အခန်း (၂၂၉-၂၃၁)

အခန်း (၂၂၉) - မျိုးစေ့များ ရှင်သန်ကြီးထွားခြင်းနှင့် အလယ်အလတ်အဆင့် ဝိညာဉ်အမြစ် ဖြစ်တည်လာခြင်း (အပိုင်း - ၂)

~စုယွီ၏ စိတ်အာရုံသည် လက်ထဲရှိ "ချန်မုနန်းတော်" လက်စွပ်ပေါ်တွင် စူးစိုက်နေ၏။ ၎င်းအတွင်း၌ ကြီးမားကျယ်ပြန့်သော နေရာလွတ်တစ်ခု ပါရှိ၏။

ယခုအခါ စုယွီ ပိုင်ဆိုင်သမျှ ပစ္စည်းအားလုံးနီးပါးကို ထိုလက်စွပ်ထဲတွင် သိမ်းဆည်းထားပြီ ဖြစ်သည်။

ဥပမာအားဖြင့် တာအိုဆရာ တောင်ပြား၏ ဂူစံအိမ်မှ ရရှိခဲ့သော အလယ်အလတ်အဆင့် ဝိညာဉ်ကျောက်တုံး တစ်သောင်းလေးထောင်ကျော်ကိုမူ သိပ်မသုံးရသေးပေ။

သို့သော် လီမိသားစု ဆေးပညာရှင် စုဆောင်းထားခဲ့သော ဒုတိယအဆင့် ဆေးလုံးကုန်ကြမ်းများကိုမူ စုယွီ အားလုံး အသုံးပြုလိုက်ပြီ ဖြစ်သည်။

စုမိသားစုမှ စုဆောင်းပေးသော ကုန်ကြမ်းများနှင့် ပေါင်းလိုက်ပါက လက်စွပ်ထဲတွင် ဒုတိယအဆင့် ဆေးလုံးပေါင်း ရှစ်ထောင်နီးပါး ရှိနေတော့သည်။

သူ့ပစ္စည်းများကို စစ်ဆေးရင်း စုယွီ တွေးလိုက်မိ၏။

'''ဒုတိယအဆင့် အဆင့်နိမ့်နဲ့ အလယ်အလတ်စား အဆောင်လက်နက်တွေကိုတော့ မိသားစုဆီ ပေးလိုက်ပြီ... တာ့ယွဲ့ နန်းတော်နဲ့ ကောင်းကင် အပျက်အစီးခန်းမက ရထားတဲ့ ဒုတိယအဆင့် ထိပ်တန်း ကုန်ကြမ်းတွေကို အကုန်သုံးပြီးတော့... အခု ငါ့လက်ထဲမှာ ဒုတိယအဆင့် ထိပ်တန်း အဆောင်လက်နက် (၁၉၁) ခု ရှိနေပြီ'''

'''အဲဒီအထဲမှာ ကုန်းကျင်း သတ္တုဓားအဆောင် ၊ ကောင်းကင်လောင်ကျွမ်း မီးအဆောင် ၊ ပင်လယ်နဂါး လှန်အဆောင် ၊ မြေကမ္ဘာနဂါး လွှမ်းခြုံအဆောင် နဲ့ သစ်သားဝိညာဉ် နတ်ဘုရားဝါးမြိုအဆောင် စတဲ့ သာမန် ဓာတ်ကြီးငါးပါး တိုက်ခိုက်ရေး အဆောင် (၁၂၆) ခု ပါတယ်... ကျန်တဲ့ (၆၂) ခုကတော့ ဘုရားသခင် အမြန်နှုန်း အဆောင် ၊ အသက်ရှူသံ ဖုံးကွယ်အဆောင် စတာတွေပေါ့'''

'''အင်မော်တယ် လက်ညှိုးအဆောင် ကတော့ (၃) ခု ရှိတယ်'''

စုယွီ တစ်ယောက်တည်း ရေရွတ်ရင်း သူ့လက်ထဲတွင် အဆောင် (၂၀၀) တောင် မပြည့်တော့သည်ကို သတိပြုမိလိုက်၏။

ထိုအထဲတွင် အင်မော်တယ် လက်ညှိုးအဆောင်သည် အစွမ်းအထက်ဆုံး ဖြစ်ပြီး သူ၏ ယုံကြည်အားထားရသော ဝှက်ဖဲ တစ်ချပ် ဖြစ်ပေသည်။

သာမန် တိုက်ခိုက်ရေး အဆောင် (၅) မျိုးအနက် ကုန်းကျင်း သတ္တုဓားအဆောင်နှင့် ပင်လယ်နဂါး လှန်အဆောင်တို့သည် ပစ်မှတ်တစ်ခုတည်းကို တိုက်ခိုက်သော အဆောင်များ ဖြစ်ကြသည်။ ကုန်းကျင်း သတ္တုဓားအဆောင်သည် ချပ်ဝတ်များကို ထိုးဖောက်ဖျက်ဆီးရာတွင် ကျွမ်းကျင်ပြီး၊ ပင်လယ်နဂါး လှန်အဆောင်ကမူ ကြမ်းတမ်းသော ခွန်အားဖြင့် ခံစစ်များကို ဖြိုခွင်းရာတွင် ထူးချွန်၏။

ကောင်းကင်လောင်ကျွမ်း မီးအဆောင်၊ မြေကမ္ဘာနဂါး လွှမ်းခြုံအဆောင်နှင့် သစ်သားဝိညာဉ် နတ်ဘုရားဝါးမြိုအဆောင် တို့မှာမူ ဧရိယာအလိုက် တိုက်ခိုက်သော အဆောင်များ ဖြစ်ကြပြီး စွမ်းအား မဆိုးလှပေ။

ဤအဆောင်လက်နက်များသာ ရှိနေပါက အခြေခံတည်ဆောက်ခြင်း အဆင့်တွင် သူ့ကို ခြိမ်းခြောက်နိုင်သူ ရှားပါးလိမ့်မည်ဟု စုယွီ ယုံကြည်ထား၏။

ထို့နောက် မကြာမီ ကျင်းပတော့မည့် လေ့ထင်း ဈေး အရောင်းအဝယ်ပွဲ အကြောင်းကို စဉ်းစားမိလိုက်၏။ စုယွီ မျက်ခုံးကြုတ်ကာ တွေးတောလိုက်သည်။

'''အဲဒီပွဲကျရင် ဘာတွေ ယူသွားပြီး ရောင်းဝယ်ရမလဲ'''

တကယ်တော့ သူ လိုချင်တာတွေက အများကြီး ရှိသည်။

ဥပမာ - မိုးကြိုးသွား ထွက်ပြေးအဆောင် နှင့် အင်မော်တယ် လက်ညှိုးအဆောင် လိုမျိုး ထူးခြားသော ဒုတိယအဆင့် ထိပ်တန်း အဆောင်တွေ ပြုလုပ်ဖို့ ကုန်ကြမ်းတွေ လိုချင်သည်။

ဒါမှမဟုတ် တတိယအဆင့် အဆင့်နိမ့် ရုပ်သေးသားရဲတွေ ပြုလုပ်ဖို့ ကုန်ကြမ်းတွေပေါ့။

ဟောင်ထျန်း ဆေးလုံး နှင့် ရွှေအမြုတေ ဆေးလုံး ပြုလုပ်ဖို့ ကုန်ကြမ်းတွေ ရနိုင်မည် ဆိုလျှင်လည်း လိုချင်သေးသည်။

