတိပေးလိုက်သည်။

ကျောင်းအုပ်ကြီးက သက်ပြင်းတစ်ချက်ချကာ "မင်းက အဆင့် ၁ နယ်မြေထဲမှာ လျှောက်သွားချင်နေတာလို့ ငါ သံသယဝင်မိတယ်"

"မင်းအတွက် ဒိုင်းကာစွမ်းအား ကျွမ်းကျင်သူတစ်ယောက်နဲ့ ကုသခြင်းစွမ်းအား ကျွမ်းကျင်သူတစ်ယောက်ကို အဖော်ထည့်ပေးမှ ဖြစ်တော့မယ်"

ကျောင်းအုပ်ကြီး၏ မျက်နှာမှာ အလွန်လေးနက်သွားသည်။

"ရွေးချယ်ရေးပြိုင်ပွဲအတွက် ၃၂၈ ရက်ပဲ လိုတော့တာ။ တကယ်လို့ မင်းသာ ဒဏ်ရာရသွားလို့ ပြိုင်ပွဲမှာ အဆင့်မကောင်းခဲ့ရင် မင်းတို့အဖွဲ့ရဲ့ စွမ်းဆောင်ရည်က တစ်ဆင့်နိမ့်သွားလိမ့်မယ်... အဲဒါက မင်းရဲ့ အနာဂတ်ကို အများကြီး ထိခိုက်စေနိုင်တယ်"

ရွှီရန်က အေးအေးဆေးဆေးပင် ပြုံးလိုက်ပြီး "စိတ်မပူပါနဲ့ဗျာ ပြိုင်ပွဲကို လုံးဝ မထိခိုက်စေရပါဘူး။ ကျွန်တော် တစ်ပွဲလောက် သွားတိုက်ပြီးတာနဲ့ ချက်ချင်း ပြန်လာမှာပါ။ ကျောင်းအုပ်ကြီး စိတ်ပူနေရင်လည်း ကျွန်တော့်ကို ကာကွယ်ရေး အစီအစဉ်အချို့ စီစဉ်ပေးထားပေါ့"

ကျောင်းအုပ်ကြီးက ရယ်မောလိုက်ရင်း "ကာကွယ်ရေးတင် မဟုတ်ဘူး။ မင်း သွားလို့ရမယ့် နယ်မြေအကွာအဝေးကိုလည်း ကန့်သတ်ထားမှာ။ အဆင့် ၁ နယ်မြေထဲကိုတော့ မင်းကို လုံးဝ အဝင်မခံနိုင်ဘူး"

ရွှီရန် : "ဟုတ်ကဲ့ပါဗျာ"

သူ့စိတ်ထဲမှာတော့ သိပ်ပြီး ဂရုမစိုက်လှချေ။

တိုက်ပွဲမြေပြင်ကို ရောက်သွားပြီးမှတော့ နယ်မြေကန့်သတ်ချက်တွေကို ဘယ်သူက လိုက်နာနေတော့မှာလဲ။

သူသာ စွမ်းအားအစစ်အမှန်ကို ထုတ်ပြလိုက်ရင် ဦးလေးယဲ့တို့က သဘောတူလာမှာပဲ။ ဦးလေးယဲ့က သတ္တိရှိတဲ့အပြင် စိတ်သဘောထားကလည်း အတော်လေး ပွင့်လင်းသူပဲဟာ။

ကျောင်းအုပ်ကြီးက ရွှီရန် ကို စောင်းကြည့်ကာ "ဒါနဲ့ မင်းက ဘယ်လောက်ကြာကြာ လေ့ကျင့်ဖို့ စိတ်ကူးထားလဲ"

ရွှီရန် ခေတ္တစဉ်းစားလိုက်သည်။ သွေးအင်အား ၁၀၀,၀၀၀ ရှိသော သားရဲပေါင်း ၁၀,၀၀၀ ကို သတ်ဖြတ်ရန် ရည်မှန်းချက်ထားလိုက်ပြီး "နှစ်လလောက်ပါပဲ"

ကျောင်းအုပ်ကြီး : "နှစ်လ... ကောင်းပြီလေ... နောက်နှစ်ရက်နေလို့ အထူးအဆင့်မြင့် လက်နက်ကို မင်းလက်ထဲ ရောက်ပြီဆိုရင်တော့ စထွက်လို့ရပြီ။ ဒါပေမဲ့ ဦးလေးယဲ့ရဲ့ စကားကိုတော့ သေသေချာချာ နားထောင်ရမယ်နော်"

ရွှီရန် : "နားထောင်ပါ့မယ်ဗျ"

ကျောင်းအုပ်ကြီးက နောက်ဆုံးတစ်ကြိမ် ထပ်မံ သတိပေးလိုက်သည်။

"ဒဏ်ရာ လုံးဝ မရစေနဲ့ဦး ပြိုင်ပွဲအတွက် ၃၂၈ ရက်ပဲ လိုတော့တာ ရှေ့လျှောက်လာမယ့် ပြိုင်ပွဲတွေကို မထိခိုက်စေဖို့ သေချာအောင် လုပ်ပါ"