အခန်း (၃၁၁)
Vol. 29 Ch. 311
အပိုင်း (၃၁၁)
ဤမြင်ကွင်းကို မြင်လိုက်ရသောအခါ ဒုတိယဂိုဏ်းခေါင်းဆောင် ဝမ်ထုံကျန်းမှာ ဒေါသချောင်းချောင်း ထွက်သွားပြီး - "ကောင်းတယ်… သိပ်ကောင်းတယ်... မင်းတို့အားလုံး သူဖုန်းစားဂိုဏ်းကို သစ္စာဖောက်ကြပြီပေါ့လေ။ အကြီးအကဲ ၁၈ ယောက်လုံးတောင်လား... ငါ့ဂိုဏ်းမှာ ဒီလောက်တောင် သစ္စာဖောက်တွေ များနေလိမ့်မယ်လို့ ငါ လုံးဝ မထင်ထားခဲ့ဘူး"
"ရှေးလူကြီးတွေ ပြောဖူးတယ်... 'ပညာရှိဆိုတာ အခြေအနေကို ကြည့်ပြီး အညံခံတတ်ရတယ်' တဲ့"
အကြီးအကဲချန်းက ရယ်မောရင်း - "အရှင်မင်းကြီးက ကျုပ်တို့အပေါ် ရက်ရောလွန်းလှတယ်၊ ကျုပ်တို့က သူ့အတွက် အမှုထမ်းတာဟာ သဘာဝကျပါတယ်"
"ဟုတ်တယ်... ကျုပ်တို့တစ်သက်လုံး ဂိုဏ်းအတွက်ပဲ ပင်ပန်းခံခဲ့တာ၊ အခုတော့ နည်းနည်းပါးပါး စည်းစိမ်ခံစားခွင့် မရှိတော့ဘူးလား"
"အရှင်မင်းကြီးနောက် လိုက်မှပဲ ကျုပ်တို့အတွက် သာယာတဲ့နေ့ရက်တွေ ရောက်လာမှာ"
"အရှင်မင်းကြီးနောက် လိုက်မှသာ သူဖုန်းစားဂိုဏ်းရဲ့ အနာဂတ်က လင်းလက်တောက်ပလာမှာ"
"တော်ကြစမ်း….!"
ကျိုးတာ့အိုက - "ဝမ်ထုံကျန်းကို အရင်သတ်ကြမယ်၊ ဒါဆိုရင် သူဖုန်းစားဂိုဏ်းတစ်ခုလုံး ငါတို့လက်ထဲ ရောက်ပြီ"
"သတ်ကြ..!" အကြီးအကဲ ၁၈ ယောက်လုံး တညီတညွတ်တည်း တိုက်ခိုက်လိုက်ကြပြီး ထွက်ပေါ်လာသော သိုင်းကွက်တိုင်းမှာ အသက်ကို ရန်ရှာနိုင်သည့် သေကွင်းသေကွက်များ ဖြစ်ကြသည်။
ထိုစဉ် ဝမ်ထုံကျန်း၏ ကိုယ်ရောင်ကိုယ်ဝါမှာ ရုတ်တရက် မြင့်တက်လာပြီး သူ၏ အစွမ်းထက်လှသော ချီစွမ်းအားများကို စုစည်းကာ လက်ဝါးတစ်ချက် ရိုက်ထုတ်လိုက်သည်။
"နဂါးနိုင်လက်ဝါး ၁၈ ကွက်"
“ဘုန်း!”
