ငါတို့ ဟင်းလင်းပြင်နယ်မြေရဲ့ မျက်နှာကို အပျက်မခံနဲ့

ဟင်းလင်းပြင်မျိုးနွယ်စုနှင့် အစစ်အမှန်အင်မော်တယ်လေးဦးတို့ တိုက်ခိုက်နေသည်ကိုကြည့်ပြီး ကျန်းချန်တစ်ယောက် အသာအယာခေါင်းခါလိုက်မိသည်။ ဟင်းလင်းပြင်နယ်မြေ၏ တိုက်ခိုက်ရေးစွမ်းအားမှာ အားကောင်းလှသော်လည်း အဆုံးသတ်တွင်မူ ၎င်းသည် အောက်လောကအဆင့်သာ ရှိသေးသည်။

သူတို့ထဲမှ နှစ်ယောက်ပေါင်းလျှင်ပင် အစစ်အမှန်အင်မော်တယ်တစ်ယောက်ကိုအနိုင်ယူရန် မလွယ်ကူပေ။ အထူးသဖြင့် ထိုအင်မော်တယ်လေးဦးမှာ ကျင့်ကြံသူတစ်သိန်းကျော်ကို ကွပ်ကဲနေခြင်းဖြစ်သည်။

ဟင်းလင်းပြင်မျိုးနွယ်စု ယခုအချိန်အထိတောင့်ခံထားနိုင်ခြင်းမှာ ထိုအင်မော်တယ်လေးဦးသည် ဇာတ်လမ်းဆင်နေကြပြီး သူတို့ကိုဝိုင်းမတိုက်သောကြောင့်ဖြစ်၏။ သူတို့သည် တမင်တကာ သုံးပွင့်ဆိုင်စစ်မြေပြင်တစ်ခုကို ဖန်တီးထားခြင်းပင်။

"ကြည့်ရတာ သူတို့က ငါပေါ်လာအောင် စောင့်နေကြတာပဲ"

အစ်ကိုကြီးချန်သည် ယုံကြည်မှုအပြည့်ဖြင့် သူ၏နူးညံ့သောဆံပင်များကို သပ်တင်လိုက်ပြီး ရှေးဟောင်းယန်အင်မော်တယ်ဓားကိုထုတ်ကာ အင်မော်တယ်သတ်လှံကို ခေါင်းပေါ်မြှောက်၍ ပြေးဝင်သွားတော့သည်။

"ဟင်းလင်းပြင်နယ်မြေကညီအစ်ကိုတို့... မင်းတို့ကိုကယ်ဖို့ ငါရောက်လာပြီ"

သူ၏တိုက်ခိုက်မှုမှာ ပြင်းထန်လှသည်။ သူရောက်မလာမီမှာပင် အောက်ဘက်ရှိ ကျင့်ကြံသူအုပ်စုကြီးမှာ သူ၏သူတော်စင်နယ်ပယ်ကြောင့် အပိုင်းပိုင်းအစစဖြစ်ကုန်၏။

ရှေးဟောင်းယန်အင်မော်တယ်ဓားကို ဝေ့ယမ်းလိုက်ရာ မြေပြင်သည် မီးပင်လယ်နှင့် ငရဲဘုံအလား ပြောင်းလဲသွားတော့သည်...

သူတော်စင်နယ်ပယ်၏စည်းမျဉ်းများကြောင့် မီးလျှံကမ္ဘာတစ်ခုဖြစ်ပေါ်လာ၏။ သူတော်စင်အဆင့်အောက်ရှိ ကျင့်ကြံသူများသည် ထိုစည်းမျဉ်းများ၏ တိုက်ရိုက်တိုက်ခိုက်မှုကို မတွန်းလှန်နိုင်ဘဲ ချက်ချင်းပြာဖြစ်သွားကြသည်။ သူတော်စင်အဆင့်ရှိသူများပင်လျှင် ကြာရှည်တောင့်မခံနိုင်ကြ။

ဟင်းလင်းပြင်မျိုးနွယ်စုဝင်များမှာ သူ့ကိုမမှတ်မိကြသေးပေ။

"ငါတို့ကိုကယ်မှာလား" ဟုတွေးကာ ဝေခွဲမရဖြစ်နေကြသည်။

သို့သော် အင်မော်တယ်လေးဦးမှာမူ ထိုမျှ အသိဉာဏ်မနည်းကြပေ။ ဓားသူတော်စင်ကွေ့ချန်းနှင့် မိစ္ဆာသူတော်စင်ရှုယွမ်တို့ ခန့်မှန်းခဲ့သည့်အတိုင်းပင် ထိုအင်မော်တယ်များသည် ဂိုဏ်းချုပ်ကျန်းကို သူတို့၏နံပါတ်တစ်ရန်သူအဖြစ် သတ်မှတ်ထားပြီး သူ့အကြောင်းကို သေချာလေ့လာထားကြပြီးဖြစ်သည်။

