အခန်း (၂၀၇-၂၀၈)
Vol. 21 Ch. 207-208
အခန်း ၂၀၇ - ကောင်းကင်နက်နဲသောအဆင့် ပထမအဆင့်၊ သေမင်းချီ
နန်းတော်အတွင်း၌ လူငယ်လေးဦးနှင့် အမျိုးသမီးငယ်နှစ်ဦးတို့သည် နောက်ဖေးဥယျာဉ်တွင် လမ်းလျှောက်နေကြပြီး ၎င်းတို့နောက်၌ နှင်းရေခဲအင်ပါယာ တော်ဝင်မိသားစုဝင် လူငယ်အုပ်စုကြီးက လိုက်ပါနေကြသည်။
ထိုအုပ်စုထဲမှ လူတိုင်းမှာ ထူးခြားသူများဖြစ်ကြသော်လည်း ရှေ့မှ လူလေးဦး၏ ထူးကဲသော အဆင့်အတန်းနှင့် ယှဉ်လျှင်မူ သူတို့မှာ ရံရွှေတော်များသဖွယ် ဖြစ်နေတော့သည်။
၎င်းတို့ထဲမှ တစ်ဦးမှာ အင်ပါယာ၏ စတုတ္ထမင်းသမီး ဟန်ချင်း ဖြစ်သည်။ သူမသည် ကျားဖြူအင်ပါယာ၏ ဆယ်မျက်နှာဂိုဏ်းတွင် နှစ်ပေါင်းများစွာ လေ့ကျင့်ခဲ့သူဖြစ်သည်။
နောက်တစ်ဦးမှာ ကျားဖြူအင်ပါယာ စစ်သေနာပတိချုပ်၏သား လင်လီ ဖြစ်ပြီး ဆယ်မျက်နှာဂိုဏ်း၏ နာမည်ကြီး ပါရမီရှင်တစ်ဦးလည်း ဖြစ်သည်။
ကျန်နှစ်ဦးမှာမူ ပို၍ပင် ခန့်ညားထည်ဝါပြီး အဆင့် ၆ အင်ပါယာမှ လာသူများ ဖြစ်ပုံရကာ သူတို့၏ ကျင့်ကြံမှုအဆင့်မှာ နက်နဲလှသဖြင့် ခန့်မှန်းရခက်လှသည်။
"အစ်ကို ကျိုး၊ အစ်မ ဝမ် ဒီတစ်ခေါက် ကျွန်တော်တို့နဲ့အတူ လိုက်လာပေးတာ တကယ်ကို ကျေးဇူးတင်ပါတယ်"
ဟု လင်လီ က ရိုသေစွာ ဆိုလိုက်သည်။
ဟန်ချင်း ကလည်း ထပ်တူပင် ရိုသေသော အမူအရာဖြင့် ကျေးဇူးတင်စကား ဆိုသည်။
အစ်ကိုကျိုးသည် အနည်းငယ် မောက်မာသော အမူအရာဖြင့် အေးစက်စွာ ပြောလိုက်သည်။
"ပုံမှန်ဆိုရင် ငါက ဒီလို အသေးအဖွဲကိစ္စတွေကို ဂရုစိုက်မှာ မဟုတ်ဘူး ဒါပေမဲ့ မင်းတို့က ငါရွေးချယ်ထားတဲ့ နောက်လိုက်တွေ ဖြစ်နေတာရယ် နှင်းရေခဲအင်ပါယာမှာ ပြဿနာရှာနေတဲ့ လေလွင့်ကျင့်ကြံသူ ရှိတယ်ဆိုတာရယ်ကြောင့် ငါလိုက်လာကြည့်တာ"
အစ်မဝမ်က ဟန်ချင်း ကို တစ်ချက်ကြည့်ပြီး ပြုံးလျက်
"ဟန်ချင်း ဒီကိစ္စပြီးရင် မင်း အိမ်ကို ပြန်မလာနိုင်တာ နှစ်အတော်ကြာသွားလိမ့်မယ် အဲဒီကျရင်တော့ မညည်းညူနဲ့ဦးနော်"
ဟု ဆိုသည်။
"နားလည်ပါပြီ အစ်မဝမ်"
ဟု ဟန်ချင်း က ရိုသေစွာ ပြန်ဖြေသည်။
သူမနှင့် လင်လီ တို့သည် ထိုလူနှစ်ဦး၏ နောက်လိုက်များအဖြစ် ရွေးချယ်ခံရခြင်းမှာ အလွန်ကံကောင်းလှသည်။
မကြာမီ သူတို့သည် အဆင့် ၆ အင်ပါယာသို့ လိုက်သွားကြတော့မည်ဖြစ်ရာ နှင်းရေခဲအင်ပါယာ၏ ပြဿနာများကို ဖြေရှင်းပေးခဲ့ခြင်းက သူမ၏ နောင်တများကို အနည်းငယ် ပြေလျော့စေပေလိမ့်မည်။
"ငါ့အစ်ကိုကြီး ဘာလို့ ပေါ်မလာတာလဲ"
ဟန်ချင်း ရုတ်တရက် ဇဝေဇဝါ ဖြစ်သွားပြီး သူမနောက်မှ တော်ဝင်မိသားစုဝင်များကို လှည့်ကြည့်လိုက်သည်။
