ဇာတ်ညွှန်းကဒီလိုဖြစ်ရမှာမဟုတ်ဘူး

ပုံရိပ်ယောင်အင်မော်တယ်ပုလင်းသည် အတွင်း၌ ဓာတ်ကြီးငါးပါးစည်းမျဉ်းများကို သဘာဝအလျောက် လည်ပတ်စေသည်။ တောင်တန်းများ၊ မြစ်ချောင်းများနှင့် အရာအားလုံးတည်ရှိနေပြီး ထိုအင်မော်တယ်ရတနာကိုယ်တိုင်ကပင် အင်မော်တယ်အနှစ်သာရချီ အစအနအချို့ကိုသယ်ဆောင်ထား၏။

သူတို့သည် လူများယုံကြည်စေရန်အတွက် ငှက်များနှင့် သားရဲများကိုပင် တမင်တကာ ဖမ်းဆီးထည့်သွင်းထားခဲ့ကြပြီး အတွင်းပိုင်းမှာအလွန်ကျယ်ပြောလှသဖြင့် တကယ့်ကမ္ဘာအစစ်နှင့်တူညီနေတော့သည်။ ၎င်းသည် လူများအား ဤနေရာသည် အင်မော်တယ်လောကဖြစ်သည်ဟု ယုံကြည်စေပြီး ရွှေရောင်အလင်းတန်း၏ဆွဲဆောင်မှုနောက်သို့ အလိုအလျောက်တိုးဝင်လာစေရန် ဖန်တီးထား၏။

ဤအင်မော်တယ်ရတနာကို ပူးပေါင်းစေလွှတ်လိုက်ပြီးသည်နှင့် ကမ္ဘာနှစ်ခုကြားရှိအတားအဆီးကြောင့် အထက်လောကမှ တန်ခိုးရှင်များသည် ၎င်းကိုဆက်လက်ထိန်းချုပ်နိုင်စွမ်းမရှိတော့ပေ။ သို့သော် ဤမျှနှင့်ပင် လုံလောက်နေလေပြီ။

ဤနေရာရှိ အင်မော်တယ်အနှစ်သာရချီမှာ အင်မော်တယ်ရတနာက ယူဆောင်လာခဲ့သော ပမာဏသာဖြစ်ပြီး ၎င်း၏အရည်အသွေးမှာ အင်မော်တယ်လောကအစစ်မှစွမ်းအင်နှင့် များစွာကွာခြား၏။ အတွင်း၌ လူအများအပြားရှိနေသဖြင့် ထိုစွမ်းအင်မှာ လျင်မြန်စွာပါးလျသွားမည်ဖြစ်ပြီး နှစ်အနည်းငယ်အတွင်း ကုန်ခမ်းသွားပေလိမ့်မည်။

ဤအင်မော်တယ်ရတနာသည် ကျန်းချန်၏ ရွှမ်ကျီရုပ်ပုံကဲ့သို့ အံ့ဩဖွယ်မကောင်းပေ။ ရွှမ်ကျီရုပ်ပုံသည် ပြီးပြည့်စုံသောကိုယ်ပိုင်ကမ္ဘာတစ်ခုဖြစ်သဖြင့် အတွင်း၌ နယ်ပယ်များကို ဆက်လက်နားလည်သဘောပေါက်နိုင်ကာ ကောင်းကင်တာအိုနှင့်လည်း ဆက်သွယ်နိုင်သည်။ သို့သော် ပုံရိပ်ယောင်အင်မော်တယ်ပုလင်းမှာမူ အင်မော်တယ်ရတနာဖြင့်ဖန်တီးထားသော ဟင်းလင်းပြင်သက်သက်သာဖြစ်ပြီး အတွင်းရောက်လျှင် ပြင်ပလောကနှင့် လုံးဝအဆက်ပြတ်သွားမည်ဖြစ်သည်။

ဤနေရာတွင် မည်သူမျှ ပြင်ပလောက၏စည်းမျဉ်းများနှင့်အညီ ဆက်လက်ကျင့်ကြံနိုင်မည် မဟုတ်တော့ပေ။ သူတို့သည် နယ်ပယ်သစ်များကို မည်သည့်အခါမျှ ထပ်မံနားလည်နိုင်တော့မည်မဟုတ်ဘဲ သက်တမ်းကုန်ဆုံးသည်အထိ သူတို့၏ကျင့်ကြံခြင်းမှာ ရပ်တန့်နေပေလိမ့်မည်။

လက်ရှိတွင် ကျင့်ကြံသူအများအပြား ကျင့်ကြံနေကြခြင်းမှာ အင်မော်တယ်အနှစ်သာရချီ၏ ခေတ္တခဏပံ့ပိုးမှုကြောင့်သာဖြစ်ပြီး မကြာမီတွင် သူတို့သည် ကျော်ဖြတ်၍မရသောပိတ်ဆို့မှုနှင့် ကြုံတွေ့ရမည်ဖြစ်ပြီး တစ်သက်လုံး ထိုအဆင့်တွင်သာ ရပ်တန့်နေပေတော့မည်။

အပြင်ထွက်ဖို့လား...

