သုံးယောက်တစ်ယောက်

"ဟင်း... မင်းတို့ပြောတာတွေက တော်တော်လေးကျိုးကြောင်းဆီလျော်တာပဲ၊ ငါတောင် ပြန်ချေပဖို့ရှက်လာပြီ"

သူပြုံးလိုက်ပြီး လိပ်နက်ဘုရင်၏ကျောပေါ်မှခုန်ဆင်းကာ လက်စွပ်ထဲမှ ချန်းလီဓားကို ထုတ်ယူလိုက်သည်။

"ငါ့အမှားတွေအတွက် ပြန်ပေးဆပ်တဲ့အနေနဲ့ ငါ လူကောင်းတစ်ယောက် လုပ်ပေးပါ့မယ်"

သူ ထိုသို့ပြောလိုက်သောအခါ တစ်ဖက်မှ ဝိညာဉ်အရှင်သုံးဦးစလုံးက ကျန်းချန်အလျှော့ပေးတော့မည်ဟု ထင်မှတ်သွား၏။ အနီးနားရှိ အခြားနယ်မြေများမှ ကျွမ်းကျင်သူများကလည်း ကျန်းချန်ကို အထင်သေးသော အမူအရာများဖြင့် ကြည့်လိုက်ကြသည်။

သို့သော် နောက်ထပ်ထွက်ပေါ်လာသောစကားနှစ်ခွန်းမှာ သူတို့ထင်သလိုလုံးဝမဟုတ်ခဲ့ပေ။

"ပိဖုန်းက မင်းတို့ကိုလိမ်ခဲ့တယ်... အခု ငါမင်းတို့ကို သူ့ဆီပို့ပေးမယ်"

"သူ့ကို ကိုယ်တိုင်တွေ့ပြီးမေးကြတော့"

ဂိုဏ်းချုပ်ကျန်း၏ လက်ရှိတိုက်ခိုက်ရေးစွမ်းရည်ကို သူကိုယ်တိုင်ပင်အတိအကျမသိနိုင်တော့ချေ။ မည်သို့ပင်ဆိုစေ ရှေ့တွင်ရပ်နေသော ဝိညာဉ်အရှင်သုံးဦးမှာ သူ့ကို အန္တရာယ်ရှိသည့် ခံစားချက်မပေးနိုင်ပေ။

"သေချင်နေတာပဲ"

မူလက ထိုဝိညာဉ်အရှင်သုံးဦးသည် ကျန်းချန်က မျက်စိသုံးလုံးကျား၊ လိပ်နက်ဘုရင် သို့မဟုတ် မိုချန်တို့ကို ထုတ်သုံးလိမ့်မည်ဟု ထင်ထားခဲ့ခြင်းဖြစ်သည်။ သူကိုယ်တိုင်တိုက်ခိုက်လိမ့်မည်ဟု မည်သူကမှမထင်ထားခဲ့ကြချေ။

ကျန်းချန်၏ အဆင့်မှာ အရှင်မြတ်အဆင့် ၈ ဖြစ်ကြောင်း တစ်ချက်ကြည့်ရုံဖြင့်သိနိုင်သည်။ ထို့ကြောင့် ဝိညာဉ်အရှင်သုံးဦးစလုံးက သူ့ကို အစကတည်းက အလေးမထားခဲ့ကြပေ။

ယခု သူကိုယ်တိုင်ထွက်လာသည်ကိုမြင်သောအခါ သူတို့ဝမ်းသာသွားကြသည်။ အကယ်၍ ကျန်းချန်ကို ဖမ်းဆီးနိုင်လျှင် အရိုးချေဖျက်အလံမှာ သူတို့အပိုင်ဖြစ်တော့မည်။

သုံးဦးစလုံးက သူတို့၏ သူတော်စင်နယ်မြေများကို တစ်ပြိုင်နက်တည်း အသက်သွင်းလိုက်ရာ ဟိန်းဟောက်နေသော သားရဲဝိညာဉ်ပုံရိပ်များက ကျန်းချန်ဆီသို့ပြေးဝင်လာသည်။ ပတ်ဝန်းကျင်ရှိ စည်းမျဉ်းများမှာလည်း ချက်ချင်းပြောင်းလဲသွား၏။

