ရေနောက်လူး၍ ငါးဖမ်းခြင်း

ရှေ့တွင် ကင်းပုန်းများ နောက်တွင် လိုက်လံတိုက်ခိုက်သူများဖြင့် အခြေအနေမှာ အလွန်အမင်း အန္တရာယ်များလှသည်။ ဉာဏ်ရည်ထက်မြက်သည်ဟု ဆိုရမည့် ချန်လင်းစုပင်လျှင် စိုးရိမ်စိတ်ဖြင့် ချွေးပြန်နေပေ၏။ ကျုံးကျောက်ဝမ်ကမူ ဘေးဘီဝဲယာကို ကြည့်ကာ "ဘယ်လိုလုပ်ကြမလဲ... ဘယ်လိုလုပ်ကြမလဲ..." ဟု တီးတိုးရေရွတ်နေသည်။

သူတို့အနက် အတည်ငြိမ်ဆုံးမှာ သေရေးရှင်ရေး တိုက်ပွဲပေါင်းများစွာကို ကြုံတွေ့ခဲ့ဖူးသော ချူကျန့်ပင်။ လျှို့ဝှက်သိုင်းကမ္ဘာ၌ ရေတွက်၍မရနိုင်သော ရန်သူများ၏ လိုက်လံတိုက်ခိုက်မှုကို သူ ကြုံတွေ့ခဲ့ဖူးသည်။ သူသည် ရှေ့မှ အခြေအနေကို အလျင်အမြန် အကဲခတ်လိုက်ပြီး မီးတုတ်အရေအတွက်ကို ကြည့်ကာ ရန်သူအင်အားကို ခန့်မှန်းလိုက်ရာ လေးရာခန့် ရှိကြောင်း မြင့်တွေ့ရသည်။ ရှေ့နောက်မှ ညှပ်ပူးညှပ်ပိတ်လိုက်လာသော ရန်သူစုစုပေါင်းမှာ သုံးထောင်ခန့် ရှိနိုင်ကြောင်း သူ တွက်ချက်မိပေ၏။

လူသုံးထောင်... ဤပမာဏမှာ နည်းပါးလှသည်တော့ မဟုတ်ပေ။

မဟာသိုင်းလောကခေတ်ဂိမ်း၏ဆာဗာအသစ်တွင် ကစားသမားသန်းတစ်ရာကျော် ရှိသော်လည်း ဂိမ်းမြေပုံမှာ အလွန်ကျယ်ဝန်းလှသည်။ ကျယ်ပြန့်သောနယ်မြေများပေါ်တွင် ကစားသမား သန်းတစ်ရာနှင့် NPC သန်းပေါင်းများစွာ ပြန့်ကျဲနေသဖြင့် လူနေသိပ်သည်းမှု နည်းပါးသည်။ ထို့ပြင် ကစားသမား သန်းတစ်ရာလုံး တပြိုင်နက်တည်း အွန်လိုင်း ရှိနေရန် မဖြစ်နိုင်ချေ။ အွန်လိုင်း၌ရှိနေသော ကစားသမား အရေအတွက်မှာ သန်းငါးဆယ်ဝန်းကျင်သာ ရှိမည်ဟု ခန့်မှန်းရသည်။

ထို့ကြောင့် ဝေးလံခေါင်သီသော မြို့ပြင်၌ ကစားသမား သုံးထောင်ခန့် စုဝေးပြီး သူတို့လေးယောက်ကို ဝိုင်းရံတိုက်ခိုက်ရန် စီစဉ်ခြင်းမှာ လွယ်ကူသောကိစ္စတစ်ရပ် မဟုတ်ချေ။ ဤသည်မှာ ကစားသမား အသိုင်းအဝိုင်းအတွင်းရှိ ကြီးမားသော ဂိုဏ်းတစ်ဂိုဏ်း၏ လက်ချက်သာ ဖြစ်ပေမည်။

ကျုံးကျောက်ဝမ်က မျှော်လင့်ချက်ရလိုရငြား ရည်ရွယ်ချက်ဖြင့် ချန်လင်းစုကိုကြည့်ပြီး မေးမြန်းသည်။

"မိန်းကလေးလင်း... မင်းဆီမှာ နေရာကျယ်ကျယ်ဖြန့်ပြီး အသုံးပြုလို့ရတဲ့ အဆိပ်ငွေ့လို မျိုး ပါလာလား..."

