အခန်း (၂၄၃-၂၄၄)

​​အခန်း ၂၄၃ - ဒီနေရာက ပိုင်မိသားစုလား

​"ဓားတစ်ချက်တည်းနဲ့ နည်းစနစ်မှန်သမျှကို ဖြိုခွဲနိုင်တာက အတော်လေး အထင်ကြီးဖို့ ကောင်းပါတယ် ဒါပေမဲ့ အားနည်းနည်း များသွားတယ်ထင်တယ်သိုလှောင်လက်စွပ်ပါ လုံးဝ ပျက်စီးသွားတယ်လေ ငါ့အတွက် အရှုံးက မနည်းဘူးပဲ"

ဖန့်ချန်က သက်ပြင်းသာသာ ချလိုက်သည်။

​အခြေခံတည်ဆောက်ခြင်းအဆင့် ပညာရှင်တစ်ဦး၏ သိုလှောင်လက်စွပ်ထဲတွင် တန်ဖိုးရှိသော ပစ္စည်းများစွာ ရှိနေမည်မှာ သေချာသည်။

သို့သော် ထိုဓားချက်က ပြင်းထန်လွန်းသဖြင့် အရာအားလုံး ပြာအဖြစ် ပြောင်းလဲသွားခဲ့ပြီ ဖြစ်သည်။

​ဖန့်ချန်၏ စိတ်ထဲတွင် ဓားငယ်လေးက ညည်းညူနေသည်ကို ခံစားလိုက်ရသည်။

​ဗိုက်ဆာတယ်... ဗိုက်ဆာတယ်

​ဖန့်ချန် ရယ်မောလိုက်သည်။

"ဒါဆိုရင် ပိုင်မိသားစုဆီ သွားလည်ကြတာပေါ့ ငါတို့ကို ဘယ်လိုများ ဧည့်ခံမလဲ ကြည့်ရသေးတာပေါ့"

​ဓားငယ်လေးမှာ အလွန်စိတ်လှုပ်ရှားသွားပြီး ဖန့်ချန်၏ ခန္ဓာကိုယ်အတွင်းသို့ ချက်ချင်း တိုးဝင်သွားသည်။

​ဖန့်ချန်သည် ရုတ်တရက် ထူးခြားသော ခံစားချက်တစ်ခု ရရှိလိုက်ပြီး လျိုမူ၏ ပုခုံးကို ဆွဲကာ သတိပေးလိုက်သည်။

"လျိုမူ မျက်လုံးမှိတ်ထား ခဏနေရင် လေက တော်တော်ပြင်းလိမ့်မယ်"

​လျိုမူသည် ချက်ချင်းပင် မျက်လုံးမှိတ်လိုက်သည်။

​နောက်တစ်စက္ကန့်တွင် ဖန့်ချန်၏ ကိုယ်ထဲမှ ဓားအရှိန်အဝါများ ရုတ်တရက် ထွက်ပေါ်လာပြီး သူသည် ထက်မြက်သော ဓားတစ်စင်းကဲ့သို့ ကောင်းကင်သို့ ပျံတက်ကာ ပိုင်မိသားစုဆိပ်ကမ်းရှိရာ လမ်းကြောင်းသို့ ဦးတည်ပျံသန်းသွားတော့သည်

​၎င်းမှာ ဖန့်ချန်၏ ပထမဦးဆုံးအကြိမ် ပျံသန်းခြင်း ဖြစ်သည်။

​တိမ်စီးခြင်း မြူခိုးစီးခြင်း မဟုတ်သလို ဓားပေါ်တွင် ရပ်၍ ပျံသန်းခြင်းလည်း မဟုတ်ပေ။

သူကိုယ်တိုင်က ဓားတစ်စင်းအဖြစ် အသွင်ပြောင်းသွားခြင်း ဖြစ်သည်

​၎င်းမှာ ဓားကျင့်ကြံသူတစ်ဦး၏ စွမ်းဆောင်ရည်များထဲမှ တစ်ခုပင်

​ဖန့်ချန်သည် ယခုအခါ ဓားငယ်လေးနှင့် တစ်သားတည်း ဖြစ်သွားပြီ ဖြစ်သည်။

သူ၏ ခန္ဓာကိုယ် ကြံ့ခိုင်မှုမှာ အံ့မခန်းအဆင့်သို့ ရောက်ရှိသွားပြီး သူ၏ အရေပြားအောက်တွင် ရွှေရောင်အလင်းတန်းများ မှိန်ပျပျ စီးဆင်းနေသည်။

သူသည် လူသားပုံသဏ္ဌာန်ရှိသော ဝိညာဉ်ရတနာတစ်ခုကဲ့သို့ ဖြစ်နေသည်ဟု ဆိုလျှင်ပင် မမှားနိုင်ပေ။

​ရှစ်မျက်နှာအရပ် ဓားကျမ်း မှ ဓားအသွင်ပြောင်း နည်းစနစ် သည် အရှိန်အလွန် မြန်ဆန်ရုံတင်မကဘဲ အခြားသော ပျံသန်းခြင်း နည်းစနစ်အားလုံးထက် သာလွန်လှသည်

​ပိုင်မိသားစု၏ အစည်းအဝေးခန်းမအတွင်းတွင် ပိုင်ချန်ချန်နှင့် ပိုင်ချီရှန့်တို့သည် တစ်ဖက်တစ်ချက်စီတွင် မတ်တပ်ရပ်နေကြသည်။

ပိုင်မိသားစုခေါင်းဆောင်မှာ သဘာပတိနေရာတွင် ထိုင်နေပြီး ပိုင်ချီရှန့်၏ ဦးလေးများနှင့် ဖခင်ဖြစ်သူ ပိုင်ယွဲ့တို့က ဘေးတစ်ဖက်တစ်ချက်တွင် ထိုင်နေကြသည်။

​"အဖေ အခြေအနေက ဒါပါပဲ ပိုင်ချီရှန့်က သူ့သဘောနဲ့သူ လုပ်ဆောင်ခဲ့တာကြောင့် ငါတို့မိသားစုဆီကို ဘေးဒုက္ခတွေ သယ်ဆောင်လာနိုင်ပါတယ်"