ဝိညာဉ်သစ်သီးပင်တွေလို ရတနာမျိုး ဆိုရင်လည်း မဆိုးဘူးပေါ့။

ဒါ့အပြင် ဒုတိယအဆင့် ထိပ်တန်း ဆေးလုံးတွေ၊ အဆောင်တွေ၊ ရုပ်သေး ကုန်ကြမ်းတွေ ပိုရနိုင်လျှင်လည်း ဝယ်ချင်သေးသည်။

သူ့မှာ အလယ်အလတ်အဆင့် ဝိညာဉ်ကျောက်တုံး တစ်သောင်းကျော် ရှိသော်လည်း၊ ပစ္စည်းချင်း လဲလှယ်နိုင်လျှင်တော့ အကောင်းဆုံး ဖြစ်ပေလိမ့်မည်။

'''ဒုတိယအဆင့် ဆေးလုံး ထောင်ဂဏန်းလောက်နဲ့ ဒုတိယအဆင့် ထိပ်တန်း အဆောင် (၁၀၀) လောက် ယူသွားပြီး ရောင်းဝယ်လိုက်မယ်... ကိုယ့်ကိုယ်ကို ကာကွယ်ဖို့အတွက် အင်မော်တယ် လက်ညှိုးအဆောင် (၂) ခုလောက်တော့ ဆောင်သွားရမယ်'''

စုယွီ ဆုံးဖြတ်ချက် ချလိုက်၏။

'''ဒုတိယအဆင့် ထိပ်တန်း အဆောင် (၁၀၀) လောက် ရောင်းလိုက်မယ်... ပြီးရင် ကိုယ့်ကိုယ်ကို ကာကွယ်ဖို့ (၅၀) လောက် အပိုဆောင်သွားမယ်'''

အထွတ်အထိပ် မှော်လက်နက်တွေကတော့ ရှားပါးလွန်း၍.. ရောင်းထုတ်ဖို့ အစီအစဉ် မရှိပေ။

နောင်ကျရင် သေချာပေါက် သုံးရမှာမို့ သိမ်းထားတာ ပိုကောင်းသည်။

တကယ်တော့ သူ့ဆီမှာ တော်တော် တန်ဖိုးရှိသော နောက်ထပ် ပစ္စည်း တစ်ခု ရှိသေးသည်။ ထိုရတနာကတော့ သူ အခု ဖင်ခုထိုင်ထားသည့် တတိယအဆင့် "ယောင်ကျင်းဟောင်" ဝိညာဉ်သတ္တုကျောက်တုံးကြီးပင် ဖြစ်၏။

သို့သော် စုယွီအမြင်တွင် ကုန်ကြမ်းပစ္စည်းများကို ရောင်းချခြင်းသည် လုံးဝ တွက်ခြေမကိုက်ပေ။

အကယ်၍ ၎င်းတို့ကို မှော်လက်နက်များ သို့မဟုတ် ရုပ်သေးသားရဲများ အဖြစ် ပြုပြင်ဖန်တီးလိုက်ပါက တန်ဖိုး (၅) ဆမှ (၁၀) ဆအထိ တက်သွားနိုင်သည် မဟုတ်ပါလော။

သူသည် ထိုင်ရာမှ ထလိုက်ပြီး ဂူစံအိမ်၏ အစွန်အဖျားတွင် "ယောင်ကျင်းဟောင်" ကျောက်တုံးကြီး၏ အဆီအနှစ်များကို တိတ်ဆိတ်စွာ စုပ်ယူနေသော တာအိုခန္ဓာ ရုပ်သေး ကို ကြည့်လိုက်၏။ လက်ကို ဝှေ့ယမ်းလိုက်ရာ အခြေခံတည်ဆောက်ခြင်း (၉) ဆင့်မြောက်နှင့် ညီမျှသော အစွမ်းသတ္တိရှိသည့် "နဂါးမိကျောင်း ရုပ်သေး" သည် သူ့ဘေးနားတွင် ဘွားခနဲ ပေါ်လာတော့သည်။

နောက်တစ်ခဏ၌...

"ဝီ"

ရေနဂါး လှံရှည် သည် နဂါးမိကျောင်း ရုပ်သေး၏ ဘေးနားတွင် ထပ်မံ ပေါ်ထွက်လာ၏။

စုယွီသည် နဂါးမိကျောင်း ရုပ်သေးကို အသက်သွင်းပြီး အဆင့်မြင့် မှော်လက်နက်ဖြစ်သော ရေနဂါး လှံရှည်ကို ထိန်းချုပ်ကာ ချက်ချင်းပင် အမိန့်ပေးလိုက်၏။ လှံရှည်သည် စစ်မှန်သော ရေနဂါး တစ်ကောင်အလား ကောင်းကင်ယံကို ဖြတ်သန်းပျံသန်းသွားပြီး ကောင်းကင်နှင့် မြေကြီးကို တုန်ခါစေသော နဂါးဟိန်းသံကြီးကို ထုတ်လွှတ်လိုက်သည်။ သို့သော် တာအိုခန္ဓာ ရုပ်သေးကမူ တုပ်တုပ်မျှ မလှုပ်ဘဲ ရင်ဆိုင်နေ၏။

ရေနဂါး လှံရှည် ထိခတ်တော့မည့် ခဏတာလေးတွင်မှ တာအိုခန္ဓာ ရုပ်သေးသည် လက်တစ်ဖက်ကို မြှောက်ကာ ဒိုင်းလွှားသဖွယ် ကာကွယ်လိုက်၏။

"ဒိုင်း"

ရေနဂါး လှံရှည်သည် လက်မောင်းကို ဝင်ဆောင့်မိသွားပြီး စွမ်းအားနှစ်ခု ပြင်းထန်စွာ ထိပ်တိုက်တွေ့သွားကြရာ စွမ်းအင်လှိုင်းများ အရပ်လေးမျက်နှာသို့ လွင့်စင်သွားကြ၏။

"ဝီ"

နောက်တစ်ခဏ၌ ရေနဂါး လှံရှည်သည် တုန်ခါသံ သဲ့သဲ့ ပြုလုပ်ပြီးနောက် မိုးကုပ်စက်ဝိုင်းကို ဖြတ်သန်းကာ စုယွီ၏ ဘေးနားသို့ ပြန်လည် ရောက်ရှိလာသည်။

တာအိုခန္ဓာ ရုပ်သေးကို ကြည့်လိုက်သောအခါ တင်ပလ္လင်ခွေ ထိုင်လျက်သားဖြင့် နဂါးမိကျောင်း ရုပ်သေးနှင့် လှံရှည်၏ တွဲဖက်တိုက်ခိုက်မှုကို ကြံ့ကြံ့ခံနိုင်ခဲ့ပြီး တုပ်တုပ်မျှ မလှုပ်ရှားသည်ကို တွေ့ရ၏။ ပြင်းထန်သော ထိပ်တိုက်တွေ့မှုကြောင့် ဖြစ်ပေါ်လာသော စွမ်းအားများကို အောက်ဘက်ရှိ "ယောင်ကျင်းဟောင်" ကျောက်တုံးကြီးက လုံးဝ စုပ်ယူသွားခဲ့ခြင်း ဖြစ်သည်။ တာအိုခန္ဓာ ရုပ်သေး၏ ဓားလက်မောင်းပေါ်တွင် အစင်းရာလေး တစ်ခုပင် ထင်မကျန်ရစ်ခဲ့ချေ။

