အခန်း (၃၃၃-၃၃၄)
Vol. 34 Ch. 333-334
အခန်း ၃၃၃ - ရာစုနှစ်ရွှေနှင့် ရာစုနှစ်ဂျင်ဆင်း
"ဟင်း"
ဖန့်ကျွယ် သည် လူအုပ်ကို ကံကောင်းခြင်းဆိုင် မှ ခေါ်ထုတ်လာစဉ် သက်ပြင်းကို ခပ်ပြင်းပြင်း ချလိုက်သည်။
နောက်ထပ် ဝိညာဉ်ကျောက်တုံး ၁၀၀ အလဟဿ ဖြစ်သွားပြန်ပြီ
ဖန့်ဟောင်၏ မျက်နှာမှာလည်း မသာမယာ ဖြစ်နေသည်။ သူ စုဆောင်းထားသော ဝိညာဉ်ကျောက်တုံး ၁၅ တုံးလုံး ဆုံးရှုံးသွားခဲ့ရသည် မဟုတ်ပါလား။
ဖန့်ယွင်မှလွဲ၍ ကျန်သည့်သူအားလုံးမှာ ထိုဆိုင်တွင် သူတို့၏ ဝိညာဉ်ကျောက်တုံးများကို ချန်ထားခဲ့ရသဖြင့် စိတ်ဓာတ်များ ကျဆင်းနေကြသည်။
"နိုင်တာရှိသလို ရှုံးတာလည်း ရှိမှာပေါ့ အစ်ကိုကြီး"
ဟု ဖန့်ယွင်က ဖန့်ကျွယ်ကို နှစ်သိမ့်လိုက်သည်။
ဖန့်ကျွယ်က ခေါင်းငြိမ့်ပြကာ
"စိတ်မပူပါနဲ့ ငါ နားလည်ပါတယ် ဒါပေမဲ့ ဝိညာဉ်အရင်းအမြစ်ကျောက်တုံးတွေရဲ့ လမ်းစဉ်က တကယ်ကို နက်နဲလွန်းတယ်လို့ ခံစားရလို့ပါ နှစ်ပေါင်းများစွာ လေ့လာခဲ့ရင်တောင် သူ့ရဲ့ အနှစ်သာရကို တကယ်တမ်း ဆုပ်ကိုင်မိဖို့ ခက်ဦးမှာပဲ"
ဟု ဆိုသည်။
ဖန့်ကျွယ်သည် ခြေလှမ်းများ ရပ်တန့်သွားသည်။
သူတို့ထဲမှ လူတစ်ယောက် ပျောက်နေသည်ကို ရုတ်တရက် သတိရသွားခြင်းဖြစ်သည်။ သူက ပတ်ဝန်းကျင်ကို ဝေ့ကြည့်ရင်း
"ဖန့်ချန် ဘယ်ရောက်သွားလဲ"
ဟု မေးလိုက်သည်။
"သူ ထွက်သွားပြီလေ"
ဖန့်ဟောင်က နှာခေါင်းရှုံ့ကာ
"သူဝယ်ခဲ့တဲ့ ဝိညာဉ်ကျောက်တုံး တစ်တုံးတည်းတန်တဲ့ ကျောက်တုံးကို တိတ်တိတ်လေး ခွဲကြည့်ဖို့ နေရာသွားရှာနေတာ ဖြစ်မှာပေါ့"
ဟု ဆိုသည်။
"သူ့ကို ဂရုမစိုက်ပါနဲ့ ပြန်ကြရအောင်"
ဖန့်ယွင်က ပြောလိုက်သည်။
ထိုစဉ် ဖန့်ဟောင်က ရှေ့နားမှ နေရာတစ်ခုကို လက်ညှိုးထိုးပြသည်
"ဟိုမှာ တော်တော် စည်နေတာပဲ တစ်ယောက်ယောက် လောင်းကစားနေပုံရတယ်"
ဖန့်ကျွယ်၏ မျက်လုံးများ လင်းလက်သွားသည်
"သွားကြည့်ရအောင်"
သူတို့အဖွဲ့ လူအုပ်ကြီးရှိရာသို့ တိုးဝင်သွားသောအခါ ဖန့်ယွင်က အံ့ဩတကြီး ဟစ်အော်လိုက်သည်
"ဟင် ဒါ ဖန့်ချန် မဟုတ်လား သူ ဒီမှာ ဘာလုပ်နေတာလဲ"
"ကျွန်တော် သွားစုံစမ်းလိုက်မယ်"
ဖန့်ဟောင်သည် လူအုပ်ထဲသို့ တိုးဝင်သွားပြီးနောက် ခဏအကြာတွင် ပြန်ထွက်လာသည်
"ဖန့်ချန်က တစ်ယောက်ယောက်နဲ့ လောင်းနေတာဗျ လောင်းကြေးက ရှကျီရဲ့ ခြေထောက်တွေပဲ"
ဖန့်ယွင်က လူအုပ်ကြားမှ လင်းယွီကို လှမ်းကြည့်ကာ ပြောသည်
"အဲ့ဒီလူက ဘယ်သူလဲဆိုတာ ငါသိတယ် ၁၈ ခုမြောက် နယ်မြေက လင်းမိသားစုဝင် လင်းယွီ ပဲ သူက ကျွယ်ဝူတီအတွက် လက်စားချေပေးချင်လို့ ဒီလိုလုပ်တာ ဖြစ်မှာသူတို့က ဆက်ဆံရေး ကောင်းကြတယ်လေ"
