ရုန်းရင်းဆန်ခတ် အခြေအနေ

ထိုစကားကို ကြားသောအခါ လျူရှောင်ရူသည် အလွန် ရှက်ရွံ့သွားသည်။

ကျန်းယွင်နန်သည် သူမ၏ လက်ဖမိုးကို ညင်သာစွာ ပုတ်ပေးပြီး တံမြက်စည်းတစ်ချောင်း ကမ်းပေးလိုက်သည်။

"မကြောက်နဲ့... နင် သူ့ကို နိုင်အောင် ရိုက်နိုင်တယ်... နင့်ယောကျ်ားက ဂုဏ်သိက္ခာကို တန်ဖိုးထားတဲ့ပုံပဲ... သူတို့နှစ်ယောက်ပေါင်းပြီး တိုက်ခိုက်လာရင် ခြံဝင်းထဲကို ပြေးထွက်လိုက်... အသံကျယ်ကျယ် အော်လေ သူ ဝင်မပါရဲလေပဲ"

လျူရှောင်ရူ စိတ်သက်သာရာ ရသွားသည်။ သူမ တံမြက်စည်းကို ယူလိုက်ပြီး အံကြိတ်ကာ အပြင်ထွက်သွားလေသည်။

စောစောက လျူရှောင်ရူ၏ ပုံမှန်မဟုတ်သော အမူအရာကို ကျန်းယွင်နန် သတိထားမိသောအခါ ကုမင်တာ့ ကို နျိုနျို့အား ခြံဝင်းထဲသို့ ခေါ်သွားခိုင်းခဲ့သည်။ နျိုနျိုက ကုမင်တာ့ ကို မေးနေဆဲဖြစ်သည်။

"အဖေ... မိန်းမပျက် ဆိုတာ ဘာလဲဟင်"

ကုမင်တာ့ စိတ်ပျက်သွားသည်။ ဆဲဆိုနေဆဲဖြစ်သော အဖွားကြီးဝမ်ကို မကျေမနပ် ကြည့်လိုက်ပြီး သမီးဖြစ်သူကို ညင်သာစွာ ပြောလိုက်သည်။

"အဲ့ဒါ ဆဲတာလေ... နျိုနျို... အဲ့လို မပြောရဘူးနော်"

နျိုနျို ခေါင်းညိတ်လိုက်ပြီး နားလည်သလိုလိုဖြင့် ပြောလိုက်သည်။

"အဲ့ဒီအဘွားကြီးက လူဆိုးပဲ"

လျူရှောင်ရူ အသည်းအသန် ငိုကြွေးနေသည်ကို သတိရပြီး ကုမင်တာ့ က သမီးဖြစ်သူ၏ ခေါင်းကို ပုတ်ပေးကာ ပြောလိုက်သည်။

"နျိုနျိုက တော်လိုက်တာ... လူကြီးတွေကိုတောင် ကူညီပေးတတ်နေပြီ"

ထိုစကားကို ကြားသောအခါ နျိုနျို ဂုဏ်ယူသွားသည်။ တုတ်ချောင်းတစ်ချောင်း ကောက်ကိုင်လိုက်ပြီး ပြောလိုက်သည်။

"သမီးက လူဆိုးတွေကိုတောင် ကူရိုက်ပေးနိုင်တယ်... အဲ့ဒီအဘွားကြီး အဒေါ့်ကို မဆဲစေရဘူး"

ပြောပြီးသည်နှင့် ခါးလောက်သာ မြင့်သော ကလေးမလေးသည် တုတ်ချောင်းကို ကိုင်ပြီး အဖွားကြီးဝမ်ကို ရိုက်ရန် ပြေးထွက်သွားလေသည်။

