အခန်း (၂၈၅-၂၈၆)

အခန်း ၂၈၅- ထားလိုက်ပါတော့ ဘာမှပြောနေစရာ မလိုတော့ဘူး

ခေါင်းပေါ်ကနေ လေတိုးသံနဲ့အတူ ကျဆင်းလာတဲ့ ဧရာမဘီလူးကြီးလေးကောင်ကို ရင်ဆိုင်ရချိန်မှာ ဖန့်ချန် ဟာ တည်ငြိမ်မြဲ တည်ငြိမ်နေဆဲပါပဲ။ သူ့မျက်လုံးထဲမှာ ကြောက်ရွံ့မှု အရိပ်အယောင်တောင် မရှိပါဘူး။

သူ့ရဲ့ တည်ငြိမ်မှုကြောင့် လူတိုင်း အံ့အားသင့်သွားကြတယ်။

သေမင်းတံခါးဝရောက်နေတဲ့ တိုက်ခိုက်မှုမျိုးကိုတောင် ဒီလောက်အေးဆေးနေနိုင်ဖို့ သူ့မှာ ဘယ်လိုဝှက်ဖဲမျိုး ရှိနေလို့လဲ

"ဟင်း..."

ရုတ်တရက်ဆိုသလို ဖန်ချန်ရဲ့ ဘေးနားမှာ ပုံရိပ်တစ်ခု ပေါ်လာပါတယ်။

သူက သူ့ရဲ့အင်္ကျီကို ဝှေ့ယမ်းလိုက်ရုံနဲ့တင် အရှိန်နဲ့ ကျဆင်းလာတဲ့ ဘီလူးတွေ ဟာ ရပ်တန့်သွားပြီး ရွှေရောင်ဘီလူးကြီးတွေဟာ သန့်စင်တဲ့ သတ္တုစွမ်းအင်တွေအဖြစ် ကွဲအက်ကာ လေထဲမှာ ပျံ့လွင့်သွားပါတော့တယ်။

ပေါ်လာတဲ့သူကတော့ တာအိုဝတ်စုံဝတ် အဖိုးအိုတစ်ဦးပါ။

သူ့မှာ မသေမျိုးအငွေ့အသက်တွေ ရှိနေပြီး သူ့မျက်လုံးတွေက ကြင်နာပုံရပေမဲ့ အရှိန်အဝါကတော့ အမိန့်ပေးနိုင်စွမ်း ရှိလှပါတယ်။

လူအုပ်ကြီး မှင်တက်သွားကြတယ်။

ဒီတာအိုအဖိုးအိုက ဘယ်သူလဲဆိုတာ သူတို့မသိပေမဲ့ ပင်လယ်နဂါး မသေမျိုး ရဲ့ တိုက်ခိုက်မှုကို ဒီလောက်အလွယ်တကူ ခြေဖျက်နိုင်တာကြည့်ရင် သူဟာ အနည်းဆုံး ရွှေအမြုတေအဆင့် နောက်ဆုံးအဆင့်မှာ ရှိနေရပါမယ်

ကောင်းကင်တောင်ပိုင်းဂိုဏ်း ဘိုးဘေးရဲ့ မျက်နှာပေါ်က အပြုံးတွေ ပျောက်ကွယ်သွားပြီး လေးနက်တဲ့ အမူအရာ အစားထိုးဝင်ရောက်လာပါတယ်။

ပင်လယ်နဂါး မသေမျိုးရဲ့ မျက်နှာကလည်း အမျိုးမျိုး ပြောင်းလဲနေပြီး ဘာမှမပြောဘဲ အဖိုးအိုကို စိုက်ကြည့်နေပါတယ်။

တာအိုဆရာ ယာ နဲ့ မီးတိမ်မသေမျိုး တို့ကတော့ ထိတ်လန့်တကြား တစ်ယောက်ကိုတစ်ယောက် ကြည့်လိုက်ကြတယ်။

သူ့မှာ တကယ်ပဲ ဝှက်ဖဲရှိနေတာပဲ ဒီတာအိုအဖိုးအိုကို သူတို့ မဟာရှ တစ်ခါ မြင်ဖူးခဲ့ကြတာပါ။

အကြီးအကဲ ကျင်းနန် ရဲ့ မျက်နှာကလည်း ပျက်ယွင်းသွားပြီး မျက်လုံးထဲမှာ ကြောက်ရွံ့မှုတွေ ပြည့်လာပါတယ်။

ပင်လယ်နဂါး မသေမျိုးတော့ အကွက်မှားသွားပြီလို့ အခြေခံတည်ဆောက်ခြင်းအဆင့် ကျင့်ကြံသူတွေ အားလုံး တစ်ပြိုင်နက်တည်း တွေးလိုက်မိကြတယ်။

ဖန်ချန်ရဲ့ ယုံကြည်မှုလွန်ကဲနေတဲ့ အပြုအမူတွေက သူ့မှာ အားကိုးစရာတစ်ခုခု ရှိနေတယ်ဆိုတာ ထင်ရှားနေတာကြောင့် သူတို့သာ ပင်လယ်နဂါး မသေမျိုးနေရာမှာဆိုရင် ဘယ်တော့မှ လက်ပါမှာ မဟုတ်ပါဘူး။

