အခန်း (၆၇-၆၈)

အခန်း ၆၇ - ကိစ္စတုံး အပြတ်ရှင်းခြင်း

ဓားသင်္ချိုင်းတံခါး ပွင့်သွားသည့်ခဏတွင်၊ စုချန်သည် ထော်ဘယန်၏ ရှေ့သို့ ရောက်ရှိနေပြီဖြစ်ပြီး၊ သူ့ခန္ဓာကိုယ်တွင် နီနီပြာပြာ ဓားစွမ်းအင်များ လင်းခနဲလက်ခနဲဖြစ်နေကာ လျှပ်စီးကြောင်းများ ဆက်တိုက် မြည်ဟီးနေသည်။

"ဘာဖြစ်တာလဲ။"

စုချန်သည် ယခုအခါတွင် ခမ်းနားထည်ဝါသော နဂါးတစ်ကောင်နှင့် တူနေသည်။ သူ့အရှိန်အဝါ ပြင်းထန်လွန်းသဖြင့် ထော်ဘယန် တုန်လှုပ်သွားပြီး အမြန်ပြောလိုက်သည်။

"ကျွန်တော် ခုနက ယွီလင်းတောင်ထိပ်ဘက်ကို ဖြတ်သွားတုန်း၊ အတွင်းစည်းဂိုဏ်းသားအချို့က စုလုံကို ထွက်မသွားအောင် တားဆီးထားတာ တွေ့ခဲ့ရတယ်။ ခဏလောက် နားထောင်ကြည့်တော့မှ ဂိုဏ်းတူညီမလေး စုလုံက ဂိုဏ်းတူအစ်ကိုကြီး ဝူခွမ်းယန်ရဲ့ နဂါးရိုးတွင်းခြင်ဆီမြက်ပင်ကို မတော်တဆ ခူးမိလိုက်လို့၊ သူ့ကို မျက်ရည်ကျမတတ် ခြိမ်းခြောက်နေကြတာ သိလိုက်ရတယ်။"

"သူတို့က ငါ့ညီမကိုတောင် ဖမ်းရဲတယ်ပေါ့။ စုလုံက ငါ့ညီမဆိုတာ သူတို့ကို မပြောဘူးလား။"

စုချန် အေးစက်စွာ မှတ်ချက်ပြုလိုက်သည်။ ဒီဝူခွမ်းယန်ကို သူသိသည်။ သူက အတွင်းစည်းဂိုဏ်း၏ နဂါးနှင့်ကျားအဆင့်သတ်မှတ်ချက်တွင် နံပါတ်ကိုးချိတ်ထားသော သိုင်းပညာရှင်တစ်ဦးဖြစ်ပြီး၊ အချိန်မရွေး အခြေတည်အဆင့်နှောင်းပိုင်းသို့ တက်လှမ်းနိုင်သူဖြစ်သည်။

သို့သော် အမှန်တကယ် ကြောက်စရာကောင်းသည်မှာ သူ့အမြွှာအစ်ကို ဝူခွမ်းရွှီဖြစ်သည်။ သူသည် နဂါးနှင့်ကျားအဆင့်သတ်မှတ်ချက်တွင် ထိပ်ဆုံးနေရာကို ယူထားပြီး၊ ရွှေအမြုတေအဆင့်သို့ ရောက်ရန် ခြေတစ်လှမ်းသာ လိုတော့သူဖြစ်သည်။ သူ့ကို ယွီထျန်းယန်ကလည်း အလွန် တန်ဖိုးထားကိုးစားသည်။

ထော်ဘယန်၏ စကားအနည်းငယ်အပေါ် မူတည်ပြီး၊ အမှားအမှန်ကို စုချန် မဆုံးဖြတ်နိုင်သေးသော်လည်း၊ ဒါက သူတပါးကို အနိုင်ကျင့်ဖို့ အကြောင်းပြချက် မဟုတ်ပေ။

ထော်ဘယန် ခါးသက်စွာ ပြုံးလိုက်ပြီး အမြန်ရှင်းပြသည်။

"သေချာပေါက် ပြောတာပေါ့၊ ဒါပေမဲ့ မပြောတာက ပိုကောင်းဦးမယ်။ ပြောပြီးတာနဲ့ ကျွန်တော်ပါ ရောပြီး အရိုက်ခံလိုက်ရတာပဲ။"

သူသည် နစ်နာသည့် အမူအရာဖြင့် အဝတ်အစားကို မ ပြလိုက်ရာ၊ ထင်ရှားသော ခြေရာတစ်ခု သူ့ခန္ဓာကိုယ်ပေါ်တွင် တွေ့လိုက်ရသဖြင့် အကန်ခံထားရကြောင်း သိသာနေသည်။

"ကောင်းပြီ၊ ဒီကောင်ကို သွားတွေ့ကြတာပေါ့။"

နောက်ထပ် ဘာမှမပြောတော့ဘဲ၊ စုချန်သည် ထော်ဘယန်ကို ခေါ်ဆောင်၍ ချက်ချင်း ဓားပျံစီးကာ ယွီလင်းတောင်ထိပ်ဆီသို့ ဦးတည်လိုက်သည်။

ကောင်းကင်ဘုံပြစ်ဒဏ်ပေးစင်မြင့် အဖြစ်အပျက် ပြီးနောက်၊ စုချန်သည် ထော်ဘယန်ကို တောင်တန်းလောင်ကျွမ်းဓား ရရှိအောင် အောင်မြင်စွာ ကူညီပေးခဲ့သည်။ ထိုအချိန်မှစ၍ ဒီကောင်လေးသည် စုချန်၏ နောက်လိုက်ဖြစ်လာပြီး၊ စုလုံ၏ အခြေအနေကို သူ့အတွက် မကြာခဏ စောင့်ကြည့်ပေးလေ့ရှိသည်။

အခု စုလုံ တားဆီးခံထားရပြီး ထော်ဘယန် အရိုက်ခံထားရပြီဆိုတော့၊ စုချန် ရှေ့မထွက်ဘဲ နေစရာ အကြောင်းမရှိတော့ပေ။

မကြာမီ သူတို့နှစ်ဦး ယွီလင်းတောင်ထိပ်သို့ ရောက်ရှိသွားရာ၊ လူဆယ်ယောက်ခန့် စုဝေးနေကြပြီး၊ ၎င်းတို့ထဲတွင် ဆေးဖော်စပ်ဆောင်မှ အကြီးတန်းဂိုဏ်းသား ပိုင်လုလည်း ပါဝင်သည်။

"အစ်ကိုကြီး။"

"ဂိုဏ်းတူညီလေး စု။"

နှစ်ယောက်စလုံး စုချန်ကို ကြည့်လိုက်ကြသော်လည်း၊ ချင်းယန်တောင်ထိပ်မှ ဂိုဏ်းသားများက စုလုံကို ထွက်လာခွင့်မပေးသေးပေ။

"သူမကို လွှတ်လိုက်။"

စုချန် ဝူခွမ်းယန်ကို လုံးဝ လျစ်လျူရှုပြီး ကြည့်လိုက်သည်။

ဒီလူရဲ့ အရှိန်အဝါက တော်တော်လေး အားကောင်းသည်။ ယန်ယွင်ဖေးထက် များစွာသာလွန်သည်။

သို့သော် စုချန်၏ လက်ရှိအင်အားနှင့်ဆိုလျှင်၊ ဒီလိုလူမျိုးကို ကိုင်တွယ်ဖို့ မခက်ခဲပေ။

"မင်းက ဘယ်သူမို့လို့ ငါတို့ ဂိုဏ်းတူအစ်ကိုကြီး ဝူကို ဒီလိုပြောရဲတာလဲ။"

