သွမ့်ဟယ်

ထိုစဉ်က အရှေ့ပိုင်းလန်မင်းဆက်၊ ဖိန်ဟိုင်စီရင်စုရှိ တိချွီမြို့တော်မှာ လူသူထူထပ်ကာ အလွန်စည်ကားလှ၏။ ၎င်းမြို့မှာ ဖေးရှန်ဂိုဏ်း၏ တပည့်သစ်စုဆောင်းရေး စစ်ဆေးမှုပြုလုပ်ရာနေရာဖြစ်လာခဲ့လေရာ လွန်ခဲ့သည့်ရက်အနည်းငယ်မှစ၍ အနီးနားရှိကျင့်ကြံသူအများအပြားမှာ ဤနေရာသို့စုပြုံရောက်ရှိလာကြခြင်းဖြစ်သည်။

အသက် ၁၅ နှစ်အရွယ်ရှိ သွမ့်ဟယ်မှာလည်း ထိုလူများအနက် တစ်ဦးအပါအဝင်ဖြစ်၏။ သူသည် ဝေဟင်သို့ ပျံသန်းနိုင်ခြင်းမရှိသဖြင့် လူအုပ်ကြီးကြားတွင်ခေါင်းငုံ့ကာ မထင်မရှားဖြင့် တိုးဝှေ့လာခဲ့ရသည်။ ခန်းမကြီး၏အရှေ့ဆုံးသို့ရောက်အောင် အတင်းတိုးဝှေ့သွားပြီး စာရင်းသွင်းလိုက်ပြီးနောက်တွင်မှ စနစ်တကျ ပြန်လည်ရှိလာတော့သည်။

ဝင်္ကပါအတွင်းသို့ တစ်ကြိမ်လျှင် လူပေါင်း ၁,၀၀၀ ခန့် ဝင်ရောက်နိုင်သဖြင့် မြန်ဆန်သည်ဟုထင်ရသော်လည်း များပြားလှသောလူဦးရေနှင့်ယှဉ်လျှင်မူ လုံလောက်မှုမရှိသေးပေ။ ကျန်းချန်ကိုယ်တိုင် ဝင်္ကပါချပ်ပြားပေါင်းသောင်းနှင့်ချီ၍ အလျင်အမြန်ထပ်မံပြုလုပ်ပေးခဲ့သော်လည်း လူအများအပြားမှာ မိမိတို့အလှည့်ရောက်ရန် ရက်အတော်ကြာစောင့်ဆိုင်းနေကြရဆဲ။

သွမ့်ဟယ်၏စစ်ဆေးမှုအချိန်မှာ နောက်ထပ်သုံးရက်အကြာတွင်ဖြစ်သော်လည်း သူသည် အခြားသူများကဲ့သို့ပြန်မသွားခဲ့ချေ။ ထိုအစားသူသည် အရှေ့ဘက်ရှိ တက်ကြွရွှင်လန်းနေသော လူငယ်တစ်စုကိုကြည့်နေမိ၏။

အထူးသဖြင့် အဖြူရောင်ဝတ်စုံနှင့် ပုဂ္ဂိုလ်ပင်။ ထိုသူမှာ တစ်ချိန်က တိချွီမြို့၏ နံပါတ်တစ်ပါရမီရှင်ဖြစ်ခဲ့ပြီး ယခုအခါ တိယွမ်ဂိုဏ်း၏အတွင်းစည်းတပည့် ပိုင်ယွီရန်ဖြစ်သည်။ ၎င်းမှာ သွမ့်ဟယ်၏ ယနေ့အတွက် အစစ်အမှန်ပစ်မှတ်လည်းဖြစ်၏။