ဖန့်ကျွယ်၏ မျက်နှာမှာ တွန့်ဆုတ်သွားသည်
"ငါတို့ရဲ့ ဆရာက ဆရာကြီး ချန်ယွမ် နဲ့ ရင်းနှီးတယ်လေ"
ဖန့်ယွင်က သူ၏ အတွေးကို ရိပ်မိပုံရသည်
"အစ်ကိုကြီး ငါတို့ ဝင်မပါတာ အကောင်းဆုံးပဲ ရှကျီ က ကျွယ်ဝူတီကို အမြဲတမ်း သိက္ခာချနေတာ ငါတို့သာ ကူညီလိုက်ရင် ကျွယ်ဝူတီက ငါတို့ကို ရှကျီဘက်ကလို့ ထင်သွားလိမ့်မယ် ပြီးတော့ ဖန့်လင်ရှင်းရဲ့ ကိစ္စကလည်း ရှိသေးတယ်လေ"
ဖန့်ကျွယ် ခေါင်းအသာငြိမ့်လိုက်သည်။
အမှန်ပင် ထိုကိစ္စက ရှုပ်ထွေးလှသည်။ ဝင်ပါမိလျှင် ဒုက္ခရှာသလို ဖြစ်ပေလိမ့်မည်။
ဖန့်ဟောင်က တဟားဟား ရယ်မောလိုက်သည်
"ဖန့်ချန်က လင်းယွီကို ကံကောင်းခြင်းဆိုင် က ကျောက်တုံးနဲ့ လောင်းနေတာတဲ့ တကယ် ရယ်ရတယ် အဲ့ဒီကျောက်တုံးက ဝိညာဉ်ကျောက်တုံး တစ်တုံးတည်းတန်တာလေ အဲ့ဒါနဲ့ သူက လောင်းရဲတယ်ပေါ့"
"သူ ခွဲနေပြီ ခွဲနေပြီ"
"ဝိညာဉ်ပစ္စည်း ထွက်လာပုံရတယ်"
"မဟုတ်ဘူး ဝိညာဉ်ဆေးပင် ပဲ"
လင်းယွီသည် သူ၏ လက်ထဲမှ ကျောက်တုံးကို ဖြည်းဖြည်းချင်း ခွဲလိုက်သောအခါ နီကျင်ကျင် ရွှေရောင် သတ္တုပစ္စည်းတစ်ခု ပေါ်ထွက်လာသည်။
သို့သော် ထိုသတ္တုပစ္စည်းပေါ်တွင် ဝိညာဉ်ဆေးပင် တစ်ပင် ပေါက်နေသည်ကို လူအုပ်က မကြာခင်မှာပင် တွေ့လိုက်ရသည်။
ဝိညာဉ်ဆေးပင်၏ အမြစ်များမှာလည်း နီရွှေရောင် ဖြစ်နေပြီး သတ္တုသားထဲသို့ ထိုးဖောက် ဝင်ရောက်နေသည်။
ဆေးပင်၏ မျက်နှာပြင်ပေါ်တွင် ရွှေရောင် အစက်အပြောက်များ ဟိုတစ်ကွက် ဒီတစ်ကွက် ရှိနေသည်။
ဖန့်ချန်၏ စိတ်ထဲတွင် ဓားငယ်လေး ၏ အသံ ထွက်ပေါ်လာသည်
"ချန်လေး ဒီဆေးပင်က တကယ်ကို အရသာရှိမယ့် ပုံပဲ"
၎င်းသည် ကျောက်တုံးထဲမှ အရာမှာ မည်မျှ ထူးခြားကြောင်း သိရှိနေပုံရသည်။
လင်းယွီမှာ အနည်းငယ် စိတ်လှုပ်ရှားသွားပြီး အမြစ်များမှ အနည်များကို ဖယ်ရှားရန် အလွန်ပင် ဂရုစိုက်နေတော့သည်
"ဒါက..."
သူသည် ကျောက်တုံးကို အကုန်ခွဲပြီး အတွင်းရှိ အရာကို ထုတ်ယူရန် လက်ဖက်ရည်တစ်ခွက်သောက်ချိန်ခန့် ကြာသွားသည်။
"ဒါက ဘာဝိညာဉ်ပစ္စည်းလဲ ဘာလို့ အပေါ်မှာ ဆေးပင် ပေါက်နေရတာလဲ"
"ဝိညာဉ်စွမ်းအင်က အရမ်း ပြည့်ဝတာပဲ ဒါက သာမန်ပစ္စည်း မဟုတ်ဘူး တန်ဖိုးကတော့ မနည်းလောက်ဘူး"
"မထင်ထားဘူးပဲ ဒီကျောက်တုံးက ဝိညာဉ်အရင်းအမြစ် ရပ်ကွက်ရဲ့ ထိပ်တန်းစာရင်းထဲ ဝင်နိုင်တယ်"
ဈေးသည်များရော၊ လာရောက်လည်ပတ်သူများပါ ထိုအရာက ဘာလဲဆိုသည်ကို သိရန် အလွန် စိတ်လှုပ်ရှားနေကြသည်။
ထိပ်တန်း ကျောက်တုံးတစ်တုံး မွေးဖွားလာသည်ကို မြင်တွေ့ရခြင်းမှာ ပြောစရာ သတင်းစကားတစ်ခု ဖြစ်ပေသည်
ရှကျီ၏ မျက်နှာမှာ ပြာနှမ်းသွားသည်
"သွားပြီ..."