"သူက အကြီးအကဲကျင်းနန် ပြောဖူးတဲ့ မဟာရှမှာ တွေ့ခဲ့ရတဲ့ နက်နဲတဲ့ ကျင့်ကြံမှုရှိတဲ့ တာအိုဆရာကြီးလား"

ယွီယွဲ့ဖန် ကတော့ ရှက်လွန်းလို့ မျက်နှာတစ်ခုလုံး နီမြန်းနေပါပြီ။

သူ့ပြိုင်ဘက်က အားလုံးကို ပြင်ဆင်ပြီးသားပဲ သူက ဖန်ချန်ကို ရင်ဆိုင်တုန်းက ဖန်ချန်က သူ့ကို ပုရွက်ဆိတ်တစ်ကောင်လိုပဲ သဘောထားခဲ့တာ ဖြစ်မှာပါ။

တာအိုဆရာ ယွမ်ဟယ် က ဖန့်ချန်ကို ကြည့်ပြီး ပြုံးလိုက်တယ်။

"ငါ မင်းဆီမှာ တစ်ခုခု ချန်ထားခဲ့မှန်း မင်း ဘယ်လိုသိလဲ ကောင်လေး"

ဖန့်ချန်က သူ့ခန္ဓာကိုယ်ထဲက ထူးဆန်းတဲ့ စွမ်းအင်ကို ခံစားနေရတာလို့ အမှန်အတိုင်း မပြောဘဲ လိမ်လိုက်ပါတယ်။

"ခန့်မှန်းကြည့်တာပါ"

"ခန့်မှန်းတာ ဟုတ်လား"

တာအိုဆရာ ယွမ်ဟယ်က မျက်မှောင်ကြုတ်လိုက်တယ်။

"မင်းရဲ့ခန့်မှန်းချက် မှားသွားရင် မင်း သေသွားနိုင်တယ်ဆိုတာ သိရဲ့လား"

သူတို့နှစ်ယောက်ဟာ ပင်လယ်နဂါး မသေမျိုးနဲ့ တခြားသူတွေကို လုံးဝ လျစ်လျူရှုပြီး စကားပြောနေကြတာပါ။

"မသေမျိုးလမ်းစဉ်ကို လျှောက်လှမ်းတဲ့သူဟာ သေခြင်းနဲ့ ရှင်ခြင်းကို ပေါ့ပေါ့ပါးပါး သဘောထားတတ်ရမယ်လေ"

လို့ ဖန်ချန်က ပြုံးပြီး ပြောလိုက်တယ်။

သေခြင်းနဲ့ ရှင်ခြင်းကို ပေါ့ပေါ့ပါးပါး သဘောထားရမယ် လူအုပ်ကြီးဟာ သူ့စကားကို ပြန်တွေးရင်း အံ့သြသွားကြတယ်။

ဒါဟာ ပြောသလောက် မလွယ်ပါဘူး။ ဒီမှာရှိတဲ့ ကျင့်ကြံသူ အများစုက သူတို့အသက်ကို အဖိုးအထိုက်ဆုံးအရာအဖြစ် သတ်မှတ်ထားကြတာ မဟုတ်လား။

တာအိုဆရာ ယွမ်ဟယ်က ဖန့်ချန်ကို ကြည့်ပြီး ရုတ်တရက် ရယ်မောလိုက်တယ်။

"ကောင်းပြီ မင်းက ပါရမီရှိပေမဲ့ ကျင့်ကြံမှုအတွက် လိုအပ်တဲ့ စိတ်ဓာတ်ခိုင်မာမှု မရှိမှာကို ငါ စိုးရိမ်နေတာ အခုတော့ ငါ စိတ်အေးသွားပြီ"

သူက ဆက်ပြောတယ်။

"လူအများစုဟာ ဘေးဒုက္ခ ၃ ပါးနဲ့ ကပ်ဘေး၉ ပါး ကို ဖြတ်ကျော်ပြီးမှ ဒီနိယာမကို နားလည်ကြတာကျင့်ကြံခြင်းလမ်းစဉ်က အမြဲတမ်း အန္တရာယ်တွေနဲ့ ပြည့်နေတာပဲ သေမှာကို ကြောက်နေရင် ကောင်းကင်နဲ့ မြေကြီးကို ဆန့်ကျင်ဖို့ ဘာအခွင့်အရေး ရှိတော့မှာလဲ"

တာအိုဆရာ ယွမ်ဟယ်ရဲ့ အကြည့်တွေက ကွင်းပြင်ကို ဝှေ့ကြည့်လိုက်ပြီး ပင်လယ်နဂါး မသေမျိုးဆီမှာ ရပ်တန့်သွားတယ်။

"လူငယ်လေး ငါ့ဂိုဏ်းရဲ့ တပည့်နဲ့ မင်းမှာ ဘာပြဿနာရှိလို့လဲ အသေးစိတ် ရှင်းပြစမ်းပါဦး"

