အခန်း (၁၃+၁၄)

အခန်း (၁၃) - သေနာပတိ စစ်သည်တော်ဖြိုခွင်းခြင်း

အေးစက်သော လေပြင်းများ တဝေါဝေါ တိုက်ခတ်နေပြီး နေဝင်ချိန် ဆည်းဆာရောင်သည် သွေးကဲ့သို့ ရဲရဲနီနေသည်။

မြစ်ကမ်းဘေးရှိ ကျူပင်တောထဲတွင် အလောင်းများမှာ တောင်လိုပုံနေပြီး သွေးချောင်းစီးလို့နေသည်။ ဓား၊ လှံ ကိုင်စွဲထားသော စစ်သည်အုပ်စုလိုက်သည် အရပ်မျက်နှာပေါင်းစုံမှ ဝိုင်းရံပိတ်ထားကြရာ ဆုတ်ခွာစရာ လမ်းမရှိတော့။

စုချန်သည် ဓားသင်္ချိုင်းထဲတွင် မတ်တပ်ရပ်ရင်း မျက်လုံးကို မှိတ်ကာ လေးလံသော ဓားကြီးတစ်လက်ကို ကိုင်စွဲထားသည်။

သူသည် ထိုအထီးကျန်၍ မြင့်မားသော ပုံရိပ်နှင့် တစ်သားတည်း ဖြစ်သွားသကဲ့သို့ ခံစားရသည်။

တဖွဲဖွဲ တိုးဝင်လာသော စစ်သည်တော် အလုံးအရင်းက ဖိနှိပ်လာသည်နှင့်အမျှ သူကိုင်ထားသော ဓားကြီးက တုန်ခါလာပြီး ဝမ်းနည်းကြေကွဲဖွယ် ငိုရှိုက်သံများ ထွက်ပေါ်လာသည်။

ငါ့တိုင်းပြည် ပျက်စီးပြီ၊ ငါ့ရဲဘော်ရဲဘက်တွေ အကုန်သေပြီ၊ ငါတစ်ယောက်တည်း ကောင်းကင်နဲ့ မြေကြီးကြားမှာ ကျန်ရစ်ခဲ့တယ်။ ငါ့ခြေထောက်အောက်မှာ ငါ့မွေးရပ်မြေ ရှိတယ်၊ ငါ့အနောက်မှာ ငါ့အိမ် ရှိတယ်။ ငါ ဘယ်လိုလုပ် နောက်ဆုတ်နိုင်မှာလဲ?

ရွေးချယ်စရာ တစ်လမ်းပဲ ရှိတယ်၊ သေသည်အထိ တိုက်ခိုက်မယ်။

အသံကြီးက ပတ်ဝန်းကျင် တစ်ခွင်လုံး တုန်ခါသွားအောင် ကျယ်လောင်စွာ ဟိန်းထွက်လာသည်။

သူက လက်ထဲမှ ဓားကြီးကို ဝှေ့ယမ်းလိုက်ရာ ပထမဆုံး ဓားချက်က စစ်သည်တော် တစ်ထောင်ကို ဖယ်ရှားပစ်လိုက်သည်။

ဓားငွေ့အင်များက လှိုင်းလုံးများကဲ့သို့ ထိုးတက်လာပြီး မြေပြင်ပေါ်ရှိ ကျူပင်များကို လွှမ်းမိုးသွားသည်။ ရှေ့သို့ တိုးဝင်လာသော ရန်သူစစ်သား ဒါဇင်ပေါင်းများစွာသည် ဓားငွေ့အင်များ၏ ရိုက်ခတ်မှုကို ခံလိုက်ရပြီး လေတိုက်ခံရသော ဂျုံခင်းများကဲ့သို့ မြေပေါ်သို့ အော်ဟစ်ကာ လဲကျသွားကြသည်။

ချက်ချင်းပင် ရန်သူတပ်ဖွဲ့ထဲမှ ကျွမ်းကျင်စစ်သည်အချို့ ပြေးထွက်လာပြီး ကောင်းကင်ကို ကျော်ဖြတ်ပျံသန်းလာကြသည်။

ဒုတိယ ဓားချက်က ချက်ချင်း ထွက်ပေါ်လာပြီး ယင်း၏ စွမ်းအားက ကောင်းကင်အမြင့်သို့ ထိုးတက်သွားသည်။

ဓားငွေ့အင် စီးကြောင်းကြီးက ကောင်းကင်ကို ဖြတ်သန်း တိုက်ခတ်သွားပြီး ရန်သူဗိုလ်ချုပ် အများအပြားကို ချက်ချင်း သတ်ဖြတ်လိုက်ရာ သွေးများ လေထဲတွင် ပြန့်ကြဲသွားသည်။

စုချန်သည် ထိုသူရဲကောင်းဆန်သော တိုက်ခိုက်လိုစိတ် ကူးစက်ခံလိုက်ရသကဲ့သို့ ဖြစ်နေပြီး ရယ်မောကာ အဆုံးမရှိသော ရန်သူတပ်မတော်ကြီးဆီသို့ ပြေးဝင်သွားသည်။ နောက်ဆုံး လက်ကျန်ခွန်အားကို သုံးပြီး ဓားချက်တစ်ချက် ထုတ်ဖော်လိုက်သည်။

ဒီဓားကွက် နာမည်က 'သေနာပတိ သံချပ်ကာချွတ်ခြင်း' ။လှိုင်းထနေသော အားကောင်းသည့် ဓားငွေ့အင်များက သူ့ကို လှုပ်နှိုးလိုက်သဖြင့် သူ မျက်လုံးဖွင့်လိုက်သည်။

"သေနာပတိဓား ကို သန့်စင်ပြီးနောက်၊ စုချန်တစ်‌ယောက် ရွှမ်အဆင့်ရှိ အဆင့်နိမ့်ဓားသိုင်းဖြစ်သော ' သေနာပတိ စစ်သည်တော်ဖြိုခွင်းခြင်း' ကို နားလည်တတ်‌မြောက်သွားပြီဖြစ်သည်။”

"တကယ်ကြီး ရွှမ်အဆင့် ဓားသိုင်းပါလား..”

စုချန် သူကိုင်ထားသော သေနာပတိဓားကို ဝမ်းသာအားရ ကြည့်လိုက်သည်။

ဒီဓားရဲ့ မူလပိုင်ရှင်က တကယ်ကို ရှားပါးပြီး ရဲရင့်တဲ့ ပုဂ္ဂိုလ်တစ်ဦးပဲ။ သူ့ဓားသိုင်းက ကျယ်ပြန့်ပြီး အားကောင်းလှသည်၊ တားဆီးမရနိုင်တဲ့ အရှိန်အဟုန်လည်း ရှိ ပေသည်။

ရွှမ်အဆင့် ဓားသိုင်း!

