အခန်း (၁၆၃)

လူတိုင်းမှာ ရှုပ်ထွေးသွားကြသည်။ ဤသည်မှာလည်း ဉာဏ်အလင်းပွင့် အခြေခံအရိုးအဆစ်၏ လေ့လာမှုတစ်မျိုးလား။

သူတို့ နားမလည်နိုင်ကြသော်လည်း ရွှီရန်၏ လုပ်ရပ်ကို လေးစားမှုပြရန်သာ ဆုံးဖြတ်လိုက်ကြသည်။

ရွှီရန်၏ အကြည့်များမှာ နောက်ဆုံးပြကွက်မှ ပြန်လည်ရောက်ရှိလာသည်အထိ အားလုံးက ငြိမ်သက်စွာ စောင့်ဆိုင်းနေကြ၏။

လျိုယန်က သူ၏ စူးစမ်းလိုစိတ်ကို မထိန်းနိုင်တော့ဘဲ "မင်း ရွေးချယ်ပြီးပြီလား" ဟု မေးမြန်းလိုက်သည်။

ရွှီရန်က လက်မလျှော့ချင်သော်လည်း မတတ်နိုင်သည့်ဟန်ဖြင့် ပုခုံးတွန်ပြကာ "မရွေးရသေးဘူးဗျာ"

လောလောဆယ်တွင် ကြက်သွေးရောင်ရတနာပုလဲထံမှ မည်သည့်တုံ့ပြန်မှုမှ မရှိခြင်းမှာ သတင်းကောင်းလား သတင်းဆိုးလား ဆိုသည်မှာ မသေချာသေးပေ။

ရွှီရန်က အကောင်းမြင်စိတ်ဖြင့် ပြုံးလိုက်ပြီး "သတ်မှတ်ချက်နဲ့ ကိုက်ညီတဲ့ ရတနာကို ရှာမတွေ့ခဲ့ပေမဲ့ ရေရှည်အတွက် ကြည့်မယ်ဆိုရင် ဒါက သတင်းကောင်းဖြစ်မှာ အသေအချာပါပဲ"

ကြက်သွေးရောင်ရတနာက ပိုပြီး နက်နဲဆန်းကြယ်လေလေ ၎င်း၏ အဆင့်အတန်းက ပိုမြင့်မားလေလေပင်။

နောင်တစ်ချိန် မြူနှင်းများ ကင်းစင်သွားသည့်အခါ ရွှီရန်အတွက် ပိုမိုကြီးမားသော အကျိုးကျေးဇူးများ ရရှိလာမှာ ဖြစ်သည်။

ဤသို့ တွေးတောခြင်းမှာလည်း မမှားပေ။

သို့သော် ကျန်ရှိနေသူများမှာမူ နားမလည်နိုင်ဘဲ ကြောင်အမ်းအမ်း ဖြစ်နေကြသည်။

"..."

ထိုအရာက တကယ်ကို နားလည်ရခက်လှသည်။

သူပြောတဲ့စကားက ဘာကို ဆိုလိုတာပါလိမ့်။

သူက ပဟေဠိတွေ ဆန်နေတာလား။

လင်းဖုန်းက မလှမ်းမကမ်းက နေရာတစ်ခုကို ညွှန်ပြလိုက်ရင်း "မင်း ဓားသိုင်းကျွမ်းကျင်တာ ငါမှတ်မိတယ်။ စောစောက ဓားပုံသဏ္ဌာန်ရှိတဲ့ ရန်ငြိုးဖွဲ့နတ်ဘုရားရဲ့ ဦးချိုတစ်ခု ရှိတယ်မလား။

အဲဒါက တိုက်တိုက်ဆိုင်ဆိုင်ပဲ ကမ်းစပ်ကို မျောပါလာလို့ လူသားတွေ ကောက်ရထားတဲ့ နတ်

ဘုရားအဆင့်ပစ္စည်းတစ်ခုပဲ။ အလျား ၁.၆ မီတာရှိပြီး သူ့ရဲ့ အလေးချိန်နဲ့ ထက်မြက်မှုက ထိပ်တန်း စူပါအဆင့်လက်နက်တွေထက်တောင် သာလွန်တယ်။

