အခန်း (၁၀၃-၁၀၄)
Vol. 11 Ch. 103-104
အခန်း ၁၀၃ - ဖန်ချန် မင်းက တကယ်ကို ရက်ရောတာပဲ
"မင်းရဲ့ ပထမဆုံး မသေမျိုးသွေးကြောကို စုစည်းနိုင်ဖို့ ဘယ်လောက်ကြာခဲ့လဲ"
ဖန်ချန်က လီတောက်ယဲ့ကို ရုတ်တရက် မေးလိုက်ရာ လီတောက်ယဲ့မှာ ခေတ္တမျှ ကြောင်သွားသည်။
ဖန်ချန်က သူ့ကို မေးနေမှန်း သိလိုက်သောအခါ သူ၏မျက်နှာတွင် တွန့်ဆုတ်မှုများ ပေါ်လာပြီး ခဏအကြာတွင် တိုးတိုးလေး ဖြေလိုက်သည်။
"တစ်နှစ်ထက် နည်းနည်း ပိုကြာမယ် ထင်တယ်ဗျ... ငါလည်း သေသေချာချာ မမှတ်မိတော့ဘူး"
တစ်နှစ်ထက် နည်းနည်း ပိုကြာတယ် ဟုတ်လား ဖန်ချန် အနည်းငယ် အံ့အားသင့်သွားသည်။
လီတောက်ယဲ့မှာ လမ်းဘေးမှ ကျင့်ကြံသူ မဟုတ်ပေ။
သူ၏ဖခင်မှာ ရှစ်ထောင့်ဗေဒင်ဂိုဏ်း ၏ ဂိုဏ်းချုပ်ဖြစ်သောကြောင့် သူသည် ငယ်စဉ်ကတည်းက အားကောင်းသော မိသားစုနှင့် ဂိုဏ်း၏ ထောက်ပံ့မှုများကို ရရှိခဲ့ပြီး အဖိုးတန် ရင်းမြစ်များစွာကိုလည်း အသုံးပြုနိုင်ခဲ့မှာ သေချာသည်။
ထိုသို့သော အခြေအနေမျိုးမှာတောင် သူ၏ ပထမဆုံး မသေမျိုးသွေးကြောကို စုစည်းရန် တစ်နှစ်ကျော် ကြာခဲ့သည်ဆိုလျှင် ဖန်ချန် အံ့သြသွားသည်မှာ မဆန်းပေ။
ဖန်ချန်၏ အတွေးကို ဖတ်မိသကဲ့သို့ လီတောက်ယဲ့က
"ဖန်ချန် မင်းတို့ မိသားစုက ထင်သလောက် မရိုးရှင်းဘူးလို့ ငါ ထင်တယ်"
ဟု ပြောလိုက်သည်။
ဖန်ချန်၏ အကြည့်က ဝေဝါးသွားသည်။
"ဘာကို ဆိုလိုတာလဲ"
"မင်း ကြည့်လေ မင်းရဲ့ ကျင့်ကြံခြင်းက မင်းအသက်အရွယ်နဲ့ဆိုရင် တကယ့်ကို လွန်လွန်းနေပြီမီးတောက်အင်ပါယာမှာတောင် ထိပ်တန်းပါရမီရှင်လို့ သတ်မှတ်လို့ ရတယ် ပြီးတော့ မင်းရဲ့ အဘိုးက ပိုပြီးတော့တောင် မယုံနိုင်စရာ ကောင်းသေးတယ်၊ တစ်ရက်တည်းနဲ့ မသေမျိုးသွေးကြောကို စုစည်းနိုင်တာလေ..."
သူက အသက်ပြင်းပြင်း တစ်ချက်ရှူလိုက်ပြီးမှ ဆက်ပြောသည်။
"သူက အရင်က ကျင့်ကြံခြင်းနည်းလမ်းတွေနဲ့ တစ်ခါမှ မထိတွေ့ဖူးဘူး အခု ခရမ်းရောင် ချီကျမ်းကို ဖတ်ကြည့်ရုံနဲ့တင် သူ့ရဲ့ ကိုယ်ပိုင်နားလည်မှုနဲ့ ဒီလို ရလဒ်မျိုး ရအောင် လုပ်နိုင်ခဲ့တာ ပြောစမ်းပါဦး၊ မင်းတို့ ဖန်မိသားစုရဲ့ သွေးမျိုးဆက်က ရိုးရှင်းနိုင်ပါ့မလား မင်း တို့ ဖန်မိသားစုဟာ အတိတ်က ကျရှုံးသွားခဲ့တဲ့ ကျင့်ကြံသူ မျိုးနွယ်စုကြီးတစ်ခုနဲ့ ဆက်စပ်နေပြီး လူတွေက ဒီလို ဆိတ်သုဉ်းတဲ့နယ်မြေထဲကို ရောက်လာခဲ့တာ ဖြစ်မယ်လို့ ငါ သံသယဖြစ်မိတယ်"
ဖန်ချန်က ပြုံးလျက် ခေါင်းခါလိုက်သည်။
"ထားလိုက်ပါတော့ အဲဒါတွေက အခု ငါတို့ ဖန်မိသားစုနဲ့ ဘာမှမဆိုင်တော့ပါဘူး အချိန်တွေ အများကြီး ကုန်လွန်ခဲ့ပြီဆိုတော့ ငါတို့ရဲ့ မျိုးရိုးစဉ်ဆက်ကို ပြန်လိုက်ဖို့ဆိုတာ ခက်ခဲပါတယ်"
သူသည် လီတောက်ယဲ့၏ စကားကို အလေးအနက် မထားပေ။
မကြာမီမှာပင် ဖန်ချန်ဟိုင်နှင့် အခြားသူများ ဖန်ချန်အနားသို့ ချဉ်းကပ်လာကြသည်။
"ချန်အာ... အဘိုး အောင်မြင်သွားပြီလား"
ဟု ဖန်ချန်ဟိုင်က တိုးတိုးလေး မေးသည်။
ဖန်ချန်က ခေါင်းငြိမ့်ပြကာ
"ဟုတ်ကဲ့၊ အဘိုးက သူ့ရဲ့ ပထမဆုံး မသေမျိုးသွေးကြောကို စုစည်းနိုင်ခဲ့ပြီး တရားဝင် ကျင့်ကြံသူ တစ်ယောက် ဖြစ်သွားပါပြီ အခုလောလောဆယ်မှာတော့ အင်အားအများကြီး မရှိသေးပေမဲ့ အဘိုးရဲ့ အသက်ကိုတော့ နည်းနည်း ပိုရှည်စေလိမ့်မယ်"
ဟု ဖြေလိုက်သည်။
ဖန်မိသားစုဝင်များမှာ အလွန် ဝမ်းသာသွားကြသည်။