ပြင်းထန်လှသော လက်ဝါးအားကြောင့် အကြီးအကဲတွေအားလုံး လွင့်ထွက်သွားကြတော့သည်။ အကြီးအကဲများမှာ ထိတ်လန့်သွားကြပြီး -
"ဒီလောက် ကြောက်စရာကောင်းတဲ့ လက်ဝါးအားဆိုရင်... မင်းက ကောင်းကင်အဆင့်ကို ရောက်နေပြီလား"
"ကောင်းကင်အဆင့်ကို ခြေတစ်လှမ်းအလိုပဲ၊ သူက သူ့ခွန်အားတွေကို တော်တော် လျှို့ဝှက်ထားတာပဲ"
"ဒါတော့ မလွယ်တော့ဘူး"
"ဟုတ်တယ်... ငါက အင်ပါယာချီအဆင့်ရဲ့ အထွတ်အထိပ်မှာ ကျင့်ကြံနေခဲ့တာ ကြာပြီ၊ အခုဆိုရင် ကောင်းကင်အဆင့်ကို ရောက်ဖို့ ခြေတစ်လှမ်းပဲ လိုတော့တယ်။ မင်းတို့အားလုံး စုပေါင်းတိုက်ရင်တောင် ငါ့ပြိုင်ဘက် မဟုတ်ဘူး"
ဝမ်ထုံကျန်းက အောင်နိုင်သူအလား တဟားဟား ရယ်မောလိုက်ပြီး - "ဂိုဏ်းခေါင်းဆောင်လည်း မရှိတော့ဘူး။ ဒီနေ့ကစပြီး ငါပဲ သူဖုန်းစားဂိုဏ်းရဲ့ ခေါင်းဆောင်ပဲ။ မင်းတို့လို သစ္စာဖောက် တစ်ယောက်မှ လွတ်မှာမဟုတ်ဘူး၊ ငါကိုယ်တိုင် ဂိုဏ်းကို သန့်စင်ပစ်မယ်"
သူသည် နဂါးနိုင်လက်ဝါးကို ထပ်မံထုတ်ဖော်လိုက်ရာ အကြီးအကဲများမှာ နာကျင်စွာဖြင့် အော်ဟစ်လိုက်ကြသည်။
ထိုအခြေအနေကို ကြည့်ပြီး ကျိုးတာ့အိုက အံကို တင်းတင်းကြိတ်လျက် ရင်ဘတ်ထဲမှ အမည်းရောင် ဓားအသေးတစ်ချောင်းကို ထုတ်ယူကာ - "အရှင်မင်းကြီး... ကျေးဇူးပြုပြီး ကူညီပေးပါဦး"
ထိုခဏတွင် ဓားငယ်လေးမှာ တုန်ခါသွားပြီး တုံ့ပြန်လိုက်သည်။
မိုင်ပေါင်း ၃,၀၀၀ ကျော် ဝေးကွာသော မဟာရှ နန်းတော်အတွင်းရှိ 'ရွှမ်ရှောင်' နတ်ဘုရားဓားမှာလည်း သိသိသာသာ တုန်ခါလာခဲ့သည်။
ဓားအဖိုးအိုက ဒါကိုမြင်ပြီး အံ့သြတကြီး ရေရွတ်လိုက်သည် - "ဆရာ"
လင်းပိုင်ဖန်က ခေါင်းညိတ်ပြလိုက်ပြီး - "ကျိုးတာ့အိုတို့ အုပ်စု အန္တရာယ်နဲ့ တွေ့နေပြီထင်တယ်။ သွားပြီး ကူညီပေးလိုက်ဦး"
"ဟုတ်ကဲ့ပါ ဆရာ" ဓားအဖိုးအိုက ရွှမ်ရှောင်ဓားကို ကိုင်လိုက်သောအခါ ကောင်းကင်အဆင့် သိုင်းပညာရှင်တစ်ဦး၏ စွမ်းအင်များ ဓားအတွင်းသို့ စီးဝင်သွားသည်။
ထို့နောက် ထိုစွမ်းအင်များသည် နတ်ဘုရားဓား၏ လမ်းညွှန်မှုဖြင့် မိုင်ပေါင်း ၃,၀၀၀ ဝေးသော နေရာရှိ ဓားငယ်လေးထံသို့ လျင်မြန်စွာ ရောက်ရှိသွားသည်။
