အခန်း (၃၆၉-၃၇၀)
Vol. 27 Ch. 369-370
အခန်း ( ၃၆၉ ) - ပိုင်ဟွာနတ်ဆိုးအရှင်အတွက် အလွန်ကိုင်တွယ်ဖြေရှင်းရခက်ခဲနေခြင်း
" မဟုတ်ဘူးလေ... ကျွန်တော်က ရှီမိုကောင်းကင်ရဲ့ သေရေးရှင်ရေးနဲ့ သက်ဆိုင်တဲ့ အရေးကြီးကိစ္စကို တင်ပြဖို့ လာခဲ့တာပါ... 'လုံလောက်တဲ့ ရိုးသားဖြူစင်မှု မရှိဘူး' ဆိုတာ ဘာသဘောလဲ "
အကယ်၍ နတ်ဆိုးဧကရာဇ်ကြီးကသာ ထိုစကားကို ပြောခဲ့ခြင်းမဟုတ်ပါက ဧကရာဇ် တာကီယွမ်သည် ထိုနေရာ၌ပင် ကျိန်ဆဲမိမည်မှာ သေချာလှသည်။
သူ၏စိတ်ထဲမှ မကျေနပ်မှုကို အတင်းအကျပ် ဖိနှိပ်ထားရင်း ဧကရာဇ် တာကီယွမ်သည် အသံကိုနှိမ့်ကာ မတတ်သာစွာ မေးမြန်းလိုက်၏။
" အရှင်... နတ်ဆိုးဧကရာဇ်ကြီးက 'ရိုးသားဖြူစင်မှု မရှိဘူး' ဆိုတာ တိတိကျကျ ဘာကို ပြောချင်တာလဲ "
ဧကရာဇ် တာကီယွမ်သည် အလွန်အမင်း နာကြည်းဝမ်းနည်းသွားလေသည်။
သူ မည်သည့်နေရာတွင် 'ရိုးသားဖြူစင်မှု မရှိ' ဖြစ်သွားသည်ကို နားမလည်နိုင်ပေ။ ထုံထျန်းနတ်ဆိုးတောင်သို့ ချဉ်းကပ်လာသည့် အချိန်မှစ၍ သူသည် ရိုသေလေးစားသော စိတ်နှလုံးကို အမြဲတစေ ထိန်းသိမ်းထားခဲ့ကာ နတ်ဆိုးဧကရာဇ်ကြီးအပေါ် အနည်းငယ်မျှပင် မရိုမသေ မလုပ်ရဲခဲ့ချေ။ ယခု အဘယ်ကြောင့် နတ်ဆိုးဧကရာဇ်ကြီးမှ သူ့အား ရိုးသားဖြူစင်မှုမရှိဟု ပြောရသနည်း။
" တစ်ချို့ကိစ္စတွေက မင်းမသိတာ ပိုကောင်းပါတယ် "
လိပ်အိုကြီးသည် ခဏတာ တိတ်ဆိတ်သွားပြီးနောက် ဤကဲ့သို့ အဖြေပေးလိုက်လေသည်။
" ကျေးဇူးပြုပြီး ရှင်းပြပေးပါ အရှင်! "
လိပ်အိုကြီး ရှောင်လွှဲနေသည်ကို မြင်သော်လည်း ဧကရာဇ် တာကီယွမ်သည် အနည်းငယ်မျှပင် စိတ်ပျက်မသွားဘဲ သွားကြိတ်ကာ တိုက်ရိုက်ပင် ဆက်လက်မေးမြန်းလိုက်သည်။
ဧကရာဇ် တာကီယွမ်၏ ဇွဲကောင်းမှုကို မြင်သောအခါ လိပ်အိုကြီးသည် အကယ်၍ တိကျသော အဖြေတစ်ခု မပေးပါက တစ်ဖက်လူမှာ လက်လျှော့မည်မဟုတ်ကြောင်း သိလိုက်လေသည်။
ထို့ကြောင့် နတ်ဆိုးဧကရာဇ်ကြီး ခုနလေးတင် ပြောခဲ့သည့် စကားကိုသာ သူ ဖြည်းညင်းစွာ ပြန်လည်ပြောပြနိုင်တော့သည်။
" အရှင် နတ်ဆိုးဧကရာဇ်ကြီးက ပြောတယ်... မင်း ထုံထျန်းနတ်ဆိုးတောင်ပေါ်ကို စတက်တုန်းက ဘယ်ခြေကို အရင်စလှမ်းခဲ့တယ်တဲ့.....
အရှင်မင်းကြီးက ဘယ်ခြေကို အရင်စလှမ်းတဲ့သူတွေကို မကြိုက်ဘူး.....
ဒါကြောင့်... မင်းရဲ့လုပ်ရပ်က မရိုသေရာ ရောက်တယ်တဲ့ "
ပြောပြီးနောက် လိပ်အိုကြီးသည် ဧကရာဇ် တာကီယွမ်၏ တုံ့ပြန်မှုကို မကြည့်ရက်တော့သည့်အလား ချက်ချင်းပင် ခေါင်းလှည့်ကာ ထုံထျန်းနတ်ဆိုးတောင်ထိပ်ဆီသို့ ဆက်လျှောက်သွားလေတော့သည်။
ထွက်ခွာသွားသော လိပ်အိုကြီး၏ ကျောပြင်ကို ကြည့်ကာ ဧကရာဇ် တာကီယွမ်၏ မျက်နှာတွင် နားမလည်နိုင်မှုများ ပြည့်နှက်သွားလေသည်။
ထုံထျန်းနတ်ဆိုးတောင်ကို တက်တဲ့အချိန် ဘယ်ခြေကို အရင်စလှမ်းမိလို့တဲ့လား။
ဒါက... ဘယ်လို မရိုသေမှုမျိုးလဲ။
နားမလည်နိုင်ဖြစ်ပြီးနောက် ဧကရာဇ် တာကီယွမ်၏ မျက်နှာသည် ချက်ချင်း ဖြူရော်သွားလေသည်။
ဤ နတ်ဆိုးဧကရာဇ်ကြီး ဘာတွေးနေသည်ကို သူ တကယ်ကို နားမလည်နိုင်တော့ပေ။
…………
ရှီမိုကောင်းကင်၏ အမြင့်ဆုံးနေရာရှိ ရှီမိုနန်းတော်အတွင်း၌.....
