သွေးမျိုးဆက် အဆင့်တက်ခြင်း၊ ငွေပြာဘုရင် မွေးဖွားလာပြီ

မဟာဧကရာဇ်အရိပ်ပိုင်းခြားခြင်း၏ ကျယ်ပြန့်ရှုပ်ထွေးလှသော သတင်းအချက်အလက် စီးကြောင်းကြီးသည် လင်းထျန်းလုံ၏ ဝိညာဉ်အနက်ထဲထိ လုံးဝပေါင်းစပ်သွားပြီး၊ သူ၏ ခန္ဓာကိုယ် အသက်စွမ်းအင် အရင်းအမြစ်မှာ ယခင်က တစ်ခါမှမကြုံဖူးသော တုန်လှုပ်ဖွယ်ရာ အပြောင်းအလဲတစ်ခုကို ခံစားလိုက်ရလေသည်။

ဤကြောက်မက်ဖွယ်ကောင်းသော ဘုရင်အဆင့်စွမ်းရည်ကို ပြီးပြည့်စုံစွာ လက်ခံနိုင်ရန်အတွက် သူ၏ ခန္ဓာကိုယ်သည် အတိကျဆုံးသော ပြုပြင်ပြောင်းလဲမှုများကို ပြုလုပ်နေခဲ့သည်။

ယခင်က ဖောင်းကြွပြီး ပေါက်ကွဲထွက်လုနီးပါးဖြစ်နေသော သူ၏ ကြွက်သားအမျှင်များသည် ယခုအခါ ပိုမိုသွယ်လျပြီး ကျစ်လျစ်သိပ်သည်းလာကာ၊ တဟုန်ထိုး ပေါက်ကွဲထွက်ပေါ်လာနိုင်သည့် ခွန်အားများကို စုစည်းထားလေသည်။

ရှည်လျားသော ငွေရောင်အဆင်းရှိ ဝံပုလွေလည်ဆံမွေးများသည်လည်း အနည်းငယ်တိုသွားပြီး ၎င်းတို့၏ အရောင်မှာ လရောင်ဖြင့် ဆေးကြောခံလိုက်ရသကဲ့သို့ တောက်ပသော ငွေပြာရောင်အဖြစ်မှ ပိုမိုနက်ရှိုင်းလာပြီး အတွင်းပိုင်းတွင် တောက်ပနေသော ငွေရောင်နှင့်မီးခိုးရောင် ရောစပ်ထားသည့် အရောင်အဖြစ်သို့ ပြောင်းလဲသွားကာ... လျှို့ဝှက်ဆန်းကြယ်ပြီး သေမင်းတမန်ကဲ့သို့သော အရိပ်ပိတ်ပါးလွှာတစ်ခု ဖုံးလွှမ်းထားသကဲ့သို့ ဖြစ်သွားလေသည်။

သူ၏ ခန္ဓာကိုယ်ဖွဲ့စည်းပုံမှာ သိသိသာသာပြောင်းလဲလာပြီး ပိုမိုသွယ်လျကာ သွက်လက်ပေါ့ပါးလာလေသည်။ စွမ်းအင်များ ကြွက်သားများနှင့် အရိုးတိုင်းအတွင်း အရှိန်အဟုန်ဖြင့် စီးဆင်းနေပြီး ပြေလွှားနေချိန်တွင် လေထုနှင့်လိုက်ဖက်ညီနေကာ သဘာဝစည်းချက်တစ်ခုနှင့် သိမ်မွေ့စွာ ကိုက်ညီနေခဲ့‌လည်။

သို့သော် လင်းထျန်းလုံကို ပျော်ရွှင်စေဆုံးအရာမှာ ဤ “အမြန်နှုန်း” ကို ဦးတည်သော ပြုပြင်ပြောင်းလဲမှုသည် ခွန်အားကိုစတေး၍ ရရှိလာခြင်းမဟုတ်သောကြောင့်ပင်။