ထိုစွမ်းအင်မှာ လမ်းခရီးကြောင့် ၇၀ ရာခိုင်နှုန်းခန့် လျော့နည်းသွားသော်လည်း ဒါကပင် လျှော့တွက်၍ မရနိုင်သော စွမ်းအားမျိုး ဖြစ်သည်။
ကျိုးတာ့အိုက ထိုဓားငယ်လေးကို ကိုင်လျက် ဒုတိယဂိုဏ်းခေါင်းဆောင် ဝမ်ထုံကျန်းထံသို့ အရှိန်အဟုန်ဖြင့် ထိုးစိုက်လိုက်ပြီး - "သေပေတော့"
“ချွင်” ဟူသော အသံနှင့်အတူ ဓားငယ်လေးမှ ပေပေါင်း ရာချီရှည်လျားသော ကြောက်မက်ဖွယ် ဓားချီများ ထွက်ပေါ်လာပြီး ဝမ်ထုံကျန်းနှင့် သူ၏ နဂါးနိုင်လက်ဝါးတို့ကို တို့ဟူးကို လှီးဖြတ်လိုက်သကဲ့သို့ အလွယ်တကူပင် နှစ်ပိုင်းပိုင်းပစ်လိုက်လေသည်။
မြေပြင်ပေါ်ရှိ နက်ရှိုင်းလှသော ဓားရာနှင့် နှစ်ပိုင်းပြတ်နေသော အလောင်းကို ကြည့်ပြီး အကြီးအကဲများမှာ ထိတ်လန့်တုန်လှုပ်သွားကြသည်။
"အရှင်မင်းကြီးရဲ့ ဓားသိုင်းက... တကယ်ကို ကြောက်စရာကောင်းလိုက်တာ…!!!"
ထို့နောက်တွင် သူတို့သည် ဝမ်ထုံကျန်း၏ ကျန်ရှိနေသော လက်ပါးစေများကို ဝိုင်းဝန်းဖမ်းဆီးလိုက်ကြသည်။ သူ၏ လူယုံ ၆ ဦးအနက် ၂ ဦးမှာ အညံမခံဘဲ အသေခံသွားကြပြီး ကျန် ၄ ဦးမှာမူ အခြေအနေကို ကြည့်ကာ သစ္စာခံလာကြသည်။
ဤသို့ဖြင့် သူဖုန်းစားဂိုဏ်း၏ အဆင့်မြင့်ခေါင်းဆောင် ၂၂ ဦးလုံး လင်းပိုင်ဖန်၏ လက်အောက်သို့ ရောက်ရှိလာပြီး သူဖုန်းစားဂိုဏ်းတစ်ခုလုံးမှာလည်း သူ၏ လက်ထဲသို့ အပြီးအပိုင် ကျရောက်သွားတော့သည်။
ရက်အနည်းငယ်အကြာတွင် သူဖုန်းစားဂိုဏ်း အကြီးအကဲအားလုံးမှာ မဟာရှနိုင်ငံရှိ လင်းပိုင်ဖန်ထံသို့ တိတ်တဆိတ် လာရောက်ဂါရဝပြုကြသည်။
"အရှင်မင်းကြီးကို ဂါရဝပြုပါတယ်... အရှင်မင်းကြီး သက်တော်ရာကျော် ရှည်ပါစေ"
ထိုအချိန်တွင် လင်းပိုင်ဖန်၏ စိတ်ထဲ၌ အသံတစ်ခု ထွက်ပေါ်လာသည်။
"ဒင်! ကစားသမား၏ နိုင်ငံတော်အင်အား တိုးတက်လာသောကြောင့် သင်၏ ခွန်အားများလည်း မြင့်တက်လာခဲ့သည်။ ဆုလာဘ်အဖြစ် 'နဂါးနတ်ဘုရား ကျင့်စဉ်' ကို ရရှိခဲ့သည်"