အိမ်နှင့် ဝေးနေသည်မှာ ကြာပြီဖြစ်သဖြင့် သူမသည် ထိုလူများနှင့် သိပ်မရင်းနှီးပေ။ အရင်က သူမ ပြန်လာတိုင်း သူမ ချစ်ရသော အစ်ကိုကြီးက အမြဲတမ်း လိုက်ပို့ပေးလေ့ရှိသည်။
ဟန်ချင်း က ထိုလူငယ်များထဲမှ တစ်ဦးကို ညွှန်ပြလိုက်သည်။
"မင်းက သတ္တမမြောက် မောင်လေး မဟုတ်လား
"
ထိုလူငယ်မှာ အနည်းငယ် အံ့ဩသွားသော်လည်း အနားသို့ အမြန်တိုးလာသည်။
"စတုတ္ထအစ်မ"
"အစ်ကိုကြီး ဘယ်မှာလဲ ငါပြန်လာတိုင်း သူက ငါ့ကို လာတွေ့နေကျပဲ"
ဟု ဟန်ချင်း က မေးလိုက်သည်။
ထိုလူငယ်မှာ ခေတ္တမျှ တွေဝေသွားပြီး ခက်ခဲသော အမူအရာ ပေါ်လာသည်။
တစ်ခုခု မှားနေပြီဟု အာရုံခံမိသဖြင့် ဟန်ချင်း က ဆက်တိုက် မေးတော့သည်။
"ပြောစရာရှိရင် ပြောပါ၊ ငါ့ကို ဖုံးကွယ်မထားနဲ့"
"စတုတ္ထအစ်မ ခမည်းတော် မပြောပြဘူးလား"
ထိုလူငယ်က သက်ပြင်းချရင်း ပြန်ဖြေသည်။
"အစ်ကိုကြီးက မကြာခင်ကပဲ မဟာရှ က ဖန့်ချန် ရဲ့ လက်ချက်နဲ့ ဆုံးသွားရှာပြီ"
"ဘာ"
ဟန်ချင်း မှာ အလွန်အမင်း ထိတ်လန့်သွားသဖြင့် မျက်လုံးများ ပြာဝေသွားတော့သည်။
ခဏအကြာတွင် သူမ စိတ်ကို ပြန်ထိန်းလိုက်နိုင်သော်လည်း သူမ၏ အသံမှာ စူးရှသွားသည်။
"နောက်တစ်ခါ ထပ်ပြောစမ်း"
ထိုလူငယ်က တုန်ယင်သော အသံဖြင့် ပြန်ဖြေသည်။
"အစ်ကိုကြီး မဟာရှက ဖန့်ချန် ကြောင့် သေသွားရတာပါ"
အခြားသူများလည်း ထပ်တူ တုံ့ပြန်ကြသည်။
နောက်ဆုံးတော့ သူတို့ရှေ့တွင် ရှိနေသူမှာ ငယ်စဉ်ကတည်းက ဆယ်မျက်နှာဂိုဏ်းတွင် သိုင်းသင်ခဲ့သည့် ပါရမီရှင်တစ်ဦး မဟုတ်ပါလား။
သူမ၏ အစွမ်းမှာ မြေကမ္ဘာနက်နဲသောအဆင့်ထက်ပင် သာလွန်နေပြီဟု ကောလာဟလများ ရှိနေသည်။
အစ်ကိုကျိုးနှင့် အစ်မဝမ်တို့ တစ်ဦးကိုတစ်ဦး ကြည့်လိုက်ကြသော်လည်း ထိုကိစ္စကို သိပ်ပြီး အာရုံမစိုက်ကြပေ။
လင်လီ က မျက်မှောင်ကြုတ်လျက် ထိုလူငယ်ကို မေးလိုက်သည်။
"မင်းပြောတဲ့ ဖန့်ချန် ဆိုတာ ဘယ်သူလဲ"
ထိုလူငယ်က အမြန် ရှင်းပြသည်။
"သူက မဟာရှရဲ့ စစ်နတ်ဘုရားပါ လွန်ခဲ့တဲ့ နှစ်အနည်းငယ်က မဟာရှနဲ့ ချင်းစုန်အင်ပါယာတို့ သုံးလောကတောင်တန်း မှာ တိုက်ပွဲဖြစ်တုန်းက နှင်းရေခဲအင်ပါယာက စစ်ကူမလွှတ်ပေးလို့ လူအများကြီး သေခဲ့ရတယ်ဆိုပြီး သူက အပြစ်တင်ခဲ့တယ် အဲဒါကြောင့်ပဲ သူက ဒေါသထွက်ပြီး အစ်ကိုကြီးကို သတ်လိုက်တာပါ"
"ဖန့်ချန်"
ဟန်ချင်း သည် သွားကြိတ်လိုက်ပြီး သူမ၏ မျက်လုံးများထဲတွင် လူသတ်လိုသော အရှိန်အဝါများ ပြည့်နှက်သွားသည်။
လင်လီ က အနည်းငယ် ဇဝေဇဝါ ဖြစ်နေသည်။
"မဟာရှဆိုတာက..."