အတွင်းစည်းဂိုဏ်းသားတစ်ဦး ကြမ်းတမ်းခက်ထန်သော မျက်နှာထားဖြင့် ရှေ့ထွက်လာသော်လည်း၊ နောက်တစ်ခဏတွင် ဓားပျံတစ်လက်က သူ့လည်ပင်းကို ထောက်ထားပြီးဖြစ်ရာ၊ အေးစက်သော ဓားသွားကြောင့် သူ တုန်ရီဆွံ့အသွား‌တော့သည်။

ဝူခွမ်းယန်လည်း မျက်မှောင်ကြုတ်လိုက်သည်။ သူ့ပတ်ဝန်းကျင်ရှိ အတွင်းစည်းဂိုဏ်းသားအားလုံးသည် တော်တော်လေး ကျွမ်းကျင်သူများဖြစ်ကြပြီး၊ လည်ပင်းနှင့် အခြား အရေးကြီးနေရာများကို ခုခံရေးချီစွမ်းအင်ဖြင့် ကာကွယ်ထားကြသည်။ စုချန်က သူတို့ကာကွယ်ရေးကို ဒီလောက်လွယ်လွယ် ဖောက်ထွင်းနိုင်လိမ့်မည်ဟု သူ လုံးဝ ထင်မထားခဲ့ပေ။

"မင်းတို့ ဂိုဏ်းသားမဟုတ်နေရင်၊ အခုချိန် သေနေလောက်ပြီ။"

ဂိုဏ်းသားအချို့ တိုက်ခိုက်ရန် ပြင်လိုက်သော်လည်း သူ တားလိုက်သည်။

"စုချန်၊ ငါက မဆင်ခြင်တတ်တဲ့ လူရမ်းကားမဟုတ်ဘူး။ မင်းညီမက ငါ့ရဲ့ နဂါးရိုးတွင်းခြင်ဆီမြက်ပင်ကို ဖျက်ဆီးလိုက်တယ်။ အဲဒါက ငါ အခြေတည်အဆင့်နှောင်းပိုင်းကို တက်လှမ်းဖို့ စုဆောင်းထားတဲ့ အရေးကြီးပစ္စည်းပဲ။ မင်း ငါ့ကို ကျေနပ်လောက်တဲ့ လျော်ကြေး ပေးနိုင်သရွေ့၊ ငါ သူမကို ပြန်လွှတ်ပေးမယ်။"

ဝူခွမ်းယန်က ပြုံးနေသော မျက်နှာထားရှိသော်လည်း၊ တိတ်တဆိတ် အချိန်မရွေး တိုက်ခိုက်ရန် ပြင်ဆင်ထားသည်။

"အစ်ကိုကြီး၊ သူ့စကား နားမထောင်နဲ့။ ယွီလင်းတောင်ထိပ်က ငါတို့ ဆေးဖော်စပ်ဆောင်ရဲ့ ဝိညာဉ်ဆေးပင်တွေ စိုက်ပျိုးတဲ့နေရာ ဖြစ်နေတာ ကြာလှပြီ။ ဒီနေ့ ဒီနေရာမှာ နဂါးရိုးတွင်းခြင်ဆီမြက်ပင်တစ်ပင် တွေ့လို့ ငါ ယူလိုက်တာ၊ ဒါပေမဲ့ ဝူခွမ်းယန်က အဲဒါ သူ့ဟာဆိုပြီး ဇွတ်ပြောနေတယ်။ သူက လူလိမ်လူညာပဲ။"

စုလုံက စုချန် အမြတ်ထုတ်ခံရမှာ ကြောက်ပြီး၊ နစ်နာသည့် လေသံဖြင့် ပြောလိုက်သည်။

သူမ၏ ပြန်လည်ချေပချက်ကို ကြားသောအခါ၊ ဝူခွမ်းယန် အေးစက်စွာ ရယ်မောလိုက်ပြီး ပြန်မေးလိုက်သည်။

"ဒီနေရာက ဆေးဖော်စပ်ဆောင်ရဲ့ ဝိညာဉ်ဆေးပင်တွေ စိုက်ပျိုးတဲ့နေရာ ဖြစ်နေတာ ကြာပြီဆိုပေမယ့်၊ ယွီလင်းတောင်ထိပ်တစ်ခုလုံး နင်တို့ ဆေးဖော်စပ်ဆောင် ပိုင်တယ်လို့ မဆိုလိုဘူး မဟုတ်လား။ အဲဒီလိုဆိုရင် ငါ ဒီမှာ နဂါးရိုးတွင်းခြင်ဆီမြက်ပင်တစ်ပင် စိုက်ထားတာ ဘာမှားလို့လဲ။"

ဒီစကားတွေက စုလုံကို ပြောစရာမရှိ ဖြစ်သွားစေသည်။ ယခု မည်သူမျှ ဒီ နဂါးရိုးတွင်းခြင်ဆီမြက်ပင်က ဝူခွမ်းယန်ပိုင်ကြောင်း သက်သေမပြနိုင်ကြပေ။

"ရှင် ဘယ်လိုလျော်ကြေးမျိုး လိုချင်တာလဲ။ ကျွန်မ ဂိုဏ်းတူညီမလေး ကိုယ်စား ရှင်လိုချင်တာ ပေးနိုင်ပါတယ်။"

ပိုင်လုက ဝူခွမ်းယန်၏ နောက်ခံကို သိထားပြီး အခြေအနေ ပိုဆိုးမလာစေချင်ပေ။

သို့သော် ဝူခွမ်းယန်၏ ရည်ရွယ်ချက်က မရိုးရှင်းလှပေ။ သူ ချက်ချင်း လက်တစ်ချောင်း ထောင်ပြလိုက်ပြီး ဝှေ့ယမ်းလိုက်သည်။

"ဝိညာဉ်ကျောက်တုံး တစ်ထောင်။"

"ဘာ။ ရှင် ဂိုဏ်းကထွက်ပြီး ဓားပြသာတိုက်စားလိုက်ပါတော့လား။"

ဒီပမာဏကို ကြားသောအခါ၊ ပိုင်လု၏ မျက်နှာမှာ ချက်ချင်း ဒေါသူပုန်ထသွားသည်။ ‌ဂိုဏ်းတွင်းပေါက်ဈေးအရ နဂါးရိုးတွင်းခြင်ဆီမြက်ပင်သည် အများဆုံး ဝိညာဉ်ကျောက်တုံး ၃၀ သာ တန်ကြေးရှိသည်။

ဒီလို မတန်တဆဈေးနှုန်းမျိုးက သာမန်အတွင်းစည်းဂိုဏ်းသားတစ်ယောက် နှစ်ပေါင်းများစွာ စုဆောင်းမှ ရနိုင်မည့် ပမာဏဖြစ်သည်။

စုချန်ကတော့ ဘာမှညှိနှိုင်းဖို့ မမျှော်လင့်ထားပုံရသည်။

"ကြည့်ရတာ မင်းက ရည်ရွယ်ချက်နဲ့ လာတာပဲ။"

နဂါးနှင့်ကျားအဆင့်သတ်မှတ်ချက်ဝင် ထိပ်တန်းသိုင်းပညာရှင်တစ်ယောက်အနေနဲ့၊ ဝူခွမ်းယန်မှာ စုလုံကို ဒုက္ခပေးစရာ အကြောင်းမရှိပေ။ တစ်ခုတည်းသော ရည်ရွယ်ချက်မှာ အခွင့်အရေးကိုသုံးပြီး စုချန်ကို ဖိနှိပ်လိုခြင်းဖြစ်သည်။