ကုမင်တာ့ က သူမ၏ခါးကို အမြန်ဖမ်းဆွဲလိုက်ပြီး တင်းကြပ်စွာ ပွေ့ဖက်ထားလိုက်သည်။

"သမီးလေး... သမီးအရပ်က ဘယ်လောက်ရှိလို့လဲ... အခုကတည်းက လူဆိုးတွေကို သွားတိုက်ခိုက်တော့မလို့လား"

နျိုနျိုသည် အမြဲတမ်း လိမ္မာသည်။ အတားခံလိုက်ရသောအခါ မရုန်းကန်တော့ဘဲ မျက်နှာငယ်လေးဖြင့် ပြောလိုက်သည်။

"ဒါဆို ကြီးလာတဲ့အထိ စောင့်လိုက်ပါ့မယ်"

ကုမင်တာ့ အသံထွက်အောင် ရယ်မောလိုက်မိသည်။ သမီးလေး၏ ချစ်စရာကောင်းပြီး နူးညံ့သော အမူအရာကြောင့် နှလုံးသား အရည်ပျော်သွားသလို ခံစားလိုက်ရသည်။

"သမီးလေးက အရမ်းတော်တာပဲ"

ဘေးတွင် ရပ်နေသော ကုကျောက်သည် ဖခင်နှင့် ညီမဖြစ်သူကို ကြည့်လိုက်သည်။ ညီမလေးလက်ထဲမှ တုတ်ချောင်းကို ဆွဲယူလိုက်ပြီး ပြောလိုက်သည်။

"သားက ယောကျ်ားလေးလေ... သားက ပိုတော်တယ်... အဖေ... သားကို ချီးကျူးပါဦး"

သို့သော် ခြေလှမ်းအနည်းငယ် လှမ်းလိုက်သည်နှင့် ကုမင်တာ့ က သူ့ကို ဆွဲပြန်ခေါ်လိုက်သည်။

သမီးဖြစ်သူက ချစ်စရာကောင်းအောင် ပြောခြင်းဖြစ်၍ ကုမင်တာ့ က နူးညံ့စွာ ဆက်ဆံသော်လည်း သားဖြစ်သူက ဆိုးသွမ်းနေခြင်းဖြစ်၍ ရိုးရှင်းကြမ်းတမ်းစွာ ဆက်ဆံလိုက်၏။

ကော်လာကို ဆွဲမလိုက်သဖြင့် ကုကျောက်၏ လည်ပင်း နီရဲသွားပြီး ခြေထောက်များ ယက်ကန်ယက်ကန် ဖြစ်ကာ လေထဲတွင် တွဲလောင်းပါသွားသည်။

ကလေးနှစ်ယောက် ဝင်ရောက်ကူညီခြင်း မရှိသော်လည်း သူတို့၏ လုပ်ရပ်ကြောင့် အဖွားကြီးဝမ်၏ ဆဲဆိုသံများ ရပ်တန့်သွား၏။

ကျန်းယွင်နန်၏ မူလရည်ရွယ်ချက်မှာ လျူရှောင်ရူအား ပြန်လည်ခုခံရန်နှင့် အမြဲတမ်း ငြိမ်ခံမနေရန် သတိပေးလိုခြင်းပင်။

သို့သော် လူတိုင်း အံ့သြသွားသည်မှာ တံမြက်စည်းကိုင်ပြီး ထွက်လာသော လျူရှောင်ရူသည် အဖွားကြီးဝမ်ကို မြင်သည်နှင့် မျက်လုံးများ နီရဲလာပြီး တံမြက်စည်းဖြင့် ရိုက်နှက်လိုက်ခြင်း ဖြစ်သည်။

အဖွားကြီးဝမ်သည် လူမှားနေသလားဟုပင် ထင်မှတ်သွားသည်။ တံမြက်စည်းကို ပြင်းထန်စွာ ဝှေ့ယမ်းနေသူသည် အမှန်တကယ် သူမ၏ ချွေးမ ဟုတ်ပါရဲ့လား။ စောစောက ဒေါသကြီးသော ကျန်းယွင်နန် များလား။