အဘိုးအို၏ အသက်ကို အနည်းငယ်မျှ ပိုရှည်စေနိုင်ရုံနှင့်ပင် ၎င်းမှာ ဖန်အိမ်တော်အတွက် ကြီးမားသော ဆုလာဘ်တစ်ခု ဖြစ်သည်
ဘေးနားတွင် ဖန်ကျစ်ရွှယ် မှာ အနည်းငယ် စိတ်ပျက်နေပုံရသည်။
"အစ်ကိုကြီး... ညီမလေးမှာ ကျင့်ကြံခြင်း ပါရမီ မရှိဘူးလား"
သူမက မေးလိုက်သည်။
"ညီမလေး အဘိုးနဲ့ ဦးလေးတို့နဲ့အတူ တစ်နေ့လုံး လေ့ကျင့်ပေမဲ့ ဘာမှ မခံစားရဘူး"
ဖန်ချန်က ရယ်မောလိုက်သည်။
"မသေမျိုးသွေးကြောကို စုစည်းတယ်ဆိုတာ လွယ်ကူတဲ့အလုပ် မဟုတ်ဘူး"
ဟု သူက ထောက်ပြလိုက်သည်။
"ဒီနေ့ ဖြစ်သွားတာက တကယ့်ကို ရှားပါးတဲ့ ကိစ္စပါ မီးတောက် အင်ပါယာက ရှစ်ထောင့်ဗေဒင် ဂိုဏ်းရဲ့ တပည့်ဖြစ်တဲ့ လီတောက်ယဲ့တောင်မှ အဲဒီအဆင့်ကို ရောက်ဖို့ ရတနာများစွာ သုံးခဲ့ရတာတောင် သူ့ရဲ့ ပထမဆုံး မသေမျိုးသွေးကြောကို စုစည်းဖို့ တစ်နှစ်နီးပါး အချိန်ယူခဲ့ရတာ။ အလျင်စလို လုပ်စရာ မလိုပါဘူး"
၎င်းကို ကြားသောအခါ ဖန်ချန်ဟိုင်နှင့် ဖန်ချန်ယူတို့က ခေါင်းငြိမ့်လိုက်ကြသည်။
၎င်းမှာ အဓိပ္ပာယ်ရှိပေသည်။ တကယ်လို့ ကျင့်ကြံခြင်းက ကိုယ်ခံပညာ လေ့ကျင့်ရတာထက် ပိုလွယ်ကူနေလျှင် ကမ္ဘာပေါ်ရှိ လူတိုင်းမှာ ကျင့်ကြံသူများ ဖြစ်နေကြလိမ့်မည်။
ဖန်ချန်၏ မိခင်မှာမူ ကျင့်ကြံခြင်းတွင် အလွန်အမင်း စိတ်မပါသော်လည်း သူမ၏ သမီးလေး စိတ်ပျက်နေသည်ကို မြင်သောအခါ ဖန်ကျစ်ရွယ် ၏ ခေါင်းကို ချစ်ခင်စွာ ပွတ်သပ်ပေးလိုက်သည်။
"စိတ်မပူပါနဲ့ သမီးလေးရဲ့ သမီးရဲ့ အစ်ကိုကြီးကလည်း ကျင့်ကြံသူ ဖြစ်နေပြီ အဘိုးလည်း ဖြစ်သွားပြီပဲ နောင်ကျရင် သမီးလည်း သူတို့နဲ့အတူ သေချာပေါက် ကျင့်ကြံသူ ဖြစ်လာမှာပါ"
ဖန်ကျစ်ရွှယ် မှာ အနည်းငယ် စိတ်မကောင်း ဖြစ်နေသေးသော်လည်း အားတက်သရော ခေါင်းငြိမ့်လိုက်သည်။
"ဟုတ်ကဲ့ပါ"
သူမ၏ မျက်လုံးများထဲတွင် ပြင်းပြသော စိတ်ဓာတ်များ လက်လာသည်။
ထိုအချိန်တွင် ဖန်ကျန့်ထျန်း၏ ပတ်ဝန်းကျင်ရှိ ဝိညာဉ်စွမ်းအင်များမှာ ငြိမ်သက်သွားသည်။ သူ မျက်လုံးဖွင့်လိုက်သည်နှင့် တစ်ပြိုင်နက် လူတိုင်းမှာ သူ၏ မျက်လုံးများအတွင်းမှ တောက်ပသော အလင်းတန်းကို မြင်လိုက်ရသည်။
ဖန်ကျန့်ထျန်းသည် သူ၏ လက်ဖဝါးကို ငုံ့ကြည့်ရင်း ပြုံးလိုက်သည်။
"စိတ်ဝင်စားစရာပဲ... ဒါက ဝိညာဉ်စွမ်းအင် ဆိုတာလား ဒါဟာ ကိုယ်ခံပညာရှင်တွေရဲ့ အတွင်းအားထက် အများကြီး ပိုပြီး အားကောင်းတာပဲ အထူးအာနိသင်တွေလည်း ရှိပုံရတယ် ငါ့ရဲ့ ခန္ဓာကိုယ်ထဲက ဒဏ်ရာဟောင်းတွေကို ဆေးကြောပေးပြီး ခန္ဓာကိုယ်ကို အားဖြည့်ပေးနေတယ် မကြာခင်မှာ အဲဒီဒဏ်ရာတွေ အကုန် ပျောက်ကင်းသွားတော့မှာပဲ"
"အဘိုး... ခရမ်းရောင်ချီကျမ်းထဲမှာ နားမလည်တာမျိုး ရှိသေးလား"
ဟု ဖန်ချန်က မေးလိုက်သည်။
"အဆင်ပြေပါတယ်"
ဖန်ကျန့်ထျန်းက ခပ်ဖျော့ဖျော့ ခေါင်းငြိမ့်လိုက်သည်။
"ရှင်းပြချက်တွေက ရှင်းလင်းပြီးသားပါ၊ နားလည်ရခက်တာမျိုး ဘာမှ မရှိပါဘူး"
အားလုံးမှာ သက်ပြင်းမချဘဲ မနေနိုင်တော့ပေ။ အဘိုးအို၏ နားလည်နိုင်စွမ်းမှာ အမှန်တကယ်ပင် ထူးကဲလှသည်။ ရှုပ်ထွေးလှသော ကျင့်ကြံခြင်းလမ်းစဉ်တွင် သူသည် အရာအားလုံးကို အလွယ်တကူ ဆုပ်ကိုင်နိုင်ခဲ့သည်။
"မင်း လုပ်စရာရှိတာ သွားလုပ်ပါ"
ဖန်ကျန့်ထျန်းက ဖန်ချန်ကို ကြည့်ရင်း ဂုဏ်ယူစွာ ပြောလိုက်သည်။
"သူတို့ရဲ့ ကျင့်ကြံခြင်းကို ငါပဲ ကူညီပေးလိုက်မယ်"
ဖန်ချန်ဟိုင်က တွန့်ဆုတ်နေသည်။
"အဖေ... ကျွန်တော်က အစိုးရ တာဝန်တွေ ထမ်းဆောင်ဖို့ ရှိသေးတယ်၊ အဲဒါက..."
