အခန်း (၃၉-၄၀)
Vol. 4 Ch. 39-40
အပိုင်း (၃၉) - နဂါးကျောရိုးတောင်ကြား လမ်းမ
မြင်းရထားသည် ပြန်လည်စတင် ထွက်ခွာလာပြီးနောက် ကုန်းမြင့်လေးတစ်ခုကို လျင်မြန်စွာ ကျော်ဖြတ်လာခဲ့သည်။
မလှမ်းမကမ်းတွင် အလွန်စည်ကားလှသော ဈေးတန်းကြီးတစ်ခု ရှိနေသည်။ ၎င်းမှာ လူသူကင်းမဲ့ပြီး ခြောက်သွေ့နေသော ပတ်ဝန်းကျင်နှင့် လုံးဝ ဆန့်ကျင်ဘက်ပင်။
တောင်ကြားဝင်ပေါက်တွင် ကင်းလှည့်နေသော အစောင့်အချို့ ရှိသည်။
ထျဲမ ကို မြင်သောအခါ အစောင့်တစ်ဦးက ရထားကို အကဲခတ်ပြီး မေးလိုက်သည်။
"မင်းမှာ နဂါးကျောရိုး တံဆိပ်ပြား ရှိလား"
ထျဲမက တံဆိပ်ပြားကို ထုတ်ပြလိုက်ပြီး ဖန်ချန် ပေးလိုက်သော ဝိညာဉ်ကျောက်တုံးကို ပစ်ပေးလိုက်သည်။
အစောင့်က ခပ်ဖွဖွ ခေါင်းညိတ်ပြသည်။
"ဝင်လို့ရပြီ"
ထိုနေရာမှာ ကျင့်ကြံသူများ စုဝေးရာ နဂါးကျောရိုးတောင် ပင် ဖြစ်သည်။
ဖန်ချန်၏ ဝိညာဉ်သည် ထိုနေရာသို့ ကြိုတင်ရောက်ရှိ စူးစမ်းပြီးသား ဖြစ်သည်။
စီနီယာ ယွမ်ဟယ် ၏ အဆင့်မျိုးရှိသော ပညာရှင်ကြီးများ ထိုနေရာတွင် မရှိပေ။
အစွမ်းအထက်ဆုံး ပုဂ္ဂိုလ်မှာ ချီသန့်စင်ခြင်းအဆင့် သာ ဖြစ်သည်။
နဂါးကျောရိုးတောင်သည် အတော်ပင် ကျယ်ဝန်းပြီး မြို့ငယ်လေးတစ်မြို့နှင့် ဆင်တူသည်။
သို့သော် ထို နေရာရှိ လူအားလုံးမှာ ကျင့်ကြံသူများ မဟုတ်ကြပေ။
ထျဲမကဲ့သို့သော သိုင်းသမားများကိုလည်း တွေ့နိုင်ပြီး သူတို့မှာ ကျင့်ကြံသူများ၏ နောက်လိုက်နှင့် အစေခံများသာ ဖြစ်ကြသည်။
ဖန်ချန်က ထိုနေရာသည် ဝိညာဉ်သွေးဂိုဏ်းနှင့် ပတ်သက်နေမည်ဟု ထင်ထားသော်လည်း သူ၏ ဝိညာဉ်က ထိုအဘွားအိုနောက်သို့ လိုက်လာသောအခါမှ ထိုနေရာသည် ကျင့်ကြံသူများအတွက် အရောင်းအဝယ်ပြုလုပ်သည့် ဈေးကွက်တစ်ခုသာ ဖြစ်ကြောင်း သိလိုက်ရသည်။
ထိုအဘွားအိုသည် သူမ၏ ကျင့်ကြံခြင်းအတွက် လိုအပ်သော ပစ္စည်းအချို့ ဝယ်ယူရန် ထိုမျှဝေးသော ခရီးကို လာခဲ့ခြင်း ဖြစ်သည်။
"ရထားထဲမှာပဲ ငါ့ကို စောင့်နေ"
ဟု ဖန်ချန်က ညွှန်ကြားလိုက်သည်။
သူသည် လက်ထဲမှ မျက်နှာဖုံးကို တပ်ဆင်ကာ ရထားပေါ်မှ ဆင်းခဲ့သည်။ ထို့နောက် ထိုအဘွားအိုကို မျက်ခြေမပြတ် စောင့်ကြည့်ရင်း ပတ်ဝန်းကျင်ကို စတင်စူးစမ်းတော့သည်။
ထိုနေရာရှိ ကျင့်ကြံသူ အများစုမှာ မျက်နှာဖုံးများ တပ်ထားကြသည်။
အလားတူပင် ထိုအဘွားအိုသည်လည်း ဈေးထဲမဝင်မီ သူမ၏ ရုပ်ရည်ကို ဖုံးကွယ်ထားခဲ့သည်။
ထိုဈေးတွင် ရောင်းချသော ပစ္စည်းအများစုမှာ ဇစ်မြစ်မသေချာသဖြင့် ဝယ်ယူသူများက သတိကြီးစွာ ထားကြပုံရသည်။
"ခွန်အားတိုးအဆောင် သုံးခု ရောင်းမယ် အဆင့်နိမ့်ဝိညာဉ်ကျောက်တုံး ခြောက်တုံးပဲ ဈေးမဆစ်နဲ့"
