အခန် (၁၈၃-၁၈၄)
Vol. 19 Ch. 183-184
အခန်း ၁၈၃ - မင်းရဲ့ဆန္ဒကို ဖြည့်ဆည်းပေးမယ်
ကျောက်ယန် သည် အစမှအဆုံးအထိ ကိုယ်တွင်းချီကိုသာ အသုံးပြုခဲ့သည်။
ထို့ကြောင့် ရွှီချင်းဖုန်း ရှုံးနိမ့်သွားသည်ကို မြင်သောအခါ ကျိလင်ရှင်း သည် အံ့သြသွားသော်လည်း ထိတ်လန့်တုန်လှုပ်ခြင်းမရှိပေ။ သူက ဖန့်ချန် ကို ကြည့်ကာ တည်ငြိမ်စွာ မေးလိုက်သည်။
"မင်းရဲ့နောက်မှာ ကိုယ်တွငချီအဆင့်ရှိတဲ့သူတစ်ယောက် ရှိနေတာဆိုတော့ မင်းက အဆင့် ၈ အင်ပါယာတစ်ခုက လာတာလို့ ငါယူဆရမလား မင်းက ထျန်းခွန်း အင်ပါယာကလား ဟုန်ရီ အင်ပါယာလား ဒါမှမဟုတ် ယင်းချန်း အင်ပါယာကလား"
ရွှီဂီ ၏ မျက်နှာ အနည်းငယ် ပျက်သွားသည်။
တစ်ဖက်လူပြောသော အင်ပါယာအမည်များထဲတွင် သူသည် ယင်းချန်း အင်ပါယာကိုသာ သိသည်။
အကြောင်းမှာ ချင်းစုန့် နိုင်ငံသည် ယင်းချန်းအင်ပါယာ၏ လက်အောက်ခံနိုင်ငံ ဖြစ်သောကြောင့်ပင်။
သုံးလောကတောင်တန်း တိုက်ပွဲတုန်းကလည်း ယင်းချန်းအင်ပါယာက မြေကမ္ဘာနက်နဲသောအဆင့်ပညာရှင်တစ်ဦး စေလွှတ်ခဲ့သောကြောင့် ဖန့်ချန် ရှုံးနိမ့်ခဲ့ရခြင်း ဖြစ်သည်။
ကျင့်ကြံသူများဖြစ်သော လီတောက်ယဲ့ နှင့် အခြားသူများမှာမူ ထိုအင်ပါယာအမည်များကို ရင်းနှီးခြင်းမရှိကြပေ။
အဆင့် ၆ နှင့်အထက် အင်ပါယာများသာလျှင် သူတို့၏ အာရုံစိုက်မှုကို ရထိုက်သည်။
ကျန်ရှိသော အဆင့် ၉၊ ၈ သို့မဟုတ် ၇ အင်ပါယာများမှာ သိုင်းပညာရှင်များအတွက်သာ နေရာများ ဖြစ်ကြသည်။
ထိုနေရာများတွင် ကျင့်ကြံသူ အနည်းငယ်ရှိနေလျှင်တောင် သူတို့မှာ ပြည့်စုံသော အမွေအနှစ်မရှိသည့် လေလွင့်ကျင့်ကြံသူ များသာဖြစ်ပြီး ကျင့်ကြံခြင်းလောကမှ အသိအမှတ်မပြုကြချေ။
ဖန့်ချန် တို့အဖွဲ့က တိတ်ဆိတ်နေသည်ကို မြင်သောအခါ ကျိလင်ရှင်း က သူ၏ ခန့်မှန်းချက် မှန်ကန်သည်ဟု ယူဆလိုက်ပြီး အသံဩဩဖြင့် ဆက်ပြောသည်။
"ထျန်းခွန်း၊ ဟုန်ရီ နဲ့ ယင်းချန်း အင်ပါယာတွေက သံတမန်တွေအားလုံး နှင်းရေခဲအင်ပါယာကို ရောက်နေကြပြီ အခု သူတို့ နန်းတော်ထဲမှာ မဟာရှအင်ပါယာက အဆင့် ၈ အဖြစ် တိုးမြှင့်ဖို့ ကြိုးစားနေတဲ့ကိစ္စကို ဆွေးနွေးနေကြတယ် မင်းတို့က သူတို့နဲ့ ပူးပေါင်းဖို့ အမြန်လာခဲ့တာလား"
ဆုန့်ယီ နှင့် အခြားသူများ၏ မျက်နှာမှာ မကောင်းလှပေ။ တကယ်လို့ ဖန့်ချန် တို့မှာ အဆင့် ၈ အင်ပါယာတစ်ခုမှ အရေးကြီးပုဂ္ဂိုလ်များ ဖြစ်နေပါက သူတို့အရှက်ရခဲ့သောကိစ္စကို ပြန်လည်လက်စားချေရန် ခက်ခဲသွားနိုင်ပေသည်။
"ဪ... သူတို့အားလုံး ရောက်နေကြပြီပေါ့။ာ နန်းတော်ထဲမှာတောင် ဆွေးနွေးနေကြပြီလား"
ဖန့်ချန် က ပြုံးလိုက်သည်။
