အခန်း (၂၀၁)

ရွှီရန်၏ လက်ဝယ်တွင် အဆောင်အခြေခံ ကိုးမျိုး ရှိနေပြီဖြစ်ရာ အုတ်မြစ်မှာ အနှိုင်းမဲ့ ခိုင်မာနေပြီဖြစ်သည်။ ယခုအခါ ရှေ့ဆက်ရမည့် လုပ်ငန်းစဉ်အပေါ်၌သာ အာရုံစိုက်ရန် လိုအပ်တော့သည်။

ထိုသို့ အစဉ်တစိုက် ကြိုးပမ်းသွားပါက နောင်တွင် နတ်မင်းဓားခင်း အဆောင်လက်ဖွဲ့ ၊ နတ်ဘုရား ဆင်းသက်ခြင်း အဆောင်၊ ကံကြမ္မာပြောင်းပြန်လှန် အဆောင်နှင့် အခြားသော အဆင့်မြင့် အဆောင်များ၊ ကုသခြင်းအဆောင်ထက်ပင် မနိမ့်ကျသည့် နတ်ဘုရားအဆင့် အဆောင်များကိုပါ သဘာဝအတိုင်း သင်ယူနိုင်မည်ဖြစ်သည်။

ရွှီရန်ကတော့ ရဲရဲဝံ့ဝံ့ပင် အာမခံဝံ့သည်။ သူ၏ နတ်ဘုရားအဆင့် အဆောင်များသည် အဆောင်လက်ဖွဲ့ ကလဲ့စားချေနတ်ဘုရား၏ အဆောင်များထက် သေချာပေါက် ပိုမို အစွမ်းထက်လိမ့်မည်ဆိုသည်ပင်။

ဤသို့ တွေးတောရင်း ရွှီရန်သည် အကြည့်ကို ပြန်လည် စုစည်းလိုက်သည်။

“ပြီးပါပြီ အန်တီလု”

အန်တီလုမှာ အံ့အားသင့်သွားပြီး “ပထမဗားရှင်း နက်နဲသောအဆောင်တွေကို နားမလည်နိုင်လို့လား အဲဒါကြောင့် ဒီလောက်မြန်မြန် ပြီးသွားတာလား” ဟု မေးမြန်းသည်။

ရွှီရန်က ပုခုံးတွန့်ပြကာ “နားမလည်နိုင်တာတော့ အမှန်ပါပဲ။ ဒါပေမဲ့ ဒီလောက်ရခဲ့တဲ့ ရလဒ်တွေနဲ့တင် လုံလောက်နေပါပြီ” ဟု ဆိုသည်။

“ကောင်းပြီလေ”

သူတို့နှစ်ဦးသည် ပခုံးချင်းယှဉ်လျက် ရတနာတိုက်အတွင်းမှ ထွက်ခွာလာခဲ့ကြသည်။ ကျောင်းအုပ်ကြီးမှာမူ အစည်းအဝေး တက်နေဆဲပင်။

“ကျောင်းအုပ်ကြီးကို ခဏစောင့်ဦးနော် အစည်းအဝေးက ညနေ ခြောက်နာရီလောက်မှ ပြီးမှာဆိုတော့ နောက်ထပ် နှစ်နာရီလောက် လိုသေးတယ်”

အန်တီလုက ပြောသည်။

ရွှီရန်က ခေါင်းညိတ်ပြရင်း “ဒါဆိုရင် စောစောက သုတေသနလုပ်ထားတာတွေကို ကျွန်တော် စမ်းကြည့်ချင်လို့ ကျင့်စဉ်ခန်းတစ်ခုလောက် ရှာလိုက်ဦးမယ်” ဟု ဆိုသည်။

“ငါ လိုက်ပို့ပေးမယ်လေ”

ကျင့်စဉ်ခန်းသို့ ရောက်သောအခါ ရွှီရန်သည် မစောင့်နိုင်တော့ဘဲ အဆောင်စက္ကူတစ်ရွက်ကို ထုတ်ယူကာ စူးစိုက်၍ ရေးထွင်းတော့သည်။ ရွှေနီရောင် လိုင်းများမှာ စက္ကူပေါ်တွင် ဝဲပျံနေပြီး လျှို့ဝှက်ဆန်းကြယ်သော အင်အားစုများမှာ တစ်ခုနှင့်တစ်ခု ပေါင်းစပ်လျက် တောက်ပသော အလင်းတန်းများ ဖြာထွက်လာသည်။