သူ့ရည်ရွယ်ချက်ကို ရိပ်မိသွားသော်လည်း၊ ဝူခွမ်းယန် လုံးဝ ဂရုမစိုက်ပေ။

"မင်းက ယန်ယွင်ဖေးလို အမှိုက်ကောင်ကို အနိုင်ယူလိုက်ရုံနဲ့၊ ဂိုဏ်းတူအစ်ကိုကြီး ထျန်းယန်ကို စိန်ခေါ်ဖို့ အရည်အချင်း ပြည့်မီပြီလို့ တကယ် ထင်နေတာလား။ ဝိညာဉ်ကျောက်တုံးတစ်ထောင်နဲ့ မင်းညီမကို ရွေးမလား၊ ဒါမှမဟုတ် ငါ မင်းခြေထောက်တစ်ဖက် ရိုက်ချိုးပြီး ကိစ္စဖြတ်ပေးရမလား။"

ဝူခွမ်းယန် လက်သီးများကို ကျစ်ကျစ်ပါအောင် ဆုပ်လိုက်ရာ အရိုးမြည်သံများ ထွက်ပေါ်လာပြီး၊ ပန်းလုံတုတ်တံအမြုတေ ရုတ်တရက် သူ့နောက်ကျောတွင် ပေါ်လာသည်။ ကြွက်သားအပြည့် ခန္ဓာကိုယ်ကို အဆုံးမဲ့ မှော်စွမ်းအင်များ ဝန်းရံထားပြီး၊ ကမ္ဘာဖျက်မိစ္ဆာ မျောက်ဝံကြီးတစ်ကောင်နှင့် တူနေသည်။

နောက်တစ်ခဏတွင် သူ ခြေထောက်ကို ဆောင့်နင်းလိုက်ရာ၊ မြေကြီး ပြင်းထန်စွာ တုန်ခါသွားပြီး၊ အက်ကွဲကြောင်းအများအပြား လျင်မြန်စွာ ပြန့်ကားသွားသည်။

ဝူခွမ်းယန် လေထဲသို့ ပျံတက်နေပြီဖြစ်ပြီး၊ လက်ပြန်ရိုက်ချက်ဖြင့် သူ့ ပန်းလုံတုတ်တံကို ထုတ်ယူကာ စုချန်အပေါ်သို့ ပြင်းထန်စွာ ရိုက်ချလိုက်သည်။

နားစည်ကွဲမတတ် အသံလှိုင်း ပေါ်ထွက်လာပြီး၊ လူအများအပြား ဝူခွမ်းယန်၏ ကြမ်းတမ်းသော အရှိန်အဝါကြောင့် မှင်သက်သွားကြသည်။ သူ့အင်အားက သာမန်လူများ လက်လှမ်းမမီနိုင်သော အဆင့်တွင် ရှိသည်။

"ဂိုဏ်းတူ မောင်လေး စု၊ သတိထား။"

ပိုင်လု အမြန် သတိပေးလိုက်သော်လည်း၊ စုချန် မလှုပ်မယှက် ရပ်နေပြီး၊ ဝူခွမ်းယန် တိုက်ခိုက်လာသည်ကို မော့ကြည့်နေသည်။

"ဘာလဲ၊ ကြောက်လွန်းလို့ ကြောင်သွားတာလား။"

ဝူခွမ်းယန် ရက်စက်စွာ ပြုံးလိုက်ရင်း လက်ကို ဝှေ့ယမ်းလိုက်ရာ၊ ပန်းလုံတုတ်တံသည် စုချန်၏ ခေါင်းပေါ်သို့ တိုးဝင်သွားသည်။

လူတိုင်း၏ အကြည့်အောက်တွင်၊ စုချန် သူ့ညာဘက်လက်ကောက်ဝတ်ကို လှည့်လိုက်ရာ၊ ချက်ချင်းဆိုသလိုပင် ပြာတစ်လှည့်နီတစ်လှည့် ဓားစွမ်းအင်များ ပေါက်ကွဲထွက်လာပြီး၊ ရဲရဲနီဧကရာဇ်ဓားနှင့် ငှက်မင်းဇာမဏီဓားတို့သည် ချောက်နက်ထဲမှ ထွက်ပေါ်လာသော နဂါးညီ‌နောင်ကဲ့သို့ ဖြစ်နေသည်။

ကြည်လင်ပြတ်သားသော ဓားမြည်သံ ထွက်ပေါ်လာပြီး၊ အခြားသူများ သေချာ မမြင်လိုက်နိုင်မီ၊ ဝူခွမ်းယန် နောက်သို့ လွင့်စဉ်သွားကာ၊ သူ့ ပန်းလုံတုတ်တံ ချက်ချင်း လွတ်ထွက်သွားသည်။

ရုတ်တရက် အပြောင်းအလဲကြောင့် လူတိုင်း အံ့အားသင့်သွားကြသည်။

ဘာဖြစ်သွားတာလဲ။

"ငါလည်း မသိဘူး။"

ချင်းယန်တောင်ထိပ်မှ ဂိုဏ်းသားများ အချင်းချင်း မယုံကြည်နိုင်စွာ ကြည့်နေကြသည်။ စုချန်၏ ဓားပျံက သိပ်မြန်လွန်းအားကြီးတယ်၊ သူတို့ အသေးစိတ်ကိုပင် မမြင်လိုက်ရပေ။

ဘေးတွင် ရပ်နေသော ပိုင်လုလည်း ထပ်တူ အံ့သြသွားသည်။ အရင်တစ်ခါ ကောင်းကင်ဘုံပြစ်ဒဏ်ပေးစင်မြင့်ထက်တွင် စုချန်၏ဓားပျံတွင် ယခုကဲ့သို့ အမြန်နှုန်းနှင့် စွမ်းအား မရှိခဲ့ပေ။

လဝက်ကျော် ကာလအတွင်း စုချန် ပိုမို သန်မာလာတာများလား။

ထိုသို့ တွေးမိပြီး သူမ နောက်တစ်ကြိမ် နက်ရှိုင်းစွာ စိတ်လှုပ်ရှားသွားသည်။

ဝူခွမ်းယန်သည် ဓားပျံနှစ်လက်ကြောင့် လွင့်စဉ်သွားပြီး၊ မြေပြင်ပေါ်သို့ မကျမီ၊ စုချန် သူ့ကို ကန်ထုတ်လိုက်ရာ မြေကြီးပေါ်သို့ ပြင်းထန်စွာ ပြုတ်ကျသွားသည်။

"ဒီကန်ချက်က မင်းအတွက်တန်ရာတန်ကြေး။"

စုချန် ပြောရင်း ထော်ဘယန်ကို ကြည့်လိုက်ရာ၊ ထော်ဘယန်တစ်ယောက် ဝမ်းသာလုံးပင်ဆို့သွားသည်။ စုချန် သူ့ကို ဂရုစိုက်လိမ့်မည်ဟု ထင်မထားခဲ့ပေ။ သူ အကန်ခံလိုက်ရတာ အလကား မဖြစ်တော့ဘူး။

"အလကားကောင်၊ ငါ မင်းကို သတ်မယ်။"

ဝူခွမ်းယန် မြေကြီးပေါ်သို့ အလွန် စုတ်ပြတ်သတ်သော အနေအထားဖြင့် ကျသွားပြီး၊ ဓားချက်တစ်ချက်တည်းဖြင့် ရှုံးနိမ့်သွားလိမ့်မည်ဟု လုံးဝ ထင်မထားခဲ့သဖြင့်၊ ယခု ဒေါသထွက်ပြီး အရှက်ရနေသည်။

"ရပ်လိုက်။"

သူ ပြန်တိုက်ခိုက်ရန် ပြင်လိုက်စဉ်၊ အားကောင်းသော နတ်ဘုရားအရှိန်အဝါ ရုတ်တရက် ကျရောက်လာပြီး၊ ဝူခွမ်းယန် ရောက်လာသူကို မြင်လိုက်သည်နှင့် ချက်ချင်း ဒေါသပြေသွားသည်။