သွယ်လျသော ခန္ဓာကိုယ်ထဲတွင် ပုန်းအောင်းနေသော ခွန်အားများသည် လျော့ကျမသွားဘဲ ပို၍ပင်တိုးလာကြောင်းကို သူ ရှင်းလင်းစွာ ခံစားနေရသည်။ ထိုးဖောက်နိုင်စွမ်း ပိုမိုအားကောင်းလာပြီး ကြီးမားသော အဖျက်စွမ်းအင်များဖြင့် ပြည့်နှက်နေသည့် ခွန်အားတစ်ခုသည် သူ၏ လက်သည်းများနှင့် အစွယ်များအတွင်း ဆူပွက်နေခဲ့လေသည်။

“အမြန်နှုန်းနဲ့ခွန်အား ယှဉ်တွဲတည်ရှိနေတာပဲ... ဒီ ဘုရင်အဆင့် ပင်ကိုစွမ်းရည်ရဲ့ ပြောင်းလဲနိုင်စွမ်းက တကယ့်ကို အံ့မခန်းပဲ...”

ဆောင်းဦးည၏ လရောင်သည် အေးစက်စွာ ကျဆင်းလာပြီး တောင်ကြားတစ်ခုလုံးကို လင်းလက်သွားစေသည်။ နှင်းဝံပုလွေများအားလုံးသည် သူတို့၏ ဘုရင်ထံမှ ထွက်ပေါ်လာသော သိသိသာသာ ကွဲပြားနေပြီး ယခင်ကထက်ပို၍ထိ တ်လန့်စရာကောင်းသော အရှိန်အဝါကို အာရုံခံမိကြသည်။

သူတို့သည် အလိုအလျောက်ပင် လေးနက်တည်ကြည်သွားကာ ရိုသေလေးစားမှုများ ဖြစ်ပေါ်လာကြပြီး၊ ငွေရောင်လမင်းအောက်ရှိ ပုံရိပ်ဆီသို့ သူတို့၏ ခန္ဓာကိုယ်များကို နှိမ့်ချလိုက်ကာ ရှေးဟောင်းကိုးကွယ်မှုဓလေ့တစ်ခုကို ပြုလုပ်နေသကဲ့သို့ တိုးညင်းပြီး ရိုသေလေးစားမှု အပြည့်ပါသော ညည်းတွားသံများကို ထုတ်လွှတ်နေကြလေသည်။

ဤအခိုက်အတန့်တွင် လင်းထျန်းလုံ၏ ငွေရောင်ဖုံးလွှမ်းနေသော သားမွေးများသည် လရောင်အောက်ရှိ တစ္ဆေတစ်ကောင်ကဲ့သို့ အလင်းရောင်များ ခပ်သဲ့သဲ့ စီးဆင်းနေပြီး၊ ယခင်ကထက် ပိုမိုသိမ်မွေ့လာသော်လည်း နားလည်ရခက်သော ခမ်းနားထည်ဝါမှုနှင့် လျှို့ဝှက်ဆန်းကြယ်မှုတို့ကို ပိုင်ဆိုင်ထားလေသည်။

“အာဝူး...”

သူသည် ခေါင်းမော့ကာ ရှည်လျားပြီး ထိုးဖောက်နိုင်စွမ်းအားကောင်းသော ဟိန်းဟောက်သံကြီးကို ထုတ်ဖော်လိုက်ပြီး သူ၏ အသွင်ပြောင်းလဲမှု ပြီးစီးကြောင်း ကြေညာလိုက်သလို၊ နှင်းဝံပုလွေမျိုးနွယ်စုသည် ဤရက်စက်ကြမ်းကြုတ်လှသော တိုက်ပွဲ၏ နောက်ဆုံးအောင်ပွဲခံသူ‌တွေ ဖြစ်လာကြောင်းကိုလည်း ကြေညာလိုက်လေသည်။