ဝူရုန့်ချိုကလည်း ဖန့်ချန်ကို ဒေါသတကြီး ကြည့်လိုက်သည်။
အပေါ်ထပ်မှ ကြည့်နေသော ဖန့်လင်ရှင်းနှင့်အတူ ရှိနေသည့် လူငယ်၏ မျက်နှာမှာလည်း လင်းယွီ ထုတ်ယူလိုက်သည့် အရာကို မြင်သောအခါ တည်ကြည်သွားသည်။
"ဒါက ရာစုနှစ်ရွှေ ပဲ အဝါရောင် အဆင့်မြင့်ဝိညာဉ်ပစ္စည်းပဲ တစ်ကျပ်သားကို ဝိညာဉ်ကျောက်တုံး ၁၀၀ တန်တယ် ကြည့်ရတာ ဒီတစ်ခုက အနည်းဆုံး ငါးကျပ်သားလောက် ရှိမယ် အဲ့ဒီအပေါ်မှာ ပေါက်နေတာက ရာစုနှစ်ဂျင်ဆင်းပဲ အဲ့ဒါက အသက်ကို ၃ နှစ်ကနေ ၅ နှစ်အထိ ပိုရှည်စေနိုင်တယ် ဒါကို ပြန်ရောင်းရင် ဝိညာဉ်ကျောက်တုံး ၈၀၀၊ ၉၀၀ လောက် ရဖို့က အေးဆေးပဲ"
ဖန့်လင်ရှင်း ရုတ်တရက် မတ်တပ်ထရပ်လိုက်သည်
"ဒါဆို ဒီကျောက်တုံးရဲ့ တန်ဖိုးက"
"ဟုတ်တယ် အဆင့်နိမ့် ဝိညာဉ်ကျောက်တုံး ၁၅၀၀ လောက် ရှိတယ်။ မင်းတော့ သူဌေးဖြစ်ပြီ"
ထိုလူငယ်က ခံစားချက်အပြည့်ဖြင့် သက်ပြင်းချသည်
"ဝိညာဉ်ကျောက်တုံး ၅၀ ကနေ ၁၅၀၀ အထိ ဒီလောက် အံ့ဩစရာကောင်းတဲ့ ရလဒ်မျိုး ငါ မတွေ့ရတာ နှစ်အတော်ကြာပြီ"
ဖန့်လင်ရှင်း၏ မျက်နှာမှာ စိတ်လှုပ်ရှားမှုကြောင့် ဝင်းပနေသည်။
သူမသည် လောင်းကြေးကိုပင် ဂရုမစိုက်တော့ဘဲ အမြတ်အစွန်းကြီးကြီးမားမား ရလိုက်ခြင်းကိုသာ အာရုံရောက်နေသည်။
အခြားတစ်ဖက်တွင် ဖန့်ယွင်က အံ့ဩတကြီးဖြင့် ဖန့်ကျွယ်ကို မေးသည်
"အစ်ကိုကြီး အဲ့ဒါ ဘာလဲ"
"ငါလည်း အတိအကျ မသိပေမဲ့ တန်ဖိုးကတော့ မနည်းဘူး ဖန့်ချန်တော့ ရှုံးပြီ"
ဟု ဖန့်ကျွယ်က တည်ငြိမ်စွာ ဆိုသည်။
"ရှုံးတာကတော့ ထိုက်တန်ပါတယ်"
ဖန့်ဟောင်နှင့် ကျန်တဲ့သူများက တစ်ဖက်သား ဒုက္ခရောက်သည်ကို ဝမ်းသာနေကြသည်။
သူတို့၏ မျက်လုံးများမှာ ရာစုနှစ်ရွှေ နှင့် ရာစုနှစ်ဂျင်ဆင်း ဆီသို့ မနာလိုစိတ်ဖြင့် ရောက်ရှိနေကြသည်။
လင်းယွီက လူအုပ်ဘက်သို့ လှည့်ကြည့်ကာ
"စီနီယာတို့ထဲက ဘယ်သူများ ဒါက ဘာလဲဆိုတာ သိပါသလဲ"
ဟု မေးလိုက်သည်။
အဘိုးအိုတစ်ဦး လူအုပ်ထဲမှ ဖြည်းဖြည်းချင်း ထွက်လာသည်
"ငါ မမှားဘူးဆိုရင် ဒါက ရာစုနှစ်ရွှေ ပဲ အဝါရောင်အဆင့်မြင့် ဝိညာဉ်ပစ္စည်း ဖြစ်ပြီး တစ်ကျပ်သားကို ဝိညာဉ်ကျောက်တုံး ၁၀၀ တန်တယ် အပေါ်က ဂျင်ဆင်းကတော့ အသက်ရှည်စေတဲ့ ရာစုနှစ်ဂျင်ဆင်းပဲ ယဒါကို ဝိညာဉ်ကျောက်တုံး ၇၀၀၊ ၈၀၀ လောက်နဲ့ ရောင်းရင် အေးဆေးပဲ"
အဘိုးအိုက လင်းယွီကို ပြုံးကြည့်ရင်း
"လူငယ်လေ ဒါကို ငါ့ကို ဝိညာဉ်ကျောက်တုံး ၁၃၀၀ နဲ့ ရောင်းမလား"
ဟု ကမ်းလှမ်းလိုက်သည်။
"ဝိညာဉ်ကျောက်တုံး ၁၃၀၀ တောင်လား"
"ဝိုး"
အားလုံးမှာ မှင်တက်သွားကြသည်။
လင်းယွီ ဖွင့်လိုက်သော ကျောက်တုံးက ထိုမျှ တန်ဖိုးရှိလိမ့်မည်ဟု မည်သူမျှ မထင်ထားခဲ့ကြပေ။
"ဒါ ကြည်လင်သောလေ ဆိုင် က မန်နေဂျာ ယွီ ပဲသူ့မျက်စိက စူးရှတယ် သူပြောရင် မမှားနိုင်ဘူး"