ထိုလူငယ်က မဟာရှအင်ပါယာ၏ အကြောင်းကို ထပ်မံ ရှင်းပြလိုက်ရာ လင်လီ သဘောပေါက်သွားတော့သည်။
လင်လီ က အစ်ကိုကျိုးကို ကြည့်ရင်း
"အစ်ကိုကျိုး. မဟာရှဆိုတာ ကျားဖြူအင်ပါယာ လက်အောက်က အဆင့် ၉ အင်ပါယာလေး တစ်ခုပါ သီအိုရီအရ ဆိုရင်တော့ နှင်းရေခဲအင်ပါယာရဲ့ လက်အောက်ခံနိုင်ငံပေါ့ ဒါပေမဲ့ အခုတော့ သူတို့က ဒီလို ယုတ်မာတဲ့ လုပ်ရပ်တွေ လုပ်နေကြတာဆိုတော့ နှင်းရေခဲအင်ပါယာကို ဖြုတ်ချဖို့ လေလွင့်ကျင့်ကြံသူတွေနဲ့ ပူးပေါင်းထားတာ ဖြစ်နိုင်ပါတယ်"
ဟု ဆိုသည်။
"ကျင့်ကြံသူတွေနဲ့ ပတ်သက်တဲ့ ကိစ္စတွေကိုတော့ ငါနဲ့ အစ်မဝမ်ကို လွှဲထားလိုက်ပါ ကျန်တဲ့ကိစ္စတွေကိုတော့ ငါတို့ ဝင်မပါသလို၊ ပါလည်း မပါချင်ဘူး"
ဟု အစ်ကိုကျိုးက ခပ်ပါးပါး ပြုံးလျက် ဆိုသည်။
"နားလည်ပါပြီ"
ဟု လင်လီ က ခေါင်းညိမ့်ပြပြီးနောက် ဟန်ချင်း ကို နှစ်သိမ့်လိုက်သည်။
"ချင်းအာ မစိုးရိမ်နဲ့ ငါတို့ မကြာခင် ဒီ ဖန့်ချန် ဆိုတဲ့လူကို ကလဲ့စားချေပေးမယ်"
ဟန်ချင်း က တိတ်ဆိတ်စွာ ခေါင်းညိမ့်လိုက်သည်။
"လေလွင့်ကျင့်ကြံသူဆိုတာ နောက်ဆုံးတော့ လေလွင့်ကျင့်ကြံသူပါပဲ"
ဟု အစ်မဝမ်က ဆိုသည်။
"ကောင်းမွန်တဲ့ အမွေအနှစ်ရှိတဲ့ ဘယ်ကျင့်ကြံသူမဆို ဘေးဒုက္ခသုံးသွယ်နဲ့ အန္တရာယ်ကိုးပါး ကို ရှောင်ရှားဖို့အတွက် လောကီရေးရာ ကံကြမ္မာတွေထဲမှာ ဝင်မပါကြဘူး မျှော်လင့်တာကတော့ သူ့ဆီမှာ ဝိညာဉ်ကျောက်တုံး အချို့ ရှိနေဖို့ပါပဲ မဟုတ်ရင်တော့ ဒီခရီးက အလကား ဖြစ်သွားလိမ့်မယ်"
အစ်ကိုကျိုး၏ နှုတ်ခမ်းများ အနည်းငယ် ကွေးညွှတ်သွားသည်။ ၎င်းမှာ သူတို့ ထိုနေရာသို့ လာရခြင်း၏ အကြောင်းရင်းပင် ဖြစ်သည်။
ကျင့်ကြံခြင်းလောကတွင် နောက်ခံတောင့်တင်းသော ကျင့်ကြံသူများကို သွားရောက် ရန်စခြင်းမှာ မလိမ္မာရာရောက်သော်လည်း လေလွင့်ကျင့်ကြံသူများမှာမူ မည်သူမဆို အမဲလိုက်နိုင်သော သားကောင်များသာ ဖြစ်ကြသည်။
ထိုအချိန်မှာပင် နှင်းရေခဲအင်ပါယာ၏ ဧကရာဇ်သည် နွမ်းနယ်သော အမူအရာဖြင့် လျှောက်လာသည်။
လူတိုင်း ဦးညွှတ်နှုတ်ဆက်ကြသည်။
"အရှင်မင်းကြီး"
အစ်ကိုကျိုးနှင့် အစ်မဝမ်တို့မှာ ကျင့်ကြံသူများ ဖြစ်ကြသဖြင့် သာမန်လူသား ဧကရာဇ်ကို ဦးညွှတ်ခြင်း မပြုကြပေ။ လင်လီ ကလည်း ငြိမ်သက်စွာ ရပ်နေသည်။
ဟန်ချင်း က ချက်ချင်းပင် ရှေ့သို့ တိုးသွားပြီး မျက်ရည်များ ဝဲလျက်
"ခမည်းတော် အစ်ကိုကြီး အသတ်ခံလိုက်ရတာကို သမီးကို ဘာလို့ အသိမပေးခဲ့တာလဲ"
ဟု မေးလိုက်သည်။
ဧကရာဇ်က သက်ပြင်းဖွဖွ ချလိုက်သည်။
"သမီးရဲ့ ကျင့်ကြံမှုကို ထိခိုက်မှာ စိုးလို့ပါ ဒါကြောင့် သမီး ပြန်လာတဲ့အခါမှပဲ ကိုယ်တိုင် ပြောပြဖို့ ဆုံးဖြတ်ခဲ့တာ"
ဟန်ချင်း က တင်းမာစွာ ဆိုသည်။
"ခမည်းတော်... ဖန့်ချန် ဆိုတဲ့လူ ဘယ်မှာလဲ သမီး အခုချက်ချင်း အစ်ကိုကြီးအတွက် ကလဲ့စားချေချင်တယ်"
ဧကရာဇ်၏ အမူအရာ အနည်းငယ် ပျက်ယွင်းသွားပြီး တိုးတိုးလေး ပြောလိုက်သည်။
"ဖန့်ချန် က ကျင့်ကြံသူတစ်ယောက် ဖြစ်နေနိုင်တယ်"
ဟင်
လင်လီ ၏ မျက်နှာ အနည်းငယ် ပြောင်းလဲသွားသည်။ စာထဲတွင်လည်း ကျင့်ကြံသူတစ်ယောက်အကြောင်း ပါရှိခဲ့သည်။
ဒါဆို သူက မဟာရှက လူပေါ့လေ
လင်လီ ၏ မျက်နှာမှာ ပုပ်သိုးသွားသည်။