ဟု ပိုင်ချန်ချန်က တည်ကြည်စွာ ပြောလိုက်သည်။

​အစည်းအဝေးတက်ရောက်လာသူများ၏ မျက်နှာတွင် အမူအရာအမျိုးမျိုး ပေါ်နေသည်။ ပိုင်မိသားစုခေါင်းဆောင် စကားမပြောရသေးခင်မှာပင် ပိုင်ယွဲ့က ခပ်ပြုံးပြုံးဖြင့် စကားစလိုက်သည်။

"ချန်ချန် မင်းက ကိစ္စတွေကို ပိုပိုသာသာ တွေးနေတာပဲ ငါ့သားလုပ်ခဲ့တာက မိသားစုအတွက် ကောင်းကျိုးပဲလေ"

သူက ကျန်သူများကို ကြည့်လိုက်သည်။

"အားလုံး စဉ်းစားကြည့်ကြပါ အရင်က ငါတို့ ပင်လယ်နဂါးဂိုဏ်းဆီ သွားတုန်းက သူတို့ ငါတို့ကို အဖက်တောင် မလုပ်ခဲ့ဘူး အခု သူတို့နဲ့ အဆက်အသွယ်ရဖို့ အခွင့်အရေး ရနေတာကို ငါတို့ ဘယ်လိုလုပ် လက်လွှတ်ရမှာလဲ"

"ရွှယ်ဖုန်းကွေ့ဆိုတာ ဘယ်သူလဲ သူက တောင်စိမ်းကျွန်းရဲ့ ကျွန်းသခင်လေ ပင်လယ်နဂါးဂိုဏ်းရဲ့ အခြေခံတည်ဆောက်ခြင်း အဆင့် ပညာရှင် ကိုးယောက်ထဲက တစ်ယောက် သူသာ ငါတို့နဲ့ ပူးပေါင်းဖို့ သဘောတူလိုက်ရင် ငါတို့ စီးပွားရေးက ဟွမ်မိသားစုနဲ့ လျိုမိသားစုကို အသာလေး ကျော်သွားမှာ"

"ချီရှန့်က အမှားလုပ်ခဲ့တာ မဟုတ်ဘူး သူက မိသားစုအတွက် ဂုဏ်ယူစရာ လုပ်ရပ်တစ်ခုကို လုပ်ခဲ့တာ"

​"အဲဒါလည်း ဟုတ်တာပဲ"

​"ပင်လယ်နဂါးဂိုဏ်းနဲ့ အဆက်အသွယ် ရသွားရင် ဒါဟာ ငါတို့မိသားစုအတွက် တကယ့် မင်္ဂလာသတင်းပဲ ပွင့်ပွင့်လင်းလင်း ပြောရရင် တောင်ဘက်ကောင်းကင်ဂိုဏ်းနဲ့ ဝိညာဉ်သားရဲတောင်ကြားတောင် ပင်လယ်နဂါးဂိုဏ်းရှေ့မှာ ခေါင်းငုံ့ရတာပဲ မဟုတ်လား"

​"ဒါပေမဲ့ ဒီလိုလုပ်လိုက်လို့ ဓားကျင့်ကြံသူတစ်ယောက်ကို ငါတို့ ရန်စမိသွားပြီ တကယ်လို့ သူသာ အိမ်တိုင်ရာရောက် လာခဲ့ရင် ပင်လယ်နဂါးဂိုဏ်းက ငါတို့ဘက်က ကာကွယ်ပေးပါ့မလား"

​"သူလာရဲရင်လည်း တောင်စိမ်းကျွန်းသခင် ရှိနေတာပဲ သူ သေဖို့သာ ပြင်ထားလိုက်"

​ပိုင်ချန်ချန်၏ ဦးလေးများက တစ်ယောက်တစ်မျိုး အကြံပြုနေကြပြီး အများစုမှာ ပိုင်ချီရှန့်၏ လုပ်ရပ်ကို ထောက်ခံနေကြသည်။

​ပိုင်ယွဲ့နှင့် သူ၏သားမှာ ကျေနပ်အားရသော အပြုံးများကို မဖုံးနိုင်ကြပေ။

​ပိုင်မိသားစုခေါင်းဆောင်သည် မျက်မှောင်ကြုတ်ကာ အခြေအနေကို စောင့်ကြည့်နေပြီးနောက် လက်ကို မြှောက်လိုက်သည်။

"အဲဒါက ဟုတ်ချင်ဟုတ်မယ် ဒါပေမဲ့ ချီရှန့်က မိသားစုရဲ့ ဘေးကင်းရေးကို ထည့်မတွက်ဘဲ သူ့သဘောနဲ့သူ လုပ်ခဲ့တာကတော့ မှားတယ်"

​လူတိုင်း၏ အကြည့်မှာ မိသားစုခေါင်းဆောင်ထံ ရောက်သွားသည်။

​ပိုင်ချီရှန့်က မိမိကိုယ်ကိုယ် ကာကွယ်ပြောဆိုလိုက်သည်။

"ဦးလေး ကျွန်တော် အဲဒီတုန်းက စိတ်နည်းနည်း လောသွားလို့ပါ ပိုင်ချန်ချန်ကို ရှင်းပြဖို့ အချိန်မရလိုက်တာပါ"

​"ဘာပဲဖြစ်ဖြစ် အခု ဆိပ်ကမ်းကို စီမံခန့်ခွဲတာ ပိုင်ချန်ချန်ရဲ့ တာဝန်ပဲ သူက မင်းရဲ့ အထက်လူကြီးပဲ မင်း သူ့ကို အရင် အကြောင်းကြားရမယ် သူ သဘောတူမှ မင်း လုပ်သင့်တာ"

ဟု ခေါင်းဆောင်က တင်းမာစွာ ဆိုလိုက်သည်။

​ပိုင်ယွဲ့ ရုတ်တရက် ထရပ်လိုက်သည်။

"ဒုတိယညီ မင်းက မင်းသမီးဘက်ကနေ ဘက်လိုက်ပြီး ပြောနေတာလား ဒါက မတရားဘူးလို့ ငါ ထင်တယ်နော်"

