အခန်း (၃၄၃-၃၄၄)
Vol. 25 Ch. 343-344
အခန်း ( ၃၄၃ ) - အင်မော်တယ်ဘုရင် အမိန့်တော်ပြန်တမ်း၊ အင်မော်တယ်တစ်သောင်း နတ်နဂါးအရှင်သခင်နှင့် စစ်မှန်သော အင်မော်တယ် ရာထူး
ရှောင်ယောက်ထျန်းကျွင်းသည် အလွန်ပင် ကျေနပ်အားရနေလေသည်။ သို့တည်းမဟုတ် သူသည် မိမိကိုယ်ကို ဖိနှိပ်ထားခဲ့ရသည်မှာ ကြာမြင့်လှပြီဖြစ်၍ ယခု ပေါက်ကွဲထွက်ရမည့်အချိန် ရောက်သောအခါ ရင်ထဲရှိ ခံစားချက်များကို မထိန်းနိုင်တော့ဘဲ ထုတ်ဖော်လိုက်ခြင်းသာ ဖြစ်ပေသည်။
ရှောင်ယောက်ထျန်းကျွင်း၏ ရှေ့မှောက်တွင် ဒိန်းဒိန်းမြည်ကာ ခုန်လှုပ်နေသော ထူးဆန်းသည့် အင်မော်တယ်ဘုရင် နှလုံးသားကို ကြည့်ရင်း စစ်မှန်သော အင်မော်တယ်နှစ်ပါးကို တစ်ပြိုင်နက်တည်း ခြုံခိုတိုက်ခိုက်ရဲသည့် ရှောင်ယောက်ထျန်းကျွင်း၏ ယုံကြည်မှု ဘယ်မှလာသည်ကို ကုချန် နားလည်သွားလေတော့သည်။
ဤ 'အင်မော်တယ်ဘုရင် နှလုံးသား' ကြောင့် ဖြစ်နေခဲ့သည်ကိုး။
ဤထူးဆန်းသော နှလုံးသားတွင် အင်မော်တယ်ဘုရင်အဆင့် ရှိသူ၏ ချီအငွေ့အသက်များ ပါရှိနေ၏။ ရှောင်ယောက်ထျန်းကျွင်း မည်သို့ ရရှိခဲ့သည်ကို မသိရသော်လည်း ၎င်းသည် စစ်မှန်သော အင်မော်တယ်နှစ်ပါးကို အမှန်တကယ် ဖိနှိပ်နိုင်စွမ်း ရှိပေသည်။
အင်မော်တယ်တစ်သောင်းမျှော်စင်မှ လာသည့် စစ်မှန်သော အင်မော်တယ်နှစ်ပါး၏ မျက်လုံးထဲတွင် ရှောင်ယောက်ထျန်းကျွင်းသည် အနည်းငယ် ပိုသန်မာသော ပုရွက်ဆိတ်တစ်ကောင်မျှသာ ဖြစ်သည်။
သို့သော် ထိုပုရွက်ဆိတ်သည် အထွတ်အထိပ်ဟု ခေါ်ဆိုနိုင်သော စွမ်းအားတစ်စိတ်တစ်ပိုင်းကို ဆုပ်ကိုင်ထားနိုင်သည့်အခါ ပုရွက်ဆိတ်ဖြစ်သည့်တိုင် ကောင်းကင်ကြီးကို မျိုချနိုင်ပေသည်။
သို့ရာတွင် အင်မော်တယ်ဘုရင် နှလုံးသားဟု ခေါ်ဆိုသော ဤအရာသည် အနည်းငယ် ထူးဆန်းနေလေသည်။ အင်မော်တယ်ဘုရင် နှလုံးသားဟု ခေါ်ဆိုခြင်းထက် အင်မော်တယ်ဘုရင်၏ နတ်ဆိုးနှလုံးသားဟု ခေါ်ဆိုခြင်းက ပို၍ မှန်ကန်တိကျပေလိမ့်မည်။
" ဒီလို မကောင်းဆိုးဝါး ပစ္စည်းမျိုးကို မင်း ဘယ်လိုရခဲ့တာလဲ "
အင်မော်တယ်မျှော်စင် ကိုင်ဆောင်သူသည် ရှောင်ယောက်ထျန်းကျွင်း၏ ရှေ့ရှိ ခုန်လှုပ်နေသော ထူးဆန်းသည့် နှလုံးသားကို ကြည့်လျက် သူ၏ အေးစက်သော မျက်နှာပေါ်တွင် ရှားပါးလှသည့် ထိတ်လန့်မှု အရိပ်အယောင်များ ပေါ်လာလေ၏။
" တကယ်လို့ မင်း ငါတို့ကို အခု လွှတ်ပေးမယ်ဆိုရင် ငါတို့က အထက်လူကြီးတွေဆီ မင်းအတွက် အသနားခံပေးလို့ ရသေးတယ်... မင်းကို အင်မော်တယ်တစ်သောင်းမျှော်စင်ထဲ တကယ် လက်ခံပေးမှာဖြစ်လို့ အင်မော်တယ်ဘုံကို တက်ရောက်နိုင်ဖို့က လက်တစ်ကမ်းမှာပဲ ရှိတော့တယ် "
အင်မော်တယ်အယ်စောက် ကိုင်ဆောင်သူ၏ လေသံသည်လည်း ပြောင်းလဲသွားကာ ရှောင်ယောက်ထျန်းကျွင်းကို သွေးဆောင်ဖြားယောင်းသကဲ့သို့ အနာဂတ်လမ်းကြောင်းကို စီစဉ်ပေးလာလေသည်။
" ဟုတ်တယ်... မင်းမှာ ဒီလိုကံကောင်းမှုမျိုး ရှိနေမှတော့ အင်မော်တယ်အရှင်သခင်ဆီ ငါတို့ သတင်းပို့လိုက်တာနဲ့ အင်မော်တယ်အရှင်သခင်က သေချာပေါက် ဝမ်းမြောက်သွားပြီး မင်းကို အင်မော်တယ်တစ်သောင်းမျှော်စင်ထဲ ခေါ်သွားမှာ... သူကိုယ်တိုင် မင်းကို လမ်းညွှန်ပေးရင်တောင် ပေးဦးမှာ "
အင်မော်တယ်မျှော်စင် ကိုင်ဆောင်သူသည် ဘေးမှနေ၍ ထောက်ခံပြောဆိုလိုက်၏။
