အခန်း (၃၆၅-၃၆၆)
Vol. 27 Ch. 365-366
အခန်း ( ၃၆၅ ) - နှုတ်ပိတ်နေပါ၊ အရှက်ကွဲခံပါ၊ မသွားပါနဲ့
တတိယအကြီးအကဲ၏ ပြောပြချက်အရ အခြားနတ်ဆိုးနယ်မြေတစ်ခုမှ ထိုချီလျန်မျိုးနွယ်ဝင် ညီမငယ်သည် ယခင်က သူ၏နတ်ဆိုးနယ်မြေအရှင်နောက်သို့ လိုက်ကာ ရှီမိုကောင်းကင်သို့ သွားရောက်ခဲ့စဉ် သူ၏နယ်မြေအရှင်နှင့် ရှီမိုကောင်းကင်၏ အဆင့်မြင့်အရာရှိတစ်ဦးတို့၏ စကားဝိုင်းကို ကံကောင်းထောက်မစွာ ကြားခဲ့ရခြင်းဖြစ်သည်။
ထိုစကားဝိုင်းအတွင်း ရှီမိုကောင်းကင်၏ အဆင့်မြင့်အရာရှိမှ ချီလျန်မျိုးနွယ်ဝင်များ သေဆုံးသွားပြီဖြစ်ကြောင်း 'မတော်တဆ' ဖွင့်ဟပြောဆိုမိခဲ့လေသည်။
" ဒီနှစ်တွေတစ်လျှောက်လုံး... ကျွန်မတို့ ချီလျန်မျိုးနွယ်က မျိုးနွယ်ဝင် ရာနဲ့ချီပြီး ရှီမိုကောင်းကင်ကို စေလွှတ်ခဲ့ပေမယ့် သူတို့... သူတို့အားလုံး သေကုန်ကြပြီ "
တတိယအကြီးအကဲသည် ထိန်းချုပ်မရနိုင်သော နာကျင်မှုများအပြည့်ပါဝင်နေသည့် လေသံတိုးတိုးဖြင့် ပြောဆိုလေသည်။
တတိယအကြီးအကဲသည် ရှီမိုကောင်းကင်သို့ စေလွှတ်ခံရသော ချီလျန်မျိုးနွယ်ဝင်များ၏ အခြေအနေမှာ သဘာဝအရ အန္တရာယ်များလွန်းလှကြောင်း သိရှိထားသော်လည်း ရှီမိုကောင်းကင်မှ ဤမျှအထိ ရက်စက်လိမ့်မည်ဟု သူ မည်သည့်အခါကမျှ မမျှော်လင့်ထားခဲ့ချေ။
သူ၏အထင်တွင် ရှီမိုကောင်းကင်သည် ချီလျန်မျိုးနွယ်ဝင်များအား အန္တရာယ်များသော ရှေ့တန်းစစ်မြေပြင်များသို့ စေလွှတ်ခြင်း သို့မဟုတ် အသက်အန္တရာယ်ရှိသော တာဝန်အချို့ကို ပေးအပ်ခြင်းမျိုးသာ လုပ်လိမ့်မည်ဟု ထင်ခဲ့သည်။ ဤသည်မှာ သေဆုံးနှုန်း မြင့်မားမည်ဆိုသော်ငြား အချို့သောသူများမှာမူ အသက်ရှင်ကျန်ရစ်နိုင်စွမ်း ရှိနေဦးမည်ဖြစ်သည်။
သို့သော် ထိုချီလျန်မျိုးနွယ်ဝင် ညီမငယ်၏ ပြောပြချက်ကို ကြားပြီးနောက်တွင် ရှီမိုကောင်းကင်မှ ထိုလူများသည် အစမှအဆုံးတိုင် ချီလျန်မျိုးနွယ်အပေါ် လွှတ်ပေးရန် မရည်ရွယ်ခဲ့ကြောင်း သူ အဆုံး၌ နားလည်သဘောပေါက်သွားခဲ့၏။ စေလွှတ်ခံခဲ့ရသော ချီလျန်မျိုးနွယ်ဝင်များအားလုံးသည် ရှီမိုကောင်းကင်၏ အဆင့်မြင့်အရာရှိများထံမှ နည်းလမ်းအမျိုးမျိုးဖြင့် တိတ်တဆိတ် ကွပ်မျက်ခြင်းကို ခံခဲ့ကြရခြင်းပင်တည်း။
" သူတို့အားလုံး သေသွားကြပြီလား...? "
ချီလျိုသည် မသိစိတ်အလျောက် ရေရွတ်လိုက်မိကာ သူ၏မျက်လုံးများအတွင်း၌ ပြင်းထန်သော နှလုံးကွဲကြေမတတ် နာကျင်မှုအရိပ်အယောင်တစ်ခု ဖြတ်ပြေးသွားလေသည်။
အံ့ဩစရာမရှိတော့ပေ။ သူတို့ ရှီမိုကောင်းကင်သို့ ဝင်ရောက်သွားပြီးကတည်းက ဘိုးဘေးပိုင်နယ်မြေတွင် ကျန်ရစ်ခဲ့သော ထိုချီလျန်မျိုးနွယ်ဝင်များ၏ ဝိညာဉ်မီးအိမ်များ အားလုံး ငြိမ်းသတ်သွားခဲ့ခြင်းမှာ အံ့ဩစရာမဟုတ်တော့ချေ။
ယခင်က ချီလျိုတွေးထင်ခဲ့သည်မှာ ထိုညီမငယ်များသည် ရှီမိုကောင်းကင်မှတဆင့် နယ်ပယ်အသီးသီးကို သိမ်းပိုက်ရန် ရှေ့တန်းစစ်မျက်နှာများသို့ စေလွှတ်ခံခဲ့ရသောကြောင့် ဖြစ်ရမည်ဟုပင်။
နတ်ဆိုးနယ်မြေမှ သက်ရှိများသည် နတ်ဆိုးနယ်မြေကို စွန့်ခွာသွားကာ နတ်ဆိုးနယ်မြေနှင့် များစွာဝေးကွာလျှင် ထိုအကွာအဝေးကို အာရုံမခံနိုင်တော့သဖြင့် ဝိညာဉ်မီးအိမ်များ သဘာဝအလျောက် ငြိမ်းသွားတတ်ပေသည်။ ထို့ကြောင့် ချီလျိုအနေဖြင့် စိုးရိမ်ပူပန်နေခဲ့သော်လည်း များစွာ မတွေးမိခဲ့ချေ။