ချန်လင်းစုက သူမ၏နှုတ်ခမ်းကိုကိုက်ကာ ခေါင်းခါယမ်းပြရင်း ပြောဆိုသည်။

"သူတို့က အင်အားအရမ်းများလွန်းတယ်... ဒီညက လေလည်းမတိုက်တော့ အဆိပ်ငွေ့တွေက ပျံ့သွားမှာ မဟုတ်ဘူး... ဒါ့ပြင် ဒီနေရာက ကွင်းပြင်ကျယ်ကြီး ဖြစ်နေတော့ အဆိပ်ကို မီးရှို့ရင်တောင် ထိရောက်မှုက အများကြီးလျော့ကျသွားမှာ..."

ကျုံးကျောက်ဝမ် တိတ်ဆိတ်သွားသည်။

ဟူဖေးက အံ့တင်းတင်းကြိတ်ရင်း ပြောဆိုသည်။

"ငါ လမ်းတစ်လမ်းဖောက်ပြီး တိုက်ခိုက်မယ်... မင်းတို့က ငါ့ရဲ့နောက်ကနေ လိုက်ခဲ့တော့..."

သူသည် သူတို့လေးယောက်အနက် သိုင်းပညာ အတော်ဆုံးဖြစ်သဖြင့် ဓားတစ်လက်ကို ဆွဲကာ ရှေ့သို့တိုးဝင်ရန် ဟန်ပြင်လိုက်စဉ်မှာပင် ချူကျန့်က သူ့ကို ဆွဲထားပြီး ပြောဆိုလိုက်၏။

"မင်း သွားပြီး အသေမခံနဲ့... မင်းတို့အားလုံး ငါ့ရဲ့နောက်ကနေ လိုက်ခဲ့တော့..."

ကစားသမားလေးရာ၏ ဝိုင်းဝန်းတိုက်ခိုက်မှုကို ရင်ဆိုင်ရလျှင် သိုင်းပညာအမှတ် ၅၀၀ ဝန်းကျင်ရှိသော ကောကျင့်ပင်လျှင် အခြေအနေ မကောင်းနိုင်ချေ။ ထို့ပြင် ရှေ့မှ ရန်သူများက ထိန်းထားလိုက်သည်နှင့် နောက်မှ အုံနှင့်ကျင်းနှင့် ရောက်လာမည့် ထောင်ပေါင်းများစွာသော ကစားသမားများ၏ရန်ကို ဂိမ်းထဲမှ ထိပ်တန်းသိုင်းသမားများပင် တောင့်ခံထားနိုင်မည် မဟုတ်ပေ။

ဤအကြပ်အတည်းနှင့် ရင်ဆိုင်ရချိန်တွင် ချူကျန့်သည် သူ၏အရည်အချင်းများကို ဖုံးကွယ်မထားနိုင်တော့ချေ။ သူက တိုးညှင်းစွာ ပြောဆိုလိုက်သည်။

"အခုက မှောင်နေပြီ... သူတို့ ငါတို့ကို အလွယ်တကူ ရှာမတွေ့နိုင်သလို မှတ်မိဖို့လည်း မလွယ်ဘူး... ဒါ ငါတို့အတွက် အခွင့်အရေးပဲ... ငါ့ရဲ့နည်းလမ်းအတိုင်း လုပ်ကြမယ်... ဒီလိုလုပ်..."

