အခန်း (၃၉-၄၀)

အခန်း (၃၉) - မြင်းမည်း

"ဟားဟား၊ စုချန်၊ မင်းကံကောင်းခြင်းတွေ ကုန်ဆုံးသွားပြီ။"

လူအုပ်ထဲတွင် လျိုလင်သည် စုချန်နှင့် ကျောက်ဝူကျိ မျက်နှာချင်းဆိုင် ရင်ဆိုင်နေသည်ကို မြင်လိုက်ရသဖြင့် ချက်ချင်း ဝမ်းသာအားရ ဖြစ်သွားသည်။ စုချန် အရိုက်ခံရပြီး ဒူးထောက် အသနားခံမည့် အချိန်ကို သူမ မစောင့်နိုင်တော့ပေ။ "မင်း ငါ့ကို ရိုက်ရဲတယ်ပေါ့၊ သေနာကောင်။ ကျောက်ဝူကျိ၊ သူ့ကို ဘယ်တော့မှ မမေ့နိုင်မယ့် သင်ခန်းစာ ပေးလိုက်စမ်းပါ။"

ဝုန်း။

လေးလံသော ပေါက်ကွဲသံကြီးက ကွင်းပြင်ကို တုန်ခါသွားစေသည်။ ကျောက်ဝူကျိ၏ ပုံရိပ်က ဖိချလာပြီး ပြင်းထန်သော လေပြင်းများ ဟိန်းဟောက်ကာ ကြီးမားသော စွမ်းအားဖြင့် ကြမ်းတမ်းစွာ ဝင်ဆောင့်လေသည်။ ကိုယ်ကာယ ကျင့်ကြံသူများသည် နာမည်နှင့်လိုက်ဖက်စွာ သူတို့၏ ရုပ်ခန္ဓာကို ကျွမ်းကျင်ပိုင်နိုင်စွာ ကျင့်ကြံထားကြသည်။ သို့သော် သာမာန်ကာလျှံကာ ခံစစ်အားကောင်းရုံ သက်သက် မဟုတ်ပေ။ ဤကဲ့သို့သော ကျင့်ကြံသူများသည် သိုင်းပညာ အခြေခံ အလွန်ခိုင်မာလေ့ရှိပြီး လူသားကမ္ဘာမှ သိုင်းပညာများဖြင့် ကျင့်ကြံခြင်း လမ်းစဉ်သို့ ဝင်ရောက်လာသူများ ဖြစ်ကြသည်။ ထို့ကြောင့် သူတို့တွင် တိုက်ခိုက်ရေး အတွေ့အကြုံ ပိုများပြီး သာမာန် ချီသန့်စင်ခြင်း အဆင့် ကျင့်ကြံသူများထက် ပိုမို ရက်စက်ကြမ်းကြုတ်ကြသည်။

ဘုန်း ဘုန်း ဘုန်း—

ကျောက်ဝူကျိက အားပါသော လက်သီးချက်များကို ဆက်တိုက် ထိုးနှက်လိုက်ရာ သူ့မှော်စွမ်းအင်များသည် မြင်သာသော လေလှိုင်းများအဖြစ် သူ့လက်သီးများမှ ပေါက်ကွဲထွက်ပေါ်လာပြီး ရွေ့လျား အမြောက်စင်ကြီး တစ်ခုကဲ့သို့ ဖြစ်နေသည်။ ယင်း၏ ဖျက်ဆီးအားမှာ အံ့သြစရာ ကောင်းလှသည်။ ထင်ထားသည့်အတိုင်းပင် မနှစ်က ပြိုင်ပွဲတွင် အဆင့် ၄ ရခဲ့သည်မှာ အလကား မဟုတ်ပေ။

စုချန်၏ မျက်နှာထား အနည်းငယ် တင်းမာသွားပြီး သူ့ ဓားငွေ့အင်များ ရုတ်တရက် ပေါက်ကွဲထွက်ပေါ်လာကာ ရေကာတာကျိုး၍ ရေလျှံကျလာသကဲ့သို့ ဖြစ်ပြီး ဓားငွေ့အင် တိုင်ကြီးများ ကောင်းကင်သို့ ထိုးတက်သွားသည်။ တစ်ခဏအတွင်း ထက်ရှသော ဓားအရှိန်အဝါ တစ်ခု သူတို့ဆီသို့ တိုက်ခတ်သွားပြီး မုန်တိုင်းတစ်ခု ဖြတ်သန်းသွားသကဲ့သို့ ကွင်းပြင်တစ်ခုလုံးကို လွှမ်းမိုးသွားသည်။

ဘုန်း ဘုန်း ဘုန်း။

ပေါက်ကွဲသံများသည် မီးရှူးမီးပန်းများ ပေါက်ကွဲသံကဲ့သို့ ဆက်တိုက် ထွက်ပေါ်လာသည်။ ကျောက်ဝူကျိ၏ လက်သီးချက်လှိုင်းများသည် ဓားငွေ့အင်ကြောင့် ချက်ချင်းနီးပါး ကြေမွသွားသည်။ ထက်ရှသော ဓားအလင်းတန်းသည် အရှိန်မလျော့ဘဲ ဒီရေလှိုင်းလုံးကြီးကဲ့သို့ ဆက်လက် တိုးဝင်လာပြီး သူ့ပုံရိပ်ကို ဝါးမြိုလိုက်သည်။

"ဘယ်လိုလုပ် ဖြစ်နိုင်မှာလဲ။ ဒီလောက် အားကောင်းပြီး ကြမ်းတမ်းတဲ့ ဓားအရှိန်အဝါ ဘယ်လိုလုပ် ရှိနိုင်မှာလဲ။"