​မိသားစုခေါင်းဆောင်က ခပ်ဖျော့ဖျော့ ပြုံးသည်။

"ငါ ဘာကြောင့် ပြောနေတာလဲဆိုတာ အရေးမကြီးဘူး စည်းကမ်းဆိုတာ စည်းကမ်းပဲ အရာရာကို စည်းကမ်းအတိုင်း လုပ်ရမယ်လို့ ဘိုးဘေးကြီး ပြောခဲ့တာ မင်းတို့ မေ့ကုန်ပြီလား"

​ပိုင်ချီရှန့်က ရုတ်တရက် ကြားဖြတ်ပြောသည်။

"ဒါဆိုရင် ဒီကိစ္စကို ဘိုးဘေးကြီးပဲ ဆုံးဖြတ်ပါစေ ဘယ်သူမှားလဲ ဘယ်သူမှန်လဲ သူ သိပါလိမ့်မယ်"

​"ဘိုးဘေးကြီးက ကျင့်ကြံအားထုတ်နေတာ သွားမနှောင့်ယှက်သင့်ဘူး"

ခေါင်းဆောင်က ခေါင်းခါလိုက်သည်။

"ဒီကိစ္စကို ခဏ ထားလိုက်ကြရအောင် တခြား ဘာမှမရှိရင် လူစုခွဲလို့ ရပါပြီ"

​ပိုင်ချန်ချန် အံ့ဩသွားသည်။

"အဖေ"

​ပိုင်ယွဲ့ကတော့ မပြုံးဘဲ မနေနိုင်ပေ။

"ဒါဆိုလည်း ခဏ ထားလိုက်တာပေါ့ ဘိုးဘေးကြီး ပြန်ထွက်လာတဲ့အချိန်ကျရင် ငါတို့ စီးပွားရေးတွေ အဆပေါင်းများစွာ တိုးတက်နေလောက်ပြီ"

​ပိုင်ချီရှန့်လည်း ပြုံးလိုက်သည်။ သားအဖနှစ်ဦးစလုံးမှာ အနိုင်ရသူ၏ အောင်ပွဲခံ ခံစားချက်ကို ရရှိနေကြသည်။

​ရုတ်တရက် ခန်းမအပြင်ဘက်မှ အသံတစ်သံ ဟိန်းထွက်လာသည်။

"ခွင့်ပြုပါဦး ဒီနေရာက ပိုင်မိသားစုလား"

​ခန်းမထဲရှိ လူတိုင်း အံ့ဩသွားကြသည်။

​ပိုင်ယွဲ့ မျက်မှောင်ကြုတ်လိုက်သည်။

"ဒီခေတ် လူငယ်တွေက တကယ့်ကို ယဉ်ကျေးမှု မရှိတာပဲ အိမ်ရှင်ကိုတောင် အကြောင်းမကြားဘဲ ငါတို့အိမ်ထဲကို ဒီအတိုင်း ဇွတ်ဝင်လာရသလား"

​"ငါတို့ ရောက်လာပြီထင်တယ်"

ဖန့်ချန်က လျိုမူကို ခေါ်ကာ အစည်းအဝေးခန်းမထဲသို့ ဝင်လာသည်။

​သူ့ကို မြင်လိုက်ရသောအခါ ပိုင်ချန်ချန် တုန်လှုပ်သွားပြီး

"ရှင်... ရှင်ပါလား..."

ဟု အော်လိုက်မိသည်။

​ပိုင်မိသားစုဝင်များ၏ မျက်နှာများ တစ်ဦးပြီးတစ်ဦး ပျက်သွားကြသည်။

တစ်ခုခု မှားနေပြီဟု ခံစားလိုက်ရသဖြင့် ပိုင်ယွဲ့သည် သူ၏ လေသံကို ချက်ချင်း လျှော့ချလိုက်သည်။

"မေးပါရစေ မင်းက ဘယ်သူလဲ"

​အဖေ သူက ဟိုဓားသမားပဲ ပိုင်ချီရှန့်က လျှို့ဝှက်အသံဖြင့် လှမ်းပြောလိုက်သည်။

​ပိုင်ယွဲ့၏ ခန္ဓာကိုယ် တောင့်တင်းသွားသည်။

သူသည် တတ်နိုင်သမျှ တည်ငြိမ်အောင် ဟန်ဆောင်ကာ ပြုံးပြလိုက်သော်လည်း သူ၏ စိတ်ထဲတွင်မူ အေးစက်မှုကို ခံစားနေရသည်။

​မိသားစုခေါင်းဆောင်သည် ချက်ချင်း ထရပ်လိုက်ပြီး ပြုံးလျက်

"မင်းက ချန်ချန် ပြောပြတဲ့ ဓားသမား ဖြစ်ရမယ် ငါတို့ဘက်က ကြိုဆိုဖို့ ပျက်ကွက်ခဲ့တဲ့အတွက် တောင်းပန်ပါတယ်"

ဟု ဆိုလိုက်သည်။

​အခြားသူများမှာမူ သံသယဝင်နေကြသည်။

တောင်စိမ်းကျွန်းသခင်က သူ့နောက်ကို လိုက်သွားသည် မဟုတ်ပါလား။

ဘာကြောင့် ဒီဓားသမားက ဘာမှမဖြစ်သလိုမျိုး သူတို့ခန်းမထဲမှာ ရုတ်တရက် ပေါ်လာရတာလဲ တောင်စိမ်းကျွန်းသခင် ရွှယ်ဖုန်းကွေ့ ဘယ်ရောက်သွားသလဲ

​"ခုနတင် ပင်လယ်နဂါးဂိုဏ်းကလို့ ပြောတဲ့ အခြေခံတည်ဆောက်ခြင်းအဆင့် ကျင့်ကြံသူတစ်ယောက် ငါ့ကို လာရှာတယ် ငါ ဘယ်မှာရှိလဲဆိုတာ ဘယ်လိုသိတာလဲလို့ မေးတော့ ပိုင်မိသားစုဝင် တစ်ယောက်က ပြောပြတာလို့ သူက ဖြေတယ်"

ဖန့်ချန်က သေနေသော ပိုးကောင်လေးကို ကြမ်းပြင်ပေါ် ပစ်ချလိုက်ပြီး လူတိုင်းကို ပြုံးကြည့်လိုက်သည်။

"အဲဒီ ပိုင်မိသားစုဝင်က ဘယ်သူလဲဆိုတာ ငါ သိချင်လို့ပဲ သူ ရှေ့ကိုထွက်ပြီး ငါ့ကို စကားပြောလို့ ရမလား"