သို့သော် လေသံပျော့သွားသော အင်မော်တယ်မျှော်စင် ကိုင်ဆောင်သူနှင့် အင်မော်တယ်အယ်စောက် ကိုင်ဆောင်သူတို့ကို ရင်ဆိုင်ရသော်ငြား ရှောင်ယောက်ထျန်းကျွင်းကမူ လုံးဝ တုန်လှုပ်ခြင်း မရှိပေ။
သူသည် စစ်မှန်သော အင်မော်တယ်နှစ်ပါးကို အေးစက်စွာ ကြည့်လိုက်၍ လှောင်ပြောင်သရော်လိုက်လေသည်။
" ငါအရှင်ကို သစ္စာရှိတဲ့ခွေးတစ်ကောင်လို ဆက်ဆံခဲ့တုန်းက မင်းတို့ရဲ့ မောက်မာတဲ့ သဘောထားတွေ ဘယ်ရောက်သွားပြီလဲ "
" အခု မင်းတို့ လေသံပျော့သွားရတာက သေတော့မှာမို့လို့ပဲ မဟုတ်လား "
" ငါအရှင်က မင်းတို့ကို လွှတ်ပေးမယ်လို့ ထင်နေတာလား... ငါအရှင်ကို အရူးများ မှတ်နေသလား... အခု မင်းတို့ကို လွှတ်ပေးလိုက်ရင် နောင်ကျ အင်မော်တယ်တစ်သောင်းမျှော်စင်က ငါအရှင်ကို ဘယ်တော့မှ လွှတ်ပေးမှာ မဟုတ်တော့ဘူး "
" မင်း ဘာလိုချင်တာလဲ "
ရှောင်ယောက်ထျန်းကျွင်း၏ စကားကို ကြားသောအခါ အင်မော်တယ်မျှော်စင် ကိုင်ဆောင်သူ၏ မျက်နှာမှာ ပျက်သွားလေသည်။
" အင်မော်တယ်ဘုံကို ဝင်ရောက်နိုင်မယ့် နည်းလမ်းကို ပြောစမ်း "
ရှောင်ယောက်ထျန်းကျွင်းသည် ခံစားချက်ကင်းမဲ့စွာ ပြောလိုက်သော်လည်း တပြိုင်နက်တည်းမှာပင် အင်မော်တယ်ဘုရင် နှလုံးသားမှ စစ်မှန်သော အင်မော်တယ်နှစ်ပါးထံမှ စွမ်းအားနှင့် တာအိုများကို စုပ်ယူနေသည့် အရှိန်ကို လျှော့ချပေးလိုက်လေသည်။
" ငါတို့မှာလည်း အင်မော်တယ်ဘုံကို ပြန်နိုင်မယ့် နည်းလမ်း မရှိဘူး "
အင်မော်တယ်မျှော်စင် ကိုင်ဆောင်သူသည် ချက်ချင်း ဖြေကြားလိုက်၏။
" အင်မော်တယ်ဘုံ တံခါးပေါက်အတွက် အင်မော်တယ်ဘုရင် အမိန့်ပြန်တမ်းက အင်မော်တယ်တစ်သောင်း အရှင်သခင် ဝမ်လုံအရှင်ဆီမှာပဲ ရှိတာ... အရှင်သခင်က အဲဒီ အမိန့်တော်ပြန်တမ်းကို သုံးမှ ငါတို့ကို အောက်ဘုံဆီ ပို့ပေးလို့ ရတာ "
" အလားတူပဲ ငါတို့က အရှင်သခင်ဆီ သတင်းပို့ပြီး ခွင့်ပြုချက်ရမှ အင်မော်တယ်ဘုံကို ပြန်လို့ရမှာ "
" ဟုတ်တယ်... အဲဒီအတိုင်းပဲ "
ဘေးနားရှိ အင်မော်တယ်အယ်စောက် ကိုင်ဆောင်သူသည်လည်း ခေါင်းညိတ်ထောက်ခံလိုက်သည်။
အင်မော်တယ်ဘုရင် အမိန့်တော်ပြန်တမ်း ရှိမှသာ အင်မော်တယ်တံခါးကိုဖွင့်၍ အင်မော်တယ်ဘုံသို့ ဝင်ရောက်နိုင်လိမ့်မည်။ သို့သော် အင်မော်တယ်ဘုရင် အမိန့်တော်ပြန်တမ်းမှာ အင်မော်တယ်တစ်သောင်းမျှော်စင် အရှင်သခင်၏ လက်ထဲတွင် ရှိနေသည်။
အင်မော်တယ်အယ်စောက် ကိုင်ဆောင်သူနှင့် အင်မော်တယ်မျှော်စင် ကိုင်ဆောင်သူတို့၏ စကားကို ကြားလိုက်ရသောအခါ ရှောင်ယောက်ထျန်းကျွင်း၏ မျက်နှာထားမှာ မပြောင်းလဲဘဲ မနေနိုင်တော့ချေ။
အဘယ်ကြောင့်ဆိုသော် ဤစစ်မှန်သော အင်မော်တယ်နှစ်ပါး လိမ်ညာမနေကြောင်း သူ သိရှိသောကြောင့်ပင်။
" မင်း ငါတို့ကို လွှတ်ပေးလိုက်ရုံပဲ... ငါတို့ အရှင်သခင်ဆီ သတင်းပို့လိုက်တာနဲ့ အရှင်သခင်က မင်းအတွက် လမ်းကြောင်းဖွင့်ပေးပြီး ငါတို့နဲ့အတူ အင်မော်တယ်ဘုံကို တက်လှမ်းလို့ ရသွားလိမ့်မယ်... အဲ့အခါကျ အင်မော်တယ်အဖြစ် တက်လှမ်းနိုင်လိမ့်မယ် "
အင်မော်တယ်မျှော်စင် ကိုင်ဆောင်သူသည် အခြေအနေကို အခွင့်ကောင်းယူကာ ထပ်လောင်းတိုက်တွန်းလိုက်သည်။
" အင်မော်တယ်ဘုံ တက်လှမ်းခြင်း ဟုတ်လား "
ရှောင်ယောက်ထျန်းကျွင်းမှ လှောင်ပြောင်သရော်စွာ ပြုံးလိုက်၏။