လူအုပ်မှာ မနာလိုစိတ်ရော၊ အားကျစိတ်ပါ ဖြစ်နေကြသည်။ လင်းယွီ စိတ်ထဲတွင် သက်ပြင်းချလိုက်သည်။
ထိုကျောက်တုံးက သူပိုင်သည်မဟုတ်ဘဲ သူက တစ်ခြားတစ်ယောက်အတွက် လုပ်ပေးနေခြင်းသာ ဖြစ်ကြောင်း သူကောင်းကောင်း သိသည်။
ဝိညာဉ်ကျောက်တုံး ၁၃၀၀ယသူ တကယ်ကို လိုချင်မိပါသည်
"အဘိုး ဒါကို အခုလောလောဆယ် မရောင်းသေးပါဘူး"
လင်းယွီက မန်နေဂျာ ယွီ၏ ကမ်းလှမ်းချက်ကို ငြင်းပယ်လိုက်ပြီး ဖန့်ချန်ဘက် လှည့်လိုက်သည်။
"အခုတော့ လောင်းကြေးကို အကောင်အထည်ဖော်ရမယ့် အချိန်ရောက်ပြီ ရှကျီရဲ့ ခြေထောက်တွေကို မင်းကိုယ်တိုင် ချိုးမှာလား ဒါမှမဟုတ် ငါကပဲ ကူညီပေးရမလား"
ဟု လင်းယွီက မေးလိုက်သည်။
ရှကျီက နှာခေါင်းရှုံ့ကာ
"ငါ့ဘာသာပဲ လုပ်မယ်"
ဟု ဆိုသည်။
သို့သော် ဖန့်ချန်က လက်ကာပြလိုက်သည်
"ငါ့ကျောက်တုံးကိုတောင် မခွဲရသေးဘူး ဘာလို့ အရှုံးပေးနေတာလဲ"
ရှကျီ ၏ မျက်နှာမှာ စိတ်ပျက်အားငယ်မှုများဖြင့် ပြည့်နှက်နေသည်
"ဖန့်ချန် မင်းရဲ့ ကျောက်တုံးက ဒါက"
သူသည် ထိုတစ်ကြိမ်တွင်တော့ အကြီးအကျယ် အလိမ်ခံလိုက်ရပြီဟု ထင်နေသည်။
လင်းယွီက တဟားဟား ရယ်မောလိုက်သည်
"မင်း ဒီကျောက်တုံးကို ဝိညာဉ်ကျောက်တုံး တစ်တုံးတည်းနဲ့ ဝယ်ခဲ့တာလို့ တစ်ယောက်ယောက် ပြောတာ ငါကြားလိုက်တယ် အဲ့ဒါနဲ့ ငါ့ကို ယှဉ်မလို့လား အဲ့ဒီထဲက ကျောက်တုံး ၁၃၀၀ တန်ဖိုးရှိတဲ့ အရာ ထွက်လာမှာမို့လို့လား"
"ခွဲမကြည့်မချင်းတော့ သိနိုင်မှာ မဟုတ်ဘူး"
ဟု ဖန့်ချန်က ခပ်ဖျော့ဖျော့ ပြုံးလျက် ဆိုသည်။
လင်းယွီက ခေါင်းငြိမ့်ပြကာ
"ဒါဆိုလည်း ခွဲလိုက်လေ ရှကျီရဲ့ ခြေထောက်တွေကို ခဏနေမှ ချိုးလည်း ဘာမှမဖြစ်ပါဘူး"
ဖန့်ချန်သည် သူ၏ ဓားငယ်လေး ကို ထုတ်ကာ ကျောက်တုံးကို စတင်ခွဲတော့သည်။
ဖန့်ချန်၏ အပြုအမူကို မြင်ရသော လူအုပ်မှာ ခေါင်းခါယမ်းနေကြသည်။
ဖန့်ယွင်က မျက်မှောင်ကြုတ်လျက်
"အစ်ကိုကြီး ဒါကို လူတွေ သိသွားရင် ဖန့်ချန်က ငါတို့ မိသားစုကို သိက္ခာချနေသလို ဖြစ်လိမ့်မယ်"
ဟု ဆိုသည်။
ဖန့်ကျွယ် သက်ပြင်းချလိုက်သည်
"ဘာပဲဖြစ်ဖြစ် ငါတို့ မိသားစု သုံးစုက စည်းလုံးရမယ်"
သူသည် လူအုပ်ကြားမှ တိုးထွက်လာပြီး ဖန့်ချန် ကျောက်တုံးခွဲနေသည်ကို လက်ကာပြကာ တားလိုက်သည်။
ဖန့်ကျွယ်သည် လင်းယွီကို ကြည့်ကာ လေးနက်သော အသံဖြင့် ပြောလိုက်သည်
"ဒီလောင်းကြေးက အတည်မဖြစ်ဘူး ဒါ ဖန့်ချန် ကျောက်တုံးလောင်းကစားတာ ပထမဆုံးအကြိမ်ပဲ မင်း တကယ် လောင်းချင်တယ်ဆိုရင် ငါနဲ့ လာလောင်း"
အခန်း ၃၃၄ - ဒါနဲ့ ကံမပါဘူး စီနီယာ
ဖန့်ချန် အံ့အားသင့်သွားသည်။
ဖန့်ကျွယ် က ဝင်ရောက်စွက်ဖက်လိမ့်မည်ဟု သူ မမျှော်လင့်ထားခဲ့ပေ။
ကြည့်ရတာ ဖန့်အောက် ရဲ့ တပည့်ကြီးက လူကောင်းတစ်ယောက်ပဲ
ဖန့်ယွင်နှင့် ကျန်သည့်သူများမှာမူ ဦးစွာ မှင်တက်သွားပြီးနောက် အလွန် စိုးရိမ်ပူပန်သွားကြသည်။
