ကောင်းကင်ဘုံကပေးသော အခွင့်အရေး

ဓားကျင့်ကြံသူအများစုသည် အရိုးထဲအထိမာန်မာနကြီးကြသူများဖြစ်သည်။

သူတော်စင် ၁၄ ဦးအထိပိုင်ဆိုင်ပြီး အောက်လောကနယ်မြေတစ်သောင်းထဲတွင် အဆင့်အတန်းမြင့်မားသော ထျန်ရှုနယ်မြေပင် ဓားနယ်မြေနှင့် စကားတစ်ခွန်းပြောခွင့်ရရန် မလွယ်ကူခဲ့ချေ။ သို့သော် ယခုမူ ကျန်းချန်သည် ဓားနယ်မြေ၏ထိပ်သီးပုဂ္ဂိုလ်ထံမှ ကိုယ်တိုင်ကိုယ်ကျဖိတ်ခေါ်မှုကိုရရှိခဲ့သည်။

ဤသို့သောဆက်ဆံမှုမျိုးမှာ သူတစ်ဦးတည်းရသည့်အခွင့်အရေးပင်။ သို့သော် အစ်ကိုကြီးချန်ကတော့ စဉ်းစားမနေဘဲငြင်းပယ်လိုက်သည်။

"လေးစားအပ်တဲ့ ဓားသူတော်စင်ကြီးကို ကျေးဇူးတင်ပါတယ်... ဒါပေမဲ့ ဟင်းလင်းပြင်အင်မော်တယ်နယ်မြေရဲ့အခြေအနေက မသေချာသေးတော့ ကျွန်တော် ကိုယ့်ဘာသာကိုယ်ပဲစူးစမ်းချင်ပါတယ်"

လူများစွာမှာ ကျန်းချန်က ဤကဲ့သို့သော အားကိုးရာကြီးကို အဘယ်ကြောင့်ငြင်းပယ်လိုက်ရသလဲ နားမလည်နိုင်ကြ။ သို့သော် အစ်ကိုကြီးချန်တွင် ကိုယ်ပိုင်အစီအစဉ်ရှိသည်။

ရွှမ်ကျီရုပ်ပုံထဲမှ တပည့်များကိုနေ့စဉ်ခေါ်ထုတ်ပြီး ပါရမီမြှင့်တင်ပေးရန်အတွက် အခြားသူများ၏ စောင့်ကြည့်ခြင်းမခံသောနေရာမှာ အကောင်းဆုံးမဟုတ်ပါလား။

ကွေ့ဇန်း ဓားသူတော်စင်ကလည်း အတင်းအကျပ်မတိုက်တွန်းခဲ့ပေ။

"ဒါဆိုရင် နောက်မှပြန်ဆုံကြတာပေါ့... အင်မော်တယ်လောကမှာ ပြန်ဆုံနိုင်ပါစေလို့ ဆုတောင်းလိုက်ပါတယ်"

ထိုသို့ပြောပြီးနောက် သူသည် ဓားနယ်မြေမှကျွမ်းကျင်သူ ၃၀၀ ကို ဦးဆောင်ကာ လျင်မြန်စွာ ထွက်ခွာသွားတော့သည်။ သူတို့ထွက်သွားသည်နှင့် အခြားနယ်မြေမှအဖွဲ့အစည်းများမှာလည်း အရပ်ရပ်သို့လူစုခွဲသွားကြ၏။

ဤဟင်းလင်းပြင်အင်မော်တယ်နယ်မြေအကြောင်းကို မည်သူမျှမသိကြ။ လန်ယီပင်လျှင် ဘာမှမသိဘဲ အင်မော်တယ်လောကသို့သွားမည့်လမ်းကြောင်းမှာ ဘယ်နေရာမှာရှိမှန်း မည်သူမျှမသိပေ။ ၎င်းမှာ သူတို့ရင်ဆိုင်နေရသော အကြီးမားဆုံးအတားအဆီးပင်။ လောလောဆယ်တွင်မူ သူတို့၏ဗီဇနှင့် အခွင့်အရေးအပေါ်တွင်သာ အားကိုးရပေမည်။