လွန်ခဲ့သောနှစ်အနည်းငယ်က သူတို့နှစ်ဦးစလုံးမှာ တိချွီမြို့ရှိ ထိုက်ရွှမ်ကိုယ်ခံပညာသင်တန်းကျောင်းတွင် အတူတူပညာသင်ကြားခဲ့ကြသည်။ ဝိညာဉ်တစ်ထောင်နယ်မြေတစ်ခုလုံးတွင် ထိုက်ရွှမ်ဟုအမည်ပေးထားသော သင်တန်းကျောင်းပေါင်း ၈၀၀ မှ ၁,၀၀၀ ခန့်အထိ ရှိနိုင်ပြီး ၎င်းတို့မှာ အခြေခံအဆင့် သင်တန်းကျောင်းများသာဖြစ်၏။

ကျောင်းသားများမှာ ငယ်ရွယ်ကြပြီး အများစုမှာ ခန္ဓာကိုယ်သန့်စင်ခြင်းအဆင့် ၃ မှ အဆင့် ၅ အတွင်းသာရှိကြသေးသည်။ သုံးနှစ်တာပညာသင်ကာလပြီးဆုံးလျှင် ပါရမီရှိသူများက ဂိုဏ်းအသီးသီးသို့ဝင်ရောက်ကြပြီး ပါရမီမရှိသူများကမူ အခြားအသက်မွေးဝမ်းကျောင်းလုပ်ငန်းများကို ရွေးချယ်ကြ၏။

အသက် ၁၂ နှစ်အရွယ်တွင် ပိုင်ယွီရန်မှာ သွေးကြောဖွဲ့တည်ခြင်းအဆင့် ၉ သို့ ရောက်ရှိနေပြီဖြစ်ပြီး သွမ့်ဟယ်မှာလည်း အဆင့် ၈ သို့ ရောက်ရှိနေပြီဖြစ်ရာ သူတို့နှစ်ဦးမှာ ထိုသင်တန်းကျောင်း၏ အမွှာကြယ်ပွင့်များဟု တင်စားခြင်းခံရသည်။ အထူးချီးကျူးစရာကောင်းသည်မှာ ထိုပြိုင်ဆိုင်မှုကြောင့် သူတို့နှစ်ဦးမှာရန်သူများမဖြစ်သွားဘဲ ဆန့်ကျင်ဘက်အနေဖြင့် တစ်ဦးကိုတစ်ဦး ညီအစ်ကိုကဲ့သို့ သတ်မှတ်ကာ အတူစား၊ အတူနေရင်း ရင်းနှီးခဲ့ကြခြင်းပင်။

သူတို့သည် ကျောင်းဆင်းပြီးနောက် အနီးနားရှိချိရှားဂိုဏ်းသို့ အတူတူသွားရောက်ကာ စစ်ဆေးမှုခံယူပြီး တပည့်ညီအစ်ကိုများအဖြစ် ဆက်လက်ရှိနေရန်ကတိပြုခဲ့ကြသည်။

သို့သော် ဤအစီအစဉ်မှာ နောက်ဆုံးတွင် တိယွမ်ဂိုဏ်းကြောင့် ပျက်ပြားသွားခဲ့ရသည်။ ထိုနေ့က တိယွမ်ဂိုဏ်း စိတ်ဝိညာဉ်ခွဲထုတ်ခြင်းအဆင့်မှ အင်မော်တယ်ဆရာသခင်နှစ်ဦးမှာ အလုပ်ကိစ္စဖြင့် အနီးနားသို့ရောက်ရှိလာပြီး ထိုက်ရွှမ်သင်တန်းကျောင်း၌ တည်းခိုခဲ့ကြသည်။

ပါရမီရှင်လူငယ်နှစ်ဦးအကြောင်း ကြားသိရသောအခါ အကြီးအကဲနှစ်ဦးမှာ စိတ်ဝင်စားသွားပြီး သူတို့၏ပါရမီကိုစစ်ဆေးကြည့်ရာ အလွန်ကျေနပ်ဖွယ်ကောင်းနေသည်ကို တွေ့ရှိခဲ့ကြသည်။ သူတို့သည် ဝင်ခွင့်စာမေးပွဲဖြေဆိုရန်မလိုဘဲ တိယွမ်ဂိုဏ်းသို့ တိုက်ရိုက်ဝင်ရောက်နိုင်မည့်အခွင့်အရေးကို ချက်ချင်းပေးအပ်ခဲ့၏။