"တာဝန်တွေကို ဘာလို့ ဂရုစိုက်နေဦးမှာလဲ မင်းရဲ့ တာဝန် တွေက ကျင့်ကြံခြင်းထက် ပိုအရေးကြီးလို့လား မင်းသာ မသေမျိုးလမ်းစဉ်ထဲကို ဝင်ရောက်နိုင်ခဲ့ရင် မင်းရရှိမယ့် အကျိုးကျေးဇူးတွေက မင်းရဲ့ စိတ်ကူးထက် အများကြီး သာလွန်တယ် ဧကရာဇ်ဆီ သွားပြီး အကြောင်းကြားလိုက် မင်း အခုချက်ချင်း ရာထူးကနေ နုတ်ထွက်လိုက်တော့"
ဟု ဖန်ကျန့်ထျန်းက ပေါ့ပေါ့ပါးပါး ပြောလိုက်သည်။
ရာထူးကနေ နုတ်ထွက်ရမယ်
အားလုံးမှာ အံ့အားသင့်သွားကြသည်။
ဖန်ချန်၏ မိခင်မှာမူ ဝမ်းသာသွားပြီး ဖန်ချန်ဟိုင်ကို ကြည့်လိုက်သည်။
"အဘိုးအိုက ပြောမှတော့ ရှင် သူ့စကားကို နားထောင်သင့်တယ် ထင်တယ်"
"အဖေ... အဘိုးပြောတာ မှန်ပါတယ် အစိုးရ ရာထူး ရှိသည်ဖြစ်စေ မရှိသည်ဖြစ်စေ အခုတော့ အရေးမကြီးတော့ပါဘူး မဟာရှရဲ့ လက်ရှိ အခြေအနေဟာ ငါတို့ ဖန်အိမ်တော်ကို ထိခိုက်စေနိုင်မှာ မဟုတ်တော့ပါဘူး"
ဟု ဖန်ချန်က ပြောသည်။
ဖန်ချန်ဟိုင်မှာ အာဏာကို မက်မောသူ တစ်ယောက်မဟုတ်သောကြောင့် ခေါင်းငြိမ့်လိုက်သည်။
"ကောင်းပါပြီ ငါ အခုချက်ချင်းပဲ နုတ်ထွက်စာ တင်လိုက်မယ်"
"ဟုတ်ပြီ... ဒီမှာတော့ အဘိုးအို ဦးဆောင်နေမှတော့ ငါ လုပ်စရာ ဘာမှမရှိတော့ဘူး ငါ သီလရှင်လေးဆီ သွားပြီး စကားသွားပြောဦးမယ်"
လီတောက်ယဲ့က ရုတ်တရက် အော်ဟစ်ကာ ထွက်ပြေးရန် ပြင်လိုက်သည်။
ဖန်ချန်က ရယ်မောလျက် သူ၏ စိတ်ကူးကို ရပ်တန့်လိုက်သည်။
"အော်... ဒါနဲ့... သီလရှင် ချင်းဟဲက မီးတောက်အင်ပါယာကို ပြန်သွားပြီ"
"ဘာ"
လီတောက်ယဲ့ မယုံနိုင်ပေ။
"သူက မီးတောက်အင်ပါယာကို ပြန်သွားတာလား သူက ခင်ဗျားကို သွေးဝိညာဉ်ဂိုဏ်းကို ရင်ဆိုင်ဖို့ ကူညီပေးမယ်လို့ ပြောထားတာ မဟုတ်လား"
"အဲဒါကြောင့်ပဲ သူ ခဏပြန်သွားတာပေါ့ ငါ မဟာရှမှာရှိတဲ့ သွေးဝိညာဉ်ဂိုဏ်းက ကျင့်ကြံသူ အများစုကို ရှင်းပစ်လိုက်ပြီ သူက နောက်ကျရင် အခြေခံအုတ်မြစ်တည်ဆောက်ခြင်းနယ်ပယ် ပညာရှင်တွေ ရောက်လာမှာကို စိုးရိမ်နေတာ၊ အဲဒါကြောင့် သူ့ဆရာဆီကနေ အကူအညီတောင်းဖို့ သွားတာ"
ဟု ဖန်ချန်က ရှင်းပြသည်။
လီတောက်ယဲ့၏ မျက်လုံးများထဲတွင် နားလည်သွားသည့် အရိပ်အယောင်များ ပေါ်လာပြီးနောက် ဝမ်းနည်းမှုများ ခံစားလိုက်ရသည်။
"ဖန်ချန် မင်း ဘယ်လိုများ ဒီလောက် ဝေဝါးနေရတာလဲ ဘာလို့ ငါ့ ကို သူမနဲ့အတူ မီးတောက်အင်ပါယာကို လိုက်သွားခွင့် မပေးတာလဲ သူမရဲ့ ဉာဏ်ရည်နဲ့ဆိုရင် ကျင့်ကြံသူတွေ နေနေသာသာကောက်ကျစ်တဲ့ သာမန်လူတွေနဲ့ တွေ့ရင်တောင် အန္တရာယ်ရှိနိုင်တယ်"
"ထျဲ့မက သူမဘေးမှာ ရှိနေတာပဲ၊ ဘာမှ မဖြစ်ပါဘူး အနည်းဆုံးတော့ သူ မသေမချင်း သူမ အန္တရာယ် မရှိပါဘူး"
ဟု ဖန်ချန်က အေးအေးဆေးဆေး ပြောလိုက်သည်။
"ထျဲ့မလား"
လီတောက်ယဲ့သည် ထျဲ့မ၏ အမြဲတမ်း တည်တင်းနေသော မျက်နှာကို သတိရသွားပြီး သက်ပြင်းချလိုက်သည်။