" မင်းတို့ မသိတာ တစ်ခုရှိတယ်... မင်းတို့ရဲ့ အကူအညီသာပါရင် အင်မော်တယ်ဘုံကို မဝင်ရရင်တောင် ငါအရှင်က အင်မော်တယ် အဆင့်အတန်းကို ရယူနိုင်သေးတယ်ဆိုတာပဲ... အင်မော်တယ်ဘုံ ဝင်ဖို့ကိစ္စကတော့ နောက်မှ ဆွေးနွေးကြတာပေါ့ "
" ဘာသဘောလဲ "
ရှောင်ယောက်ထျန်းကျွင်း၏ လေသံမှာ ပုံမှန်မဟုတ်ကြောင်း အင်မော်တယ်မျှော်စင် ကိုင်ဆောင်သူ ခံစားလိုက်ရပြီးနောက် သူ၏စိတ်ထဲတွင် ဆိုးရွားသော နိမိတ်တစ်ခု ဖြစ်ပေါ်လာလေသည်။
" ဘာသဘောလဲ ဟုတ်လား... ခင်ဗျားတို့နှစ်ယောက်ကို သေလမ်းပို့ပေးမယ့် သဘောပေါ့ "
ရှောင်ယောက်ထျန်းကျွင်းသည် အေးစက်စွာ ပြောဆိုလိုက်ပြီးနောက် လက်ကို ပြင်းထန်စွာ ဆုပ်ကိုင်လိုက်ကာ အင်မော်တယ်ဘုရင် နှလုံးသားမှ စစ်မှန်သော အင်မော်တယ်နှစ်ပါး၏ စွမ်းအားကို စုပ်ယူသည့် အရှိန်ကို တစ်ဖန် ပြန်လည် မြှင့်တင်လိုက်လေသည်။
အင်မော်တယ်အယ်စောက် ကိုင်ဆောင်သူနှင့် အင်မော်တယ်မျှော်စင် ကိုင်ဆောင်သူတို့၏ စွမ်းအားများ ကုန်ခမ်းသွားသည်နှင့်အမျှ အင်မော်တယ်ဘုရင် နှလုံးသား၏ မျက်နှာပြင်ပေါ်တွင် ချည်နှောင်ထားဆဲဖြစ်သော တာအိုကြိုးများသည်လည်း တစ်ခုပြီးတစ်ခု ပြိုကွဲပျက်စီးသွားလေသည်။
နောက်ဆုံးတွင် အင်မော်တယ်တစ်သောင်းမျှော်စင်မှ စစ်မှန်သော အင်မော်တယ်နှစ်ပါး၏ မျှော်လင့်ချက်မဲ့နေသော အကြည့်အောက်၌ သူတို့၏ အတွင်းအားများ လုံးဝ ကုန်ခမ်းသွားချိန်တွင် အင်မော်တယ်ဘုရင် နှလုံးသားပေါ်ရှိ တာအိုကြိုးအများစုမှာ ပြိုကွဲသွားခဲ့ကာ အနည်းငယ်မျှသာ ကျန်ရစ်တော့၏။
" တကယ်ကို အသုံးမကျတာပဲ... သူတို့ရဲ့ စွမ်းအားတွေအကုန် စုပ်ယူပြီးတာတောင် အင်မော်တယ်ဘုရင် နှလုံးသားရဲ့ တံဆိပ်ခတ်ထားတာကို အကုန် မဖြေနိုင်သေးပါလား "
အင်မော်တယ်ဘုရင် နှလုံးသားပေါ်၌ ကျန်ရစ်နေသေးသော ကြိုးအနည်းငယ်ကို ကြည့်လျက် ရှောင်ယောက်ထျန်းကျွင်း၏ မျက်ဝန်းများထဲတွင် မကျေနပ်သည့် အရိပ်အယောင်များ ပေါ်လာ၏။ သို့သော် သူသည် အင်မော်တယ်တစ်သောင်းမျှော်စင်မှ စစ်မှန်သော အင်မော်တယ်နှစ်ပါးကို ကြည့်ကာ ရက်စက်သော အပြုံးဖြင့် ပြောဆိုလိုက်သည်။
" ဒါပေမဲ့လည်း ကောင်းပါသေးတယ်... အင်မော်တယ်ဘုရင် နှလုံးသား ပွင့်လာတဲ့ ပမာဏက ငါအရှင်ရဲ့ နောက်တစ်ဆင့် စီမံကိန်းကို ဆက်လုပ်ဖို့ လုံလောက်ပါတယ် "
" မင်း ငါတို့ကို သတ်ရဲတယ်ဆိုရင် မင်းရဲ့ အင်မော်တယ်ဘုံ တက်လှမ်းမယ့်လမ်းကို လုံးဝ ဖြတ်တောက်လိုက်တာပဲ... ပြီးတော့ အင်မော်တယ်တစ်သောင်းမျှော်စင်က နောက်ကျရင် မင်းကို သေချာပေါက် စာရင်းရှင်းလိမ့်မယ်... အင်မော်တယ်တစ်သောင်းမျှော်စင်က ပေးတဲ့ သက်တမ်းရှည်ဆေး မရှိရင် ဒီအောက်ဘုံမှာ ကံကောင်းမှုတွေ ဘယ်လောက်ပဲ ရရ ဘာအသုံးကျမှာလဲ... နောက်ဆုံးကျရင် မင်း အိုပြီးသေသွားမှာပဲ... မြေဝါပုံလေး ဖြစ်သွားမှာပဲ "
အင်မော်တယ်မျှော်စင် ကိုင်ဆောင်သူ၏ အရှိန်အဝါမှာ အားနည်းနေပြီ ဖြစ်သော်လည်း သူသည် 'ကြမ်းတမ်းသော စကားများ' ကို ပြောဆိုနေဆဲပင်။
ဤရှောင်ယောက်ထျန်းကျွင်းသည် သူတို့နှစ်ဦးကို လွှတ်ပေးရန် ဆန္ဒမရှိကြောင်း သူ သိ၏။ ယခုအခါ တစ်ဖက်လူ စိတ်ပြောင်းသွားစေရန်အတွက် သက်တမ်းရှည်ခြင်းနှင့် အင်မော်တယ်ဘုံ တက်လှမ်းခြင်းတို့ကို အသုံးပြုပြီး သွေးဆောင်ရုံသာ တတ်နိုင်တော့သည်။
မည်သို့ပင်ဆိုစေကာမူ ဤအင်မော်တယ်ဘုရင် နှလုံးသားသည် စွမ်းအားကြီးသည်ဆိုသော်ငြားလည်း နောင်တွင် အင်မော်တယ်တစ်သောင်းမျှော်စင်မှ ပေးသနားသော သက်တမ်းရှည်ဆေး မရှိပါက ထျန်းကျွင်းအဆင့်သာရှိသော ရှောင်ယောက်ထျန်းကျွင်းသည် သက်တမ်းကုန်ဆုံးချိန်တွင် ပျက်စီးသွားရမည် မဟုတ်ပါလော။
