အခန်း (၇၇-၇၈)
Vol. 8 Ch. 77-78
အခန်း ၇၇ - အစုလိုက်အပြုံလိုက် သတ်ဖြတ်ခြင်း
မြို့တော်အရှေ့တံခါးတွင် ရန်သူမြင်းတပ် အင်အား နှစ်သောင်း၏ ဝိုင်းရံပိတ်ဆို့မှုကို ရင်ဆိုင်နေရစဉ်၊ ချီထိန်းချုပ်ခြင်းနယ်ပယ်မှ ကိုယ်ခံပညာရှင်တစ်ဦးဖြစ်သည့် ဖန်ချန်းဟိုင် သည် တစ်ကိုယ်တော် သူရဲကောင်းတစ်ဦးကဲ့သို့ ရပ်တည်နေပြီး တံတိုင်းပေါ်သို့ တက်လာသမျှသူတိုင်းကို သူ၏ဓားဖြင့် ပိုင်းဖြတ်နေလေသည်။
သို့သော်လည်း အနောက်ကျားတပ်ရင်းမှ စစ်ကူများ ရောက်ရှိလာသော်လည်း စစ်သည်အနည်းငယ်မျှဖြင့် တံခါးကို ခုခံကာကွယ်ရန်မှာ အလွန်ခက်ခဲလှပြီး စက္ကန့်နှင့်အမျှ ကျဆုံးမှုများ ပိုမိုများပြားလာသည်။
"စစ်သူကြီး အရှင်မင်းကြီးကိုယ်တိုင် ဒီမှာရှိနေရင်တောင် အရှေ့တံခါးကို ခုခံနိုင်ဖို့ မလွယ်ဘူးကျွန်တော်တို့ လူလွှတ်ပြီး စစ်သူကြီးဖန်ကို အကြောင်းကြားသင့်ပြီ၊ သခင်မကြီးနဲ့ သခင်မလေးကို ခေါ်ပြီး အမြန်ဆုံး တိမ်းရှောင်ခိုင်းပါတော့"
ဟု ဖန်ချန်းဟိုင်နှင့်အတူ တိုက်ပွဲဝင်နေသော စစ်သည်တစ်ဦးက အရေးတကြီး ပြောလိုက်သည်။
တိုက်ခိုက်မှု၏ နောက်ဆုံးပန်းတိုင်မှာ ဖန်ချန်ဖြစ်သည်မှာ ငြင်းစရာမရှိပေ။
ထို့ကြောင့် လုံတုအင်ပါယာသည် ဖန်မိသားစုကို ချမ်းသာပေးမည်မဟုတ်ဘဲ တံခါးကို မကာကွယ်နိုင်တော့လျှင် ဖန်ချန် အသက်ရှင်နေမှသာ ပြန်လည်တုံ့ပြန်နိုင်မည့် အခွင့်အရေးရှိပေလိမ့်မည်။
"အပိုတွေ မစဉ်းစားနဲ့ တံခါးကို ထိန်းထားနိုင်ဖို့ပဲ အာရုံစိုက်စမ်း ရှုံးတော့မယ်ဆိုရင်တောင် ရန်သူကို အများဆုံးသတ်ပြီးမှ သေကြတာပေါ့"
ဟု ဖန်ချန်းဟိုင်က တည်ငြိမ်သောအသံဖြင့် ပြောလိုက်သည်။
နောက်တစ်စက္ကန့်တွင် အလင်းတန်းတစ်ခု လက်သွားပြီး တံတိုင်းပေါ်သို့ တက်လာသည့် လုံတုမြင်းတပ်သားတစ်ဦးက သူ၏ပြင်းထန်သော အတွင်းအားကို ထုတ်လွှတ်လိုက်ရာ မဟာရှစစ်သည် ဒါဇင်ပေါင်းများစွာ လွင့်စင်သွားကြသည်။
ထို့နောက် သူသည် ဖန်ချန်းဟိုင်ရှေ့တွင် ပေါ်လာပြီး သူ၏ဓားဖြင့် ထိုးနှက်လိုက်သည်။ ထိုတိုက်ကွက်မှာ မြန်ဆန်၊ တိကျပြီး ပြင်းထန်လှကာ လျှော့တွက်၍မရသော အတွင်းအားများ ပါဝင်နေသည်။
ဖန်ချန်းဟိုင်၏ မျက်နှာ အနည်းငယ် ပျက်သွားသည်ချီထိန်းချုပ်ခြင်းနယ်ပယ်မှ ပညာရှင်တစ်ဦးပင်
လုံတုသည် မြို့တော်ကို ဖောက်ထွင်းရန် ချီထိန်းချုပ်ခြင်းနယ်ပယ်မှ ပညာရှင်တစ်ဦးကို စေလွှတ်လိုက်ပြီဖြစ်ရာ အရှေ့တံခါးကို သိမ်းပိုက်ရန် သူတို့၏ အင်အားအပြည့်အဝကို မကြာခင် အသုံးပြုတော့မည်ဟူသော အဓိပ္ပာယ်ပင်။
၎င်းကို မြင်သောအခါ မဟာရှစစ်သည်တစ်ဦးသည် မိမိ၏အသက်ကို ပဓာနမထားဘဲ ဖန်ချန်းဟိုင်ရှေ့သို့ ခုန်ဝင်လိုက်သည်။
ဓားသည် သူ၏ရင်ဘတ်ကို ဖောက်ထွက်သွားပြီး နှလုံးကို ပျက်စီးစေခဲ့သည်။ သို့သော် သူ၏နောက်ဆုံးထွက်သက် မတိုင်ခင်မှာပင် သူသည် လုံတုစစ်သည်ကို မြဲမြံစွာ ဖက်တွယ်ထားပြီး ဓားကို သူ၏ကိုယ်ထဲသို့ ပို၍ နက်ရှိုင်းအောင် တွန်းပို့လိုက်သည်။
ထိုစစ်သည်မှာ ထိုသို့ဖြစ်လာမည်ဟု မမျှော်လင့်ထားဘဲ အမျက်ထွက်သွားသည်။
