အခန်း (၁၄၇-၁၄၈)

အခန်း။ ၁၄၇

ကံဆိုးစွာဖြင့်ပင်... ရွှီရန်တွင်လည်း စိတ်ကူးစိတ်သန်းအခြေခံနတ်ဘုရားအတတ်တစ်ခု ရှိနေခဲ့သည်။

သူ့တွင် စူပါ ပေါက်ကွဲအားပြင်း ဓားချက်ရှိနေသောကြောင့်ပင် သူသည် ယုံကြည်မှုကို အထူးအလေးထားခဲ့ခြင်းဖြစ်သည်။ ထို အဆင့်မြင့် အာရုံချောက်ခြားမှု အတတ်က သူ၏ယုံကြည်မှုကို ဖျက်ဆီးရန် ကြိုးပမ်းလာသောအခါ တစ်ခုခုလွဲချော်နေပြီဖြစ်ကြောင်း သူက အကဲခတ်မိသွားခြင်းပင်။

“ဒါက တကယ့်ကို... တိုက်ဆိုင်လွန်းတာပဲ...”

လွန်ခဲ့သော ငါးရက်ခန့်ကမှ သူသည် စိတ်ကူးစိတ်သန်းအခြေခံ ဓားသိုင်းကို စတင်လေ့ကျင့်ခဲ့ပြီး ယနေ့တွင် ထိုစွမ်းအားမျိုးသုံးသည့် ပြိုင်ဘက်နှင့် တိုးနေရသည်မှာ... ရန်သူက သူ၏ဓားဖျားဆီသို့ အလိုလို တိုးဝင်လာသကဲ့သို့ပင်။

ဤသည်ကို တွေးမိရင်း ရွှီရန်သည် အေးစက်စွာ ပြုံးလိုက်ပြီး ကြောက်ရွံ့မှု သန့်စင်ခြင်းကို ပေါ့ပေါ့ပါးပါးပင် အစပျိုးလိုက်သည်။

ကြောက်ရွံ့မှုသန့်စင်ခြင်းသည် မကောင်းသော စိတ်ခံစားချက်များကို သန့်စင်ပေးရုံသာမကဘဲ ပတ်ဝန်းကျင်ရှိ ကျင့်ကြံသူအားလုံး၏ စိတ်ထဲသို့ ခိုင်မာသော ယုံကြည်ချက်တစ်ခုကိုပါ ချက်ချင်း ရောက်ရှိစေခဲ့သည်။

“ဒါက အာရုံချောက်ခြားမှု အတတ်ပဲ ဒါက အာရုံလှည့်စားမှု သက်သက်ပဲ”

“ဒါကို ကြောက်နေစရာ မလိုဘူး။ အာရုံချောက်ခြားမှုအတတ်သာ မရှိရင် ဒီနောက်ကွယ်က ကောင်က ဘာမှမဟုတ်တော့ဘူး”

ကျင့်ကြံသူများသည် တိုးတိုးလေး ရေရွတ်လိုက်ကြသည်။ ဤကဲ့သို့သော ယုံကြည်မှုမျိုးသည် အဆင့်မြင့် အာရုံချောက်ခြားမှု အတတ် အတွက်မူ အပြင်းထန်ဆုံးသော အဆိပ်ရည်ပင်။

၎င်းသည် ရွှီရန်၏ ဓားချက်ဖြင့် အပိုင်းပိုင်း ခုတ်ထစ်ခံထားရပြီးပြီ ဖြစ်ရာ ယခု ထိုယုံကြည်မှုစွမ်းအား၏ ရိုက်ခတ်မှုကိုပါ တိုက်ရိုက် ခံလိုက်ရသောအခါ...

၎င်းသည် ပထမဆုံး ဒိုမီနိုပြားလေး လဲကျသွားသကဲ့သို့ပင်။

ပထမတစ်ခု လဲကျသွားပြီးနောက် ဒုတိယတစ်ခု၊ တတိယတစ်ခု၊ စတုတ္ထတစ်ခု... ကလစ်၊ ကလစ်နှင့် ဆက်တိုက် လဲကျသွားသည့် ဒိုမီနိုများအလားပင်။

ထို အဆင့်မြင့် အာရုံချောက်ခြားမှု အတတ်ကြီးမှာ ကြွပ်ဆတ်သော ဖန်ပုတီးစေ့လေးပမာ တစ်ခဏချင်းအတွင်း အစိတ်စိတ်အမြွှာမြွှာ ကြေမွပျက်စီးသွားတော့သည်။

မြေပြင်ပေါ်သို့ လဲကျနေခဲ့ကြသော လူသားကျင့်ကြံသူများသည် တစ်ဦးပြီးတစ်ဦး ပြန်လည်နိုးထလာကြပြီး သူတို့ လဲကျနေသည့် နေရာများမှ ပြန်လည်ထရပ်လိုက်ကြသည်။

တတိယ ကာကွယ်ရေးတန်း...

ဒုတိယ ကာကွယ်ရေးတန်း...

ပထမ ကာကွယ်ရေးတန်း...