အင်မော်တယ်ဘုံသို့ မဝင်ရောက်နိုင်ခြင်းသည် အင်မော်တယ်ဘုံသို့ မတက်လှမ်းနိုင်ခြင်းကို ဆိုလိုပြီး ပျက်စီးဆုံးရှုံးရမည်မှာ အချိန်မရွေး ဖြစ်လာနိုင်သော ကိစ္စဖြစ်သည်။
အင်မော်တယ်တစ်သောင်းမျှော်စင် ဟူသော သစ်ပင်ကြီးကို ခိုင်မြဲစွာ ဖက်တွယ်ထားခြင်းကသာ မှန်ကန်သော လမ်းကြောင်း ဖြစ်သည်။
အင်မော်တယ်တစ်သောင်းမျှော်စင်နှင့် လမ်းခွဲမသွားစေရန်အတွက် သူတို့နှစ်ဦးကို သတ်၍မဖြစ်ပေ။
ဤသည်မှာ အင်မော်တယ်မျှော်စင် ကိုင်ဆောင်သူ၏ ရည်ရွယ်ချက်အစစ်အမှန်ပင်။
သို့သော် အင်မော်တယ်မျှော်စင် ကိုင်ဆောင်သူ၏ ခြိမ်းခြောက်စကားများကို ရင်ဆိုင်ရသော်ငြား ရှောင်ယောက်ထျန်းကျွင်းမှာမူ လုံးဝ တုန်လှုပ်ပုံမရဘဲ မျက်နှာပေါ်ရှိ လှောင်ပြောင်သော အပြုံးသည်ပင် ပို၍ နက်ရှိုင်းလာလေသည်။
" ငါအရှင်က မင်းတို့နှစ်ယောက်ကို ဘာလို့ အရှင်ထားထားလဲဆိုတာ သိလား "
" ငါအရှင်က စစ်မှန်တဲ့ အင်မော်တယ် ဖြစ်လာတာကို မင်းတို့ မျက်စိနဲ့တပ်အပ် မြင်ပြီးမှ စိတ်ချလက်ချ သေသွားစေချင်လို့လေ "
" အင်မော်တယ်တစ်သောင်းမျှော်စင်ရဲ့ လက်တုံ့ပြန်မှုအတွက်တော့ မင်းတို့ ပူစရာမလိုပါဘူး... ငါအရှင်က အရာအားလုံးကို သူ့အပေါ် ပုံချလိုက်မှာလေ... ဘာပဲဖြစ်ဖြစ် မင်းတို့က ကုချန်ကို လိုက်သတ်ဖို့ လာကြတာပဲ... အခု သေသွားတယ်ဆိုရင်တောင် ဒီကုချန်ကြောင့်ပဲ ဖြစ်ရမှာပေါ့... ငါအရှင်နဲ့ ဘာဆိုင်လို့လဲ... ဟားဟားဟား "
ထိုအချိန်၌ ရှောင်ယောက်ထျန်းကျွင်း၏ အကြည့်များသည် ဘေးရှိ ကုချန်ထံသို့ ရောက်ရှိသွားလျက် ကျေနပ်အားရစွာ ပြောဆိုလိုက်သည်။
" မင်း တော်တော်ကောင်းသားပဲ... ထွက်ပြေးဖို့ မကြိုးစားဘူး... ဒီတော့ ငါအရှင်က မင်းကို သဘောကောင်းပြီး မြန်မြန်ဆန်ဆန် ဇာတ်သိမ်းပေးလိုက်မယ် "
ယုံကြည်မှုများ ပြည့်နှက်နေသော ရှောင်ယောက်ထျန်းကျွင်းကို ကြည့်ကာ ဘေး၌ ပွဲထိုင်ကြည့်နေသော ကုချန်မှာမူ အနည်းငယ် ပြုံးရုံသာ ပြုံးလိုက်၏။
ဇာတ်လမ်းက မပြီးသေးဘူးလေ။ ဒီတော့ ဒီရှောင်ယောက်ထျန်းကျွင်းကို ခဏလောက် ပျော်ခွင့်ပေးထားလိုက်ပါဦးမယ်။
ထို့ပြင် ရှောင်ယောက်ထျန်းကျွင်းအနေဖြင့် အင်မော်တယ်ဘုံသို့ မတက်လှမ်းဘဲ စစ်မှန်သော အင်မော်တယ်အဆင့်ကို ရောက်ရှိနိုင်မည်ဟု မည်သို့ ယုံကြည်မှု ရှိနေသနည်း ဆိုသည်ကို ကုချန် အမှန်တကယ် သိလိုစိတ် ပြင်းပြနေမိသည်။
သူက ဒီဟွမ်သွမ့်ပင်လယ်ထဲမှာ အင်မော်တယ်ဘုံနဲ့မခြားနားဘဲ တာအိုတရားတွေ ပြည့်စုံပြီး သူ့ကို အဆင့်တက်အောင် ကူညီပေးနိုင်မယ့် 'ရတနာနယ်မြေ' တစ်ခုခုများ ရှာတွေ့ထားတာများလား။
အခန်း ( ၃၄၄ ) - ရူးသွပ်ဖွယ်ရာ အတွေး၊ သန့်စင်သော နယ်မြေ၊ အတူတကွ အင်မော်တယ်တက်လှမ်းခြင်း
" ဒါမဖြစ်နိုင်ဘူး! အောက်ကမ္ဘာမှာ စိတ်ဝိညာဉ်ချီက ပါးလျတယ်... ဒီနေရာမှာ စစ်မှန်တဲ့ အင်မော်တယ်အဆင့်ကို ဘယ်လိုလုပ် တက်လှမ်းနိုင်မှာလဲ? ဒါက ရူးမိုက်တဲ့ အိပ်မက်သက်သက်ပဲ! "
ရှောင်ယောက်ထျန်းကျွင်း၏ မောက်မာသောစကားများကို ကြားလိုက်ရချိန်တွင် အင်မော်တယ်မျှော်စင် ကိုင်ဆောင်သူသည် တစ်ဖက်လူမှ သူ့အား လွှတ်ပေးမည်မဟုတ်ကြောင်း နားလည်သွားပုံရသည်။ သူသည် ချက်ချင်းပင် လှောင်ပြောင်လိုက်ကာ.....
