အခန်း (၅၉-၆၀)

အခန်း (၅၉) - ပန်းတိုင်၊ စစ်မှန်သော မျိုးဆက်

အဒေါ် ပိုင်လင်း ၏ ပါရမီသည် တကယ်တမ်းတွင် အလွန် အားကောင်းသည်။

ပိုင်မိသားစုသည် တစ်ချိန်က မသေမျိုး ကျောက်စိမ်း မိသားစု ဟု ကျော်ကြားခဲ့သည်။ သူတို့၏ သွေးမျိုးဆက်သည် ထူးခြားပြီး တမူထူးခြားသော ကျောက်စိမ်း ဝိညာဉ်အမြစ် ရှိကာ ကျောက်စိမ်းနန်းတော် သိုင်းပညာ ဟုခေါ်သော ထူးခြားသည့် မိသားစုပိုင် သိုင်းပညာကို ကျင့်ကြံနိုင်သည်။

ဒါက အလွန် ရှားပါးသော ကောင်းကင်အဆင့် သိုင်းပညာ တစ်ခု ဖြစ်သည်ဟု ဆိုကြသည်။

ပိုင်မိသားစုသည် ၎င်းကို အသုံးပြုပြီး အရှေ့ဖက်ဒေသကို လွှမ်းမိုးခဲ့ဖူးပြီး အလွန် အင်အားကြီးမားသော ရှေးဟောင်း မိသားစုကြီး တစ်ခု ဖြစ်ခဲ့သည်။

သို့သော် နောက်ပိုင်းတွင် နတ်ဘုရား အသွင်ပြောင်းအဆင့် ကျင့်ကြံသူ တစ်ဦး၏ ဖျက်ဆီးခြင်းကို ခံခဲ့ရသည်။ ပြင်းထန်သော အဆိပ်များ လွှမ်းခြုံမှုအောက်တွင် မိသားစုဝင် ထောင်ပေါင်းများစွာ အားလုံးနီးပါး သေဆုံးခဲ့ရပြီး ငယ်ရွယ်သော ပိုင်လင်း တစ်ဦးတည်းသာ စုချန် မိခင်၏ ကယ်ထုတ်မှုကြောင့် လွတ်မြောက်ခဲ့ရသည်။

ထိုလူ၏ နာမည်ကို ပိုင်လင်းက လုံးဝ ထုတ်မပြောပေ။

တဖက်လူက အဆိပ်အသုံးပြုရာတွင် ကျွမ်းကျင်သော နတ်ဘုရား အသွင်ပြောင်းအဆင့် ကျင့်ကြံသူသက်ကျားအိုကြီး တစ်ကောင် ဖြစ်ကြောင်းသာ စုချန် သိထားသည်။

ဖြစ်နိုင်တာက စုချန်ရဲ့ အင်အားအဆင့် ပြည့်မီသွားတဲ့ အခါကျမှ အဒေါ်ပိုင်ရဲ့ မိသားစုကို ဖျက်ဆီးခဲ့တဲ့ တရားခံက ဘယ်သူလဲ ဆိုတာ သိခွင့်ရလိမ့်မယ်။

အဲဒီကျမှ သဲလွန်စ လိုက်ပြီး သူ့မိဘတွေကို လိုက်လံသတ်ဖြတ်နေတဲ့ ရန်သူကို ရှာဖွေနိုင်လိမ့်မယ်။

ယခုအခါ အဒေါ်သည် ခန္ဓာကိုယ်ထဲရှိ အဆိပ်အတောက်များကို အောင်မြင်စွာ ဖယ်ရှားနိုင်ခဲ့ပြီး ကျင့်ကြံရေးပါရမီ ပြန်လည် ပေါ်ထွက်လာပြီ ဖြစ်သည်။ သူမ၏ စုဆောင်းထားရှိမှု မှော်စွမ်းအင်များနှင့် ဆိုလျှင် မကြာမီ အခြေတည်အဆင့် ကို အောင်မြင်စွာ ရောက်ရှိနိုင်တော့မည် ဖြစ်ပြီး ထိုထက်ပို၍ပင် တက်လှမ်းနိုင်လိမ့်မည်။

မိသားစုတွင် သူမ ရှိနေသဖြင့် စုချန် အများကြီး စိတ်အေးသွားရသည်။

သို့သော် မတော်တဆ ဖြစ်မှာ စိုးရိမ်သဖြင့် သူသည် မှော်ရတနာ နှစ်ခုနှင့် မှော်ပစ္စည်း အများအပြားကို အဒေါ်နှင့် မိသားစု ကာကွယ်ရေးအတွက် ချန်ထားခဲ့သည်။

ရွှမ်လိပ် ဒိုင်း နှင့် တောင်ဖြို တံဆိပ်တုံး တို့ကို သူ အသုံးပြုရတာ အဆင်ပြေခဲ့သဖြင့် ချန်ထားခဲ့သည်။

ယင်ဝိညာဉ် အလံတံခွန် ကတော့ အရမ်း ထင်ရှားလွန်းပြီး မိစ္ဆာဂိုဏ်း၏ အာရုံစိုက်မှုကို ဆွဲဆောင်နိုင်သဖြင့် စုချန် ပြန်ယူသွားပြီး ကောင်းကင်ဝါးမြို သားရဲဝိညာဉ် ကို ဝါးမြိုသန့်စင်ခိုင်းရန် စီစဉ်လိုက်သည်။

"မိသားစုအတွက် အဒေါ် ရှိတယ် ။ မင်း စိတ်မပူနဲ့။ ကောင်းကောင်း ကျင့်ကြံပြီး အင်အား တိုးတက်အောင် လုပ်ပါ။ ယွဲ့မိသားစု က ငါတို့နဲ့ ကျေးဇူး ရှိဖူးတော့ ယုံကြည်ရလောက်ပါတယ်။ မင်း ယွဲ့လျိုရွှမ် ကို ယုံကြည်လို့ ရမှာပါ။"

"ဒါ့အပြင် ရှုတောင်ရဲ့ ဖွဲ့စည်းပုံက နက်ရှိုင်းတယ်။ မင်းအဖေ တစ်ချိန်တုန်းက ရှုတောင် အထက်ပိုင်း ခေါင်းဆောင် တစ်ယောက်နဲ့ ရင်းနှီးတဲ့ ဆက်ဆံရေး ရှိခဲ့ဖူးတယ်။ သူ မင်းအတွက် ရှုတောင်မှာ လက်ဆောင်တစ်ခု ချန်ထားခဲ့တယ်။ မင်း အမွေခံ ဂိုဏ်းသား ဖြစ်လာတဲ့ အခါကျရင် သိရလိမ့်မယ်။"