"ကျန်းချန်"

"နောက်ဆုံးတော့ ကျန်းချန်ရောက်လာပြီ"

"သူ ထောင်ချောက်ထဲကို တည့်တည့်တိုးလာပြီ"

အင်မော်တယ်လေးဦး ဝမ်းသာသွား၏။ သူတို့သည် တမင်တကာ တိုက်ပွဲတစ်ခုကိုဖန်တီးကာ ကျန်းချန်နှင့် သူ၏မဟာမိတ်များ အကွက်ထဲဝင်လာရန် စောင့်နေခဲ့ခြင်းဖြစ်သည်။

ဟင်းလင်းပြင်နယ်မြေမှလူများ အရင်ရောက်လာလိမ့်မည်ဟု သူတို့မမျှော်လင့်ထားခဲ့ပေ။ ကျန်းချန်၏ အင်မော်တယ်သတ်နိုင်သည့်အစွမ်းမှာ ပိုအရေးကြီးသည်။ ထို့ကြောင့် ငါးကြီးကြီးမိရန် ဟင်းလင်းပြင်မျိုးနွယ်စုနှင့် အချိန်ဆွဲတိုက်နေခဲ့ခြင်းပင်။ ယခု ကျန်းချန်ရောက်လာပြီဖြစ်ရာ သူတို့ အစွမ်းကုန်ထုတ်နိုင်လေပြီ။

သို့သော် ချက်ချင်းဆိုသလိုပင် သူတို့ ပြန်လည်တွေဝေသွားကြသည်။

"ဘာလို့ သူတစ်ယောက်တည်းဖြစ်နေတာလဲ"

"ဓားနယ်မြေနဲ့ မိစ္ဆာနယ်မြေကလူတွေရော ဘယ်မှာလဲ"

"ပွဲသိမ်းဖို့ အချိန်မတန်သေးဘူးထင်တယ်"

အင်မော်တယ်လေးဦးသည် အချင်းချင်းတိုက်ခိုက်နေသယောင် ဟန်ဆောင်နေသော်လည်း လျှို့ဝှက်စွာ အဆက်အသွယ်လုပ်နေကြသည်။ သူတို့ ခဏထပ်စောင့်ရန် ဆုံးဖြတ်လိုက်၏။

ဓားသူတော်စင်ကွေ့ချန်းနှင့် ရွှေနဂါးဘုရင်တို့၏စစ်တပ်ကြီး ရောက်လာမှသာ သူတို့၏အစီအစဉ်အစစ်ကို ဖော်ထုတ်မည်။

သို့သော် သူတို့မှာ အစ်ကိုကြီးချန်၏တိုက်ခိုက်မှုကို ခံလိုက်ရသည်။ သူတော်စင်နယ်ပယ် ပွင့်ထွက်လာသောအခါ အင်မော်တယ်လေးဦးစလုံး၏ တာအိုနှလုံးသားမှာ တစ်ပြိုင်နက် ဖိနှိပ်ခံလိုက်ရ၏။ အင်မော်တယ်-မိစ္ဆာ ခန္ဓာကိုယ်နှင့် သူရဲကောင်းဝိညာဉ်၏ အထောက်အပံ့ကြောင့် အင်မော်တယ်လေးဦးမှာ အငိုက်မိသွားပြီး တစ်လှမ်းချင်းဆုတ်ခွာရတော့သည်။

ဟင်းလင်းပြင်နယ်မြေမှ ထိပ်တန်းကျွမ်းကျင်သူများပင် မှင်တက်သွားကာ ရပ်ကြည့်နေမိ၏။ ကျန်းချန်ပေါ်လာသောအခါ သူတို့က မည်သူမှန်းမသိသော်လည်း ယခုအခါ အင်မော်တယ်လေးဦးကို တစ်ယောက်တည်းယှဉ်တိုက်နေသည့် ဤကြောက်စရာကောင်းသောလူကို မြင်လိုက်ရသောအခါ သေမတတ်ထိတ်လန့်သွားကြသည်။

"မဖြစ်ဘူး"

"အစီအစဉ်ကို အခုပဲစလိုက်ကြစို့"

