မယ်ကံကောင်းလေး

နျိုနျို‌လေးကို မွေးကင်းစလေးမှာပင် လူယုတ်မာတချို့က သူ့ကိုခိုးသွားကြပြီး တောနက်မြိုင်အလယ်၌ စွန့်ပစ်ခဲ့ကြလေသည်။ သို့သော် ကံတရား၏ဖေးမမှုကြောင့် သားသမီးရတနာကင်းမဲ့နေရှာသော ကျန်းလင်မယား နှစ်ယောက်က တွေ့သွားပြီး မွေးစားခဲ့ကြ၏။ အချိန်ကာလများရွှေ့ပြောင်း၍ သူမ အသက်ငါးနှစ်အရွယ်သို့ရောက်ရှိချိန်မှာတော့ ကျန်းမိသားစုအိမ်တော်၌ မြေးယောက်ျားလေးတစ်ဦး ဖွားမြင်လာခဲ့သည်။ ထိုအခါ နျိုနျိုအား ကျန်းမိသားစုက ဂြိုဟ်ဆိုးမဟု သမုတ်ကာ အပြင်းဖျားနေချိန်မှာပင် ဂရုမစိုက်ဘဲ ဖြစ်ချင်ရာဖြစ်ပစ်ထားလိုက်ကြတော့သည်။ ထိုစဉ် မိဘအိမ်သို့ အလည်ပြန်ရောက်လာသည့် အစ်မကြီးဖြစ်သူက ထိုအရာများကိုကိုမြင်သွားပြီး ဒေါသအမျက်ချောင်းချောင်းထွက်သွားတော့လေ၏။ “ငါတို့နျိုနျိုလေးကို ဘယ်သူကများ နိမိတ်မကောင်းဘူးလို့ ပြောရက်တာလဲ…ဒီကလေးက ကံကောင်းတဲ့ကောင်မလေးပါ… နင်တို့မကျွေးမွေးချင်ရင် ငါခေါ်ပြီးမွေးမယ်” ထိုအချိန်မှစ၍ နျိုနျိုဟာ အတောမသတ်နိုင်သည့် အိမ်မှုကိစ္စများကို လုပ်ကိုင်စရာမလိုတော့ဘဲ ဗိုက်ကလေးတင်းနေအောင် ပျော်ပျော်ရွှင်ရွှင်စားနိုင်သောက်နိုင်သွားတော့သည်။ မိသားစုတစ်စုလုံးကလည်း သူမကို ဖူးဖူးမှုတ် အလိုလိုက်ချစ်ခင်ကြလေသည်။ ကျန်းမိသားစုမှ ယောက္ခမနှင့် ချွေးမတို့မှာမူ နျိုနျိုက သူ့မွေးစားအမေ၏ မိသားစုတစ်ခုလုံးကို ကံဆိုးမိုးမှောင်ကျစေလိမ့်မည်ဟု ယုံကြည်ပြီး အစ်မကြီးတို့မိသားစု ဒုက္ခရောက်မည့်အချိန်ကိုသာ တမျှော်မျှော်စောင့်စားနေခဲ့ကြသည်။ သို့သော် သူတို့မျှော်လင့်သလို ဖြစ်မလာခဲ့ပေ။ သူတို့မျှော်လင့်ထားသည်နှင့် ဆန့်ကျင်စွာပင် နျိုနျို့မွေးစားမိသားစုမှာ အိမ်သစ်တည်၊ မြေသစ်ဝယ်နှင့် နေ့စဉ်နှင့်အမျှ စီးပွားလာဘ်လာဘများ တိုးသထက်တိုးနေခဲ့တော့၏။ မွေးစားဖခင်ဖြစ်သူမှာလည်း ဧကရာဇ်စာမေးပွဲကို ဝင်ရောက်ဖြေဆိုရာ ရှို့ချိုင်၊ ကျုံးကျွီရန်မှသည် ကျွမ်းယွမ်အဆင့်ထိ အောင်မြင်ကျော်လွှားနိုင်ခဲ့ပြီး ရာထူးကြီးအမတ်တစ်ဦးအဖြစ် မိသားစုတစ်ခုလုံးကို မြို့တော်ဆီသို့ ခေါ်ဆောင်သွားနိုင်ခဲ့လေတော့သည်။ နျိုနျို မင်္ဂလာဆောင်သည့်နှစ်သို့ရောက်သော် မြို့တော်မှာ ဂုဏ်သရေရှိ အထက်တန်းစားမျိုးနွယ်များက နျိုနျိုနှင့်ပတ်သက်သည့် အံ့အားသင့်ဖွယ်အဖြစ်မှန်ကို တွေ့ရှိသွားကြသည်။ တော်ဝင်မင်းဆရာ၏ မွေးစားသမီးလေးမှာ ရှန်ကုန်းအိမ်တော်သခင်မ၏ ကလေးဘဝပုံစံနှင့် တစ်ထပ်တည်းတူညီနေကြောင်းကိုပင်။ __ Author's Note - နှုတ်ကြမ်းအာကြမ်း အမေ… ဝမ်းတွင်းမည်း အဖေရယ်…မြေးကိုအလိုလိုက်တဲ့ အဖွားရယ်… ညီမလေးဆိုရင် သည်းသည်းလှုပ်ကြတဲ့ အစ်ကိုအစ်မတွေနဲ့ ဇာတ်လိုက်မလေးကတော့ အချစ်ခံမယ်ကံကောင်းလေး… ပေါ့ပေါ့ပါးပါး ရိုရိုချိုချို fluffy ဇာတ်လမ်းလေးမို့ သေချာပေါက်ဖတ်ကြည့်ကြပါနော်