အခန်း (၄၉-၅၀)
Vol. 5 Ch. 49-50
အခန်း ၄၉- တစ်ယောက်ယောက်က မင်းလမ်းကို ပိတ်ရင်... သတ်ပစ်လိုက်
ဖန်ချန်နှင့် သူ၏လူများ စခန်းအတွင်းသို့ ဝင်လာသောအခါ စူးစမ်းလိုသော အကြည့်များစွာက သူတို့ကို ဝိုင်းဝန်းကြည့်ရှုကြသည်။
ထိုအကြည့်များတွင် အံ့ဩမှု၊ ထိတ်လန့်မှု၊ စူးစမ်းလိုမှုနှင့် သတိထားမှုများ ရောပြွမ်းနေသည်။
နျူကျူး က ရှေ့မှ ဦးဆောင်ကာ လူတိုင်းကို ခန်းမဆောင်ကြီးသို့ ခေါ်ဆောင်လာသည်။
သူသည် သူ၏ လက်အောက်ငယ်သားများကို မဟာတောက်ပရေးဗျူရိုမှ စုံထောက် ယွမ်ကျန်း ဟု အမည်ရသူကို ပြီးခဲ့သည့် ရက်ပိုင်းအတွင်းက ဖမ်းဆီးခဲ့ခြင်း ရှိမရှိ အမှုတွဲဖိုင်များကို စစ်ဆေးရန် ချက်ချင်း အမိန့်ပေးလိုက်သည်။
"အရာရှိယွမ် ဒီမှာရှိမရှိဆိုတာ ခဏနေရင် သိရပါလိမ့်မယ်"
ဟု နျူကျူးက ဖန်ချန်ရှေ့တွင် ရိုသေစွာ ပြောလိုက်သည်။
"ကျေးဇူးတင်ပါတယ် တပ်မှူးနျူ"
ဟု ဖန်ချန်က ခပ်ဖျော့ဖျော့ ပြုံးလျက် ပြန်ဖြေသည်။
သူတို့နောက်တွင် ယွမ်ယုသည် စက္ကန့်နှင့်အမျှ ပို၍ စိုးရိမ်လာသည်။ သူမသည် ယွမ်ကျွမ်း ဒီမှာ မရှိမှာကို ကြောက်နေမိသည်။
အကယ်၍ ဖန်ချန်နှင့် စုံထောက်ချုပ် ကျောက်စီရှင်း နှစ်ယောက်စလုံးမှ ရှာမတွေ့ပါက သူ၏ ကံကြမ္မာမှာ တကယ်ပင် မသေချာတော့ပေ။
ခဏအကြာတွင် ဗိုလ်ကြီးတစ်ဦး အပြေးအလွှား ဝင်လာပြီး ရိုသေစွာ အရိုအသေ ပေးလိုက်သည်။
"တပ်မှူးနျူ... အမှုတွဲဖိုင်တွေကို စစ်ဆေးပြီးပါပြီ။ ယွမ်ကျန်းကို ဖမ်းဆီးထားတဲ့ မှတ်တမ်း လုံးဝမရှိပါဘူး။"
"ဒါ ဘယ်လိုဖြစ်နိုင်မှာလဲ..."
ယွမ်ယု၏ မျက်နှာမှာ ဖြူလျော်သွားသည်။
"ဒါက..."
နျူကျူးက ဖန်ချန်ကို ခါးသီးသောအပြုံးဖြင့် ကြည့်လိုက်သည်။
"းစစ်သူကြီးဖန်... နားလည်မှုလွဲတာ တစ်ခုခု ရှိနေမလားသူ တကယ် ဒီမှာ မရှိတာလည်း ဖြစ်နိုင်ပါတယ်..."
"မင်းတို့ စခန်းထဲမှာ တည်ဆောက်ထားတဲ့ ကိုယ်ပိုင်အကျဉ်းထောင်ဆီ ငါတို့ကို ခေါ်သွားပေးပါ"
ဟု ဖန်ချန်က ပြောလိုက်သည်။
နျူကျူး တွေဝေသွားသည်။ ဖန်ချန်သည် ရဲရင့်သောဓား သက်တော်စောင့်တပ်ဖွဲ့ဝင် မဟုတ်သည့်အပြင် စည်းမျဉ်းများအရ သူသည် ကိုယ်ပိုင်အကျဉ်းထောင်ထဲသို့ ဝင်ရောက်ခွင့် အာဏာမရှိပေ။ ခဏမျှ စဉ်းစားပြီးနောက် နျူကျူးက နှုတ်ခမ်းကို ကိုက်ကာ ပြောလိုက်သည်
"စစ်သူကြီးဖန်... စစ်သူကြီးနဲ့ တပ်မူးချုပ်ကျောက်စီရှင်း နှစ်ယောက်ပဲ အထဲဝင်ခွင့် ရပါလိမ့်မယ်။ စည်းမျဉ်းစည်းကမ်းတွေကို လိုက်နာရတာမို့ နားလည်ပေးဖို့ မျှော်လင့်ပါတယ်။"
"နားလည်ပါတယ်"
ဖန်ချန်က ပြုံးလျက် ခေါင်းငြိမ့်ပြသည်။
ထို့နောက် နျူကျူးက အကျဉ်းထောင်ရှိရာသို့ ဦးဆောင်ခေါ်သွားသည်။ သူတို့ အကျဉ်းထောင်ဂိတ်ဝသို့ ချဉ်းကပ်လာစဉ်မှာပင် အနီးအနားမှ အေးစက်သော အော်ဟစ်သံတစ်ခု ထွက်ပေါ်လာသည်။
"တပ်မှူးနျူ... မင်း ဘာလုပ်နေတာလဲ"
လူငယ်တစ်ဦးသည် ဗိုလ်ကြီးများနှင့် တပ်မှူးများစွာ ခြံရံလျက် လျှောက်လာသည်။
ဗိုလ်ကြီးနှစ်ဦးက ဖန်ချန်ကို မြင်လိုက်ရသောအခါ သူတို့၏ မျက်နှာအမူအရာမှာ သိသိသာသာ ပြောင်းလဲသွားသည်။
နျူကျူးက နှစ်ဖက်စလုံးကို အလျင်အမြန် မိတ်ဆက်ပေးလိုက်သည်။
"ငြိမ်ဝပ်ပိပြားရေးမှူးချုပ် လျို... ကျွန်တော့်ကို မိတ်ဆက်ပေးခွင့်ပြုပါ။ ဒါက စစ်သူကြီးဖန်ပါ"