သူသည် စစ်သည်၏ ခန္ဓာကိုယ်ကို အတွင်းအားဖြင့် ဖောက်ခွဲပစ်ရန် ပြင်လိုက်စဉ်မှာပင် သူ၏ဦးခေါင်းပေါ်သို့ ကျဆင်းလာသော ဖန်ချန်းဟိုင်၏ ဓားအလင်းတန်းကို သတိပြုမိသွားသည်။
ဖျတ်
လုံတုစစ်သည်၏ ဦးခေါင်းမှာ မကျေမနပ်ဖြစ်နေသော မျက်နှာထားဖြင့် လေထဲသို့ မြင့်မားစွာ လွင့်စင်သွားသည်။
သူကဲ့သို့ ချီထိန်းချုပ်ခြင်းနယ်ပယ်မှ ပညာရှင်တစ်ဦးမှာ မဟာရှ၏ ရဲရင့်စွန့်လွှတ်သော စစ်သည်တစ်ဦးကြောင့် စစ်မြေပြင်တွင် ဘာမှမစွမ်းဆောင်နိုင်ဘဲ သေဆုံးသွားရရှာသည်။
စစ်မြေပြင်ဆိုသည်မှာ ခန့်မှန်းရခက်လှပေသည်။ ပညာရှင်တစ်ဦးဖြစ်ပါစေ၊ စက္ကန့်ပိုင်းမျှ သတိလက်လွတ်ဖြစ်သွားပါက မည်မျှပင် အစွမ်းထက်စေကာမူ အသက်ပျောက်သွားနိုင်ပေသည်။
ဖန်ချန်းဟိုင်သည် ထိုစစ်သည်ကို ထိန်းပေးလိုက်ပြီး သူ၏မျက်လုံးထဲတွင် ဝမ်းနည်းရိပ်များ ဖြတ်ပြေးသွားသည်။
"မင်းနာမည် ဘယ်သူလဲ"
ဟု သူ မေးလိုက်သည်။
"စစ်သူကြီး... ကျွန်တော်မျိုးက တစ်ချိန်က စစ်သူကြီးဖန်ရဲ့ လက်အောက်က နာမည်မရှိတဲ့ စစ်သည်တစ်ယောက်ပါ ဒီနေ့ စစ်သူကြီးအတွက် လုံတုက ပညာရှင်တစ်ယောက်ကို သတ်ပေးနိုင်ခဲ့လို့ နောင်တမရှိဘဲ သေနိုင်ပါပြီ။ ဟားဟား"
စစ်သည်က ရယ်မောလိုက်သော်လည်း ပါးစပ်မှ သွေးများထွက်လာပြီး ချောင်းဆိုးသွားသည်။
သူ၏ မျက်လုံးများမှာ တဖြည်းဖြည်း အရောင်မှိန်သွားကာ ဦးခေါင်းမှာ ဘေးသို့ ငိုက်ကျသွားတော့သည်။
သူ နောက်ဆုံးထွက်သက် ချုပ်ငြိမ်းသွားသည်ကို မြင်သောအခါ ဖန်ချန်းဟိုင်သည် စစ်သည်၏ကိုယ်ကို လုံတုစစ်သည်၏ အလောင်းနှင့်အတူ မြေပြင်ပေါ်သို့ ညင်သာစွာ ချပေးလိုက်သည်။
ထို့နောက် ဖန်ချန်းဟိုင်သည် မြို့တံခါးအတွင်းသို့ တရစပ် ဝင်ရောက်လာသော ကျန်ရှိသည့် မြင်းတပ်သားများကို ပြန်လည်တိုက်ခိုက်သည်။ သူသည် သွေးချင်းချင်းနီနေပြီး ပြင်းထန်စွာ တိုက်ခိုက်နေသော်လည်း သူတို့၏ ကျရှုံးမှုမှာ နေ့ခင်းကြောင်တောင်ကဲ့သို့ ထင်ရှားနေသည်။
အချိန်ကြာလာသည်နှင့်အမျှ လုံတုမြင်းတပ်များမှာ မြို့တံခါးအတွင်းသို့ ပိုမိုဝင်ရောက်လာသဖြင့် ဖန်ချန်းဟိုင်နှင့် သူ၏လူများမှာ နောက်သို့ ဆုတ်ခွာရတော့သည်။
နောက်ဆုံးတွင် မြို့တံခါးမှာ ရန်သူ၏ ဝိုင်းရံဖျက်ဆီးမှုကြောင့် ပျက်စီးသွားပြီး လုံတုဘက်မှ အောင်ပွဲခံ အော်ဟစ်သံများ ထွက်ပေါ်လာသည်။
"မြို့တော်ကို ဖောက်လိုက်နိုင်ပြီဟေ့"
မဟာရှစစ်သည်များ၏ မျက်နှာမှာ သေလူကဲ့သို့ ဖြူလျော့သွားသည်။ ၎င်းကို မြင်သောအခါ ဖန်ချန်းဟိုင်သည် ဆက်လက်ခုခံရန် မဖြစ်နိုင်တော့ကြောင်း သိလိုက်ပြီး ကျန်ရှိသည့် စစ်သည်များကို ခေါ်ကာ မြို့ထဲသို့ ဆုတ်ခွာသွားသည်။
နောက်တစ်ဆင့်မှာ မြို့ထဲသို့ ဝင်ရောက်လာမည့် လုံတုမြင်းတပ်များကို မြို့တွင်းစစ် ဆင်နွှဲရန်သာ ရှိတော့သည်။
ပျက်စီးသွားသော တံခါးမှ ဝင်ရောက်လာသည့် မြင်းတပ်အုပ်စုထဲတွင် စစ်မြင်းတစ်ကောင်ကို စီးနင်းထားသော အရပ်ရှည်ရှည် လူလတ်ပိုင်းတစ်ဦး ပါဝင်သည်။ သူသည် ဖန်ချန်းဟိုင်ကို အထက်စီးမှ ကြည့်ကာ