မျက်နှာများကို ဖုံးထားလျှင် လျူရှောင်ရူနှင့် ကျန်းယွင်နန်ကို မည်သူ ခွဲခြားနိုင်မည်နည်း။

"မိန်းမပျက်... နင် တော်တော် လွန်နေပြီ... ယောက္ခမကိုတောင် ပြန်ရိုက်ရဲတယ်ပေါ့... အာဏာပိုင်တွေဆီသွားပြီး မိဘမရိုသေမှုနဲ့ တိုင်ပစ်လိုက်မယ်... မကြောက်ဘူးလား"

အဖွားကြီးဝမ်က အော်ဟစ်လိုက်သည်။

လျူရှောင်ရူ အမှန်တကယ် ကြောက်လန့်သွားပြီး တံမြက်စည်းကိုင်ထားသော လက် အနည်းငယ် တုံ့ဆိုင်းသွားသည်။

ထိုအချိန်တွင် ကျန်းယွင်နန် ရုတ်တရက် ဝင်ပြောလိုက်သည်။

"အဖွားကြီးဝမ်... ရှင်က အာဏာပိုင်တွေဆီ တကယ်သွားတိုင်ရင် ရှင့်သားရဲ့ ဂုဏ်သိက္ခာ ထိခိုက်မှာ မစိုးရိမ်ဘူးလား... အရာရှိတွေက သူ့အိမ်ကိုတောင် ကောင်းကောင်း မအုပ်ချုပ်နိုင်ဘူးလို့ ထင်သွားကြလိမ့်မယ်"

ကြင်နာသလို ထင်ရသော ဤစကားများသည် အပေါ်ယံတွင် အဖွားကြီးဝမ်ကို သတိပေးနေခြင်း ဖြစ်သော်လည်း လက်တွေ့တွင် လျူရှောင်ရူကို သတိပေးနေခြင်းသာ။

လျူရှောင်ရူ အားတက်သွားပြီး အဖွားကြီးဝမ်ကို တံမြက်စည်းဖြင့် ထပ်မံ ရိုက်နှက်လိုက်သည်။

အိမ်ငှားများသည် တစ်နေ့တည်းတွင် ပွဲနှစ်ပွဲ ကြည့်ရလိမ့်မည်ဟု မမျှော်လင့်ထားကြပေ။

သို့သော် ဤတစ်ကြိမ်တွင် သူစိမ်းနှစ်ယောက် ရန်ဖြစ်နေခြင်း မဟုတ်ဘဲ ယောက္ခမနှင့် ချွေးမ ရန်ဖြစ်နေခြင်းပင်။

ထို့ကြောင့် လူအများက လျူရှောင်ရူကို အပြစ်တင် ဝေဖန်လာကြသည်။

"ယောက္ခမက ချွေးမကို ရိုက်တာ ပုံမှန်ပါပဲ... ဒါပေမယ့် ချွေးမက ယောက္ခမကို ပြန်ရိုက်တာမျိုး ရှားတယ်"

"ဝမ်ကတော်က တကယ် မစဉ်းစားတတ်ဘူး... လူကြီးကို ပြန်ရိုက်တာ မိုးကြိုးပစ်ခံရမှာ မကြောက်ဘူးလား"

ထိုဝေဖန်သံများကို ကြားသောအခါ လျူရှောင်ရူ ပြန်ပြောချင်သော်လည်း လျှာလေးအာလေး ဖြစ်နေပြီး ဘာပြောရမှန်း မသိတော့ပေ။