လူသားကျင့်ကြံသူ အားလုံးသည် သူတို့၏ မျက်လုံးများကို ဖွင့်ကြည့်လိုက်ကြပြီး ပတ်ဝန်းကျင်ရှိ ဦးခေါင်းများ သွေးမြူတိမ်အဖြစ် ပေါက်ကွဲနေသည့် သလင်းကျောက်သားရဲများကို ကြည့်ကာ ကျောချမ်းသွားကြတော့သည်။

“ဒါ... ဒါက...”

“ဒါက...”

မျက်လုံးများ နီမြန်းနေသော စစ်သည်တစ်ဦးက “တပ်မှူး... ခင်ဗျားခေါင်းက ရှိနေသေးတာပဲ ပေါက်ကွဲမသွားဘူး” ဟု ပြောလိုက်သည်။

ဤစကားမှာ အချိန်အခါနှင့် မဆီလျော်သလို ဖြစ်နေသော်လည်း...

ယခုအခိုက်အတန့်တွင် တပ်မှူးဖြစ်သူသည် ကြီးမားသော ဘေးဒုက္ခမှ ကံကောင်းထောက်မစွာ လွတ်မြောက်လာသူပမာ ရယ်မောလိုက်ပြီး “မင်းခေါင်းလည်း ရှိနေသေးတာပဲ စစ်သည်အားလုံးရဲ့ ဦးခေါင်းတွေ ရှိနေသေးတယ်”

စစ်သေနာပတိချုပ်: “ဒါဆို ငါတို့အားလုံး တစ်ချိန်တည်းမှာ စုပေါင်းအာရုံချောက်ခြားမှု နယ်ပယ်ထဲကို ဆွဲသွင်းခံလိုက်ရတာပေါ့”

“တကယ့်ကို လက်တွေ့ဆန်လွန်းတယ်။ ကြောက်စရာကောင်းတဲ့ အာရုံချောက်ခြားမှုအတတ်ပဲ... အသက်ရှူကျပ်လုနီးပါး ဖြစ်ခဲ့ရပြီး ငါ လုံးဝ ရုန်းမထွက်နိုင်ဘဲ ရှုံးနိမ့်သွားခဲ့တာ...”

ပထမကာကွယ်ရေးတန်းမှ စွမ်းအားရှင်များသည် တစ်ဦးပြီးတစ်ဦး နောက်သို့ ဆုတ်ခွာလာကြသည်။

တတိယကာကွယ်ရေးတန်းတွင်မူ ရွှီရန်ကို ဝန်းရံထားသော မီးငရဲတပ်ဖွဲ့ နှင့် ဝိညာဉ်သန့်စင်ရေးတပ်ဖွဲ့ မှ အသင်းဖော်များသည် ကောင်းကင်ယံသို့ ခုန်တက်ကာ တိုက်ပွဲဝင်ရန် ပြင်ဆင်လိုက်ကြပြီး အဝေးတစ်နေရာသို့ လှမ်းကြည့်လိုက်ကြသည်။

လျိုယန်က “ခုနက အဆင့်မြင့် အာရုံချောက်ခြားမှု နယ်ပယ်တစ်ခု ဖြစ်သွားတာ။ မင်းတို့အားလုံးရဲ့ ဦးခေါင်းတွေ တစ်ခဏချင်းအတွင်း သွေးမြူတိမ်တွေအဖြစ် ပေါက်ကွဲသွားတာကို ငါ မြင်လိုက်ရတယ်။ အဲဒီနောက် တခြားကျင့်ကြံသူတွေနဲ့ ဟိုသလင်းကျောက်သားရဲတွေလည်း အဲဒီအချိန်မှာပဲ တူညီတဲ့ ကံကြမ္မာကို ကြုံခဲ့ရတာ”

သူသည် သူရရှိထားသော သတင်းအချက်အလက်များကို သူ၏ အသင်းဖော်များနှင့် လျင်မြန်စွာ မျှဝေလိုက်သည်။

ရှောင်ရွှယ်: "ငါလည်း အတူတူပဲ ငါကလွဲလို့ စစ်မြေပြင်က သက်ရှိအားလုံးရဲ့ ဦးခေါင်းတွေ သွေးမြူတိမ်တွေအဖြစ် ပေါက်ကွဲသွားတာကို မြင်ခဲ့ရတာ"

အားဟောင်: "ငါမြင်ရတဲ့ မြင်ကွင်းကလည်း မင်းတို့နဲ့ ဆင်တူတယ်။ ငါတို့တွေ အလွန်ကြီးမားတဲ့ စူပါ အာရုံချောက်ခြားမှုတစ်ခုထဲကို ဆွဲသွင်းခံလိုက်ရတာ ထင်ရှားတယ်။ ဒါပေမဲ့ ကြည့်လိုက်ဦး... စစ်မြေပြင်က သလင်းကျောက်သားရဲတွေကတော့ ငါတို့နဲ့ မတူဘူး။ ငါတို့က အာရုံနယ်ပယ်ကနေ အသက်ရှင်လျက် လွတ်မြောက်လာပေမဲ့ သူတို့တွေကတော့ အကုန်သေကုန်ပြီ။ ယွဲ့ကျင့်စဉ်နယ်ပယ်က သလင်းကျောက်သားရဲတွေတောင် ခေါင်းတွေပေါက်ထွက်ပြီး သေကုန်ကြပြီ"