"မင်းက ဖန်ချန်ရဲ့ အဖေ၊ ဖန်ချန်းဟိုင် မဟုတ်လား"
ဟု မေးလိုက်သည်။
သူတို့၏ နောက်ခံတွင် အရှေ့တံခါး ပျက်စီးသွားသည်ကို မျက်မြင်ကိုယ်တွေ့ မြင်လိုက်ရသော ကြောက်လန့်တုန်လှုပ်နေသည့် အရပ်သားများ ရှိနေသည်။
တကယ်လို့ အပြင်မြို့တော် သာ လုံတုလက်ထဲ ကျသွားရင် အတွင်းမြို့တော် က ဘယ်လောက်ကြာကြာ ခံနိုင်မှာလဲ။
"မင်းက ဘယ်သူလဲ"
ဟု ဖန်ချန်းဟိုင်က အေးစက်စွာ မေးလိုက်သည်။
"နယ်စား လီရှီယွင် ပဲ"
ထိုလူက ခပ်တိုးတိုး ရယ်မောလိုက်ပြီး ပတ်ဝန်းကျင်ကို ဝေ့ကြည့်ကာ
"ဟက်... ငါ တစ်နေ့မှာ မဟာရှမြို့တော်ကို စစ်တပ်နဲ့ သိမ်းပိုက်ရလိမ့်မယ်လို့ တစ်ခါမှ မတွေးဖူးဘူးနားထောင်ကြစမ်း ဒီနိမ့်ကျတဲ့ မဟာရှအရပ်သားတွေကို ကရုဏာမသက်ကြနဲ့ အစုလိုက်အပြုံလိုက် သတ်ဖြတ်ပွဲကို ၁၀ ရက်တိုင်တိုင် ဆင်နွှဲမယ် လုယက်လို့ရတဲ့ ရွှေ၊ ငွေနဲ့ မိန်းမတွေအားလုံးက မင်းတို့ အပိုင်ပဲ"
"ဟုတ်ကဲ့"
မြင်းတပ်သားများမှာ ရက်စက်ကြမ်းကြုတ်သော စိတ်လှုပ်ရှားမှုများဖြင့် ဟိန်းဟစ်လိုက်ကြရာ၊ မျှော်လင့်ချက်မဲ့နေသော အရပ်သားများမှာ ကြောက်လန့်တုန်ရင်ကုန်ကြသည်။
၁၀ ရက်တိုင်တိုင် သတ်ဖြတ်မယ် အဲဒီအချိန်ကျရင် မဟာရှမှာ လူဘယ်နှစ်ယောက် အသက်ရှင်ကျန်ဦးမှာလဲ။
လုံတုအင်ပါယာသည် မဟာရှကို လုံးဝ အမြစ်ပြတ် သုတ်သင်ပစ်ရန် ရည်ရွယ်ထားပုံရသည်။
ဖန်ချန်းဟိုင်သည် ရင်ထဲတွင် ဒေါသတကြီး ဖြစ်နေသော်လည်း တည်ငြိမ်သယောင် ဟန်ဆောင်ထားသည်။
သူတို့ဘက်တွင် ရန်သူကို ထိပ်တိုက်ရင်ဆိုင်ရန် အင်အားမလုံလောက်ကြောင်း သူ သိသည်။
ယခုအချိန်တွင် သူ လုပ်နိုင်သည်မှာ ရန်သူကို အချိန်ဆွဲထားပြီး စစ်ကူများ မကြာခင် ရောက်လာရန် ဆုတောင်းရုံသာ ရှိသည်။
ရန်သူကို မြို့ပြင်သို့ ပြန်လည်မောင်းထုတ်နိုင်သရွေ့ အခြေအနေကို ပြောင်းပြန်လှန်နိုင်မည့် အခွင့်အရေး ရှိနေဆဲဖြစ်သည်။
"မင်းက မင်းရဲ့သား ဖန်ချန်နဲ့ ယှဉ်ရင် အများကြီး နိမ့်ကျပါတယ် သူသာ ဒီမှာရှိနေရင် အရှေ့တံခါးကို ဖောက်ဖို့ ဒီလောက် မလွယ်ဘူး ဒါပေမဲ့ ကံမကောင်းစွာနဲ့ပဲ အခုအချိန်မှာ နယ်စားကြီး ရှန်းယွီက သူ့ကို ကိုယ်တိုင် ကိုင်တွယ်နေပြီ သူ သေတောင် သေနေလောက်ပြီ ဒါကြောင့် ငါကပဲ စိတ်ကောင်းထားပြီး မင်းကို သူ့ဆီ ပို့ပေးလိုက်ပါ့မယ်"
လီရှီယွင်က အားရပါးရ ရယ်မောရင်း
"ငါ့အမိန့်ကို နာခံကြ၊ သူတို့ကို အစိပ်စိပ်အမွှာမွှာ ဖြစ်အောင် လုပ်ပစ်ကြစမ်း"
ဟု လက်ယမ်းကာ အမိန့်ပေးလိုက်သည်။
ထိုစဉ်မှာပင် လူရိပ်တစ်ခုသည် လျှပ်တစ်ပြက် ပြေးဝင်လာပြီး လီရှီယွင်ရှေ့တွင် ပေါ်လာကာ သူ၏ဦးခေါင်းကို လှမ်းဖမ်းလိုက်သည်။
ထိုစက္ကန့်ပိုင်းအတွင်း လီရှီယွင်၏ မျက်လုံးများတွင် အံ့သြထိတ်လန့်မှုများ ဖြတ်ပြေးသွားပြီး
"မင်း... မင်းက ဘယ်သူလဲ"
ဟူသော စကားကိုသာ ပြောနိုင်တော့သည်။
တစ်ယောက်ယောက် အနားကပ်လာတာကို သူ ဘာလို့ သတိမထားမိတာလဲ သူက ချီထိန်းချုပ်ခြင်းနယ်ပယ် အထွတ်အထိပ်က ပညာရှင်တစ်ယောက်လေ ထိုသူသည် သူ၏ အာရုံခံမှုကို ကျော်လွန်ရုံသာမက ဦးခေါင်းကိုပါ ဖမ်းထားနိုင်ခဲ့သည် ဒီလူက ဘယ်လိုကျင့်ကြံမှုအဆင့်လဲ။ ချီအမြုတေအဆင့်လား။