ထိုအချိန်တွင် ကျန်းယွင်နန် ဝင်ပြောလိုက်သည်။

"အဖွားကြီးဝမ်... ရှင်က ဘာလို့ သူ့ကို 'မိန်းမပျက်' လို့ ခေါ်နေရတာလဲ... ရှင့်ချွေးမက ရိုးသားဖြောင့်မတ်တဲ့သူပါ... ရှင့်မိသားစုအတွက် ကျွန်ခံနေရတာ... ဒီလို စွပ်စွဲချက်တွေ ကြားရရင် သူ ဘယ်လောက် ခံစားရမလဲ... ရှင် အဲ့လိုပြောတာ ရှင့်သားရဲ့ သိက္ခာကို ချနေတာပဲ မဟုတ်ဘူးလား... ချွေးမက ပြန်ရိုက်တာ မဆန်းပါဘူး"

"သူသာ စဉ်းစားဉာဏ်မရှိတဲ့သူဆိုရင် အခုလောက်ဆို ရေတွင်းထဲ ခုန်ချပြီးလောက်ပြီ"

လျူရှောင်ရူ၏ မျက်လုံးများ တောက်ပလာပြီး အော်ပြောလိုက်သည်။

"အမေ... ကျွန်မ ယောကျ်ား စာမေးပွဲအောင်ဖို့အတွက် ညမအိပ်ဘဲ ပန်းထိုးပေးတယ်... မျက်စိကွယ်မတတ် အိမ်မှုကိစ္စတွေ လုပ်ပေးတယ်... အဲ့ဒါကို အမေက ကျွန်မကို မိန်းမပျက်လို့ ခေါ်တယ်ပေါ့... အမေက ကျွန်မကို သေအောင် ဖိအားပေးနေတာပဲ... ကျွန်မ မနေချင်တော့ဘူး"

လျူရှောင်ရူသည် "မနေချင်တော့ဘူး" ဟု ပါးစပ်က ပြောနေသော်လည်း လက်က ရိုက်နှက်နေခြင်းကို မရပ်တန့်ပေ။ သူမသည် ယောက္ခမထက် ခေါင်းတစ်လုံးစာခန့် အရပ်ပိုရှည်ပြီး ယခုအခါ မည်သည့် အထိန်းအကွပ်မျှ မရှိတော့ဘဲ အဖွားကြီးဝမ် နာကျင်စွာ အော်ဟစ်သည်အထိ ရိုက်နှက်နေတော့သည်။

နျိုနျိုနှင့် ကုကျောက်တို့သည် ထိုမြင်ကွင်းကို စိတ်လှုပ်ရှားစွာ ကြည့်ရှုနေကြသည်။ နျိုနျို လက်သီးကို ဝှေ့ယမ်းပြီး အော်ဟစ်လိုက်၏။

"ဒီအဒေါ်က အရမ်းတော်တာပဲ... ရန်ဖြစ်တာ အရမ်းတော်တယ်"

ကုမင်တာ့ သည် ကလေးနှစ်ယောက်ကို ကျန်းယွင်နန်၏ ဘေးသို့ ဆွဲခေါ်သွားပြီး တိုးတိုးလေး ပြောလိုက်သည်။

"ယွင်နန်... ဒီအဘွားကြီးက သူ့ချွေးမကို ဖောက်ပြန်တယ်လို့ ပြောတယ်... သူ့ချွေးမက ခုနကမှ ငါတို့အခန်းထဲ ရောက်နေတာလေ"

ကျန်းယွင်နန် သတိမထားမိခဲ့ပေ။ ခင်ပွန်းသည် သတိပေးလိုက်မှ ကြက်မွှေးတံမြက်စည်းကို ဆွဲယူပြီး အဖွားကြီးဝမ်ထံ ပြေးသွားကာ အော်ဟစ်လိုက်သည်။

"ရှင်က ငါ့ယောကျ်ားကို စော်ကားရဲတယ်ပေါ့... ရှင့်ချွေးမက ငါနဲ့ စကားပြောနေတာ... ငါ့ယောကျ်ားက ခြံဝင်းထဲမှာ ကလေးထိန်းနေတာ... ရှင်က ငါ့ယောကျ်ားကို အဲ့လို စွပ်စွဲရဲတယ်ပေါ့... ရှင့်ကို အသေရိုက်ပစ်မယ်"