သူသည် အင်ပါယာ၏ စစ်သေနာပတိချုပ် သားဖြစ်သော်လည်း ကျင့်ကြံခြင်းကို လေ့လာခွင့် မရခဲ့ပေ။ ယခုမူ အဆင့် ၉ အင်ပါယာလေး တစ်ခုက ကျင့်ကြံသူတစ်ယောက် ထွက်ပေါ်လာသည်တဲ့လား
"ခင်ဗျားရဲ့ လက်အောက်ခံနိုင်ငံမှာ ကျင့်ကြံသူ တစ်ယောက် ထွက်ပေါ်လာတယ်လို့ ပြောတာလား"
ဟု အစ်ကိုကျိုးက အံ့ဩတကြီး မေးလိုက်သည်။
"ခမည်းတော် ဒါက အစ်ကိုကျိုးပါ သူက အဆင့် ၆ အင်ပါယာက ကျင့်ကြံသူ တစ်ယောက်ပါ"
ဟု ဟန်ချင်း က အမြန် မိတ်ဆက်ပေးလိုက်သည်။
ဒါဆို သူက တကယ့် ကျင့်ကြံသူပေါ့
တော်ဝင်မိသားစုဝင်များ၏ မျက်နှာမှာ ပိုမို ရိုသေသော အမူအရာများ ဖြစ်သွားကြသည်။
ဧကရာဇ်က လေးလေးနက်နက် ဦးညွှတ်လိုက်သည်။
"ကျင့်ကြံသူ ကျွန်တော့်ရဲ့ ရိုင်းပျမှုတွေကို ခွင့်လွှတ်ပေးပါ"
အစ်ကိုကျိုးက လက်ဝှေ့ယမ်းလိုက်သည်။
"ဒီလောက်အထိ လုပ်စရာ မလိုပါဘူး"
"ဖန့်ချန် က မဟာရှက လာတာ အမှန်ပါပဲ သူက ကျင့်ကြံသူ တစ်ယောက် ဖြစ်ဖို့ အရမ်းများပါတယ်"
ဟု ဧကရာဇ်က ရိုသေစွာ လျှောက်တင်သည်။
"သူက ကံကောင်းလို့ ကျင့်ကြံသူ ဖြစ်လာတာပဲ နေမှာပါ စိုးရိမ်စရာ မရှိပါဘူး"
ဟု အစ်မဝမ်က ခပ်ပေါ့ပေါ့ ဆိုသည်။
အစ်ကိုကျိုးက ခေါင်းညိမ့်ပြသည်။
"သက်ရှည်ချီ သိုင်းပညာရှင်တွေက စိုးရိမ်စရာ မဟုတ်ပါဘူး သူတို့က ငါတို့ရဲ့ ပြိုင်ဘက် မဟုတ်ဘူး၊ ဘာလို့လဲဆိုတော့ အတွင်းအား က ဝိညာဉ်စွမ်းအင် အကာအကွယ်ကို မဖောက်နိုင်လို့ပဲ "
"ဒါပေမဲ့ သိုင်းပညာရှင်တွေက ကောင်းကင်နက်နဲသောအဆင့် ကို ရောက်သွားရင်တော့ တစ်မျိုးပေါ့ ဟန်ချင်း နဲ့ လင်လီ တို့က ကောင်းကင်နက်နဲသော ပထမအဆင့် ဖြစ်တဲ့ သေမင်းချီအဆင့် ကို ရောက်နေကြပြီ"
"အဲဒီအဆင့်က သိုင်းပညာရှင်တွေရဲ့ အတွင်းအားက ဝိညာဉ်စွမ်းအင်ကို ခြိမ်းခြောက်နိုင်စွမ်း ရှိတယ် ခင်ဗျားပြောတဲ့ ဖန့်ချန် ဆိုတဲ့လူက ကျင့်ကြံမှုအဆင့် သိပ်မြင့်မှာ မဟုတ်ပါဘူး သူတို့နှစ်ယောက်တည်းနဲ့တင် သူ့ကို ဖြေရှင်းဖို့ လုံလောက်ပါတယ် သူကလွဲလို့ တခြား လေလွင့်ကျင့်ကြံသူတွေ ရှိသေးလား"
"ဒါဆို စတုတ္ထအစ်မက တကယ်ပဲ ကောင်းကင်နက်နဲသောအဆင့် သိုင်းပညာရှင်ပေါ့"
တော်ဝင်မိသားစုဝင် လူငယ်များ၏ မျက်လုံးများတွင် အားကျမှုများ တောက်ပနေသည်။
ထိုသည်မှာ နှင်းရေအင်ပါယာ၏ ဘိုးဘေးကြီးပင် တစ်ခါမှ မရောက်ဖူးခဲ့သော နယ်ပယ်တစ်ခု ဖြစ်သည်။
ကောင်းကင်နက်နဲသောအဆင့် သိုင်းပညာရှင် နှစ်ဦးနှင့် အဆင့် ၆ အင်ပါယာမှ ကျင့်ကြံသူနှစ်ဦး ထိုအင်အားစုက သူတို့ကို ပို၍ စိတ်လှုပ်ရှားစေသည်။
ဖန့်ချန် ဘက်က ရပ်တည်ခဲ့သည့် ကျိမိသားစု၏ ဆုံးဖြတ်ချက်မှာ အမှားကြီး မှားသွားပြီဟု သူတို့ ထင်မြင်နေကြသည်။
"တခြားလူတွေလည်း ရှိဦးမှာပါ ဒါပေမဲ့ သူတို့ ထွက်သွားကြပြီ ထင်ပါတယ် အခုတော့ ဖန့်ချန် ပဲ ကျန်ပါတော့တယ် အခုလေးတင်ပဲ သူနဲ့ ကျိချုံယွန်း တို့ မြို့တော်ကို ပြန်ရောက်လာကြပါတယ် ဒီည စားသောက်ပွဲ တက်ဖို့အတွက် သူတို့ဆီကို ဖိတ်စာ ပို့ထားပြီးပါပြီ"
ဟု ဧကရာဇ်က ဆိုသည်။
အစ်ကိုကျိုးက ဟန်ချင်း နှင့် လင်လီ တို့ကို ကြည့်ကာ ပြုံးလိုက်သည်။
"ဟဲဟဲ... ဒါဆို ဒီည စားသောက်ပွဲအထိ စောင့်ကြတာပေါ့ အဲဒီကျရင် သူ့ကို တွေ့ရလိမ့်မယ်"
အခန်း ၂၀၈ - စားသောက်ပွဲ