သူတော်စင်အဆင့်၏ သူတော်စင်နယ်မြေနှင့် အရှင်မြတ်အဆင့်၏နယ်ပယ်တို့ကြား အကြီးမားဆုံးကွာခြားချက်မှာ ထိန်းချုပ်နိုင်စွမ်းပင်။ သူတော်စင်အဆင့်ကျွမ်းကျင်သူများသည် နယ်မြေအတွင်းရှိစည်းမျဉ်းများကို သူတို့၏ခြေလက်များကဲ့သို့ လွယ်ကူစွာစေခိုင်းနိုင်သည်။

သာမန်ကျင့်ကြံသူတစ်ဦးအတွက် သူတော်စင်နယ်မြေအတွင်းတိုက်ခိုက်ရခြင်းမှာ နတ်ဘုရားတစ်ပါးကို ဆန့်ကျင်တိုက်ခိုက်ရသကဲ့သို့ ဖြစ်ရာ အနိုင်ရရန်အခွင့်အရေးလုံးဝမရှိချေ။

ကျန်းချန်ကို ထိုသူတော်စင်နယ်မြေသုံးခုက တစ်ပြိုင်နက်လွှမ်းခြုံသွားသည်ကို မြင်လိုက်ရသောအခါ အနီးနားရှိလူများက ကျန်းချန်မှာ ကိုယ့်ကိုယ်ကိုယ်အထင်ကြီးလွန်းသည်ဟုထင်ကာ ခေါင်းခါလိုက်ကြ၏။ အကယ်၍သူသည် သူတော်စင်နယ်မြေများမရောက်လာမီ အမြန်ဆုံးဆုတ်ခွာခဲ့မည်ဆိုလျှင် အသက်ဆက်ရှည်နိုင်သေးသည်။

သို့သော်လည်း နောက်တစ်ခဏ၌ ဝုန်းခနဲမြည်သံကြီးနှင့်အတူ အက်ကွဲသံကြီး ထွက်ပေါ်လာသည်။

မှန်သုံးချပ်ရိုက်ခွဲခံလိုက်ရသလိုပင်။ ထိုအသံမှာ နားဖြင့်ကြားရခြင်းမဟုတ်ဘဲ စည်းမျဉ်းများထိပ်တိုက်တွေ့ဆုံမှုကြောင့် သူတို့၏သိစိတ်ထဲအထိ တုန်ခါသွားခြင်းဖြစ်သည်။

ကျန်းချန်က လက်တစ်ဖက်ကိုဝှေ့ယမ်းလိုက်ရာ ကောင်းကင်နှင့် မြေကြီးကို ဖျက်ဆီးနိုင်သော အငွေ့အသက်များပါရှိသည့် သူ၏အရှင်မြတ်အဆင့် ၈ နယ်ပယ်သည် ထိုသူတော်စင်နယ်မြေသုံးခုကို အပြင်းအထန်ရိုက်ခတ်လိုက်သည်။

ရလဒ်မှာ လူတိုင်းမျှော်လင့်ထားသည်နှင့် လုံးဝဆန့်ကျင်ဘက် ဖြစ်သွားသည်။ ကျန်းချန်၏နယ်ပယ်မှာ အနည်းငယ်မျှပင် ပျက်စီးခြင်းမရှိသော်လည်း ထိုသူတော်စင်နယ်မြေသုံးခုမှာမူ စည်းမျဉ်းများထိပ်တိုက်တွေ့မှုတွင် ချက်ချင်းရှုံးနိမ့်သွားတော့သည်။ သူတော်စင်နယ်မြေသုံးခုစလုံးမှာ တောင်ကြီးတစ်လုံး၏ဖိခြေခြင်းကို ခံလိုက်ရသည့်အလား အစိတ်စိတ်အမွှာမွှာ ကွဲအက်သွားပြီး ဆက်လက်တည်ရှိမနေနိုင်တော့ချေ။