သူက ဖန်ချန်ဘက် လှည့်ကာ
"စစ်သူကြီးဖန်... ဒါကတော့ ငြိမ်ဝပ်ပိပြားရေးမှူးချုပ် လျို ပါ"
မှူးချုပ်လျိုက ဖန်ချန်ကို အေးစက်စွာ တစ်ချက် ကြည့်လိုက်သည်။
"စစ်သူကြီးဖန် စစ်သူကြီး ဒီနေ့ ငါတို့ဆီကို ကြွလာတာပဲ ဘာကိစ္စ ရှိလို့လဲ"
"ငါ လူတစ်ယောက် လာရှာတာ"
ဖန်ချန်က ပြန်ဖြေသည်။
"ငါတို့ စခန်းထဲမှာ လူလာရှာတယ် ဒါက သိပ်တော့ မသင့်တော်ဘူး မဟုတ်လား"
မှူးချုပ်လျိုက တည်ငြိမ်စွာ ပြောပြီးနောက် နျူကျူးဘက် လှည့်ကာ ဒေါသတကြီး နှာခေါင်းရှုံ့လိုက်သည်။
"ဂုဏ်သိက္ခာရှိတဲ့ ရဲရင့်သောဓား သက်တော်စောင့်တပ်မှူး တစ်ယောက်က ပြင်ပလူတွေကို ငါတို့ရဲ့ ကိုယ်ပိုင်အကျဉ်းထောင်ထဲ ခေါ်လာရဲတယ်ပေါ့... ဘယ်လောက်တောင် ရဲတင်းလိုက်သလဲ အကယ်၍ တပ်ဖွဲ့မှူးကြီး သိသွားရင် မင်း ရာထူးက ပြုတ်သွားလိမ့်မယ်"
နျူကျူး ခဏမျှ မှင်တက်သွားပြီးနောက် ဒေါသများက သူ၏ ရင်ထဲသို့ ချက်ချင်း စီးဝင်လာသည်။
"မှူးချုပ်လျို စစ်သူကြီးဖန်က လူလာရှာတာပါ၊ သူ့ရဲ့ တောင်းဆိုချက်ကို ကျွန်တော် မငြင်းရဲဘူး ဒါက ဘာများ အရေးကြီးလို့လဲ သူက ကိုယ်ပိုင်အကျဉ်းထောင်ကို စစ်ဆေးဖို့ အရည်အချင်း မရှိဘူးလို့ မင်း ပြောချင်တာလား"
"စည်းမျဉ်းဆိုတာ စည်းမျဉ်းပဲ သူ့ရဲ့ အဆင့်အတန်းနဲ့ ပတ်သက်ရင်တော့... ဟဲဟဲ ဒါကို ပြောရတာ စိတ်မကောင်းပေမဲ့ စစ်သူကြီးဖန်ကို နန်းတွင်းထဲ ထပ်ဝင်ခွင့် မပြုတော့သလို စစ်တပ်တွေကိုလည်း အမိန့်ပေးပိုင်ခွင့် မရှိတော့ဘူးလို့ ဧကရာဇ်မင်းမြတ် မိန့်ကြားထားတာကို ငါ မှတ်မိနေတယ် တစ်နည်းပြောရရင် သူက အခု သာမန်အရပ်သား တစ်ယောက်ထက် မပိုပါဘူး ဘယ်လို အဆင့်အတန်းအကြောင်း ငါတို့ကို လာပြောနေတာလဲ"
မှူးချုပ်လျိုက ခပ်အေးအေး ပြောလိုက်သည်။
ရှိနေသူအားလုံး၏ မျက်နှာအမူအရာများမှာ အမျိုးမျိုး ဖြစ်သွားကြသည်။ သူပြောသည့် စကားများမှာ အမှန်တရား အချို့ ရှိနေသော်လည်း ဖန်ချန် ပြီးခဲ့သည့် နှစ်များအတွင်း တည်ဆောက်ခဲ့သော ဂုဏ်သတင်းနှင့် အောင်မြင်မှုများကို ဖျက်ပစ်ရန် မလွယ်ကူပေ။
သူ၏ ကျင့်ကြံခြင်း ပြန်လည် ရရှိလာခြင်းနှင့် ချင်းစုန်းအဆင့်မြင့်သင်တန်းကျောင်းတွင် ဖြစ်ပျက်ခဲ့သည့် အဖြစ်အပျက်ကြောင့် သူသည် လူများစွာ၏ ရင်ထဲတွင် ကြောက်ရွံ့မှုကို ဖြစ်ပေါ်စေခဲ့သည်။
သူ၏ အဆင့်အတန်းကြောင့် ကြောက်ရွံ့ကြခြင်း မဟုတ်ဘဲ အခြားအရာတစ်ခုကြောင့် ဖြစ်သည်
ဖန်ချန်၏ မျက်နှာတွင် အပြုံးတစ်ခု ပေါ်လာပြီး သူက ပြောလိုက်သည်
"ငြိမ်ဝပ်ပိပြားရေးမှူးချုပ်လျို... မင်းက ငါ့ကို အထဲဝင်ခွင့် မပေးဘူးလို့ ပြောနေတာလား"
မှူးချုပ်လျိုက ခပ်ဖွဖွ ခေါင်းငြိမ့်ပြသည်။
"ငါ လုပ်သမျှ အရာအားလုံးဟာ ရဲရင့်သောဓား သက်တော်စောင့်တပ်ရဲ့ စည်းမျဉ်းတွေနဲ့ အညီပါပဲ မင်း နားလည်ပေးလိမ့်မယ်လို့ မျှော်လင့်ပါတယ်"
"ဒါဆို ငါ အထဲမဝင်တော့ဘူး မင်း လုပ်ရမှာက ငါတို့လူကို အပြင်ထုတ်ပေးဖို့ပဲ"
ဟု ဖန်ချန်က ပြောလိုက်သည်။
"မင်း ဘယ်သူ့ကို ပြောနေတာလဲ"
မှူးချုပ်လျိုက ဝေခွဲမရသည့် ပုံစံဖြင့် ပြန်မေးသည်။
"မဟာတောက်ပရေးဗျူရိုက စုံထောက် ယွမ်ကျန်း အကြောင်းကို ပြောနေတာယ မင်း သူ့ကို ဖမ်းဆီးပြီး ဒီမှာ စစ်ဆေးမေးမြန်းနေတယ်လေ မင်းက မှတ်ဉာဏ် သိပ်မကောင်းပုံရတယ်..."
