အခန်း (၃၇၇-၃၇၈)
Vol. 27 Ch. 377-378
အခန်း ( ၃၇၇ ) - ကောင်းကင်ဘုံနှလုံးသား ပေါင်းစည်းခြင်း၊ စစ်မှန်သော မှော်ဆန်သည့် အကျိုးသက်ရောက်မှုနှင့် အချိန်ဆွဲလွန်းနေခြင်း
" နတ်ဆိုးဧကရာဇ်ကြီးရဲ့ အမိန့်တော်... "
ကုချန်၏ အဖြေက ချီလျိုကို အသက်အောင့်သွားစေခဲ့သည်။
သူက ကုချန်အား ကြက်သွေးရောင်ငရဲ နတ်ဆိုးနယ်မြေသို့ ပြန်မလားဟု မေးခဲ့ရသည့် အကြောင်းရင်းမှာ သူ နတ်ဆိုးဧကရာဇ်ကြီး၏ အမိန့်တော်နှင့် ထိပ်တိုက်တွေ့မည်ကို မသိစိတ်မှ ကြောက်ရွံ့နေသောကြောင့် ဖြစ်သည်။
ထိုအမိန့်တော်ထဲတွင် မည်သည့်အရာများ ရေးသားထားသည်ကို သူ မသိသော်လည်း သူ့အရှင်၏ စရိုက်အရ နတ်ဆိုးဧကရာဇ်ကြီး ကိုယ်တိုင်ရောက်လာလျှင်တောင် သူ့ကို ခေါင်းငုံ့သွားစေရန် ခက်ခဲမည်ဖြစ်ရာ အမိန့်တော်တစ်ခုတည်းဆိုလျှင် ဆိုဖွယ်ရာပင် မရှိတော့ကြောင်း ချီလျို ကောင်းစွာ သိထားလေသည်။
သို့သော် သူ၏ အရှင်က ဤအမိန့်တော်ကို လုံးဝ လျစ်လျူရှုကာ နတ်ဆိုးဧကရာဇ်ကြီးအား မထီမဲ့မြင်ပြုလုပ်မည်ဆိုပါက နောက်ပိုင်းတွင် မည်သို့ဆက်ဖြစ်လာမည်ကို ပြောရန် ခက်ခဲပေလိမ့်မည်။
ထို့ကြောင့် နတ်ဆိုးဧကရာဇ်ကြီးနှင့် တိုက်ရိုက် ပဋိပက္ခဖြစ်ခြင်းမှ ရှောင်ရှားနိုင်ရန် ကုချန်နှင့်အတူ ရှီမိုကောင်းကင်မှ စောစီးစွာ ထွက်ခွာသွားလိုခဲ့ခြင်း ဖြစ်သည်။
သို့သော် ကုချန်တွင် ထွက်ခွာရန် ရည်ရွယ်ချက် လုံးဝမရှိကြောင်း ထင်ရှားပေသည်။
ဤတစ်ကြိမ် သူ ရှီမိုကောင်းကင်သို့ လာရခြင်း၏ အဓိကအကြောင်းရင်းမှာ နတ်ဆိုးဧကရာဇ်ကြီးကြောင့်ပင်ဖြစ်သည်ဟု ဆိုနိုင်ပေသည်။
နတ်ဆိုးဧကရာဇ်ကြီး ကိုယ်တိုင်ရောက်လာလျှင်တောင် ကုချန်က ကြောက်ရွံ့မည်မဟုတ်ရာ သာမန် အမိန့်တော်လေးတစ်ခုကို ဂရုစိုက်မည်လော။
ကုချန်က စကားဆက်မပြောတော့ဘဲ တစ်စုံတစ်ရာကို အာရုံခံနေသည့်အလား မျက်လုံးများကို အနည်းငယ် မှိတ်ထားလိုက်သည်ကို မြင်သောအခါ။
ချီလျိုသည် သူ၏ ငွေရောင်သွားလေးများကို ဖွဖွလေးကြိတ်လိုက်ပြီး မတတ်သာဘဲ ငြိမ်သက်စွာ ရပ်၍သာ စောင့်ဆိုင်းနေလိုက်လေသည်။
သို့သော် သူ၏ စိတ်နှလုံးထဲတွင် ယုံကြည်ချက်က ခိုင်မာနေပြီဖြစ်သည်။ နောက်ပိုင်းတွင် ဘာပဲဖြစ်လာပါစေ သူသည် သူ့အရှင်၏ဘေးတွင် ခိုင်မာစွာ ရပ်တည်သွားမည်သာ ဖြစ်သည်။
အဆိုးဆုံးအခြေအနေဖြစ်လာခဲ့လျှင် အရှင် နတ်ဆိုးဧကရာဇ်ကြီး၏ အမျက်ဒေါသအောက်တွင် သူ ပြာအဖြစ်သို့ ပြောင်းလဲသွားရုံသာ ရှိမည်မဟုတ်ပါလော။
ကုချန်က မျက်လုံးများကို မှိတ်ထားသော်လည်း သူ၏ ကြီးမားကျယ်ပြောလှသော နတ်ဘုရားအာရုံမှာ သူ၏ ခန္ဓာကိုယ်မှ ထွက်ပေါ်လာပြီး ရှီမိုကောင်းကင်တစ်ခုလုံးဆီသို့ ပျံ့နှံ့သွားခဲ့လေပြီ။
ဤရှီမိုကောင်းကင်ကို မူလက ရှီမိုကောင်းကင်အရှင်က အုပ်ချုပ်ခဲ့ခြင်း ဖြစ်သည်။
ယခုအခါ ရှီမိုကောင်းကင်အရှင် ကျဆုံးသွားပြီဖြစ်ရာ ဤကောင်းကင်ဘုံနှင့် ပေါင်းစည်းထားသော အဆုံးမဲ့တာအို ကောင်းကင်ဘုံနှလုံးသား အမှတ်အသားမှာလည်း သဘာဝကျကျပင် အရှင်သခင်မဲ့သွားခဲ့ပြီ ဖြစ်သည်။