ညစ်ညမ်းမှုတွေ အတော်လေး များနေပေမဲ့ မင်း အဲဒါကို ကြိုတင်စာရင်းပေးထားပြီး နောက်မှ လာယူလို့ရတာပဲ"

ယဲ့ဖျင်ကလည်း "ဟုတ်တယ် အဲဒီဓားက တကယ်ကောင်းတယ်။ မင်းရဲ့ စူပါပေါက်ကွဲအားပြင်း ဓားချက်ကိုလည်း ခံနိုင်ရည်ရှိမှာပါ" ဟု ထောက်ခံသည်။

ရွှီရန်က ခေါင်းယမ်းလိုက်ပြီး "အဲဒီဦးချိုဓားကို ကျွန်တော် သိပ်သဘောမကျဘူးဗျာ"

"ဒါပေမဲ့ အဲဒီထူးဆန်းတဲ့ ရန်ငြိုးဖွဲ့နတ်ဘုရား ရဲ့ အရေပြားကိုတော့ သုတေသနလုပ်ဖို့ ယူသွားချင်မိတယ်။ နှမြောစရာကောင်းတာက အဲဒါက ညစ်ညမ်းမှုတွေ အရမ်းများနေပြီး ဘယ်လိုကိုင်တွယ်ရမလဲဆိုတာ ကျွန်တော် မသိတာပဲ"

ပွင့်ပွင့်လင်းလင်း ပြောရလျှင် နတ်ဘုရားအဆင့် ရတနာတိုက်ထဲက ပစ္စည်းတွေက တိုက်ရိုက်အသုံးပြုဖို့ မသင့်တော်လှပေ။

အနည်းဆုံးတော့ ယွဲ့နယ်ပယ် အောက်က ကျင့်ကြံသူတွေအတွက် မသင့်တော်တာ အမှန်ပဲ။

ညစ်ညမ်းမှုများက အရမ်းကို ပြင်းထန်လွန်းလှသည်။ ယွဲ့နယ်ပယ် ကျင့်ကြံသူတစ်ယောက် အသုံးပြုမယ်ဆိုရင်တောင် ကောင်းကျိုးထက် ဆိုးကျိုးက ပိုများနေနိုင်၏။ တကယ်လို့ တိုက်ပွဲအလယ်မှာ သွေးလေအင်အားကုန်သွားပြီး ပြန်လည်တိုက်ခိုက်ခံရရင်ဘယ်လိုလုပ်မလဲ။

ဒါက ပြဿနာအကြီးကြီးပဲ။

ရွှီရန်မှာ သွေးလေအင်အား ၃၀,၀၀၀ ကျော်ပဲ ရှိသေးသည်။

နတ်ဘုရားအဆင့် ပစ္စည်းတစ်ခုကို လက်နက်အဖြစ်သုံးပြီး ပြင်းထန်တဲ့ ညစ်ညမ်းမှုကို အံတုဖို့ဆိုတာ... နာရီဝက်တောင် မပြည့်ခင်မှာတင် သွေးလေအင်အားက သုည ဖြစ်သွားလိမ့်မယ်။

ဒါက ကိုယ့်လည်ပင်းကိုယ် ကြိုးကွင်းစွပ်ပြီး သေမင်းတံဆိပ်ကပ်လိုက်သလိုမျိုး ဖြစ်နေမှာ အသေအချာပင်။

ဒီလိုမျိုးတော့ မလုပ်တာ အကောင်းဆုံးပဲ။

ကိုယ့်ကိုယ်ကိုယ် လူမိုက်တစ်ယောက်လို အဖြစ်မခံနိုင်ဘူးလေ။

ရွှီရန်က ခပ်အေးအေးပင် ပြုံးလိုက်ပြီး "ကျွန်တော် အခုလောလောဆယ် ဒီဆုလာဘ်ကို အကြွေးတင်ထားလိုက်မယ်ဗျာ။ ကျွန်တော့်ရဲ့ အင်အားက လုံလောက်တဲ့အဆင့်ရောက်မှပဲ လာယူတော့မယ်။ ဒါမှမဟုတ် ကျွန်တော့်လိုအပ်ချက်နဲ့ ကိုက်ညီတဲ့ နတ်ဘုရားအဆင့် ပစ္စည်းအသစ်တွေ ရောက်လာရင်တော့ တစ်ခေါက်ပြန်လာခဲ့ပါ့မယ်"