ဖန်ချန်က သူ၏ ဘေးရှိ ဗိုလ်ကြီးနှစ်ဦးကို လက်ညှိုးထိုးပြလိုက်သည်။
"မင်း မမှတ်မိရင်တောင် သူတို့ကတော့ မှတ်မိမှာပါ။ အဆုံးမှာတော့ သူတို့ကပဲ သူ့ကို နှိပ်စက်တဲ့ တာဝန်ကို ယူခဲ့တာ မဟုတ်လား"
ဖန်ချန်၏ စကားကြောင့် စုံထောက်ချုပ် ကျောက်စီရှင်းနှင့် အခြားသူများမှာ ဒေါသထွက်သွားကြသည်။ သူတို့သည် ထိုဗိုလ်ကြီးနှစ်ဦးကို ဒေါသတကြီး စိုက်ကြည့်လိုက်ကြသည်။
မဟာတောက်ပရေးဗျူရို၏ အဖွဲ့ဝင်များအနေဖြင့် ရဲရင့်သောဓား သက်တော်စောင့်တပ်၏ နှိပ်စက်နည်းများကို သူတို့ ကောင်းကောင်း သိထားကြသည်။
အကယ်၍ ယွမ်ကျန်းသာ တကယ်ပဲ သူတို့ဆီမှာ စစ်ဆေးခံနေရပါက သူ၏ အခြေအနေမှာ ကောင်းလိမ့်မည် မဟုတ်ပေ
ဗိုလ်ကြီးနှစ်ဦးမှာ ဆွံ့အသွားပြီး သူတို့၏ မျက်နှာများမှာ စက္ကူကဲ့သို့ ဖြူလျော်သွားသည်။
ဖန်ချန်က သူတို့ လုပ်ရပ်တွေကို ဘယ်လို သိနေရတာလဲဆိုတာ သူတို့ လုံးဝ နားမလည်နိုင် ဖြစ်နေကြသည်။ သူသည် ယွမ်ကျန်းကို နှိပ်စက်ရန် တာဝန်ယူခဲ့သူများမှာ သူတို့ဖြစ်ကြောင်းကိုတောင် သိနေသည်!
နျူကျူးသည် နောက်ဆုံးတွင် ဖန်ချန်သည် မဟာတောက်ပရေးဗျူရိုက လူများနှင့် တိုက်တိုက်ဆိုင်ဆိုင် ဆုံခဲ့ခြင်း မဟုတ်ဘဲ ယွမ်ကျန်းကို ရှာရန် ရည်ရွယ်ချက်ရှိရှိ လာခဲ့ခြင်းဖြစ်ကြောင်း နားလည်သွားသည်။ ဖန်ချန်သည် သူ၏ ကိစ္စများကို မည်သို့ ကိုင်တွယ်တတ်ကြောင်း သူ သိသည်။
အကယ်၍ ဖန်ချန်က သူ့လူ တစ်ယောက်ယောက် ဒီမှာ ရှိနေတယ်လို့ ပြောရင် အဲဒါက အမှန်ဖြစ်ဖို့ များသည်။
သူ့အတွက် တွေးမရသည့် မေးခွန်းတစ်ခုမှာ မှူးချုပ်လျိုက ဘာကြောင့် ယွမ်ကျန်းးကို ဖမ်းဆီးထားရသနည်း ဆိုသည်ပင်။
ယွမ်ကျန်းက မဟာတောက်ပရေးဗျူရိုက စုံထောက်တစ်ယောက်လေ ပြီးတော့ ဘာလို့ ဒါကို လျှို့ဝှက်ထားရတာလဲ သူတောင် မသိခဲ့ဘူး ဒီကိစ္စရဲ့ နောက်ကွယ်မှာ အမြင်ထက် ပိုတဲ့ တစ်ခုခု ရှိနေနိုင်မလား
"စစ်သူကြီးဖန် စကားကို လွယ်လွယ် မပြောပါနဲ့"
မှူးချုပ်လျိုက တည်ငြိမ်စွာ ပြောလိုက်သည်။
ဖန်ချန်က ရွှီဂီဘက် လှည့်လိုက်သည်။
"ရွှီဂီ သွားပြီး သူ့ကို ခေါ်လာခဲ့ အကယ်၍ တစ်ယောက်ယောက်က မင်းလမ်းကို ပိတ်ဆို့ဖို့ ကြိုးစားရင် သတ်ပစ်လိုက် ဧကရာဇ်မင်းမြတ်နဲ့ ဖြစ်လာမယ့် နောက်ဆက်တွဲ ပြဿနာတွေကို ငါကိုယ်တိုင် တာဝန်ယူ ဖြေရှင်းပေးမယ်"
"ဟုတ်ကဲ့"
ရွှီဂီက ခေါင်းငြိမ့်ကာ ကိုယ်ပိုင်အကျဉ်းထောင် ဂိတ်တံခါးဆီသို့ လျှောက်သွားသည်။ အနီးနားရှိ အစောင့် မည်သူမျှ ဝင်မတားဝံ့ကြပေ။
သူတို့ ရွှီဂီက ဘယ်သူလဲဆိုတာ သိကြသည်... သူက မြို့တော်ရဲ့ ချီပေါက်ကွဲခြင်းနယ်ပယ် ကိုယ်ခံပညာရှင် အစွမ်းထက်ဆုံး ဆယ်ယောက်ထဲက တစ်ယောက်ဖြစ်တဲ့ 'လေတိမ်တိုက် ဓားသမား' လေ
ရဲရင့်သောဓား သက်တော်စောင့်တပ်ထဲမှာ သူ့အဆင့်အတန်းမျိုးရှိတဲ့လူ ရှာဖို့ ခက်ခဲလိမ့်မည်။
ထို့အပြင် ထိုအဆင့်ရှိသူများသည် မှူးချုပ်လျိုထက် ရာထူး အများကြီး ပိုမြင့်ကြသည်။ ဤစခန်းထဲတွင် ထိုသို့သောလူ လုံးဝ မရှိပေ။
"သူ့ကို တားစမ်း"
မှူးချုပ်လျိုက ဒေါသတကြီး အော်ဟစ်လိုက်သည်။ သို့သော် သူ၏ လက်အောက်ငယ်သားများသည် တစ်ယောက်ကိုတစ်ယောက် ကြည့်လိုက်ကြပြီးနောက် ကြောက်လန့်တကြား ခေါင်းငုံ့သွားကြသည်။ သူတို့၏ မျက်နှာများ ဖြူလျော်နေသည်။
ဖန်ချန်လို လူမျိုးရှေ့မှာ သူတို့ မကစားဝံ့ကြပေ။