မာလိုက်တဲ့ ဖြစ်ခြင်း။

ဒါကို မြင်လိုက်ရတော့ စုယွီ၏ မျက်နှာပေါ်တွင် အပြုံးတစ်ခု ပေါ်လာပြီး စိတ်ထဲမှ တွေးလိုက်မိ၏။

'''တတိယအဆင့် ဝိညာဉ်သတ္တုကျောက် ဖြစ်တဲ့ ယောင်ကျင်းဟောင်က မာကျောမှုရော ကြံ့ခိုင်မှုပါ ရှိတဲ့အပြင်... အရေးကြီးဆုံးက စွမ်းအင်တွေကို စုပ်ယူနိုင်စွမ်း ရှိတာပဲ'''

'''တိုက်ခိုက်မှု တစ်ခု ကျရောက်လာတဲ့ ခဏမှာ... စွမ်းအားရဲ့ (၆၀)၊ (၇၀) ရာခိုင်နှုန်းလောက်ပဲ တကယ် ထိရောက်မှု ရှိတော့တယ်'''

'''ဒီ ယောင်ကျင်းဟောင် ကျောက်တုံးကြီးရဲ့ အဆီအနှစ်တွေကို (၂) နှစ်၊ (၃) နှစ်လောက် စုပ်ယူပြီးတဲ့နောက်... တာအိုခန္ဓာ ရုပ်သေးက နောက်ဆုံးတော့ ရလဒ်ကောင်းတွေ ပြသလာပြီပဲ... သူ့ရဲ့ ခန္ဓာကိုယ်နဲ့တင် အဆင့်မြင့် မှော်လက်နက် တစ်ခုကို ယှဉ်ပြိုင်ဖို့ ဘာပြဿနာမှ မရှိတော့ဘူး'''

မပြည့်စုံသော အထွတ်အထိပ်အဆင့် မှော်လက်နက်သို့မဟုတ် အဆင့်မြင့်ဆုံးနှင့် တစ်ဝက်တစ်ပျက်တူသော မှော်လက်နက် မဟုတ်လျှင်၊ အမြုတေ တပိုင်း အဆင့် အရှင်သခင် တစ်ပါးက တိုက်ခိုက်လာလျှင်တောင် တာအိုခန္ဓာ ရုပ်သေးကို ဘာမှ ထိခိုက်အောင် လုပ်နိုင်မည် မဟုတ်ပေ။

ဒါက တတိယအဆင့် ကုန်ကြမ်းပစ္စည်းရဲ့ အဆီအနှစ်ကို စုပ်ယူထားသော တာအိုခန္ဓာ ရုပ်သေးရဲ့ စွမ်းအားပဲ ဖြစ်သည်။

ထို့နောက် စုယွီသည် ကျင့်ကြံခြင်းမှ ထွက်ခွာလာခဲ့၏။

လေ့ထင်း ဈေး အရောင်းအဝယ်ပွဲ စတင်ရန် (၂) လကျော် လိုသေးသည်။ မူလက စုယွီသည် ပွဲစမည့်ရက်ကို စောင့်ဆိုင်းရန် စီစဉ်ထားသော်လည်း၊ ကျင့်ကြံခြင်းမှ ထွက်လာပြီး ရက်အနည်းငယ် အကြာတွင် စုဇီ သူ့ထံ ရောက်ရှိလာ၏။

စုဇီ၏ မျက်နှာထားမှာ အနည်းငယ် လေးနက်နေ၏။ နန်းတော်သို့ ရောက်သည်နှင့် သူမက သတင်းစကား ပါးလိုက်၏။

"စုယွီရေ... ယွင်ကျန်းဂိုဏ်းဘက်က သတင်းရတယ်... ကုန်းစွန်းယီ.. တံခါးပိတ် ကျင့်ကြံနေပြီတဲ့... ဂိုဏ်းချုပ်ကြီးက ဒီအချိန်ကို ရွေးပြီး သူ့ကို ‘ အမွေအနှစ်' ပေးမလား ဆိုတာတော့ မသိရသေးဘူး"

ထိုသတင်းကို ကြားသောအခါ စုယွီ၏ မျက်နှာ အနည်းငယ် ပျက်သွားရ၏။ ဒါ သတင်းကောင်း လုံးဝ မဟုတ်ပေ။

ကုန်းစွန်းယီသည် ပါရမီ မညံ့ဖျင်းသူ ဖြစ်ပြီး၊ လွန်ခဲ့သော အချိန်ကြာမြင့်စွာကတည်းက အခြေခံတည်ဆောက်ခြင်း (၉) ဆင့်မြောက်သို့ ရောက်ရှိနေခဲ့သူ ဖြစ်သည် မဟုတ်ပါလော။

အခန်း (၂၃၀) - မျိုးစေ့များ ရှင်သန်ကြီးထွားခြင်းနှင့် အလယ်အလတ်အဆင့် ဝိညာဉ်အမြစ် ဖြစ်တည်လာခြင်း (အပိုင်း - ၃)

~ကုန်းစွန်းယီ သည် တာအိုအခြေခံအုတ်မြစ်နှင့် အခြားသော ကိစ္စရပ်များတွင် လော့ချန်ယွီလောက် ထူးချွန်ပြောင်မြောက်သူ မဟုတ်ပေ။

သူသည် ယခင်က ကောင်းကင်ဖီးနစ် နန်းတော် အပျက်အစီးများထဲသို့ ဝင်ရောက်ရန်ပင် သတ္တိမရှိခဲ့သူ ဖြစ်၏။

သို့သော် ရွှေအမြုတေ လမ်းစဉ်ကို ကျော်ခွပြီး အမြုတေဖွဲ့စည်းခြင်း အဆင့်သို့ တိုက်ရိုက် တက်လှမ်းရန် ကြိုးစားခြင်းမျိုး ဆိုလျှင်တော့... ယွင်ကျန်းဂိုဏ်း၏ အထောက်အပံ့နှင့် ကုန်းစွန်းယီ၏ ပါရမီအရ အောင်မြင်နိုင်ချေ (၅၀) ရာခိုင်နှုန်း သို့မဟုတ် ထိုထက်မက ရှိနေပေသည်။

အကယ်၍ ကုန်းစွန်းယီသာ အောင်မြင်သွားခဲ့လျှင်...

မကြာမီမှာပင် သူသည် ယွင်ကျန်းဂိုဏ်းကို ချုပ်ကိုင်တော့မည် ဖြစ်သည်။

ထို့နောက် ဂိုဏ်း၏ နယ်မြေအတွင်းရှိ ခေါင်းမာသော အဖွဲ့ဝင်များကို ရှင်းလင်းသုတ်သင်တော့မည်မှာ အသေအချာပင်။

မိမိတို့ စုမိသားစုလို...