"သူတို့တွေ ဆုံးဖြတ်ချက် တစ်ခုခု ချပြီးပြီလားဆိုတာ သိချင်မိတယ်"
ကျိလင်ရှင်း က သူ၏စကားမှာ ထိရောက်သွားသည်ဟု ထင်ကာ လေးနက်စွာ ဆိုသည်။
"မဟာရှမှာ အဆင့် ၈ အင်ပါယာတစ်ခုရဲ့ အခြေခံအုတ်မြစ် မရှိဘူး အခု သူတို့က အဆင့် ၈ လို့ မောက်မာစွာ ကြေညာရဲတာဆိုတော့ ငါတို့ အင်ပါယာ လေးခုရဲ့ ပူးပေါင်းတိုက်ခိုက်မှုကို သဘာဝအတိုင်း ရင်ဆိုင်ရမှာပဲ"
ရှယားယိ သည် မျက်မှောင်ကြုတ်လိုက်မိသည်။
နှင်းရေခဲအင်ပါယာသည် သင်ခန်းစာမရသေးပုံရသည်။
ကျိလင်ယွဲ့ ကို မဟာရှတွင် ဓားစာခံအဖြစ် ဖမ်းဆီးထားဆဲ ဖြစ်သော်လည်း သူတို့က အခြားအင်ပါယာ သုံးခုနှင့်ပေါင်းကာ မဟာရှကို တိုက်ခိုက်ရန် ကြံစည်နေကြပြီ ဖြစ်သည်။
ထိုအချိန်တွင် ပိတ်ဆို့ထားသော လူအုပ်ကြီးမှာ လမ်းပွင့်သွားပြီး လူအချို့ ဖြည်းညှင်းစွာ လျှောက်လာကြသည်။ ခေါင်းဆောင်ဖြစ်သူမှာ ခံ့ညားထည်ဝါသော အရှိန်အဝါရှိသည့် လူလတ်ပိုင်း အမျိုးသားတစ်ဦး ဖြစ်သည်။
ထိုသူကို မြင်သောအခါ ဆုန့်ယီ သည် ဝမ်းသာသွားသည်။
ထိုသူမှာ ကျိမိသားစု၏ လက်ရှိမျိုးဆက်တွင် ထင်ရှားသူတစ်ဦးဖြစ်သော ကျိကျွင်းဟွာ ဖြစ်ပြီး ကျိလင်ရှင်း ၏ ဖခင်လည်း ဖြစ်သည်။ သူသည် ဆုန့်ယီ တို့၏ ယောက္ခမလောင်းလည်း ဖြစ်သဖြင့် သူတို့မှာ အမျိုးတော်စပ်နေကြပြီ ဖြစ်သည်။
ကျိလင်ရှင်း လည်း စိတ်သက်သာရာ ရသွားသည်။ သူသည် အချိန်ဆွဲနေခဲ့ခြင်းဖြစ်ပြီး သူ၏ဖခင်မှာ အချိန်ကိုက် ရောက်ရှိလာခဲ့သည်။
သိသာသည်မှာ သူ၏ဖခင်သည် ကျောက်ယန် နှင့် ရွှီချင်းဖုန်း တို့၏ တိုက်ပွဲမှ ထွက်ပေါ်လာသော အရှိန်အဝါကို ခံစားမိခဲ့ခြင်းပင်။
ကျိကျွင်းဟွာ ၏ ရယ်မောသံမှာ သူတို့အနားသို့ မရောက်ခင်ကတည်းက ဟိန်းထွက်လာသည်။
"ဆုန့်ယီ၊ ဆုန့်ဟွေ့... မင်းတို့ မိဘတွေ နေကောင်းကြရဲ့လား အဘိုးအို ဆုန့် ကော ကျန်းမာရဲ့လား"
ဆုန့်ယီ နှင့် အခြားသူများက ချက်ချင်းပင် ရိုသေစွာ နှုတ်ဆက်ကြသည်။
ကျိကျွင်းဟွာ ၏ ဘေးတွင် ကျိလင်ရှင်း နှင့် ရုပ်ချင်းဆင်သော လူငယ်တစ်ဦး ပါလာသည်။ ကျိကျွင်းဟွာ က ထိုလူငယ်ကို တစ်ချက်ကြည့်ပြီး ဆုန့်ယီ နှင့် ဆုန့်ဟွေ့ ဘက်သို့ လှည့်လိုက်သည်။
"မင်းတို့နှစ်ယောက်က လက်မထပ်ရသေးဘူးဆိုတော့ ငါတို့ နှင်းရေခဲအင်ပါယာရဲ့ ဓလေ့အရ မတွေ့သင့်သေးဘူး ဒါပေမဲ့ လင်ရှောင် က မင်းတို့ရဲ့ ဘေးကင်းရေးကို စိတ်ပူနေလို့ လိုက်လာတာ"
ဆုန့်ဟွေ့ သည် ကျိလင်ရှောင် ကို တစ်ချက်လှမ်းကြည့်လိုက်ရာ မျက်နှာလေး နီမြန်းသွားပြီး ခေါင်းငုံ့သွားတော့သည်။
ကျိလင်ရှောင် က ရှက်ကိုးရှက်ကန်း ရယ်လိုက်သော်လည်း တိတ်ဆိတ်နေဆဲပင်။
"အဖေ..."