အင်မော်တယ်လေးဦးမှာ ဆက်မစောင့်နိုင်တော့ပေ။ ဆက်ပြီးအချိန်ဆွဲနေလျှင် သူတို့ကိုယ်တိုင်သာမက သူတို့၏နောက်လိုက် သောင်းနှင့်ချီသောကျင့်ကြံသူများပါ အန္တရာယ်ရှိနိုင်၏။ ကျန်းချန်၏ တိုက်ခိုက်ရေးစွမ်းအားမှာ သူတို့မျှော်လင့်ထားသည်ထက် များစွာသာလွန်နေသည်။

အင်မော်တယ်လေးဦးသည် အရောင်မတူသည့် ပုလဲလေးလုံးကို တစ်ပြိုင်နက်ပစ်ထုတ်လိုက်ကြသည်။ ပုလဲလေးလုံး ပျံတက်သွားပြီးနောက် ချက်ချင်းပျောက်ကွယ်သွားကာ ကောင်းကင်တစ်ခုလုံး မီးခိုးရောင်သန်းသွား၏။ ကြီးမားသော မီးခိုးရောင်အလင်းတန်းကြီးတစ်ခု ကျဆင်းလာပြီး မိုင်ပေါင်းထောင်ချီသောဧရိယာကို လွှမ်းခြုံသွားသည်။

ဟင်းလင်းပြင်မျိုးနွယ်စုဝင်များမှာ အန္တရာယ်ကိုရိပ်မိပြီး ဖောက်ထွက်ရန်ကြိုးစားကြသော်လည်း ထိုမီးခိုးရောင်မြူခိုးအတားအဆီးကို မကျော်နိုင်ကြပေ။ ထိုမြူခိုးများက သူတို့ကိုတိုက်စားကာ အားနည်းသွားစေသည်။

"ဒါဘာကြီးလဲ"

"အဲဒီ အင်မော်တယ်လေးယောက်က တစ်ဖွဲ့တည်းပဲ"

"ငါတို့ ချုံခိုတိုက်ခိုက်ခံရပြီ"

သူတို့ အခုမှသတိဝင်လာကြသော်လည်း နောက်ကျသွားလေပြီ။ အစ်ကိုကြီးချန်အပါအဝင် ဟင်းလင်းပြင်နယ်မြေမှ အဖွဲ့ဝင်တစ်ထောင်နီးပါးမှာ ဝင်္ကပါကြီးထဲတွင်ပိတ်မိသွားသည်။

"ဟားဟားဟား"

"ကျန်းချန်... မင်းတော့သေပြီ"

"လေးမျက်နှာဝိညာဉ်မဲ့ဝင်္ကပါက မင်းရဲ့အသက်ကို အဆုံးသတ်ဖို့လုံလောက်တယ်"

"အင်မော်တယ်လောကမှာဆိုရင် ဒီဝင်္ကပါက ကောင်းကင်အင်မော်တယ်တစ်ယောက်ကိုတောင် သတ်နိုင်တယ်"

"အောက်လောကက ကျင့်ကြံသူတစ်ယောက်အနေနဲ့ ဒီလိုခမ်းနားတဲ့ဆက်ဆံမှုကိုခံရတာ ဂုဏ်ယူသင့်ပါတယ်"

စကားအဆုံးတွင် ဝင်္ကပါအတွင်းရှိမြူခိုးများ ပိုမိုထူထပ်လာ၏။ ဟင်းလင်းပြင်စစ်သည်တော်များသည် ပတ်ဝန်းကျင်ရှိမြူခိုးများကို ရူးသွပ်စွာ တိုက်ခိုက်ကြသော်လည်း မြူခိုးများမှာ ထိခိုက်မှုမရှိဘဲ ပို၍သာထူထပ်လာသည်။ သူတို့၏ လက်သီးများ မြူခိုးနှင့်ထိလိုက်သည်နှင့် ချက်ချင်း တိုက်စားခံရသည်။ သူတို့၏ လက်နက်များမှာလည်း ချက်ချင်း ဟောင်းနွမ်းပျက်စီးသွား၏။

အစ်ကိုကြီးချန်က ဓားအချက်အနည်းငယ် ထပ်မံဝေ့ယမ်းလိုက်သော်လည်း ကြီးမားသောမီးလျှံများမှာ မြူခိုးများကြားတွင် လျင်မြန်စွာပျောက်ကွယ်သွားပြီး မြူခိုးများမှာ သူတို့ဆီသို့ တဖြည်းဖြည်း နီးကပ်လာသည်။ အပြင်ဘက်ဆုံးရှိ ဟင်းလင်းပြင်စစ်သည်တော်အချို့မှာ မြူခိုးများ၏ဝါးမြိုခြင်းကိုခံလိုက်ရပြီး သူတို့၏ ခန္ဓာကိုယ်များ၊ အသားနှင့် အရိုးများ ချက်ချင်းအရည်ပျော်ကာ သွေးရည်များအဖြစ်ပြောင်းလဲသွားတော့သည်။

ဝိုး... ဒီဝင်္ကပါက ဒီလောက်တောင် ကြမ်းတာလား...