" စစ်မှန်တဲ့ အင်မော်တယ်အဆင့်ဆိုတာ အင်မော်တယ်ကမ္ဘာကပဲ ထိန်းထားပေးနိုင်တာ... ဒီလို သေးငယ်တဲ့ အောက်ကမ္ဘာမှာ အထွတ်အထိပ်အဆင့်ကို ရောက်ဖို့ဆိုတာတောင် အကန့်အသတ်ဖြစ်နေပြီ.....
ထျန်းကျွင်းအဆင့်ကို ရောက်ဖို့ ကံကောင်းခဲ့တဲ့ မင်းလိုလူမျိုးတွေက... အင်မော်တယ်တစ်သောင်းမျှော်စင်ကနေ အသက်ရှည်စေတဲ့ အရာတွေကို ပေးသနားခဲ့လို့သာ ဖြစ်နိုင်ခဲ့တာ.....
မင်းက စစ်မှန်တဲ့ အင်မော်တယ်အဆင့်ကို တက်လှမ်းချင်နေသေးတာလား? ဟားဟားဟား.. ရိုးအလွန်းတယ်... တကယ်ကို ရိုးအလွန်းတယ်! "
အနီးတွင် ရပ်နေသော အင်မော်တယ်အယ်စောက် ကိုင်ဆောင်သူမှာမူ တိတ်ဆိတ်နေခဲ့သော်လည်း သူ၏မျက်နှာထက်ရှိ လှောင်ပြောင်လိုသော အမူအရာသည် သူ၏အတွင်းစိတ်ကို ဖော်ပြနေပေသည်။
အောက်ကမ္ဘာတွင် အင်မော်တယ်အဆင့်သို့ တက်လှမ်း၍မရနိုင်ဆိုသည်မှာ ပြောင်းလဲ၍မရသော သံမဏိစည်းမျဉ်းတစ်ခုပင် ဖြစ်သည်။ ကမ္ဘာတည်ကတည်းက ဤသံမဏိစည်းမျဉ်းကို မည်သူက ချိုးဖောက်နိုင်ခဲ့ဖူးသနည်း။
ယခင်က အဆုံးမဲ့ကမ္ဘာ၏ လူသားဧကရာဇ်ပင်လျှင် ဤသို့ပြုလုပ်ရန် ကျရှုံးခဲ့ရသည်။ အင်မော်တယ်တစ်သောင်းမျှော်စင်မှ မွေးမြူထားသော ခွေးတစ်ကောင်မျှသာဖြစ်သည့် ဤရှောင်ယောက်ထျန်းကျွင်းသည် စစ်မှန်သော အင်မော်တယ်အဆင့်သို့ တက်လှမ်းရန် ရဲဝံ့စွာ အိပ်မက်မက်နေသည်လော။
သို့သော် စစ်မှန်သော အင်မော်တယ်နှစ်ပါး၏ လှောင်ပြောင်မှုအား ရင်ဆိုင်ရချိန်တွင် ရှောင်ယောက်ထျန်းကျွင်း၏ မျက်နှာအမူအရာမှာ ပြောင်းလဲသွားခြင်း မရှိချေ။
" ငါ့ရဲ့ နှစ်သန်းချီတဲ့ အစီအစဉ်ကို မင်းတို့လို သာမန်လူတွေက ဘယ်လိုလုပ် နားလည်နိုင်မှာလဲ? ကောင်းပြီလေ... ငါ ထျန်းကျွင်းက စစ်မှန်တဲ့ အင်မော်တယ်အဆင့်ကို ဘယ်လိုတက်လှမ်းမလဲဆိုတာ မင်းတို့မသေခင် ရှင်းရှင်းလင်းလင်း ပြပေးမယ်! "
ထိုသို့ပြောပြီးနောက် ရှောင်ယောက်ထျန်းကျွင်းသည် လက်နှစ်ဖက်ကို ဆန့်ထုတ်ကာ သူ၏ရှေ့ရှိ အင်မော်တယ်ဘုရင်၏ နှလုံးသားကို ဖမ်းဆုပ်၍ ပြင်းထန်စွာ ညှစ်လိုက်လေသည်။ ချက်ချင်းဆိုသလိုပင် အနက်ရောင် အင်မော်တယ်ဘုရင်၏ နှလုံးသားထဲမှ အဆုံးမရှိသော တာအိုစာလုံးများ ပေါက်ကွဲထွက်လာလျက် မရေမတွက်နိုင်သော တာအိုသံကြိုးများမှာ စက်လုံးသဏ္ဍာန် သိပ်သည်းစွာ ဖြစ်တည်လာကာ ရှောင်ယောက်ထျန်းကျွင်းအား လွှမ်းခြုံသွားတော့သည်။
ထိုအတိုင်းအဆမဲ့သော တာအိုစာလုံးများသည် ရှောင်ယောက်ထျန်းကျွင်း ဤနှစ်သန်းပေါင်းများစွာအတွင်း လျှို့ဝှက်စွာ ရိတ်သိမ်းစုဆောင်းခဲ့သော 'အထွတ်အထိပ် မဟာဆေးဝါး' အစိတ်အပိုင်းပင် ဖြစ်လေသည်။
၎င်းတို့သည် အထွတ်အထိပ်အရှင် ရာပေါင်းများစွာ၏ တာအိုများဖြစ်ပြီး သူတို့၏ တစ်သက်တာ နားလည်သဘောပေါက်မှုများနှင့် စွမ်းအားများဖြစ်သည်။
ထိုအထဲတွင် သူယခုလေးတင် စုပ်ယူခဲ့သော အင်မော်တယ်အယ်စောက် ကိုင်ဆောင်သူနှင့် အင်မော်တယ်မျှော်စင် ကိုင်ဆောင်သူတို့၏ စွမ်းအားများပင် ပါဝင်နေလေသည်။