ကျိလင်ရှင်း က ရှေ့သို့ တိုးလာပြီး ဖြစ်ပျက်ခဲ့သမျှကို သူ၏ဖခင်အား တိုးတိုးလေး ပြောပြလိုက်သည်။
ဇာတ်ကြောင်းကို ကြားပြီးနောက် ကျိကျွင်းဟွာ က ခေါင်းအသာညိမ့်သည်။ သူသည် ဒဏ်ရာရထားသော ရွှီချင်းဖုန်း ကို ကြည့်ပြီးနောက် ကျောက်ယန် ဆီသို့ အကြည့်လွှဲလိုက်သည်။
"ဒီလောက် ငယ်ငယ်ရွယ်ရွယ်နဲ့ ရွှီချင်းဖုန်း ကို အလွယ်တကူ အနိုင်ယူနိုင်တာ တကယ်ကို ရှားပါးပါတယ် မင်းရဲ့ ဆရာက ဘယ်သူလဲ"
ဟု ကျိကျွင်းဟွာ က ချီးမွမ်းသလိုနှင့် မေးလိုက်သည်။
ကျောက်ယန် က ခပ်ပါးပါး ပြုံးကာ
"ကျွန်တော့် ဆရာရဲ့ အမည်ကို မဖော်ပြလိုပါဘူး"
ဟု ဆိုသည်။
"မင်းက ကျိမိသားစုရဲ့ လက်စားချေမှုကို ကြောက်လို့ မင်းဆရာရဲ့ အမည်ကို မပြောတာလား"
"အဲဒီလို ပြောစရာမလိုလို့ မပြောတာပါ ပြီးတော့ ဟုတ်ပါတယ် ကျိမိသားစုကိုတော့ ကျွန်တော် နည်းနည်း သတိထားမိတယ်"
"ကြည့်ရတာ သူ ကျိမိသားစုကို ကြောက်နေပုံရတယ်"
ဟု ပတ်ဝန်းကျင်ရှိ လူများကြားတွင် တိုးတိုးလေး ပြောဆိုသံများ ထွက်ပေါ်လာသည်။
"ပြောမပြချင်လည်း ရပါတယ်"
ဟု ကျိကျွင်းဟွာ က ဆိုသည်။ သူသည် ဖန့်ချန် ကို တစ်ချက်ကြည့်ပြီးမှ ကျောက်ယန် ဆီသို့ ပြန်ကြည့်လိုက်သည်။
"ဒါပေမဲ့ အဲဒီလိုဆိုရင် ဒီလူက မင်းအတွက် ဘယ်သူလဲ မင်းရဲ့ သိုင်းပညာအဆင့်အတန်းနဲ့ဆိုရင် ဘယ်သူ့လက်အောက်မှာမှ နေဖို့ မလိုအပ်ဘူးလို့ ငါထင်တယ်"
"ဒါက ကျွန်တော့်ရဲ့ သခင်လေးပါ"
ဟု ကျောက်ယန် က ဖြေလိုက်သည်။
"မင်းရဲ့ သခင်လေး ဟုတ်လား"
လူတိုင်းက တစ်ဦးကိုတစ်ဦး ထူးဆန်းသော အမူအရာဖြင့် ကြည့်လိုက်ကြသည်။
ဖန့်ချန် ၏ နောက်ခံအကြောင်းကို လူတိုင်း ပို၍ စိတ်ဝင်စားလာကြသည်။
ကိုယ်တွင်းချီအဆင့်ရှိ သိုင်းပညာရှင်တစ်ဦးကို ကိုယ်ရံတော်အဖြစ် ထားနိုင်ခြင်းမှာ သူ၏ နောက်ခံသည် အလွန်ပင် ကြီးမားနေကြောင်း သက်သေပြနေခြင်းပင်။
ထိုအချိန်တွင် ဖန့်ချန် က စကားပြောလာသည်။
"ကျွန်တော် သိချင်တာက ခင်ဗျားမှာ ကျိလင်ရှင်း၊ ကျိလင်ရှောင် ဆိုတဲ့ သားတွေရှိသလို၊ ကျိလင်ယွဲ့ ဆိုတဲ့ သားတစ်ယောက်ကော ရှိသေးလား"
လူအုပ်ကြီး၏ အမူအရာမှာ အနည်းငယ် ပြောင်းလဲသွားပြီး ကျိကျွင်းဟွာ က သူ၏ မျက်လုံးများကို အနည်းငယ် ကျဉ်းလိုက်သည်။
"မင်း ငါ့ရဲ့ သားကြီးကို သိတာလား"
ဖန့်ချန် က မပြုံးဘဲ မနေနိုင်တော့ပေ။
"အင်း... သိတာပေါ့"
"မင်းက ဘယ်ကလာတာလဲ ညီငယ်လေး ထျန်းခွန်းလား ဟုန်ရီလား ယင်းချန်းလား"
ဟု ကျိကျွင်းဟွာ က မေးသည်။
"မင်းရဲ့ လူကြီးတွေ မြို့တော်ကို ရောက်နေပြီလားသူတို့ နန်းတော်ထဲမှာ ရှိနေပြီလား"
"ကျွန်တော် ဘယ်ကလာသလဲဆိုတာ ခဏထားပါဦး ကျွန်တော် သိချင်တာက ဆုန့်ယီ အတွက် ကျိမိသားစုက ရှေ့ထွက်ပေးမှာလား ဆိုတာပါပဲ သင်္ဘောပေါ်မှာ သူ့ရဲ့ အစေခံမလေးက အရင် စော်ကားခဲ့တာကို သူ ခင်ဗျားကို ပြောပြခဲ့လားကျွန်တော်တို့က သူ့ကို ဦးသုံးကြိမ်ပဲ တိုက်ခိုင်းခဲ့တာ၊ ဒါဟာ သေးငယ်တဲ့ အပြစ်ပေးမှုပဲ ရှိပါသေးတယ်"