ထို့ကြောင့် ကုချန်သည် သူ၏ နတ်ဝိညာဉ်ကို ရှီမိုကောင်းကင်၏ အဆုံးမဲ့တာအိုများနှင့် အလွယ်တကူ ချိတ်ဆက်လိုက်ပြီး ဤကောင်းကင်ဘုံ၏ ကောင်းကင်ဘုံနှလုံးသား အမှတ်အသားနှင့် ပေါင်းစည်းကာ ရှီမိုကောင်းကင်၏ အရှင်သခင်သစ် ဖြစ်လာခဲ့လေသည်။
" ဘုန်း! "
ကုချန်၏ နတ်ဘုရားအာရုံက ရှီမိုကောင်းကင်၏ ကောင်းကင်ဘုံနှလုံးသား အမှတ်အသားနှင့် လုံးဝ ပေါင်းစည်းသွားသည့် အခိုက်အတန့်တွင် သူ၏ နတ်ဘုရားအာရုံမှာ ချက်ချင်း အဆုံးအစမဲ့ မြင့်တက်သွားသည်ဟု ခံစားလိုက်ရသည်။ ရှီမိုကောင်းကင်တစ်ခုလုံးကို ဖုံးလွှမ်းသွားရုံသာမက ရှီမိုကောင်းကင် လက်အောက်ရှိ နတ်ဆိုးနယ်မြေများစွာဆီသို့ပင် ပျံ့နှံ့သွားခဲ့လေသည်။
ရှီမိုကောင်းကင် တစ်ခုလုံးနှင့် အောက်ဘက်ရှိ ရာနှင့်ချီသော နတ်ဆိုးနယ်မြေများက သူ့ထံသို့ သိမ်မွေ့သော ဆက်သွယ်မှုတစ်ခုကို တည်ဆောက်လိုက်သကဲ့သို့ ရေးရေးမျှ ခံစားလိုက်ရသည်။
ကုချန်ကို ပို၍ အံ့အားသင့်သွားစေသည်မှာ ဤကောင်းကင်ဘုံ၏ ကောင်းကင်ဘုံနှလုံးသားနှင့် ပေါင်းစည်းလိုက်ချိန်တွင် ရှီမိုကောင်းကင်ရှိ ကောင်းကင်နှင့် မြေကြီး၏ အဆုံးမဲ့တာအိုများထံမှ အဆုံးမဲ့တာအို နိယာမ အသိအမြင်များသည် စမ်းချောင်းလေးများကဲ့သို့ ကောင်းကင်ဘုံနှလုံးသား အမှတ်အသားဆီသို့ စုဆင်းလာနေသည်ကို သူ အမှန်တကယ် ခံစားလိုက်ရခြင်းပင် ဖြစ်သည်။
ထိုအရာများမှာ ဤကောင်းကင်ဘုံအတွင်းရှိ မရေမတွက်နိုင်သော သက်ရှိများ၏ ကျင့်ကြံခြင်းလုပ်ငန်းစဉ်တစ်လျှောက် နားလည်သဘောပေါက်မှုများပင် ဖြစ်သည်။
ကျင့်စဉ်များ...နတ်ဘုရားစွမ်းရည်များ... အားလုံး အကျုံးဝင်လေသည်။
ဤမရေမတွက်နိုင်သော အဆုံးမဲ့တာအို နိယာမ အသိအမြင်များသည် ကောင်းကင်ဘုံနှလုံးသား အမှတ်အသားမှတစ်ဆင့် ကုချန်၏ အသိစိတ်ပင်လယ်အတွင်းသို့ ဝင်ရောက်လာသောအခါ ငါးရာခိုင်နှုန်းကို ကျော်လွန်ပြီးနောက် နားလည်ရန် ခက်ခဲနက်နဲလာခဲ့သော "ကောင်းကင်ဘုံအလုံးစုံ အမှန်တရား နားလည်ခြင်း" သည် အမှန်တကယ်ပင် ၎င်း၏ တိုးတက်မှုကို တစ်ဖန် ပြန်လည်အရှိန်မြှင့်လာကြောင်းကို သူ ခံစားလိုက်ရလေသည်။
ဤရှီမိုကောင်းကင်နှင့် ပေါင်းစည်းခြင်းက ဤကဲ့သို့သော အကျိုးကျေးဇူးများ ရှိနေသည်ပေါ့။
ကုချန်သည် ရုတ်တရက် မျက်လုံးများကို ဖွင့်လိုက်ရာ သူ၏ အကြည့်များတွင် ထိန်းချုပ်မရနိုင်သော စိတ်လှုပ်ရှားမှုများ ပြည့်နှက်နေလေသည်။
ဒီတစ်ခေါက်တော့ သူ တကယ့် ရတနာသိုက်ကြီးကို အမှတ်မထင် တွေ့သွားတာပဲ။
ယခင်က သူ၏ မူလခန္ဓာကိုယ်သည် အချိန်မြစ်ပေါ်တွင် ထိုလျှို့ဝှက်ဆန်းကြယ်သော လက်ကို နောက်တစ်ကြိမ် မြင်တွေ့ခဲ့ရပြီး ထိုအခွင့်အရေးကို အသုံးချကာ "ကောင်းကင်ဘုံအလုံးစုံ အမှန်တရား နားလည်ခြင်း" ကို ငါးရာခိုင်နှုန်းအထိ တိုးမြှင့်နားလည်နိုင်ခဲ့သည်။
သို့သော် "ကောင်းကင်ဘုံအလုံးစုံ အမှန်တရား နားလည်ခြင်း" ၏ နားလည်သဘောပေါက်မှု ငါးရာခိုင်နှုန်းသို့ ရောက်ရှိသွားသည်နှင့် အဆင့်သစ်တစ်ခုသို့ ဝင်ရောက်သွားသကဲ့သို့ ဖြစ်သွားခဲ့သည်။ ကုချန်၏ ခန္ဓာကိုယ်သုံးခု တစ်ပြိုင်နက်တည်း လုပ်ဆောင်နေသည့်တိုင်အောင် သူ၏ နားလည်သဘောပေါက်မှု တိုးတက်နှုန်းမှာ သိသိသာသာကို နှေးကွေးသွားခဲ့ရသည်။