တိယွမ်ဂိုဏ်းမှာ ဝိညာဉ်အခြေတည်အဆင့်ကျင့်ကြံသူများ အုပ်ချုပ်သည့်ဂိုဏ်းဖြစ်သဖြင့် ချိရှားဂိုဏ်းထက်ပိုအစွမ်းထက်သည်။ ထိုကဲ့သို့သောဂိုဏ်းသို့ဝင်ရောက်ခွင့်ရမည်ဟု သူတို့နှစ်ဦးစလုံး တစ်ခါမျှမတွေးတောခဲ့ဖူးသဖြင့် အတိုင်းထက်အလွန် ဝမ်းသာသွားကြတော့သည်။ သို့သော် အင်မော်တယ်ဆရာသခင်နှစ်ဦးက စကားလမ်းကြောင်းပြောင်းကာ နေရာလွတ်မှာ တစ်နေရာသာရှိကြောင်း ပြောလိုက်၏။

နောက်ဆုံးတွင် ထိုကိစ္စမှာ ပြိုင်ပွဲတစ်ခုဆီသို့ ဦးတည်သွားတော့သည်။ သူတို့နှစ်ဦး ယှဉ်ပြိုင်ကြရမည်ဖြစ်ပြီး အနိုင်ရသူမှာ တိယွမ်ဂိုဏ်း၏တပည့် တိုက်ရိုက်ဖြစ်လာမည်ဖြစ်ကာ ရှုံးနိမ့်သူမှာမူ အခြားအခွင့်အရေးများကိုသာ ရှာဖွေရတော့မည်။

“သူတို့က ငါတို့နှစ်ယောက်လုံးကို တန်ဖိုးထားပြီး ရွေးချယ်ရခက်နေတယ်ဆိုရင် ဘာလို့ နှစ်ယောက်လုံးကို လက်မခံတာလဲ။ ဘာလို့ တမင်သက်သက် နေရာလွတ်ကို တစ်နေရာပဲသတ်မှတ်ပြီး ငါတို့ကို တိုက်ခိုက်ခိုင်းရတာလဲ။ ငါထင်တာတော့ သူတို့က ငါတို့ကို မျောက်တွေလိုသဘောထားပြီး ဖျော်ဖြေမှုတစ်ခုအနေနဲ့ လုပ်နေတာပဲ။ ဒီလိုနေရာမျိုးက ဝင်ဖို့မထိုက်တန်ဘူး”

ပြင်ဆင်ရန် ပြန်သွားကြသည့်အချိန်တွင် သွမ့်ဟယ်က သူ၏အတွေးများကို ပိုင်ယွီရန်အား ပွင့်ပွင့်လင်းလင်း ပြောပြခဲ့သည်။ တိယွမ်ဂိုဏ်းက သူတို့ကို တန်ဖိုးထားသည်ဆိုလျှင် အခြားဂိုဏ်းများတွင်လည်း အခွင့်အရေးရှိနိုင်သည်ဟု သူယူဆခဲ့၏။ သို့သော် ပိုင်ယွီရန်က သူ့ကို ပြန်လည်ဖျောင်းဖျခဲ့သည်။

“သူတို့က ငါတို့ကို မျောက်တွေလို သဘောထားနေရင်တောင် ငါတို့က သူတို့ရှေ့မှာ အကောင်းဆုံး ဖျော်ဖြေပြဖို့ပဲ တတ်နိုင်တယ်။ တကယ်လို့ သူတို့ရဲ့အပျော်ကိုဖျက်ဆီးပြီး ဒေါသထွက်အောင်လုပ်မိရင် ဘာတွေဆက်ဖြစ်လာမလဲ ဘယ်သူသိမှာလဲ”