အင်မော်တယ် နတ်ဆိုးအရှင်တစ်စုသည် ဝိုင်းဖွဲ့ထိုင်နေကြကာ လေထုထဲရှိ အခြေအနေမှာလည်း အလွန်လေးလံနေလေသည်။
" ဒီလောက်အချိန်တွေ ကြာနေပြီကို ဘာလို့ တာအိုရောင်းရင်း တာကီယွမ်ဆီက ဘာသတင်းမှမရသေးတာလဲ "
နတ်ဆိုးအရှင်တစ်ပါးမှ လေးလံနေသော လေထုကို ဖြိုခွဲရင်း ပြောဆိုလိုက်သည်။
ယခုအခါ အင်မော်တယ် နတ်ဆိုးအရှင်များအားလုံးသည် ရှီမိုနန်းတော်အတွင်း စုရုံးနေကြကာ စိတ်တထိတ်ထိတ်ဖြင့် ထုံထျန်းနတ်ဆိုးတောင်မှ သတင်းကို စိတ်အားထက်သန်စွာ စောင့်မျှော်နေကြလေသည်။
သို့သော် သူတို့ စောင့်ရင်း စောင့်ရင်းဖြင့် သတင်းအစအနမှာ ပင်လယ်ထဲ ကျသွားသော ရွှံ့နွားတစ်ကောင်ပမာ ဘယ်တော့မှ ရောက်မလာခဲ့ရာ ဤရှီမိုကောင်းကင်မှ အင်မော်တယ် နတ်ဆိုးအရှင်များအား အတော်လေး စိုးရိမ်ပူပန်သွားစေခဲ့သည်။
" ကံကောင်းတာက တာကီယွမ် ထွက်သွားပြီးတဲ့နောက်မှာ ပိုင်ဟွာနတ်ဆိုးအရှင်က သွားပါရစေလို့ သူ့သဘောဆန္ဒနဲ့သူ ထပ်ပြီး တောင်းဆိုခဲ့တာပဲ... တာအိုရောင်းရင်း တာကီယွမ်က အတားအဆီးတွေ... ပြဿနာတွေနဲ့ ကြုံတွေ့ခဲ့ရရင်တောင်မှ မကြာခင်မှာ တာအိုရောင်းရင်း ပိုင်ဟွာက သတင်းကောင်း ပြန်ယူလာပေးလိမ့်မယ်လို့ ယူဆရပါတယ် "
အခြားနတ်ဆိုးအရှင်တစ်ပါးမှ သူတို့ကို နှစ်သိမ့်ရန် ပြောလိုက်သည်။
အမှန်တကယ်တွင် လွန်ခဲ့သော ရက်အနည်းငယ်က ဧကရာဇ် တာကီယွမ် ထုံထျန်းနတ်ဆိုးတောင်သို့ ထွက်သွားပြီး မကြာမီမှာပင်။
ပိုင်ဟွာနတ်ဆိုးအရှင်သည်လည်း နတ်ဆိုးဧကရာဇ်ကြီးထံ သတင်းပို့ရန် ထုံထျန်းနတ်ဆိုးတောင်သို့ သွားရောက်ဖို့ သူ့ဆန္ဒအလျောက် တောင်းဆိုခဲ့ခြင်း ဖြစ်သည်။
အကယ်၍ ဧကရာဇ် တာကီယွမ်တစ်ယောက်တည်းသာ သတင်းပို့ရန် သွားမည်ဆိုပါက သူ ပြဿနာတစ်ခုခုနှင့် ကြုံတွေ့၍ နှောင့်နှေးသွားနိုင်မည်ကို စိုးရိမ်ခဲ့ကြသောကြောင့် အခြားနတ်ဆိုးအရှင်တစ်ပါးကို စေလွှတ်ခြင်းမှာ အာမခံချက် တစ်ခုတိုးလာစေမည်ဖြစ်ရာ နတ်ဆိုးအရှင်များသည် မသင်္ကာမှုမရှိဘဲ ပိုင်ဟွာနတ်ဆိုးအရှင်ကို သွားရောက်ခွင့်ပြုခဲ့ကြ၏။
သို့သော် ထိုအချိန်တွင် နဖူး၌ မည်းနက်သော နတ်ဆိုးဂျိုတစ်ခုပါရှိသည့် အနက်ရောင်ဝတ်ရုံကို ဝတ်ဆင်ထားသော နတ်ဆိုးအရှင်တစ်ပါးမှ အသံသြသြဖြင့် ပြောဆိုလေသည်။
" ဟက်! တာအိုရောင်းရင်း တာကီယွမ်က ငါတို့ဘက်ကဆိုတာကို သံသယဖြစ်စရာ မလိုပါဘူး... ဒါပေမယ့် တာအိုရောင်းရင်း ပိုင်ဟွာရဲ့ ရည်ရွယ်ချက်တွေက ခန့်မှန်းရခက်တယ်... သူက နတ်ဆိုးဧကရာဇ်ကြီးဆီကို သတင်းပို့ဖို့ သွားတာလား... ဒါမှမဟုတ် ကိုယ့်အသက်ကိုယ်လုပြီး ထွက်ပြေးသွားတာလားဆိုတာ ပြောရခက်တယ် "
" နတ်ဆိုးဂျိုတာအိုရောင်းရင်း ဘာပဲဖြစ်ဖြစ် တာအိုရောင်းရင်း ပိုင်ဟွာက ငါတို့ ရှီမိုကောင်းကင်ရဲ့ နတ်ဆိုးအရှင်တစ်ပါးပဲ... အရင်တုန်းက ငါတို့အားလုံး အရှင်သခင်ကို အတူတူ အလုပ်အကျွေးပြုခဲ့ကြတာ... မင်းပြောတဲ့စကားက နည်းနည်း လွန်မနေဘူးလား "
