အလုပ်ခွင်ထဲမှာဆိုရင်တော့ မင်းက ဘော့စ်၊ နောက်ကွယ်မှာတော့ ငါက မင်း အဖေပဲ
Vol. 20 Ch. 196
ကြည့်ရှုသူတော်တော်များက အူတက်သည်အထိ ရယ်မောမိလိုက်ကြသည်။
သူ့ကိုယ်သူ ရောင်းစားပြီးနေတဲ့အချိန်မှာ ချန်ယွီ့က ကိုယ်ရေးကိုယ်တာ တိုက်ခိုက်တယ်ဆိုပြီး ပြောနေလို့ ဘာအသုံးဝင်တော့မှာလဲ …
[သာမန်လေးလည်း ခန့်ညားနေတဲ့ ရှောင်ကျွင်းလေး]သည် နောင်တများဖြင့် ပြည့်နှက်သွားခဲ့၏။
ချန်ယွီ့ … ဒင်း သိပ်ဉာဏ်များတဲ့ကောင် …
တစ်ဆင့်ပြီး တစ်ဆင့်နဲ့ သူ့ကို ထောင်ချောက်ထဲ ကျအောင်လုပ်ပြီး အမှန်ပြောထွက်အောင် လုပ်တယ် …
ချန်ယွီ့ သူ့အား ဤအချက်ဖြင့် လှောင်ပြောင်ထေ့ငေါ့လာတော့မှာကို တွေးထားသော်လည်းပဲ ချန်ယွီ့က ထိုသို့ မပြုလုပ်ခဲ့ပေ။
“ ဘော့စ်ကို ကားထဲပို့ပြီးတဲ့နောက်မှာ အမျိုးသမီးက မင်းနဲ့ သီးသန့်စကားပြောတယ် …”
“ သူက မင်းဘော့စ်ရဲ့ အလုပ်ခွင်မှာ သူ့ရဲ့ ဝန်ထုပ်ဝန်ပိုးတွေကို ကူထမ်းပေးဖို့ ဘာဖို့ ညာဖို့ ပြောတယ် …” ချန်ယွီ့က တည်တည်ငြိမ်ငြိမ်နှင့် ပြောလိုက်ပြီး “ တစ်လက်စတည်း သူ့ရဲ့ ဖုန်းနံပါတ်ကိုပါ မင်းနဲ့ ဖလှယ်ထားခဲ့တယ် ဟုတ်တယ်နော်…”
“ မင်း တကယ်ပဲ အားလုံး သိနေတယ် ….”
[သာမန်လေးလည်း ခန့်ညားနေတဲ့ ရှောင်ကျွင်းလေး]၏ နှလုံးမှာ လည်ချောင်းဝသို့ တစ်ဆို့လာခဲ့၏။
နှစ်ယောက်က အနီးနား ဘယ်သူမှ မရှိတဲ့အချိန် သီးသန့်စကားပြောခဲ့တာပါ …
ဖြတ်သွားဖြတ်လာတွေ ၊ စောင့်ကြည့်ရေး ကင်မရာတွေတောင် မရှိဘူး …
ဒါကို ချန်ယွီ့က ဘယ်လိုလုပ်ပြီး သိနေရတာလဲ ….
အတိတ်နဲ့ အနာဂတ်ကို ခန့်မှန်းနိုင်နေတယ်ဆိုရင်တောင်မှ တစ်ဖက်သူ ဘာတွေ ပြောလဲဆိုတာကို ခန့်မှန်းဖို့က မဖြစ်နိုင်ဘူးလေ … ဟုတ်တယ်နော်…
“ အဲ့နေ့ကတည်းကစပြီး ….” ချန်ယွီ့က ဆက်လက်၍ “ သူ မင်းဆီ ဝီချက်ကနေ မကြာခဏ စာတွေ ပို့တယ် ….”