သို့သော် အမှန်တရားမှာ ဤသို့လုံးဝမဟုတ်ခဲ့ကြောင်း မည်သူက တွေးမိမည်နည်း။
အစမှအဆုံးတိုင်အောင် ရှီမိုကောင်းကင်မှ ချီလျန်မျိုးနွယ်ဝင် ညီမငယ်တစ်ဦးတစ်ယောက်မျှ ပြန်မလာခဲ့ခြင်းမှာ အံ့ဩစရာမဟုတ်တော့ပေ။ သူတို့အားလုံး ကံဆိုးစွာဖြင့် သေပွဲဝင်ခဲ့ရခြင်းပင် ဖြစ်တော့သည်။
" ဘာလို့ စောစောကတည်းက မပြောခဲ့ရတာလဲ "
ချီလျိုသည် ရင်နာစွာဖြင့် ပြောဆိုလေသည်။
ထိုချီလျန်မျိုးနွယ်ဝင်သည် ရှီမိုကောင်းကင် အဆင့်မြင့်အရာရှိ၏ စကားဝိုင်းကို ကြားခဲ့ရပြီးကတည်းက အဘယ်ကြောင့် ဤသတင်းကို ချီလျန်မျိုးနွယ်ထံသို့ စောစီးစွာ သတင်းမပို့ခဲ့ရသနည်း။
အကယ်၍ သူတို့သာ စောစောသိခဲ့ပါက ချီလျန်မျိုးနွယ်အနေဖြင့် ပိုမိုများပြားသော မျိုးနွယ်ဝင်များ အသက်စတေးခံရခြင်းမှ ကာကွယ်ရန် သင့်လျော်သော အစီအမံများကို ပြုလုပ်နိုင်ခဲ့မည်ဖြစ်သည်။
" စောစောပြောပြခဲ့ရင်ရော ဘာအကျိုးထူးမှာမို့လို့လဲ "
တတိယအကြီးအကဲမှ အသံတိမ်တိမ်ဖြင့် ပြောဆိုလေသည်။
" အဲ့ဒီညီမငယ်က ချီလျန်မျိုးနွယ်ကို သတင်းမပို့ဘဲ တမင်သက်သက် နေခဲ့တာလို့ ပြောပါတယ်... ဘာဖြစ်လို့လဲဆိုတော့ ရှီမိုကောင်းကင်ရဲ့ အဆင့်မြင့်အရာရှိက ဒီသတင်းကို မတော်တဆ ပြောမိသွားတာမဟုတ်ဘဲ... သူ့ကို တမင်သက်သက် ကြားစေချင်လို့ လုပ်ခဲ့တာလို့ သူက သံသယရှိခဲ့လို့ပါပဲ.....
ရည်ရွယ်ချက်ကတော့ သူပြန်လာပြီး ဒီသတင်းကို ကျွန်မတို့မျိုးနွယ်ဆီ သတင်းပို့ဖို့ပါပဲ.....
အဲ့ဒီအချိန်မှာ ဒီသတင်းကို သိလိုက်ရရင် ကျွန်မတို့ ချီလျန်မျိုးနွယ်က သေချာပေါက် မခံမရပ်နိုင်ဖြစ်သွားလိမ့်မယ်... တစ်မျိုးနွယ်လုံးရဲ့ ဒေါသအောက်မှာ အသိဉာဏ်ကင်းမဲ့တဲ့ လုပ်ရပ်တွေကို လုပ်ဖို့ ပိုလွယ်ကူသွားပြီး... ရှီမိုကောင်းကင်အတွက် ကျွန်မတို့မျိုးနွယ်ကို ပစ်မှတ်ထားဖို့ အကြောင်းပြချက်တစ်ခု ပေးလိုက်သလို ဖြစ်သွားလိမ့်မယ်လေ.....
ဒီအချက်ကို သူ ခန့်မှန်းမိခဲ့လို့ပဲ အခုထိ နှုတ်ပိတ်နေခဲ့ပြီး ဘာမှမကြားခဲ့ရသလို ဟန်ဆောင်နေခဲ့တာပါ... ဒီနေ့ ဘိုးဘေးပိုင်နယ်မြေကို ပြန်ရောက်လာပြီး ကျွန်မတို့ ချီလျန်မျိုးနွယ်ရဲ့ လက်ရှိအခြေအနေကို သိလိုက်ရတဲ့အချိန်ရောက်မှသာ... သူက မျက်ရည်တွေကျပြီး အတိတ်က သူကြုံတွေ့ခဲ့ရသမျှကို ကျွန်မကို ပြောပြခဲ့တာပါ "
တတိယအကြီးအကဲ၏ စကားများကြောင့် ချီလျိုသည် တိတ်ဆိတ်သွားလေသည်။
စိတ်ငြိမ်သက်သွားပြီးနောက် ချီလျန်မျိုးနွယ်ဝင် ညီမငယ်၏ လုပ်ရပ်မှာ အမှန်တကယ်ပင် မှန်ကန်ကြောင်း သူ ဝန်ခံလိုက်ရသည်။
တွေးကြည့်လိုက်စမ်းပါ။ ရှီမိုကောင်းကင် အဆင့်မြင့်အရာရှိနှင့် နတ်ဆိုးနယ်မြေအရှင်တို့၏ စကားဝိုင်းကို သာမန် ချီလျန်မျိုးနွယ်ဝင်တစ်ဦးမှ မည်သို့လုပ်၍ သိနိုင်မည်နည်း။
ချီလျန်မျိုးနွယ်ဝင်များအား ကွပ်မျက်သည့်ကိစ္စဆိုလျှင် ရှီမိုကောင်းကင်အတွင်း၌ လျှို့ဝှက်ချက်တစ်ခုပင် ဖြစ်ပေလိမ့်မည်။ ထိုရှီမိုကောင်းကင်၏ အဆင့်မြင့်အရာရှိအနေဖြင့် စကားပြောဆိုနေစဉ်အတွင်း ဤသတင်းကို ပေါက်ကြားစေသည်အထိ မည်သို့များ ပေါ့ဆနိုင်မည်နည်း။
ထို့အပြင် တိုက်တိုက်ဆိုင်ဆိုင်ပင် ချီလျန်မျိုးနွယ်ဝင်တစ်ဦးမှ ကြားသွားခဲ့ခြင်းက.....