ပတ်ဝန်းကျင် တစ်ခုလုံး ခဏမျှ တိတ်ဆိတ်သွားသည်။ ဆုန့်ယီ ၏ မျက်နှာတွင် အရှက်ရသည့် အမူအရာများ ပေါ်လာသည်။ ကျိကျွင်းဟွာ သည် ဆုန့်ဟွေ့ နှင့် ကျိလင်ရှောင် တို့ကို တစ်ချက်ကြည့်လိုက်ပြီးမှ လက်ကို ခပ်ဖွဖွလေး တီးလိုက်သည်။
"စိတ်ဝင်စားဖို့ ကောင်းတာပဲ နှင်းရေခဲအင်ပါယာရဲ့ နယ်နိမိတ်ထဲမှာ ငါ့ရဲ့ ကျိမိသားစုကို စော်ကားရဲတာ... ထျန်းခွန်း၊ ဟုန်ရီ နဲ့ ယင်းချန်း အင်ပါယာ သုံးခုရဲ့ တော်ဝင်မိသားစုတွေတောင် အဲဒီလို လုပ်ဖို့ သတ္တိရှိမှာ မဟုတ်ဘူး"
စကားဆုံးသည်နှင့် ကျိကျွင်းဟွာ သည် ခြေထောက်ကို မြေပြင်ပေါ်သို့ အသာအယာ နင်းလိုက်သည်။
ချက်ချင်းပင် မြေပြင်မှာ အက်ကွဲသွားပြီး ကြောက်မက်ဖွယ်ကောင်းသော အရှိန်အဝါကြောင့် ကျောက်ခဲများစွာသည် လေထဲသို့ ပျံတက်သွားသည်။ နောက်တစ်ခဏ၌ ထိုကျောက်ခဲများသည် အမြောက်ဆန်များအလား ဖန့်ချန် တို့အဖွဲ့ဆီသို့ တိုက်ရိုက် ပြေးဝင်သွားတော့သည်။
ကျောက်ယန် က လက်ကို ဝှေ့ယမ်းလိုက်ရာ ကျောက်ခဲများစွာမှာ သူ၏ အရှိန်အဝါကြောင့် လမ်းကြောင်းပြောင်းသွားပြီး သူ၏နောက်ကွယ်ရှိ ပင်လယ်ထဲသို့ ကျသွားရာ လှိုင်းလုံးကြီးများ ထပေါ်လာသည်။ အမြင့်ဆုံးလှိုင်းမှာ ၁၀ မီတာခန့်အထိ ရှိပြီး ရောက်ရှိနေသူတိုင်း အသက်ရှူကျပ်မတတ် ဖိအားကို ခံစားလိုက်ရသည်။
"ကောင်းပြီ... လာခဲ့စမ်း"
ကျိကျွင်းဟွာ က ဟိန်းဟောက်ကာ ရယ်မောလိုက်ပြီး သူ၏ခန္ဓာကိုယ်မှ ခမ်းနားသော ချီ များ စီးထွက်လာသည်။
သူသည် လူ့လောကသို့ ဆင်းသက်လာသော နတ်ဘုရားတစ်ပါးအလား ပြောင်းလဲသွားပြီး ကြောက်မက်ဖွယ်ကောင်းသော အရှိန်အဝါနှင့်အတူ ကျောက်ယန် ရှေ့တွင် ပေါ်လာသည်။
သူ့ကို ကျောက်ယန် က ဖမ်းကိုင်လိုက်ပြီး ဘေးသို့ ပြင်းထန်စွာ ပစ်ပေါက်လိုက်သည်။
ပေါက်ကွဲသံများ ဆက်တိုက် ထွက်ပေါ်လာပြီး ကျိကျွင်းဟွာ ၏ ခန္ဓာကိုယ်သည် သင်္ဘောကြီး အများအပြားကို ဖောက်ထွက်သွားကာ နောက်ဆုံးတွင် ပင်လယ်ထဲသို့ ကျသွားတော့သည်။
တိတ်ဆိတ်သွားပြန်သည်။
ပွဲကြည့်ပရိသတ်များ၏ မျက်လုံးထဲတွင် မယုံကြည်နိုင်သည့် အရိပ်အယောင်များ ပေါ်လာသည်။
အနှစ်သာရပြန်လည်ရောက်ရှိခြင်းချီအဆင့်ပညာရှင် တစ်ဦးဖြစ်သော ကျိကျွင်းဟွာ သည် ကျောက်ယန် ၏ ပစ်ပေါက်ခြင်းကို ဤမျှ လွယ်လွယ်ကူကူ ခံလိုက်ရသည်လား
"သူ... သူက အနှစ်သာရပြန်လည်ရောက်ရှိခြင်းချီအဆင့်ပဲ"
ဟု အဘိုးအို ကင် က တုန်တုန်ယင်ယင် ပြောလိုက်သည်။
အနှစ်သာရပြန်လည်ရောက်ရှိခြင်းချီအဆင့် ဟုတ်လား
ကျိလင်ရှင်း နှင့် အခြားသူများ၏ မျက်နှာများ ပျက်သွားပြီး သူတို့သည် မီတာအတော်ဝေးဝေးအထိ နောက်ဆုတ်သွားကြသည်။
သူတို့သည် ကျောက်ယန် က တစ်ချက်တည်းနှင့် သူတို့ကို သတ်ပစ်မည်ကို ကြောက်ရွံ့နေကြသည်။
ထိုအခါမှ ရွှီချင်းဖုန်း ၏ တင်းမာနေသော မျက်နှာမှာ ပြေလျော့သွားတော့သည်။
"ဪ သူက အနှစ်သာရပြန်လည်ရောက်ရှိခြင်းချီအဆင့်ကိုး ငါ ရှုံးရတာ နောင်တမရတော့ပါဘူး"
"သူက ဘယ်လိုလုပ်ပြီး အနှစ်သာရပြန်လည်ရောက်ရှိခြင်းခြင်းချီအဆင့် ဖြစ်နေတာလဲ ဒါက မဖြစ်နိုင်တာ"
ဆုန့်ယီ ၏ မျက်နှာမှာ ဖြူလျော်သွားပြီး ဖန့်ချန် ကို စိုက်ကြည့်နေမိသည်။
