ဝံပုလွေအုပ်စု၏ အသွင်ပြောင်းလဲခြင်း ၊ ပဲ့တင်ထပ်သံ၏ စွမ်းအားနှင့် ဧကရီ၏ အံ့ဩမှင်တက်မှု

“ဂေ့...”

ကလေးငယ်နှစ်ဦး၏ ဗိုက်ဝသွားကြောင်း ပြသနေသည့် ချစ်စဖွယ် လေတက်သံကို ကြားလိုက်ရပြီး လင်းထျန်းလုံ၏ မျက်နှာထက်တွင် ဖခင်တစ်ဦး၏ မေတ္တာနှင့် ကျေနပ်ပီတိဖြစ်မှုတို့ ယှက်နွှယ်နေသော အပြုံးတစ်ပွင့် ပွင့်လန်းလာသည်။

သမီးတော်လေးများ ပျော်ရွှင်နေသည်ကို မြင်တွေ့ရခြင်းက သူ၏ ပင်ပန်းထားရမှုမှန်သမျှ တန်သွားစေခဲ့သည်။

ကလေးငယ်နှစ်ဦးသည် လုံးဝန်းသော ဗိုက်ကလေးများကို ပွတ်သပ်ရင်း အချိန်ဆိုင်းမနေဘဲ ကိုယ်စီပြုပြင်မွမ်းမံထားသော အခြေခံကျင့်စဥ်နည်းစနစ်များကို စတင်လည်ပတ်လိုက်ကြသည်။

ခန္ဓာကိုယ်အတွင်းရှိ ဝက်ဝံလက်ဖဝါးအသားမှ ရရှိသော လျှံကျနေသည့် စွမ်းအင်များကို ချေဖျက်စုပ်ယူရန် ကြိုးစားနေကြသည်။ ဤစွမ်းအင်များသည် သန့်စင်ပြီး များပြားလွန်းသဖြင့် သူတို့၏ ခန္ဓာကိုယ်ပတ်လည်တွင် ဝိညာဉ်အလင်းရောင်များ ဖျော့ဖျော့လေး တောက်ပလာသည်။

စွမ်းအင်များအား စုပ်ယူလေလေ ဝံပုလွေဖေဖေအပေါ် ထားရှိသော ကျေးဇူးတရား ပိုမိုနက်ရှိုင်းလာလေလေ ဖြစ်သည်။ ဤပါရမီရှင်အဆင့် ဝက်ဝံလက်ဖဝါးများ၏ တန်ဖိုးကို သူတို့ ကောင်းကောင်းကြီးနားလည်ထားကြသည်။

၎င်းသည် အမြုတေမှလွဲ၍ တန်ဖိုးအရှိဆုံး အစိတ်အပိုင်းဖြစ်ပြီး ဝံပုလွေဖေဖေ ကိုယ်တိုင်အတွက်လည်း များစွာအကျိုးရှိစေမည့်အရာ ဖြစ်သည်။ သို့သော် သူသည် တွန့်ဆုတ်ခြင်းမရှိဘဲ အားလုံးကို သူတို့အတွက် ပေးဆပ်ခဲ့ပြီး အစာကြေလွယ်စေရန် ဂရုတစိုက်ပင် ကင်ပေးခဲ့သေးသည်။

“ဝံပုလွေဖေဖေက... ငါတို့အတွက်ဆိုရင် အကောင်းဆုံးတွေကိုပဲ ပေးတာပါလား...”

အတိတ်ဘဝတွင် လူသားဧကရီနှင့် မိစ္ဆာဧကရီ ဖြစ်ခဲ့ကြသော်လည်း ဤမျှ သန့်စင်ပြီး ခြွင်းချက်မရှိ အလိုလိုက်၊ အချစ်ခံရမှုကြောင့် သူတို့၏ နှလုံးသားထဲတွင် နွေးထွေးသော စီးကြောင်းတစ်ခု စီးဆင်းသွားသည်။

သူတို့၏ အကြည့်များသည် အနီးနားတွင် တိတ်ဆိတ်စွာ စောင့်ကြပ်နေသော ရန့်မြဲ့ထံသို့ မသိစိတ်မှ ရောက်ရှိသွားသည်။

“ပြီးတော့ ဝံပုလွေဦးလေး... သူကလည်း ခုနက ငါတို့ကို တွန့်ဆုတ်ခြင်းမရှိ ကာကွယ်ပေးခဲ့တယ်...”