ကျန်းချန်ကတော့ ထိုအကြောင်းတွေကို သိပ်စဉ်းစားမနေဘဲ အောင်ပွဲရပစ္စည်းများကိုစစ်ဆေးရန်သာ အလုပ်ရှုပ်နေသည်။ ရလဒ်ကတော့ သူ့ကိုစိတ်ပျက်စေခဲ့သည်... ဝိညာဉ်ကျောက်တုံးများမရှိ၊ ဆေးလုံးများမရှိဘဲ ကောင်းကင်နှင့်မြေကြီး ရတနာအချို့သာပါဝင်သည်။ ကျန်သောပစ္စည်းအများစုမှာ သားရဲဝိညာဉ်ကျင့်ကြံရန်အတွက် ရွှမ်လင်နယ်မြေမှပစ္စည်းများဖြစ်ရာ သူ့အတွက်အသုံးမဝင်ချေ။

ကံကောင်းသည်မှာ စနစ်က ထိုပစ္စည်းများကိုလဲလှယ်ပေးနိုင်ပြီး အသုံးမလိုသောပစ္စည်းများမှာ အမှတ်များဖြစ်လာသည်။ မည်သို့ပင်ဆိုစေ သူတော်စင်အဆင့်ကျွမ်းကျင်သူများ စုဆောင်းထားသောပစ္စည်းများမှာ နယ်မြေတစ်ခု၏ အကောင်းဆုံးရတနာများသာ။ လဲလှယ်မှု တစ်ကြိမ်ပြုလုပ်ပြီးနောက်တွင် ကျန်းချန်မှာ အမှတ် ၁.၂ ဘီလီယံ ထပ်မံရရှိသွားသည်။

သူအလုပ်ပြီးသွားသည့်အခါမှသာ မိုချန်က အံ့ဩစရာသတင်းတစ်ခုကို ပြောလိုက်သည်။

"ကျွန်တော် ဒီနေရာကို အရင်ကရောက်ဖူးတယ်"

"ဘာ"

လူတိုင်း မှင်တက်သွားကြသည်။

မျက်စိသုံးလုံးကျားကတော့ လုံးဝမယုံပေ။

"အဘိုးကြီးမို... လေကြီးမနေနဲ့။ ခင်ဗျားက သွေးပြောင်းလဲခြင်းဓားထဲမှာပဲ အောင်းနေတာလေ... ဟင်းလင်းပြင်အင်မော်တယ်နယ်မြေကို ဘယ်လိုလုပ်ရောက်ဖူးမှာလဲ"

"မင်းလိုကျားနတ်ဆိုးက ဘာနားလည်မှာလဲ"

မိုချန်က သူ့ကို အထင်သေးစွာကြည့်လိုက်ပြီးနောက် တည်ငြိမ်သောအမူအရာသို့ ပြောင်းလိုက်သည်။

"ဂိုဏ်းချုပ်... ကျွန်တော် အရင်ကပြောဖူးတဲ့ အင်မော်တယ်တွေနဲ့ နတ်ဆိုးတွေရဲ့စစ်ပွဲကို မှတ်မိလား"

ကျန်းချန်မှတ်မိသွားသည်။ ထိုလူအိုကြီးကို သူနှိမ်နင်းခဲ့စဉ်က ထိုအကြောင်းပြောခဲ့ဖူးသည်။ ထိုစဉ်က သူစိတ်မဝင်စားသဖြင့် အသေးစိတ်မမေးခဲ့။

"အင်မော်တယ်ကျင့်ကြံသူတွေနဲ့ နတ်ဆိုးကျင့်ကြံသူတွေဟာ ကွဲပြားတဲ့လမ်းစဉ်နှစ်ခုဖြစ်ခဲ့ပေမဲ့ နောက်ဆုံးမှာတော့ ပြန်လည်စေ့စပ်လို့မရတဲ့ရန်သူတွေ ဖြစ်သွားကြတယ်။ ဒီနေရာဟာ အဲဒီတုန်းက တိုက်ပွဲဖြစ်ခဲ့တဲ့ စစ်မြေပြင်ပဲ"

"ဒီလောက်တောင် တိုက်ဆိုင်တာလား"

အဖွဲ့ထဲတွင် လန်ယီမှာ လက်ခံရန်အခက်ခဲဆုံးဖြစ်နေသည်။

"ဟင်းလင်းပြင်အင်မော်တယ်နယ်မြေက စစ်မြေပြင်ဖြစ်နေတာလား... ဒါဆို ငါတို့ရဲ့ အင်မော်တယ်ဘိုးဘေး ၉ ယောက်က ဘာလို့ ဒီကနေတဆင့် အောက်လောကကိုဆင်းလာတာလဲ။ ပြီးတော့ ရှင်တို့ရဲ့စစ်ပွဲက အင်မော်တယ်လောကမှာဖြစ်ခဲ့တာ မဟုတ်ဘူးလား"