"အဲဒီလူက တကယ့်ကို ပါးနပ်တဲ့လူပဲ။ သူရှိနေရင်တော့ သူမ ဘေးကင်းမှာပါ"
"ဘာပဲဖြစ်ဖြစ်၊ သူမက ခရမ်းရောင်လျှပ်စီးအဆောင်တွေ အများကြီး သယ်သွားပါတယ်ကျင့်ကြံသူတွေနဲ့ တွေ့ရင်တောင် သူမ ကိုင်တွယ်နိုင်ပါလိမ့်မယ်"
"ခရမ်းရောင်လျှပ်စီးအဆောင်"
ခရမ်းရောင်လျှပ်စီးအဆောင် ဆိုသည့် စကားလုံးကြောင့် လီတောက်ယဲ့ တစ်ခုခုကို သတိရသွားပြီး အလျင်အမြန် ပြောလိုက်သည်။
"ဒါနဲ့ ဖန်ချန်... ငါ တစ်ခါက မင်းအတွက် ပစ္စည်းတွေ ဝယ်ပေးတုန်းက ဝိညာဉ်ကျောက်တုံးတွေ အများကြီး ကုန်ခဲ့တာနော် ငါ့ကိုလည်း ကာကွယ်ဖို့အတွက် အဆောင်အချို့ ပေးသင့်တယ် မဟုတ်လား"
ဖန်ချန်က ပြုံးလိုက်သည်။
သူသည် လီတောက်ယဲ့ကို ခရမ်းရောင်လျှပ်စီးအဆောင်အချို့ ပေးရန် စီစဉ်ထားပြီးသား ဖြစ်သည်။
သူသည် အဆောင်ပုံကြီးကို ထုတ်ယူကာ လီတောက်ယဲ့ကို ပေးလိုက်သည်။ စုစုပေါင်း ၅၀ ရှိသည်။
လီတောက်ယဲ့သည် ထိုအဆောင်ပုံကြီးကို ကြည့်လိုက်သောအခါ သူ၏ မျက်လုံးများမှာ အပြင်သို့ ပြူးထွက်မတတ် ဖြစ်သွားသည်။
"ဒါ... ဒါ... ဘယ်လိုလုပ် ဒီလောက် အများကြီး ရှိနေရတာလဲ"
သူသည် တုန်တုန်ရင်ရင်ဖြင့် အဆောင်များကို လက်ခံလိုက်ပြီး ဖန်ချန်ကို မယုံကြည်နိုင်စွာ ကြည့်လိုက်သည်။
ခရမ်းရောင်လျှပ်စီးအဆောင်များသည် အလွန် တန်ဖိုးရှိလှသည်။ အဆင့်နိမ့် ဝိညာဉ်ကျောက်တုံး ၅ တုံး သို့မဟုတ် ၆ တုံးခန့် တစ်ခုလျှင် ပေးရတတ်သည်။
အရည်အသွေး ပိုမြင့်လျှင် ဈေးနှုန်းမှာ ပို၍ မြင့်မားသည်။ ဘာပဲဖြစ်ဖြစ် ဒါတွေဟာ အရေးကြီးသော အချိန်တွင် တိုက်ပွဲ၏ အခြေအနေကို ပြောင်းလဲပေးနိုင်သော ဝှက်ဖဲများ ဖြစ်သည်။
တကယ်လို့ ချီသန့်စင်ခြင်းနယ်ပယ်ရှိ ကျင့်ကြံသူတစ်ဦးတွင် ထိုအဆောင် များ ရှိနေပါက သူ၏ ဘေးကင်းမှုမှာ အလွန်ပင် စိတ်ချရပေသည်။
ဖန်ချန်က သူ၏ ပုံမှန်အပြုံးဖြင့် ခေါင်းငြိမ့်လိုက်ပြီး
"ဒါက မျှတပါတယ်"
ဟု ဆိုသည်။
လီတောက်ယဲ့မှာ အနည်းငယ် စိတ်လှုပ်ရှားသွားပြီး ၎င်းက ဖန်ချန်နောက်သို့ လိုက်ရန် သူ၏ ဆုံးဖြတ်ချက်ကို ပြန်လည် သုံးသပ်မိစေသည်။ ဒီအရူးနောက်ကို လိုက်ရတာ ငါထင်သလောက် မဆိုးပါဘူးလား..
ရှစ်ထောင့်ဗေဒင်ဂိုဏ်းမှာတောင် ခရမ်းရောင်လျှပ်စီးအဆောင်ကဲ့သို့သော အရာမျိုးကို မထုတ်လုပ်နိုင်ပေ
လီတောက်ယဲ့မှာ အလွန် ကျေးဇူးတင်သွားမိသည်။
"ဖန်ချန်. မင်းက တကယ်ကို ရက်ရောတာပဲ"
ဖန်ချန်က ရယ်မောလိုက်ပြီး မေးလိုက်သည်။
"ဒါနဲ့... မင်း နဂါးတောင်တန်း မှာ ရှိနေတုန်းက အရိုးသန့်စင်ဆေးပြား တွေ ရောင်းတာ တွေ့ခဲ့သေးလား"
လီတောက်ယဲ့က ခေါင်းခါလိုက်သည်။
"အရိုးသန့်စင်ဆေးပြားလား အဲဒါမျိုးက တွေ့ရခဲပါတယ်။ ဘယ်ကျင့်ကြံသူကမှ ဒီလို ဆေးပြားမျိုးကို တကူးတက သန့်စင်မှာ မဟုတ်ဘူး ငါသွားတုန်းကတော့ အဲဒါမျိုး ဘာမှ မတွေ့ခဲ့ပါဘူး..."
