အခန်း (၁၈၉)
Vol. 19 Ch. 189
နတ်ဘုရားအဆင့် ပုံဆောင်ခဲသားရဲတွေပဲလာလာ ရန်ငြိုးဖွဲ့နတ်ဘုရားတွေပဲလာလာ၊ ဒါမှမဟုတ် နတ်ဘုရားအဆင့် တစ္ဆေသဘက် တွေပဲလာလာ... သူတို့အားလုံးဟာ ဒီနတ်ဘုရားအဆင့် အမြစ်အရိုးရဲ့ ရှေ့မှာတော့ တုန်လှုပ်ခြောက်ခြားသွားကြမှာ အမှန်ပဲ။
ဦးလေးယဲ့သည် မျက်လုံးအဝိုင်းသားဖြင့် ရွှီရန်ကို ကြည့်နေမိပြီး သူ၏အကြည့်များအတွင်း၌ တုန်လှုပ်မှုများနှင့်အတူ ကြည်ညိုလေးစားမှုများပါ အပြည့်အဝ ဖုံးလွှမ်းလျက် ရှိနေသည်။
ဦးလေးယဲ့ဖျင်၏ အမူအရာကို မြင်တွေ့လိုက်ရသောအခါ ရွှီရန်က အလျင်အမြန်ပင် နှုတ်ခမ်းထက်၌ လက်ညှိုးတင်ကာ တိတ်ဆိတ်စွာနေရန် အချက်ပြလိုက်ပြီး “မလောပါနဲ့ဦး ဦးလေးရာ... မလောပါနဲ့။ ဦးလေး စိတ်လှုပ်ရှားနေတာကို ကျွန်တော် သိတယ်။ ဒါပေမဲ့ ခဏတော့ ထိန်းထားပေးပါဦး”
“ကျွန်တော် တကယ်ပဲ အောင်မြင်ပြီလို့ ပြောလို့မရသေးပါဘူး။ အနည်းဆုံး နောက်ထပ် ရက်ပေါင်း နှစ်ရာခန့်တော့ တိတ်တဆိတ် ထပ်မံလေ့လာရဦးမယ်။ အဲဒီအချိန်ကျမှသာ အဖြေအမှန်က ထွက်ပေါ်လာမှာပါ။ ဒီအတောအတွင်းမှာ ဦးလေးယဲ့အနေနဲ့ ဘယ်သူ့ကိုမှ စကားမပေါက်ကြားစေဖို့ လုံးဝ အရေးကြီးပါတယ်”
“ကျွန်တော် အောင်မြင်သွားတဲ့ အချိန်ကျမှသာ အဆောင်လက်ဖွဲ့ ရန်ငြိုးဖွဲ့နတ်ဘုရားကို သတ်ဖြတ်နိုင်မယ့် နည်းလမ်းကို ရှာတွေ့နိုင်မှာမလို့ပါ”
ဤစကားကို ကြားလိုက်ရသည့်အခါတွင်မူ ယဲ့ဖျင်သည် သူ၏ရင်ထဲမှ တုန်လှုပ်မှုများကို ထိန်းချုပ်နိုင်ရန် အသက်ကို ပြင်းပြင်းရှူသွင်းလိုက်ရကာ “နားလည်ပါပြီ... ငါ လျှို့ဝှက်ထားပေးပါ့မယ်။ ဒါပေမဲ့ မင်းကတော့ တကယ့်ကို အနှိုင်းမဲ့တဲ့ ကောင်လေးပဲ ရွှီရန်ရာ။ တကယ့်ကို အံ့ဖွယ်အမြစ်အရိုးနဲ့ ထိုက်တန်တဲ့သူပဲ” ဟု ပြောလိုက်သည်။
ရွှီရန်၏ စရိုက်ကို ယဲ့ဖျင် မသိဘဲ မနေပေ (၉၈ ရာခိုင်နှုန်းခန့် သေချာမှုမရှိလျှင် ရွှီရန်သည် သူအောင်မြင်ပြီဟု ဘယ်သောအခါမျှ အပိုင်ပြောမည့်သူ မဟုတ်ပေ။ ထို့ကြောင့် ရွှီရန်သည် အောင်မြင်မှု၏ လမ်းစကို အသေအချာ ရှာဖွေတွေ့ရှိထားပြီဖြစ်ကြောင်း သူ သိရှိနေသည်။