ဒါက သာမန်လူတွေ တတ်မြောက်နိုင်တဲ့ အရာမဟုတ်ဘူး။

ယင်း၏ စွမ်းအားနှင့် အကျိုးသက်ရောက်မှုသည် သူလက်ရှိ လေ့ကျင့်နေသော အဝါရောင်အဆင့် ဓားသိုင်းများထက် အများကြီး သာလွန်သည်။

ဒီဓားသိုင်းက ရိုးရှင်းသော်လည်း နက်ရှိုင်းပြီး သိုင်းကွက် သုံးကွက်သာ ပါရှိသည်။

သို့သော် ယင်း၏ စွမ်းအားက အံ့မခန်းပင်။

ဓားချက်တိုင်းတွင် ပြိုင်ဘက်ကင်းသော ခွန်အားများ ပါရှိသည်။ ကိုယ်ပိုင်ခွန်အား ကြီးမားလေလေ၊ ဓားသိုင်း၏ စွမ်းအားက ပိုကြီးလေလေ ဖြစ်သည်။

သူ့မွေးရာပါ ဓားအမြုတေရှင် ခန္ဓာကိုယ်နှင့် ပေါင်းစပ်လိုက်လျှင် ကြောက်မက်ဖွယ်ကောင်းသော ဖျက်ဆီးအားကို ထုတ်ဖော်နိုင်မည်မှာ သေချာသည်။

အရေးကြီးဆုံးမှာ ဒီဓားသိုင်း၏ နောက်ဆုံးသိုင်းကွက်ဖြစ်သော " သေနာပတိ သံချပ်ကာချွတ်ခြင်း" သည် အားကောင်းသော ဓားငွေ့အင် အဖြစ် စုစည်းလာမည့် လက္ခဏာများ ပြသနေပြီ ဖြစ်သည်။

၎င်းသည် သာမန်ဓားသိုင်းကွက်များနှင့် ဓားငွေ့အင်များထက် များစွာ သာလွန်သော နည်းစနစ်တစ်ခုဖြစ်ပြီး လူများကို အင်အားသုံး၍ လွှမ်းမိုးဖိနှိပ်နိုင်သည်။ ၎င်းသည် ဓားအလိုဆန္ဒ ပြီးလျှင် ဒုတိယ အကောင်းဆုံးသိုင်းကွက်လည်း ဖြစ်ရာ ဓားကျင့်ကြံသူများကြားတွင် ပိုမို အားကောင်းပြီး ရှုပ်ထွေးနက်နဲသော နည်းစနစ်တစ်ခု ဖြစ်သည်။

"သေနာပတိ စစ်သည်တော်ဖြိုခွင်းခြင်း ကို တတ်မြောက်လိုက်တော့ ငါ့ဓားသိုင်းက ပိုတိုးတက်လာပြီ။ ယန်ဝူလို ပြိုင်ဘက်မျိုးနဲ့ ထပ်တွေ့ခဲ့ရင် ဓားချက်တစ်ချက်တည်းနဲ့ ဖိနှိပ်နိုင်လောက်ပြီပဲ။"

စုချန် အလွန် ဝမ်းသာသွားသည်။

ယခုအချိန်တွင် ဓားအမြုတေရှင် ခန္ဓာကိုယ်သည် သေနာပတိဓားမှ သတ်ဖြတ်လိုစိတ် စွမ်းအင် များကို အဆက်မပြတ် စုပ်ယူနေသဖြင့် သူ့ခန္ဓာကိုယ်ထဲရှိ ဓားငွေ့အင်များမှာလည်း အဆက်မပြတ် တိုးပွားနေသည်။

"အစ်ကိုကြီးက တကယ် အံ့သြဖို့ကောင်းတာပဲ။ ဒီ‌ သေနာပတိဓားက သေမျိုးလက်စွဲဓား သုံးဆင့်ထဲမှာတောင် ခက်ခဲနက်နဲတဲ့ ဓားအနည်းငယ်ထဲက တစ်လက်ပဲ။ သူ့ရဲ့ မကောင်းဆိုးဝါး စွမ်းအင်က အရမ်း ရက်စက်ကြမ်းကြုတ်တာ။ အစ်ကိုကြီးက ဘယ်လိုလုပ်ပြီး ယဉ်ပါးအောင် လုပ်လိုက်တာလဲ။"

အနီရောင်ဝတ် မိန်းကလေးငယ်၏ အသံက နေရာတိုင်းတွင် ရှိနေသကဲ့သို့ သူ့နားထဲတွင် ပြန်လည် ကြားလိုက်ရသည်။

စုချန် တဖြည်းဖြည်းနှင့် ကျင့်သားရလာပြီ ဖြစ်သည်။

နေ့ဘက်ဖြစ်နေသရွေ့ ထို‌ ကလေးမလေး ကိုယ်ထင်မပြနိုင်၊ အများဆုံး စကားဖြင့်သာ နှောင့်ယှက်နိုင်သည်။

ထို့ကြောင့် သူ မကြောက်တော့ပေ။

တစ်ခါတစ်ရံ သူမနှင့် စကားစမြည်ပင် ပြောနိုင်သည်။

"ဒီ‌ သေနာပတိဓားရဲ့ မူလအစကို မင်းသိလား။"

"ဒါပေါ့၊ ဒီ ဓားသင်္ချိုင်းထဲက ဓားတိုင်းကို ငါ့လက်ဖဝါးလို စေ့စေ့စပ်စပ်ကို သိတာပေါ့၊ နင်တို့ ဓားသင်္ချိုင်းစောင့်တွေထက်တောင် ပိုသိသေးတယ်"

မိန်းကလေးငယ်က ဂုဏ်ယူစွာ ပြောလိုက်သည်။

သူမ ထိုသို့ ပြောခြင်းမှာ ပိုပြောခြင်း မဟုတ်ပေ။

ဘာပဲပြောပြော သူမက ဓားသင်္ချိုင်းထဲတွင် နှစ်ပေါင်းမရေတွက်နိုင်အောင် ပိတ်လှောင်ခံထားရသော ဓားဝိညာဉ်တစ်ပါးဖြစ်ပြီး အကြီးအကဲကျိုးထက်ပင် ပို၍ သက်တမ်းရင့်နိုင်သည်။