မကြာမီမှာပင် အခြေခံအဆင့် ကျင့်ကြံခြင်းအဆောင်မှာ ခမ်းနားထည်ဝါစွာ ပေါ်ထွက်လာတော့သည်။

“ဝါးးး”

အဆောင်လက်ဖွဲ့ကို ခါယမ်းကြည့်လိုက်ရင်း ရွှီရန်၏ မျက်ဝန်းများမှာ စိတ်အားထက်သန်မှုတို့ဖြင့် တောက်ပလာသည်။

သူ၏ စိတ်အာရုံကို လှည့်ပတ်လိုက်သည်နှင့် ရွှေရောင်အလင်းတန်းများ ဖြာထွက်နေသော အခြေခံအဆင့် ကျင့်ကြံခြင်းအဆောင်မှာ ရင်ဘတ်ပေါ်တွင် ရွှေချထားသည့်အလား ကပ်ပါသွားတော့သည်။ မမြင်ရသော ဆန်းကြယ်သည့် အင်အားစုတစ်ခုမှာလည်း ရွှီရန်၏ တစ်ကိုယ်လုံးကို လွှမ်းခြုံသွားသည်။

ရွှီရန်သည် သူ၏ သွေးကြောများအတွင်းရှိ သွေးစွမ်းအင်စီးဆင်းမှုနှုန်းမှာ သိသိသာသာ မြန်ဆန်လာသည်ကို ခံစားလိုက်ရသည်။ နတ်ဘုရားတစ်ပိုင်း ကျင့်ကြံခြင်း သံလိုက်စက်ကွင်းကို ဖြတ်သန်းသည့် အရှိန်မှာလည်း ပိုမိုမြင့်တက်လာခဲ့သည်။

“တကယ်ကို အံ့ဩစရာပဲ။ ဒြပ်ဆွဲအားကျင့်စဉ်ခန်းမှာဆိုရင် သွေးစွမ်းအင် အနည်းငယ် တိုးဖို့တောင် အကြာကြီး လေ့ကျင့်ရတာ။ အခုတော့ ဒီအခြေခံကျင့်ကြံခြင်းအဆောင် တစ်ခုတည်းနဲ့တင် နေ့စဉ် သွေးစွမ်းအင် တိုးတက်မှုနှုန်းကို ၅၀ ရာခိုင်နှုန်းအထိ မြှင့်တင်ပေးနိုင်တယ်”

အမှန်အတိုင်းပြောရလျှင် ဤမြှင့်တင်ပေးမှုမှာ ကြောက်စရာကောင်းလောက်အောင်ပင် များပြားလှသည်။

အသက်ရှစ်နှစ်အရွယ်မှစ၍ ရွှီရန်၏ ကျင့်ကြံမှုအရှိန်မှာ တစ်စိုက်မတ်မတ် တိုးတက်လာခဲ့ရာ အစပိုင်းတွင် တစ်နေ့လျှင် ၁၀၁ မှတ်သာ ရှိသော်လည်း ယခုအခါ ၁၄၀ မှတ်အထိ ရှိနေပြီဖြစ်သည်။ အကယ်၍ အခြေခံကျင့်ကြံခြင်းအဆောင်၏ အကူအညီပါ ရရှိမည်ဆိုပါက တစ်နေ့လျှင် ၂၁၀ မှတ်အထိ တိုးတက်လာမည် ဖြစ်သည်။

ထိုသို့ဆိုလျှင် တစ်နှစ်အတွင်း သွေးစွမ်းအင် ၇၆,၆၅၀ အထိ ဒုံးပျံကဲ့သို့ မြင့်တက်သွားမည်

ဖြစ်ပြီး နှစ်စဉ် သွေးစွမ်းအင် ၂၅,၀၀၀ ခန့်ကို ပိုမိုရရှိလာမည် ဖြစ်သည်။

“ငါ့လို စူပါပါရမီရှင်မျိုးက ဒီလိုကျင့်စဉ်စနစ်ကိုပါ ပေါင်းစပ်လိုက်မယ်ဆိုရင်တော့ အနှိုင်းမဲ့သွားပြီပေါ့”