ဦးလေးယဲ့တစ်ယောက် စိတ်လှုပ်ရှားလွန်းသဖြင့် အမူအရာများ ပျက်ယွင်းနေသည်ကို ကြည့်ရှုရင်း ရွှီရန်ကမူ စကားတစ်ခွန်းမျှ မဆိုဘဲ ပြုံးနေမိသည်။ သူသည် “လျှို့လျှို့ဝှက်ဝှက်ပဲ နေပါ... လျှို့လျှို့ဝှက်ဝှက်ပဲ နေပါ” ဟူသော အမူအရာမျိုးကိုသာ ဆက်တိုက် ပြုလုပ်ပြနေသည်။
၎င်းတို့မှာ ပုံမှန်လုပ်ဆောင်ချက်များမျှသာ ဖြစ်ပါသဖြင့် အံ့ဩမနေသင့်ပေ။
“ငါသာ ကြက်သွေးရောင်အမြစ်အရိုးကို ထုတ်ယူနိုင်တဲ့နေ့ကျရင် အဲဒါကိုမှ အနှိုင်းမဲ့တယ် လို့ ခေါ်တာကွ။ ဟုတ်ပြီလား”
“အဲဒီအချိန်ကျရင် လွှမ်းမိုးနိုင်စွမ်းရှိပြီး တစ်ဦးတည်းသောအမြစ်အရိုးဆိုတာ ဘာလဲဆိုတာကို မင်းတို့ကို ငါ ပြပေးမယ်”
ရွှီရန်က ခပ်အေးအေးလေး ပြုံးလိုက်သည်။
ရွှီရန်၏ တည်ငြိမ်လှသော အပြုံးကို ကြည့်ရင်း ယဲ့ဖျင်သည် ပတ်ဝန်းကျင်မှ အပူရှိန်ကို အဆုတ်ထဲသို့ ပြင်းပြင်းရှူသွင်းလိုက်ပြီး စိတ်ကို အကြာကြီး အေးအောင်ထားကာ ရွှီရန်၏ ပုခုံးကို လေးလေးပင်ပင် ပုတ်လိုက်သည်။
“ရက်ပေါင်း နှစ်ရာ စောင့်ရမယ်... ဟုတ်တယ်မလား”
ရွှီရန်က ခေါင်းညိတ်ပြလိုက်သည်။
“ဟုတ်ပါတယ်”
ယဲ့ဖျင်က ခေတ္တစဉ်းစားပြီး “သေချာပေါက် ဖြစ်နိုင်ပါတယ်။ အခု ငါတို့က အဆောင်လက်ဖွဲ့ ရန်ငြိုးဖွဲ့နတ်ဘုရား ရဲ့ အစီအစဉ် ၄၉ ခုကို ဖျက်ဆီးပစ်လိုက်ပြီး ဝိညာဉ်ယဇ်ပူဇော်တာတွေကို ဆက်မလုပ်နိုင်အောင် တားဆီးထားနိုင်ခဲ့ပြီ။ သူ နောက်ထပ် အစီအစဉ်အသစ်တွေ လုပ်ဖို့အတွက် အချိန်တစ်ခု ပြန်ယူရဦးမှာပဲ။ ဒါကြောင့် ရက်ပေါင်း နှစ်ရာဆိုတာ ပိုတောင် ပိုသေးတယ်”
“မင်းအတွက် စမ်းသပ်ဖို့နဲ့ တိုးတက်ဖို့ အချိန်အလုံအလောက် ရှိပါတယ်။ နတ်ဘုရားက ရုတ်တရက်ကြီး လှုပ်ရှားလာမှာကို စိုးရိမ်နေဖို့ မလိုဘူး”