"မီးတောက်ဓား ဝိညာဉ်တံဆိပ် လေးခုပါတယ်အသုံးပြုလိုက်တာနဲ့ မီးတောက်တွေ ထွက်လာမယ်အင်မတန် အစွမ်းထက်တယ် အဆင့်နိမ့်ဝိညာဉ်ကျောက်တုံး ၈၀ နဲ့ ရောင်းမယ် ဈေးဆစ်လို့ရတယ်"
"အရည်အသွေးမြင့် ချီစုစည်းဆေးလုံး ၁၂ လုံးတစ်တွဲကို ဝိညာဉ်ကျောက်တုံး ၅၅ တုံးပဲ တစ်လုံးချင်း ဝယ်ရင်တော့ ၅ တုံး ကျမယ်"
ဖန်ချန်သည် လမ်းမအတိုင်း လျှောက်လာစဉ် ဘေးတစ်ဖက်တစ်ချက်မှ အော်ဟစ်ရောင်းချသံများကို ကြားနေရသည်။
ထိုကျင့်ကြံသူများမှာ ကျင့်စဉ်အဆင့် နိမ့်ပါးကြပြီး ချီသန့်စင်ခြင်း ပထမအဆင့်မှ ဒုတိယအဆင့်အတွင်းသာ ရှိကြသည်။
ထိုကဲ့သို့သော ဆိုင်ခန်းလေးများအပြင် ပို၍ ဈေးကြီးသော ပစ္စည်းများရောင်းသည့် တရားဝင် ဆိုင်ကြီးအချို့လည်း ရှိသည်။
ထိုနေရာရှိ ကျင့်ကြံသူများမှာမူ အဆင့်အတန်း ပိုမြင့်ကြသည်။
ဖန်ချန်သည် အဆောင်များရောင်းသည့် ဆိုင်ခန်းတစ်ခုရှေ့တွင် ရပ်လိုက်သည်။
ဆိုင်နှင့် မလှမ်းမကမ်းတွင် အဘွားအိုသည် ချီစုစည်းဆေးလုံး အချို့အတွက် ဈေးဆစ်နေသည်။
သူမသည် ဆေးလုံး ငါးလုံး ဝယ်လိုသော်လည်း သတ်မှတ်ထားသည့် ဈေးနှုန်းအတိုင်း မပေးလိုဘဲ လျှော့ဈေးရရန် အတင်းအကျပ် ကြိုးစားနေသည်။
ဖန်ချန်က ထိုအမျိုးသမီးကို အကဲခတ်နေစဉ် လူတစ်ယောက်က သူရပ်နေသော ဆိုင်ခန်းသို့ ချဉ်းကပ်လာသည်။
"အကိုကြီး ဒီခွန်အားတိုးအဆောင် တွေအတွက် သာမန် ပြဒါးမင်နဲ့ ဝါဂွမ်းစက္ကူတွေကိုပဲ သုံးထားတာလား ဒါတွေက အရည်အသွေး တော်တော်နိမ့်တယ် သုံးခုကို ဝိညာဉ်ကျောက်တုံး လေးတုံးဆိုရင်တော့ သင့်တော်မယ်ထင်တယ်"
ဆိုင်ရှင်က မျက်လုံးလှန်ကြည့်ကာ
"အဆောင်တစ်ခု လုပ်ဖို့ဆိုတာ အချိန်နဲ့ အင်အား အများကြီး စိုက်ထုတ်ရတာဗျ တစ်ခုရဖို့ ဆယ်ရက်ကနေ လဝက်လောက်အထိ ကြာတတ်တယ် လုပ်နေတုန်းမှာလည်း ဝိညာဉ်စွမ်းအင်တွေ အများကြီး ကုန်တာ ဒါ အနည်းဆုံးဈေးပဲ ဈေးဆစ်ချင်ရင် တခြားသွားဝယ်"
ဟု ပြန်ပြောလိုက်သည်။
'အဆောင်တစ်ခုလုပ်ဖို့ ဆယ်ရက်ကနေ လဝက်'
ဖန်ချန်က ဆိုင်ရှင်ကို တစ်ချက်ကြည့်လိုက်သည်။
သူ၏ အရှိန်အဝါမှာ ဖန်ချန်နှင့် အဆင့်တူဖြစ်ပြီး ချီသန့်စင်ခြင်း ဒုတိယအဆင့်တွင် ရှိသည်။
အဆောင်ဆွဲရတာ တကယ်ပဲ အဲဒီလောက် ခက်ခဲတာလား
ဆိုင်ရှင်က ဈေးတင်ဖို့အတွက် ပြောနေတာလို့ ဖန်ချန် ထင်ခဲ့ပေမဲ့ အံ့ဩစရာကောင်းသည်မှာ ဝယ်သူက ခေတ္တဝေခွဲမရ ဖြစ်သွားပြီးမှ မူလဈေးအတိုင်းပင် ဝယ်ယူသွားခဲ့ခြင်း ဖြစ်သည်။
'ဒါကတော့... ခွန်အားတိုးအဆောင်တွေက အမြန်နှုန်းအဆောင် ဒါမှမဟုတ် စိန်ကိုယ်ထည် အဆောင်တွေနဲ့ ယှဉ်ရင် လုပ်ရတာ ပိုလွယ်ပါတယ် ငါသာ တစ်နေ့လုံး ဘာမှမလုပ်ဘဲ ခွန်အားတိုးစာစောင်တွေပဲ လုပ်မယ်ဆိုရင် အခု ၄၀၊ ၅၀ လောက် ထွက်ဖို့က ပြဿနာမရှိဘူး'
ဖန်ချန်၏ မျက်နှာတွင် ထူးဆန်းသော အမူအရာတစ်ခု ပေါ်လာသည်။