ဖန့်ကျွယ်က ထိုကဲ့သို့ ရုတ်တရက် ဝင်ပါလိမ့်မည်ဟု သူတို့ မထင်ထားခဲ့ကြပါ။
အကယ်၍ ထိုကိစ္စကြောင့် ကျွယ်ဝူတီ ကို စော်ကားမိသွားပါက ၎င်းမှာ သူတို့အတွက် ပြဿနာအိုးကြီးကို ဖွင့်လိုက်သလို ဖြစ်ပေလိမ့်မည်။
"ဒါ ဖန့်မိသားစုရဲ့ တတိယမြောက် မျိုးနွယ်စုက ဖန့်ကျွယ် မဟုတ်လား"
"ဒါဆို လောင်းနေတဲ့သူတွေထဲက တစ်ယောက်က ဖန့်မိသားစုဝင်ပေါ့"
လူအုပ်ကြားတွင် တီးတိုးစကားသံများ ပျံ့နှံ့သွားသည်။
ဖန့်ကျွယ်သည် ဝိညာဉ်အရင်းအမြစ် ရပ်ကွက်တွင် အတော်အတန် နာမည်ကျော်ကြားသူဖြစ်သည်အနည်းဆုံးတော့ ချီသန့်စင်ခြင်းအဆင့် ကျင့်ကြံသူများကြားတွင် သူက လူသိများသည်။
လင်းယွီ ၏ မျက်နှာမှာ အနည်းငယ် ပျက်သွားသော်လည်း အတင်းပြုံးလိုက်ကာ
"အစ်ကိုကြီး ဖန့်ကျွယ် ပါလား"
ဟု နှုတ်ဆက်လိုက်သည်။
"စကားအပိုတွေ ပြောမနေနဲ့တော့ မင်းနဲ့ လောင်းကြေးထပ်မယ့်သူက ငါပဲ ဒါပေမဲ့ မင်း တခြား ဝိညာဉ်အရင်းအမြစ်ကျောက်တုံး တစ်ခု ထပ်ရှာရမယ်"
ဟု ဖန့်ကျွယ်က တည်ငြိမ်စွာ ပြောလိုက်သည်။
လင်းယွီနှင့် ကျန်သည့်သူများ၏ မျက်နှာမှာ ဇဝေဇဝါ ဖြစ်သွားကြသည်။
လောင်းကြေးကို အသစ်ပြန်လုပ်မယ် ဟုတ်လားအဓိပ္ပာယ် မရှိတာ
"အစ်ကိုကြီး ဖန့်ကျွယ် ဒါက ကျွန်တော်နဲ့ သူနဲ့ လောင်းထားတဲ့ ပွဲပါ အသစ်ပြန်လုပ်ဖို့ မလိုပါဘူးနောက်ထပ် ပွဲအသစ်တစ်ခု စမယ်ဆိုရင်တောင် အခုပွဲကို အရင်ဆုံး အဆုံးသတ်ရမယ်လေ"
ဟု လင်းယွီက တွေးဆဆဖြင့် ပြောသည်။
ဖန့်ကျွယ်က နှာခေါင်းရှုံ့ကာ
"အတည်မဖြစ်ဘူးလို့ ငါပြောရင် မဖြစ်ဘူးပဲ ဘာလို့ လူသစ်တစ်ယောက်ကို အနိုင်ကျင့်နေတာလဲ ဖန့်ချန်က အခုမှ ရောက်တာ သူ ဘာမှ နားမလည်သေးဘူး ဒါက အစကတည်းက မမျှတတဲ့ လောင်းကစားပွဲပဲ"
ဖန့်မိသားစုဝင်တစ်ဦး၏ အာဏာစက်မှာ ဤနေရာတွင် အထင်အရှား ပေါ်ထွက်နေသည်။
သူသည် လင်းယွီနှင့် ကျန်သည့်သူများ၏ ထင်မြင်ချက်ကို ဂရုပင်မစိုက်ပေ။
လင်းယွီနှင့် အဖွဲ့သားများမှာ တွန့်ဆုတ်နေကြသည်။ ဖန့်မိသားစု တတိယမျိုးနွယ်စု၏ တပည့်ကြီးကို အံတုရန် သူတို့တွင် သတ္တိမရှိပေ။
သို့သော် အခုမှ နောက်ဆုတ်လိုက်လျှင်လည်း ဖန့်လင်ရှင်း ဘက်ကို မျက်နှာပြရန် ခက်ပေလိမ့်မည်။
လင်းယွီသည် အနီးနားရှိ နေရာတစ်ခုသို့ အကြည့်လွှဲလိုက်ရာ ထိုနေရာတွင် ဖန့်လင်ရှင်းနှင့် လူငယ်တစ်ဦးက အခြေအနေကို စောင့်ကြည့်နေသည်ကို တွေ့လိုက်ရသည်။
ဖန့်လင်ရှင်းက သူ့ကို ခေါင်းငြိမ့်ပြသည်ကို လင်းယွီ မြင်လိုက်ရသည်။
ထိုအချက်ပြမှုကို မြင်လိုက်ရသောအခါ လင်းယွီသည် ရုတ်တရက် သတ္တိများ ပြန်လည်ရှိလာသည်။
ဖန့်ကျွယ်ကို ရင်ဆိုင်ရင်း လင်းယွီက အလျှော့မပေးဘဲ
"အစ်ကိုကြီး ဖန့်ကျွယ် ဒီမှာ ရှိနေတဲ့သူ အားလုံးက ကျွန်တော်နဲ့ ဖန့်ချန်ရဲ့ လောင်းကြေးကို သက်သေတွေ့ခဲ့ကြတာပါ အနီးနားက မဟာချန်း ကင်းလှည့်စစ်သည်တောင် အစကတည်းက ရှိနေခဲ့တာ "