"ဝူခွမ်းရွှီ... ဂိုဏ်းတူအစ်ကိုကြီး။"

ပိုင်လုလည်း အံ့သြသွားသည်။ ရှုတောင်ဂိုဏ်းမှ ဦးဆောင်ကာ မိစ္ဆာများကို တိုက်ခိုက်သည့် စစ်ပွဲကြီး စတင်နေပြီဖြစ်ပြီး၊ ဝူခွမ်းရွှီသည် လွန်ခဲ့သော ရက်အနည်းငယ်က ယွီထျန်းယန်နှင့်အတူ ရန်သူကို တိုက်ခိုက်ရန် သွားခဲ့သည်။ ဒီအချိန် ဂိုဏ်းကို ပြန်ရောက်လာလိမ့်မည်ဟု သူမ ထင်မထားခဲ့ပေ။

ဝူခွမ်းရွှီသည် စကားနည်းသူဖြစ်ပြီး၊ ကိစ္စကို ဆက်လက် မဖြေရှင်းတော့ဘဲ၊ စုချန်ကိုသာ ကြည့်လိုက်သည်။

ထိုအကြည့်တွင် အားကောင်းသော ဝိညာဉ်စွမ်းအင်များ ပြည့်နှက်နေပြီး၊ အနည်းငယ် အသက်ရှူကျပ်စေသော ခံစားမှုနှင့် သတိပေးချက် ပါဝင်နေသည်။

နောက်တစ်ခဏတွင် ဝူခွမ်းယန်နှင့် အခြားသူများကို သူ ခေါ်ဆောင်သွားလေသည်။

အခန်း ၆၈ - မိစ္ဆာဓားကို ဖိနှိပ်ခြင်း

"ရရဲ့လား။ အဆင်ပြေရဲ့လား။"

ဝူခွမ်းယန်နှင့် အခြားသူများ ထွက်ခွာသွားပြီးနောက်၊ စုချန်သည် စိုးရိမ်တကြီးဖြင့် စုလုံဘက်သို့ ချက်ချင်းလှည့်မေးလိုက်သည်။

"ဘာမှမဖြစ်ပါဘူး၊ ကျွန်မ အစ်ကိုကြီးကို ဒုက္ခပေးမိပြန်ပြီ။"

စုလုံက ရှက်ရွံ့စွာ ပြောလိုက်ပြီး၊ ကိုယ့်ကိုယ်ကိုယ် အပြစ်တင်စိတ်များ မျက်နှာတွင် အထင်းသား ပေါ်နေသည်။

ဒါကိုမြင်တော့ စုချန်ပြုံးပြီး သူမကို နှစ်သိမ့်လိုက်သည်။

"မိသားစုဝင်တွေ အချင်းချင်း ဒုက္ခပေးတယ်ဆိုတာ မရှိပါဘူး။ နင်က ဆေးဘုရင်ဆီမှာ ဆေးဝါးပညာ သင်ယူဖို့ပဲ အာရုံစိုက်ထားပါ၊ ကျန်တာ အစ်ကိုကြီးတာဝန် ထားလိုက်။"

သူ့စကားကို ကြားသောအခါ စုလုံ ချက်ချင်း စိတ်သက်သာရာ ရသွားသည်။

အမှန်တကယ်တော့ သူမ၏ ကြိုးစားအားထုတ်မှုများကို စုချန် မြင်တွေ့နေရသည်။ လွန်ခဲ့သော လအနည်းငယ်အတွင်း သူမ၏ ဆေးပညာ စွမ်းရည်များ လျင်မြန်စွာ တိုးတက်လာခဲ့ပြီး၊ အစ်ကိုကြီးကို ကူညီနိုင်ရန် ရည်ရွယ်ချက်ဖြင့် သူမ ဖော်စပ်ထားသော ဆေးလုံးများကို မကြာခဏ ယူလာပေးလေ့ရှိသည်။

ဒီစေတနာကို စုချန် ဘယ်လိုလုပ် နားမလည်ဘဲ နေပါ့မလဲ။

တောင်အောက်သို့ ဆင်းလာစဉ်၊ ပိုင်လုက စုချန်ကို ကြည့်ပြီး မေးလိုက်သည်။

"ဝူခွမ်းရွှီရဲ့ အင်အားကို ဘယ်လိုထင်လဲ။"

"သူ အရမ်းသန်မာတယ်။ ကျွန်တော့်ရဲ့ လက်ရှိအင်အားနဲ့ဆိုရင် သူ့ကို ဘာမှလုပ်နိုင်မှာ မဟုတ်ဘူး။"

ခဏတာ စဉ်းစားပြီးနောက်၊ စုချန်က ကိုယ်ပိုင်သုံးသပ်ချက်ကို ပြောပြလိုက်သည်။

ဝူခွမ်းရွှီသည် အခြေတည်အဆင့်ပြည့်ဝခြင်း ကျွမ်းကျင်သူတစ်ဦး ဖြစ်ရုံသာမက၊ အချိန်မရွေး ရွှေအမြုတေအဆင့်သို့ တက်လှမ်းနိုင်သူဖြစ်သည်။ အတွင်းစည်းဂိုဏ်းတွင် ရှုံးနိမ့်ဖူးခြင်း ရှားပါးပြီး၊ ရှု‌တောင်‌ခြေအနီး ဒေသတစ်ခုလုံးတွင်ပင် အတော်လေး နာမည်ကြီးသည်။

ဘေးတွင် ရပ်နေသော ထော်ဘယန်က စိုးရိမ်တကြီး မေးလိုက်သည်။

"အခု ငါတို့ ဘာလုပ်ကြမလဲ။ အဲဒီညီအစ်ကိုနှစ်ယောက်က မူလက ဂိုဏ်းတူအစ်ကိုကြီး ယွီထျန်းယန်ရဲ့ လူတွေလေ။ အခု မင်းက ဝူခွမ်းယန်ကို တိုက်ခိုက်လိုက်တော့၊ ပြဿနာတွေ ပိုများလာနိုင်တယ်။"

ဒီမေးခွန်းကို ကြားသောအခါ ပိုင်လု ခေါင်းခါလိုက်သည်။

"အဲဒီကိစ္စအတွက် သိပ်စိုးရိမ်စရာ မလိုပါဘူး။ ငါတို့ဂိုဏ်းက ဦးဆောင်တဲ့ မိစ္ဆာတိုက်ဖျက်ရေးစစ်ပွဲက အနီးနားပြည်နယ်အချို့ကို ပျံ့နှံ့နေပြီ၊ အခြားအမတဂိုဏ်းတွေလည်း ပါဝင်လာကြပြီ။ ယွီထျန်းယန်ရဲ့ လက်ရုံးတစ်ဆူအနေနဲ့၊ ဝူခွမ်းရွှီက အချိန်ကြာကြာ စစ်သွားတိုက်နေရမှာဆိုတော့ ဂိုဏ်းတူ‌မောင်လေးစုကို ပစ်မှတ်ထားဖို့ အချိန်ရမှာ မဟုတ်ဘူး။"

သူမ၏ စကားကြောင့် ထော်ဘယန်နှင့် စုလုံတို့ များစွာ စိတ်အေးသွားကြသည်။

စုချန် အဝေးမှ ဂိုဏ်းမြင်ကွင်းကို မော့ကြည့်လိုက်ရာ၊ လေထုထဲတွင် သွေးနံ့သဲ့သဲ့ ရလိုက်သလို ခံစားလိုက်ရသည်။

ဒါက စစ်ပွဲရှည်ကြီးဖြစ်လာမှာ သေချာပြီး၊ အာဏာရှိသူတွေရဲ့ စကားတစ်ခွန်းကြောင့် ဒီစစ်ပွဲထဲမှာပဲ မရေမတွက်နိုင်တဲ့ သက်ရှိတွေဟာ အသက်မဲ့ခန္ဓာအဖြစ် ပြောင်းလဲသွားကြတော့မယ်။