ဓားသင်္ချိုင်းတွင် ဓားပျံပေါင်း ၁၀၈,၀၀၀ ရှိသည်။ ဓားသင်္ချိုင်းစောင့်က ဓားတစ်လက်စီ၏ မူလအစနှင့် ဝိသေသလက္ခဏာများကို မသိနိုင်သော်လည်း သူမကမူ သေချာပေါက် သိသည်။

"ဒီဓားက မူလက ရှုတောင်ဂိုဏ်းသား ရှန်လုံ ပိုင်ဆိုင်ခဲ့တာ။ သူက အနောက်ပိုင်း ချူနိုင်ငံရဲ့ မင်းသားတစ်ပါး ဖြစ်ခဲ့ဖူးတယ်။ ဓားသိုင်း တတ်မြောက်ပြီးတဲ့နောက် သူ့တိုင်းပြည်ကို ပြန်ပြီး စစ်ချီခဲ့တယ်။ သူက ရန်သူ မြင်းစီးစစ်သည် သုံးထောင်ကို တစ်ယောက်တည်း အနိုင်ယူခဲ့ဖူးတယ်...။"

မိန်းကလေးငယ်က ညင်သာပြီး အသေးစိတ်ကျကျ ပုံပြင်ပမာ ပြောပြနေသည်။

စကားပြောနေရင်း ရုတ်တရက် လေသံပြောင်းသွားပြီး သူမက ပြောလိုက်သည်။ "အစ်ကိုကြီး၊ အစ်ကိုကြီးမှာ ထူးခြားတဲ့ စွမ်းရည်တွေ ရှိတာ ကျွန်မ သိပါတယ်။ ဒီ ဓားသင်္ချိုင်းရဲ့ မကောင်းဆိုးဝါး စွမ်းအင်တွေကို သုံးပြီး ကျင့်ကြံနိုင်ပုံရတယ်။ မကောင်းဆိုးဝါး စွမ်းအင် ပိုများလေ၊ အစ်ကိုကြီး အကျိုးကျေးဇူး ပိုရလေပဲ။ ဘာလို့ ကျွန်မရှိတဲ့ဓားကို လာမရှာတာလဲ။ ကျွန်မက ဒီ ဓားသင်္ချိုင်းထဲမှာ အကြမ်းကြုတ်ဆုံး ဓားဆိုတာ သေချာတယ်၊ အစ်ကိုကြီး ကောင်းကင်ဘုံအထိ ပျံသန်းနိုင်အောင် ကျွန်မ ကူညီပေးနိုင်တယ်။"

"ဟားဟား"

စုချန် ရယ်မောလိုက်ရုံသာ ပြုသည်။

ဒီဓားက ဘယ်လောက် ကြမ်းတမ်းသလဲဆိုတာ သူ သေချာပေါက် သိသည်။ ဒီလို ဉာဏ်ရည်ဉာဏ်သွေးမျိုး မွေးဖွားပေးနိုင်တဲ့ ဓားဝိညာဉ်ဆိုတာ သေချာပေါက် သာမာန်ဓားတစ်လက် မဟုတ်နိုင်။

ယင်းတွင် ပါဝင်သော မကောင်းဆိုးဝါး စွမ်းအင်သည် လုံးဝ စိတ်ကူး၍မရနိုင်လောက်အောင်ပင်။

သူ့ ဓားအမြုတေရှင် ခန္ဓာကိုယ်က ၎င်းကို လိုချင်တပ်မက်ကြောင်း ပြင်းပြင်းထန်ထန် ပြသနေသည်။

သို့သော် စုချန် မထိရဲပေ။

ထိုအဆင့်ရှိသော ဓားမျိုးကို ယခုအချိန်တွင် သူ ထိန်းချုပ်နိုင်မည် မဟုတ်။ ဓားက သန်မာပြီး လူက အားနည်းနေလျှင် လူက ဓားကို ထိန်းချုပ်နိုင်ဖို့ မဆိုထားနှင့်၊ဓား၏ ဝါးမြိုခြင်းကိုပင် ခံရနိုင်သည်။

"ငါက ကံနိမ့်တဲ့သူမို့လို့ မင်းရဲ့ ပြင်းထန်တဲ့ စွမ်းအားကို မခံနိုင်ပါဘူး။ တကယ်လို့ လောဘတက်မိရင် ငါ့အသက် အန္တရာယ်ရှိမှာ ကြောက်မိတယ်။"

စုချန် ခေါင်းခါလိုက်သော်လည်း တိကျပြတ်သားသည့် အဖြေကို ပေးမထားဘဲ စကားစ ချန်ကာ အခွင့်အရေး ချန်ထားလိုက်သည်။

ဓားဝိညာဉ်က ထိုနေရာမှ ထွက်ချင်လွန်း၍ သူ့ကို အဆက်မပြတ် မြှူဆွယ်နေကြောင်း သူ အာရုံခံမိသည်။

သူမကို အသုံးချလို့ ရနိုင်ကောင်းသည်။

ဘာပဲဖြစ်ဖြစ် ဓားသင်္ချိုင်းထဲတွင် ဓားများ အလွန်များပြားပြီး မည်သည့်ဓားက ပိုစွမ်းအားကြီးသည်ကို သူ မသိပေ။ တစ်လက်ချင်းစီ လိုက်လံ သန့်စင်နေလျှင် အချိန်အများကြီး ပေးရလိမ့်မည်။

ထို့ကြောင့် သူက ပြောလိုက်သည်။ "ဒါပေမဲ့ ကျွန်တော့် ကျင့်ကြံမှုအဆင့် အလုံအလောက် မြင့်လာရင်တော့ စမ်းကြည့်လို့ ရကောင်းပါရဲ့။ မင်းက ဓားပျံအားလုံးရဲ့ မူလအစနဲ့ ဝိသေသတွေကို သိနေမှတော့ ဘာလို့ ကျွန်တော့်ကို လမ်းညွှန်ပေးပြီး မြန်မြန် ကျင့်ကြံနိုင်အောင် မကူညီပေးတာလဲ။ ကျွန်တော် ကျင့်ကြံမှု အောင်မြင်သွားရင် မင်းကို အပြင်ထုတ်ပေးပြီး နေရောင်ခြည် ပြန်မြင်ရအောင် လုပ်ပေးကောင်း လုပ်ပေးနိုင်တယ်"

ဒါက စိတ်ကူးယဉ် သက်သက်သာ။

ထိုစကားကို ကြားလိုက်ရသောအခါ အနီရောင်ဝတ် မိန်းကလေးငယ်က စုချန်မှာ ကောက်ကျစ်လှသည်ဟု စိတ်ထဲမှ ကျိန်ဆဲလိုက်သည်။