"နဂါးနတ်ဘုရားကျင့်စဉ်ကို မိမိကိုယ်ကိုယ် နဂါးနတ်ဘုရားဟု သမုတ်ခဲ့သော အစွမ်းအထက်ဆုံး ပုဂ္ဂိုလ်တစ်ဦးက တီထွင်ခဲ့ခြင်း ဖြစ်သည်။ ဤကျင့်စဉ်သည် အလွန်မာကျောထက်မြက်သော သိုင်းပညာဖြစ်ပြီး တတ်မြောက်သွားပါက အဆိပ်ကို ထုတ်ခြင်း၊ ဒဏ်ရာကုသခြင်းနှင့် ခုခံကာကွယ်မှုတွင် ပြိုင်ဘက်ကင်း စွမ်းအားကို ရရှိစေမည် ဖြစ်သည်"
"ထို့ပြင် နဂါးနတ်ဘုရားအဖြစ် အသွင်ပြောင်းလဲနိုင်ကာ လေ၊ မိုး၊ လျှပ်စီးနှင့် မိုးကြိုးများကို စေခိုင်းပြီး ရန်သူများကို ပြိုင်ဘက်ကင်းစွမ်းအားဖြင့် သုတ်သင်နိုင်သည်"
လင်းပိုင်ဖန်မှာ မျက်လုံးကို မှိတ်လိုက်ပြီး ဤပြိုင်ဘက်ကင်း နတ်ဘုရားကျင့်စဉ်ကို လျင်မြန်စွာ စုပ်ယူလိုက်သည်။
လင်းပိုင်ဖန် သင်ယူခဲ့သမျှ ကျင့်စဉ်များထဲတွင် ဤကျင့်စဉ်မှာ အထူးခြားဆုံးဟု ဆိုရပေမည်။ အဆိပ်ထုတ်ခြင်း၊ ဒဏ်ရာကုသခြင်းနှင့် အရာဝတ္ထုများကို လှမ်းယူနိုင်ခြင်းတို့အပြင်...
အရေးကြီးဆုံးမှာ နဂါးတစ်ကောင်အဖြစ် အသွင်ပြောင်းပြီး သဘာဝတရားကို စေခိုင်းနိုင်ခြင်းပင် ဖြစ်ချေသည်။ ၎င်းက သူ့ကို စစ်မှန်သော "နဂါးဧကရာဇ်" ဖြစ်စေသည်။
လင်းပိုင်ဖန်မှာ ဤဆုလာဘ်ကြောင့် အလွန်ပင် ကျေနပ်သွားသည်။ သူ့အတွက် ဤအကျိုးအမြတ်များကို ယူဆောင်လာပေးသော အကြီးအကဲများကို ကြည့်ကာ ပျော်ရွှင်စွာ ပြုံးလိုက်ပြီး - "အသစ်ရောက်လာတဲ့ အကြီးအကဲတွေကို ကြိုဆိုပါတယ်။ မောင်မင်းတို့ ငါကိုယ်တော်ကို သစ္စာခံဖို့ ရွေးချယ်ခဲ့တာဟာ မှန်ကန်တဲ့ ဆုံးဖြတ်ချက်ပဲ၊ ငါကိုယ်တော် မောင်မင်းတို့ကို စိတ်ပျက်စေမှာ မဟုတ်ဘူး"
သူ လက်ခုပ်တီးလိုက်သောအခါ မိန်းမစိုးတစ်စုမှာ သေတ္တာငယ်လေးများကို ကိုင်ဆောင်ကာ ထွက်လာကြသည်။
လင်းပိုင်ဖန်က ပြုံးလျက် - "ဒါတွေက မောင်မင်းတို့အားလုံးအတွက် ငါကိုယ်တော် ပြင်ဆင်ထားတဲ့ လက်ဆောင်တွေပဲ၊ လက်ခံလိုက်ကြပါဦး"
"ကျေးဇူးတင်လှပါတယ် အရှင်မင်းကြီး" အကြီးအကဲများမှာ စိတ်လှုပ်ရှားသွားကြသည်။
ပထမဆုံးအနေဖြင့် အသစ်ဝင်လာသော အကြီးအကဲချန်းယွမ်နှင့် အဖွဲ့မှာ သူတို့ အလိုချင်ဆုံးဖြစ်သည့် နတ်ဆေးလုံးများနှင့် 'ယင်းကိုးပါးသိုင်းကျမ်း' ထဲမှ အရိုးတည်ဆောက်ပုံ ကျင့်စဉ်ကို ရရှိသွားကြသည်။