နတ်ဆိုးအရှင်တစ်ပါးသည် ဤစကားများကို ကြားသောအခါ မတတ်သာဘဲ ပြန်လည်ချေပလိုက်လေသည်။
ယခုအခါ ရှီမိုကောင်းကင်သည် ကမောက်ကမဖြစ်နေ၍ လူတိုင်း အန္တရာယ်နှင့် ကြုံတွေ့နေရရာ စည်းလုံးညီညွတ်မှု အလိုအပ်ဆုံးအချိန်ပင် ဖြစ်သည်။ ဤအချိန်မျိုးတွင် ဤသို့သော စကားများကို ဖြန့်ဝေခြင်းက အခြေအနေတစ်ခုလုံးကို တမင်သက်သက် နှောင့်ယှက်ဖျက်ဆီးနေခြင်း မဟုတ်ပါလော။
အခြားသော နတ်ဆိုးအရှင်များသည်လည်း ဤသည်ကို ကြားသောအခါ နတ်ဆိုးဂျိုအရှင်အား အနည်းငယ် မကျေနပ်သော အကြည့်များဖြင့် ကြည့်လိုက်ကြကာ ဤကဲ့သို့သော အချိန်မျိုးတွင် ပိုင်ဟွာနတ်ဆိုးအရှင်အား အကြောင်းမဲ့ အပုပ်ချပြောဆိုခြင်းမှာ အမှန်တကယ်ပင် မသင့်လျော်ဟု ယူဆခဲ့ကြသည်။
ထိုနေရာတွင်ရှိနေသော နတ်ဆိုးအရှင်များ၏ တုံ့ပြန်မှုများကို မြင်သော် နတ်ဆိုးဂျိုအရှင်သည် နောက်ထပ် တစ်စုံတစ်ရာ ဆက်ပြောလိုစိတ် ရှိနေသော်ငြား နောက်ဆုံးတွင် အေးစက်စက် နှာခေါင်းတစ်ချက်မှုတ်ရုံသာ တတ်နိုင်တော့ပြီး ဆက်မပြောတော့ချေ။
ပိုင်ဟွာနတ်ဆိုးအရှင် ရှီမိုကောင်းကင်ကို သစ္စာဖောက်သည်ဆိုသည့် ခိုင်လုံသော အထောက်အထားမျိုး သူ့ထံတွင် အမှန်တကယ် မရှိပေ။ သို့မဟုတ်ပါက သူ စောစောကတည်းက ထုတ်ဖော်ပြောဆိုခဲ့ပြီး ဖြစ်လိမ့်မည်။
သို့သော် အစမှအဆုံးတိုင်အောင် ပိုင်ဟွာနတ်ဆိုးအရှင်သည် သူတို့ဘက်မှ မဟုတ်ကြောင်းကိုသာ သူ အမြဲတမ်း ခံစားနေခဲ့ရသည်။
သူသည် ထိုစကားများကို စိတ်လိုက်မာန်ပါ ပြောလိုက်ခြင်းသာဖြစ်ပြီး ယခု လူတိုင်း မကျေမနပ်ဖြစ်နေသည်ကို မြင်သောအခါ နတ်ဆိုးဂျိုအရှင်သည် အခြေအနေကို နားလည်သဖြင့် ဆက်မပြောတော့ခြင်း ဖြစ်သည်။
…
" ဒါက ထုံထျန်းနတ်ဆိုးတောင်ပဲ..... "
ထုံထျန်းနတ်ဆိုးတောင်ခြေတွင် ပန်းပွင့်လေးတစ်ပွင့်ကဲ့သို့ လှပသော မျက်နှာသွင်ပြင်ရှိ၍ ခရမ်းရောင်ဝတ်စုံကို ဝတ်ဆင်ထားသော ကျက်သရေရှိသည့် အမျိုးသမီးတစ်ဦးသည် အာကာသပြင်ပအထိ ထိုးတက်နေသော ဧရာမ နတ်ဆိုးတောင်ကြီးကို မော်ကြည့်ကာ တိုးညင်းစွာ သက်ပြင်းချလိုက်လေသည်။
" ရှီမိုကောင်းကင်အရှင် ကျဆုံးသွားတာနဲ့တင် အဲ့ဒီလူမိုက်တွေက... ဆက်ပြီး သွေးထိုးလှုံ့ဆော်မှုတွေ လုပ်ပြီး နတ်ဆိုးဧကရာဇ်ကြီးကို လှည့်စားနေကြဦးမယ်ဆိုရင်တော့ ရှီမိုကောင်းကင်က သွေးထွက်သံယိုမှုတွေ... မငြိမ်သက်မှုတွေနဲ့ ထပ်ပြီး ပြည့်နှက်သွားတော့မှာပဲ "
ပိုင်ဟွာနတ်ဆိုးအရှင်သည် တစ်ကိုယ်တည်း တိုးဖွစွာ ရေရွတ်လိုက်လေသည်။
အားနည်းချိန်မှစ၍ တက်လှမ်းလာခဲ့သော နတ်ဆိုးအရှင်တစ်ပါးအနေဖြင့် ယခုအခါ ရှီမိုကောင်းကင်သည် များစွာ ကမောက်ကမဖြစ်နေကြောင်း ပိုင်ဟွာနတ်ဆိုးအရှင် နက်နက်ရှိုင်းရှိုင်း သိရှိထားသည်။ အကယ်၍ နောက်ထပ် ပဋိပက္ခများ ထပ်မံဖြစ်ပွားလာပါက ရှီမိုကောင်းကင် လက်အောက်ရှိ ရာနှင့်ချီသော နယ်မြေများအတွက် ကောင်းမွန်သော နေ့ရက်များ ရှိတော့မည်မဟုတ်ဟု စိုးရိမ်ရလေသည်။