ယွီမိသားစုလို အဖွဲ့အစည်းမျိုးတွေပေါ့။

ဒါက ရှောင်လွှဲမရနိုင်သော ကိစ္စ ဖြစ်သည်။ အဘယ်ကြောင့်ဆိုသော် စုမိသားစုနှင့် ယွီမိသားစုသည် ကုန်းစွန်းယီတို့နှင့် လုံးဝ ပူးပေါင်းဆောင်ရွက်နိုင်မည့်သူများ မဟုတ်သောကြောင့်တည်း။

ကုန်းစွန်းယီတို့ကို ဆက်လက် ထားရှိနေခြင်းသည် ယွင်ကျန်းဂိုဏ်းအတွက် ခြိမ်းခြောက်မှု တစ်ခု ဖြစ်လာစေမည်မှာ ဧကန်မလွဲပင်။

"သူ့ရဲ့ အဆင့်တက်တာကို သွားဖျက်ဆီးပစ်ရမလား"

ထိုအတွေးသည် စုယွီ၏ စိတ်ထဲတွင် လက်ခနဲ ပေါ်လာသော်လည်း ချက်ချင်းပင် ပျက်ပြယ်သွားရသည်။ သူ၏ လက်ရှိ စွမ်းရည်နှင့် အင်အားအရ ဆိုလျှင် ထိုကိစ္စသည် လုံးဝ မဖြစ်နိုင်ပေ။

ယွင်ကျန်းဂိုဏ်း၏ နှစ်ပေါင်းများစွာ စုဆောင်းထားသော အင်အားကို လျှော့တွက်၍ မရချေ။

ထိုသို့ လုပ်ဆောင်ခြင်းသည် အကျိုးမရှိဘဲ အဆိုးသာ ဖြစ်လာစေပေလိမ့်မည်။

အချိန်အတော်ကြာ စဉ်းစားပြီးသည့်တိုင် စုယွီသည် တန်ပြန်မည့် နည်းလမ်းကို ရှာမတွေ့သေးပေ။

လေပူတစ်ချက်ကို မှုတ်ထုတ်လိုက်ပြီး တိတ်ဆိတ်စွာ တွေးတောလိုက်၏။

'''အခြေအနေကို ကြည့်ပြီးမှပဲ ကြံဖန်ရတော့မယ် ထင်တယ်..ကုန်းစွန်းယီ အဲဒီလောက်ထိ မမိုက်မဲဖို့ မျှော်လင့်ရတာပဲ... မဟုတ်ရင်တော့ ငရဲမင်းကြီးဆီ ပို့ပေးဖို့ နည်းလမ်းရှာရတော့မှာပေါ့ကွာ'''

အမြုတေဖွဲ့စည်းခြင်း အဆင့်ကို ကိုင်တွယ်ရတာ ဘယ်လောက်များ ခက်ခဲလို့လဲ။ ငါ.. အရင်က သတ်ဖူးတာပဲ မဟုတ်လား။

ထိုခဏ၌ စုယွီ၏ မျက်ဝန်းနက်နက်ထဲတွင် အေးစက်သော အရိပ်အယောင်တစ်ခု ဖြတ်ပြေးသွား၏။

စုယွီသည် ထိုသတင်းကို ယွီခယ်အာအား ပြောပြလိုက်ပြီး၊ ယွီမိသားစုကို ကြိုတင် ပြင်ဆင်မှုများ ပြုလုပ်နိုင်ရန် သတင်းစကား ပါးခိုင်းလိုက်၏။

လဝက်ခန့် ကြာပြီးနောက်၊

ယွီမိသားစု ခေါင်းဆောင် ယွီပိုင်ရှန်းသည် ယွီပိုင်ဟယ် နှင့်အတူ ဆေးလုံးတောင်သို့ ရောက်ရှိလာပြီး စုယွီနှင့် လူကိုယ်တိုင် တွေ့ဆုံ၏။

*

ဧည့်ခန်းမဆောင် အတွင်း၌။

ယွီခယ်အာသည် ယွီပိုင်ရှန်းနှင့် ယွီပိုင်ဟယ်တို့အား လက်ဖက်ရည် တည်ခင်းပေးပြီးနောက်၊ စုယွီ၏ ဘေးနားတွင် ဝင်ထိုင်ကာ တိတ်ဆိတ်စွာဖြင့် စောင့်ကြည့်နေ၏။

ယွီပိုင်ရှန်း၏ မျက်နှာထားမှာ လေးနက်နေပြီး စုယွီကို ကြည့်ကာ လေသံနက်နက်ဖြင့် ပြောဆိုလိုက်၏။

"ကုန်းစွန်းယီက အမြုတေဖွဲ့စည်းခြင်း အဆင့်ကို တက်လှမ်းဖို့ ကြိုးစားနေတာ သေချာသလောက် ရှိနေပြီ... သူသာ အောင်မြင်သွားရင် အကျိုးဆက်တွေက ဆိုးရွားသွားလိမ့်မယ်"

"ဒါကြောင့် မကြာသေးခင်ကပဲ ငါ ကိုယ်တိုင် ပိုင်ယွဲ့ အင်မော်တယ် မြို့တော် ကို သွားပြီး အရှင်သခင် ပိုင်ယွဲ့ ရဲ့ ဒုတိယတပည့် နတ်မိမယ်ဖုန်းလင် ဆီမှာ အကူအညီ တောင်းခဲ့တယ်"

"ယွင်ကျန်းဂိုဏ်းက ယွီမိသားစုကို ခြိမ်းခြောက်လာတဲ့ အချိန်ကျရင်... ငါတို့ ကိုယ့်ကိုယ်ကို ကာကွယ်ရတော့မယ်... ပိုင်ယွဲ့ အင်မော်တယ် မြို့တော်က ရွေးချယ်စရာကောင်း တစ်ခုပဲလေ"

စုယွီ အနည်းငယ် အံ့အားသင့်သွားသော်လည်း သေချာ စဉ်းစားကြည့်လိုက်သောအခါ ယွီမိသားစု၏ ဆုံးဖြတ်ချက်မှာ မဆန်းကြောင်း တွေ့ရှိရ၏။

ပိုင်ယွဲ့ အင်မော်တယ် မြို့တော်သည် အရှင်သခင် တစ်ပါး ထိန်းချုပ်ထားသော အင်အားစု ဖြစ်ပြီး၊ နတ်မိမယ်ဖုန်းလင်ကဲ့သို့ တောက်ပသော ပါရမီရှင်လည်း ရှိနေသည် မဟုတ်ပါလော။

အရှင်သခင် ပိုင်ယွဲ့၏ သက်တမ်းမှာ ဆယ်စုနှစ် အနည်းငယ်သာ ကျန်တော့သည် ဆိုသော်ငြား၊ နတ်မိမယ်ဖုန်းလင်သာ အမြုတေဖွဲ့စည်းခြင်း အဆင့်သို့ အောင်မြင်စွာ တက်လှမ်းနိုင်ခဲ့လျှင် ပိုင်ယွဲ့ အင်မော်တယ် မြို့တော်သည် တာ့ယွဲ့ စီရင်စုတွင် ယိမ်းယိုင်ခြင်းမရှိ ရပ်တည်နိုင်ဦးမည် ဖြစ်ပေသည်။