အကယ်၍ သူတို့ ရွှီဂီရဲ့ လက်ချက်နဲ့ အသတ်ခံရရင်တောင် သူတို့ သေဆုံးမှုက ဖန်ချန်ကို အနည်းငယ်မျှ ထိခိုက်စေမှာ မဟုတ်ပါ သူတို့က သေမင်းဆီကို ကိုယ်တိုင် သွားသလို ဖြစ်နေလိမ့်မည်
၎င်းကို မြင်သောအခါ မှူးချုပ်လျိုမှာ ဒေါသအလိပ်လိပ် တက်လာပြီး သွေးအန်မတတ် ခံစားလိုက်ရသည်။
သူတို့က စစ်တပ်တွေကို ဘာလို့ မွေးမြူထားရတာလဲ အရေးကြီးတဲ့ အခြေအနေမှာ အသုံးချဖို့ မဟုတ်ဘူးလား အခုတော့ အခြေအနေ တကယ် ဆိုးလာတဲ့အခါမှာ သူတို့က စကားတစ်လုံးတောင် မဟဝံ့တဲ့အထိ ကြောက်နေကြပြီ
ရွှီဂီ အထဲသို့ ဝင်သွားပြီးနောက် နှစ်ဖက်စလုံးမှာ တစ်ဦးကိုတစ်ဦး စိုက်ကြည့်ရင်း အနေခက်သော အခြေအနေတစ်ခု ဖြစ်ပေါ်လာသည်။
လက်ဖက်ရည်တစ်ခွက်စာ အချိန်ခန့်အကြာတွင် ရွှီဂီသည် သွေးချင်းချင်းနီကာ ထော့နဲ့ထော့နဲ့ ဖြစ်နေသော ယွမ်ကျန်းကို ခေါ်ဆောင်၍ ပြန်ထွက်လာသည်။
သူ့ကို မြင်လိုက်ရသောအခါ ယွမ်ယု၏ မျက်လုံးများတွင် မျက်ရည်များ ဝဲလာသည်။
သူသည် တကယ်ကို သနားစရာကောင်းသော အခြေအနေတွင် ရှိနေသည်။
သူ၏ မျက်နှာမှအပ ခန္ဓာကိုယ်၏ နေရာတိုင်းတွင် ဒဏ်ရာများ ပြည့်နှက်နေသည်။ သူ၏ လက်ချောင်းများမှာ သွေးများဖြင့် စိုရွှဲနေပြီး လက်သည်းများမှာလည်း အကုန် ဆွဲခွာခံထားရသည်။
"မင်းတို့ တကယ်ကို လွန်သွားပြီ"
မဟာတောက်ပရေးဗျူရိုမှ အခြားစုံထောက်များမှာ ဒေါသကြောင့် တုန်ယင်နေကြသည်။
ရဲရင့်သောဓား သက်တော်စောင့်တပ်ဖွဲ့ဝင် အချို့မှာလည်း ဝေခွဲမရ ဖြစ်နေပုံရသည်။
သူတို့သည် ထိုကိစ္စကို ဘာမှ မသိပုံရပေ။
မှူးချုပ်လျိုနှင့် သူ၏ ယုံကြည်ရဆုံးသော လက်အောက်ငယ်သားများသာ သိရှိကြခြင်း ဖြစ်သည်။
သို့သော် ယွမ်ကျန်းကို အပြင်ထုတ်လာပြီးသည့်တိုင် သူတို့သည် မည်သည့် အမူအရာမျှ မပြကြပေ။
ယွမ်ကျန်း ပေါ်လာသောအခါ နျူကျူးမှာ အနည်းငယ် အံ့အားသင့်သွားပြီး သူ၏ မျက်နှာမှာ တဖြည်းဖြည်း မှောင်မှောင်မည်းမည်း ဖြစ်သွားသည်။
တစ်ချိန်လုံး တိတ်ဆိတ်နေသော စုံထောက်ချုပ် ကျောက်စီရှင်းက ဖြည်းဖြည်းချင်း ပြောလိုက်သည်။
"ငြိမ်ဝပ်ပိပြားရေးမှူးချုပ်လျို... ကျွန်တော် ရှင်းပြချက်တစ်ခု တောင်းဆိုတယ်"
"ရှင်းပြချက် ငါတို့က ဘာလို့ မင်းကို ရှင်းပြချက် ပေးရမှာလဲ ဒီလူကို ငါတို့က ရာဇဝတ်ကောင်အဖြစ် သတ်မှတ်ထားတာ အကယ်၍ မင်းတို့ သူ့ကို ခွင့်ပြုချက်မရှိဘဲ ခေါ်သွားမယ်ဆိုရင် ဒါကို ထောင်ဖောက်မှုလို့ ငါတို့ သတ်မှတ်ပြီး မင်းတို့အားလုံးကို ကွပ်မျက်ပစ်မယ်"
ဟု မှူးချုပ်လျိုက ဖြည်းဖြည်းချင်း ပြောလိုက်သည်။ သူသည် ဖန်ချန်ကို စိုက်ကြည့်ရင်း သူ၏ အကြည့်များမှာ မှောင်မိုက်သွားသည်။
"စစ်သူကြီးဖန်... စစ်သူကြီး စည်းမျဉ်းတွေကို သိလိမ့်မယ်လို့ ကျွန်တော် ယုံကြည်ပါတယ် အခုတော့ အဲဒီစည်းမျဉ်းတွေကို မချိုးဖောက်ဖို့ ကျွန်တော် မျှော်လင့်ပါတယ်"
အခန်း ၅၀- မျက်နှာပျက်ရသူ
တပ်မှုးချုပ် ကျောက်စီရှင်း၏ မျက်နှာအမူအရာ ပြောင်းလဲသွားသည်။
အခြားတစ်ဖက်က ဥပဒေအကြောင်း စတင်ပြောဆိုလာသည်နှင့်အမျှ ကိစ္စရပ်များမှာ ရှုပ်ထွေးသွားတော့သည်။
ငြိမ်ဝပ်ပိပြားရေးမှူးချုပ်သည် သူရာဇဝတ်ကောင်ဟု ယူဆသူ မည်သူ့ကိုမဆို ဖမ်းဆီးပိုင်ခွင့် အမှန်တကယ် ရှိသည်။
သက်သေအထောက်အထား တစ်စုံတစ်ရာ မပြနိုင်လျှင်ပင် သူတို့၏ လုပ်ရပ်မှာ တရားဝင်သည်ဟု သတ်မှတ်၍ ရနေသည်။ အဆုံးမှာတော့ ရဲရင့်သောဓား သက်တော်စောင့်တပ်ဖွဲ့သည် ဝန်ကြီးဌာန ခြောက်ခု၏ ပြင်ပတွင် သီးခြားလည်ပတ်နေပြီး ဧကရာဇ်မင်းမြတ်၏ တိုက်ရိုက်စီရင်ပိုင်ခွင့်အောက်တွင် ရှိနေသောကြောင့် ဖြစ်သည်။
