အင်မော်တယ်သတ်လှံ

အပြင်ဘက်သို့ရောက်ရှိလာချိန်တွင် လူအားလုံးစုဝေးနေကြသည်ကို တွေ့လိုက်ရ၏။ ဓားနယ်မြေ၊ မိစ္ဆာနယ်မြေနှင့် ကောင်းကင်မိစ္ဆာနယ်မြေတို့မှ ကျွမ်းကျင်သူအားလုံးရှိနေကြပြီး ရှေ့မှလူအုပ်စုတစ်စုနှင့် ထိပ်တိုက်ရင်ဆိုင်နေကြသည်။

ကျန်းချန်ရောက်လာသည်ကိုမြင်လျှင် နယ်ပယ်အသီးသီးမှလူများက ကြိုဆိုကြသည်။

"ဂိုဏ်းချုပ်ကျန်း"

မြင်ကွင်းမှာ ခမ်းနားလှပြီး စူပါစတားတစ်ယောက်ကို ကြိုဆိုသည့်အတိုင်းပင်။ အစ်ကိုကြီးချန်က ကျေနပ်စွာဖြင့် လက်ဝှေ့ယမ်းပြလိုက်သည်။ ဤအားပေးအဖွဲ့မှာ မဆိုးပေ။

သို့သော်လည်း လူအများအပြားက သူ့ကို တိတ်တဆိတ်အကဲခတ်ဝေဖန်နေကြသည်ကို သူမသိပေ။ ဥပမာအားဖြင့် မိစ္ဆာသူတော်စင်ရှုယွမ်သည် ဤနေရာသို့ရောက်ကတည်းက သူ့ကို လာရောက်ကြိုဆိုခြင်းမရှိသဖြင့် အတော်လေးမကျေမနပ်ဖြစ်နေ၏။

သူတို့နှင့် ဆန့်ကျင်ဘက်တွင်ရှိနေသော လူအုပ်စုမှာမူ အင်မော်တယ်အကြွင်းအကျန်မျိုးနွယ်စု၏ အခြားဌာန ၇ ခုမှလူများ ဖြစ်ကြသည်။

"ချင်းစော့... မင်းကထွက်ပြေးဖို့ ပြင်ပလူတွေကို အကူအညီတောင်းနေတာလား"

ရှေ့ဆုံးမှဦးဆောင်လာသူမှာ စစ်နတ်ဘုရားတစ်ပါးဆင်းသက်လာသည့်အလား ချပ်ဝတ်တန်ဆာအပြည့်ဝတ်ဆင်ထားသည့် အရပ်ရှည်ရှည်လူတစ်ယောက်ဖြစ်ပြီး ကောင်းကင်ယံတွင် မာန်ပါပါရပ်နေသည်။

"မင်းတို့ နှလုံးသားဌာနကတော့ တကယ်ကို တစ်နေ့ထက်တစ်နေ့နိမ့်ကျလာတာပဲ"

"အင်မော်တယ်အကြွင်းအကျန်ဌာနကိုးခုထဲမှာ မင်းတို့နဲ့တန်းတူအဆင့်သတ်မှတ်ခံရတာဟာ တကယ့်ကိုအရှက်ရစရာပဲ"

ဤစကားကိုကြားလျှင် နှလုံးသားဌာနမှအဖွဲ့ဝင်များအားလုံး ဒေါသထွက်သွား၏။ အစ်ကိုကြီးချန်မှာလည်း အံ့သြမိသွားသည်။ ဤကဲ့သို့ အဓိပ္ပာယ်မရှိသော စော်ကားမှုမျိုးမှာ မူလတန်းကျောင်းသားအဆင့်လောက်သာရှိပြီး အနှစ်သာရမရှိလှပေ။

ချင်းစော့သည် နှလုံးသားထိုးဖောက်ကန်တော့ကို ကိုင်ဆောင်ထားပြီး တင်းမာသောအမူအရာဖြင့် ပြန်ပြောလိုက်သည်။

"ကျန့်ရင်း... ရှင်က နှလုံးသားဌာနကိုအထင်သေးတယ်ဆိုမှတော့ ကိုယ့်လမ်းကိုယ်သွားကြတာပေါ့။ နှလုံးသားဌာနဘာလုပ်လုပ် ရှင့်အလုပ်မဟုတ်ဘူး"