"ဖန့်မိသားစုဝင်တွေက လောင်းကြေးရှုံးမှာကြောက်လို့ နောက်ဆုတ်မှာ မဟုတ်ဘူး မဟုတ်လား ခင်ဗျား နောက်ဆုတ်တယ်ဆိုတဲ့ သတင်းသာ ပျံ့သွားရင် ခင်ဗျားအတွက် သိက္ခာကျစရာ ဖြစ်နေလိမ့်မယ်"
ဟု ပြောလိုက်သည်။
ဖန့်ကျွယ် မျက်မှောင်ကြုတ်သွားသည်။
လင်းယွီက သူ့ကို ထိုကဲ့သို့ ပြောရဲသည့် သတ္တိ ဘယ်ကရလာသနည်းဟု သူ နားမလည်နိုင် ဖြစ်နေသည်။ ကျွယ်ဝူတီကြောင့်ပဲလား
အခြားတစ်ဖက်တွင် လူငယ်ဖြစ်သူက ဖန့်လင်ရှင်းကို ပြုံးကြည့်ကာ
"အဲ့ဒါ ဖန့်ကျွယ်လား သူက မင်းကို သိပ်ပြီး အရေးစိုက်ပုံ မရဘူးနော်"
ဟု ဆိုသည်။
"ဖန့်ကျွယ်ရဲ့ ဆရာ ဖန့်အောက်က တတိယမျိုးနွယ်စုကို အုပ်ချုပ်တာ ပြီးတော့ သူက ဆရာကြီး ချန်ယွမ် နဲ့လည်း သူငယ်ချင်းတွေလေ"
ဖန့်လင်ရှင်းက တည်ငြိမ်စွာ ပြန်ပြောသည်
"ဖန့်ကျွယ်က ကူညီချင်ရင်တောင် သူ လုပ်နိုင်တာ သိပ်မရှိပါဘူး"
ဖန့်လင်ရှင်း၏ စကားမှာ မကြာခင်မှာပင် အတည်ဖြစ်သွားသည်။
ဖန့်ကျွယ်သည် အတော်ကြာအောင် တိတ်ဆိတ်သွားပြီးနောက် ဖန့်ချန်ဘက်သို့ လှည့်ကာ အားကိုးရာမဲ့သည့် အမူအရာဖြင့်
"မင်းက လူသစ်ပဲ ရှိသေးတာ ဘာလို့ လူတွေနဲ့ လောင်းနေရတာလဲ မင်း အရမ်း ပေါ့ဆသွားတယ်"
ဟု ဆိုလိုက်သည်။
ဖန့်ချန်က ပြုံးလျက်
"ကျွန်တော် ဒီဝိညာဉ်အရင်းအမြစ်ကျောက်တုံးကို သဘောကျတယ် ကျွန်တော် ရှုံးချင်မှ ရှုံးမှာပါ"
ဖန့်ဟောင်က စိတ်မထိန်းနိုင်ဘဲ ဆဲဆိုတော့သည်
"မင်းလို မျက်စိမမြင်တဲ့သူက ဝိညာဉ်အရင်းအမြစ်ကျောက်တုံးကို ဘယ်လိုများ အကဲခတ်မှာလဲ ကျောက်တုံးကို ခေါက်တဲ့အသံနဲ့ ရွေးနေတာလား ဘာလား အကယ်၍ မင်းသာ တကယ် ကျွမ်းကျင်တယ်ဆိုရင် ငါ ဖန့်ဟောင်က နောက်နောင် တတိယမျိုးနွယ်စုထဲမှာ မင်းကိုတွေ့ရင် လမ်းဖယ်ပေးမယ်ကွာ"
"အားလုံးပဲ ခင်ဗျားတို့ရဲ့ ပုဂ္ဂိုလ်ရေး အာဃာတတွေက ကျွန်တော်တို့ရဲ့ လောင်းကြေးကို မထိခိုက်ပါစေနဲ့"
လင်းယွီက ပြုံးလျက် ဖန့်ချန်ကို တိုက်တွန်းသည်
"မင်းရဲ့ ဝိညာဉ်အရင်းအမြစ်ကို မြန်မြန်ခွဲစမ်းပါ ဒါမှ မြန်မြန် ပြီးသွားမှာ"
ဖန့်ချန်သည် သူ၏ ဓားငယ်လေး ဖြင့် ဝိညာဉ်အရင်းအမြစ်ကျောက်တုံး၏ မျက်နှာပြင်ကို အသာအယာ ခြစ်လိုက်ရာ မာကျောသော အပေါ်ယံသားမှာ ချက်ချင်း ကွာကျသွားသည်။
ရုတ်တရက် အလယ်လတ်စား ဝိညာဉ်ကျောက်တုံး၏ ထောင့်စွန်းတစ်ခုမှာ လေထုထဲတွင် ပေါ်ထွက်လာတော့သည်။
ဝိညာဉ်စွမ်းအင် လှိုင်းလုံးကြီးတစ်ခုမှာ ဟုန်းခနဲ ပွင့်ထွက်လာသည်
ဖန့်ကျွယ်မှာ မှင်တက်သွားသည်
"ဟင် အထဲမှာ တစ်ခုခု တကယ် ရှိနေတာလား"
ဖန့်ဟောင်နှင့် အဖွဲ့သားများမှာလည်း အံ့ဩသွားသလို သံသယလည်း ဖြစ်နေကြသည်။ ာ
ထိုကဲ့သို့သော အမှိုက်ကျောက်တုံးထဲတွင် တကယ်ပဲ ကောင်းတဲ့အရာ ရှိနိုင်လို့လား
ထွက်ပေါ်လာသည့် ဝိညာဉ်စွမ်းအင်၏ ပြည့်ဝမှုကို ကြည့်ရုံနှင့် ထိုအရာမှာ သာမန်မဟုတ်ကြောင်း သိသာလှသည်