ကျိမိသားစုဝင် အားလုံး၏ မျက်နှာများမှာ လေးနက်တည်ကြည်ကာ ပူပန်မှုများ ပြည့်နှက်နေသည်။ ဖန့်ချန် နှင့် သူ၏အဖွဲ့သာလျှင် ဘာခံစားချက်မျှ မရှိသော မျက်နှာထားများ ရှိနေကြသည်။
ဖန့်ချန်နှင့် ကျိချုံယွန်းတို့ကို တစ်ချက်ကြည့်ပြီးနောက် ကျိကျွင်းဟွာ က တိုးတိုးလေး ရေရွတ်လိုက်သည်။
"အဖေ ဒါက သိသိသာသာကို အန္တရာယ်ရှိသော စားသောက်ပွဲ ပဲ"
ကျိလင်ရှင်း အပါအဝင် ကျိမိသားစု၏ မျိုးဆက်သစ်များမှာတော့ တိတ်ဆိတ်နေကြသည်။
သူတို့မှာ စကားပြောဆိုခွင့် အာဏာမရှိကြပေ။ ကျိကျွင်းဟွာနှင့် ဝါစဉ်တူသူများမှာတော့ စိုးရိမ်တကြီးဖြင့် အကြည့်ချင်း ဖလှယ်နေကြသည်။
ကျိချုံယွန်းက ဖန့်ချန်ကို ကြည့်ကာ
"သခင်လေး ဖန့် ခင်ဗျား ဘယ်လိုထင်လဲ"
ဟု မေးလိုက်သည်။
"စားသောက်ပွဲ စတဲ့အခါကျရင် အလိုလို သိလာမှာပါ"
ဟု ဖန့်ချန်က ပြုံးလျက် ပြန်ဖြေသည်။
စားသောက်ပွဲ စတဲ့အခါ သိလာမှာပေါ့လေ
လူတိုင်း ဇဝေဇဝါ ဖြစ်ပြီး စိုးရိမ်နေကြသော်လည်း ဖန့်ချန်၏ ထူးထူးခြားခြား တည်ငြိမ်နေသော အမူအရာက သူတို့အပေါ် သက်ရောက်မှုရှိသွားပြီး ရင်ထဲက အလေးအပင်ဖြစ်မှုကို အနည်းငယ် လျော့ပါးသွားစေသည်။
ထိုအချိန်မှာပင် ကျိမိသားစု၏ အစေခံတစ်ဦး အပြေးအလွှား ဝင်လာသည်။
သူက ရိုသေစွာဖြင့် သတင်းပို့လိုက်သည်။
"နန်းတော်က သတင်းရပါပြီ စတုတ္ထမင်းသမီး ဟန်ချင်း ပြန်ရောက်လာပါပြီ သူမနဲ့အတူ ကျားဖြူအင်ပါယာ စစ်သေနာပတိချုပ်ရဲ့သား လင်လီ နဲ့ အဆင့် ၆ အင်ပါယာက ကျင့်ကြံသူနှစ်ယောက်လည်း ပါလာပါတယ်"
လူတိုင်း ထိတ်လန့်သွားကြပြီး ကျောချမ်းသွားကြသည်။
ဧကရာဇ်က ထိုကဲ့သို့ ကြောက်မက်ဖွယ်ကောင်းသော လူများကို ဖိတ်ကြားနိုင်စွမ်း ရှိလိမ့်မည်ဟု မည်သူမျှ ထင်မထားခဲ့ပေ။
ကျိချုံယွန်း ရုတ်တရက် စိတ်လှုပ်ရှားသွားသည်။
ထိုသည်မှာ ကျိမိသားစုအနေဖြင့် နှင်းရေခဲအင်ပါယာကို အမှန်တကယ် မထိန်းချုပ်နိုင်ရခြင်း၏ အကြောင်းရင်းပင် ဖြစ်သည်။
အကယ်၍ ဖန့်ချန်သာ ထိုနေရာမှာ မရှိပါက သူတို့အနေဖြင့် နိုင်ငံ၏ ဒုတိယအင်အားအကြီးဆုံး နေရာကိုပင် ထိန်းသိမ်းထားနိုင်ရန် အခွင့်အရေး ရှိတော့မည်မဟုတ်ပေ။
အစေခံ ထွက်သွားပြီးနောက် ကျိချုံယွန်း က ဖန့်ချန်ဘက်သို့ ပြန်လှည့်ကာ စိုးရိမ်တကြီး ပြောလိုက်သည်။
"သခင်လေး ဖန့် အခု ကျားဖြူအင်ပါယာက အဆင့် ၆ အင်ပါယာရဲ့ ကျင့်ကြံသူတွေကိုပါ ဖိတ်ထားတာဆိုတော့ ကျွန်တော်တို့ ဆွေးနွေးထားတဲ့ ကိစ္စက"
"ခင်ဗျား တာဝန် ခင်ဗျား ကျေအောင်လုပ်ပါ ယာ ကျန်တာကို ကျွန်တော် တာဝန်ယူတယ်"
ဟု ဖန့်ချန်က ခပ်ပါးပါး ပြုံးလျက် ဆိုသည်။
"ကျင့်ကြံသူတွေ ဆိုတာလည်း အစွမ်းချင်း ကွာခြားတာပဲလေ အခုချိန်ထိ ကျင့်ကြံသူ ဘယ်နှစ်ယောက်တောင် သေသွားပြီးပြီလဲ"
လူတိုင်း တုန်လှုပ်သွားကြပြီး သူတို့၏ အမူအရာများမှာ ထူးဆန်းသွားကြသည်။
ကျင့်ကြံသူ တစ်ယောက်၏ အသက်ရှင်ခြင်းနှင့် သေဆုံးခြင်းကို ထိုမျှ ပေါ့ပါးစွာ ပြောနိုင်သူမှာ ဖန့်ချန် တစ်ဦးတည်းသာ ရှိပေလိမ့်မည်။
မကြာမီ ဖန့်ချန်နှင့် ကျိချုံယွန်း တို့သည် နန်းတော်သို့ အတူတူ ထွက်လာကြသည်။
လမ်းတွင် သူတို့သည် ဆုနိ့ယီ နှင့် တိုးသည်။