အမြုတေဖွဲ့စည်းခြင်း အဆင့် အရှင်သခင် တစ်ပါး၏ ကျောထောက်နောက်ခံ မရှိဘဲ၊ ယွီမိသားစု အနေဖြင့် ယွင်ကျန်းဂိုဏ်းကဲ့သို့ အင်အားစုကို ယှဉ်ပြိုင်ရန်မှာ ကိုယ့်ကိုယ်ကို ကာကွယ်ရုံမှတစ်ပါး အခြား မတတ်နိုင်ပေ။

အခြား အရှင်သခင် တစ်ပါး၏ အင်အားနှင့် ပူးပေါင်းခြင်းသည် အကောင်းဆုံး ရွေးချယ်မှု ဖြစ်သည်မှာ ယုံမှားသံသယ ဖြစ်ဖွယ် မရှိချေ။

ယွီပိုင်ရှန်း လာရောက်ခြင်းမှာ ယွီမိသားစု၏ ရှေ့ဆက်မည့် လမ်းစဉ်ကို အသိပေးရန်သာ ဖြစ်ပြီး၊ ညှိနှိုင်းရန် သို့မဟုတ် စုယွီ၏ သဘောထားကို တောင်းခံရန် မဟုတ်ပေ။ အဘယ်ကြောင့်ဆိုသော် စုမိသားစုရော ယွီမိသားစုပါ တစ်ဦးနှင့်တစ်ဦး လက်အောက်ခံ မဟုတ်ကြသောကြောင့်တည်း။

"မင်းလည်း ဘာလုပ်မယ် ဆိုတာ စဉ်းစားထားသင့်တယ်"

ဟု ယွီပိုင်ရှန်းက စုယွီကို အကြံပေးလိုက်၏။

သို့နှင့်၊ သူတို့နှစ်ဦးသည် ဆေးလုံးတောင်ပေါ်တွင် ကြာကြာ မနေဘဲ၊ ယဉ်ပါးပြီးသား သားရဲများကို စီးနှင်ကာ အလျင်အမြန် ထွက်ခွာသွားကြလေတော့သည်။

*

ထိုနေ့ ညနေခင်း။

ဆေးလုံးတောင် အောက်ခြေ ပေတစ်ထောင်ကျော် အနက်ရှိ နေလမင်းကျွန်း ရေအောက် ဂူစံအိမ် အတွင်း၌ ဖြစ်၏။

စုယွီသည် ရွှေပုစဉ်းရင်ကွဲ ကျင့်စဉ်ကို လေ့ကျင့်နေပြီး၊ တတိယအဆင့် ရွှေပုစဉ်းရင်ကွဲ ကျင့်စဉ်၏ နက်ရှိုင်းသော ဝိညာဉ်စွမ်းအားဖြင့် ဝိညာဉ်ရုပ်သေးကို ပြုစုပျိုးထောင်နေ၏။ ညဉ့်နက်ပိုင်း ရောက်သောအခါ သူ၏ စိတ်အာရုံထဲရှိ ပုလဲပုံစံ ဝိညာဉ်ရုပ်သေးထံမှ ကြောက်မက်ဖွယ် ကောင်းသော စွမ်းအင်လှိုင်းများ ထွက်ပေါ်လာတော့သည်။

ဝိညာဉ်ရုပ်သေး ပုလဲ၏ စွမ်းအင် ပြောင်းလဲမှုကို ခံစားမိလိုက်သောအခါ စုယွီ ဝမ်းသာအားရ ဖြစ်သွား၏။

'''ဝိညာဉ်ရုပ်သေးရဲ့ စွမ်းအားက ထပ်တိုးလာပြန်ပြီ... အမြုတေဖွဲ့စည်းခြင်း ဒုတိယအဆင့်ကို ရောက်သွားပြီပဲ'''

ဒါက လွယ်ကူသည့် ကိစ္စတော့ မဟုတ်ပေ။

ဝိညာဉ်ရုပ်သေး၏ စွမ်းအား အမြုတေဖွဲ့စည်းခြင်း အဆင့်သို့ ရောက်ရှိခဲ့သည်မှာ ဆယ်စုနှစ် တစ်ခုကျော် ကြာခဲ့ပြီ ဖြစ်သည်။ မကြာသေးမီကမှ ရွှေပုစဉ်းရင်ကွဲ ကျင့်စဉ် တတိယအဆင့်သို့ ရောက်ရှိလာပြီး၊ ဒုတိယအဆင့်၏ နက်ရှိုင်းသော ဝိညာဉ်စွမ်းအားဖြင့် ဆက်တိုက် ပြုစုပျိုးထောင်ပေးမှုကြောင့်သာ ယခုကဲ့သို့ အဆင့်တက်လာနိုင်ခြင်းပါ။

"ဟူး"

စုယွီ စိတ်ထဲမှ သက်ပြင်းချလိုက်မိသည်။ ဝိညာဉ်ရုပ်သေး၏ စွမ်းအား တိုးတက်လာမှုကြောင့် အနာဂတ်တွင် ဖြစ်ပေါ်လာမည့် အပြောင်းအလဲများကို ရင်ဆိုင်ရန် ပိုမို ယုံကြည်မှု ရှိလာ၏။

ဝိညာဉ်ရုပ်သေးကို ခေတ္တမျှ ဆက်လက် ပြုစုပျိုးထောင်ပြီးနောက်၊ စုယွီသည် ၎င်းအား ရုပ်သေးကိုယ်ခန္ဓာထဲသို့ ပြန်လည် ဝင်ရောက်စေလိုက်၏။

လက်ကို ဝှေ့ယမ်းလိုက်ရာ သစ်သီးစေ့လေး တစ်စေ့ ထွက်ပေါ်လာ၏။ ထုံးစံအတိုင်း သူသည် အစိမ်းရောင် သစ်သား ချီစွမ်းအားများကို သစ်သီးစေ့ထဲသို့ ထည့်သွင်းကာ ဤထူးဆန်းသော မျိုးစေ့ကို ပြုစုပျိုးထောင်ပေးလိုက်သည်။

နှစ်ပေါင်းများစွာ ကြာမြင့်ခဲ့ပြီ ဖြစ်၍ နေ့စဉ် ဤကဲ့သို့ ပြုလုပ်ရသည်မှာ သစ်ကြားသီး ခွဲသကဲ့သို့ပင် အကျင့်ပါနေပြီ ဖြစ်သည်။

သို့သော် (၁၅) မိနစ်ခန့် အကြာတွင်... စုယွီ၏ မျက်နှာထား တမုဟုတ်ချင်း ပြောင်းလဲသွား၏။

"ဝီ... ဝီ... ဝီ"

လက်ထဲရှိ သစ်သီးစေ့လေးသည် ရုတ်တရက် တောက်ပသော အစိမ်းရောင် အလင်းတန်းများကို ထုတ်လွှတ်လိုက်ရာ၊ ရေခဲနှင့် မီး ဂူစံအိမ် တစ်ခုလုံးကို မြစိမ်းရောင် ပင်လယ်ကြီးအလား လွှမ်းခြုံသွားတော့သည်။

နောက်တစ်ခဏ၌ သစ်သီးစေ့လေးသည် စတင် တုန်ခါလာပြီး စုယွီ၏ လက်ထဲမှ နေလမင်းကျွန်း၏ မြေပြင်ပေါ်သို့ ပြုတ်ကျသွား၏။