လူအများအပြား အသက်ရှူမှားသွားကြပြီး ရင်တွေ တုန်လာကြတယ်။

လူငယ်လေး ဟုတ်လား

ရွှေအမြုတေအဆင့် ကျင့်ကြံသူတစ်ယောက်ကို ဒီလိုခေါ်ဝေါ်တာက သူဟာ အချိန်အတော်ကြာအောင် အသက်ရှင်နေထိုင်ခဲ့သူ ဖြစ်ရပါမယ်။

သူ့ရဲ့ လေသံနဲ့ ယုံကြည်မှုအရ သူဟာ ရွှေအမြုတေအဆင့်ထက်တောင် ကျော်လွန်နေတာ ဖြစ်နိုင်ပါတယ်။

ရွှေအမြုတေအဆင့်ရဲ့ အထက်မှာတော့ ဝိညာဉ်သန္ဓေသားအဆင့် ရှိပြီး အဲ့ဒါဟာ အခြေခံတည်ဆောက်ခြင်းအဆင့် ကျင့်ကြံသူတွေ အိပ်မက်တောင် မမက်ရဲတဲ့ အဆင့်ပါ။

ပင်လယ်နဂါး မသေမျိုး ခဏလောက် တိတ်ဆိတ်သွားပြီးမှ စကားစလိုက်တယ်။

"တကယ်တော့ "

"ထားလိုက်ပါတော့ မင်း ဘာမှပြောနေစရာ မလိုတော့ဘူး"

လို့ တာအိုဆရာ ယွမ်ဟယ်က ပြောရင်း သူ့ရဲ့လက်အင်္ကျီကို ဝှေ့ယမ်းလိုက်ပါတယ်။

ပင်လယ်နဂါး မသေမျိုးဟာ မမြင်ရတဲ့ စွမ်းအားတစ်ခုနဲ့ အစောင့်ခံလိုက်ရသလို လေထဲကို လွင့်ထွက်သွားပြီး ကောင်းကင်မှာ အစက်အပြောက်လေးတစ်ခုအဖြစ် ပျောက်ကွယ်သွားပါတော့တယ်။

"..."

လူအုပ်ကြီး ကြောင်အသွားကြတယ်။

ရွှေအမြုတေအဆင့် ကျင့်ကြံသူတစ်ယောက်က ဒီလိုမျိုး လွင့်ထွက်သွားရတယ်လို့ ပင်လယ်နဂါး မသေမျိုး သေလား၊ ရှင်လား သူတို့မသိပေမဲ့ အတော်လေး ဒဏ်ရာပြင်းထန်သွားမှာကတော့ သေချာပါတယ်။

တာအိုဆရာ ယွမ်ဟယ်က ဖန်ချန်ကို ကြည့်လိုက်တယ်။

"ဒီမှာ မင်းရဲ့ ရန်သူတွေ ကျန်သေးလား"

လူတိုင်းရဲ့ မျက်နှာတွေ တင်းမာသွားကြတယ်။

ခြောက်ယောက်မြောက် မင်းသားကတော့ သိသိသာသာ ခေါင်းငုံ့ထားလိုက်တယ်။

ကောင်းကင်တောင်ပိုင်းဂိုဏ်း ဘိုးဘေးကလည်း အဝေးကိုပဲ လှမ်းကြည့်နေပါတယ်။

ယွီယွဲ့ဖန်ကတော့ ဒဏ်ရာတွေကြောင့် မေ့လဲနေသလိုမျိုး မျက်လုံးပိတ်ပြီး ငြိမ်နေပါတော့တယ်။

"ကျန်တာတော့ မရှိတော့ဘူး ထင်ပါတယ်"

လို့ ဖန်ချန်က ပြောလိုက်တယ်။

အဲ့ဒီနောက်မှာတော့ တာအိုဆရာ ယွမ်ဟယ်က ဖန်ချန်ဆီကိုပဲ စိတ်ချင်းဆက်သွယ်ပြီး စကားပြောလိုက်တယ်။

"ဒါဆိုရင် ကောင်းပြီ ငါ့မှာ ကျန်နေတဲ့ ဝိညာဉ်စွမ်းအင် အကြွင်းအကျန်လေးကို အခု သုံးလိုက်ပြီ နောက်ဆိုရင်တော့ ပြဿနာတွေကို မင်းကိုယ်တိုင်ပဲ ဖြေရှင်းရတော့မယ် မင်းမှာ မသေမျိုးသွေးကြော ၁၁ ချောင်း စုစည်းပြီးပြီဆိုတော့ အလယ်ပိုင်းတိုက်ကြီး ကို သွားဖို့ အချိန်တန်ပြီ"

ပြောပြီးတာနဲ့ တာအိုဆရာ ယွမ်ဟယ်ရဲ့ ပုံရိပ်ဟာ စတင်ပျောက်ကွယ်သွားပြီး အမှုန်အမွှားလေးတွေက ဖန်ချန်ရဲ့ စိတ်ထဲကို ဝင်ရောက်ကာ မြေပုံတစ်ခု ဖြစ်လာပါတယ်။