ရွှီရန်က အားရပါးရ ရယ်မောလိုက်ပြီး “ကျွန်တော် သိပါတယ်။ အဲဒီ နတ်ဘုရားကတော့ ကျွန်တော်တို့ကြောင့် အကြိမ်ကြိမ် အနှောင့်အယှက် ဖြစ်နေရတာဆိုတော့ အတော်လေးကို စိတ်ပျက်နေလောက်ပြီ”
ယဲ့ဖျင်လည်း လိုက်ရယ်မိသည်။ ထို့နောက် သူသည် ထူးဆန်းသော ကျောက်တုံးကြီးများရှိရာဘက်သို့ လှည့်ကြည့်လိုက်သည်။
“ဒီအရာတွေကို မင်း ထပ်ပြီး လေ့လာဖို့ လိုသေးလား အထွေထွေစီမံခန့်ခွဲရေးဌာနမှာပဲ ခေတ္တ သိမ်းထားပေးရမလား”
ရွှီရန်က ခေတ္တစဉ်းစားလိုက်ပြီးနောက် နောက်ဆုံးတွင် ခေါင်းခါပြလိုက်သည်။
“ဌာနမှာ မသိမ်းထားပါနဲ့၊ ဘေးကင်းလုံခြုံရေးဇုန်ထဲက ရတနာတိုက်ဆီပဲ ပို့လိုက်ပါ။ အဲဒီမှာဆိုရင် အစီရင်တွေနဲ့ ဖိနှိပ်ထားလို့ ပိုကောင်းတယ်။ တကယ်လို့ နတ်ဘုရားက ကြိုတင်ပြင်ဆင်မှုတစ်ခုခုကျန်ခဲ့လို့ ယဇ်ပလ္လင်ကို ရုတ်တရက် အသက်သွင်းလိုက်ရင် ဒုက္ခရောက်ကုန်မယ်”
ရွှီရန်မှာ တကယ့်ကို ဂရုတစိုက်ရှိလှသည်။
ယဲ့ဖျင်က ခေါင်းညိတ်လျက် “အဓိပ္ပာယ်ရှိသားပဲ ဒါဆို ငါ လူလွှတ်ပြီး ဘေးကင်းလုံခြုံရေးဇုန်ထဲက ရတနာတိုက်ဆီ ပို့ခိုင်းလိုက်မယ်လေ”
ရွှီရန် "ကောင်းပါပြီ။ ဒီကိစ္စတွေကတော့ အတော်လေး အခြေကျသွားပြီဆိုတော့... ကျွန်တော် ပန်းခြံကိုပဲ ပြန်လိုက်တော့မယ်လေ"
ယဲ့ဖျင်က ဝမ်းသာအားရ ပြုံးပြလျက် "ငါ ကိုယ်တိုင် လိုက်ပို့ပေးပါ့မယ်"
ယခုဆိုလျှင် သူသည် ရွှီရန်ကဲ့သို့ပင် အလွန်အမင်း ပျော်ရွှင်နေမိသည်။ အမှန်စင်စစ် ရွှီရန်ထက်ပင် ပို၍ စိတ်လှုပ်ရှားနေသည်ဟု ဆိုနိုင်သည်။ အကြောင်းမှာ အဆောင်လက်ဖွဲ့ ရန်ငြိုးဖွဲ့နတ်ဘုရား၏ တတိယအကြိမ်မြောက် အကြံအစည်ကို ဖျက်ဆီးရာတွင် သူကိုယ်တိုင် ဦးဆောင်ခဲ့ရုံသာမက ရွှီရန်က လျှို့ဝှက်ဆန်းကြယ်အဆောင်လက်ဖွဲ့များကို အဓိပ္ပာယ်ဖော်
နိုင်သည်ကိုပါ မျက်မြင်တွေ့ခဲ့ရသောကြောင့်ပင်။
"ဒါနဲ့... ရက်ပေါင်း နှစ်ရာ ကြာပြီးရင် မင်းက အဆောင်လက်ဖွဲ့တွေကို ကိုယ်တိုင် ဖန်တီးနိုင်တော့မှာလား"
ရွှီရန်က မျက်ခုံးတစ်ချက် ပင့်လိုက်ရင်း "မသိသေးပါဘူး။ အစွမ်းကုန်တော့ ကြိုးစားကြည့်မှာပေါ့"