“ မင်းရဲ့ အလုပ်ကြောင့်မို့ အွန်လိုင်းကလူတွေနဲ့ စကားပြောတဲ့နေရာမှာ အင်မတန်ကောင်းတဲ့ စွမ်းရည်တွေ မင်းမှာ ပိုင်ဆိုင်ထားတယ် … သူ မင်းဆီ ရင်ဖွင့်လာခဲ့ဖို့ အချိန် ဘယ်လောက်မှတောင် မယူလိုက်ရဘူး …”
“ သူ့ခင်ပွန်း စောစီး မရှိတော့တဲ့အကြောင်းတွေ … သားဖြစ်သူကလည်း ငွေရှာဖို့ပဲ အာရုံစိုက်နေတော့ တစ်ယောက်တည်း အထီးကျန်နေရတဲ့ အကြောင်းတွေ … “
“ အမျိုးသမီးရဲ့ သားက ပိုက်ဆံ မချို့တဲ့ဘူးဆိုပေမယ့် သူ့မှာက မိသားစုဆိုတဲ့ နွေးထွေးတဲ့ ခံစားချက်လေးတို့ ဆာလောင်မွတ်သိပ်နေရတယ် …”
“ သူ အဲ့နေ့တုန်းက မင်းကို မြင်လိုက်တဲ့အခိုက်အတန့်မှာ ငယ်ငယ်တုန်းက သူ့သားသူ မြင်တွေ့လိုက်ရသလို မေတ္တာစိတ်တွေ ယိုဖိတ်လာတယ် … “
“ အဲ့နောက်မှာ သူက မင်းရဲ့ မွေးနေ့အကြောင်း မေးမြန်းတယ် … တိုက်ဆိုင်ချင်တော့ အမျိုးသမီးရဲ့ သားဖြစ်သူနဲ့ မွေးနေ့ချင်းက တစ်ရက်တည်း … ဒါ ကောင်းကင်က သတ်မှတ်ပေးလိုက်တဲ့ ရေစက်လို့ ဆိုပြီးတော့ ပြောခဲ့တာ ဟုတ်တယ်နော်…”
ချန်ယွီ့ စကားတစ်ခွန်း ပြောလိုက်သည့် အချိန်တိုင်း [သာမန်လေးလည်း ခန့်ညားနေတဲ့ ရှောင်ကျွင်းလေး]၏ အမူအရာမှာ ပို၍ပို၍ အကျည်းတန်လာခဲ့သည်။
“ အဲ့အချိန်ကစပြီး ….” ချန်ယွီ့ သူ့စကားကို ဆက်သည်။ “ ရက် နည်းနည်းကြာတိုင်း အမျိုးသမီးက မင်းကို ငွေတွေ လွှဲပေးတယ် …”
“ သူ့ရဲ့ ရက်ရောမှုတွေကြောင့်နဲ့ မင်းကလည်း သူ့ရဲ့ မွေးစားသားလေး ဖြစ်လာတယ် …”
“ မင်း သူ့ကို နေ့တိုင်းနေ့ အဖော်လုပ်ပေးချင်တဲ့အကြောင်း …၊ ဒီအလုပ်ကြီးမှာ ဆက်မလုပ်ချင်တော့တဲ့ အကြောင်း မင်း တစ်ခါမက ပြောခဲ့ဖူးတယ် …”
“ ဒါပေမယ့် တစ်ချို့ အကြောင်းအရင်းတွေကြောင့် အမျိုးသမီးက မင်းကို ကုမ္ပဏီမှာပဲ နေဖို့ပြောတယ် …”
“ အဲ့တော့ မင်းလည်း သူ့စကားကို ဘယ်လိုလုပ် လွန်ဆန်ဝံ့မှာလဲ ဟုတ်တယ်မလား ….”