ပြန်လည်မထွက်ခွာမီ အဒေါ် ပိုင်လင်းက သူ့ကို လျှို့ဝှက်ချက် တစ်ခု ပြောပြလိုက်သည်။

မူလက မိသားစု အနေဖြင့် ဘာမဆို ပေးဆပ်ပြီး သူ့ကို ရှုတောင်သို့ ပို့ဆောင်ခဲ့ခြင်းမှာ ရှုတောင်သည် အနောက်တောင်ပိုင်းတွင် နံပါတ်တစ် ကျင့်ကြံခြင်း ဂိုဏ်းကြီး ဖြစ်သောကြောင့် တစ်ခုတည်း မဟုတ်ပေ။

ဒါက သူ့အဖေ အဲဒီတုန်းက ချန်ထားခဲ့တဲ့ အစီအစဉ်လည်း ဖြစ်နေတာကိုး။

"ရှုတောင် အမွေခံ ဂိုဏ်းသား ဟုတ်လား။ ကျွန်တော် ကြိုးစားပါ့မယ်။"

စုချန် ခေါင်းညိတ် သဘောတူလိုက်သည်။

အရင်တုန်းက သူသည် ကျင့်ကြံပြီး သန်မာလာအောင် လုပ်ရမည်ဟုသာ သိထားသော်လည်း ရှင်းလင်းပြတ်သားသော ပန်းတိုင် မရှိခဲ့ပေ။

အခု သူ့မှာ ရှိပြီ။

ရွှေရောင် အမြုတေ စုစည်းပြီး ရှုတောင် အမွေခံ ဂိုဏ်းသား ဖြစ်လာရမယ်။ အဖေ သူ့အတွက် ချန်ထားခဲ့တဲ့ လက်ဆောင်က ဘာဖြစ်မလဲ။

ခန္ဓာကိုယ်ထဲက ကောင်းကင်ဝါးမြို သားရဲဝိညာဉ် နဲ့ ဆက်နွယ်နေမလား။

ဖြစ်နိုင်တာက အဲဒီအချိန်ရောက်ရင် သူ ကိုယ့်ဇာစ်မြစ်ရဲ့ လျှို့ဝှက်ချက်ကို သိခွင့်ရလိမ့်မယ်။

မျှော်လင့်ချက်များဖြင့် စုချန် ခရီးစတင်လိုက်ပြီး ဓားပျံစီးကာ ကောင်းကင်သို့ ပျံတက်ပြီး ရှုတောင်သို့ ဦးတည်လိုက်သည်။

အခြေတည်ပြီးနောက် သူ့တွင် နတ်ဘုရား အာရုံ ဖြစ်ပေါ်လာပြီ ဖြစ်ရာ ဓားပျံကို ထိန်းချုပ်ရတာ ပိုမို လွယ်ကူသက်သာလာသည်။ ဓားစီးပြီး လေကို ခွင်းကာ တောင်နှင့် မြစ်များကို ဖြတ်ကျော်ရသည်မှာ ကျင့်ကြံသူ တစ်ယောက်၏ လွတ်လပ်ပေါ့ပါးမှုကို အမှန်တကယ် ခံစားလိုက်ရသည်။

သုံးရက် ကြာပြီးနောက် စုချန် ရှုတောင်သို့ ပြန်ရောက်လာသည်။

လမ်းတစ်လျှောက်တွင် ဂိုဏ်းသား အများအပြား ဓားပျံစီးပြီး ထွက်ခွာနေကြသည်ကို တွေ့ရသည်။ သူတို့သည် အုပ်စုလိုက် ဖွဲ့စည်းထားကြပြီး တောင်တန်းများကြားတွင် တိုက်ပွဲဝင် အစီအရင်များ လေ့ကျင့်နေကြသည်မှာ စစ်တပ်က စစ်ချီနေသကဲ့သို့ပင်။

ဒါက ယွီထျန်းယန် ချမှတ်လိုက်တဲ့ အမိန့်ပဲ။

ထောင်ချောက် တောင်တန်း တိုက်ပွဲက ရှုတောင်ကို အလွန် ဒေါသထွက်စေခဲ့သည်။ မိစ္ဆာလမ်းစဉ် ခြောက်ဂိုဏ်း ၏ မိုက်မဲပက်စက်သော လုပ်ရပ်များကို အပြစ်ပေးရမည်။

ထို့ကြောင့် ဂိုဏ်းသားများကို တက်ကြွစွာ ကျင့်ကြံရန် ဓားအစီအရင်ဖြင့် ရန်သူသတ်ဖြတ်နည်းများကို လေ့ကျင့်ရန်နှင့် မိစ္ဆာလမ်းစဉ် ခြောက်ဂိုဏ်းကို အချိန်မရွေး ဝိုင်းရံတိုက်ခိုက်ရန် အမိန့်ပေးထားခြင်း ဖြစ်သည်။

"ဒီလူက ပြတ်ပြတ်သားသား လုပ်တတ်တဲ့သူပဲ။ ဒါပေမဲ့ အောင်မြင်မှုကို လိုချင်လွန်းအားကြီးတယ်။"

စုချန် တိတ်တဆိတ် ခေါင်းခါလိုက်သည်။

ယွီထျန်းယန် ဘယ်လိုပဲ လုပ်လုပ် သူနဲ့ မဆိုင်ဘူး။ ချင်းယန်တောင်ထိပ် ရဲ့ အမွေခံ ဂိုဏ်းသား အာဏာ ဘယ်လောက်ကြီးကြီး ဓားသင်္ချိုင်းကိုတော့ သူ လာစီမံလို့ မရဘူး။

"အကြီးအကဲ ၊ ကျွန်တော် ပြန်ရောက်ပါပြီ။"

စုချန် ဓားသင်္ချိုင်းသို့ ပြန်ရောက်ရောက်ချင်း ပထမဆုံး လုပ်သည်မှာ အပေါ်ထပ်သို့ တက်ပြီး ဆရာ့ကို ဂါရဝပြုခြင်း ဖြစ်သည်။

အကြီးအကဲကျိုး မျက်လုံးဖွင့်ကြည့်လိုက်ရာ သူ့ခန္ဓာကိုယ်ပေါ်တွင် လှည့်ပတ်နေသော မှော်စွမ်းအင် အလင်းရောင်များကို မြင်သောအခါ ဝမ်းသာသွားသည်။