"တော်သေးတာပေါ့ ပြီးခဲ့တဲ့ တစ်ခေါက်က အဲဒီမှာရှိတဲ့ အရိုးသန့်စင်ဆေးပြား အကုန်လုံးကို ဝယ်ခဲ့မိလို့"
ဟု ဖန်ချန်က မိမိကိုယ်ကိုယ် တိုးတိုးလေး ပြောလိုက်သည်။
သူသည် ဖန်ချန်ဟိုင်နှင့် ကျန်လူများကို နှုတ်ဆက်လိုက်ပြီးနောက် လာမည့် စစ်ရေးလေ့ကျင့်မှုအတွက် အစောင့်အုပ်စုတစ်စုကို ရွေးချယ်ရန် ထွက်ခွာသွားတော့သည်။
အခန်း ၁၀၄ - နေရာတိုင်းမှာ ဒုက္ခပေးမယ့်သူတွေ
ဖန့်အိမ်တော် တွင် စုစုပေါင်း အစောင့် ခြောက်ဆယ်ကျော် ရှိပြီး သူတို့ကို အဆိုင်းနှစ်ဆိုင်း ခွဲထားသည်။ တစ်ဝက်မှာ နေ့ဘက်ကင်းလှည့်ရန် တာဝန်ယူရပြီး ကျန်တစ်ဝက်မှာ ညဘက်ကင်းလှည့်ရန်ဖြစ်သည်။
သူတို့သည် အသက်အရွယ် အနည်းငယ်ကြီးနေပြီဖြစ်သော်လည်း အငယ်ဆုံးမှာ အသက် ၃၀ ကျော်နှင့် အကြီးဆုံးမှာ ၅၀ ကျော်ဖြစ်သည် သူတို့၏ နောက်ခံမှာမူ အလွန်ပင် ထူးခြားလှသည်။
သူတို့အားလုံးသည် ဖန့်မိသားစု နှင့်အတူ စစ်ပွဲပေါင်းများစွာကို ရင်ပေါင်တန်း တိုက်ခိုက်ခဲ့ကြသည့် ဝါရင့်စစ်သည်ဟောင်းများ ဖြစ်ကြသည်။
သူတို့သည် ဖန့်မိသားစု ၏ နက်နဲသော ကောင်းကင်ကျမ်း ကို လေ့ကျင့်ထားကြပြီး ပျမ်းမျှကျင့်ကြံခြင်းအဆင့်မှာ ချီပေါက်ကွဲခြင်းအဆင့် ၏ အစောပိုင်းတွင် ရှိကြသည်။
လေ့ကျင့်ရေးကွင်းအတွင်း အစောင့်အားလုံးသည် ဖန့်ချန် ၏ ရှေ့တွင် ခေါင်းကိုမော့ကာ သေသေသပ်သပ် ရပ်နေကြသည်။
သူတို့၏ မျက်လုံးများတွင် ပြင်းထန်သော တိုက်ပွဲဝင်လိုစိတ်များ ပေါ်လွင်နေသည်။
"မင်းတို့သာ အိပ်မက်ဆိုး မြင်းစီးစစ်သည်တော်တွေနဲ့ ရင်ဆိုင်ရရင် ဘာဖြစ်မယ်လို့ ထင်သလဲ"
ဖန့်ချန် ၏ အသံသည် လေ့ကျင့်ရေးကွင်းအတွင်း ပဲ့တင်ထပ်သွားသည်။ သူ၏ မျက်နှာတွင် အပြုံးတစ်ခု ရှိနေသည်။
ဝါရင့်အစောင့်တစ်ဦးက ရယ်မောရင်း ပြောလိုက်သည်။
"ကျွန်တော်တို့ သေဖို့ပဲ ရှိတာပေါ့ ဒါပေမဲ့ သခင်လေး ကျွန်တော်တို့ သေရရင်တောင် သူတို့ထဲက အနည်းဆုံး အချို့ကိုတော့ အတူခေါ်သွားနိုင်မယ်လို့ ယုံကြည်ပါတယ်"
"ဟဲဟဲ ကျွန်တော်တို့ အရင်တုန်းက အသက်ရှင်ခဲ့ပြီးပြီပဲ အခု ဒီအသက်ကို အိပ်မက်ဆိုး မြင်းစီးစစ်သည်တော်တွေရဲ့ အသက်အချို့နဲ့ လဲနိုင်မယ်ဆိုရင် တကယ်ကို တန်ပါတယ်"
"နှင်းရေခဲ အင်ပါယာက တကယ့်ကို သတ္တိကောင်းလှချည်လား သခင်လေးကို ဖမ်းဖို့ ဘယ်လိုတောင် ကြံစည်ရဲတာလဲ သူတို့ အလိုကျ ဖြစ်ခွင့်မပေးနိုင်ဘူး ကျွန်တော်တို့ဆီမှာ တို့ဖူးတုံးတစ်တုံးပဲ ရှိရင်တောင် အဲဒါနဲ့ သူတို့ကို အားကုန်သုံးပြီး ပစ်ပေါက်ပစ်မယ်"
အစောင့်များသည် တစ်ဦးကိုတစ်ဦး နောက်ပြောင်နေကြပြီး သူတို့၏ အသံများမှာ ပေါ့ပါးသွက်လက်နေကာ စိုးရိမ်ပူပန်မှု အရိပ်အယောင် လုံးဝမရှိပေ။
သူတို့ ရင်ဆိုင်ရတော့မည်မှာ နှင်းရေခဲ အင်ပါယာ၏ အိပ်မက်ဆိုး မြင်းစီးစစ်သည်တော်များ မဟုတ်ဘဲ နာမည်မရှိသော စစ်တပ်တစ်ခုမှ ငါးပိကောင်အချို့ကို ရင်ဆိုင်ရတော့မည့်အတိုင်းပင်။
လီတောက်ယဲ့ မှာ သူ၏ မျက်လုံးများကိုပင် မယုံနိုင်ဖြစ်နေပြီး တစ်ကိုယ်တည်း ရေရွတ်လိုက်သည်။
"သူတို့တွေ ရူးနေတာပဲ... အားလုံး ရူးနေကြတာ"
တကယ်လို့ ထို လူများသာ ကျင့်ကြံသူများ ဖြစ်လာခဲ့လျှင် သူတို့ထက် ကျင့်ကြံခြင်း မြင့်မားသူများကိုပင် အနိုင်ယူနိုင်သော ကြောက်စရာကောင်းသည့် ကျွမ်းကျင်သူများ ဖြစ်လာပေလိမ့်မည်။
ထိုကဲ့သို့သော စိတ်ဓာတ်မျိုးမှာ ကျင့်ကြံသူများကြားတွင်ပင် တွေ့ရခဲလှသည်
"ကောင်းပြီ... မင်းတို့ တိုက်ရမှာကတော့ သေချာတယ်၊ ဒါပေမဲ့ တို့ဖူးတုံးတွေကို သုံးမှာ မဟုတ်ဘူး မင်းတို့က အသုံးမကျတဲ့သူတွေလည်း ဖြစ်လာမှာ မဟုတ်ဘူး"
ဖန့်ချန် က အသာအယာ ပြုံးလိုက်ပြီး ရွှီဂီ ဘက်သို့ လှည့်လိုက်သည်။