ဒီနှုန်းအတိုင်းဆိုလျှင် ဤ "ကောင်းကင်ဘုံအလုံးစုံ အမှန်တရား နားလည်ခြင်း" ကို လုံးဝ နားလည်သဘောပေါက်ရန် မဆိုထားနှင့်၊ ၎င်း၏ ကျင့်ကြံမှု ဆယ်ရာခိုင်နှုန်းသို့ ရောက်ရှိရန်ပင် ယုံကြည်နိုင်လောက်အောင် အချိန်အလွန်ကြာမြင့်ပေလိမ့်မည်။
ယခုအခါ သူသည် ရှီမိုကောင်းကင်၏ ကောင်းကင်ဘုံနှလုံးသားနှင့် ပေါင်းစည်းပြီး ဤကောင်းကင်ဘုံ၏ နက်နဲမှုအမျိုးမျိုးကို အာရုံခံသိရှိလိုက်ရချိန်တွင် ရှီမိုကောင်းကင်ရှိ သက်ရှိအားလုံးက သူ့အား အဆုံးမဲ့တာအို အမှန်တရား နားလည်ခြင်းကို ကျင့်ကြံရန် ကူညီပေးနေသကဲ့သို့ ဖြစ်နေကြောင်း ကုချန် အံ့အားသင့်ဖွယ် တွေ့ရှိလိုက်ရလေသည်။
သက်ရှိအားလုံး၏ အသိအမြင်များနှင့် ကျင့်ကြံမှုများကို ကောင်းကင်ဘုံနှလုံးသားက ပြောင်းလဲပေးလိုက်ပြီး သူ၏ အသိအမြင်နှင့် ကျင့်ကြံမှုများအဖြစ်သို့ ရောက်ရှိလာကာ "ကောင်းကင်ဘုံအလုံးစုံ အမှန်တရား နားလည်ခြင်း" ၏ တိုးတက်မှုကို ဆက်လက် တွန်းအားပေးနေလေသည်။
ကောင်းကင်နှင့် မြေကြီးတစ်ခုကို ပေါင်းစည်းခြင်းက ဤကဲ့သို့သော မှော်ဆန်သည့် အသုံးဝင်မှုမျိုး ရှိနေသည်ပေါ့။
" ကောင်းကင်ဘုံအလုံးစုံ အမှန်တရား နားလည်ခြင်း " ၏ အဆက်မပြတ် နက်ရှိုင်းလာသော နားလည်သဘောပေါက်မှုကို ခံစားရင်း ကုချန် သဘာဝကျကျပင် စိတ်လှုပ်ရှားသွားလေသည်။
သေချာပေါက် သူ့ကို ပို၍ ပျော်ရွှင်သွားစေသည်မှာ "ကောင်းကင်ဘုံအလုံးစုံ အမှန်တရား နားလည်ခြင်း" ကို ကျင့်ကြံရန်အတွက် မှန်ကန်သော နည်းလမ်းကို သူ နောက်ဆုံးတွင် ရှာဖွေတွေ့ရှိသွားခြင်းပင် ဖြစ်သည်။
ယခင်က သူသည် "ကောင်းကင်ဘုံအလုံးစုံ အမှန်တရား နားလည်ခြင်း" ၏ နားလည်သဘောပေါက်မှုကို သူ၏ ကိုယ်ပိုင်အင်အားဖြင့်သာ တွန်းအားပေးခဲ့ပြီး နောက်ပိုင်းတွင် "ချီတစ်ခုမှ သန့်စင်သူသုံးပါး ခွဲထွက်ခြင်း" ဖြင့် ဖန်တီးထားသော ကိုယ်ပွားနှစ်ခု၏ အကူအညီဖြင့်ပင် ကျယ်ပြောလှသော ကောင်းကင်ဘုံနှင့် အဆုံးမဲ့ စကြာဝဠာများရှိ တာအိုအားလုံးနှင့် အပြောင်းအလဲများကို လွှမ်းခြုံထားပုံရသော ဤအမြင့်မားဆုံး နိယာမရှေ့တွင် သူသည် ယုံကြည်နိုင်လောက်အောင် သေးငယ်နေဆဲဖြစ်ကာ အလွန်ကို လိုအပ်ချက်များစွာ ရှိနေသေးသည်။
သို့သော် ယခုအခါ ဤ "ကောင်းကင်ဘုံအလုံးစုံ အမှန်တရား နားလည်ခြင်း" ကို ကျင့်ကြံရန် သူ၏ ကိုယ်ပိုင်အင်အား တစ်ခုတည်းကိုသာ အားကိုးနေစရာ မလိုဘဲ သက်ရှိအားလုံးထံမှ စွမ်းအားများကို ငှားရမ်းအသုံးပြုနိုင်ကြောင်း ကုချန် တွေ့ရှိသွားခဲ့လေပြီ။
" ငါ မှားခဲ့တယ်...အရင်က ငါ့အတွေးတွေ အမြဲတမ်း မှားယွင်းနေခဲ့တာပဲ...'ကောင်းကင်ဘုံအလုံးစုံ အမှန်တရား နားလည်ခြင်း' က ဒီကျယ်ပြောလှတဲ့ ကောင်းကင်ဘုံတွေရဲ့ တာအိုကို ဖော်ပြနေတာ...လူတစ်ယောက်တည်းက ဘယ်လိုလုပ်ပြီး ဒါကို အပြည့်အဝ နားလည်သဘောပေါက်နိုင်မှာလဲ...
ဒီကောင်းကင်ဘုံတွေရဲ့ တာအိုကို နားလည်သဘောပေါက်ဖို့ဆိုရင် ဒီကောင်းကင်ဘုံတွေထဲက သက်ရှိအားလုံးရဲ့ စွမ်းအားကို ငှားရမ်းရမှာပေါ့...