​ပိုင်ချီရှန့်မှာ ထိတ်လန့်လွန်းသဖြင့် အသက်ရှူရပ်မတတ် ဖြစ်သွားကာ သူ၏ဖခင် ပိုင်ယွဲ့ကို အကူအညီတောင်းသော မျက်လုံးများဖြင့် လှမ်းကြည့်လိုက်သည်။

​ပိုင်ယွဲ့က သူ့ကို နှစ်သိမ့်သည့် အကြည့်ပေးလိုက်ပြီး တည်ငြိမ်အောင် ကြိုးစားကာ ဖန့်ချန်ကို ကြည့်လိုက်သည်။

"ပင်လယ်နဂါးဂိုဏ်းက အခြေခံတည်ဆောက်ခြင်းအဆင့် ပညာရှင် ဟုတ်လား အဲဒီ စီနီယာက အခု ဘယ်မှာလဲဆိုတာ သိပါရစေ"

​"ငါ သူ့ကို ငရဲမင်းနဲ့ သွားတွေ့ဖို့ လွှတ်လိုက်ပြီ"

ဖန့်ချန်က ပေါ့ပေါ့ပါးပါးပင် ပြောလိုက်သည်။

​အစည်းအဝေးခန်းမအတွင်းရှိ ပိုင်မိသားစုဝင် ဒါဇင်ပေါင်းများစွာမှာ တစ်ပြိုင်နက်တည်း အသက်ရှူရပ်မတတ် ဖြစ်သွားကြပြီး သူတို့၏ မျက်နှာများမှာ အလွန်အမင်း ဖြူဖျော့သွားကြသည်။

​သူက. အခြေခံတည်ဆောက်ခြင်း အဆင့် ပညာရှင်ကို ငရဲမင်းဆီ လွှတ်လိုက်တယ် ဟုတ်လား

​သူတို့သည် ဖန့်ချန်ကို မျက်နှာချင်းဆိုင် ကြည့်ကာ ကြွားမနေနဲ့ ဟု ပြောချင်သော်လည်း ရွှယ်ဖုန်းကွေ့ကို မတွေ့ရသဖြင့် မသေချာနိုင်ကြပေ။

ထို့အပြင် ထိုနှစ်ဦး တွေ့ဆုံခဲ့ပြီးနောက် ရွှယ်ဖုန်းကွေ့ ပျောက်ကွယ်သွားကာ ထိုဓားသမားက ပိုင်မိသားစုဆီ ရောက်လာသည်ဆိုကတည်းက အရာအားလုံးက ရှင်းနေပြီ ဖြစ်သည်

​ပိုင်ယွဲ့သည် အတင်းပြုံးလိုက်သည်။

"တစ်ခုခု မှားယွင်းမှု ရှိနေတာလား သူငယ်ချင်း ငါတို့မိသားစုက မင်းနဲ့ ပင်လယ်နဂါးဂိုဏ်းကြားက ကိစ္စတွေမှာ ဝင်ပါဖို့ မဝံ့ရဲပါဘူ"

​"ဒါဆို ခင်ဗျား ပြောချင်တာက အခြေခံတည်ဆောက်ခြင်း အဆင့် ပညာရှင်က လူလိမ်ပေါ့ ဟုတ်လား သူက ငါ့ကို ဘာလို့ လိမ်ပြောရမှာလဲ"

ဖန့်ချန်က ပိုင်ယွဲ့ကို ပြုံးကြည့်လိုက်သည်။

"သူပြောတဲ့ ပိုင်မိသားစုဝင်ဆိုတာ ခင်ဗျား ဖြစ်နေမလား"

​ပိုင်ယွဲ့၏ မျက်နှာမှာ စိမ်းဖန်သွားသည်။ သူ အလျင်အမြန် ခေါင်းခါလိုက်သည်။

"ကျွန်တော် မဟုတ်ပါဘူး"

​"ဒါဆို ဘယ်သူလဲ"

ဖန့်ချန်က ပြုံးသည်။

"ခင်ဗျားက အဲဒီလူကို ကာကွယ်ပေးဖို့ ကြိုးစားနေတာတော့ မဟုတ်ဘူး မဟုတ်လား"

​ပိုင်ချန်ချန်သည် သွားကို တင်းတင်းကြိတ်ကာ ပိုင်ချီရှန့်ကို လက်ညှိုးထိုးပြလိုက်သည်။

"သခင်လေး ရှင့်နောက်ကို ကပ်ပါးပိုးတွေ သုံးပြီး ခြေရာခံခိုင်းတာ သူပါ သူက သူ့သဘောနဲ့သူ လုပ်ခဲ့တာပါ"

​ပိုင်ချီရှန့် ရုတ်တရက် ဒေါသထွက်သွားသည်။

"ဒီမိန်းမယုတ်"

သူ အော်ဟစ်လိုက်သည်။

​ထို့နောက် သူသည် ဖန့်ချန်ကို အလွန်အမင်း ထိတ်လန့်စွာ ကြည့်လိုက်သည်။

"ကျွန် ကျွန်တော် တမင်လုပ်တာ မဟုတ်ပါဘူး ပင်လယ်နဂါးဂိုဏ်းက ကျွန်တော့်မိသားစုကို အပြစ်တင်မှာ ကြောက်လို့ပါ"

​အခန်း ၂၄၄ - စိမ်းဖန့်ကျောက်စိမ်းကြာပန်း

​"ဒါက တကယ်ကို နားလည်မှုလွဲတာပါ တကယ့်ကို နားလည်မှုလွဲတာပါဗျာ"

ပိုင်ယွဲ့က အတင်းပြုံး၍ ဆိုသည်။

"မင်းဘက်က နစ်နာသမျှကို ကျုပ် လျော်ကြေးပေးဖို့ အသင့်ပါပဲ ကျေးဇူးပြုပြီး သခင်လေးကို ခွင့်လွှတ်ပေးပြီး အသက်ချမ်းသာပေးပါဦး"

​"ဟုတ်ပါတယ်၊ ဟုတ်ပါတယ်၊ ကျွန်တော်တို့ ပိုင်မိသားစုက ခင်ဗျားရဲ့ နစ်နာမှုမှန်သမျှကို လျော်ကြေးပေးဖို့ အဆင်သင့်ပါပဲ"

​"ကျွန်တော်တို့ မိသားစုရဲ့ ဂုဏ်သိက္ခာကို ထောက်ထားပြီးတော့...."