"အခြေတည်ခြင်း အောင်မြင်သွားပြီလား။"

"အကြီးအကဲ ပြင်ဆင်ပေးလိုက်တဲ့ ရှားပါးပစ္စည်းတွေ ကျေးဇူးကြောင့်ပါ။ တပည့် တာဝန်ကျေခဲ့ပါတယ်။ ကံကောင်းလို့ အောင်မြင်ခဲ့ပါတယ်။"

"ငါတို့ ဆရာတပည့်ကြားမှာ ယဉ်ကျေးနေစရာ မလိုပါဘူး။ ထောင်ချောက် တောင်တန်း ကိစ္စ ငါသိပြီးပြီ။ ဒါကလည်း မင်း ကြုံတွေ့ရမယ့် ကပ်ဘေးတစ်ခုပဲ။ အန္တရာယ်ကနေ လွတ်မြောက်နိုင်ခဲ့တာ မင်းရဲ့ အရည်အချင်းကြောင့်ပါ။"

အကြီးအကဲကျိုး လက်ကာပြလိုက်ပြီး သူ့အမြုတေ ကို ထုတ်ပြခိုင်းလိုက်သည်။

စုချန် ခေါင်းညိတ်လိုက်ရာ ခန္ဓာကိုယ်ပေါ်တွင် လျှပ်စီးကြောင်းများ ပေါ်လာပြီး ကောင်းကင်မိုးကြိုးဓား ပျံဝဲထွက်ပေါ်လာသည်။

အကြီးအကဲကျိုးသည် ဓားအလင်းတန်းထဲမှ သန့်စင်သော ဓားအရှိန်အဝါနှင့် ကောင်းကင်မိုးကြိုး၏ စွမ်းအားကို အာရုံခံမိသောအခါ လှိုက်လှိုက်လှဲလှဲ ချီးကျူးလိုက်သည်။ " 'ကောင်းကင်လမ်းစဉ် အခြေတည်ခြင်း' က တကယ် ထူးခြားတာပဲ။ ဒီ ကောင်းကင်မိုးကြိုး အရှိန်အဝါ တစ်ခုတည်းနဲ့တင် တခြားသူများကို ဖိနှိပ်ဖို့ လုံလောက်နေပြီ။ မင်းမှာ ဒီအခြေခံအုတ်မြစ် ရှိနေမှတော့ အနာဂတ် အောင်မြင်မှုက ဆရာ့ထက် သာလွန်မှာ သေချာတယ်။ ကောင်းတယ် အရမ်းကောင်းတယ်။"

သူ စုချန်အတွက် တကယ် ဝမ်းသာနေခြင်း ဖြစ်သည်။

ဘာပဲဖြစ်ဖြစ် ဒါက သူ လိုလားတဲ့ ဆက်ခံသူလေ။ စုချန် အလားအလာ ကောင်းလေ၊ နောက်ပိုင်း ဓားသင်္ချိုင်း ပိုလုံခြုံလေပဲ။

"အခြေတည်ပြီးသွားပြီ ဆိုတော့ မင်းရဲ့ အဆင့်အတန်းက အတွင်းစည်းဂိုဏ်းသား နဲ့ တန်းတူ ဖြစ်သွားပြီ။ နောက်ပိုင်း ဂိုဏ်းကချီးမြှင့်မယ့် အရင်းအမြစ်တွေကို ပိုရနိုင်တော့မယ်။ အချိန်ရရင် ဂိုဏ်းသား ခါးချိတ်တံဆိပ်ပြား သွားလဲလိုက်ဦး။"

"ဟုတ်ကဲ့ပါ။"

စုချန် နာခံလိုက်သည်။ သူက ဓားသင်္ချိုင်းစောင့် ဂိုဏ်းသား ဖြစ်၍ အပြင်ဂိုဏ်းသားများကဲ့သို့ စာမေးပွဲ စစ်ဆေးခံစရာ မလိုပေ။

ကျင့်ကြံမှုအဆင့် စံချိန်မီသည်နှင့် အလိုအလျောက် ရာထူးတိုးသွားမည် ဖြစ်သည်။

ရာထူးတိုးပြီးနောက် ဓားသင်္ချိုင်းစောင့် အဖြစ် ဆက်လက် ရှိနေဦးမည် ဖြစ်သော်လည်း ခံစားခွင့် အမျိုးမျိုးသည် အတွင်းစည်းဂိုဏ်းသားများနှင့် တန်းတူ ဖြစ်သွားသည်။ လစဉ် လစာ ဝိညာဉ်ကျောက်တုံး ၁၀ တုံး ပိုရမည် ဖြစ်ပြီး ဂုဏ်ပြုမှတ်များကို အသုံးပြု၍ ပစ္စည်းများနှင့် ဆေးလုံးများ လဲလှယ်နိုင်မည် ဖြစ်သည်။

ဒါတွေက အတွင်းစည်းဂိုဏ်းသားတွေမှ ရနိုင်တဲ့ အခွင့်အရေးတွေပဲ။

"အကြီးအကဲ၊ ကျွန်တော့်မှာ နတ်ဘုရား အာရုံ ရှိနေပြီ ဆိုတော့ ပိုပြီး အားကောင်းတဲ့ ဓားထိန်းချုပ်နည်း သင်ပေးလို့ ရပြီလား။"

စုချန်က ဓားသောင်းချီ မူလနေရာသို့ ပြန်လာခြင်း သိုင်းကွက်ကို အမြဲတမ်း စိတ်စွဲနေခဲ့တာ။

အကြီးအကဲကျိုး ခေါင်းခါလိုက်သည်။ "မင်း အခုမှ အခြေတည်ကာစ ရှိသေးတယ် ။ ကျင့်ကြံမှု မတည်ငြိမ်သေးဘူး။ နတ်ဘုရား အာရုံ အသုံးပြုပုံကိုလည်း အပြည့်အဝ မကျွမ်းကျင်သေးဘူး။ အရင်ဆုံး ပြန်သွားပြီး ဓားသန့်စင်ခြင်း လုပ်လိုက်ဦး။ မတူညီတဲ့ ဓားစွမ်းအင်တွေကို တတ်နိုင်သမျှ အာရုံခံကြည့်ပါ။ မင်း ပြာလဲ့လဲ့ သမုဒ္ဒရာ ဓားကျမ်း ပထမအဆင့်ကို ပြီးပြည့်စုံအောင် ကျင့်ကြံပြီးရင် အချိန်တန်လာလိမ့်မယ်။"