“တစ်ခုတည်းသော ဘေးထွက်ဆိုးကျိုးကတော့ အစားပိုစားလာရတာပဲ။ ဒါက ရေးထွင်းရတာ မခက်ခဲတာကြောင့် ကျားမလေးတို့၊ နောက်ပြီး ကျန်တဲ့ကလေးငယ်တွေကိုပါ ဝေမျှပေးလို့ရတယ်”

သူက တွေးတောလိုက်သည်။

ရွှီရန်၏ မျက်ဝန်းများမှာ တောက်ပသွားသည်။ ဤအဆောင်သည် ကမ္ဘာကြီးကိုပင် ပြောင်းလဲပစ်နိုင်ကြောင်း သူသဘောပေါက်လိုက်သည်။ အကယ်၍ ယွဲ့အဆင့်ကဲ့သို့သော အစွမ်းထက် ကျင့်ကြံသူများသာ အသုံးပြုမည်ဆိုပါက ကျင့်ကြံမှုအရှိန်မှာ တစ်ဝက်ခန့် တိုးလာမည်ဖြစ်ရာ တကယ့်ကို ကြောက်မက်ဖွယ်ကောင်းလှပေမည်။

ရွှီရန်သည် အသာအယာ ခေါင်းညိတ်လိုက်ပြီး ကျင့်စဉ်ခန်းအတွင်း၌ပင် အဆောင်များကို ဆက်လက်ရေးထွင်းရန် အာရုံစိုက်လိုက်သည်။

[အခြေခံအဆင့် အင်အားပြန်လည်ဖြည့်တင်းခြင်းအဆောင်: သွေးစွမ်းအင် ပြန်လည်ပြည့်ဖြူးမှုနှုန်း +၅၀%...]

[အခြေခံအဆင့် ခွန်အားအဆောင်: ရုပ်သေးနှင့် လက်နက်များ၏ ကြံ့ခိုင်မှု +၅၀%...]

[အခြေခံအဆင့် ဝိဇ္ဇာအဆောင်: ခန္ဓာကိုယ်၏ ခံနိုင်ရည်နှင့် ကြံ့ခိုင်မှု +၅၀%...]

အဆောင်လက်ဖွဲ့တစ်ခုချင်းစီမှာ အကောင်းဆုံးထဲက အကောင်းဆုံးတွေချည်းပင်။

အထူးသဖြင့် အခြေခံအဆင့် ဝိဇ္ဇာအဆောင်ကိုသာ ရွှီရန်ကိုယ်တိုင် အသုံးပြုမည်ဆိုပါက သွေးစွမ်းအင် ၁၅၀,၀၀၀ ခန့်ရှိသော တိုက်ကွက်များကိုပင် လက်ဗလာဖြင့် ဖမ်းယူတားဆီးနိုင်စွမ်း ရှိသွားမည်ဖြစ်သည်။

ရုပ်သေးရုပ်များအတွက်မူ အခြေခံအဆင့် ခွန်အားအဆောင်ကို အသုံးပြုလိုက်သည်နှင့် ၎င်းတို့၏ သတ်ဖြတ်နိုင်စွမ်းအဆင့်သည် ၁၅၀,၀၀၀ မှ ၂၂၅,၀၀၀ အထိ ခုန်တက်သွားမည်ဖြစ်သည်။

တကယ့်ကို မယုံနိုင်စရာပင်။

ရွှီရန်က ခပ်ဖွဖွ ပြုံးလိုက်သည်။ ဤအရာသည် အမှန်တကယ်ပင် အံ့ဩစရာကောင်းလှသည်။

အဓိကအချက်မှာ... ၎င်းသည် ယုံကြည်ခြင်းအဆောင်လက်ဖွဲ့၏ အကြီးစားအောင်မြင်မှုအဆင့်မျှသာ ရှိသေးခြင်းဖြစ်သည်။ အကယ်၍ နတ်ဘုရားအတွေးအမြင်အဆောင်အဆင့်သို့သာ ရောက်ရှိသွားပါက မည်မျှအထိ ကြောက်မက်ဖွယ်ကောင်းမည်ကို စိတ်ကူးကြည့်ရန်ပင် ခက်ခဲလှသည်။