ချူကျန့်ကို ဝိုင်းရံတိုက်ခိုက်ရန် ရောက်ရှိလာသောအဖွဲ့မှာ ကစားသမားများကြားတွင် အလွန် နာမည်ကြီးသော ဂိုဏ်းဖြစ်ပြီး ချူကျန့်၏ ပြိုင်ဘက်ဟောင်းလည်း ဖြစ်သည့် 'အရှင်သခင်ဂိုဏ်း' ပင်။ ဤကိစ္စကို ဆာဗာအသစ်၏ ရှေ့ပြေးအဖွဲ့ ခေါင်းဆောင် 'ကမ္ဘာ့ဧကရာဇ်' ကိုယ်တိုင် စီစဉ်ထားခြင်း ဖြစ်သည်။

ကမ္ဘာ့ဧကရာဇ်သည် ဆာဗာအသစ်ရှိ ဝါရင့်ဂိုဏ်းသားထောင်ပေါင်းများစွာကို အဆင့်မြှင့်တင်ခြင်းများ ရပ်ဆိုင်းထားစေပြီး မြင်းဖြူဘုရားကျောင်းမြို့၏ပတ်ဝန်းကျင်တွင် စေ့စေ့စပ်စပ် ရှာဖွေမှုများ ပြုလုပ်ရန် အမိန့်ပေးခဲ့သည်။ တခြားကစားသမားများ "သားကောင် လုယူခြင်း"ကို မပြုလုပ်နိုင်စေရန်အတွက်လည်း လမ်းကြောင်းများအားလုံးကို စောင့်ကြပ်စေခဲ့သည်။

ကံဆိုးစွာဖြင့် ချူကျန့်ကို သိုင်းပညာ မြင့်မားသော ဟူဖေးနှင့် အဆိပ်ကျွမ်းကျင်သူ ချန်လင်းစုတို့က ကာကွယ်ပေးထားလိမ့်မည်ဟု သူတို့ မျှော်လင့်မထားခဲ့ကြချေ။ သူတို့ဘက်မှ အထိနာခဲ့ရပြီး ထိုလူလေးယောက်သည် မြင်းရထားလုံးတစ်စီးကို ခိုးယူကာ ဝိုင်းရံပိတ်ဆို့မှုမှ လွတ်မြောက်သွားခဲ့ကြသည်။

စာပို့ခိုများ အသုံးပြု၍ သတင်းစကားများ ပေးပို့ကာ ကြားဖြတ်တိုက်ခိုက်မည့် အစီအစဉ်များကို ချမှတ်ရင်း ကမ္ဘာ့ဧကရာဇ်သည် အနီးအနားရှိ ဂိုဏ်းသားအားလုံးကို ချူကျန့်တို့အား အမြန်ဆုံး လိုက်လံဖမ်းဆီးရန် စုစည်းခဲ့သည်။ယနေ့မှသာ သူတို့၏ ဝိုင်းရံပိတ်ဆို့မှု ပြီးပြည့်စုံသွားခြင်း ဖြစ်ပေ၏။

မြင်းရထားလုံးကို ကြားဖြတ်တားဆီးနိုင်ခဲ့သော်လည်း အတွင်း၌ မည်သူမျှ မရှိကြောင်း သတင်းပို့လာချိန်၌ ချူလော့ကျွင်းနှင့် သူ၏လူများသည် တောထဲတွင် ပုန်းအောင်းနေမည် ဖြစ်ကြောင်း ကမ္ဘာ့ဧကရာဇ်က ရိပ်မိလိုက်ပြီး ဝိုင်းရံပိတ်ဆို့ရန် ချက်ချင်းအမိန့်ပေးလိုက်သည်။

ထောင်ပေါင်းများစွာသော ကစားသမားများသည် သုံးယောက်တစ်ဖွဲ့ ဖွဲ့စည်းလိုက်ပြီး အဖွဲ့တစ်ဖွဲ့နှင့်တစ်ဖွဲ့အကြား ဆယ်ပေထက် မပိုသော အကွာအဝေးဖြင့် နေရာယူထားကြသည်။ ကွက်လပ်တိုင်းကို တခြားအဖွဲ့တစ်ခုက ဖြည့်ဆည်းထားသဖြင့် ပိတ်ဆို့ထားမှုမှာ ထိုးဖောက်၍ မရနိုင်လောက်အောင် ဖြစ်နေသည်။ ချူလော့ကျွင်းတို့အဖွဲ့တွင် အတောင်ပံများ ပါလာလျှင်ပင် လွတ်မြောက်နိုင်မည် မဟုတ်ချေ။