" ငါ ဒီကိုလာခဲ့တဲ့ ပထမအချက်က... နတ်ဆိုးဧကရာဇ်ကြီးကို ရှီမိုကောင်းကင်ရဲ့ အမှန်တရားကို အသိပေးပြီး ဒေါသမထွက်ဖို့ ဖျောင်းဖျဖို့ပဲ... ဒုတိယအချက်က နတ်ဆိုးဧကရာဇ်ကြီးရဲ့ရှေ့မှာ စကားနည်းနည်းလောက် ဝင်ပြောနိုင်မယ့် နည်းလမ်းကို ရှာဖွေပြီး... ချီလျန်မျိုးနွယ်ရဲ့ အသက်တွေကို ကာကွယ်ပေးနိုင်အောင် ကြိုးစားဖို့ပဲ "
ပိုင်ဟွာနတ်ဆိုးအရှင်သည် သူ၏စိတ်ထဲတွင် တိတ်တဆိတ် တွက်ဆလိုက်လေသည်။
ရှီမိုကောင်းကင်မှ နတ်ဆိုးအရှင်တစ်ပါးဖြစ်သော သူသည် အဘယ်ကြောင့် ချီလျန်မျိုးနွယ်ကို ဘက်လိုက်နေရသနည်း ဆိုသည်မှာတော့ ဇာတ်လမ်းက ရှည်ပေသည်။
အမှန်တကယ်တွင် အတိတ်ရှိ ပိုင်ဟွာနတ်ဆိုးအရှင် အားနည်းနေချိန်၌ သူသည် ချီလျန်မျိုးနွယ်၏ ဘိုးဘေးကြီး ချီရှောင်၏ စောင့်ရှောက်မှုကို ခံခဲ့ရကာ နောက်ပိုင်းတွင် နယ်မြေအားလုံးကို တုန်လှုပ်စေခဲ့သော ပိုင်ဟွာနတ်ဆိုးအရှင် ဖြစ်လာခဲ့ခြင်း ဖြစ်သည်။
သို့သော် ဤအကြောင်းအကျိုး ကံတရားကို ချီရှောင်၏ တောင်းဆိုမှုအရ ပြင်ပလောကသို့ မည်သည့်အခါမျှ ထုတ်ဖော်ပြောဆိုခြင်း မပြုခဲ့ပေ။
ချီလျန်မျိုးနွယ်၏ လက်ရှိ မိသားစုခေါင်းဆောင်ဖြစ်သော ချီလျိုပင်လျှင် ပိုင်ဟွာနတ်ဆိုးအရှင်နှင့် ချီလျန်မျိုးနွယ်တို့ကြား ဤကဲ့သို့သော ဆက်နွယ်မှုမျိုး ရှိနေကြောင်းကို လုံးဝ မသိခဲ့ချေ။
သို့သော် ဤအဆုံးအစမဲ့သော နှစ်ပေါင်းများစွာ တစ်လျှောက်လုံး ပိုင်ဟွာနတ်ဆိုးအရှင်သည် ချီလျန်မျိုးနွယ်ကို အမြဲတစေ တိတ်တဆိတ် ကူညီထောက်ပံ့ပေးခဲ့လေသည်။
အတိတ်က ရှီမိုကောင်းကင်သို့ စေလွှတ်ခံခဲ့ရသော ချီလျန်မျိုးနွယ်ဝင်များအနက် မရေမတွက်နိုင်သော လူများကို ပိုင်ဟွာနတ်ဆိုးအရှင်သည် အမိုက်မှောင်ထဲတွင်ရော အလင်းထဲတွင်ပါ တိတ်တဆိတ် ကယ်တင်ခဲ့၍ လျှို့ဝှက်စွာ နေရာချထားပေးခဲ့၏။ ရှီမိုကောင်းကင်မှ နတ်ဆိုးအရှင်များပင်လျှင် ဤအရာကို တစ်ခါမျှ သတိမထားမိခဲ့ကြပေ။
" အရမ်းလောလွန်းတယ်... အင်အားကြီးမားတဲ့ အင်မော်တယ်ဘုရင်တစ်ပါးကို အားကိုးလို့ရပြီဆိုရင်တောင် ဒီလောက် မဆင်မခြင် မလုပ်သင့်ဘူးလေ... ဘာပဲဖြစ်ဖြစ် ရှီမိုကောင်းကင်အရှင်က နတ်ဆိုးဧကရာဇ်ကြီးရဲ့ လက်အောက်ခံပဲ.....
ဒီလောက် မဆင်မခြင်လုပ်ပြီး နတ်ဆိုးဧကရာဇ်ကြီးကို ဒေါသထွက်အောင် လုပ်မိရင်... အင်မော်တယ်ဘုရင်တစ်ပါးကတောင် မင်းတို့ကို ကာကွယ်ပေးနိုင်တော့မှာ မဟုတ်ဘူး "
ပိုင်ဟွာနတ်ဆိုးအရှင်သည် သက်ပြင်းချလိုက်ကာ ဖြေရှင်းရခက်ခဲလွန်းနေကြောင်း ခံစားလိုက်ရလေသည်။
အကြောင်းမှာ ပြဿနာအားလုံးကို ဖန်တီးခဲ့သော ချီလျန်မျိုးနွယ်အား ချမ်းသာပေးရန် နတ်ဆိုးဧကရာဇ်ကြီးကို မည်သို့ ဖျောင်းဖျရမည်ကို သူလည်း မသိသောကြောင့်ပင်။
သို့သော် အတိတ်က ချီရှောင်၏ သူ့အပေါ် အသက်ကယ်တင်ခဲ့သော ကျေးဇူးတရားအပြင် အခြားတစ်ခုလည်း ရှိနေသေး၏။