သူမသည် ယခုအခါ ကျန်းချန်နှင့်အတူအမြဲရှိနေရန် ဆုံးဖြတ်ထားပြီးဖြစ်ရာ ဌာနကိုးခုအရေးကို ဂရုမစိုက်တော့ပေ။

"ဘယ်လောက်တောင် ရဲတင်းလိုက်သလဲ"

တိုက်ပွဲဌာနမှ အကြီးအကဲများနှင့်အဖွဲ့ဝင်များမှာ ဒေါသတကြီးဖြင့် အော်ဟစ်လိုက်ကြသည်။

"ချင်းစော့... နင် ဒါဘာကိုဆိုလိုတာလဲ"

"နင်တို့နှလုံးသားဌာနက အင်မော်တယ်အကြွင်းအကျန်မျိုးနွယ်စုထဲကနေ ထွက်ချင်နေတာလား"

"နင်တို့နှလုံးသားဌာနက ပိုပိုပြီးဆိုးလာတာပဲ၊ နင်တို့က အင်မော်တယ်အကြွင်းအကျန်မျိုးနွယ်စုအတွက် တကယ့်အရှက်ရစရာပဲ"

"သူတို့ကို စာရင်းထဲကပယ်ဖျက်ပြီး နှလုံးသားထိုးဖောက်ကန်တော့ကို ပြန်သိမ်းလိုက်"

တိုက်ပွဲဌာန၏ခေါင်းဆောင်ကျန့်ရင်းက ရွှေရောင်လှံတစ်စင်းကို ရှေ့သို့ချိန်ရွယ်လိုက်သည်။ ချင်းစော့သာမက ဆန့်ကျင်ဘက်ရှိ အခြားသူများပင်လျှင် ပစ်မှတ်ထားခံရသည့်ခံစားချက်ကို ခံစားလိုက်ရ၏။ ထိုလှံအတွင်း၌ သူတို့ကိုဖျက်ဆီးပစ်နိုင်သော ကြောက်မက်ဖွယ်စွမ်းအားများ ကိန်းအောင်းနေပုံရသည်။

"အင်မော်တယ်သတ်လှံ"

ဓားသူတော်စင်ကွေ့ချန်း၏ မုတ်ဆိတ်ဖြူများ အနည်းငယ်တုန်ယင်သွားသည်။ ဤအဆင့်မြင့်ရှေးဟောင်းပစ္စည်းအကြောင်းကို သူကြားဖူးသည်မှာကြာလေပြီ။

ရွှေနဂါးဘုရင်က စပ်စုစွာဖြင့်မေးလိုက်သည်။

"အင်မော်တယ်သတ်လှံဆိုတာဘာလဲ။ ရှေးခေတ်ကကျန်ရစ်ခဲ့တဲ့ အင်မော်တယ်လက်နက်လား"

သူ့ဘေးရှိ မိစ္ဆာသူတော်စင်ရှုယွမ်က ခေါင်းခါပြလိုက်၏။ သူသည် ထိုရွှေရောင်လှံကို အလွန်လေးနက်သောအကြည့်ဖြင့် စိုက်ကြည့်နေသည်။

"အင်မော်တယ်လက်နက်မဟုတ်ဘူး၊ အဆင့်မြင့်ရှေးဟောင်းပစ္စည်းပဲ"

"အဆင့်မြင့်ဟုတ်လား"

ဘေးရှိလူများ အံ့အားသင့်သွားကြသည်။ သူတို့ထဲမှအချို့မှာလည်း ကံကောင်း၍ ရှေးဟောင်းပစ္စည်းများရရှိထားကြသော်လည်း အများစုမှာအဆင့်နိမ့်များသာဖြစ်ပြီး အမြင့်ဆုံးမှာ အလယ်အဆင့်သာ။ အဆင့်မြင့်ရှေးဟောင်းပစ္စည်းဆိုသည်မှာ အောက်လောကတွင် မရှိသင့်သောအရာဖြစ်သည်။