သက်ရှိအားလုံးက ငါပဲ...ငါကလည်း သက်ရှိအားလုံးပဲ "
ကုချန်က စိတ်လှုပ်ရှားစွာ ရေရွတ်လိုက်လေသည်။
" ကောင်းကင်ဘုံအလုံးစုံ အမှန်တရား နားလည်ခြင်း " အတွက် မှန်ကန်သော ကျင့်စဉ်ကို သူ နောက်ဆုံးတွင် ရှာတွေ့သွားခဲ့ပြီ ဖြစ်သည်။
ရှီမိုကောင်းကင်နှင့် ပေါင်းစည်းခြင်းက ရှီမိုကောင်းကင်အရှင်အတွက် သူ၏ အဆုံးမဲ့တာအိုများအပေါ် နားလည်သဘောပေါက်မှုကို နက်ရှိုင်းလာစေရန်သာ ကူညီပေးနိုင်ကောင်း ကူညီပေးနိုင်လိမ့်မည်။ သို့သော် ကုချန်အတွက်မူ ၎င်း၏ အကျိုးကျေးဇူးများမှာ စိတ်ကူးယဉ်၍ပင် မရနိုင်အောင် ကြီးမားလှပေသည်။
ဤသည်မှာ ရှီမိုကောင်းကင် တစ်ခုတည်းနှင့် ပေါင်းစည်းပြီးနောက်တွင်သာ ရှိသေးသည်။ အကယ်၍ သူက အခြားသော နတ်ဆိုးကောင်းကင်ဘုံများ သို့မဟုတ် အင်မော်တယ်နယ်မြေ ကောင်းကင်ဘုံများနှင့် ဤကျယ်ပြောလှသော ဟွမ်သွမ့်ပင်လယ်အတွင်းရှိ မရေမတွက်နိုင်သော ကမ္ဘာများအားလုံးနှင့်ပါ ပေါင်းစည်းနိုင်ခဲ့လျှင်ကော ဘယ်လိုနေမည်နည်း။
ကုချန်သည် အမှောင်ထုထဲတွင် ခံစားချက်တစ်ခုကို ရေးရေးမျှ ခံစားလိုက်ရသည်။
ဤမရေမတွက်နိုင်သော ကျယ်ပြောလှသည့် ကမ္ဘာများအားလုံးကို သူ လက်ခံပေါင်းစည်းနိုင်သောအချိန်သည် သူ၏ "ကောင်းကင်ဘုံအလုံးစုံ အမှန်တရား နားလည်ခြင်း" ကျင့်ကြံမှု အမှန်တကယ် ကြီးမားသော အောင်မြင်မှုအဆင့်သို့ ရောက်ရှိသွားမည့် အချိန်ပင် ဖြစ်ကောင်းဖြစ်ပေလိမ့်မည်။
ကုချန်က ရှီမိုကောင်းကင်နှင့် ပေါင်းစည်းခြင်း၏ အံ့သြဖွယ် အသုံးဝင်မှု အမျိုးမျိုးကို ဂရုတစိုက် အာရုံခံနေစဉ်မှာပင် ရှီမိုကောင်းကင်၏ အပြင်ဘက်၌ ဧကရာဇ် တာကီယွမ်နှင့် ပိုင်ဟွာနတ်ဆိုးအရှင်တို့ နောက်ကျမှ ရောက်ရှိလာကြလေသည်။
မျက်စိတစ်မှိတ်အတွင်း ဖျက်ဆီးခံလိုက်ရသော ရှီမိုနန်းတော်နှင့် ကောင်းကင်ယံအထက်တွင် ရပ်နေသော ကုချန်ကို မြင်သောအခါ ဧကရာဇ် တာကီယွမ်၏ မျက်နှာမှာ ချက်ချင်း ဖြူရော်သွားလေတော့သည်။
ရှီမိုနန်းတော်... အမှန်တကယ် ဖျက်ဆီးခံလိုက်ရပြီလော။
ဒီလူက ရှီမိုနန်းတော်ကို တကယ် ဖျက်ဆီးရဲတယ်ပေါ့။
ဧကရာဇ် တာကီယွမ်မှာ မယုံကြည်နိုင်အောင် ဖြစ်သွားရလေသည်။
သူသည် ယခင်က ရှီမိုကောင်းကင်မှ တာအိုရောင်းရင်းများကို နတ်ဆိုးဧကရာဇ်ကြီး၏ အမိန့်တော်အကြောင်း အသိပေးခဲ့ပြီးဖြစ်သည်။
ကုချန် ရောက်လာချိန်တွင် နတ်ဆိုးဂျိုအရှင်နှင့် အခြားသူများသည် ဤသတင်းကို သူ့အား သေချာပေါက် ပြောပြခဲ့လိမ့်မည်ဟု သူ ယုံကြည်ထားခဲ့သည်။
တာအိုရောင်းရင်းများက အရှင် နတ်ဆိုးဧကရာဇ်ကြီးအကြောင်းကို ထုတ်ပြောခဲ့ပြီးဖြစ်သော်လည်း ဤလူက ဤမျှ ရမ်းကားနေဆဲပင်။ အရူးတစ်ယောက်၊ တကယ့် အရူးတစ်ယောက်ပဲ။
" တာအိုရောင်းရင်း ပိုင်ဟွာ... နတ်ဆိုးဧကရာဇ်ကြီးရဲ့ အမိန့်တော်ကို ချက်ချင်း ထုတ်ပြလိုက်...ဒီလူက နတ်ဆိုးဧကရာဇ်ကြီးရဲ့ ဂုဏ်သိက္ခာကို လျစ်လျူရှုထားတာ...သူ ကြီးမားတဲ့ တန်ဖိုးတစ်ခု ပေးဆပ်ရမယ် "
ဧကရာဇ် တာကီယွမ်သည် သွားကြိတ်ကာ ပြောလိုက်လေသည်။
ကုချန်၏ရူးသွပ်မှုသည် ဧကရာဇ် တာကီယွမ်၏ စိတ်နှလုံးကို ထိတ်လန့်သွားစေသော်လည်း တစ်ချိန်တည်းမှာပင် သူ့ကို စိတ်လှုပ်ရှားစေခဲ့သည်။