ကျောက်ဝူကျိ မျက်နှာပျက်သွားသည်။ စုချန်၏ ကျင့်ကြံမှုအဆင့် ဤမျှ နက်ရှိုင်းလိမ့်မည်ဟု သူတို့ မျှော်လင့်မထားခဲ့သဖြင့် နေရာတွင်ပင် အငိုက်မိသွားကြသည်။ သို့သော် သူသည် ချီသန့်စင်ခြင်း နဝမအဆင့် ကျင့်ကြံမှု ရှိပြီး ခန္ဓာကိုယ်တွင် လှုပ်ရှားနေသော မှော်စွမ်းအင်များ ပြည့်နှက်နေသည်။ သူ့သွေးရောင် ဝတ်ရုံပါးက ခန္ဓာကိုယ်ကို ကာကွယ်ပေးထားသဖြင့် ဓားငွေ့အင် ဒီရေလှိုင်း၏ တိုက်ခိုက်မှုကို မနည်း တားဆီးထားနိုင်ခဲ့သည်။ ဟိန်းသံနှင့်အတူ သူ့သိုလှောင်အိတ်ထဲမှ အလင်းရောင် ထွက်ပေါ်လာပြီး လေးလံသော ဓားကြီး တစ်လက် လက်ထဲသို့ ရောက်ရှိလာသည်။ ကျောက်ဝူကျိ ဓားကို လက်နှစ်ဖက်ဖြင့် ဆုပ်ကိုင်ပြီး လေရဟတ် လည်နေသကဲ့သို့ ရမ်းခါလိုက်ရာ ကြမ်းတမ်းသော ဓားငွေ့အင် ဒီရေလှိုင်းကြားတွင် ကွာဟချက် တစ်ခု ဖြစ်ပေါ်လာစေသည်။

"ဓားလား? ဟွန့်၊ မင်းအင်အားက ငါ့ရဲ့ '‌ သေနာပတိ စစ်သည်တော်ဖြိုခွင်းခြင်း' နဲ့ ယှဉ်ရင် ဘာမှ မဟုတ်ဘူး။"

စုချန် မထီမဲ့မြင် ပြုံးလိုက်သည်။ ဓားများသည် ခွန်အားနှင့် အရှိန်အဟုန်ကို အားကိုးရသော လက်နက်များ ဖြစ်သည်။ သူသည် ယခု သေနာပတိဓား ကို ကိုင်ဆောင်ထားခြင်း မရှိသော်လည်း ဓားမွေးမြူခြင်း နည်းစနစ်ကို အချိန်ကြာမြင့်စွာ လေ့ကျင့်ခဲ့သဖြင့် သူ့ခန္ဓာကိုယ် ခွန်အားသည်လည ကိုယ်ကာယ ကျင့်ကြံသူ စစ်စစ်များထက် မနိမ့်ပေ။ ထို့အပြင် သူသည် ဓားသိုင်းပညာ ကို ကျွမ်းကျင်ထားသည်။ ယခု ' သေနာပတိ စစ်သည်တော်ဖြိုခွင်းခြင်း' ကို ပြန်လည် အသုံးပြုလိုက်ပါက ယင်း၏ စွမ်းအားသည် အကြီးအကျယ် တိုးတက်လာပေလိမ့်မည်။

ရွှမ်း—

'တောင်တန်း လောင်ကျွမ်း’ ဓား သည် လေထဲတွင် တုန်ခါသွားပြီး မီးတောက်များ တဖျပ်ဖျပ် လှုပ်ရှားလာသည်။ မူလက သွယ်လျပြီး ပေါ့ပါးသော ဓားသည် ယခု ပေါင်တစ်ထောင်မျှ လေးလံနေသကဲ့သို့ ဖြစ်နေသည်။ယင်းဓားသည် ကောင်းကင်သို့ ထိုးတက်သွားစဉ် ချွင်ကနဲ အသံနှင့်အတူ ကြောက်မက်ဖွယ် စွမ်းအားချင်း ထိခတ်သံ ထွက်ပေါ်လာသည်။ ကျောက်ဝူကျိ နေရာတွင်ပင် ညည်းညူလိုက်ပြီး သူ့ဓားကြီး၏ လည်ပတ်မှုမှာ ချက်ချင်း ရပ်တန့်သွားသည်။ သူ့လက်မှာ ကွဲအက်သွားပြီး ပြင်းထန်သော ရိုက်ခတ်မှုကြောင့် မျက်နှာပင် ဖြူဖျော့သွားသည်။ ချက်ချင်းဆိုသလိုပင် ဓားငွေ့အင်များ ထိုးထွက်လာပြီး သူ့သွေးရောင် ဝတ်ရုံပါးကို အပိုင်းပိုင်း ဆုတ်ဖြဲပစ်လိုက်သည်။

ဖလွပ် ဖလွပ် ဖလွပ်—

သွေးမှုန်များ သူ့ခန္ဓာကိုယ်မှ ပန်းထွက်သွားပြီး မျက်စိတစ်မှိတ်အတွင်း ကျောက်ဝူကျိ၏ ခန္ဓာကိုယ်ပေါ်တွင် ဒဏ်ရာအသေးစား အများအပြား ပေါ်လာသည်။ ၎င်းတို့မှာ ဓားငွေ့အင် ဖြတ်သန်းသွားခြင်းကြောင့် ဖြစ်သည်။ သူ့အင်အား အားလုံး စုပ်ယူခံလိုက်ရသကဲ့သို့ သွေးအိုင်ထဲမှပင် ခံစားလိုက်ရသည်။ သူ့ခန္ဓာကိုယ်ကို အထူးပြုလေ့ကျင့်ထားသဖြင့် ကြံ့ခိုင်နေခြင်းနှင့် သွေးရောင် ဝတ်ရုံပါးက ထိခိုက်မှု အများစုကို လျှော့ချပေးလိုက်ခြင်းသာ မရှိပါက ဤဓားချက်သည် သူ့အသက်ကိုပင် နှုတ်ယူသွားနိုင်သည်။

"ဒါ မဖြစ်နိုင်ဘူး...။"