မိုချန်က တည်ငြိမ်စွာပြောလိုက်သည်။

"စစ်ပွဲက အင်မော်တယ်လောကမှာဖြစ်ခဲ့တာ မှန်ပါတယ်... ကမောက်ကမဖြစ်နေတဲ့ အလယ်ပိုင်းပျက်စီးခြင်းမြေမှာပေါ့"

လိပ်နက်ဘုရင်က စူးစမ်းစွာမေးလိုက်သည်။

"အဲဒီ ပျက်စီးခြင်းမြေဆိုတာက ဘာလဲ"

"အဲဒါက စည်းမျဉ်းတွေရှုပ်ထွေးနေတဲ့နေရာတစ်ခုပဲ။ အင်မော်တယ်တွေတောင် အဲဒီမှာ အကြာကြီးမနေနိုင်ကြဘူး"

ကျန်းချန်က ဇဝေဇဝါဖြစ်သွားသည်။

"အင်မော်တယ်လောကရဲ့ဗဟိုချက်က ဘယ်လိုလုပ်ပြီး အောက်လောကဆီကိုလွင့်ကျလာရတာလဲ"

မိုချန်က မျက်ခုံးနှစ်ဖက်ကိုတွန့်ကာ အချိန်အတော်ကြာစဉ်းစားပြီးနောက် သက်ပြင်းချလိုက်သည်။

"ကျွန်တော် သေချာပေါက်ပြောနိုင်တာကတော့ ဒီဟင်းလင်းပြင်အင်မော်တယ်နယ်မြေဟာ အထက်လောကက ထိပ်သီးပုဂ္ဂိုလ်တွေပူးပေါင်းပြီး ဖန်တီးထားတာပဲ။ သူတို့က ပျက်စီးခြင်းမြေကို နစ်မြုပ်စေခဲ့ပြီး အင်မော်တယ်လောကနဲ့ အောက်လောကကြားမှာ ညှပ်ထားလိုက်တယ်။ ဒါက သဘာဝစည်းမျဉ်းတွေကိုနှောင့်ယှက်ပြီး အောက်လောကကျင့်ကြံသူတွေရဲ့ အင်မော်တယ်လောကသို့ တက်လှမ်းမယ့်လမ်းကို ဖြတ်တောက်လိုက်တာပဲ"

မျက်စိသုံးလုံးကျားက သူ၏အမွှေးများကိုကုတ်ရင်း ခပ်ပေါ့ပေါ့မေးလိုက်သည်။

"ဒါဆို ဒီကနေ အထက်ကိုဘယ်လိုတက်ရမလဲဆိုတာသိလား"

"မသိဘူး"

"ဒါဆို ဒါတွေပြောနေတော့ ဘာထူးမှာလဲ"

မိုချန်မှာ ဒေါသထွက်လွန်းသဖြင့် သွေးအန်ချင်သွားသည်။

"ပျက်စီးခြင်းမြေဆိုတာ တက်လှမ်းရာလမ်းကြောင်းမဟုတ်ခဲ့ဖူးဘူး... ဘယ်လိုလုပ်တက်လမ်းရှိမှာလဲ"

ကျန်းချန် မျက်မှောင်ကြုတ်လိုက်သည်။

"ဒါဆို ငါတို့က ဒီလောက်ဝေးဝေးကို အလကားလာခဲ့ကြတာလား"

"မဟုတ်သေးပါဘူး"

မိုချန်က လေသံပြောင်းလိုက်သည်။

"ဒါက တက်လှမ်းရာလမ်းကြောင်းမဟုတ်ပေမဲ့ အင်မော်တယ်လောကထဲကိုဝင်ဖို့ အခွင့်အရေးရှိနိုင်ပါသေးတယ်။ အဲဒီတုန်းက အင်မော်တယ်ဘက်ကော နတ်ဆိုးဘက်ကောက ဒီပျက်စီးခြင်းမြေထဲမှာ ယဇ်ပလ္လင်တွေတည်ခဲ့ကြတယ်။ အဲဒီယဇ်ပလ္လင်တွေကို ရှာတွေ့ရင်တော့ အလှည့်အပြောင်းတစ်ခုရှိလာနိုင်တယ်"

မျက်စိသုံးလုံးကျားက ထပ်ပက်ပြန်သည်။

"နှစ်ပေါင်းသန်းနဲ့ချီကြာသွားပြီပဲ... အဲဒီယဇ်ပလ္လင်တွေက ဘယ်မှာကျန်တော့မှာလဲ"

