အခန်း (၄၇၇-၄၇၈)

အပိုင်း(၄၇၇) လူယုတ်မာ

"သမီးရဲ့ဖေဖေ လာနေပြီထင်တယ်"

ကလေးမလေးက ထိုစကားကို ပြောလိုက်ပြီးနောက်တွင်တော့ ပျော်ရွှင်ဖွယ်ကောင်းနေသော လေထုက ရုတ်တရက် ရပ်တန့်သွားခဲ့သည်။

သူတို့နှစ်ဦးက တစ်ယောက်မျက်နှာ တစ်ယောက် ကြည့်လိုက်ကြသည်။ ထိုအချိန်ရောက်မှသာ မည်သည့်အချိန်ကတည်းက စတင်ခဲ့မှန်းမသိဘဲ မူလက ငြိမ်သက်နေသော လေထုက စတင်ရွေ့လျားနေကြောင်း သူတို့ ရုတ်တရက် သတိပြုမိသွားကြ၏။

မျက်စိတစ်ဆုံးအကွာအဝေးတွင် ထူးဆန်းစွာပင် အားပျော့သော်လည်း ပုံမှန်မဟုတ်သော လေဆင်နှာမောင်းငယ်များ ဖြစ်ပေါ်နေပြီး ထိတ်လန့်ဖွယ်ကောင်းသော အငွေ့အသက်တစ်ခုက သူတို့ဆီသို့ လျင်မြန်စွာ ချဉ်းကပ်လာနေသည်ကို မသဲမကွဲ ခံစားလိုက်ရသည်။

ထိုအငွေ့အသက်က အလွန်တရာ ကြောက်မက်ဖွယ်ကောင်းလှသဖြင့် သူတို့နှစ်ဦးစလုံး၏ ရင်ဘတ်ထဲတွင် အနည်းငယ် မွန်းကျပ်လာပြီး အသက်ရှူရပင် ခက်ခဲလာသလို ခံစားလိုက်ရသည်။

သူတို့နှစ်ဦးက အကြည့်ချင်းဖလှယ်လိုက်ကြပြီး အန္တရာယ်ကို လျင်မြန်စွာ အာရုံခံမိလိုက်ကြ၏။ ထိုခဏတွင်ပင် လေထုက ချက်ချင်းဆိုသလို လေးလံတင်းကျပ်သွားခဲ့သည်။

"ကလေးမလေး... သမီးမှာ တကယ်ပဲ ဖေဖေရှိတာလား" ဝူချင်းယုက ကမန်းကတန်း မေးလိုက်သည်။ ယခင်က သူတို့အနေဖြင့် ဤမေးခွန်းကို အလိုအလျောက် လျစ်လျူရှုထားခဲ့မိသည်မှာလည်း အပြစ်ဆိုစရာတော့ မရှိပေ။

ဤမျှ အစွမ်းထက်သော သက်ရှိတစ်ဦးကို မွေးဖွားပေးနိုင်သည့် မိဘများဆိုသည်မှာလည်း ကိုယ်တိုင်က အားနည်းနေမည်မဟုတ်ဘဲ အဆိုးဆုံးအခြေအနေတွင်ပင် သူတို့ထက် အဆပေါင်းများစွာ သာလွန်သည့် စူပါဆင့်ကဲပြောင်းလဲသူများ ဖြစ်နေပေလိမ့်မည်။

ထိုကဲ့သို့သော သူများက လုံးဝ နာမည်မရှိဘဲ နေမည်မဟုတ်သလို သူတို့၏ ကလေးကိုလည်း ဓာတ်ခွဲခန်းထဲတွင် လူတွေစမ်းသပ်ရန်အတွက် ချန်ထားရစ်ခဲ့မည် မဟုတ်ပေ။

ယခင်က ပြန်လည်တည်ဆောက်ရေးဇုန်သည် အလွန်အမင်း ဖြူစင်တောက်ပနေခြင်းမျိုး မဟုတ်ဘဲ နောက်ကွယ်တွင် အမှောင်ခြမ်းများ ရှိနေတတ်သော်လည်း ဆင့်ကဲပြောင်းလဲသူများ၏ သားသမီးများ လုံခြုံရေးနှင့် ပတ်သက်လာလျှင်တော့ ဆင့်ကဲပြောင်းလဲသူများ၏ သည်းခံနိုင်စွမ်းကို ကျော်လွန်သွားစေမည့် ကိစ္စမျိုးသာ ဖြစ်သည်။

ဤကိစ္စသာ ပေါက်ကြားသွားပါက ပြန်လည်တည်ဆောက်ရေးဇုန်၏ တည်ငြိမ်မှုကို တုန်လှုပ်သွားစေနိုင်ပြီး အမြဲတမ်း တားမြစ်ထားသော စည်းမျဉ်းတစ်ခုဖြစ်သဖြင့် လုံးဝ ဖြစ်နိုင်ခြေမရှိပေ။

သူတို့၏ ခန့်မှန်းချက်အရ ကလေးမလေးက စူပါစစ်သည်တော်များ မွေးထုတ်ပေးသည့် လျှို့ဝှက် မျိုးဗီဇဓာတ်ခွဲခန်းတစ်ခုမှ ထွက်ပေါ်လာသူဖြစ်ပြီး မိဘမဲ့တစ်ဦးသာ ဖြစ်ရမည်ဟု ထင်မှတ်ထားခဲ့ကြသည်။

အစောပိုင်းက သူမ၏ ဖေဖေကို အာရုံခံမိသည်ဟု ဆိုခြင်းမှာလည်း ကလေးမလေး၏ စိတ်ကူးယဉ်မှုသက်သက်သာ ဖြစ်မည်ဟု တွေးထင်ခဲ့ကြ၏။

သို့သော် မထင်မှတ်ထားစွာပင် သူမ၏ ဖေဖေက တကယ်ရောက်လာပုံရသဖြင့် ယခုတော့ အနည်းငယ် အနေရခက်သွားရပြီဖြစ်သည်။

စက္ကန့်အနည်းငယ်မျှသာ ကြာမြင့်ပြီးနောက် အဝေးမှ လေဆင်နှာမောင်းငယ်များက လေဆင်နှာမောင်းငယ်လေးများအဖြစ် ပြောင်းလဲသွားပြီး လေထုထဲတွင် တိုးညှင်းသော်လည်း လေးနက်ကျယ်လောင်သည့် တဝီဝီမြည်သံတစ်ခု ထွက်ပေါ်လာခဲ့သည်။ ကောင်းကင်ကြီးတစ်ခုလုံးပင် အနည်းငယ် တုန်ခါနေသလို ခံစားရ၏။

ကြောက်မက်ဖွယ်ကောင်းသော ထူးဆန်းသည့် ဖြစ်စဉ်များက မကြာမီ ရောက်ရှိလာတော့မည့် ထိုပုဂ္ဂိုလ်အား နတ်ဘုရားတစ်ပါး ဆင်းသက်လာသကဲ့သို့ ထင်မှတ်ရစေသည်။

လင်းဖေးယန်က ဦးရေပြားများ ထုံကျဉ်လာသည်ဟု ခံစားလိုက်ရပြီး လက်ဖဝါးများမှလည်း ချွေးအေးများ စိမ့်ထွက်လာကာ ခေါင်းထဲတွင်ပင် အနည်းငယ် နောက်ကျိသွားခဲ့သည်။

"မျှော်လင့်ချက်မြို့တော်က ဆင့်ကဲပြောင်းလဲသူများ ဖြစ်မယ်လို့ နင်ထင်လား" ဝူချင်းယုက စိုးရိမ်တကြီး မေးလိုက်သည်။

လင်းဖေးယန်က သူမ ယခင်က တွေ့ဖူး၊ ကြားဖူးခဲ့သော ဆင့်ကဲပြောင်းလဲသူများကို စိတ်ထဲတွင် လျင်မြန်စွာ စစ်ထုတ်ကြည့်လိုက်သော်လည်း လူလုံးမပြရသေးဘဲ ဤမျှလောက် ပြင်းထန်သော အရှိန်အဝါကို ထုတ်လွှတ်နိုင်စွမ်းရှိသူ တစ်ယောက်မှ မရှိခဲ့ပေ။

"မသိဘူးလေ... ငါတို့ မသိသေးတဲ့ စူပါဆင့်ကဲပြောင်းလဲသူတွေ အသက်ရှင်နေသေးတာလည်း ဖြစ်နိုင်တာပဲ" သူမက ခေါင်းယမ်းကာ ပြောလိုက်သည်။