"စိန်ကိုယ်ထည် အဆောင် ၊ အမြန်နှုန်းအဆောင် ၊ ခွန်အားအဆောင် နဲ့ ခရမ်းရောင်လျှပ်စီးအဆောင် တွေကို ဝေပေးလိုက်တော့"
"ဟုတ်ကဲ့"
ရွှီဂီ သည် အဆောင်လက်ဖွဲ့များကို အထပ်လိုက် ထုတ်ယူကာ အစောင့်တစ်ဦးချင်းစီကို အမျိုးအစား တစ်ခုလျှင် ဆယ်ခုစီ လိုက်လံဝေငှပေးလိုက်သည်။
လီတောက်ယဲ့ သည် ဖြစ်ပျက်နေသည်ကို မျက်လုံးပြူးကာ စိုက်ကြည့်နေပြီးမှ ဖန့်ချန် ဘက်သို့ လှည့်လိုက်သည်။
"ဖန်ချန် ကျင့်ကြံခြင်းလောကမှာ ဒီအဆောင်လက်ဖွဲ့တွေရဲ့ တန်ဖိုးက ဘယ်လောက်ရှိလဲဆိုတာ မင်း သိရဲ့လား"
ဟု လီတောက်ယဲ့ က မယုံနိုင်စွာ မေးလိုက်သည်။
ဖန့်ချန် က ရယ်မောလိုက်သည်။
"ဟက် ဒါတွေကို တိုက်ပွဲမှာ သုံးမှသာ အသုံးဝင်မှာပါ အသုံးမပြုရင်တော့ ဒါတွေက စက္ကူစုတ်တွေပါပဲ"
လီတောက်ယဲ့ အသက်ကို ပြင်းပြင်းရှူသွင်းလိုက်သည်။
"ရှူးးး! စက္ကူစုတ် ဟုတ်လား အစ်ကိုကြီး... ဒါတွေက စက္ကူစုတ် လုံးဝမဟုတ်ဘူး ဒါတွေကို ဝိညာဉ်ကျောက်တုံး ဘယ်လောက်နဲ့ ရောင်းလို့ရလဲ ခင်ဗျား သိရဲ့လား အဆင့်(၈) အင်ပါယာလေးကို ကိုင်တွယ်ဖို့ ဒီလောက်အထိ အဖိုးအခ ပေးစရာ မလိုပါဘူးကျွငါ မီးတောက်အင်ပါယာ ရဲ့ နာမည်ကို သုံးပြီး သူတို့ကို ဖိနှိပ်ပေးမယ်လေ ငါ့ကို အဲဒီအဆောင်တွေရဲ့ တစ်ဝက်လောက်ပဲ ပေး..."
ဖန့်ချန် သည် လီတောက်ယဲ့ ၏ အကြံပြုချက်ကို လျစ်လျူရှုလိုက်ပြီး ပြုံးလျက် မေးလိုက်သည်။
"တကယ်လို့ ဝါရင့်စစ်သည် ခြောက်ဆယ်ကျော်က စိန်ကိုယ်ထည် အဆောင်၊ အမြန်နှုန်းအဆောင်၊ ခွန်အားအဆောင် နဲ့ ခရမ်းရောင်လျှပ်စီးအဆောင် တွေကို သုံးမယ်ဆိုရင် စစ်မြေပြင်မှာ သူတို့ ဘယ်လောက်အထိ စွမ်းဆောင်နိုင်မယ်လို့ မင်း ထင်သလဲ"
လီတောက်ယဲ့ မှာ သူ၏စကား အဖတ်မလုပ်ခံရသဖြင့် အနည်းငယ် စိတ်ပျက်သွားသော်လည်း အလေးအနက် ပြန်လည်စဉ်းစားပေးလိုက်သည်။ ထို့နောက် သူက ဆိုသည်။
"အကယ်၍ သူတို့ရဲ့ ရန်သူက ချီသန့်စင်ခြင်းအဆင့် အဆင့် ၈ ရှိတဲ့ ကျင့်ကြံသူဆိုရင် သူဟာ ဘက်ပေါင်းစုံကနေ ဖိနှိပ်ခံရမှာပဲ သူ့ဆီကို ကျဆင်းလာမယ့် ခရမ်းရောင်လျှပ်စီးအဆောင် ခြောက်ဆယ်ကို ခုခံကာကွယ်ဖို့ဆိုတာ မှော်လက်နက် မရှိဘဲနဲ့တော့ လုံးဝ မဖြစ်နိုင်ဘူး။ အဆင့် ၉ ရှိတဲ့ ကျင့်ကြံသူဆိုရင်တောင် သူ နောက်ဆုတ်သွားရလိမ့်မယ်"
"ဒါပေမဲ့ ရန်သူက အဆောင်လက်ဖွဲ့တွေရဲ့ အာနိသင် ကုန်သွားတဲ့အထိ တောင့်ခံနိုင်မယ်ဆိုရင်တော့ သူက အခြေအနေကို ပြောင်းပြန်လှန်ပြီး တစ်ဖက်သတ် သတ်ဖြတ်နိုင်လိမ့်မယ် ဒါပေမဲ့ မင်း ရင်ဆိုင်နေရတာက အိပ်မက်ဆိုး မြင်းစီးစစ်သည်တော်တွေလေ သူတို့က ချီထိန်းချုပ်ခြင်းအဆင့် အထွတ်အထိပ်က သိုင်းသမား တစ်ရာပဲ ရှိတာ သူတို့က ချီသန့်စင်ခြင်းအဆင့် အဆင့် ၅ ကျင့်ကြံသူကိုတောင် မယှဉ်နိုင်ဘူး"
ရုတ်တရက် လီတောက်ယဲ့ ၏ မျက်နှာ တောင့်ခဲသွားသည်။
သူသည် ရှေ့မှ အစောင့်အုပ်စုကို အလေးအနက် ပြန်လည်ကြည့်ရှုလိုက်ရာ သူ၏မျက်လုံးထဲတွင် အံ့အားသင့်မှုများ ဖြတ်ပြေးသွားသည်။
သာမန်သိုင်းသမားများ အဆောင်လက်ဖွဲ့အမျိုးမျိုး တပ်ဆင်ထားလျှင် စုပေါင်းလုပ်ဆောင်သောအခါ ချီသန့်စင်ခြင်းအဆင့် အဆင့် ၈ ကျင့်ကြံသူကိုပင် ယှဉ်နိုင်စွမ်း ရှိနေသည် မဟုတ်ပါလား သူတို့သည် အဆင့် ၉ ကျင့်ကြံသူကိုပင် ရင်ဆိုင်နိုင်သည်။
သာမန်လူသားတွေကို ဒီလောက်များပြားတဲ့ အဆောင်လက်ဖွဲ့တွေ ပေးလိမ့်မယ်လို့ သူ မမျှော်လင့်ထားခဲ့သဖြင့် ထိုအချက်ကို သူ အရင်က မတွေးမိခဲ့ခြင်းဖြစ်သည်။
ဖန့်ချန် သည် ချီသန့်စင်ခြင်းအဆင့် ကျင့်ကြံသူများကို ခုခံနိုင်သည့် အထူးအဖွဲ့တစ်ခုကို ဖွဲ့စည်းလိုက်သကဲ့သို့ပင်။
အကယ်၍ ဖန့်ချန် ထံတွင် အဆောင်လက်ဖွဲ့များ အမြဲတစေ ရှိနေပြီး ထိုအဖွဲ့ကို ထပ်မံ ချဲ့ထွင်လိုက်မည်ဆိုလျှင်...