ဧကရီနှစ်ပါး၏ နှလုံးသားထဲတွင် အတိတ်ဘဝက လူသားလောက၏ ရှုပ်ထွေးပွေလီသော လှည့်ကွက်များနှင့် နှိုင်းယှဉ်ကာ ဤဝံပုလွေများ၏ သစ္စာရှိမှုနှင့် စစ်မှန်မှုအပေါ် ကြည်နူးမိသွားကြသည်။

“ယုံကြည်မှု” ဟူသော အစေ့အဆံလေးသည် သူတို့၏ နှလုံးသားထဲတွင် တိတ်တဆိတ် အမြစ်တွယ်စ ပြုလာတော့သည်။

ထိုစဉ် လင်းထျန်းလုံ၏ အသိစိတ်ပင်လယ်ထဲတွင် စနစ်အသိပေးချက်များ ဆက်တိုက်ထွက်ပေါ်လာသည်။

[ စနစ် အသိပေးချက် - ပိုင်ရှင်၏ လက်အောက်ခံ နှင်းဝံပုလွေမျိုးနွယ်စုသည် ထူးချွန်အဆင့် မိစ္ဆာသားရဲ နှင်းတောင်ကုန်းသမင် (အဆင့် ၁၅) ကို အမဲလိုက်နိုင်ခဲ့သည်၊ ပါရမီကြွေကျခြင်း - ရုပ်ပိုင်းဆိုင်ရာ အားဖြည့်ခြင်း (အစိမ်း)၊ စုပ်ယူမည်လား ]

[ စနစ် အသိပေးချက် - ပိုင်ရှင်၏ လက်အောက်ခံ နှင်းဝံပုလွေမျိုးနွယ်စုသည် ထူးချွန်အဆင့် မိစ္ဆာသားရဲ နှင်းတောင်ကုန်းသမင် (အဆင့် ၁၅) ကို အမဲလိုက်နိုင်ခဲ့ပြီ၊ ပါရမီကြွေကျခြင်း - ဧရာမဦးချိုဖြင့် ဝင်ဆောင့်ခြင်း (အဖြူ)၊ စုပ်ယူမည်လား ]

[ စနစ် အသိပေးချက် - ပိုင်ရှင်၏ လက်အောက်ခံ နှင်းဝံပုလွေမျိုးနွယ်စုသည် ခြေလှမ်း၀က်ပါရမီရှင်အဆင့် မိစ္ဆာသားရဲ နှင်းသမင်ဘုရင်ကို အမဲလိုက်နိုင်ခဲ့ပြီ၊ ပါရမီကြွေကျခြင်း - ရုပ်ပိုင်းဆိုင်ရာ အားဖြည့်ခြင်း (အဖြူ)၊ စုပ်ယူမလား ]

အစိမ်းရောင်နှင့်အဖြူရောင် ပါရမီအများအပြား ဆက်တိုက် ပေါ်ထွက်လာသည်။

“အင်း... ကံကောင်းခြင်းဆိုတာ ထာဝရ မတည်မြဲပါလား...”

လင်းထျန်းလုံ တည်ငြိမ်စွာ တွေးလိုက်သည်။ ဤအရည်အသွေးနိမ့် ပါရမီများသည် သူ့အတွက် အဓိပ္ပာယ် ကြီးကြီးမားမားမရှိတော့သဖြင့် အတွေးတစ်ချက်ဖြင့် ၎င်းတို့အားလုံးကို လက်ရှိ ပါရမီများအား အားဖြည့်ရန်အတွက် အာဟာရအဖြစ် ပြောင်းလဲပစ်လိုက်သည်။

[ စနစ် အသိပေးချက် - ပါရမီ၊ ဓားလက်သည်း (အဖြူ) ကို အားဖြည့်ပြီးပါပြီ၊ သံချပ်ကာ ဖောက်ထွင်းနိုင်စွမ်းနှင့် ထက်ရှမှု အနည်းငယ်တိုးလာသည် ]

[ စနစ် အသိပေးချက် - စွမ်းရည်၊ ဝံပုလွေဟိန်းသံဖြင့် ခြိမ်းခြောက်ခြင်း (အဖြူ) ] ကို အားဖြည့်ပြီးပါပြီ၊ ခြိမ်းခြောက်နိုင်စွမ်း နယ်ပယ်နှင့် အာနိသင် အနည်းငယ် တိုးလာသည် ]

[ စနစ် အသိပေးချက် - စွမ်းရည်၊ လမင်းမြည်ကြွေးသံ (အစိမ်း) ] ကို အားဖြည့်ပြီးပါပြီ၊ အသက်သွင်းချိန်တွင် မဟာမိတ်ဝံပုလွေအုပ်စုအား ပေးစွမ်းနိုင်သော တိုက်ခိုက်စွမ်းအားနှင့် အရှိန်နှုန်း အနည်းငယ် တိုးလာသည် ]