မြေပြင်သည် "ယောင်ကျင်းဟောင်" ဟု ခေါ်သော တတိယအဆင့် ဝိညာဉ်သတ္တုကျောက် ဖြစ်သော်လည်း၊ သစ်သီးစေ့လေးသည် မည်သည့် အတားအဆီးမျှ မရှိဘဲ အမြစ်တွယ်သွားတော့သည်။ အစို့အညှောင့်များ ထွက်ပေါ်လာသည်နှင့်အတူ အမြစ်များသည် ဝိညာဉ်ကျောက်တုံးထဲသို့ ထိုးဖောက်ဝင်ရောက်သွားကြ၏။

ထိုအမြစ်များ၏ ရှေ့တွင် အလွန် မာကျောသော "ယောင်ကျင်းဟောင်" ဝိညာဉ်ကျောက်တုံးကြီးသည် တို့ဖူးတုံး တစ်တုံးကဲ့သို့ ပျော့ပျောင်းသွားသယောင် ရှိ၏။

"ကျွတ်... ကျွတ်... ကျွတ်"

ပိုမို ကြီးထွားလာသော အမြစ်များ၏ ဖိအားကြောင့် "ယောင်ကျင်းဟောင်" ဝိညာဉ်ကျောက်တုံး အပိုင်းအစများသည် အက်ကွဲသွားကြ၏။

တစ်ချိန်တည်းမှာပင်...

သစ်သီးစေ့မှ အစို့အညှောင့်သည် လျင်မြန်စွာ ကြီးထွားလာပြီး၊ ပျိုးပျိုးပြက်ပြက် လက်နေသော အစိမ်းရောင် အလင်းတန်းများအောက်တွင် တစ်ကိုက်ကျော် မြင့်သော ဝိညာဉ်သစ်ပင် တစ်ပင်အဖြစ် ဗြုန်းစားကြီး.. ပြောင်းလဲသွားတော့သည်။ ၎င်းသည် တတိယအဆင့် ဝိညာဉ်ကျောက်တုံးပေါ်တွင် အမြစ်တွယ်နေပြီး၊ ကြီးမားလှသော အသက်စွမ်းအင်များကို ထုတ်လွှတ်နေ၏။

ဘေးနားသို့ ကိုက်အနည်းငယ်ခန့် ဆုတ်ခွာရပ်နေသော စုယွီသည် သစ်သီးစေ့ အမြစ်တွယ်ပြီး သစ်ပင်အဖြစ် ကြီးထွားလာသော မြင်ကွင်းကို ကြည့်ရင်း မျက်လုံးအိမ်များ ကျဉ်းမြောင်းသွားရ၏။

ဤမြင်ကွင်းမျိုးကို ယခင်က နှစ်ကြိမ်တိုင်တိုင် မြင်တွေ့ခဲ့ဖူးသော်လည်း၊ ယခုတစ်ကြိမ်တွင်လည်း ထိတ်လန့်အံ့ဩခြင်း မဖြစ်ဘဲ မနေနိုင်တော့ချေ။

အခန်း (၂၃၁) - မျိုးစေ့များ ရှင်သန်ကြီးထွားခြင်းနှင့် အလယ်အလတ်အဆင့် ဝိညာဉ်အမြစ် ဖြစ်တည်လာခြင်း (အပိုင်း - ၆)

~"ဒီမျိုးစေ့က တကယ်ကို ထူးခြားဆန်းကြယ်လွန်းပါတကား"

စုယွီ စိတ်ထဲမှ တီးတိုး ရေရွတ်လိုက်မိသည်။

ယခုတစ်ခေါက်တွင် ဝိညာဉ်သစ်ပင်သည် အပွင့်ပွင့်ခြင်း၊ အသီးသီးခြင်း မရှိပေ။ ထိုအစား ၎င်း၏ အသက်စွမ်းအား အားလုံးကို တစ်နေရာတည်းတွင် စုစည်းလိုက်ရာ၊ နောက်ဆုံး၌ သစ်ပင်၏ ထိပ်ဖျားတွင် ရနံ့သင်းပျံ့လွန်းလှသော အစိမ်းရောင် ဝိညာဉ်အရည်ကြည် တစ်စက် ထွက်ပေါ်လာ၏။

"ဝုန်း"

နောက်တစ်ခဏ၌ ယခင်ကကဲ့သို့ပင် အသက်စွမ်းအား ကုန်ခန်းသွားသော ဝိညာဉ်သစ်ပင်သည် ပြာမှုန့်များအဖြစ် ပြိုကွဲပျက်စီးကာ လေထဲသို့ လွင့်ပါးသွားတော့သည်။

ထိုအခိုက်၌ အစိမ်းရောင် မျိုးစေ့ တစ်စေ့သည် လေထဲမှ ပြုတ်ကျလာ၏။

စုယွီသည် လျှပ်စီးလက်သကဲ့သို့ လျင်မြန်စွာ လှုပ်ရှားလိုက်ပြီး ကျောက်စိမ်းပုလင်းငယ် တစ်လုံးကို ထုတ်ကာ ရနံ့သင်းပျံ့နေသော ဝိညာဉ်အရည်ကြည်စက်ကို ခံယူလိုက်သည်။ တစ်ချိန်တည်းမှာပင် အစိမ်းရောင် မျိုးစေ့ကိုလည်း လက်တစ်ဖက်ဖြင့် ဖမ်းယူလိုက်၏။ သူ၏ မျက်နှာပေါ်တွင် အံ့ဩမှုနှင့် မရေရာမှုတို့ ရောထွေးနေ၏။

'''ဒါ ဘယ်လို ဝိညာဉ်အရည်ကြည်မျိုးပါလိမ့်'''

သူသည် မျိုးစေ့ကို သိမ်းဆည်းလိုက်ပြီး ကျောက်စိမ်းပုလင်းငယ်ကို အာရုံစိုက်လိုက်သည်။

အစိမ်းရောင် အရည်ကြည်စက်သည် ပုလင်းအောက်ခြေသို့ မကျဘဲ အလယ်ဗဟို၌ ဝဲပျံနေသည်ကို တွေ့ရ၏။

ဤအချက် တစ်ခုတည်းနှင့်ပင် ၎င်းသည် သာမန် ဝိညာဉ်အရည် မဟုတ်ကြောင်း ထင်ရှားလှပေသည်။

ထို့ပြင် ပြင်းထန်သော ရနံ့က သူ၏ အာရုံများကို လှုပ်ခတ်စေပြီး၊ ခန္ဓာကိုယ်အတွင်းရှိ ချီစွမ်းအားများကို လှုပ်ရှားစေသလို၊ ဆဲလ်အမှုန်အမွှားတိုင်းကလည်း ထိုရနံ့ကို ရှူရှိုက်ရန် တောင့်တနေသကဲ့သို့ ခံစားလိုက်ရသည်။

ဤထူးဆန်းသော ခံစားမှုက စုယွီကို အံ့အားသင့်စေခဲ့သည်။

'''ဒီပစ္စည်းက သေချာပေါက် အဖိုးတန်ရတနာပဲ'''