"ရွှေ၊ ငွေ၊ ရတနာတွေနဲ့ ကြီးကျယ်ခမ်းနားတဲ့ စံအိမ်တွေကိုတော့ နောက်မှ လူလွှတ်ပြီး ပေးပို့ခိုင်းလိုက်မယ်" ဟု လင်းပိုင်ဖန်က ဆိုလိုက်သည်။
"ကျေးဇူးတင်လှပါတယ် အရှင်မင်းကြီး" အကြီးအကဲများမှာ အလွန်ပင် ဝမ်းသာသွားကြသည်။
"ဒါတင် မကသေးဘူး" လင်းပိုင်ဖန်က လက်ခုပ် ထပ်တီးလိုက်ပြန်သည်။
နောက်ထပ် မိန်းမစိုးတစ်စုက ပိုမိုလှပသော သေတ္တာများကို သယ်ဆောင်လာကြပြန်သည်။
"ဒါကတော့ ကျိုးတာ့အို အပါအဝင် အကြီးအကဲ ၈ ယောက်အတွက်ပဲ။ မောင်မင်းတို့က သူဖုန်းစားဂိုဏ်းကို ငါကိုယ်တော်လက်ထဲ ရောက်အောင် ကူညီပေးခဲ့လို့ ဒါဟာ မောင်မင်းတို့ရဲ့ ကြိုးစားမှုအတွက် ဆုလာဘ်ပဲ။ မောင်မင်းတို့ သဘောကျလိမ့်မယ်လို့ မျှော်လင့်ပါတယ်"
"ကျေးဇူးတင်ပါတယ် အရှင်မင်းကြီး" ကျိုးတာ့အိုနှင့် အဖွဲ့က သေတ္တာများကို စိတ်လှုပ်ရှားစွာ ဖွင့်ကြည့်လိုက်ကြသည်။
အတွင်း၌ တန်ဖိုး ဖြတ်မရနိုင်ဘဲ ပြင်ပလောကတွင် ရှာဖွေရန် မဖြစ်နိုင်သော ပိုမိုအဆင့်မြင့်သည့် နတ်ဆေးလုံးများကို တွေ့လိုက်ရသည်။ ထို့ပြင် အကြွေးမှတ်တမ်း ( IOU) တစ်စောင်ကိုလည်း တွေ့လိုက်ရသည်။ ( မှတ်ချက်- IOU ရဲ့ အရှည်က I Owe yoU )
လင်းပိုင်ဖန်က ပြုံးကာ - "ဒါက မောင်မင်းတို့အတွက် ငါကိုယ်တော်ရဲ့ ကတိပဲ။ မောင်မင်းတို့ သင်ယူချင်တဲ့ ဘယ်လို နတ်ဘုရားအဆင့် သိုင်းကျင့်စဉ်ကိုမဆို ဒီထဲမှာ ရေးလိုက်ပါ။ အဲဒီကျင့်စဉ်ရဲ့ ပထမ အဆင့်နှစ်ဆင့်ကို ငါကိုယ်တော် ကိုယ်တိုင် သင်ပေးမယ်"
"အရှင်မင်းကြီးရဲ့ ဂရုဏာတော်က ကြီးမားလှပါတယ်" ကျိုးတာ့အိုနှင့် အကြီးအကဲ ၈ ဦးတို့မှာ ရှေ့ဆက်၍ မပြောနိုင်လောက်အောင်ပင် စိတ်လှုပ်ရှားသွားကြသည်။
နတ်ဘုရားအဆင့် ကျင့်စဉ်များကို မကြာခင် သင်ယူရတော့မည် မဟုတ်ပါလော။
အရှင်မင်းကြီးအား သစ္စာခံရန် ဆုံးဖြတ်ခဲ့ခြင်းမှာ သူတို့တစ်သက်တာတွင် အမှန်ကန်ဆုံးသော ဆုံးဖြတ်ချက်ဖြစ်သည်ဟု သူတို့အားလုံး တစ်ညီတည်း တွေးတောမိလိုက်ကြသည်။