၎င်းမှာ ချီရှောင် အင်မော်တယ်ဘုရင်အဆင့်သို့ တက်လှမ်းရန် တိတ်တဆိတ် မကြံစည်မီ သူ့ထံ လျှို့ဝှက်စွာ ဆက်သွယ်ခဲ့၍ အကျပ်အတည်းကြုံလာပါက ချီလျန်မျိုးနွယ်အတွက် အမွေအနှစ်တစ်ခု ချန်ထားပေးနိုင်မည့် နည်းလမ်းကို ရှာဖွေပေးရန် တောင်းဆိုခဲ့ခြင်း ဖြစ်သည်။
ချီရှောင်၏ နောက်ဆုံးဆန္ဒလေးတစ်ခုတည်းနှင့်ပင် ပိုင်ဟွာနတ်ဆိုးအရှင်သည် လက်ပိုက်ကြည့်မနေနိုင်ခဲ့ချေ။
အခန်း ( ၃၇၀ ) - ပိုင်ဟွာ၏ အတွေးများ၊ ကောင်းကျိုးနှင့် ဆိုးကျိုး အပြောင်းအလဲများ၊ ဒါဟာ ဆော့နေတာမဟုတ်ဘူး
" တကယ်လို့ တခြားနည်းလမ်းမရှိတော့ဘူးဆိုရင်လည်း ချီလျန်မျိုးနွယ်အတွက် အမွေအနှစ်တချို့ ချန်ထားခဲ့ဖို့ ကြိုးစားရမှာပဲ "
ပိုင်ဟွာနတ်ဆိုးအရှင်သည် တိုးတိတ်စွာ ရေရွတ်လျက် မတတ်သာစွာဖြင့် သက်ပြင်းချလိုက်လေသည်။
အခြေအနေမှာ ပြန်လည်ကုစား၍ မရနိုင်တော့ပါက သူ့အနေဖြင့် ချီလျန်မျိုးနွယ်တစ်ခုလုံးကို ကာကွယ်ပေးရန် ကြိုးပမ်းနေမှုကို စွန့်လွှတ်ရုံသာရှိပြီး နှစ်များတစ်လျှောက် ရှီမိုကောင်းကင်မှ သူ ကယ်တင်ခဲ့သော ထိုချီလျန်မျိုးနွယ်ဝင်များကိုသာ ကာကွယ်ပေးကာ ချီလျန်မျိုးနွယ်အတွက် အမွေအနှစ်တစ်ခု ချန်ထားပေးနိုင်ရန် သူတို့ကို သေချာစွာ နေရာချထားပေးရမည်ဖြစ်သည်။
သို့သော် ဤသည်မှာ သူ ကာကွယ်ပေးခဲ့ရာမှ အသက်ရှင်သန်ခွင့်ရခဲ့ကြသော ချီလျန်မျိုးနွယ်ဝင်များအနေဖြင့် နတ်ဆိုးနယ်မြေသို့ မည်သည့်အခါမျှ ပြန်လည်ဝင်ရောက်နိုင်တော့မည်မဟုတ်ဘဲ ထိုအချိန်မှစ၍ ချီလျန်မျိုးနွယ်ဟူသော အမည်နာမကိုလည်း စွန့်လွှတ်ရမည်ပင်။
မည်သို့ပင်ဆိုစေ ထိုအချိန်ရောက်လျှင် အင်မော်တယ်နယ်မြေ၌ဖြစ်စေ၊ နတ်ဆိုးနယ်မြေ၌ဖြစ်စေ ချီလျန်မျိုးနွယ်သည် 'သစ္စာဖောက်များ' အဖြစ် သတ်မှတ်ခံရမည်ဖြစ်၏။ အကယ်၍ သူတို့သာ ချီလျန်မျိုးနွယ်ဟူသော အမည်နာမဖြင့် ဆက်လက်နေထိုင်နေမည်ဆိုပါက ဟွမ်သွမ့်ပင်လယ်အတွင်းရှိ ကမ္ဘာငယ်လေးတစ်ခု၌ နေထိုင်လျှင်တောင် လုံခြုံနိုင်မည် မဟုတ်ချေ။
" မဖြစ်ဘူး... ငါ မြန်မြန်လုပ်မှရမယ်... တာကီယွမ်ဆိုတဲ့ကောင် နတ်ဆိုးဧကရာဇ်ကြီးကို တွေ့ပြီးပြီလား မသိဘူး "
ပိုင်ဟွာနတ်ဆိုးအရှင်သည် ခဏတာ တွေးတောလိုက်ပြီးနောက် ထုံထျန်းနတ်ဆိုးတောင်ပေါ်သို့ အလျင်စလို တက်သွားလေသည်။
ဧကရာဇ် တာကီယွမ်သည် နတ်ဆိုးဧကရာဇ်ကြီးကို တွေ့ခဲ့ပြီးပြီလားဆိုသည်ကို သူ မသိသော်လည်း တာကီယွမ်၏ စရိုက်အရ သူသည် သေချာပေါက် ပုံကြီးချဲ့ပြောဆိုမည်ဖြစ်ကာ ရှီမိုကောင်းကင်အရှင် သေဆုံးမှုအတွက် ချီလျန်မျိုးနွယ်၏ နောက်ကွယ်ရှိ အင်မော်တယ်ဘုရင်အပေါ် လုံးဝ အပြစ်ပုံချလိမ့်မည်ကိုမူ သူ ကောင်းစွာ သိထား၏။
အကယ်၍ နတ်ဆိုးဧကရာဇ်ကြီးသာ တာကီယွမ်အား ယုံကြည်သွားပါက သူ မည်သို့ပင်ပြောစေကာမူ နတ်ဆိုးဧကရာဇ်ကြီးသည် သူ့ကို ယုံကြည်တော့မည်မဟုတ်ချေ။
ထို့ကြောင့် အရေးအကြီးဆုံးကိစ္စမှာ ထုံထျန်းနတ်ဆိုးတောင်ပေါ်သို့ အမြန်တက်သွားကာ နတ်ဆိုးဧကရာဇ်ကြီး တစ်စုံတစ်ရာ အရေးမယူမီ ဖျောင်းဖျရန်ပင် ဖြစ်သည်။
ထုံထျန်းနတ်ဆိုးတောင်ထိပ်ရှိ နန်းတော်အတွင်း၌.....