ရှောင်ရွှယ်: "ဘာတွေဖြစ်သွားတာလဲ ငါတို့ လူသားဘက်တော်သားထဲက တစ်ယောက်ယောက်က ဒီ စူပါ အာရုံချောက်ခြားမှုကို ဖြိုခွဲလိုက်တာလား"

လင်းဖုန်း: "တစ်ယောက်ယောက်က ဖြိုခွဲလိုက်တာ သေချာတယ်။ အကယ်၍သာ အဲဒါကို မဖြိုခွဲနိုင်ခဲ့ရင် ငါတို့လူသားစစ်မြေပြင်က ထောင်နဲ့ချီတဲ့ အထူးတပ်ဖွဲ့ဝင်တွေဟာလည်း မြေပြင်ပေါ်က သလင်းကျောက်သားရဲတွေလိုပဲ ဦးခေါင်းတွေ ပေါက်ကွဲပြီး သေဆုံးသွားကြလိမ့်မယ်"

အဖွဲ့ဝင်အားလုံး အသက်ကို ပြင်းပြင်းရှူသွင်းလျက် တုန်လှုပ်သွားကြသည်။

"ဘယ်သူက ဒီအာရုံချောက်ခြားမှုအတတ်ကို ဖြိုခွဲလိုက်တာလဲ အစ်ကိုဖုန်း... ခင်ဗျားလား ခင်ဗျားက ကျိုးကြောင်းဆင်ခြင်ရာမှာ တော်တာပဲ"

လင်းဖုန်းက ခေါင်းခါပြလိုက်ပြီး "ငါမဟုတ်ဘူး၊ ငါကိုယ်တိုင်လည်း ထောင်ချောက်ထဲ မိနေခဲ့တာ"

ရှောင်ရွှယ်: "ငါလည်း ထောင်ချောက်ထဲ မိနေခဲ့တယ်"

လျိုယန် က ရှက်ကိုးရှက်ကန်းဖြင့် "ငါလည်း အတူတူပဲ..."

အခြားအဖွဲ့ဝင်များ "ငါရောပဲ..."

ထိုစဉ် ယဲ့ဖျင်က ရုတ်တရက် ထူးဆန်းသော ခံစားချက်တစ်ခုနှင့်အတူ ရေရွတ်လိုက်သည်။

"ရွှီရန် ဖြစ်ဖို့ ရာခိုင်နှုန်း တော်တော်များတယ်နော်"

အင်း...

အားလုံး၏ စိတ်ထဲတွင် တစ်စုံတစ်ခုကို ခံစားလိုက်ရသော်လည်း အရေးကြီးသော အခိုက်အတန့်ဖြစ်နေသဖြင့် ရွှီရန်ရှိရာဘက်သို့ လှည့်မကြည့်မိအောင် ထိန်းထားကြသည်။

လင်းဖုန်း: "ဖြစ်နိုင်တယ်။ ဒါပေမဲ့ အခုက မေးခွန်းထုတ်နေရမယ့် အချိန်မဟုတ်ဘူး။ ဘေးကင်းဇုန် အပြင်ဘက်မှာ ငါတို့ကို စောင့်ကြည့်နေတဲ့ နတ်ဘုရားအဆင့် သလင်းကျောက်သားရဲတစ်ကောင် ရှိနေတယ်။ သူ့ရဲ့ အကြည့်ကို ငါခံစားနေရတယ်။ ငါတို့တွေ စစ်သည်တော်တွေ ဆုတ်ခွာနိုင်အောင် အမြန်ဆုံး အကာအကွယ်ပေးရမယ်"

"ရွှီရန်... မင်းလည်း ဘေးကင်းဇုန်ထဲကို မြန်မြန်ဆုတ်ခွာတော့"

လျိုယန်: "အဲဒီကောင်လေးက တကယ့်ကို အမြဲသတိရှိပြီး ဝေးဝေးရှောင်တတ်တဲ့ကောင်ပဲ။ သူကတော့ ကြိုပြီး လစ်ထွက်သွားပြီ"

လင်းဖုန်း: "ကောင်းပြီလေ... ဒါက တကယ်လည်း သူ့ရဲ့ ပင်ကိုယ်ဗီဇပဲဟာ..."

နတ်ဘုရားသတ်တပ်ဖွဲ့နှစ်ဖွဲ့သည် ကောင်းကင်ယံ၌ ပျံဝဲနေကြပြီး သူတို့၏ အောက်တွင်မူ လူသားစစ်သည်တော်များသည် အသိုက်ပြန်သည့် ငှက်များပမာ ဘေးကင်းဇုန်အတွင်းသို့ လျင်မြန်စွာ ဆုတ်ခွာနေကြသည်။

ပျက်စီးယိုယွင်းနေသော စစ်မြေပြင်ထက်တွင် အာရုံချောက်ခြားမှုအတတ်ကြီး ပျက်ပြားသွားချိန်ကတည်းက ဟိန်းဟောက်နေခဲ့သော ဆုတ်ခွာခြင်းခေါင်းလောင်းသံသည် လူသားစစ်သည်အားလုံး ဘေးကင်းဇုန်အတွင်းသို့ လုံခြုံစွာ ရောက်ရှိသွားချိန်မှသာ ရပ်တန့်သွားတော့သည်။