ထိုသို့ဖြင့် ဤပြိုင်ပွဲမှာ နောက်ဆုံးတွင် ဖြစ်ပေါ်လာခဲ့တော့သည်။ လူအများ၏ မျက်စိရှေ့မှောက်တွင် ကျင့်ကြံမှုအဆင့်တစ်ဆင့်နိမ့်သော သွမ့်ဟယ်က မထင်မှတ်ဘဲ ပိုင်ယွီရန်ကို အလွယ်တကူအနိုင်ယူလိုက်၏။ ရှည်လျားသောဓားဖျားမှာ တစ်ဖက်လူ၏လည်ပင်းရှေ့ တစ်ပေအကွာတွင် ရပ်တန့်သွားသောအခါ ပရိသတ်အားလုံး မှင်သက်သွားကြရသည်။

“ဓားသခင်ကြီးပါလား”

ဤကလေးငယ်မှာ ဤမျှငယ်ရွယ်သော အသက်အရွယ်ဖြင့် ဓားသခင်ကြီးအဆင့်သို့ ရောက်ရှိနေခြင်းမှာ အလွန်ရှားပါးလှပေသည်။ အကြီးအကဲနှစ်ဦးမှာ အတော်ပင် အံ့အားသင့်သွားကြပြီး သင်တန်းကျောင်းမှ ဆရာများမှာမူ ပို၍ပင်မယုံနိုင်အောင်ဖြစ်နေကြရသည်။

ဓားပညာဖြစ်စေ၊ ဆေဘာပညာဖြစ်စေ နယ်ပယ်အဆင့်ဆင့်ရှိကြ၏။ ဓားကို စိတ်ဖြင့်မထိန်းချုပ်နိုင်မီ လက်နက်ဖြင့် အနီးကပ်တိုက်ခိုက်ခြင်းမှာ အခြေခံပင်။

ကျွမ်းကျင်ပါက ဓားသမား၊ မိမိအလိုရှိသလို အသုံးပြုနိုင်ပါက ဓားသခင်နှင့် မိမိ၏ဆန္ဒကို ဓားအသိအဖြစ်ပြောင်းလဲနိုင်ပါက ဓားသခင်ကြီးဖြစ်သည်။ ဤနယ်ပယ်တစ်ခု မြင့်မားနေခြင်းက ကျင့်ကြံမှုအဆင့်ကိုကျော်လွန်ကာ စိန်ခေါ်မှုကိုအလွန်လွယ်ကူစေသည်။

ပိုင်ယွီရန်မှာ ပါရမီရှိပြီး လွန်ခဲ့သောတစ်နှစ်က ဓားသခင်အဆင့်သို့ရောက်ရှိခဲ့သဖြင့် သင်တန်းကျောင်းရှိ ဆရာများနှင့်ပင် ရင်ဘောင်တန်းနိုင်နေပြီဖြစ်သည်။ သို့သော် သွမ့်ဟယ်၏ ဓားသခင်ကြီးနယ်ပယ်မှာမူ ဝိညာဉ်ခွဲထုတ်ခြင်းအဆင့် ကျင့်ကြံသူအများအပြားပင် မရောက်ရှိနိုင်သေးသောအဆင့်ပင်။ သူသည် ဓားပညာတွင် အလွန်ထူးချွန်သောပါရမီရှိသော်လည်း ပင်ကိုယ်အရ ကြွားဝါခြင်းကို မနှစ်သက်သူဖြစ်သည်။

သို့သော် သူသည် ဓားကိုပြန်ရုပ်သိမ်းကာ လှည့်ထွက်သွားသည့်အချိန်တွင် ရှည်လျားသော ဓားတစ်စင်းမှာ သူ၏ခါးနောက်ဘက်မှနေ၍ ဝိညာဉ်ပင်လယ်အတွင်းသို့ ထိုးဖောက်ဝင်ရောက်လာပြီး သူ၏ဝိညာဉ်ပင်လယ်ကို အစိတ်စိတ်အမွှာမွှာ ဖျက်ဆီးပစ်လိုက်တော့သည်။