အဘယ်ကြောင့်ဆိုသော် ကုချန် ရူးသွပ်စွာ ပြုမူလေလေ အရှင် နတ်ဆိုးဧကရာဇ်ကြီးကို ဒေါသထွက်စေမည့် ဖြစ်တန်ခြေ ပိုမြင့်မားလေလေ ဖြစ်သောကြောင့်ပင်။
ယခုအခါ ရှီမိုကောင်းကင်မှ နတ်ဆိုးအရှင် တာအိုရောင်းရင်းများအားလုံး သေဆုံးသွားပြီဖြစ်ရာ အကယ်၍ အရှင် နတ်ဆိုးဧကရာဇ်ကြီးက ဤအင်မော်တယ်ဘုရင်ကိုပါ 'ရှင်းလင်း' လိုက်နိုင်မည်ဆိုလျှင် ဤကျယ်ပြောလှသော ရှီမိုကောင်းကင်ကြီးသည် နောက်ဆုံးတွင် သူ အလွယ်တကူ သိမ်းပိုက်နိုင်မည့် နေရာဖြစ်လာမည် မဟုတ်ပါလော။
အခန်း ( ၃၇၈ ) - အမိန့်တော် ရောက်ရှိလာခြင်း၊ အမည်နာမမှာ ဝူလျန်ဖြစ်ပြီး မင်းသာလျှင် ဖြစ်ရမည်
ဧကရာဇ် တာကီယွမ်၏ မျက်လုံးများတွင် မျှော်လင့်ချက် အရိပ်အယောင်တစ်ခု ပေါ်လွင်နေလေသည်။
ရှီမိုကောင်းကင်အရှင် သေဆုံးသွားပြီးနောက် ဤအင်မော်တယ် နတ်ဆိုးအရှင်များသည် အဘယ်ကြောင့် ရှီမိုကောင်းကင်တွင် အမြဲနေထိုင်ပြီး နတ်ဆိုးဧကရာဇ်ကြီးကို ဆက်သွယ်ရန် ကြိုးစားနေခဲ့ကြသနည်း။
ဤသည်မှာ သူတို့က နတ်ဆိုးဧကရာဇ်ကြီးအပေါ် အလွန်သစ္စာရှိနေသောကြောင့် မဟုတ်သလို သူတို့ကိုယ်သူတို့ ကာကွယ်ရန် သက်သက်အတွက်လည်း မဟုတ်ပေ။
အကြောင်းရင်း၏ အဓိကအစိတ်အပိုင်းမှာ ဤအင်မော်တယ် နတ်ဆိုးအရှင်များသည် ရှီမိုကောင်းကင်အရှင်၏ သေဆုံးမှုကို အခွင့်ကောင်းယူကာ ရှီမိုကောင်းကင်ကို 'ခွဲဝေ' ယူလိုသောကြောင့်ပင် ဖြစ်သည်။
သူတို့၏ စွမ်းအားဖြင့် ရှီမိုကောင်းကင်တစ်ခုလုံးကို မသိမ်းပိုက်နိုင်ချေ။
သို့သော် ရှီမိုကောင်းကင်၏ အစိတ်အပိုင်းတစ်ခုကို ခွဲဝေယူနိုင်သရွေ့ ၎င်းသည် သူတို့၏ ကိုယ်ပိုင်ကျင့်ကြံခြင်းနှင့် အနာဂတ် တက်လှမ်းမှုများအတွက် ကြီးမားလှသော အကျိုးကျေးဇူး ဖြစ်လာမည်ဖြစ်သည်။
မည်သို့ပင်ဆိုစေ နတ်ဆိုးနယ်မြေ၌ပင် အင်မော်တယ်ဘုရင်များမှာ ဖီးနစ်ငှက်၏ အမွေးအမျှင်များကဲ့သို့ ရှားပါးနေဆဲပင် ဖြစ်သည်။
ယခု ရှီမိုကောင်းကင်အရှင် သေဆုံးသွားပြီဖြစ်ရာ အရှင် နတ်ဆိုးဧကရာဇ်ကြီး ကိုယ်တိုင်ပင်လျှင် ရှီမိုကောင်းကင်ကို ထိန်းချုပ်ရန် ပိုမိုကောင်းမွန်သော သူကို အချိန်တိုအတွင်း ရှာတွေ့နိုင်မည်မဟုတ်ဘဲ လစ်လပ်ထားရဖွယ် ရှိလေသည်။
ဤနည်းဖြင့် ဤနတ်ဆိုးအရှင်များသည် 'အသိုက်လု' ယူရန် အခွင့်အရေး ရရှိလာမည်ဖြစ်သည်။ အကယ်၍ သူတို့က ရှီမိုကောင်းကင်ကို အချိန်အတိုင်းအတာတစ်ခုအထိ ခွဲဝေသိမ်းပိုက်ထားနိုင်မည် ဆိုလျှင်တောင် သူတို့အတွက် ကြီးမားသော အကျိုးကျေးဇူး ဖြစ်စေလိမ့်မည်။
အကယ်၍ ဤကဲ့သို့သော အကျိုးကျေးဇူးများသာ မရှိပါက ဤနတ်ဆိုးအရှင်များသည် ရှီမိုကောင်းကင်အရှင် သေဆုံးကြောင်း သိလိုက်ရသည့် အခိုက်အတန့်တွင် ငှက်များနှင့် သားရဲများကဲ့သို့ လူစုကွဲသွားကြမည်သာ ဖြစ်သည်။ ကြီးမားသော အန္တရာယ်ကို ရင်ဆိုင်ပြီး ရှီမိုကောင်းကင်တွင် မည်သူ နေရဲမည်နည်း။
ယခုအခါ နတ်ဆိုးဧကရာဇ်ကြီး၏ အမိန့်တော် ရှိနေပြီဖြစ်သည်။