ဟိန်းဟောက်သံများ တဖြည်းဖြည်း ပျောက်ကွယ်သွားခဲ့ပြီး သူသည် အရိပ်မီးတောက် ကျားသစ်ဘုရင်၏ အလောင်းဆီသို့ လျှောက်သွားလိုက်သည်။ ခွန်အားပြင်း သံချပ်ကာခွဲလက်သည်းမှာ အလင်းရောင်များ လျှပ်တစ်ပြက် တောက်ပသွားပြီး မာကျောသော ဦးခေါင်းခွံကို အလွယ်တကူ ခွဲပစ်လိုက်လေသည်။

ကံကြမ္မာက သူ့ဘက်တွင်ရှိနေဆဲ ဖြစ်ပုံရသည်။ အသန့်စင်ဆုံးမဟူရာကျောက်ကဲ့သို့ မည်းနက်နေပြီး ခိုဥအရွယ်အစားရှိ သလင်းကျောက်တစ်ခုသည် ၎င်းအတွင်းတွင် ငြိမ်သက်စွာ တည်ရှိနေပြီး ကြောက်မက်ဖွယ်ကောင်းသော စွမ်းအင်လှိုင်းများကို ထုတ်လွှတ်နေလေသည်။ ထိုအရာမှာ အရိပ်မီးတောက် ကျားသစ်ဘုရင်၏ အမြုတေပင်။

လင်းထျန်းလုံ၏ နှလုံးသား လှုပ်ရှားသွားပြီး သူ အသစ်ရရှိထားသော ကနဦး စိတ်ထိန်းချုပ်ခြင်း စွမ်းရည်ကို အသုံးပြုရန် ကြိုးစားလိုက်သည်။ အားနည်းသော်လည်း တည်ငြိမ်နေသော စိတ်စွမ်းအင်တစ်ခုသည် ဆန့်ထွက်လာကာ အမြုတေကို ဂရုတစိုက် ရစ်ပတ်လိုက်ပြီး တည်ငြိမ်စွာ မြှောက်တင်လိုက်သဖြင့် သူ့ရှေ့တွင်ဝဲနေ‌ခဲ့သည်။

[ မိစ္ဆာသားရဲအမြုတေ (အရိပ်မီးတောက် ကျားသစ်ဘုရင်)။ ။ ခြေလှမ်း၀က်ဘုရင်အဆင့် မိစ္ဆာသားရဲတစ်ကောင်၏ ဝိညာဥ်အနှစ်သာရမှနေ၍ ပေါင်းစပ်ဖွဲ့စည်းထားခြင်းဖြစ်ပြီး ကြီးမားလှသော စွမ်းအင်များနှင့် မိစ္ဆာသားရဲ၏ အခြေခံ စွမ်းရည်များ၏ တစ်စိတ်တစ်ပိုင်း ပါဝင်သည်။ ၎င်းကို စားသုံးပါက အတွေ့အကြုံရမှတ် အမြောက်အမြား ရရှိမည်ဖြစ်ပြီး အောက်ပါ ပင်ကိုစွမ်းရည်များထဲမှ တစ်ခုကို နိုးထလာရန် အခွင့်အလမ်းများစွာရှိသည်။ ]

[ မီးတောက်အရိပ် အမွှာဝိညာဉ် (ခရမ်းရောင် · ပါရမီရှင်အဆင့်)၊ မသေနိုင်သော မိစ္ဆာခန္ဓာ (ခရမ်းရောင် · ပါရမီရှင်အဆင့်)၊ မီးတောက်အရိပ် သွေးမျိုးဆက် (ခရမ်းရောင် · ပါရမီရှင်အဆင့်) ]

“အားလုံးက ခရမ်းရောင် ပါရမီရှင်အဆင့် အကောင်းစားတွေချည်းပဲ...” လင်းထျန်းလုံ၏ မျက်လုံးများထဲတွင် ပူပြင်းလောင်ကျွမ်းနေသော မီးတောက်တစ်ခု လျှပ်တစ်ပြက် တောက်ပသွားပြီး တွန့်ဆုတ်ခြင်းမရှိဘဲ ပါးစပ်ဟကာ အမြုတေကို မျိုချလိုက်လေသည်။