“မင်းက တော်တော်ပုန်းလျှိုးကွယ်လျှိုး လုပ်နိုင်တာပဲ။ ဒီနေ့ ငါ့ကိုနင်းခြေဖို့အတွက် အကြာကြီး အောင့်ထားခဲ့တာလား”

ဤဓားကိုထိုးသွင်းလိုက်ချိန်တွင် ပိုင်ယွီရန်၏မျက်နှာပေါ်ရှိ နာကျည်းမှုနှင့် မနာလိုမှုများကြောင့် သူသည် အလွန်ပင်စိမ်းသက်သွားရသည်။ သွမ့်ဟယ်၏ ဝိညာဉ်ပင်လယ်ပျက်စီးသွားပြီး သူ၏ သွေးကြောဖွဲ့တည်ခြင်းအဆင့် ကျင့်ကြံခြင်းများလည်း ပျောက်ကွယ်သွားကာ ခန္ဓာကိုယ်သန့်စင်ခြင်း အထွတ်အထိပ်အဆင့်နှင့်သာညီမျှသော ခန္ဓာကိုယ်သာကျန်ရှိတော့သဖြင့် ဤဘဝတွင် ကျင့်ကြံရန် မျှော်လင့်ချက်များ ကုန်ဆုံးသွားခဲ့ရသည်။ သူသည် အသုံးမဝင်သောလူတစ်ယောက် ဖြစ်သွားခဲ့လေပြီ။

ပိုင်ယွီရန်မှာမူ ဘာမှမဖြစ်ဘဲ သူ၏ပါရမီမှာလည်း ထူးချွန်နေဆဲဖြစ်ရာ ဤကဲ့သို့သောကိစ္စကို လုပ်ဆောင်ခဲ့သော်လည်း တိယွမ်ဂိုဏ်းသို့ တပည့်အဖြစ် ခေါ်ယူခြင်းခံခဲ့ရသည်။ အိပ်မက်ဆိုးမှာ ထိုမျှနှင့်မပြီးဆုံးသေးပေ။

အင်မော်တယ်ဆရာသခင်က ပိုင်ယွီရန်ကိုခေါ်ဆောင်သွားပြီးနောက် ပိုင်မိသားစုသည် နောင်တွင်ဖြစ်ပေါ်လာနိုင်သည့် ဘေးရန်များကိုဖယ်ရှားရန်အတွက် သွမ့်ဟယ်ရှိရာ တောင်ရွာလေးသို့ လူလွှတ်ကာ တိုက်ခိုက်ခဲ့ကြသည်။ သူသည် အသက်လုကာထွက်ပြေးခဲ့ရပြီး နောက်ထပ်သုံးနှစ်တာကာလအတွင်း ကလဲ့စားချေခြင်းနှင့်အတူ ရှင်သန်ခဲ့ရသည်။

သူ၏ခွန်အားမှာ ခန္ဓာကိုယ်ကျင့်ကြံသူ အထွတ်အထိပ်အဆင့်နှင့်သာ ညီမျှသော်လည်း သူ၏ဓားပညာနယ်ပယ်ရှိနေဆဲ။ လွန်ခဲ့သောအချိန်အချို့က သူသည် ပိုင်မိသားစုမှ ဝိညာဉ်ပုံဖော်ခြင်းအဆင့်ရှိ အကြီးအကဲတစ်ဦးကိုပင် လုပ်ကြံနိုင်ခဲ့သည်။