ဖန်ချန်းဟိုင်၏ မျက်နှာမှာလည်း အံ့သြမှုများဖြင့် ပြည့်နှက်သွားသည်။
မည်သူမျှ တုံ့ပြန်ရန် အချိန်မရလိုက်မီမှာပင် ထိုလူသည် လီရှီယွင်၏ ဦးခေါင်းကို ရက်စက်စွာ ညှစ်ခွဲပစ်လိုက်သည်။
ထို့နောက် နောက်သို့ မဆုတ်ခွာဘဲ မြင်းတပ်အုပ်စုထဲသို့ ဒုန်းစိုင်းဝင်ရောက်ကာ တိုက်ခိုက်တော့သည်။ သူ၏ တစ်ချက်တည်းသော တိုက်ခိုက်မှုတိုင်းတွင် ရန်သူအများအပြား ကျဆုံးသွားရသည်။
"တိုက်ကြ"
ဖန်ချန်းဟိုင်သည်လည်း တုံ့ဆိုင်းမနေတော့ပေ။ ထိုသူမှာ သူတို့ဘက်တော်သားဖြစ်ပြီး အလွန်အစွမ်းထက်သူဖြစ်ရာ သူ၏တပ်ကို ဦးဆောင်ကာ ရန်သူများကို မြို့တံခါးအပြင်ဘက်သို့ ပြန်လည်မောင်းထုတ်ရန် ပူးပေါင်းတိုက်ခိုက်တော့သည်။
ထိုလျှို့ဝှက်ဆန်းပြားသော ပညာရှင် ပါဝင်လာသဖြင့် တိုက်ပွဲမှာ အလွန်လွယ်ကူသွားသည်။
ခဏအတွင်းမှာပင် မြို့ထဲသို့ ဝင်ရောက်လာသော လုံတုမြင်းတပ်များကို မြို့ပြင်သို့ ပြန်လည်မောင်းထုတ်နိုင်ခဲ့သည်။ သို့သော် ထိုလျှို့ဝှက်ပညာရှင်သည် ရန်သူကို ချမ်းသာမပေးဘဲ အေးစက်သော လူသတ်စက်တစ်လုံးကဲ့သို့ ခြေလှမ်းတိုင်းတွင် အသက်များကို ခြွေယူကာ ဆက်လက်လိုက်လံ တိုက်ခိုက်နေလေသည်။
အားလုံးမှာ ရင်ထဲတွင် တိတ်တဆိတ် ထိတ်လန့်သွားကြသည်။ ခဏအတွင်းမှာပင် ထိုလျှို့ဝှက်ပညာရှင်သည် မြင်းတပ်သား အနည်းဆုံး သုံးရာခန့်ကို သတ်ဖြတ်ခဲ့သော်လည်း မောပန်းသည့် အရိပ်အယောင်ပင် မပြပေ။
ချီအမြုတေအဆင့် ပညာရှင်တစ်ဦးပင်လျှင် ထိုမျှလောက် စွမ်းဆောင်နိုင်ရန် ခက်ခဲပေလိမ့်မည်။
လေထဲတွင်မူ ဖန်ချန်သည် သစ်သားရုပ်သေးရုပ် တိုက်ပွဲဝင်နေသည်ကို မြင်ပြီးနောက် ကျန်ရှိသည့် တံခါးသုံးခုဘက်သို့ အာရုံလွှဲလိုက်သည်။
အရှေ့တံခါးအတွက် စိတ်ပူစရာမလိုတော့ပေ၊ အကြောင်းမှာ သစ်သားရုပ်သေးရုပ်နှင့်အတူ ခရမ်းရောင်လျှပ်စီးအဆောင်များကို ကိုင်ဆောင်ထားသော မဟာရှလျှို့ဝှက်အစောင့်တပ်သား ဆယ်ဦးက တစ်ဖက်သတ် အစုလိုက်အပြုံလိုက် သတ်ဖြတ်ရန် အသင့်ရှိနေသောကြောင့် ဖြစ်သည်။
ဟွမ်စီဟိုင် သည် မြောက်ဘက်တံခါးတွင် တိုက်ပွဲဝင်နေပြီး သူသည် ကောင်းကင်မှ ဆင်းသက်လာသော နတ်စစ်သည်တစ်ဦးနှင့် တူလှသည်။
စိန်ကိုယ်ထည် အဆောင် ၊ အမြန် နှုန်းအဆောင် နှင့် ခွန်အားအဆောင် တို့၏ အစွမ်းကြောင့် သူသည် လုံတုမြင်းတပ်များကြားတွင် သောင်းကျန်းနေပြီး မဟာရှစစ်သည်များ၏ စိတ်ဓာတ်ကို မြှင့်တင်ပေးနေသည်။
တောင်ဘက်တံခါးတွင်မူ ရွှီဂီ သည် လျှို့ဝှက်အစောင့်တပ်သား ဆယ်ဦးကျော်နှင့်အတူ အင်အားကြီးမားသော တပ်ဖွဲ့တစ်ခုကို ဖွဲ့စည်းထားသည်။ အဆောင်လေးမျိုး၏ အကူအညီဖြင့် သူတို့သည် ရန်သူ၏ ဝိုင်းရံမှုကို ဖောက်ထွက်ကာ တိုက်ခိုက်ရေးခေါင်းဆောင်ကို သတ်ပစ်နိုင်ခဲ့သည်။
အနောက်ဘက်တံခါးတွင် ယူလုံချန်း ဦးဆောင်သော စစ်ကူများမှာ လုံတုမြင်းတပ်များ၏ ဝိုင်းရံခြင်းကို ခံရလုနီးပါး ဖြစ်နေချိန်တွင် နက်မှောင်သော လူရိပ်တစ်ခု ပေါ်လာသည်။