ပိုင်လုနှင့် အခြားသူများကို ပြန်ပို့ပြီးနောက်၊ စုချန် ဓားသင်္ချိုင်းသို့ အမြန် ပြန်လာခဲ့သည်။

ဒီကာလအတွင်း ဂိုဏ်းသားအများအပြား၏ ကျင့်ကြံမှုအဆင့်များ လျင်မြန်စွာ တိုးတက်လာသည်ကို သူ တွေ့ရှိခဲ့ရသည်။ အကြောင်းမှာ သူတို့အများစုသည် အလှည့်ကျ စစ်ထွက်ပြီး တိုက်ပွဲကြီးများကို တွေ့ကြုံခံစားကြရသောကြောင့် ဖြစ်သည်။

ဒီလို သေရေးရှင်ရေး အကျပ်အတည်းမျိုးက လူတွေရဲ့ အလားအလာကို အမြဲ နှိုးဆွပေးလေ့ရှိသည်။

စွမ်းအားကြီးပုဂ္ဂိုလ်များ အဆက်မပြတ် ပေါ်ထွက်လာမှုကို ရင်ဆိုင်ရသဖြင့်၊ စုချန် အနည်းငယ်မျှ အနားမယူရဲဘဲ၊ ဓားသန့်စင်ခြင်း မရှိသော ပြင်ပ အားလပ်ချိန်များတွင် ဆက်လက် ကျင့်ကြံအားထုတ်နေခဲ့သည်။

တစ်လအကြာတွင်၊ သူ့ကျင့်ကြံမှုအဆင့်သည် အရေးကြီးအဆင့်တစ်ခုသို့ ရောက်ရှိလာပြီး၊ အခြေတည်အဆင့်အလယ်ပိုင်းသို့ မကြာမီ ချိုးဖျက်ဝင်ရောက်နိုင်တော့မည်ဟု ခံစားလိုက်ရသည်။

ဒီလိုအမြန်နှုန်းမျိုးက အခြားသူများအတွက် မယုံနိုင်စရာ ကောင်းလောက်အောင် မြန်ဆန်သော်လည်း၊ စုချန်တစ်ဦးတည်းသာ သူ ဖြတ်သန်းခဲ့ရသော ခက်ခဲကြမ်းတမ်းမှုများကို သိသည်။

ပါရမီနှင့် ကြိုးစားအားထုတ်မှုအပြင်၊ အဓိကအကျဆုံးအချက်မှာ ဓားသင်္ချိုင်းအတွင်းရှိ ပေါများလှသော ကြမ်းတမ်းသည့် အရှိန်အဝါများကြောင့် ဖြစ်သည်။

ယနေ့ခေတ်တွင် မိုးနှင့် မြေကြား အသက်ဝိညာဉ်စွမ်းအင်များ ရှားပါးလာသဖြင့်၊ ပါရမီရှင်အများအပြားသည် ပါရမီရှိပါလျက်နှင့် ဘာမှမတတ်နိုင် ဖြစ်နေကြသည်။

သို့သော် စုချန်တွင်မူ စုပ်ယူစရာ မိစ္ဆာစွမ်းအင်များ အဆက်မပြတ် ရှိနေပြီး၊ ၎င်းမှရရှိသော စွမ်းအားသည် သူ့ကျင့်ကြံမှုလိုအပ်ချက်များကို ဖြည့်ဆည်းပေးရန် လုံလောက်သည်။

ဤကဲ့သို့ အားသာချက်များနှင့်အတူ၊ ကောင်းကင်လမ်းစဉ် အခြေတည်ခြင်းဆိုသည့် မွေးရာပါ ပါရမီနှင့် ပေါင်းစပ်လိုက်သောအခါ၊ စုချန် မြန်မြန်ဆန်ဆန် အဆင့်တက်နိုင်သည်မှာ အံ့သြစရာ မဟုတ်ပေ။

အောင်မြင်စွာ အဆင့်တက်ပြီးနောက်၊ ချုံလုံမိစ္ဆာဓားကို ရယူလိုစိတ် ဖြစ်ပေါ်လာသည်။

ဒီဓားက အလွန် အားကောင်းရုံသာမက၊ ဓားဝိညာဉ်ပါရှိသောကြောင့် အနည်းဆုံး ဝိညာဉ်ဓားအဆင့် ဖြစ်ကြောင်း သူသိသည်။

ဒါကို လက်ဝယ်ပိုင်ဆိုင်လိုက်သည်နှင့်၊ သူ့အင်အား သေချာပေါက် အဆများစွာ တိုးတက်လာလိမ့်မည်။

ထို့အပြင် ၎င်းကို ဓားအစီအရင်၏ ပင်မသွေးကြောအဖြစ် အသုံးပြုနိုင်လျှင်၊ ကောင်းကင်နီနီ ဓားအစီအရင်ကို ထုတ်ဖော်လိုက်သောအခါ စွမ်းအားက စိတ်ကူး၍ မရနိုင်လောက်အောင် ဖြစ်လိမ့်မည်။

"အကယ်၍ ဒီရည်မှန်းချက် အောင်မြင်ရင်၊ ရွှေအမြုတေအဆင့်အောက် ကျွမ်းကျင်သူတွေကို ရင်ဆိုင်ရာမှာ ငါ ရှုံးနိမ့်စရာ မရှိတော့ဘူး။"

သူ့အတွေးများကို ရှင်းလင်းပြီးနောက်၊ အကြီးအကဲကျိုးကို ဖွင့်ပြောပြပြီး အကြံဉာဏ် တောင်းလိုက်သည်။

"မင်းမှာ ဒီလို စိတ်ကူးရှိမှတော့၊ ဘာလို့ မစမ်းကြည့်တာလဲ။"

စုချန် ကန့်ကွက်ခံရမည်ဟု တွေးကာ စိတ်ကို ကြိုတင်ပြင်ဆင်ထားပြီး၊ အကြီးအကဲကျိုး ဒေါသထွက်ဆူပူလိမ့်မည်ဟုပင် တွေးထားခဲ့သည်။

သို့သော် တစ်ဖက်လူက အလွန် တည်ငြိမ်နေပြီး အားပေးနေပုံပင် ရသည်။

အနည်းငယ် ရှုပ်ထွေးသွားသော်လည်း၊ စုချန် ရည်ရွယ်ချက် အောင်မြင်သွားသဖြင့် ဓားသင်္ချိုင်း၏ နက်ရှိုင်းရာသို့ ချက်ချင်း ဦးတည်သွားလိုက်သည်။

ချုံလုံမိစ္ဆာဓားသည် သာမန်လက်နက် မဟုတ်သော်လည်း၊ အကြီးအကဲကျိုး ဒီနေရာတွင် ကြီးကြပ်နေသရွေ့၊ ကလေးမဓားဝိညာဉ် ပြဿနာရှာမှာကို စုချန် မပူပေ။

စုချန် ထွက်ခွာသွားသော ကျောပြင်ကို ကြည့်ပြီး အကြီးအကဲကျိုး ချောင်းအနည်းငယ် ဟန့်လိုက်ကာ တီးတိုး ရေရွတ်လိုက်သည်။

"ချုံလုံမိစ္ဆာဓားက ဒီမှာ အကြာကြီး အပိတ်လှောင်ခံထားရဖို့ ကံပါမလာဘူး။ မင်းခန္ဓာကိုယ်ပေါ်က ဓားစွမ်းအင်က တော်တော် ထူးခြားတယ်။ မင်း တကယ်ပဲ ဒီဓားကို ထိန်းချုပ်နိုင်လောက်တယ်။"