ဤအင်မော်တယ်ဘုရင်၏ နှလုံးသားက ပံ့ပိုးပေးထားသော အဆုံးမဲ့စွမ်းအားများ ပေါင်းဆုံမှုသည် ဟွမ်သွမ့်ပင်လယ်မှ သီးခြားခွဲထွက်ကာ အံ့ဖွယ်နယ်မြေတစ်ခုကို တည်ဆောက်လိုက်၍ ကိုယ်ပိုင်ကမ္ဘာတစ်ခုအဖြစ် ဖန်တီးလိုက်သည်နှင့် တူနေပေသည်။
ထိုကမ္ဘာအတွင်းရှိ ရှောင်ယောက်ထျန်းကျွင်းမှာမူ လွန်ကဲစွာ ဝမ်းမြောက်နေသော အမူအရာရှိနေပြီး သူ၏လက်ဝါးများကို လေဟာနယ်ထဲသို့ ဆန့်ထုတ်ကာ တစ်စုံတစ်ခုကို ခံစားနေရသကဲ့သို့ မျက်လုံးများကို အနည်းငယ် မှိတ်ထားလေသည်။
" အင်မော်တယ်ကမ္ဘာ... အင်မော်တယ်ကမ္ဘာ... ဒါက အင်မော်တယ်ကမ္ဘာရဲ့ ခံစားချက်မျိုးလား? ဟားဟားဟား... တကယ်ကို စွဲမက်စရာကောင်းလိုက်တာ! "
ဤမြင်ကွင်းကို ကြည့်နေရင်း အင်မော်တယ်အယ်စောက် ကိုင်ဆောင်သူနှင့် အင်မော်တယ်မျှော်စင် ကိုင်ဆောင်သူတို့မှာ တုံ့ပြန်နိုင်ခြင်း မရှိသေးသော်လည်း ကုချန်၏ မျက်နှာပေါ်တွင်မူ ထူးဆန်းသော အမူအရာတစ်ခု ပေါ်လာခဲ့သည်။
ရှောင်ယောက်ထျန်းကျွင်းသည် စစ်မှန်သော အင်မော်တယ်အဆင့်သို့ တက်လှမ်းရန် မည်သို့ စီစဉ်ထားကြောင်းကို နောက်ဆုံးတွင် သူ နားလည်သွားလေပြီ။
အမှန်တကယ်တွင် သူသည် ၎င်း၏ နှစ်သန်းပေါင်းများစွာ စုဆောင်းထားမှုများကို အသုံးပြုကာ ကြီးမားစွာ တံဆိပ်ခွာထားပြီးဖြစ်သော အင်မော်တယ်ဘုရင်၏ နှလုံးသားကို အထောက်အပံ့ပြု၍ အောက်ကမ္ဘာတွင် အင်မော်တယ်ကမ္ဘာ၏ အနှစ်သာရနှင့် ယှဉ်ပြိုင်နိုင်သော 'သန့်စင်သော နယ်မြေ' တစ်ခုကို တည်ဆောက်ရန် ရည်ရွယ်ထားခြင်း ဖြစ်သည်။
ဤသန့်စင်သော နယ်မြေသည် ပမာဏအားဖြင့် မကျယ်ဝန်းသော်ငြား အနှစ်သာရအားဖြင့်မူ အင်မော်တယ်ကမ္ဘာ၏ ကောင်းကင်နှင့် မြေကြီးအား ယှဉ်ပြိုင်နိုင်ရန် လုံလောက်ပေသည်။
သူလုပ်ဆောင်လိုသည်မှာ အင်မော်တယ်ကမ္ဘာ၏ ကောင်းကင်နှင့် မြေကြီးကို ယှဉ်ပြိုင်နိုင်သော ထိုနယ်မြေအတွင်း၌ စစ်မှန်သော အင်မော်တယ်အဆင့်သို့ တက်လှမ်းရန်ပင် ဖြစ်သည်။
မည်မျှ ထက်မြက်လှသော အကြံအစည်နည်း။ တကယ်ကို ပြောင်မြောက်လှသော အကြံအစည်ပင်။
ရှောင်ယောက်ထျန်းကျွင်း၏ ရည်ရွယ်ချက်ကို သိရှိပြီးနောက် ကုချန်ပင်လျှင် မချီးကျူးဘဲ မနေနိုင်အောင်ဖြစ်လျက် သက်ပြင်းချမိသွားသည်။
အင်မော်တယ်တက်လှမ်းခြင်းကို ရရှိရန်အတွက် ရှောင်ယောက်ထျန်းကျွင်းသည် ဤကဲ့သို့သော နည်းလမ်းကို အမှန်တကယ် ဖန်တီးနိုင်ခဲ့သည်။
အဆုံးမဲ့ကမ္ဘာတွင် အထွတ်အထိပ်အဆင့်သို့ တက်လှမ်းရန် အလွန်ခက်ခဲသည်မှာ မှန်သော်လည်း ရှေးခေတ်က အထွတ်အထိပ်အဆင့်သို့ တက်လှမ်းနိုင်ခဲ့သူများ၏ ပါရမီနှင့် စွမ်းရည်များသည် ထိုအဆင့်အထိသာ ရောက်ရှိနိုင်သည်ဟု မဆိုလိုပေ။ သူတို့ အင်မော်တယ်တက်လှမ်းခြင်းကို မရရှိနိုင်ခဲ့ခြင်းမှာ အဆုံးမဲ့ကမ္ဘာ၏ ကောင်းကင်နှင့် မြေကြီး၏ အခြေခံသဘာဝမှ ခွင့်မပြုသောကြောင့်သာ ဖြစ်သည်။
သို့သော် ဤအထွတ်အထိပ်အရှင်များ၏ တာအိုများသည် ကမ္ဘာ၏ အထွတ်အထိပ်အထက်သို့ ပျံသန်းကာ အဆုံးမဲ့ကမ္ဘာ၏ အဆုံးမဲ့တာအိုကိုပင် ကျော်လွန်နေပြီ ဖြစ်သည်။