"ဘုရားရေ အခြေခံတည်ဆောက်အဆင့် က လူနဲ့ မဆုံသရွေ့ သူက ဒီအဆောင်လက်ဖွဲ့တွေကို သုံးပြီး ချီသန့်စင်ခြင်းအဆင့် ကျင့်ကြံသူတစ်ယောက်ကို ရိုက်သတ်လို့ရတာပဲ အဆင့် ၁၂ ကလူ ဖြစ်နေရင်တောင် ဂရုစိုက်စရာ မလိုတော့ဘူး..."
လီတောက်ယဲ့ က အသက်ကို အကြိမ်ကြိမ် ရှူသွင်းလိုက်မိသည်။ သူ ဖန့်ချန် ကို ကြည့်သည့် အကြည့်များ ပြောင်းလဲသွားသည်။
ဖန့်ချန် သည် မဟာရှ လျှို့ဝှက်အစောင့်တပ်ဖွဲ့ကိုပါ ထိန်းချုပ်ထားသည်ကို သူ မသိသေးပေ။
အကယ်၍ သူတို့သာ ပူးပေါင်းလိုက်လျှင် ချီသန့်စင်ခြင်းအဆင့် အဆင့် ၁၂ ကျင့်ကြံသူကို တိုက်ခိုက်ရန်မှာ ပြဿနာ မဟုတ်တော့ပေ
ဒါဟာ တကယ့်ကို အရေအတွက်နဲ့ အရည်အသွေးကို ဖိနှိပ်ခြင်း ပင် ခရမ်းရောင်လျှပ်စီးအဆောင် အနည်းငယ်နှင့် တိုက်ခိုက်ခြင်းမှာ အနည်းငယ် ကြမ်းတမ်းသော်လည်း ကျင့်ကြံသူများမှာ သန်မာလျှင် ဆယ်ခုခန့်ကိုတော့ လျစ်လျူရှုနိုင်ကြသည်။
သို့သော် လျှပ်စီးအဆောင် တစ်ရာဆိုလျှင်မူအခွင့်အရေး မရှိတော့ပေ တကယ်လို့ ပထမတစ်ကျော့နှင့် မလုံလောက်လျှင် ဒုတိယတစ်ကျော့၊ မရသေးလျှင် တတိယတစ်ကျော့...
မည်သူမျှ တောင့်ခံနိုင်လိမ့်မည် မဟုတ်ပေ ဖန့်ချန် ကိုယ်တိုင်ပင်လျှင် ခရမ်းရောင်လျှပ်စီးအဆောင် တစ်ကျော့စာ ပစ်ခတ်မှုကို တောင့်ခံနိုင်ရန် ယုံကြည်ချက် မရှိပေ။
"သခင်လေး... ဒါတွေက ဘာတွေလဲ..."
အစောင့်တစ်ဦးက သူ၏လက်ထဲရှိ အဆောင်လက်ဖွဲ့အမျိုးမျိုးကို ကြည့်ကာ ဇဝေဇဝါနှင့် အံ့အားသင့်နေမိသည်။
"မင်းတို့ ဒီလူကို ထာဝရငြိမ်းချမ်းရေး ခန်းမ မှာ တွေ့ခဲ့ကြတယ် မဟုတ်လား"
ဖန့်ချန် က လီတောက်ယဲ့ ကို လက်ညှိုးထိုးပြရင်း ပြောလိုက်သည်။
"ဒီအဆောင်လက်ဖွဲ့တွေကို ကျင့်ကြံသူတွေက ဖန်တီးထားတာဖြစ်ပြီး ကျင့်ကြံသူတွေရဲ့ စွမ်းအားတွေ ပါဝင်နေတယ် အမြန်နှုန်း အဆောင် က မင်းတို့ကို ဇရက်ငှက်လေးလို ပေါ့ပါးသွက်လက်စေမယ်၊ စိန်ကိုယ်ထည် အဆောင် က မင်းတို့ကို ဓားလှံမတိုးအောင် လုပ်ပေးမယ်၊ ခွန်အားအဆောင် က မင်းတို့ကို နွားလားဥဿဘလို အားသန်စေမယ်ခရမ်းရောင်လျှပ်စီးအဆောင် ကတော့ မင်းတို့ အိပ်မက်ဆိုး မြင်းစီးစစ်သည်တော်တွေကို ရင်ဆိုင်တဲ့အခါ သုံးရမယ့်အရာပဲ "
"မင်းတို့အားလုံးဆီမှာ အဆောင်တစ်ခုကို ဆယ်ခုစီရမယ် ၊ လာမယ့်တိုက်ပွဲမှာ ဒီအဆောင်တွေကို သုံးပြီး အနည်းဆုံး အိပ်မက်ဆိုး မြင်းစီးစစ်သည်တော် နှစ်ယောက်စီကို သတ်နိုင်ရမယ် ဒါပေမဲ့ မင်းတို့ သေသေချာချာ ပစ်မှတ်ထားဖို့ လိုတယ်နော် လွဲအောင်မလုပ်နဲ့ ပစ်မှတ်ကို ထိအောင်ပစ်"
"ကျင့်ကြံသူတွေရဲ့ စွမ်းအား"
အစောင့်များသည် စိတ်ဓာတ်များ တက်ကြွသွားကြပြီး ဝမ်းသာအားရ ဖြစ်နေကြသည်။ ဖန့်ချန် က အိပ်မက်ဆိုး မြင်းစီးစစ်သည်တော်များနှင့် အဘယ်ကြောင့် လက်ရည်စမ်းခိုင်းသနည်းဆိုသည်မှာ မဆန်းတော့ပေ။ ကြည့်ရတာ သူက အသင့်ပြင်ထားပြီးသားပဲ
"လာမယ့် ရက်အနည်းငယ်မှာ ဒီအဆောင်တွေကို အသုံးပြုတာ ကျွမ်းကျင်သွားအောင် အားလုံး လေ့ကျင့်ကြရအောင်"
ဟု ရွှီဂီ က ကြေညာလိုက်သည်။
လီတောက်ယဲ့ မှာ ထိုစကားကို ကြားသည်နှင့် ချက်ချင်း နှမြောတသ ဖြစ်သွားသည်။
"လေ့ကျင့်မယ် ဟုတ်လား အဲဒါက ဖြုန်းတီးရာ မရောက်ဘူးလား..."