လူတိုင်း တိတ်ဆိတ်သွားသောအခါ မှူးချုပ်လျိုက ခပ်ဖျော့ဖျော့ ပြုံးလိုက်သည်။
"စစ်သူကြီးဖန်. ဒီရာဇဝတ်ကောင်ကို ငါတို့ဆီမှာပဲ ထားခဲ့လိုက်တာ ပိုမကောင်းဘူးလား မင်းအနေနဲ့ ဂုဏ်သိက္ခာရှိရှိ ကိုယ့်ဘာသာကိုယ် ပြန်ထွက်သွားရင် ဘယ်သူ့ကိုမှ မျက်နှာပျက်စရာ မလိုတော့ဘူးပေါ့။"
"မင်းမှားနေပြီ တစ်ယောက်ယောက် မျက်နှာပျက်ရမယ်ဆိုရင် အဲဒါ မင်းပဲ ဖြစ်လိမ့်မယ်"
ဟု ဖန်ချန်က ခပ်တိုးတိုး ရယ်မောလိုက်သည်။
နောက်တစ်စက္ကန့်တွင် သူသည် မှူးချုပ်လျို၏ ရှေ့မှောက်သို့ ရုတ်တရက် ရောက်ရှိသွားသည်။
ပြင်းထန်သော ပါးရိုက်ချက်တစ်ခုမှာ မှူးချုပ်လျို၏ မျက်နှာပေါ်သို့ ကျရောက်သွားပြီး သူ့ကို ပေပေါင်းများစွာ လွင့်ထွက်သွားစေသည်။
ပတ်ဝန်းကျင်ရှိ သက်တော်စောင့်များမှာ အချိန်မီ တုံ့ပြန်ရန် ပျက်ကွက်ခဲ့ကြသည်။
ဘာဖြစ်သွားသလဲဆိုသည်ကို သူတို့ သတိထားမိချိန်တွင် နောက်ကျသွားပြီ ဖြစ်သည်။
မှူးချုပ်လျိုသည် ကြမ်းပြင်ပေါ်သို့ မှောက်လျက်သား ပြုတ်ကျသွားသည်။ သူ ချက်ချင်း ပြန်ထရန် ကြိုးစားလိုက်သောအခါ သူ၏ ပါးမှာ ထိတ်လန့်ဖွယ် ကောင်းလောက်အောင် ဖူးရောင်လာသည်ကို လူတိုင်း မြင်လိုက်ရသည်။
"သူ အရမ်းမြန်တယ်"
ပတ်ဝန်းကျင်တွင် ရှိနေသူများမှာ အံ့ဩသွားကြပြီး သူတို့၏ ရင်ထဲတွင် ရှိနေသော နောက်ဆုံး သံသယမှာလည်း ပျောက်ကွယ်သွားခဲ့သည်။ ဖန်ချန်သည် သူ၏ ကျင့်ကြံခြင်းကို အမှန်တကယ် ပြန်လည် ရရှိထားခြင်းပင် ဖြစ်သည်
မဟာတောက်ပရေးဗျူရိုမှ လူများမှာမူ ထိုမြင်ကွင်းကို ကြည့်ကာ တိတ်တဆိတ် အားပေးနေကြသည်။ တကယ်ကို ရင်အေးစရာ ကောင်းလှသည်
"မင်း ငါ့ကို ဘယ်လိုတောင် လက်ဖျားနဲ့ ထိရဲရတာလဲ ဖန်ချန်... မင်း ပုန်ကန်ဖို့ ကြိုးစားနေတာလား"
မှူးချုပ်လျိုသည် သူ၏ မျက်နှာကို ကိုင်ရင်း ဖန်ချန်ကို ဒေါသတကြီး စိုက်ကြည့်လိုက်သည်။ သူ၏ မျက်လုံးထဲတွင် အမုန်းတရားနှင့် အရှက်ရမှုများ လှည့်လည်နေသည်။
"ပြီးခဲ့တဲ့ နှစ်တွေအတွင်းမှာ ငါဟာ မင်းထက် ရာထူးအများကြီး ပိုမြင့်တဲ့ လူတွေကိုတောင် ရိုက်နှက်ခဲ့ဖူးတယ်။ ဒါပေမဲ့ သူတို့ ဘယ်သူမှ ငါ့ကို ပုန်ကန်သူလို့ မစွပ်စွဲရဲခဲ့ကြဘူး"
ဟု ဖန်ချန်က ပြောလိုက်သည်။
"မှူးချုပ်လျို မင်းရဲ့ အလုပ်ကို မင်း သေချာလုပ်ပါ၊ ငါ့ကို ထပ်ပြီး လာမရန်စနဲ့ နောက်တစ်ခါဆိုရင်တော့ ဒါက ပါးရိုက်ရုံနဲ့တင် ပြီးမှာ မဟုတ်ဘူး"
"ဖန်ချန် မင်းက မဟာရှ မှာ မင်းလုပ်ချင်တာ အကုန်လုပ်လို့ရတယ်လို့ ထင်နေတာလား မင်းရဲ့ အတိတ်က အောင်မြင်မှုတွေ ကြီးကျယ်ခဲ့ရင်တောင် လွန်ခဲ့တဲ့ ငါးနှစ်က သုံးလောကတောင်တန်း တိုက်ပွဲမှာ မင်းရဲ့ ဂုဏ်သိက္ခာတွေ အကုန် ပျက်စီးသွားခဲ့ပြီ"
မှူးချုပ်လျိုက ဒေါသတကြီး အော်ဟစ်လိုက်သည်။
"ဧကရာဇ်မင်းမြတ်က မင်းရဲ့အသက်ကို ချမ်းသာပေးထားတာ ဒါပေမဲ့ မင်းက မင်းရဲ့အမှားတွေကို ဆင်ခြင်သုံးသပ်မယ့်အစား ရဲရင့်သောဓား သက်တော်စောင့်တပ်ရဲ့ ကိစ္စတွေမှာ ဝင်ပါနေတယ်ပေါ့ ဧကရာဇ်ရဲ့ အမိန့်တွေကို မင်း မေ့သွားပြီလား"
"ဧကရာဇ်ရဲ့ စကားတွေကို ငါ အမြဲ နှလုံးသွင်းထားပါတယ်"
ဖန်ချန်က ကိုယ်ကို အနည်းငယ် လှည့်ပြီး နန်းတော်ရှိရာ ဘက်သို့ ညွှန်ကာ အရိုအသေ ပေးရင်း ပြုံးလိုက်သည်။