ဧကရာဇ် တာကီယွမ်သည် ရှီမိုကောင်းကင်ရှိ အခြား အင်မော်တယ် နတ်ဆိုးအရှင်များ သေဆုံးသွားကြောင်းကို သိလိုက်ရလျှင်တောင် သူ၏ စိတ်ထဲတွင် ကြောက်ရွံ့မှု အနည်းငယ်မျှသာ ရှိပေမည်။ အမှန်တကယ်တွင် မျှော်လင့်ချက်က ကြောက်ရွံ့မှုထက် ပိုမိုကြီးမားနေလေသည်။
မုန်တိုင်း ကြီးလေလေ၊ ရလိုက်တဲ့ ငါးက ပိုတန်ဖိုးကြီးလေလေပဲ။
အခြား နတ်ဆိုးအရှင်များ သေဆုံးသွားသည့် သတင်းသည် သူအတွက်လည်း သတင်းကောင်းတစ်ခု ပင်ဖြစ်သည်။
" သွားမယ်! "
ဧကရာဇ် တာကီယွမ်သည် ပိုင်ဟွာနတ်ဆိုးအရှင်၏ လက်ထဲရှိ နတ်ဆိုးဧကရာဇ်ကြီး၏ အမိန့်တော်ကို တစ်ချက်ကြည့်လိုက်ပြီး စိတ်တည်ငြိမ်သွားကာ မည်သည့် တွန့်ဆုတ်မှုမျှမရှိဘဲ ရှီမိုကောင်းကင်သို့ ပျံသန်းဝင်ရောက်သွားလေသည်။
မကြာမီမှာပင် သူနှင့် ပိုင်ဟွာနတ်ဆိုးအရှင်တို့သည် ရှီမိုနန်းတော်အထက်သို့ ရောက်ရှိလာကြသည်။
" နတ်ဆိုးဧကရာဇ်ကြီးရဲ့ အမိန့်တော် ရောက်လာပြီ "
ဧကရာဇ် တာကီယွမ်က အသံကျယ်ကျယ်ဖြင့် ကြေညာလိုက်ရာ သူ၏အသံသည် အဆုံးမဲ့တာအိုများနှင့်အတူ တုန်ခါသွားပြီး ရှီမိုကောင်းကင် တစ်ခုလုံးသို့ ပျံ့နှံ့သွားလေသည်။
သူသည် ကုချန်ကို အောင်ပွဲခံသည့်ဟန်ဖြင့် ကြည့်လိုက်လေသည်။
မင်းက အင်မော်တယ်ဘုရင်ဆိုတော့ရော ဘာဖြစ်လဲ။
အခု အရှင် နတ်ဆိုးဧကရာဇ်ကြီးရဲ့ အမိန့်တော် ကျရောက်လာပြီဆိုတော့ နတ်ဆိုးဧကရာဇ်ကြီး ကိုယ်တိုင် ရောက်လာသလိုပဲ။ မင်းက အင်မော်တယ်ဘုရင် ဖြစ်နေရင်တောင်မှ အမိန့်တော်ကို နာခံစွာ လက်ခံရမှာပဲ မဟုတ်လော။
သို့သော် ဧကရာဇ် တာကီယွမ်ကို အံ့အားသင့်သွားစေသည်မှာ သူ၏ရှေ့ရှိ အင်မော်တယ်ဘုရင်က သူ့ကို တစ်ချက်လေးမျှပင် မကြည့်ဘဲ ဘေးရှိ ပိုင်ဟွာနတ်ဆိုးအရှင်ထံသို့ အကြည့်ရွှေ့ကာ ဂရုမစိုက်ဟန်ဖြင့် မေးလိုက်ခြင်းဖြစ်သည်။
" မင်းက ပိုင်ဟွာနတ်ဆိုးအရှင်လား "
" အရှင့်ကို တင်ပြပါတယ်...ဟုတ်ပါတယ် "
ကုချန်၏ အမေးကို ရင်ဆိုင်ရချိန်တွင် နတ်ဆိုးဧကရာဇ်ကြီး၏ အမိန့်တော်ကို ကိုင်ဆောင်ထားသော်ငြားလည်း ပိုင်ဟွာနတ်ဆိုးအရှင်သည် ပေါ့ဆစွာ မပြုမူရဲဘဲ အလျင်အမြန် ရိုသေစွာ ပြန်ဖြေလိုက်လေသည်။
" အင်း... မင်း အရမ်းကောင်းကောင်း လုပ်ခဲ့တယ် "
ဒီနှစ်တွေတစ်လျှောက်လုံး ချီလျန်မျိုးနွယ်ဝင်များကို ကယ်တင်ခဲ့သော ပိုင်ဟွာနတ်ဆိုးအရှင်၏ လုပ်ရပ်များကို အသိအမှတ်ပြုကာ ချီးကျူးသည့်အနေဖြင့် ကုချန်က ခေါင်းအနည်းငယ် ညိတ်လိုက်လေသည်။
ကုချန် ခေါင်းညိတ်လိုက်သည်ကို မြင်သောအခါ သူ၏ဘေးတွင် ရပ်နေသော ချီလျိုသည်လည်း အနည်းငယ် သက်ပြင်းချကာ စိတ်အေးသွားလေသည်။
သူအရှင်က ခေါင်းညိတ်လိုက်ပြီဖြစ်ရာ ပိုင်ဟွာနတ်ဆိုးအရှင်နှင့် ပတ်သက်၍ သူ့အရှင်က ဆက်လက် အရေးယူတော့မည် မဟုတ်ကြောင်း ဆိုလိုပေသည်။
" မင်း! "
ကုချန်နှင့် ပိုင်ဟွာနတ်ဆိုးအရှင်တို့အကြား အပြန်အလှန် စကားပြောဆိုမှုကို ကြားသောအခါ ဧကရာဇ် တာကီယွမ်၏ မျက်လုံးများ ချက်ချင်း ပြူးကျယ်သွားလေသည်။
သူက အရူးတစ်ယောက် မဟုတ်ပေ။ စကားအနည်းငယ်ဖြင့်ပင် ပိုင်ဟွာနတ်ဆိုးအရှင်သည် ရှီမိုကောင်းကင်ကို သစ္စာဖောက်ပြီး ဤအင်မော်တယ်ဘုရင်ဘက်သို့ ပါသွားပြီဖြစ်ကြောင်း သူ သိလိုက်လေသည်။
" ပိုင်ဟွာ... မင်းက သစ္စာဖောက်ရဲတယ်ပေါ့... "