ကျောက်ဝူကျိ မယုံကြည်နိုင်စွာဖြင့် မျက်လုံးပြူးကြည့်နေစဉ် သူ့ပုံရိပ်ကို အဖြူရောင် အလင်းတန်းက လွှမ်းခြုံသွားပြီး ကြေးမုံပြင် နယ်မြေလွတ်ထဲမှ အတင်းအကျပ် စိတ်ဝိညာဉ် ကူးပြောင်းပို့ဆောင်ရေး လုပ်ခံရကာ ထုတ်ပယ်လိုက်သည်။

စုချန် အနိုင်ရပြီး နောက်တစ်ဆင့် ထပ်တက်သွားသည်။ ။

ကွင်းပြင်အထက်တွင် တိုက်ပွဲ အချက်အလက်များ ပေါ်လာသောအခါ အပြင်ဘက်ရှိ ဂိုဏ်းသား အများအပြား အံ့သြမင်သက်သွားကြသည်။ လူအများအပြား ဒီပွဲကို အာရုံစိုက်နေကြသည်။ စုချန် ကံကောင်းလို့ ဒီအဆင့်ထိ ရောက်လာတာ ဖြစ်ပြီး ကျောက်ဝူကျိ လို ကျွမ်းကျင်သူနဲ့ တွေ့ရင် ရှုံးဖို့ များတယ်လို့ ထင်ထားကြတာ။ ရှုံးသွားတဲ့သူက ကျောက်ဝူကျိ ဖြစ်နေလိမ့်မယ်လို့ ဘယ်သူက ထင်မှာလဲ။

ထို့အပြင် စုချန်၏ ဓားချက်တစ်ချက်တည်းဖြင့် ထိပ်တိုက် ရင်ဆိုင်ရာတွင် ရှုံးနိမ့်သွားခြင်း ဖြစ်သည်။ ရှုပ်ထွေးသော လှုပ်ရှားမှုများ မပါဘဲ လွှမ်းမိုးဖိနှိပ်နိုင်သော စွမ်းအားသက်သက်ဖြင့် အနိုင်ယူလိုက်ခြင်း ဖြစ်သည်။ ဒါက လုံးဝ ယုံကြည်နိုင်စရာ မရှိပေ။ တကယ်တမ်းကျတော့ စုချန်သည် အလွန် မည်းနက်ပြီး သန်မာသွေးဆာနေသော မြင်းမည်း တစ်ကောင် ဖြစ်နေတာကိုး။

"ဘယ်လိုလုပ် ဖြစ်နိုင်မှာလဲ။ ကျောက်ဝူကျိ တောင် သူ့ပြိုင်ဘက် မဟုတ်ဘူးလား။"

လျိုလင် ဤမြင်ကွင်းကို မြင်လိုက်ရသောအခါ လုံးဝ ကြောင်အသွားသည်။ ကျောက်ဝူကျိ ကို အားကိုးပြီး ဂိုဏ်းထဲတွင် ထင်ရာစိုင်းကာ မာနကြီးနိုင်ပြီဟု သူမ ထင်မှတ်ခဲ့သော်လည်း ယခုအခါ သူမ အားကိုးနေသော လူမှာ ဒီလောက်ပဲ ရှိသည်ကို တွေ့ရှိလိုက်ရသည်။ ဒီလောက် လွယ်လွယ်ကူကူ ရှုံးသွားတာလား။ ဒီ စုချန်က ဘီလူးလား။ အဲဒီတုန်းက ခံစားခဲ့ရတဲ့ အရှက်ကွဲမှုကို လက်စားချေဖို့ အခွင့်အရေး ရှိတော့မယ် မထင်ဘူး။

"ချီသန့်စင်ခြင်း နဝမအဆင့်။ နောက်ဆုံးအကြိမ် တွေ့တုန်းက သူ အလွန်ဆုံး သတ္တမအဆင့် ပဲ ရှိသေးတာ မဟုတ်လား။ ဒီကောင်စုတ်လေးက တကယ် စွမ်းရည်ရှိတာပဲ။"

စင်မြင့်ပေါ်တွင် ရပ်နေသော ယန်ယွင်ဖေး ၏ မျက်ခုံးများလည်း နက်ရှိုင်းစွာ တွန့်ချိုးသွားသည်။ အမှန်အတိုင်း ပြောရရင် သူ စုချန်ကို ပြိုင်ဘက်အဖြစ် ဘယ်တုန်းကမှ အလေးအနက် မထားခဲ့ဖူးဘူး။ စိန်ခေါ်ပွဲ ကို လက်ခံခဲ့တာက စုချန်ကို တရားမျှတစွာ သတ်ပစ်ဖို့ အခွင့်အရေး ရှာရုံ သက်သက်ပဲ။ မထင်မှတ်ဘဲ တစ်လတည်း အတွင်းမှာ စုချန်ရဲ့ အင်အားက ဒီလောက် တိုးတက်လာခဲ့တယ်။

ဒါက သူ့ကို အနည်းငယ် စိုးရိမ်စိတ် ဖြစ်ပေါ်စေသည်။ အကယ်၍ စုချန်သာ အခြေတည်အဆင့်ကို အောင်မြင်စွာ ရောက်ရှိသွားပါက သူ့အတွက် ခြိမ်းခြောက်မှု အချို့ ဖြစ်လာနိုင်သည်။ ကံကောင်းသည်မှာ ယန်ယွင်ဖေးသည် ကြိုတင် ပြင်ဆင်မှုများ ပြုလုပ်ထားပြီး ယန်ဝူ၏ အင်အားကို ကြိုတင် မြှင့်တင်ပေးထားသည်။ အကယ်၍ သူတို့ ထိပ်တိုက် တွေ့ဆုံပါက စုချန်ကို ပြင်းထန်စွာ ဒဏ်ရာရစေနိုင်ပြီး အခြေတည်အဆင့် အောင်မြင်စွာ မရောက်နိုင်အောင် တားဆီးနိုင်ကောင်း တားဆီးနိုင်လိမ့်မည်။