နတ်ဆိုးဧကရာဇ်ကြီးသည် မျက်မှောင်ကျုံ့လိုက်ကာ တစ်စုံတစ်ရာ မကျေနပ်သော လေသံဖြင့် ပြောဆိုလေ၏။
" မပြီးကြသေးဘူးလား "
နတ်ဆိုးဧကရာဇ်ကြီးသည် အလွန်အမင်း စိတ်အနှောင့်အယှက်ဖြစ်နေပုံရသည်။ အကြောင်းမှာ နောက်ထပ် နတ်ဆိုးအရှင်တစ်ပါး ထုံထျန်းနတ်ဆိုးတောင်ပေါ်သို့ တက်လာသည်ကို သူ အာရုံခံသိရှိလိုက်သောကြောင့်ပင်။
သူသည် တစ်ယောက်ကို မောင်းထုတ်လိုက်ကာရှိသေး၊ ယခု နောက်တစ်ယောက် ရောက်လာပြန်သည်။ သူ၏ထုံထျန်းနတ်ဆိုးတောင်ကို မည်သူမဆို ဝင်ထွက်သွားလာနိုင်သည့် နေရာတစ်ခုဟု ထင်မှတ်နေကြသလော။
" ဒါလည်း ရှီမိုကောင်းကင်ကပဲ ဖြစ်ရမယ်... တာကီယွမ်ဆိုတဲ့ ကောင်လေးနဲ့ ရည်ရွယ်ချက်တူတူပဲ ဖြစ်လောက်တယ် "
လိပ်အိုကြီးသည် ခဏတာ အာရုံခံကြည့်ပြီးနောက် ဖြည်းညင်းစွာ ပြောဆိုလိုက်သည်။
" မင်းသွားပြီး သူ့ကိုလည်း မောင်းထုတ်လိုက် "
နတ်ဆိုးဧကရာဇ်ကြီးသည် စိတ်မရှည်စွာဖြင့် လက်ယမ်းပြလိုက်ကာ နောက်မှရောက်လာသော ပိုင်ဟွာနတ်ဆိုးအရှင်ကိုလည်း ယခင်အတိုင်း မောင်းထုတ်ရန် လိပ်အိုကြီးအား အချက်ပြလိုက်လေသည်။
လိပ်အိုကြီးသညါ ခေါင်းညိတ်လိုက်ကာ ထွက်သွားရန် ပြင်လိုက်၏။
ပိုင်ဟွာနတ်ဆိုးအရှင် ထုံထျန်းနတ်ဆိုးတောင်ပေါ်သို့ တက်လာချိန်တွင်လည်း ဘယ်ခြေကို အရင်စလှမ်းခဲ့သည်ကို သူ သတိထားမိလိုက်ရာ ငြင်းပယ်ရန် အကြောင်းပြချက်မှာ အသင့်ရှိနေပြီးဖြစ်သည်။ ယခင် 'အတွေ့အကြုံ' ရှိထားပြီးဖြစ်ရာ လိပ်အိုကြီးသည် ဘာလုပ်ရမည်ကို သဘာဝကျကျပင် သိနေလေသည်။
" ဟုတ်ကဲ့ပါ "
လိပ်အိုကြီး ဖြည်းညင်းစွာ ထွက်ခွာသွားသည်ကို မြင်သော် နတ်ဆိုးဧကရာဇ်ကြီးသည် ဖြေညင်းစွာ ခေါင်းညိတ်လိုက်လေသည်။
ထို့နောက် သူ၏လက်ဖဝါးထဲရှိ ကျောက်စိမ်းဖြူလိပ်ခွံကို ပေါ့ပေါ့ပါးပါးပင် ကြည့်လိုက်မိရာ နတ်ဆိုးဧကရာဇ်ကြီးအား ရုတ်တရက် အေးခဲသွားစေခဲ့တော့သည်။
အဘယ်ကြောင့်ဆိုသော် ကျောက်စိမ်းဖြူလိပ်ခွံ၏ ကျောဘက်တွင် ငါးမျှားနေသည့် မြင်ကွင်းကို ပြသနေဆဲဖြစ်သော်ငြား။
လိပ်ခွံပေါ်ရှိ ကြက်သွေးရောင်မှာ မည်သည့်အချိန်က ပျောက်ကွယ်သွားမှန်းမသိစွာ ပြည့်ဝသော ရွှေရောင်ဖြင့် အစားထိုး ဝင်ရောက်လာသောကြောင့်ပင်တည်း။
ဒါ... ဘာဖြစ်ရတာလဲ။ ဟောကိန်းတစ်ခုတည်းမှာပဲ ကံဆိုးမယ့်နိမိတ်ကနေ ကောင်းကျိုးပေးမယ့်နိမိတ်အဖြစ် ပြောင်းလဲသွားတယ်ပေါ့?!
နတ်ဆိုးဧကရာဇ်ကြီးသည် ဤကဲ့သို့သော နိမိတ်မျိုးကို အမှန်တကယ် တစ်ခါမျှ မမြင်ဖူးခဲ့ချေ!
သို့သော် ကံဆိုးမည့်နိမိတ်မှာ မည်သို့လုပ်၍ ကောင်းကျိုးပေးမည့်နိမိတ်အဖြစ် ရုတ်တရက် ပြောင်းလဲသွားနိုင်သနည်း။
ဒါက မမှန်ဘူး!