ထိုသူသည် စစ်မြေပြင်တွင် လျင်မြန်စွာ လှုပ်ရှားရင်း ဝိုင်းရံမှုကို ဖြိုခွင်းကာ လုံတုမှ ပညာရှင်အများအပြားကို သတ်ဖြတ်လိုက်သည်။
လက်ခနဲ ဖြစ်သွားသော လျှပ်စီးတန်းများကြားတွင် ယူလုံချန်းသည် အံ့အားသင့်သွားပြီးနောက် အခြေအနေကို ချက်ချင်း သဘောပေါက်သွားသည်။ သူ၏ မျက်နှာမှာ အလွန်စိတ်လှုပ်ရှားသွားပြီး
"ဒါ ဖန်ချန်ရဲ့ လက်အောက်ငယ်သားပဲ သူ နောက်ဆုံးတော့ လှုပ်ရှားလာပြီ"
ဟု ရေရွတ်လိုက်လေတော့သည်။
အခန်း ၇၈ - အခြေအနေကို စုံစမ်းမေးမြန်းခြင်း
ဝိုင်နံ့များ သင်းပျံ့နေသည့် ခမ်းနားထည်ဝါသော အိမ်တော်တစ်ခုအတွင်း၌ လုံတုမှ ပညာရှိတစ်ဦးသည် မတ်တတ်ရပ်ကာ ခွက်ကိုမြှောက်၍ အချက်ပြလိုက်သည်။
“အားလုံးပဲ သောက်ကြစို့ဗျာ ဒီနေ့ပြီးရင် မဟာရှဟာ ကြာရှည်ခံတော့မှာ မဟုတ်ပါဘူး ဒါပေမဲ့ ကုဟယ်နဲ့ ယီကျိုးက မိတ်ဆွေတို့ကတော့ စိတ်မပူကြပါနဲ့၊ ခင်ဗျားတို့က လုံတုရဲ့ မိတ်ဆွေကောင်းတွေပဲ ဒီသတ်ဖြတ်ပွဲက ခင်ဗျားတို့နဲ့ မဆိုင်သလို ခင်ဗျားတို့ရဲ့ စီးပွားရေးလုပ်ငန်းတွေကိုလည်း ဘာမှထိခိုက်မှာ မဟုတ်ပါဘူး”
သူ့ရှေ့တွင် ထိုင်နေကြသူများမှာ လုံဟွေ့ရှင်း အပါအဝင် ကုဟယ်နှင့် ယီကျိုးတို့မှ ထင်ရှားသော ကုန်သည်ကြီးများ ဖြစ်ကြသည်။ သူတို့သည် တစ်ယောက်ကိုတစ်ယောက် ကြည့်ကာ ပြုံးလျက် ဝိုင်ခွက်များကို မော့လိုက်ကြသည်။
ဝိုင်သောက်ပြီးနောက် လုံဟွေ့ရှင်းက ခပ်ဖွဖွပြုံးကာ မေးလိုက်သည်။
“ဖန်အိမ်တော်ကိုရော ဘယ်လိုမျိုး ကိုင်တွယ်ဖို့ စီစဉ်ထားလဲဆိုတာ သိချင်မိတယ်”
ထိုပညာရှိက မောက်မာသော အကြည့်ဖြင့် ပြန်ဖြေသည်။
“အမှန်အတိုင်းပြောရရင် ဖန်အိမ်တော်က ငါတို့ရဲ့ ပထမဆုံး ပန်းတိုင်ပဲ မဟာရှဧကရာဇ်ထက် သူတို့ကို အရင်နှိမ်နင်းဖို့ စီစဉ်ထားတယ် မဟာရှကို မတိုက်ခိုက်ခင်ကတည်းက ငါတို့ရဲ့ ပညာရှင်တွေကို ဖန်အိမ်တော်ဆီ လွှတ်ထားပြီးသားပါ”
လုံဟွေ့ရှင်း၏ မျက်လုံးများ ခဏမျှ တောက်ပသွားသော်လည်း ချက်ချင်းပင် မျက်မှောင်ကြုတ်လိုက်သည်။
“ဖန်ချန်ရဲ့ ကျင့်ကြံမှုက ထူးခြားတယ်၊ သူက ချီအမြုတေအဆင့်မှာ ရှိနေတာ။ ခင်ဗျားတို့ရဲ့ ပညာရှင်တွေက သူ့ကို ယှဉ်နိုင်ပါ့မလားလို့ စိုးရိမ်မိတယ်”
“ဟားဟားဟား!”
ထိုပညာရှိက အားရပါးရ ရယ်မောလိုက်သည်။ သူ့ဘေးရှိလူများ၏ ဇဝေဇဝါမျက်နှာများကို ကြည့်ကာ သူက ကောက်ကျစ်စွာ ပြုံးလျက် ရှင်းပြလိုက်သည်။
“ဖန်ချန်က အခု ကျောက်စိမ်းမသေမျိုးလှေပေါ်မှာ ပိတ်မိနေပြီလေ”
ကျန်ရှိသူများမှာ ချက်ချင်းပင် အံ့သြသွားကြသည်။
“ဘာ... ခင်ဗျားတို့ သူ့ကို ဖမ်းထားနိုင်ပြီလား”
လုံဟွေ့ရှင်းက မယုံကြည်နိုင်စွာဖြင့်
“ဒါက ဘယ်လိုလုပ် ဖြစ်နိုင်မှာလဲ”
ဟု မေးလိုက်သည်။
“ဖြစ်နိုင်တာပေါ့ နယ်စားကြီး ရှန်းယွီက သူ့ကိုပိတ်မိအောင် ကိုယ်တိုင်လှုပ်ရှားခဲ့တာ နယ်စားကြီးက လွန်ခဲ့တဲ့ ၅ နှစ်ကတည်းက ချီအမြုတေအဆင့်ကို ရောက်ခဲ့တာဖြစ်သလို အခုဆိုရင် ချီအမြုတေအဆင့် အလယ်အလတ်ကိုတောင် ရောက်နေပြီ ဖန်ချန် ဘယ်လိုမှ မလွတ်နိုင်ဘူး”
ဟု ထိုပညာရှိက ပြောလိုက်သည်။
“ဟူး...”