အခြားတစ်ဖက်တွင်မူ သုံးနှစ်တာကာလ ကုန်ဆုံးသွားပြီးနောက် ပိုင်ယွီရန်မှာ တိယွမ်ဂိုဏ်း၏အတွင်းစည်းတပည့် ဖြစ်လာခဲ့ပြီး သူ၏ကျင့်ကြံမှုမှာ မူလဖြစ်တည်ခြင်းအဆင့်သို့ပင် ရောက်ရှိနေလေပြီ။ ခန္ဓာကိုယ်သန့်စင်ခြင်းနှင့် မူလဖြစ်တည်ခြင်းအဆင့်... သူတို့နှစ်ဦးကြားရှိ ကွာဟချက်မှာ ရွှံ့ညွှန်နှင့် တိမ်တိုက်ကဲ့သို့ ကွာခြားလှသဖြင့် ယှဉ်ပြိုင်ရန်ပင် အရည်အချင်းမရှိတော့ပေ။

သို့သော် မူလဖြစ်တည်ခြင်းအဆင့်ကျင့်ကြံသူဖြစ်စေကာမူ အသက်အန္တရာယ်ရှိသောနေရာကိုအထိုးခံရလျှင် သေဆုံးနိုင်သည်မဟုတ်ပါလား။ ကြိုတင်လိုအပ်ချက်မှာ ခံစစ်ကိုထိုးဖောက်နိုင်ရန်သာ။ ဓားသခင်ကြီးနယ်ပယ်ကို ကျော်လွန်သွားပြီဖြစ်သော သွမ့်ဟယ်မှာ ထိုခံစစ်ကိုထိုးဖောက်နိုင်ရန် ယုံကြည်ချက်အပြည့်ရှိနေသည်။

ဒေသတွင်း၏ ဂုဏ်ယူစရာတစ်ခုဖြစ်သော ပိုင်ယွီရန်မှာ ယနေ့ပွဲတွင်မူ အလွန်ထင်ရှားလှသည်တော့မဟုတ်။ ဤစစ်ဆေးပွဲတွင် ဝိညာဉ်အခြေတည်အဆင့်နှင့် ကောင်းကင်ကံကြမ္မာအဆင့် ကျင့်ကြံသူများကိုပင် အတွေ့ရများနေသောကြောင့်ဖြစ်သည်။

သူသည် လက်ရှိတွင် တိယွမ်ဂိုဏ်းမှ တပည့်ညီအစ်ကိုအချို့နှင့် စကားပြောနေ၏။ ဂိုဏ်းဝင်တပည့်များမှာ အခြားအဖွဲ့အစည်းများသို့ ကူးပြောင်းခွင့်မရှိကြသော်လည်း ဖေးရှန်ဂိုဏ်း၏ အခွင့်အရေး မျက်စိရှေ့မှောက်သို့ရောက်လာသောအခါ သစ္စာရှိမှုဆိုသည်မှာ...

သူ၏လည်ပင်းနောက်ဘက်မှ ပြင်းထန်သောနာကျင်မှုတစ်ခု ခံစားလိုက်ရသည့်အချိန်တွင် ရည်မှန်းချက်ကြီးမားသောပိုင်ယွီရန်မှာ ဘာဖြစ်သွားမှန်းပင်မသိလိုက်ရချေ။ ထိုမတိုင်မီက မည်သည့်ဝိညာဉ်စွမ်းအားလှုပ်ခတ်မှုမျှမရှိခဲ့။

ဓားမြှောင်မှာ အရေပြားကိုထိမိသွားသည့်အချိန်တွင် သူ၏တစ်ကိုယ်လုံးမှာ ရုတ်တရက် ရေခဲတိုက်အတွင်းသို့ ပစ်ချခံလိုက်ရသလို ခံစားလိုက်ရသည်။ သွေးများစွန်းထင်းနေသော ဓားမြှောင်ဖျားမှာ တစ်ဖက်သို့ထိုးထွက်လာသည်ကို သူ၏မျက်စိဖြင့်မြင်လိုက်ရပြီး ခန္ဓာကိုယ်အတွင်းရှိခွန်အားအားလုံးမှာ လေထွက်သွားသောဘောလုံးကဲ့သို့ ပျောက်ကွယ်သွားတော့သည်။