အောက်လောကမှ သူတော်စင်များကို ထားလိုက်ပါဦး၊ အင်မော်တယ်လောကမှ မြင့်မြတ်အင်မော်တယ် သို့မဟုတ် ရွှေအင်မော်တယ်များပင် ဤအင်မော်တယ်ရတနာကို ဖျက်ဆီးနိုင်စွမ်းမရှိကြပေ။

အမှန်စင်စစ် အထက်လောကမှ တန်ခိုးရှင်များသည် သတ်ဖြတ်ခြင်းအင်မော်တယ်ရတနာများကို စေလွှတ်လိုခဲ့ကြသော်လည်း ထိုသို့သောရတနာများထဲသို့ လူများကိုလှည့်ဖြားဝင်ရောက်စေရန်ခက်ခဲ၏။ ထို့ကြောင့်သာ လူတိုင်းက အလိုအလျောက်တိုးဝင်လာမည့် ဤပုလင်းကို ရွေးချယ်ခဲ့ကြသည်။ အဆုံးတွင် အိုမင်း၍သေဆုံးသွားသည်အထိ ပိတ်လှောင်ထားခြင်းမှာ တိုက်ရိုက်သတ်ဖြတ်ခြင်းနှင့် ရလဒ်ချင်း အတူတူပင်။

ထို့အပြင် သူတို့သည် အစစ်အမှန်အင်မော်တယ်ငါးဦးကိုပါ ထည့်သွင်းပေးလိုက်ပြီး အတွင်း၌ ဆူပူသောင်းကျန်းမှုများဖြစ်အောင် ဖန်တီးခဲ့ကြသည်။ ဤအင်မော်တယ်ရတနာက အောက်လောကသို့ သယ်ဆောင်လာနိုင်သည့် အင်မော်တယ်အရေအတွက်မှာငါးဦးသာဖြစ်ပြီး ထိုငါးဦး၏ မြှောက်ပင့်ပေးမှုနှင့်တင် အတွင်းရှိလူများသည် အိုမင်း၍မသေဆုံးမီ တစ်ဦးနှင့်တစ်ဦး သတ်ဖြတ်ခြင်းဖြင့် သေဆုံးသွားကြပေလိမ့်မည်။

ဤအစစ်အမှန်အင်မော်တယ်ငါးဦးမှာလည်း အသူများမဟုတ်ကြ။ အကယ်၍ သူတို့သာ အလွတ်သတ်ဖြတ်နေပါက အောက်လောကမှလူများပူးပေါင်း၍ သူတို့ကို ပြန်လည်တိုက်ခိုက်မည်ကို သိကြသည်။ ထို့ကြောင့် သုံးပြည်ထောင်မင်းဆက်ကဲ့သို့ ဇာတ်လမ်းဆင်ကာ အချင်းချင်းသတ်ဖြတ်အောင် ပြုလုပ်ခဲ့ခြင်းဖြစ်သည်။ အမှန်တကယ်ကို ယုတ်မာလှပေသည်။

"ဒါဆို ဒီနေရာက အမြစ်မဲ့ကျွန်းမဟုတ်ဘူးပေါ့"

"မဟုတ်ဘူး။ အင်မော်တယ်လောကမှာ အမြစ်မဲ့ကျွန်းဆိုတာမရှိဘူး။ ငါတို့က မင်းတို့ရဲ့ အသိပညာနည်းပါးမှုကို အသုံးချခဲ့တာပဲ"

"ဒါဆို ပတ်ဝန်းကျင်ကမြူခိုးတွေကရော..."