ကျန်းယွင်နန်၏ ခင်ပွန်းသည်ကို ကာကွယ်မှုသည် ပွဲကြည့်သူများအတွက် ထူးဆန်းပုံ မရပေ။

ဆန့်ကျင်ဘက်အားဖြင့် အမျိုးသမီးငယ်နှစ်ဦးက ထောက်ခံအားပေးကြသည်။

"သူက တခြားမိန်းမနဲ့ စကားပြောနေရုံလေးကို ယောက္ခမက ဖောက်ပြန်တယ်လို့ စွပ်စွဲတယ်... အဖွားကြီးဝမ်ရဲ့ ပါးစပ်က ရိုက်ချင်စရာပဲ"

"ဟုတ်တယ်... သခင်လေးကုက ခြံဝင်းထဲမှာ ကလေးထိန်းနေတာ တောက်လျှောက်ပဲ... အဖွားကြီးဝမ် လာတုန်းကလည်း မြင်သားပဲ... ဘယ်လိုလုပ်ပြီး ဖောက်ပြန်တယ်လို့ စွပ်စွဲရဲတာလဲ... တော်တော် လွန်တာပဲ"

ကျန်းယွင်နန် ဝင်ရောက်ပါဝင်လာမှုကြောင့် ခြံဝင်းထဲရှိ အတင်းအဖျင်းများသည် အဖွားကြီးဝမ်ကို ဆန့်ကျင်ဘက်သို့ ချက်ချင်း ပြောင်းလဲသွားသည်။

အမျိုးသမီးငယ်နှစ်ယောက်၏ ဝိုင်းဝန်းရိုက်နှက်မှုကို ခံရသဖြင့် အဖွားကြီးဝမ် ဝက်အော်သလို အော်ဟစ်နေသည်။

သူမ မည်မျှပင် ကျယ်လောင်စွာ အော်ဟစ်စေကာမူ အခြားခြံဝင်းမှ လူများပင် လာကြည့်ကြသော်လည်း သူမ၏ သားလိမ္မာ ဝမ်ယောက်ကျူသည် အိမ်ထဲတွင် စာအုပ်တစ်အုပ်ဖြင့် ဝီရိယရှိစွာ စာကျက်နေပြီး မိခင်ဖြစ်သူကို ကာကွယ်ရန် လုံးဝ ထွက်မလာပေ။

အဖွားကြီးဝမ် ကြောက်လန့်တကြား ထွက်ပြေးရုံသာ တတ်နိုင်တော့သည်။

ထွက်မပြေးမီ သူမ၏ ဆံပင်များ ဖရိုဖရဲဖြစ်နေပြီး ခေါင်းပေါ်တွင် ဆံပင်အချို့ ကျွတ်ထွက်သွားကာ ထိပ်ပြောင်သွားသည်။ မည်သူ ဆွဲနှုတ်လိုက်မှန်း မသိရပေ။ မျက်နှာပေါ်တွင် သွေးစို့နေသော အရာများ ရှိနေပြီး အပေါ်အင်္ကျီမှာလည်း စုတ်ပြဲနေသည်။

ကံကောင်းစွာဖြင့် ဆောင်းဦးနှောင်းပိုင်း ဖြစ်၍ အဝတ်အစား ထူထူဝတ်ထားသဖြင့် လက်မောင်းသား ပေါ်မသွားခဲ့ပေ။

လျူရှောင်ရူသည် ယောက္ခမကို အချိန်အကြာကြီး ရင်ဆိုင်ခဲ့ရသဖြင့် မောပန်းနွမ်းနယ်နေပြီဖြစ်သည်။ အိမ်ပြန်မသွားချင်သော်လည်း အပြင်တွင် ဆက်နေ၍ မဖြစ်ပေ။ တံမြက်စည်းကို ဆုပ်ကိုင်ထားရင်း ကျန်းယွင်နန်ကို တစ်ချက်ကြည့်လိုက်ပြီး နောက်ဖေးအိမ်သို့ ပြတ်သားစွာ လျှောက်သွားလိုက်သည်။