သူ၏ ဖြူဖျော့ပြီး နွမ်းနယ်နေသော ပုံစံကို ကြည့်ခြင်းအားဖြင့် သူသည် နှင်းရေခဲအင်ပါယာ ဆိပ်ကမ်းတွင် အနည်းဆုံး တစ်လခန့် ဒူးထောက်ခဲ့ပုံရသည်။
သူတို့ကို မြင်လျှင် မြင်ချင်း ဆုန့်ယီ က ချက်ချင်း ခေါင်းငုံ့လိုက်သည်။
လူနှစ်ဦး ဆာန့်ယီ ၏ ဘေးမှ ဖြတ်သွားပြီးနောက် ဆန့်ယီ ၏ မျက်နှာတွင် အံ့ဩတုန်လှုပ်သော အမူအရာ ပေါ်လာသည်။
ထိုအချိန်မှာပင် သူ၏ ပုခုံးပေါ်သို့ လက်တစ်ဖက် ရောက်လာသည်။ ကျိလင်ရှင်း က သူ့ဘေးတွင် ပေါ်လာခြင်းဖြစ်သည်။
ကျိလင်ရှင်းက
"ညီအစ်ကို ဆုန့်် အခု ကျိမိသားစုက သခင်လေး ဖန့်နဲ့ မဟာမိတ် ဖွဲ့လိုက်ပြီဆိုတော့ အတိတ်က ကိစ္စတွေကို စိတ်ထဲ မထားပါနဲ့တော့"
ဟု ဆိုသည်။
"နားလည်ပါပြီ"
ဟု ဆုန်ယီ က ခေါင်းကို တဆက်ဆက် ညိမ့်ရင်း ပြန်ဖြေသည်။ သူသည် အနည်းငယ် စိတ်လေနေပုံရသည်။ သို့သော် နောက်တစ်ခဏတွင် သူ သတိပြန်ဝင်လာသည်။
သူက ဇဝေဇဝါဖြင့် မေးလိုက်သည်။
"မဟာမိတ် ဟုတ်လား ဘာကို ဆိုလိုတာလဲ"
ကျိလင်ရှင်းက ပြုံးရုံသာ ပြုံးလိုက်သည်။ သူ၏ မျက်လုံးထဲတွင် မျှော်လင့်ချက် အရိပ်အယောင်များ ရှိနေသည်။
"မမေးပါနဲ့ဦး ဖြစ်နိုင်တာက မကြာခင်မှာ ခင်ဗျား အလိုလို သိလာမှာပါ"
ဖန့်ချန်နှင့် ကျိချုံယွန်း တို့ နန်းတော်သို့ ရောက်သောအခါ အပြင်ဘက်တွင် တန်ဖိုးကြီး လှည်းတော်များစွာ ရပ်ထားသည်ကို တွေ့လိုက်ရသည်။
သိသိသာသာပင် နှင်းရေခဲအင်ပါယာမှ နန်းတွင်းအရာရှိများနှင့် ဂုဏ်သရေရှိ ပုဂ္ဂိုလ်များစွာကို စားသောက်ပွဲသို့ ဖိတ်ကြားထားခြင်း ဖြစ်သည်။
ဖန့်ချန်နှင့် ကျိချုံယွန်းတို့၏ ရောက်ရှိလာမှုက အနီးအနားရှိ ဧည့်သည်တော်များ၏ အာရုံကို ဆွဲဆောင်သွားသော်လည်း ထိုဧည့်သည်များမှာ တစ်ခုခုကို သတိပြုမိသွားပုံရကာ သူတို့နှစ်ဦးကို လာရောက် ကြိုဆိုခြင်း မပြုကြပေ။
ကျိမိသားစုမှ အရာရှိများသာလျှင် လာရောက် ဂါရဝပြုရဲကြသည်။ သို့သော် သူတို့၏ မျက်နှာများမှာ လေးနက်နေပြီး ပြောချင်သော စကားများစွာ ရှိနေသည့်အလား တွေဝေနေကြသည်။
ကျိချုံယွန်းက ပြုံးရုံသာ ပြုံးပြီး ဖန့်ချန်နှင့် စကားပြောရင်း ဆက်လျှောက်လာသည်။ လူအုပ်၏ ခြံရံမှုဖြင့် သူတို့သည် နန်းတော်မဟာရင်ပြင်ထဲသို့ ဝင်လာကြသည်။
ကျယ်ပြောလှသော နန်းရင်ပြင်ထဲတွင် ဧည့်သည်များက သူတို့၏ နေရာများတွင် အသီးသီး ထိုင်နေကြသည်။ တစ်ဖက်လျှင် နေရာပေါင်း နှစ်ရာစီ ရှိသည်။ နေရာ လေးရာလုံး ပြည့်သွားသောအခါ နန်းတော်အတွင်းရှိ အငွေ့အသက်မှာ ချက်ချင်းပင် သက်ဝင်လှုပ်ရှားလာသည်။
ဖန့်ချန်သည် ကျိချုံယွန်း၏ ဘေးတွင် နေရာယူလိုက်သည်။ သူ၏ မျက်စိရှေ့တွင်မူ သူ့ကို ရန်လိုသော အကြည့်များဖြင့် စိုက်ကြည့်နေသော လူငယ်အုပ်စုတစ်စု ရှိနေသည်။
သူတို့ကို မြင်သောအခါ ဖန့်ချန်က ပေါ့ပေါ့ပါးပါး ပြောလိုက်သည်။
"ဒါတွေက တော်ဝင်မိသားစုက ကလေးတွေလား"
ကျိချုံယွန်းက တစ်ချက် လှည့်ကြည့်ပြီး ခေါင်းညိမ့်ပြသည်။
ထိုလူငယ်များအပြင် နန်းရင်ပြင်ထဲတွင် ဝန်ကြီးများလည်း ထိုင်နေကြသည်။
သူတို့သည်လည်း ဖန့်ချန်ကို တိတ်တဆိတ် အကဲခတ်နေကြပြီး သူတို့၏ အကြည့်များမှာ အလေးအနက် စဉ်းစားနေပုံရသည်။ နှင်းရေခဲအင်ပါယာ၏ ဧကရာဇ် ပေါ်လာမှသာ သူတို့၏ အကြည့်များက ဖန့်ချန်ထံမှ ဖယ်ခွာသွားကြသည်။
