ဝံပုလွေအုပ်စုကို ပြုပြင်ပြောင်းလဲခြင်း၊ စနစ်ပင် မစစ်ဆေးနိုင်သည့် ရှောင်လန်နှင့်ရှောင်ယင်း

စိတ်ချင်းဆက်သွယ်မှု စွမ်းရည်ကို ပိုင်နိုင်စွာ တတ်မြောက်ပြီးနောက် လင်းထျန်းလုံ၏ ရင်ထဲတွင် ဆန်းသစ်သော ပျော်ရွှင်မှုတို့ဖြင့် ပြည့်နှက်နေခဲ့သည်။

ဖျာပေါ်တွင် မျက်လုံးဝိုင်းကြီးများဖြင့် သူ့ကို စိုက်ကြည့်နေသော ကလေးငယ်နှစ်ဦးထံသို့ သူ၏ အသိစိတ်အာရုံကို နောက်တစ်ကြိမ် ဂရုတစိုက် ပို့လွှတ်လိုက်သည်။

“ရှောင်လန်၊ ရှောင်ယင်း၊ မင်္ဂလာနံနက်ခင်းပါ”

အတွေးမှာ အနည်းငယ် မချောမွေ့သေးသော်လည်း ဖခင်တစ်ဦး၏ ကြင်နာမှုများဖြင့် ပြည့်နှက်နေပြီး သူ၏ ရင်ထဲတွင် ကြိုတင် ရွေးချယ်ထားသော နာမည်များကို သဘာဝကျကျ အသုံးပြုလိုက်ခြင်း ဖြစ်သည်။

နောက်တစ်စက္ကန့်တွင် ကလေးငယ်နှစ်ဦး၏ စိတ်အာရုံထဲ၌ အံ့ဩမှုလှိုင်းများထသွားပြီးနောက် ဝမ်းသာမှုအဖြစ် ပြောင်းလဲသွားသည်ကို သူ ရှင်းရှင်းလင်းလင်းခံစားလိုက်ရသည်။

“ဝံပုလွေဖေဖေက တယ်လီပသီနဲ့ ငါတို့နာမည်တွေကို ခေါ်လိုက်တာလား” ရှောင်ယင်းက စိတ်ထဲမှ ပြောလိုက်သည်။ “အင်း... ဟုတ်တယ်၊ ဝံပုလွေဖေဖေက ဒီစွမ်းရည်ကို လုံးဝ ပိုင်နိုင်သွားပြီပဲ...” ရှောင်လန်ကလည်း ထောက်ခံလိုက်လေသည်။

ဝံပုလွေပြာသွေးမျိုးဆက်၏ သိမ်မွေ့သော ဆက်စပ်မှုကြောင့် သူတို့သည် ရှောင်လန်နှင့်ရှောင်ယင်း ဟူသော နာမည်များကို လက်ခံထားပြီးသားဖြစ်သော်လည်း ယခုကဲ့သို့ ကြားလိုက်ရခြင်းသည် ပိုမို ရင်းနှီးနွေးထွေးမှုကို ခံစားရစေသည်။

“ဖေဖေ... ပွေ့ပါ...”

သူတို့နှစ်ဦးသည် တယ်လီပသီမှတစ်ဆင့် ချိုမြိန်သော တောင်းဆိုသံလေးများ ပို့လွှတ်လာပြီး ကုတင်ပေါ်မှ ကျွမ်းကျင်စွာ ထထိုင်ကာ လက်သေးသေးလေးများကို သူ့ထံသို့ ဆန့်တန်းလာကြသည်။

လင်းထျန်းလုံ၏ နှလုံးသား အရည်ပျော်ကျသွားရပြန်သည်။ သူ အလျင်အမြန် ခေါင်းငုံ့ပေးလိုက်ရာ ကလေးငယ်များသည် ခြေရောလက်ရော အသုံးပြု၍ သူ၏ ထူထဲပြီးနွေးထွေးသော ပခုံးပေါ်သို့ တက်ရောက်ကာ ဘယ်ညာတစ်ဖက်စီတွင် နေရာယူလိုက်ကြသည်။ ပခုံးပေါ်တွင် နေရာယူလိုက်ကြပုံမှာ ယခင် (၇) ရက်ကထက်ပိုကျွမ်းကျင်လာကြမှန်း သိသာလေသည်။

သူ့ပခုံးပေါ်မှ ကလေးမလေး နှစ်ယောက်ဆီမှတစ်ဆင့် သာမန်ကလေးငယ်များထက် များစွာသာလွန်သော ဝိညာဉ်စွမ်းအင် လှုပ်ခတ်လှိုင်းများကို အာရုံခံမိလိုက်သောအခါ လင်းထျန်းလုံ အံ့ဩသွားရသည်။ “ရက်ပိုင်းလေးပဲ ရှိသေးတယ်... အဆင့် ၆ တောင် ရောက်နေပြီလား... ဒီပါရမီက တကယ့်ကို ကြောက်စရာ ကောင်းလွန်းတယ်...”