အကယ်၍ ကျောက်စိမ်းဖြူလိပ်ခွံအပေါ် အလွန်အမင်း ယုံကြည်မှုမရှိပါက နတ်ဆိုးဧကရာဇ်ကြီးသည် လိပ်ခွံ၏ ဟောကိန်းတွင် ပြဿနာတစ်ခုခုရှိနေပြီဟုပင် သံသယဝင်မိမည်ဖြစ်သည်။
သို့သော် နတ်ဆိုးဧကရာဇ်ကြီး၏ ဂရုတစိုက် လေ့လာမှုအောက်တွင် လိပ်ခွံမျက်နှာပြင်ပေါ်ရှိ ပြည့်ဝသော ရွှေရောင်သည် တဖြည်းဖြည်းချင်း မှေးမှိန်လာနေပုံရကြောင်းကို အမှန်တကယ်ပင် သူ တွေ့ရှိလိုက်ရသည်။
ကောင်းကျိုးအလင်းတောင် ပြန်မှေးမှိန်လာပြန်ပြီလား။
နတ်ဆိုးဧကရာဇ်ကြီးသည် မှင်သက်သွား၍ ဖြည်းညင်းစွာ ထွက်ခွာသွားသော လိပ်အိုကြီးကို မသိစိတ်အလျောက် လှမ်းကြည့်လိုက်မိရာ တစ်စုံတစ်ရာကို နားလည်သဘောပေါက်သွားဟန်ဖြင့် အလျင်အမြန်ပင် ပြောဆိုလိုက်လေ၏။
" မသွားနဲ့ဦး... ခဏနေဦး! "
ထိုစကားကို ကြားသောအခါ လိပ်အိုကြီးသည် ရပ်တန့်သွားလျက် နတ်ဆိုးဧကရာဇ်ကြီးကို နားမလည်နိုင်သော အမူအရာဖြင့် လှည့်ကြည့်လာလေသည်။
သို့သော် နတ်ဆိုးဧကရာဇ်ကြီး၏ အကြည့်များကမူ ကျောက်စိမ်းဖြူလိပ်ခွံပေါ်တွင်သာ စူးစိုက်နေခဲ့သည်။
လိပ်အိုကြီး ရပ်တန့်သွားသည်နှင့်တစ်ပြိုင်နက် ကျောက်စိမ်းဖြူလိပ်ခွံပေါ်တွင် ဖြည်းဖြည်းချင်း မှေးမှိန်လျော့ပါးလာနေသော ရွှေရောင်သည်လည်း ရုတ်တရက် မှေးမှိန်ခြင်း ရပ်တန့်သွားလေတော့သည်။
ဒါက.....
နတ်ဆိုးဧကရာဇ်ကြီး၏ မျက်လုံးများသည် တောက်ပသွားကာ တစ်စုံတစ်ရာကို နားလည်သဘောပေါက်သွားကြောင့် ဖော်ပြနေလေ၏။
တူညီသော ဟောကိန်းအတွက် နိမိတ်လက္ခဏာမှာ အစမှအဆုံးတိုင်အောင် မည်သည့်အခါမျှ ပြောင်းလဲမသွားခဲ့ချေ။ ရှီမိုကောင်းကင်၏ အဖြစ်အပျက်များကို အသုံးချကာ သူ့အား 'ငါးမျှား' ရန် ကြိုးစားနေသူ တစ်စုံတစ်ယောက် အမြဲရှိနေခဲ့သည်။
ပြောင်းလဲသွားသည့် တစ်ခုတည်းသော အရာမှာ ဟောကိန်း၏ ရလဒ်ပင် ဖြစ်သည်။
မကြာသေးမီက အလွန်အမင်း ကံဆိုးမည့်နိမိတ် ဖြစ်ခဲ့သော်လည်း ယခုအခါ အလွန် ကောင်းကျိုးပေးမည့်နိမိတ် ဖြစ်လာခဲ့လေပြီ။
ယခုလေးတင် လိပ်အိုကြီး၏ လုပ်ရပ်များနှင့် ဟောကိန်း၏ ကောင်းကျိုး၊ ဆိုးကျိုး ပြောင်းလဲမှုတို့အပေါ် ပေါင်းစပ်တွေးတောကြည့်လိုက်သောအခါ.....
နတ်ဆိုးဧကရာဇ်ကြီးမှာ ချက်ချင်းပင် နားလည်သွားလေတော့သည်။
ဟောကိန်း၏ ကောင်းကျိုးနှင့် ဆိုးကျိုး လုံးဝကွဲပြားနေရခြင်း၏ အကြောင်းရင်းမှာ ထုံထျန်းနတ်ဆိုးတောင်သို့ သတင်းလာပို့သော သူအပေါ် မူတည်နေသောကြောင့်ပင်။
ဧကရာဇ် တာကီယွမ် လာစဉ်က ဟောကိန်းမှာ ကြက်သွေးရောင်ကို ပြသခဲ့သည်။
သို့သော် နောက်ပိုင်း ဤကောင်မလေး လာသောအခါ ဟောကိန်းမှာ ရွှေရောင်ဖြစ်နေခဲ့သည်။
ယခုလေးတင် ထိုကောင်မလေးကို ပြန်လွှတ်ရန် လိပ်အိုကြီးအား သူ ခွင့်ပြုလိုက်ပါက ဟောကိန်းပေါ်ရှိ ပြည့်ဝသော ရွှေရောင်သည်လည်း သေချာပေါက် ပျောက်ကွယ်သွားလိမ့်မည်ဟု နတ်ဆိုးဧကရာဇ်ကြီး ခန့်မှန်းမိလေသည်။
ထို့ကြောင့် ဟောကိန်း၏ ကောင်းကျိုးနှင့် ဆိုးကျိုး ပြောင်းလဲမှုသည် လာရောက်သူ ကွဲပြားခြင်းပေါ်မူတည်၍ ဖြစ်ပေါ်လာခြင်းပင်တည်း!