ယခင်က သုတ်သင်ရှင်းလင်းမှုကြီး ပြုလုပ်စဉ်အတွင်း ထွက်ပြေးလွတ်မြောက်သွားသူများ သို့မဟုတ် နှင်ထုတ်ခံရသော ဆင့်ကဲပြောင်းလဲသူ အရေအတွက်မှာ နည်းပါးလှသည်မဟုတ်ပေ။

ထိုသူများထဲမှ အချို့မှာ ယခုတိုင် အသက်ရှင်နေသေးပြီး ကြောက်မက်ဖွယ်ကောင်းသော တည်ရှိမှုများအဖြစ်သို့ ရောက်ရှိနေခြင်းကလည်း လုံးဝမဖြစ်နိုင်သည့် ကိစ္စတော့မဟုတ်ပေ။

"ငါတို့... ခဏလောက် ပုန်းနေရမလား"

ဝူချင်းယု၏ မျက်နှာက ဖြူရော်နေခဲ့သည်။ လာမည့်သူက ရန်သူလား၊ မိတ်ဆွေလား ဆိုသည်ကို မသိရသေးသဖြင့် ဤနေရာတွင် ဆက်နေရန်မှာ အလွန်အန္တရာယ်များလှသည်။

"ထပ်ပြီး... စောင့်ကြည့်ရအောင်" လင်းဖေးယန်က နှုတ်ခမ်းကိုကိုက်ကာ ခေါင်းမာမာဖြင့် ပြောလိုက်သည်။ သူမတို့က မကောင်းမှု တစ်ခုမှ လုပ်ထားခြင်း မရှိပေ။

တကယ်လို့ ရောက်လာသူက အဆင့်(၈) သန္ဓေပြောင်းသားရဲ ဖြစ်နေလျှင်တောင်မှ ၎င်း၏ သမီးကို စောင့်ရှောက်ပေးထားသည့်အတွက် သူတို့ကို ချမ်းသာပေးကောင်း ပေးနိုင်လိမ့်မည် မဟုတ်လား။

ယခု ရောက်လာသူမှာ သဘာဝကျစွာပင် လော်ယွမ် ဖြစ်သည်။ ဤကဲ့သို့သော ထူးဆန်းသည့်ဖြစ်စဉ်များကို လင်းဖေးယန်အနေဖြင့် မည်သို့မျှ ဆက်စပ်တွေးတောနိုင်ခြင်း မရှိသည်မှာလည်း ပုံမှန်သာဖြစ်သည်။

လော်ယွမ်က ဂြိုဟ်သားများကို ထောက်လှမ်းသည့် မစ်ရှင် ပြီးဆုံးကတည်းက မျှော်လင့်ချက်မြို့တော် ဓားတရားအဖွဲ့မှ ထွက်ခွာခဲ့ပြီးဖြစ်သည်။

ပုံမှန်အားဖြင့် ကောင်းကင်တွင် ပျံသန်းသည့်အခါ၌လည်း တောရိုင်းဒေသများသို့သာ သွားရောက်လေ့ရှိသဖြင့် သူ့ကို မြင်တွေ့နိုင်ရန် အလွန်ခဲယဉ်းလှသည်။

ယခင်က ထောက်လှမ်းရေးဌာနတွင် သူ၏ လှုပ်ရှားမှုများကို စောင့်ကြည့်မှတ်တမ်းတင်ထားသော ရုပ်သံများ ရှိသော်လည်း သူမအနေဖြင့် ထိုအရာများကို ကြည့်ရှုခွင့်မရှိပေ။

ထို့ကြောင့် ယနေ့ခေတ် လော်ယွမ်၏ ပျံသန်းမှုကြောင့် ဖြစ်ပေါ်လာသည့် ထူးခြားသောဖြစ်စဉ်များကို သူမ လုံးဝ မသိရှိခဲ့ခြင်းဖြစ်သည်။

လင်းဖေးယန်က ကလေးမလေးကို တစ်ချက်ကြည့်လိုက်ရာ ကလေးမလေးက သူမထက်ပင် ပို၍ စိုးရိမ်တကြီး ဖြစ်နေသည်ကို တွေ့လိုက်ရသည်။

ကလေးမလေးက ကောင်းကင်ကြီးကို စိုက်ကြည့်နေပြီး လက်နှစ်ဖက်ကို အလိုအလျောက် ဆုပ်ထားမိလျက်ရှိသည်။ ကြောက်မက်ဖွယ်ကောင်းသော ခွန်အားကြောင့် သူမ၏ လက်သီးများဆီမှ "ကျွီ... ကျွီ" ဟူသော ပွတ်တိုက်သံများ ထွက်ပေါ်လာပြီး ခန္ဓာကိုယ်တစ်ခုလုံးမှလည်း ပူလောင်သော အငွေ့အသက်များ ထွက်ပေါ်နေခဲ့သည်။

"သမီးက... သမီးဖေဖေကို မြင်ဖူးလို့လား"

ကလေးမလေးက သူမကို တစ်ချက်ကြည့်လိုက်ပြီးနောက် ကောင်းကင်သို့ ပြန်ကြည့်ကာ ပြောလိုက်သည်။ "သမီး မွေးခါစတုန်းက မြင်ဖူးတယ်"

ဟုတ်ပေသည်။ ထိုကလေးမလေးမှာ လော်ယွမ်၏ ကိုယ်ပွားတပ်သားများထဲမှ တစ်ဦးပင်ဖြစ်သည်။ သို့သော် အစပိုင်းတွင် ဤကိုယ်ပွားများ ကြီးပြင်းလာသောအခါ သူ၏ ရုပ်ရည်၊ အရပ်အမောင်းများနှင့် တူညီနေမည်ကို ရှောင်ရှားနိုင်ရန်အတွက် လော်ယွမ်က ထိုကိုယ်ပွားများ၏ မျိုးဗီဇများကို အထူးပြုပြင်ပြောင်းလဲမှုများ ပြုလုပ်ခဲ့သည်။

၎င်းတို့ထဲမှ အချို့ဆိုလျှင် ဝိုင် ခရိုမိုဇုန်းကိုပင် ဖြိုခွဲကာ အိတ်စ် ခရိုမိုဇုန်းအဖြစ် ပြန်လည်ပေါင်းစပ်ထားသဖြင့် လိင်အမျိုးအစားပင် ပြောင်းလဲသွားခဲ့သည်။

သူမ၏ အရည်အသွေးများက အခြေခံအားဖြင့် ထိုအချိန်က လော်ယွမ်၏ အရည်အသွေးများကို ပုံစံယူထားခြင်းဖြစ်သည်။

မွေးရာပါ ဉာဏ်ရည်မှာ (၁၆) မှတ်အထိ မြင့်မားနေသဖြင့် ဖန်ပြွန်ထဲတွင် ရှိနေစဉ်ကတည်းကပင် သူမ၌ ရှင်းလင်းပြတ်သားသော မှတ်ဉာဏ်များ ရှိနေခဲ့ပြီဖြစ်သည်။

ကလေးမလေး၏ စကားကို ကြားသောအခါ သူတို့နှစ်ဦးစလုံး အံ့သြမှင်တက်သွားကြသည်။

"ဒါဆို သမီးထင်တာ... သမီးဖေဖေရဲ့ စိတ်သဘောထားက ကောင်းရဲ့လား" လင်းဖေးယန်က သတိထားကာ ထပ်မေးလိုက်သည်။

"သမီးလည်း မသိဘူး... ဒါပေမဲ့ သူက အရမ်းတည်ကြည်ခန့်ညားပြီး အရမ်းကို အစွမ်းထက်တယ်" ကလေးမလေးက ခဏမျှ စဉ်းစားပြီးနောက် ပြောလိုက်သည်။

သူတို့နှစ်ဦးက ထိုစကားကို ကြားသောအခါ ရင်ထဲတွင် ထပ်မံ၍ တင်းကျပ်သွားပြန်သည်။

စကားအနည်းငယ် ပြောဆိုနေစဉ်အတွင်းမှာပင် ပတ်ဝန်းကျင်ရှိ လေထုရွေ့လျားမှုက ပိုမိုပြင်းထန်လာခဲ့သည်။

လေဆင်နှာမောင်းငယ် အမြောက်အမြားက ဘေးပတ်ဝန်းကျင်တွင် တစ်ခုပြီးတစ်ခု ထွက်ပေါ်လာပြီး မြေပြင်ပေါ်ရှိ နှင်းမှုန်များကို လေထဲသို့ တဖြည်းဖြည်း လွှင့်တင်သွားကာ အချိန်ကြာမြင့်စွာ ပြန်လည်မကျဆင်းလာတော့ပေ။ ကျယ်လောင်သော တဝီဝီမြည်သံကလည်း ပိုမို ရှင်းလင်းလာခဲ့သည်။