တိုက်ဆိုင်မှုတစ်ခုသည် ကံတရားကြောင့် ဖြစ်နိုင်ပေသည်။ သို့သော် ထပ်တလဲလဲဖြစ်နေသော တိုက်ဆိုင်မှုများသည် အလျင်း ကံတရားကြောင့် မဟုတ်ပေ။
တစ်ခုတည်းသော ရှင်းလင်းချက်မှာ ရှီမိုကောင်းကင်၏ အဆင့်မြင့်အရာရှိသည် ချီလျန်မျိုးနွယ်တစ်ရပ်လုံးအား ပစ်မှတ်ထားရန် ရည်ရွယ်ချက်ဖြင့် ထိုချီလျန်ညီမငယ်အား အသုံးပြုကာ သတင်းစကားကို ချီလျန်မျိုးနွယ်ထံ ပြန်လည်ရောက်ရှိစေရန် တမင်သက်သက် လုပ်ဆောင်ခဲ့ခြင်းပင်ဖြစ်သည်။ ချီလျန်မျိုးနွယ်အနေဖြင့် ဤသတင်းကို ကြားသောအခါ အသိဉာဏ်ကင်းမဲ့သော တုံ့ပြန်မှုများ ပြုလုပ်လာမည်ဟု သူတို့ မျှော်လင့်ထားခဲ့ကြသည်။
ထို့အပြင် ထိုချီလျန်ညီမငယ်ကလည်း ဤအချက်ကို သေချာပေါက် ခန့်မှန်းမိခဲ့သည့်အတွက်ကြောင့်ပင် သူသည် အရှက်ကွဲခံကာ ဤအချိန်အထိ နှုတ်ပိတ်နေခဲ့ခြင်း ဖြစ်သည်။
ချီလျိုသည် ထိုညီမငယ်အား အပြစ်မတင်သင့်ရုံသာမက လွန်စွာ ကျေးဇူးတင်သင့်ကြောင်း သိလိုက်ရသည်။
အကယ်၍ သူသာ ထိုအချိန်က ကိစ္စရပ်အား အမှန်တကယ် သတင်းပို့ခဲ့ပါက ချီလျန်မျိုးနွယ်သည် ပြန်လမ်းမရှိသော ချောက်ကမ်းပါးထဲသို့ ကျရောက်ပြီးဖြစ်နေလောက်ပြီဖြစ်သည်။
" ကျွန်မကိုယ်စား အဲ့ဒီညီမငယ်ကို ကျေးဇူးတင်ပေးပါ... အခုတော့ သူ့ကို အနားယူခိုင်းလိုက်ပါဦး... နောက်မှ သူ့ဆီ ကျွန်မကိုယ်တိုင် လာလည်ပါ့မယ် "
ချီလျိုသည် ကြေကွဲအက်ရှသော အသံဖြင့် ပြောကြားလေသည်။
ကုချန်သည် ဘေးတွင်ထိုင်လျက် ချီလျိုနှင့် တတိယအကြီးအကဲတို့၏ စကားဝိုင်းကို နားထောင်ရင်း အခြေအနေကို အကြမ်းဖျင်း နားလည်သွားခဲ့သည်။
အခြားသော နတ်ဆိုးနယ်မြေများအားလုံး ကြက်သွေးရောင်ငရဲ နတ်ဆိုးနယ်မြေသို့ ချစ်ကြည်ရေးပြသရန် ရောက်လာကြချိန်တွင် ရှီမိုကောင်းကင်မှ အဘယ်ကြောင့် မတုန်မလှုပ် ရှိနေခဲ့ရသနည်းဆိုသည်ကို ထိုအခါမှသာ သူ သဘောပေါက်သွားလေတော့သည်။
ရှီမိုကောင်းကင်၏ လက်အောက်ရှိ ရာနှင့်ချီသော နတ်ဆိုးနယ်မြေများသည် ယခင်က ချီလျန်မျိုးနွယ်ကို တိတ်တဆိတ် ဖိနှိပ်ရန် ရှီမိုကောင်းကင်ထံမှ အရိပ်အမြွက်များ ရရှိခဲ့သည့်အတွက် ချီလျန်မျိုးနွယ်ဝင်များအား အန္တရာယ်များသော တာဝန်များကို ထမ်းဆောင်ရန် စေလွှတ်ခဲ့သော်ငြား သူတို့သည် အစွန်းရောက်သည့်အထိတော့ မလုပ်ဆောင်ခဲ့ကြပေ။
ထို့ကြောင့် ယခု ရှီမိုကောင်းကင်အရှင် ကျဆုံးသွားသည့်အခါ ထိုနတ်ဆိုးနယ်မြေအရှင်များသည် ကြက်သွေးရောင်ငရဲ နတ်ဆိုးနယ်မြေသို့ 'သစ္စာခံ' ရန် မည်သည့်ဝန်ထုပ်ဝန်ပိုးမျှမရှိဘဲ လာရောက်နိုင်ခဲ့ကြခြင်း ဖြစ်သည်။
သို့သော် ရှီမိုကောင်းကင်မှာမူ ကွဲပြားနေခဲ့သည်။
ဤနှစ်များတစ်လျှောက်လုံး ရှီမိုကောင်းကင်၏ အင်မော်တယ်နတ်ဆိုးအရှင်များသည် မရေမတွက်နိုင်သော ချီလျန်မျိုးနွယ်ဝင်များ၏ သွေးများဖြင့် သူတို့၏လက်များကို စွန်းထင်းစေခဲ့ပြီဖြစ်ရာ ချီလျန်မျိုးနွယ်ရှေ့တွင် သူတို့ကိုယ်သူတို့ နှိမ့်ချနိုင်တော့မည် မဟုတ်ချေ။