ဒါဆိုရင် သူသာ အဆောင်တွေ စတင်ရောင်းချမယ်ဆိုရင် ဝိညာဉ်ကျောက်တုံးတွေ အများကြီး ရနိုင်တာပေါ့
သူသည် ချက်ချင်းပင် စိတ်ဝင်စားသွားသည်။
တာအိုဆရာရွှယ်၏ 'ဝိညာဉ်နှိမ်နင်းခေါင်းလောင်း' ကဲ့သို့သော ရတနာပစ္စည်းများ ရောင်းနေသည်ကိုလည်း သူ မြင်ခဲ့ရသဖြင့် ထိုအရာများကို သူ အလွန် လိုချင်နေမိသည်။
ရုတ်တရက် ဆူညံအော်ဟစ်သံတစ်ခု ထွက်ပေါ်လာသည်။
"အဘွားကြီး ဝယ်မှာလား မဝယ်ဘူးလား မဝယ်ရင်လည်း ငါ့ဆိုင်ရှေ့မှာ လာမရှုပ်နဲ့ ဒီချီစုစည်းဆေးလုံးတွေက တစ်လုံးကို ဝိညာဉ်ကျောက်တုံး ငါးတုံးပဲဒါပဲ ငါက ဘယ်သူလဲဆိုတာရော မင်း သိရဲ့လား"
ဖန်ချန် လှည့်ကြည့်လိုက်သောအခါ ဆိုင်ရှင်က အဘွားအိုကို အော်ဟစ်ဆဲဆိုနေသည်ကို တွေ့ရသည်။
အဘွားအို၏ မျက်နှာမှာ ဒေါသကြောင့် ဖြူလိုက်ပြာလိုက် ဖြစ်နေသော်လည်း အံ့ဩစရာကောင်းသည်မှာ သူမ ပြန်မပြောခြင်းပင်။
သူမသည် မတတ်သာဘဲ ဝိညာဉ်ကျောက်တုံးများကို ထုတ်ပေးကာ သတ်မှတ်ဈေးအတိုင်း ဆေးလုံးများကို ဝယ်လိုက်ရသည်။
'ကျင့်ကြံခြင်းလောကထဲက အင်အားစုတွေက တော်တော် ရှုပ်ထွေးပုံရတယ် ဒီအဘွားအိုက ဝိညာဉ်သွေးဂိုဏ်းက ဖြစ်ပေမဲ့ သူမထက် နှစ်ဆင့်လောက် နိမ့်တဲ့ ကျင့်ကြံသူကိုတောင် ရမ်းရမ်းကားကား မလုပ်ရဲဘူးပဲ' ဟု ဖန်ချန် တွေးမိသည်။
ဒါက သတင်းကောင်းပင်။ အနည်းဆုံးတော့ ဝိညာဉ်သွေးဂိုဏ်းက အင်အားစုကြီး မဟုတ်ဘူးဆိုတာ သက်သေပြနေသည်။
သို့သော် ၎င်းမှာ ထိုအမျိုးသမီး၏ အဆင့်အတန်းမှာ ဂိုဏ်းအတွင်း၌ အလွန်နိမ့်ကျနေသောကြောင့်လည်း ဖြစ်နိုင်သည်။
ထိုအဘွားအိုသည် ပစ္စည်းဝယ်ပြီးနောက် ထွက်မသွားသေးဘဲ လွတ်လပ်သော နေရာတစ်ခုတွင် သူမကိုယ်တိုင် ဆိုင်ခန်းဖွင့်လိုက်သည်။
သူမသည် ဝိညာဉ်ဆေးပင်များ၊ ဆေးဖက်ဝင်အပင်များနှင့် ထူးခြားသော သတ္တုအချို့ကို တင်ရောင်းနေသည်။
၎င်းကို မြင်သောအခါ ဖန်ချန်၏ မျက်လုံးများတွင် အပြုံးရိပ်တစ်ခု ဖြတ်ပြေးသွားပြီး သူမကို ဆက်ပြီး ဂရုမစိုက်တော့ပေ။
နဂါးကျောရိုးတောင်ကြား လမ်းမထဲသို့ ဝင်ခွင့်ရခြင်းမှာ ရှားပါးသော အခွင့်အရေး ဖြစ်သည်။
သူ၏ လှုပ်ရှားမှုတိုင်းကို သေသေချာချာ စီစဉ်ရန် လိုအပ်သည်။
တစ်နာရီခန့် လှည့်ပတ်ကြည့်ရှုပြီးနောက် ဖန်ချန်သည် နဂါးကျောရိုးတောင် တစ်ခုလုံးကို ပတ်မိသွားပြီး ဈေးနှုန်းများကိုလည်း အကြမ်းဖျင်း နားလည်သွားခဲ့ပြီ ဖြစ်သည်။
ထိုနေရာတစ်ခုလုံးမှာ ရှေးဟောင်းပစ္စည်းဈေးကွက်နှင့် ဆင်တူသည်။
လူအများစုမှာ မသိနားမလည်သူများကို လိမ်လည်ကာ ဈေးကြီးကြီးဖြင့် ရောင်းချရန် ကြိုးစားနေကြသည်။ သို့သော် ရိုးသားစွာ စီးပွားရှာသူ အချို့လည်း ရှိပါသေးသည်။
အစောပိုင်းက လူတစ်ယောက်သည် ဝိညာဉ်တံဆိပ် လေးခုပါသော 'မီးတောက်ဓား' ကို ရောင်းခဲ့သည်။