ပါရမီ အဆင့်များ ပြောင်းလဲခြင်း မရှိသော်လည်း သိသာထင်ရှားသော စွမ်းအားတိုးတက်မှုကို ရရှိခဲ့သဖြင့် လင်းထျန်းလုံ အလွန်ကျေနပ်အားရသွားသည်။

သိပ်မကြာမီမှာပင် ထျန်းပင်းဦးဆောင်သော အမဲလိုက်အဖွဲ့သည် အားအင်အပြည့်ဖြင့် ပြန်လည်ရောက်ရှိလာသည်။

သူတို့သည် ဧရာမသမင်ထီး (၆) ကောင်၏ အလောင်းများကို သယ်ဆောင်လာရုံသာမက လင်းထျန်းလုံ၏ အမိန့်အတိုင်း အရှင်ဖမ်းဆီးလာသော သမင်မအုပ်စုငယ် တစ်စုကိုလည်း ထိန်းကျောင်းလာကြသည်။ ဤသမင်အရှင်များကို နှင်းဝံပုလွေကျေးရွာ၏ ဆောင်းတွင်း အရန်ရိက္ခာအဖြစ် မွေးမြူထားမည်ဖြစ်ပြီး အထူးသဖြင့် ကလေးငယ်နှစ်ဦး လတ်ဆတ်သော သမင်သားအား စားသုံးနိုင်ရန် ရည်ရွယ်ထားခြင်း ဖြစ်သည်။

အချိန် (၇) ရက်သည် လျှပ်စီးလက်သကဲ့သို့ လျှင်မြန်စွာ ကုန်ဆုံးသွားသည်။

ဆောင်းဦးအအေးဓာတ်သည် ထျန်းစန်းသစ်တောကြီး တစ်ခုလုံးကို လွှမ်းခြုံထားပြီး နှင်းထူထပ်စွာ ကျဆင်းမှုကြောင့် တောင်လမ်းများ ပိတ်ဆို့လုနီးပါးဖြစ်နေကာ အမဲလိုက်ထွက်ရန် ပိုမိုခက်ခဲလာသည်။ လင်းထျန်းလုံသည် ကျေးရွာအတွင်းတွင်သာနေပြီး သမီးများကို ပြုစုပျိုးထောင်ခြင်း၊ ဝံပုလွေအုပ်စုကို လေ့ကျင့်ပေးခြင်းနှင့် ခံစစ်ခိုင်မာအောင် တည်ဆောက်ခြင်းတို့ကို အာရုံစိုက်ကာ ပြုလုပ်နေသည်။

“အာဝူး...”

“ဂါး...”

နှင်းဝံပုလွေကျေးရွာ၏ ကွင်းပြင်ကျယ်တွင် ဟိန်းသံများနှင့် တိုက်ခိုက်သံများ အဆက်မပြတ် ထွက်ပေါ်နေသည်။ လင်းထျန်းလုံ၏ လမ်းညွှန်မှုအောက်တွင် ဝံပုလွေများသည် နှစ်ကောင်တစ်တွဲ ပြင်းထန်သော တိုက်ခိုက်ရေး လေ့ကျင့်မှုများကို ပြုလုပ်နေကြသည်။

အချို့က ခုန်အုပ်ခြင်းနှင့် ရှောင်တိမ်းခြင်းကို လေ့ကျင့်နေကြပြီး အချို့က ဘေးဘက်မှ ဝိုင်းရံတိုက်ခိုက်ခြင်းကို ညှိနှိုင်းနေကြသည်။ အချို့မှာမူ ရေခဲစွမ်းအားများကို အသုံးပြု၍ အတားအဆီးများ ဖန်တီးခြင်းတို့ကို လေ့ကျင့်နေကြသည်။

လင်းထျန်းလုံသည် အမြင့်တစ်နေရာတွင်ရပ်လျက် ငွေပြာရောင်မျက်ဝန်းများဖြင့် ဤမြင်ကွင်းကို ကျေနပ်စွာ ကြည့်ရှုနေခဲ့သည်။

သူ၏ ဦးဆောင်မှုအောက်တွင် ဝံပုလွေအုပ်စု၏ ပြောင်းလဲမှုမှာ သိသာထင်ရှားလာခဲ့သည်။

တစ်ဦးချင်း ကွာခြားချက်များနှင့် ဆင့်ကဲပြောင်းလဲမှု လမ်းကြောင်းမတူညီခြင်းကြောင့် အုပ်စုအတွင်း ကနဦး လုပ်ငန်းတာဝန်သုံးမျိုး ကွဲပြားလာသည်ကိုလည်း တွေ့ရသည်။