ကြည့်ရတာ ဒီတစ်ခါတော့ ငါသေရတော့မှာပဲ...

ဂိုဏ်းချုပ်ကျန်းကတော့ အလျင်မလိုပေ။

"ဟားဟားဟား..."

ကောင်းကင်ပေါ်တွင် ဝင်္ကပါကိုထိန်းချုပ်နေသော အင်မော်တယ်လေးဦးမှာ သူတို့၏အစီအစဉ် အောင်မြင်နေသည်ကိုမြင်ပြီး အဆက်မပြတ်ရယ်မောနေကြ၏။

"ပြောရဦးမယ်... ဒီလေးမျက်နှာဝိညာဉ်မဲ့ဝင်္ကပါကို တိုက်ခိုက်လို့မရဘူး။ မင်းတို့ရဲ့ တိုက်ခိုက်မှုစွမ်းအားတွေကို သူကစုပ်ယူပြီး ပိုပြီးတော့တောင် အန္တရာယ်ရှိလာမှာ"

"ဘာ"

ဟင်းလင်းပြင်နယ်မြေမှကျွမ်းကျင်သူများမှာ လုံးဝစိတ်ဓာတ်ကျသွားကြသည်။ သူတို့၏တိုက်ခိုက်မှုများက ဝင်္ကပါကိုအားဖြည့်ပေးနေခြင်းပင်။ အပြင်ဘက်ရှိ အင်မော်တယ်များ၏နောက်လိုက် သောင်းချီသောကျင့်ကြံသူများသည်လည်း ဝင်္ကပါကို ဝိုင်းဝန်းတိုက်ခိုက်နေကြသည်။ သူတို့၏ရည်ရွယ်ချက်မှာ လူကယ်ရန်မဟုတ်ဘဲ အတွင်းရှိမြူခိုးများကို ပို၍ပြင်းထန်လာစေရန် ဝင်္ကပါကိုအားသွင်းပေးနေခြင်းသာ။

"မင်းတို့ တကယ်ကိုယုတ်မာတာပဲ"

ချုံခိုတိုက်ခိုက်ခံရတာတစ်မျိုး၊ ဝင်္ကပါကထောင်ချောက်ဖြစ်နေတာကတစ်မျိုး။

ဟင်းလင်းပြင်ကျွမ်းကျင်သူများသည် ရိုးသားဖြောင့်မတ်သူများဖြစ်ကြရာ ဤမျှရှုပ်ထွေးသော ဗျူဟာမျိုးကို တစ်ခါမှမကြုံဖူးကြ။

အစ်ကိုကြီးချန်က သေရမည့်အချိန်ကိုစောင့်နေရင်း ပျင်းရိစွာပြုံးလိုက်ပြီး အပေါ်ရှိအင်မော်တယ်လေးဦးကို မေးလိုက်သည်။

"ဒါဆို မင်းတို့ရဲ့ဝင်္ကပါက အနှိုင်းမဲ့မဟုတ်ဘူးပေါ့"

သူ ယခုအချိန်အထိပြုံးနိုင်နေသည်ကိုမြင်သောအခါ ဟင်းလင်းပြင်နယ်မြေမှလူအုပ်ကြီးမှာ ရှက်စိတ်ဝင်သွားကြသည်။ သူ၏တည်ငြိမ်မှုကို ကြည့်ပါ။ သေလုနီးပါး အခြေအနေ၊ နီးကပ်လာသည့် မြူခိုးများကြား၍ ပြုံးနိုင်နေသေးသည်။

အမြဲတမ်း စိတ်ဓာတ်မာကျောသည်ဟု ကြွေးကြော်နေသည့် ဟင်းလင်းပြင်နယ်မြေမှစစ်သည်တော်များမှာ ယခုပျာယာခတ်နေကြလေပြီ။ ဤနှိုင်းယှဉ်မှုအရ သူတို့ရှုံးနိမ့်သွားပြီဖြစ်သည်။

"ငါတို့ဟင်းလင်းပြင်နယ်မြေရဲ့မျက်နှာကို အပျက်မခံနဲ့"

ဟင်းလင်းပြင်မျိုးနွယ်စုခေါင်းဆောင်ပိချန်းက သူ၏ကျောက်ခက်ရင်းကိုမြှောက်ကာ ဒေါသတကြီး အမိန့်ပေးလိုက်သည်။

"အားလုံးပဲ... ငါ့အတွက်ရယ်ကြစမ်း"

ဟင်းလင်းပြင်စစ်သည်တော်များမှာ အစပိုင်းတွင်မှင်တက်သွားကြပြီးနောက် အားရပါးရ ဝိုင်းရယ်ကြတော့သည်။

"ဟားဟားဟား..."