ဖန်ချန်ဟာ ဒါကိုကြည့်ပြီး အံ့သြမိပါတယ်။

ဒါဟာ တကယ့် တာအိုဆရာ ယွမ်ဟယ် ချန်ထားခဲ့တဲ့ ဝိညာဉ်စွမ်းအင် ပုံရိပ်ယောင်လေးပဲ ရှိပါသေးတယ်။

ဒါတောင်မှ ရွှေအမြုတေအဆင့် ကျင့်ကြံသူကို အလွယ်တကူ အနိုင်ယူနိုင်တယ်ဆိုတော့ တာအိုဆရာကြီးဟာ ဘယ်လောက်အထိ အစွမ်းထက်နေမလဲ

"သူ သွားပြီလား"

လူအုပ်ကြီး ဇဝေဇဝါ ဖြစ်နေပေမဲ့ သက်ပြင်းချနိုင်သွားကြတယ်။

ကျန့်ယွီ နဲ့ တခြားလူတွေကလည်း အခုမှပဲ ဒူးတုန်တာ ရပ်သွားပြီး ရင်ကို ကော့လိုက်နိုင်ကြပါတယ်။

သူတို့ဂိုဏ်းချုပ်ရဲ့ နောက်ခံက ဒီလောက်တောင့်တင်းနေမှတော့ သူတို့ ဘာကြောက်စရာ ရှိတော့မှာလဲ

ဒီနေ့ပြီးရင် ချင်းကျိုးဓားဂိုဏ်း ဆိုတဲ့ နာမည်ဟာ အင်ပါယာမှာ အစွမ်းအထက်ဆုံး အမှတ်အသား ဖြစ်လာမှာပါ။

မင်းမျိုးမင်းနွယ်တွေတောင် သူတို့ကို ရန်စရဲတော့မှာ မဟုတ်ပါဘူး။

"အကြီးအကဲစူး မင်းရဲ့တပည့်ကို ချက်ချင်း ပြန်ခေါ်လိုက်တော့"

လို့ မီးတိမ်မသေမျိုးက စိတ်လှုပ်ရှားစွာနဲ့ တိုက်တွန်းလိုက်တယ်။

အကြီးအကဲစူးကတော့ ရှုပ်ထွေးတဲ့ ခံစားချက်တွေနဲ့ ဘာမှမပြောဘဲ နေနေပါတယ်။

ကောင်းကင်တောင်ပိုင်းဂိုဏ်း ဘိုးဘေးကပဲ အရင်ဆုံး စကားစလိုက်တယ်။

"အဲ့ဒီဆရာကြီးက မင်းရဲ့ ဆရာလား"

"အတိအကျတော့ မဟုတ်ပါဘူး"

လို့ ဖန်ချန်က ခေါင်းခါပြလိုက်တယ်။

"စီနီယာ ယွမ်ဟယ်က ကျွန်တော့်ကို တပည့်အဖြစ် လက်ခံချင်ခဲ့တာ ဒါပေမဲ့ ကျွန်တော် ငြင်းလိုက်တယ်"

လူတိုင်း မှင်တက်သွားကြတယ်။

ငြင်းလိုက်တယ် ဟုတ်လား ဒီလောက်အစွမ်းထက်တဲ့သူရဲ့ တပည့်ဖြစ်ခွင့်ကို ငြင်းလိုက်တယ်လို့

ဖန့်ချန်က လူအုပ်ကို ဝှေ့ကြည့်လိုက်တယ်။

"ပင်လယ်နဂါး မသေမျိုးက ဒီကိစ္စကို မရပ်တန့်ချင်ဘူးဆိုတော့ ငါ သူ့ဂိုဏ်းဆီကို တစ်ခေါက်သွားလည်မလို့ ဘယ်သူ လိုက်ချင်လဲ"

ကျန့်ယွီ နဲ့ တခြားအကြီးအကဲတွေရဲ့ မျက်လုံးတွေ တောက်ပသွားတယ်။

ပင်လယ်နဂါးဂိုဏ်းကို သွားလည်မယ်ဆိုတာ အဲ့ဒီက ရတနာတွေကို သိမ်းကျုံးဖို့ပဲ မဟုတ်လား

အခြေခံတည်ဆောက်ခြင်းအဆင့် ကျင့်ကြံသူတွေလည်း စိတ်လှုပ်ရှားသွားကြတယ်။

ဖန်ချန်နောက်ကို လိုက်တာက အကျိုးအမြတ်ရမယ့်အပြင် ဖန်ချန်နဲ့ ရင်းနှီးခွင့်ရမှာ ဖြစ်လို့ အလွန်အဖိုးတန်ပါတယ်။ ပင်လယ်နဂါး မသေမျိုးကိုတော့ သူတို့ မေ့လိုက်ကြပါပြီ။

ခြောက်ယောက်မြောက် မင်းသားက အရင်ဆုံး ဝင်ပြောပါတယ်။

"မိတ်ဆွေဖန့် ကျွန်တော်လည်း လိုက်လို့ရမလား"