အထွေထွေတပ်မှူးက ပြုံးလျက် "မင်းတစ်ခုခု လိုအပ်ရင် ငါ့ဆီကို အချိန်မရွေး လာခဲ့လို့ရပါတယ်။ ဆုလာဘ်ရွေးတာက အလောတကြီး လုပ်စရာမလိုပါဘူး။ မင်းရဲ့ ကျင့်ကြံမှုအဆင့်က ငယ်သေးတာဆိုတော့ နောက်ထပ် သုံးနှစ်၊ ငါးနှစ်လောက် စောင့်ပြီးမှ ယူလည်း မနောက်ကျပါဘူး။ ပြီးတော့ လစဉ်လတိုင်း ရောက်လာမယ့် ပစ္စည်းအသစ်တွေရဲ့ စာရင်းနဲ့ ဓာတ်ပုံတွေကိုလည်း မင်းဆီ ပို့ပေးပါ့မယ်"

ရွှီရန် "ကျေးဇူးတင်ပါတယ် တပ်မှူးကြီး"

ဘေးကင်းဇုန် ရတနာတိုက်ရဲ့ ဝန်ဆောင်မှုပေးပုံကတော့ တကယ်ကို ကြယ်ငါးပွင့်အဆင့် သတ်မှတ်ပေးရလောက်အောင် ကောင်းမွန်တာပဲ။

ရွှီရန်က ခပ်ပြုံးပြုံးဖြင့်ပင် သူ၏ စိတ်အာရုံထဲမှ ကြက်သွေးရောင်ရတနာကို စစ်ဆေးကြည့်လိုက်သည်။

အတွင်းထဲတွင် မြူနှင်းများမှာ လှိုင်းထကာ ရွေ့လျားနေသော်လည်း ထိုမြူများအောက်တွင် ဘာတွေဖုံးကွယ်ထားသည်ကို မြင်နိုင်ရန်မှာ မဖြစ်နိုင်သေးပေ။

နတ်ဘုရားအဆင့် ပစ္စည်းပေါင်း ၂၀၀ ကျော်နှင့် အနီးကပ် ထိတွေ့ခဲ့သော်လည်း ရတနာပုလဲမှာ မည်သို့မျှ မလှုပ်မယှက် တည်ရှိနေဆဲပင်။

"ဒါ့အထဲမှာ ကမ္ဘာငယ်လေးတစ်ခုများ ဖုံးကွယ်ထားတာလား"

ဒါကတော့ နည်းနည်းတော့ လွန်ရာကျလိမ့်မယ်။

"နတ်ဘုရားသစ်ရဲ့ မျိုးစေ့များလား။ ဒါကလည်း မဖြစ်နိုင်ပါဘူး... ဒါဆိုရင် နတ်ဘုရားသားရဲဥများလား"

ဒါလည်း မဖြစ်နိုင်ပြန်ဘူး... နတ်ဘုရားသားရဲဥဆိုတာ ဒီလောက်တော့ မသေးငယ်နိုင်ပါဘူး။

"ဟူး... ဘာဖြစ်လို့ မြူနှင်းတွေနဲ့ ဖုံးအုပ်ထားရတာလဲ။ ကောင်းကင်ဘုံလျှို့ဝှက်ချက်တွေ ပေါက်ကြားသွားမှာ ကြောက်လို့လား"

ရွှီရန် အနည်းငယ် မျက်မှောင်ကြုတ်လိုက်မိသည်။

"အဲဒါကြောင့်ပဲ ဖြစ်ရမယ်။ အိပ်မက်ဆိုး ကလဲ့စားချေမိခင်ရဲ့ အလင်းလုံးလေးပဲ ကျန်တော့တဲ့အချိန်မှာ သူမက ဟင်းလင်းပြင်အချိန် အတားအဆီးကို ဖျက်ဆီးပြီး ထွက်ပြေးဖို့ ကြိုးစားခဲ့တာ။ ဒါပေမဲ့ သူမ မလွတ်မြောက်နိုင်ခဲ့ဘဲ ကြောက်စရာကောင်းတဲ့ စကားတစ်ခွန်း ပြောခဲ့သေးတယ်။ ဒီကမ္ဘာကြီးရဲ့ ဟင်းလင်းပြင်နဲ့ အချိန်က အစိတ်စိတ်အမွှာမွှာ ပြတ်တောက်နေတယ်ဆိုတာပဲ"