"အဲဒါက အင်မော်တယ်ရတနာနဲ့အတူပါလာတဲ့ အဆိပ်မြူတွေပဲ။ ကမ္ဘာနှစ်ခုကြား အတားအဆီးကြောင့် အဆက်ပြတ်သွားပြီး ဒီရတနာမှာ အရှင်သခင်မရှိလို့ ဘယ်သူမှမထိန်းချုပ်နိုင်တာ။ မဟုတ်ရင် အထဲကလူတိုင်းကို အရည်ပျော်သွားအောင် လုပ်လို့ရတယ်"

"ဒါဆို သန့်စင်သောအင်မော်တယ်ကြာပန်းက တကယ်မရှိဘူးလား"

"မှန်တယ်"

ဤစကားကိုကြားလိုက်ရချိန်တွင် အောက်လောကမှလူများမှာ ဒေါသကြောင့် ပေါက်ကွဲမတတ် ဖြစ်သွားကြသည်။ အမြဲတမ်းတည်ငြိမ်လှသော ဓားသူတော်စင်ကွေ့ချန်းပင် သူ၏မုတ်ဆိတ်ဖြူများ တုန်ရီလာတော့သည်။

"ဒီအဘိုးကြီး တကယ်ကိုဒေါသထွက်မိပြီ"

"သူတို့က အနိုင်ကျင့်လွန်းတယ်"

"ငါတို့က အင်မော်တယ်လောကကိုတက်လှမ်းနိုင်ပြီလို့ ထင်နေတာ၊ တကယ်တော့ တခြားသူရဲ့ အင်မော်တယ်ရတနာထဲမှာ ပြေးလွှားနေရတာလား"

တကယ့်ကို အရှက်ရစရာပင်။

"ဒါဆို ဒီအင်မော်တယ်ရတနာထဲကနေ ဘယ်လိုထွက်ရမလဲ"

"အင်မော်တယ်အရှင်သခင်အဆင့်ရှိသူကပဲ ဒါကိုဖျက်ဆီးနိုင်မယ်"

"တခြားနည်းလမ်း လုံးဝမရှိဘူးလား"

"မရှိဘူး"

ထိုအဖြေက လူတိုင်း၏ နောက်ဆုံးမျှော်လင့်ချက်ကို ရိုက်ချိုးလိုက်၏။

"မြင့်မြတ်အင်မော်တယ်အထက်မှာ ရွှေအင်မော်တယ်ရှိတယ်၊ ရွှေအင်မော်တယ်အထက်မှာမှ အင်မော်တယ်အရှင်သခင်ရှိတာ"

မိုချန်က ခေါင်းခါရင်း သက်ပြင်းချလိုက်သည်။

"အဲဒါက ခင်ဗျားတို့ရဲ့ လက်ရှိနယ်ပယ်တွေနဲ့ အဝေးကြီးလိုသေးတယ်"

ကောင်းကင်သားတော်တစ်ယောက်၏ကံတရားမှာ ကောင်းကင်ကိုဆန့်ကျင်နိုင်စွမ်းရှိသော်လည်း ဤတစ်ကြိမ်တွင်မူ အင်မော်တယ်ဧကရာဇ် ဒါဇင်ပေါင်းများစွာက ပူးပေါင်း၍ ထောင်ချောက်ဆင်ထားခြင်းဖြစ်သည်။ အင်မော်တယ်ဟောင်းဖြစ်သူ မိုချန်ပင်လျှင် မျှော်လင့်ချက်မဲ့သွား၏။

ဇာတ်ညွှန်းက ဒီလိုဖြစ်ရမှာမဟုတ်ဘူးလေ...

ပုံမှန်ဆိုလျှင် ကောင်းကင်သားတော်သည် ရန်သူများကို အဆင့်လိုက်ရင်ဆိုင်ရမည်ဖြစ်သည်။ အစစ်အမှန်အင်မော်တယ်ဖြစ်နေချိန်တွင် ကောင်းကင်အင်မော်တယ်နှင့်ရင်ဆိုင်ရမည်၊ ကောင်းကင်အင်မော်တယ်ဖြစ်လာချိန်တွင် မြင့်မြတ်အင်မော်တယ်နှင့်ရင်ဆိုင်ရမည် စသဖြင့် အတွေ့အကြုံအမှတ်များကို စနစ်တကျရယူသွားရမည်။

ယခုတော့ အင်မော်တယ်လောကသို့မရောက်သေးမီ အင်မော်တယ်ဧကရာဇ်များစွာ၏ ပစ်မှတ်ထားခြင်းကို ခံလိုက်ရသည်။ သူတို့က အသက်ရှင်လမ်း လုံးဝမပေးထားကြပေ။

အောင်ပွဲခံနေသည့် အငွေ့အသက်များမှာ တဖြည်းဖြည်းအေးစက်သွား၏။ ဤနေရာတွင် တစ်သက်လုံးပိတ်မိနေတော့မည်ကို သိရှိသွားကြသဖြင့် မည်သူမျှမပျော်ရွှင်နိုင်တော့ပေ။