"လိုက်ချင်တဲ့သူ ဘယ်သူမဆို လိုက်နိုင်ပါတယ်"

လို့ ဖန့်ချန်က ပြုံးပြီး ပြောလိုက်တယ်။

"ဆိပ်ကမ်းဖြူ ကို အားလုံး သိကြတယ်မလားနောက် ၇ ရက်နေရင် အဲ့ဒီမှာ တွေ့ကြမယ်"

ပြီးတော့ သူက ကျန်းရှောင်ခဲ့ကို ကြည့်လိုက်တယ်။

"မင်းရဲ့ဆရာဆီ ဘာလို့ ပြန်မသွားတာလဲ သူက စောစောက မင်းကို ကာကွယ်ပေးချင်လို့ ပြောခဲ့တာပါ"

ကျန်းရှောင်ခဲ့က ရှက်ကိုးရှက်ကန်းနဲ့ အကြီးအကဲစူးကို ကြည့်လိုက်တယ်။

"ဆရာ... ကျွန်တော်..."

"ဒီဘက်ကို လာခဲ့ပါ"

လို့ အကြီးအကဲစူးက စိတ်သက်သာရာရတဲ့ အပြုံးနဲ့ ခေါ်လိုက်ပါတယ်။

အခန်း ၂၈၆- ချီသန့်စင်ခြင်းအဆင့်၏ ၁၂ ခုမြောက် အဆင့်

ချင်းကျိုးဓားဂိုဏ်း တွင် ရဲ့ဝမ်ရှို့ နှင့် လျိုမူ တို့နှစ်ဦးစလုံး စိုးရိမ်တကြီး စောင့်ဆိုင်းနေကြသည်။

"ဂျူနီယာလျိုဆရာဘေးကင်းပါ့မလား"

ဟု ရဲ့ဝမ်ရှို့က မေးလိုက်သည်။

သူသည် ကျောက်စားပွဲငယ်တစ်ခုတွင် ထိုင်နေပြီး သူ့ရှေ့တွင်တော့ လျိုမူက မြင်းစီးဟန် ဖြင့် လေ့ကျင့်ခန်း လုပ်နေသည်။

လျိုမူ ပြန်မဖြေမီ ရဲ့ဝမ်ရှို့ကပဲ ဆက်ပြောလိုက်သည်

"ဆရာက အဆင်ပြေမှာပါနော် သူက အခြေခံတည်ဆောက်ခြင်း နောက်ဆုံးအဆင့် ကျင့်ကြံသူကိုတောင် ဓားတစ်ချက်တည်းနဲ့ သတ်နိုင်ခဲ့တာပဲကို"

လျိုမူ၏ ခြေထောက်များမှာ တုန်ယင်နေပြီး နဖူးမှ ချွေးစက်များ စီးကျနေသည်။

ခဏအကြာတွင် သူ မတ်မတ်ရပ်လိုက်ပြီး သက်ပြင်းချကာ မြေပြင်ပေါ်တွင် သစ်ကိုင်းတစ်ချောင်းဖြင့် ရေးလိုက်သည်

'ဟုတ်တယ် ဟုတ်တယ် ဆရာ က အဆင်ပြေမှာပါ'

ရဲ့ဝမ်ရှို့က သက်ပြင်းချကာ ပြုံးလိုက်သည်။

"ဂျူနီယာအစ်ကိုလျို တကယ်တော့ ကျင့်ကြံခြင်းဆိုတာ ဒီလောက် ပြင်းထန်တဲ့ ကိုယ်ကာယလေ့ကျင့်ခန်းတွေ မလိုပါဘူး ဒါက သိုင်းသမားတွေပဲ လုပ်ကြတာပဲ မင်း မြင်းစီးဟန် ကျင့်နေစရာ မလိုပါဘူး ဆရာ ပြန်လာရင် မင်းကို ကျင့်စဉ်တစ်ခု သင်ပေးမှာပါ အဲ့ဒီကျမှ တရားထိုင်ပြီး ကျင့်ကြံတာပေါ့"

လျိုမူက မြေပြင်တွင် ထပ်ရေးသည်

'နည်းနည်း ပိုသန်မာတာက ဘာမှမဖြစ်ပါဘူး'

သူ့မျက်လုံးများမှာ တည်ကြည်နေသည်။

သူ ကြုံတွေ့ခဲ့ရသမျှက သူ့နှလုံးသားထဲတွင် မျိုးစေ့တစ်ခု ချပေးခဲ့သည် သူ သန်မာလာဖို့ လိုအပ်သည်။

သူ သန်မာမှသာ ဖန့်ချန် အတွက် ဝန်ထုပ်ဝန်ပိုး မဖြစ်မှာပါ။

သူ လုံလောက်အောင် သန်မာလာလျှင် သူ့သခင်၏ သောကများကို အတိုင်းအတာတစ်ခုအထိ ကူညီထမ်းပိုးပေးနိုင်လိမ့်မည်။

"သိုင်းသမားတွေဆီကနေ သင်ယူစရာတွေ အများကြီး ရှိပါတယ်"