​ပိုင်မိသားစုခေါင်းဆောင်က ဖြည်းဖြည်းချင်း စကားဆိုလာသည်။

"ငါတို့ ထိုင်ပြီးတော့ အေးအေးဆေးဆေး ဆွေးနွေးလို့ မရဘူးလား မိတ်ဆွေ"

​ဖန့်ချန်က ပြုံးလိုက်သည်။

"ကျုပ် တော့ မသိဘူး ကျုပ် ကြားဖူးတာကတော့ ကျင့်ကြံခြင်းလောကက အရမ်းရက်စက်တယ် မျိုးနွယ်စုတွေနဲ့ ဂိုဏ်းတွေ မြေလှန်ဖျက်ဆီးခံရတယ်ဆိုတာမျိုးက ရှားမှမရှားတာ"

​ထိုစကားကို ကြားလိုက်ရသည်နှင့် ခန်းမထဲတွင် ရုတ်ရုတ်သည်းသည်း ဖြစ်သွားတော့သည်။

​"ပိုင်ယွဲ့နဲ့ သူ့သားကို သတ်ပစ်ကြ"

​"ဒီမိုက်မဲတဲ့ သားအဖနှစ်ယောက်က သူတို့ရဲ့ ကိုယ်ကျိုးအတွက်နဲ့ ငါတို့မိသားစုကို ဒုက္ခပေးနေတာ"

​ခဏချင်းမှာပင် လူတိုင်းက ထိုသားအဖနှစ်ဦးကို ရန်သူလို သဘောထားလိုက်ကြသည်။

မိသားစုခေါင်းဆောင်၏ ဦးဆောင်မှုဖြင့် ပိုင်မိသားစု ကျင့်ကြံသူတစ်စုသည် သူတို့၏ ဝိညာဉ်ရတနာများကို အသုံးပြု၍ ပိုင်ယွဲ့နှင့် ပိုင်ချီရှန့်ကို လျင်မြန်စွာ တိုက်ခိုက်လိုက်ကြတော့သည်။

​မကြာမီမှာပင် သားအဖနှစ်ဦးစလုံး အလောင်းဖြစ်သွားကြသည်။

သူတို့ သေဆုံးသွားချိန်အထိ သူတို့၏ မိသားစုဝင်များက သူတို့ကို ထိုမျှ လျင်မြန်စွာနှင့် တွန့်ဆုတ်ခြင်းမရှိဘဲ စတေးခံ နယ်ရုပ်များကဲ့သို့ သတ်ပစ်လိမ့်မည်ဟု မယုံကြည်နိုင်ကြပေ။

​ထိုနှစ်ဦး သေဆုံးသွားသည်ကို သေချာအောင် စစ်ဆေးပြီးနောက် ပိုင်မိသားစုခေါင်းဆောင်သည် တည်ငြိမ်မှုကို ပြန်လည်ထိန်းသိမ်းကာ ဖန့်ချန်ကို ပြုံးပြလိုက်သည်။

"ဒါက ခင်ဗျားကို ကျေနပ်စေရဲ့လား မိတ်ဆွေ"

​"အခုတော့ လျော်ကြေးအကြောင်း ဆွေးနွေးလို့ ရပြီ"

ဟု ဖန့်ချန်က ဆိုသည်။

​လျော်ကြေး

​ဒီလူနှစ်ယောက်ရဲ့ အသက်နဲ့တင် မလုံလောက်သေးဘူးလား လူတိုင်း၏ မျက်နှာများမှာ ဇဝေဇဝါ ဖြစ်သွားကြသော်လည်း မည်သူမှ စကားမဟရဲကြပေ။

​"လျော်ကြေး ဘယ်လောက်များ လိုချင်လို့လဲ မိတ်ဆွေ ငါတို့ ဆွေးနွေးကြည့်ကြတာပေါ့"

ဟု ခေါင်းဆောင်က ဆိုသည်။

​ဖန့်ချန်က ပြုံးလျက်

"ဒါက ခင်ဗျားတို့ရဲ့ ရိုးသားမှုအပေါ်မှာပဲ မူတည်ပါတယ် ကျုပ် ဝိညာဉ်ကျောက်တုံးတွေ မလိုချင်ဘူး ရတနာတွေနဲ့ ပစ္စည်းကြမ်းတွေကိုပဲ လက်ခံမယ်"

ဟု ပြောလိုက်သည်။

​ဝိညာဉ်ကျောက်တုံးတွေ မလိုချင်ဘူး ဟုတ်လား

​လူတိုင်း၏ မျက်လုံးများ တောက်ပသွားသည်။

​ဝိညာဉ်ကျောက်တုံးများသည် လောကတွင် တန်ဖိုးအရှိဆုံးနှင့် အသန့်စင်ဆုံး ရတနာများ ဖြစ်ကြသည်။

အကယ်၍ သူက ၎င်းတို့ကို မလိုချင်ဟု ဆိုလျှင် ညှိနှိုင်းမှုတွင် သူတို့အတွက် အခွင့်အလမ်း ပိုများသွားပြီ ဖြစ်သည်။

​ခဏမျှ အချင်းချင်း တိုင်ပင်ပြီးနောက် ဖန့်ချန် အလေးပေးပြောဆိုခဲ့သည့် ရိုးသားမှု ကို ထည့်တွက်ကာ ပိုင်မိသားစုခေါင်းဆောင်သည် ပိုင်ယွဲ့သားအဖ၏ ဝိညာဉ်ရတနာများအပြင် နောက်ထပ် တစ်ခုကိုပါ ထပ်ပေါင်းပေးလိုက်သည်။

ထိုဝိညာဉ်ရတနာ သုံးခုအနက် တစ်ခုမှာ ဝိညာဉ်တံဆိပ် ၁၂ ခု ပါဝင်ပြီး ကျန်နှစ်ခုမှာ ၁၀ ခုနှင့် ၇ ခုစီ ပါဝင်ကြသည်။