"ဟုတ်ကဲ့ပါ ၊ အကြီးအကဲ။"

စုချန်လည်း အရမ်း မလောပါဘူး။ ဆရာ့ အစီအစဉ်က အကျိုးအကြောင်း ခိုင်လုံမှု ရှိတယ်လို့ သူ ယုံကြည်တယ်။

ထို့နောက် ဦးညွှတ် နှုတ်ဆက်ပြီး ထွက်ခွာလာကာ ဓားသင်္ချိုင်းထဲတွင် ဓားသန့်စင်ခြင်း စတင်လိုက်သည်။

အပြင်ထွက်နေသည်မှာ ရက်အနည်းငယ် ကြာသွား၍ သူ ဓားသင်္ချိုင်းကို လွမ်းနေမိသည်။ ပတ်ဝန်းကျင်တွင် လှည့်ပတ်နေသော ဓားအရှိန်အဝါများကို ခံစားလိုက်ရသောအခါ ခန္ဓာကိုယ်ထဲရှိ ဓားအမြုတေက ရေထဲပြန်ရောက်သွားသော ငါးတစ်ကောင်ကဲ့သို့ ပျော်ရွှင်စွာ တုန်ခါနေသည်။

စုချန် စတုတ္ထထပ်သို့ တိုက်ရိုက် တက်သွားပြီး မှော်ဝင်ဓားများကို စတင် သန့်စင်လေသည်။

သူ့လက်ရှိ ကျင့်ကြံမှုအဆင့်နှင့် ဆိုလျှင် အောက် ၃ ထပ်တွင် စွမ်းအင် အများကြီး ဖြုန်းနေစရာ မလိုတော့ပေ။

ဓားကို ကိုင်လိုက်သည်နှင့် သိမ်မွေ့ပြီး နာကျည်းသော အသံတစ်သံကို ကြားလိုက်ရသည်။ "အစ်ကိုကြီးက တစ်ယောက်တည်း အပြင်ထွက်ပြီး ပျော်ပါးနေတယ်။ ကျွန်မကိုတော့ ဒီ ဓားသင်္ချိုင်းထဲမှာ အဘိုးကြီးနဲ့ ပစ်ထားခဲ့တယ်။ တကယ် ရက်စက်တာပဲ။"

ဘယ်သူလဲ ဆိုတာ စုချန် စဉ်းစားနေစရာပင် မလို။ ကလေးမ ဓားဝိညာဉ်ပဲ။ သူ စိတ်ပျက်လက်ပျက် မျက်လုံးလှိမ့်ရင်း ဆိုလိုက်သည်။

"လူလို ပြောစမ်းပါ။"

...

တစ်ချိန်တည်းမှာပင် အတွင်းစည်းဂိုဏ်းသားဆောင်ရှိ ခြံဝန်း တစ်ခုအတွင်း၌။

ယန်ယွင်ဖေး သည် မိသားစုထံမှ သတင်းစကား ရရှိလိုက်ပြီး လေနက်တောင် ဝမ်မိသားစု သုတ်သင်ခံလိုက်ရကြောင်းနှင့် စုချန် အောင်မြင်စွာ အခြေတည်သွားပြီ ဖြစ်ကြောင်း သိရှိလိုက်ရသည်။

"တကယ့် အသုံးမကျတဲ့ ကောင်တွေ။"

သူ အံကြိတ်လိုက်ပြီး လက်ထဲမှ သတင်းစကား ပေးပို့သော ကျောက်စိမ်းပြားကို မှော်စွမ်းအင်ဖြင့် ညှစ်ခွဲပစ်လိုက်သည်။

"စုချန် ဆိုတဲ့ ကောင်စုတ်က ကံကောင်းလွန်းတယ်။ မိစ္ဆာဂိုဏ်းက ထောင်ချောက် တောင်တန်း မှာ ခြုံခိုတိုက်ခိုက်တာ လူတွေ အများကြီး သေကုန်ကြတယ် ။ အတွင်းစည်းဂိုဏ်းသားတွေတောင် ပါပေမယ့် သူကတော့ ဘေးကင်းကင်းနဲ့ လွတ်လာပြီး အခြေတည်ပစ္စည်းတွေတောင် အောင်အောင်မြင်မြင် ရလာသေးတယ်...။"

စုချန်က တကယ် စွမ်းရည်ရှိပြီး ကံတရားကလည်း သိသိသာသာ ကောင်းမွန်နေသည်ကို ယန်ယွင်ဖေး ဝန်ခံရတော့မည်။

ဒီအဆင့်တက်နှုန်းက လူတိုင်းရဲ့ စိတ်ကူးထက် ကျော်လွန်နေတယ်။

သုံးလအတွင်း တကယ်ပဲ အောင်မြင်စွာ အခြေတည်နိုင်ခဲ့တယ်။ ပြီးတော့ အလွန် ရှားပါးတဲ့ ကောင်းကင်လမ်းစဉ် အခြေတည်ခြင်း တဲ့။

ရှုတောင် အတွင်းစည်း တစ်ခုလုံးကို ကြည့်လိုက်ရင်တောင် ကောင်းကင်လမ်းစဉ် အခြေတည်ခြင်း လုပ်နိုင်သူက လက်ချိုးရေလို့ ရတယ်။ ဒါက အမွေခံ ဂိုဏ်းသား တွေမှာသာ ရှိတဲ့ ပါရမီလို့ သတ်မှတ်ထားကြတာ။ ဒီ စုချန်က ဘယ်လိုလုပ် ကျင့်နိုင်ခဲ့တာလဲ။

ယန်ယွင်ဖေး အခုဆိုရင် မနာလိုတောင် ဖြစ်မိနေပြီ။

ဒါပေမဲ့ အခုမှတော့ ဒါတွေ ပြောနေလို့ နောက်ကျသွားပြီ။ စုချန်က ဓားသင်္ချိုင်းကို ပြန်ရောက်နေပြီ ဆိုတော့ သူ လှုပ်ရှားချင်ရင်တောင် အခွင့်အရေး မရှိတော့ဘူး။ သူတို့နှစ်ဦး ချိန်းဆိုထားတဲ့ စိန်ခေါ်ပွဲ အချိန်ကလည်း နီးကပ်လာပြီ။