လူတိုင်းက အံ့သြတုန်လှုပ်စွာဖြင့် အသက်ပြင်းပြင်း ရှူလိုက်ကြသည်။
သူတို့၏ ထိတ်လန့်မှုကြားတွင် စိုးရိမ်စိတ်များလည်း ပေါ်လာသည်။ လုံတုသည် ထိုသတင်းကို သူတို့အင်ပါယာများထံမှပင် ဖုံးကွယ်ထားခဲ့ခြင်း ဖြစ်သည်။
လုံတု ပိုမိုအစွမ်းထက်လာလေလေ အင်ပါယာများကြားတွင် အင်အားမမျှတမှု ပိုဖြစ်လာလေလေ ဖြစ်မည် မဟုတ်ပါလား။
ထိုအချိန်မှာပင် အပြင်ဘက်မှ ရုတ်ရုတ်သဲသဲ အသံများ ထွက်ပေါ်လာသည်။ ပညာရှိက ဝမ်းသာအားရ ရယ်မောကာ
“ငါတို့ မြင်းတပ်တွေ အတွင်းမြို့တော်ကို သိမ်းပိုက်လိုက်ပြီ ထင်တယ်၊ သွားကြည့်ရအောင်”
ဟု ဆိုသည်။
ပညာရှိနှင့် သူ၏အပေါင်းအပါများ အပြင်သို့ ထွက်လာသောအခါ အပြင်ဘက်တွင် စိတ်ပျက်အားငယ်နေသော လုံတုမြင်းတပ်သားများကို တွေ့လိုက်ရသည်။ သူတို့သည် ခေါင်းငိုက်စိုက်ကျနေပြီး ရဲရင့်သောဓားစောင့်တပ်များ၏ သံခြေချင်းခတ်ကာ ခေါ်ဆောင်လာခြင်းကို ခံထားရသည်။
အားလုံး မှင်တက်သွားကြသည်။ လုံတုက မြို့တော်ကို ဖောက်ထွင်းရမှာ မဟုတ်ဘူးလား။ ဘာလို့ လုံတုမြင်းတပ်သား ရာပေါင်းများစွာ အဖမ်းခံထားရတာလဲ။
လုံဟွေ့ရှင်းနှင့် အခြားသူများ၏ မျက်နှာများမှာ ထူးဆန်းသွားပြီး လုံတုပညာရှိများ၏ အပြုံးများမှာလည်း တဖြည်းဖြည်း အေးခဲသွားတော့သည်။
စက္ကန့်အနည်းငယ်အကြာတွင် မီးကျွမ်းနေသော အလောင်း တစ်ဒါဇင်ကျော်ကို တစ်စုံတစ်ဦးက သယ်ဆောင်လာသည်ကို မြင်လိုက်ရသည်။
“ညီလေး... အခြေအနေလေး တစ်ချက်လောက် ပြောပြပါလား”
ဟု လုံတုပညာရှိတစ်ဦးက မနေနိုင်ဘဲ ရဲရင့်သောဓားစောင့်တပ်သား တစ်ဦးကို မေးလိုက်သည်။
ထိုအစောင့်က လှည့်ပင်မကြည့်ဘဲ ပြန်ဖြေလိုက်သည်။
“စိုးရိမ်စရာ မရှိတော့ပါဘူး၊ အခြေအနေက တည်ငြိမ်သွားပြီ။ လုံတုမြင်းတပ်တွေ မြို့တော်ကို ဖောက်ဖို့ ကြိုးစားတာ ရှုံးနိမ့်သွားပြီ”
ဘာ...