၎င်းမှာ ချီသန့်စင်ခြင်း စတုတ္ထအဆင့်ရှိသူများသာ အစွမ်းအပြည့် ထုတ်နိုင်သည့် ရတနာဖြစ်သည်။
သို့သော် ဝယ်သူက ဝယ်ပြီးမှ ထိုဓားရှိ ဝိညာဉ်တံဆိပ် နှစ်ခုမှာ ပျက်စီးနေကြောင်း သိလိုက်ရသည်။
၎င်းသည် တတိယအဆင့် ရတနာတစ်ခု၏ အစွမ်းကိုသာ ပြသနိုင်တော့သည်။
ဝယ်သူသည် သူ လိမ်လည်ခံရမှန်း သိသဖြင့် ရောင်းသူထံ ပြန်လာခဲ့သော်လည်း ရောင်းသူမှာ ထွက်ပြေးသွားပြီ ဖြစ်သည်။
ထိုလူသည် ဒေါသတကြီးဖြင့် နဂါးကျောရိုးတောင်မှ ထွက်ခွာသွားတော့သည်။ တစ်ဖက်လူကို ပြန်မိမမိဆိုသည်မှာတော့ မပြောနိုင်ပေ။
ဖန်ချန်သည် အဆောင်ဆွဲရာတွင် အသုံးပြုသည့် ပစ္စည်းများ ရောင်းသည့် ဆိုင်တစ်ခုရှေ့တွင် ရပ်လိုက်သည်။
ထိုနေရာတွင် စုတ်တံ ဒါဇင်ပေါင်းများစွာ၊ ဟင်္သပြဒါး မှင်များနှင့် ဝါဂွမ်းစက္ကူပုံကြီးများ ရှိနေသည်။
သို့သော် သူ အရင်က သုံးခဲ့သော ပစ္စည်းများနှင့် ဤအရာများမှာ ကွာခြားသည်။
ထိုပစ္စည်းများမှာ ဝိညာဉ်စွမ်းအင်များ ထွက်ပေါ်နေသည်။ ၎င်းတို့မှာ သာမန်ပစ္စည်းများ မဟုတ်ကြပေ။
"ညီလေး အဆောင်လုပ်ရတာ ဝါသနာပါလို့လား ဒါဆိုရင်တော့ နေရာမှန်ကို ရောက်လာတာပဲ ဒီစုတ်တံတွေကို ကြည့်စမ်းပါ ဒါတွေအားလုံးကို မိစ္ဆာသားရဲတွေရဲ့ အကောင်းဆုံး အမွေးအမှင်တွေနဲ့ လုပ်ထားတာ"
"ကဲ... ဒီပြဒါးကို ကြည့်ဦး ဝိညာဉ်ကျောက်တွင်း တစ်ခုထဲက တူးဖော်ရရှိတာ၊ မြေအောက်မှာ နှစ်ပေါင်းဘယ်လောက် ကြာအောင် ရှိနေခဲ့လဲ မသိဘူး၊ ကြွယ်ဝတဲ့ ဝိညာဉ်စွမ်းအင်တွေကို စုပ်ယူထားတာဗျ"
"ပြီးတော့ ဒီစက္ကူတွေက နှစ်တစ်ထောင်သက်တမ်းရှိတဲ့ ရှေးဟောင်းသစ်ပင်ကနေ လုပ်ထားတာ ဒါတွေနဲ့ အဆောင်ဆွဲရင် အကောင်းဆုံး အရည်အသွေးကို ရလိမ့်မယ်"
ဆိုင်ရှင်က ဖန်ချန်ကို အားတက်သရော ရှင်းပြနေသည်။
"ဒါတွေက ဘယ်လောက်လဲ"
ဖန်ချန်က ခပ်ဖွဖွ ပြုံးလျက် မေးလိုက်သည်။
ဆိုင်ရှင်က ဖန်ချန်၏ ပုံစံနှင့် အရှိန်အဝါကို အကဲခတ်ပြီး
"စိတ်မပူပါနဲ့ ဈေးပေါပါတယ် ပြဒါး တစ်ကျပ်သားကို ဝိညာဉ်ကျောက်တုံး တစ်တုံးယ စက္ကူ အချပ်တစ်ရာကို ဝိညာဉ်ကျောက်တုံး တစ်တုံးပဲ"
"ဒီစုတ်တံတွေကတော့ ဘယ်တစ်ခုကို ကြိုက်လဲပေါ် မူတည်တာပေါ့ အရည်အသွေး မတူတော့ ဈေးနှုန်းလည်း ကွဲတာပေါ့ဗျာ"
ဖန်ချန်က ခေတ္တကြည့်ရှုပြီးနောက် ဝိညာဉ်စွမ်းအင် အရှိန်အဝါ အကောင်းဆုံး ထွက်ပေါ်နေသည့် စုတ်တံတစ်ချောင်းကို ရွေးလိုက်သည်။
"ဒါကရော ဘယ်လောက်လဲ"
"ညီလေးက မျက်စိစူးရှတာပဲ ဒီစုတ်တံက ထူးခြားတယ်"
ဆိုင်ရှင်က စကားဖန်တီးပြီး ကြော်ငြာတော့မည့်အဆဲမှာပင် ဖန်ချန်က စကားဖြတ်လိုက်သည်။
"ဈေးနှုန်းပဲ ပြောပါ"
ဆိုင်ရှင်က မျက်လုံး ကစားလိုက်ပြီးနောက် အော်လိုက်သည်။
"ဝိညာဉ်ကျောက်တုံး ဆယ်တုံး"