အဖွားကြီးဝမ်သည် စုတ်ပြတ်သတ်နေသော ပုံစံဖြင့် အခန်းထဲသို့ ပြန်ရောက်လာပြီး သားဖြစ်သူထံမှ စာနာမှု ရရှိရန် မျှော်လင့်နေသည်။

သို့သော် ဝမ်ယောက်ကျူ၏ မျက်နှာထား မဲမှောင်နေပြီး ဆူပူလိုက်သည်။

"ကျွန်တော် အမေ့ကို သူ့ကို ပြန်ခေါ်လာခိုင်းတာလေ... ဘာလို့ အပြင်မှာ ရန်သွားဖြစ်နေရတာလဲ"

ဤအိမ်သည် အစိုးရစာမေးပွဲ ဖြေဆိုမည့် ကျောင်းသားများဖြင့် ပြည့်နေသည်။ ဝမ်ယောက်ကျူသည် ကိုယ့်ပညာကို ကိုယ်ယုံကြည်မှု ရှိသော်လည်း စာမေးပွဲအောင်မြင်မည့်သူများကို သတိထားရမည်ဖြစ်သည်။

ထိုသူများသည် အနာဂတ်တွင် အဆက်အသွယ်ကောင်းများ ဖြစ်လာနိုင်သည်။

ဝမ်ယောက်ကျူသည် မိခင်ဖြစ်သူကို မကျေနပ်ပေ။ အိမ်ထဲတွင် ပြဿနာရှာသည်ကို လက်ခံနိုင်သော်လည်း အပြင်ထွက်ပြီး သူများနှင့် ရန်ဖြစ်ခြင်းသည် သူ့သိက္ခာကို ကျစေသည်။

အဖွားကြီးဝမ် ကုပ်ကုပ်လေး ဖြစ်သွားပြီး ပြောလိုက်သည်။

"အဲ့ဒါ မင်းမိန်းမ အပြစ်ပဲ... သူက စာသင်သားကုရဲ့ မိန်းမနဲ့ ပေါင်းပြီး အိမ်ပြန်မလာတော့ဘူး... အမေက ဒေါသထွက်ပြီး သူ့ကို သွားပြောမလို့ပါ... ဒါပေမယ့် သူက အမေ့ကို မြင်တာနဲ့ တန်းရိုက်တော့တာပဲ... ကြည့်ပါဦး... အမေ တစ်ကိုယ်လုံး ဒဏ်ရာတွေနဲ့"

အဖွားကြီးဝမ်သည် အပြစ်အားလုံးကို ချွေးမအပေါ် ပုံချလိုက်သည်။

အပြင်ဘက်တွင် အားလုံးကြားခဲ့ရသော လျူရှောင်ရူသည် တံမြက်စည်းကို ဆွဲကိုင်ပြီး ဒေါသတကြီး ဝင်လာသည်။

"ရှင် ကျွန်မကို စွပ်စွဲပြန်ပြီ... ရှင် ကျွန်မကို သတ်ချင်နေတာ... ကျွန်မ မနေချင်တော့ဘူး"

အဖွားကြီးဝမ်သည် အတွေ့အကြုံရှိသူပီပီ တံမြက်စည်းကို မြင်သည်နှင့် အမြန် ရှောင်တိမ်းလိုက်သည်။ သို့သော် သားဖြစ်သူကို ဆွဲဖယ်ရန် မေ့သွားသည်။ ဝမ်ယောက်ကျူသည် ဤကဲ့သို့ ရုန်းရင်းဆန်ခတ် အခြေအနေမျိုး တစ်ခါမျှ မကြုံဖူးသဖြင့် ခေါင်းကို ပြင်းထန်စွာ အရိုက်ခံလိုက်ရပြီး နာကျင်စွာ အော်ဟစ်လိုက်သည်။