နောက်တစ်ခဏတွင် ကောင်းကင်ယံ၌ အစက်အပြောက်ငယ်တစ်ခု ရုတ်တရက် ထွက်ပေါ်လာခဲ့သည်။

ပထမတစ်ချက် ကြည့်လိုက်ချိန်တွင် ထိုအစက်ငယ်မှာ မှုန်ဝါးဝါးဖြစ်နေပြီး သေချာစွာ မြင်နိုင်ရန်ပင် ခက်ခဲလှသည်။

သို့သော် အသက်တစ်ခိုက်ရှူချိန်အတွင်းမှာပင် ထိုအစက်ငယ်က လျင်မြန်စွာ ကြီးမားလာခဲ့သည်။

စက္ကန့်အနည်းငယ်အကြာတွင် လူရိပ်တစ်ခုက လေထဲမှနေ၍ လျင်မြန်စွာ ကျဆင်းလာပြီး မြေပြင်ပေါ်သို့ ဆောင့်အကျတွင် တွင်းတိမ်တိမ်တစ်ခု ဖြစ်ပေါ်သွားစေခဲ့သည်။

ထိုလူရိပ်ကို မြင်လိုက်ရသောအခါ မိန်းကလေးနှစ်ဦးစလုံး အလိုအလျောက် မျက်လုံးပြူးသွားကြပြီး ပါးစပ်များလည်း ဟအာသွားခဲ့သည်။

"ရှင်..." လင်းဖေးယန်က လော်ယွမ်ကို စိုက်ကြည့်နေသော်လည်း ဘာပြောရမှန်း လုံးဝ မသိတော့ပေ။ သူတို့ခမျာ အချိန်အတော်ကြာအောင် ကြောက်လန့်တကြား ဖြစ်နေခဲ့ရသမျှ ယခုရောက်လာသူက ဤလူ ဖြစ်နေလိမ့်မည်ဟု ထင်မှတ်မထားခဲ့မိပေ။

သို့သော် မကြာမီမှာပင် သူမ၏ မျက်လုံးများက တစ်ပတ်လည်သွားပြီး မျက်နှာအမူအရာကလည်း ထူးဆန်းသွားခဲ့သည်။

ဤအမြင်ကပ်စရာကောင်းသော ကောင်မှာ တိတ်တဆိတ်ဖြင့် တရားမဝင် သမီးတစ်ယောက် ရှိနေလိမ့်မည်ဟု မည်သူကမျှ ထင်မှတ်ထားမည် မဟုတ်ပေ။

တကယ်ကို မျှော်လင့်မထားသော ကိစ္စပင်ဖြစ်သည်။

သို့သော် ထူးဆန်းသည်တော့ မဟုတ်ပေ။ သူက မူလကတည်းက ဤမျှလောက် မိန်းမလိုက်စားတတ်သူ မဟုတ်ပါလော။

သူတို့နှစ်ဦး၏ အမူအရာများ အနည်းငယ် ထူးဆန်းနေသည်ကို မြင်သောအခါ လော်ယွမ်မှာ နားမလည်နိုင်အောင် ဖြစ်သွားခဲ့သည်။

သို့သော် သူက ထပ်မတွေးတော့ဘဲ အကြည့်ကို ရုပ်သိမ်းကာ ကလေးမလေးကို ကြည့်လိုက်သည်။ "ဪ... နင်တို့ ရှာတွေ့ခဲ့တာကိုး... သူ့ကို ဘယ်နေရာမှာ တွေ့ခဲ့တာလဲ"

"ဖေဖေ" မိန်းကလေးနှစ်ဦး စကားမပြောရသေးခင်မှာပင် ကလေးမလေးက လော်ယွမ်ကို ကြောက်ရွံ့တုန်လှုပ်စွာဖြင့် ခေါ်လိုက်သည်။

လော်ယွမ်က ထိုစကားကို ကြားသောအခါ မျက်နှာအမူအရာ တောင့်တင်းသွားပြီး သက်ပြင်းချကာ ပြောလိုက်သည်။ "ဦးက သမီးရဲ့ ဖေဖေ မဟုတ်ပါဘူးကွာ"

သူမက သူ၏ ကိုယ်ပွားတစ်ခုသာ ဖြစ်သည်။ တစ်နည်းအားဖြင့် ပြောရလျှင် ကိုယ်ပွားဟု သတ်မှတ်ရန်ပင် ခက်ခဲလှသည်။

၎င်းတို့ နှစ်ဦး၏ မျိုးဗီဇတူညီမှုမှာ ကွာခြားချက် ကြီးမားလှပြီး လိင်အမျိုးအစားပင် မတူညီပေ။

တစ်ခုတည်းသော ဆက်စပ်မှုမှာ သူပေးအပ်ခဲ့သော ကိုယ်ပိုင်ဆဲလ်တစ်ခုသာ ဖြစ်ပြီး သူမက ထိုဆဲလ်မှတစ်ဆင့် ကွဲပွားကြီးထွားလာခဲ့ခြင်း ဖြစ်သည်။

၎င်းကပင် သူတို့နှစ်ဦးကြားတွင် ထူးခြားသော စိတ်ပိုင်းဆိုင်ရာ ဆက်သွယ်မှုတစ်ခုကို ဖြစ်ပေါ်စေခဲ့သည်။

"ဒါပေမဲ့ ဦးက သမီးရဲ့ ဖေဖေပဲလေ" ကလေးမလေးက တိုးညှင်းစွာ ပြောလိုက်သည်။ ဖန်ပြွန်ထဲတွင် ရှိနေစဉ်ကတည်းက သူမနှင့် သူမ၏ မောင်နှမများက ဤတည်ကြည်ခန့်ညားပြီး ရင်းနှီးကျွမ်းဝင်သော တည်ရှိမှုကို အာရုံခံမိခဲ့ကြသည်။

မျက်လုံးဖွင့်လိုက်ချိန်တွင်လည်း သူမ ကိုယ်တိုင် မြင်တွေ့ခဲ့ရပြီး တိုတောင်းသော်လည်း ရှင်းလင်းပြတ်သားသော မှတ်ဉာဏ်များ ကျန်ရစ်ခဲ့သည်။

ဤအရာက သူတို့ ကိုယ်ပွားအုပ်စုတစ်ခုလုံး၏ စိတ်ထဲတွင် နက်ရှိုင်းစွာ အမြစ်တွယ်နေသော ဘုံအသိတစ်ခု ဖြစ်လာခဲ့သည်။

လင်းဖေးယန်က လော်ယွမ်ကို ကြည့်သည့် အကြည့်များက ပိုမို၍ ထူးဆန်းလာခဲ့သည်။ သူမသာ လော်ယွမ်၏ အရှိန်အဝါကို မကြောက်ရွံ့ပါက သူ့ကို 'လူယုတ်မာ' ဟု အော်ဆဲပြီးနေလောက်ပြီ ဖြစ်သည်။

"ဒီကိစ္စကို နောက်မှ ဆက်ပြောကြတာပေါ့" လော်ယွမ်က ခေါင်းကိုက်စွာဖြင့် ပြောလိုက်သည်။ ဤရှုပ်ထွေးနေသော ဆက်ဆံရေးကို အချိန်တိုအတွင်း ရှင်းပြနိုင်ရန်မှာ လုံးဝ မဖြစ်နိုင်ပေ။

သူက ကလေးများကို မနှစ်သက်သည်တော့ မဟုတ်ပေ။ အရေးအကြီးဆုံးအချက်မှာ သူက ဘာမှပင် မလုပ်ရသေးဘဲ နေ့လယ်စာတောင် မစားရသေးဘဲ အပြင်ထွက်လာခဲ့ရာမှ ရုတ်တရက် အလကားရသော သမီးတစ်ယောက် ရှိနေကြောင်း သိလိုက်ရသဖြင့် စိတ်ပိုင်းဆိုင်ရာ ကြိုတင်ပြင်ဆင်မှု လုံးဝ မရှိခဲ့ခြင်း ဖြစ်သည်။

ထို့ထက် ပို၍ ဆိုးရွားသည်မှာ သူမ အသက်ရှင်ကျန်ရစ်ခြင်းက တိုက်ဆိုင်မှုတစ်ခု မဟုတ်နိုင်ဘဲ အခြားသော ကိုယ်ပွားများစွာလည်း မည်သည့်နေရာများတွင် အသက်ရှင်နေကြသေးသည်ကို မသိရခြင်းပင် ဖြစ်သည်။