“ ဒီလိုနဲ့ မင်းလည်း ဘော့စ်ဖြစ်သူရဲ့ ကုမ္ပဏီမှာ အလုပ်လုပ်နေရင်း တစ်ဖက်မှာက အမျိုးသမီးရဲ့ မွေးစားသားလေး လုပ်နေရတယ် …”
ထိုစဉ် ရုတ်တရက် ကျယ်လောင်သည့် အော်ဟစ်သံနှင့်အတူ [သာမန်လေးလည်း ခန့်ညားနေတဲ့ ရှောင်ကျွင်းလေး]က နာကျင်နေသည့် အမူအရာဖြင့် ကြမ်းပြင်သို့ လဲကျသွားခဲ့သည်။
သူ့နောက်တွင်တော့ ဝတ်စုံပြည့်နှင့် သက်လတ်ပိုင်း အမျိုးသားကြီးက ကြမ်းကြုတ်သည့် မျက်နှာထားနှင့် ရှိနေသည်။
သူ့လက်တွင် သံပိုက်လုံး တစ်ခုကိုလည်း ကိုင်ထားသေး၏။
ထိုသူကတော့ [သာမန်လေးလည်း ခန့်ညားနေတဲ့ ရှောင်ကျွင်းလေး]အား သံပိုက်နှင့် ကြမ်းပြင်သို့ လဲကျအောင် ရိုက်နှက်လိုက်သူပင်။
[သာမန်လေးလည်း ခန့်ညားနေတဲ့ ရှောင်ကျွင်းလေး]က နာကျင်သည့် အမူအရာဖြင့် ခက်ခက်ခဲခဲ မေးမြန်းလိုက်သည်။
“ ဘော့စ် ဘော့စ် … မင်း မင်း ငါ့ကို ရိုက်တယ် …”
“ ခွေးမသား … ငါမင်းကို ရိုက်ရုံတင် မကဘူး … အသေပါ သတ်မှာ ….”
သူ့စကားဆုံးသည်နှင့် သက်လတ်ပိုင်း အမျိုးသားက သံပိုက်ကို ပင့်ပြီး [သာမန်လေးလည်း ခန့်ညားနေတဲ့ ရှောင်ကျွင်းလေး]၏ ညာလက်မောင်းထံသို့ ပြင်းထန်စွာ လွှဲရိုက်ပစ်လိုက်သည်။
“ အားးးးး “
ဝက်ပေါ်သကဲ့သို့ အော်ဟစ်သံကြီးက လိုက်စထွင်း အခန်းတစ်ခုလုံးထဲ ပျံ့လွင့်သွားခဲ့သည်။
သန်းနှင့်ချီသည့် ကြည့်ရှုသူများမှာ အံ့အားသင့်သွားခဲ့ကြ၏။
သူ့ ဘော့စ် ဒီလောက်ထိ ဒေါသထွက်အောင် [သာမန်လေးလည်း ခန့်ညားနေတဲ့ ရှောင်ကျွင်းလေး]က ဘာတွေများ လုပ်မိလို့ပါလိမ့် …
ဘော့စ်က သူ့ကို သတ်ချင်နေမှန်း တကယ်လည်း သိသာတယ် …
ချန်ယွီ့ စောနတုန်းက ပြောသွားခဲ့တာ တကယ်လို့ သူသာ မထွက်သွားဘူးဆိုရင် သူ့ဘော့စ်က သူ့ကို ပြဿနာ လာရှာတော့မယ် …
လူတိုင်းက ဖြစ်နိုင်ချေမျိုးစုံကို စဉ်းစားမိကြသော်လည်း ဘော့စ်ဖြစ်သူက ဤမျှ ရက်စက်စွာ ပြုမူလာလိမ့်မည်လို့တော့ ထင်မှတ်မထားခဲ့ကြပေ။
“ ဘော့စ် … တောင်းပန်ပါတယ် … ငါ့ကို မရိုက်ပါနဲ့တော့ …”
သူ့ဘော့စ်က ရက်စက်ကြမ်းကြုတ်သည့် လူတစ်ယောက် ဖြစ်မှန်း သိသည့်အတွက်ကြောင့် [သာမန်လေးလည်း ခန့်ညားနေတဲ့ ရှောင်ကျွင်းလေး]သည် တွားသွား၍ သူ့ဘောစ်၏ ပေါင်ကို ဖက်တွယ်ထားလိုက်သည်။
သူ့ အမှားကို ဝန်ခံပြီး တောင်းပန်လေသည်။
“ မင်း ဘယ်နားမှားသွားလဲ သိလား….”