ပိတ်ဆို့မှု တင်းကြပ်လာသည်နှင့်အမျှ တစ်စုံတစ်ယောက်က ရုတ်တရက် အော်ဟစ်လိုက်သည်။

"ချူလော့ကျွင်း ဒီမှာဟေ့... အား..."

လက်နက်ချင်း ထိခတ်သံများ အချိန်တခဏကြာမျှ ထွက်ပေါ်လာပြီးနောက် တစ်စုံတစ်ယောက် လဲကျသွားသည်။ ကစားသမားများသည် ချူလော့ကျွင်းတို့အဖွဲ့နှင့် တိုက်ခိုက်နေပြီ ဖြစ်ကြောင်း ထင်ရှားသည်။ ကမ္ဘာ့ဧကရာဇ်သည် ထိုနေရာနှင့် မနီးမဝေးတွင် ရှိနေသဖြင့် သူ၏လူများကို ဦးဆောင်ကာ အခင်းဖြစ်ပွားရာသို့ ချက်ချင်းသွားရောက်လိုက်သည်။

သူတို့ အနီးကပ် ရောက်ရှိသွားချိန်တွင် ရှေ့မှ တိုက်ခိုက်သံများကို ကြားလိုက်ရသည်။ အမျိုးသားတစ်ဦးက နာကျင်စွာ အော်ဟစ်လိုက်ပြီးနောက် ပြောဆိုသည်။

"သတိထားကြ... ချူလော့ကျွင်းဆီမှာ နတ်ဘုရားလက်နက် 'သွေးပြာဓား' ပါတယ်... သူ အရှေ့မြောက်ဘက်ကို ပြေးသွားပြီ... သူ့ကို လွတ်မသွားစေနဲ့..."

အရှေ့မြောက်ဘက်သည် ဝိုင်းရံထားမှုတွင် အားအနည်းဆုံးနေရာပင်။ ကမ္ဘာ့ဧကရာဇ်သည် တိုးတိုးတိတ်တိတ် ကျိန်ဆဲလိုက်ပြီး လိုက်လံဖမ်းဆီးကြရန် သူ၏လူများကို ချက်ချင်း အော်ဟစ်၍ အမိန့်ပေးလိုက်သည်။

အရှေ့မြောက်ဘက်ရှိ ကစားသမားများသည်လည်း သားကောင်ဝင်လာမည့်အချိန်ကို သတိကြီးစွာထား၍ စောင့်ဆိုင်းနေကြသည်။

သို့သော် အချိန်တခဏကြာမျှ စောင့်ဆိုင်းပြီးနောက် ကမ္ဘာ့ဧကရာဇ်နှင့်သူ၏လူများ ဝင်ရောက်လာပြီး ရုန်းရင်းဆန်ခတ် ဖြစ်လုနီးပါး အခြေအနေသို့ ရောက်ရှိသွားသည့်တိုင် ချူလော့ကျွင်းတို့အဖွဲ့ကို ရှာမတွေ့ခဲ့ကြချေ။

"သူတို့ ဘယ်ရောက်သွားလဲ..."

"ဒီနားလေးမှာ ရှိမှာပါ... သေချာရှာကြ..."