"ဈေးကြီးလွန်းတယ်"
ဖန်ချန်က စုတ်တံကို ပြန်ချထားပြီး ထိုလူကို နောက်တစ်ချက်ပင် လှည့်မကြည့်တော့ဘဲ ထွက်လာခဲ့သည်။
ဝိညာဉ်ကျောက်တုံး ဆယ်တုံး ဒီဆိုင်ရှင်က လူတွေကို ဓားပြတိုက်နေတာနဲ့ အတူတူပဲ။
အဲဒီဈေးနဲ့ဆိုရင် ဝိညာဉ်တံဆိပ်ပါတဲ့ ရတနာတစ်ခုတောင် ဝယ်လို့ရသည်။
စုတ်တံက ဘယ်လောက်ပဲ ဝိညာဉ်စွမ်းအင် ကောင်းနေပါစေ တကယ့် ရတနာပစ္စည်းတစ်ခုနဲ့တော့ ဘယ်ယှဉ်နိုင်ပါ့မလဲ။
အပိုင်း (၄၀) - ဓားပြတိုက်ခြင်း
ဖန်ချန် က သူ့အကွက်ထဲ မဝင်မှန်းသိတော့ ဆိုင်ရှင်က သူ့နောက်ကို အပြေးလိုက်လာပြီး
"ဟေ့ ညီလေး... နေဦး နေဦး တို့တွေ ဈေးညှိလို့ရပါတယ်ဗျ"
ဟု အော်ဟစ်တားဆီးတော့သည်။
ဖန်ချန်က သူ့ကို လျစ်လျူရှုလိုက်သည်။
သူသည် ထိုကဲ့သို့ မရိုးသားသော ကုန်သည်များကို သဘောမကျပေ။
ထိုသူရောင်းသော ဟင်္သပြဒါး၊ စက္ကူနှင့် စုတ်တံများသည် နဂါးကျောရိုးတောင်ကြား လမ်းမ တစ်ခုလုံးမှာ ပေါပေါများများ ရှိသည်။
တစ်ဖက်လူက သူ၏ ပစ္စည်းများကို အပိုတွေပြောပြီး ဈေးတင်ရောင်းရန် ကြိုးစားနေခြင်းသာ ဖြစ်သည်။
ဖန်ချန်သည် အဘွားအိုရှိရာ အနီးသို့ ရောက်လာသည်။
သူသည် ခွန်အားတိုးအဆောင် ဆယ်ခု၊ အမြန်နှုန်းအဆောင် ဆယ်ခုနှင့် စိန်ကိုယ်ထည် အဆောင် ဆယ်ခုကို ထုတ်ကာ စတင်ရောင်းချတော့သည်။
အဘွားအို၏ အရောင်းအဝယ်မှာ အတော်လေး အေးစက်နေသည်။
ဖန်ချန်၏ ရှေ့မှ အဆောင်အပုံလိုက်ကို မြင်သောအခါ သူမ၏ မျက်လုံးထဲတွင် အံ့ဩရိပ်များ ဖြတ်ပြေးသွားပြီး
"လူငယ်လေး ဒီအဆောင်တွေ အကုန်လုံးရဖို့ မင်း ဘယ်လောက်တောင် အချိန်ပေးလိုက်ရလဲ"
ဟု မမေးဘဲ မနေနိုင်တော့ပေ။
"တစ်နှစ်တိတိ အချိန်ပေးခဲ့ရပါတယ်"
ဟု ဖန်ချန်က ပြုံးလျက် ဖြေလိုက်သည်။
"တစ်နှစ်တောင်လား ဒါက အချိန်ဖြုန်းတာပဲ အဲဒီအချိန်ကို ကျင့်ကြံတဲ့နေရာမှာ သုံးသင့်တာ"
အဘွားအိုက ခပ်ဖွဖွ ခေါင်းခါသော်လည်း သူမ၏ အကြည့်များမှာ ထိုအဆောင်များပေါ်၌သာ ဝဲလည်နေပြီး ရံဖန်ရံခါ လောဘအရိပ်အယောင်များ ပေါ်လာတတ်သည်။
ထိုအဆောင်များ၏ တန်ဖိုးမှာ မနည်းလှပေ။
အကယ်၍ အားလုံးကို ရောင်းထွက်ခဲ့လျှင် ဝိညာဉ်တံဆိပ် သုံးခုပါသော ရတနာတစ်ခုကိုပင် သူ ဝယ်ယူနိုင်လိမ့်မည်။
မကြာမီ ဝယ်သူအချို့ ရောက်လာပြီး ဈေးနှုန်းစုံစမ်းကြသည်။
ဖန်ချန်က စာစောင်တစ်ခုလျှင် အဆင့်နိမ့်ဝိညာဉ်ကျောက်တုံး နှစ်တုံးဟု သတ်မှတ်ဈေးဖြင့် ရောင်းချသည်။
အမြန်နှုန်းအဆောင်နှင့် စိန်ကိုယ်ထည်အဆောင်များ ဖော်စပ်ရသည်မှာ ခက်ခဲသော်လည်း သူ၏ အဆောင်များသည် အရည်အသွေး အလွန်မြင့်မားခြင်း မရှိသေးကြောင်း ဖန်ချန် သိသည်။
ထို့ကြောင့် ဝိညာဉ်ကျောက်တုံး နှစ်တုံးမှာ သင့်တော်သော ဈေးနှုန်းပင်။