ထို့နောက် သူက ပြန်လှည့်လာပြီး
"ဒါပေမဲ့ မင်းက ဘယ်သူမို့လို့လဲ ဧကရာဇ်မင်းမြတ်ကို အကြောင်းပြပြီး ငါ့ကို ဖိနှိပ်ချင်တာလား အဲဒီလိုလုပ်ဖို့ မင်းမှာ အရည်အချင်း မရှိဘူးလို့ ငါ ထင်တယ်"
မှူးချုပ်လျိုမှာ ဘာပြန်ပြောရမှန်း မသိဘဲ ဆွံ့အသွားသည်။ သူ၏ ရင်ထဲတွင် ခံစားချက်များ ပြည့်နှက်နေပြီး စကားလုံးများမှာလည်း လည်ချောင်းထဲတွင် တစ်ဆို့နေတော့သည်။
ဖန်ချန်၏ မီးခိုးရောင် သွေးစုပ်နေသော မျက်လုံးများကို စိုက်ကြည့်နေမိသူတိုင်း သူ့ကို မျက်မမြင်တစ်ယောက်ဟု မသတ်မှတ်ရဲကြပေ။
နတ်စစ်သူကြီး ဖန်သည် ငါးနှစ်တိုင်တိုင် တိတ်ဆိတ်နေခဲ့သော်လည်း သူ၏ ခံ့ညားထည်ဝါသော အရှိန်အဝါမှာ အနည်းငယ်မျှ လျော့ပါးသွားခြင်း မရှိပေ။
အမှန်တကယ်တော့ ယခင်ကထက်ပင် ပိုမို အားကောင်းလာခဲ့သည်။ သူ့အနီးဆုံးတွင် ရှိနေသော နျူကျူး က ထိုအရာကို အခြားသူများထက် ပို၍ ခံစားလိုက်ရသည်။
ယခင်က ဖန်ချန်သည် ကျော်ဖြတ်ရန် ခက်ခဲသော တောင်ကြီးတစ်လုံးကဲ့သို့ ခံစားချက်မျိုး ပေးခဲ့လျှင်၊ ယခုမူ သူသည် အဆုံးမရှိသော ပင်လယ်ပြင်ကြီး ဖြစ်လာခဲ့သည်။
မျက်နှာပြင်ပေါ်တွင် တည်ငြိမ်နေသော်လည်း အတွင်းထဲတွင်မူ ပြင်းထန်သော စွမ်းအားများ ကိန်းအောင်းနေသည်။ သူ၏ အရှိန်အဝါကြောင့် ဘေးနားရှိ လူများမှာ အကျဉ်းချခံထားရသလို ခံစားနေရသည်။
"ဟားဟား"
အားရပါးရ ရယ်မောသံတစ်ခု အဆောက်အအုံအတွင်း ဟိန်းထွက်လာပြီးနောက် နဂါးရုပ်ပုံများ ထိုးထားသော ဝတ်ရုံကို ဝတ်ဆင်ထားသည့် လူလတ်ပိုင်းတစ်ဦးသည် အစောင့်အုပ်စုနှင့်အတူ လျှောက်လာခဲ့သည်။
"နတ်စစ်သူကြီး ဖန် ဒီနေ့ ငါတို့ စခန်းကို လာလည်မယ်လို့ မမျှော်လင့်ထားဘူး ငါ့ရဲ့ လက်အောက်ငယ်သားတွေရဲ့ ယဉ်ကျေးမှု မရှိမှုကို ငါ တောင်းပန်ပါတယ်၊ ငါ နောက်ကျမှ ရောက်လာတာကိုလည်း ခွင့်လွှတ်ပေးဖို့ မျှော်လင့်ပါတယ်"
ထိုလူလတ်ပိုင်းသည် ခံ့ညားထည်ဝါသော ခြေလှမ်းများဖြင့် လျှောက်လာသည်။
သူ၏ နားထင်များမှာ ဖောင်းကြွနေပြီး သူ၏ တစ်ကိုယ်လုံးမှာလည်း ဖျော့တော့သော အရှိန်အဝါတစ်ခုနှင့် ဝန်းရံထားသကဲ့သို့ ဖြစ်နေသည်။
သူသည် ခှိထိန်းချုပ်ခြင်းနယ်ပယ် မှ ကိုယ်ခံပညာရှင်တစ်ဦး ဖြစ်ပြီး အလွန်အစွမ်းထက်သူ ဖြစ်သည်
သူကား မြို့တွင်းပိုင်းရှိ ရဲရင့်သောဓား သက်တော်စောင့်တပ်၏ တပ်ဖွဲ့မှူးချုပ် ရှောင်းရှန်းချဲပင် ဖြစ်သည်
"တပ်ဖွဲ့မှူးချုပ်ကို ဂါရဝပြုပါတယ်"
သက်တော်စောင့်များက ချက်ချင်းပင် အရိုအသေ ပေးလိုက်ကြသည်။ သူတို့ သက်ပြင်းချနိုင်သွားကြသည်။ သူ ရှိနေမှသာ ဤအခြေအနေကို ထိန်းချုပ်နိုင်မည် ဖြစ်သည်။ မဟုတ်ပါက သူတို့မှာ အရှက်ရရန်သာ ရှိတော့သည်။
အခြားတစ်ဖက်တွင်မူ မဟာတောက်ပရေးဗျူရိုမှ လူများ၏ မျက်နှာအမူအရာမှာ အနည်းငယ် ပြောင်းလဲသွားသည်။ တည်ငြိမ်နေသော စုံထောက်ချုပ် ကျောက်စီရှင်းမှလွဲ၍ ကျန်သူများမှာ စိုးရိမ်သွားကြသည်။ ရှောင်ရှန်းချဲ ရောက်လာသည့်တိုင် သူသည် တုန်လှုပ်ခြင်း မရှိပေ။
"အစ်ကိုရှောင်... ခင်ဗျားက အရမ်း ယဉ်ကျေးနေပါပြီ"
ဟု ဖန်ချန်က ပြောလိုက်သည်။
လူတိုင်း အံ့ဩသွားကြသည်။ ဖန်ချန်က ရှောင်ရှန်းချဲကို တကယ်ပဲ သိနေတာလား မှူးချုပ်လျို၏ အမြင်တွင် သူတို့၏ နောက်ခံသမိုင်းကြောင်းများအရ ရှောင်ရှန်းချဲနှင့် ဖန်ချန်တို့ကြားတွင် မည်သည့် ပတ်သက်မှုမှ မရှိသင့်ပေ