ဧကရာဇ်က သူ၏ ထီးနန်းပေါ်တွင် ထိုင်လိုက်သောအခါ သူ၏ နှုတ်ခမ်းများတွင် ပြုံးရွှင်သော အမူအရာ ရှိနေသည်။
သူက နွေးထွေးစွာ ပြောလိုက်သည်။
"လေးစားအပ်တဲ့ ဝန်ကြီးတို့ ဒီနေ့တော့ တရားဝင် အခမ်းအနားတွေ လုပ်နေဖို့ မလိုပါဘူး ဒီနေ့ကို ရိုးရိုးရှင်းရှင်း စားသောက်ပွဲတစ်ခုလို့ပဲ သဘောထားကြပါ အားလုံးကို ကိုယ့်အိမ်မှာလိုပဲ သက်သောင့်သက်သာ နေစေချင်ပါတယ်"
ကျိချုံယွန်း က ဧကရာဇ်ဘေးရှိ လွတ်နေသော နေရာ လေးနေရာကို ကြည့်ပြီး မေးလိုက်သည်။
"အရှင်မင်းကြီး မိန်းမစိုး လင် ပြောခဲ့တဲ့ ဂုဏ်သရေရှိ ဧည့်သည်တော်တွေက ဘယ်မှာလဲ"
နန်းရင်ပြင် တစ်ခုလုံး တိတ်ဆိတ်သွားသည်။
ဧကရာဇ်က လွတ်နေသော နေရာများကို ကြည့်ပြီး ရယ်မောလိုက်သည်။
"ကျိအိုကြီး စိတ်မပူပါနဲ့ ငါ့သမီးက ဧည့်သည်တော်တွေနဲ့အတူ မကြာခင် ရောက်လာပါလိမ့်မယ်"
"ဒါဆို စတုတ္ထမင်းသမီး ပြန်ရောက်လာတာ တကယ်ပဲလား အရှင်မင်းကြီး"
ဟု ဝန်ကြီးတစ်ဦးက စပ်စုလိုက်သည်။
လူအုပ်ကြီးက တစ်ဦးကိုတစ်ဦး ကြည့်လိုက်ကြသည်။
သူတို့လည်း ထိုကောလာဟလကို ကြားထားကြသော်လည်း အမှန်တကယ် ဟုတ်မဟုတ်ကိုတော့ မသေချာကြပေ။
အကယ်၍ ဟန်ချင်း အမှန်တကယ် ပြန်ရောက်လာသည်ဆိုပါက စားသောက်ပွဲမှာ လျှို့ဝှက်အစီအစဉ်တစ်ခု ရှိနေပေလိမ့်မည်။
ငယ်စဉ်ကတည်းက ဟန်ချင်းကို ကျားဖြူအင်ပါယာရှိ ဆယ်မျက်နှာဂိုဏ်းသို့ သိုင်းပညာသင်ရန် လွှတ်ထားခဲ့သည်။
သူမမှာ ထူးကဲသော ပါရမီရှင်တစ်ဦးဖြစ်ပြီး မဟုတ်ပါက ဆယ်မျက်နှာဂိုဏ်းက သူမကို ရွေးချယ်မည်မဟုတ်ပေ။
ထို့အပြင် သူမသည် ကောင်းကင်နက်နဲသောနယ်ပယ်သို့ တက်လှမ်းနိုင်ခဲ့ပြီး အရင်က ဘိုးဘေးများကိုပင် ကျော်လွန်သွားပြီဖြစ်ကြောင်း ကောလာဟလများ ရှိနေသည်။
ဧကရာဇ်က အနည်းငယ် ခေါင်းညိမ့်ပြသည်။
"ဟုတ်တယ် ငါ့သမီးက မကြာခင်က နှင်းရေခဲအင်ပါယာမှာ ဖြစ်နေတဲ့ မငြိမ်မသက်မှုတွေကို သိသွားလို့ အဆင့် ၆ အင်ပါယာကို မထွက်ခွာခင် အိမ်ကို ခဏပြန်လာတာပဲ"
စတုတ္ထမင်းသမီး ဟန်ချင်း အဆင့် ၆ အင်ပါယာသို့ သွားတော့မည်ဟူသော သတင်းကြောင့် ကျိမိသားစုမှ အရာရှိများနှင့် တော်ဝင်အနွယ်ဝင် အရာရှိများ အားလုံး အံ့အားသင့်မှုကို မထိန်းနိုင်ကြတော့ပေ။
"ငါ့သမီးက ထူးကဲတဲ့ ပါရမီရှင်ဖြစ်လို့ အဆင့် ၆ အင်ပါယာက ကျင့်ကြံသူတွေရဲ့ ဘေးမှာ ခစားဖို့ ရွေးချယ်ခံခဲ့ရတယ် သူမက နောင်မှာ ကျင့်ကြံသူတွေရဲ့ ဂိုဏ်းထဲမှာ ကျင့်ကြံရတော့မှာပါ"
ဟု ဧကရာဇ်က ကြေညာလိုက်သည်။
"မင်းတို့အားလုံး သိတဲ့အတိုင်းပဲ ကျင့်ကြံသူတွေက တစ်ခါတစ်ရံ နှစ်ပေါင်းများစွာ တရားထိုင်လေ့ရှိကြတယ်၊ အနှစ် ၂၀ လောက်အထိတောင် ကြာတတ်တယ် ဒါကြောင့် သူမ အခုကစပြီး အိမ်ကို မကြာခဏ ပြန်မလာနိုင်တော့မှာကို ငါ စိုးရိမ်မိတယ်"
တိတ်ဆိတ်နေသော အငွေ့အသက်မှာ တဖြည်းဖြည်း သက်ဝင်လာသည်။ သစ္စာရှိသော ဝန်ကြီးများမှာ အလွန်အမင်း စိတ်လှုပ်ရှားသွားကြပြီး ဖန့်ချန်နှင့် ကျိချုံယွန်းတို့ဘက်သို့ မကြာခဏ လှည့်ကြည့်နေကြသည်။
ကျိချုံယွန်းသည် တည်ငြိမ်အောင် ကြိုးစားနေသော်လည်း သူ၏ မျက်လုံးထဲမှ တုန်လှုပ်မှုကိုတော့ ဖုံးကွယ်ထားနိုင်ခြင်း မရှိပေ။
ကျင့်ကြံသူတွေက စတုတ္ထမင်းသမီးကို သူတို့ဘေးမှာ ခစားဖို့ ရွေးချယ်ခဲ့တယ် ဟုတ်လား.