ဘော့စ်က သံပိုက်ကို ကိုင်ထားပြီး [သာမန်လေးလည်း ခန့်ညားနေတဲ့ ရှောင်ကျွင်းလေး]ကို ရွယ်လျက် မေးလိုက်သည်။
“ ငါ … ငါ မသိဘူး ….”
“ မင်း မသိဘူးပေါ့ … ဟုတ်လား .. ငါ အခု ပြောပြလိုက်မယ် … ပုံထဲက အမျိုးသမီးက ငါ့အမေကွ … အဲ့တာ ငါ့အမေ …”
[သာမန်လေးလည်း ခန့်ညားနေတဲ့ ရှောင်ကျွင်းလေး]၏ ဦးနှောက်မှာ ထိုစကားကြားတော့ ပေါက်ကွဲလုနီးပါး ဖြစ်သွားခဲ့သည်။
သူ နားမလည်နိုင်သည့် အရာတို့က ချက်ချင်းဆိုသလို ကြည်လင်ပြတ်သား ရှင်းလင်းလာသည်။
သက်လတ်ပိုင်း အမျိုးသမီးက သူ့ဘော့စ်ကို ပွဲ အပြင်ဘက် တွဲပို့လာပြီး ဘော့စ်ကို ကူညီပေးဖို့ ပြောပေးခဲ့တာ မဆန်းတော့ပေ။
သူ ကုမ္ပဏီကနေ နှုတ်ထွက်မယ့် အကြံကို သဘောမတူတာလည်း ဒါကြောင့်ကိုး …
“ မင်း မျိုးမစစ် … ၊ မင်းက ခြေသွက်လက်သွက်နဲ့ အမြင်ကောင်းတွေရှိလို့ အစတုန်းကတော့ မင်းကို လူယုံတစ်ယောက်အနေနဲ့ မွေးချင်ခဲ့တာ …”
“ ထွီး … မင်းက ငါ့ရဲ့ လက်အောက်ငယ်သား မဖြစ်ချင်ဘဲ ငါ့အဖေ ဖြစ်ချင်နေတယ် …”
“ ငါ မင်းကို ဒီနေ့ မသတ်ဘူးဆိုရင် မင်းရဲ့ စောက်မျိုးရိုးနာမည်ကို ငါ ယူပစ်လိုက်မယ် …”
“ ရှီးတဲ့မှ ထွီး …”
ထိုသို့ပြောပြီးနောက် ဘော့စ်က ကြမ်းပြင်သို့ မာန်ပါစွာ တံတွေးထွေးချလိုက်သည်။
သူ့လက်ထဲက သံပိုက်ကို မြှောက်ပြီး [သာမန်လေးလည်း ခန့်ညားနေတဲ့ ရှောင်ကျွင်းလေး]အား ထပ်ခါတလဲလဲ ရိုက်နှက်နေတော့၏။
“ ဒီလူ တော်တော်ရက်စက်တာပဲ … အရင်က လူမိုက်ဖြစ်ခဲဖူးလား မသိဘူးနော်….”
“ မြင်သာနေတာပဲ မဟုတ်ဘူးလား … လည်ပင်က တက်တူးကိုပဲ တစ်ချက်ကြည့်လိုက်လေ … သာမန် ဘယ်သူကများ အဲ့လိုနေရာမျိုးမှာ တက်တူးထိုးမှာမို့လို့ ….”
“ ရှီး … ဒီဘော့စ်က ကိုင်တွယ်ရ မလွယ်ကူလောက်ဘူးပဲ .. ငါ့စိတ်ထင် သူ့ ကုမ္ပဏီကလည်း သွေးရိုးသားရိုး ကုမ္ပဏီတော့ မဖြစ်နိုင်လောက်ဘူး ….”
“ ရာဇဝတ်မှုတွေ ကျူးလွန်နေတဲ့ ကုမ္ပဏီများ ဖြစ်နေမလား ….”