သို့သော် လောလောဆယ် သူမတွင် ပိုကောင်းသော ရွေးချယ်စရာ မရှိပေ။

ဓားသင်္ချိုင်းထဲက အဘိုးကြီးက သူမကို မကြိုက်သဖြင့် အပြင်ပေးမထွက်။ နှစ်တွေတစ်လျှောက် ဓားသင်္ချိုင်းစောင့်ခဲ့သော တပည့်များ အားလုံးကလည်း အသုံးမကျဘဲ သူမကို ရှိမှန်းပင် မသိကြ။

စုချန်ကသာ မျှော်လင့်ချက် အချို့ ပေးနိုင်ပုံရသည်။

သူ့ကို ဆုလာဘ် အနည်းငယ် အရင်ပေးပြီး သူ့တန်ဖိုးသူ သိအောင်လုပ်ကာ ဖြည်းဖြည်းချင်း လမ်းညွှန်တာ ပိုကောင်းလိမ့်မည်။

ထိုသို့ တွေးလိုက်ပြီး အနီရောင်ဝတ် မိန်းကလေးငယ်က ပြောလိုက်သည်။ "အစ်ကိုကြီးရဲ့ အင်အား အမြန်တိုးတက်လာအောင် သန့်စင်ဖို့ သင့်တော်တဲ့ ဓားပျံ တစ်လက်တော့ ရွေးပေးနိုင်ပါတယ်။ ဒါပေမဲ့ အစ်ကိုကြီး အခြေတည်အဆင့် ရောက်ပြီးရင် ဓားသင်္ချိုင်းကို လာပြီး ကျွန်မကို ရှာရမယ်၊ ပြီးရင် နေရောင်ခြည် ပြန်မြင်ရအောင် ဒီနေရာကနေ ခေါ်ထုတ်သွားပေးရမယ်။"

"မင်း တကယ် ကူညီချင်တယ်ဆိုရင် ငါ အကောင်းဆုံး ကြိုးစားပါ့မယ်။"

စုချန်က တိတိကျကျ အဖြေမပေးဘဲ ဝေ့လည်ကြောင်ပတ် လုပ်ထားလိုက်သည်။

အနီရောင်ဝတ် မိန်းကလေးငယ်က သူနဲ့ အပြိုင် မငြင်းခုံပေ။ ခဏမျှ စဉ်းစားပြီးနောက် သူမက ပြုံးစစဖြင့် ပြောလိုက်သည်။ "ရှေ့ဆက်သွားလိုက်၊ အဲဒီမှာ အစ်ကိုကြီးနဲ့ စွမ်းအင်အဆင့်ချင်း တူညီတဲ့ ဓားတစ်လက် ရှိတယ်၊ အစ်ကိုကြီး စမ်းကြည့်လို့ရတယ်"

စုချန် ခေါင်းညိတ်လိုက်သည်။

သူ့လက်ရှိ ကျင့်ကြံမှုအဆင့်အရ ဒုတိယအဆင့် သာမာန်ဓားအရှိန်အဝါကို အပြည့်အဝ ခံနိုင်ရည်ရှိသဖြင့် အလိမ်ခံရမည်ကို မကြောက်ပေ။

အနီရောင်ဝတ် မိန်းကလေးငယ်၏ လမ်းညွှန်မှုအတိုင်း သူသွားလိုက်ရာ တစ်လက်လုံး ဖြူဖွေးနေသော ဓားရှည်တစ်လက်ကို အမြန်ပင် တွေ့လိုက်ရသည်။

ဒီဓားက အသွင် ထူးခြားသည်၊ အရိုးဖြူများဖြင့် သွန်းလုပ်ထားပြီး မျက်နှာပြင်မှာ ကျောက်စိမ်းကဲ့သို့ ချောမွတ်ကာ အတွင်း၌ သွေး‌ကြောကဲ့သို့ အစင်းကြောင်းများ စီးဆင်းနေသဖြင့် အလွန် ထူးဆန်းအံ့သြဖွယ် ကောင်းနေသည်။

စုချန် လက်လှမ်းလိုက်ပြီး ဓားရိုးကို ထိလိုက်သည်။

မဆွဲထုတ်ရသေးခင်မှာပင် ပြင်းထန်သော မိစ္ဆာငွေ့အင်တစ်ခု တိုးထွက်လာသည်။

ယခင် ဓားငွေ့အင်များနှင့် မတူဘဲ ဤဓားပေါ်ရှိ အရှိန်အဝါက ပိုမို ရက်စက်ကြမ်းကြုတ်သည်။ သေဆုံးပြီးသော ဝိညာဉ်ပေါင်းများစွာက သူ့နားထဲတွင် အော်ဟစ်နေသကဲ့သို့ ဖြစ်နေသည်။ စုချန်သည် အဆုံးမရှိသော မိစ္ဆာစိတ်နှင့် အာဃာတ အရှိန်အဝါများ ဝန်းရံထားသည့် အောက်ခြေမရှိသော ချောက်နက်ထဲသို့ ကျသွားသကဲ့သို့ ခံစားလိုက်ရပြီး သူကျသွားရာ အောက်တွင်တော့ အရိုးဖြူများက ပြန့်ကျဲလို့နေသည်။

【ဓားအမည် : အရိုးဖြူ 】

【ဓားသခင် : မရှိ】

ဒါက သခင်တစ်ခါမှ မရှိဖူးတဲ့ သတ်ဖြတ်‌ရေးဓားတစ်လက်ပါလား။

အပိုင်း ၁၄

အခန်း (၁၄) - လူနှင့်ဓား အပြန်အလှန် ရွေးချယ်ကြခြင်း။

အရိုးဖြူများက မြေပြင်ထက်တွင် ပြန့်ကျဲနေပြီး၊ သေဆုံးသူများ၏ ဝိညာဉ်များသည် လမ်းပျောက်နေသကဲ့သို့ လွင့်မျောနေကြသည်။

အရိုးဖြူဓား တွင် ဓားပိုင်ရှင်သခင် တစ်ခါမှ မရှိခဲ့ဖူးသောကြောင့် စုချန်သည် ယင်းဓား၏ မှတ်ဉာဏ်ကို မခံစားနိုင်ပေ။ လွှမ်းမိုးနေသော မိစ္ဆာ စွမ်းအင်များကြားတွင် လမ်းပျောက်နေသော ဝိညာဉ်တစ်ကောင်ကဲ့သို့ လွင့်မျောနေရုံသာ တတ်နိုင်သည်။