အကယ်၍ ကျောက်ယန် သာ အနှစ်သာရပြန်လည်ရောက်ရှိခြင်းချီအဆင့် ဖြစ်နေလျှင် ဖန့်ချန် က မည်မျှအထိ အဆင့်မြင့်သော နောက်ခံ ရှိနေမည်နည်း
သူ ပို၍ မစဉ်းစားနိုင်ခင်မှာပင် ကျိကျွင်းဟွာ သည် ပင်လယ်ထဲမှ ပြန်တက်လာပြီး သင်္ဘောရွက်တိုင် ထိပ်ပေါ်တွင် တည်ငြိမ်စွာ ရပ်လိုက်သည်။
သူသည် ကျောက်ယန် ကို ကြည့်ကာ အမူအရာမှာ ပုံမှန်ထက် ပို၍ လေးနက်နေသည်။
"မင်းက အနှစ်သာပြန်လည်ရောက်ရှိခြင်းချီအဆင့်ကိုး စောစောက ငါ ပေါ့ဆသွားလို့ပါ ပြန်လာခဲ့စမ်း"
"မင်းရဲ့ ဆန္ဒကို ငါဖြည့်ဆည်းပေးမယ်"
ာ
ကျောက်ယန် က ဟိန်းဟောက်ကာ ရယ်မောလိုက်သည်။ သူသည် တစ်လှမ်းတည်းနှင့် မီတာများစွာကို ဖြတ်ကျော်လိုက်ပြီး ခြေလှမ်းအနည်းငယ်အတွင်းမှာပင် ကျိကျွင်းဟွာ နှင့် အမြင့်ချင်း တူညီသောနေရာသို့ ခုန်တက်သွားသည်။
ကျိကျွင်းဟွာ သည် သူ၏ လျှို့ဝှက်နည်းစနစ်များကို သုံးရန် ပြင်လိုက်သော်လည်း ကျောက်ယန် ထံမှ ထွက်ပေါ်လာသော ကြောက်မက်ဖွယ်ကောင်းပြီး ရင်းနှီးနေသော အရှိန်အဝါကြောင့် တုန်လှုပ်သွားတော့သည်။
သက်ရှည်ချီ လား သူ ထိုသို့ စဉ်းစားလိုက်မိချိန်မှာပင် ကျိကျွင်းဟွာ သည် ကျောက်ယန် ၏ လည်ပင်းညှစ်ကာ ဖမ်းကိုင်ခြင်းကို ခံလိုက်ရပြီး ကြက်ကလေးတစ်ကောင်အလား အမောက်ခံလိုက်ရတော့သည်။
သက်ရှည်ချီ ၏ အဝိုင်းခံထားရသော ကျိကျွင်းဟွာ သည် သူ၏ အတွင်းအားကို အနည်းငယ်မျှပင် အသုံးမပြုနိုင်တော့ဘဲ ခုခံနိုင်စွမ်း အားလုံး ပျောက်ဆုံးသွားတော့သည်။
အခန်း ၁၈၄ - စူးစမ်းလေ့လာခြင်း
လူအုပ်ကြီးတစ်ခုလုံး တိတ်ဆိတ်သွားသည်။
ကျိလင်ရှင်း ၏ မျက်နှာမှာ သေလူကဲ့သို့ ဖြူလျော်သွားပြီး ကျိမိသားစုဝင်များမှာလည်း သစ်သားရုပ်ထုများအလား ကြောင်စီစီ ရပ်နေမိကြသည်။
အနီးရှိ အိမ်မက်ဆိုးမြင်းသည်တော်များမှာ စိုးရိမ်တကြီး ဖြစ်နေကြသော်လည်း သူတို့၏သခင် ကျိကျွင်းဟွာ သည် ရန်သူ့လက်ထဲတွင် ရောက်နေပြီး အချိန်မရွေး အသတ်ခံရနိုင်သဖြင့် မည်သည့်ရမ်းကားသော လှုပ်ရှားမှုကိုမျှ မလုပ်ရဲကြချေ။
ထိုအချိန်တွင် ခန့်ညားထည်ဝါသော အသံတစ်ခုသည် မြို့တော်အတွင်းမှ ရုတ်တရက် ဟိန်းထွက်လာသည်။
"ဘယ် သက်ရှည်ချီ အဆင့် ပညာရှင်က ရောက်လာတာလဲ ကျေးဇူးပြုပြီး ငါ့သားကို ချမ်းသာပေးပါ သူ စော်ကားမိတာရှိရင် သူ့ကိုယ်စား ငါပဲ တောင်းပန်ပါရစေ"
ရောက်ရှိနေသူများမှာ အံ့အားသင့်သွားကြသည်။ ထိုအသံမှာ ကျိမိသားစု၏ လက်ရှိခေါင်းဆောင် ကျိချုံယွန်း ၏ အသံပင် ဖြစ်သည်။
သူ ခုနက သက်ရှည်ချီ လို့ ပြောလိုက်တာလား
လူတိုင်းက တောင့်တောင့်ကြီး ဖြစ်နေသော သူတို့၏ခေါင်းများကို ကျောက်ယန် ဆီသို့ ဖြည်းဖြည်းချင်း လှည့်ကြည့်လိုက်ကြသည်။ သူတို့၏ မျက်လုံးများထဲတွင် ထိတ်လန့်တုန်လှုပ်မှုမှလွဲ၍ ဘာမှမရှိတော့ပေ။
ထိုလူငယ်သည် 'ူသက်ရှည်ချီအဆင့် သိုင်းပညာရှင် တစ်ဦး ဖြစ်နေသည်လား ထိုအဆင့်မှာ မြေကမ္ဘာနက်နဲသောအဆင့် ၏ အထွတ်အထိပ်ပင် ဖြစ်သည်။ ထိုကဲ့သို့သော ပုဂ္ဂိုလ်မျိုးကို ကိုယ်ရံတော်အဖြစ် ထားရှိနိုင်ခြင်းမှာ...