"အင်မော်တယ်အကြွင်းအကျန်မျိုးနွယ်စုမှာ အမွေဆက်ခံတဲ့ ရှေးဟောင်းပစ္စည်းကိုးခုရှိတယ်။ အားလုံးက အဆင့်မြင့်တွေချည်းပဲ၊ တစ်ခုချင်းစီမှာ အံ့ဖွယ်နတ်ဘုရားစွမ်းအားတွေရှိကြတယ်"

ဓားသူတော်စင်ကွေ့ချန်းက ဖြည်းဖြည်းချင်းရှင်းပြသည်။

"အဲဒီထဲမှာ အင်မော်တယ်သတ်လှံက သတ်ဖြတ်ခြင်းနဲ့ ထိုးနှက်ခြင်းကို အဓိကထားပြီး ရတနာကိုးခုထဲမှာ အန္တရာယ်အများဆုံးပဲ"

"ဒီရတနာက ဝိညာဉ်ကို တိုက်ရိုက်တိုက်ခိုက်နိုင်တယ်။ သူတော်စင်တစ်ယောက်က ကိုင်ထားမယ်ဆိုရင် သူတော်စင်အဆင့် ကျွမ်းကျင်သူကိုတောင် သတ်နိုင်တယ်"

"အဲလောက်တောင်စွမ်းတာလား"

လူတိုင်း အံ့သြတုန်လှုပ်သွားကြသည်။

"ဓားသူတော်စင်အိုကြီးပြောတာမှန်တယ်"

မိစ္ဆာသူတော်စင်ရှုယွမ်က လေးနက်သောအသံဖြင့်ဆိုသည်။

"လွန်ခဲ့တဲ့နှစ်ပေါင်းခုနစ်သန်းက တိုက်ပွဲဌာနရဲ့ခေါင်းဆောင်တစ်ယောက်ဟာ အင်မော်တယ်သတ်လှံကိုကိုင်ပြီး ငါ့ရဲ့မိစ္ဆာနယ်မြေကို ကျူးကျော်ခဲ့ဖူးတယ်"

"အဲဒီလူက သူတော်စင်အစောပိုင်းအဆင့်မှာပဲ ရှိသေးတာ။ ဒါပေမဲ့ သူက ငါတို့ရဲ့မိစ္ဆာသူတော်စင်ငါးယောက်ကို ဆက်တိုက်သတ်ခဲ့တယ်။ အဲဒီထဲမှာ သူတော်စင်နောက်ဆုံးအဆင့်တစ်ယောက်တောင်ပါတယ်"

"သူ့ကျေးဇူးကြောင့် အရင်က တိုက်ခိုက်နေပြီးဖရိုဖရဲဖြစ်နေတဲ့ မိစ္ဆာနယ်မြေဟာ ပထမဆုံးအကြိမ်အဖြစ် စည်းလုံးသွားခဲ့တယ်၊ အဲဒီတော့မှပဲ ငါတို့ အဲဒီလူကိုသတ်နိုင်ခဲ့တာ။ ဒါပေမဲ့ အင်မော်တယ်သတ်လှံကိုတော့ ထွက်ပြေးသွားတဲ့ တိုက်ပွဲဌာနအဖွဲ့ဝင်တွေက ပြန်ယူသွားနိုင်ခဲ့ကြတယ်"

နယ်ပယ်အသီးသီးမှ ကျွမ်းကျင်သူများမှာ ထိုအကြောင်းကိုကြားပြီး မှင်တက်သွားကြသည်။ သူတော်စင်အစောပိုင်းအဆင့်က သူတော်စင်နောက်ဆုံးအဆင့်ကို သတ်ခဲ့တာလား။ ပြီးတော့ နယ်မြေကျော်ဖြတ်ခြင်းကြောင့်ဖြစ်ရသည့် စည်းမျဉ်းများ၏ဖိနှိပ်မှုကို ခံထားရချိန်လည်းဖြစ်၏။ ဤအင်မော်တယ်သတ်လှံမှာ ကြောက်စရာကောင်းလွန်းလှသည်။