ယခုအခါ အထွတ်အထိပ်အရှင် ရာပေါင်းများစွာ၏ တာအိုနှင့် နားလည်သဘောပေါက်မှုများ စုစည်းထားမှုအပြင် ဤစစ်မှန်သော အင်မော်တယ်နှစ်ပါး၏ တာအိုများပါ ပေါင်းထည့်ထားကာ အင်မော်တယ်ဘုရင်၏ နှလုံးသားဖြင့် ထပ်မံမြှင့်တင်ထားသဖြင့် အင်မော်တယ်ကမ္ဘာ၏ အနှစ်သာရနှင့် နှိုင်းယှဉ်နိုင်သော ကောင်းကင်နှင့် မြေကြီးငယ်တစ်ခုကို ယာယီတည်ဆောက်နိုင်သည်ဆိုသည်မှာ လုံးဝနားလည်၍ မရနိုင်သောအရာ မဟုတ်တော့ချေ။
လက်ရှိရလဒ်အရ ရှောင်ယောက်ထျန်းကျွင်း၏ ရည်ရွယ်ချက်မှာ ရှင်းလင်းစွာပင် အောင်မြင်သွားခဲ့ပြီ ဖြစ်သည်။
တစ်ဖက်လူ ရပ်တည်နေသော နယ်မြေသည် အဆုံးမဲ့တာအို၏ အနှစ်သာရအရ နတ်ဆိုးနယ်မြေရှိ မည်သည့် မိစ္ဆာနယ်မြေထက်မျှ မနိမ့်ကျကြောင်း ကုချန် ခံစားနိုင်လေသည်။
တစ်နည်းဆိုရသော် ရှောင်ယောက်ထျန်းကျွင်း၏ ကိုယ်ပိုင်စုဆောင်းမှု လုံလောက်နေသရွေ့ ဤနယ်မြေအတွင်း၌ အင်မော်တယ်တက်လှမ်းခြင်းကို သူ အပြည့်အဝ ကြိုးစားနိုင်ပေသည်။
" နှမြောစရာပဲ "
ကုချန်မှ ခပ်တိုးတိုး သက်ပြင်းချလိုက်သည်။
ဤအရာကို သိရှိပြီးနောက် သူသည် ထိုနယ်မြေကို လုယူကာ ၎င်းအတွင်း၌ အင်မော်တယ်တက်လှမ်းရန်ပင် တွေးတောမိသေးသည်။ သို့သော် အတန်ငယ် စဉ်းစားပြီးနောက် ကုချန်သည် လက်လျှော့လိုက်ရုံမှတစ်ပါး အခြားရွေးချယ်စရာ မရှိတော့ပေ။
အကြောင်းမှာ ယာယီတည်ဆောက်ထားသော ဤသန့်စင်သည့် နယ်မြေအတွင်း ပါဝင်သော စွမ်းအားမှာ အကန့်အသတ်ရှိနေသောကြောင့်ပင်။ ၎င်းသည် ရှောင်ယောက်ထျန်းကျွင်း၏ အင်မော်တယ်တက်လှမ်းခြင်းကို ပံ့ပိုးပေးနိုင်သော်လည်း ကုချန်၏ အင်မော်တယ်တက်လှမ်းခြင်းအတွက်မူ ကူညီပေးနိုင်မည် မဟုတ်ချေ။
ကုချန်၏ လက်ရှိ အခြေခံအရ သူသာ အင်မော်တယ်အဖြစ် တက်လှမ်းလိုပါက အတိုင်းအဆမသိနိုင်သော တာအိုစွမ်းအား ပမာဏကို လိုအပ်မည်ဖြစ်သည်။
ရှောင်ယောက်ထျန်းကျွင်း၏ နှစ်သန်းချီ စုဆောင်းမှုမှာ များပြားလှသော်လည်း ကုချန်အတွက်မူ ပင်လယ်ထဲမှ ရေတစ်စက်မျှသာ ဖြစ်နေသည်။ အကယ်၍ သူသာ ထိုသန့်စင်သော နယ်မြေထဲသို့ ဝင်ရောက်သွားပါက ၎င်းအတွင်းရှိ တာအိုနှင့် စွမ်းအားအားလုံးကို မျက်စိတစ်မှိတ်အတွင်း စုပ်ယူပစ်လိုက်နိုင်သည်ဖြစ်ရာ လုံလောက်မည်ပင် မဟုတ်ချေ။
တစ်နည်းဆိုရသော် အင်မော်တယ်တက်လှမ်းရန်အတွက် သူသည် အင်မော်တယ်ကမ္ဘာ မဟုတ်လျှင် နတ်ဆိုးနယ်မြေကဲ့သို့ ကြီးမြတ်သော အနှစ်သာရရှိသည့် ကျယ်ပြောလှသော ကောင်းကင်နှင့် မြေကြီးအတွင်း၌ ရှိနေရန် လိုအပ်သည်။ ရှောင်ယောက်ထျန်းကျွင်း၏ နည်းလမ်းမှာ သူ့ကိုယ်သူ အင်မော်တယ်တက်လှမ်းရန် ကူညီပေးနိုင်သော်လည်း ကုချန်အတွက်မူ အသုံးမဝင်လှပေ။
ဤအရာကို နားလည်သွားပြီးနောက် ကုချန်သည် ချက်ချင်းလှုပ်ရှားမည့် အတွေးကို စွန့်လွှတ်လိုက်ပြီး နောက်သို့ဆုတ်ကာ အေးဆေးစွာဖြင့် ပြဇာတ်ကိုသာ ဆက်လက်ကြည့်ရှုနေလိုက်သည်။
ထိုသန့်စင်သော နယ်မြေအတွင်း ရှောင်ယောက်ထျန်းကျွင်း၏ အရှိန်အဝါသည် ထိန်းချုပ်မှု တစ်ခုခုကို ချိုးဖောက်လိုက်သကဲ့သို့ အဆမတန် မြင့်တက်လာကာ ထျန်းကျွင်းအဆင့်၏ အမြင့်ဆုံး အကန့်အသတ်ကို ရှင်းလင်းစွာ ကျော်လွန်သွားလျက် စစ်မှန်သော အင်မော်တယ်အဆင့်ဆီသို့ တောက်လျှောက် တက်လှမ်းသွားတော့သည်။