" သာမန် ဧကရာဇ်ငယ်လေးတစ်ပါးကများ ငါအရှင်အပေါ် အကြံအစည်လုပ်ဖို့ ကြိုးစားနေတယ်ပေါ့! "
တာကီယွမ်ဆိုသော ကောင်လေးမှ သူ့အပေါ် လှည့်စားရန် ကြိုးစားနေသည်မှာ သေချာသည်ဟု ခံစားလိုက်ရသောကြောင့် နတ်ဆိုးဧကရာဇ်ကြီး၏ အမူအရာမှာ မကျေမနပ်ဖြစ်နေ၏။ အကယ်၍ သူ၏ နတ်ဆိုးဧကရာဇ် ဂုဏ်သိက္ခာကိုသာ ထည့်မတွက်ရပါက ထိုကောင်လေးကို နေရာမှာတင် ရိုက်သတ်ပစ်မိမည် ဖြစ်သည်။
သို့သော် ယခု အရေးအကြီးဆုံးကိစ္စမှာ တာကီယွမ်ကို မည်သို့ ကိုင်တွယ်ရမည်ဆိုသည်မဟုတ်ဘဲ နောက်မှရောက်လာသော ထိုကလေးမကို သူ့ထံ အမြန်လာတွေ့ခိုင်းရန်ပင် ဖြစ်သည်။
" မင်းသွား... အဲ့ဒီကလေးမကို ငါ့ဆီ ခေါ်ခဲ့! "
နတ်ဆိုးဧကရာဇ်ကြီးသည် လျင်မြန်စွာ အမိန့်ပေးလိုက်၏။
" ..... "
ခုနလေးတင် သူပဲ လက်ခံမတွေ့ချင်ပါဘူးဆိုပြီး အခုကျမှ ဘာလို့ ဒီလောက်မြန်မြန် စိတ်ပြောင်းသွားရတာလဲ။
လိပ်အိုကြီးမှာ တိတ်ဆိတ်နေဆဲပင်။ သူ၏အရှင်သခင် ဘာကိုတွေးနေသည်ကို သူ မသိသော်လည်း ပိုင်ဟွာနတ်ဆိုးအရှင်ကို အပေါ်သို့ ခေါ်ဆောင်လာရန် နာခံထွက်ခွာသွားရုံသာ တတ်နိုင်တော့သည်။
လိပ်အိုကြီး ထွက်ခွာသွားသည်နှင့်အမျှ ကျောက်စိမ်းဖြူလိပ်ခွံပေါ်ရှိ ရွှေရောင်သည် အမှန်တကယ်ပင် အဆပေါင်းများစွာ ပိုမိုပြည့်ဝလာကာ ခရမ်းရောင် အရိပ်အယောင်တစ်ခုကိုပင် ရေးရေးမျှ မြင်လိုက်ရသကဲ့သို့ ရှိလေသည်။
ကောင်းမွန်တဲ့ အကြောင်းအကျိုး ကံတရား၊ ကြီးမားတဲ့ ကံကောင်းမှုပဲ!
နတ်ဆိုးဧကရာဇ်ကြီး၏ မျက်နှာတွင် ဝမ်းမြောက်မှုများ ပေါ်လွင်လာလေသည်။
သူ၏ယခင်ခန့်မှန်းချက်သည် အမှန်တကယ်ပင် မှန်ကန်နေခဲ့သည်။ ဟောကိန်း၏ ကောင်းကျိုးနှင့် ဆိုးကျိုး ကွဲပြားနေရခြင်းအကြောင်းရင်းမှာ သတင်းလာပို့သူ ကွဲပြားခြင်းပေါ်လိုက်၍ ဖြစ်ပေါ်လာခြင်းပင်တည်း။
... ... ... ...
ထုံထျန်းနတ်ဆိုးတောင်၏ တောင်ခါးပန်းတွင်.....
အပေါ်သို့ အလျင်စလို တက်လာသော ပိုင်ဟွာနတ်ဆိုးအရှင်သည် တောင်ပေါ်မှ ငေးမောကာ ဆင်းလာသည့် ဧကရာဇ် တာကီယွမ်နှင့် ဆုံတွေ့လိုက်လေသည်။
" တာအိုရောင်းရင်း တာကီယွမ်... နတ်ဆိုးဧကရာဇ်ကြီးကို တွေ့ခဲ့ရလား "
ဧကရာဇ် တာကီယွမ်၏ ပုံပန်းသွင်ပြင်ကို မြင်သောအခါ ပိုင်ဟွာနတ်ဆိုးအရှင်သည် မှင်သက်သွားကာ မေးမြန်းလိုက်မိလေသည်။
" မတွေ့ခဲ့ရဘူး "
ဧကရာဇ် တာကီယွမ်မှ ခေါင်းခါလိုက်ပြီးနောက် ပိုင်ဟွာနတ်ဆိုးအရှင်ကို လှမ်းကြည့်ကာ ထုံထိုင်းစွာဖြင့် ပြောလေသည်။
" နတ်ဆိုးဧကရာဇ်ကြီးက ငါ့ကို မရိုသေဘူးဆိုပြီး လက်ခံမတွေ့ချင်ဘူးတဲ့... အော်... ဒါနဲ့ တာအိုရောင်းရင်း ပိုင်ဟွာ... ခုနက ထုံထျန်းနတ်ဆိုးတောင်ပေါ်ကို တက်လာတုန်းက မင်း ဘယ်ခြေကို အရင်စလှမ်းခဲ့လဲ "
" အင်း... ငါ ဘယ်ခြေကို အရင်စလှမ်းခဲ့တာ "
ဧကရာဇ် တာကီယွမ်သည် အဘယ်ကြောင့် ဤမျှ ထူးဆန်းသော မေးခွန်းကို ရုတ်တရက် မေးလာသနည်းဆိုသည်ကို ပိုင်ဟွာနတ်ဆိုးအရှင် မသိသော်ငြား များစွာမတွေးတော့ဘဲ ပြန်ဖြေလိုက်လေသည်။
" ဘယ်ခြေလား... ဒါဆို မျှော်လင့်ချက်မရှိတော့ဘူး... မင်း ထပ်ပြီး အချိန်ဖြုန်းနေစရာ မလိုတော့ဘူး... ငါနဲ့ပဲ အတူတူ ပြန်လိုက်ခဲ့တော့ "
ဧကရာဇ် တာကီယွမ်သည် ခေါင်းခါလျက် ပြောလေ၏။
" ခုနက နတ်ဆိုးဧကရာဇ်ကြီးက... ထုံထျန်းနတ်ဆိုးတောင်ပေါ်ကို တက်တုန်းမှာ ငါက ဘယ်ခြေကို အရင်စလှမ်းခဲ့လို့ ငါ့ရဲ့စိတ်နှလုံးက ရိုးသားဖြူစင်မှု မရှိဘူးတဲ့လေ...
အခု မင်းကလည်း ဘယ်ခြေကို အရင်စလှမ်းခဲ့တာဆိုတော့... နတ်ဆိုးဧကရာဇ်ကြီးက မင်းကိုလည်း လက်ခံတွေ့မှာ မဟုတ်လောက်တော့ဘူး "