အခြေအနေက တည်ငြိမ်သွားပြီ ရှုံးနိမ့်သွားပြီ ဟုတ်လား
လုံတုပညာရှိများ၏ မျက်နှာမှာ ပို၍ ဆိုးရွားလာပြီး တစ်ဦးက
“အဲဒီ မီးကျွမ်းနေတဲ့ အလောင်းတွေကရော ဘာတွေလဲ”
ဟု မေးလိုက်သည်။
“ဒီအလောင်းတွေလား ဟားဟား... ရယ်ရတယ်ဗျာ နယ်စားကြီး ရှန်းယွီက သူကိုယ်တိုင် ချီအမြုတေအဆင့် ပညာရှင်ဆိုတော့ စစ်သူကြီးဖန်ကို ကျောက်စိမ်းမသေမျိုးလှေပေါ်မှာ ပိတ်မိအောင် လုပ်နိုင်မယ်လို့ ထင်ထားတာ ဒါပေမဲ့ သူနဲ့အတူ ချီထိန်းချုပ်ခြင်းနယ်ပယ်က ပညာရှင် တစ်ဒါဇင်ကျော်လုံး စစ်သူကြီးဖန်ရဲ့ လက်အောက်ငယ်သား လေပြေ တိမ်တိုက် ဓားသမား ရဲ့ လက်ချက်နဲ့ မီးကျွမ်းနေတဲ့ အလောင်းတွေ ဖြစ်သွားတာလေ”
ဟု အစောင့်က ပြောပြသည်။ ထို့နောက် သူက အားကျစွာဖြင့်
“သူသုံးလိုက်တဲ့ တိုက်ကွက်က စစ်သူကြီးဖန်ရဲ့ ခရမ်းရောင်လျှပ်စီးလက်ဝါးနဲ့ တော်တော်တူတာပဲ အစွမ်းကတော့ တကယ် ကြောက်စရာကောင်းတယ်”
ဟု ဆိုသည်။
“ဘာ... “
လုံတုအင်ပါယာမှ ပညာရှိအုပ်စုမှာ ထိတ်လန့်သွားပြီး မျက်နှာများ ပြာနှမ်းကုန်ကြသည်။ သူတို့၏ ခြေထောက်များမှာ တုန်ယင်လာပြီး မြေပြင်ပေါ်သို့ ပြိုလဲလုနီးပါး ဖြစ်သွားသည်။
နယ်စားကြီး ရှန်းယွီ သေသွားပြီလား အဲဒီမီးကျွမ်းနေတဲ့ အလောင်းတွေထဲမှာ သူပါနေတာလား ပြီးတော့ ဖန်ချန် ကိုယ်တိုင် တိုက်ခိုက်တာတောင် မဟုတ်ဘဲ... သူ့လက်အောက်ငယ်သားက သတ်လိုက်တာလား။
လုံဟွေ့ရှင်းနှင့် အခြားသူများမှာ အလိုအလျောက် နောက်သို့ ခြေလှမ်းဆုတ်လိုက်ပြီး လုံတုပညာရှိများနှင့် ခပ်ခွာခွာ နေလိုက်ကြသည်။
သူတို့၏ ထူးဆန်းသော မျက်နှာများကို မြင်သောအခါ ရဲရင့်သောဓားစောင့်တပ်သားက မျက်မှောင်ကြုတ်ကာ သူ၏လူများကို အချက်ပြလိုက်သည်။ ထို့နောက် သူက ပြုံးလျက်
“နေပါဦး... ခင်ဗျားတို့က လုံတုကလား”
ဟု မေးလိုက်သည်။
“ဒါ... ဒါက...”
ပညာရှိ၏ မျက်နှာတွင် သွေးစမရှိတော့ပေ။
နျူးကျူးက ကောက်ကျစ်စွာ ရယ်မောလိုက်ပြီး ဝံပုလွေနှင့် ကျားကဲ့သို့ ရဲရင့်သောဓားစောင့်တပ်သားများက ရှေ့သို့ တိုးလာကာ ပညာရှိများကို တစ်ယောက်ပြီးတစ်ယောက် တုပ်နှောင်လိုက်ကြသည်။
အားလုံးကို ဖမ်းဆီးပြီးနောက် နျူးကျူးက
“ကဲ သူတို့ကို စစ်ဆေးဖို့ တပ်စခန်းကို ခေါ်သွားကြ”
ဟု အမိန့်ပေးလိုက်သည်။
ထို့နောက် နျူးကျူး၏ အကြည့်က လုံဟွေ့ရှင်းနှင့် ကျန်သူများထံသို့ ကျရောက်လာသည်။
“ခင်ဗျားတို့ကရော”
“ကျွန်မတို့က ကုဟယ်ကပါ”
“ကျွန်တော်တို့ကတော့ ယီကျိုးကပါ ကျွန်တော်တို့နဲ့ လုံတုနဲ့ ဘာမှမပတ်သက်ပါဘူး သူတို့ အခုလို တိုက်ခိုက်ဖို့ စီစဉ်နေတာကိုလည်း လုံးဝ မသိပါဘူး”
နှစ်ဖက်စလုံးက လုံတုနှင့် ပတ်သက်မှုမရှိကြောင်း အမြန် ငြင်းဆိုကြသည်။
“အော် ဒါဆိုလည်း ခင်ဗျားတို့ သတိထားကြဦးနော်မြို့ထဲမှာ လုံတုမြင်းတပ်က ထွက်ပြေးလွတ်မြောက်နေတဲ့သူတွေ အများကြီး ရှိသေးတယ် ကိုယ့်ကိုယ်ကိုယ် ဘေးကင်းအောင် နေကြပါ သူတစ်ပါးရဲ့ အသုံးချခံဖြစ်ပြီး အင်ပါယာချင်း ကြားမှာ အက်ကြောင်း မပေါ်ပါစေနဲ့”
နျူးကျူးက စိုးရိမ်သယောင်ဖြင့်
“ခင်ဗျားတို့ ကျွန်တော်တို့ တပ်စခန်းမှာ ခဏ လာတည်းမလား အဲဒီမှာက တော်တော် ဘေးကင်းတယ်”
ဟု ပြောလိုက်သည်။
ထိုအုပ်စုမှာ ခေါင်းများကို တရစပ် ခါယမ်းလိုက်ကြသည်။
“မလာပါရစေနဲ့... မလာပါရစေနဲ့...”
“တပ်မှူးကြီးက အထင်ကြီးနေတာပါ၊ ကျွန်မတို့ ဘေးကင်းအောင် နေနိုင်ပါတယ် စိတ်ပူပေးတာ ကျေးဇူးတင်ပါတယ်”
ရဲရင့်သောဓားစောင့်တပ်စခန်းဆိုသည်မှာ ငရဲခန်းကဲ့သို့ပင်။
အဲဒီနား ရောက်သွားသူတိုင်းမှာ အသက်ရှင်လျက် အရေခွံဆုတ်ခံရသလို ခံစားရတတ်သည်။ အခုလို ထိရှလွယ်တဲ့ အချိန်မျိုးမှာ ဘယ်သူကမှ အဲဒီကို မသွားရဲကြပေ။
“အင်းလေ ဒါဆိုလည်း သတိထားကြပေါ့ ပြီးတော့ လုံတုကလူတွေနဲ့ ဆက်ပြီး မပတ်သက်တာ အကောင်းဆုံးပဲ ထွက်ပြေးနေတဲ့သူတွေရဲ့ သတင်းရရင်လည်း တပ်စခန်းကို လာသတင်းပို့ဖို့ မမေ့နဲ့ဦး”
နျူးကျူးက အကြိမ်ကြိမ် မှာကြားပြီးနောက် သူ၏လူများနှင့်အတူ ထွက်ခွာသွားသည်။
သူတို့ မြင်ကွင်းမှ ပျောက်ကွယ်သွားမှသာ လူတိုင်း သက်ပြင်းချနိုင်တော့သည်။ လုံဟွေ့ရှင်း၏ မျက်နှာမှာ တည်ကြည်သွားပြီး
“အဲဒီတပ်မှူး ပြောတာ တကယ်လို့ ထင်သလား ဖန်ချန်ရဲ့ လက်အောက်ငယ်သားက တကယ်ပဲ ချီအမြုတေအဆင့်မှာ ရှိနေတာလား”
ဟု မေးလိုက်သည်။
“ချင်းစုန်းအင်ပါယာက နတ်သမီးရှောင် မြို့တော်ကို ဝင်လာတုန်းက... သူမရဲ့ လက်အောက်က ချီထိန်းချုပ်ခြင်းနယ်ပယ်က ဝံပုလွေတပ်သားတစ်ယောက်ဟာ လက်ဝါးတစ်ချက်တည်းနဲ့ မီးကျွမ်းနေတဲ့ အလောင်း ဖြစ်သွားတယ်လို့ ကျွန်တော် ကြားဖူးတယ်...”