အဘယ်ကြောင့်ဆိုသော် သူတို့ နှိမ့်ချခဲ့လျှင်တောင်မှ နောက်ပိုင်းတွင် စုံစမ်းစစ်ဆေးခံရပါက သူတို့အတွက် သေချာပေါက် သေလမ်းသာဖြစ်မည်ကို သိနေကြသောကြောင့်ပင်။
ထို့ကြောင့် ရှီမိုကောင်းကင်အရှင် ကျဆုံးသွားသော်ငြားလည်း ရှီမိုကောင်းကင်မှ မည်သူတစ်ဦးတစ်ယောက်မျှ အညံ့ခံကြောင်း ပြသရန် ရောက်မလာခဲ့ခြင်း ဖြစ်သည်။
ရှီမိုကောင်းကင်သည် နောက်ဆုံးအချိန်အထိ ခုခံရန် ဆုံးဖြတ်ထားကြောင်း ထင်ရှားနေပေသည်။
" ဒီလိုအခြေအနေမျိုး ဖြစ်နေမှတော့ ငါကိုယ်တိုင် ရှီမိုကောင်းကင်ကို တစ်ခေါက်လောက် သွားရလိမ့်မယ် "
ကုချန်မှ ရုတ်တရက် ပြောကြားလိုက်ရာ ချီလျိုနှင့် တတိယအကြီးအကဲတို့မှာ အံ့ဩသွားကြလေသည်။
တတိယအကြီးအကဲမှာ ဤစကားကို ကြားသောအခါ လွန်စွာဝမ်းမြောက်သွားခဲ့၏။ အရှင်သခင်၏ ရှီမိုကောင်းကင်သို့ သွားရောက်မည့် ရည်ရွယ်ချက်မှာ အထူးပြောနေစရာပင် မလိုချေ။ သူသည် ချီလျန်မျိုးနွယ်အတွက် တရားမျှတမှုကို ရှာဖွေပေးရန် သွားရောက်ခြင်းပင် ဖြစ်သည်။
ယခင်က ကုချန်မပြောခဲ့သည့်တိုင် ချီလျန်မျိုးနွယ်သည် အရှင်သခင်၏ လက်အောက်ခံမျှသာဖြစ်ကာ အရှင်သခင်ထံမှ မည်သည့်အရာကိုမျှ တောင်းဆိုပိုင်ခွင့် မရှိသည့်အတွက်ကြောင့် တတိယအကြီးအကဲအနေဖြင့် မေးမြန်းရန် ခက်ခဲနေခဲ့ခြင်းသာ ဖြစ်သည်။
သို့သော် ယခုအခါ အရှင်သခင်သည် ချီလျန်မျိုးနွယ်အတွက် 'တရားမျှတမှုကို ဖော်ဆောင်ပေးရန်' သူ၏သဘောဆန္ဒအလျောက် ဖော်ပြလာပြီဖြစ်ရာ မည်သည့်ပြဿနာမျှ မရှိတော့ချေ။
သို့ရာတွင် တတိယအကြီးအကဲ၏ ဝမ်းမြောက်နေသော အမူအရာနှင့် နှိုင်းယှဉ်ပါက ချီလျို၏ အမူအရာမှာ များစွာပို၍ တည်ငြိမ်နေခဲ့သည်။ အမှန်တကယ်တွင် ကုချန်မှ ရှီမိုကောင်းကင်သို့ သွားမည်ဟု ပြောသည်ကို ကြားလိုက်သောအခါ သူသည် မသိစိတ်အလျောက် ရုတ်တရက် ပြောလိုက်မိလေသည်။
" သခင်... မသွားပါနဲ့ "
မသွားပါနဲ့?
ကုချန်သည် ချီလျိုအား စိတ်ဝင်တစား စိုက်ကြည့်ကာ သူ့ထံမှ ရှင်းပြချက်ကို စောင့်မျှော်နေလေသည်။
ကုချန်၏အကြည့်အောက်တွင် ချီလျိုသည် ကြီးမားလှသော ဖိအားတစ်ခုကို ခံစားလိုက်ရဟန် ရှိ၏။ သူ၏ဒူးများ ခွေယိုင်သွားကာ မြေပြင်ပေါ်သို့ လဲကျသွားလျက် သူ၏ ချောမွေ့သော နဖူးပြင်မှ ချွေးစေးများ စိမ့်ထွက်လာလေသည်။
သို့သော် သူ၏ငွေရောင်သွားလေးများကို ကြိတ်ကာ သူ့ကိုယ်သူ တည်ငြိမ်အောင် ထိန်းလိုက်ပြီးနောက် ခိုင်မာစွာပင် ဆက်လက် ပြောဆိုလေ၏။
" ကျွန်မအနေနဲ့ သခင့်ရဲ့ စွမ်းအားကို နည်းနည်းလေးမှ သံသယမရှိပါဘူး... သခင်က ရှီမိုကောင်းကင်တစ်ခုလုံးကို သုတ်သင်ပစ်ချင်တယ်ဆိုရင်တောင် ဘာအခက်အခဲမှ ရှိမှာမဟုတ်ပါဘူး.....
ဒါပေမယ့် အခု ရှီမိုကောင်းကင်အရှင် သေဆုံးသွားပြီဖြစ်လို့ ဒါက တစ်ခြား ကောင်းကင်ဘုံတွေရဲ့ အာရုံစိုက်မှုကို ဆွဲဆောင်နေပြီဖြစ်ပါတယ်... တကယ်လို့ ရှီမိုကောင်းကင်ပါ ထပ်ပြီး ဖျက်ဆီးခံရမယ်ဆိုရင်.....