အကြီးအကဲကျိုးက စုချန်၏ စိတ်နေသဘောထားကို ကောင်းကောင်းသိပြီး၊ မိစ္ဆာဓား၏ လွှမ်းမိုးမှုကို အလွယ်တကူ ခံရမည့်သူ မဟုတ်ကြောင်း သိသဖြင့် စိတ်အေးနေခြင်း ဖြစ်သည်။

စုချန် အက်ကွဲကြောင်းချောက်နက်သို့ ရောက်ရှိလာသောအခါ၊ မဟူရာရွှေကြိုးကို အဆင်သင့် ပြင်ထားလိုက်သည်။ မိစ္ဆာဓားကို ချိတ်ပိတ်ထားပြီးဖြစ်၍၊ ဒီပစ္စည်းနှင့်ဆိုလျှင် လွယ်ကူစွာ ထိန်းချုပ်ရန် လုံလောက်သည်။

"အစ်ကိုကြီး၊ နောက်ဆုံးတော့ ရောက်လာပြီပေါ့။ ရှင်က တကယ်ပဲ ကမ္ဘာပေါ်မှာ အယုံကြည်ရဆုံး ယောက်ျားသားပါပဲ။"

ကလေးမဓားဝိညာဉ်သည် စုချန်ဘေးတွင် ပေါ်လာပြီး၊ ပြုံးလိုက်သောအခါ ချွန်ထက်သော သွားနှစ်တန်း ပေါ်လာသဖြင့် ကဝေမလေးတစ်ကောင်နှင့် ပိုတူနေသည်။

"ခဏနေရင် ငါ မင်းရဲ့ မူလပုံစံကို ပြန်ဆွဲထုတ်ယူတော့မယ်။ မင်း ဘာပြဿနာမှ မရှာမှာ သေချာတယ် မဟုတ်လား။"

စုချန် ကလေးမ၏ မျက်လုံးများကို စိုက်ကြည့်လိုက်သည်။ ဒီကောင်မလေးမှာ နောက်ကွယ်က ကြံစည်မှု ရှိသည်ဖြစ်စေ မရှိသည်ဖြစ်စေ၊ အရင်ဆုံး ခြိမ်းခြောက်ထားရမည်။

"ဘယ်လိုလုပ် ဖြစ်နိုင်မှာလဲ။ ကျွန်မတို့က အတူတူ ဒုက္ခခံခဲ့ကြတာပဲ၊ စိတ်မပူပါနဲ့။"

ကလေးမဓားဝိညာဉ်မှာ တမင်စ‌လျက် လူယုတ်မာအပြုံးနှင့် အပြစ်ကင်းစင််ပြီး အန္တရာယ်ကင်းသော ပုံစံမျိုး လုပ်ပြလိုက်သည်။

"ကောင်းပြီလေ။"

စုချန် သဘာဝကျကျပင် သူမ၏ အဓိပ္ပာယ်မရှိသော စကားများကို မယုံပေ။ ချုံလုံမိစ္ဆာဓားကို ဆယ်ယူပြီးတာနဲ့ ချက်ချင်း သန့်စင်လိုက်မယ်၊ ပြီးရင် ကလေးမဓားဝိညာဉ် ဘာအကြံအစည်ပဲရှိရှိ ကိစ္စမရှိတော့ဘူး။

အောက်ဘက်ရှိ ပူပြင်းသော မီးတောင်ချော်ရည်များကို ကြည့်လိုက်ပြီး၊ စုချန် မဟူရာရွှေကြိုးကို ချက်ချင်း ပစ်ချလိုက်ကာ မီးတောင်ချော်ရည် နက်ရှိုင်းရာရှိ မိစ္ဆာဓားကို ဖမ်းယူလိုက်သည်။

သို့သော် မိစ္ဆာဓားကို ဖမ်းမိလိုက်သည့် ခဏတွင်၊ ကလမဓားဝိညာဉ်က စူးရှစွာ အော်ဟစ်လိုက်ပြီး မိစ္ဆာဓားထဲသို့ ချက်ချင်း ပြန်ဝင်သွားသည်။

"အစ်ကိုကြီး ကျေးဇူးပြုပြီး ဓားကိုဒီထဲက ယူထုတ်သွားပါတော့။ ကျွန်မတစ်သက်လုံး ရှင် ခိုင်းတာ အကုန် လုပ်ပါ့မယ်။"

ကလေးမဓားဝိညာဉ်၏ တောင်းပန်သံက ထွက်ပေါ်လာသည်။ ယခင်ကကဲ့သို့ပင် သူမ လုံးဝ မဟူရာကြိုးကို မခုခံနိုင်ပေ။

"ကောင်းပြီ၊ မင်းကိုယ်တိုင် ပြောတာနော်။"

စုချန် မဟူရာရွှေကြိုးကို ပြန်ရုပ်သိမ်းလိုက်သော်လည်း၊ အချိန်မရွေး ပြန်သုံးနိုင်ရန် အသင့်ပြင်ထားသည်။

လက်တစ်ချက် ဝှေ့ယမ်းလိုက်ရာ၊ အနီရောင် ချုံလုံမိစ္ဆာဓားသည် မီးတောင်ချော်ရည်များထဲမှ ဖြည်းညှင်းစွာ ပျံတက်လာပြီး၊ အိပ်ပျော်နေသော နဂါးတစ်ကောင် နိုးထလာသကဲ့သို့ ကြောက်မက်ဖွယ် မိစ္ဆာစွမ်းအင်များကို ထုတ်လွှတ်နေသည်။

သူ့ရှေ့တည့်တည့်သို့ ရောက်လာသည်အထိ မည်သည့် မမျှော်လင့်သော အရာမှ မဖြစ်ပွားခဲ့ပေ။ ဓားသင်္ချိုင်းအတွင်းရှိ မှော်ဓားအားလုံး ဖြည်းညှင်းစွာ လည်ပတ်နေပြီး၊ မည်သည့် အခြေအနေကိုမဆို ကိုင်တွယ်ရန် အသင့်ဖြစ်နေကြသည်။

သို့သော် ထိုအချိန်တွင်၊ ချုံလုံမိစ္ဆာဓားမှ အနီရင့်ရောင် အလင်းတန်းများ ပေါက်ကွဲထွက်လာပြီး၊ ဓားသင်္ချိုင်းတစ်ခုလုံးရှိ မှော်ဓားများကို တုန်ခါသွားစေသည်။

ချက်ချင်းဆိုသလိုပင် ကြောက်မက်ဖွယ် သတ်ဖြတ်လိုသော အရှိန်အဝါမှာ မိစ္ဆာဓားမှ ပေါက်ကွဲထွက်လာပြီး၊ စုချန်၏ ခန္ဓာကိုယ်ထဲသို့ ချက်ချင်း တိုးဝင်သွားသည်။

ဒီသတ်ဖြတ်လိုသော အရှိန်အဝါသည် ထိုမှော်ဓားများထက် များစွာသာလွန်ပြီး၊ အခြေတည်အဆင့် ကျွမ်းကျင်သူတစ်ဦး၏ စိတ်ကို ချက်ချင်းနီးပါး ဖျက်ဆီးပစ်နိုင်သည်။

သို့သော် စုချန် ကြိုတင်ကာကွယ်မှုများ လုပ်ထားပြီးဖြစ်သည်။ သူ့မွေးရာပါ ဓားခန္ဓာကိုယ်မှ စွမ်းအားများ ထုတ်လွှတ်လိုက်ရာ၊ ဝင်ရောက်လာသော သတ်ဖြတ်လိုသည့် အရှိန်အဝါကို ချက်ချင်းနီးပါး ဝါးမြိုပစ်လိုက်သည်။

ရုတ်တရက် အပြောင်းအလဲက မမျှော်လင့်ထားလွန်းသဖြင့် ချုံလုံမိစ္ဆာဓားပင် တုံ့ပြန်ချိန် မရလိုက်ပေ။