ယန်ယွင်ဖေး စိုးရိမ်လာမိသည်။

"ဝမ်ညီအစ်ကိုတွေက အသုံးမကျဘူး ဆိုပေမယ့် နှစ်နဲ့ချီ တိုက်ခိုက်လုယက်လာကြတာ သာမာန် အခြေတည်အဆင့် ကျင့်ကြံသူတွေနဲ့ ယှဉ်လို့ မရဘူး။ ဒါပေမဲ့ သူတို့နှစ်ယောက်စလုံး စုချန် လက်ချက်နဲ့ သေဆုံးသွားကြတယ်။ ဒါကို ကြည့်ရင် သူ့အင်အားက တော်တော် ထက်မြက်ပုံရတယ်။ ကောင်းကင်လမ်းစဉ် အခြေတည်ခြင်းကို... လျှော့တွက်လို့ မရဘူး။"

ထိုသို့ တွေးမိပြီး ယန်ယွင်ဖေး မတ်တပ်ရပ်လိုက်သည်။

သူ ချင်းယန်တောင်ထိပ် ကို နောက်တစ်ခေါက် သွားပြီး ဂိုဏ်းတူအစ်ကိုကြီး ထျန်းယန် ဆီကနေ ရတနာ တစ်ခုလောက် သွားတောင်းရမယ်။

ဘာပဲဖြစ်ဖြစ် ဒါက သူ့သေရေးရှင်ရေးနဲ့ သက်ဆိုင်နေတာ မြောင်းထဲရောက်မယ့်အဖြစ်မျိုး သူ အဖြစ်မခံနိုင်ဘူး။

အခန်း (၆၀) - ကောင်းကင်ဘုံပြစ်ဒဏ်ပေး စင်မြင့်

ဓားသင်္ချိုင်း နက်ရှိုင်းရာတွင်၊ စုချန်သည် မှော်ဓားတစ်လက်ကို လက်ဖြင့် ညင်သာစွာ ပွတ်သပ်နေသည်။

ကြမ်းတမ်းပြီး မကောင်းဆိုးဝါးဆန်သော အရှိန်အဝါများ လှိုင်းထလာပြီး သူ့ကို ဝါးမြိုတော့မည့်အလား ခြိမ်းခြောက်နေသော်လည်း၊ သူ့နောက်ကျောတွင် ရွှေရောင် လျှပ်စီးကြောင်းများ လက်ခနဲ ဖြစ်သွားပြီး ဓားရိပ်များ ပေါ်လာရာ၊ ကြောင်ကို တွေ့သော ကြွက်တစ်ကောင်ကဲ့သို့ ထိုအရှိန်အဝါများ ချက်ချင်း ငြိမ်သက်သွားသည်။

မှော်ဓားဆိုသည်မှာ မှော်ပစ္စည်းနှင့် တူညီသည်။ မာကျောသော ပစ္စည်းဖြင့် ပြုလုပ်ထားရုံသာမက၊ များသောအားဖြင့် ထူးခြားသော စွမ်းအား အချို့ ပါဝင်လေ့ ရှိသည်။

ဥပမာအားဖြင့် ..စုချန် ယခု သန့်စင်နေသော "မြေကမ္ဘာမိစ္ဆာဓား" ကိုပဲ ကြည့်လိုက်ရင်

ဤဓားကို 'မြေကမ္ဘာမိစ္ဆာရွှေ' ဖြင့် သွန်းလုပ်ထားသည်။ မာကျောပြီး ထက်ရှရုံသာမက၊ 'မြေကမ္ဘာမိစ္ဆာ စွမ်းအင်' ကို ဆွဲယူအသုံးပြုနိုင်ပြီး ထူးခြားသော အသွင်ပြောင်းလဲခြင်း နည်းစနစ်များကို ဖန်တီးနိုင်သည်။ ၎င်းကို "မြေကမ္ဘာမိစ္ဆာ အသွင်ပြောင်းလဲခြင်း ၁၂ မျိုး" ဟု ခေါ်သည်။

အနောက်အရပ်ခရီးသွား ဒဏ္ဍာရီထဲက 'စွန်းဝူခုန်း' ရဲ့ အသွင်ပြောင်းလဲခြင်း ၇၂ မျိုးလောက်တော့ မစွမ်းပေမယ့် "မြေကမ္ဘာမိစ္ဆာ အသွင်ပြောင်းလဲခြင်း ၁၂ မျိုး" ကလည်း အံ့မခန်း နည်းစနစ် တစ်မျိုးပါပဲ။

ဓားသိုင်းပညာထဲမှာ ထည့်သွင်း အသုံးပြုလိုက်ရင် ရန်သူကို ရှုပ်ထွေးသွားစေနိုင်ပြီး၊ အဆန်းတကြယ် ရလဒ်တွေ ရရှိနိုင်တယ်။

"ဓားသန့်စင်ခြင်း 【မြေကမ္ဘာမိစ္ဆာ】၊ မြေကမ္ဘာအဆင့် နည်းစနစ်ဖြစ်သော 'မြေကမ္ဘာမိစ္ဆာ အသွင်ပြောင်းလဲခြင်း ၁၂ မျိုး' ကို နားလည်သဘောပေါက်ခြင်း..."

စုချန် မျက်လုံးဖွင့်လိုက်ပြီး စိတ်ကူးပုံရိပ် ကမ္ဘာမှ နိုးထလာသည်။

"မြေကမ္ဘာမိစ္ဆာ အသွင်ပြောင်းလဲခြင်း ၁၂ မျိုး" ၏ အသုံးပြုပုံ အမျိုးမျိုးသည် သူ့စိတ်ထဲတွင် စွဲထင်နေပြီ ဖြစ်သည်။ ဤနည်းစနစ်ကို ဓားသိုင်းပညာနှင့် ပေါင်းစပ်လိုက်သောအခါ ထူးခြားသော ပုံရိပ်ယောင် ဓားသိုင်းပညာ တစ်ခု ဖြစ်ပေါ်လာပြီး အလွန် အံ့သြဖွယ် ကောင်းသည်။

ဤလုပ်ငန်းစဉ်တွင် "မြေကမ္ဘာမိစ္ဆာဓား" ၏ ထူးခြားသော ဓားငွေ့အင်ကိုလည်း အောင်မြင်စွာ သန့်စင်သိမ်းဆည်းနိုင်ခဲ့ပြီး၊ သူ့ကိုယ်ပိုင် ဓားငွေ့အင် ၏ အစိတ်အပိုင်း တစ်ခု ဖြစ်လာစေကာ 'ပြာလဲ့လဲ့ သမုဒ္ဒရာ ဓားကျမ်း' ကျင့်ကြံမှုကို ပိုမို အားကောင်းစေခဲ့သည်။

"အစ်ကိုကြီး အခြေတည်အဆင့် ကို ဒီလောက် မြန်မြန် ရောက်လိမ့်မယ်လို့ မထင်ထားဘူး၊ အထူးသဖြင့် ရှားပါးတဲ့ 'ကောင်းကင်လမ်းစဉ် အခြေတည်ခြင်း' ကိုပေါ့။ အခု အစ်ကိုကြီး အင်အား အများကြီး တိုးတက်လာပြီ ဆိုတော့၊ ဒီသာမာန် မှော်ဓားတွေက အစ်ကိုကြီးနဲ့ လုံးဝ မတန်တော့ပါဘူး။ ကျွန်မတစ်ယောက်တည်းသာ အစ်ကိုကြီးရဲ့ အကောင်းဆုံး ကံကြမ္မာပဲ...။"

"မင်းက ဓားတစ်လက်လေ၊ ဘာတွေ ကြီးကြီးကျယ်ကျယ် ပြောနေတာလဲ?"