သို့သော် ယန်ယွင်ဖေးသည် ဈေးတန်းတွင် စုချန် အသုံးပြုခဲ့သော ဓားသိုင်းပညာကို ရုတ်တရက် သတိရသွားသည်။ ဒီပြိုင်ပွဲမှာ အခုထိ စုချန်က ဓားသိုင်းပညာကိုပဲ သုံးနေသေးတယ်။ သူ ဘယ်လောက်အထိ ကျွမ်းကျင်နေပြီလဲ ဆိုတာ ငါမသိဘူး။ ။ စုချန်သည် ယန်ဝူကို အစကတည်းက သတိထားနေခဲ့ကြောင်း အစပိုင်းကတည်းက အနိုင်ယူမှုများမှတဆင့် သူ့အရှိန်အဟုန်ကို တည်ဆောက်နေခဲ့ကြောင်း သူ မသိလိုက်ပေ။ အခုဆိုရင် ဓားအရှိန်အဟုန်က ပိုပိုပြီး အားကောင်းလာပြီ။ ယန်ဝူနဲ့ တွေ့ရင် သူ့ကို အံ့သြစရာ လက်ဆောင်ကြီး ပေးလိုက်ဦးမယ်။

"သူ တကယ် နိုင်သွားတာပဲ။ ဒီ စုချန်က တကယ် စွမ်းရည်ရှိသားပဲ။"

"ဂိုဏ်းတူအစ်မ ချင်းလန်ရဲ့ မှန်းဆချက်က တကယ် တိကျတာပဲ၊ လေးစားပါတယ်။”

"ဒါကို ကြည့်ရတာ ဒီကောင်လေးကို ပါရမီရှင်လို့ သတ်မှတ်လို့ ရတယ်။ ဒီလောက် တိုတောင်းတဲ့ အချိန်အတွင်း ဒီအဆင့်ထိ ကျင့်ကြံနိုင်တာ၊ ဂိုဏ်းတူအစ်မ ယွဲ့နဲ့ လိုက်ဖက်တယ်လို့ ပြောလို့ရပါတယ်...။"

ကျောက်စိမ်းတောင်ထွတ်မှ အမျိုးသမီး ဂိုဏ်းသားများ အားလုံး သဘောတူကြောင်း ခေါင်းညိတ်လိုက်ကြသည်။ ဒီတိုက်ပွဲမှာ စုချန် ပြသခဲ့တဲ့ အင်အားက သူတို့ရဲ့ အသိအမှတ်ပြုမှုကို ရရှိစေခဲ့သည်။ သို့သော် ချင်းလန်၏ မျက်နှာသည် ယခုအချိန်တွင် ပိုလေးနက်သွားသည်။ အဘယ်ကြောင့်ဆိုသော် အခြား ကြေးမုံပြင် နယ်မြေလွတ် တစ်ခုတွင် သူတို့ အထူးမျှော်လင့်ထားသော ချူးရန် သည် ပြင်းထန်သော တိုက်ပွဲတစ်ခု ကြုံတွေ့နေရသောကြောင့် ဖြစ်သည်။

သူမလည်း ကံဆိုးသည်၊ မနှစ်က အဆင့် ၃ ရခဲ့သော ကျိုးလျဲ့ နှင့် သွားတိုးသည်။ ဒီလူသည် အဆိပ်သိုင်းပညာ တစ်မျိုးကို တတ်မြောက်ထားပြီး ကိုင်တွယ်ရ အလွန် ခက်ခဲသည်။ ချူးရန်၏ ကျင့်ကြံမှုအဆင့် မနိမ့်သော်လည်း အတွေ့အကြုံ နည်းပါးမှုကြောင့် ထောင်ချောက်များ အတွင်းသို့ အကြိမ်ကြိမ် ကျရောက်ခဲ့သည်။ နောက်ဆုံးတွင် အင်အားသုံး၍ ပြိုင်ဘက်ကို အနိုင်ယူနိုင်ခဲ့သော်လည်း သူမလည်း ပြင်းထန်သော ဒဏ်ရာရခဲ့ပြီး အတွင်းပိုင်း မှော်စွမ်းအင်များ အဆိပ်သင့်သွားသဖြင့် တဖြည်းဖြည်း အားနည်းလာသည်။ နောက်တစ်ဆင့် တက်လှမ်းရန် အလွန် ခက်ခဲမည် ဖြစ်ပြီး ချန်ပီယံ ဖြစ်နိုင်ချေမှာ နည်းပါးသွားပြီ ဖြစ်သည်။

တစ်ချိန်တည်းမှာပင်။

အခြား ကွင်းပြင်များမှ တိုက်ပွဲများလည်း တစ်ခုပြီးတစ်ခု ပြီးဆုံးသွားကြသည်။ ယန်ဝူသည် ဆက်လက် အောင်ပွဲခံနေပြီး မုန်တိုင်းကဲ့သို့ ပြိုင်ဘက်များကို အနိုင်ယူကာ သူ့စိတ်ဓာတ် တက်ကြွမှုကြောင့် လူအများ၏ ထောက်ခံမှုကို ရရှိနေသည်။ အခြားတစ်ဖက်တွင် လုချိုး သည် ဝမ်းနည်းဖွယ်ရာ ရှုံးနိမ့်သွားသည်။ သူ့ကျင့်ကြံမှုအဆင့်က နဂိုကတည်းက မမြင့်မားပေ။ 'စီးဆင်း စမ်းရေကြည်’ ဓား၏ ထူးခြားသော စွမ်းအားများကို အသုံးချပြီး ထိပ်ဆုံး ၂၀ စာရင်းဝင်အောင် လုပ်နိုင်ခဲ့ခြင်းသာ ဖြစ်သည်။ ဒါက သူ ဓားစတင်လေ့လာချိန်ကတည်းက အကောင်းဆုံး အောင်မြင်မှု ဖြစ်နေပြီ။