လူတိုင်း၏ အကြည့်များသည် ကျောက်ယန် ထံမှ ခွာသွားပြီး ဖန့်ချန် ဆီသို့ ရောက်သွားကြသည်။ သူတို့၏ နှလုံးသားများမှာ တုန်လှုပ်စွာဖြင့် ခုန်ပေါက်နေတော့သည်။
ဒီလူက ဘယ်လို နောက်ခံမျိုး ရှိနေတာလဲ
ဆုန့်ယီ သည် ကြောက်ရွံ့လွန်း၍ တုန်ရီနေပြီး နောင်တများဖြင့် ပြည့်နှက်နေသည်။
အကယ်၍ ကျောက်ယန် သည် ကျိကျွင်းဟွာ တောင်မှ ယှဉ်နိုင်ခြင်းမရှိသော သက်ရှည်ချီအဆင့် ပညာရှင် ဖြစ်နေမှန်း သူသိခဲ့လျှင် အဘိုးအို ကင် ကို သတင်းသွားပို့ခိုင်းမည် မဟုတ်ပေ။
ဆုန့်ယီ ၏ ဘေးမှ အစေခံမလေး၏ မျက်နှာမှာလည်း သေလူကဲ့သို့ ဖြူလျော်နေတော့သည်။
ဖန့်ချန် တို့အဖွဲ့ကို ကြည့်သော သူမ၏ အကြည့်များတွင် ကြောက်ရွံ့ထိတ်လန့်မှုများဖြင့် ပြည့်နှက်နေသည်။
"သက်ရှည်ချီ သူက ဘယ်လိုလုပ် သက်ရှည်ချီအဆင့် ဖြစ်နေရတာလဲ သူက အဆင့် ၇ အင်ပါယာက လာတာလား"
ကျိလင်ရှင်း က ဖန့်ချန် ကို ကြောင်ကြည့်နေမိသည်။
သူ စောစောက ခံစားနေရသော သာလွန်မှုများမှာ ချက်ချင်းပင် ပျောက်ကွယ်သွားတော့သည်။
သူ၏ အဆင့်အတန်းမှာ သက်ရှည်ချီအဆင့်ရှိသူကို ကိုယ်ရံတော်အဖြစ် ထားနိုင်လောက်အောင် မမြင့်မားသော်လည်း ထိုကဲ့သို့သော ဆက်ဆံမှုကို ခံယူနိုင်သူများကို သူ မြင်ဖူးသည်။
ထိုသူများ အားလုံးမှာ အဆင့် ၇ အင်ပါယာများမှ လာသူများ ဖြစ်ကြသည်။
ကျိလင်ရှင်း သည် ထိုသူများကို ပထမဆုံးအကြိမ် မြင်ဖူးစဉ်က ငြူစူစိတ်များ ပေါ်ပေါက်ခဲ့ပြီး တစ်နေ့တွင် ကျိမိသားစုကိုလည်း ထိုမျှအထိ အင်အားကြီးအောင် လုပ်မည်ဟု တိတ်တဆိတ် ကျိန်ဆိုခဲ့သည်။
သို့သော် ထိုအရာမှာ ကျိမိသားစုအတွက် အလှမ်းဝေးလွန်းနေသေးသည်။
ယခုအချိန်အထိ သူတို့မိသားစုတွင် ကောင်းကင်နက်နဲသောအဆင့် ရှိသူ တစ်ယောက်မှ မထွက်ပေါ်သေးချေ။
ဖန့်ချန် တို့နှင့်အတူ လိုက်ပါလာသော သိုင်းပညာရှင်များ၊ ခရီးသည်များနှင့် သင်္ဘောပိုင်ရှင်မှာမူ တုန်ရီနေကြပြီး သွားများမှာပင် တဂတ်ဂတ် မြည်နေတော့သည်။
ဖန့်ချန် တို့မှာ ကံဆိုးသူများ မဟုတ်ဘဲ ဆုန့်ယီ သာလျှင် ကံဆိုးသူဖြစ်ကြောင်း သူတို့ သဘောပေါက်လိုက်ကြသည်။
ကျိမိသားစု၏ နှင်းရေခဲအင်ပါယာ ဆိပ်ကမ်းကို ပိတ်ဆို့ထားခြင်းမှာ ယခုအခါ ပြက်လုံးတစ်ခုနှင့် တူနေတော့သည်။ အားလုံးမှာ ကျိမိသားစုခေါင်းဆောင်က ထိုအထင်လွဲမှုကို ဘယ်လို ဖြေရှင်းမလဲဆိုသည်ကိုသာ စောင့်ကြည့်နေကြရသည်။
ကျောက်ယန် သည် ကျိကျွင်းဟွာ ကို သယ်ဆောင်လျက် ဖန့်ချန် ၏ ဘေးသို့ လျင်မြန်စွာ ပြန်ရောက်လာသည်။
"သခင်လေး သက်ရှည်ချီ ပညာရှင် တစ်ယောက် လာနေပြီ နောက်ပြီး အနှစ်သာရပြန်လည်ရောက်ရှိခြင်းချီအဆင့် ရှိတဲ့သူ အချို့လည်း ပါလာတယ်"
မျက်လုံးများကို မှိတ်ထားဆဲဖြစ်သော ဖန့်ချန် သည် နှာခေါင်းကို အနည်းငယ် လှုပ်ရှားလိုက်ပြီး နှုတ်ခမ်းတွင် အပြုံးတစ်ခု ပေါ်လာသည်။
"ငါ ရင်းနှီးတဲ့ အရှိန်အဝါတစ်ခုကို ခံစားနေရတယ်. အဲဒါ ယင်းချန်း က ဓားသမားရဲ့ အရှိန်အဝါပဲ"
ထိုအခါမှ လူတိုင်းက ထူးဆန်းသော အချက်တစ်ခုကို သတိထားမိလိုက်ကြသည်။
"ဟင်"
ဖန့်ချန် သည် အစမှအဆုံးအထိ မျက်လုံးကို တစ်ခါမှ မဖွင့်ခဲ့သည်မှာ ထူးဆန်းလှသည်။