မီးခိုးညိုရောင် တိမ်တိုက်များက သူ့ဘေးမှ ဖြတ်သန်းသွားသည်။

ထိုအရာများမှာ သေဆုံးသူများ ကျန်ရစ်ခဲ့သော အပိုင်းအစ မှတ်ဉာဏ်များပင် ဖြစ်သည်။

လှပပြီး အေးချမ်းသော ရွာကလေး တစ်ရွာကို သူမြင်လိုက်ရသည်။ သစ်ပင်ရိပ်အောက်တွင် အဘိုးအိုများ အနားယူနေကြပြီး၊ အမျိုးသားများက ပေါက်ပြားများကို ပခုံးပေါ်ထမ်းကာ လယ်တောမှ ပြန်လာနေကြသည်။ အမျိုးသမီးများက အရသာရှိသော အစားအသောက်များကို ပြင်ဆင်ပေးပြီး လက်ဆေးကာ ထမင်းစားရန် ပြောနေကြသည်...။

ရုတ်တရက် ကျယ်လောင်သော ပေါက်ကွဲသံကြီးက တိတ်ဆိတ်မှုကို ဖြိုခွင်းလိုက်ပြီး ရွာမြင်ကွင်းတစ်ခုလုံး မီးပင်လယ်ထဲ ရောက်သွားသည်။

အဘိုးအိုက မီးထဲတွင် ကွေးကွေးလေး ဖြစ်နေသည်၊ အမျိုးသား၏ ခေါင်းက လေထဲသို့ လွင့်စဉ်သွားသည်၊ အမျိုးသမီးက သွေးအိုင်ထဲတွင် လဲနေပြီး သူမ၏ မမွေးသေးသော ရင်သွေးလေးမှာ လှံတစ်ချောင်းဖြင့် ထိုးဖောက်ခံထားရသည်...။

ထိုအဖြစ်ဆိုး မှတ်ဉာဏ်များ၏ လွှမ်းမိုးမှုကြောင့် ဖြစ်မည်၊ စုချန် ရင်ထဲတွင် မီးတောက်တစ်ခု တငွေ့ငွေ့ လောင်ကျွမ်းလာသည်ကို ခံစားလိုက်ရသည်။

ဒေါသ!

သူ ခေါင်းမော့လိုက်ပြီး အလောင်းတောင်၊ သွေးပင်လယ်ကြီးကြားမှ အနက်ရောင်ဝတ် ကျင့်ကြံသူကို လှမ်းကြည့်လိုက်သည်။ သူ့မျက်လုံးများတွင် ဒေါသတကြီး သတ်ဖြတ်လိုစိတ်များ ပြည့်နှက်နေသည်။

သတ်ဖြတ်ခြင်းနှင့် သူ စိမ်းမနေပေ၊ ကျင့်ကြံခြင်းလောကတွင် အားကြီးသူက အသက်ရှင်ကျန်ရစ်မည်ဆိုသော သဘောတရားအတွက် သူအသင့်ပြင်ထားပြီး ဖြစ်သည်။

သို့သော် သာမာန် ရပ်ရွာသားများကို အစုလိုက်အပြုံလိုက် သတ်ဖြတ်ခြင်းကိုမူ သူ လက်ခံရန် ခက်ခဲလှသည်။

ယခုအချိန်တွင် အလောင်းတောင်နှင့် သွေးပင်လယ်များကြား၌ အရိုးဖြူများဖြင့် သွန်းလုပ်ထားသော ဓားကြီးတစ်လက် တဖြည်းဖြည်း ပုံပေါ်လာသည်။ လေထဲတွင် ရပ်နေသော အနက်ရောင်ဝတ် လူက သူရှိနေမှုကို အာရုံခံမိဟန်တူပြီး မထီမဲ့မြင် ပြုကာ လက်ညှိုးထိုးပြလိုက်သည်။

တစ်ခဏအတွင်း အဆုံးမရှိသော မိစ္ဆာ စွမ်းအင်များနှင့် အာဃာတ စိတ်များက သမုဒ္ဒရာလှိုင်းလုံးကြီးများကဲ့သို့ ထိုးတက်လာပြီး သူ့စိတ်ကို လွှမ်းမိုးဝါးမြိုရန် ခြိမ်းခြောက်လာသည်။

"သတ်!"

"သတ်ပစ်! သတ်! သတ်ပစ်လိုက်!"

"အကုန်သတ်ပစ်!"

သူ့ရင်ထဲတွင် မိစ္ဆာတစ်ကောင်က တိုးတိုးလေး ကပ်ပြောနေသကဲ့သို့ ခံစားရသည်။

စုချန် ဟစ်အော်လိုက်ပြီး ဓားကြီးကို တင်းတင်းကျပ်ကျပ် ဆုပ်ကိုင်ကာ လှိုင်းလုံးများကို ပိုင်းဖြတ်၍ ပြင်းထန်သော သတ်ဖြတ်လိုစိတ်ကို ထုတ်လွှတ်လိုက်သည်။ ထို့နောက် စိတ်ကူးယဉ် ကမ္ဘာထဲမှ အနက်ရောင်ဝတ် ပုံရိပ်ကို အဆက်မပြတ် တိုက်ခိုက်လေ‌တော့သည်။

သို့သော် သူတို့နှစ်ဦးမှာ မိုင်ထောင်ချီ ခြားနေသကဲ့သို့ ဖြစ်နေသည်။

နီးသလိုလိုနှင့် ဝေးနေသည်။

စုချန် မည်မျှပင် ကြိုးစား၍လိုက်လံ တိုက်ခိုက်ပါစေ၊ တဖက်လူကို တိုက်ခိုက်၍ မရပေ။ ထိုသို့ လုပ်နေစဉ်အတွင်း မိစ္ဆာ စွမ်းအင်များက ခြကောင်များကဲ့သို့ သူ့ခန္ဓာကိုယ်ထဲသို့ တရွရွ တိုးဝင်လာပြီး သူ့အသားနှင့် သွေးများကို ပုပ်သိုးစေကာ၊ ဝိညာဉ်ကို ဝါးမြိုပြီး အဆုံးမရှိသော ချောက်နက်ထဲသို့ ဆွဲချရန် ကြိုးစားနေသည်။

ထိုအချိန်တွင် စုချန် သူ့ခန္ဓာကိုယ်ထဲမှ တစ်စုံတစ်ခု လှုပ်ရှားသွားသည်ကို ခံစားလိုက်ရသည်။

ကြောက်မက်ဖွယ်ကောင်းသော ပုံရိပ်တစ်ခု သူ့ကျောဘက်မှ ထွက်ပေါ်လာပြီး စိတ်ကူးယဉ် ကမ္ဘာတစ်ခုလုံး လိမ်ဖယ်တုန်ခါသွားသကဲ့သို့ ဖြစ်သွားသည်။