ကမ္ဘာ့ဧကရာဇ်၏စိတ်ထဲတွင် မကောင်းသော နိမိတ်တစ်ခု ဖြစ်ပေါ်လာသည်။ ကစားသမား အရေအတွက် များပြားသော်လည်း လူအုပ်ကြီး ဖြစ်နေသဖြင့် ဝရုန်းသုန်းကား ဖြစ်မှုကို ရှောင်လွှဲ၍ မရနိုင်ပေ။ တဖျတ်ဖျတ်လက်နေသော မီးရောင်များ အရိပ်များနှင့် ရောထွေးနေသော ဂိမ်းID များကြောင့် မည်သူမည်ဝါဖြစ်ကြောင်း ခွဲခြားရန် မဖြစ်နိုင်ချေ။ အကယ်၍ ချူလော့ကျွင်းသာ လူအုပ်ထဲသို့ ရောနှောဝင်ရောက်သွားပါက နောက်ဆက်တွဲ အကျိုးဆက်များကို တွေးကြည့်ရန်ပင် ခက်ခဲပေလိမ့်မည်။

"မင်းတို့ အားလုံးပဲ... ကိုယ်ရင်းနှီးတဲ့ အဖွဲ့တွေနဲ့ပဲ နေကြ... သတိထား..."

ကမ္ဘာ့ဧကရာဇ်၏စကား မဆုံးမီမှာပင် လူအုပ်ထဲမှ အော်ဟစ်သံတစ်သံ ရုတ်တရက် ထွက်ပေါ်လာသည်။ ထို့နောက် "ချူလော့ကျွင်း ဒီမှာ..." ဟု တစ်စုံတစ်ယောက်က အော်ဟစ်လိုက်၏။

ထို့နောက် လူအုပ်ကြီးအတွင်းရှိနေရာအနှံ့အပြား၌ ရုတ်ရုတ်သဲသဲ ဖြစ်သွားကာ လူတချို့ ဒဏ်ရာရပြီး လဲကျသွားကြသည်။

"ချူလော့ကျွင်း ဒီမှာ..." ဟူသော အသံများ နေရာတိုင်းတွင် ပဲ့တင်ထပ်နေပြီး သူတို့အားလုံး စိုးရိမ်ထိတ်လန့် နေကြသည်။

ကမ္ဘာ့ဧကရာဇ်သည် ဒေါသတကြီးဖြင့် ခုန်ပေါက်ပြီး အော်ဟစ်နေစဉ်မှာပင် ရုတ်တရက် ငွေရောင်အလင်းတန်းတစ်တန်း ထွက်ပေါ်လာသည်။ ထို့နောက် လျှပ်စီးကဲ့သို့ လျင်မြန်သော ငွေရောင်ဓားသွားတစ်ခုက သူ၏လည်ပင်းကို ထိုးဖောက်ဝင်ရောက်သွားသည်။ ကမ္ဘာ့ဧကရာဇ်သည် သူ့ရှေ့မှ မြင်ကွင်းများ မီးခိုးရောင်သို့ ပြောင်းလဲသွားသည်ကို ခံစားလိုက်ရပြီး သူ့ခန္ဓာကိုယ် အထိန်းအကွပ်မဲ့စွာ တောင့်တင်းသွားသည်။

"ကစားသမား 'ချူလော့ကျွင်း' ၏ တိုက်ခိုက်မှုကြောင့် သင်သည် ပြင်းထန်စွာ ဒဏ်ရာရရှိသွားပြီး စိုးရိမ်ရသော အခြေအနေသို့ ရောက်ရှိသွားပါသည်..."

နောက်ထပ်အချိန်တခဏတွင် သူ၏ အသိစိတ်သည် ဂိမ်းမှ အတင်းအကျပ် မောင်းထုတ်ခြင်းကို ခံလိုက်ရပြီး သူ၏လည်ပင်းမှ သွေးများ ပန်းထွက်လာကာ ပျော့ခွေ၍ လဲကျသွားလေသည်။

လက်တွေ့ဘဝတွင် ကမ္ဘာ့ဧကရာဇ်သည် မယုံကြည်နိုင် ဖြစ်နေပြီး ဂိမ်းကစားခန်းထဲတွင် ထထိုင်ရန်အတွက် အချိန်အတော်ကြာ ယူလိုက်ရသည်။

'ငါ့ကို ချူလော့ကျွင်းက သတ်လိုက်တာလား...'