သို့သော် ဒီအဆင့်ရှိသော မှော်လက်နက်တစ်ခုက လွယ်လွယ် အရှုံးမပေးလို‌ပေ။ ဓားက ရူးသွပ်စွာ တုန်ခါလာပြီး၊ ဓားသွားများ ပြင်းထန်စွာ လက်ခနဲဖြစ်ကာ၊ ပြန်လည်တိုက်ခိုက်ရန် စွမ်းအားထုတ်လွှတ်ချင်နေသည်။

"ငြိမ်ငြိမ်နေစမ်း။"

စုချန် စူးရှစွာ အော်ဟစ်လိုက်ပြီး၊ တစ်ချိန်တည်းမှာပင် သူ့အတွင်းအားမှော်စွမ်းအင်ဖြင့် ဖိနှိပ်လိုက်သည်။ မွေးရာပါ ဓားခန္ဓာကိုယ်၏ အရှိန်အဝါက ချက်ချင်း ဖိနှိပ်ချုပ်တည်းလိုက်သည်။

တစ်ချိန်က ဘယ်သူမှ မယှဉ်နိုင်ခဲ့သော မိစ္ဆာဓားသည် ယခု တိတ်ဆိတ်သွားခဲ့ပြီ။

ကြမ်းတမ်းသော အရှိန်အဝါမှ ပြောင်းလဲသွားသော မှော်စွမ်းအင်များ သူ့ခန္ဓာကိုယ်ထဲတွင် ဖြည်းညှင်းစွာ ပျံ့နှံ့သွားသည်နှင့်၊ စိတ်ကူးယဉ်ပုံရိပ်တစ်ခု စုချန်၏ မျက်စိရှေ့တွင် ပေါ်လာသည်။

တောင်တန်း နက်ရှိုင်းရာတွင်၊ စုချန်သည် သူ့ဂိုဏ်းတူအစ်ကိုကြီးနောက် လိုက်ပါပြီး မိစ္ဆာဂိုဏ်းတစ်ခု၏ ခြေကုပ်စခန်းထဲသို့ တိတ်တဆိတ် ဝင်ရောက်သွားသည်။

အတွင်းပိုင်းသို့ ဦးတည်နေသော လမ်းတစ်လျှောက်တွင် သွေးစွန်းသော တိုင်အများအပြား ရှိနေပြီး၊ တစ်ခုစီတွင် အရေခွံခွာခံထားရသော လူသေအလောင်းများ ချိတ်ဆွဲထားသည်၊ အားလုံးက မျိုးနွယ်စုတစ်ခုတည်းမှ ဖြစ်ကြသည်။

သူတို့၏သွေးများသည် အဆက်မပြတ် စီးကျနေပြီး၊ ရေမြောင်းငယ်လေးအတိုင်း သွေးကန်ထဲသို့ စီးဝင်နေသည်မှာ ကြက်သီးထဖွယ် မြင်ကွင်းပင်။

သွေးကန်ရှေ့တွင် မိန်းကလေးငယ်တစ်ဦး အဆက်မပြတ် ငိုကြွေးနေသော်လည်း၊ ဒါက မိစ္ဆာများအတွက်မူ အားရပျော်ရွှင်စရာ ဖြစ်လာသည်။ သူတို့က သူမရှေ့မှာတင် သူမ၏မိဘများကို တစ်စစီ အရေခွံခွာနေကြသည်။

အော်ဟစ်သံများ၊ ငိုကြွေးသံများနှင့် ထိန်းချုပ်မရသော ရယ်မောသံများက မကောင်းမှုများနှင့် ပြည့်နှက်နေသော ဂူထဲတွင် ပဲ့တင်ထပ်နေသည်။ ဒီမြင်ကွင်းက မိန်းကလေးငယ်ကို နက်ရှိုင်းစွာ ထိခိုက်စေပြီး၊ သူမမိဘများ၏ ဆိုးရွားသော သေဆုံးမှုက သူမကို သွေးမျက်ရည်ကျစေသည်။

စုချန် ထိန်းချုပ်မရသော ဒေါသများ ပြည့်နှက်လာပြီး၊ အပြင်ထွက်၍ မိစ္ဆာများအားလုံးကို သတ်ပစ်ချင်စိတ် ပေါက်လာသည်။

"စိတ်လိုက်မာန်ပါ မလုပ်နဲ့။ ငါတို့ရဲ့ ဂိုဏ်းတူတွေ မရောက်လာသေးဘူး။ အခု ထွက်သွားရင် ငါတို့အသက်ပါ ဆုံးရှုံးသွားလိမ့်မယ်။"

"ငါတို့ ဒီအတိုင်း လျစ်လျူရှုထားရမှာလား။ ဒါဆို ငါတို့နဲ့ ဒီမိစ္ဆာတွေ ဘာကွာခြားတော့မှာလဲ။"

စုချန် ဒေါသကို မြိုသိပ်ပြီး သူ့ဂိုဏ်းတူအစ်ကိုကြီးကို ကြည့်လိုက်သော်လည်း၊ တစ်ဖက်လူက သူ့လက်ကို တင်းတင်းဆုပ်ထားရင်း တိတ်ဆိတ်နေရုံမှတပါး ဘာမှမတတ်နိုင်ပေ။

"ငါတို့ ဒီအရေးကြီးကိစ္စကို မပျက်စီးစေရဘူး။ အခု ငါတို့ထွက်သွားရင် မိစ္ဆာတွေအကုန် ထွက်ပြေးကုန်လိမ့်မယ်။"

စုချန် တိတ်ဆိတ်သွားပြီး၊ မိန်းကလေးငယ်၏ ဝိညာဉ်ကို ထုတ်ယူကာ သွေးကန်ထဲတွင် မိစ္ဆာဓားအား သန့်စင်နေသည်ကို ကူကယ်ရာမဲ့စွာ ကြည့်နေရသည်။

တစ်ခဏအတွင်း သွေးကန်တစ်ခုလုံး ကြောက်မက်ဖွယ် မီးတောက်များဖြင့် ပေါက်ကွဲထွက်လာပြီး၊ မိန်းကလေးငယ်၏ ဝိညာဉ်မှ ပြင်းထန်သော အငြိုးအတေးများ ထွက်ပေါ်လာကာ၊ မိစ္ဆာဂူတွင်းတစ်ခုလုံးကို တုန်ခါသွားစေသည်။

"ငါတို့က သူမရဲ့ မျိုးနွယ်စုဝင် ၁၀၈ ယောက်လုံးကို သတ်ပစ်လိုက်တာနဲ့တင် ဒီ ကောင်မလေးက နောက်ဆုံးတော့ လုံးဝ မိစ္ဆာစိတ်ဝင်သွားပြီပဲ။ သူမဆီက ထွက်လာတဲ့ အရှိန်အဝါက တကယ့်ကို ရက်စက်တာပဲ။"

မိစ္ဆာများ ဝမ်းသာသွားကြသည်၊ နောက်ဆုံးတော့ သူတို့ မိစ္ဆာဓားကို သွန်းလုပ်ကြရတော့မည်။

"ကြမ်းတမ်းတဲ့ အရှိန်အဝါက အရမ်းများလွန်းတယ်၊ ငါတို့အင်အားနဲ့ ဖိနှိပ်ဖို့ ခက်ခဲလိမ့်မယ်လို့ စိုးရိမ်ရတယ်။ သူမရဲ့ အသားနဲ့အရိုးတွေကို မဟူရာရွှေကြိုးအဖြစ် သန့်စင်လိုက်ကြရအောင်၊ အဲဒါဆို ထိန်းချုပ်ရ ပိုလွယ်သွားလိမ့်မယ်။"