မီးငရဲတပ်ဖွဲ့ နှင့် ဝိညာဉ်သန့်စင်ရေးတပ်ဖွဲ့ တို့သည်လည်း သက်ပြင်းတစ်ချက်ကို အသာအယာ ချလိုက်ကြပြီး ဘေးကင်းဇုန်အတွင်းသို့ ပြန်လည် ဆင်းသက်လာကြသည်။

လျိုယန်: "သူတို့ ငါတို့ကို တိုက်ခိုက်မလာဘူးပဲ... ပြင်းထန်တဲ့ တိုက်ပွဲတစ်ခု ဖြစ်လာတော့မယ်လို့ ငါထင်ထားတာ"

ယဲ့ဖျင်က ခပ်ဖျော့ဖျော့ ပြုံးလိုက်ပြီး "တစ်ခုခုကို စိုးရိမ်နေလို့ ဖြစ်မှာပါ... ဘယ်လိုပဲဖြစ်ဖြစ် ငါတို့တွေက ထူးဆန်းလှတဲ့ ကောင်းကင်ဘုံက ပေးသနားတဲ့ နတ်ဘုရားအတတ် တစ်ခုကို ဖြိုခွဲလိုက်နိုင်တာပဲလေ"

လင်းဖုန်း: "ဖြစ်နိုင်ပါတယ်။ ဒါပေမဲ့ အဲဒီစောင့်ကြည့်နေတဲ့ အကြည့်ကတော့ တကယ့်ကို အန္တရာယ်ရှိတာ အမှန်ပဲ"

နှစ်ကီလိုမီတာခန့် အကွာအဝေးတွင် ထူးဆန်းသော သွေးနီရောင်မျက်ဝန်းတစ်စုံသည် ဆုတ်ခွာသွားသော လူသားစစ်သည်တော်များကို စူးစိုက်ကြည့်နေသည်။

“မင်းရဲ့ နတ်ဘုရားဘိသိက်မင်္ဂလာက တကယ်ပဲ ကျရှုံးသွားတာလား။ ဒီလောက်အထိ ထူးဆန်းပြီး အနှိုင်းမဲ့တဲ့ အထွဋ်အထိပ် နတ်ဘုရားအတတ်ကို ငါကိုယ်တိုင်တောင် ဘယ်လိုရုန်းထွက်ရမလဲ မသိခဲ့တာကို... အဲဒါကြီးက ကျရှုံးသွားတယ်တဲ့လား ဒါက ဘယ်လိုလုပ် ဖြစ်နိုင်မှာလဲ”

ကန္တာရ ကောင်းကင်ဘုံ ဘေးဒုက္ခမှာ အလွန်အမင်း အံ့အားသင့်နေမိသည်။

ထိုကြောက်မက်ဖွယ်ကောင်းသော နတ်ဘုရားဘိသိက်မင်္ဂလာ ကျရောက်လာစဉ်က ၎င်းကိုယ်တိုင်ပင် ခေတ္တမျှ ထိတ်လန့်သွားခဲ့ပြီး သေဘေးအန္တရာယ်ကို ခံစားခဲ့ရသည်။ စုန်းအကြီးအကဲချုပ်၏ ဤတိုက်ကွက်သည် အောင်မြင်မှုရရန် သေချာပေါက်ဖြစ်သည်ဟုပင် ၎င်းက ထင်မှတ်ထားခဲ့ခြင်း ဖြစ်သည်။

ကျရှုံးနိုင်မည့် မည်သည့်အခွင့်အရေးကိုမျှ မတွေ့မြင်ခဲ့ရချေ။

ခုခံ၍မရသော ကြောက်မက်ဖွယ်မြင်ကွင်းများနှင့်အတူ ထူးဆန်းလှသော စိတ်ဝိညာဉ်ဆိုင်ရာ ရိုက်ခတ်မှုများ ဆက်တိုက်ကျရောက်လာလျှင် နတ်ဘုရားများပင် နာကြည်းစွာ ကျဆုံးသွားနိုင်သည်။

ဒါဆို ဒီလူသားကျင့်ကြံသူတွေက ဒီသေစေနိုင်တဲ့ ကပ်ဘေးကြီးကနေ ဘယ်လိုမျိုး လွတ်မြောက်သွားကြတာလဲ။

ကန္တာရ ကောင်းကင်ဘုံ ဘေးဒုက္ခမှာ နားမလည်နိုင်အောင် ဖြစ်နေရသည်။

“တစ်နေရာရာမှာ ပြဿနာရှိခဲ့လို့လား မေ့လိုက်ပါတော့... နောက်တစ်ကြိမ်ကျရင်တော့ ပိုပြီး စေ့စပ်သေချာအောင် ပြင်ဆင်ရမယ်။ ဒါဆိုရင်တော့ နတ်ဘုရားဘိသိက်မင်္ဂလာက ပြီးပြည့်စုံစွာ အောင်မြင်သွားလိမ့်မယ်”

လူသားကျင့်ကြံသူတွေက ဒီအထွဋ်အထိပ် နတ်ဘုရားအတတ်ကို ဖျက်ဆီးလိုက်တာလို့ ၎င်းက လုံးဝ မတွေးမိခဲ့ပေ။