စူးစမ်းလိုစိတ်ကြောင့် သူသည် စနစ်ကို အသုံးပြု၍ သမီးတော်များအား မသိစိတ်ဖြင့် စစ်ဆေးကြည့်လိုက်သည်။

[ပစ်မှတ်]: ရှောင်လန်

[အဆင့်]: ၆ (ဝိညာဉ်စွမ်းအင်အဆင့်)

[အခြေအနေ]: ကျန်းမာသည်၊ ကြီးထွားနေသည်

[ပါရမီ‌]: ??? (ရှာဖွေမတွေ့ရှိပါ)

[စွမ်းရည်များ]: ပုံမှန်မဟုတ်သော စိတ်စွမ်းအင် (?) ၊ စွမ်းအင်နှင့် လိုက်ဖက်ညီမှု (?)

[သုံးသပ်ချက်]: အလွန်ထူးခြားသော ပါရမီရှင် လူသားကလေးငယ် ဖြစ်သည်။ သာမန်လူထက် များသွာသာလွန်သော စိတ်စွမ်းအားနှင့် စွမ်းအင်အာရုံခံနိုင်စွမ်းကို ပိုင်ဆိုင်ထားပြီး အနာဂတ် အလားအလာ ကောင်းမွန်သည်။

[ပစ်မှတ်]: ရှောင်ယင်း

[အဆင့်]: ၆ (ဝိညာဉ်စွမ်းအင်အဆင့်)

[အခြေအနေ]: ကျန်းမာသည်၊ ကြီးထွားဆဲကာလ

[ပါရမီ]: ??? (ရှာဖွေမတွေ့ရှိပါ)

[စွမ်းရည်များ]: စိတ်ပိုင်းဆိုင်ရာ တက်ကြွမှု (?) ၊ စွမ်းအင် လိုက်လျောညီထွေဖြစ်မှု (?)

[သုံးသပ်ချက်]: အလွန် တက်ကြွသော လူသားကလေးငယ် ဖြစ်သည်။ စွမ်းအင်အပေါ် ထူးခြားသော လိုက်လျောညီထွေမှု ရှိပုံရပြီး အနာဂတ်အလားအလာ ကောင်းမွန်သည်။

“ဟေ၊ စနစ်တောင် မသိတာတွေက များလှချေလားဟ...”

လင်းထျန်းလုံ ခေတ္တမျှ မှင်တက်သွားသည်။ စနစ်မှ ပြသသော အချက်အလက်များမှာ အလွန် ဝေဝါးနေပြီး အဓိကကျသော အစိတ်အပိုင်းများကို “???” များဖြင့် ဖုံးကွယ်ထားကာ ထူထဲသော မြူနှင်းများ ခြားနားထားသကဲ့သို့ ဖြစ်နေသည်။

“စနစ်က အရာအားလုံးကို မသိနိုင်တာလား... ဒါမှမဟုတ် ကလေးတွေရဲ့ စွမ်းရည်က အပြည့်အဝ မပွင့်သေးလို့လား... ဒါပေမဲ့ ‘ပုံမှန်မဟုတ်သော စိတ်စွမ်းအား’ တို့ ‘စွမ်းအင်နှင့် လိုက်ဖက်ညီမှု’ တို့ဆိုတာ... ကြည့်ရသလောကှ်ာ့ ငါ့သမီးလေးတွေက တကယ့် ဉာဏ်ကြီးရှင်လေးတွေပဲ”

သူသည် ဤမူမမှန်မှုများအတွက် ကျိုးကြောင်းဆီလျော်သော အကြောင်းပြချက်ကို အလိုအလျောက် ရှာဖွေတွေ့ရှိသွားပြီး ပို၍ပင် ဂုဏ်ယူသွားကာ နက်နက်နဲနဲ ဆက်တွေးမနေတော့ပေ။

ဤကဲ့သို့ ပါရမီထူးချွန်သော သမီးနှစ်ယောက်အား ပိုင်ဆိုင်ရခြင်းသည် ဝံပုလွေဘဝကြှး၏ အကြီးမားဆုံး ကံကောင်းမှုဟု သူခံစားလိုက်ရသည်။

သူသည် ကလေးများကို သစ်ပင်အိမ်အပြင်ဘက်သို့ ဂရုတစိုက် ခေါ်ထုတ်လာပြီး အပြင်ဘက်မှ အအေးဓာတ်ကိုလည်း သူ၏ စိတ်စွမ်းဖြင့် ဖိအားဖြင့် သဘာဝကျကျ ကာကွယ်ပေးထားလိုက်သည်။