​ထို့အပြင် ပိုင်မိသားစုသည် သူတို့၏ ဘဏ္ဍာတိုက်အတွင်းမှ ရောင်းချရန် သိမ်းဆည်းထားသော သတ္တုရိုင်းအချို့ကိုလည်း ထုတ်ပေးလိုက်သည်။

​"မိတ်ဆွေယဒီ လကျောက်သတ္တုရိုင်း တွေက ဝေးလံတဲ့ လကျောက်အင်ပါယာကနေ လာတာပါ"

"စုစုပေါင်း ပိဿာ နှစ်ထောင် နီးပါး ရှိပါတယ် ဒါကနေ လနစ်မြုပ်ရွှေစင် ၁၀ ကျပ်သားခန့် ထုတ်လို့ရတယ် လနစ်မြုပ်ရွှေစင် တစ်ကျပ်သားကို အဆင့်နိမ့် ဝိညာဉ်ကျောက်တုံး ၃၀ နီးပါး တန်ဖိုးရှိပါတယ်"

ပိုင်မိသားစုခေါင်းဆောင်က

"ဒီလျော်ကြေးက ခင်ဗျားကို ကျေနပ်စေရဲ့လားဗျာ

"

ဟု မေးလိုက်သည်။

​လကျောက်သတ္တုရိုင်းလား သူ၏ နဂါးတုတ်ကောက်အတွက် အဓိက လိုအပ်သည့် ပစ္စည်းမှာ လနစ်မြုပ်ရွှေစင် ဖြစ်သည်။

ဖန့်ချန်က ပြုံး၍ ခေါင်းညိမ့်လိုက်ပြီး ဝိညာဉ်ရတနာ သုံးခုနှင့် သတ္တုရိုင်းများကို သူ၏ သိုလှောင်လက်စွပ်ထဲသို့ သိမ်းဆည်းလိုက်သည်။

​"ဒီလျော်ကြေးကို ကျုပ် တော်တော်လေး ကျေနပ်ပါတယ် အခုတော့ သွားပါဦးမယ်"

ဟု ပြောကာ ဖန့်ချန် ပြန်လှည့်ထွက်ရန် ပြင်လိုက်သည်။

​သို့သော် ၎င်းကို မြင်သောအခါ မိသားစုခေါင်းဆောင်က အလျင်အမြန် လှမ်းခေါ်လိုက်သည်။

"ခဏလောက် စောင့်ပါဦး မိတ်ဆွေ"

​ပိုင်မိသားစုဝင်များသည် သူတို့၏ ခေါင်းဆောင်ကို နားမလည်နိုင်စွာ ကြည့်လိုက်ကြသည်။

ဘေးဒုက္ခသယ်ဆောင်လာသူက အခုမှ ပြန်တော့မလို့ကို ဘာကြောင့် မိသားစုခေါင်းဆောင်က သူ့ကို ဆွဲထားရသနည်း

​"ဘာကိစ္စလဲ"

ဖန့်ချန်က ခပ်ဖျော့ဖျော့ ပြုံးရင်း မေးသည်။

​ပိုင်မိသားစုခေါင်းဆောင်၏ အကြည့်က လျိုမူထံသို့ ကျရောက်သွားသည်။

"မိတ်ဆွေ ငါ အကြည့် မမှားဘူးဆိုရင် မင်းနဲ့အတူပါလာတဲ့ ဒီလူဟာ မိစ္ဆာကျင့်ကြံသူတွေရဲ့ အဆိပ်မွေးမြူဖို့ အသုံးချခံထားရတာ မဟုတ်လား"

​လျိုမူ၏ မျက်လုံးများ အနည်းငယ် တုန်ခါသွားပြီး သူ၏ လည်ပင်းကို အလိုအလျောက် ကျုံ့လိုက်မိသည်။

သူ၏ ကိုယ်နံ့က မိသားစုခေါင်းဆောင်ကို စိတ်အနှောင့်အယှက် ပေးမိပြီဟု သူ ထင်လိုက်ခြင်း ဖြစ်သည်။

​ဖန့်ချန်က အသာအယာ ခေါင်းညိမ့်လိုက်သည်။

"ခင်ဗျားက အတော်လေး မျက်စိလျင်တာပဲ ခေါင်းဆောင်ကြီး ဒီလိုမျိုး အရင်က တွေ့ဖူးလို့လား"

​"အဆိပ်အတတ်ကို ကျင့်ကြံတဲ့ မိစ္ဆာကျင့်ကြံသူ အတော်များများက ဒီလိုပဲ လုပ်တတ်ကြတယ် ငါတို့ ပိုင်မိသားစု ဆိပ်ကမ်းမှာ နေ့တိုင်း ဒီလိုလူမျိုးတွေ အများကြီး လာတတ်ကြတာဆိုတော့ ဒါက ငါတို့အတွက် ထူးဆန်းတဲ့ အရာတော့ မဟုတ်ပါဘူး"

ပိုင်မိသားစုခေါင်းဆောင်က ခေါင်းညိမ့်ပြသည်။

"ငါ တစ်ခု ခန့်မှန်းကြည့်ပါရစေ မင်းက သူ့ကိုယ်ထဲက အဆိပ်တွေကို ဖယ်ရှားပေးချင်နေတာ မဟုတ်လား"

​ဖန့်ချန်က မိသားစုခေါင်းဆောင်ကို တိတ်ဆိတ်စွာ အကဲခတ်လိုက်ပြီး

"ဆက်ပြောပါဦး"

ဟု ဆိုသည်။

​မိသားစုခေါင်းဆောင်၏ မျက်လုံးများ အနည်းငယ် တောက်ပသွားပြီး သူက ဆက်ပြောသည်။

"မိုင်နှစ်ရာအကွာမှာရှိတဲ့ လျိုမိသားစုနဲ့ ဟွမ်မိသားစုဟာ ဝိညာဉ်ဆေးဝါး အရောင်းအဝယ်ကို အဓိက လုပ်ကိုင်ကြတယ် သူတို့ဆိပ်ကမ်းမှာ နေ့တိုင်း ဝိညာဉ်ဆေးဝါးပေါင်း မြောက်မြားစွာကို သယ်ယူပို့ဆောင်နေကြတာ"