"ဟားဟားဟားဟားဟား..."

ပိချန်းက ကျန်းချန်ကို ဂုဏ်ယူဝင့်ကြွားစွာဖြင့် ကြည့်လိုက်သည်။

"ဘယ်လိုလဲ"

"ငါတို့က ပိုကျယ်ကျယ်ရယ်နိုင်သလို သေရမှာကိုလည်း ပိုပြီးတော့တောင်မကြောက်ဘူး"

"ဟင်းလင်းပြင်နယ်မြေက ထာဝရနံပါတ်တစ်ပဲ"

ကျန်းချန်မှာ ကြောင်တောင်တောင်ဖြင့် ကြည့်နေမိသည်။

ဒီလူတွေ ဘာလုပ်နေကြတာလဲ... ဒါက ဟင်းလင်းပြင်နယ်မြေရဲ့ ပုံစံလား...

ဓားနယ်မြေနဲ့ မိစ္ဆာနယ်မြေတို့ အကွက်ချသည့်ပုံစံနှင့် လုံးဝကွဲပြားနေ၏။

ဒီလိုကိစ္စမျိုးကိုတောင် လာနှိုင်းယှဉ်နေကြသေးတာလား...

ကောင်းပြီ... ငါမင်းတို့ကို အရှုံးပေးပါတယ်...

အပေါ်ရှိ အင်မော်တယ်လေးဦးမှာလည်း ထိုမြင်ကွင်းကြောင့် ကြောင်သွားကြသည်။ ခဏအကြာတွင် သူတို့က အေးစက်စွာ ရယ်မောလိုက်ပြီး...

"လေးမျက်နှာဝိညာဉ်မဲ့ဝင်္ကပါမှာ ထွက်ပေါက် ဒါမှမဟုတ် အားနည်းချက်ဆိုတာမရှိဘူး"

"လွတ်မြောက်နိုင်မယ့် တစ်ခုတည်းသောနည်းလမ်းကတော့ ဝင်္ကပါကို အတင်းအဓမ္မဖျက်ဆီးပစ်ဖို့ပဲ"

"ဒါပေမဲ့ ဒီဝင်္ကပါကို မြင့်မြတ်အင်မော်တယ်အဆင့် စွမ်းအားရှိမှသာ ဖျက်ဆီးနိုင်မှာ"

"အခုမင်းတို့ သေဖို့စောင့်နေတော့"

သူတို့၏အမြင်အရ အရာအားလုံးပြီးဆုံးသွားပြီဖြစ်သည်။ အောက်လောက ကျင့်ကြံသူတစ်ယောက်၏ တိုက်ခိုက်မှုမှာ အစစ်အမှန်အင်မော်တယ်အဆင့်သို့ ရောက်ရှိနေခြင်းမှာပင် ကောင်းကင်ကို ဆန့်ကျင်နေ၏။

ပိချန်း၊ ကွေ့ချန်း၊ ရှုယွမ်၊ ရွှေနဂါးဘုရင်တို့ကဲ့သို့သော ထိပ်တန်းကျွမ်းကျင်သူအနည်းငယ်သာ ထိုအဆင့်သို့ ရောက်ရှိကြသည်။ အခြားသော သူတော်စင်အဆင့် အထွက်အထိပ် ကျွမ်းကျင်သူများသည်ပင် အစစ်အမှန်အင်မော်တယ်အဆင့်ကို မရောက်ကြသေးပေ။ မြင့်မြတ်အင်မော်တယ်အဆင့်ရှိသော တိုက်ခိုက်မှုမျိုးမှာ သူတို့နှင့် အလွန်ဝေးလှသည်။

သေချာသည်မှာ ဟင်းလင်းပြင်မျိုးနွယ်စုဝင်များသည် ဟန်ဆောင်ကာရယ်မောနေကြသော်လည်း မြင့်မြတ်အင်မော်တယ်အဆင့်ရှိမှသာ ဝင်္ကပါကိုဖျက်ဆီးနိုင်မည်ဟုကြားလိုက်ရသောအခါ သူတို့၏ မျက်လုံးများတွင် မျှော်လင့်ချက်ကင်းမဲ့မှုများ ပြည့်နှက်သွားတော့သည်။