မကြာမီ မိစ္ဆာအချို့က သူမ၏ ခန္ဓာကိုယ်ကို ယူကာ သွေးကန်ထဲသို့ ပစ်ချလိုက်ပြီး လျှို့ဝှက်နည်းစနစ်များ အသုံးပြု၍ စတင်သန့်စင်လိုက်ကြသည်။

မဟူရာရွှေကြိုး ပြီးစီးသွားသည့်အချိန်တွင်၊ မိစ္ဆာများကို သုတ်သင်ရန် အချက်ပြမီး အပြင်ဘက်မှ နောက်ဆုံးတော့ ရောက်လာသည်။

ဒေါသများ ပြည့်နှက်နေသော စုချန် ချက်ချင်း ပြေးထွက်သွားသည်။ မဟူရာရွှေကြိုးဖြင့် ထွက်ပြေးလွတ်မြောက်သွားပြီး ဒဏ်ရာအပြင်းအထန် ရသွားသော မိစ္ဆာတစ်ကောင်မှလွဲ၍၊ ကျန်သူအားလုံး ရှုတောင်ဂိုဏ်းသားများ၏ လက်ချက်ဖြင့် သေဆုံးသွားကြသည်။

ထို့နောက် စုချန် သနားစိတ်ဝင်ကာ ချုံလုံမိစ္ဆာဓားကို သိမ်းဆည်းလိုက်သည်။

"ဒီဓားက ကြမ်းတမ်းတယ်၊ လမ်းမှားမရောက်အောင်နဲ့ မိစ္ဆာစိတ်မဝင်အောင် သတိထားပါ။"

သူ့ဂိုဏ်းတူအစ်ကိုကြီးက တားမြစ်ရန် ကြိုးစားသော်လည်း၊ သူကတော့ သိမ်းထားလိုက်သည်။

ထိုအချိန်မှစ၍ ဤဓားသည် သူ့တိုက်ပွဲများတွင် အဖော်ပြုခဲ့ပြီး၊ မရေမတွက်နိုင်သော မိစ္ဆာများကို နှိမ်နင်းခဲ့သည်။

သို့သော် ဓားဝိညာဉ်က သူ့ကို သတ်ဖြတ်ရန် အကြိမ်ကြိမ် ဖြားယောင်းခဲ့သည်။ သတ်ဖြတ်‌တိုင်း သူသည် စိတ်ကြွရူးသွပ်လှစွာ သွေးဆာနေမှုကို ခံစားရပြီး၊ သူ့မှော်စွမ်းအင်များသည်လည်း ပိုမိုမြန်ဆန်စွာ တိုးတက်လာသည်။

မည်သည့်အချိန်က စမှန်းမသိ‌သော်ငြား၊ သတ်ဖြတ်စရာ မိစ္ဆာမတွေ့လျှင် သူ အလွန် ဒေါသထွက်လွယ်လာပြီး၊ အချိန်မရွေး လူတစ်ယောက်ယောက်ကို အစားထိုး သတ်ပစ်ချင်လာသည်။

ဒီလိုအတွေးမျိုးက လုံးဝ ထိန်းချုပ်မရနိုင်ဘဲ၊ နောက်ဆုံးမှာ ပြင်ဆင်မရသော အမှားတစ်ခုဆီသို့ ဦးတည်သွားစေသည်။

မြို့သူမြို့သားများ အသတ်ခံရသည်ကို မြင်သောအခါ၊ နောက်ဆုံးတွင် သူ၏အပြစ်များကို ဆေးကြောရန် ကိုယ့်ကိုယ်ကိုယ်သတ်သေဖို့သာ ရွေးချယ်လိုက်သည်။

ဒီနေရာမှာပဲ စုချန် သူ့စိတ်ကူးယဉ်ကမ္ဘာထဲမှ လန့်နိုးလာပြီး၊ မိစ္ဆာဓားကို ကြောက်ရွံ့စိတ်ဖြင့် ကြည့်လိုက်သည်။

"မင်းမှာ ဒီလိုအတိတ်မျိုး ရှိလိမ့်မယ်လို့ ငါထင်မထားခဲ့ဘူး။ ဒီဓားက ဒီလောက် မိစ္ဆာဆန်နေတာ မဆန်းပါဘူး။"

"ရှင် ကျွန်မရဲ့ အတိတ်ကို မြင်နိုင်တာလား။"

ကလေးမဓားဝိညာဉ် တုန်လှုပ်သွားသည်၊ စုချန် လိမ်မပြောကြောင်း သူမ ပင်ကိုယ်အသိအရ ခံစားလိုက်ရသည်။

စုချန် ခေါင်းညိတ်လိုက်သည်။

"တကယ်ပါ၊ ချုံလုံမိစ္ဆာဓားကနေတဆင့် မင်းရဲ့အတိတ်ကို ငါသိနိုင်တယ်။ ဒီမဟူရာရွှေကြိုးက မင်းရဲ့ အသားနဲ့အရိုးတွေကနေ ဖြစ်တည်လာတာဆိုတော့၊ ငါ ဒါကို သိမ်းထားစရာ မလိုတော့ပါဘူး။ အသုံးမလိုမှတော့ ဒီမှာပဲ စွန့်ပစ်လိုက်တော့။"

ပြောပြီးသည်နှင့် သူ မဟူရာရွှေကြိုးကို ချေမွပြီး မီးတောင်ချော်ရည်ထဲသို့ ပစ်ချလိုက်သည်။

ဒါကိုမြင်တော့ ကလေးမ မတုန်လှုပ်ဘဲ မနေနိုင်တော့ပေ။

"အဲဒါက ရှင် ကျွန်မကို ဖိနှိပ်ဖို့ သုံးနိုင်တဲ့ တစ်ခုတည်းသော အရာလေ။ ရှင်က အလွယ်တကူ ဖျက်ဆီးပစ်လိုက်တာလား။ နောက်ကျရင် ကျွန်မ ရှင်ကို ပြန်ထိခိုက်‌စေမှာ မကြောက်ဘူးလား။"

စုချန် ပြုံးပြီး ပြောလိုက်သည်။

"ငါ မင်းကို ရွေးချယ်ပြီးမှတော့၊ နောက်ဆက်တွဲရလဒ်တွေကို မကြောက်ပါဘူး။"

ကလေးမဓားဝိညာဉ် လုံးဝ တိတ်ဆိတ်သွားသည်။ ဒီလို ထူးဆန်းတဲ့လူမျိုးကို သူမ ပထမဆုံးအကြိမ် တွေ့ဖူးခြင်းဖြစ်ပြီး၊ ဒါကို စုချန်က အခွင့်အရေးယူ၍ ချုံလုံမိစ္ဆာဓားကို သန့်စင်ပြီး ထိန်းချုပ်လိုက်သည်။

အကယ်၍ တစ်ဖက်လူက အနာဂတ်မှာ လက်စားချေချင်ရင်တောင် အလကားပါပဲ။ စုချန်က ကောင်းကင်ဝါးမြို သားရဲဝိညာဉ်၏ လျှို့ဝှက်ချက်ကိုလည်း ဖုံးကွယ်ထားသည်။ အကယ်၍ ဒီက‌လေးမမှာ မရိုးသားတဲ့ ရည်ရွယ်ချက်ရှိရင်၊ သူ့အနေနဲ့ ဓားဝိညာဉ်ကို တိုက်ရိုက် ဝါးမြိုပစ်လိုက်ရုံပါပဲ။

သို့သော် ကလေးမ ခမျာ ဒီအကြောင်းအရာအားလုံးကို မသိရှာပေ။ အခု ချုံလုံမိစ္ဆာဓားကို သန့်စင်ပြီးပြီဖြစ်၍၊ စုချန် စိတ်ကြိုက် အသုံးပြုနိုင်ပြီဖြစ်သည်။