တိုက်ပွဲဌာနဆိုသည်မှာ ယခင်က မည်သူမှသိပ်မကြားဖူးကြ။ အောက်လောကတွင် ဤမျှအစွမ်းထက်သောမျိုးနွယ်စုရှိနေသည်ကို ယခုမှသိကြတော့သည်။ ဤအမြစ်မဲ့ကျွန်းတွင် နယ်မြေကျော်ဖြတ်ခြင်းကြောင့်ဖြစ်ရသည့် စည်းမျဉ်းဖိနှိပ်မှုများမရှိသဖြင့် သူတို့သည် အောက်လောကတွင် အနှိုင်းမဲ့ဖြစ်နေပေတော့မည်။

ထိုအခါမှသာ အစ်ကိုကြီးချန်သည် အဘယ်ကြောင့် ပိဖုန်းက ပုံရိပ်ယောင်များစွာဖန်တီးပြီး နယ်ပယ်အသီးသီးသို့ သွားခဲ့ရသည်ကို နားလည်သွားတော့သည်။ မလွဲသာ၍ လုပ်ခဲ့ရခြင်းပင်။

ကျန့်ရင်းသည် နယ်ပယ်အသီးသီးမှလူများ၏ ဆွေးနွေးမှုနှင့် အံ့သြမှုများကိုကြားသောအခါ ပို၍မာန်တက်လာသည်။

"လွန်ခဲ့တဲ့ရက်အနည်းငယ်က ငါဟာ အစစ်အမှန်အင်မော်တယ်ဟွမ်းချုံနဲ့ အစစ်အမှန်အင်မော်တယ်နင်ဝူတို့နဲ့ တိုက်ပွဲကြီးတစ်ခုဆင်နွှဲခဲ့တယ်။ ငါတစ်ယောက်တည်းက သူတို့နှစ်ယောက်ကိုရင်ဆိုင်ခဲ့တာ၊ လူအင်အားမမျှလို့သာ အနိုင်အရှုံးမသေချာဘဲ ကပ်ပြီးရှုံးခဲ့တာ"

လူအုပ်ကြီးမှာ ထပ်မံဆူညံသွားပြန်သည်။ သူတို့လည်း ထိုအစစ်အမှန်အင်မော်တယ်များနှင့် တိုက်ခဲ့ကြသည်လော။

တစ်ယောက်တည်းက နှစ်ယောက်ကိုရင်ဆိုင်ပြီး ကပ်ပြီးရှုံးခဲ့တာလား။ ဤတိုက်ခိုက်ရေးစွမ်းအားမှာ ဓားနယ်မြေနှင့် မိစ္ဆာနယ်မြေခေါင်းဆောင်များထက်ပင် သာလွန်နေလေပြီ။ သူတို့မှာ အင်မော်တယ်တစ်ယောက်ကိုရင်ဆိုင်ရန်ပင် အင်အားစုပေါင်းပြီး အနိုင်နိုင်အသက်လုခဲ့ရသည် မဟုတ်ပါလား။

"အခုတော့ ရတနာကိုးခုစလုံးကို ထုတ်သုံးရမယ့်အချိန်ပဲ"

ကျန့်ရင်းက အသံကျယ်ကျယ်ဖြင့် အော်ဟစ်လိုက်သည်။

"ရတနာကိုးပါး အင်မော်တယ်ဝင်္ကပါကို တည်ဆောက်တာကသာ ရန်သူကိုအနိုင်ယူနိုင်မယ့် တစ်ခုတည်းသောနည်းလမ်းပဲ"

ရတနာကိုးပါး အင်မော်တယ်ဝင်္ကပါ၏ ဝင်္ကပါအချက်အချာကိုးခုဖြစ်သော ဤရှေးဟောင်းပစ္စည်းကိုးခုကို အတူတကွအသုံးပြုလျှင် အသေးစားဝင်္ကပါပုံစံတစ်ခု တည်ဆောက်နိုင်သည်။ ၎င်း၏စွမ်းအားမှာ မူလဝင်္ကပါကြီးကိုမမီသော်လည်း အဆင့်မြင့်ရှေးဟောင်းပစ္စည်းကိုးခု၏စွမ်းအားကို စုစည်းထားခြင်းဖြစ်၏။ အခြားသော ရတနာရှစ်ခု၏ အထောက်အပံ့ဖြင့် အင်မော်တယ်သတ်လှံ၏စွမ်းအားမှာ အဆပေါင်းများစွာ တိုးတက်သွားမည်။ အစစ်အမှန်အင်မော်တယ်နှစ်ယောက်ကိုရင်ဆိုင်ရန် မျှော်လင့်ချက်မရှိသည်တော့မဟုတ်။