"နောက်ပိုင်းမှ ရရှိမယ့် မှော်စွမ်းရည်တွေက ဘာလို့ ပေါ်ထွက်လာဖို့ ဒီလောက်ခက်ခဲနေရတာလဲဆိုတာ မဆန်းတော့ဘူး"

"ဒါတွေက ကမ္ဘာ့နိယာမတွေကိုပါ ဆန့်ကျင်နိုင်လောက်အောင် စွမ်းအားကြီးလွန်းလို့ကိုး"

ရွှီရန်မှာ မအောင့်နိုင်ဘဲ လျှာသပ်မိသွားသည်။ ပေါ်ထွက်လာရန် ခက်ခဲသော စူပါပေါက်ကွဲအားပါသော ဓားချက်ဖြစ်စေ၊ သာ၍ခက်ခဲသော ယုံကြည်ခြင်းအဆောင်လက်ဖွဲ့ဖြစ်စေ ၎င်းတို့အားလုံးကို စူပါနတ်ဘုရားအဆင့် စွမ်းရည်များ ဟု ခေါ်ဆိုထိုက်သည်။

"ငါ့ရဲ့ နောက်ထပ် ပေါ်ထွက်လာမယ့် စူပါစွမ်းရည်က ဘာဖြစ်မလဲဆိုတာ တွေးကြည့်ရင်း ရင်ခုန်မိတယ်"

ရွှီရန်၏ အကြည့်များမှာ စူးရှတောက်ပနေသည်။ သူသည် အခြေခံအဆင့် ကျင့်ကြံခြင်းအဆောင် အခု ၁၀၀ ခန့်ကို အေးအေးဆေးဆေးပင် ထပ်မံရေးထွင်းလိုက်သည်။

နှစ်နာရီတာ အချိန်မှာ မျက်တောင်တစ်ခတ်အတွင်း ကုန်ဆုံးသွားခဲ့သည်။ အချိန်ကို ကြည့်လိုက်သောအခါ ကျောင်းအုပ်ကြီး၏ အစည်းအဝေး ပြီးလောက်ပြီ ဖြစ်သည်။

သူသည် နေရာမှ ထရပ်လိုက်သည်။

အစည်းအဝေးခန်းမအပြင်ဘက်သို့ ရွှီရန် ရောက်ရှိသွားချိန်တွင် အစည်းအဝေးမှာ အချိန်ကိုက်ပင် ပြီးဆုံးသွားခဲ့သည်။

အစည်းအဝေးတက်ရောက်လာသူများသည် ခန်းမအတွင်းမှ တစ်ဦးပြီးတစ်ဦး ထွက်ခွာလာကြရာ ရွှီရန်ကို မြင်သောအခါ အားလုံးက အံ့အားသင့်သွားကြသည်။

“ဒါ အရာရှိလေး မဟုတ်လား”

“အရာရှိလေးက ကျောင်းအုပ်ကြီးဆီ လာတာလား ဒါမှမဟုတ် စစ်ဆေးရေးမှူးယဲ့ဆီ လာတာလား”

ရွှီရန်မှာ ကြောင်တောင်တောင်ဖြစ်သွားပြီး “...”

ဟင် ငါ့ကို ပြောနေတာလား။ အရာရှိလေးတဲ့လား။

ရွှီရန်၏ အံ့အားသင့်နေသော အမူအရာကို မြင်သော်လည်း လူတိုင်းက သူ့ကို လက်ပြနှုတ်ဆက်ကြသည်။

“အော်... ဟုတ်ကဲ့ အားလုံးပဲ မင်္ဂလာပါခင်ဗျာ...”