အစပိုင်းက ဤကိုယ်ပွားတပ်ဖွဲ့၏ အရေအတွက်မှာ ၄,၁၀၀ ကျော်အထိ ရှိခဲ့ပြီး ၎င်းတို့အထဲမှ ရှင်သန်နိုင်စွမ်း ပိုမိုမြင့်မားကာ အနုမြူစွမ်းအင်သုံး ခန္ဓာကိုယ် ပိုင်ဆိုင်ထားသည့် ကိုယ်ပွား အရေအတွက်မှာ သုံးရာနီးပါး ရှိသည်။

အကယ်၍ ထိုသူများအားလုံးက သူ့ကို ဖခင်ဟု ခေါ်ကြမည်ဆိုပါက အတော်လေးကို ပွဲစည်သွားတော့မည် ဖြစ်သည်။

သို့သော် မည်မျှပင် ခေါင်းကိုက်စရာ ကောင်းနေပါစေ... အသက်ရှင်နေနိုင်သေးသည့် ဤကိုယ်ပွားများကို မဖြစ်မနေ ကယ်တင်ရမည်ဖြစ်သည်။

ဤသူများက သူ၏ ခွန်အားနှင့် စိတ်ဆန္ဒများ၏ အဆက်အနွယ်များဖြစ်ရုံသာမက အနည်းငယ်မျှ လေ့ကျင့်ပေးလိုက်ရုံဖြင့် ကြောက်မက်ဖွယ်ကောင်းသော စစ်သည်တော်များ ဖြစ်လာနိုင်ကြသည်။

စစ်သည်တော်များ မဖြစ်လာလျှင်တောင်မှ သူတို့၏ မြင့်မားသော ဉာဏ်ရည်များက လူသားယဉ်ကျေးမှု ဖွံ့ဖြိုးတိုးတက်ရေးအတွက် ကြီးမားသော တွန်းအားတစ်ခု ဖြစ်လာနိုင်ပေသည်။

"ဝူချင်းယု... သူ့ကို ဘယ်နေရာမှာ တွေ့ခဲ့တာလဲ" သူက ဝူချင်းယုဘက်သို့ လှည့်ကာ မေးလိုက်သည်။ သူတို့နှစ်ဦးထဲတွင် ဝူချင်းယုက အနည်းငယ် ပို၍ ယုံကြည်စိတ်ချရသူ ဖြစ်သည်။

"ဖန်းကျင့်မြို့မှာပါ... အဲဒီအချိန်တုန်းက သူက ရေခဲပြင်ကြီးထဲမှာ လဲနေပြီး ခန္ဓာကိုယ်တစ်ခုလုံး အေးခဲနေတာ" လော်ယွမ်၏ ကိုယ်ရေးကိုယ်တာဘဝကို မည်မျှပင် အထင်သေးနေပါစေ၊ လော်ယွမ်၏ မေးခွန်းကိုတော့ ဝူချင်းယုက မဖြေဘဲ မနေရဲပေ။

"ဖန်းကျင့်မြို့ဆိုတော့... မြို့သစ်နဲ့ အတော်လေး ဝေးနေပြီပဲ" လော်ယွမ်က သူ့ဘာသာသူ ရေရွတ်လိုက်သည်။

မြို့သစ် တည်ရှိခဲ့သော တွင်းကြီးဆီသို့ သူ မသွားခဲ့ဖူးသည်တော့ မဟုတ်ပေ။ သို့သော် ထိုအချိန်က မည်သည့်အရာကိုမျှ အာရုံမခံမိခဲ့ပေ။

ယခု အခြေအနေကို ကြည့်ရသလောက် ဤကိုယ်ပွားများက အရပ်မျက်နှာ အသီးသီးသို့ ပြန့်ကျဲသွားခဲ့ပြီ ဖြစ်ပုံရသည်။

အဘယ်ကြောင့်ဆိုသော် စိတ်ပိုင်းဆိုင်ရာ အာရုံခံနိုင်စွမ်းက အကွာအဝေး၏ ကန့်သတ်ချက်များ ရှိနေပြီး အလွန်ဝေးကွာသွားပါက ဆက်လက်၍ အာရုံခံနိုင်တော့မည် မဟုတ်သောကြောင့်ဖြစ်သည်။

"ငါ့ကို မြေပုံ တစ်ချက်လောက် ပြပေးလို့ရမလား" လော်ယွမ်က ပြောလိုက်သည်။

လင်းဖေးယန်က မြေပုံကို ထုတ်ပေးလိုက်သောအခါ လော်ယွမ်က လှမ်းယူ၍ တစ်ချက်ကြည့်ပြီးနောက် ပြန်ပေးလိုက်သည်။

"နသ်တို့ မျှော်လင့်ချက်မြို့တော်ကို အရင်ပြန်နှင့်ကြ... ငါ ထပ်ပြီး သွားရှာကြည့်လိုက်ဦးမယ်... နောက်ထပ် နှစ်ယောက်၊ သုံးယောက်လောက် ရှာတွေ့နိုင်သေးတယ်"

ထို့နောက် သူက ကလေးမလေးကို ကြည့်ကာ ဆက်ပြောလိုက်သည်။ "သမီးလည်း သူတို့နဲ့အတူတူ ပြန်လိုက်သွားနော်... ဟိုရောက်ရင် သမီးနေဖို့ နေရာ စီစဉ်ပေးမယ်"

ဤကလေးမလေးကို မည်သည့်နေရာတွင် ထားရမည်ကို သူ အပြီးသတ် မဆုံးဖြတ်ရသေးပေ။ အခြေအနေကို ကြည့်ရဦးမည်ဖြစ်သည်။

အကယ်၍ တစ်ယောက်၊ နှစ်ယောက်လောက်သာ ဆိုလျှင် သူနှင့်အတူတူ နေထိုင်ခိုင်းရန် ပြဿနာမရှိသော်လည်း အရေအတွက်က ဆယ်ဂဏန်း၊ ရာဂဏန်းအထိ ရှိလာမည်ဆိုပါက နေရာအသစ် ပြင်ဆင်ပေးရမည်ဖြစ်သည်။ ထိုသို့မဟုတ်ပါက သူ့အိမ်သည်လည်း မူကြိုကျောင်းကြီး ဖြစ်သွားပေလိမ့်မည်။

"ဟုတ်ကဲ့ပါ ဖေဖေ... သမီးက လိမ္မာပါ့မယ်" ကလေးမလေးက အကင်းပါးစွာဖြင့် ပြောလိုက်သည်။

"မလိုပါဘူး မြို့တော်ဝန်ယွမ်... သူက ကျွန်မတို့နဲ့ပဲ တူတူနေပါလိမ့်မယ်" လင်းဖေးယန်က မျက်နှာထား တင်းမာစွာဖြင့် ပြောလိုက်သည်။

"မေမေ... သမီးက ဖေဖေနဲ့ အတူတူ နေချင်တာကို" ကလေးမလေးက အနည်းငယ် စိုးရိမ်တကြီးဖြင့် ပြောလိုက်သည်။

"မေမေဟုတ်လား" လော်ယွမ်၏ မျက်နှာတွင် နားမလည်နိုင်မှုများ ပြည့်နှက်သွားပြီး သူတို့နှစ်ဦးကို ကြည့်လိုက်သည်။ ဒါက ဘယ်လို အခြေအနေကြီးလဲ။

မိန်းကလေးနှစ်ဦးစလုံး၏ မျက်နှာများ ချက်ချင်း နီရဲသွားကြပြီး လော်ယွမ်၏ အကြည့်ကို ကမန်းကတန်း ရှောင်လွှဲလိုက်ကြကာ မလုံမလဲ အမူအရာဖြင့် ပြောလိုက်သည်။

"ကျွန်မတို့က သူ့ကို မွေးစားသမီးအဖြစ် အသိအမှတ်ပြုလိုက်ပြီလေ"

လော်ယွမ်က ခေါင်းညိတ်လိုက်ပြီး မည်သို့မျှ ကန့်ကွက်ခြင်း မရှိပေ။

"နင်တို့ သူ့ကို သေချာ ဂရုစိုက်ပေးထားလိုက်ပါ... ငါ အရင်သွားနှင့်မယ်... ဘယ်မှာနေရမယ် ဆိုတာကိုတော့ ငါပြန်လာမှ ဆက်ပြောကြတာပေါ့"

ထိုသို့ပြောပြီးနောက် လော်ယွမ်၏ ဒူးများက အနည်းငယ် ကွေးညွတ်သွားပြီး မြေပြင်ကို အားကုန်စောင့်ကန်လိုက်သည်။

နောက်တစ်ခဏတွင် သူက လေးကြိုးမှ လွတ်ထွက်သွားသော မြားတစ်စင်းအလား လေထဲသို့ တဟုန်ထိုး ပျံတက်သွားပြီး မကြာမီမှာပင် အစက်အပြောက်ငယ်လေးအဖြစ် ပြောင်းလဲကာ အဝေးသို့ ပျောက်ကွယ်သွားခဲ့သည်။