ပြီးတော့... အဲ့ဒါက နတ်ဆိုးဧကရာဇ်ကြီးကိုပါ အထိတ်တလန့် ဖြစ်သွားစေခဲ့မယ်ဆိုရင်တော့..... "
အခန်း ( ၃၆၆ ) - နတ်ဆိုးဧကရာဇ်ကို ငါးမျှားခြင်း၊ ချက်ချင်းထွက်ခွာခြင်းနှင့် ကျောက်စိမ်းဖြူလိပ်ခွံ
ချီလျို၏ စကားမဆုံးသေးသော်လည်း ကုချန်သည် သူ၏ဆိုလိုရင်းကို နားလည်ပြီးဖြစ်လေသည်။
အခြားကြောင့်မဟုတ်ဘဲ သူ ရှီမိုကောင်းကင်သို့သွားကာ သူ၏ 'ဒေါသ' ကို မထိန်းနိုင်ဘဲ ရှီမိုကောင်းကင်တစ်ခုလုံးကို သတ်ဖြတ်ပစ်လိုက်မိမည်ကို စိုးရိမ်နေခြင်းဖြစ်သည်။ ထိုသို့ဆိုလျှင် ထုံထျန်းနတ်ဆိုးတောင်မှ နတ်ဆိုးဧကရာဇ်ကြီး၏ အာရုံစိုက်မှုကို ခံရရုံမက ဒေါသထွက်စေကာ အမျက်ဒေါသများ ကျရောက်လာမည်ကို ကြောက်ရွံ့နေခြင်းပင်တည်း။
နတ်ဆိုးဧကရာဇ်ကြီးသည် ပုံမှန်အားဖြင့် လောကီရေးရာများတွင် ဝင်ရောက်စွက်ဖက်လေ့မရှိဘဲ သူ၏လက်အောက်ခံ အင်မော်တယ်ဘုရင်များအကြား ကိစ္စရပ်များတွင်လည်း မည်သည့်အခါမျှ ဝင်ရောက်စွက်ဖက်လိုခြင်း မရှိပေ။
သို့သော် အမည်ခံအားဖြင့် ရှီမိုကောင်းကင်အရှင်သည် သူ၏လက်အောက်ခံတစ်ဦး ဖြစ်နေဆဲပင်။
ယခုအခါ ရှီမိုကောင်းကင်အရှင်မှာ အကြောင်းရင်းမသိရဘဲ သေဆုံးသွားရုံသာမက ရှီမိုကောင်းကင်ပါ တစ်စုံတစ်ယောက်၏ 'မြေလှန်' ဖျက်ဆီးခြင်းကို ခံလိုက်ရပြီဆိုပါက.....
နတ်ဆိုးဧကရာဇ်ကြီးသည် လောကီရေးရာများကို လျစ်လျူရှုထားတတ်သူ ဖြစ်လျှင်တောင်မှ လက်ပိုက်ကြည့်နေမည်တော့ မဟုတ်တန်ရာ။
ရွှံ့ဖြင့်လုပ်ထားသော ဘုရားဆင်းတုတော်ပင်လျှင် ဒေါသထွက်တတ်သေးရာ အလွန်မြင့်မြတ်လှသော နတ်ဆိုးဧကရာဇ်ကြီးဆိုလျှင် ဆိုဖွယ်ရာ ရှိပါဦးမည်လော။
ဘေးတွင်ရှိနေသော တတိယအကြီးအကဲသည်လည်း ဤအချက်ကို ရှင်းလင်းစွာ သဘောပေါက်သွားလျက် မျက်နှာအမူအရာ အနည်းငယ် ပြောင်းလဲသွားလေ၏။
ဟုတ်ပေသည်။ ယခင်က သူ တွေးထင်ထားခဲ့သည်မှာ ရှီမိုကောင်းကင်အရှင် သေဆုံးသွားပြီဖြစ်ရာ သူ့အရှင်သခင်၏ မြင့်မြတ်သော စွမ်းအားတော်ဖြင့် ရှီမိုကောင်းကင်ကို အပြစ်ပေးရန်မှာ မည်သည့်အခက်အခဲမျှမရှိဘဲ လွယ်ကူသော ကိစ္စတစ်ခုဖြစ်မည်ဟုပင်။
သို့သော် သူသည် နတ်ဆိုးဧကရာဇ်ကြီး ရှိနေကြောင်းကို လုံးဝ မေ့လျော့နေခဲ့လေသည်။
သို့သော် နတ်ဆိုးဧကရာဇ်ကြီးသည် လွန်စွာ လျှို့ဝှက်ဆန်းကြယ်၍ အလွန်အမင်း တိတ်ဆိတ်နေတတ်သူ ဖြစ်နေသောကြောင့် ဤသို့ မေ့လျော့သွားခြင်းမှာ တတိယအကြီးအကဲ၏ အပြစ်မဟုတ်ချေ။
မည်သို့ပင်ဆိုစေကာမူ ချီလျန်မျိုးနွယ်သည် နတ်ဆိုးနယ်မြေသို့ ပြောင်းရွှေ့လာပြီးကတည်းက နတ်ဆိုးဧကရာဇ်ကြီးကို တစ်ခါမျှ မမြင်ဖူးခဲ့သလို သူနှင့်ပတ်သက်သော အကြောင်းအရာများကို ကြားဖူးခြင်းမှာလည်း အလွန်နည်းပါးလှသည်။
ရှီမိုကောင်းကင်အတွင်းရှိ ရာနှင့်ချီသော နတ်ဆိုးနယ်မြေများကြားတွင်ပင် နယ်မြေအသီးသီးမှ အရှင်များအပါအဝင် သက်ရှိအများစုသည် ရှီမိုကောင်းကင်အရှင်ကိုသာ သိကြကာ နတ်ဆိုးဧကရာဇ်ကြီးကို မသိကြပေ။
ဤအချက်ကို ကြည့်ခြင်းအားဖြင့် ထိုနတ်ဆိုးဧကရာဇ်ကြီးသည် ပုံမှန်အားဖြင့် မည်မျှ 'တိတ်ဆိတ်စွာ' နေထိုင်တတ်ကြောင်း ထင်ရှားပေသည်။
သို့သော် မည်မျှပင် တိတ်ဆိတ်စွာ နေထိုင်ပါစေ သူသည် စစ်မှန်သော ဧကရာဇ်တစ်ပါးဖြစ်ကာ နတ်ဆိုးနယ်မြေရှိ သန်းရာနှင့်ချီသော သက်ရှိများမှ မော်ကြည့်ရမည့် ဖြစ်တည်မှုတစ်ခုပင် ဖြစ်သည်။
မည်သည့်သက်ရှိကမျှ နတ်ဆိုးဧကရာဇ်ကြီး၏ ဩဇာလွှမ်းမိုးမှုကို လျစ်လျူမရှုရဲကြပေ။