ယခုအချိန်တွင် အပြင်ဂိုဏ်း ပြိုင်ပွဲ၏ ထိပ်ဆုံး ၁၀ ယောက် စာရင်း ထွက်ပေါ်လာပြီ ဖြစ်ပြီး ကွင်းပြင်ရှိ ကျောက်စိမ်းနံရံပေါ်တွင် နောက်ဆုံး နာမည် ၁၀ ခုသာ ကျန်ရှိတော့သည်။ ထိပ်ဆုံး ၁၀ ယောက် တိုက်ပွဲသည် နောက်ဆုံး အထွတ်အထိပ် ဖြစ်ပြီး လူတိုင်း အနီးကပ် စောင့်ကြည့်နေကြသည်။ ဂိုဏ်း၏ အထက်ပိုင်း ခေါင်းဆောင် အချို့ပင် ဤအရာကို အာရုံစိုက်လာကြပြီး ယခုနှစ် အပြင်ဂိုဏ်း ထိပ်တန်း ဂိုဏ်းသား ဘယ်သူ ဖြစ်လာမလဲ ဆိုတာ သိချင်နေကြသည်။ ။

အခန်း (၄၀) - ဓားချက်တစ်ချက်တည်း

"ငါ ရှုံးသွားပြီ ။"

သတ္တမမြောက် နေရာလွတ်ပေါ်တွင် စုချန်က မိုးမီးလောင်ကျွမ်းစေနိုင်သော ဓားငွေ့အင် တစ်ခု ထုတ်လွှတ်လိုက်သည်နှင့် သူ့နှင့် မျက်နှာချင်းဆိုင်ရှိ ဂိုဏ်းသားသည် မြေကြီးပေါ်သို့ လဲကျသွားပြီး မျက်နှာ ဖြူဖျော့နေသည်။ သူ အရှုံးပေးလိုက်သည်။

ဒါက ထိပ်ဆုံး ၁၀ ယောက် စာရင်းဝင်ပြီးနောက် သူ့ဒုတိယမြောက် ပွဲစဉ် ဖြစ်သည်။ သူ့ပြိုင်ဘက်မှာ မနှစ်က အဆင့် ၈ ရခဲ့သော ထိပ်တန်း ကစားသမား ဖြစ်ပြီး ကျောက်ဝူကျိနှင့် ယှဉ်လျှင် အများကြီး အားနည်းသဖြင့် စုချန် အလွယ်တကူ အနိုင်ယူလိုက်နိုင်သည်။ ဓားချက်တစ်ချက်တည်းသာ သုံးခဲ့သည်။ ဆက်တိုက် အနိုင်ရရှိမှုများက သူ့ယုံကြည်မှုကို တိုးပွားစေပြီး တဖြည်းဖြည်းနှင့် ပြိုင်ဘက်ကင်းသော အရှိန်အဝါ တစ်ခုအဖြစ် ပြောင်းလဲလာသည်။ ယုံကြည်မှုနှင့် အရှိန်အဟုန်သည် ဓားချက်တစ်ချက်၏ စွမ်းအားကို တိုက်ရိုက် သက်ရောက်မှု ရှိသော အဓိက အချက်များ ဖြစ်သည်။

ယခုအချိန်တွင် စုချန်၏ အရှိန်အဝါသည် အထွတ်အထိပ်သို့ ရောက်လုနီးပါး ဖြစ်နေပြီ။ သို့သော် သူက ထိန်းထားပြီး ပြိုင်ဘက်အစစ်ကို စောင့်ဆိုင်းနေသည်။ ဒီပွဲစဉ် နှစ်ပွဲပြီးနောက် စုချန်သည် ပထမနေရာအတွက် ယှဉ်ပြိုင်ခွင့် ရရှိသွားပြီ ဖြစ်သည်။ ရှေ့က တစ်စုံတစ်ယောက် အလှည့်ကျော်သွားခဲ့သဖြင့် ယခု ယန်ဝူ နှင့် ချူးရန် တို့၏ တိုက်ခိုက်ပွဲ စတင်နေပြီ ဖြစ်သည်။ ဒီနှစ်ယောက်ထဲက အနိုင်ရသူနှင့် စုချန်က နောက်ဆုံး ဗိုလ်လုပွဲ ယှဉ်ပြိုင်ရမည် ဖြစ်သည်။

ယခုအချိန်တွင် နံပါတ်တစ် နေရာလွတ်ပေါ်ရှိ တိုက်ပွဲမှာ အရှိန်အဟုန် ပြင်းထန်နေသည်။ ယန်ဝူ၏ ပုံရိပ်သည် တောင်ပေါ်မျောက်တစ်ကောင်ကဲ့သို့ တဖျပ်ဖျပ် လှုပ်ရှားနေပြီး အရိပ်များစွာ ကျန်ရစ်စေသည်။ ချူးရန် ဟုခေါ်သော အမျိုးသမီး ဂိုဏ်းသားသည် ကျောက်စိမ်းတောင်ထွတ် လမ်းစဉ်ကို ကျင့်ကြံသူ ဖြစ်ပုံရသည်။ သူမ၏ လက်နက်မှာ ပုလွေထဲတွင် ဝှက်ထားသော ဓားတစ်လက် ဖြစ်ပြီး ပေါ့ပါးပြီး လှည့်ဖျားတတ်ကာ ယန်ဝူ၏ အရှိန်ကို မနည်း လိုက်နေရသည်။ ဒီအမျိုးသမီးသည် ကျင့်ကြံမှုတွင် အတော်လေး ကျွမ်းကျင်ပြီး ကောင်းမွန်သော ကိုယ်ဖော့ပညာ နှင့် သိမ်မွေ့သော ဓားသိုင်းပညာကို ပိုင်ဆိုင်ထားသည်။ သို့သော် ယခင်ပွဲစဉ်တွင် ရရှိခဲ့သော ဒဏ်ရာများကြောင့် ခန္ဓာကိုယ်ထဲရှိ အဆိပ်များကို အချိန်တိုအတွင်း မရှင်းထုတ်နိုင်ဘဲ တိုက်ခိုက်နေစဉ်အတွင်း တဖြည်းဖြည်း အားနည်းလာသည်။