ဟု အသံတစ်ခု ရုတ်တရက် ထွက်ပေါ်လာသည်။

"နှစ်ပေါင်းများစွာ တိုက်ပွဲတွေထဲမှာ နစ်မွန်းခဲ့တဲ့ သိုင်းသမားတစ်ယောက်ရဲ့ တိုက်ပွဲဝင်အာရုံက နှစ်ပေါင်းတစ်ရာ တရားထိုင်နေတဲ့ ကျင့်ကြံသူတစ်ယောက်ထက် ပိုကောင်းတတ်တယ်"

လျိုမူနှင့် ရဲ့ဝမ်ရှို့တို့မှာ အသံကြားသဖြင့် လန့်သွားကြပြီး ထိုအသံမှာ မည်သူဖြစ်ကြောင်း သိလိုက်ရသောအခါ အလွန်ဝမ်းသာသွားကြသည်။

ရဲ့ဝမ်ရှို့က ချက်ချင်း မတ်တပ်ရပ်ကာ ဦးညွှတ်လိုက်သည်။

"ဆရာ "

"အင်း..."

ဖန်ချန်က ခပ်ဖျော့ဖျော့ ပြုံးလျက် ခေါင်းငြိမ့်ပြလိုက်သည်။

"ငါ ဒီကိစ္စတွေ ပြီးရင် မင်းတို့ နှစ်ယောက်လုံး ချင်းကျိုးဓားဂိုဏ်းမှာပဲ နေပြီး ကျင့်ကြံရမယ်"

သူတို့နှစ်ဦးစလုံး စိတ်အေးသွားကြသည်။

ဖန်ချန်က ပြုံးလိုက်ပြီး သူ၏ ကိရိယာများနှင့် ပစ္စည်းများကို ထုတ်ကာ ဘေးတွင် အဆောင် များ စတင်ပြုလုပ်တော့သည်။

တစ်ချိန်တည်းမှာပင် သူသည် ရေ၊ မြေ၊ သစ်သား၊ မီး နှင့် သတ္တု ဓာတ်ကြီးငါးပါး စွမ်းအင်များကို တစ်ပြိုင်နက်တည်း လေ့ကျင့်နေသည်။

ဓာတ်ကြီးငါးပါး နည်းစနစ် သည် အလွန်အသုံးဝင်ပြီး ဝိညာဉ်သန္ဓေသားအဆင့် ရောက်လျှင်ပင် အသုံးဝင်နိုင်ကြောင်း သူ သိရှိခဲ့ရသည်။

အလုပ်များစွာကို တစ်ပြိုင်နက် လုပ်ဆောင်ခြင်းက ဝိညာဉ်စွမ်းအင် သုံးစွဲမှုကို မြင့်တက်စေသော်လည်း သူ သုံးလိုက်သမျှ ဝိညာဉ်စွမ်းအင်များမှာ ချက်ချင်း ပြန်လည် ပြည့်ဖြိုးနေသဖြင့် အဆင်ပြေလှသည်။

ရက်အနည်းငယ် ကုန်ဆုံးသွားသောအခါ အင်ပါယာတစ်ခုလုံးတွင် တုန်လှုပ်ဖွယ်ရာ သတင်းတစ်ခု ပျံ့နှံ့သွားသည်။

လျှို့ဝှက်ဆန်းကြယ်သော ကျင့်ကြံသူတစ်ဦးသည် ကောင်းကင်တောင်ပိုင်းဂိုဏ်းတွင် ပင်လယ်နဂါး မသေမျိုး ကို အနိုင်ယူခဲ့သည်ဟူသော သတင်းပင် ဖြစ်သည်။

ထိုလျှို့ဝှက်ဆန်းကြယ်သူမှာ လျှို့ဝှက်သော ဓားကျင့်ကြံသူဂိုဏ်းတစ်ခုမှ အကြီးတန်းပုဂ္ဂိုလ်တစ်ဦး ဖြစ်နိုင်ကြောင်းလည်း ကောလာဟလများ ထွက်နေသည်။

ဟင်းလင်ပြင်မြို့ ရှိ ရဲ့မျိုးနွယ်စု အတွင်း၌...

ရဲ့ဝမ်ရှို့၏ ဖခင်သည် ရင်ခုန်တုန်ရင်စွာဖြင့် မျိုးနွယ်စုဝင်းအတွင်းသို့ ပြေးဝင်လာသည်။

"အဖေ... အဖေ"

ရဲ့မျိုးနွယ်စု ခေါင်းဆောင်က မျက်မှောင်ကြုတ်လျက် ထွက်လာသည်။

"ဘာဖြစ်လို့လဲ"

ရဲ့ဝမ်ရှို့၏ ဖခင်က စိတ်လှုပ်ရှားစွာဖြင့်

"အဖေ ကျွန်တော် သတင်းတစ်ခု ရထားတယ် အဲ့ဒီ ဓားကျင့်ကြံသူ စီနီယာကြီးက ကောင်းကင်တောင်ပိုင်းဂိုဏ်းမှာ ပင်လယ်နဂါး မသေမျိုးနဲ့ ထိပ်တိုက်တွေ့ခဲ့သတဲ့"