အချို့က ဈေးကြီးသည်ဟု ဆိုကာ ထွက်သွားကြသော်လည်း အချို့ကမူ တစ်ခါတည်း အများအပြား ဝယ်ယူသွားကြသည်။
နာရီအနည်းငယ်အတွင်းမှာပင် ဖန်ချန်၏ အဆောင်များ အကုန်ရောင်းထွက်သွားသည်။
ကျင့်ကြံသူများအတွက် အဆောင်များသည် တကယ်ပင် အဖိုးတန်လှသည်။
'ဒါတွေသာ ခရမ်းရောင်လျှပ်စီး အဆောင်တွေဆိုရင် ဈေးက အဆပေါင်းများစွာ ပိုရမှာပဲ'
ဟု ဖန်ချန် ကိုယ်တိုင် တွေးမိသည်။
သို့သော် ခရမ်းရောင်လျှပ်စီး အဆောင်များသည် ရှားပါးပြီး အဖိုးတန်လွန်းလှသဖြင့် မည်သူမှပင် ထုတ်မရောင်းကြပေ။
အကယ်၍ သူသာ ထိုအရာများကို ထုတ်ရောင်းခဲ့လျှင် မလိုလားအပ်သော အန္တရာယ်များကို ဖိတ်ခေါ်သလို ဖြစ်ပေလိမ့်မည်။
အဘွားအို၏ အရောင်းအဝယ်မှာမူ အလွန်ပင် ညံ့ဖျင်းနေသည်။
နာရီအတော်ကြာအောင် ရောင်းသော်လည်း ဝိညာဉ်ကျောက်တုံး သုံးတုံးသာ ရသေးသည်။
အစောပိုင်းက သူမသည် ဆေးလုံးများ ဝယ်ယူရန် ဝိညာဉ်ကျောက်တုံး အမြောက်အမြား သုံးစွဲထားရသဖြင့် ဖန်ချန် ပိုက်ဆံအိတ်ဖောင်းသွားသည်ကို မြင်သောအခါ သူမ၏ မျက်လုံးထဲမှ လောဘရိပ်များမှာ ပို၍ ထင်ရှားလာတော့သည်။
"ကဲ... ပြီးပြီ။"
ဖန်ချန်က ခပ်ဖွဖွပြုံးကာ အဘွားအိုကို တစ်ချက်ကြည့်ပြီး ထွက်ခွာရန် ပြင်လိုက်သည်။
အဘွားအို၏ မျက်လုံးများမှာ အရောင်တောက်လာသည်။ သူမ၏ နည်းပါးလှသော ဝင်ငွေနှင့် ဟောင်းလောင်းဖြစ်နေသော ပိုက်ဆံအိတ်ကို ကြည့်ရင်း ဖန်ချန်ကို အေးစက်သော အကြည့်များဖြင့် ကြည့်လိုက်သည်။
ဖန်ချန်သည် ချက်ချင်း ထွက်မသွားဘဲ နဂါးကျောရိုးတောင်ကြား လမ်းမထဲတွင် ဆက်လက် လှည့်ပတ်နေသည်။
သူသည် စုတ်တံတစ်ချောင်း၊ ဟင်္သပြဒါးနှင့် စက္ကူအချို့ကို ဝိညာဉ်ကျောက်တုံး ငါးတုံး အကုန်အကျခံကာ ဝယ်ယူခဲ့သည်။
သူ့တွက်ချက်မှုအရ သူ၏ လက်ထဲတွင် ဝိညာဉ်ကျောက်တုံး ၆၈ တုံး ကျန်ရှိနေသေးသည်။
ထိုနေရာရှိ ကျင့်ကြံသူများအကြားတွင် သူ၏ ချမ်းသာကြွယ်ဝမှုမှာ ပျမ်းမျှအဆင့်ထက် များစွာ သာလွန်နေသည်။
"အရိုးသန်ဆေးလုံး ဝိညာဉ်ကျောက်တုံး တစ်တုံးကို ဆေးလုံး ဆယ်လုံးပဲ ဈေးပေါလို့ အထင်မသေးနဲ့အရိုးတွေကို သန်မာစေရုံတင်မကဘူး ဒါက တကယ့်ကို ရှားပါးတဲ့ ရတနာပဲ အခွင့်အရေးကို လက်လွတ်မခံကြနဲ့"
ဆိုင်ရှင်တစ်ဦးက အော်ဟစ်နေသည်။
ဖြတ်သွားဖြတ်လာ ကျင့်ကြံသူများက ရပ်ကြည့်ကြသော်လည်း ဆေးလုံးကို စစ်ဆေးပြီးနောက် လှောင်ပြောင်ကြတော့သည်။
"ဒါက ရှားတာတော့ မှန်ပါတယ် ဒါပေမဲ့ အရိုးသန်မာတာကလွဲလို့ ဘာမှ အသုံးမကျဘူး ဘယ်ဆေးဆရာကများ ဒီအရိုးသန်ဆေးလုံးတွေကို အချိန်ကုန်ခံ ဖော်စပ်နေလဲ မသိဘူး သိုင်းသမားတွေအတွက်တော့ ကောင်းမှာပေါ့ တို့လို ကျင့်ကြံသူတွေအတွက်တော့ အလကားပဲ"
ကျင့်ကြံသူများသည် အနီးကပ် တိုက်ခိုက်လေ့ မရှိကြသလို တိုက်ခိုက်ခဲ့လျှင်ပင် ဝိညာဉ်စွမ်းအင်များက သူတို့၏ အရိုးများကို သဘာဝအတိုင်း သန်မာစေပြီးသား ဖြစ်သည်။