အခန်း။ ၁၄၈

သို့သော်လည်း ကင်းမြီးကောက်ကြီး၏ ကျောပေါ်တွင်မူ ခရမ်းရောင်အာလူးလေးနှင့် တူသော ကလေးငယ်၏ မျက်နှာမှာ နီမြန်းနေပြီး ကျဉ်းမြောင်းသော မျက်လုံးအစုံကို တင်းတင်းပိတ်ထားသော်လည်း မျက်လုံးထောင့်များမှ သွေးစများ စီးကျနေသည်။

ခရမ်းပုပ်ရောင်သန်းနေသော ပါးပြင်လေးများမှာ ဒေါသကြောင့် ဖောင်းကားနေပြီး နဖူးပေါ်ရှိ သွေးကြောများမှာလည်း တီကောင်များပမာ ထောင်ထနေတော့သည်။

“ငါ့ဘက်က ပြင်ဆင်မှု အားနည်းခဲ့တာမဟုတ်ဘူး... အဲဒီစစ်မြေပြင်မှာ အရူး တစ်ယောက် ရှိနေလို့ပဲ။ ဟုတ်တယ်... ရုပ်သေးတပ်မတော်ကို ထိန်းချုပ်နေတဲ့ အဲဒီ ခွေးမသားပဲ သူက... သူက တကယ်ကို...”

ကန္တာရ ကောင်းကင်ဘုံ ဘေးဒုက္ခက စပ်စုချင်စိတ်ဖြင့် “တကယ်ကို ဘာဖြစ်လို့လဲ”

စုန်းအကြီးအကဲချုပ်မှာ ဒေါသကြောင့် စကားပင် ထစ်နေရှာသည်။

“အဲဒီ ခွေးမသားက... အနီရောင်ဓားတစ်စင်းကို ဝေ့ယမ်းပြီး ငါ့ရဲ့ ကောင်းကင်ဘုံက ပေးသနားတဲ့ နတ်ဘုရားအတတ်ကို ဖျက်ဆီးပစ်လိုက်တာ”

“ဘာလို့ သူဖြစ်နေရတာလဲ ငါ့ရဲ့ စီစဉ်မှုကို ဖျက်ဆီးဖို့ သူက ဘယ်လောက်တောင် သတ္တိရှိနေတာလဲ ပြီးတော့ သူက အဲဒါကို ဘယ်လိုမျိုး မြင်နိုင်သွားတာလဲ”

ခရမ်းရောင်အာလူးကလေးသည် စူးရှသောအသံဖြင့် အော်ဟစ်လိုက်ပြီး ဒေါသကြောင့် တစ်ကိုယ်လုံး တုန်ယင်နေတော့သည်။

“အဲဒီအရူးသာ မရှိရင် ငါ့ရဲ့ နတ်ဘုရားဘိသိက်မင်္ဂလာက ပြီးပြည့်စုံနေမှာ။ တကယ့်ကို ကောင်းမွန်လှတဲ့ အသားနဲ့ သွေးပူဇော်သက္ကာတွေပဲ... နတ်ဘုရားသတ်တပ်ဖွဲ့ လေးဖွဲ့တောင်လေ တောက်... အဲဒီကောင် သေချင်းဆိုး….”

ကန္တာရ ကောင်းကင်ဘုံ ဘေးဒုက္ခမှာ ဇဝေဇဝါ ဖြစ်သွားသည်။

“ရုပ်သေးတပ်မတော်ကို ထိန်းချုပ်တဲ့ကောင်လား။ သူ အနီရောင်ဓား ဝေ့ယမ်းတာကို ငါမမြင်လိုက်ပါဘူး... တကယ်ပဲ ဘာတွေဖြစ်သွားတာလဲ”

စုန်းအကြီးအကဲချုပ်သည် ရွှီရန်၏ အရိုးကိုပင် ကိုက်ဝါးပစ်ချင်သည့်အလား အံကို တင်းတင်းကြိတ်လိုက်သည်။

“အတိုချုပ်ပြောရရင် အဲဒီခွေးမသားပဲ နောက်နောင် ဒီကောင်ကို သေချာ စောင့်ကြည့်ရမယ်။ အခွင့်အရေးရတာနဲ့ သူ့ကို ညှာတာမှုမရှိဘဲ သတ်ပစ်ရမယ်”

စုန်းအကြီးအကဲချုပ်သည် မရိုးသားသော ရည်ရွယ်ချက်ဖြင့် သတင်းအချက်အလက်အချို့ကို ဖုံးကွယ်ထားပြီး အကုန်အစင် ရှင်းမပြပေ။ အကြောင်းမှာ သူ၏ နတ်ဘုရားအတတ်အကြောင်းကို ရန်သူက အသေးစိတ် သိရှိသွားပါက ဖြိုခွဲမည့်နည်းလမ်းကို ရှာတွေ့သွားနိုင်သောကြောင့်ပင်။