ဟင်းလင်းပြင်နယ်မြေအတွင်း၌ စည်းမျဉ်းပုံရိပ်များစွာမှာ ခဏချင်းအတွင်း တဖျတ်ဖျတ် ပေါ်လာသည်။ ဆက်တိုက်ဆိုသလို ပေါက်ကွဲမှုများကြောင့် အရိုးချေဖျက်အလံ၏ အောက်ဘက်ရှိဟင်းလင်းပြင်မှာ ကမောက်ကမဖြစ်သွားတော့သည်။ ဝိညာဉ်အရှင်သုံးဦးစလုံးမှာလည်း စည်းမျဉ်းစွမ်းအားများ၏ တန်ပြန်သက်ရောက်မှုကြောင့် မျက်နှာများဖြူဖျော့သွား၏။

"ဒါ... ဒါက ဘယ်လိုဖြစ်နိုင်မှာလဲ"

"နယ်ပယ်တစ်ခုတည်းနဲ့ သူတော်စင်နယ်မြေသုံးခုကို အနိုင်ယူလိုက်တာလား"

နယ်မြေအသီးသီးမှ ကျွမ်းကျင်သူများမှာ အံ့အားသင့်ကာ အော်ဟစ်လိုက်ကြ၏။ ဓားနယ်မြေမှ ခေါင်းဆောင်သုံးဦးပင်လျှင် သူတို့၏မျက်လုံးထဲ၌ သံသယများ ပြည့်နှက်သွားတော့သည်။

သာမန်အားဖြင့် သူတော်စင်နယ်မြေသည် နယ်ပယ်ထက် ပိုမိုတည်ငြိမ်ပြီး စည်းမျဉ်းစွမ်းအားများ ပိုမိုနက်ရှိုင်းသည်မှာ အခြေခံအသိပညာပင်။ ထို့ကြောင့် ယခုမြင်တွေ့နေရသောရလဒ်မှာ သူတို့လုံးဝနားမလည်နိုင်သော အရာဖြစ်နေသည်။

လိပ်နက်ဘုရင်၏ ကျောပေါ်တွင်ထိုင်နေသောမိုချန်တစ်ဦးတည်းသာ ခပ်ပြုံးပြုံးဖြင့် လန်ယီထံသို့ တိုးတိုးလေးအသံလွှင့်ကာပြောလိုက်သည်။

"ကျွန်တော် ပြောသားပဲ... စိုးရိမ်စရာမလိုပါဘူးလို့"

"ဂိုဏ်းချုပ်ရဲ့နယ်ပယ်က စည်းမျဉ်းစွမ်းအားတွေ ရှုပ်ထွေးနေပြီး စိတ်တိုင်းကျ မထိန်းချုပ်နိုင်သေးပေမဲ့၊ အဲဒါက အစစ်အမှန်အင်မော်တယ်နဲ့ မြင့်မြတ်အင်မော်တယ်အဆင့်တွေရဲ့ သိုင်းတာအိုတွေကို အခြေခံထားတာလေ။ သူရဲ့ အနှစ်သာရစုဆောင်းမှုက အရမ်းအစွမ်းထက်လွန်းတယ်၊ သာမန် သူတော်စင်နယ်မြေတွေက ဘယ်လိုလုပ်ခံနိုင်မှာလဲ"

"အဲဒီသုံးယောက်က သစ်ပင်ကိုလာလှုပ်တဲ့ ပုရွက်ဆိတ်တွေလိုပါပဲ"

လန်ယီက အံ့ဩတကြီးမေးလိုက်သည်။

"ဒါဆို သူက သူတော်စင်အဆင့်တွေကြားမှာတောင် ပြိုင်ဘက်ကင်းနေတာပေါ့ ဟုတ်လား"

မိုချန်က ခေါင်းယမ်းလိုက်သည်။

"ဒီသုံးယောက်က သူတော်စင်အဆင့် အစောပိုင်း၊ အလယ်ပိုင်းနဲ့ အနှောင်းပိုင်းတွေဆိုတော့ သူတို့ရဲ့ ခွန်အားကမလုံလောက်သေးဘူး"