စုချန် ခနဲ့လိုက်သော်လည်း၊ စိတ်ထဲတွင် သံသယ အနည်းငယ် ရှိနေဆဲ ဖြစ်သည်။

'ချုံလုံ မိစ္ဆာဓား' ၏ စွမ်းအားကို သူ ရှင်းရှင်းလင်းလင်း မှတ်မိနေသေးသည်။ ဒီလို မိစ္ဆာလက်နက်မျိုး လက်ထဲ ရှိနေရင် သူ့အင်အား အများကြီး တိုးလာမှာ သေချာတယ်။

သူ အခု အခြေတည်ပြီးသွားပြီ။ အမြုတေ နှစ်ခု ဖြစ်တဲ့ 'ကောင်းကင်မိုးကြိုးဓား' နဲ့ 'ကောင်းကင်ဝါးမြို သားရဲဝိညာဉ်' တို့ရဲ့ စွမ်းအားနဲ့ ဆိုရင်၊ 'ချုံလုံဓား' ကို ဖိနှိပ်ထားဖို့ လုံလောက်ပါတယ်။

ဒါပေမဲ့ ဒီဓားက မိစ္ဆာဂိုဏ်း နဲ့ ဆက်နွယ်နေတယ်။

'အရိုးဖြူ မိစ္ဆာဂိုဏ်း' က ဒီဓားကို ရဖို့အတွက် ရှုတောင်ထဲအထိ လူလွှတ်ပြီး ခိုးဝင်ခိုင်းခဲ့တာ၊ အကြောင်းပြချက် တစ်ခုခုတော့ ရှိမှာပဲ။ အခု မိစ္ဆာလမ်းစဉ် ခြောက်ဂိုဏ်းက ကြိမ်ဖန်မနည်း လှုပ်ရှားနေကြပြီး အခြေအနေ ရှုပ်ထွေးနေတဲ့ အချိန်မှာ၊ ဒီမိစ္ဆာဓားကို ယူလိုက်ရင် ပြဿနာ အကြီးအကျယ် တက်လာနိုင်တယ်။

မိစ္ဆာဂိုဏ်းက စောင့်ကြည့်နေမှာ သေချာသလို၊ ရှုတောင်ဂိုဏ်းက တစ်ချို့လူတွေကလည်း ဒါကို အကြောင်းပြပြီး ပြဿနာ ရှာလာနိုင်တယ်။

ထို့ကြောင့် စုချန် ဆုံးဖြတ်ချက် မချရဲသေးပေ။

"ယန်ယွင်ဖေး နဲ့ ငါ့ရဲ့ စိန်ခေါ်ပွဲ က နီးကပ်နေပြီ၊ အာရုံလွင့်လို့ မဖြစ်ဘူး။ ပြီးတော့ ငါသာ ရှုံးနိမ့်ပြီး သေသွားခဲ့ရင်၊ မင်းလည်း ဓားသင်္ချိုင်းကို ပြန်ရောက်ပြီး အပိတ်လှောင် ခံရမှာပဲ။ ယန်ယွင်ဖေး ကိစ္စ ရှင်းပြီးမှ ဆက်ပြောကြတာပေါ့။"

စုချန် ပြောလိုက်သည်။

ဝမ်မိသားစု က အခြေအနေ ရှုပ်ထွေးနေတာကို အခွင့်ကောင်းယူပြီး စုမိသားစုကို တိုက်ခိုက်သတ်ဖြတ်ခဲ့တာ၊ ဒါ ယန်မိသားစုရဲ့ လက်ချက် ဆိုတာ ယုံမှားသံသယ ဖြစ်စရာ မလိုဘူး။ ဒီကိစ္စအတွက် ယန်ယွင်ဖေး ကို စာရင်းရှင်းရမယ်။

...

လ၏ ၁၂ ရက်မြောက်နေ့၊ လာဘပွဲတော် နေ့ ဟုလည်း ခေါ်ကြသည်။

မသေမျိုး ကျင့်ကြံသူများသည် ကောက်ပဲသီးနှံများကို မစားသဖြင့် ပွဲတော်ထုံးစံများ မရှိကြပေ။ သို့သော် ယနေ့ ရှုတောင်တွင် အလွန် စည်ကားနေသည်။

ဒီနေ့သည် စုချန်နှင့် ယန်ယွင်ဖေး တို့ 'ကောင်းကင်ဘုံပြစ်ဒဏ်ပေး စင်မြင့်' တွင် တိုက်ခိုက်ရန် သဘောတူထားသော နေ့ဖြစ်သည်။

မနက်စောစောကတည်းက ရှုတောင်ဂိုဏ်းသား အများအပြား ရောက်ရှိလာကြပြီး 'ကောင်းကင်ဘုံပြစ်ဒဏ်ပေး စင်မြင့်' အောက်ခြေတွင် စုဝေးနေကြသည်။ အဝေးမှ ကြည့်လျှင် ချောက်ကမ်းပါး နှစ်ခုကြားတွင် ကြီးမားသော စင်မြင့်ကြီး တစ်ခု ပျံဝဲနေပြီး၊ တောင်ထွတ်များကို ဖြတ်သန်းကာ သံကြိုးကြီးများဖြင့် ချိတ်ဆက်ထားသည်။ လေသံ၊ မိုးသံများ ဟိန်းဟောက်နေပြီး လျှပ်စီးများ လက်နေသဖြင့်၊ လူများကို သွေးလန့်ဖွယ် ခံစားမှု ပေးစွမ်းသည်။