" နတ်ဆိုးဧကရာဇ်ကြီး? "
ကုချန်သည် ချီလျိုနှင့် တတိယအကြီးအကဲတို့၏ တုံ့ပြန်မှုများကို မြင်တွေ့ရသောအခါ ပို၍ပင် စိတ်ဝင်စားသွားလေတော့သည်။
ယခုအခါ သူ၏မူလခန္ဓာသည် ပြီးပြည့်စုံသော စစ်မှန်သည့် အင်မော်တယ်တစ်ပါးအဖြစ် တာအိုကို သက်သေပြနိုင်ခဲ့ပြီဖြစ်ကာ သူ၏ "ကောင်းကင်ဘုံအလုံးစုံ အမှန်တရား နားလည်ခြင်း" ကျင့်စဉ်ကိုလည်း ငါးရာခိုင်နှုန်းအထိ အောင်မြင်စွာ တိုးမြှင့်နိုင်ခဲ့ပြီဖြစ်သောကြောင့် ဤအချိန်တွင် သူ၏ တိုက်ခိုက်ရေးစွမ်းအားမှာ မည်မျှ အားကောင်းနေမည်ကို ကုချန်ကိုယ်တိုင်ပင် ခန့်မှန်း၍မရနိုင်တော့ချေ။
အထူးသဖြင့် ခန္ဓာကိုယ်သုံးခု တစ်ခုတည်းအဖြစ် ပေါင်းစည်းသွားချိန်တွင် သာမန် အင်မော်တယ်ဘုရင်များဆိုလျှင် သူနှင့် တစ်ကွက်မျှပင် ယှဉ်နိုင်မည်မဟုတ်ဟု ကုချန် ခန့်မှန်းမိ၏။
သင့်လျော်သော နှိုင်းယှဉ်စရာမရှိသဖြင့် သူ အတိအကျ မည်မျှသန်မာနေပြီကို ကုချန် မသေချာခြင်းသာ ဖြစ်သည်။
ထို့ကြောင့် သူသည် ဤလျှို့ဝှက်ဆန်းကြယ်၍ အမည်မသိရသော နတ်ဆိုးဧကရာဇ်ကို စိတ်ဝင်စားလာခဲ့လေသည်။
သူသည် အင်မော်တယ်ဘုရင်တစ်ပါး၏ တိုက်ခိုက်ရေးစွမ်းအားကို မျက်မြင်ကိုယ်တွေ့ ကြုံဖူးခဲ့ပြီးဖြစ်သည်။
သို့ဆိုလျှင် ပိုမို ကြောက်မက်ဖွယ်ကောင်းသော နတ်ဆိုးဧကရာဇ်တစ်ပါးဆိုပါက မည်မျှစွမ်းအားကြီးမားမည်ကို သူ သိချင်နေမိသည်။
ရှီမိုကောင်းကင်၏ ကိစ္စကို အကြောင်းပြချက်အဖြစ် အသုံးချကာ ကုချန်သည် ထိုအရာကို 'မြည်းစမ်း' ကြည့်ချင်နေလေ၏။
နတ်ဆိုးဧကရာဇ်ကြီးနှင့် သူ၏စွမ်းအားကို စမ်းသပ်ရန်အတွက် ထုံထျန်းနတ်ဆိုးတောင်သို့ သွားရောက်တိုက်ခိုက်ခြင်းမှာ လွန်စွာမိုက်မဲရာကျပြီး အလွန်လည်း အန္တရာယ်များပေသည်။ မည်သို့ပင်ဆိုစေကာမူ ထိုနေရာသည် တစ်ဖက်လူ၏ ပင်မစခန်းဖြစ်ရာ အကြောင်းရင်းမသိနိုင်သော အန္တရာယ်များ ရှိနေမည်ကို မည်သူသိနိုင်မည်နည်း။
ဤကိုယ်ပွားသေဆုံးသွားလျှင်တောင် သူ၏ မူလခန္ဓာကိုယ်မှာ ထိခိုက်မည်မဟုတ်သော်ငြား ကိုယ်ပွားတစ်ခု ဆုံးရှုံးရခြင်းအတွက် ကုချန် ရင်နာရမည်သာဖြစ်သည်။ အကြောင်းမှာ "ချီတစ်ခုမှ သန့်စင်သူသုံးပါး ခွဲထွက်ခြင်း" နည်းစနစ်သည် ကိုယ်ပွားနှစ်ခုသာ ဖန်တီးနိုင်ပြီး ကိုယ်ပွားတစ်ခုစီတိုင်းသည် ထူးခြားပြိုင်ဘက်ကင်းကာ တစ်ကြိမ်သေဆုံးသွားပါက မည်သည့်အခါမျှ ပြန်လည်ဖွဲ့စည်း၍ မရနိုင်တော့သောကြောင့်ပင်။
သို့သော် ရှီမိုကောင်းကင်ကိစ္စကို အကြောင်းပြကာ နတ်ဆိုးဧကရာဇ်ကြီးကို 'မြှူဆွယ်ခေါ်ထုတ်' ရန် နည်းလမ်းရှာမည်ဆိုပါက အရာရာသည် များစွာ ပိုမိုထိန်းချုပ်ရလွယ်ကူသွားမည်ဖြစ်သည်။
သူသည် နတ်ဆိုးဧကရာဇ်ကြီး၏ ပြိုင်ဘက် မဟုတ်လျှင်တောင်မှ သူ၏ အာမခံချက်ဖြစ်သော "ကံကြမ္မာပြောင်းပြန်လှန်အမွှေးတိုင်" နှင့် "အကြွင်းမဲ့အရိပ်ခြောက်ပါးအဆောင်" တို့ ရှိနေသဖြင့် အနည်းဆုံးတော့ သူ၏လုံခြုံရေးအတွက် စိတ်ချရမည်ဖြစ်သည်။
ဤအချက်ကို တွေးမိလိုက်သောအခါ ကုချန်သည် ချက်ချင်းပင် စိတ်အေးသက်သာရာ ရသွားလေသည်။
တစ်ချိန်တည်းမှာပင် သူသည် စိုးရိမ်ပူပန်နေသော အမူအရာများရှိနေသည့် ချီလျိုနှင့် တတိယအကြီးအကဲတို့ကို ကြည့်ကာ ငြင်းဆန်၍မရနိုင်သော လေသံဖြင့် ပြောလိုက်သည်။
" အခုပဲ ငါကိုယ်တော်နောက်ကနေ ရှီမိုကောင်းကင်ကို လိုက်ခဲ့ကြ... ချက်ချင်း ထွက်ခွာမယ်! "
...