သူသည် ဝေးကွာသောနေရာမှ ဓားနယ်မြေကလူစုကို လှမ်းကြည့်လိုက်သည်။

"တကယ်လို့ သူတော်စင်အဆင့်အထွတ်အထိပ်က လူတွေနဲ့ဆိုရင်တော့ ဘယ်သူနိုင်မလဲဆိုတာ မပြောနိုင်သေးဘူး"

ကျန်းချန်၏အားသာချက်မှာ သူ၏အခြေခံမှာ အလွန်နက်ရှိုင်းလွန်းလှသဖြင့် နယ်ပယ်၏စွမ်းအားကိုယ်တိုင်က အလွန်ကြီးမားခမ်းနားနေခြင်းဖြစ်သည်။ သူတော်စင်အဆင့် အထွတ်အထိပ်တစ်ဦးတွင် ထိုမျှကြီးမားသောစွမ်းအား မရှိနိုင်သော်လည်း သူတို့၏ စည်းမျဉ်းစွမ်းအားမှာ ကျန်းချန်ထက် ဆယ်ဆမကသာလွန်ပေလိမ့်မည်။

သူတော်စင်နယ်မြေများပျက်စီးသွားသည်နှင့် ကျန်းချန်သည် တိုက်စစ်ကိုအရှိန်မြှင့်လိုက်သည်။ ချန်းလီဓား၏စွမ်းအားကို အပြည့်အဝထုတ်ဖော်လိုက်တော့သည်။ ၎င်းသည် သူတော်စင်အဆင့်လက်နက်တစ်ခုဖြစ်ရာ ၎င်းကပေးသောစွမ်းအားမြှင့်တင်မှုမှာ အလွန်အစွမ်းထက်၏။

ဓားကို တစ်ချက်ဝှေ့ယမ်းလိုက်ရုံဖြင့် ကောင်းကင်မီးတောက်များသည် ဟင်းလင်းပြင်နယ်မြေကိုဖြတ်တောက်သွားပြီး အန္တရာယ်ရှိသောလေပြင်းများကို ဖန်တီးလိုက်သည်။

"ဒီဓားချက်က ငါတို့ကိုတောင်ခြိမ်းခြောက်နိုင်နေပြီ"

"သူ့မှာ သူတော်စင်အဆင့်လက်နက် ရှိနေတာလား"

"သူတော်စင်အဆင့်လက်နက်တင် မဟုတ်ဘူး၊ သူကိုယ်တိုင်က ဒီဓားသိုင်းကို ပြီးပြည့်စုံခြင်းအဆင့်အထိ ကျင့်ကြံထားပြီးသားပဲ"

"တခြားနယ်မြေတစ်ခုမှာ ဒီလိုဓားကျင့်ကြံသူတစ်ယောက်ရှိနေလိမ့်မယ်လို့ ငါတစ်ခါမှမတွေးဖူးဘူး"

ဓားနယ်မြေမှလူများ၏မျက်လုံးများ တောက်ပလာသည်။ သူတို့သည် နတ်ဘုရားဝိညာဉ်ဖြင့် ဆွေးနွေးနေစဉ်မှာပင် ဝိညာဉ်အရှင်သုံးဦးသည် သူတို့၏သားရဲဝိညာဉ်များကိုအသုံးပြုကာ ကျန်းချန်ကိုတိုက်ခိုက်ရန် ပြင်ဆင်လိုက်ကြသည်။

ဟင်းလင်းပြင်အတွင်း၌ နဂါးခေါင်းပုံရိပ်ယောင်ကြီးမှာ ကြမ်းတမ်းစွာဟိန်းဟောက်လိုက်ပြီး ကောင်းကင်တစ်ခုလုံးကိုလွှမ်းခြုံကာ ပတ်ဝန်းကျင်ရှိ ကောင်းကင်မီးတောက်များကို ဖယ်ရှားပစ်လိုက်၏။ ဝံပုလွေသားရဲ၏အူသံကြောင့် အရှင်မြတ်အဆင့်ကျင့်ကြံသူများစွာမှာ စိတ်ဝိညာဉ်ချောက်ချားသွားရပြီး အပြင်ဘက်မှလေပြင်းများမှာလည်း ထိုအသံကြောင့် ရစ်ဝဲလာတော့သည်။