မကြာမီ ယန်ဝူက အခွင့်အရေးရပြီး သူမ၏ လက်မောင်းကို ဓားဖြင့် ခုတ်လိုက်သည်။ ထိုအချိန်တွင် စုချန် ယန်ဝူ၏ လက်ထဲမှ လက်နက်ကို သတိထားမိလိုက်သည်။ ၎င်းသည် ရှည်လျားပြီး ကျဉ်းမြောင်းသော လက်ကောက်ဝတ်သုံးဓား တစ်စုံ ဖြစ်ပြီး နှံကောင်၏ လက်သည်းကဲ့သို့ ထူးဆန်းပြီး ကြမ်းတမ်းသည်။ တကယ်တမ်းတွင် ၎င်းသည် မိစ္ဆာသားရဲ၏ သွေးဖြင့် သွန်းလုပ်ထားသော မိစ္ဆာဓား ဖြစ်ပြီး ကြောက်မက်ဖွယ် စွမ်းအားရှိကာ စစ်မှန်သော မှော်ဓားတစ်လက်နှင့် တူညီသည်။

အင်အားကွာခြားမှု ဖြစ်ပေါ်လာသဖြင့် ချူးရန် ချက်ချင်း အကြီးအကျယ် ခံစစ်အနေအထား ရောက်သွားသည်။ သူမက ခေါင်းမာပြီး ပင်ပန်းနွမ်းနယ်နေပြီ ဖြစ်သော်လည်း ဆက်လက် တိုက်ခိုက်ရန် ကြိုးစားနေသည်။ နောက်ဆုံးတွင် ချင်းလန် ဝင်ရောက်စွက်ဖက်ပြီး သူမအစား အရှုံးပေးကြောင်း ဝန်ခံလိုက်မှသာ ပြိုင်ပွဲ ပြီးဆုံးသွားသည်။ ဆက်တိုက်ခိုက်နေပါက ချူးရန် အကြီးအကျယ် ထိခိုက်နစ်နာပြီး သူမ၏ အတွင်းအား ပျက်စီးသွားနိုင်သည်။

"ဒီ ချူးရန် က ကျောက်စိမ်းတောင်ထွတ်ရဲ့ တန်ဖိုးထားပြီး အားကိုးခံရတဲ့ ဂိုဏ်းသားဆိုတာ သိသာတယ်။" စုချန် အသိအမှတ်ပြုလိုက်သည်။

အမွှေးတိုင် တစ်ဝက်လောက် ကြာပြီးနောက် အဖြူရောင် အလင်းတန်း တစ်ခုက သူ့ခန္ဓာကိုယ်ကို လွှမ်းခြုံသွားပြီး နံပါတ်တစ် နေရာလွတ်ပေါ်သို့ စိတ်ဝိညာဉ် ကူးပြောင်း ပို့ဆောင်ခံလိုက်ရတော့သည်။ အပြင်ဂိုဏ်း ပြိုင်ပွဲကြီး၏ နောက်ဆုံး ဗိုလ်လုပွဲ စတင်တော့မည်။

"ချူးရန်တောင် ရှုံးသွားလိမ့်မယ်လို့ ထင်မထားဘူး။ ဒီ ယန်ဝူ က တကယ် သန်မာတာပဲ။"

"သူက ချင်းယန်တောင်ထိပ်ရဲ့ တန်ဖိုးထားတဲ့ ဂိုဏ်းသားလို့ ကြားတယ်၊ အင်အားက မနည်းပါဘူး။"

"ဘုရားရေ၊ သူ့ပြိုင်ဘက်က စုချန် ပါလား။ တိုက်ဆိုင်လိုက်တာ၊ ဒီနှစ်ယောက် အရင်က တိုက်ဖူးတယ်လေ။ အဲဒီတုန်းက ယန်ဝူ က စုချန်ကို မနိုင်ခဲ့ဘူး..."

"လတွေ ကြာသွားပြီလေ။ ယန်ဝူ ရဲ့ အင်အားက အခု အများကြီး တိုးတက်လာပြီ။ ချင်းယန်တောင်ထိပ် ရဲ့ ပျိုးထောင်မှုနဲ့ဆို ဓားသင်္ချိုင်းထဲက စုချန်က ဘယ်လိုလုပ် ယှဉ်နိုင်မှာလဲ။ မထင်မှတ်တာက မနှစ်က အပြင်ဂိုဏ်း ထိပ်တန်း ၁၀ ယောက် အကုန်လုံး ပြုတ်ကုန်ကြတာပဲ။ ဒီနှစ်တော့ လူသစ်မြင်းမည်း နှစ်ကောင် ဗိုလ်လုပွဲ ပြိုင်ကြတော့မယ် ။"

"ဒါ သေချာပေါက် ကြည့်ကောင်းမယ့်ပွဲပဲ ။"

လူအုပ်ကြီးက တီးတိုး ပြောဆိုနေကြသည်။ သို့သော် လူအများစုက ယန်ဝူ ဘက်ကို ပိုအားပေးကြသည်။ လူအုပ်ထဲတွင် ရပ်နေသော စုလုံက သူမအစ်ကိုကြီး နာမည်ကို ကျယ်လောင်စွာ အော်ဟစ်အားပေးနေပြီး ဘေးနားမှ လူများ၏ အကြည့်များကို လုံးဝ ဂရုမစိုက်ပေ။ ကျောက်စိမ်းတောင်ထွတ် တွင်လည်း ချင်းလန်နှင့် အခြားသူများ စုချန်အပေါ် ကြည့်သော အကြည့်များ ပြောင်းလဲသွားသည်။

"လုပ်လိုက် စုချန်။ ငါတို့အတွက် လက်စားချေပေး ။"

"ဘယ်သူ ပထမရရ ကိစ္စမရှိဘူး၊ ချင်းယန်တောင်ထိပ်က လူတော့ မဖြစ်ရဘူး။"

"အဲဒီ ယန်ဝူ က သိပ်ရက်စက်လွန်းတယ်။ စုချန်၊ ကြိုးစားထား။"