"ဒါ့အပြင် အဲဒီမိသားစု နှစ်ခုမှာ ဘုံပိုင်ဆိုင်တဲ့ ဆေးဘက်ဝင် အပင်စိုက်ခင်းကြီး တစ်ခုလည်း ရှိတယ်ငါ သိသလောက်ဆိုရင် သူတို့ စိုက်ပျိုးထားတဲ့ နှစ်တစ်ရာ စိမ်းဖန့်ကျောက်စိမ်းကြာပန်း ဟာ အခုဆိုရင် ရင့်မှည့်ဖို့ အချိန်ရောက်နေပြီ အဲဒီအပင်က ထွက်တဲ့ ကြာစေ့တွေက အဆိပ်ဖြေရာမှာ အံ့မခန်း အစွမ်းရှိတယ်"

​ပိုင်မိသားစုဝင်များသည် ခေါင်းဆောင်က ဘာကြောင့် ထိုဘေးဒုက္ခကြီးကို ဆွဲထားချင်ရသလဲ ဆိုသည်ကို နောက်ဆုံးတွင် သဘောပေါက်သွားကြပြီး သူတို့၏ မျက်လုံးထဲတွင် စိတ်လှုပ်ရှားမှုများ ပေါ်လာတော့သည်။

​ဖန့်ချန်က အဓိပ္ပာယ်ပါပါ ပြုံးလိုက်သည်။

"ခင်ဗျားက အဲဒီမိသားစု နှစ်ခုနဲ့ မတည့်ဘူးလား သူတို့ကို သင်ခန်းစာပေးဖို့ ကျုပ်ကို အသုံးချချင်နေတာလား"

​ပိုင်မိသားစုခေါင်းဆောင်က တည်ငြိမ်စွာပင်

"ဒါက ကျုပ် ရဲ့ ရည်ရွယ်ချက်ဆိုတာ မှန်ပါတယ်ဒါပေမဲ့ ဒါကို လုပ်မလား မလုပ်ဘူးလား ဆိုတာကတော့ ခင်ဗျားရဲ့ ဆုံးဖြတ်ချက်ပေါ်မှာပဲ မူတည်ပါတယ် ကျုပ် ကတော့ ခင်ဗျားကို ကူညီတဲ့အနေနဲ့ သိထားတာလေး ပြောပြတာပါ"

ဟု ဆိုသည်။

​ဖန့်ချန် ခေါင်းညိမ့်လိုက်ပြီး လျိုမူကို ခေါ်ကာ ခန်းမအပြင်ဘက်သို့ ထွက်ခဲ့သည်။

ထို့နောက် ဓားတစ်စင်းအဖြစ် အသွင်ပြောင်းကာ ကောင်းကင်သို့ ပျံတက်သွားတော့သည်။

သူ ထွက်ခွာသွားသော လမ်းကြောင်းတွင် ဓားအသိ များမှာ ခေတ္တမျှ ကျန်ရစ်နေခဲ့သည်။

​"ဒါက ဓားအသွင်ပြောင်း နည်းစနစ်ပဲ"

​"သူက တကယ့်ကို ဓားကျင့်ကြံသူ တစ်ယောက်ပဲ"

​ခန်းမထဲမှ လူများမှာ မှင်တက်ကျန်ရစ်ခဲ့ကြသည်။ သူတို့မှာ မျက်စိမကန်းကြပေ။

ဓားပေါ်စီး၍ ပျံသန်းခြင်းနှင့် ဓားကိုယ်တိုင် အသွင်ပြောင်း၍ ပျံသန်းခြင်း၏ ကွာခြားချက်ကို သူတို့ ခွဲခြားနိုင်သည်။

ဒုတိယနည်းလမ်းမှာ ဓားကျင့်ကြံသူများသာ တတ်မြောက်သော ထူးခြားသည့် အစွမ်းပင် ဖြစ်သည်။

​"အဖေ... အဖေ အခုလို လုပ်လိုက်တာက လျိုမိသားစုနဲ့ ဟွမ်မိသားစုက ငါတို့ဆီ ပြဿနာလာရှာမှာ မစိုးရိမ်ဘူးလား"

ပိုင်ချန်ချန်က စိုးရိမ်တကြီး မေးလိုက်သည်။

​"အဲဒီလူတွေက မာနကြီးလွန်းနေတာ ကြာပြီ ငါ အခုလို မလုပ်ရင်တောင် သူတို့က ငါတို့ဆီ ပြဿနာ လာရှာဦးမှာပဲ အဲဒီတော့ ငါတို့ကပဲ လက်ဦးမှု ယူလိုက်တာက ပိုကောင်းတယ်"

ပိုင်မိသားစုခေါင်းဆောင်က ခပ်ဖျော့ဖျော့ ပြုံးလိုက်သည်။

"ဝိညာဉ်ရတနာ အချို့နဲ့ လကျောက်သတ္တုရိုင်းတွေကတော့ တန်ဖိုးကြီးတဲ့ လက်ဆောင်တွေလို့ပဲ သတ်မှတ်လိုက်ပါတော့"

​ထိုစကားကို ကြားသောအခါ ပိုင်မိသားစု ကျင့်ကြံသူများသည် အရိုအသေ ပေးလိုက်ကြသည်။

​"တကယ့်ကို ပညာရှိတဲ့ ဆုံးဖြတ်ချက်ပါ ခေါင်းဆောင်ကြီး"

​အကယ်၍ ခေါင်းဆောင်သာ ပြတ်သားမှု မရှိခဲ့လျှင် ထိုခန်းမ၏ ကြမ်းပြင်ပေါ်တွင် သူတို့၏ သွေးများဖြင့် ရွှဲစိုနေလောက်ပြီ ဖြစ်သည်။

​"အကယ်၍ ပင်လယ်နဂါးဂိုဏ်းက ကျင့်ကြံသူတွေ ရောက်လာရင်ရော ကျွန်မတို့ ဘာလုပ်ကြမလဲ"

ပိုင်ချန်ချန်က စိုးရိမ်တကြီး မေးပြန်သည်။

​"ငါတို့ကတော့ အမှန်အတိုင်းပဲ ပြောရမှာပေါ့ ငါတို့ကလည်း ဘေးသင့်တဲ့သူတွေပဲလေ"