လင်းဖေးယန်က လေပြင်းကြောင့် ရှုပ်ပွသွားသော ဆံပင်များကို သပ်တင်လိုက်ပြီးနောက် ပါးစပ်မှ စကားနှစ်ခွန်းကို ဖွဖွလေး ရေရွတ်လိုက်သည်။

"လူယုတ်မာ"

"ဒါက နားလည်မှုလွဲတာလည်း ဖြစ်နိုင်ပါတယ်" ဝူချင်းယုက လော်ယွမ်ဘက်မှ ဝင်ပြောပေးလိုက်သည်။

သူမက လော်ယွမ်အပေါ်တွင် သဘောကျစိတ် ရှိနေသေးသဖြင့် ဤကိစ္စ၏ နောက်ကွယ်တွင် တစ်စုံတစ်ရာ အကြောင်းပြချက် ရှိရမည်ဟု ယုံကြည်နေသည်။

"နင်က သူ့ဘက်ကနေ ဝင်ပြောပေးနေတုန်းလား" လင်းဖေးယန်က ဝူချင်းယုကို ဒေါသတကြီးဖြင့် ကြည့်ကာ ပြောလိုက်သည်။

"သူ့ရဲ့ မျက်ခုံးထူထူ မျက်လုံးပြူးပြူးနဲ့ တည်ကြည်ရိုးသားမယ့်ပုံစံကို သွားမယုံနဲ့... သူ့မှာ မိန်းမ ဘယ်နှစ်ယောက်ရှိလဲ နင်သိလား... ပြောပြလိုက်ရင် နင် လန့်သွားမယ်... အနည်းဆုံး ခြောက်ယောက်လောက် ရှိတယ်... ဒါတောင် ငါသိထားတာနော်... သူ့အိမ်မှာ အသက်မပြည့်သေးတဲ့ ကလေးမလေး နှစ်ယောက်တောင် ရှိသေးတယ်"

"ချန်ရှင်းကျယ်ကို နင်သိတယ်မလား... အရင်တုန်းက ဓားတရားအဖွဲ့ရဲ့ ရုံးအုပ်လေ... သူက အဲဒီမိန်းကလေးကိုတောင် မလွတ်တမ်း ကြံစည်ထားသေးတာ... သူက ဌာနချုပ်မှာ ဒုတိယဝန်ကြီး ဖြစ်လာတာနဲ့ အဲဒီမိန်းကလေးကို သူ့ရဲ့ အတွင်းရေးမှူးအဖြစ် ချက်ချင်း ပြောင်းခေါ်သွားတယ်... သူက တကယ့်ကို နှာဘူးကောင်ပဲ... နောက်ကွယ်မှာ တရားမဝင် သားသမီးတွေ ဘယ်နှစ်ယောက်တောင် ရှိသေးလဲဆိုတာ ဘယ်သူက သိမှာလဲ"

"ဒီလိုကိစ္စမျိုး တကယ် ရှိတာလား" ဝူချင်းယုက မျက်လုံးပြူးသွားပြီး လုံးဝ မယုံကြည်နိုင်သည့် အမူအရာ ဖြစ်သွားခဲ့သည်။

မြို့တော်ဝန်လော်က ဤကဲ့သို့သော ကိစ္စမျိုးကို လုပ်ခဲ့လိမ့်မည်ဟု ယုံကြည်ရန် အလွန်ခက်ခဲလှသည်။ သူမ၏ စိတ်ကူးယဉ် အိပ်မက်များအားလုံး ပျက်စီးသွားသလိုပင် ခံစားလိုက်ရသည်။

"ဒါတင် မကသေးဘူးနော်... သူက ငါ့ကို ကြည့်ရင်လည်း မျက်လုံးတွေက ရမ္မက်တွေနဲ... အမြဲတမ်း ငါ့ကို လာလာပြီး ပရောပရည် လုပ်သေးတာ... ငါသာ သူ့ကို ပြတ်ပြတ်သားသား မငြင်းခဲ့ဘူးဆိုရင် ငါလည်း သူ့လက်ထဲ ပါသွားလောက်ပြီ" လင်းဖေးယန်က သူမ၏ စကားများကို ပိုမိုယုံကြည်လာစေရန်အတွက် သူမကိုယ်သူမ အသရေဖျက်ရန်ပင် ဝန်မလေးတော့ဘဲ တိုးတိုးလေး ထပ်ပြောလိုက်သည်။

ဝူချင်းယုက မူလတန်းကျောင်းသူလေးတစ်ဦးကဲ့သို့ သေးသွယ်သော သူမ၏ ခန္ဓာကိုယ်ကို သံသယဝင်စွာဖြင့် တစ်ချက်ကြည့်လိုက်သည်။

ပါးစပ်က တစ်စုံတစ်ရာ ပြောရန် ဟန်ပြင်လိုက်သော်လည်း နောက်ဆုံးတွင် ဘာမှမပြောဖြစ်တော့ပေ။

စကားပုံတစ်ခုရှိသည် မဟုတ်ပါလော... "အလွန်အကျွံ ဖြစ်လွန်းပါက အကျိုးယုတ်တတ်သည်" တဲ့။ အစပိုင်းက သူမသည် လင်းဖေးယန်၏ စကားများကို အနည်းငယ် ယုံကြည်ခဲ့မိသေးသည်။

သို့သော် နောက်ဆုံး ပြောလိုက်သော စကားကတော့ ယုံကြည်နိုင်စရာ အကြောင်း လုံးဝမရှိတော့ပေ။ မြို့တော်ဝန်လော်က မည်မျှပင် ဆာလောင်မွတ်သိပ်နေပါစေ... လင်းဖေးယန်ကိုတော့ ရွေးချယ်လိမ့်မည် မဟုတ်ဟု သူမ စိတ်ထဲမှ တိတ်တဆိတ် တွေးလိုက်မိသည်။

ဆက်ရန်...

အပိုင်း(၄၇၈) သားသမီးများ

အချိန်ကား မွန်းတည့်ချိန် ဖြစ်သော်လည်း ကောင်းကင်ယံတစ်ခုလုံးမှာ မှောင်မိုက်နေပြီး မိုးချုပ်ခါနီး ဆည်းဆာအချိန်ကဲ့သို့ ဖြစ်နေလေသည်။

ကပ်ဘေးဆိုးကြီး စတင်ဖြစ်ပွားချိန်နှင့် နှိုင်းယှဉ်လျှင် ယခုအခါ နေ့ဘက်အလင်းရောင် ရရှိမှုမှာ အနည်းငယ် ပြန်လည်ကောင်းမွန်လာပြီ ဖြစ်သဖြင့် ယခင်ကကဲ့သို့ ညဉ့်နက်သဖွယ် မည်းမှောင်မနေတော့ချေ။

နေ့နှင့်ည အပိုင်းအခြားမှာ သိသာထင်ရှားလာပြီ ဖြစ်သော်လည်း ဤမျှသော နေရောင်ခြည်စွမ်းအင်ဖြင့် ကမ္ဘာ့ရာသီဥတုကို ပြန်လည်ပူနွေးလာစေရန်မှာမူ ဝေးကွာလွန်းနေဆဲ ဖြစ်သည်။

နေ့ဘက်အချိန်၌ပင် လေထုအပူချိန်သည် သုညအောက် ၂၅ ဒီဂရီမှ ၃၅ ဒီဂရီ ဝန်းကျင်တွင် ရှိနေတတ်ပြီး ညဘက်ရောက်လျှင် အပူချိန်မှာ နောက်ထပ် အနုတ် ၆ ဒီဂရီခန့် ထပ်မံ ကျဆင်းသွားလေ့ရှိသည်။

လေပေါ်တွင် ပျံသန်းနေသော လော်ယွမ်က ရုတ်တရက် ရပ်တန့်လိုက်သည်။ သူသွားလိုသော ခရီးပန်းတိုင်သို့ ရောက်ရှိလာပြီ ဖြစ်သောကြောင့်ပင်။

လော်ယွမ်က အောက်ဘက်သို့ မျက်နှာထားတင်းတင်းဖြင့် ငုံ့ကြည့်လိုက်သည်။ ခြေအောက်တွင် တွေ့မြင်နေရသည်မှာ စတုရန်းမိုင် လေးထောင်ခန့် ကျယ်ဝန်းပြီး အဆုံးအစမမြင်နိုင်အောင် ကြီးမားလှသော ဧရာမ ချိုင့်ဝှမ်းကြီးတစ်ခု ဖြစ်လေသည်။