သူတို့ မျှော်လင့်ထားသော ချူးရန် မှာ ယန်ဝူ၏ လက်ချက်ဖြင့် ရှုံးနိမ့်ပြီး ပြင်းထန်စွာ ဒဏ်ရာရသွားသဖြင့် သူတို့အားလုံး သဘာဝကျကျ စုချန်ဘက်သို့ လှည့်ပြီး အားပေးကြသည်။ အခြေအနေ ဘယ်လိုပဲ ဖြစ်နေပါစေ စုချန်နှင့် ယွဲ့လျိုရွှမ်၏ ပတ်သက်မှုအရ သူတို့က မိသားစုလို ဖြစ်နေပြီ။

"စုချန်။ နောက်ဆုံးတော့ ငါတို့ ပြန်တွေ့ကြပြီပဲ။"

နေရာလွတ်ပေါ်တွင် ယန်ဝူသည် ဓားကို ကိုင်လျက် ရပ်နေပြီး မျက်နှာတွင် အမုန်းတရားများ ပြည့်နှက်နေသည်။ သူသည် သခင်လေးပြီးလျှင် ယန်မိသားစု၏ ဒုတိယမြောက် အထူးချွန်ဆုံး ပါရမီရှင် ဖြစ်သည်။ သူသည် တိုက်ပွဲများနှင့် ရုန်းကန်မှုများကြားတွင် ကြီးပြင်းလာပြီး ဘယ်တုန်းကမှ မရှုံးဖူးသလောက်ပင်။

ရှုတောင်သို့ ဝင်ရောက်ပြီးနောက် သခင်လေး ရည်မှန်းချက်ကြီးများ အောင်မြင်ရန်နှင့် ယန်မိသားစု ဂုဏ်သိက္ခာကို မြှင့်တင်ရန် သူ ဆုံးဖြတ်ထားသည်။ သို့သော် သခင်လေး ပေးသော ပထမဆုံး တာဝန်မှာ ဓားသင်္ချိုင်းသို့ သွားပြီး စုချန်ကို ရှင်းပစ်ရန် ဖြစ်သည်။ သူ အကြီးအကျယ် ကျရှုံးခဲ့သည်။ ကံကောင်းသည်မှာ သခင်လေးက သူ့ကို လက်မလျှော့ဘဲ နောက်ထပ် အခွင့်အရေး တစ်ကြိမ် ပေးခဲ့သည်။ ဒဏ်ရာများ ပျောက်ကင်းအောင် ကုသပေးပြီး ချင်းယန်တောင်ထိပ်မှ တန်ဖိုးရှိသော ဆေးလုံးများ စွန့်ကြဲပေးကာ သူ့အင်အား လျင်မြန်စွာ တိုးတက်လာအောင် ကူညီပေးခဲ့သည်။

ယခု သူသည် မိစ္ဆာဓားတစ်လက်ကိုပင် ကိုင်ဆောင်ထားပြီ။ သူ အောင်ပွဲခံကာ တက်လှမ်းလာခဲ့ပြီး ပါရမီရှင် အများအပြား သူ့ဓားချက်အောက်တွင် ကျရှုံးခဲ့ရသည်။ ယခုအချိန်တွင် ယန်ဝူ ယုံကြည်မှု အပြည့်ရှိနေသည်။ လူတိုင်းရှေ့တွင် စုချန်ကို ခြေဖြင့်နင်းချေပြီး သူ့အရှက်ကွဲခဲ့ရသည်များကို ဆေးကြောပစ်ချင်နေသည်။

"စုချန်၊ မင်း ဒီအဆင့်ထိ ရောက်လာမယ်လို့ ငါ လုံးဝ ထင်မထားခဲ့ဘူး။ တခြားသူတွေ လက်ချက်နဲ့ မင်း ပြုတ်သွားမှာကို စိုးရိမ်နေတာ။ ဘုရားသခင် ကျေးဇူးကြောင့် မင်း ငါ့ဆီ ရောက်လာပြီ၊ ငါ့လက်နဲ့ မင်းကို အနိုင်ယူခွင့် ရပြီ..."

"မင်းလို ရှုံးဖူးတဲ့ကောင်က စကားသိပ်များတာပဲ။"

စုချန် သူနှင့် အပြန်အလှန် စကားနိုင်လုဖို့ စိတ်မဝင်စားပေ။ လူဆိုးတိုင်း ဘာလို့ စကားအများကြီး ပြောရတာ ကြိုက်ကြသလဲ ဆိုတာ သူ တကယ် နားမလည်နိုင်။ စကားများများ ပြောရင် ပိုစွမ်းအားကြီးလာလို့လား။ တကယ့် စစ်မြေပြင် ရောက်ရင် သေရေးရှင်ရေး တိုက်ပွဲတွေက မျက်စိတစ်မှိတ်အတွင်း အဆုံးအဖြတ် ပေးနိုင်တယ်။ ဘယ်သူက မင်းရဲ့ အဓိပ္ပာယ်မရှိတဲ့ စကားတွေကို နားထောင်ဖို့ အချိန်ရှိမှာလဲ။

ထို့ကြောင့် ပြိုင်ပွဲစရန် ခေါင်းလောင်းသံ မြည်သည်နှင့် တပြိုင်နက် စုချန် စတင် လှုပ်ရှားလိုက်သည်။ မိုးမီးလောင်ကျွမ်းစေနိုင်သော ဓားငွေ့အင် ပေါက်ကွဲထွက်ပေါ်လာပြီး မီးနဂါးတစ်ကောင် လေထဲသို့ ပျံတက်သွားသကဲ့သို့ ဖြစ်သည်။ တစ်ချိန်တည်းမှာပင် သူသည် မီးစွဲ နှလုံးသား သိုင်းကွက်သုံးလိုက်ရာ သွေးနှင့် စွမ်းအင်များ ဆူပွက်လောင်ကျွမ်းလာပြီး သူ့စွမ်းအားနှင့် အရှိန်အဝါ ချက်ချင်း မြင့်တက်လာသည်။

"မင်း..."