ယဲ့ဖျင် "မင်းကတော့ တကယ့်ကို နှုတ်လုံတဲ့ကလေးပဲ သတင်းအစအနလေးတောင် မပြောပြနိုင်ဘူးလား ငါတို့က ဖန်တီးထားတဲ့ အဆောင်လက်ဖွဲ့တွေကို ဘယ်လို သုံးရမှာလဲ"
ရွှီရန်က မတတ်နိုင်သလို ပုခုံးတွန့်ပြလိုက်သည် "ဦးလေးယဲ့ရာ... ကျွန်တော် တကယ် မသိသေးတာပါ။ နောက်ထပ် ရက်ပေါင်း နှစ်ရာ ကြာမှပဲ ဦးလေးကို ပြောပြနိုင်လိမ့်မယ်"
ရွှီရန်သည် အမှန်တကယ်ပင် ဟန်ဆောင်နေခြင်း မဟုတ်ပေ။
အမှန်စင်စစ် သူသည် အဆောင်လက်ဖွဲ့အတတ်နှင့် ပတ်သက်၍ ဘာမှ မသိသေးပေ။ အရှိန်မြှင့်အဆောင်လက်ဖွဲ့၊ နုပျိုခြင်းအဆောင်လက်ဖွဲ့၊ ကုသခြင်းအဆောင်လက်ဖွဲ့၊ ဝဇီရအဆောင်လက်ဖွဲ့ သို့မဟုတ် မီးလျှံအဆောင်လက်ဖွဲ့ တို့ကို မည်သို့ ပြုလုပ်ရမည်ဆိုသည်ကို လုံးဝ စိတ်ကူးမရှိသေးချေ။
ယုံကြည်ခြင်းအဆောင်လက်ဖွဲ့ကျွမ်းကျင်မှု အထွတ်အထိပ်ရောက်သည်အထိ စောင့်ဆိုင်းပြီးမှသာ တစ်ဆင့်ချင်း လေ့လာသွားရုံသာ ရှိသည်။
ထို့အပြင် သူ၏ ယုံကြည်ခြင်းအဆောင်လက်ဖွဲ့စွမ်းရည် တိုးတက်လာမှုသည် အဆောင်လက်ဖွဲ့ ရန်ငြိုးဖွဲ့နတ်ဘုရား ကို ယှဉ်ပြိုင်နိုင်မလား သို့မဟုတ် နတ်ဘုရား၏ စီမံချက်များကို ဖျက်ဆီးနိုင်မလား ဆိုသည်ကိုလည်း သူ မသိသေးပေ။
အဆောင်လက်ဖွဲ့စနစ်နှင့် ပတ်သက်၍ လူသားမျိုးနွယ်တို့မှာ မည်သည်ကိုမျှ မသိရှိကြသေးပေ။ သဘာဝကျကျပင် ရွှီရန်သည်လည်း ဘာမျှမသိသေးသဖြင့် ရက်ပေါင်းနှစ်ရာကြာမှ ထွက်ပေါ်လာမည့် အဖြေအတွက် အသည်းအသန် ကြိုးစားအားထုတ်ရန်သာ ရှိသည်။
ထို့ကြောင့်လည်း ရွှီရန်သည် အပိုင်တွက်၍ ကြွားဝါပြောဆိုခြင်း မပြုခြင်းပင်။ အကယ်၍ ယုံကြည်ခြင်းအဆောင်လက်ဖွဲ့က မလုံလောက်ခဲ့ဘဲ ရန်ငြိုးဖွဲ့နတ်ဘုရားကို ယှဉ်ပြိုင်ရန်အတွက် တတိယမြောက် စွမ်းရည်အဆင့်ဖြစ်သည့် ကောင်းကင်ဘုံစိတ်ဆန္ဒအဆောင်လက်ဖွဲ့အထိ အဆင့်မြှင့်တင်ရန် လိုအပ်ခဲ့ပါက သူပြောခဲ့သမျှမှာ ဟာသဖြစ်သွားနိုင်သောကြောင့်ပင်။
...