" အင်မော်တယ်တက်လှမ်းခြင်း! မင်းတို့အားလုံးကိုပါ အင်မော်တယ်တက်လှမ်းဖို့ ငါခေါ်သွားပေးမယ်! ဟားဟားဟား! "
ရှောင်ယောက်ထျန်းကျွင်းသည် ရူးသွပ်စွာ ရယ်မောလေသည်။ သူ၏အရှိန်အဝါများ မြင့်တက်လာသည်နှင့်အမျှ သူ၏ ခန္ဓာကိုယ်အစိတ်အပိုင်း အသီးသီးမှ လိမ်ကောက်နေသော ဝိညာဉ်မျက်နှာ ရာပေါင်းများစွာ ဖောင်းကြွထွက်ပေါ်လာသည်မှာ လွတ်မြောက်ရန် ရုန်းကန်နေကြသကဲ့သို့ပင်။
ဤသည်မှာ ရှောင်ယောက်ထျန်းကျွင်း တည်ဆောက်ထားသော သန့်စင်သည့် နယ်မြေ၏ နောက်ထပ် အားနည်းချက်တစ်ခု ဖြစ်သည်။
အင်မော်တယ်ကမ္ဘာရှိ ကောင်းကင်နှင့် မြေကြီး၏ စစ်မှန်သော တာအိုသည် ဟန်ချက်ညီကာ သဟဇာတဖြစ်၍ အညစ်အကြေးမှန်သမျှ ကင်းစင်ပေသည်။ သို့သော် ရှောင်ယောက်ထျန်းကျွင်း တည်ဆောက်ထားသော သန့်စင်နယ်မြေ၏ အခြေခံတာအိုမှာ အထွတ်အထိပ်အရှင် ရာပေါင်းများစွာ၏ တာအိုအပေါ်တွင် အခြေခံ၍ တည်ဆောက်ထားခြင်း ဖြစ်သည်။
ရှောင်ယောက်ထျန်းကျွင်းသည် ဤအထွတ်အထိပ်အရှင်များ ချန်ရစ်ခဲ့သော ကျန်ရစ်နေသည့် အတွေးများကို အစွမ်းကုန် သန့်စင်ရန် ကြိုးစားခဲ့သော်လည်း ၎င်းတို့ကို အပြည့်အဝ မသန့်စင်နိုင်သေးချေ။
အစကတည်းက ကြောက်မက်ဖွယ်ကောင်းနေသော အင်မော်တယ်ဘုရင်၏ နှလုံးသားနှင့် ပေါင်းစပ်သွားသောအခါ ပို၍ပင် ဆိုးရွားသွားလေသည်။
ထို့ကြောင့် ဤသန့်စင်သော နယ်မြေ၏ အနှစ်သာရသည် ပုံပျက်နေခြင်းများနှင့် အာရုံလွဲမှားစေသော အတွေးများဖြင့် ပြည့်နှက်နေပြီး ၎င်းအတွင်း၌ အဆင့်တက်လှမ်းနေသည့် ရှောင်ယောက်ထျန်းကျွင်းအား သဘာဝအလျောက် သက်ရောက်မှုရှိကာ သူ၏ နတ်ဘုရားဝိညာဉ်နှင့် အသိစိတ်ပင်လယ်ကို ညစ်ညမ်းသွားစေသည်။
" မင်း ရူးနေပြီ... မင်း လုံးဝကို ရူးနေပြီပဲ! "
ယခုအချိန်တွင် အင်မော်တယ်အယ်စောက် ကိုင်ဆောင်သူနှင့် အင်မော်တယ်မျှော်စင် ကိုင်ဆောင်သူတို့ပင်လျှင် မည်မျှပင် သဘောပေါက်ရန် နှေးကွေးနေပါစေ ရှောင်ယောက်ထျန်းကျွင်း မည်သို့တွေးတောကာ မည်သည့်အရာများ လုပ်ဆောင်နေသည်ကို နားလည်သွားကြလေပြီ။
သို့သော် အင်မော်တယ်တက်လှမ်းရန် ဤမျှ ရူးသွပ်သော နည်းလမ်းကို ရွေးချယ်လိုက်သည်မှာ သူ့ကိုယ်သူ ဆုံးရှုံးသွား၍ ဖော်ပြ၍မရနိုင်သော 'မိစ္ဆာကောင်' တစ်ကောင် ဖြစ်သွားစေလိမ့်မည်။ သူသည် အမှန်တကယ်ပင် မကြောက်ရွံ့ဘူးလော။
" ငါက ရှေးခေတ်ကနေ ဒီနေ့ခေတ်အထိ လွှမ်းမိုးနိုင်ဖို့ နှစ်ပေါင်းများစွာ ကြံစည်လာခဲ့တာ! လူသားဧကရာဇ်တောင် ကျရှုံးခဲ့ရတယ်! အင်မော်တယ်တစ်သောင်းမျှော်စင်ကိုလည်း ငါ လှည့်စားပစ်ဦးမှာ! သာမန် အင်မော်တယ်တက်လှမ်းတာလောက်က ငါ့ကို ဘယ်လိုလုပ် တားဆီးနိုင်မှာလဲ!! "
ရှောင်ယောက်ထျန်းကျွင်းသည် သူ၏ခန္ဓာကိုယ်အတွင်းမှ အဆက်မပြတ် ထွက်ပေါ်လာနေသော ဝိညာဉ်မျက်နှာ ရာပေါင်းများစွာကို ဖိနှိပ်ထားရန် ရုန်းကန်နေရရင်း ကျယ်လောင်စွာ အော်ဟစ်လိုက်တော့သည်။