"နတ်ဘုရားတစ်ပါးကတောင် ကြောက်လန့်တကြား ဖြစ်နေရတယ်ဆိုရင် ဒါက တကယ်ကို အရေးကြီးတဲ့ အချက်အလက် ဖြစ်ရမယ်..."

"ပြီးတော့ ဒီကြက်သွေးရောင်ရတနာပုလဲကလည်း အဲဒီတုန်းက အက်ကြောင်းတွေကြားထဲကနေ အပြာရောင်ကြယ်ပေါ်ကို အတင်းတိုးဝင်လာခဲ့တာပဲ... ဆိုလိုတာက ဒီကြက်သွေးရောင်ရတနာပုလဲဟာ ဟင်းလင်းပြင်နဲ့ အချိန်ဆိုင်ရာလျှို့ဝှက်ချက်တွေနဲ့ ဆက်စပ်နေနိုင်တာပေါ့"

အတွေးများစွာကို ခေါင်းထဲတွင် ဝိုင်းပတ်စဉ်းစားပြီးနောက် ရွှီရန်က သူ၏ မူးဝေနေသော ခေါင်းကို ခါယမ်းလိုက်သည်။

"စဉ်းစားမနေတော့ဘူး။ ငါ့ရဲ့အင်အားက ယွဲ့နယ်ပယ်ကို ရောက်တဲ့အခါကျရင် ဒီမြူနှင်းတွေက အလိုအလျောက် ပျောက်ကွယ်သွားမှာပါ"

"အော်..."

"ခုနက ငါ နတ်ဘုရားသားရဲဥ ဆိုတာကို ပြောလိုက်မိတာလား"

ရွှီရန်၏ ဦးနှောက်ထဲတွင် ရုတ်တရက် အိုင်ဒီယာကောင်းတစ်ခု လက်ခနဲ ပေါ်လာသည်။

သူသည် နှစ်ပေါင်းများစွာကြာအောင် တိရစ္ဆာန်အစာကျွေးခြင်းကို စွဲစွဲမြဲမြဲ လုပ်ဆောင်ခဲ့သူဖြစ်သည်။ ထိုမှော်စွမ်းရည်မှာ ယခုအခါ တတိယအစီအစဉ်ဖြစ်သော နတ်ဘုရားအဆင့် အိမ်မွေးသားရဲ ပြုစုပျိုးထောင်ခြင်းသို့ပင် ရောက်ရှိနေပြီဖြစ်သည်။

ဒါဆိုရင် အစွမ်းထက်တဲ့ ဥတစ်လုံးကို ရှာပြီး သားဖောက်ကာ တိုက်ခိုက်ရေးဖော်အဖြစ် မွေးမြူကြည့်ရင် မကောင်းဘူးလား။

ရွှီရန်က အထွေထွေတပ်မှူးကို ကြည့်ကာ "တပ်မှူးကြီး... ဒီရတနာတိုက်ထဲမှာ သားဖောက်ပြီး မွေးမြူလို့ရတဲ့ သလင်းကျောက်သားရဲဥတွေ ရှိမယ် မဟုတ်လားဗျာ"

တပ်မှူးမှာ အံ့အားသင့်သွားရသည် "ရှိတော့ရှိပါတယ်။ ဒါပေမဲ့ မင်းမှာ စစ်သားရဲ ပြုစုပျိုးထောင်ခြင်းအတွက် အခြေခံအရိုးအဆစ်မရှိဘူး မဟုတ်လား။ သက်ဆိုင်ရာ အခြေခံအရိုးအဆစ် မရှိဘဲ သားဖောက်ထားတဲ့ သလင်းကျောက်သားရဲတွေက သစ္စာရှိမှု အလွန်နည်းပါးပြီး သူတို့ရဲ့ သခင်ကို ပြန်ကိုက်ဖို့ အရမ်းလွယ်တယ် ဒါကို မစမ်းကြည့်တာ အကောင်းဆုံးပါပဲ။ ပြီးတော့ စစ်သားရဲတစ်ကောင်ကို မွေးမြူရတာက ကိုယ်တိုင်ကျင့်ကြံရတာထက် အားထုတ်မှု မနည်းဘူးနော်..."