သူ၏ ပါးစပ်ထဲသို့ အမြုတေဝင်ရောက်သွားသည့် အခိုက်အတန့်တွင် မျှော်လင့်ထားသကဲ့သို့ မာကျောနေခြင်း မရှိခဲ့ပေ။

၎င်းသည် အသန့်စင်ဆုံး စွမ်းအင်ရေခဲသလင်းကျောက်တစ်ခုကဲ့သို့ ချက်ချင်းပင် အရည်ပျော်ကျသွားပြီး ကြမ်းတမ်းကာ ပူပြင်းလောင်ကျွမ်းနေသော မီးလျှံဒီရေလှိုင်းတစ်ခုအဖြစ် ပြောင်းလဲသွားသည်။

ထိုစွမ်းအင်များသည် လည်ချောင်းထဲသို့ စီးဆင်းသွားပြီး ပြင်းထန်စွာ ပေါက်ကွဲထွက်လာကာ သူ၏ ခြေလက်များနှင့် အရိုးများဆီသို့ အရှိန်ပြင်းပြင်းဖြင့် တိုးဝင်သွားလေတော့သည်။

“ဘုန်း...”

သူ၏ ခန္ဓာကိုယ်အတွင်းမှနေ၍ ယခင်ကထက် ပိုမိုပြင်းထန်လှသော တုန်ခါမှုလှိုင်းကြီးတစ်ခု ထပ်မံပေါက်ကွဲထွက်လာခဲ့သည်။

ယခင် အပြောင်းအလဲမှာ ခန္ဓာကိုယ်ဖွဲ့စည်းပုံကို ပြုပြင်ပြောင်းလဲခြင်းသာ ဖြစ်ခဲ့ပြီး ယခုအကြိမ်သည် သန့်စင်သောစွမ်းအင်များ၏ ကြမ်းတ‌မ်းစွာ ဝင်ရောက်ရိုက်ခတ်မှုပင် ဖြစ်လေသည်။ စွမ်းအင် အလွန်အမင်း များပြားလွန်းမှုကြောင့် သူ၏ အမွေးတစ်ပင်ချင်းစီတိုင်း ထောင်မတ်နေပြီး၊ သူ၏ ကြွက်သားအမျှင်များသည် ဖိအားများအောက်တွင် တုန်ခါနေကာ သူ၏ အရိုးများသည်လည်း ကြီးမားသန့်စင်သော စွမ်းအင်များဖြင့် အတင်းအဓမ္မ သန့်စင်ခံနေရလေသည်။

[ စနစ် အသိပေးချက်။ ။ ပိုင်ရှင်သည် အရိပ်မီးတောက်ကျားသစ်ဘုရင်၏ အမြုတေကို ဝါးမြိုလိုက်သဖြင့် အတွေ့အကြုံရမှတ် အမြောက်အမြား ရရှိခဲ့သည်။ ]

[ စနစ် အသိပေးချက်။ ။ ပိုင်ရှင်သည် ပင်ကိုစွမ်းရည်တစ်ခုကို နိုးထလာခဲ့သည်။ မီးတောက်အရိပ် သွေးမျိုးဆက် (ခရမ်းရောင် · ပါရမီရှင်အဆင့်) ]

သို့သော်လည်း အရိပ်နှင့် မီးတောက်ဒြပ်စင်များ အများအပြားပါဝင်သော အသစ်မွေးဖွားလာသည့် ဤအားကောင်းလှသော သွေးမျိုးဆက်စွမ်းအားသည် သူ၏ ခန္ဓာကိုယ်အတွင်း မူလကတည်းက တည်ရှိနေသော ခမ်းနားထည်ဝါပြီး အေးစက်သည့် ဝံပုလွေပြာဘုရင် သွေးမျိုးဆက်နှင့် ချက်ချင်းပင် တွေ့ဆုံကာ ပဋိပက္ခဖြစ်လာခဲ့သည်။