အမဲလိုက်သူများ (ကင်းထောက်) - အရှိန်အဟုန်ကောင်းပြီး အာရုံခံစားမှု ကောင်းမွန်သော နှင်းဝံပုလွေများသည် လေ့ကျင့်ရေးများတွင် ပိုမိုသွယ်လျသွက်လက်လာပြီး ကင်းလှည့်ခြင်း ၊ ကင်းစောင့်ခြင်းနှင့် ခြေရာခံခြင်းများကို တာဝန်ယူကြရသည်။

အားကုန်တိုက်ခိုက်သူများ (တိုက်ခိုက်ရေးသမား) - ခွန်အားနှင့် အရှိန် မျှတပြီး ရန်လိုစိတ်ပြင်းထန်သူများသည် တိုက်ခိုက်ရေး နည်းစနစ်များကို အာရုံစိုက်ရကာ အမဲလိုက်ခြင်းနှင့် တိုက်ပွဲများအတွက် အဓိကအင်အားစု ဖြစ်လာသည်။

အစောင့်အရှောက်များ (အစောင့်၊သယ်ယူပို့ဆောင်ရေး) - ခန္ဓာကိုယ် ထွားကျိုင်းသူများ သို့မဟုတ် အနည်းငယ်နှေးကွေးသော်လည်း ခံနိုင်ရည်ကောင်းမွန်သူများသည် ကာကွယ်ရေးနှင့် ဝန်သယ်ဆောင်ခြင်းကို အာရုံစိုက်ရကာ ကျေးရွာလုံခြုံရေးနှင့် သားကောင်ကြီးများ သယ်ယူခြင်းကို တာဝန်ယူကြရသည်။

ပါရမီနှင့် တိုက်ခိုက်ရေးဗီဇအပေါ် အခြေခံထားသော ဤခွဲခြားမှုသည် သဘာဝကျသော လမ်းကြောင်းတစ်ခုဖြစ်ကြောင်း လင်းထျန်းလုံ ကောင်းစွာ သိထားသည်။

၎င်းကြောင့် စိတ်ဝမ်းကွဲပြားမှု ဖြစ်စေမည်ကို သူမစိုးရိမ်ပေ။ ဆန့်ကျင်ဘက်အားဖြင့် အုပ်စု၏ အဓိကစည်းလုံးမှုဖြစ်သော မျိုးတူပဲ့တင်ထပ်သံနှင့် သူ၏ အကြွင်းမဲ့ဦးဆောင်မှု ခိုင်မြဲနေသမျှ ကာလပတ်လုံး ဤလုပ်ငန်းခွဲဝေမှုသည် ဝံပုလွေအုပ်စုကို ပိုမိုသန်မာစေပြီး ထိရောက်လိမ့်မည် ဖြစ်သည်။

အုပ်စု၏ အနာဂတ်ကို တွေးတောနေစဉ် ခဏတာ တိတ်ဆိတ်နေခဲ့သော စနစ်အသိပေးသံသည် သူ၏စိတ်ထဲတွင် ပြန်လည်မြည်ဟိန်းလာပြီး ကြီးမားသော အံ့ဩဖွယ်ရာ တစ်ခုကိုပါ ယူဆောင်လာခဲ့သည်။

[ စနစ် အသိပေးချက် - နှင်းဝံပုလွေမျိုးနွယ်စုသည် အင်အားပြောင်းလဲမှုကို စုပေါင်း ပြီးမြောက်ခဲ့သည်၊ လက်ရှိ ပျမ်းမျှအဆင့်သည် အဆင့် ၁၅ (ထူးချွန်အဆင့်) သို့ မြင့်တက်လာသည်၊ [ မျိုးတူပဲ့တင်ထပ်သံ (ခရမ်းရောင်) ] ၏ အာနိသင် တိုးမြှင့်ခံရသည်၊ လက်ရှိ အာနိသင်၊ နှင်းဝံပုလွေအုပ်စု၏ ဂုဏ်သတ္တိအားလုံး ၃၅% တိုးပွားသည် ]

[ စနစ် အသိပေးချက် ၊ ချိတ်ဆက်နိုင်သော နယ်ပယ် ကျယ်ပြန့်လာသည်၊ ပိုင်ရှင်သည် ဝံပုလွေအုပ်စုအဖွဲ့ဝင်များနှင့် မီတာ (၄၀၀၀) အတွင်း ရှိနေပါက အဖွဲ့ဝင်များ၏ အမဲလိုက်မှုမှ ပါရမီနှင့်စွမ်းရည် ဆုလာဘ်များကို ရရှိနိုင်သည် ]

ဂုဏ်သတ္တိအားလုံး ၃၅% တိုးပွားခြင်း... ဝံပုလွေအုပ်စု တစ်ခုလုံးကို လွှမ်းခြုံထားခြင်း...