ကောက်ကျစ်လှသော ဤလောကကြီးက သူ့ကို သတိရှိရန် သင်ကြားပေးထားသည်။ မရှုံးနိမ့်ခင်အထိ သူက ထိုသို့မယုံကြည်ခဲ့သော်လည်း ယခု လက်တွေ့ကြုံလိုက်ရသော အခြေအနေဆိုးကြီးက သူ့ကို ကောင်းကောင်းကြီး သင်ခန်းစာ ပေးလိုက်ခြင်းပင်။

ကန္တာရ ကောင်းကင်ဘုံ ဘေးဒုက္ခ “...တကယ်ပဲ အဲဒီကောင်လေးကြောင့်လား မင်းသာ ငါ့ကို စောစောက ပြောခဲ့ရင် ခုနကတင် ငါ သူ့ကို အမှုန့်လုပ်ပစ်လိုက်မှာပေါ့”

၎င်းက ထိုသို့ပြောဆိုရင်း ကန္တာရ ကောင်းကင်ဘုံ ဘေးဒုက္ခသည် သူ၏ ဘယ်ဘက်လက်သည်းကို ဝေ့ယမ်းလိုက်သည်။ သူ၏ ရူးသွပ်နေသော မျက်လုံးကြီးသည် နှစ်ကီလိုမီတာ အကွာအဝေးမှ ရန်သူကို သတ်ဖြတ်နိုင်စွမ်း ရှိသည်။

စုန်းအကြီးအကဲချုပ်: "ငါက ဘိသိက်မင်္ဂလာ အခမ်းအနားကို လုပ်ဆောင်နေတာလေ မင်းကို သူ့ကိုသတ်ခွင့် ဘယ်လိုပေးလို့ ရမလဲ။ မင်းရဲ့ အစွမ်းတွေနဲ့သာ လှုပ်ရှားလိုက်ရင် ငါ့ရဲ့ အခမ်းအနားက ပျက်စီးသွားမှာပေါ့"

ကန္တာရ ကောင်းကင်ဘုံ ဘေးဒုက္ခ: "နှမြောစရာပဲ..."

စုန်းအကြီးအကဲချုပ်က လှောင်ပြုံးပြုံးလိုက်သည်။

"သူ့ကို အထင်မသေးနဲ့။ မင်းရဲ့ တိုက်ကွက်က သူ့ကို ထိမှန်ရင်တောင် သူ သေမှာမဟုတ်ဘူး"

ကန္တာရ ကောင်းကင်ဘုံ ဘေးဒုက္ခမှာ အံ့အားသင့်သွားရသည်။

"တကယ်ပဲ သူက သာမန်မဟုတ်တဲ့ကောင်ပဲ။ နောက်ဆိုရင် ငါလည်း ပိုပြီး သတိထားရတော့မယ်"

စုန်းအကြီးအကဲချုပ်က ခေါင်းခါယမ်းလိုက်ပြီး "ဒါပေမဲ့ သူက ငါ့ရဲ့ အထွဋ်အထိပ် နတ်ဘုရားအတတ်ကို တိုက်တိုက်ဆိုင်ဆိုင် ကံကောင်းလို့ ဖြိုခွဲနိုင်ခဲ့တာပဲ ဖြစ်ရမယ်... နောက်နှစ်နှစ်နေရင် ငါ ပြန်လာခဲ့မယ်"

ကန္တာရ ကောင်းကင်ဘုံ ဘေးဒုက္ခ: "နောက်နှစ်နှစ်နေရင် ဘေးကင်းဇုန်အပြင်ဘက်မှာ နတ်

ဘုရားဘိသိက်မင်္ဂလာကို ပြန်လုပ်မယ်ပေါ့ အဲဒီအချိန်ကျရင်လည်း ထပ်ပြီး အဖျက်ခံရရင်ရော…"

ခရမ်းရောင်အာလူးကလေးသည် အမြီးနင်းခံလိုက်ရသော ကြောင်တစ်ကောင်ပမာ "ထပ်ပြီး အဖျက်မခံရစေရဘူး။ နောက်နှစ်နှစ်ကျရင် အဲဒီအရူးနဲ့ ဝေးရာမှာ ငါလုပ်မယ် ငါ့ရဲ့ နတ်ဘုရားဘိသိက်မင်္ဂလာသာ အောင်မြင်သွားရင် သူ့ခေါင်းကို အရင်ဆုံး ပေါက်ကွဲအောင် လုပ်ပစ်မယ်"

ကန္တာရ ကောင်းကင်ဘုံ ဘေးဒုက္ခက အနည်းငယ် အံ့ဩသွားပြီး "မင်း ကိုယ့်ကိုယ်ကိုယ် ယုံကြည်မှုတွေ လျော့နည်းလာပြီပဲ"

ထိုစကားကို ကြားလိုက်ရချိန်တွင် ခရမ်းရောင်အာလူးကလေးသည် ကင်းမြီးကောက်၏ ကျောပေါ်တွင် ပြိုလဲကျသွားပြီး ၎င်း၏ နှလုံးသားမှာ ရုတ်တရက် တုန်လှုပ်သွားတော့သည်။