ပိုင်ယွီရန်မှာ ခေါင်းကိုအားယူကာလှည့်ကြည့်လိုက်ရာ သွမ့်ဟယ်မှာ လူအုပ်ကြားမှ တိုးဝှေ့ထွက်ကာ စာရင်းသွင်းရာနေရာသို့ ပြေးဝင်သွားသည်ကိုတွေ့လိုက်ရ၏။

“လူသတ်မှု... သူပဲ”

“သူက ဒီနေရာမှာလူသတ်ရဲတယ်လား”

ပိုင်ယွီရန်၏ တပည့်ညီအစ်ကိုများသာမက ဖိန်ဟိုင်စီရင်စုတွင် အစီအစဉ်တကျဖြစ်အောင် ထိန်းသိမ်းရန်တာဝန်ယူထားသည့် နံပါတ်တစ်ဂိုဏ်းဖြစ်သော သွမ့်ဟိုင်ခန်းမပင် လန့်နိုးသွားကြရသည်။ ဤသည်မှာ ဖေးရှန်ဂိုဏ်းကလွှဲအပ်ထားသည့် အရေးကြီးသောကိစ္စဖြစ်သဖြင့် မည်သည့်အမှားအယွင်းမျှ အဖြစ်မခံနိုင်ပေ။ ကောင်းကင်ကံကြမ္မာအဆင့်မှ အကြီးအကဲအချို့မှာ သူတို့၏နတ်ဘုရားနန်းတော်များကို ထုတ်ဖော်လိုက်ကြပြီး လူအုပ်ကြားရှိသွမ့်ဟယ်ကိုဖမ်းဆီးရန် တိုက်ရိုက်ဦးတည်သွားကြတော့သည်။

သို့သော် သူတို့မတိုက်ခိုက်မီအချိန်လေးတွင် ရပ်တန့်လိုက်ကြရ၏။ သွမ့်ဟယ်က သွေးများစွန်းထင်းနေသော သူ၏ညာဘက်လက်ဖြင့် နံပါတ်ပြားကိုမြှောက်ပြလိုက်သည်။

“ကျွန်တော် စာရင်းသွင်းပြီးသွားပြီ။ ဖေးရှန်ဂိုဏ်းက အမိန့်ထုတ်ထားတာရှိတယ်... စာရင်းသွင်းထားတဲ့ စစ်ဆေးခံမယ့်သူတွေကို ဘယ်ဂိုဏ်းကမှ အဟန့်အတားမလုပ်ရဘူး၊ မနှောင့်ယှက်ရဘူး”

သူသည် ကလဲ့စားချေမှုကြီးကိုလုပ်ဆောင်ပြီးကာစ အသက် ၁၅ နှစ်အရွယ် ကောင်လေးတစ်ယောက်နှင့်မတူဘဲ သူ၏ထွက်ပေါက်ကိုပါ ကြိုတင်တွက်ချက်ထားနိုင်လောက်အောင် တည်ငြိမ်နေသည်။ သွမ့်ဟိုင်ခန်းမမှအကြီးအကဲအချို့မှာ စိတ်အနှောင့်အယှက်ဖြစ်သွားကြရသည်။

ပိုင်ယွီရန်မှာလည်း စာရင်းသွင်းထားသည့် စစ်ဆေးခံမည့်သူမဟုတ်ပါလား။ သူတို့ မည်သူမှန်းမသိသော်လည်း သူတို့၏မျက်စိရှေ့မှောက်တွင် အသတ်ခံလိုက်ရခြင်းမှာ မျက်နှာကိုဖြတ်ရိုက်လိုက်သလိုပင်။

အကြီးအကဲတစ်ဦးက အေးစက်စွာပြောလိုက်၏။

“မင်း အရွေးခံရပါစေလို့ပဲ ဆုတောင်းနေလိုက်တော့။ မဟုတ်ရင် စစ်ဆေးမှုပြီးတာနဲ့ မင်းရဲ့အကာအကွယ်က အသုံးမဝင်တော့ဘူး”