အားကောင်းသော သွေးမျိုးဆက်နှစ်ခုသည် ကမ္ဘာမကြေရန်သူများကဲ့သို့ သူ၏ ခန္ဓာကိုယ်အတွင်းတွင် တိုက်ခိုက်နေကြပြီး ဆွဲဆုတ်ဖြဲခံရသကဲ့သို့ နာကျင်မှုများကို ဖြစ်ပေါ်စေလေသည်။

[ စနစ် အသိပေးချက်။ ။ ပိုင်ရှင်၏ ခန္ဓာကိုယ်အတွင်းတွင် သွေးမျိုးဆက်များ ပဋိပက္ခဖြစ်မှုကို တွေ့ရှိရသည်။ မီးတောက်အရိပ် သွေးမျိုးဆက် (ခရမ်းရောင် · ပါရမီရှင်အဆင့်) နှင့် [ ဝံပုလွေပြာသွေးမျိုးဆက် (ခရမ်းရောင်)တို့သည် အချင်းချင်း တွန်းကန်နေကြသည်။ ကျေးဇူးပြု၍ ချက်ချင်း ဖြေရှင်းပါ၊ သို့မဟုတ်ပါက သွေးမျိုးဆက် ပြိုကွဲမှုကို ဖြစ်စေနိုင်သည်။ ]

[ ရွေးချယ်စရာ တစ်။ ။ [ မီးတောက်အရိပ် သွေးမျိုးဆက် ] ကို အတင်းအဓမ္မ ဖိနှိပ်ကာ ၎င်းကို အာဟာရအဖြစ် အသုံးပြု၍ [ ဝံပုလွေပြာသွေးမျိုးဆက် ] ကို အနည်းငယ် အားဖြည့်ပါ။ ]

[ ရွေးချယ်စရာ နှစ်။ ။ [ ဝံပုလွေပြာသွေးမျိုးဆက် ] ကို ဦးဆောင်၍ [ မီးတောက်အရိပ် သွေးမျိုးဆက် ] အား ဝါးမြိုစေကာ [ ဝံပုလွေပြာသွေးမျိုးဆက် ] ၏ အကျိုးသက်ရောက်မှုများကို မြှင့်တင်ရန် အခွင့်အလမ်း ရယူပါ။ ]

လင်းထျန်းလုံသည် သူ၏ ကိုယ်ပိုင် သွေးမျိုးဆက်ကို အားဖြည့်ရန် ကြိုးစားသည့်အနေဖြင့် ဒုတိယရွေးချယ်စရာကို ရွေးချယ်ရန် ပြင်နေဆဲမှာပင်၊ ပို၍မြင့်မားသော အာဏာပိုင်တစ်ဦးထံမှ စကားသံထွက်ပေါ်လာသကဲ့သို့ ပိုမိုနက်ရှိုင်းသော စနစ်အသိပေးသံတစ်ခု ထွက်ပေါ်လာခဲ့သည်။

[ ဒင်။ ။ ပိုင်ရှင်သည် အလွန်လိုက်ဖက်ညီမှုရှိသည့် အမိန့်ပေးအမျိုးအစား ပင်ကိုစွမ်းရည် မျိုးတူပဲ့တင်ထပ်သံ (ခရမ်းရောင်)၊ ဘုရင်သွေးမျိုးဆက် ပင်ကိုစွမ်းရည် ဝံပုလွေပြာသွေးမျိုးဆက် (ခရမ်းရောင်) နှင့် ထိပ်တန်း သားရဲသွေးမျိုးဆက် မီးတောက်အရိပ် သွေးမျိုးဆက် (ခရမ်းရောင် · ပါရမီရှင်အဆင့်) တို့ကို တစ်ပြိုင်နက်တည်း ပိုင်ဆိုင်ထားကြောင်း တွေ့ရှိရသည်။ ထိုစွမ်းရည်များသည် အထူးပေါင်းစပ်မှု အခြေအနေများနှင့် ကိုက်ညီနေပါသည်။ ]