ရှကျီ ၏ စိတ်ဓာတ်မှာ ချက်ချင်း တက်ကြွလာပြီး ဝူရုန့် ချို အား အသံလွှင့်ကာ
"ငါ သိသားပဲ အစ်ကိုကြီးဖန့်က ငါ့ကို ဒုက္ခမပေးဘူးဆိုတာ အစ်မကြီး ငါတို့ အဆင်ပြေသွားပြီ"
ဟု ပြောလိုက်သည်။
ရှကျီ၏ အသက်ကို လောင်းကြေးထပ်ခဲ့သဖြင့် ဖန့်ချန်အပေါ် မကျေမနပ် ဖြစ်နေသော ဝူရုန့်ချိုမှာလည်း ယခုအခါ သံသယများဖြင့် ပြည့်နှက်သွားတော့သည်။
"မဖြစ်နိုင်တာ ဝိညာဉ်စွမ်းအင်က ဒီလောက်တောင် ပြည့်ဝနေတာလား ကံကောင်းခြင်းဆိုင် မှာ နှစ်ပေါင်းများစွာ မရောင်းရဘဲ တင်ထားတဲ့ ကျောက်တုံးထဲမှာ တကယ်ပဲ တန်ဖိုးရှိတာ ပါနေတာလား"
"မဖြစ်နိုင်ဘူး ကြည့်ရတာ သိသိသာသာ အမှိုက်ပဲကို ဘယ်လိုလုပ် ကောင်းတာ ပါနေမှာလဲ"
အားလုံးက တစ်ဦးကိုတစ်ဦး အံ့ဩတကြီး ကြည့်လိုက်ကြသည်။
လင်းယွီမှာ အနည်းငယ် အံ့ဩသွားသော်လည်း ချက်ချင်းပင် စိတ်အေးသွားသည်။
အထဲမှာ တစ်ခုခု ပါနေရင်တောင် ရာစုနှစ်ရွှေ နှင့် ရာစုနှစ်ဂျင်ဆင်း ထက်တော့ ပိုတန်ဖိုးရှိနိုင်စရာ မရှိပေ။
အဝေးမှနေ၍ ကြည့်နေသော လူငယ်၏ မျက်နှာမှာ အနည်းငယ် ပြောင်းလဲသွားသည်
"ဒီနေ့ ပွဲက ငါ ထင်ထားတာထက် ပိုစိတ်ဝင်စားဖို့ ကောင်းနေပြီပဲ"
ဖန့်လင်ရှင်း ခေါင်းငြိမ့်ပြသည်
"ဟုတ်တယ် ကျောက်တုံးလောင်းကစားပွဲ အတော်များများက နှစ်ဖက်စလုံးမှာ ဘာမှမပါဘဲ သရေနဲ့ ပြီးသွားတတ်တာ ဒီနေ့ ကျောက်တုံး နှစ်ခုလုံးကနေ တစ်ခုခု ထွက်လာလိမ့်မယ်လို့ မထင်ထားဘူး"
"ဒါပေမဲ့ ဘာမှ မဖြစ်ပါဘူး"
လူငယ်က ခပ်ဖျော့ဖျော့ ပြုံးလျက်
"မင်းရဲ့ ကျောက်တုံးက ပိုပြီး သိသိသာသာ တန်ဖိုးရှိတာပဲ"
ဝိညာဉ်အရင်းအမြစ် ရပ်ကွက် ပေါ်ပေါက်လာသည်မှာ နှစ်ပေါင်း ရာနှင့်ချီ ရှိနေပြီဖြစ်သော်လည်း ဝိညာဉ်အရင်းအမြစ်ကျောက်တုံး တစ်လုံး၏ တန်ဖိုးမှာ ဝိညာဉ်ကျောက်တုံး တစ်သောင်းထက် တစ်ခါမှ မကျော်ဖူးသေးပေ။
ထိုစံချိန်မှာ နှစ်ပေါင်းများစွာ ကျန်ရှိနေဆဲဖြစ်သည်။
ဝိညာဉ်ကျောက်တုံး ထောင်နှင့်ချီ တန်ဖိုးရှိသော ကျောက်တုံးများ ရှိသော်လည်း ၎င်းတို့မှာ အလွန်ပင် ရှားပါးလှသည်။
"ဟင်"
ကြည်လင်သောလေ ဆိုင်မှ ဆိုင်ရှင် မန်နေဂျာ ယွီက တိုးတိုးလေး ရေရွတ်လိုက်သည်။
သူသည် ဖန့်ချန်ထံသို့ အလျင်အမြန် လျှောက်လာကာ ဖန့်ချန် လက်ထဲမှ ကျောက်တုံးကို သေသေချာချာ စစ်ဆေးပြီးနောက်
"လူငယ်လေး ဒါကို အကုန်ခွဲမနေနဲ့တော့ ငါ မင်းဆီကနေ ဝိညာဉ်ကျောက်တုံး ငါးရာနဲ့ ဝယ်ရင် ဘယ်လိုလဲ"
ဟု ဆိုလိုက်သည်။
အားလုံးမှာ မှင်တက်သွားကြသည်။
"ငါးရာတောင်လား"
ဖန့်ကျွယ်သည် ဖန့်ချန် လက်ထဲမှ ကျောက်တုံးကို မျက်တောင်မခတ် စိုက်ကြည့်နေပြီး သူ၏ မျက်နှာမှာလည်း အမျိုးမျိုး ပြောင်းလဲနေသည်။
ဖန့်ယွင်နှင့် ကျန်သည့်သူများမှာ ခဏမျှ တိတ်ဆိတ်သွားပြီးနောက်
"ဒီကောင် ကံကောင်းလှချည်လား"
ဟု မဝံ့မရဲ ရေရွတ်လိုက်ကြသည်။