ထို့ကြောင့် ထိုဆေးလုံးများမှာ သူတို့အတွက် ပိုလျှံနေခြင်းပင်။
မိမိတို့အတွက် အသုံးမဝင်သော ပစ္စည်းများအတွက် ဝိညာဉ်ကျောက်တုံးများကို မည်သူမှ အလကား မဖြုန်းတီးလိုကြပေ။
"အစ်ကိုကြီး ဒီအရိုးသန်ဆေးလုံးတွေ ဘယ်လောက်ရှိလဲ"
ဖန်ချန်က အမှတ်မထင် မေးလိုက်သည်။
"အများကြီး မရှိပါဘူး မင်း ဝယ်မလို့လား"
ဆိုင်ရှင်က ပြောသည်။ ဖန်ချန်တွင် နောက်လိုက်နောက်ပါ တစ်ယောက်မှ ပါမလာသည်ကို မြင်သောအခါ သူက မျက်မှောင်ကြုတ်လိုက်သည်။
ဖန်ချန်သည် သူ့ကို လာပြီး လှောင်ပြောင်နေသည်ဟု သူ ထင်သွားခြင်း ဖြစ်သည်။
ဖန်ချန်က ပြုံးလျက်
"ကျွန်တော် ဝယ်ပါ့မယ် ကျွန်တော့်ရဲ့ ဂူဗိမာန်မှာ နောက်လိုက်တွေ ရှိတယ်လေ သူတို့ကို ဆုလာဘ်အဖြစ် ပေးမလို့ပါ"
ဟု ဆိုသည်။
"ဂူဗိမာန် "
ဘေးနားရှိ လူများ၏ မျက်နှာမှာ အနည်းငယ် ပြောင်းလဲသွားသည်။ ဂူဗိမာန်တစ်ခုကို ပိုင်ဆိုင်သော ကျင့်ကြံသူသည် သေချာပေါက် နောက်ခံအင်အား ကြီးမားသူ ဖြစ်ရမည်။
အဝေးမှ စောင့်ကြည့်နေသော အဘွားအိုသည်လည်း ထိုစကားကို ကြားသောအခါ အနည်းငယ် တုံ့ဆိုင်းသွားသည်။
"ရတာပေါ့ ကျွန်တော် ဒါတွေကို ဈေးကြီးပေး ဝယ်ထားတာ ဒီမှာ ဆေးလုံး အလုံး ၁၀၀ ရှိတယ် အားလုံး ယူမလား ၁၀ လုံးကို ဝိညာဉ်ကျောက်တုံး တစ်တုံးပဲ"
ဖန်ချန်က တကယ်ဝယ်မည်ကို သိသောအခါ ဆိုင်ရှင်၏ မျက်လုံးများ ဝင်းလက်သွားသည်။
တကယ်တော့ သူသည် ဝိညာဉ်ကျောက်တုံး တစ်တုံးကို ဆေးလုံး အလုံး ၂၀ နှုန်းဖြင့် ဝယ်ခဲ့ခြင်း ဖြစ်သည်။
အကုန်ရောင်းထွက်လျှင် ဝိညာဉ်ကျောက်တုံး ငါးတုံး မြတ်မည် မဟုတ်ပါလား
ဖန်ချန်က မျက်မှောင်ကြုတ်လိုက်သည်။
"အဲဒီလောက် အများကြီး မလိုဘူး"
"ရပါတယ်ဗျာ ကျွန်တော် လျှော့ဈေး ပေးပါ့မယ်အားလုံးကို ဝိညာဉ်ကျောက်တုံး ကိုးတုံးနဲ့ ယူမလားအလုံး ၁၀၀ ဆိုရင် မူလက ၁၀ တုံး ကျသင့်မှာလေ ဘယ်လိုလဲ"
ဆိုင်ရှင်က အလောတကြီး ပြောသည်။ သူသည် အရောင်းအဝယ်ဖြစ်ရန် တကယ့်ကို မျှော်လင့်နေပုံရသည်။
"ဝိညာဉ်ကျောက်တုံး ရှစ်တုံးနဲ့ဆိုရင် အကုန်ယူမယ် မဟုတ်ရင်တော့ ဆယ်လုံးပဲ ဝယ်တော့မယ်"
ဟု ဖန်ချန်က ဆိုသည်။
"သူ ရူးနေတာလား ဘာလို့ အရိုးသန်ဆေးလုံးတွေ အများကြီး ဝယ်နေတာလဲ နောက်လိုက်တွေကို ဆုပေးဖို့ သက်သက်လား ဒီဝိညာဉ်ကျောက်တုံးတွေကို ကိုယ့်ဘာကိုယ် ကျင့်ကြံဖို့ သိမ်းထားတာက ပိုမကောင်းဘူးလား"
"ဒီထက် ပိုသိမ်းထားရင် ဝိညာဉ်တံဆိပ်တစ်ခုပါတဲ့ ရတနာတောင် ဝယ်လို့ရနေပြီကို"
လူအများက တီးတိုး ဝေဖန်နေကြသည်။ ဆိုင်ရှင်သည် အရှုံးခံလိုက်ရသလို မျက်နှာမျိုးဖြင့်
"ကောင်းပြီ ကျွန်တော် အရှုံးခံပြီး မိတ်ဆွေသစ် ဖွဲ့လိုက်ပါ့မယ် ဒီဆေးလုံးတွေ အကုန်ယူသွားတော့"