ဒါက အဖွားကြီးဝမ်၏ နှလုံးသားကို ကွဲကြေစေသည်။ ချက်ချင်းပင် "ငါ့သားလေး" ဟု အော်ဟစ်ပြီး ဝမ်ယောက်ကျူကို ရင်ခွင်ထဲ ဆွဲသွင်းကာ နှစ်သိမ့်လိုက်သည်။

"လျူရှောင်ရူ... နင် ရူးသွားပြီလား... နင့်ယောကျ်ားကိုတောင် ရိုက်ရဲတယ်ပေါ့... နင် တော်တော် လွန်နေပြီ"

အဖွားကြီးဝမ် စွပ်စွဲလိုက်သည်။

ဝမ်ယောက်ကျူ ဤကဲ့သို့ တစ်ခါမျှ မခံစားဖူးပေ။ ပုံမှန်အားဖြင့် မိခင်နှင့် ဇနီးသည် ရန်ဖြစ်သည်ကို အပျော်သဘော ကြည့်လေ့ရှိသော်လည်း ယခု သူကိုယ်တိုင် အရိုက်ခံရသောအခါ ဒေါသထွက်လာသည်။

လျူရှောင်ရူကို အစိမ်းလိုက် ဝါးစားချင်သလို စိုက်ကြည့်လိုက်သည်။

ထိုအကြည့်ကို မြင်သောအခါ လျူရှောင်ရူ ကြောက်ရွံ့သွားသည်။

တပြိုင်နက်တည်းမှာပင် ခင်ပွန်းသည်သည် ဇနီးသည်ကို သတ်မည့် ဝံပုလွေမျိုးဖြစ်ကြောင်း ဝမ်းနည်းစွာ အတည်ပြုလိုက်မိသည်။

သူမကို လုပ်ကြံရန် ကြံစည်နေကြပြီး မကြာခင် လမ်းခွဲရတော့မည်ဖြစ်၍ လျူရှောင်ရူသည် ခင်ပွန်းသည်အပေါ် မျှော်လင့်ချက် ကုန်ဆုံးသွားပြီးနောက် မည်သည့်အရာကိုမျှ ဂရုမစိုက်တော့ပေ။

ခင်ပွန်းသည်ကို တံမြက်စည်းဖြင့် ထပ်မံ ရိုက်နှက်လိုက်ပြီး အော်ဟစ်လိုက်သည်။

"ရှင်လည်း ရှင့်အမေဘက်ကပဲ... ရှင်လည်း ကျွန်မကို ဖောက်ပြန်တယ်လို့ ထင်နေတာမလား... ဒီနှစ်တွေတစ်လျှောက်လုံး ကျွန်မ ဘယ်သူ့အတွက် ပင်ပန်းခံနေရတာလဲ"

သားအမိနှစ်ယောက် ဖက်ထားကြသဖြင့် နှစ်ယောက်စလုံး အရိုက်ခံလိုက်ရသည်။

ဝမ်ယောက်ကျူသည် မိခင်၏ ရင်ခွင်ထဲမှ ရုန်းထွက်ပြီး လျူရှောင်ရူ၏ လက်ထဲမှ တံမြက်စည်းကို ဆွဲယူရန် ကြိုးစားလိုက်သည်။

ဟင်...။

ဝမ်ယောက်ကျူ တံမြက်စည်းကို အကြိမ်ကြိမ် ဆွဲယူသော်လည်း လျူရှောင်ရူက မြဲမြံစွာ ဆုပ်ကိုင်ထားသည်။

သူ့ဇနီးသည်က သူ့ထက် သန်မာနေသည်ကို ဝမ်ယောက်ကျူ မမျှော်လင့်ထားခဲ့ပေ။