ရွှီရန် အနည်းငယ် အနေရခက်သွားမိသည်။ သို့သော် သူ ပြန်စဉ်းစားမိသည်မှာ သူ၌ အထူးတပ်မှူးတံဆိပ်ရှိပြီး ဦးလေးယဲ့ဖျင်ထံသို့လည်း မကြာခဏ လာရောက်လေ့ရှိသည်။ ထို့ပြင် နတ်ဘုရားတစ်ပိုင်း မူကြိုကျောင်း၏ စူပါပါရမီရှင်တစ်ဦးလည်း ဖြစ်ရာ သူ့ကို အရာရှိလေးဟု ခေါ်ဝေါ်ကြသည်မှာ ပုံမှန်ပင် ဖြစ်ပေလိမ့်မည်။

သူသည် ဂုဏ်သိက္ခာရှိသော ပုဂ္ဂိုလ်တစ်ဦးပင်။ သူ၏ အဆင့်အတန်းမှာလည်း နိမ့်ကျလှသည်မဟုတ်ပေ။

ရွှီရန်သည် တံခါးဝတွင် ရပ်ကာ လူတိုင်းကို နှုတ်ဆက်ပြီး အစည်းအဝေးတက်သူအားလုံး ထွက်သွားသည်အထိ စောင့်ဆိုင်းနေလိုက်သည်။ ထို့နောက်မှ တံခါးကို တွန်းဖွင့်ကာ အစည်းအဝေးခန်းမအတွင်းသို့ ကြည့်လိုက်ရာ ရင်းနှီးသော မျက်နှာအချို့ကို တွေ့လိုက်ရသည်။ သူတို့မှာ ကျောင်းအုပ်ကြီး၊ ဦးလေးယဲ့ဖျင်၊ အကြီးအကဲ ဖုန်းထန်၊ ဒုတိယအကြီးအကဲဖြစ်သူ ရှင်းလင်းရေးတပ်ဖွဲ့မှူး ယွမ်ယန်နှင့် တတိယအကြီးအကဲဖြစ်သူ စုံစမ်းစစ်ဆေးရေးတပ်ဖွဲ့မှူး ဟယ်စီဖန်းတို့ ဖြစ်ကြသည်။

ကျောင်းအုပ်ကြီးမှာ စားပွဲပေါ်ရှိ စာရွက်စာတမ်းများကို သိမ်းဆည်းနေစဉ် ရွှီရန် ရောက်လာသည်ကို ခံစားမိ၍ ခေါင်းမော့ကြည့်လိုက်သည်။

“သားငယ် ရွှီရန်... သုတေသနက ဘယ်လိုအခြေအနေရှိလဲ”

ရွှီရန်က အနားသို့ လျှောက်သွားရင်း “အတော်လေး ကောင်းပါတယ်ခင်ဗျာ” ဟု ပြန်ဖြေလိုက်သည်။

ကျောင်းအုပ်ကြီးက သူ့ကို သံသယမျက်လုံးဖြင့် စေ့စေ့စပ်စပ် ကြည့်လိုက်ပြီး “အတော်လေး ကောင်းရုံပဲလား။ မင်းရဲ့ မျက်နှာပေးကတော့ အဲဒီလိုမဟုတ်ဘဲ လုံးဝပြည့်စုံနေတဲ့ပုံပဲ” ဟု ဆိုသည်။

ရွှီရန်မှာ ပုခုံးတွန့်ပြလိုက်သော်လည်း မည်သို့ ပြန်လည်ချော့မော့ပြောရမည်ကို မစဉ်းစားရသေးပေ။ ထိုစဉ်မှာပင် ဦးလေးယဲ့ဖျင်နှင့် တပ်မှူးအချို့ အနားသို့ ရောက်ရှိလာကြသည်။

ယဲ့ဖျင်: “သားလေး... မင်း ဒီနေ့ ဘာကိစ္စရှိလို့ ရောက်လာတာလဲ”

ဖုန်းထန်က ရွှီရန်ကို ကြင်နာစွာ ပြုံးပြရင်း “မတွေ့တာ တော်တော်ကြာပြီပဲ။ ကောင်လေးက ဒီလောက်တောင် အရပ်ရှည်လာတာလား။ နောက်ဆုံးတစ်ခါ ငါတွေ့တုန်းက သူ့မျက်နှာလေးက ကလေးရုပ်လေးပဲ ရှိသေးတာ။ အခုတော့ တည်ငြိမ်ရင့်ကျက်တဲ့ အသွင်လေးတွေ ပေါ်နေပြီပဲ” ဟု ချီးကျူးစကား ဆိုသည်။