သူ့စကားအဆုံးတွင် မိစ္ဆာသူတော်စင်ရှုယွမ်နှင့် အခြားသူများ၏မျက်လုံးများ လင်းလက်သွားကြသည်။

"ဒီဝင်္ကပါကိုသာတည်ဆောက်နိုင်ရင် ဒီဘေးဒုက္ခကို အလွယ်တကူဖြေရှင်းနိုင်မှာပဲ"

"မှန်တယ်၊ အင်မော်တယ်သတ်လှံတစ်ခုတည်းတင် ဒီလောက်စွမ်းတာ၊ ကိုးခုစလုံးရဲ့ စွမ်းအားပေါင်းလိုက်ရင် အင်မော်တယ်နယ်ပယ်ကိုပါ ရှင်းပစ်နိုင်မှာပေါ့"

ကျန့်ရင်း၏လက်ထဲမှလှံမှာ ငြိမ်သက်နေသော်လည်း ရွှေရောင်မီးလျှံများမှာ တိုက်ခိုက်လိုစိတ်များ ပြည့်နှက်နေသည်။

"ချင်းစော့... နင့်မှာ ရွေးချယ်စရာနှစ်ခုရှိတယ်"

"နှလုံးသားထိုးဖောက်ကန်တော့ကိုယူပြီး ငါနဲ့အတူစစ်တိုက်မလား"

"နင်ငြင်းမယ်ဆိုရင်တော့ နင်တို့နှလုံးသားဌာနဟာ နှလုံးသားထိုးဖောက်ကန်တော့ကိုပိုင်ဆိုင်ဖို့ မထိုက်တန်တော့ဘူး"

လူတိုင်း၏အကြည့်မှာ ချင်းစော့ထံသို့ ကျရောက်သွားသည်။ ၎င်းသည် အထက်လောကမှရန်သူကိုတွန်းလှန်ရန် ခမ်းနားသောလုပ်ရပ်ဖြစ်သဖြင့် ငြင်းစရာအကြောင်းမရှိဟု သူတို့ယူဆကြ၏။

သို့သော်လည်း ချင်းစော့က ခေါင်းခါလိုက်သည်။

"ငါတို့နှလုံးသားဌာနဟာ အခုဆိုဂိုဏ်းချုပ်ကျန်းရဲ့ဦးဆောင်မှုအောက်မှာပဲရှိပြီး သူ့ရဲ့အမိန့်ကိုပဲနာခံမယ်"

"ဂိုဏ်းချုပ်ကျန်းမှာ ရန်သူကိုအနိုင်ယူနိုင်တဲ့အစွမ်းရှိပြီးသား၊ ဝင်္ကပါတွေမလိုဘူး"

သူမသည် မိုက်မဲသူမဟုတ်ပေ။ ရတနာကိုးပါး အင်မော်တယ်ဝင်္ကပါ၏ အချက်အချာမှာ အင်မော်တယ်သတ်လှံဖြစ်ပြီး ဝင်္ကပါ၏အနှစ်သာရမှာ အခြားရတနာများ၏စွမ်းအားကို တစ်ခုတည်းသို့ စုစည်းပေးရန်ဖြစ်သည်။ ၎င်းမှာ အင်မော်တယ်သတ်လှံ၏စွမ်းအားကို ခေတ္တမျှ အဆပေါင်းများစွာမြှင့်တင်ရန်အတွက် အခြားရတနာရှစ်ခု၏အဆီအနှစ်ကို လောင်ကျွမ်းစေခြင်းနှင့်အတူတူပင်။