သူကိုယ်တိုင်ပင် ယုံကြည်မှု မလုံလောက်တော့ကြောင်း သတိပြုမိသွားပြီဖြစ်သည်။

သို့သော် သူက ဝန်ခံရန် ငြင်းဆန်နေဆဲပင်။

ငါ ဘယ်လိုလုပ် ဝန်ခံနိုင်မှာလဲ။

ယခု နတ်ဘုရားဘိသိက်မင်္ဂလာ ထိပ်တိုက်တွေ့ဆုံမှုတွင် ရွှီရန်၏ ယုံကြည်မှုစွမ်းအားမှာ ၎င်း၏ ယုံကြည်မှုထက် မမျှော်လင့်ဘဲ သာလွန်သွားခဲ့သည်။

ရွံရှာစရာကောင်းလိုက်တာ။

ခရမ်းရောင်အာလူးကလေးသည် အလွန်အမင်း စိတ်ပျက်သွားသဖြင့် အန်ပင်အန်ချင်လာတော့သည်။

“ငါ့ကို ဒီကနေ ခေါ်သွားတော့။ ငါ နတ်ဘုရားဖြစ်လာတဲ့ တစ်နေ့ကျရင် သူ့ခေါင်းကို အရင်ဆုံး ပေါက်ကွဲအောင် လုပ်ပစ်မယ်”

၎င်းက ရက်ရက်စက်စက် ကျိန်ဆဲလိုက်သည်။

ကန္တာရ ကောင်းကင်ဘုံ ဘေးဒုက္ခကမူ ဘာမှပြန်မပြောပေ။

၎င်းသည် ဧရာမမျက်လုံးကြီးပါသော လက်သည်းကို အပေါ်သို့ မြှင့်တင်လိုက်ရာ မျက်လုံးသူငယ်အိမ်မှာ အရူးအမူး လည်ပတ်သွားပြီး ထူးဆန်းသော စွမ်းအင်တန်းများ လျင်မြန်စွာ ပျံ့နှံ့သွားတော့သည်။ ၎င်းတို့၏အောက်ရှိ လေပွေသဲမုန်တိုင်းမှာ အိမ်မွေးတိရစ္ဆာန်လေးတစ်ကောင်ပမာ လိမ္မာပါးနပ်စွာဖြင့် ဧရာမကင်းမြီးကောက်ကြီးကို သယ်ဆောင်၍ တစ်ခဏချင်းအတွင်း ထိုနေရာမှ ပျောက်ကွယ်သွားတော့သည်။

သဋတို့၏ နောက်ကွယ်တွင်မူ လင်းဖုန်းက သူ၏အကြည့်ကို ပြန်လည်ရုပ်သိမ်းလိုက်ပြီး “သူ ထွက်သွားပြီ။ တကယ့်ကို ပြတ်ပြတ်သားသားပဲ”

လျိုယန်: “တောက်... ပြောရမယ်ဆိုရင် ငါတို့တွေက တော်တော်ကံဆိုးတာပဲ။ ထူးဆန်းတဲ့ ယန္တရားမိစ္ဆာနှစ်ကောင်နဲ့ ဆက်တိုက် တိုးနေရတယ်”

ရှောင်ရွှယ်: “တကယ်တော့ ငါတို့တွေက ကံကောင်းတယ်လို့လည်း ပြောလို့ရပါတယ်။ ပထမတစ်ခါက ပျံလွှားခေါင်းပြတ်တစ္ဆေ ကို သုတ်သင်နိုင်ခဲ့တယ်။ အခု ဒုတိယတစ်ခါမှာလည်း ဒီအန္တရာယ်ကြီးကနေ ဘာဒဏ်ရာမှမရဘဲ အသက်ရှင်ခဲ့ရတာပဲလေ...”

ယဲ့ဖျင်က ခပ်ပြုံးပြုံးဖြင့် “မင်းပြောတာလည်း ဟုတ်တာပဲ...”

အဖွဲ့ဝင်အားလုံး အချင်းချင်း ကြည့်ကာ ပြုံးလိုက်ကြသည်။ သူတို့သည် ကြီးမားသော ဘေးဒုက္ခတစ်ခုမှ သီသီလေး လွတ်မြောက်လာခဲ့သည်ဟု အမှန်တကယ် ခံစားနေရဆဲပင်။

နှလုံးခုန်သံများ မငြိမ်သက်သေးသည့် သူတို့နှင့် နှိုင်းယှဉ်လျှင် ဘေးကင်းဇုန်အတွင်းသို့ ဝင်

ရောက်လာကြသော စစ်သည်တော်များမှာ ပို၍ပင် အားအင်ကုန်ခမ်းနေပုံရသည်။ သူတို့သည် မြေပြင်ပေါ်သို့ ပုံရက်သားလဲကျကာ အမောတကော အသက်ရှူနေကြပြီး တစ်ကိုယ်လုံးလည်း ချွေးများဖြင့် ရွှဲစိုနေတော့သည်။

စည်းကမ်းမရှိ၍ မဟုတ်ဘဲ သုတို့သည် အမှန်တကယ်ပင် မတ်တပ်ရပ်နိုင်စွမ်း မရှိတော့ခြင်းပင်။

ရွှီရန်သည် လူအုပ်ကြီးကြားတွင် ကြောက်ရွံ့မှု သန့်စင်ခြင်းအတတ်ကို ထုတ်လွှတ်လိုက်သည်။ ထောင်နှင့်ချီသော တိုးတက်မှုကိရိယာ အသုံးပြုသူတိုင်းကို အစွမ်းကုန် အသုံးချရမည်ပင်။

တိုးတက်မှု +၁...