ဖန့်ကျွယ်သည် ဝိညာဉ်အရင်းအမြစ်ကျောက်တုံးများနှင့် ကစားလာသည်မှာ နှစ်အတော်ကြာပြီ ဖြစ်သော်လည်း အဆင့်နိမ့် ဝိညာဉ်ကျောက်တုံး နှစ်ရာထက် ပိုတန်ဖိုးရှိသည့်အရာကို တစ်ခါမှ မရဖူးသေးပေ။
ဖန့်ချန်မှာမူ ပထမဆုံးအကြိမ်မှာပင် ဝိညာဉ်ကျောက်တုံး တစ်တုံးတည်းနှင့် ငါးရာတန်ဖိုးရှိသော အရာကို ရလိုက်ခြင်းဖြစ်သည်။
ဤသည်မှာ တကယ်ကို မယုံနိုင်စရာ ကံကောင်းမှုပင်
လင်းယွီက ပြုံးလိုက်သည်။
"ဖန့်ချန် ရှုံးပြီ ငါးရာ ဆိုတာ ငါ့ကျောက်တုံးရဲ့ တန်ဖိုးနဲ့ ယှဉ်ရင် အဝေးကြီးပဲ"
လင်းယွီက ရယ်မောလျက်
"မင်းမှာ နည်းနည်းတော့ အရည်အချင်း ရှိသားပဲလို့ ငါ မထင်ထားဘူး ဒါပေမဲ့ နှမြောစရာပဲ မင်းကတော့ ရှုံးဦးမှာပဲ"
ဟု ဆိုလိုက်သည်။
ထိုသို့ပြောနေစဉ်မှာပင် လင်းယွီသည် မနာလိုစိတ် ဖြစ်မိသည်။
ဖန့်ချန်၏ ကျောက်တုံးက ဖန့်ချန်ကိုယ်တိုင်ပိုင်သည်ဖြစ်သော်လည်း သူခွဲလိုက်သော ကျောက်တုံးမှာမူ သူကိုယ်တိုင် ပိုင်သည်မဟုတ်သောကြောင့် ဖြစ်သည်။
"ငါ အကုန်မခွဲရသေးဘူးလေ မင်းက ဘာလို့ ဒီလောက် အလျင်လိုနေတာလဲ"
ဖန့်ချန် ပြုံးလိုက်ပြီး မန်နေဂျာ ယွီဘက် လှည့်ကာ
"စီနီယာ ဒါ ဘာလဲဆိုတာ ခင်ဗျား သိလား"
ဟု မေးလိုက်သည်။
"ငါ ငါ မသိဘူး"
ဆိုင်ရှင်က ခေါင်းခါပြသည်
"ဒါပေမဲ့ ဝိညာဉ်စွမ်းအင်တွေ အရမ်း ပြည့်ဝနေတာကြောင့် တန်ဖိုးရှိလိမ့်မယ်လို့ ငါ ခံစားရတယ် လူငယ်လေး ဒါကို ငါ့ကို ရောင်းမလား"
"အဆင့်နိမ့် ဝိညာဉ်ကျောက်တုံး ငါးရာဆိုတာ အဝေးကြီး လိုပါသေးတယ် စီနီယာသာ မသိရင်တော့ သိတဲ့လူတစ်ယောက်ယောက်က ဒါကို လာဝယ်လိမ့်မယ်လို့ ကျွန်တော် ထင်တယ်"
ဖန့်ချန် ပြုံးလျက် ဆိုသည်
"ကြည့်ရတာ ဒီ အလယ်လတ်စား ဝိညာဉ်ကျောက်တုံး က စီနီယာနဲ့ ကံမပါဘူး ထင်တယ်"
အားလုံးမှာ ချက်ချင်းပင် တုန်လှုပ်သွားကြသည်။
"ဘာ အလတ်စား ဝိညာဉ်ကျောက်တုံး ဟုတ်လား"
အဝေးမှ ဖန့်လင်ရှင်းနှင့် လူငယ်မှာလည်း ရုတ်တရက် မတ်တပ်ထရပ်လိုက်ကြပြီး အံ့အားသင့်စွာဖြင့် တစ်ဦးကိုတစ်ဦး ကြည့်လိုက်ကြသည်။
နှစ်ဦးစလုံး၏ မျက်လုံးများထဲတွင် အံ့ဩတုန်လှုပ်မှုများကို မြင်တွေ့နေရသည်။
အလယ်လတ်စား ဝိညာဉ်ကျောက်တုံး သူတို့ တစ်သက်လုံးတွင် အလယ်လတ်စား ဝိညာဉ်ကျောက်တုံးကို တစ်ခါမှ မမြင်ဖူးကြပေ။
မဟာချန်းအင်ပါယာရှိ ရွှေအမြုတေအဆင့် ကျင့်ကြံသူများသာလျှင် ထိုကဲ့သို့သော ရတနာကို မြင်တွေ့ခွင့် ရနိုင်ပေလိမ့်မည်
ဆိုင်ရှင်၏ မျက်နှာမှာ တောင့်တင်းသွားသည်။
သူက အလယ််လတ်စား ဝိညာဉ်ကျောက်တုံးဆိုတာကို ဘယ်လိုလုပ် သိနေတာလဲ
သူသည်လည်း ၎င်းမှာ ဘာလဲဆိုသည်ကို သိရှိပြီးသားဖြစ်သော်လည်း ဖန့်ချန်ကို အခွင့်ကောင်းယူကာ ဈေးနည်းနည်းဖြင့် ဝယ်ရန် ကြိုးစားခဲ့ခြင်းဖြစ်သည်။
သို့သော် ယခုအခါတွင်မူ သူ၏ အခွင့်အရေးမှာ လက်လွှတ်သွားခဲ့ရပြီ ဖြစ်သည်