စုယွီ၏ ရင်ထဲတွင် စိတ်လှုပ်ရှားမှုများ ဖြစ်ပေါ်လာရ၏။

သူသည် တင်ပလ္လင်ခွေ ထိုင်လိုက်ပြီး ရွှေပုစဉ်းရင်ကွဲ ကျင့်စဉ်ကို အသက်သွင်းကာ စိတ်ကို တည်ငြိမ်အေးချမ်းသော အခြေအနေသို့ ပို့ဆောင်လိုက်သည်။ ထို့နောက် မြေနှင့် သစ်သားကျင့်စဉ်ကို အသုံးပြု၍ သူ၏ ချီစွမ်းအားများကို အထွတ်အထိပ်သို့ ရောက်အောင် ပြင်ဆင်လိုက်၏။

တစ်နာရီခန့် ကြာသောအခါ သူ၏ အခြေအနေ အကောင်းဆုံးသို့ ရောက်ရှိပြီဟု ခံစားလိုက်ရမှ စုယွီသည် ပါးစပ်ကို ဟကာ အစိမ်းရောင် အရည်ကြည်စက်ကို မျိုချလိုက်၏။

"ဝီ"

အရည်ကြည်စက် ပါးစပ်ထဲသို့ ဝင်သွားသည်နှင့် တစ်ပြိုင်နက် အေးမြသော ခံစားမှုတစ်ခုသည် ခန္ဓာကိုယ်အနှံ့သို့ ပျံ့နှံ့သွားတော့သည်။ အလွန် ကြီးမားသော အသက်စွမ်းအားများ စုယွီ၏ ခန္ဓာကိုယ်အတွင်း ပေါက်ကွဲထွက်ပေါ်လာရာ၊ ဆဲလ်များ အားလုံးသည် ထိုစွမ်းအားကို ငတ်မွတ်စွာဖြင့် စုပ်ယူကြလေတော့သည်။

ခန္ဓာကိုယ်က စွမ်းအားများကို စုပ်ယူနေစဉ်တွင် စုယွီသည် သူ၏ ခန္ဓာကိုယ်၌ လျင်မြန်သော ပြောင်းလဲမှုများ ဖြစ်ပေါ်နေသည်ကို သိသိသာသာ ခံစားလိုက်ရသည်။

ကျွမ်းကျင်မှု မျက်နှာပြင်ကို တစ်ချက် ကြည့်လိုက်ရာ၊ "မိကျောင်းသားရဲ(၁၀၈) ကွက် ကိုယ်ခန္ဓာ ကျင့်စဉ်" ၏ ကျွမ်းကျင်မှု အဆင့်သည် သိသိသာသာ တိုးတက်နေသည်ကို တွေ့လိုက်ရ၏။

တစ်ချိန်တည်းမှာပင်...

အေးမြသော စွမ်းအားတစ်ခုသည် စုယွီ၏ စိတ်အာရုံထဲသို့ စိမ့်ဝင်သွား၏။

အမြုတေဖွဲ့စည်းခြင်း အဆင့်၏ ကန့်သတ်ချက်သို့ ရောက်လုနီးပါး ဖြစ်နေသော သူ၏ ဝိညာဉ်အာရုံသည် ဤစွမ်းအားနှင့် ထိတွေ့လိုက်သည်နှင့် တစ်ပြိုင်နက် ပြောင်းလဲမှုများ စတင် ဖြစ်ပေါ်လာတော့သည်။

အမြုတေဖွဲ့စည်းခြင်း အဆင့်တွင် စစ်မှန်သော တာအိုအသီးအပွင့် ကို ဖန်တီးခြင်းအပြင်၊ ဝိညာဉ်နှင့် ဝိညာဉ်အာရုံ ပြောင်းလဲခြင်းသည်လည်း အလွန် အရေးပါလှပေသည်။

အခြေခံတည်ဆောက်ခြင်း အဆင့်နှင့် အမြုတေဖွဲ့စည်းခြင်း အဆင့်တို့၏ ကွာခြားချက်မှာ ကျယ်ပြန့်ရုံသာမက၊ ကမ္ဘာချင်း ခြားနားသကဲ့သို့ ကွာခြားလှပေသည်။

လွန်ခဲ့သော နှစ်များဆီက တာအိုခန္ဓာ ရုပ်သေးသည် အခြေခံတည်ဆောက်ခြင်း (၈) ဆင့်မြောက်သာ ရှိသေးချိန်တွင် ဆေးလုံးတောင်းရန် လီမိသားစုသို့ သွားရောက်ခဲ့ဖူးသည်။ ထိုစဉ်က လီမိသားစု ဘိုးဘေးနှင့် ရင်ဆိုင်ရသောအခါ ရုပ်သေးတွင် ခုခံနိုင်စွမ်း လုံးဝ မရှိခဲ့ချေ။

အကယ်၍ အမြုတေဖွဲ့စည်းခြင်း ပထမအဆင့်နှင့် ညီမျှသော ဝိညာဉ်ရုပ်သေး၏ စွမ်းအားနှင့် ဖွဲ့စည်းဆဲ ကာလသာ ရှိသေးသော "ရေခဲဝိညာဉ် ပုလဲ" တို့ကို အသုံးမပြုခဲ့ပါက၊ တာအိုခန္ဓာ ရုပ်သေးသည် လီမိသားစု ဘိုးဘေးကို ယှဉ်ပြိုင်နိုင်မည် မဟုတ်ပေ။

ဤကွာဟချက်သည် ချီစွမ်းအား တစ်ခုတည်းတွင်သာ မဟုတ်ဘဲ၊ ဝိညာဉ်နှင့် ဝိညာဉ်အာရုံ စွမ်းအားများတွင်လည်း တည်ရှိနေခြင်း ဖြစ်သည်။

အမြုတေဖွဲ့စည်းခြင်း အဆင့် အရှင်သခင် တစ်ပါး၏ ဖိနှိပ်ထားသော အကြည့်ကို အခြေခံတည်ဆောက်ခြင်း အဆင့် ကျင့်ကြံသူများ ခံနိုင်ရည် မရှိကြပေ။

ထို့ကြောင့်လည်း စုယွီက ယွီခယ်အာကို ပေးခဲ့သော ပယင်းရောင် ဖီးနစ်ဂါဝန်ရှည်သည် အဖိုးတန် ရတနာဖြစ်ကြောင်း ပြောခဲ့ခြင်း ဖြစ်၏။

အဘယ်ကြောင့်ဆိုသော် ၎င်းတွင် ပါရှိသော ခမ်းနားထည်ဝါသည့် အရှိန်အဝါသည် အစွမ်းထက်သူများ၏ ဖိနှိပ်မှုကို ယှဉ်ပြိုင်နိုင်ပြီး၊ ဝတ်ဆင်သူ ခံစားရမည့် ဖိအားကို လျော့ကျစေနိုင်သောကြောင့်တည်း။

တိုက်ခိုက်ရာတွင် ဖြစ်စေ၊ ထွက်ပြေးရာတွင် ဖြစ်စေ၊ အလွန် အသုံးဝင်လှပေသည်။

ထိုအချိန်၌ စုယွီ၏ စိတ်ထဲရှိ ဝိညာဉ်နှင့် ဝိညာဉ်အာရုံတို့သည် စတင် ပြောင်းလဲလာကြ၏။ မျက်စိတစ်မှိတ် အတွင်းမှာပင် အတားအဆီး တစ်ခုကို ကျော်ဖြတ်သွားသကဲ့သို့ ခံစားလိုက်ရ၏။ သူ၏ ဝိညာဉ်သည် အရူးအမူး ကြီးထွားလာပြီး၊ ဝိညာဉ်အာရုံသည်လည်း ပုံစံပြောင်းလဲလာတော့သည်။