ဟု ယီကျိုးမှ ပညာရှိတစ်ဦးက တိုးတိုးလေး ပြောလိုက်သည်။
အချို့သော ပညာရှိများမှာ ချီစုဆောင်းခြင်းနယ်ပယ် တွင် ရှိနေကြသော်လည်း လက်ဝါးတစ်ချက်တည်းဖြင့် လူတစ်ဦးကို မီးကျွမ်းသွားအောင် လုပ်နိုင်သည်ဆိုသည်ကို သူတို့ နားမလည်နိုင်ကြပေ။
သို့သော် ယခုမူ သူတို့ မယုံကြည်ဘဲ မနေနိုင်တော့ပေ။
ဖန်ချန်၏ အစွမ်းမှာ သူတို့ စိတ်ကူးထားသည်ထက် များစွာ ကျော်လွန်နေပြီ ဖြစ်သည်။
ရုတ်တရက် လုံဟွေ့ရှင်းက သံသယဖြင့် မျက်မှောင်ကြုတ်လိုက်သည်။
“တကယ်လို့ အဲဒါ အမှန်ဆိုရင် ဘာလို့ မဟာရှဟာ ဒီနှစ်တွေမှာ ချင်းစုန်းရဲ့ အနိုင်ကျင့်တာကို ဒီလောက်အထိ ခံနေခဲ့တာလဲ”
“ဖြစ်နိုင်တာကတော့ သူတို့က သူတို့ရဲ့ အစွမ်းကို ဖုံးကွယ်ပြီး အားနည်းသယောင် ဟန်ဆောင်နေတာလား အခု လုံတုနဲ့ ဖြစ်သလိုမျိုးပေါ့ မဟာရှကို လျှော့တွက်မိလို့ သူတို့ အကြီးအကျယ် ရှုံးနိမ့်သွားရတာပဲ”
နယ်စားကြီး ရှန်းယွီပင် သေဆုံးသွားခဲ့ရပြီး လုံတု၏ ကျူးကျော်မှုမှာ ရယ်စရာတစ်ခု ဖြစ်သွားခဲ့သည်။
လုံတု ရှုံးနိမ့်သွားခြင်းကြောင့် အကြီးအကျယ် ထိခိုက်နစ်နာမှုများ ဖြစ်လာမည်မှာ မြေကြီးလက်ခတ်မလွဲပေ။
ဒါဟာ တကယ်ကို မယုံနိုင်စရာပဲ
ရောက်ရှိနေသူများမှာ နောင်တအနည်းငယ် ရမိသလို တစ်ချိန်တည်းမှာပင် ပို၍ သတိကြီးလာကြသည်။
ထိုဖြစ်ရပ် ပြီးဆုံးသွားလျှင် သူတို့၏ အင်ပါယာများထံ သတင်းပို့ကာ သတိပေးရန် စီစဉ်ကြတော့သည်။
တစ်နာရီအကြာတွင် မြို့တံခါး လေးခုစလုံး၌ ချထားသော စစ်သည်အင်အားမှာ တိုးလာပြီး အခြေအနေမှာ နောက်ဆုံးတွင် တည်ငြိမ်သွားတော့သည်။
၎င်းကို မြင်သောအခါ ရွှီဂီနှင့် အခြားသူများမှာ စစ်မြေပြင်မှ တိတ်တဆိတ် ထွက်ခွာသွားကြသည်။
သူတို့အရှင်၏ အမိန့်မှာ ရှင်းလင်းပါသည် အခြေအနေ တည်ငြိမ်သွားသရွေ့ သူတို့ ထပ်မံ လှုပ်ရှားရန် မလိုတော့ပေ။
“သွေးဝိညာဉ်ဂိုဏ်း က တကယ်ပဲ နောက်ကွယ်ကနေ ကြိုးကိုင်မနေတာလား”
လေထဲတွင် ဖန်ချန်၏ မျက်မှောင်များ အနည်းငယ် တွန့်သွားသည်။ သူ နေရာအနှံ့ ရှာဖွေခဲ့သော်လည်း သွေးဝိညာဉ်ဂိုဏ်းမှ ကျင့်ကြံသူများ၏ အရိပ်အယောင်ကို မတွေ့ရပေ။
အကယ်၍ ထိုသို့ဆိုလျှင် လုံတု၏ ရုတ်တရက် တိုက်ခိုက်မှုမှာ လုံတုအင်ပါယာကို တွန်းအားပေး ထောက်ပံ့နေသော အခြား အင်အားစုများ၏ လက်ချက် ဖြစ်နိုင်ပေသည်။
“ကျိုးရှို့ရဲ့ အထောက်အထားက အဓိက အချက်ပဲ။”