မိုချန်ကမအောင့်နိုင်တော့ဘဲ ဟောက်လိုက်တော့သည်။

"ဘာမှမသိရင် ပါးစပ်ပိတ်ထားစမ်း... အင်မော်တယ်ဧကရာဇ်တွေနဲ့ နတ်ဆိုးဧကရာဇ်တွေရဲ့ နည်းလမ်းက မင်းလိုပုရွက်ဆိတ်တစ်ကောင် နားလည်နိုင်တဲ့အရာမဟုတ်ဘူး"

ကျန်းချန်က လက်ယမ်းပြကာတားလိုက်သည်။

"အဲဒီယဇ်ပလ္လင်ဘယ်မှာရှိလဲသိလား"

"ကျွန်တော်တို့ရဲ့ လက်ရှိတည်နေရာကို အရင်အတည်ပြုပြီးမှ တွက်ချက်ရမှာပါ"

"ကောင်းပြီ... အေးအေးဆေးဆေး တွက်ချက်လိုက်ဦး"

ကျန်းချန်သည် တိုက်ပွဲတိုက်ပြီး၍ပင်ပန်းနေသဖြင့် လိပ်ကျောပေါ်တွင် အိပ်စက်ရန်ပြင်ဆင်လိုက်သည်။

မိုချန်ကထပ်ပြော၏။

"အမှန်တော့ ဖေးရှန်ဂိုဏ်းကလူတိုင်းအတွက် ဒီဟင်းလင်းပြင်အင်မော်တယ်နယ်မြေဟာ ကောင်းကင်ဘုံကပေးတဲ့အခွင့်အရေးပဲ"

"အို... ဘာအခွင့်အရေးလဲ၊ မြန်မြန်ပြောပါဦး အကြီးအကဲမို"

မျက်စိသုံးလုံးကျားက အဘိုးကြီးမိုမှ အကြီးအကဲမိုဟု ချက်ချင်းပင် နာမည်ပြောင်းခေါ်လိုက်သည်။

မိုချန်က သူ့ကိုတစ်ချက်ကြည့်လိုက်ပြီး ဤကျားကိုပြောပြမိသည်ကို နောင်တရသွားသည်။ သို့သော် ဂိုဏ်းချုပ်၏ရှေ့တွင် ဟန်ထုတ်ရန်ပိုအရေးကြီးသည်။

"အဲဒီတုန်းက မရေမတွက်နိုင်တဲ့ အင်မော်တယ်တွေနဲ့ နတ်ဆိုးတွေ ဒီနေရာမှာသေဆုံးခဲ့ကြတယ်။ သူတို့ရဲ့ သွေးငွေ့တွေက အခုထိကျန်ရှိနေသေးတယ်။ တကယ်လို့ တစ်ယောက်ယောက်က အဲဒီသွေးငွေ့တွေရဲ့စမ်းသပ်မှုကို ခံနိုင်ရည်ရှိမယ်ဆိုရင် လျှပ်စီးကပ်ဘေးမလိုဘဲ နတ်ဆိုးခန္ဓာကိုယ်ကို ဖွဲ့စည်းနိုင်မယ့်အခွင့်အရေးရှိတယ်"

နတ်ဆိုးခန္ဓာကိုယ်သည် အင်မော်တယ်ခန္ဓာကိုယ်နှင့် အဆင့်အတန်းတူညီ၏။ ၎င်းကိုရရှိခြင်းမှာ အင်မော်တယ်ဖြစ်ရန် ခြေတစ်လှမ်းသာလိုတော့သည်ဟု ဆိုလိုသည်။

"တကယ်တော့ ရှေးဟောင်းစစ်မြေပြင်တွေဟာ နတ်ဆိုးကျင့်ကြံသူတွေအနှစ်သက်ဆုံး ကျင့်ကြံရာနေရာတွေပဲ။ ပြီးတော့ ဒီစစ်မြေပြင်ကအကြီးဆုံးပဲ... ဒီမှာသွန်းလုပ်တဲ့ နတ်ဆိုးခန္ဓာကိုယ်ဟာ အမြင့်မြတ်ဆုံးအရည်အသွေးဖြစ်လိမ့်မယ်"

ကျန်းချန်နှင့် မျက်စိသုံးလုံးကျားတို့ လိပ်ခွံပေါ်မှာ အကြည့်ချင်းဆုံလိုက်ကြသည်။

"ခင်ဗျားက နတ်ဆိုးကျင့်ကြံသူမဟုတ်လား... ဒါတွေ ဘယ်လိုသိနေတာလဲ"