"မင်း ငါ့ကို အစ်ကိုရှောင် လို့ ခေါ်ခဲပါတယ် ဪ... ဒီငါးနှစ်အတွင်းမှာ ငါလည်း မင်းရဲ့ ဖန်အိမ်တော်ကို မလာဖြစ်ခဲ့ဘူး ငါ့ကိုတော့ အပြစ်မတင်ဘူး မဟုတ်လား "
ရှောင်ရှန်းချဲက သက်ပြင်းချရင်း မေးသည်။
"ရဲရင့်သောဓား သက်တော်စောင့်တပ်က တာဝန်တွေ ကြီးမားပါတယ် သူတို့ရဲ့ တပ်ဖွဲ့မှူးချုပ်အနေနဲ့ ခင်ဗျား အလုပ်များမှာ သေချာပါတယ် ခင်ဗျားရဲ့ အခြေအနေကို ကျွန်တော် နားလည်ပါတယ်"
ဟု ဖန်ချန်က ခပ်ဖျော့ဖျော့ ပြုံးလျက် ပြောလိုက်သည်။
"ကောင်းပြီ... ကောင်းပြီ"
ရှောင်ရှန်းချဲက ခေါင်းကို တရစပ် ငြိမ့်ပြသည်။ သူသည် မှူးချုပ်လျိုဘက်သို့ လှည့်ကာ ခဏမျှ ကြည့်ပြီးနောက် ယွမ်ကျန်းရှိရာသို့ အကြည့်ကို ပို့လိုက်ပြီး သက်ပြင်းချလိုက်ပြန်သည်။
ထို့နောက် သူက ဖန်ချန်ကို ထပ်မံ ပြောလိုက်သည်
"ညီအစ်ကိုဖန် ဘာတွေ ဖြစ်ပျက်နေသလဲဆိုတာ ငါ အနည်းငယ် သိပါတယ် ဒါပေမဲ့ မှူးချုပ်လျိုကတော့ လုပ်ထုံးလုပ်နည်းတွေ၊ စည်းမျဉ်းတွေအတိုင်းပဲ လုပ်ခဲ့တာပါ ဒါကြောင့် မင်း သူ့ကို ခေါ်သွားမယ်ဆိုရင် ငါ့အတွက် တကယ်ကို အခက်တွေ့စေလိမ့်မယ် အကယ်၍ ဒါက အပြင်ကို ပျံ့သွားရင် လူတွေက ရဲရင့်သောဓား သက်တော်စောင့်တပ်ကို ဘယ်လို မြင်ကြမလဲ ငါလည်း ဧကရာဇ်မင်းမြတ်ကို သင့်တော်တဲ့ ရှင်းပြချက် ပေးနိုင်မှာ မဟုတ်ဘူး"
မှူးချုပ်လျို၏ မျက်လုံးများတွင် အေးစက်သော အလင်းရောင်တစ်ခု လက်သွားသည်။
အဆောက်အအုံအတွင်းရှိ လေထုမှာ ရုတ်တရက် ပြောင်းလဲသွားပြီး မဟာတောက်ပရေးဗျူရိုမှ အဖွဲ့ဝင်များမှာ တင်းမာသွားကြသည်။
ရှောင်ရှန်းချဲသည် ယွမ်ကျန်းကို အလွယ်တကူ လွှတ်ပေးရန် ရည်ရွယ်ချက် မရှိပုံရသည်။
ယွမ်ယုသည် အလွန် စိုးရိမ်နေသည်။ ယွမ်ကျန်းသည် ပြင်းထန်စွာ ဒဏ်ရာရထားပြီး စကားပင် မပြောနိုင်တော့ပေ အကယ်၍ သူတို့ သူ့ကို ခေါ်မသွားနိုင်ပါက သူ သေဆုံးရန် သိပ်မကြာတော့ပေ
"ဒီကိစ္စနဲ့ ပတ်သက်ပြီး ခင်ဗျားအတွက်ပါ ကျွန်တော် အသေအချာ စဉ်းစားပေးထားပါတယ်"
ဖန်ချန်က ခပ်ဖွဖွ ခေါင်းငြိမ့်လိုက်သည်။
မဟာတောက်ပရေးဗျူရိုမှ လူများ၏ မျက်နှာအမူအရာမှာ ရုတ်တရက် ပြောင်းလဲသွားသည်။
နောက်တစ်စက္ကန့်တွင် ဖန်ချန်သည် ဘေးသို့ လှည့်လိုက်ပြီး
"ပဉ္စမမင်းသား "
ဟု ခေါ်လိုက်သည်။
ပဉ္စမမင်းသား
ရှောင်ရှန်းချဲနှင့် ကျန်ရှိသူများမှာ ထိတ်လန့်သွားကြပြီး ဖန်ချန် ကြည့်ရာဘက်သို့ လိုက်ကြည့်လိုက်ကြသည်။
ပဉ္စမမင်းသား အမှန်တကယ် ရောက်ရှိလာသည်ကို တွေ့လိုက်ရသဖြင့် သူတို့ အံ့ဩသွားကြသည်။
မဟာတောက်ပရေးဗျူရိုမှ လူများမှာမူ အလွန် ဝမ်းသာသွားကြသည်။ ပဉ္စမမင်းသားသည် မဟာတောက်ပရေးဗျူရိုကို တာဝန်ယူထားသူဖြစ်ပြီး သူ ပေါ်လာခြင်းမှာ တိုက်ဆိုင်မှု မဟုတ်သည်မှာ သေချာသည်။
"ဖန်ချန် မင်း သူ့ကို တကယ်ပဲ ရှာတွေ့သွားတာလား ငါ သိနေသားပဲ လူတစ်ယောက်က ဘာခြေရာမှ မချန်ဘဲ ဒီအတိုင်း ပျောက်ကွယ်သွားဖို့ဆိုတာ မဖြစ်နိုင်ဘူး"
ဟု မင်းသားဝူ က အားရပါးရ ရယ်မောရင်း ပြောလိုက်သည်။
ထို့နောက် သူက ရှောင်ရှန်းချဲဘက် လှည့်လိုက်ရာ သူ၏ အကြည့်မှာ အေးစက်သွားသည်။
"ရှောင်ရှန်းချဲ... ခင်ဗျားက တကယ်ကို ရဲတင်းလှချည့်လား ငါ့ကို အသိပေးချက်လေးတောင် မပေးဘဲ ငါ့ရဲ့ မဟာတောက်ပရေးဗျူရိုက လူကို ဖမ်းဆီးရဲတယ်ပေါ့"
"ကျွန်တော်မျိုး အသိပေးဖို့ ရည်ရွယ်ထားပါတယ် ဒါပေမဲ့ ကိစ္စအချို့ကြောင့် နောက်ကျသွားတာပါ..."