ဟု ဆိုကာ သဘောတူလိုက်သည်။
ထိုသို့ဖြင့် အရောင်းအဝယ်မှာ ပြေပြေလည်လည် ပြီးဆုံးသွားသည်။
ဖန်ချန်သည် ဝိညာဉ်ကျောက်တုံး ရှစ်တုံး အကုန်အကျခံကာ အရိုးသန်ဆေးလုံး အလုံး ၁၀၀ ကို ရရှိခဲ့သည်။ သူသည် ဘာမှထပ်မပြောဘဲ ထွက်ခွာလာခဲ့သည်။
ထိုဆေးလုံးများသည် ကျင့်ကြံသူများအတွက် အသုံးမဝင်သော်လည်း သိုင်းသမားများအတွက်မူ အလွန်ပင် ရှားပါးပြီး အဖိုးတန်သော ရတနာများ ဖြစ်သည်။
မြင်းရထားဆီသို့ ပြန်ရောက်သောအခါ သူက အမိန့်ပေးလိုက်သည်။
"သွားကြစို့ လာခဲ့တဲ့ လမ်းအတိုင်းပဲ ပြန်မယ်"
ထျဲမက ခေါင်းညိတ်ကာ ရထားကို မောင်းထွက်ခဲ့သည်။
နဂါးကျောရိုးတောင်ကြား လမ်းမမှ ထွက်လာသောအခါ ဖန်ချန်၏ နောက်သို့ လိုက်လာသူမှာ အဘွားအို တစ်ယောက်တည်း မဟုတ်ပေ။
အခြားသော ကျင့်ကြံသူ သုံးဦးကလည်း တိတ်တဆိတ် နောက်မှ ထက်ကြပ်မကွာ လိုက်ပါလာကြသည်။
ကောင်းကင်ယံမှနေ၍ ဖန်ချန်၏ ဝိညာဉ်သည် အောက်မှ လူပုံရိပ်များကို စိုက်ကြည့်နေသည်။
ချီသန့်စင်ခြင်း စတုတ္ထအဆင့်ရှိသော အဘွားအိုအပြင်၊ နောက်ထပ် သုံးယောက်ထဲမှ တစ်ဦးမှာ တတိယအဆင့်ဖြစ်ပြီး ကျန်နှစ်ဦးမှာ ဒုတိယအဆင့်တွင် ရှိကြသည်။ ထိုသုံးဦးမှာ အဖွဲ့တစ်ခုတည်းမှ ဖြစ်ပုံရသည်။
သူတို့အားလုံး၏ ရည်ရွယ်ချက်မှာ အတူတူပင် ဖြစ်ကြောင်း ရှင်းလင်းနေသည်။
သူတို့သည် တစ်ဦးနှင့်တစ်ဦး သတိထားမိကြပုံရသော်လည်း ချက်ချင်း လက်မလှုပ်ကြသေးပေ။
နဂါးကျောရိုးတောင်မှ မိုင် ၃၀၀ ခန့် ဝေးသော နေရာသို့ ရောက်သောအခါမှ အဘွားအိုနှင့် ထိုသုံးယောက်အဖွဲ့သည် ရထား၏ ရှေ့မှ ပိတ်ဆို့ကာ တားဆီးလိုက်ကြတော့သည်။
"ခင်ဗျားတို့က ဘယ်သူတွေလဲ ကျွန်တော့်သခင်လေးရဲ့ လမ်းကို ဘာလို့ ပိတ်ထားတာလဲ"
မျက်နှာဖုံး တပ်ထားသော ထျဲမက တည်ငြိမ်စွာ မေးလိုက်သည်။ သံသယ မဝင်စေရန်အတွက် ဖန်ချန်က သူ့ကို
"သခင်လေး"
ဟု ခေါ်ရန် ကြိုတင်မှာကြားထားခြင်း ဖြစ်သည်။
"လူငယ်လေး ငါက လောဘကြီးချင်လို့ မဟုတ်ပါဘူး ငါ့ကို ဝိညာဉ်ကျောက်တုံး ၄၀ ပဲ ပေးလိုက်ပါ၊ ဒါဆိုရင် ငါ ထွက်သွားမယ်"
အဘွားအိုက မရေမရာ ပြုံးလျက် ပြောသည်။
"ဟဲဟဲ ခင်ဗျားကိုး။"
ဖန်ချန်က လိုက်ကာကို လှန်ကာ အံ့ဩဟန် ပြလိုက်သည်။
"ဟေ့ အဘွားကြီး... ခင်ဗျားက ကျွန်တော့်ဆီကနေ ဝိညာဉ်ကျောက်တုံး ၄၀ လာချေးတာလား"
အဘွားအိုက ရယ်မောလိုက်သည်။
"ချေးတာ မဟုတ်ဘူး ငါက တောင်းတာ"
သူမ၏ နောက်ကွယ်မှ မျက်နှာဖုံးစွပ် ကျင့်ကြံသူ သုံးဦးကလည်း ဝင်ပြောသည်။
"ငါတို့ကလည်း ဝိညာဉ်ကျောက်တုံး ၂၀ ယူမယ် အဲဒီထက် နည်းနည်း နည်းလည်း ကိစ္စမရှိပါဘူး"
ဖန်ချန်က ပြန်လည် ရယ်မောလိုက်သည်။
"ဒါဆိုရင် ခင်ဗျားတို့က ကျွန်တော့်ကို ဓားပြလာတိုက်တာပေါ့"