"နတ်ဆိုးခန္ဓာကိုယ်နဲ့ အင်မော်တယ်ခန္ဓာကိုယ်က ဘာကွာလို့လဲ"

ကျန်းချန်အတွက်တော့ အင်မော်တယ်ဖြစ်ဖြစ် နတ်ဆိုးဖြစ်ဖြစ် ဘာမှမကွာခြားပေ။ လမ်းကြောင်းချင်းသာ ကွဲပြားခြင်းဖြစ်သည်။ မိုချန်ကို ကြည့်ပါဦး... မြင့်မြတ်နယ်မြေက လူတွေထက်တောင် ပိုပြီးပုံမှန်ဖြစ်နေသေးသည်။

"အင်မော်တယ်ကျင့်ကြံသူတွေက နတ်ဘုရားဝိညာဉ်ကို အလေးထားပြီး နတ်ဆိုးကျင့်ကြံသူတွေကတော့ ကိုယ်ခန္ဓာကြံ့ခိုင်မှုကို အဓိကထားတယ်။ အင်မော်တယ်ခန္ဓာကိုယ်က ဝိညာဉ်ကျင့်ကြံမှုကိုအားပေးပြီး နတ်ဆိုးခန္ဓာကိုယ်ကတော့ အနီးကပ်တိုက်ခိုက်မှုမှာအားသာတယ်"

"ဒါဆို ဘာစောင့်နေတာလဲ... လုပ်ကြတာပေါ့..."

ထိုစကားကိုကြားသည်နှင့် မျက်စိသုံးလုံးကျားမှာ ဟိန်းဟောက်လိုက်ပြီး အရိုးချေဖျက်အလံ၏ အကာအကွယ်အောက်မှ ပျံထွက်သွားတော့သည်။ သူတော်စင်ခန္ဓာမှ နတ်ဆိုးခန္ဓာကိုယ်သို့ ပြောင်းလဲခြင်းမှာ အကြီးမားဆုံးခုန်ပျံကျော်လွှားမှုပင်။ ကျန်းချန်က သူတော်စင်အဆင့်သုံးဦးကို အလွယ်တကူသတ်ဖြတ်နိုင်ခြင်းမှာ အင်မော်တယ်ခန္ဓာကိုယ်ကြောင့်ဖြစ်မှန်း သူသိထားသဖြင့် ထိုစွမ်းအားမျိုးကိုရချင်နေသည်။

မကြာမီမှာပင် သူ၏စိတ်လှုပ်ရှားမှုများမှာ အော်ဟစ်သံများဖြစ်သွားတော့သည်။ သူတော်စင်တစ်ဦးဖြစ်သဖြင့် သူ၏သူတော်စင်နယ်မြေက ရှုပ်ထွေးသောစည်းမျဉ်းများနှင့် သွေးငွေ့ဒဏ်ကို ကာကွယ်ပေးထားသည်။ နတ်ဆိုးခန္ဓာကိုယ်ကို ရယူရန်အတွက်မူ သူ၏နယ်မြေကိုပြန်ရုပ်သိမ်းပြီး ဟင်းလင်းပြင်အင်မော်တယ်နယ်မြေ၏ ကြမ်းတမ်းသောပတ်ဝန်းကျင်ကို တိုက်ရိုက်ရင်ဆိုင်ရပေမည်။

ဤနေရာတွင် တာအိုနန်းတော်အဆင့်ကျင့်ကြံသူတစ်ဦးဆိုလျှင် ချက်ချင်းသေဆုံးပေလိမ့်မည်။ အရှင်မြတ်အဆင့်၏နယ်မြေမှာလည်း အကြာကြီးခံမည်မဟုတ်။ ယခုအခါ ဘာအကာအကွယ်မှမရှိဘဲ ရင်ဆိုင်ရသဖြင့် သူ၏နာကျင်မှုမှာ ဖော်ပြ၍ပင်မရနိုင်တော့ချေ။

ကျားကြီးတစ်ကောင် မြေပြင်ပေါ်မှာလူးလိမ့်နေပြီး သူ၏ဖြူဖွေးသောအမွှေးများမှာ သွေးများဖြင့်ရဲရဲနီသွားသည်ကိုမြင်သောအခါ အစ်ကိုကြီးချန်မကြည့်ရက်တော့ပေ။ စမ်းကြည့်ချင်နေသောလိပ်နက်ဘုရင်မှာလည်း ထိုမြင်ကွင်းကြောင့် ချက်ချင်းနောက်ဆုတ်သွားတော့သည်။