ယခင်က စုယွီ၏ ဝိညာဉ်အာရုံသည် မြွေကြီးတစ်ကောင်နှင့် တူသည်ဆိုလျှင်၊ ယခုအခါ မွေးကာစ ရေနဂါးတစ်ကောင် အသွင်သို့ ပြောင်းလဲသွားပြီ ဖြစ်ပေသည်။

ဤပြောင်းလဲမှု ခံစားချက်သည် အလွန် သက်သောင့်သက်သာ ရှိလှပြီး၊ စုယွီအား နတ်ဘုရားတစ်ပါးကဲ့သို့ လွင့်မျောနေသလို ခံစားရစေသည်။

ဝိညာဉ်အာရုံ စွမ်းအားများသည် အပြင်သို့ ပျံ့နှံ့ထွက်သွားပြီး လမ်းတစ်လျှောက်ရှိ အရာအားလုံးကို လွှမ်းခြုံပစ်ချင်နေကြ၏။

ကံကောင်းထောက်မစွာဖြင့် ရွှေပုစဉ်းရင်ကွဲ ကျင့်စဉ် လည်ပတ်နေသဖြင့် စုယွီသည် ထိုဆန္ဒကို ချက်ချင်း ထိန်းချုပ်လိုက်နိုင်၏။ အကယ်၍ အမြုတေဖွဲ့စည်းခြင်း အဆင့်နှင့် ညီမျှသော ဝိညာဉ်အာရုံသာ အပြင်သို့ ပျံ့နှံ့သွားပါက၊ ဆေးလုံးတောင် တစ်ခုလုံးရှိ လူအများ ထိတ်လန့်ကုန်ကြပြီး အရှင်သခင် တစ်ပါး ရောက်လာပြီဟု ထင်မှတ်သွားနိုင်ပေသည်။

သူသည် ထိုကဲ့သို့ အုတ်အော်သောင်းတင်း ဖြစ်ရပ်မျိုးကို မလိုလားသလို၊ သူ၏ ဝိညာဉ်အာရုံသည် ကျင့်ကြံမှုအဆင့်ထက် များစွာ သာလွန်ကာ အမြုတေဖွဲ့စည်းခြင်း အဆင့်သို့ ရောက်ရှိနေပြီ ဖြစ်ကြောင်းကိုလည်း အခြားသူများအား မသိစေလိုပေ။

"ဟင်"

ရုပ်ခန္ဓာနှင့် ဝိညာဉ် ပြောင်းလဲနေစဉ်တွင် စုယွီသည် သူ၏ ဒန်တျန် အတွင်း၌ အပြောင်းအလဲ အနည်းငယ် ဖြစ်ပေါ်နေသည်ကို သတိထားမိလိုက်သည်။ အစိမ်းရောင် အရည်ကြည်စက်၏ စွမ်းအားများသည် ဒန်တျန်ထဲသို့ အဓိက စီးဝင်သွားသော်လည်း၊ ဓာတ်ကြီးငါးပါး ချီစွမ်းအားများဆီသို့ ဦးတည်ခြင်း မရှိချေ။

ထိုအစား... ဓာတ်ကြီးငါးပါး ဝိညာဉ်အမြစ် တာအိုအခြေခံအုတ်မြစ် ဆီသို့ ဦးတည်သွား၏။

"ဝီ"

ထိုခဏ၌ စုယွီသည် သူ၏ ဝိညာဉ်အမြစ်နှင့် တာအိုအခြေခံအုတ်မြစ်တို့ ပြောင်းလဲသွားပုံကို မျက်ဝါးထင်ထင် တွေ့မြင်လိုက်ရသည်။ ရှေးဟောင်းသစ်သား တာအိုအခြေခံသည် အစိမ်းရောင် အညစ်အကြေးများကို ခါထုတ်ပစ်လိုက်သကဲ့သို့ ဖြစ်သွား၏။

ဖီးနစ် တာအိုအခြေခံ သည်လည်း နိဗ္ဗာန်မီးတောက်များ အဖြစ် ချက်ချင်း ပြောင်းလဲသွားပြီး၊ ထိုမီးတောက်များထဲမှ ဖီးနစ်အသစ်တစ်ကောင် ပြန်လည် မွေးဖွားလာ၏။

ဖီးနစ်ထံမှ ထွက်ပေါ်လာသော စွမ်းအားသည် ယခင်ကထက် နှစ်ဆကျော် ပိုမို အားကောင်းလာ၏။

ထို့ပြင် ထူထဲသော မြေကမ္ဘာ တာအိုအခြေခံ၊ ရေခဲဝိညာဉ် တာအိုအခြေခံနှင့် သတ္တုဓား တာအိုအခြေခံတို့သည်လည်း...

ယခု အချိန်၌ အရည်အသွေးပိုင်းဆိုင်ရာ အကြီးစား ပြောင်းလဲမှုကြီးကို ကြုံတွေ့လိုက်ရ၏။

*

နာရီဝက်ခန့် အကြာတွင်၊

အစိမ်းရောင် အရည်ကြည်စက်၏ စွမ်းအားများ ကုန်ခန်းသွားချိန်၌ စုယွီ၏ ဒန်တျန်အတွင်းရှိ ဓာတ်ကြီးငါးပါး ဝိညာဉ်အမြစ်သည် လုံးဝ (လုံးဝ) ပြောင်းလဲသွားခဲ့ပြီ ဖြစ်သည်။

မူလက အဆင့်နိမ့် သာ ရှိခဲ့သော ဓာတ်ကြီးငါးပါး ဝိညာဉ်အမြစ်သည် ယခုအခါ အလယ်အလတ်အဆင့် သို့ ရောက်ရှိသွားခဲ့တော့သည်။

စုယွီ၏ ရုပ်ခန္ဓာ၊ ဝိညာဉ်နှင့် ဝိညာဉ်အာရုံတို့ ပြောင်းလဲမှုသည်လည်း ပြီးဆုံးသွားခဲ့၏။

ရုပ်ခန္ဓာပိုင်းနှင့် ပတ်သက်၍ စုယွီ ကျွမ်းကျင်မှု မျက်နှာပြင်ကို ကြည့်လိုက်၏။

ဤအချိန်တိုလေး အတွင်းမှာပင် သူ၏ ခန္ဓာကိုယ် သန့်စင်ခြင်း ကျင့်စဉ်သည် (၁၅) ဆင့်မြောက်ကို ကျော်လွန်ပြီး (၁၆) ဆင့်မြောက်သို့ ရောက်ရှိသွားခဲ့ပြီ ဖြစ်သည်။ ကျွမ်းကျင်မှု အဆင့်မှာ (၂၁.၄၁) ရာခိုင်နှုန်း ဖြစ်၏။

ဒါက သူ့ကို အနည်းဆုံး (၁၀) နှစ်လောက် သက်သာစေခဲ့သည်ပဲ။

သိထားရမည်မှာ ခန္ဓာကိုယ် သန့်စင်ခြင်း (၁၆) ဆင့်မြောက်သည် အခြေခံတည်ဆောက်ခြင်း (၇) ဆင့်မြောက် (နှောင်းပိုင်းအဆင့်) ၏ စွမ်းအားနှင့် ညီမျှပေသည်။