'ကောင်းကင်ဘုံပြစ်ဒဏ်ပေး စင်မြင့်' သည် မူလက ရှုတောင်၏ အပြစ်အကြီးဆုံး ကျူးလွန်သူ ဂိုဏ်းသားများကို ကွပ်မျက်သော နေရာဖြစ်သည်။

နောက်ပိုင်းတွင် ဂိုဏ်းသားများ အချင်းချင်း ပဋိပက္ခများနှင့် ရန်ငြိုးများကို ဖြေရှင်းသော နေရာအဖြစ် တဖြည်းဖြည်း ပြောင်းလဲလာသည်။

'ကောင်းကင်ဘုံပြစ်ဒဏ်ပေး စင်မြင့်' ပေါ် ရောက်သွားပြီ ဆိုရင်၊ ကိုယ့်အသက်ကို ကိုယ်တာဝန်ယူရမယ်။ ဘယ်သူမှ ဝင်စွက်ဖက်လို့ မရဘူး။

"အဲဒီ စုချန်က အတွင်းစည်းဂိုဏ်းသား ကို စိန်ခေါ်ပြီး တော်တော် လှုပ်လှုပ်ရှားရှား ဖြစ်စေခဲ့တာ။ ကိုယ့်ကိုယ်ကိုယ် ယုံကြည်မှု လွန်ကဲနေပေမယ့်၊ သူ့သတ္တိကိုတော့ ချီးကျူးရမယ်။ ဒီနေ့ သူ လာရဲပါ့မလား မသိဘူး?"

"မင်း မသိသေးဘူးလား? စုချန်က အခြေတည်ပြီးသွားပြီတဲ့၊ လွန်ခဲ့တဲ့ ရက်ပိုင်းကပဲ အတွင်းစည်းဂိုဏ်းသား ခါးတံဆိပ်ပြား ရသွားပြီလို့ ကြားတယ်။"

"ဘာ? သုံးလအတွင်း အခြေတည်အဆင့် ရောက်သွားတယ် ဟုတ်လား? တကယ့် ပါရမီရှင်ပဲ။ ဒါပေမဲ့ အချိန်တိုအတွင်း ဆိုတော့ သာမာန် အခြေတည်အဆင့် လောက်ပဲ ဖြစ်မှာပါ၊ ယန်ယွင်ဖေး ကို ယှဉ်နိုင်မှာ မဟုတ်သေးပါဘူး။"

"ဘယ်သူ သိမှာလဲ? ပွဲကြည့်ကြတာပေါ့။ ဒီနေ့ လူတော်တော် စုံတာပဲ...။"

လူအုပ်ကြီး ဆွေးနွေးငြင်းခုံနေကြစဉ် ပတ်ဝန်းကျင်ကို ကြည့်လိုက်ရာ အဝေးမှ စင်မြင့်မြင့်ပေါ်သို့ ပုံရိပ်များ ပျံသန်းရောက်ရှိလာသည်ကို တွေ့လိုက်ရသည်။

ကျောက်စိမ်းတောင်ထွတ် မှ ချင်းလန်၊ ဆေးဖော်စပ်ဆောင် မှ ပိုင်ယွီ၊ အပြင်ဂိုဏ်း တာဝန်ခံ အချို့နှင့် အကြီးအကဲ အချို့ပင် သတင်းကြားပြီး လာရောက် ကြည့်ရှုကြသည်။

ဘာပဲဖြစ်ဖြစ် ရှုတောင်ဂိုဏ်းသား တစ်ဦးဦး 'ကောင်းကင်ဘုံပြစ်ဒဏ်ပေး စင်မြင့်' ပေါ် တက်ရောက်သည်မှာ နှစ်ပေါင်းများစွာ ကြာမြင့်ခဲ့ပြီ ဖြစ်သည်။

ထို့အပြင် စုချန်သည် ယွဲ့လျိုရွှမ် နှင့် ပတ်သက်မှုကြောင့် ဂိုဏ်းအတွင်း၌ အနည်းငယ် နာမည်ကြီးနေသူ ဖြစ်ရာ၊ သဘာဝကျကျပင် ပိုမို အာရုံစိုက်ခံရသည်။

မမျှော်လင့်ထားသည်မှာ ယန်ယွင်ဖေး ဓားပျံစီးပြီး ရောက်ရှိလာသောအခါ၊ ချင်းယန်တောင်ထိပ် ၏ 'အမွေခံ ဂိုဏ်းသား' ယွီထျန်းယန် ကိုယ်တိုင် လာရောက် ကြည့်ရှုခြင်းပင်။

အားကောင်းသော အရှိန်အဝါ တစ်ခု ထွက်ပေါ်လာပြီး၊ ကောင်းကင်ယံမှ နေမင်းကဲ့သို့ တောက်ပနေသဖြင့် ရှိနေသူ အားလုံး ခေါင်းငုံ့ထားရကာ၊ သူ့အကြည့်ကို မဆုံရဲကြပေ။

ချင်းလန်နှင့် အခြားသူများ မျက်မှောင် အနည်းငယ် ကြုတ်လိုက်ကြသည်။ ယွီထျန်းယန် က ဘယ်လို သဘောလဲ? သူ ကိုယ်တိုင် ရောက်လာတာက စိန်ခေါ်ပွဲကို အခြေအနေ ပြောင်းလဲသွားစေတယ်။

"ငါ ဒီနေ့ လာတာက အလည် သက်သက်ပါပဲ။ ဂိုဏ်းသားတွေ သူတို့ရန်ငြိုးကို သူတို့ဘာသာ ဖြေရှင်းကြပါစေ။"

ယွီထျန်းယန် တည်ငြိမ်စွာ ပြောလိုက်ပြီး၊ အမြင့်ဆုံး နေရာတွင် ဝင်ထိုင်လိုက်ကာ သက်သောင့်သက်သာ ပုံစံဖြင့် နေလိုက်သည်။

"စိတ်မပူပါနဲ့ ။ ဂိုဏ်းတူအစ်ကိုကြီး၊ ကျွန်တော် သေချာပေါက် ကောင်းကောင်း လုပ်ပြပါ့မယ်။"

ယန်ယွင်ဖေး လေးစားစွာ ဦးညွှတ်လိုက်ပြီး၊ လူအများရှေ့တွင် 'ကောင်းကင်ဘုံပြစ်ဒဏ်ပေး စင်မြင့်' ပေါ်သို့ ခုန်တက်လိုက်သည်။ သူ့ထံမှ အင်အားကြီးမားသော အရှိန်အဝါ ပေါက်ကွဲထွက်ပေါ်လာပြီး အော်ဟစ်လိုက်သည်။ "စုချန်။ မင်း ငါ့ကို သေသေရှင်ရှင် တိုက်ခိုက်ချင်တယ် ဆို? အခု အချိန်ရောက်ပြီလေ၊ ကြောက်ပြီး ပုန်းနေတာလား?"