ဧကရာဇ် တာကီယွမ်သည် ဒေါသတကြီး အော်ဟစ်လိုက်သော်လည်း သူ စကားမဆုံးမီမှာပင် အင်မော်တယ်ဘုရင်အဆင့် ဖိအားက ချက်ချင်း ကျဆင်းလာကာ သူ၏ ခန္ဓာကိုယ်ကို ပေါက်ကွဲသွားစေပြီး လုံးဝ သေဆုံးသွားစေခဲ့သည်။
" ဆူညံလိုက်တာ "
ကုချန်က ဂရုမစိုက်ဟန်ဖြင့် ရေရွတ်လိုက်ပြီးနောက် ပိုင်ဟွာနတ်ဆိုးအရှင်ဘက်သို့ လက်ယမ်းပြလိုက်ရာ နတ်ဆိုးဧကရာဇ်ကြီး၏ အမိန့်တော်လိပ်သည် လေမတိုက်ဘဲ ရွေ့လျားလာကာ ကုချန်၏ လက်ထဲသို့ ပျံသန်းဝင်ရောက်လာလေသည်။
" အရှင်... "
ဤမြင်ကွင်းကို ကြည့်ရင်း ပိုင်ဟွာနတ်ဆိုးအရှင်၏ မျက်နှာတွင် စိုးရိမ်ပူပန်မှု အရိပ်အယောင်တစ်ခု ပေါ်လာလေသည်။
မည်သို့ပင်ဆိုစေ ဤသည်မှာ အရှင် နတ်ဆိုးဧကရာဇ်ကြီး၏ အမိန့်တော် ဖြစ်သည်။ အကယ်၍ အနည်းငယ်မျှ မှားယွင်းစွာ ကိုင်တွယ်မိပါက အရှင် နတ်ဆိုးဧကရာဇ်ကြီးကို စော်ကားသလို ဖြစ်သွားနိုင်ပေသည်။
ထုံထျန်းနတ်ဆိုးတောင်ပေါ်တွင် နတ်ဆိုးဧကရာဇ်ကြီးက စကားပြောရ အလွန်လွယ်ကူပုံရသည်။
သို့သော် ပိုင်ဟွာနတ်ဆိုးအရှင်သည် တစ်ဖက်လူကို သဘောကောင်းသူတစ်ဦးဟု ထင်မှတ်လောက်အောင် မမိုက်မဲပေ။
နတ်ဆိုးဧကရာဇ် နေရာအထိ တက်လှမ်းနိုင်ခဲ့သူတိုင်း အလောင်းကောင်တောင်တန်းများနှင့် သွေးပင်လယ်များထဲမှ တိုက်ခိုက်ထွက်ပေါ်လာခဲ့ကြသည်ချည်း မဟုတ်ပါလော။
တစ်ဖက်လူ၏ ညင်သာပုံရသော အမူအရာမှာ သူနှင့် သူမအကြား ကွာဟချက် လွန်းမင်းစွာ ကြီးမားနေသောကြောင့် တမင်သက်သက် ပြသထားသည့် ထင်ယောင်ထင်မှားတစ်ခုမျှသာ ဖြစ်နိုင်ပေသည်။
" ကိစ္စမရှိဘူး "
ကုချန်သည် လက်ယမ်းပြကာ ပိုင်ဟွာနတ်ဆိုးအရှင်အား စိုးရိမ်မနေရန် အချက်ပြလိုက်လေသည်။
နောက်တစ်ခဏတွင် သူသည် လက်ဖျစ်တစ်ချက်တီးကာ ဤနတ်ဆိုးဧကရာဇ်ကြီး၏ အမိန့်တော်ကို ဖွင့်လှစ်လိုက်လေသည်။
" ဝုန်း…! "
အမိန့်တော် ဖွင့်လှစ်လိုက်သည့် အခိုက်အတန့်တွင် ၎င်း၏ မျက်နှာပြင်ပေါ်ရှိ မရေမတွက်နိုင်သော ရွှေရောင် တာအိုအမှတ်အသားများသည် ချက်ချင်း တောက်ပလာပြီး ကျယ်ပြောလှသော ဤကမ္ဘာလောကကြီးထဲတွင် နတ်ဆိုးဧကရာဇ်အဆင့် ဖိအားတစ်ခု ခဏတာ ထွက်ပေါ်လာလေသည်။
ထိုဖိအား၏ ပြင်းအားမှာ အင်မော်တယ်ဘုရင်တစ်ပါးထက်ပင် သာလွန်နေပြီး ဤကမ္ဘာလောကရှိ အဆုံးမဲ့တာအိုများကို ခဏတာမျှ အေးခဲသွားစေခဲ့သည်။
သို့သော် ဤဖိအားက လျင်မြန်စွာ လာပြီး လျင်မြန်စွာပင် ပျောက်ကွယ်သွားလေသည်။
၎င်းသည် ထွက်သက်ဝင်သက် တစ်ကြိမ်စာမျှပင် မကြာလိုက်ဘဲ အရိပ်အယောင်မျှမကျန် ချက်ချင်း ပျောက်ကွယ်သွားခဲ့သည်။
ထို့နောက် အမိန့်တော်ပေါ်ရှိ မရေမတွက်နိုင်သော ရွှေရောင် တာအိုအမှတ်အသားများသည် လေဟာနယ်ထဲမှ အနက်ရောင်ဝတ်စုံနှင့် လူလတ်ပိုင်းအရွယ် ပုံရိပ်တစ်ခုကို ပုံဖော်ပေးလိုက်လေသည်။
" အရှင် နတ်ဆိုးဧကရာဇ်ကြီး "
ရင်းနှီးနေသော ထိုပုံရိပ်ကို မြင်သောအခါ ပိုင်ဟွာနတ်ဆိုးအရှင်သည် အလွန်အမင်း အံ့အားသင့်သွားပြီး သူ့အား အလျင်အမြန် ဦးညွှတ်လိုက်လေသည်။
အဘယ်ကြောင့်ဆိုသော် ဤပုံရိပ်သည် ထုံထျန်းနတ်ဆိုးတောင်ပေါ်တွင် သူမြင်တွေ့ခဲ့ရသော နတ်ဆိုးဧကရာဇ်ကြီးနှင့် အတိအကျ တူညီနေသောကြောင့်ပင်။