ဤတိုက်ပွဲနိုင်ခဲ့လျှင်ပင် နှလုံးသားထိုးဖောက်ကန်တော့ ထိခိုက်ပျက်စီးသွားမည်ဖြစ်ပြီး ၎င်း၏စွမ်းအားအလွန်လျော့နည်းသွားမည်ဖြစ်သည့်အပြင် တိုက်ပွဲဌာန၏ ဗိုလ်ကျတတ်သောပုံစံနှင့်ဆိုလျှင် တိုက်ပွဲပြီးနောက် နှလုံးသားထိုးဖောက်ကန်တော့ကို ပြန်ရပါ့မလားဆိုသည်မှာလည်း မေးခွန်းထုတ်စရာပင်။

တိုက်ပွဲဌာန၏နောက်ကွယ်တွင် တိတ်တဆိတ်ရပ်နေကြသော အခြားဌာနအချို့ကိုကြည့်ရုံနှင့် သိနိုင်သည်။ သူတို့မှာ ဖိနှိပ်ခံထားရခြင်းဖြစ်ပြီး စိတ်ထဲတွင်တော့မလိုလားကြ။

"ပြင်ပရန်သူကိုတွန်းလှန်ရမယ့်အခြေအနေကြီးမှာ နင်က တရားမျှတမှုကိုလျစ်လျူရှုပြီး ပြင်ပလူနောက်လိုက်ဖို့ရွေးချယ်တယ်၊ တစ်မျိုးနွယ်စုလုံးကို သစ္စာဖောက်လိုက်တာပဲ"

"ချင်းစော့... နင်နဲ့ နှလုံးသားဌာနဟာ ငါတို့ကိုအရမ်းစိတ်ပျက်စေတယ်"

ထိုအင်မော်တယ်သတ်လှံ၏ ရွှေရောင်မီးလျှံများမှာ လူများကိုဝါးမြိုတော့မည့်အလား ပိုမိုတောက်ပလာသည်။ ချင်းစော့ထပ်မံငြင်းခုံချင်သော်လည်း ကျန်းချန်က နောက်မှနေ၍ သူမကိုတားလိုက်သည်။

"ကဲ... ကဲ... မင်းတို့ပြပွဲလုပ်တာ တော်တော်လွန်နေပြီ၊ ရပ်ဖို့အချိန်တန်ပြီ"

"ရှည်ရှည်ဝေးဝေးပြောမနေနဲ့တော့"

သူပေါ်လာသည်နှင့် အရင်က ကြမ်းတမ်းနေသော ကျန့်ရင်းမှာ မျက်မှောင်ကြုတ်လိုက်သည်။

"နင်ကကျန်းချန်လား"

"ဒါဟာ ငါတို့အင်မော်တယ်အကြွင်းအကျန်မျိုးနွယ်စုရဲ့ အတွင်းရေးပဲ၊ နင်နဲ့ဘာမှမဆိုင်ဘူး"

ကျန့်ရင်းမှာ အပေါ်ယံမြင်ရသလို အရမ်းကာရောလုပ်တတ်သူမဟုတ်။ ကျန်းချန်သည် အင်မော်တယ်ကျန့်ထိုင်ကို သတ်ခဲ့သည်ဟူသောသတင်းကို သူကြားဖူးသည်။

ရိုးရိုးသားသားပြောရလျှင် အင်မော်တယ်သတ်လှံရှိသော်လည်း သူကိုယ်တိုင် ထိုသို့လုပ်နိုင်ပါ့မလားဆိုသည်ကို မသေချာပေ။ မိစ္ဆာသူတော်စင်ရှုယွမ်ကဲ့သို့ပင် ထိုသတင်းကို မယုံကြည်သော်လည်း ဘေးကင်းစေရန်အတွက် သူသည် ကျန်းချန်ကို တိုက်ရိုက်ပစ်မှတ်မထားဘဲ ချင်းစော့ကိုသာ အာရုံစိုက်နေခြင်းဖြစ်သည်။

အထူးသဖြင့် ကျန်းချန်၏နောက်ကွယ်တွင် ဓားသူတော်စင်ကွေ့ချန်းနှင့် ရွှေနဂါးဘုရင်ကဲ့သို့သော ကျွမ်းကျင်သူများရှိနေခြင်းကြောင့်ပင်။ ရတနာကိုးခု၏စွမ်းအားကို မစုစည်းနိုင်သေးမီတွင် ထိုကဲ့သို့အားကောင်းသည့်လူများကို ရန်မစရဲပေ။