[ ရွေးချယ်စရာ သုံး။ ။ စနစ်၏စွမ်းအားကို အကူပစ္စည်းအဖြစ် အသုံးပြု၍ ပင်ကိုစွမ်းရည်သုံးခုကို ပေါင်းစပ်ကာ သင့်သွေးမျိုးဆက် အနက်ထဲတွင် ပုန်းကွယ်နေသော စစ်မှန်သည့် စွမ်းအား (ငွေပြာရောင် သွေးမျိုးဆက်) ကို နိုးထနိုင်သည်။ ဤဖြစ်စဉ်သည် စတင်ပြီးသည်နှင့် ရပ်တန့်၍မရနိုင်ဘဲ အန္တရာယ်အချို့ ရှိနိုင်ပါသည်။ ကျေးဇူးပြု၍ သတိထား ရွေးချယ်ပါ။ ]

“သုံးခုလုံးကို ပေါင်းစပ်ရမယ်ဟုတ်လား... မျိုးတူပဲ့တင်ထပ်သံကပါ ပျောက်ကွယ်သွားမှာလား...” လင်းထျန်းလုံ ချက်ချင်းပင် တွေဝေသွားခဲ့သည်။ မျိုးတူပဲ့တင်ထပ်သံ၏ အားကောင်းလှသော အထောက်အကူပြု အကျိုးသက်ရောက်မှုကို သူကိုယ်တိုင် တွေ့ကြုံခံစားခဲ့ရပြီးသား ဖြစ်သည်။

၎င်းမှာ ဝံပုလွေအုပ်စု တစ်ခုလုံး၏ခွန်အားအတွက် အခြေခံအုတ်မြစ်ပင် ဖြစ်လေသည်။

“ဒါပေမဲ့... စနစ်က အထူးတလည် အသိပေးထားသေးတယ်... ငွေပြာရောင် သွေးမျိုးဆက်တဲ့လား...” အလိုအလျောက်အသိစိတ်၏ အနက်ရှိုင်းဆုံးနေရာမှ မြစ်ဖျားခံလာသော ဆန္ဒတစ်ခုက သူ့အား လှမ်းခေါ်နေသလို ခံစားလိုက်ရလေသည်။

ဤသည်မှာ နှစ်ထောင်ပေါင်းများစွာတွင် တစ်ကြိမ်သာ ကြုံတွေ့နိုင်မည့် အခွင့်အရေးတစ်ခုဖြစ်ကြောင်း သူ၏ အလိုအလျောက်အသိစိတ်က ပြောပြနေသည်။

အန္တရာယ်များ ရှိနေသော်ငြား၊ အကယ်၍ သူသာ ဤအခွင့်အရေးကို လက်လွတ်ခံလိုက်ပါက နောက်ထပ် ဘယ်တော့မှ ပြန်ရလာနိုင်တော့မည်မဟုတ်ပေ။ သူ့ရည်မှန်းချက်ဖြစ်သော သမီးငယ်လေးများကို အကာအကွယ်ပေးရန် ခွန်အားကြီးမားလာဖို့ မရှိမဖြစ်လိုအပ်ပေသည်။

“မိစ္ဆာသားရဲတွေအတွက် သွေးမျိုးဆက်ဆိုတာ အခြေခံအုတ်မြစ်ပဲ... ငါ စွန့်စားကြည့်လိုက်မယ်...”

ထပ်မံ တွန့်ဆုတ်နေခြင်းမရှိတော့ဘဲ သူသည် တတိယရွေးချယ်စရာကို ပြတ်သားစွာ ရွေးချယ်လိုက်လေတော့သည်။

သူ ဆုံးဖြတ်ချက်ချလိုက်သည့် အခိုက်အတန့်တွင် ပုံမှန်မဟုတ်သော အခြေအနေတစ်ခု ရုတ်တရက်ဖြစ်ပေါ်လာခဲ့သည်။