ရွှီဂီက သွားကြိတ်လျက်
"သခင်လေး သူ့ကို အရှင်ထားရမှာလား"
ဟု မေးလိုက်သည်။
"မထားနဲ့လေ"
ဖန့်ချန် က ရယ်မောလိုက်သည်။
"ဒီနေ့တော့ အတိုးလေး နည်းနည်းပဲ ယူထားဦးမယ်နောက်တစ်နေ့ကျမှ ယင်းချန်း တစ်နိုင်ငံလုံးကို မြေလှန်ပစ်ကြတာပေါ့"
ထိညစကားမှာ ရွှီဂီ အတွက် အလွန် နားထောင်ကောင်းသော စကားဖြစ်ပြီး သူ မစောင့်နိုင်တော့ပေ။
ရှယားယိ နှင့် အခြားသူများ၏ အမူအရာမှာ အနည်းငယ် ထူးဆန်းနေသည်။
ကျင့်ကြံသူများအနေဖြင့် ထိုလောကီရေးရာ ကံတရား များတွင် ဝင်ရောက်ပတ်သက်ခြင်းမှာ သူတို့၏ အနာဂတ်ကျင့်ကြံမှုအတွက် အလွန် ထိခိုက်စေနိုင်သည်။
ချီသန့်စင်ခြင်းအဆင့် တွင် မသိသာသော်လည်း အခြေခံတည်ဆောက်ခြင်းအဆင့် သို့ ရောက်သောအခါ အဆင့်တိုင်းတွင် မိမိကိုယ်ကိုယ် ပြန်လည်ဆန်းစစ်ခြင်း ရှိသည်။
ကံတရား အရှုပ်အထွေး နည်းလေ၊ အောင်မြင်ရန် လွယ်ကူလေဖြစ်သည်။
အပြန်အလှန်အားဖြင့် ကံတရားများ အများကြီး စုဆောင်းမိလျှင် မိစ္ဆာလမ်းစဉ်သို့ ကျရောက်နိုင်ခြေ ပိုများသည်။
ဆန်းစစ်ခြင်းတွင် ကျရှုံးပါက ကျင့်ကြံခြင်း ခရီးလမ်းမှာ အဆုံးသတ်သွားပေလိမ့်မည်။
ထို့ကြောင့် ရှယားယိ သည် လောကီရေးရာများတွင် ဝင်ပါလေ့မရှိပေ။
မဟာရှအင်ပါယာ တစ်နေ့တွင် ပျက်သုဉ်းသွားလျှင်တောင် ၎င်းကို ကောင်းကင်ဘုံ၏ အလိုဆန္ဒဟုသာ သူ သတ်မှတ်ပေလိမ့်မည်။
မဟာရှကို တည်ထောင်သူ ဧကရာဇ်သည် ကျင့်ကြံသူ နှစ်ဦး စစ်တုရင် ကစားနေသည်ကို တိုက်ဆိုင်စွာ မြင်တွေ့ခဲ့ရပြီး နတ်မျိုးစေ့ အနည်းငယ် ရရှိခဲ့ရာမှ သာမန်လူသားဘဝမှ ဧကရာဇ် ဖြစ်လာခဲ့သလိုမျိုးပင်။ အရာအားလုံးမှာ ကောင်းကင်ဘုံက သတ်မှတ်ထားပြီးသား ဖြစ်သည်
လက်ဖက်ရည် တစ်ခွက်သောက်စာ အချိန်အတွင်းမှာပင် ကျိချုံယွန်း သည် လူတစ်စုနှင့်အတူ ဆိပ်ကမ်းသို့ ရောက်ရှိလာသည်။
သူနှင့်အတူ ပါလာသောသူများမှာ ဝတ်စုံချင်း မတူကြပေ။
ထိုသူများထဲမှ တစ်ဦးမှာ ခါးတွင် ဓားတိုတစ်စင်း၊ ဓားရှည်တစ်စင်း ချိတ်ဆွဲထားပြီး အနှစ်သာပြန်လည်ရောက်ရှိခြင်းချီအဆင့်ယယပညာရှင်တစ်ဦး၏ ပြင်းထန်သော အရှိန်အဝါများ ထွက်ပေါ်နေသည်။
"ဘိုးဘေး"
ကျိလင်ရှင်း နှင့် အခြားသူများမှာ သက်ပြင်းချလိုက်နိုင်ပြီး ကျိချုံယွန်း ကို ရိုသေစွာ ဦးညွှတ်ကြသည်။ ကျိချုံယွန်း ရောက်လာပြီဆိုလျှင် ကိစ္စက ပြေလည်သွားနိုင်ခြေ ရှိသည်။
ကျိချုံယွန်း က အေးစက်စွာ နှာခေါင်းရှုံ့လိုက်ပြီး ကျောက်ယန် ဘက်သို့ လှည့်လိုက်သည်။
"လူကို လွှတ်လိုက်ပါ ဒီအထင်လွဲမှုကို ငါတို့ ရှင်းလင်းလို့ ရပါတယ်"
ကျောက်ယန် က ပြုံးလိုက်သည်။
"သူ့ကို လွှတ်ပေးဖို့ ဆုံးဖြတ်ရမှာက ငါ မဟုတ်ဘူး ငါ့ရဲ့ သခင်လေးကိုပဲ မေးကြည့်ပါ"
သခင် လေး ဟုတ်လား
ကျိချုံယွန်း နှင့် အခြားသူများမှာ မျက်မှောင်ကြုတ်သွားကြသည်။
သူတို့သည် ဖန့်ချန် တို့အဖွဲ့ကို လှမ်းကြည့်လိုက်ကြရာ ချက်ချင်းပင် လူနှစ်ဦးမှာ ထူးခြားသော တုံ့ပြန်မှု ရှိလာသည်။
တစ်ဦးမှာ ကျိချုံယွန်း ကိုယ်တိုင် ဖြစ်သည်။
ကျန်တစ်ဦးမှာ ကိုယ်တွင်းချီအဆင့် သိုင်းပညာရှင်များ ဝိုင်းရံထားသော ဓားသမား ဖြစ်သည်။
"မင်း... မင်းပဲ..."