တစ်ခဏအတွင်း ရှိသမျှ မကောင်းဆိုးဝါး ဝိညာဉ်များနှင့် တစ္ဆေများ အားလုံး ဖုန်မှုန့်အဖြစ် ကြေမွသွားသည်။

စုချန် ရုတ်တရက် လန့်နိုးလာသည်။

ထိုအခါမှ သူသည် ဓားထဲတွင် ရောက်နေခြင်းဖြစ်ပြီး၊ သူ့ရှေ့မှ အရာအားလုံးသည် ဓားထဲရှိ သတ်ဖြတ်လိုစိတ် အ‌ငွေ့အသက်ကြောင့် ဖြစ်ပေါ်လာသော စိတ်ကူးယဉ် ပုံရိပ်များသာ ဖြစ်ကြောင်း သတိရလိုက်သည်။

စောစောက လက်ခနဲ ပေါ်လာသော ကြောက်မက်ဖွယ် ပုံရိပ်မှာ ဘာမှန်း သူ မသိလိုက်၊ ၎င်းက သူ့ရင်ထဲ တစ်နေရာမှ ထွက်ပေါ်လာပုံရသည်။

မျက်စိတစ်မှိတ်အတွင်း မကောင်းဆိုးဝါး စွမ်းအင် အားလုံး ကြေမွသွားသည်။

ချက်ချင်းပင် ဓားအမြုတေရှင် ခန္ဓာကိုယ်က တုန်ခါသွားပြီး ခန္ဓာကိုယ်ထဲရှိ ရွှေရောင်ဓားလေးက ညည်းသံပြုလိုက်သည်။

သူ့ကိုယ်တွင်းတွင် တန်ထျန်း အတွင်းအားကြောက ကြီးမားသော မီးဖိုကြီးတစ်ခု ဖြစ်သွားသကဲ့သို့ မကောင်းဆိုးဝါး စွမ်းအင်ငယ်လေးများ အားလုံးကို စုပ်ယူလိုက်သည်။ ထို့နောက် ဝါးမြိုသန့်စင်ပြီး သူ့ကိုယ်ပိုင် မှော်စွမ်းအင်နှင့် ဓားငွေ့အင် အဖြစ် ပြောင်းလဲလိုက်သည်။

ဤသန့်စင်ခြင်း လုပ်ငန်းစဉ်သည် နေ့တစ်ဝက်တိတိ ကြာမြင့်ခဲ့သည်။

အရိုးဖြူဓားတွင် သခင်မရှိသဖြင့် စုချန်သည် ယင်းဓားမှ မည်သည့် ဂါထာ၊ ဓားသိုင်းကိုမျှ တွေ့မြင်သင်ယူရခြင်း မရှိပေ။ သို့သော် ယင်းတွင် ပါဝင်သော မကောင်းဆိုးဝါး ငွေ့အင်သည် ယခင်က သူသန့်စင်ခဲ့ဖူးသော ဓားပျံ အားလုံး ပေါင်းစပ်ထားသည်ထက် ပိုမို အားကောင်းသည်။

သာမာန်လူများအနေဖြင့် လုံးဝ ခုခံနိုင်စွမ်း မရှိပဲ တိုက်ခိုက်ခံရသည်နှင့် တပြိုင်နက် ယင်းက အတွင်းအားနှင့် သွေး‌ကြောကို ထိခိုက်စေနိုင်ပြီး စိတ်ဖောက်ပြန်ခြင်းမျိုးပင် ဖြစ်စေနိုင်သည်။

ကံကောင်းသည်မှာ သူသည် ဓားအမြုတေရှင် ခန္ဓာကိုယ်ကို ပိုင်ဆိုင်ထားသဖြင့် ဤကြီးမားသော ဓားအရှိန်အဝါကို နောက်ဆုံးတွင် သန့်စင်စုပ်ယူနိုင်ခဲ့ပြီး ကိုယ်ပိုင်အင်အားအဖြစ် ပြောင်းလဲနိုင်ခဲ့သည်။

ဝုန်း—

ကြီးမားသော မှော်စွမ်းအင်နှင့် ဓားငွေ့အင်များက သွေးကြောများနှင့် တန်ထျန်းအကြော တစ်လျှောက် ယန်ဇီမြစ်ကဲ့သို့ တဟုန်ထိုး စီးဆင်းသွားပြီး ဟိန်းသံကြီးပင် ထွက်ပေါ်လာသည်။

စုချန် မျက်လုံးဖွင့်လိုက်ရာ သူ့အရှိန်အဝါက ပိုမို နက်ရှိုင်းပြီး စူးရှလာသည်။

အရိုးဖြူဓားထဲမှ မကောင်းဆိုးဝါး စွမ်းအင်၏ အကူအညီဖြင့် သူ့ကျင့်ကြံမှု အဆင့်တက်သွားပြီး ချီသန့်စင်ခြင်း ဆဌမအဆင့်သို့ ရောက်ရှိသွားသည်။

ဤအချိန်တွင် သူသည် ချီသန့်စင်ခြင်း သတ္တမအဆင့်၏ အကန့်အသတ်သို့ပင် နီးကပ်သွားခဲ့သည်။

ဒီ အရိုးဖြူဓားထဲတွင် ပါဝင်သော သတ်ဖြတ်ခြင်း စွမ်းအားသည် သာမာန် ကျင့်ကြံသူတစ်ဦး နှစ်ဝက် သို့မဟုတ် တစ်နှစ်ခန့် ကြိုးကြိုးစားစား ကျင့်ကြံမှ ရရှိသော ရလဒ်နှင့် အနည်းဆုံး ညီမျှပေသည်။

"ကလစ်—"

မိစ္ဆာ စွမ်းအင် အများအပြား စုပ်ယူခံလိုက်ရသဖြင့် အရိုးဖြူဓား၏ မျက်နှာပြင်တွင် အက်ကြောင်းတစ်ခု ပေါ်လာသည်။

ဒီဓား ဒီလောက် ကြမ်းတမ်းနေရခြင်းမှာ ၎င်းအတွင်း၌ ကျန်ရှိနေသော မိစ္ဆာစွမ်းအင်များကြောင့်သာ ဖြစ်သည်။ ယခု စုချန်က ထိုစွမ်းအင် အားလုံးကို စုပ်ယူလိုက်ပြီ ဖြစ်ရာ ဓားသည် သာမန် အရိုးဓားတစ်လက် ဖြစ်သွားသည်။

ဒီလို ဓားဆိုးဓားယုတ်မျိုးက လောကကြီးမှာ လုံးဝ မရှိသင့်ဘူး။

"ဒီ အရိုးဖြူဓားက ယုံနိုင်စရာမရှိအောင် ကြမ်းတမ်းတာပဲ။ သခင်မရှိတာ မဆန်းပါဘူး။ ဒါက လူပေါင်းများစွာကို သတ်ဖြတ်ခဲ့တဲ့ ယုတ်မာတဲ့ ကျင့်ကြံသူတစ်ယောက် သွန်းလုပ်ခဲ့တဲ့ မိစ္ဆာလက်နက်ပဲ။ ဘာလို့များ ရှုတောင်ရဲ့ ဓားသင်္ချိုင်းမှာ မြှုပ်နှံထားရသလဲ မသိဘူး..."