“ [သာမန်လေးလည်း ခန့်ညားနေတဲ့ ရှောင်ကျွင်းလေး] : ဘော့စ် … ငါတို့ရဲ့ အနာဂတ်အကြောင်း ဆွေးနွေးကြရအောင် … အလုပ်မှာဆိုရင် ငါမင်းကို ဘော့စ်လို့ ခေါ်မယ် … နောက်ကွယ်မှာဆိုရင်တော့ ငါ့ကို အဖေခေါ်ပေါ့ကွာ …”
“ ချီးပဲ … ဒါကြီးက စောက်ရမ်း စောက်လှုပ်ရှားဖို့ ကောင်းလွန်းတယ် ….”
ထိုအချိန် အလုပ်သမားအုပ်ကြီးမှာ အနီးနားတစ်ဝိုက်တွင် စုဝေးလာကြ၏။
“ မင်းတို့ကောင်တို့က -ီးကို ကြည့်ကောင်းနေတာလား … မြန်မြန် လိုက်စထွင်းကို ပိတ်လိုက်စမ်း …”
[သာမန်လေးလည်း ခန့်ညားနေတဲ့ ရှောင်ကျွင်းလေး]ကို ဆယ်ကြိမ်မက ရိုက်နှက်ပြီးနောက် ဘော့စ်မှာ ပင်ပန်းလွန်း၍ မောဟိုက်နေလေပြီ။
သူ့မျက်လုံးထောင့်စွန်းမှနေ၍ ကွန်ပျူတာစခရင်ကို တစ်ချက် ကြည့်လိုက်ပြီး မျက်နှာတစ်ခုလုံး စိမ်းဖန့်သွားခဲ့သည်။
ဉာဏ်ကောင်းသည့် ဝန်ထမ်းတစ်ဦးက ချက်ချင်းပဲ ပါဝင်ဖွင့်သည့် ခလုတ်ကို နှိပ်ချလိုက်၏။
ထိုသို့ဖြင့် လိုက်စထွင်းသည်လည်း အဆုံးသတ်သွားခဲ့သည်။
“ ဒေါက်တာချန် … အဲ့လူ သေတဲ့အထိ ရိုက်နှက်ခံရမှာတော့ မဟုတ်ဘူးမလား …”
ကြင်နာတတ်သည့် ကြည့်ရှုသူတစ်ဦးက ကွန်းမန့်ပေးလာခဲ့သည်။
“ သူ မသေပါဘူး …” ချန်ယွီ့ ပြောပြီး ခေါင်းခါယမ်းလိုက်ကာ “ ဒါပေမယ့် တစ်သက်လုံး ဝှီးချဲပေါ်မှာပဲ အချိန်ကုန်နိုင်တော့မယ် ….”
“ လက်နှစ်ဖက်မှာရှိတဲ့ သွေးကြောတွေလည်း ပြန်ကုမရနိုင်တော့အောင် ထိခိုက်သွားပြီး သူ့လက်တွေက အချိန်တိုင်းလိုလို တုန်ယင်နေမယ် …”
[သာမန်လေးလည်း ခန့်ညားနေတဲ့ ရှောင်ကျွင်းလေး]၏ ကံကြမ္မာကို သိရှိလိုက်ရပြီးနောက် ကြည့်ရှုသူများက ပင့်သပ်ရှိုက်မိသွားခဲ့ကြသည်။
စူးစမ်းချင်စိတ် အပြည့်ရှိသည့် ကြည့်ရှုသူ အများအပြားက ဘာလုပ်သည့် ကုမ္ပဏီလဲဟု အများအပြား ကွန်းမန့်ရေးလာလေသည်။
အဲ့ဒါက ငွေကြေး ခဝါချတဲ့ ကုမ္ပဏီလား … ဒါမှမဟုတ် ဟန်ဆောင်ထားတဲ့ ဂိုဏ်းတစ်ခုလား …
ဘော့စ်ဖြစ်သူရဲ့ ရက်စက်ချက်က [သာမန်လေးလည်း ခန့်ညားနေတဲ့ ရှောင်ကျွင်းလေး]ကို သံတုတ်နဲ့ မညှာမတာ ရိုက်နှက်တဲ့အထိပဲ … ပြီးတော့ အနီးနားဝိုင်းနေတဲ့ လူတွေကလည်း တစ်ကောင်မှ လူကောင်းပုံ မပေါ်ဘူး …