နာရီဝက်ခန့်အကြာတွင် ကားတစ်စီးသည် ပန်းခြံဝင်ပေါက်၌ ဆိုက်ရောက်လာသည်။
“သွားပြီနော် ဦးလေးယဲ့”
ဦးလေးယဲ့၏ နှုတ်ခမ်းများ တစ်ချက်လှုပ်ရှားသွားပြီး “အေးအေး။ ကြိုးစားအားထုတ်စမ်းပါဦး၊ ငါ မင်းရဲ့ သတင်းကောင်းကို စောင့်မျှော်နေမယ်။ သမိုင်းကို ပြောင်းလဲပေးမယ့် မင်းကို ငါ စောင့်နေမယ်” ဟု ပြောလိုက်သည်။
ရွှီရန်က ပြုံးလိုက်ရင်း “ကျွန်တော် အစွမ်းကုန် ကြိုးစားမှာပါ” ဟု ပြန်လည်ဖြေကြားခဲ့သည်။
ယဲ့ဖျင်သည် ရွှီရန်၏ အဆောင်လက်ဖွဲ့အတတ်အပေါ်၌ အတော်လေး မျှော်လင့်ချက်ကြီးမားနေသည်မှာ သိသာလှသည်။ သူသည် နတ်ဘုရားရွေ့လျားခြင်းအဆောင်လက်ဖွဲ့နှင့် ကုသခြင်းအဆောင်လက်ဖွဲ့တို့၏ စွမ်းအားများကို မျက်မြင်တွေ့ရှိဖူးခြင်းကြောင့်လည်း ဖြစ်နိုင်သည်။
“ငါလည်း အဲဒီလို အဆောင်လက်ဖွဲ့မျိုးတွေ ဖန်တီးနိုင်မှာပဲ မဟုတ်လား။ အရှိန်မြှင့်အဆောင်
လက်ဖွဲ့ဆိုတဲ့ နာမည်အရဆိုရင် လူတွေကို အရှိန်မြှင့်ပေးနိုင်မှာပဲ ဆိုလိုတာက နတ်ဘုရားရွေ့လျားခြင်းအဆောင်လက်ဖွဲ့ အသေးစားလေးပေါ့...”
“နုပျိုခြင်းအဆောင်လက်ဖွဲ့ကတော့ ခန္ဓာကိုယ်အခြေအနေကို ပြန်လည်ကောင်းမွန်စေတာ၊ သွေးစွမ်းအင်ကို ပြန်လည်ဖြည့်တင်းပေးတာမျိုး ဖြစ်ရမယ်။ တကယ်လို့ တိုက်ပွဲအလယ်မှာ ဒီလိုအဆောင်လက်ဖွဲ့မျိုး သုံးပြီး ခန္ဓာကိုယ်အခြေအနေကို ပြန်ထိန်းနိုင်မယ်ဆိုရင်တော့ တကယ့်ကို အနှိုင်းမဲ့သွားမှာပဲ”
“ကုသခြင်းအဆောင်လက်ဖွဲ့ကတော့ ကုသပေးတဲ့ အဆောင်လက်ဖွဲ့ပဲ ဖြစ်မှာပါ။ ဝဇီရအဆောင်လက်ဖွဲ့ကတော့ ခန္ဓာကိုယ်ရဲ့ ကြံ့ခိုင်မှုကို မြှင့်တင်ပေးမှာ မဟုတ်လား”
ရွှီရန် ကိုယ်တိုင်ပင်လျှင် တွေးတောရင်း အံ့အားသင့်သွားမိသည်။
“ငါ့ရဲ့ လက်ရှိခန္ဓာကိုယ် ကြံ့ခိုင်မှုနဲ့တင် ဝဇီရအဆောင်လက်ဖွဲ့ကိုသာ သုံးလိုက်ရင်... အဲဒါက တကယ်ကို စိတ်ဝင်စားဖို့ ကောင်းမှာပဲ။ ဒါ့အပြင် ငါ့ရဲ့ အဆောင်လက်ဖွဲ့တွေက ဘေးထွက်ဆိုးကျိုးလည်း မရှိဘူး။ အဆောင်လက်ဖွဲ့ တစ်မျိုးတည်းကိုတင် ၁၀ ကြိမ်အထိ ထပ်ဆင့်စွမ်းအားမြှင့်လို့ ရသေးတယ်။ တကယ်လို့ ဝဇီရအဆောင်လက်ဖွဲ့ ၁၀ ခုလုံးကို ငါ့အပေါ်မှာသာ ထပ်ဆင့်အသုံးပြုလိုက်ရင်... ငါ့ရဲ့ အနှိုင်းမဲ့စွမ်းအားက ဘယ်လောက်တောင် ဖြစ်သွားမလဲဆိုတာ တွေးကြည့်လို့တောင် မရနိုင်ဘူး...”
ဤသို့ တွေးမိလိုက်သည်နှင့် ရွှီရန်၏ မျက်ဝန်းများမှာ တောက်ပလာသည်။
“ကြည့်ရတာ ရှေ့လျှောက်ရက်တွေမှာတော့ ငါက စည်းကမ်းအရှိဆုံး ကျင့်ကြံသူတစ်ယောက်ပြန်ဖြစ်ရတော့မယ် ထင်တယ်”