နတ်ဆိုးနယ်မြေ၊ ထုံထျန်းနတ်ဆိုးတောင်.....
ဤနေရာသည် ရှီမိုကောင်းကင်ထက် ကျော်လွန်သည့် နေရာတစ်ခုဖြစ်ရာ ပိုမို ရှေးကျ၍ ခန့်မှန်းမရနိုင်သော နယ်မြေတစ်ခုပင် ဖြစ်သည်။
အဆုံးအစမဲ့ ကျယ်ပြန့်သော ကမ္ဘာမြေပြင်မှနေ၍ မှောင်မည်းနေသော တောင်တန်းကြီးတစ်ခု ပေါ်ထွက်နေကာ မိုင်ပေါင်း သန်းနှင့်ချီ၍ ရှည်လျားသည့် ကောင်းကင်ယံသို့ တည့်မတ်စွာ ထိုးတက်နေလေသည်။
ဤတောင်ထွတ် မည်မျှမြင့်မားသည်ကို မည်သူမျှ မသိကြပေ။ ဧကရာဇ်အဆင့်ရှိသူတစ်ဦးပင်လျှင် တောင်ထိပ်ကို တစ်ချက်တည်းဖြင့် မမြင်နိုင်ချေ။
ထိုအချိန်တွင် ဧကရာဇ် တာကီယွမ်သည် ဤမှောင်မည်းနေသော တောင်ကြီးကို အားထုတ်၍ တက်နေလေသည်။
သူသည် ရှီမိုကောင်းကင်မှ ဧကရာဇ်တစ်ပါး ဖြစ်ရာ အဆုံးအစမဲ့သော အမြင့်ဆီသို့ မျက်စိတစ်မှိတ်အတွင်း ပျံသန်းသွားနိုင်သင့်ပေသည်။
သို့သော် ကံမကောင်းစွာဖြင့် ထုံထျန်းနတ်ဆိုးတောင်တဝိုက်တွင် မျက်စိဖြင့် မမြင်ရသော တားမြစ်ကန့်သတ်ချက်များ ရှိနေ၍ သက်ရှိအားလုံးကို ထိုနေရာတွင် ပျံသန်းခွင့် မပေးထားပေ။
နတ်ဆိုးဧကရာဇ်ကြီးထံသို့ လာရောက် ဂါရဝပြုကြသော အင်မော်တယ်ဘုရင်များပင်လျှင် တောင်တက်လမ်းကို နာခံစွာ တက်ကြရသည်ဟု သူ ကြားဖူးထားရာ သူ့ကဲ့သို့ သာမန် ဧကရာဇ်ငယ်လေးတစ်ပါးအတွက် မည်သို့ ချွင်းချက် ဖြစ်နိုင်မည်နည်း။
သို့သော် ရက်ပေါင်းများစွာ တက်ပြီးနောက် ထုံထျန်းနတ်ဆိုးတောင်သည် အဆုံးသတ်မရှိကြောင်း တာကီယွမ် တွေ့ရှိလိုက်ရသည်။ အထက်သို့ မော်ကြည့်လိုက်သောအခါ တောင်ကိုယ်ထည်သည် ကောင်းကင်ဘုံနှင့် နယ်ပယ်ပေါင်းစုံကို ဖောက်ထွက်ကာ အမည်မသိ နေရာတစ်ခုဆီသို့ ဦးတည်နေသကဲ့သို့ ကျယ်ပြောလှသော ဟင်းလင်းပြင်ကြီးသာ ရှိနေဆဲဖြစ်သည်။
ဘယ်တော့မှ သူ တောင်ထိပ်ကို ရောက်ပါမည်နည်း။
ဧကရာဇ် တာကီယွမ်သည် စိတ်ထဲတွင် သက်ပြင်းချလိုက်သော်လည်း အပြင်သို့ ထုတ်မပြရဲပေ။
အဘယ်ကြောင့်ဆိုသော် ထုံထျန်းနတ်ဆိုးတောင်ပေါ်သို့ ခြေချလိုက်သည့် အချိန်မှစ၍ သူ၏ လှုပ်ရှားမှုတိုင်းသည် ကြီးမြတ်သော နတ်ဆိုးဧကရာဇ်ကြီး၏ မျက်စိအောက်သို့ ရောက်ရှိနေပြီဖြစ်ကြောင်း သူ သိထားသောကြောင့်ပင်။
နတ်ဆိုးဧကရာဇ်ကြီး၏ အမြင်တွင် သူသည် လမ်းဘေးမှ ပုရွက်ဆိတ်တစ်ကောင်လောက်ပင် အသုံးမကျသော်ငြားလည်း။
သူ၏ အနည်းငယ်သော မရိုသေမှုက နတ်ဆိုးဧကရာဇ်ကြီးကို အမျက်ဒေါသ ထွက်စေခဲ့လျှင် မည်သို့ လုပ်မည်နည်း။
ဤသည်မှာ ကြီးလေးသော ကိစ္စဖြစ်၍ သူ ဂရုစိုက်ရမည်သာ ဖြစ်သည်။
သူ ရိုးသားဖြူစင်မှုကို နတ်ဆိုးဧကရာဇ်ကြီးသည် ကျိန်းသေပေါက် သိမြင်တော်မူလိမ့်မည်။
...