သူတို့ရဲ့ ဆံပင်တွေက ကာလာစုံနဲ့ … တက်တူးမရှိတဲ့လူရယ်လို့လည်း မြင်ကို မမြင်မိဘူး …
“ သူ အလုပ်လုပ်တဲ့ ကုမ္ပဏီက တရားမဝင်တဲ့ လုပ်ငန်းကိစ္စတွေနဲ့ တစ်ခုမှ ပတ်သက်မနေဘူး …” ချန်ယွီ့ ပြောလိုက်ပြီး “ အဲ့တာက ဂိုဏ်းမဟုတ်ဘူး … ဒီတိုင်း အွန်လိုင်း PR ကုမ္ပဏီတစ်ခုပဲ … အင်တာနက် ရေတပ်ဖွဲ့ဆိုပြီးလည်း လူပြောများကြတယ် …”
ကြည့်ရှုသူများမှာ ဉာဏ်အလင်းပွင့်သွားခဲ့ကြ၏။
[သာမန်လေးလည်း ခန့်ညားနေတဲ့ ရှောင်ကျွင်းလေး]က နည်းလမ်းမျိုးစုံသုံး၍ ချန်ယွီ့အား ဆန့်ကျင်နေသည်မှာ မထူးဆန်းတော့ချေ။ လက်စသတ်တော့ သူက ထိုသို့သော နေရာမျိုးတွင် အလုပ်လုပ်သူ တစ်ဦး ဖြစ်နေလေသည်။
ချန်ယွီ့က သူ့အား အွန်လိုင်းပေါ်တွင် လူများနှင့် စကားပြောဆိုရာ၌ ထူးချွန်ကျွမ်းကျင်သညဟု ဆိုခဲ့သည့်မှာ မထူးဆန်းတော့ပေ။ ပရော်ဖက်ရှင်နယ် ရေတပ်သားတို့က သူတို့၏ ကီးဘုတ်နှင့် လက်နှစ်ဖက်ကိုသာလျှင် အသုံးပြု၍ တိုက်ပွဲဝင်ကြ၏။
“ ဟုတ်တော့ မဟုတ်သေးဘူးနော် ဒေါက်တာချန် … မင်း လူနာရွေးချယ်တဲ့ နည်းလမ်းက ဟုန်ပေါင်းနဲ့လေ … ထိပ်တန်း သုံးဦးကပဲ လူချင်းစကားပြောပြီး ဆွေးနွေးနိုင်မယ့် အခွင့်အရေး ရှိတာ … “
“ အင်တာနက်ရေတပ်က ဘယ်လောက်တောင် တိုက်ဆိုင်လွန်းလို့ ဟုန်ပေါင်းရသွားခဲ့တာလဲတဲ့ … ဒါကြီးက တိုက်ဆိုင်လွန်းမနေဘူးလား …”
ကြည့်ရှုသူတစ်ဦးက ထပ်မံ မေးမြန်းလိုက်သည်။
“ ဒါပေါ့ … လောကကြီးထဲ အဲ့လို တိုက်ဆိုင်တာမျိုး ဘယ်လိုလုပ်ပြီး ရှိနိုင်မှာ …” ချန်ယွီ့က ခပ်ဖျော့ဖျော့ပြုံး၍ ပြောလိုက်ပြီး “ ငါ့ကို ပုတ်ခတ်ပြောဆိုချင်တဲ့လူက ကြည့်ရှုသူ အတုတွေ အများကြီး ငှားထားတယ်လေ …”
“ သူတို့က ထောင်နဲ့ချီတဲ့ ရေတပ်သားတွေကို ငှားရမ်းပြီး သူတို့တစ်ယောက်ချင်းစီတိုင်းမှာ အကောင့်တွေကလည်း ရာနဲ့ချီတယ် ….”
“ ဖြစ်နိုင်ချေက နည်းပါးတယ်ဆိုရင်တောင် သူတို့မှာ အခွင့်အရေးကတော့ ရှိနေသေးတုန်းပဲ …”