"ဒါနဲ့ ကျားဖြူအင်ပါယာ စစ်သေနာပတိချုပ်ရဲ့သား လင်လီရယ်၊ အဆင့် ၆ အင်ပါယာက ကျင့်ကြံသူနှစ်ယောက်ရယ်လည်း ရောက်နေကြတယ် ဒီဆရာကြီး နှစ်ယောက်က မြင့်မြတ်တဲ့ သွေးမျိုးနွယ်တွေ ဖြစ်တာကြောင့် သူတို့ကို မစော်ကားမိအောင် သတိထားကြပါ"
ဟု ဧကရာဇ်က ထပ်လောင်းပြောကြားလိုက်သည်။
သူပြောရင်းနှင့် သူ၏ အကြည့်မှာ ဖန့်ချန်နှင့် ကျိချုံယွန်းတို့အပေါ် ကျရောက်သွားသည်။
ဧကရာဇ်က ပြုံးလျက်
"ငါတို့ရဲ့ ဧည့်သည်တော်နှစ်ယောက်က တကယ့်ကို ဂုဏ်သရေရှိလှတယ်လို့ မထင်ကြဘူးလား"
ဟု မေးလိုက်သည်။
ကျိချုံယွန်းက ခေါင်းညိမ့်ပြသည်။
"ဟုတ်ပါတယ်၊ တကယ်ကို ဂုဏ်သရေရှိလှပါတယ်"
ဖန့်ချန်က ပြုံးလိုက်သော်လည်း ဘာမှ မပြောပေ။
သို့သော် ဘေးလူများ၏ အမြင်တွင်မူ ဖန့်ချန်မှာ သတိထားနေပုံရသည်။ မင်းသားများနှင့် မင်းသမီးများသည် နောက်ထပ် ဘာဖြစ်လာမလဲဆိုသည်ကို စိတ်လှုပ်ရှားစွာ စောင့်ကြည့်နေကြသည်
လူအုပ်ကြီး ဆွေးနွေးငြင်းခုံနေကြစဉ်မှာပင် တံခါးအပြင်ဘက်၌ ပုံရိပ်လေးခု ပေါ်လာသည်။
အရှေ့ဆုံးတွင် အစ်ကိုကျိုးနှင့် အစ်မဝမ်တို့ ရှိနေပြီး၊ ဟန်ချင်းနှင့် လင်လီတို့က နောက်မှ ကပ်လိုက်လာကြသည်။
ဆွေးနွေးသံများ ချက်ချင်း ရပ်တန့်သွားပြီး လူတိုင်း သူတို့ထံသို့ အကြည့်များ ပို့လိုက်ကြသည်။ အလိုလိုပင် လူတိုင်း မတ်တတ်ရပ်လိုက်ကြသည်။
ကျိချုံယွန်းသည်လည်း မူလက မတ်တတ်ရပ်ရန် ကြံရွယ်ထားသော်လည်း ဖန့်ချန်က တည်ငြိမ်စွာ ထိုင်နေဆဲဖြစ်သည်ကို မြင်သောအခါ သူ၏ စိတ်ထဲမှ မတင်မကျဖြစ်မှုကို အတင်းအကျပ် ထိန်းချုပ်လိုက်ပြီး ဆက်လက် ထိုင်နေလိုက်သည်။
လူတိုင်း လူသစ်များကို ကြိုဆိုရန် မတ်တတ်ရပ်နေကြစဉ် ဖန့်ချန်နှင့် ကျိချုံယွန်းတို့သာ ထိုင်နေကြသဖြင့် ၎င်းမှာ သိသိသာသာ ဆန့်ကျင်ဘက် ဖြစ်နေတော့သည်။
အစ်ကိုကျိုးနှင့် အစ်မဝမ်တို့က ဖန့်ချန်ကို လှောင်ပြောင်သလို ကြည့်လိုက်ကြသည်။
တစ်ဖက်တွင်မူ ဟန်ချင်း သည် ဖန့်ချန်ကို လူသတ်လိုသော အကြည့်များဖြင့် စိုက်ကြည့်နေသည်။
လင်လီ က မျက်မှောင်ကြုတ်လိုက်သည်။
အဆင့် ၉ အင်ပါယာက ဘယ်လို ပိုးကောင်လေးကများ ကံတရား အနည်းငယ် ရပြီး ကျင့်ကြံသူ ဖြစ်လာရသလဲဆိုသည်ကို သူ မြင်ချင်နေခဲ့ခြင်း ဖြစ်သည်။
စားသောက်ပွဲကတော့ စတင်နေပါပြီ။ ဖန့်ချန် နဲ့ ကျိချုံယွန်း တို့က အားလုံး မတ်တတ်ရပ်နေချိန်မှာ ထိုင်နေကြတာကြောင့် အခြေအနေက တင်းမာလာပါပြီ။
ဟန်ချင်း ကလည်း ဖန့်ချန် ကို ကလဲ့စားချေဖို့ အဆင်သင့် ဖြစ်နေပါတယ်။