" မဟုတ်သေးဘူး... ဒါက မမှန်ဘူး! "
ထုံထျန်းနတ်ဆိုးတောင်၏ ထိပ်ရှိ အနည်းငယ် ဟောင်းနွမ်းနေသော ရှေးဟောင်းခန်းမဆောင်တစ်ခုအတွင်း အနက်ရောင်ဝတ်ဆင်ထား၍ မည်သည့်စွမ်းအားအငွေ့အသက်မျှ မရှိသော လူလတ်ပိုင်းအရွယ် အမျိုးသားတစ်ဦးသည် တင်ပျဉ်ခွေထိုင်လျက် သူ၏လက်ထဲရှိ အရာတစ်ခုကို စူးစိုက်ကြည့်ကာ တစ်စုံတစ်ခုကို ရေရွတ်နေလေသည်။
သူ၏လက်ထဲတွင် လက်ဖဝါးနှစ်ဖက်စာခန့် အရွယ်အစားရှိသော ကျောက်စိမ်းဖြူ လိပ်ခွံတစ်ခု ရှိနေ၏။
ဤအခိုက်အတန့်တွင် ကျောက်စိမ်းဖြူ လိပ်ခွံပေါ်၌ မှိန်ဖျော့သော အနီရောင်အလင်းတန်းတစ်ခု ရေးရေးမျှ ပေါ်ထွက်လာလေသည်။
အချိန်ကြာလာသည်နှင့်အမျှ မှိန်ဖျော့သော အနီရောင်အလင်းတန်းသည် ပိုမိုအားကောင်းလာကာ ငါးမျှားနေသည့် မြင်ကွင်းတစ်ခုကို ရေးရေးမျှ ဖော်ပြနေသကဲ့သို့ ရှိသော်လည်း ငါးမျှားတံကို ကိုင်ထားသူကိုမူ မှုန်ဝါးဝါး ကောက်ကြောင်းတစ်ခုအဖြစ်သာ မြင်ရကာ လုံးဝ ရှင်းလင်းမှုမရှိချေ။
ရွှေရောင်နှင့် ခရမ်းရောင်သည် ကောင်းကျိုး၊ အနက်ရောင်နှင့် အနီရောင်သည် ဆိုးကျိုး၊ ထို့အပြင် ဤငါးမျှားနေသည့် မြင်ကွင်းမှာ.....
တစ်ယောက်တစ်ယောက်က 'ငါးမျှား' နေတာလား၊ ပြီးတော့ အဲ့ဒီငါးမျှားရခြင်းရဲ့ ရည်ရွယ်ချက်က... ငါအရှင်ကိုများလား။
လူလတ်ပိုင်းအမျိုးသားသည် ကျောက်စိမ်းဖြူ လိပ်ခွံပေါ်ရှိ ပိုမိုအားကောင်းလာသော အနီရောင်အလင်းတန်းကို ကြည့်ကာ မျက်လုံးများ တောက်ပသွား၏။ သူ ဘာကို တွေးနေသည်ကို မသိနိုင်ပေ။
ဤကျောက်စိမ်းဖြူ လိပ်ခွံသည် သူ အတိတ်က ရရှိခဲ့သော အမြင့်မြတ်ဆုံး နတ်ဘုရားအဆင့် ပစ္စည်းတစ်ခုဖြစ်ပြီး သူ၏ အားနည်းမှုမှ ရုန်းထွက်နိုင်ရန်၊ ကောင်းကျိုးနှင့် ဆိုးကျိုးများကို ကြိုတင်သိမြင်နိုင်ရန်၊ ကံဆိုးမှုများကို ကံကောင်းခြင်းအဖြစ် ပြောင်းလဲနိုင်ရန်နှင့် သူ၏ လက်ရှိ နတ်ဆိုးဧကရာဇ်အဆင့်သို့ ရောက်ရှိစေရန် ကူညီပေးခဲ့၏။ ဟောကိန်းထုတ်ရာတွင် မည်သည့်အခါမျှ အမှားအယွင်းမရှိခဲ့ဟု ဆိုနိုင်သည်။
ယနေ့တွင် သူ ရုတ်တရက် အတိတ်နိမိတ်တစ်ခုကို ခံစားလိုက်ရ၍ ဤကျောက်စိမ်းဖြူ လိပ်ခွံကို အသုံးပြုကာ ဟောကိန်းထုတ်ကြည့်ခဲ့ရာ ဤကံဆိုးမည့် နိမိတ်လက္ခဏာကို ရရှိခဲ့သဖြင့် သူ မပျော်မရွှင် ဖြစ်သွားရလေသည်။
ထိုအချိန်၌ပင် အိုမင်းနေသော လိပ်ကြီးတစ်ကောင်သည် တံခါးအပြင်ဘက်မှ ဖြည်းညင်းစွာ တွားသွားဝင်ရောက်လာကာ လူသားစကားဖြင့် ပြောဆိုလေသည်။
" အရှင် နတ်ဆိုးဧကရာဇ်ကြီး... ဟိုကောင်လေးက တောင်တက်နေတာ အတော်ကြာနေပြီ... အရေးကြီးတဲ့ သတင်းပို့စရာ ရှိနေပုံရတယ်... အရှင်က တကယ်ပဲ သူ့ကို လက်ခံမတွေ့ဘူးလား "