စုချန်၏ ယဉ်ကျေးမှု မရှိသော လုပ်ရပ်ကြောင့် ယန်ဝူ အံ့သြသွားသည်။ ဓားငွေ့အင်နှင့် မီးလှိုင်းများ တိုးဝင်လာသည်ကို မြင်လိုက်ရပြီး ပြင်းထန်သော အပူရှိန်ကြောင့် မျက်နှာပျက်သွားကာ ဓားကို အရှေ့သို့ အမြန် ဝှေ့ယမ်းလိုက်သည်။ အေးစက်ပြီး ထက်ရှသော ဓားအလင်းတန်း လက်ခနဲ ဖြစ်သွားပြီး မိစ္ဆာဓားက ကောင်းကင်ကို ပိုင်းဖြတ်ကာ မီးလှိုင်းများကို ဆုတ်ဖြဲပစ်လိုက်သည်။ သူ့ပုံရိပ်သည် လျှပ်စီးကဲ့သို့ ပြေးထွက်သွားပြီး သရဲတစ္ဆေ တစ်ကောင်ကဲ့သို့ တိုးဝင်လာသည်။

"မင်း ငါ့ကို ဒီနည်းလမ်းနဲ့ တိုက်ချင်တုန်းလား။ စုချန်၊ ငါ အရင်က လူ မဟုတ်တော့ဘူးကွ ။"

စကားပြောရင်း သူ လက်မောင်းကို ဆန့်တန်းလိုက်ရာ ထူးဆန်းသော ဓားအလင်းတန်း တစ်ခု စုချန်ဆီသို့ ခုတ်ပိုင်းလာသည်။ သို့သော် ကြောက်မက်ဖွယ် ကောင်းသော အရှိန်အဝါ တစ်ခု ချက်ချင်း ကျဆင်းလာသည်။ ယခုအချိန်တွင် စုချန်သည် မီးတောက်များဖြင့် လောင်ကျွမ်းနေပြီး ဝတ်ရုံများ လွင့်ပျံကာ ဆံပင်ရှည်များ လေထဲ ကခုန်နေသည်မှာ ပေါက်ကွဲကာစ မီးတောင်သကဲ့သို့ပင်။

ယန်ဝူ သူ့ခန္ဓာကိုယ် တောင့်တင်းသွားသည်ကို ခံစားလိုက်ရပြီး ပတ်ဝန်းကျင် လေထု ခဲသွားသကဲ့သို့ ဖြစ်သွားသည်။ အလောင်းတောင်၊ သွေးပင်လယ် မြင်ကွင်းတစ်ခု သူ့မျက်စိရှေ့တွင် ပေါ်လာသည်။ စုချန်သည် စစ်မြေပြင်မှ ပြိုင်ဘက်ကင်း စစ်နတ်ဘုရား တစ်ပါးကဲ့သို့ စစ်သည်တော် ထောင်ပေါင်းများစွာကို ဆုတ်ခွာသွားစေနိုင်သော စွမ်းအားဖြင့် ဖိချလိုက်သည်။

ဓားအရှိန်အဟုန်။ ဒါ ဓားအရှိန်အဟုန်ပဲ။ စုချန်သည် ဆက်တိုက် အနိုင်ရရှိခဲ့ပြီး သူစုဆောင်းထားသော အရှိန်အဟုန်သည် ယခု သူ့ဓားတွင် စုစည်းနေပြီ ဖြစ်သည်။ ထုတ်လွှတ်လိုက်သောအခါ ဖျက်ဆီးအား အလွန် ကြီးမားလှသည်။ တစ်ခဏအတွင်း ယန်ဝူ၏ စိတ်ဓာတ်ကို ချေမှုန်းဖျက်ဆီးပစ်လိုက်သည်။ ဓား၏ အရှိန်အဝါသည် မမြင်ရသော တောင်ကြီးတစ်လုံး ဖိချလိုက်သကဲ့သို့ ဖြစ်ပြီး သူ့ကို ထိတ်လန့်စေကာ အကြောင်းပြချက်မရှိဘဲ ကြောက်ရွံ့လာစေသည်။

သူသည် အကျပ်အတည်း ကြုံနေရသော သားရဲတစ်ကောင်ကဲ့သို့ ဟိန်းဟောက်လိုက်ပြီး မိစ္ဆာဓားကို ရမ်းကားစွာ ဝှေ့ယမ်းကာ အေးစက်သော အလင်းတန်းများကို ထုတ်လွှတ်လိုက်ရာ ကွင်းပြင်တွင် အပေါက်အပြဲများ ဖြစ်ပေါ်သွားသည်။ သို့သော် စုချန်ကို အနည်းငယ်မျှ မထိခိုက်စေနိုင်ပေ။

ချက်ချင်းဆိုသလိုပင် တောက်ပသော မီးတောက်တစ်ခု ကောင်းကင်မှ ကျဆင်းလာပြီး ဥက္ကာခဲ ပြုတ်ကျလာသကဲ့သို့ ဖြစ်ကာ လောင်ကျွမ်းနေသော ဓားအလင်းတန်းက အရာအားလုံးကို ပြာကျစေလိုက်သည်။ ယန်ဝူ၏ မျက်လုံးများ ပြူးကျယ်သွားပြီး သူ့အကာအကွယ် ဝတ်ရုံများ ဓားငွေ့အင်ကြောင့် စုတ်ပြဲသွားကာ မီးစွဲလောင်သွားသည်။ ထို့နောက် သူ နောက်သို့ လဲကျသွားပြီး အဖြူရောင် အလင်းတန်း တစ်ချက်ဖြင့် ဝိညာဉ်သယ်ပို့ ခေါ်ဆောင်သွားခြင်း ခံလိုက်ရသည်။

ဓားတစ်လက်။ ဓားချက်တစ်ချက်တည်း ။

လူတိုင်းကို အံ့သြစေခဲ့သော မြင်းမည်း ယန်ဝူ သည် စုချန်၏ ဓားချက်တစ်ချက်တည်းဖြင့် ရှုံးနိမ့်ပြီး ပြိုင်ပွဲမှ ထွက်သွားရလေသည်။