စုချန် ခေါင်းခါလိုက်ပြီး လှည့်ကာ ဓားကို ကျောက်ကြားထဲ ပြန်ထိုးစိုက်လိုက်သည်။ ထို့နောက် ဓားသင်္ချိုင်း၏ နက်ရှိုင်းရာသို့ လှမ်းကြည့်ပြီး ရှုပ်ထွေးသော မျက်နှာထားဖြင့် ပြောလိုက်သည်။ "မင်း ငါ့ကို ဓားကောင်းတစ်လက် ရှာပေးတာပဲ၊ ကောင်းလွန်းလို့ ငါသေလုနီးပါး ဖြစ်သွားတယ်...။"

"ဟီးဟီး၊ အခု အစ်ကိုကြီး ဘေးကင်းကင်းနဲ့ ကျန်းမာနေတယ် မဟုတ်လား။ စိတ်မပူပါနဲ့ အစ်ကိုကြီးရယ်၊ ကျွန်မကို အပြင်ခေါ်ထုတ်သွားဖို့ အစ်ကိုကြီးကို လိုသေးတယ်လေ။ ကျွန်မ အစ်ကိုကြီးကို သေအောင် မလုပ်ပါဘူး။"

အနီရောင်ဝတ် မိန်းကလေးငယ်က ပြုံးစစဖြင့် ပြောလိုက်သည်။

"ဒါပေမဲ့ အစ်ကိုကြီးက ကျွန်မထင်ထားတာထက် ပိုအံ့သြဖို့ကောင်းတယ်။ အဲဒီ အရိုးဓားထဲက မကောင်းဆိုးဝါး စွမ်းအင်ကို အခြေတည်အဆင့် ကျင့်ကြံသူတွေတောင် မထိရဲကြဘူး။ အစ်ကိုကြီးက အကုန်သန့်စင်ပစ်လိုက်ပြီး မှော်စွမ်းအင်တောင် အများကြီး တိုးလာသေးတယ်။ အစ်ကိုကြီးရဲ့ ခန္ဓာကိုယ်က တော်တော် ထူးခြားပုံရတယ်..။."

"ဒါ မင်းကိစ္စ မဟုတ်ဘူး။"

စုချန်ကတော့ ဝန်ခံမည် မဟုတ်ပေ။

တကယ်တမ်းတွင် သူကိုယ်တိုင်ပင် အနည်းငယ် သံသယ ဝင်နေမိသည်။

သူသည် ဓားအမြုတေရှင် ခန္ဓာကိုယ်ကြောင့် ဓားငွေ့အင် အားလုံးကို စုပ်ယူနိုင်ခဲ့သည် ဆိုသော်လည်း၊ စောစောက လက်ခနဲ ပေါ်လာသော ကြောက်မက်ဖွယ် ပုံရိပ်မှာ ဓားအမြုတေမှ ဖြစ်ပေါ်လာခြင်း မဟုတ်ကြောင်း သူသိနေသည်။ ၎င်းသည် သူ့သွေးကြောနှင့် စိတ်ဝိညာဉ် ဟိုးအနက်ထဲမှ ပေါ်ထွက်လာသော ဗီဇစိတ်နှင့် ပိုတူသည်။

ထိုအရာ ပေါက်ကွဲထွက်ပေါ်လာချိန်တွင် ၎င်း၏ စွမ်းအားမှာ ကြောက်ခမန်းလိလိ ဖြစ်ပြီး ဓားအမြုတေရှင် ခန္ဓာကိုယ် ပိုင်ရှင်ကိုပင် ခြိမ်းခြောက်နိုင်စွမ်း ရှိသည်။

အဲဒီ အင်အားက ဘာလဲ?

ငါ့ရဲ့ ခန္ဓာကိုယ် ပါရမီက အပေါ်ယံ မြင်ရသလို ဓားအမြုတေရှင် သက်သက် မဟုတ်တာများလား?

ဒါက ငါ့နောက်ကြောင်း ရာဇဝင်နဲ့၊ နှစ်ပေါင်းများစွာ ပျောက်ဆုံးနေတဲ့ ငါ့မိဘတွေနဲ့များ သက်ဆိုင်နေမလား?

စုချန် စိတ်ထဲတွင် မေးခွန်းပေါင်းများစွာ ပေါ်လာသည်။

ကံမကောင်းသည်မှာ သူ့လက်ရှိ ကျင့်ကြံမှုအဆင့်က အကန့်အသတ် ရှိနေပြီး၊ ထိုအရာကို အာရုံခံနိုင်စွမ်း မရှိပေ။ တဒင်္ဂ တုန်ခါမှုသည် ဘယ်တုန်းကမှ မဖြစ်ပျက်ခဲ့ဖူးသကဲ့သို့ လျင်မြန်စွာ ငြိမ်သက်သွားသည်။

"အဲဒီ စွမ်းအားက ဖိနှိပ်ခံထားရပုံပဲ၊ ငါ အန္တရာယ်ရှိမှသာ အသက်ဝင်လာတာ။ ဘာပဲဖြစ်ဖြစ် လောလောဆယ်တော့ ငါ့ကို အန္တရာယ်ပေးပုံ မရပါဘူး။"

ထိုသို့ တွေးလိုက်ပြီး စုချန် စိတ်သက်သာရာ ရသွားသည်။

နားမလည်ရင်လည်း လောလောဆယ် လျစ်လျူရှုထားလိုက်တာပဲ ကောင်းပါတယ်။

သို့သော် ဤအနီရောင်ဝတ် ဓားဝိညာဉ်က လှည့်စားခဲ့သဖြင့် စုချန် မကျေမနပ် ဖြစ်မိသည်။

"မင်း လှည့်စားတယ်။ မင်း ငါ့ကို ရွေးပေးတဲ့ ဓားကြောင့် ငါ သေလုနီးပါး ဖြစ်သွားတယ်။ မင်းမှာ ရိုးသားမှု မရှိမှတော့ ငါတို့ ပူးပေါင်းတာကို ဒီမှာပဲ ရပ်လိုက်ကြစို့။"