“ကျေးဇူးပါ ဖေဖေ...” သူတို့နှစ်ဦးက ပိုမို ရှင်းလင်းသော တယ်လီပသီဖြင့် တုံ့ပြန်လာကြသည်။

အချိန်များ တရွေ့ရွေ့ကုန်ဆုံးသွားပြီး (၇) ရက်အကြာတွင် တောအုပ်ကြီးသည် ဆောင်းဦး၏ ပထမဆုံး အအေးဓာတ်ကို ကြိုဆိုလိုက်သည်။

ကလေးငယ်နှစ်ဦးသည်လည်း အနည်းငယ် ပိုမိုကြီးထွားလာကြသည်။ လင်းထျန်းလုံသည် နှင်းဝိညာဉ်သွေးဆိုးအိပ်မက် မြေခွေးမိစ္ဆာ၏ အနူးညံ့ဆုံးနှင့် အခိုင်ခံ့ဆုံး အမွေးအမျှင်များကို အသုံးပြု၍ သူတို့အတွက် နွေးထွေးသက်သာသော အင်္ကျီလေးများကို စေ့စပ်သေချာစွာ ချုပ်လုပ်ပေးထားသည်။

ထျန်းပင်းသည်လည်း သန်မာထွားကျိုင်းလာပြီး ခြေလှမ်း၀က်ထူးချွန်အဆင့်သို့ တည်ငြိမ်စွာ တက်လှမ်းနေပြီ ဖြစ်သည်။

သူသည် အုပ်စုအတွင်း လင်းထျန်းလုံနှင့် ရန့်မြဲ့ ပြီးလျှင် တတိယအသန်မာဆုံး ဖြစ်လာခဲ့သည်။

သို့သော် မျိုးနွယ်စု အရွယ်အစား ကြီးထွားလာသည်နှင့်အမျှ လင်းထျန်းလုံသည် ပြဿနာသစ်တစ်ခုကို ရင်ဆိုင်လာရသည်။ ဝံပုလွေအုပ်စုကို စီမံခန့်ခွဲရသည်မှာ ပိုမို ခက်ခဲလာခဲ့သည်။

သာမန် နှင်းဝံပုလွေ စစ်သည်များသည် ဉာဏ်ရည်အကန့်အသတ် ရှိကြပြီး အမဲလိုက်ရာတွင် အမိန့်နာခံသော်လည်း နေ့စဉ်ဘဝတွင်မူ စနစ်တကျမရှိဘဲ အလွန်ရှုပ်ထွေးနေတတ်ကာ ပူးပေါင်းဆောင်ရွက်မှု အားနည်းကြသည်။

လူသားမုဆိုးများနှင့် သူတို့ယူဆောင်လာနိုင်သော ကြီးမားသည့် ခြိမ်းခြောက်မှုများကို မြင်တွေ့ခဲ့ပြီးပြီဖြစ်ရာ ဗီဇနှင့် ရိုးရှင်းသော အမိန့်များကိုသာ အားကိုးနေရသော အုပ်စုသည် အနာဂတ်၏ ရှုပ်ထွေးသော စိန်ခေါ်မှုများကို ရင်ဆိုင်ရန် လုံလောက်မည် မဟုတ်ကြောင်း သူ ကောင်းကောင်းသိသည်။

“ပြောင်းလဲမှုတွေ လုပ်မှ ဖြစ်မယ်၊ ဒီအတိုင်း ဆက်သွားနေလို့ မဖြစ်ဘူး...”

သူသည် သစ်ပင်အိမ် အပြင်ဘက်တွင် လဲလျောင်းရင်း သူ၏ ယခင်ဘဝက စကိတ်ဝါသနာရှင်နှင့် တောတွင်းစူးစမ်းလေ့လာသူအဖြစ် ဖြတ်သန်းခဲ့သော အတွေ့အကြုံများကို ပြန်လည် သုံးသပ်လိုက်သည်။ “ငါက ကြေးစား ကစားသမား မဟုတ်ခဲ့ပေမယ့်... စကိတ်အသိုင်းအဝိုင်းက လူတွေစုပြီး လမ်းကြမ်းခရီးထွက်ကြရင် အခြေခံ ပူးပေါင်းဆောင်ရွက်မှုနဲ့ တစ်ယောက်ကိုတစ်ယောက် ကြည့်ရှုစောင့်ရှောက်မှုတွေ ရှိရတယ်... တောထဲမှာ ငါ လေ့လာခဲ့ဖူးတဲ့ ဝံပုလွေအုပ်စုတွေကလည်း အမဲလိုက်တဲ့နေရာမှာ ပူးပေါင်းဆောင်ရွက်တာတွေနဲ့ အဆင့်အတန်း ခွဲခြားတာတွေ ရှိတယ်...”