အရှင်သခင်ဂိုဏ်းအတွက် ဆာဗာအသစ်ကို ဦးဆောင်၍ လမ်းဖောက်ပေးရသော ခန်းမသခင် တစ်ဦးအနေဖြင့် ကမ္ဘာ့ဧကရာဇ်သည် အလွန်မောက်မာသူတစ်ယောက်ပင်။ ထို့ပြင် ဝါရင့်ကစားသမား တစ်ဦးအနေဖြင့် သူသည် ဝူတန်ဂိုဏ်းသို့ ဝင်ရောက်ထားပြီးဖြစ်ကာ လက်ရှိ သိုင်းပညာအဆင့်သတ်မှတ်ချက်မှာ ၂၂၀ အထိ ရောက်ရှိနေလေပြီ။

သူ ဈေးကြီးပေးကာ ဖန်တီးထားသော သံချပ်ကာဝတ်စုံနှင့် ပေါင်းစပ်လိုက်လျှင် သူ၏ကာကွယ်မှုစွမ်းရည်မှာ အလွန်မြင့်မားနေပြီဖြစ်ရာ ဆာဗာအသစ်တစ်ခုလုံးရှိ ထိပ်တန်း ၅ ရာခိုင်နှုန်းဝင် ကစားသမားတစ်ဦး ဖြစ်နေခဲ့သည်။

တစ်ကိုယ်တော် ပြိုင်ပွဲတွင် ချန်ပီယံဖြစ်ခဲ့ဖူးသည်ဟု ကောလာဟလ ထွက်နေသော "မိုးရေစိုရွှဲ ကြာရွက်မကြွေ" ဟူသော အမည်ဝှက်ကို အသုံးပြုထားသည့် "လေပြင်းတိုက်ခတ် ကြာရွက်မကြွေ" နှင့် တွေ့ဆုံလျှင်ပင် ရာချီသော တိုက်ကွက်များကို ခုခံနိုင်မည်ဟု သူ ယုံကြည်ထားသည်။

သူ သားကောင်အဖြစ် သတ်မှတ်ထားသော ချူလော့ကျွင်းက ယခုညတွင် ဓားတစ်ချက်တည်းဖြင့် သူ့ကို သတ်ဖြတ်သွားလိမ့်မည်ဟု လုံးဝထင်မှတ်မထားခဲ့မိပေ။

ခိုးကြောင်ခိုးဝှက် တိုက်ခိုက်မှု ပါဝင်သည်ဆိုသော်လည်း သူသည် သံချပ်ကာ အပြည့်အစုံ ဝတ်ဆင်ထားပြီး လည်ပင်းနေရာ၌သာ ဟာကွက်အနည်းငယ်ရှိသည်။ နေ့ခင်းကြောင်တောင်တွင် သူ ငြိမ်သက်စွာ မတ်တတ်ရပ်နေလျှင်ပင် ဓားတစ်ချက်တည်းဖြင့် ထိမှန်အောင် တိုက်ခိုက်ရန် ခက်ခဲလှသည်။ ကစားသမားများ နေရာအနှံ့အပြား၌ အော်ဟစ်နေပြီး အလင်းရောင်မှိန်ပျပျသာရှိသော ဤကဲ့သို့ ဝရုန်းသုန်းကား အခြေအနေမျိုးတွင်ဆိုလျှင် ပို၍ပင် မဖြစ်နိုင်ပေ။

သို့သော် ဂိမ်းစနစ်၏အသိပေးချက်များက တိကျမှန်ကန်သည်။ ချူလော့ကျွင်းသည် မည်သူမျှ မလုပ်နိုင်လောက်သော အရာကို လုပ်ပြသွားခဲ့သည်။ မှိန်ပျပျနှင့် ရှုပ်ထွေးနေသော အလင်းရောင်အောက်တွင် သံချပ်ကာ၏ ဟာကွက်လေးမှတဆင့် ဓားတစ်ချက်တည်းဖြင့် သူ၏လည်ပင်းကို ထိုးဖောက်ကာ ချက်ချင်း အသေသတ်သွားခဲ့ခြင်းဖြစ်သည်။

ကမ္ဘာ့ဧကရာဇ်၏ ကျောရိုးတလျှောက် ချမ်းစိမ့်သွားသည်။

'ဘယ်... ဘယ်လို မွန်းစတားကြီးလဲ...'