ယခုမှသာ မျိုးတူပဲ့တင်ထပ်သံ ဟူသော ခရမ်းရောင်ပါရမီသည် မည်မျှကြောက်မက်ဖွယ်ကောင်းကြောင်း လင်းထျန်းလုံ ပိုမိုနက်ရှိုင်းစွာ သဘောပေါက်လာခဲ့သည်။ ၎င်းသည် မျိုးနွယ်စု တစ်ခုလုံးကို အဆက်မပြတ် သန်မာလာစေနိုင်သော ဗျူဟာမြောက် စွမ်းရည်တစ်ခုပဲ ဖြစ်သည်။

အောက်ဘက်ရှိ ကောင်းစွာ လေ့ကျင့်ထားသော ပျမ်းမျှအဆင့် ၁၅ (ထူးချွန်အဆင့်) တွင်ရှိပြီး လုပ်ငန်းတာဝန်များဖြင့် တိကျသေသပ်သော ဝံပုလွေအုပ်စုကိုကြည့်ရင်း လင်းထျန်းလုံ၏ရင်ထဲတွင် ယုံကြည်မှုများ တိုးပွားလာသည်။

“စစ်သည်ကောင်းတွေဖြစ်လာမဲ့ သန်မာတဲ့ ဝံပုလွေတွေ...”

သူရဲကောင်းဆန်သော ခံစားချက်များ သူ၏ရင်ထဲတွင် ပြည့်နှက်လာသည်။

“ဒီတောအုပ်ကြီးကကျယ်ပြန့်ပြီး စွမ်းအားကြီးတဲ့ သတ္တဝါတွေ ပုန်းအောင်းနေနိုင်ပေမယ့်... ငါတို့ နှင်းဝံပုလွေမျိုးနွယ်စုလောက် အင်အားကြီးပြီး စနစ်ကျတဲ့ အဖွဲ့အစည်းကတော့ နောက်ထပ်ရှိနိုင်မှာ မဟုတ်တော့ဘူး...”

“နွေဦးရောက်ရင်... အမဲလိုက်နယ်မြေချဲ့ထွင်ဖို့ စဉ်းစားရမယ်၊ ဒါမှမဟုတ်... ထျန်းစန်းတောင်တန်းရဲ့ ပိုနက်ရှိုင်းတဲ့ နေရာတွေကို စူးစမ်းလေ့လာရမလား”

သစ်ပင်အိမ်အတွင်းတွင် ကျင့်ကြံမှု တစ်ကြိမ်ပြီးဆုံးသွားသော ရှောင်လန်သည် မျက်လုံးများကို ဖြည်းဖြည်းချင်း ဖွင့်လာခဲ့ပြီး သူမ၏ ဝိညာဉ်စွမ်းအင်များ ပိုမိုသိပ်သည်းလာသည်ကို ခံစားနေရသည်။ ထိုစဉ် တံခါးအပြင်ဘက်ရှိ ဝံပုလွေဖေဖေ၏ အရှိန်အဝါကို မသိစိတ်ဖြင့် အာရုံခံမိလိုက်သည်။

“အို...”

သူမ ခဏတာ ကြောင်အသွားပြီး ရေခဲပြာမျက်ဝန်းများထဲတွင် အံ့ဩမှု အရိပ်အယောင်များ ဖြတ်ပြေးသွားသည်။

“ဝံပုလွေဖေဖေရဲ့ အရှိန်အဝါက... အရင် (၇) ရက်ကထက် အများကြီး ပိုအားကောင်းလာသလိုပဲ၊ ဒီမမြင်ရတဲ့ဖိအားက...”

အ‌စောပိုင်းက သူမ၏ တိုးတက်မှုနှုန်းမှာ မြန်ဆန်နေသည်ဟု သူမခံစားနေရသော်လည်း ယခုမူ ဝံပုလွေဖေဖေ၏ တိုးတက်မှု သူမထက်ပင် ပိုမြန်ဆန်နေခဲ့သည်။ ၎င်းသည် ယခင် ဧကရီ ဖြစ်ဖူးသော သူမအတွက်ပင် အနည်းငယ် ယုံကြည်ရခက်နေသည်။

“ဝံပုလွေဖေဖေ... ဖေဖေက ဘယ်လို သားရဲမျိုးလဲ...”