ရဲ့မျိုးနွယ်စု ခေါင်းဆောင်က အံ့သြသွားသည်။ ၎င်းမှာ သတင်းကောင်း မဟုတ်ပေ။

"မင်းက ဘာလို့ ဒီလောက် စိတ်လှုပ်ရှားနေရတာလဲ"

ဝမ်ရှို့၏ ဖခင်က အနားသို့ တိုးကာ အသံတိုးတိုးဖြင့် စကားအနည်းငယ် ပြောလိုက်သောအခါ မျိုးနွယ်စု ခေါင်းဆောင်၏ မျက်နှာမှာ အံ့သြမှုကြောင့် တောင့်တင်းသွားသည်။

"ဒါသာ တကယ်ဆိုရင်တော့ ဝမ်ရှို့က ထူးခြားတဲ့ ဆရာတစ်ယောက်ကို ရထားတာပဲ ငါတို့ရဲ့ ရဲ့မျိုးနွယ်စုကြီး ကြီးပွားတိုးတက်ဖို့ အချိန်ရောက်ပြီ"

ဟု ခေါင်းဆောင်က ရေရွတ်လိုက်သည်။

"သေချာတာပေါ့"

ဝမ်ရှို့၏ ဖခင်က ခိုင်ခိုင်မာမာ အတည်ပြုသည်။

"ဒီသတင်းက အမှန်ဖြစ်ရမယ် ဘယ်သူက ရွှေအမြုတေအဆင့် ဘိုးဘေးတစ်ယောက်အကြောင်း ကောလာဟလအမှားတွေ လွှင့်ရဲမှာလဲ"

ရဲ့မျိုးနွယ်စု ခေါင်းဆောင်က အားရပါးရ ရယ်မောလိုက်သည်။

"ကောင်းတယ် အရမ်းကောင်းတယ် ဟားဟားဟား"

ချင်းကျိုးဓားဂိုဏ်း

ဖန်ချန်၏ လက်ထဲရှိ စုတ်တံသည် ကွဲအက်သွားသည်။

သူ၏ ကိုးပါးသော ဘေးဒုက္ခ ပြဒါး နှင့် မိုးကြိုးသစ်သား စက္ကူ များ ကုန်ဆုံးသွားပြီ ဖြစ်သည်။

ပစ္စည်းများ ကုန်သွားပြီဖြစ်၍ ခရမ်းရောင်လျှပ်စီး အဆောင် များ ပြုလုပ်ခြင်းကို ခေတ္တရပ်လိုက်ရသည်။

ဖန်ချန်သည် သူ၏ လက်စွပ်ကို ပွတ်သပ်ကြည့်လိုက်သည်။

အတွင်းတွင် ထိပ်တန်းအဆင့် ခရမ်းရောင်လျှပ်စီး အဆောင် ၂၀၀ နီးပါး ရှိနေပြီး ၎င်းတို့မှာ ဝိညာဉ်ကျောက်တုံးများစွာ တန်ဖိုးရှိသည်။

ထို့ပြင် သူ့တွင် အဆင့်နိမ့် ဝိညာဉ်ကျောက်တုံး ၆၀၀၀ ခန့်လည်း ရှိနေသေးသည်။

ရက်အနည်းငယ်ကြာ မရပ်မနား ကျင့်ကြံပြီးနောက် သူ၏ ဝိညာဉ်စွမ်းအင် သိုလှောင်မှုမှာ သိသိသာသာ မြင့်တက်လာသည်။

"နောက်ဆုံးအဆင့်အတွက် အချိန်ရောက်ပြီ"

ဟု ဖန်ချန်က ရေရွတ်လိုက်သည်။

သူက လက်ကို ဝှေ့ယမ်းလိုက်ရာ သူ့ရှေ့တွင် ရွှေရောင်ပုံရိပ်တစ်ခု ပေါ်လာသည်။

၎င်းမှာ ပင်လယ်နဂါး မသေမျိုး၏ ဘီလူးကြီးများ၏ ပုံစံငယ်လေး ဖြစ်သည်။

ဒါက ရက်အတော်ကြာ လေ့ကျင့်ပြီးနောက် သူ၏ အကန့်အသတ်ဖြစ်သည်။

ပင်လယ်နဂါး မသေမျိုး၏ အဆင့်သို့ ရောက်ရန်မှာ အခြေခံတည်ဆောက်ခြင်း မဟာပြီးပြည့်စုံခြင်းအဆင့်သို့ ရောက်ရန် လိုအပ်မည်ဖြစ်ပြီး နှစ်ပေါင်းများစွာ ကျင့်ကြံရပေဦးမည်။

သူသည် သူ၏ ဝိညာဉ်စွမ်းအင်များ အကုန်အစင် ခန်းခြောက်သွားသည်အထိ ထိုရွှေရောင်ပုံရိပ်ကို အဖန်ဖန် ဖန်တီးလိုက်၊ ဖျက်လိုက် လုပ်နေသည်။