ဂိမ်းထဲတွင်မူ မီးတုတ်ကိုင်ထားသော ကစားသမားများ မကြာခဏ လဲကျသွားကာ မီးတုတ်များ ငြိမ်းသွားသဖြင့် အခြေအနေမှာ ပို၍ပင် ရှုပ်ထွေးလာသည်။ ထောင်ပေါင်းများစွာသော ကစားသမားများသည် ကြောက်ရွံ့မှုနှင့် အပြန်အလှန် သတ်ဖြတ်မှုများကြားတွင် နစ်မွန်းနေကြသည်။ ချူကျန့်နှင့် သူ၏မိတ်ဆွေ သုံးဦးသည် ကစားသမားအုပ်စုထဲမှ တိတ်တဆိတ် ထွက်ခွာသွားပြီး အခင်းဖြစ်ပွားရာနေရာမှ လျင်မြန်စွာ လွတ်မြောက်သွားကြသည်ကို မည်သူမျှ မသိလိုက်ကြပေ။

ရန်သူများ ဖမ်းမိမည်ကို စိုးရိမ်စရာ မလိုတော့သည့် သစ်တောတစ်ခုထဲသို့ ရောက်ရှိသွားမှသာ ကျုံးကျောက်ဝမ်သည် လက်ခုပ်တီးကာ ကျယ်လောင်စွာ အော်ဟစ်ရယ်မောလိုက်၏။

"သခင်လေးချူ... ကျွန်တော် ကျုံးကျောက်ဝမ်ကတော့ ဒီနေ့ ခင်ဗျားကို တကယ် လေးစားသွားပြီ... ခင်ဗျားပဲ ဒီလို ပြောင်မြောက်တဲ့ အစီအစဉ်ကို စဉ်းစားနိုင်တာ..."

ချူကျန့်သည် ထုံးစံအတိုင်း နှိမ့်ချသော စကားအနည်းငယ်ကို ပြောဆိုလိုက်ပြီး ဟူဖေးနှင့် တခြားသူများကိုလည်း ပြန်လည်၍ ဂုဏ်ပြုစကား ပြောဆိုလိုက်သည်။

အကယ်၍ အခြေအနေသာ သိပ်မဆိုးဝါးခဲ့လျှင် သူသည် ဆရာကြီးပုံစံ ဖမ်းနေအုံးမည် မဟုတ်ပေ။ သို့သော် ထိုဂိုဏ်းခေါင်းဆောင်က ညတိုက်ပွဲဆင်နွှဲရန် စဉ်းစားလောက်အောင် တုံးအနေခဲ့သည်မှာ သူတို့အတွက် ကံကောင်းခဲ့ခြင်းပင်။

ကောင်းမွန်စွာ လေ့ကျင့်ထားသော ရှေးခေတ်မှ လက်ရွေးစင်စစ်သည်များပင်လျှင် ညတိုက်ပွဲကို ပေါ့ပေါ့တန်တန် ဆင်နွှဲဝံ့ခြင်းမရှိချေ။ သို့ရာတွင် ဤကစားသမားများကမူ ညအချိန်၌ သူတို့၏နောက်သို့ လိုက်လံဖမ်းဆီးရဲကြသည်။ ဤသည်မှာ ထိုလူများသည် ဒုက္ခကို လက်ယပ်ခေါ်နေကြခြင်း မဟုတ်လော။

ဤအချက်ကပင် ချူကျန့်ကို လွတ်မြောက်ခွင့် ရရှိစေခဲ့ပြီး ဝိုင်းရံပိတ်ဆို့မှုမှ ထွက်ပြေးနိုင်စေခဲ့ခြင်းဖြစ်သည်။