ဤသည်မှာ မြို့သစ်မြို့တော်ကို ကျရောက်ပေါက်ကွဲခဲ့သော "ဆန့်ကျင်ဘက်ဒြပ်သား" ၏ လက်ရာပင်ဖြစ်သည်။

ထိုဗုံး၏ အဖျက်စွမ်းအားသည် မြို့သစ်မြို့တော်တစ်ခုလုံးကို ပြာကျစေခဲ့ရုံသာမက ကြောက်မက်ဖွယ်ကောင်းသော စွမ်းအင်လှိုင်းများကြောင့် ပတ်ဝန်းကျင်ရှိ ဂြိုဟ်တုမြို့တော် အများအပြားကိုပါ ပျက်စီးစေခဲ့သည်။

အနီးအနားရှိ တောင်တန်းကြီးများ ဆိုလျှင်လည်း ဤကဲ့သို့သော ကမ္ဘာပျက်မတတ် တိုက်ခိုက်မှုအောက်တွင် ပြာမှုန့်ဘဝ ရောက်သွားခြင်း သို့မဟုတ် မြေပြင်ညီတညာတည်း ဖြစ်သွားခြင်းတို့ဖြင့် ကြုံတွေ့ခဲ့ရလေသည်။

လော်ယွမ် ဤနေရာသို့ ယခင်က ရောက်ဖူးသည်။ ပေါက်ကွဲမှုကြောင့် မြေသားများ ပွရောင်းသွားပြီး မြေအောက်အပူရှိန်များ စိမ့်ထွက်နေခဲ့သော မြေလွှာကို သူ၏ရေခဲစွမ်းအားသုံးကာ ပြန်လည်ဖာထေး ပိတ်ဆို့ထားခဲ့ခြင်း ဖြစ်သည်။

ယခုပြန်ကြည့်ရသည်မှာ အခြေအနေအားလုံး ပုံမှန်ရှိနေပြီး မြေအောက် မီးတောင်ရှင်များ ပေါက်ကွဲမည့် အရိပ်အယောင်မရှိသဖြင့် စိတ်ချရသည့် အနေအထားတွင် ရှိနေသည်။

သို့သော် ယခုတစ်ခေါက် သူလာရခြင်းမှာ မီးတောင်ကိစ္စအတွက် မဟုတ်ချေ။

သူက မြေပြင်ပေါ်သို့ ဆင်းသက်လိုက်ပြီး မျက်လုံးများကို မှိတ်ကာ သူ၏အာရုံခံနိုင်စွမ်းကို အစွမ်းကုန် ဖြန့်ကျက်လိုက်သည်။

ဖြစ်နိုင်ချေရှိသော စိတ်စွမ်းအင် အာရုံခံစားမှု တစ်စုံတစ်ရာကို ဖမ်းယူနိုင်ရန် ကြိုးစားလိုက်ခြင်း ဖြစ်သည်။

သို့သော် ထင်မှတ်ထားသည့်အတိုင်းပင် မည်သည့်အရာကိုမျှ အာရုံမခံမိပေ။ အကယ်၍ အာရုံခံမိစရာ ရှိခဲ့လျှင်လည်း ပြီးခဲ့သည့်တစ်ခေါက်ကတည်းက သူ သတိထားမိခဲ့လိမ့်မည် ဖြစ်သည်။

အမှန်အတိုင်းဆိုရလျှင် ပြီးခဲ့သည့်ရက်ပိုင်းက သူ၏ ပုံတူပွားလူသား တစ်ယောက်ကိုသာ မမျှော်လင့်ဘဲ မတွေ့ရှိခဲ့ပါက ဤမျှပြင်းထန်သော အဖျက်စွမ်းအားအောက်တွင် အသက်ရှင် ကျန်ရစ်သူရှိလိမ့်မည်ဟု လော်ယွမ် ယုံကြည်မိမည် မဟုတ်ပေ။

သို့သော် ယခုအချိန်တွင်မူ သေချာစဉ်းစားကြည့်လိုက်သောအခါ မဖြစ်နိုင်ဘူးဟု တစ်ထစ်ချ ငြင်းဆို၍ မရနိုင်ကြောင်း လော်ယွမ် တွေးမိလိုက်သည်။

ဆန့်ကျင်ဘက်ဒြပ်သား၏ အစွမ်းမှာ အလွန်အမင်း အားကောင်းပြီး ကြောက်မက်ဖွယ်ကောင်းသည်မှာ မှန်သည်။ သာမန်ဒြပ်စင်တစ်ခုနှင့် ထိတွေ့လိုက်သည်နှင့်တပြိုင်နက် "ဆန့်ကျင်ဘက်ဒြပ်စင် ချေမှုန်းခြင်း" ဖြစ်ပေါ်ပြီး ဒြပ်ထုအားလုံး စွမ်းအင်အဖြစ်သို့ ပြောင်းလဲသွားလေ့ရှိသည်။

ထိုဖြစ်စဉ်မှ ထွက်ပေါ်လာသော စွမ်းအင်မြင့် အမှုန်စီးကြောင်းများနှင့် ရောင်ခြည်ဖြာထွက်မှု ပမာဏမှာ ဟိုက်ဒရိုဂျင်ဗုံး အလုံးတစ်ထောင်ကို တပြိုင်နက် ဖောက်ခွဲလိုက်သည်ထက်ပင် ပြင်းထန်ပါသေးသည်။

ထိုကဲ့သို့သော တိုက်ခိုက်မှုမျိုးနှင့် တိုက်ရိုက်ထိတွေ့မိပါက သူကဲ့သို့သော အစွမ်းပိုင်ရှင်မျိုး အယောက်တစ်ရာ ရှိနေပါစေ၊ လုံးဝဥဿုံ ပျက်စီးသွားပေလိမ့်မည်။

သို့သော် ဤမျှကြီးမားကျယ်ပြန့်သော ချိုင့်ဝှမ်းကြီးတစ်ခုလုံးသည် ဆန့်ကျင်ဘက်ဒြပ်စင် ပေါက်ကွဲမှု၏ ဗဟိုချက်ဖြစ်သည်ဟု ယူဆလျှင်မူ အလွန်ချဲ့ကားရာ ရောက်ပေလိမ့်မည်။

အမှန်စင်စစ်တွင်မူ ဗုံး၏ ဗဟိုချက် ပေါက်ကွဲမှုဧရိယာမှာ ထင်ထားသည်ထက် များစွာသေးငယ်ပြီး ဤချိုင့်ဝှမ်းကြီး၏ ငါးပုံတစ်ပုံခန့်ပင် ရှိမည်မဟုတ်ပေ။

ချိုင့်ဝှမ်းကြီး ဤမျှ ကြီးမားကျယ်ပြန့်သွားရခြင်းမှာ ပေါက်ကွဲမှုနှင့် တိုက်ရိုက်ထိတွေ့ပြီး အငွေ့ပျံသွားသော အစိတ်အပိုင်းများအပြင် ပေါက်ကွဲမှုကြောင့် ဖြစ်ပေါ်လာသော တုန်ခါမှုလှိုင်းများနှင့် စွမ်းအင်မြင့် အမှုန်စီးကြောင်းများ၏ ရိုက်ခတ်မှုကြောင့် ပတ်ဝန်းကျင်ရှိ အရာဝတ္ထုများ အရည်ပျော်ကျသွားခြင်းကြောင့် အဓိက ဖြစ်ပွားရခြင်း ဖြစ်သည်။

သို့တိုင်အောင် ထိုပေါက်ကွဲမှုမှ ဂယက်ရိုက်ခတ်မှုသည်ပင်လျှင် အလွန်ကြောက်မက်ဖွယ် ကောင်းနေဆဲ ဖြစ်သည်။

သို့သော် ထိုဂယက်ရိုက်ခတ်မှုလောက်ကမူ "အနုမြူ ပေါင်းစပ်ခန္ဓာကိုယ်" ပိုင်ရှင်များအတွက် သေစေနိုင်လောက်သည့် အရာမဟုတ်တော့ပေ။

လော်ယွမ်က သူ့ကိုယ်သူ နမူနာထားပြီး တွက်ချက်ကြည့်လိုက်သည်။ သေချာတိုင်းတာခဲ့ဖူးခြင်း မရှိသော်လည်း အပူရှိန်အပေါ် သူ၏ ခံနိုင်ရည်ရှိမှုကို မူတည်၍ တွက်ချက်ကြည့်ပါက သူ၏ လက်ရှိခန္ဓာကိုယ်သည် အပူချိန် ၃၀၀၀ ဒီဂရီ ဝန်းကျင်အထိ ခံနိုင်ရည်ရှိသည်။