သူတို့၏ နတ်ဘုရားဝိညာဉ်များမှာ ခဏချင်းအတွင်း ဝါးမျိုခံရတော့မည့်အလား ခံစားလိုက်ရသည်။ နွားသိုးခေါင်းပုံရိပ်မှာမူ မဖျက်ဆီးနိုင်သော ဧရာမစစ်ရထားကြီးကဲ့သို့ ဖြစ်နေပြီး ဓားအလင်းနှင့် ကောင်းကင်မီးတောက်များမှာ ၎င်းနှင့်ထိတွေ့သည်နှင့် ပျောက်ကွယ်ကုန်ကြသည်။

ထိတ်လန့်ဖွယ်ရာ အငွေ့အသက်များပါရှိသည့် ထိုသားရဲဝိညာဉ်သုံးခုမှာ ကျန်းချန်နှင့် မထိတွေ့မီမှာပင် ရပ်တန့်သွား၏။ ကျန်းချန်၏နတ်ဘုရားဝိညာဉ်ထွက်ပေါ်လာပြီး ဟင်းလင်းပြင်တစ်ခုလုံးကို လွှမ်းမိုးထားသော ဧရာမလက်ကြီးသုံးခုအဖြစ် ပြောင်းလဲသွားသည်။

ကောင်းကင်ယံမှ လက်သီးတစ်ချက် ကျဆင်းလာသည်။ မိုးပြာနဂါးမျိုးဆက်သွေးမှ ထွက်ပေါ်လာသောဖိအားသည် နဂါးခေါင်းသားရဲဝိညာဉ်ကို အပေါ်မှနေ၍နှိမ်နင်းလိုက်ရာ ၎င်း၏ဟိန်းဟောက်သံမှာ ရပ်တန့်သွား၏။ နဂါးခေါင်းသားရဲဝိညာဉ်သည် ရုန်းကန်နေသော်လည်း လုံးဝမလှုပ်နိုင်တော့ချေ။

လက်ဝါးတစ်ဖက်က ရှေ့မှနေ၍ဆီးကြိုလိုက်ရာ အတားအဆီးအားလုံးကို ဖောက်ထွက်နိုင်မည့်ပုံစံရှိသော နွားသိုးခေါင်းသားရဲဝိညာဉ်မှာ ဝုန်းခနဲမြည်သံနှင့်အတူ နောက်သို့လွင့်ထွက်သွားသည်။ ထိုဧရာမလက်ဝါးကြီးမှာ ရုတ်တရက်ဆုပ်ကိုင်လိုက်ရာ အနက်ရောင်လှောင်အိမ်ကြီးတစ်ခု ပေါ်လာတော့သည်။ နွားသိုးခေါင်းသားရဲဝိညာဉ်မှာ မည်မျှပင်တိုက်ခိုက်ရုန်းကန်သော်လည်း ထိုလှောင်အိမ်ထဲမှ မလွတ်မြောက်နိုင်တော့ချေ။

လက်ညှိုးတစ်ချောင်းညွှန်ပြလိုက်ရာ စိမ်းပြာရောင်မြူခိုးများပျံ့လွင့်သွားပြီး ဝံပုလွေသားရဲဝိညာဉ်ကို လွှမ်းခြုံသွား၏။ ထို့နောက်တွင် ဝံပုလွေသားရဲဝိညာဉ်မှာ သိသိသာသာအားနည်းသွားပြီး ၎င်း၏အူသံမှာလည်း ယခင်ကဲ့သို့အားမရှိတော့ကြောင်း လူတိုင်းတွေ့မြင်လိုက်ရသည်။

အရှင်မြတ်အဆင့်နှင့် သူတော်စင်အဆင့်တို့ကြား နတ်ဘုရားဝိညာဉ်ချင်းယှဉ်ပြိုင်မှုတွင် အရှင်မြတ်အဆင့်ကအသာစီးရနေပြီလော။ ထို့အပြင် သုံးယောက်တစ်ယောက်ဖြစ်၏။