ဒီကောင်က ယုံကြည်မှု တော်တော် ရှိနေပါလား။

လူအုပ်ထဲတွင် ရောက်နေသော စုချန် မျက်မှောင် အနည်းငယ် ကြုတ်လိုက်သည်။ သူ အခုမှ ရောက်လာတာ ဖြစ်ပြီး၊ ယန်ယွင်ဖေး အနေနဲ့ သူ့အင်အားအကြောင်း ကြားပြီးလောက်ပြီ။

ဒါတောင်မှ ဒီလောက် ယုံကြည်မှု ရှိနေသေးတာလား?

ကြည့်ရတာ ယွီထျန်းယန် က သူ့ကို တစ်ခုခု ပေးလိုက်တာ ဖြစ်ရမယ်။

သတိထားမှ ဖြစ်မယ်။

"အစ်ကိုကြီး၊ သတိထားနော်။ ယန်ယွင်ဖေး က မကြာသေးမီက ချင်းယန်တောင်ထိပ် မှာ သီးသန့်ကျင့်ကြံနေခဲ့တာလို့ ကြားတယ်။ သူ အများကြီး တိုးတက်ထားမှာ သေချာတယ်။ သူ အခြေတည်တာလည်း ကြာပြီဆိုတော့ မှော်စွမ်းအင်က နက်ရှိုင်းတယ်။ သူ့ကျင့်ကြံမှု အဆင့်က အခြေတည်အဆင့် အလယ်ပိုင်း ရောက်နေလောက်ပြီ။"

အနောက်မှ လိုက်ပါလာသော စုလုံ က စိုးရိမ်တကြီး သတိပေးလိုက်သည်။

စုချန် ခေါင်းညိတ်လိုက်ပြီး နှစ်သိမ့်ပေးလိုက်သည်။

"စိတ်မပူပါနဲ့၊ ငါ့မှာ ယုံကြည်မှု ရှိပါတယ်။ ဒီလူက သဘောထား သေးသိမ်တယ်။ ပုဂ္ဂိုလ်ရေး ရန်ငြိုးကြောင့် ငါတို့မိသားစုကို တိုက်ခိုက်ဖို့ 'လေနက် ဓားပြ' တွေကို မြှောက်ပေးခဲ့တယ်။ ဒီစာရင်းကို ငါ ရှင်းကို ရှင်းရမယ်။ ဒီနေ့ မိုးနတ်မင်း ကိုယ်တိုင် ဆင်းလာရင်တောင်၊ ငါ သူ့ကို သတ်ပြီး သေဆုံးသွားတဲ့ ဆွေမျိုးတွေအတွက် လက်စားချေရမယ်။"

ပြောပြီးသည်နှင့် သူ မြေကြီးကို ခြေဖြင့် အသာထိလိုက်ပြီး၊ ဓားပျံစီးကာ လေထဲသို့ ပျံတက်သွားပြီး 'ကောင်းကင်ဘုံပြစ်ဒဏ်ပေး စင်မြင့်' ဆီသို့ ဦးတည်လိုက်သည်။

"လာပြီ။ လာပြီ။"

"ဘုရားရေ၊ ဓားစီးပြီး ပျံလာတာလား? စုချန်က တကယ် အခြေတည်အဆင့် ရောက်သွားပြီပေါ့?"

"ဒီပွဲက အရမ်း စိတ်ဝင်စားစရာ ကောင်းတော့မယ်။"

လူတိုင်း အလွန်ပင် စိတ်ဝင်စားသွားကြသည်။

ချင်းလန်နှင့် အခြားသူများလည်း စုချန် ပျံသန်းလာသည်ကို မြင်သောအခါ၊ မှော်အလင်းရောင်များ ဝန်းရံထားပြီး အားကောင်းသော အရှိန်အဝါ ထွက်ပေါ်နေသဖြင့် စိတ်အေးသွားကြသည်။

ဒီကောင်လေးက သုံးလအတွင်း အခြေတည်အဆင့်ကို တကယ် ရောက်အောင် လုပ်နိုင်ခဲ့တာပဲ။

တကယ့်ကို မယုံနိုင်စရာပဲ။

"စုချန်၊ ကြိုးစားထား။"

ချူးရန် နဲ့ ကျောက်စိမ်းတောင်ထွတ်မှ အခြား အမျိုးသမီး ဂိုဏ်းသားများက အော်ဟစ်အားပေးကြသည်။ 'ထောင်ချောက် တောင်တန်း' တိုက်ပွဲက စုချန်အပေါ် သူတို့၏ ထောက်ခံမှုနှင့် အသိအမှတ်ပြုမှုကို အပြည့်အဝ ရရှိစေခဲ့သည်။

တစ်ချိန်တည်းမှာပင်။

ဓားသင်္ချိုင်း နက်ရှိုင်းရာမှ အကြီးအကဲကျိုးသည်လည်း မျက်လုံးများကို ဖြည်းညှင်းစွာ ဖွင့်လိုက်ပြီး 'ကောင်းကင်ဘုံပြစ်ဒဏ်ပေး စင်မြင့်' ဆီသို့ လှမ်းကြည့်လိုက်သည်။

စုချန် သူ့ပြဿနာသူ ဖြေရှင်းပါစေ၊ ဝင်မပါဘူးလို့ ပြောခဲ့ပေမယ့်၊ ဘာပဲဖြစ်ဖြစ် ဒါက သူ့တစ်ဦးတည်းသော တပည့်လေ၊ ဘယ်လိုလုပ် စိတ်မပူဘဲ နေနိုင်မှာလဲ?

"စုချန်ရဲ့ လက်ရှိ ကျင့်ကြံမှုအဆင့်နဲ့ ဆိုရင်၊ ယန်ယွင်ဖေး ကို ရင်ဆိုင်ကိုင်တွယ်ဖို့ မခက်ခဲပါဘူး။ ဒါပေမဲ့ ယွီထျန်းယန် ဝင်စွက်ဖက်မှာကို စိုးရိမ်တယ်။ သူသာ စည်းကမ်းဖောက်ဖျက်ရင်၊ ငါလည်း ဒီတစ်ခါတော့ အားနည်းတဲ့သူကို အနိုင်ကျင့်ရတော့မှာပဲ။"