ဤမျှသော ခံနိုင်ရည်စွမ်းအားမျိုးဖြင့် သူသည် ချော်ရည်ပူများ၊ ဆူပွက်နေသော သံရည်ပူများ ထဲတွင်ပင် အေးဆေးစွာ ရေချိုးနိုင်လေသည်။

သူ၏ ကာကွယ်နိုင်စွမ်းမှာလည်း အံ့မခန်းပင် ဖြစ်သည်။ သာမန် ဒုံးကျည်များဖြင့် အနီးကပ် ပစ်ခတ်မှုကို ခံနိုင်ရည်ရှိရုံမျှမက အသံထက် အဆ ၃၀ နှေးသော လျှပ်စစ်သံလိုက် စွမ်းအင်သုံး ကျည်ဆန်များဖြင့် တည့်တည့်ပစ်ခတ်မှုကိုပင် ကြံ့ကြံ့ခံနိုင်လေသည်။

သာမန် တိုက်ခိုက်မှုမျိုးက လော်ယွမ်အပေါ် သက်ရောက်မှု မရှိသလောက်ပင် ဖြစ်သည်ဟု ဆိုနိုင်သည်။

အနုမြူ ပေါင်းစပ်ခန္ဓာ ပိုင်ဆိုင်ထားကြသော သူ၏ ပုံတူပွားလူသား အချို့သည် လော်ယွမ်လောက် စွမ်းအားမကြီးမားနိုင်သော်လည်း တူညီသော မျိုးဗီဇပိုင်ရှင် သက်ရှိထူးများ ဖြစ်ကြသည့်အတွက် အလွန်အမင်း အားနည်းနေလိမ့်မည် မဟုတ်ပေ။

ထို့အပြင် အနုမြူ ပေါင်းစပ်ခန္ဓာ ပိုင်ဆိုင်ထားသော ပုံတူပွားလူသား ၃၀၀ ခန့်ကို အုပ်စု ၂၈ စု ခွဲထားရာ အများစုမှာ စွမ်းရည် နှစ်မျိုးစီ ပိုင်ဆိုင်ထားကြပြီး အုပ်စုနှစ်စုမှာမူ ရှားပါးသော စွမ်းရည် သုံးမျိုးအထိပင် ပိုင်ဆိုင်ထားကြသည်။ ၎င်းတို့၏ ဖွံ့ဖြိုးတိုးတက်နိုင်စွမ်းမှာ အလွန် ကြောက်ခမန်းလိလိ ဖြစ်သည်။

ထိုပုံတူပွားများ၏ ဒုတိယနှင့် တတိယစွမ်းရည်များမှာ ဆန်းကြယ်ပြီး အမျိုးမျိုး ကွဲပြားကြသည်။ ထိုစွမ်းရည်များကို အကန့်အသတ်မဲ့ စွမ်းအင်ရရှိစေသော "ပေါင်းစပ်ခန္ဓာ" နှင့် တွဲဖက်လိုက်သောအခါ မည်သို့သော ဓာတ်ပြုပြောင်းလဲမှုမျိုး ဖြစ်ပေါ်လာမည်ကို လော်ယွမ် ကိုယ်တိုင်ပင် ကြိုတင်မခန့်မှန်းနိုင်ပေ။

ထို့ကြောင့် ဤကဲ့သို့သော တိုက်ခိုက်မှုအောက်တွင် အသက်ရှင်ကျန်ရစ်ခဲ့ခြင်းမှာ တိုက်ဆိုင်မှု သက်သက် မဟုတ်တန်ရာ။

လော်ယွမ်သည် ချိုင့်ဝှမ်းကြီးကို ဗဟိုပြု၍ အဝိုင်းပတ်ပုံစံဖြင့် ပြင်ပသို့ တဖြည်းဖြည်းချင်း တိုးချဲ့ကာ စတင် ရှာဖွေလိုက်လေသည်။

......

ကပ်ဘေးသင့်ပြီးနောက်ပိုင်း ရာသီဥတုမှာ အလွန်ဖောက်ပြန်နေတတ်သည်။ ကောင်းကင်ယံတွင် ဖုန်မှုန့်များနှင့် တိမ်တိုက်များ အလွန်အမင်း စုဝေးနေခြင်းကြောင့် ကမ္ဘာမြေပေါ်တွင် မိုးရွာသွန်းမှုမှာ အလွန်စိတ်ပျက်ဖွယ် ကောင်းလောက်အောင် နှောင့်ယှက်နေတတ်သည်။

ရှာဖွေမှု စတင်ပြီး မိနစ်ပိုင်းမျှ အကြာတွင်ပင် ကောင်းကင်ယံ၏ မြင်ကွင်းမှာ လျင်မြန်စွာ ကျဆင်းလာပြီး မကြာမီအချိန်အတွင်း မင်ရည်လောင်းချလိုက်သကဲ့သို့ မည်းမှောင်သွားလေသည်။

ပတ်ဝန်းကျင်တွင် လေစတင် တိုက်ခတ်လာသည်။ ဦးစွာ လေပြေအဖြစ် တိုက်ခတ်ရာမှ တဖြည်းဖြည်း လေပြင်းမုန်တိုင်း အသွင်သို့ ပြောင်းလဲသွားသည်။

မကြာမီ ကြောက်မက်ဖွယ်ကောင်းသော ရေခဲမုန်တိုင်းကြီး ကျရောက်လာတော့သည်။

လေပြင်းမုန်တိုင်းထဲတွင် ညစ်ပေနေသော ရေခဲတုံးအမြောက်အမြား ပါဝင်နေပြီး ကောင်းကင်ယံမှ ဥက္ကာခဲများ ကြွေကျလာသကဲ့သို့ ပြင်းထန်စွာ ရိုက်ခတ်လျက် ရှိသည်။

ထိုရေခဲတုံးများမှာ အသေးဆုံး ဘောလုံးအရွယ်အစားခန့် ရှိပြီး အကြီးဆုံးမှာမူ တစ်ပေခွဲ၊ နှစ်ပေနီးပါးခန့်ပင် ရှိလေသည်။

သာမန်လူတစ်ယောက်သာ ထိုရေခဲတုံး ထိမှန်ခံရပါက ဒဏ်ရာအပြင်းအထန် ရရှိရုံသာမက သေဆုံးသည်အထိပင် ဖြစ်သွားနိုင်သည်။

ပျံသန်းနေစဉ် လော်ယွမ်အနေဖြင့် သူ၏ ကြိုတင်သိမြင်နိုင်စွမ်းကို အသုံးပြုကာ အရွယ်အစားကြီးမားသော ရေခဲတုံးကြီးများကို မနားတမ်း ရှောင်တိမ်းနေရသည်။

သူ၏ ခံနိုင်ရည်စွမ်းအားအရ တူညီသော အရွယ်အစားရှိသည့် သံတုံးများနှင့် ထိမှန်လျှင်ပင် ဘာမျှမဖြစ်သော်လည်း သူ၏ စိတ်စွမ်းအားဖြင့် ပျံသန်းခြင်းမှာ တွန်းကန်အား နည်းပါးလှသဖြင့် ရေခဲတုံးကြီးများနှင့် ရိုက်မိပါက ဟန်ချက်ပျက်ကာ ပုံပျက်ပန်းပျက် ဖြစ်သွားနိုင်သည်။

သို့သော် ထိုသို့ ရှောင်တိမ်းနေသော်လည်း ပျံသန်းနေစဉ် လှုပ်ရှားရခက်ခဲမှုနှင့် ရေခဲမုန်တိုင်း၏ သိပ်သည်းမှုတို့ကြောင့် ရေခဲတုံးကြီး အားလုံးကို ရှောင်တိမ်းနိုင်ရန်မှာ မဖြစ်နိုင်ပေ။ ဆယ်မိနစ်ကျော် အတွင်းမှာပင် သူသည် သုံးကြိမ်တိုင်တိုင် ဆက်တိုက် ရိုက်ချခံလိုက်ရသည်။

အနုမြူ ပေါင်းစပ်ခန္ဓာ၏ ဘေးထွက်ဆိုးကျိုးကြောင့် သူ၏ စိတ်ခံစားချက်မှာ ဒေါသထွက်လွယ်ပြီး စိတ်ဆတ်နေတတ်သည်။

နောက်ဆုံးတစ်ကြိမ် မြေကြီးပေါ်သို့ ရိုက်ချခံလိုက်ရသောအခါ သူ၏ ရင်ထဲ၌ ဒေါသ မီးတောက်တစ်ခု ဟုန်းခနဲ ထတောက်လာပြီး ဦးခေါင်းငယ်ထိပ်ထိ တက်ဆောင့်လေတော့သည်။