နယ်မြေအသီးသီးမှလူများသာမက မိုချန်ပင်လျှင် ယခုတစ်ကြိမ်တွင် အံ့ဩသွားရသည်။ ဂိုဏ်းချုပ်သည် သူ၏သိုင်းတာအိုအဆင့်ကိုသာမြှင့်တင်ခဲ့ခြင်း မဟုတ်လော၊ သူ၏နတ်ဘုရားဝိညာဉ်က အဘယ်ကြောင့်ကြောင့် ဤမျှထူးခြားနေရသနည်း။

သူမသိခဲ့သည်မှာ ဝိညာဉ်တစ်သိန်းဖြင့်သွန်းလုပ်ထားသော သူတော်စင်ဝိညာဉ်မှာ အရည်အသွေးအလွန်မြင့်မားပြီး ထာဝရအဆင့်ကိုပင် ကျော်လွန်နေခြင်းဖြစ်သည်။ ထို့ကြောင့် ပိဖုန်းပင်လျှင် ကျန်းချန်၏ဝိညာဉ်ကို မနှိမ်နင်းနိုင်ခဲ့ပေ။ ယခုကျန်းချန်သည် ထိုဝိညာဉ်ကို သူတော်စင်အဆင့်အလယ်ပိုင်းအထိ မြှင့်တင်ထားပြီးဖြစ်သည်။

၎င်းပြင် မိုးပြာနဂါးမျိုးဆက်သွေး၊ အဆိပ်သူရဲကောင်းဝိညာဉ်နှင့် အကျဉ်းထောင်ဝိညာဉ်တို့ ပေါင်းစပ်လိုက်သောအခါ...

အဆင့်အတန်း၊ ဖိအားနှင့် နည်းလမ်းများအရ ဤဝိညာဉ်အရှင်သုံးဦးသာမက သူတော်စင်အဆင့် အထွတ်အထိပ်တစ်ဦးပင်လျှင် နတ်ဘုရားဝိညာဉ်ချင်းယှဉ်ပြိုင်မှုတွင် ကျန်းချန်ကိုယှဉ်နိုင်မည် မဟုတ်တော့ချေ။

သူတို့သည် သားရဲဝိညာဉ်စွမ်းအားကိုကျင့်ကြံသူများဖြစ်ကြရာ သားရဲဝိညာဉ်များအဖမ်းခံလိုက်ရသည်နှင့် သူတို့၏ခွန်အားမှာ အောက်ဆုံးသို့ ကျဆင်းသွား၏။ သူတို့သုံးဦးစလုံး အလွန်ထိတ်လန့်သွားကြပြီး ကျန်းချန်ကို အနီးကပ်တိုက်ခိုက်ရန် ပြေးဝင်လာကြသည်။

သို့သော် ဂိုဏ်းချုပ်ကျန်းမှာ သူတို့၏တိုက်ကွက်များကို ရှောင်တိမ်းရန်အစီအစဉ်မရှိဘဲ ဓားကိုကိုင်စွဲကာ သူကိုယ်တိုင်ပင် အရင်ဆုံးတိုးဝင်တိုက်ခိုက်လိုက်သည်ကို မြင်လိုက်ရသည်။

ဒါက အရမ်း.. အရမ်း ထောင်လွှားလွန်းတာ မဟုတ်ဘူးလား...

ဤအတွေးမှာ လူတိုင်း၏ခေါင်းထဲ၌ တစ်ပြိုင်နက်ပေါ်လာတော့သည်။ မည်သို့ပင်ဖြစ်စေ သူတော်စင်အဆင့်မှာ သူတော်စင်အဆင့်ပင်။

သူတော်စင်ခန္ဓာ၏ခိုင်ခံ့မှုနှင့် ၎င်းတွင်ရှိသည့်ကြီးမားလှသောစွမ်းအားမှာ အရှင်မြတ်အဆင့် ကျင့်ကြံသူတစ်ဦးနှင့် နှိုင်းယှဉ်၍ရနိုင်သောအရာမဟုတ်ပေ။