ကျိချုံယွန်း က ဖန့်ချန် ကို စိုက်ကြည့်နေပြီး သူ့ကို ဤနေရာတွင် တွေ့ရမည်ဟု မယုံကြည်နိုင်အောင် ဖြစ်နေသည်။
ကျိကျွင်းဟွာ နှင့် အခြားသူများမှာ အံ့သြသွားကြသည်။
"သူ့ကို သိတာလား"
ဖန့်ချန် က ပြုံးလိုက်သည်။
"ပြန်ဆုံကြပြန်ပြီနော် စီနီယာကျိ ကျိလင်ယွဲ့ လည်း ကျွန်တော့်ဆီမှာ နေကောင်းပါတယ် အားရင် လာလည်ပါဦး"
ကျိလင်ယွဲ့
ဖန့်ချန် က ကျိလင်ယွဲ့ ဟူသော အမည်ကို ပြောလိုက်သည်ကို ကြားသောအခါ ကျိချုံယွန်း နှင့် အခြားသူများမှာ ဇဝေဇဝါ ဖြစ်သွားကြသည်။
သို့သော် မကြာမီမှာပင် အားလုံးက အခြေအနေကို သဘောပေါက်သွားပြီး အသက်ကို ပြင်းပြင်းရှူလိုက်ကြသည်။
"မင်းက မဟာရှရဲ့ နတ်ဘူစစ်သူကြီး ဖန့်ချန် ပဲ"
ဟု ကျိလင်ရှင်း က အော်လိုက်သည်။
မဟာရှ... စစ်သူကြီး ဟုတ်လား
အားလုံး၏ အမူအရာမှာ တစ်မျိုးပြီးတစ်မျိုး ပြောင်းလဲနေကြသည်။
သူတို့ရှေ့မှ လူသည် နှင်းရေခဲအင်ပါယာ၏ လက်အောက်ခံနိုင်ငံဟောင်း ဖြစ်ခဲ့ပြီး ယခုအခါ အဆင့် ၈ အင်ပါယာအဖြစ် ကိုယ့်ကိုယ်ကိုယ် ကြေညာထားသော မဟာရှအင်ပါယာမှ ဖန့်ချန် ဖြစ်နေလိမ့်မည်ဟု သူတို့ မထင်ထားခဲ့ကြပေ။
ထိုကိစ္စမှာ နှင်းရေခဲအင်ပါယာအတွင်း၌ အငြင်းပွားဖွယ်ရာများ ဖြစ်ပေါ်စေခဲ့သည်။ စစ်လိုလားသော အမတ်များမှာ လက်စားချေရန်အတွက် စစ်တပ်စေလွှတ်ရန်ပင် တောင်းဆိုနေကြသည် မဟုတ်လား
"ဒီကောင်က ငါတို့ နှင်းရေခဲအင်ပါယာကိုတောင် လာရဲတယ်ပေါ့"
"သူက တကယ့်ကို ရဲတင်းလွန်းတာပဲ"
"မဟာရှက ဘာလို့ ဒီလောက် ရုတ်တရက် ရဲတင်းလာတာလဲဆိုတာ မထူးဆန်းတော့ဘူး သူတို့မှာ သက်ရှည်ချီ သိုင်းပညာရှင် တစ်ယောက် ရှိနေတာကိုး ဒါပေမဲ့ ငါတို့ အင်ပါယာမှာ အဲဒီလိုလူတွေ အများကြီး ရှိတယ် သူတို့က ငါတို့ကို ဘယ်လို ယှဉ်နိုင်မှာလဲ!"
"ဒီသက်ရှည်ချီ ပညာရှင်ကို ဒီကနေ အရှင်ထွက်သွားခွင့် မပေးသင့်ဘူး အဲဒါဆိုရင် မဟာရှရဲ့ ကံကြမ္မာက လုံးဝ ပြတ်တောက်သွားလိမ့်မယ်!"
လူများက တစ်ဦးကိုတစ်ဦး တီးတိုးပြောဆိုနေကြသည်။ သူတို့သည် ဘေးကြည့်ပရိသတ်များ မဟုတ်တော့ဘဲ သူတို့၏ အင်ပါယာဘက်မှ ခိုင်မာစွာ ရပ်တည်နေကြသူများ ဖြစ်သည်။
ကျိချုံယွန်း ၏ အကြည့်မှာ သိသိသာသာ ပြောင်းလဲသွားပြီး သူ၏ဘေးမှ သက်ရှည်ချီ ပညာရှင် သုံးဦးနှင့် သူတို့၏ နောက်လိုက်များသည်လည်း ဖန့်ချန် ကို အသေအချာ စူးစမ်းလိုက်ကြသည်။
"ဖန့်ချန် မင်းက ဘယ်လောက်ပဲ အစွမ်းထက်ပါစေ၊ ဒါက နှင်းရေခဲအင်ပါယာပဲ ငါတို့ မြို့တော်မှာ အခုထိ လက်မလှုပ်ရသေးတဲ့ သက်ရှည်ချီ သိုင်းပညာရှင် နှစ်ယောက် ရှိသေးတယ် မင်းတို့အားလုံးကို ဒီမှာ တင်ထားခဲ့ဖို့ သူတို့နဲ့ ငါပူးပေါင်းလိုက်မှာကို မင်းမကြောက်ဘူးလား"
ဟု ကျိချုံယွန်း က ခြိမ်းခြောက်လိုက်သည်။
ထိုအချိန်တွင် ရှယားယိ က ခပ်ပါးပါး ပြုံးလျက် စကားထဲ ဝင်ပါလာသည်။
"မိတ်ဆွေ ဖန့် ကြည့်ရတာ သက်ရှည်ချီ ပညာရှင် တစ်ယောက်တည်းနဲ့တော့ သူတို့ကို ခြောက်လို့ မရဘူး ထင်တယ်"
သူက စဉ်းစားလိုက်သည်နှင့် သူ၏လက်ထဲတွင် မီးလုံးတစ်လုံး ဖြစ်ပေါ်လာပြီး သူတို့နောက်ကွယ်ရှိ ကျယ်ပြောလှသော ပင်လယ်ပြင်ဆီသို့ ပစ်လွှတ်လိုက်သည်။
ဘုန်း
မီးတောက်များမှာ ကောင်းကင်ယံသို့ ပျံတက်သွားသည်။ ကိုက် ဒါဇင်ပေါင်းများစွာအတွင်းရှိ ပင်လယ်ရေများမှာ ချက်ချင်းပင် အငွေ့ပျံသွားပြီး အဖြူရောင် အငွေ့များမှာ လေထုထဲတွင် ပျံ့နှံ့သွားသည်ကို အားလုံး မြင်လိုက်ရသည်။ ၎င်းမှာ အိပ်မက်တစ်ခုကဲ့သို့ပင်။
အကယ်၍ ထိုမီးလုံးသာ သူတို့အပေါ် ကျရောက်လာလျှင် ဘယ်လိုဖြစ်သွားမလဲ ထိုအတွေးက လူတိုင်းကို ကျောချမ်းသွားစေသည်။
ကျိချုံယွန်း ၏ အမူအရာမှာ တစ်မျိုးပြီးတစ်မျိုး ပြောင်းလဲနေပြီး နောက်ဆုံးတွင် သူသည် ရှယားယိနှင့် အခြားသူများကို လေးနက်စွာ အကဲခတ်လာတော့သည်။ ထို့နောက် သူသည် သူ့ကိုယ်သူပင် ထိတ်လန့်သွားစေသော ကောက်ချက်တစ်ခုကို ချလိုက်သည်။
ဒီလူတွေ အားလုံးက ကျင့်ကြံသူ တွေပဲ