တိုးတက်မှု +၁...

တိုးတက်မှု +၁...

ယဲ့ဖျင် အနားသို့ လျှောက်လာပြီး “ရှောင်ရန်... မင်း ဘာလုပ်နေတာလဲ ထိတ်လန့်သွားတာမျိုးတော့ မရှိဘူးမလား”

ရွှီရန်က ခေါင်းခါပြလိုက်သည်။

“မရှိပါဘူး။ အာရုံချောက်ခြားမှု တစ်ခုပဲဟာ အရေးမကြီးပါဘူး”

ယဲ့ဖျင်: “အင်း... ငါ မင်းကို အထင်သေးမိသွားတာပဲ။ အဲဒီ အဆင့်မြင့် အာရုံချောက်ခြားမှုကို ဖြိုခွဲလိုက်တာ မင်းပဲ မဟုတ်လား”

ရွှီရန်က ခေါင်းညိတ်ပြလိုက်သည်။

“တိုက်တိုက်ဆိုင်ဆိုင်ပါပဲ”

ယဲ့ဖျင်က ရွှီရန်၏ ထူးခြားသော စွမ်းဆောင်ရည်များကို သိရှိသွားသည့်အလား လေးစားသော အကြည့်ဖြင့် ကြည့်လိုက်ပြီး “ဒါက တိုက်ဆိုင်မှု မဟုတ်ပါဘူး နေဦး... သူတို့ရဲ့ ကြောက်ရွံ့မှုတွေကို သန့်စင်ပေးတာ ခဏရပ်ထားလိုက်။ ငါနဲ့ လိုက်ခဲ့ဦး ပိုအရေးကြီးတဲ့ ကိစ္စရှိတယ်”

ရွှီရန်: “ဘာများ အရေးကြီးလို့လဲ”

ယဲ့ဖျင်: “ပြိုင်ဘက်ရဲ့ သတင်းအချက်အလက်နဲ့ ပတ်သက်တာလေ။ ဒါကို ကောင်းကင်ဘုံ အထွတ်အထိပ် နန်းဆောင်ဆီ ချက်ချင်း အစီရင်ခံရမယ်။ ပြီးတော့ နတ်ဘုရားသတ်တပ်ဖွဲ့တွေနဲ့ ဘေးကင်းဇုန် အားလုံးကိုလည်း မျှဝေရမယ်... ဒါမှ လူသားကျင့်ကြံသူ အားလုံး ဒီလိုထူးဆန်းတဲ့ ယန္တရားမိစ္ဆာအကြောင်း သိထားမှာ”

“ဒီကောင် တခြားနေရာတွေမှာ သွားပြီး ပွက်လောရိုက်နေတာကို မင်းလည်း မမြင်ချင်ဘူး မဟုတ်လား”

ရွှီရန်: “အဲဒီကောင်က အဲဒီတိုက်ကွက်ကို လောလောဆယ် ပြန်သုံးနိုင်မှာ မဟုတ်ပေမဲ့ ဦးလေးယဲ့ ပြောတာလည်း ဟုတ်ပါတယ်။ သွားကြတာပေါ့ ကျွန်တော် သိတာတွေကို မျှဝေပေးမယ်။ ဒါပေမဲ့ ဆုလာဘ်တော့ ရှိရမယ် မဟုတ်လား”

ယဲ့ဖျင်က ဝန်မလေးဘဲ ချက်ချင်းပြောလိုက်သည်။

“ထူးခြားတဲ့ ဂုဏ်ပြုမှတ်တမ်းရမှာပေါ့”

“ထူးခြားတဲ့ ဂုဏ်ပြုမှတ်တမ်းသာ မရရင် ငါကော ပါဝင်ပတ်သက်ပါ့မလား”

ရွှီရန်: “ဟဲဟဲ။ မဆိုးပါဘူး မဆိုးပါဘူး”

ယဲ့ဖျင်: “ငါ့နောက် လိုက်ခဲ့”

ထို့ကြောင့် သူတို့နှစ်ဦးမှာ နတ်ဘုရားသတ်တပ်ဖွဲ့ လေးဖွဲ့ရှိရာ နေရာသို့ ဦးတည်ထွက်ခွာလာခဲ့ကြသည်။

ထိုအခိုက်အတန့်တွင် သတ္တမမြောက် ဘေးကင်းဇုန်၏ တပ်ရင်းမှူးမှာ တစ်ကိုယ်လုံး တုန်ယင်နေဆဲ ဖြစ်သော်လည်း သူ၏ အကြည့်မှာမူ ယခင်ကထက် ပိုမိုခိုင်မာနေသည်။

“ဒီနေ့ ဖြစ်ပျက်ခဲ့တဲ့ အသေးစိတ် အချက်အလက်တိုင်းကို အသေးစိတ် အစီရင်ခံစာ ရေးသားပြီး ကောင်းကင်ဘုံ အထွတ်အထိပ် နန်းဆောင် ဆီ ညတွင်းချင်း တင်ပြရမယ်”