"အနည်းငယ် ရင်းနှီးပြီး အများကြီး ပြန်ရယူရမှာပဲ။"
ဖန့်ချန် က လီတောက်ယဲ့ ၏ ပုခုံးကို ပုတ်လိုက်သည်။
"ငါလည်း မီးလုံးပညာ နဲ့ ရေခဲမြှားပညာ တွေကို လေ့ကျင့်ချင်တယ် မင်းက ငါ့ရဲ့ ပစ်မှတ်အဖြစ် နေပေးပါ ရှစ်ထောင့်ဗေဒင်ဂိုဏ်း က ကျင့်ကြံသူတွေ ဗေဒင်ဟောတာအပြင် တခြား ဘာလုပ်နိုင်သေးလဲဆိုတာ ငါ ကြည့်ချင်သေးတယ်"
နောက်ရက်များတွင် သိုင်းသင်တန်းကွင်းကို လုံးဝ ပိတ်ထားလိုက်သည်။
ဖန့်အိမ်တော် ရှိ အစေခံများသည် အတွင်းမှ တဂျိန်းဂျိန်း အသံများကို တစ်ခါတစ်ရံ ကြားနေရသည်။ ဖန့်ချန်းယူ သည် တစ်ခါက ဖြတ်သွားရင်း အတွင်းကို တစ်ချက်ကြည့်လိုက်ပြီးနောက် ထူးဆန်းသော မျက်နှာပေးဖြင့် လှည့်ပြန်သွားကာ နောက်ထပ် လုံးဝ ရောက်မလာတော့ပေ။
သိုင်းသင်တန်းကွင်း တစ်ခုလုံးမှာ မည်းတူးနေပြီဖြစ်သည်။ ကောင်းကင်လျှပ်စီးများ ရက်ပေါင်းများစွာ ဆက်တိုက် ကျရောက်ထားသည့်အတိုင်းပင်။
ဖန့်အိမ်တော် အစောင့်များသည် အဆောင်လက်ဖွဲ့များကို အသုံးပြုခြင်း၌ တဖြည်းဖြည်း ကျင့်သားရလာကြသည်။ ဖန့်ချန် သည်လည်း မီးလုံးပညာနှင့် ရေခဲမြှားပညာတို့၌ ပိုမိုကျွမ်းကျင်လာကာ ယခုအခါ စိတ်ကူးလိုက်ရုံနှင့် ချက်ချင်း ထုတ်လွှတ်နိုင်ပြီဖြစ်သည်။
"ဖန့်ချန် မင်းမှာ ဝိညာဉ်စွမ်းအင် ဘယ်လောက်တောင် ရှိနေတာလဲ မင်း က ချီသန့်စင်ခြင်းအဆင့် အဆင့် ၁၂ ကို ရောက်နေပြီလား"
လီတောက်ယဲ့ သည် သူ၏ မီးကျွမ်းနေသော မျက်ခုံးများကို ထိကြည့်ရင်း လက်လျှော့လိုက်တော့သည်။
"ငါ မင်းရဲ့ ပစ်မှတ်အဖြစ် မနေတော့ဘူး ဒီအတိုင်းသာ ဆက်သွားရင် ငါ့ကိုယ်ပေါ်မှာ ဆံပင်တစ်ပင်တောင် ကျန်မှာ မဟုတ်တော့ဘူး"
သူသည် အမှန်တကယ်ပင် အံ့အားသင့်နေရသည်။
မီးလုံးပညာသည် အခြေခံပညာတစ်ခုသာ ဖြစ်သော်လည်း အခြေခံတည်ဆောက်ခြင်းအဆင့် ကျင့်ကြံသူများသာ ဝိညာဉ်စွမ်းအင် ကုန်ခမ်းသွားမည်ကို စိုးရိမ်စရာမလိုဘဲ လွယ်လွယ်ကူကူ အသုံးပြုနိုင်ကြခြင်းဖြစ်သည်။
သာမန် ချီသန့်စင်ခြင်းအဆင့် ကျင့်ကြံသူများအတွက်မူ မီးလုံးပညာနှင့် ရေခဲမြှားပညာတို့၏ အသုံးစရိတ်မှာ အလွန်များပြားသည်။
သို့မဟုတ်ပါက သူတို့သည် အဆောင်လက်ဖွဲ့များကို ထိုမျှ စိတ်အားထက်သန်စွာ အသုံးပြုကြလိမ့်မည် မဟုတ်ပေ။
"ချီသန့်စင်ခြင်းအဆင့် အဆင့် ၁၂ ကျင့်ကြံသူတစ်ယောက်တောင် မီးလုံးပညာကို အဆက်မပြတ် မသုံးနိုင်ဘူး ဝိညာဉ်စွမ်းအင် လုံးဝမကုန်ခင် သူတို့ အကြိမ် တစ်ရာလောက်ပဲ ထုတ်နိုင်မှာ"
ဟု လီတောက်ယဲ့ က ညည်းညူလိုက်သည်။
သူသည် ဖန့်ချန် က ဘယ်ဘက်လက်မှ မီးလုံး၊ ညာဘက်လက်မှ ရေခဲမြှားကို အကြိမ်ပေါင်းများစွာ အားစိုက်စရာမလိုဘဲ၊ ပင်ပန်းနွမ်းနယ်သည့် အရိပ်အယောင် လုံးဝမပြဘဲ ဆက်တိုက် ထုတ်လွှတ်နေသည်ကို ကိုယ်တိုင် မြင်တွေ့ခဲ့ရခြင်း ဖြစ်သည်။
ဖန့်ချန် က ပြုံးပြီး လီတောက်ယဲ့ ကို လွှတ်ပေးလိုက်သည်။
ရက်အနည်းငယ် လေ့ကျင့်ပြီးနောက် သူသည် ပညာရပ်နှစ်ခုစလုံး၏ အနှစ်သာရကို တတ်မြောက်သွားပြီဖြစ်သည်။
ထိုရက်များတွင် သူသည် အဆောင်လက်ဖွဲ့များကို မပြုလုပ်ဖြစ်ခဲ့သော်လည်း ဝိညာဉ်စွမ်းအင်ကို အကြိမ်ပေါင်းများစွာ ကုန်ခမ်းအောင် အသုံးပြုခဲ့သည်။
ရလဒ်အနေဖြင့် သူ၏ကျင့်ကြံခြင်းမှာ တစ်နေ့ထက်တစ်နေ့ တိုးတက်လာပြီး သူ၏ ဆဌမမြောက် မသေမျိုးသွေး ကြော ကို ပေါင်းစပ်နိုင်ရန် အလှမ်းမဝေးတော့ပေ