သူ၏ ခမ်းနားထည်ဝါသော ဝိညာဉ်စွမ်းအင်များ ပြန်လည် ပြည့်ဖြိုးလာချိန်တွင် ပတ်ဝန်းကျင်ရှိ ဝိညာဉ်စွမ်းအင် လှိုင်းဂယက်များမှာ ရုတ်တရက် ပြင်းထန်လာသည်။

ဖန့်ချန်သည် ငြိမ်သက်စွာ ရပ်နေပြီး မရေမတွက်နိုင်သော ဝိညာဉ်စွမ်းအင် စီးကြောင်းများကို သူ၏ ၁၂ ခုမြောက် မသေမျိုးသွေးကြော အတွင်းသို့ စီးဝင်စေလိုက်သည်။

ချင်းကျိုးဓားဂိုဏ်းရှိ ကျင့်ကြံသူများသည် လေထုထဲရှိ ထူးခြားသော ဝိညာဉ်စွမ်းအင် လှိုင်းဂယက်များကို ခံစားလိုက်ရသည်။ ကျန့်ယွီ က

"ဒါက ဂိုဏ်းချုပ်ရဲ့ ခြံဝင်းထဲကနေ လာတာပဲ"

ဟု ဆိုကာ မျက်မှောင်ကြုတ်လိုက်သည်။

"ဒီလှိုင်းဂယက်တွေက ငါတို့ ချီသန့်စင်ခြင်းအဆင့် ၁၂ ကို ဝင်တုန်းက ခံစားချက်နဲ့ တူလိုက်တာ"

ဟု ကျင့်ကြံသူတစ်ဦးက ပြောလိုက်သည်။

"နည်းနည်းတော့ ဆင်တယ် ဒါပေမဲ့ မတူဘူးဂိုဏ်းချုပ်က ချီသန့်စင်ခြင်းအဆင့်မှာ ရှိနေဖို့ မဖြစ်နိုင်ဘူးလေ သူက အနည်းဆုံး အခြေခံတည်ဆောက်ခြင်း အစောပိုင်းအဆင့်မှာ ရှိနေရမှာ"

ဟု နောက်တစ်ဦးက ဆိုသည်။

၁၆ နာရီခန့် ကြာပြီးနောက် ဖန့်ချန် ဖြစ်ပေါ်စေသော လှုပ်ခတ်မှုများ ငြိမ်သက်သွားသည်။

၁၂ ခုမြောက် မသေမျိုးသွေးကြော ကို အောင်မြင်စွာ တည်ဆောက်ပြီးစီးသွားပြီ ဖြစ်သည်။

အားလုံး ပြီးဆုံးသွားပြီဟု ဖန့်ချန် ထင်နေစဉ်မှာပင် သူ၏ မသေမျိုးသွေးကြော ၁၂ ခုစလုံးတွင် ထူးဆန်းသော အပြောင်းအလဲတစ်ခု ဖြစ်ပေါ်လာသည်။

ရွှေရောင်အလင်းတန်းတစ်ခု ဝါးခနဲ လက်သွားပြီး သွေးကြောအားလုံးသည် ရွှေရောင်အဖြစ်သို့ ပြောင်းလဲသွားသည်။

ဖန်ချန်သည် သူ၏ မသေမျိုးသွေးကြောများမှာ ယခင်ကထက် ဆယ်ဆမျှ ပိုမို ခိုင်ခံ့လာကြောင်း ခံစားလိုက်ရသည်။

မသေမျိုးသွေးကြောများသည် အခြေခံ ဖြစ်သည်။

အခြေခံ ခိုင်မာခြင်းက ဝိညာဉ်စွမ်းအင် အရည်အသွေးမှသည် ကျင့်ကြံသူ၏ ကိုယ်ခန္ဓာအထိ အရာရာကို သက်ရောက်မှု ရှိသည်။

၁၁ အဆင့်မှ ၁၂ အဆင့်သို့ တက်လှမ်းခြင်းက ဖန်ချန်၏ ခွန်အားကို ၁ အဆင့်မှ ၁၁ အဆင့်အထိ တက်လှမ်းခဲ့စဉ်ကထက် ပိုမို တိုးတက်စေခဲ့သည်။

" တာအိုသုံးထောင် ကျမ်းထဲမှာ ဒီလို ဖော်ပြထားတယ် အခြေခံတွေကို အမျိုးအစား ၅ မျိုး ခွဲခြားနိုင်တယ် ကြေး ၊ သံ ၊ ငွေ ၊ ရွှေ နှင့် အာဏာ၏ အရင်းအမြစ် "

ဖန်ချန်က ရေရွတ်လိုက်သည်။

"ငါက စတုတ္ထအဆင့်ကို ရောက်သွားတာလား ဒါက အတော်လေး ကောင်းတယ် ဒါပေမဲ့ ငါသာ ပဉ္စမမြောက် အခြေခံ အမျိုးအစားကို တည်ဆောက်နိုင်ရင် ငါ့ရဲ့ အနာဂတ် ကျင့်ကြံမှုအတွက် ပိုပြီး ကောင်းမွန်တဲ့ အုတ်မြစ် ဖြစ်လာမှာပဲ"