ထိုသို့ ပြောပြီး သူက ထွက်သွားရန် လှည့်လိုက်သည်။

အနီရောင်ဝတ် မိန်းကလေးငယ် ထိတ်လန့်သွားပြီး အလျင်အမြန် ရှင်းပြလေသည်။ "မဟုတ်ဘူး၊ ကျွန်မ ဝန်ခံပါတယ်၊ အရိုးဖြူဓားနဲ့ အစ်ကိုကြီးကို စမ်းသပ်ချင်ခဲ့တာပါ။ ဘာပဲဖြစ်ဖြစ် ကျွန်မတို့ ပူးပေါင်းမယ်ဆိုရင်၊ အစ်ကိုကြီးက ကျွန်မကို အပြင်ထုတ်ပေးနိုင်တဲ့ အရည်အချင်း ရှိမရှိ ကျွန်မ ကြည့်ရမယ်လေ၊ ဟုတ်တယ်မလား? အန္တရာယ် ဘယ်လောက်ရှိလဲ ဆိုတာကို ကျွန်မ ကြည့်နေရုံပါ၊ တကယ်လို့ အစ်ကိုကြီး တကယ် အန္တရာယ် ကြုံလာရင် ကျွန်မ ကူညီမှာပါ...။"

ငါ့ကို ငတုံးများ ထင်နေလား?

စုချန် စိတ်ထဲမှ လှောင်ပြောင်လိုက်သည်။

အကယ်၍ အရိုးဖြူဓား၏ မိစ္ဆာ စွမ်းအင်ကိုပင် မခံနိုင်လျှင် သူသည် ဓားဝိညာဉ်ကို ထိန်းချုပ်ရန် အရည်အချင်း မရှိသူ ဖြစ်ပြီး၊ သူမအတွက် အထူးတလည် ကယ်ပေးစရာ ဘာတန်ဖိုးမှ ရှိမည် မဟုတ်ပေ။

ဒါတောင် သူမက သူ့ကို ကယ်တင်မယ်တဲ့လား? ဘယ်လိုလုပ်ပြီး ကယ်မှာလဲ?

အနီရောင်ဝတ် မိန်းကလေးငယ်က သူ့ကို လှည့်စား၍ မရကြောင်း သိပုံရသည်။ ခဏတာ တိတ်ဆိတ်သွားပြီးနောက် သူမအသံက ပိုမို လေးနက်လာသည်။

"ကောင်းပြီ၊ ကျွန်မ တောင်းပန်ပါတယ်။ အစတုန်းက ကျွန်မ တကယ်ပဲ စမ်းသပ်ချင်ခဲ့တာပါ၊ ဒါပေမဲ့ အစ်ကိုကြီး အခု အောင်မြင်သွားပြီလေ၊ မဟုတ်ဘူးလား? အခု ကျွန်မ တကယ် ပူးပေါင်းချင်ပါတယ်။ ကျွန်မ ဒီ ဓားသင်္ချိုင်းမှာ နေရတာ ကြာလှပြီ၊ အခု အစ်ကိုကြီး တစ်ယောက်ပဲ ကျွန်မကို ဒီကနေ ခေါ်ထုတ်သွားနိုင်မယ့် မျှော်လင့်ချက် ရှိတာ။ ကျွန်မ အစ်ကိုကြီးကို ထပ်ပြီး ဒုက္ခပေးစရာ အကြောင်း မရှိတော့ပါဘူး!"

"ဒါပေမဲ့ မင်းကတော့ ငါ့စမ်းသပ်မှုကို မအောင်မြင်သေးဘူး။"

စုချန် ခေါင်းခါလိုက်သည်။ ဓားက သုံးစွဲသူကို ရွေးချယ်သလို၊ သုံးစွဲသူကလည်း ဓားကို ရွေးချယ်ရသည်။

အနည်းဆုံးတော့ လောလောဆယ် သူသည် ဓားဝိညာဉ်ကို မယုံရဲတော့သလို၊ သူမနှင့်လည်း မပတ်သက်ချင်တော့ပေ။

အရိုးဖြူဓားကို သန့်စင်ရာမှ အကျိုးကျေးဇူး များစွာ ရရှိခဲ့သော်လည်း ၎င်းက သူ့ခန္ဓာကိုယ်ကို အတော်လေး ဝန်ပိစေခဲ့ရာ သူမနှင့် စကားဆက်မပြောတော့ဘဲ သူ့အခန်းသို့ ကျင့်ကြံရန် ထပြန်လာခဲ့သည်။

နှစ်ရက်အကြာ ဆေးသောက်ပြီး အသက်ရှူခြင်းကို ထိန်းညှိပြီးနောက်တွင် စုချန်သည် အရိုးဖြူဓား၏ မိစ္ဆာစွမ်းအင်ကို အပြည့်အဝ ချေဖျက်နိုင်ခဲ့ပြီး ကိုယ်ပိုင်အတွင်းအားကို ခိုင်မာအောင် လုပ်နိုင်ခဲ့သည်။

လွန်ခဲ့သော နှစ်ရက်အတွင်း သူဝယ်ထားသော ရွှမ်ဟွမ်ဆေးလုံးများလည်း ကုန်သွားပြီ ဖြစ်သည်။

ကံကောင်းသည်မှာ ဒီရက်ပိုင်းအတွင်း လူအများအပြား သူ့ကို ဓားချင်းယှဉ်ပြိုင်ရန် စိန်ခေါ်လာကြသဖြင့် ဝိညာဉ်ကျောက်တုံး အများအပြား ရရှိထားသည်။ ဂိုဏ်းဈေးတန်းသို့ သွားပြီး ရွှမ်ဟွမ်ဆေးလုံးများ ထပ်ဝယ်နိုင်သည်။ သူ အရင်တစ်ခေါက်က လိုချင်နေသော ခန္ဓာကိုယ်ကြံ့ခိုင်ဆေး ကိုလည်း ဓားသိုင်းကျင့်ကြံနည်း နှင့် တွဲဖက်သုံးရန် ဝယ်ယူဖို့ ကြိုးစားနိုင်သည်။

စုချန် ဓားသင်္ချိုင်းမှ ထွက်သွားသည်နှင့် တပြိုင်နက် တိတ်တဆိတ် စောင့်ကြည့်နေသော အစေခံ ဂိုဏ်းသားတစ်ဦးက သတင်းသွားပို့လေတော့သည်။