သူမ၏ ဖခင်က ပုခုံးကို ပုတ်ကာ နှစ်သိမ့်လိုက်သည်။

"အဲဒီ ဓားကျင့်ကြံသူက ဒီလောက် ငယ်ငယ်ရွယ်ရွယ်နဲ့ အခြေခံတည်ဆောက်ခြင်းအဆင့် ပညာရှင်တစ်ယောက်ကို သတ်နိုင်တယ်ဆိုတာ ပင်လယ်နဂါးဂိုဏ်း သိသွားရင် သူတို့ ဒီကိစ္စကို ဆက်လိုက်ချင်မှ လိုက်တော့မှာပါ"

​ပိုင်ချန်ချန် အံ့ဩသွားသည်။

"ဒါပေမဲ့ သူက သူတို့ရဲ့ ဂိုဏ်းဆက်ခံသူကို သတ်လိုက်တာလေ"

​ပိုင်မိသားစုခေါင်းဆောင်က ပြုံးလိုက်သည်။

"တကယ်လို့ သူက ငါ့ကို သတ်လိုက်ရင် မင်း ငါ့အတွက် ကလဲ့စားချေပေးမှာလား"

​ပိုင်ချန်ချန်၏ အမူအရာ အနည်းငယ် ပြောင်းလဲသွားပြီးနောက် ခါးသီးစွာ ပြုံးလိုက်သည်။

"ကျွန်မထင်တာတော့ ဖြစ်နိုင်မှာ မဟုတ်ပါဘူး"

​"ဒါပဲပေါ့ ကျင့်ကြံသူတွေဆိုတာ လုပ်ရပ်တိုင်းရဲ့ အရှုံးနဲ့ အမြတ်ကို တွက်ချက်တတ်ကြတယ် ပင်လယ်နဂါးဂိုဏ်းချုပ်က ဘယ်လို ဆုံးဖြတ်ချက် ချရမလဲဆိုတာ ကောင်းကောင်း သိပါလိမ့်မယ်"

ခေါင်းဆောင်က ပြုံးသည်။

"သွားပါ မင်းဦးလေး ပိုင်ယွဲ့ရဲ့ အိမ်က ကိစ္စတွေကို သွားရှင်းလင်းပြီး စာရင်းတွေ သွားစစ်လိုက်ဦး"

​"ဟုတ်ကဲ့"

ပိုင်ချန်ချန် ခေါင်းညိမ့်ပြီး ချက်ချင်း ထွက်ခွာသွားတော့သည်။

​လျိုမိသားစုနှင့် ဟွမ်မိသားစု ပူးပေါင်းစီမံသော ဆိပ်ကမ်းမှာ ပိုင်မိသားစုထက် အဆပေါင်းများစွာ ပိုမို ကြီးမားလှသည်။

ဆိပ်ကမ်းတွင် ပင်လယ်သားရဲ ဝိညာဉ်အမြုတေများ၊ ပင်လယ်ထွက် ဝိညာဉ်ပစ္စည်းများအပြင် ဝိညာဉ်ရတနာများ၊ အဆောင်လက်ဖွဲ့များနှင့် ဆေးလုံးများ ရောင်းချသော ဆိုင်ခန်းပေါင်းများစွာ ရှိနေသည်။

​"ပိုင်မိသားစုက ဘာလို့ ငါ့ကိုသုံးပြီး လျိုမိသားစုနဲ့ ဟွမ်မိသားစုကို ဖိနှိပ်ချင်ရတာလဲဆိုတာ မဆန်းတော့ပါဘူး ဒီနေရာနှစ်ခုက မိုင်နှစ်ရာပဲ ဝေးပေမဲ့ ဒီဆိပ်ကမ်းက အများကြီး ပိုကြီးတာပဲ သူတို့ရဲ့ အမြတ်အစွန်းက ပိုင်မိသားစုထက် အဆပေါင်းများစွာ ပိုများမှာ သေချာတယ်"

ဖန့်ချန်က လျိုမူနှင့်အတူ လမ်းလျှောက်ရင်း ပြောလိုက်သည်။

​"ဟွမ်မိသားစုနဲ့ လျိုမိသားစုက ဒီနေ့ သူတို့ရဲ့ ဆေးစိုက်ခင်းက ထွက်တာတွေကို ရောင်းကြမှာတဲ့ လူအများကြီးက လေလံပွဲဆီ သွားနေကြပြီ ငါတို့လည်း မြန်မြန်သွားရအောင်၊ တစ်ခုခု အချောင် ရနိုင်မလား ကြည့်ရမယ်"

​" ဒီမိသားစု နှစ်ခုက အရမ်း လည်တာဟ မင်း ဈေးကောင်းကောင်းနဲ့ ရမယ်လို့ ထင်နေရင် အိပ်မက်မက်နေတာပဲ ဖြစ်မှာပေါ့"

​"ဘာပဲဖြစ်ဖြစ် သွားကြည့်ကြတာပေါ့ အဲဒီမိသားစု နှစ်ခုက စိုက်ပျိုးတဲ့ ဝိညာဉ်ဆေးဝါးတွေက အတော်လေး စုံလင်တယ် ငါ နှစ်အတော်ကြာ ရှာနေတဲ့ ဆေးဝါးမျိုးကိုတောင် တွေ့နိုင်တာပဲ"

​"ဒါဆို ငါလည်း မင်းနဲ့အတူ လိုက်ခဲ့မယ်"

​ထိုစကားဝိုင်းကို ကြားလိုက်ရသောအခါ ဖန့်ချန်က ပြုံးလိုက်သည်။

"လျိုမူ ငါတို့လည်း သွားကြည့်ကြတာပေါ့ မင်းရဲ့ ကိုယ်ထဲက အဆိပ်ပြင်းတွေကို ဖြေပေးနိုင်မလားဆိုတာ ကြည့်ဖို့ စိမ်းဖန့်ကျောက်စိမ်းကြာစေ့ တစ်စေ့လောက် ရနိုင်မလား ကြည့်ရမယ်"

​လျိုမူ၏ မျက်လုံးထဲတွင် မျှော်လင့်ချက် ရိပ်ယောင်များ ပေါ်လာသည်။

သူသည် ပုံမှန်လူတစ်ယောက်အဖြစ် ပြန်လည် နေထိုင်နိုင်ရန် အမြဲ အိပ်မက်မက်နေခဲ့သည် မဟုတ်ပါလား