တပ်မှူးက စေတနာနှင့် အားတက်သရော အကြံပေးနေသော်လည်း ရွှီရန်က ယုံကြည်မှုအပြည့်ဖြင့် "စိတ်မပူပါနဲ့။ ကျွန်တော့်ရဲ့ စစ်သားရဲတွေက ကျွန်တော့်ကို ဘယ်တော့မှ သစ္စာမဖောက်ပါဘူး" ဟု ပြောလိုက်သည်။

လင်းဖုန်း "..."

လျိုယန် "..."

ရွှီရန်၏ ယုံကြည်ချက်အပြည့်ရှိသော အမူအရာနှင့် တောက်ပနေသော မျက်လုံးများကို မြင်

လိုက်ရသည့်အခါ သူတို့ သိလိုက်ကြသည်။

ဒီကလေးက နောက်ထပ် ဝှက်ဖဲတစ်ခုကို ထုတ်ပြတော့မည်ဆိုတာကိုပင်။

ဒါကလည်း နောက်ထပ် ကောင်းကင်ဘုံလက်ဆောင် နတ်ဘုရားစွမ်းရည် အဆင့်မျိုး ဖြစ်နေဦးမလား...

ကိုယ်ပျောက်စွမ်းရည်၊ ကိုယ်ခံပညာ၊ ဓားသိုင်း၊ စက္ကူရုပ်စစ်တပ်၊ စက္ကူရုပ်ကိုယ်ပွား၊ ကင်းထောက်လင်းနို့... ဒီကလေးက အသက်ရှစ်နှစ်ပဲ ရှိသေးတာ။ ဒါတွေအားလုံးကို ဘယ်လိုများ ကျင့်ကြံခဲ့တာပါလိမ့်။ သူ့ရဲ့ စွမ်းရည်တွေက မှန်အရိပ် အရှင်သခင်တစ်ယောက်နဲ့တောင် နှိုင်းယှဉ်လို့ ရနေပြီ။

ရှောင်ရွှယ်၏ ရင်ဘတ်မှာ မြင့်တက်ကာ နိမ့်ဆင်းသွားရသည်။

"စစ်သားရဲ မွေးမြူတာကိုတောင် ယုံကြည်မှုရှိနေတာလား မင်းက ဉာဏ်အလင်းပွင့် အခြေခံအရိုးအဆစ် လား ဒါမှမဟုတ် အရာရာတတ်စွမ်းတဲ့ အခြေခံအရိုးအဆစ်လား။ မင်း မလုပ်နိုင်တာရော ရှိရဲ့လား"

ယဲ့ဖျင်က စဉ်းစားဟန်ဖြင့် "ငါ့အမြင်အရတော့ ရွှီရန် ဒါကို တကယ် လုပ်နိုင်လိမ့်မယ်။ ပြီးတော့ တော်တော်လည်း ကျွမ်းကျင်မှာပဲ။ သူ နတ်ဘုရားတစ်ပိုင်း မူကြိုကျောင်းကို စဝင်ကတည်းက နေပူမရှောင် မိုးရွာမရှောင် တိရစ္ဆာန်တွေကို နေ့တိုင်း အစာသွားကျွေးခဲ့တာ။ တကယ်လို့ ဒါက ဉာဏ်အလင်းပွင့်စွမ်းရည်ကနေတစ်ဆင့် စစ်သားရဲ ပြုစုပျိုးထောင်နည်းကို သုတေသနလုပ်ဖို့ မဟုတ်ရင် သူက ဘယ်လိုလုပ်ပြီး ဒီလောက်အထိ ဇွဲနပဲနဲ့ ၅ နှစ်တိတိ ဆက်တိုက် လုပ်နိုင်မှာလဲ"