ကုချန်၏ အကြည့်ကလည်း ဤပုံရိပ်ပေါ်သို့ ကျရောက်သွားလေသည်။
ဤသည်မှာ အစစ်အမှန် နတ်ဆိုးဧကရာဇ်ကြီး မဟုတ်ဘဲ ဤအမိန့်တော်တွင် တွယ်ကပ်ထားပြီး ယခု အလိုအလျောက် နိုးထလာသော သူ၏ ဆန္ဒဝိညာဉ်စတစ်ခုမျှသာ ဖြစ်ကြောင်း သူ သိလေသည်။
သို့သော် ဆန္ဒဝိညာဉ်စတစ်ခုမျှသာ ဖြစ်လင့်ကစား အင်မော်တယ်ဘုရင်အဆင့်ကို ကျော်လွန်နေသော မှိန်ဖျော့ဖျော့ ဖိအားတစ်ခုကို ကုချန် ခံစားနိုင်သေးသည်။
နတ်ဆိုးဧကရာဇ်ဟူသော ဂုဏ်ပုဒ်မှာ အမှန်တကယ်ပင် ထိုက်တန်သည်ဟုသာ ဆိုရပေမည်။
" ငါက နတ်ဆိုးဧကရာဇ်ကြီးပဲ... မိတ်ဆွေငယ်က ကိုယ့်ကိုယ်ကိုယ် ဘယ်လို ခေါ်လဲ "
နတ်ဆိုးဧကရာဇ်ကြီး ထွက်ပေါ်လာပြီး မျက်စိတစ်မှိတ်အတွင်း ဤကမ္ဘာလောကရှိ ကျန်ရစ်နေသော တာအိုနိယာမများမှတစ်ဆင့် အရာအားလုံးကို သူ သိရှိသွားလေသည်။
သို့သော် ရှီမိုနန်းတော်ကို ကုချန် ဖျက်ဆီးပစ်လိုက်ပြီဆိုသည်ကို သိလျက်နှင့်ပင် နတ်ဆိုးဧကရာဇ်ကြီးသည် ဒေါသထွက်သည့် အရိပ်အယောင်မျှ မပြခဲ့ချေ။ ထိုအစား သူ့ကိုယ်သူ မိတ်ဆက်ပြီးနောက် ကုချန်၏နာမည်ကို မေးမြန်းလိုက်လေသည်။
" ဝူလျန် "
နတ်ဆိုးဧကရာဇ်ကြီး ဘာကြံစည်နေသနည်းဆိုသည်ကို ကုချန် မသိသော်လည်း သူ၏ နာမည်ကို တည်ငြိမ်စွာ ပြောလိုက်သည်။
နတ်ဆိုးနယ်မြေရှိ သူ၏ ကိုယ်ပွားသည် မူလကိုယ်ပိုင်ခန္ဓာ၏ အမည်ကို အသုံးပြု၍ မရနိုင်ချေ။
ထို့ကြောင့် ကုချန်သည် အဆုံးမဲ့ဓား၏ အမည်ကို အသုံးပြုကာ 'ဝူလျန်' ဟူသော တာအိုဘွဲ့အမည်ကို ပေါ့ပေါ့ပါးပါးပင် သူ့ကိုယ်သူ ပေးလိုက်လေသည်။
" ဝူလျန်...နာမည်ကောင်းပဲ...ခံ့ညားတဲ့ အငွေ့အသက်လည်း ရှိတယ် "
နတ်ဆိုးဧကရာဇ်ကြီးက ရေရွတ်လိုက်ပြီး သူ၏ လေသံတွင် သဘောကျ နှစ်သက်မှု အရိပ်အယောင် ပါဝင်နေလေသည်။
" မိတ်ဆွေငယ် ဝူလျန်... မင်းက ရှီမိုကောင်းကင်အရှင်ကို သတ်ပြီး သူ့ရဲ့ ရှီမိုနန်းတော်ကို မြေလှန်ပစ်လိုက်တာဆိုတော့ ဒီကိစ္စအတွက် မင်းက ဒီဧကရာဇ်ကို ရှင်းပြချက်တစ်ခု ပေးရလိမ့်မယ်လို့ ထင်တယ် "
နတ်ဆိုးဧကရာဇ်ကြီး ဤစကားကို ပြောလိုက်သည်နှင့်တစ်ပြိုင်နက် မူလက အနည်းငယ် ပြေလျော့နေသော လေထုမှာ ချက်ချင်း တင်းမာသွားလေတော့သည်။
" ရှင်းပြချက်... ဘယ်လို ရှင်းပြချက်မျိုးကို လိုချင်တာလဲ "
ကုချန်၏ မျက်လုံးများ အနည်းငယ် ကျဉ်းမြောင်းသွားလေသည်။ ဤနတ်ဆိုးဧကရာဇ်နှင့် အေးအေးဆေးဆေး စကားပြောနိုင်မည်ဟု သူ တစ်ခါမျှ မတွေးခဲ့ဖူးရာ ယခု ထင်သည့်အတိုင်းပင် ဓားမြှောင်က ပေါ်ထွက်လာခဲ့လေပြီ။
သို့သော် ကိစ္စမရှိပေ။ သူ၏ ရည်ရွယ်ချက်မှာ နတ်ဆိုးဧကရာဇ်၏ အတိုင်းအတာကို စမ်းသပ်ရန်နှင့် ဤနတ်ဆိုးနယ်မြေ၏ ရေက ဘယ်လောက်တောင် နက်ရှိုင်းသလဲဆိုတာ ကြည့်ရန်ပင် ဖြစ်သည်။
သို့သော် နတ်ဆိုးဧကရာဇ်ကြီး၏ နောက်ဆက်တွဲ အဖြေက ကုချန်ကို အံ့အားသင့်ကာ မှင်သက်သွားစေခဲ့သည်။
" ရှီမိုကောင်းကင်အရှင် သေသွားပြီဆိုတော့ ဒီကျယ်ပြောလှတဲ့ ရှီမိုကောင်းကင်ကို တစ်ယောက်ယောက်ကတော့ စီမံအုပ်ချုပ်ရမှာပဲ မဟုတ်လား... ဒီဝန်ထုပ်ဝန်ပိုးက မိတ်ဆွေငယ် ဝူလျန်ဆီကိုပဲ ကျရောက်ရတော့မှာပေါ့ "