မှူးချုပ်လျိုက အလျင်အမြန် ဝင်ပြောသည်။
"ငါ့ရှေ့မှာ ပါးစပ်ဟရအောင် မင်းက ဘယ်သူမို့လို့လဲ ထွက်သွားစမ်း"
ပဉ္စမမင်းသားက မှူးချုပ်လျိုကို အရေးမစိုက်သော အကြည့်ဖြင့် ကြည့်ကာ ပြောလိုက်သည်။
မှူးချုပ်လျို၏ မျက်နှာမှာ တလှည့်နီ တလှည့်ဖြူ ဖြစ်သွားသည်။ သူတို့ ပေါ်လာကတည်းက သူသည် အကြိမ်ကြိမ် အရှက်ခွဲခံနေရပြီး အဆိုးဆုံးမှာ သူသည် ပြန်၍ပင် မပြောဝံ့ခြင်း ဖြစ်သည်
ရှောင်ရှန်းချဲက ရယ်မောလိုက်သည်။
"မှူးချုပ်လျိုက ကိစ္စအချို့ကို သတိမမူမိခဲ့တာ အမှန်ပါပဲ ဒါပေမဲ့ ကျွန်တော်တို့ရဲ့ ဖမ်းဆီးမှု လုပ်ငန်းစဉ်ကတော့ ဘယ်ဥပဒေကိုမှ ချိုးဖောက်ခြင်း မရှိပါဘူးဒါကြောင့်"
"အဲဒါ ဟုတ်လို့လား ကောင်းပြီ ငါ ယွမ်ကျန်းကို ခေါ်သွားမယ် သူ့ကို လာဘ်စားမှုနဲ့ တစ်ယောက်ယောက်က စွပ်စွဲထားလို့ လွန်ခဲ့တဲ့ လအနည်းငယ်ကတည်းက ငါတို့ သူ့ကို ဖမ်းဖို့ လုပ်နေတာ ကဲ ဒါကို ခင်ဗျားကိုယ်တိုင် ကြည့်လိုက်ဦး"
မင်းသားဝူက အမှုတွဲဖိုင်တစ်ခုကို ရှောင်ရှန်းချဲထံ လွှင့်ပစ်လိုက်သည်။
"ဒါတွေက ငါ့ရဲ့ ဗျူရိုက စာရွက်စာတမ်းတွေပဲဥပဒေနဲ့လည်း အပြည့်အဝ ညီညွတ်တယ် ငါတို့ဘက်က နည်းနည်း နောက်ကျသွားတာပဲ ရှိတာခင်ဗျားတို့က အခွင့်အရေးကို လက်လွှတ်မခံဘဲ အရင်ဦးအောင် ဖမ်းလိုက်လိမ့်မယ်လို့ ငါတို့ မထင်ထားခဲ့ဘူး။"
"ကဲ... ဖတ်လို့ ပြီးပြီလား ငါတို့ရဲ့ မဟာတောက်ပရေးဗျူရိုက သူ့ကို ဖမ်းဖို့ အကြောင်းပြချက်က ခင်ဗျားတို့ထက် အများကြီး ပိုစောတယ် အခု သူ့ကို ငါတို့ ခေါ်သွားတာကိုတော့ ခင်ဗျားတို့ ပြဿနာ ရှာမှာ မဟုတ်တော့ဘူးလို့ ငါ ထင်တယ်။"
စကားဆုံးသည်နှင့် သူက တပ်မှုးချုပ် ကျောက်စီရှင်းကို အော်ပြောလိုက်သည်
"ဘာလို့ သူ့ကို ခေါ်မသွားသေးတာလဲ"
"ဟုတ်ကဲ့ပါ အကြီးအကဲ"
တပ်မှုးချုပ် ကျောက်စီရှင်းက အမိန့်ပေးလိုက်ရာ သူ၏ လက်အောက်ငယ်သားများသည် ရွှီဂီထံမှ ယွမ်ကျန်းကို ကူညီတွဲပေးလိုက်ကြသည်။ သူတို့သည် သူ့ကို ခေါ်ဆောင်ကာ ဂုဏ်သိက္ခာရှိရှိ ထွက်ခွာသွားကြတော့သည်။
"ဘယ်လိုလဲ အမှုတွဲဖိုင်ကို ဖတ်ပြီးပြီလား အခု ဘာတွေ ဖြစ်နေသလဲဆိုတာ ခင်ဗျား နားလည်ပြီလား"
ပဉ္စမမင်းသားက ရှောင်ရှန်းချဲကို ပြုံးပြသည်။
"တကယ်ပဲ နားလည်မှုလွဲတာတစ်ခု ရှိခဲ့ပုံရပါတယ်"
ရှောင်ရှန်းချဲက ခပ်ဖျော့ဖျော့ ပြုံးကာ အမှုတွဲဖိုင်ကို မင်းသားထံ ပြန်ပေးလိုက်သည်။
"နောင်ဆိုရင် ဒီလို အမှားမျိုး မလုပ်ပါနဲ့ ငါ့ကျန်းမာရေးက သိပ်မကောင်းဘူး ခင်ဗျားက ငါ့ကို အရမ်း ရန်စနေရင် ငါ ဒေါသထွက်ပြီး ဖျားနာသွားနိုင်တယ် အဲဒီအချိန်ကျရင် ငါ့ရဲ့ အစ်ကိုတော် ဧကရာဇ်မင်းမြတ်က ခင်ဗျားရဲ့ ခေါင်းကို ဖြတ်ပစ်လိမ့်မယ်၊ သိလား"
ပဉ္စမမင်းသားက ခပ်ဖွဖွ ရယ်မောရင်း ဖန်ချန်ဘက် လှည့်လိုက်သည်။
"ဖန်ချန် ငါတို့ သွားကြမလား?"
"ကြွပါ"
ဖန်ချန်က ပြုံးလျက် ခေါင်းငြိမ့်ပြပြီး သူတို့နှစ်ဦး ဘေးချင်းယှဉ်ကာ ထွက်ခွာသွားကြသည်။ သူတို့နှစ်ဦး ဘေးချင်းယှဉ် လမ်းလျှောက်နေကြသည်ကို လူတိုင်း မြင်တွေ့လိုက်ရသည်။
မှူးချုပ်လျို၏ မျက်နှာမှာ ဖြူလျော်သွားသည်။
ယွမ်ကျန်းကို ထိုမျှ လွယ်လွယ်ကူကူနှင့် ခေါ်သွားနိုင်လိမ့်မည်ဟု သူ မထင်ထားခဲ့ပေ။
သူတို့ ထွက်သွားသောအခါ ရှောင်ရှန်းချဲသည် စကားတစ်လုံးမှ မပြောဘဲ သူတို့ ထွက်သွားသည်ကို တိတ်ဆိတ်စွာ ကြည့်နေခဲ့သည်။
သူတို့ အမြင်အာရုံထဲမှ ပျောက်ကွယ်သွားသောအခါမှ သူက မှူးချုပ်လျိုကို အေးစက်စွာ နှာခေါင်းရှုံ့လိုက်သည်။
"နောင်ဆိုရင် ကိစ္စတွေကို ပိုပြီး သေချာအောင် လုပ်ပါ ဒီနေ့လိုမျိုး ထပ်မဖြစ်စေနဲ့ ပြီးတော့... ခဏနေရင် ငါ့ဆီ လာခဲ့ဦး မင်း ယွမ်ကျန်းကို ဘာလို့ ဖမ်းခဲ့သလဲဆိုတာ ငါ သိချင်တယ်..."
"ဟုတ်ကဲ့ပါ"
မှူးချုပ်လျိုက တိုးတိုးလေး ပြန်ဖြေလိုက်သည်။