သူသည် ရှေးခေတ် စစ်တပ်များ၏ အခြေခံအကျဆုံး စီမံခန့်ခွဲမှုစနစ်ဖြစ်သော ‘ငါးတစ်စု၊ ဆယ်တစ်ဖွဲ့’ စနစ်ကိုစဉ်းစားမိပြီး ဝံပုလွေအုပ်စု၏ ပါရမီအလိုက် အဆင့်အတန်း ခွဲခြားဖို့အပြင်၊ အမဲလိုက်ရာတွင် တာဝန်ခွဲဝေမှု (ခေါင်းဆောင်ဝံပုလွေ၊ တပ်ကြပ်နှင့် တပ်သား) တို့ကိုပါ ဆက်စပ် တွေးတောလိုက်မိသည်။

“ဖြစ်နိုင်တာက... ငါ ပိုပြီးရှင်းလင်းတဲ့ ဖွဲ့စည်းပုံတစ်ခုကို တည်ဆောက်ကြည့်ရင်ရော...”

ဝံပုလွေအုပ်စု၏ မူလအဆင့်အတန်းနှင့် ဗီဇကိုမဖျက်ဆီးဘဲ အရိုးရှင်းဆုံးသော လူသားများ၏ စစ်တပ် ဖွဲ့စည်းပုံနှင့် ဝံပုလွေတို့၏ အမဲလိုက်အလေ့အထများကို ပေါင်းစပ်ကာ လုပ်ငန်းတာဝန်များအား ပိုမိုတိကျစွာ ခွဲဝေခြင်းနှင့် ပုံသေအဖွဲ့များ ဖွဲ့စည်းခြင်းတို့ ပါဝင်သည့် အကြံအစည်တစ်ခု သူ၏စိတ်ထဲတွင် တဖြည်းဖြည်း ပုံပေါ်လာသည်။

၎င်းသည် နေ့စဉ် စီမံခန့်ခွဲမှုနှင့် ပူးပေါင်းဆောင်ရွက်မှုကို ပိုမိုထိရောက်စေပေလိမ့်မည်။

သူသည် ရုတ်တရက် ခေါင်းမော့ကာ နှင်းဝံပုလွေကျေးရွာတစ်ခုလုံး ပဲ့တင်ထပ်သွားစေမည့် ရှည်လျားသော ဟိန်းသံကြီးကို ထုတ်ဖော်လိုက်သည်။ ထိုဟိန်းသံထဲတွင် ညွှန်ကြားချက်အသစ်များ ပါဝင်နေလေသည်။

သစ်ပင်အိမ်အတွင်း၌ [စိတ်ချင်းဆက်သွယ်မှု] ဖြင့် ဆက်သွယ်နေကြသော ရှောင်လန်နှင့် ရှောင်ယင်းသည် ထိုဟိန်းသံထဲတွင် ပါဝင်သော အဓိပ္ပာယ်များကို ချက်ချင်း ဘာသာပြန်ကြည့်လိုက်ကြသည်။

၎င်းတို့မှာ ပုံသေအမဲလိုက်အဖွဲ့များ ကနဦးဖွဲ့စည်းခြင်း၊ ကင်းလှည့်စနစ်ကို ရှင်းလင်းစွာ သတ်မှတ်ခြင်းနှင့် သိုလှောင်ဂူ၏ ကာကွယ်ရေးအား မြှင့်တင်ခြင်းတို့ ဖြစ်သည်!

“ပုံသေအဖွဲ့တွေ ခွဲမလို့လား၊ အလှည့်ကျစနစ်တဲ့လား” ရှောင်လန် အနည်းငယ် အံ့ဩသွားသည်။ ၎င်းသည် သာမန် ဝံပုလွေအုပ်စု၏ ဖွဲ့စည်းပုံ အဆင့်အတန်းထက် ကျော်လွန်နေချေပြီ “ဝံပုလွေဖေဖေက... အုပ်စုအတွက် စည်းကမ်းတွေ သတ်မှတ်ပြီး စစ်တပ်အဖွဲ့အစည်း တည်ဆောက်နေတာလား... သူက ဝံပုလွေအုပ်စုကို... ပိုပြီး စည်းကမ်းရှိတဲ့ တပ်ဖွဲ့တစ်ခုအဖြစ် ပြောင်းလဲချင်နေတာလား”

ရှောင်ယင်း၏ ထိတ်လန့်မှုထဲတွင်တော့ စိတ်လှုပ်ရှားမှု အရိပ်အယောင်များပါ ရောယှက်ပါဝင်နေသည်။ သူတို့၏ ဝံပုလွေဖေဖေသည် အချိန်နှင့်အမျှ အင်အားတိုးတက်စေမည့် နည်းလမ်းသစ်များကို အမြဲတမ်း ဖန်တီးနိုင်စွမ်း ရှိသူပင် ဖြစ်သည်။