သို့သော် လူတိုင်းစိတ်ဓာတ်ကျနေချိန်တွင် ဂိုဏ်းချုပ်ကျန်း တစ်ယောက်ကတော့ အလုပ်ရှုပ်နေသည်။ သူသည် မေးခွန်းများမမေးမီကတည်းက မျက်စိသုံးလုံးကျားနှင့် မိုချန်တို့ကို စစ်မြေပြင်မှပစ္စည်းများ သိမ်းဆည်းခိုင်းထားခဲ့သည်။ ယခုအခါ သူသည် ထိုပစ္စည်းများကို အမှတ်များအဖြစ်လဲလှယ်ရင်း အလုပ်ရှုပ်နေ၏။

သူကတော့ စိုးရိမ်ပူပန်ခြင်းမရှိပေ။ ထွက်မရခဲ့လျှင်ပင် ရွှမ်ကျီရုပ်ပုံရှိသေးသည်။ ထိုအထဲတွင် ဆက်လက်ကျင့်ကြံနိုင်ပြီး နယ်ပယ်ကိုမြှင့်တင်နိုင်သည်။

အကယ်၍ ဆေးလုံးများကုန်သွားလျှင်ပင် အဝါလေးက အတွင်းရှိဝိညာဉ်သွေးကြောကို အင်မော်တယ်အနှစ်သာရချီအဆင့်အထိ မြှင့်တင်ပေးထားပြီးဖြစ်ရာ အခြေအနေအရမ်းဆိုးလာလျှင် အတွင်းရှိတပည့်များ အင်မော်တယ်အရှင်သခင်အဆင့်ရောက်သည်အထိ စောင့်နေလိုက်ရုံပင်။

ထို့အပြင် သူ့တွင် ထွက်ပေါက်လုံးဝမရှိသည်တော့မဟုတ်။ သူ့တွင် ဆယ်ဆတိုက်ခိုက်မှုရှိသော်လည်း အင်မော်တယ်အရှင်သခင်အဆင့်ထက် များစွာနိမ့်ပါးနေသေးသဖြင့် အတွင်းမှဖျက်ဆီး၍ မရနိုင်သည်မှာမှန်သည်။ သို့သော် သူသည် အင်မော်တယ်ရတနာကို ပတ်ပတ်လည်ဝိုင်းထားသော အဆိပ်မြူများထဲသို့ တိုက်ရိုက်တိုးဝင်သွားနိုင်သည်...

ထိုမြူခိုးများက အင်မော်တယ်အရှင်သခင် တစ်ယောက်ကိုပင် သတ်နိုင်သော်လည်း... သေဆုံးခြင်းဆိုသည်မှာ အစ်ကိုကြီးချန်အကျွမ်းကျင်ဆုံးအလုပ်တစ်ခု မဟုတ်ပါလား။

ပစ္စည်းအားလုံးသိမ်းဆည်းပြီးချိန်တွင် လူအုပ်ကြီးမှာ ထွက်ပေါက်ရှာရန် ဆွေးနွေးနေကြဆဲ။ အချို့ကလက်လျှော့လိုက်ကြပြီး ဆိတ်ငြိမ်သောနေရာတစ်ခုရှာ၍ အေးဆေးနေထိုင်ရန် ပြင်ဆင်နေကြသည်။ အချို့က ပို၍ပင်ဆိုးသေးသည်... ဤပုလင်းထဲမှာပင် မျိုးဆက်သစ်များထူထောင်ရန် မိန်းကလေးများကို မျက်စိလိုက်ကစားနေကြသည်။

"အဟမ်း"

ကျန်းချန်က ချောင်းတစ်ချက်ဟန့်ပြီး ရှေ့တက်လာသည်။

"တကယ်တော့... ထွက်သွားဖို့မဖြစ်နိုင်တာတော့မဟုတ်ဘူး"

ထိုစကားထွက်ပေါ်လာသည်နှင့်တစ်ပြိုင်နက် တစ်လောကလုံး တိတ်ဆိတ်သွား၏။ အဝေးသို့ထွက်သွားရန်ပြင်နေသူများပင် အံ့အားသင့်စွာ ပြန်လှည့်ကြည့်လာကြသည်။ အကယ်၍ ဤစကားကို တခြားသူတစ်ယောက်ကပြောပါက ကြွားလုံးဟုသာသတ်မှတ်ခံရမည်ဖြစ်သော်လည်း ကျန်းချန်ကတော့မတူပေ။ သူသည် အံ့ဖွယ်အမှုပေါင်းများစွာကို ဖန်တီးခဲ့လေပြီ။

"ဂိုဏ်းချုပ်ကျန်း... ခင်ဗျားမှာ တကယ်ပဲထွက်ပေါက်ရှိတာလား"

ဓားသူတော်စင်ကွေ့ချန်းက စိတ်လှုပ်ရှားစွာဖြင့် ကျန်းချန်၏လက်ကို ဆုပ်ကိုင်လိုက်သည်။