သူက ခေါင်းမော့ကာ ကောင်းကင်ကို ကြည့်လိုက်သည်။ ရေခဲတုံးများ၏ "နှောင့်ယှက်" တိုက်ခိုက်မှုကို မတတ်သာဘဲ ကြိတ်မှိတ် သည်းခံနေရသည်။

ရေခဲမိုးမှာ တော်တော်နှင့် စဲမည့်ပုံ မပေါ်ချေ။ လော်ယွမ်၏ မျက်နှာထားမှာ တင်းမာခက်ထန်လာပြီး ရှာဖွေမှု မဆက်လုပ်မီ တိမ်တိုက်များကြားသို့ တိုးဝင်ကာ ပတ်ဝန်းကျင်ရှိ မိုးတိမ်တိုက်များကို အရင်ဆုံး ဖြိုခွင်းပစ်ရန် ဆုံးဖြတ်လိုက်သည်။

သို့သော် သူ ကောင်းကင်သို့ မပျံတက်မီမှာပင် အလွန်တရာ အားနည်းသော စိတ်အာရုံ ခံစားမှုတစ်ခုကို ရုတ်တရက် ဖမ်းယူရရှိလိုက်သည်။

ထိုတွေ့ရှိမှုကြောင့် သူ၏ ရင်ထဲမှ ဒေါသမီးများမှာ နေပူရှိန်အောက်မှ နှင်းပွင့်များသဖွယ် ချက်ချင်း အရည်ပျော်ကျသွားလေသည်။

သူက မျက်လုံးများကို အလျင်အမြန် မှိတ်ကာ သေချာစွာ အာရုံခံကြည့်လိုက်ရာ အထင်မှားခြင်း မဟုတ်ကြောင်း သိလိုက်ရသည်။

ထိုစိတ်စွမ်းအင် အာရုံခံစားမှုလေးမှာ သနားစဖွယ် ကောင်းလောက်အောင် အားနည်းလွန်းလှသည်။ သူသာ မြေကြီးပေါ်သို့ ပြုတ်ကျမလာခဲ့လျှင် ထိုအာရုံကို သတိထားမိလိုက်မည် မဟုတ်ပေ။

တည်နေရာအရ ထိုအာရုံသည် မြေအောက်နက်ရှိုင်းသော နေရာမှ လာခြင်းဖြစ်ပြီး ရွေ့လျားနေသည့် လက္ခဏာ လုံးဝမတွေ့ရပေ။

သူ၏ စိတ်ထဲတွင် ဝမ်းသာသွားပြီး တုံ့ဆိုင်းမနေတော့ဘဲ စိတ်ကိုစုစည်းကာ "ဟင်းလင်းပြင်ကွေးညွတ်ပျံသန်းခြင်း" ကို ချက်ချင်း အသုံးပြုလိုက်သည်။

ပတ်ဝန်းကျင်ရှိ ဟင်းလင်းပြင်မှာ ကွေးညွတ်သွားပြီး ဟင်းလင်းပြင်ပူဖောင်းသဏ္ဌာန် ဖြစ်ပေါ်လာကာ သူ၏ ခန္ဓာကိုယ်သည် မြေကြီးထဲသို့ စတင် နစ်ဝင်သွားလေတော့သည်။

ရေခဲလွှာများကို ဖြတ်ကျော်ပြီးနောက် မြေအောက်ကမ္ဘာသို့ သူရောက်ရှိသွားသည်။ ပတ်ဝန်းကျင် တစ်ခုလုံးမှာ အမှောင်အတိ ကျသွားလေပြီ။

ဤအမှောင်ထုမှာ အလင်းရောင် တစ်စက်မျှ မဝင်ရောက်နိုင်သော စစ်မှန်သည့် အမှောင်ကမ္ဘာ ဖြစ်သည်။ တွင်းနက် မှလွဲ၍ ဤနေရာထက် ပိုမိုမှောင်မိုက်သော နေရာကို ရှာတွေ့နိုင်မည် မဟုတ်ပေ။

ကံကောင်းသည်မှာ လေးဘက်မြင် အမြင်အာရုံသည် အလင်းရောင်အပေါ် မှီခိုခြင်းမရှိသည့်အတွက် ဤကဲ့သို့သော အခြေအနေမျိုးတွင် လော်ယွမ်၏ မြင်ကွင်းမှာ ထိခိုက်မှု တစ်စုံတစ်ရာ မရှိပေ။

ဤနေရာသည် မြို့သစ်ချိုင့်ဝှမ်းကြီး၏ နှုတ်ခမ်းဝနှင့် မိုင် ၂၀ ခန့်သာ ကွာဝေးသည်။ မြေအောက် ပေထောင်ချီ အနက်အထိ ချော်ရည်များ အေးခဲသွားပြီးနောက် ဖြစ်ပေါ်လာသော ဖန်သားပြင်ကဲ့သို့ ကျောက်သားများဖြင့် ပြည့်နှက်နေသည်။

ပေထောင်ချီ နက်အောင် ဆင်းပြီးမှသာ ပုံမှန် ကျောက်သားများကို တဖြည်းဖြည်း ပြန်လည် တွေ့ရှိရသည်။

လေဟာနယ် ခေါက်ချိုးပျံသန်းမှု နှုန်းမှာ တဖြည်းဖြည်း မြန်ဆန်လာပြီး မကြာမီမှာပင် သူသည် မြေအောက် အနက်ပေ ၃၃၀၀ ကျော်သို့ ရောက်ရှိလာသည်။

အာရုံခံစားမှုမှာ ပိုမိုားကောင်းလာသော်လည်း ထိုပုံတူပွားလူသားမှာ ပိုမိုနက်ရှိုင်းသော မြေအောက်တွင် ရှိနေသေးကြောင်း သိသာနေသည်။

လော်ယွမ်အနေဖြင့် ထိုပုံတူပွားလူသားက မည်သည့်အတွက်ကြောင့် ဤမျှနက်ရှိုင်းသော မြေအောက်ထဲသို့ တိုးဝင်သွားရသည်ကို နားမလည်နိုင်အောင် ဖြစ်နေသည်။

"လမ်းပျောက်ပြီး မြေပြင်ပေါ်တက်ဖို့ လမ်းမတွေ့တာများလား" သူ၏ စိတ်ထဲတွင် ထူးဆန်းသော အတွေးတစ်ခု ပေါ်လာသည်။

"ဒါက ဖြစ်နိုင်ချေ တစ်ခုပဲ... သူတို့ မွေးဖွားလာတာမှ တစ်နှစ်တောင် မပြည့်သေးတာ... ဒီလို လမ်းမလျှောက်တတ်သေးတဲ့ ကလေးအရွယ်လေးတွေ အနေနဲ့ မြေဆွဲအားကို သုံးသပ်ပြီး အထက်နဲ့အောက် ခွဲခြားဖို့ဆိုတာ တော်တော်ခက်ခဲတဲ့ ကိစ္စပဲ" လော်ယွမ် တွေးမိလိုက်သည်။

သူသည် ထိုကလေးများနှင့် ထိတွေ့ဆက်ဆံဖူးခြင်း သိပ်မရှိသဖြင့် ပုံတူပွားလူသားများ၏ အကြောင်းကို ရေရေရာရာ မသိရှိပေ။

ယခင်က ပြန်လည်ထူထောင်ရေးဇုန်တွင် ၎င်းတို့ကို ဘက်စုံတော်သော ဉာဏ်ကြီးရှင်များအဖြစ် ပြုစုပျိုးထောင်ခဲ့ကြခြင်း ဖြစ်ရာ သာမန် ကလေးငယ်များကဲ့သို့ သဘောထား၍ မရနိုင်ပေ။

အာရုံရသော နေရာသို့ တဖြည်းဖြည်း နီးကပ်လာသည်နှင့်အမျှ ထူးခြားသော အခြေအနေတစ်ခုကို လော်ယွမ် သတိထားမိလိုက်သည်။ စိတ်စွမ်းအင် အာရုံခံစားမှုမှာ တစ်ခုတည်း မဟုတ်ဘဲ အများအပြား စုဝေးနေခြင်း ဖြစ်သည်။

လော်ယွမ် ရှာတွေ့လိုက်သည်မှာ တစ်ယောက်တည်း မဟုတ်ပေ... ကလေးတစ်သိုက် ဖြစ်နေလေသည်။

တစ်နေရာတည်းတွင် စုဝေးနေကြသောကြောင့်သာ အစောပိုင်းက အာရုံတစ်ခုတည်းဟု လော်ယွမ် ထင်မှတ်မှားခဲ့ခြင်း ဖြစ်ပေသည်။

ဆက်ရန်...